གསུམ་པ་སྐུ་བལྟམས་པའི་མཛད་པ།
༈ གསུམ་པ་སྐུ་བལྟམས་པའི་མཛད་པ་ནི། དེ་ལྟར་ཟླ་བ་བཅུ་ཚང་བར་བཞུགས་ནས་བལྟམས་ཚུལ་ནི་ལྕགས་སྤྲེལ་ས་གའི་ཚེས་བདུན་རྒྱུ་སྐར་རྒྱལ་ལ་བབས་པའི་ཉིན་ལུམྦིའི་ཚལ་དུ་ལྷ་རྣམས་ཀྱིས་ཡུམ་སྤྱན་དྲངས་ཏེ་འཁོར་ཚོགས་རྣམས་ཀྱིས་རོལ་མོའི་སྒྲ་ཁྲོལ་ཞིང་། ལྷ་རྣམས་ཀྱིས་མེ་ཏོག་འཐོར། འཇིག་རྟེན་སྐྱོང་བ་བཞིས་ཤིང་རྟ་འདྲེན། བརྒྱ་བྱིན་གྱིས་ལམ་གྱི་བྱི་དོར་བྱེད། ཚངས་པས་ལམ་སེལ། ལྷ་བརྒྱ་སྟོང་དག་ཕྱག་འཚལ་བ་དང་བཅས་ཡོན་ཏན་དུ་མས་བརྒྱན་པའི་ལུམྦིའི་ཚལ་དུ་ལྷས་བཤམས་པའི་ཁྲི་ལ་ཡུམ་འཁོད་མ་ཐག་ཡུམ་གྱི་བ་སྤུའི་སྒོ་ནས་བྱུང་བའི་འོད་ཀྱི་སྣང་བས་སྟོང་གསུམ་གྱི་འོད་ཇི་སྙེད་ཡོད་པ་ཟིལ་གྱིས་མནན། ངན་སོང་གི་དུཿཁ་ཞི། ཚལ་དེའི་ལྗོན་ཤིང་ཡལ་ག་གཡུར་ཟ་བ་དག་གིས་མངོན་པར་བཏུད་དེ་ཕྱག་བྱས་སོ། །དེ་ནས་བདེ་བར་བཙའ་བའི་ཕྱིར་ཡུམ་ཕྱག་གཡས་པ་བརྐྱངས་ཏེ་ཤིང་བླག་ཤའི་ཡལ་ག་བཟུང་ནས་ནམ་མཁའི་དཀྱིལ་དུ་བལྟ་ཞིང་། བརྒྱ་བྱིན་མ་མ་རྒན་མོའི་ཚུལ་གྱི་ཆ་བྱད་ཀྱིས་མདུན་དུ་འདུག་གོ། དེའི་ཚེ་ཡུམ་གྱི་རྩིབས་ལོགས་གཡས་པ་ནས་བདུད་དཔའ་བཀོང་བ་དང་རེག་ན་བདེ་བའི་འོད་གསེར་མདོག་སྟོང་གསུམ་དུ་སྣང་བ་འགྱེད་བཞིན་པར་ནམ་གྱི་གུང་ཐུན་དེར་ན་བཟའ་དང་བཅས་བལྟམས་སོ། །དེའི་ཚེ་ས་གཡོས། མེ་ཏོག་གི་ཆར་བབས། ཤིང་ཐམས་ཅད་ཀྱི་མེ་ཏོག་རྒྱས་ཤིང་འབྲས་བུ་ཆགས། ངན་སོང་གསུམ་རྒྱུན་ཆད། གྲོང་ཁྱེར་བཞིའི་རྒྱལ་པོར་བུ་རེ་བཙས་ཏེ། མཉན་ཡོད་དུ་རྒྱལ་པོ་རྩིབས་ཀྱི་རིང་འཕུར་ཚངས་བྱིན་གྱི་བུ་བཙས་པ་ན། ཡུལ་པྲ་ཕབ་པ་བཞིན་གསལ་བས་མིང་གསལ་རྒྱལ་དང་། རྒྱལ་པོའི་ཁབ་ཏུ་པདྨ་ཆེན་པོའི་བུ་བཙས་པས་ན་ཉི་མའི་གཟུགས་ཤར་བ་ལྟར་སྣང་ཞིང་གཟུགས་ཅན་མའི་བུ་ཡིན་པས་གཟུགས་ཅན་སྙིང་པོ་དང་། ཀཽ་ཤམྦྷིར་དམག་བརྒྱ་པའི་བུ་བཙས་པ་ན་འཇིག་རྟེན་ཉི་མ་ཤར་བ་ལྟར་གྱུར་པས་ཤར་པ་ཞེས་པའི་མིང་བཏགས། འཕགས་རྒྱལ་དུ་མུ་ཁྱུད་མཐའ་ཡས་ཀྱི་བུ་བཙས་པ་ན། འཇིག་རྟེན་སྒྲོན་མེས་སྣང་བ་ལྟར་གྱུར་པ་རབ་སྣང་ཞེས་མིང་བཏགས་ཤིང་རང་རང་གི་བུའི་ཡོན་ཏན་དུ་
རློམ་མོ། །གཞན་ཡང་བཟང་ལྡན་དགའ་བོ་སོགས་ལྔ་བརྒྱ་དང་། ཤཱཀྱ་གཞན་འབུམ་ཕྲག་དང་། འདུན་པ་སོགས་འབངས་བརྒྱད་བརྒྱ། གྲགས་འཛིན་མ་སོགས་ཤཱཀྱའི་བུ་མོ་ཁྲི། འདུན་མ་སོགས་བྲན་མོ་བརྒྱད་བརྒྱ། རྒྱལ་རིགས་དང་བྲམ་ཟེ་ཁྱིམ་བདག་གི་བུ་མོ་ཉི་ཁྲི། ཆིབས་བསྔགས་ལྡན་སོགས་རྟེའུ་ཕོ་མོ་ཉི་ཁྲི། གླང་པོ་ཆེ་མཆོག་ཁྲི། བ་གླང་དྲུག་སྟོང་རྣམས་བཙས་ཤིང་། ཟས་
གཙང 
་གི་མདུན་ན་འདོན་འཆར་པོའི་བུ་འཆར་ཀ་ཡང་བཙས་སོ། །འཛམ་གླིང་དབུས་སུ་ཨ་ཤྭཏྠའི་སྡོང་པོ་དང་། མ་དྲོས་འགྲམ་དུ་ཨུ་དུམ་ཝཱ་རའི་མེ་ཏོག་ཁ་འབུས། གླིང་ཕྲན་རྣམས་སུ་ཙན་དན་གྱི་ཚལ་དང་། རིའི་རྩེ་མོ་རྣམས་སུ་བྱུ་རུའི་མྱུ་གུ་འཐོན་ཞིང་། འབབ་ཆུ་རོ་ཧི་ཏའི་འགྲམ་དུ་ཤིང་དགེ་བའི་སྙིང་པོ་ཞེས་ཉིན་རེ་བཞིན་ཁྲུ་བརྒྱ་རེ་སྐྱེ་ཞིང་ཉི་མ་མེད་ཚེ་སེན་མོས་བཅད་རུང་བ་ཉི་མ་ཤར་ནས་མེས་ཀྱང་མི་འཇིག་པ་སྐྱེས་པ་སོགས་དགེ་མཚན་དུ་མ་དང་ལྡན་པར་བྱས། དེ་ནས་བྱང་ཆུབ་ཀྱི་ཕྱོགས་དང་འཕགས་ནོར་བདུན་དང་མཐུན་པའི་ཕྱོགས་བཞིར་གོམ་པ་བདུན་བདུན་བོར་ནས་པདྨ་བདུན་བདུན་བྱུང་སྟེ། ཤར་ཕྱོགས་སུ་བོར་བའི་ཚེ། དགེ་བའི་ཆོས་ཐམས་ཅད་མྱང་འདས་ཀྱི་སྔོན་དུ་འགྲོ་བར་བྱའོ། །ཞེས་དང་། དེ་བཞིན་དུ་ལྷོ་ཕྱོགས་སུ། འགྲོ་བ་ཐམས་ཅད་ཀྱི་ཡོན་གནས་སུ་འགྲོ་བར་བྱའོ། །ནུབ་ཕྱོགས་སུ་སྐྱེ་རྒ་ན་འཆི་མཐར་དབྱུང་བར་བྱའོ། །བྱང་ཕྱོགས་སུ་སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ་ཞེས་པའི་སྒྲ་དེ་སྟོང་ཆེན་པོའི་འཇིག་རྟེན་གྱི་སེམས་ཅན་གྱིས་གོ་བར་བྱས་ཚེ། རྒྱལ་པོ་ཟས་ གཙང ་མས་བུ་འདི་བཙས་པས་བདག་གི་དོན་ཐམས་ཅད་འགྲུབ་བོ། །ཞེས་གསུངས་པས་མཚན་གཞོན་ནུ་དོན་གྲུབ་ཏུ་གསོལ་ལོ། །དེ་ནས་ཞག་བདུན་སོང་བ་ན་ཡུམ་མྱ་ངན་ལས་འདས་ཏེ་སུམ་ཅུ་རྩ་གསུམ་གྱི་ལྷར་སྐྱེས་སོ། །