གཉིས་པ་རང་ལུགས་བཞག་པ།
གཉིས་པ་རང་ལུགས་བཞག་པ་ལ།
དགོས་པ་དང༌། ཉིང་དགོས་དང༌། དགོས་འབྲེལ་གྱི་རབ་ཏུ་དབྱེ་བ་དང༌། གྲངས་ངེས་པའི་རྒྱུ་མཚན་དང༌། དབྱེ་བ་སོ་སོའི་རང་བཞིན་དང༌། ངག་འདིས་དགོས་འབྲེལ་བསྟན་ལུགས་དང་དྲུག དང་པོ་ལ་གཉིས་ལས། དང་པོ་ཡོངས་གཅོད་ཀྱི་དགོས་པ་ནི། དགོས་སོགས་ཆོས་བཞི་ཡོད་སྟོན་གྱི་ངག་ལ་བརྟེན་ནས་བསྟན་བཅོས་ལུས་ཀྱི་དགོས་སོགས་ཆོས་བཞི་ཡོད་པར་དང་པོར་རྟོགས་པ་དེ་ཆོས་ཅན། དགོས་སོགས་ཆོས་བཞི་ཡོད་སྟོན་གྱི་ངག་བཀོད་པའི་དགོས་པ་ཡིན་ཏེ། དགོས་འབྲེལ་གྱི་ངག་ལ་བརྟེན་ནས་དགོས་སོགས་ཆོས་བཞི་ཡོད་སྟོན་གྱི་སྒྲའི་བརྗོད་བྱ་རྟོགས་པ་ཡིན་པའི་ཕྱིར་རོ། །གཏན་ཚིགས་དེ་གང་གིས་གྲུབ་ན། ཊཱི་ཀ་ལས། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་བྱ་བའི་མདོ་དང་པོ་འདིས་ནི། འདུལ་བ་མདོ་འདིའི་འབྲེལ་པ་དང༌། བརྗོད་པར་བྱ་བ་དང༌། དགོས་པ་དང༌། དགོས་པའི་ཡང་དགོས་པ་རྣམས་བརྗོད་དེ་ཞེས་གསུངས་པས། བསྟན་བཅོས་ལུས་ཀྱི་དགོས་སོགས་ཆོས་བཞི་ཡོད་པ་དེ། ངག་འདིའི་བརྗོད་བྱ་ཡིན་པར་གྲུབ་ལ་ངག་འདི་ལ་བརྟེན་ནས་ངག་འདིའི་བརྗོད་བྱ་དེ་རྟོགས་པ་ཡིན་པས་གཏན་ཚིགས་དེ་གྲུབ་བོ། །ཁྱབ་པ་གཞུང་གིས་གྲུབ་སྟེ། རྣམ་ངེས་ལས། བརྡ་ཇི་ལྟ་བ་བཞིན་དོན་རྟོགས་པའི་ཕྱིར་དང་སྒྲ་སྦྱར་བའི་དགོས་པ་ཡང་དེ་ཙམ་དུ་ཟད་པའི་ཕྱིར་ཞེས་པས་གྲུབ་བོ། །དགོས་སོགས་ཆོས་བཞི་ཡོད་པར་གོ་བ་དེ་ཡང་དབང་རྣོན་ཐེ་ཚོམ་དུ་སྐྱེ་བ་ཤས་ཆེ་བ་ཡིན་ཏེ། ཚིག་དོན་འབྲེལ་པར་མ་ངེས་ཤིང་ཡིད་ཆེས་པར་དཀའ་བའི་ཕྱིར་རོ། །དབང་རྟུལ་ངེས་ཤེས་སུ་སྐྱེ་བ་ཤས་ཆེ་བ་ཡིན་ཏེ། ཚིག་དོན་འབྲེལ་པར་མ་ངེས་ཀྱང་ཡིད་ཆེས་པར་སླ་བའི་ཕྱིར་རོ། །