སྐབས་ལྔ་པའི་ངག་དོན་བཤད་པ།
རྣམ་པ་ཀུན་མངོན་པར་སོགས་ལ། རྩེ་སྦྱོར་ཆོས་ཅན། རྣམ་ཀུན་གྱི་རྗེས་སུ་འཆད་པའི་རྒྱུ་མཚན་ཡོད་དེ། རྣམ་ཀུན་མཐར་ཕྱིན་པ་ལས་ཁྱོད་འབྱུང་བའི་ཕྱིར། རྩེ་སྦྱོར་གྱི་རྟགས་ལ་སོགས་པ་བཞི་ཆོས་ཅན། རྩེ་སྦྱོར་གྱི་དང་པོར་འཆད་པའི་རྒྱུ་མཚན་ཡོད་དེ། རྩེ་སྦྱོར་རྟོགས་སླ་བའི་ཆེད་ཡིན་པའི་ཕྱིར། རྨི་ལམ་ན་ཡང་སོགས་ལ། རྨི་ལམ་དུའང་ཆོས་ཐམས་ཅད་རྨི་ལམ་དང་འདྲ་བར་ལྟ་སོགས་ཆོས་བཅུ་གཉིས་ཆོས་ཅན། རྩེ་མོའི་མངོན་རྟོགས་ཐོབ་པའི་རྟགས་ཡིན་ཏེ། རྩེ་མོའི་མངོན་རྟོགས་ལ་མི་འཁྲུལ་བའི་ཡོན་ཏན་ཡིན་པའི་ཕྱིར། ས་དགུ་པའི་ཡེ་ཤེས་ལ་ཆ་བཞིར་བྱས་པའི་ཆ་དང་པོ་ཆོས་ཅན། རྟགས་ཀྱི་རྩེ་མོ་ཡིན་ཏེ། རྨི་ལམ་ན་ཡང་ཆོས་ཐམས་ཅད་རྨི་ལམ་དང་འདྲ་བར་ལྟ་བ་སོགས་རྟགས་བཅུ་གཉིས་ཐོབ་པའི་དག་པའི་ཡེ་ཤེས་ཡིན་པའི་ཕྱིར། འཛམ་བུ་གླིང་གི་སོགས་ལ། ས་དགུ་པའི་ཡེ་ཤེས་ཆ་གཉིས་པ་ཆོས་ཅན། རྣམ་འཕེལ་གྱི་རྩེ་མོ་ཡིན་ཏེ། སྐབས་འདིར་བསྟན་བསོད་ནམས་རྣམ་པར་འཕེལ་བ་བཅུ་དྲུག་དང་ལྡན་པའི་དག་པའི་ཡེ་ཤེས་ཡིན་པའི་ཕྱིར། ཀུན་ཤེས་ཉིད་གསུམ་སོགས་ལ། ས་དགུ་པའི་ཡེ་ཤེས་ཆ་གསུམ་པ་ཆོས་ཅན། ངེས་པར་བསྟན་པའི་རྩེ་མོ་ཡིན་ཏེ། ཤེས་རབ་ཀྱིས་མཁྱེན་གསུམ་གྱི་ཡོན་ཏན་གྱི་རིགས་ཡོངས་སུ་རྫོགས་ཤིང་སྙིང་རྗེས་གནས་སྐབས་ཐམས་ཅད་དུ་སེམས་ཅན་གྱི་དོན་ཡོངས་སུ་མི་བཏོང་བའི་དག་པའི་ཡེ་ཤེས་ཡིན་པའི་ཕྱིར། གླིང་བཞི་སོགས་ལ་ས་དགུ་པའི་ཡེ་ཤེས་ཆ་བཞི་པ་ཆོས་ཅན། སེམས་ཀུན་ཏུ་གནས་པའི་རྩེ་མོ་ཡིན་ཏེ། སྟོང་གསུམ་སྲང་ལ་གཞལ་བའི་གྲངས་ལས་ཆེས་ཁྱད་པར་དུ་འཕགས་པའི་བསོད་ནམས་མང་པོ་དང་ལྡན་པའི་དག་པའི་ཡེ་ཤེས་ཡིན་པའི་ཕྱིར། འཕགས་པ་ལྟར་ན། དྲོད་སོགས་སྦྱོར་ལམ་བཞི་ཆོས་ཅན་དུ་བྱས་ནས་རིམ་བཞིན་རྟགས་དང་རྣམ་འཕེལ་དང་། བརྟན་པ་དང་། སེམས་ཀུན་ཏུ་གནས་པའི་རྩེ་མོ་ཡིན་ཏེ། དག་པའི་ཡེ་ཤེས་དོར་ནས་སྔར་གྱི་ས་རྣམས་འགོད་དོ། །འཇུག་པ་དང་ནི་ལྡོག་པ་ལ་སོགས་པ་ལ། བྱང་སེམས་ཀྱི་ལམ་འབྲས་བུ་དང་བཅས་པ་ལ་བླང་བྱར་ཞེན་པ་དང་། ཉན་ཐོས་ཀྱི་དེ་དག་དོར་བྱར་ཞེན་པའི་བྱང་སེམས་ལྷ་བྱིན་གྱི་རྟོག་པ་ཆོས་ཅན། རིམ་བཞིན་འཇུག་པ་གཟུང་རྟོག་ལྡོག་པའི་གཟུང་རྟོག་ཡིན་ཏེ། དེ་ལྟ་བུའི་རྟོག་པ་ཡིན་པའི་ཕྱིར། རེ་རེ་ལ་དགུ་དགུར་དབྱེར་ཡོད་དེ། རང་གི་ཞེན་པ་ལྟར་གྱི་ཡུལ་ཡོད་པ་མ་ཡིན་ཏེ། ཕྱིན་ཅི་ལྡོག་ཏུ་སྣང་བའི་ཕྱིར། དེར་ཐལ། ཞེན་ཡུལ་གྱི་དངོས་པོ་དང་མ་འབྲེལ་བར་འཇུག་པའི་ཕྱིར། སོ་སོ་སྐྱེ་བོ་འཕགས་དབྱེ་སོགས་ལ། སོ་སོ་སྐྱེ་བོའི་རྒྱུད་ཀྱི་གང་ཟག་རྫས་ཡོད་འཛིན་པ་ཆོས་ཅན། རྫས་འཛིན་རྟོག་པ་ཡིན་ཏེ། ལོངས་སྤྱོད་པ་པོ་ལ་རྫས་ཡོད་དུ་ཞེན་པའི་རྟོག་པ་ཡིན་པའི་ཕྱིར། འཕགས་པའི་རྒྱུད་ཀྱི་སྐྱེས་བུ་བཏགས་ཡོད་དུ་འཛིན་པ་ཆོས་ཅན། རྟག་འཛིན་རྟོག་པ་ཡིན་ཏེ། ལོངས་སྤྱོད་པ་པོ་བཏགས་ཡོད་ཙམ་དུ་འཛིན་པའི་རྟོག་པ་ཡིན་པའི་ཕྱིར། རེ་རེ་ལ་དགུ་དགུར་དབྱེར་ཡོད་དེ། ཡུལ་དགུ་དགུ་ཡོད་པའི་ཕྱིར། འཛིན་པ་བདེན་པ་བ་མ་གྲུབ་སྟེ། རང་གི་གཟུང་བ་ལྟར་གྱི་དོན་མ་གྲུབ་པའི་ཕྱིར། ངོ་བོ་ཉིད་སོགས་ལ། ཕྱིན་དྲུག་བྱང་སེམས་ལམ་གྱི་ངོ་བོ་ཡིན་པས་བླང་བྱར་ཞེན་པའི་རྟོག་པ་ཆོས་ཅན། སྐབས་འདིའི་མཐོང་སྤང་འཇུག་པ་གཟུང་རྟོག་ཡིན་ཏེ། མཐོང་ལམ་རྩེ་མོའི་སྦྱོར་བའི་གནས་སྐབས་ཀྱི་སྤང་བྱར་གྱུར་པའི་གཟུང་རྟོག་ཡིན་པའི་ཕྱིར། དག་པ་ས་གསུམ་ལ་སངས་རྒྱས་ཀྱི་རིགས་སུ་ངེས་པས་བླང་བྱར་འཛིན་པ་དང་། རྒྱུ་མ་ལྟ་བུར་བསྒོམས་པས་ཐེག་ཆེན་གྱི་ལམ་སྒྲུབ་པ་ལ་བླང་བྱར་ཞེན་པ་དང་། ཐེག་ཆེན་གྱི་རྟོགས་པ་དམིགས་པ་མ་འཁྲུལ་བས་བླང་བྱར་ཞེན་པ་དང་། ཐེག་ཆེན་གྱི་སྤང་གཉེན་ལ་བླང་དོར་དུ་ཞེན་པ་དང་། གཞི་ལམ་སྐྱེ་མེད་དུ་རྟོགས་པའི་བླང་བྱར་འཛིན་པ་དང་། ཉན་རང་གིས་ཐག་སྲིད་པས་ཡིད་བྱེད་ལ་བླང་བྱར་འཛིན་པ་དང་། སེམས་ཅན་གྱི་དོན་བྱེད་པའི་ལས་ལ་བླང་བྱར་འཛིན་པ་དང་། སེམས་ཅན་མ་ལུས་ཀྱི་འབྲས་བུ་ལ་འགོད་པ་ལ་བླང་བྱར་འཛིན་པ་རྣམས་ཆོས་ཅན་དུ་བྱས་ནས། རྟགས་དང་སྒྲུབ་བྱ་སྔ་མ་ལྟར་འགོད་དོ། །
སྲིད་དང་ཞི་བར་ལྟུང་པའི་ཕྱིར་སོགས་ལ། ཉན་རང་གི་ལམ་ཆོས་ཅན། རྟོགས་པ་དམན་པ་ཡིན་ཏེ། སྲིད་ཞི་གང་རུང་དུ་ལྟུང་བའི་ཕྱིར། ཡོངས་འཛིན་དམ་པ་མ་ཡིན་ཏེ། ཕྱི་ནང་གི་ཐབས་མཁས་དང་བྲལ་བའི་ཕྱིར། སྒྲུབ་པའི་ལམ་མ་ཚང་བ་ཡིན་ཏེ། ཤེས་སྒྲིབ་མཐའ་དག་གི་གཉེན་པོ་མ་ཡིན་པའི་ཕྱིར། གཞན་གྱི་རྐྱེན་གྱིས་འགྲོ་བ་ཡིན་ཏེ། ལམ་བགྲོད་པ་སློབ་དཔོན་གཞན་གྱི་གདམས་ངག་ལ་ལྟོས་པའི་ཕྱིར། ཆེད་དུ་བྱ་བ་དམན་པ་ཡིན་ཏེ། ཆེན་པོ་གསུམ་གྱི་ཆེད་དུ་མི་འཇུག་པའི་ཕྱིར། ཉེ་ཚེ་བའི་ལམ་གྱི་བྱེད་པ་ཡིན་ཏེ། ཉོན་སྒྲིབ་ཙམ་གྱི་གཉེན་པོ་ཡིན་པའི་ཕྱིར། འབྲས་བུ་བཞིའི་རྟོགས་པ་ཐ་དད་པ་ཡིན་ཏེ། གཟུགས་སོགས་དངོས་པོ་བ་ལ་དམིགས་ནས་མི་རྟག་སོགས་སུ་མཚན་མར་འཛིན་པའི་ཕྱིར། ཐེག་ཆེན་གྱི་ལམ་ལ་གནས་པ་དང་། བགྲོལ་བའི་ངེས་པ་ཡིན་ཏེ། ཐེག་ཆེན་གྱི་ལམ་ལ་རྨོངས་པའི་མ་རིག་པ་དང་ལྡན་པའི་ཕྱིར། འབྲས་བུ་མྱང་འདས་དམན་པ་ཡིན་ཏེ། རང་ལུགས་ཀྱི་མྱང་འདས་ཐོབ་པའི་རྗེས་སུ་རྣམ་མཁྱེན་ཐོབ་པར་བྱེད་དགོས་པའི་ཕྱིར། རྟོགས་པ་དམན་པ་སོགས་ཡུལ་དགུ་ལ་ལྡོག་པར་ཞེན་པའི་རྟོག་པ་ཆོས་ཅན། མཐོང་སྤང་རྟོག་པ་གཟུང་རྟོག་ཡིན་ཏེ། མཐོང་ལམ་རྩེ་མོ་བར་ཆད་མེད་ལམ་གྱི་སྤང་བྱར་གྱུར་པའི་གཟུང་རྟོག་ཡིན་པའི་ཕྱིར། འཛིན་པ་དང་ནི་འདོར་བ་སོགས་ལ། ཀུན་རྫོབ་ཏུ་ཤེར་ཕྱིན་གྱི་ཡོན་ཏན་འཛིན་ཞིང་སྐྱོན་འདོར་བར་བྱེད་པའི་བློ་ཆོས་ཅན། སྐབས་འདིའི་མཐོང་སྤང་རྫས་འཛིན་རྟོག་པ་ཡིན་ཏེ། མཐོང་ལམ་རྩེ་མོའི་སྦྱོར་བ་ཉེར་སྟོགས་ཀྱི་སྤང་བྱར་གྱུར་པའི་འཛིན་རྟོག་ཡིན་པའི་ཕྱིར། ཤེར་ཕྱིན་ཡང་དག་པར་གང་ལ་ཡང་ཡིད་ལ་མི་བྱེད་ཅིང་ཀུན་རྫོབ་དུ་གནས་ལུགས་ཡིད་ལ་བྱེད་པར་འཛིན་པ་དང་། ཁམས་གསུམ་བདེན་མེད་དུ་རྟོགས་པས་ཆོས་ཉིད་ཀྱིས་རང་བཞིན་གྱི་ཁམས་གསུམ་དང་འབྲེལ་བར་འཛིན་པ་དང་། སྟོང་པ་ཉིད་ལ་མི་གནས་པའི་ཚུལ་གྱིས་མངོན་པར་ཞེན་པའི་ཚུལ་གྱིས་མངོན་པར་ཞེན་པ་འཛིན་པ་དང་། ཆོས་ཐམས་ཅད་བརྡར་བཏགས་པ་ཙམ་དུ་རྟོག་པར་འཛིན་པ་དང་། གང་ལ་ཡང་མངོན་པར་མ་ཞེན་པའི་ཚུལ་གྱིས་ཆགས་པར་འཛིན་པ་དང་། འཁོར་འདས་ཐ་དད་དུ་ཞེན་པ་སོགས་ཀྱི་གཉེན་པོར་འཛིན་པ་དང་། ཤེར་ཕྱིན་གྱིས་མ་ཟིན་པའི་ཕར་ཕྱིན་གཞན་ལྔས་རྣམ་མཁྱེན་གྱི་སར་འགྲོ་བ་ཐོགས་པར་འཛིན་པའི་རྟོག་པ་ཆོས་ཅན་དུ་བྱས་ནས་རྟགས་དང་སྒྲུབ་བྱ་སྔ་མ་ལྟར། ཆེད་བཞིན་ངེས་པར་མི་འབྱུང་སོགས་ལ། ཉན་རང་གི་ལམ་ཆོས་ཅན། ཆེད་དུ་བྱ་བ་ཇི་ལྟ་བ་བཞིན་ངེས་པར་མི་འབྱུང་སྟེ། ཉན་རང་གི་བྱང་ཆུབ་དུ་ངེས་པར་འབྱུང་བའི་ཕྱིར། བྱང་སེམས་ཆོས་ཅན། ཉན་རང་གི་ལམ་ལ་རང་གི་འཇུག་བྱའི་ལམ་མ་ཡིན་པར་འཛིན་ཏེ། ཉན་རང་གི་ལམ་དེས་རང་གི་མངོན་པར་འདོད་པའི་དོན་སྒྲུབ་མི་ནུས་པའི་ཕྱིར། ཐེག་ཆེན་གྱི་ལམ་ཆོས་ཅན། དོན་དམ་པར་སྐྱེ་འགག་མེད་ཀྱང་སྐྱེ་འགག་མི་བྱེད་པའི་སྐྱོན་མེད་དེ། ཀུན་རྫོབ་དུ་རྒྱུ་འབྲས་སྐྱེ་འགག་བྱེད་པའི་ཕྱིར། དངོས་པོ་རྣམས་ལྡན་པ་དང་མི་ལྡན་པར་སྣང་སྟེ། གཅིག་དང་ཐ་དད་དུ་སྣང་བའི་ཕྱིར། གཟུགས་སོགས་ཡུལ་ལ་མི་གནས་པའི་ཚུལ་གྱིས་གནས་ཏེ། དེ་རྣམས་སྟོང་ཉིད་དུ་རྟོགས་པའི་ཚུལ་གྱིས་གནས་པའི་ཕྱིར། ཉན་རང་གི་རིགས་འཇིག་པར་བྱེད་དེ། བྱང་ཆུབ་དུ་སེམས་བསྐྱེད་ཅིང་ཕར་ཕྱིན་དྲུག་ལ་སློབ་པའི་ཕྱིར། དོན་དམ་པར་འཚང་རྒྱ་འདོད་ཀྱི་དོན་གཉེར་མེད་དེ། ཆོས་ཐམས་ཅད་དེ་བཞིན་ཉིད་ཀྱི་ཚུལ་དུ་ཁོང་དུ་ཆུད་པའི་ཕྱིར། དོན་དམ་པར་སྐྱེད་བྱེད་ཀྱི་རྒྱུ་མེད་དེ། མཐའ་བཞི་གང་ལས་ཀྱང་མི་སྐྱེ་བའི་ཕྱིར། དངོས་པོར་མངོན་ཞེན་གྱི་ཕྱིར་རྒོལ་བ་དང་བཅས་པ་ཡིན་ཏེ། དངོས་པོར་མངོན་ཞེན་དེ་རང་གི་མི་མཐུན་ཕྱོགས་སུ་གྱུར་པའི་ཕྱིར། ཆེད་བཞིན་ངེས་པར་མི་འབྱུང་བ་ལ་སོགས་པ་ཡུལ་དགུ་ལ་བཏགས་པའི་དངོས་པོར་ཞེན་པ་ཆོས་ཅན། སྐབས་འདིའི་མཐོང་སྤང་རྟག་འཛིན་རྟོག་པ་ཡིན་ཏེ། མཐོང་ལམ་འཇུག་པ་བར་ཆད་མེད་ལམ་གྱི་སྤང་བྱར་གྱུར་པའི་འཛིན་རྟོག་ཡིན་པའི་ཕྱིར། བྱང་ཆུབ་ལས་གཞན་སྟོན་པ་ལ་སོགས་ལ། ཐེག་ཆེན་མཐོང་ལམ་ཆོས་ཅན། བྱང་ཆེན་འཐོབ་པའི་རྒྱུ་ཡིན་ཏེ། གཞན་དག་བྱང་ཆུབ་ལ་འགོད་པར་བྱ་བའི་ཕྱིར་དུ་སངས་རྒྱས་ཀྱིས་ཁྱོད་ཕྱིན་ཅི་ལོག་པར་སྟོན་པའི་ཕྱིར་དང་། བྱང་ཆུབ་ཀྱི་རྒྱུ་མཚན་ཁོ་ནར་ཁྱོད་ཀྱི་རང་བཞིན་གྱི་ཤེར་ཕྱིན་ཚིག་དང་དོན་གྱི་སྒོ་ནས་གདུལ་བྱ་ལ་ཡང་དག་པར་གཏོད་པའི་ཕྱིར་དང་། བྱང་ཆུབ་ཀྱི་བར་ཆད་མེད་པའི་རྒྱུར་ཁྱོད་སྒོམ་པ་སྟོང་གསུམ་གྱི་སེམས་ཅན་དགྲ་བཅོམ་པ་ལ་བཀོད་པ་བས་ཆེས་བསོད་ནམས་མང་པའི་ཕྱིར། དྲི་མ་ཟད་དང་ཞེས་སོགས་ལ། འབྲས་ཡུམ་ཆོས་ཅན། སྐབས་འདིའི་བྱང་ཆེན་ཡིན་ཏེ། སྒྲིབ་གཉིས་ཀྱི་དྲི་མ་གདོད་མ་ནས་ཟད་པ་ལ་ཟད་པ་དང་མི་སྐྱེ་བ་ལ་མི་སྐྱེ་བར་ཤེས་པའི་ཡེ་ཤེས་མཐར་ཐུག་ཡིན་པའི་ཕྱིར། སྒྲིབ་གཉིས་ཀྱི་དྲི་མ་ཆོས་ཅན། དོན་དམ་པར་སྐྱེ་འགག་མེད་དེ། གཅིག་དང་དུ་མའི་རང་བཞིན་དང་བྲལ་བའི་ཕྱིར་ནམ་མཁའི་པད་མོ་བཞིན་ནོ། །
གང་གི་ཕྱིར་སོགས་ལ། སྤང་བྱ་རྫས་ཡོད་འགག་པའི་ཟད་པ་ལ་ཟད་དོ་སྙམ་པ་དང་། རྫས་ཡོད་མི་སྐྱེ་བར་མ་སྐྱེ་བའོ་སྙམ་པའི་ཤེས་པ་ཆོས་ཅན། བྱང་ཆུབ་ཆེན་པོར་མི་རུང་བར་ཐལ། ཁྱོད་ཀྱིས་ཞེན་པ་ལྟར་ཟད་པ་དང་མི་སྐྱེ་བ་དེ་དག་མེད་པའི་ཕྱིར། འགོག་པ་མེད་པའི་རང་བཞིན་སོགས་ལ། བྱང་སེམས་ཀྱི་མཐོང་ལམ་ཆོས་ཅན། སྤང་བྱའི་རྣམ་རྟོག་སྔར་ཡོད་ཟད་པ་དང་མ་འོངས་པའི་སྐྱེ་བ་མེད་པའི་རྣམ་པ་སྔར་མེད་གསར་དུ་ཐོབ་པ་བདེན་པར་ཐལ། སྤང་བྱ་བདེན་པ་ལ་སྐྱེ་འགག་མེད་པའི་ཕྱིར། དེ་ལ་སྐྱེ་བ་དང་འཇིག་པས་ཞེས་སོགས་ལ། བདེན་བཞི་མི་རྟག་སོགས་བཅུ་དྲུག་གི་རྣམ་པར་སྒོམ་པའི་བྱང་སེམས་ཚོགས་ལམ་པའི་རྣལ་འབྱོར་ཆོས་ཅན། བདག་མེད་ལ་དམིགས་པ་རྣལ་འབྱོར་གྱི་ས་ཡིན་ཏེ། ཉོན་མོངས་པའི་དབལ་བཞོམ་པའི་ཕྱིར་དུ་གང་ཟག་གི་བདག་མེད་ཙམ་སྒོམ་པའི་ཐེག་ཆེན་གྱི་རྣལ་འབྱོར་ཡིན་པའི་ཕྱིར། དེས་དབེན་པའི་ཕུང་པོ་སོགས་ལ། བྱང་སེམས་ཀྱི་སྦྱོར་ལམ་དྲོད་རྩེ་གཉིས་ཆོས་ཅན། སེམས་ཙམ་ལ་དམིགས་པ་རྣལ་འབྱོར་གྱི་ས་ཡིན་ཏེ། ཕྱི་ནང་གི་རྟེན་འབྲེལ་དོན་གྱིས་དབེན་པའི་སེམས་ཙམ་དུ་རྟོགས་པའི་འཇིག་རྟེན་པའི་སྒོམ་བྱུང་ཡིན་པའི་ཕྱིར། གཟུང་བ་མེད་ན་སོགས་ལ། བཟོད་མཆོག་ཆོས་ཅན། གཉིས་མེད་ལ་དམིགས་པ་རྣལ་འབྱོར་གྱི་ས་ཡིན་ཏེ། གཟུང་འཛིན་གཉིས་མེད་རྟོགས་ཤིང་གཉིས་མེད་ཀྱི་རང་རིག་ཙམ་ལ་ཞེན་པ་མ་བོར་བའི་རྣལ་འབྱོར་ཡིན་པའི་ཕྱིར། དེ་ཡང་རྟེན་ཅིང་འབྲེལ་བར་འབྱུང་པ་སོགས་ལ། བྱང་སེམས་ཀྱི་མཐོང་ལམ་ཆོས་ཅན། སྤྲོས་བྲལ་ལ་དམིགས་པ་རྣལ་འབྱོར་གྱི་ས་ཡིན་ཏེ། ཡོད་མེད་ཀྱི་མཐའ་དང་བྲལ་བའི་རྟེན་འབྲེལ་རྒྱུ་མ་ལྟ་བུའི་དེ་ཁོ་ན་ཉིད་མངོན་སུམ་དུ་བྱས་པའི་མི་རྟོག་ཡེ་ཤེས་ཡིན་པའི་ཕྱིར། དེ་ལྟ་མ་ཡིན་ཏེ་ཞེས་སོགས་ལ། གཟུང་འཛིན་དུ་མངོན་པར་ཞེན་པའི་བློ་ཆོས་ཅན། ཁྱོད་ཀྱི་གཉེན་པོར་གཟུང་འཛིན་གཉིས་མེད་སྒོམ་པས་ཁྱོད་སྤང་མི་ནུས་པར་ཐལ། ཁྱོད་ཀྱི་ཡུལ་གཟུང་འཛིན་དོན་དམ་པར་གྲུབ་པའི་ཕྱིར། གཞན་དག་གིས་སོགས་ལ། དངོས་སྨྲ་བ་ཆོས་ཅན། སངས་རྒྱས་ཀྱི་ཤེས་སྒྲིབ་རྣམ་པ་ཐམས་ཅད་དུ་སྤངས་པ་མ་ཡིན་པར་ཐལ། གཟུང་འཛིན་དུ་མངོན་པར་ཞེན་པ་གཉེན་པོས་སྤང་མི་ནུས་པའི་ཕྱིར། འདི་ལ་བསལ་བྱ་ཅི་ཡང་མེད་སོགས་ལ། རྟེན་འབྲེལ་ཆོས་ཅན། གང་ཟག་དང་ཆོས་ཀྱི་བདག་སྔར་ཡོད་བསལ་དུ་མེད་ཅིང་བདག་གཉིས་ཀྱིས་སྟོང་པའི་ཆོས་ཉིད་སྔར་མེད་བཞག་དུ་མེད་དེ། གདོད་མ་ནས་བདག་ཉིད་ཀྱིས་སྟོང་པའི་རང་བཞིན་ཡིན་པའི་ཕྱིར། དབུ་མ་པའི་ལུགས་ལ་ཆོས་ཅན། རྟེན་འབྲེལ་བདག་གཉིས་ཀྱིས་སྟོང་པར་མཐོང་ན་སྒྲིབ་གཉིས་ལས་གྲོལ་བར་འགྱུར་ཏེ། རྟེན་འབྲེལ་བདག་གཉིས་ཀྱིས་སྟོང་པར་མཐོང་བ་དེ་གནས་ལུགས་ལ་ཡང་དག་པར་མཐོང་བའི་ཡེ་ཤེས་ཡིན་པའི་ཕྱིར། སྦྱིན་པ་ལ་སོགས་རེ་རེ་ནི་སོགས་ལ། ས་བཅུ་པའི་དཀྱིལ་སྟོད་ཀྱི་ཡེ་ཤེས་ཆོས་ཅན། མཐོང་ལམ་རྩེ་མོའི་མིང་ཅན་གྱི་མངོན་རྟོགས་ཡིན་ཏེ། སྐབས་འདིའི་མཐོང་སྤང་གཟུང་འཛིན་གྱི་རྣམ་རྟོག་གི་བག་ལ་ཉལ་འཇོམས་བྱེད་ཀྱི་ཡེ་ཤེས་ཡིན་པའི་ཕྱིར། སྐབས་འདིའི་མཐོང་ལམ་རྩེ་མོ་ཆོས་ཅན། རྣམ་པས་ཕྱེ་ན་སུམ་ཅུ་རྩ་དྲུག་དུ་དབྱེར་རུང་སྟེ། འཁོར་གསུམ་རྣམ་དག་གི་སྒོ་ནས་ཕྱིན་དྲུག་རེ་རེ་ཡང་ཕྱིན་དྲུག་ཚང་བར་སྒོམ་པའི་ཡེ་ཤེས་ཡིན་པའི་ཕྱིར། འཕགས་པ་ལྟར་ན། མཐོང་ལམ་སྡུག་བསྔལ་ལ་ཆོས་བཟོད་ཆོས་ཅན་དུ་བྱས་ནས་སྔ་མ་ལྟར་འགོད་དོ། །
དེ་སྐྱེས་པ་ན་སོགས་ལ། མཐོང ལམ་རྩེ་མོའི་རྣམ་གྲོལ་ཆོས་ཅན། སྐབས་འདིའི་མཐོང་སྤང་གི་རྣམ་རྟོག་བརྒྱ་རྩ་བརྒྱད་ཀྱི་བག་ལ་ཉལ་སྤངས་པ་ཡིན་ཏེ། དེ་དག་གིས་བསྐྱེད་པའི་མཐོང་སྤང་གཟུང་འཛིན་གྱི་རྣམ་རྟོག་བརྒྱ་རྩ་བརྒྱད་སྤངས་པའི་མི་རྟོག་ཡེ་ཤེས་ཀྱི་རང་བཞིན་གྱི་རྣམ་གྲོལ་ལམ་ཡིན་པའི་ཕྱིར། དེ་ནས་སེང་གེ་རྣམ་སྒྱིངས་པའི་སོགས་ལ། མཐོང ལམ་རྩེ་མོའི་རྗེས་ཐོགས་སུ་མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་དང་ལུགས་མི་མཐུན་དུ་སྙོམས་པར་འཇུག་པའི་ཡེ་ཤེས་ཆོས་ཅན། སེང་གེ་རྣམ་སྒྱིངས་ཀྱི་ཏིང་ངེ་འཛིན་ཡིན་ཏེ། མཐོང་ལམ་རྩེ་མོའི་སྤང་བྱ་སྒྲིབ་གཉིས་ཀྱི་འཇིགས་པ་མེད་ཅིང་མཐོང་ལམ་རྩེ་མོ་ལ་དབང་བསྒྱུར་ཐོབ་པར་བྱ་བའི་ཕྱིར་སྒོམ་པའི་སྙོམས་འཇུག་ཡིན་པའི་ཕྱིར། རྟེན་ཅིང་འབྲེལ་བར་འབྱུང་སོགས་ལ། མཐོང་ལམ་རྩེ་མོ་ལ་གནས་པའི་བྱང་སེམས་ཆོས་ཅན། རྗེས་ཐོབ་ཏུ་ཀུན་ནས་ཉོན་མོངས་ཀྱི་རྟེན་འབྲེལ་ལུགས་མཐུན་ལུགས་ཟློག་དུ་སྒོམ་པ་ལ་དགོས་པ་ཡོད་དེ། འཁོར་བར་འཇུག་པའི་ཚུལ་གྱིས་རྒྱུ་འབྲས་ཁོང་དུ་ཆུད་པར་བྱ་བའི་ཆེད་ཡིན་པའི་ཕྱིར། རྣམ་བྱང་གི་རྟེན་འབྲེལ་ལུགས་མཐུན་ལུགས་བཟློག་ཏུ་སྒོམ་པ་ལ་དགོས་པ་ཡོད་དེ། འཁོར་བ་ལས་ལྡོག་པའི་ཚུལ་རྣམ་བྱང་རྒྱུ་འབྲས་དང་བཅས་པ་ཁོང་དུ་ཆུད་པར་བྱ་བའི་ཆེད་ཡིན་པའི་ཕྱིར། འགོག་པ་དང་བཅས་པ་སོགས་ལ། ཐོད་རྒལ་ལ་སྙོམས་པར་འཇུག་པའི་ཆེད་དུ་མཐར་གནས་ཀྱི་སྙོམས་འཇུག་དགུ་ལ་ལུགས་མཐུན་ལུགས་ཟློག་དུ་སྙོམས་པར་འཇུག་པའི་ས་བཅུ་པའི་ཡེ་ཤེས་ཆོས་ཅན། ཐོད་རྒལ་སྙོམས་འཇུག་གི་སྦྱོར་བ་ཡིན་ཏེ། ཐོད་རྒལ་ལ་སྙོམས་པར་འཇུག་པའི་ཆེད་དུ་མཐར་གནས་སྙོམས་འཇུག་དགུ་ལ་རྩལ་སྦྱོང་བའི་ཏིང་ངེ་འཛིན་ཡིན་པའི་ཕྱིར། འདོད་པར་རྟོགས་པའི་སོགས་ལ། ཡར་སོང་བསམ་གཏན་བཞི་དང་། གཟུགས་མེད་བཞི་ལ་འགོག་པ་སྤེལ་ཞིང་། མཉམ་པར་བཞག་པའི་སེམས་འཚམས་སུ་བཞག་ནས་མར་འོང་མཐར་གནས་ཀྱི་སྙོམས་འཇུག་དགུ་ལ་འདོད་སེམས་སྤེལ་བའི་ས་བཅུ་པའི་ཡེ་ཤེས་ཆོས་ཅན། སྐབས་འདིའི་ཐོད་རྒལ་གྱི་སྙོམས་འཇུག་ཡིན་ཏེ། སྙོམས་འཇུག་དགུ་ལ་འདོད་རྒུར་དབང་ཐོབ་པར་བྱ་བའི་ཆེད་དུ་མཉམ་གཞག་གི་སེམས་དང་སེམས་མེད་ཤིན་ཏུ་ཞི་བ་དང་རྣམ་གཡེང་ཅན་གྱི་སེམས་སྤེལ་ནས་བསྒོམ་པའི་སྙོམས་འཇུག་ཡིན་པའི་ཕྱིར། སྒོམ་ལམ་རྩེ་མོ་ཡིན་ཏེ། སྐབས་འདིའི་སྒོམ་སྤངས་གཟུང་འཛིན་གྱི་རྣམ་རྟོག་བརྒྱ་རྩ་བརྒྱད་ཀྱི་བག་ལ་ཉལ་སྤོང་བྱེད་ཀྱི་གཉེན་པོ་ཡིན་པའི་ཕྱིར། མདོར་བསྡུས་རྒྱས་དང་སོགས་ལ། སྐབས་འདིར་བསྟན་ཡུལ་དགུ་ལ་བླང་བྱར་འཛིན་པའི་རྟོག་པ་ཆོས་ཅན། སྒོམ་སྤང་འཇུག་པ་གཟུང་རྟོག་ཡིན་ཏེ། སྒོམ་ལམ་རྩེ་མོའི་སྦྱོར་བའི་གནས་སྐབས་ཀྱི་སྤང་བྱར་གྱུར་པའི་གཟུང རྟོག་ཡིན་པའི་ཕྱིར། བརྒྱད་སྟོང་པ་ཆོས་ཅན། ཆོས་བསྡུས་པ་ཡིན་ཏེ། མདོར་བསྡུས་པ་ལ་དགའ་བའི་སེམས་ཅན་རྗེས་སུ་བཟུང་པའི་ཆེད་དུ་གསུངས་པའི་བཀའ་ཡིན་པའི་ཕྱིར། སྟོང་ཕྲག་བརྒྱ་པ་ཆོས་ཅན། ཆོས་རྒྱས་པ་ཡིན་ཏེ། རྒྱས་པ་ལ་དགའ་བའི་གདུལ་བྱ་རྗེས་སུ་བཟུང་བའི་ཆེད་དུ་གསུངས་པའི་བཀའ་ཡིན་པའི་ཕྱིར། རིགས་ཆད་ཆོས་ཅན། སངས་རྒྱས་ཀྱི་གསུང་ཡོངས་སུ་མ་བཟུང་སྟེ། སངས་རྒྱས་ཀྱི་བཀའ་ལ་ཐོས་སོགས་ཀྱིས་ནན་ཏན་མི་བྱེད་པའི་ཕྱིར། མཐོང་ལམ་སྐྱེས་པའི་ཚེ་ཆོས་ཅན། དོན་དམ་པར་སྦྱོར་ལམ་ལ་སྤང་བྱ་ཆོག་གནོན་པའི་ཡོན་ཏན་མེད་དེ། དེ་འགགས་ཟིན་པའི་ཕྱིར། དོན་དམ་པར་མཐོང་ལམ་ལ་མཐོང་སྤང་སྤོང་བའི་ཡོན་ཏན་མེད་དེ། ཡང་དག་པར་དེ་སྐྱེ་བའི་རྒྱུ་མེད་པའི་ཕྱིར། དོན་དམ་པར་སྒོམ་ལམ་ལ་སྒོམ་སྤང་སྤོང་བའི་ཡོན་ཏན་མེད་དེ། མ་འོངས་པ་དངོས་པོར་མེད་པའི་ཕྱིར། སྦྱོར་ལམ་ཆོས་ཅན། མྱང་འདས་ལ་སྦྱོར་བའི་ལམ་ཡིན་ཏེ། མྱང་འདས་ཀྱི་གེགས་ཀྱི་གཙོ་བོ་རྟག་སོགས་ཕྱིན་ཅི་ལོག་བཞི་ཞི་བར་བྱེད་པའི་ལམ་ཡིན་པའི་ཕྱིར། མཐོང་ལམ་ཆོས་ཅན། སྟོང་ཉིད་མངོན་པར་སྒྲུབ་པའི་ལམ་ཡིན་ཏེ། སྟོང་ཉིད་སྔར་མེད་གསར་དུ་རྟོགས་པར་བྱེད་པའི་ཕྱིར། སྒོམ་ལམ་ཆོས་ཅན། རང་བཞིན་མེད་པར་སྒོམ་པར་བྱེད་པའི་ལམ་ཡིན་ཏེ། སྟོང་ཉིད་མཐོང་ཟིན་སྒོམ་པར་བྱེད་པའི་ཕྱིར། གཉིས་པ་སེམས་དང་སེམས་བྱུང་སོགས་ལ། སྐབས་འདིའི་ཡུལ་དགུ་ལ་ལྡོག་བྱར་ཞེན་པའི་རྟོག་པ་ཆོས་ཅན། སྒོམ་སྤང་རྟོག་པ་གཟུང་རྟོག་ཡིན་ཏེ། སྒོམ་ལམ་རྩེ་མོའི་འཇུག་པ་བར་ཆད་མེད་ལམ་གྱི་སྤང་བྱར་གྱུར་པའི་གཟུང་རྟོག་ཡིན་པའི་ཕྱིར། སེམས་མི་སྐྱེ་དང་སོགས་ལ། ཉན་རང་ཚོགས་ལམ་ཆོས་ཅན། གཞན་དོན་དུ་བྱང་ཆུབ་ཀྱི་སེམས་མི་སྐྱེ་སྟེ། ཐེག་ཆེན་དགེ་བའི་བཤེས་གཉེན་སོགས་དང་བྲལ་བའི་ཕྱིར། བྱང་ཆུབ་ཀྱི་སྙིང་པོ་ཡིད་ལ་མི་བྱེད་དེ། གཞན་དོན་དུ་སངས་རྒྱས་ལ་དམིགས་པའི་བསོད་ནམས་ཁྱད་པར་ཅན་མེད་པའི་ཕྱིར། ཉན་ཐོས་སྦྱོར་ལམ་པ་ཆོས་ཅན། ཉན་ཐོས་ཀྱི་ཐེག་པ་ཡིད་ལ་བྱེད་དེ། ཉན་ཐོས་ཀྱི་རྒྱས་འགྱུར་གྱི་རིགས་སད་པ་ཅན་ཡིན་པའི་ཕྱིར། རང་རྒྱལ་སྦྱོར་ལམ་པ་ཆོས་ཅན། རང་རྒྱལ་ཐེག་པ་མངོན་དུ་བྱེད་དེ། རང་རྒྱལ་གྱི་རྒྱས་འགྱུར་གྱི་རིགས་སད་པ་ཅན་ཡིན་པའི་ཕྱིར། ཉན་རང་མཐོང་ལམ་པ་ཆོས་ཅན། རྫོགས་བྱང་ཡིད་ལ་མི་བྱེད་དེ། ཤེར་ཕྱིན་གྱི་སྒྲུབ་པ་དང་བྲལ་བའི་ཕྱིར། ཉན་རང་སྒོམ་ལམ་པ་ཆོས་ཅན། དམིགས་བཅས་ཀྱི་སྒོམ་པ་དང་བཅས་པ་ཡིན་ཏེ། ཕུང་པོ་མི་རྟག་སོགས་སུ་སྒོམ་པའི་ཕྱིར། ཉན་རང་གི་མི་སློབ་ལམ་ཆོས་ཅན། སྤང་བྱ་སྤང་པའི་ཕྱིར་སྒོམ་པ་མེད་དེ། རང་ལུགས་ཀྱི་སྤང་བྱ་མ་ལུས་པ་སྤངས་པའི་ཕྱིར། ཉན་རང་གི་ཕུང་པོ་ལྷག་མེད་ཀྱི་མྱང་འདས་ཆོས་ཅན། སྒོམ་པ་དང་སྒོམ་པ་མེད་པ་གཉིས་ཀ་མེད་དེ། དམིགས་པ་དང་མི་དམིགས་པ་གཉིས་ཀ་མེད་པའི་ཕྱིར། ཉན་རང་ཆོས་ཅན། ཤེས་བྱ་ཐོས་བསམ་གྱིས་གཏན་ལ་འབེབ་པ་ལ་དོན་ཇི་ལྟ་བ་བཞིན་མ་ཡིན་པའི་ཤེས་རབ་དང་ལྡན་ཏེ། དེའི་ཚེ་ཕུང་པོ་མི་རྟག་སོགས་སུ་མངོན་པར་ཞེན་པའི་ཕྱིར། སེམས་ཅན་བརྟགས་པའི་སོགས་ལ། སྐབས་འདིའི་ཡུལ་དགུ་ལ་རྫས་ཡོད་དུ་ཞེན་པའི་རྟོག་པ་ཆོས་ཅན། སྒོམ་སྤང་རྫས་འཛིན་རྟོག་པ་ཡིན་ཏེ། སྒོམ་ལམ་རྩེ་མོའི་སྦྱོར་བ་ཉིད་སོགས་ཀྱི་སྤང་བྱར་གྱུར་པའི་འཛིན་རྟོག་ཡིན་པའི་ཕྱིར། གང་ཟག་ཆོས་ཅན། ཕུང་པོ་ལ་སེམས་ཅན་དུ་བཏགས་པ་ཙམ་ཡིན་ཏེ། ཕུང་པོ་ལས་མ་གཏོགས་པའི་སེམས་ཅན་རྫས་ཡོད་མ་གྲུབ་པའི་ཕྱིར། གཟུགས་སོགས་ཆོས་ཅན། ཆོས་སུ་བཏགས་པ་ཙམ་ཡིན་ཏེ། བློ་འཁྲུལ་པའི་སྣང་བ་ཙམ་ཡིན་པའི་ཕྱིར། མཁྱེན་གསུམ་གྱིས་བསྡུས་པའི་ཆོས་རྣམས་ཆོས་ཅན། ཐ་སྙད་དུ་དངོས་པོ་མེད་པའི་རང་བཞིན་གྱི་སྟོང་ཉིད་མ་ཡིན་ཏེ། ཤེས་བྱ་ཐམས་ཅད་ལ་ཁྱབ་པའི་ཕྱིར། ཉན་རང་གི་ཤེས་རབ་ཆོས་ཅན། ཆོས་ལ་ཆགས་པ་ཡིན་ཏེ། གཟུགས་སོགས་མི་རྟག་སོགས་སུ་མངོན་པར་ཞེན་པ་ཅན་ཡིན་པའི་ཕྱིར། བྱང་སེམས་ཀྱི་ཤེས་རབ་ཆོས་ཅན། ཆོས་ཀྱི་རང་བཞིན་ཇི་ལྟ་བ་བཞིན་འབྱེད་པ་ཅན་ཡིན་ཏེ། ཆོས་ཐམས་ཅད་ངོ་བོ་ཉིད་མེད་པར་རྟོགས་པའི་ཕྱིར། ཉན་རང་ཆོས་ཅན། རང་དོན་རྒྱུན་ཞུགས་སོགས་ཀྱི་དངོས་པོའི་ཆེད་དུ་བྱ་བ་བྱེད་དེ། གཞན་དོན་དུ་ཆེན་པོ་གསུམ་གྱི་ཆེད་དུ་བྱ་བ་མི་བྱེད་པའི་ལམ་ཞུགས་ཡིན་པའི་ཕྱིར། བྱང་སེམས་ཆོས་ཅན། ཐེག་པ་གསུམ་གྱི་ལམ་གྱིས་ངེས་པར་འབྱུང་སྟེ། གཟུགས་ནས་རྣམ་མཁྱེན་བར་བདེན་པར་མི་དམིགས་པར་སྒོམ་པའི་ཕྱིར། སོ་སྐྱེ་ཆོས་ཅན། ཡོན་གནས་ཀྱི་ས་མ་དག་སྟེ། འཕགས་ལམ་ལ་ཡང་དག་པར་མ་ཞུགས་པའི་ཕྱིར། བྱང་ཆུབ་ཀྱི་སྤྱོད་པ་རྣམ་པར་འཁྲུགས་ཏེ། དམིགས་བཅས་ཀྱི་སྒོ་ནས་སྦྱིན་སོགས་སྒྲུབ་པའི་ཕྱིར། སེམས་ཅན་བཏགས་དང་སོགས་ལ། སེམས་ཅན་དུ་བཏགས་པ་དང་། དེར་འཇོག་པའི་རྒྱུ་ཕུང་པོ་ཙམ་གྱི་ཡུལ་ཅན་གྱི་རྣམ་རྟོག་ཆོས་ཅན། སྒོམ་ལམ་རྩེ་མོའི་མི་མཐུན་ཕྱོགས་ས་དེའི་སྤང་བྱ་ཡིན་པའི་ཕྱིར། དབྱེ་ན་དགུ་ཡོད་དེ། ཡུལ་དགུ་ཡོད་པའི་ཕྱིར། བདག་ཉིད་ཇི་བཞིན་སོགས་ལ། སྐབས་འདིར་བསྟན་ཡུལ་དགུ་ལ་སྐྱེས་བུ་བཏགས་པ་ཙམ་དུ་འཛིན་པའི་རྟོག་པ་དགུ་ཆོས་ཅན། སྒོམ་སྤང་བཏགས་འཛིན་རྟོག་པ་ཡིན་ཏེ། སྒོམ་ལམ་རྩེ་མོའི་འཇུག་པ་བར་ཆད་མེད་ལམ་གྱི་སྤང་བྱར་གྱུར་པའི་འཛིན་རྟོག་ཡིན་པའི་ཕྱིར། ཉན་རང་གི་ལམ་ཆོས་ཅན། རྣམ་མཁྱེན་གྱི་སྒྲིབ་པ་ལ་ཀུན་ཏུ་རྨོངས་ཏེ། རྒྱུ་འབྲས་ངོ་བོའི་རྣམ་པ་མ་ལུས་པ་ཡོངས་སུ་མ་ཤེས་པའི་ཕྱིར། ལམ་ཤེས་ཀྱི་སྒྲིབ་པ་ལ་ཀུན་ཏུ་རྨོངས་ཏེ། ཐེག་པ་གསུམ་གྱི་ལམ་ཐམས་ཅད་ཡོངས་སུ་མ་ཤེས་པའི་ཕྱིར། ཐམས་ཅད་ཤེས་པ་ཉིད་ཀྱི་སྒྲིབ་པ་ལ་ཀུན་ཏུ་རྨོངས་ཏེ། གཞི་ཐམས་ཅད་སྐྱེ་མེད་དུ་མ་ཤེས་པའི་ཕྱིར། སྒྲིབ་པ་ཐམས་ཅད་ཞི་བའི་ལམ་ལ་རྨོངས་ཏེ། ཆོས་རང་བཞིན་མེད་རྟོགས་ཀྱི་ཤེར་ཕྱིན་ཡོངས་སུ་མ་ཤེས་པའི་ཕྱིར། ཆོས་ཉིད་དེ་བཞིན་ཉིད་དང་ཆོས་གཟུགས་སོགས་མཚུངས་མི་མཚུངས་ལྡན་མི་ལྡན་ལ་ཀུན་ཏུ་རྨོངས་ཏེ། དེ་དག་གཅིག་དང་ཐ་དད་ལས་གྲོལ་བར་ཡོངས་སུ་མ་ཤེས་པའི་ཕྱིར། ཐེག་དམན་དང་རྣམ་མཁྱེན་གྱི་མི་མཉམ་པ་ལ་རྨོངས་ཏེ། ཐེག་ཆེན་ལམ་གྱི་བར་ཆད་ཕྱི་ནང་གི་བདུད་དང་སྡིག་གྲོགས་སོགས་ཀྱི་ངོ་བོ་མི་ཤེས་པའི་ཕྱིར། བདེན་བཞིའི་ངོ་བོ་ལ་རྨོངས་ཏེ། བདེན་བཞི་མི་རྟག་སོགས་སུ་སྟོན་པའི་མདོ་ལ་སྒྲ་ཇི་བཞིན་པར་འཛིན་པའི་ཕྱིར། ཉོན་མོངས་པའི་རང་བཞིན་ལ་རྨོངས་ཏེ། ཆགས་སོགས་ཀྱི་ངོ་བོ་སྟོང་པར་མི་ཤེས་པའི་ཕྱིར། གཉིས་སུ་མེད་པ་ལ་རྨོངས་ཏེ། གཟུང་འཛིན་གྱི་མཚན་ཉིད་སྟོང་པར་མ་ཤེས་པའི་ཕྱིར། ཡམས་ནད་འདི་དག་སོགས་ལ། སྒོམ་ལམ་རྩེ་མོའི་རྣམ་གྲོལ་ལམ་ལ་གནས་པའི་བྱང་སེམས་ཆོས་ཅན། ཐེག་པ་གསུམ་གྱིས་བསྡུས་པའི་ཡོན་ཏན་ཐམས་ཅད་མངོན་དུ་འོང་པའི་རྣམ་པས་རྟེན་ཏེ། ཐེག་པ་གསུམ་གྱི་ཡོན་ཏན་ཐོབ་པའི་གེགས་སྒོམ་སྤང་གཟུང་འཛིན་གྱི་རྣམ་རྟོག་བརྒྱ་རྩ་བརྒྱད་བག་ཆགས་དང་བཅས་པ་སྤངས་པའི་ཕྱིར། དཔེར་ན་རིམས་ནད་མ་ལུས་པ་བྱང་ན་ལུས་སྟོབས་ངང་གིས་འཕེལ་ཞིང་དགའ་བའི་དབུག་འབྱིན་པ་ཐོབ་པ་བཞིན་ནོ། །སྟོང་གསུམ་སྐྱེ་བོ་ཉན་ཐོས་སོགས་ལ་བར་ཆད་མེད་རྩེ་ཆོས་ཅན། མདོ་ལས་སྟོང་གསུམ་གྱི་སྐྱེ་བོ་ཉན་ཐོས་ནས་བྱང་སེམས་ཀྱི་སྐྱོན་མེད་པའི་བར་ལ་བཀོད་པའི་དགེ་བ་ལས་ཁྱོད་ཀྱི་འབྲས་བུ་བསོད་ནམས་ཆེས་མང་པའི་སྒོ་ནས་ཁྱོད་བསྟན་པ་ལ་དགོས་པ་ཡོད་དེ། གདུལ་བྱ་ཁྱོད་ཀྱིས་སྒོམ་པ་ལ་སྤྲོ་བ་བསྐྱེད་པའི་ཆེད་ཡིན་པའི་ཕྱིར། ས་བཅུ་རྒྱུན་མཐའི་ཡེ་ཤེས་ཆོས་ཅན། བར་ཆད་མེད་རྩེ་ཡིན་ཏེ། རྣམ་མཁྱེན་གྱི་ཡེ་ཤེས་སྐྱེད་པ་ལ་སྒྲུབ་བ་གཞན་གྱིས་བར་ཆད་མ་ཆོད་པ་དེ་ཡིན་པའི་ཕྱིར། འདིའི་དམིགས་པ་སོགས་ལ། བར་ཆད་མེད་རྩེ་ཆོས་ཅན། བདེན་མེད་སྒྱུ་མ་ལྟ་བུའི་ཆོས་རྣམས་ཁྱོད་ཀྱི་དམིགས་པ་ཡིན་ཏེ། དེ་ཁྱོད་ཀྱི་ཤེས་རྣམ་གྱིས་བཅད་པར་བྱ་བའི་གཞི་ཡིན་པའི་ཕྱིར། གྲངས་མེད་གསུམ་དུ་སྦྱོར་བཞི་སྒོམ་པའི་དམིགས་རྣམ་མ་བརྗེད་པའི་དྲན་པ་དེ་ཁྱོད་ཀྱི་བདག་རྐྱེན་ཡིན་ཏེ། དེ་མངོན་དུ་བྱས་པའི་དབང་གིས་དེ་འབྱུང་བའི་ཕྱིར། སྤྲོས་པ་ཉེ་བར་ཞི་བའི་རྣམ་པ་ཅན་ཡིན་ཏེ། མཐའ་གང་དུ་མི་རྟོག་པའི་ཡེ་ཤེས་ཡིན་པའི་ཕྱིར། གནས་འདི་ལ་ནི་སོགས་ལ། བར་ཆད་མེད་རྩེ་ཆོས་ཅན། ཁྱོད་ཀྱི་དམིགས་རྣམ་ལ་དངོས་པོ་སྨྲ་བ་རྣམས་ཀྱི་ཀླན་ཀའི་རྒོལ་བ་རྒྱུད་མར་འབྱུང་བའི་རྒྱུ་མཚན་ཡོད་དེ། ཁྱོད་ཀྱི་དམིགས་རྣམ་དངོས་སྨྲ་བ་རྣམས་ཀྱིས་རྟོགས་དཀའ་བའི་ཕྱིར། དམིགས་པ་འཐད་དང་སོགས་ལ། རྣམ་མཁྱེན་གྱི་དམིགས་པ་མི་འཐད་པར་ཐལ། འདུས་བྱས་དང་འདུས་མ་བྱས་ཀྱི་ཁམས་མེད་པའི་ཕྱིར་ཞེས་པའི་ཐལ་བ་ཆོས་ཅན། རྣམ་མཁྱེན་གྱི་དམིགས་པ་ཀུན་རྫོབ་དུ་ཁས་བླངས་པ་ལ་མི་གནོད་དེ། ཀུན་རྫོབ་ཏུ་རྟགས་མ་གྲུབ་ཀྱི་ལན་ཐེབས་པའི་ཕྱིར། ཡང་རྣམ་མཁྱེན་གྱི་དམིགས་པའི་ངོ་བོ་ངེས་པར་གཟུང་དུ་མེད་པར་ཐལ། རྣམ་པ་ཐམས་ཅད་དུ་རང་བཞིན་མེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་རྣམ་མཁྱེན་གྱི་ངོ་བོ་ངེས་པར་གཟུང་བ་ལ་མི་གནོད་དེ། རྟགས་སྔ་མའི་ཕྱིར། རྣམ་མཁྱེན་གྱི་ཡེ་ཤེས་མེད་པར་ཐལ། དངོས་པོ་དང་དངོས་པོ་མེད་པ་མ་དམིགས་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་རྣམ་མཁྱེན་གྱི་ཡེ་ཤེས་ཁས་བླངས་པ་ལ་མི་གནོད་དེ། དུ་མའི་ཕྱིར། བདེན་གཉིས་མི་འཐད་པར་ཐལ། ཆོས་ཐམས་ཅད་དེ་བཞིན་ཉིད་ཀྱི་ངོ་བོ་ཡིན་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་བདེན་གཉིས་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། ལམ་ལ་སྦྱོར་བ་མི་འཐད་པར་ཐལ། སྦྱིན་སོགས་མ་དམིགས་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་ལམ་ལ་སྦྱོར་བ་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། སངས་རྒྱས་དཀོན་མཆོག་མི་མཐད་པར་ཐལ། རྟོགས་བྱ་མེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་སངས་རྒྱས་དཀོན་མཆོག་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། ཆོས་དཀོན་མཆོག་མི་འཐད་པར་ཐལ། སྟོང་པ་ཉིད་ལ་ཆོས་སུ་བཏགས་པ་ཙམ་ཡིན་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་ཆོས་དཀོན་མཆོག་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། དགེ་འདུན་དཀོན་མཆོག་མི་འཐད་པར་ཐལ། དེའི་གདགས་གཞི་གཟུགས་སོགས་མི་དམིགས་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། ཐབས་མཁས་མི་འཐད་པར་ཐལ། དེའི་ངོ་བོ་སྦྱིན་སོགས་མ་དམིགས་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་དེ་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། དེ་བཞིན་གཤེགས་པའི་རྟོགས་པ་མི་འཐད་པར་ཐལ། དེའི་རྟོགས་བྱ་དངོས་པོ་སོགས་ལ་མི་དམིགས་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་དེ་ཁས་བླངས་པ་ལ་མི་གནོད་དེ། དེའི་ཕྱིར། རྟགས་སོགས་ཕྱིན་ཅི་ལོག་མི་འཐད་པར་ཐལ། མི་རྟག་སོགས་ཕྱིན་ཅི་མ་ལོག་པ་མེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་རྟག་སོགས་ཕྱིན་ཅི་ལོག་ཁས་བླངས་པ་ལ་མི་གནོད་དེ། སྔ་མ་དེའི་ཕྱིར། ཐར་པའི་དོན་དུ་ལམ་སྒོམ་པ་མི་འཐད་པར་ཐལ། ལམ་གྱི་འབྲས་བུ་སྔོན་དུ་མི་བྱེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་དེ་ལ་མི་གནོད་དེ། དེའི་ཕྱིར། སྤང་གཉེན་མི་འཐད་པར་ཐལ། བླང་དོར་མེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་དེ་ཡོད་པ་ལ་མི་གནོད་དེ། སྔ་མ་དེའི་ཕྱིར་རོ། །ཆོས་ཀྱི་མཚན་ཉིད་མི་འཐད་པར་ཐལ། ཆོས་ཅན་མེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་དེ་ཡོད་པ་ལ་མི་གནོད་དེ། སྔ་མ་དེའི་ཕྱིར། སྒོམ་པ་མི་འཐད་པར་ཐལ། བསྒོམ་བྱ་རང་སྤྱིའི་མཚན་ཉིད་མེད་པའི་ཕྱིར་ཞེས་པའི་ཐལ་བ་ཆོས་ཅན། ཀུན་རྫོབ་ཏུ་དེ་ཡོད་པ་ལ་མི་གནོད་དེ། དེའི་ཕྱིར། སྐྱེ་བོ་སོགས་ལ། སྐབས་འདིའི་བདེན་གཉིས་འགལ་བར་སེམས་པའི་རྟོག་པ་ཆོས་ཅན། ངེས་པའི་རྣམ་པ་ཅན་ཡིན་ཡང་། དཔྱད་ན་ཐེ་ཚོམ་གྱི་ངོ་བོ་ཡིན་ཏེ། མཐའ་གཞན་དུ་དོགས་པ་མ་དཔྱད་པའི་རྟོག་པ་ཡིན་པའི་ཕྱིར་ཏེ། རྒྱུ་མཚན་ཡང་དག་ལ་མ་བརྟེན་པའི་ཞེན་པ་ཡིན་པའི་ཕྱིར། དེ་བས་ན་སོགས་ལ་བར་ཆད་མེད་པའི་དམིགས་རྣམ་ལ་བདེན་གཉིས་འགལ་བར་རྩོད་པའི་གླན་ཀ་རྣམས་ཆོས་ཅན་དབུ་མ་པ་ལ་གནོད་བྱེད་མ་ཡིན་ཏེ། ཁྱོད་གང་ཡིན་ཀུན་རྫོབ་སྒོ་ཅན་དང་། དོན་དམ་སྒོ་ཅན་གྱི་ཀླན་ཀ་གཉིས་སུ་ངེས་པ་གང་ཞིག །དབུ་མ་པས་ཀུན་རྫོབ་སྒོ་ཅན་ལ་དོན་དམ་གྱི་སྒོ་ནས་ལན་གདབ་ནུས་དོན་དམ་སྒོ་ཅན་ལ་ཀུན་རྫོབ་ཀྱི་སྒོ་ནས་ལན་གདབ་ནུས་པའི་ཕྱིར། བྱང་ཆུབ་སེམས་དཔའ་སོགས་ལ། གདུལ་བྱ་བར་ཆད་མེད་པའི་ཏིང་ངེ་འཛིན་སྐྱེད་པར་འདོད་པའི་བྱང་སེམས་ལྷ་སྦྱིན་ཆོས་ཅན། བར་ཆད་མེད་རྩེའི་འགལ་རྐྱེན་དེའི་དམིགས་རྣམ་ལ་ལོག་པར་རྟོག་པ་ཇི་སྙེད་པ་བསལ་ནས་མཐུན་རྐྱེན་ཡང་དག་པའི་ངེས་པ་གདུལ་བྱ་ལ་སྐྱེ་དགོས་ཏེ། གདུལ་བྱ་ལ་བར་ཆད་མེད་རྩེའི་ཏིང་ངེ་འཛིན་སྐྱེས་པར་འདོད་པའི་ཕྱིར། སྐབས་ལྔ་པའི་ངག་དོན་ནོ།། །།