ཀྱཻ་རྡོ་རྗེའི་ལུས་དཀྱིལ་ལམ་དུས་ཀྱི་དབང་ཆོག་ཏཱ་ར་ནཱ་ཐས་མཛད་པ།
ཀྱཻ་རྡོ་རྗེའི་ལུས་དཀྱིལ་ལམ་དུས་ཀྱི་དབང་ཆོག་ཏཱ་ར་ནཱ་ཐས་མཛད་པ་བཞུགས་སོ།
ན་མོ་གུ་རུ། འདིར་ལམ་འབྲས་བུར་གྲགས་པའི་མན་ངག་གི་རྩ་བ། ལམ་དུས་ཀྱི་དབང་དང་བཅས་པ་ཉམས་སུ་བླང་བའི་རིམ་པ་ལ། ལས་དང་པོ་པས་ཕྱི་དཀྱིལ་དང་སྦྲགས་ཏེ་སྒོམ་དགོས་པ་ལས། ཕྱི་བསྐྱེད་པའི་རིམ་པ་རྒྱས་འབྲིང་བསྡུས་པ་གང་ཡང་རུང་བའི་དམ་ཚིག་པ་བསྐྱེད། ཡེ་ཤེས་པ་སྤྱན་དྲངས་པ་ལ་མཆོད་ཅིང་བསྟོད་ནས། ཨོཾ་བཛྲ་གཽ་རི་ཨཀརྵ་ཡ་ཛ། ཨོཾ་བཛྲ་ཙཽ་རི་པྲ་བེ་ཤ་ཡ་ཧཱུཾ། ཨོཾ་བཛྲ་བཻ་ཏ་ལི་བནྡྷ་བཾ། ཨོཾ་བཛྲ་གྷསྨ་རི་ཝ་ཤཾ་ཀུ་རུ་ཧོ། གཉིས་སུ་མེད་པར་ཐིམ་པའི་རྐྱེན་གྱིས། སྐད་ཅིག་གིས་རང་གི་ལུས་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་གྱུར་པ་ནི། སྤྱི་བོར་སྣ་ཚོགས་རྡོ་རྗེ། རྐང་མཐིལ་རྡོ་རྗེའི་ས་གཞི། རྩིབ་མ་རྡོ་རྗེའི་རྭ་བ། ལྤགས་པ་རྡོ་རྗེའི་གུར་དང་བླ་བྲེ། བ་སྤུ་མདའི་དྲྭ་བ། སེན་མོ་མེ་རི་འབར་བ་སྟེ་བསྲུང་བའི་འཁོར་ལོ་དང༌། རྐང་མཐིལ་རླུང༌། སུམ་མདོ་མེ། ལྟོ་བ་ཆུ། སྙིང་ཁ་ས། སྒལ་ཚིགས་རི་རབ།
མགོ་བོ་རི་རབ་ཀྱི་སྟོད་ཀྱི་ཆ། ལུས་མི་མཉམ་པ་མེད་པ། གྲུ་བཞི་ནི་གཞལ་ཡས་ཁང་གྲུ་བཞི། སྙིང་ཁ་ནས་འབྱུང་བ་བཞིའི་རླུང་རྒྱུ་བ་ནི་སྒོ་བཞི། མིག་པཉྩ་རེ་གའི་རྩིག་པ། སྣ་རིན་པོ་ཆེའི་ཕ་གུ །སོ་དྲྭ་བ་དང་དྲྭ་བ་ཕྱེད་པ། ལྕེ་དང་མཆུ་འདོད་ཡོན་གྱི་སྣམ་བུ། རྣ་བ་རྟ་བབས་རྐང་རྣམས་ཀ་བ་བརྒྱད་དེ་རྟེན་གྱི་དཀྱིལ་འཁོར་དང་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་པའི་ལྟེ་བར་ཨཾ་ལས་ང་རྒྱལ་དང་སེར་སྣ་དང༌། ཚོར་བའི་ཕུང་པོ་རྣམ་པར་དག་པ། བཅོམ་ལྡན་འདས་ཡོན་ཏན་རིན་ཆེན་འབྱུང་ལྡན་སྐུ་མདོག་སེར་པོ། ཞལ་གཅིག་ཕྱག་གཉིས་པ་གཡས་རིན་པོ་ཆེ་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་ས་རྣམ་པར་དག་པ་སངས་རྒྱས་སྤྱན་མ་སེར་མོ་དང་མཉམ་པར་སྦྱོར་བ། ཡུམ་དང་འདྲ་བའི་ལྷ་མོ་དྲུག་ཅུ་རྩ་བཞིས་བསྐོར་བ། མཉམ་པ་ཉིད་ཀྱི་ཡེ་ཤེས། གསང་གནས་བདེ་བ་ཆེན་པོའི་འཁོར་ལོ་རྩ་འདབ་སོ་གཉིས་པའི་ལྟེ་བའི་ཧ་ལས་
ཕྲག་དོག་དང་འདུ་བྱེད་ཀྱི་ཕུང་པོ་རྣམ་པར་དག་པ། བཅོམ་ལྡན་འདས་འཕྲིན་ལས་དོན་ཡོད་གྲུབ་པ་སྐུ་མདོག་ལྗང་ཁུ། ཞལ་གཅིག་ཕྱག་གཉིས་པ། གཡས་རལ་གྲི་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རླུང་རྣམ་པར་དག་པ་དམ་ཚིག་སྒྲོལ་མ་དང་མཉམ་པར་སྦྱོར་བ། ཡུམ་དང་འདྲ་བའི་ལྷ་མོ་སུམ་ཅུ་རྩ་གཉིས་ཀྱིས་བསྐོར་བར་བྱ་བ་གྲུབ་པའི་ཡེ་ཤེས། སྙིང་ག་ཆོས་ཀྱི་འཁོར་ལོ། རྩ་འདབ་བརྒྱད་ཀྱི་ལྟེ་བའི་ཧཱུཾ་ལས་ཞེ་སྡང་དང་རྣམ་པར་ཤེས་པའི་ཕུང་པོ་རྣམ་པར་དག་པ། བཅོམ་ལྡན་འདས་ཐུགས་རྡོ་རྗེ་མི་བསྐྱོད་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་ཆུ་རྣམ་པར་དག་པ་མཱ་མ་ཀཱི་སྔོན་མོ་དང་མཉམ་པར་སྦྱོར་བ། ཡུམ་དང་འདྲ་བའི་ལྷ་མོ་བརྒྱད་ཀྱིས་བསྐོར་བ། མེ་ལོང་ལྟ་བུའི་ཡེ་ཤེས། མགྲིན་པ་ལོངས་སྤྱོད་འཁོར་ལོ་རྩ་འདབ་བཅུ་དྲུག་པའི་ལྟེ་བའི་ཨོཾ་ལས་འདོད་ཆགས་དང་འདུ་ཤེས་ཀྱི་ཕུང་པོ་རྣམ་པར་དག་པ། བཅོམ་ལྡན་འདས་གསུང་རྡོ་རྗེ་འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་པདྨ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་མེ་རྣམ་པར་དག་པ་གོས་དཀར་མོ་དམར་མོ་དང་མཉམ་པར་སྦྱོར་བ། ཡུམ་དང་འདྲ་བའི་ལྷ་མོ་བཅུ་དྲུག་གིས་བསྐོར་བ་སོ་སོར་རྟོག་པའི་ཡེ་ཤེས། སྤྱི་བོ་བདེ་བ་ཆེན་པོའི་འཁོར་ལོ། རྩ་
འདབ་སུམ་ཅུ་སོ་གཉིས་པའི་ལྟེ་བའི་ཧཾ་ལས། གཏི་མུག་དང་གཟུགས་ཀྱི་ཕུང་པོ་རྣམ་པར་དག་པ། བཅོམ་ལྡན་འདས་སྐུ་རྡོ་རྗེ་རྣམ་པར་སྣང་མཛད་སྐུ་མདོག་དཀར་པོ། ཞལ་གཅིག་ཕྱག་གཉིས་པ། གཡས་འཁོར་ལོ་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་ནམ་མཁའི་ཁམས་རྣམ་པར་དག་པ་རྡོ་རྗེ་དབྱིངས་ཀྱི་དབང་ཕྱུག་མ་དཀར་མོ་དང་མཉམ་པར་སྦྱོར་བ། ཡུམ་དང་འདྲ་བའི་ལྷ་མོ་སུམ་ཅུ་རྩ་གཉིས་ཀྱིས་བསྐོར་བ་ཆོས་ཀྱི་དབྱིངས་ཀྱི་ཡེ་ཤེས། གཙོ་བོ་ལྔ་པོ་ཐམས་ཅད་མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། གཡས་བརྐྱང་གི་གར་སྟབས་ཅན། སྤྱན་གསུམ་པ། ཡབ་ལྔ་པོ་གྲི་གུག་དང་ཐོད་པ་འཛིན་པས་ཡུམ་ལ་འཁྱུད་པ། ཡུམ་ལྔ་གཡོན་བརྐྱང་གི་གར་སྟབས་ཀྱི་ཡབ་ལ་འཁྱུད་པ། ཐམས་ཅད་ཀྱང་རུས་པའི་རྒྱན་གྱིས་བརྒྱན་པ་འཁོར་རྣམས་གཡས་པའི་ཕྱག་མཚན་འཕྱར་ཐབས་དང༌། གཡོན་པས་ཐོད་པ་ཐུགས་ཀར་གཏོད་པའོ། །གཞན་ཡང་མིག་ཏུ་ས་སྙིང་དཀར་པོ་འཁོར་ལོ་འཛིན་པ། རྣ་བར་ཕྱག་རྡོར་སྔོན་པོ་རྡོ་རྗེ་འཛིན་པ། སྣར་མཁའ་སྙིང་སེར་པོ་ནོར་བུ་འཛིན་པ། ལྕེར་སྤྱན་རས་གཟིགས་དམར་པོ་པདྨ་འཛིན་པ། དཔྲལ་བར་སྒྲིབ་སེལ་ལྗང་ཁུ་རལ་གྲི་འཛིན་པ། སྙིང་ཁར་ཀུན་བཟང་དཀར་པོ་རྡོ་རྗེ་འཛིན་པ། གཞན་ཡང་མིག་ཏུ་གཟུགས་གཽ་རི། རྣ་བར་སྒྲ་ཙཽ་རི། སྣར་དྲི་བཻ་ཏ་ལི།
ལྕེར་རོ་གྷསྨ་རི། དཔྲལ་བར་རེག་ས་སྤྱོད་མ། སྙིང་གར་ཆོས་ཁམས་མཁའ་སྤྱོད་མ། དེ་རྣམས་སྐུ་མདོག་ནག་པོ་འདབ་མའི་ལྷ་དང་མཚུངས་པའོ། །ལག་པ་གཡས་པར་གཤིན་རྗེ་མཐར་བྱེད་སྔོན་པོ་ཐོད་པ་འཛིན་པ། ལག་པ་གཡོན་པར་ཤེས་རབ་མཐར་བྱེད་དཀར་པོ་བེ་ཅོན་འཛིན་པ། ལྕེར་པདྨ་མཐར་བྱེད་དམར་མོ་པདྨ་འཛིན་པ། གསང་གནས་སུ་བགེགས་མཐར་བྱེད་སྔོ་བསངས་རྡོ་རྗེ་འཛིན་པ། དཔུང་པ་གཡས་པར་མི་གཡོ་བ་སྔོ་སྐྱ་རལ་གྲི་འཛིན་པ། དཔུང་པ་གཡོན་པར་འདོད་པའི་རྒྱལ་པོ་སྔོན་པོ་ལྕགས་ཀྱུ་འཛིན་པ། པུས་མོ་གཡས་པར་དབྱུག་སྔོན་ཅན་སྔོན་པོ་དབྱུག་པ་འཛིན་པ། པུས་མོ་གཡོན་པར་སྟོབས་པོ་ཆེ་དུད་ནག་རྩེ་གསུམ་འཛིན་པ། སྤྱི་གཙུག་ཏུ་གཙུག་ཏོར་འཁོར་ལོར་བསྒྱུར་བ་སེར་པོ་འཁོར་ལོ་འཛིན་པ། རྐང་མཐིལ་གཉིས་སུ་གནོད་མཛེས་རྒྱལ་པོ་སྔོན་པོ་གཏུན་ཤིང་འཛིན་པ། དེ་ཐམས་ཅད་གཡོན་བརྐྱང་གིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ལྷ་དེ་དག་ཐམས་ཅད་སྐུའི་དབྱིབས་རྣམ་པར་བདེ་བ། རང་བཞིན་གསལ་སྟོང༌། ངོ་བོ་ཟུངའཇུག །གཞན་ཡང་ལུས་རྩ་སྤྲུལ་པའི་སྐུ། རྩ་ཡི་གེ་ལོངས་སྤྱོད་རྫོགས་པའི་སྐུ། ཁམས་བདུད་རྩི་ཆོས་ཀྱི་སྐུ། སྙིང་པོ་ཡེ་ཤེས་རླུང༌། ངོ་བོ་ཉིད་ཀྱིས་སྐུར་གྱུར། རང་གི་སྙིང་ཁའི་ས་བོན་ལས་འོད་ཟེར་འཕྲོས་པས། དབང་གི་ལྷ་དེ་བཞིན་གཤེགས་པ་རིགས་ལྔ། ཡུམ་བཞི། བྱང་ཆུབ་སེམས་དཔའ་བརྒྱད། ལྷ་མོ་དྲུག ཁྲོ་བོ་བཅུ་དང་
བཅས་པ། ཨོཾ་བྷ་ག་ཝན་མཧཱ་ཀ་རུ་ཎི་ཀ་ཧེ་བཛྲ་པཉྩ་ཀུ་ལ་ས་པ་རི་ཝ་ར་བཛྲ་ས་མཱ་ཛཿ དཀར་མོའི་རི་དྭགས། ནས། གཡུང་མོ་སྐུ་ལ་འཁྱུད་པ་ཉིད། །ཞེ་སྡང་རྡོ་རྗེ་ཕྱག་འཚལ་བསྟོད་སོགས།ཨོཾ་བཛྲ་བྷཱུ་མི་ཨཱཿཧཱུཾ། དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུཾ། ཕྱི་ལྕགས་རི་འཁོར་ཡུག་གིས་བསྐོར་བའི་དབུས་སུ། ཧཱུཾ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང༌། ནུབ་བ་ལང་སྤྱོད། བྱང་སྒྲ་མི་སྙན། ཉི་མ་ཟླ་བ། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་གང་ཡང་མ་ཚང་བ་མེད་པ། འདི་ཉིད་དཔལ་ལྡན་བླ་མ་དམ་པ་རྣམས་ལ་དབང་བསྐུར་ཟབ་མོ་ཞུ་བའི་ཡོན་དུ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བྱིན་གྱིས་བརླབ་ཏུ་གསོལ། བྱང་ཆུབ་རྡོ་རྗེ། སོགས། ལན་གསུམ། ཨོཾ་སྭ་བྷཱ་ཝ༴ བདག་དང་དབང་རྫས་རྣམ་རྒྱལ་བུམ་པའི་ཆུར་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་སྔོན་པོ་ལྟེ་བ་ལ་ཧཱུཾ་གིས་མཚན་པ། དེ་ལས་འོད་འཕྲོས་ཚུར་འདུས་གཅིག་ཏུ་གྱུར་པ་ལས་གཉིས་ཀ་མི་བསྐྱོད་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་རྡོ་རྗེ་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་མཱ་མ་ཀཱི་སྔོན་པོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ།
གཉིས་ཀའང་རུས་པའི་རྒྱན་གྱིས་བརྒྱན་པའི་མིག་ཏུ་གཏི་མུག་རྡོ་རྗེ་མ། རྣ་བར་ཞེ་སྡང་རྡོ་རྗེ་མ། སྣ་ལ་སེར་སྣ་རྡོ་རྗེ་མ། ཁ་ལ་འདོད་ཆགས་རྡོ་རྗེ་མ། ལུས་ལ་ཕྲག་དོག༴ ཡིད་ལ་བདག་མེད༴ སྤྱི་བོར་སྐུ༴ མགྲིན་པར་གསུང་༴ ཐུགས་ཀར་ཐུགས་རྡོ་རྗེ་མ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་མི་བསྐྱོད་པ་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿགཉིས་སུ་མེད་པར་ཐིམ། ཨོཾ་བཛྲ་བྷ་ཝ་བྷི་ཥིཉྩ་ཧཱུཾ། དབང་རྫས་ལ་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན། དབང་རྫས་ཀྱི་མི་བསྐྱོད་པ་ཡབ་ཡུམ་སྙོམས་པར་ཞུགས་ཏེ། ཞུ་བ་ལས་བྱུང་བའི་དབང་རྫས་རྣམ་རྒྱལ་བུམ་པའི་ཆུར་གྱུར། ཞེས་བརྗོད། དེ་ནས་བཅོམ་ལྡན་དེ་བཞིན་གཤེགས་པ་ཀུན། །སོགས་དང༌། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། སངས་རྒྱས་རྣམས་ནི་ཐམས་ཅད་ཀྱི། །ཞེས་སོགས་བརྗོད་ཅིང༌། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ་ཞེས་གསུངས་ཤིང༌། དེ་བཞིན་གཤེགས་པ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། རིག་མ་རྣམས་ཀྱི་རྡོ་རྗེ་གླུ་ལེན། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་རྗོད། ཁྲོ་བོ་རྣམས་ཀྱིས་བགེགས་བསྐྲད། ལྷ་མོ་རྣམས་ཀྱིས་ནི་མཆོད། དབང་གི་ཆུ་རྒྱུན་གྱིས་
སྨིན་མཚམས་ཡན་ཆད་གང་བས་བུམ་པའི་དབང་ཐོབ། མགྲིན་པ་ཡན་ཆད་གང་བས་གསང་བའི་དབང་ཐོབ། སྙིང་ཁ་ཡན་ཆད་གང་བས་ཤེས་རབ་ཡེ་ཤེས་ཀྱི་དབང་ཐོབ། ལུས་ཐམས་ཅད་གང་བས་མཆོག་ཏུ་བདེ་བ་ཆེན་པོ་བཞི་དབང་ཐོབ། ལུས་ངག་ཡིད་གསུམ་གྱི་དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པའི་དབུ་བརྒྱན་ཉེར་སྤྱོད་ལྔས་མཆོད། དེ་ལྟར་ན་ཆུའི་དབང་ཐོབ། ཞེ་སྡང་དག །རྣམ་པར་ཤེས་པའི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། མི་བསྐྱོད་པའི་གོ་འཕང་མངོན་དུ་གྱུར་པའི་སྐལ་བ་ཅན་དུ་བྱས་པ་ཡིན་ནོ། །ཅོད་པན་ནས། བརྟུལ་ཞུགས་ཀྱི་བར་ལ་རྒྱས་པར་ནི་ཆུ་དབང་དང་འདྲ་ལ།ཅུང་ཟད་བསྡུ་ན། ཨོཾ་སྭ་བྷཱ་ཝ༴ བདག་དང་དབང་རྫས་དབུ་རྒྱན་སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཨཾ་ལས་རིན་པོ་ཆེ་སེར་པོ་ཨཾ་གིས་མཚན་པ། དེ་ལས་འོད་འཕྲོས་འདུས་གཅིག་ཏུ་གྱུར་པ་ལས། གཉིས་ཀ་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་རིན་པོ་ཆེ་དང༌། གཡོན་དེས་ཡུ་བ་བྱས་པའི༴ ཡུམ་རིན་ཆེན་སྒྲོལ་མ་སེར་མོ་གཡས་གྲི་གུག་དང་༴ གཉིས་ཀའང་རུས་པའི་རྒྱན་གྱིས་བརྒྱན་པ། དཔྲལ་བར་ཨོཾ། མགྲིན་པར་ཨཱ། ཐུགས་ཀར་ཧཱུཾ། ཐུགས་ཀའི་
ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི༴ རིན་ཆེན་འབྱུང་ལྡན་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ དབང་རྫས་ལ་དབང་བསྐུར། རིན་ཆེན་འབྱུང་ལྡན་གྱིས་དབུ་བརྒྱན། དབང་རྫས་ཀྱི་རིན་ཆེན་འབྱུང་ལྡན་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་རིན་པོ་ཆེའི་དབུ་རྒྱན་དུ་གྱུར། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། སངས་རྒྱས་རྣམས་ནི་ཐམས་ཅད་ཀྱི། །ནས། རིན་ཆེན་དབང་བསྐུར་ཆེན་པོར་སྦྱིན། །ཨོཾ་བཛྲ་རཏྣ་མུ་ཀུ་ཊ་ཨབྷི་ཥིཉྩ་ཧཱུཾ། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། བུམ་པའི་ཆུས་སྤྱི་བོ་ནས་དབང་བསྐུར། ལུས་ཐམས་ཅད་གང༌། དྲི་མ་ཐམས་ཅད་དག །ཆུའི་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱི་དབུ་བརྒྱན། ཨོཾ་བཛྲ་པུཥྤེ་ཨཱཿཧཱུཾ། སོགས། དེ་ལྟར་ན་ཅོད་པན་གྱི་དབང་ཐོབ། ང་རྒྱལ་སེར་སྣ་དག །ཚོར་པའི་ཕུང་པོ༴ མཉམ་པ་ཉིད་ཀྱི་ཡེ་ཤེས༴ ཨོཾ་སྭ་བྷཱ་ཝ༴ སོགས། བདག་དང་དབང་རྫས་རྡོ་རྗེ་སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་སྟེང་དུ། ཛྲྀཾ་ལས་པདྨ་དམར་པོ་ཛྲྀཾ་གིས་མཚན་པ། དེ་ལས་འོད་འཕྲོས། གཉིས་ཀ་འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་པདྨ་དང༌། གཡོན་དེས་ཡུ་བ། ཡུམ་གོས་དཀར་མོ་དམར་མོ་གྲི་གུག༴
ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི༴ འོད་དཔག་མེད་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ འོད་དཔག་མེད་ཀྱིས་དབུ་བརྒྱན་དབང་རྫས་ཀྱི་འོད་དཔག་མེད་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་རྡོ་རྗེར་གྱུར། དེ་བཞིན་གཤེགས་པ་ཐམས་ཅད་ཀྱིས་བདག་ལ༴ སངས་རྒྱས་ཀུན་གྱི་རྡོ་རྗེའི་དབང༌། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང༌། །ཨོཾ་མཧཱ་བཛྲ་ཧཱུཾ། ཨོཾ་བཛྲ་བྷཱ་ཝ༴ འོད་དཔག་མེད་ཀྱི༴ ཨོཾ་བཛྲ་པུཥྤེ། ནས། ཤབྟ་ཨཱཿཧཱུཾ། དེ་ལྟར་ན་རྡོ་རྗེའི་དབང་ཐོབ་འདོད་ཆགས་དག །འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་མངོན་དུ་བྱས། འོད་དཔག་མེད་ཀྱི་གོ༴ ཨོཾ་སྭ་བྷཱ་ཝ༴ བདག་དང་དབང་རྫས་དྲིལ་བུ་སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཁཾ་ལས་རལ་གྲི་སྔོ་བསངས་སམ་ལྗང་ཁུ་ཁཾ་གིས་མཚན་པ། དེ་ལས་འོད་འཕྲོས། གཉིས་ཀ་དོན་ཡོད་གྲུབ་པ་སྐུ་མདོག་ལྗང་ཁུ་ཞལ་གཅིག་ཕྱག་གཉིས་པ། གཡས་རལ་གྲི་དང་གཡོན་དེས་ཡུ་བ་བྱས་པའི༴ ཡུམ་དམ་ཚིག་སྒྲོལ་མ་ལྗང་གུ་གཡས་གྲི་གུག༴ ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི༴ དོན་ཡོད་གྲུབ་པ་ཡབ་ཡུམ་གྱི་རྣམ་པར་
བཛྲ་ས་མཱ་ཛཿ དོན་ཡོད་གྲུབ་པས་དབུ་བརྒྱན། དབང་རྫས་ཀྱི་དོན་ཡོད་གྲུབ་པ་ཡབ་ཡུམ་སྙོམས་པར་ཞུགས། ཞུ་བ་ལས་བྱུང་བའི་དབང་རྫས་དྲིལ་བུར་གྱུར། དེ་བཞིན་གཤེགས་པ་ཐམས་ཅད་ཀྱིས༴ ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མཾ། ཏིཥྛ་བཛྲ་ས་མཱ་ཡེ་སྟཾ། ཨོཾ་བཛྲ་བྷ་ཝ༴ དོན་ཡོད་གྲུབ་པས་དབུ་བརྒྱན། ཨོཾ་བཛྲ་པུཥྤེ༴ སོགས། དེ་ལྟར་ན་དྲིལ་བུའི་དབང་ཐོབ། ཕྲག་དོག་དག །འདུ་བྱེད་ཀྱི་ཕུང་པོ་གནས་གྱུར། བྱ་བ་གྲུབ་པའི་ཡེ་ཤེས་མངོན་དུ་བྱས། དོན་ཡོད་གྲུབ་པའི༴ ཨོཾ་སྭ་བྷཱ་ཝ༴ རང་ཉིད་མི་དམིགས་ཏེ་སྟོང་པའི་ངང་ལས་པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། བྷྲུཾ་ལས་འཁོར་ལོ་དཀར་པོ་བྷྲུཾ་གྱིས་མཚན་པ། དེ་ལས་འོད་འཕྲོས༴ བདག་ཉིད་རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་འཁོར་ལོ་དང་གཡོན་དེས་ཡུ་བ༴ ཡུམ་སངས་རྒྱས་སྤྱན་མ་དཀར་མོ་གཡས་གྲི་གུག༴ ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི༴ རྣམ་པར་སྣང་མཛད་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དེ་བཞིན་གཤེགས་པ་ཐམས་ཅད་ཀྱིས༴ ཨོཾ་བཛྲ་སཏྭ་སྟྭཾ། ཨ་བྷི་ཥིཉྩ་བཛྲ་ན་མ་ཨ་བྷི་ཥེ་ཀ་ཏ། ཀྱཻ་དཔལ་ཆེན་ཆེ་གེ་མོ་རྡོ་རྗེ་ཞེས་བྱ་བའི་དེ་བཞིན་གཤེགས་པའོ། །ཨོཾ་བཛྲ་བྷ་ཝཱ༴
ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱི་དབུ་བརྒྱན། ཨོཾ་བཛྲ་པུཥྤེ། སོགས་ནས། དེ་ལྟར་ན་མིང་གི་དབང༴ གཏི་མུག༴ གཟུགས་ཀྱི་ཕུང་པོ༴ ཆོས་ཀྱི་དབྱིངས་ཀྱི་ཡེ་ཤེས༴ རྣམ་པར་སྣང་མཛད་ཀྱི་གོ་འཕང་མངོན་དུ་གྱུར་པའི་སྐལ་བ་ཅན་དུ་བྱས་པ་ཡིན་ནོ། །དངོས་ཀུན་གང་དང་གང་སྣང་བ། །གཙོ་དེ་རང་གི་ལྷག་པའི་ལྷ། །ཆོས་རྣམས་རང་བཞིན་རྙོག་མེད་དག །སངས་རྒྱས་ཡེ་ཤེས་ལྟ་བར་གྱིས། །ཨོཾ་སྭ་བྷཱ་ཝ༴ པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ། དེ་ལས་འོད་འཕྲོས་འདུས་གཅིག་ཏུ་གྱུར་ལ་ལས། བདག་ཉིད་རྡོ་རྗཻ་སེམས་པ་སྐུ་མདོག་དཀར་པོ་གཡས་རྡོ་རྗེ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་སྐུ་མདོག་དཀར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། གཉིས་ཀའང་རུས་པའི་རྒྱན་གྱིས་བརྒྱན་པའི། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་རྡོ་རྗེ་སེམས་དཔའ་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་བྷ་ཝ་ཨ་བྷི་ཥིཉྩ་
ཧཱུཾ། བུམ་པའི་ཆུས་སྤྱི་བོ་ནས་དབང་བསྐུར། ནས་ཆུའི་ལྷག་མ་ཡར་ལུད་པ་ལས། མི་བསྐྱོད་པས་དབུ་བརྒྱན། འདི་སྟེ་སངས་རྒྱས་ཐམས་ཅད་དེ། །སོགས་དང༌། བརྟུལ་ཞུགས་བརྟན། ཨོཾ་སརྦ་ཏ་ཐཱ་ག་ཏ༴ ཧི་ཧཱུཾཾ། ཞེས་བརྗོད། དེ་ནས། མཎྜལ་གླིང་བཞི་རི་རབ་ཉི་ཟླ་ཟུང་གཅིག །ལྷ་མིའི་དཔལ་འབྱོར་ཕུན་སུམ་ཚོགས༴ དཔལ་ལྡན་བླ་མ་དམ་པ་ལ་བུམ་པའི་དབང་བསྐུར་བ་ཞུ་བའི་ཡོན་དུ་འབུལ་བ༴ བརླབ་ཏུ་གསོལ། ཅེས་བརྗོད། དེ་ནས། མི་ལྡོག་འཁོར་ལོའི་དབང་བསྐུར་བ། །མགོན་པོས་བདག་ལ་སྩལ་ནས་ཀྱང༌། །འཁོར་ལོ་ལྷ་ཡི་དེ་ཉིད་དང༌། །སློབ་དཔོན་འཕྲིན་ལས་ཡོངས་སུ་གསུངས། །སངས་རྒྱས་ཀུན་གྱི་དམ་ཚིག་དང༌། །སྡོམ་པའང་བླ་ན་མེད་པ་སྩོལ། །ལན་གསུམ། འདི་དེ་སངས་རྒྱས་ཐམས་ཅད་དེ། །ནས། བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག༴ ཧི་ཧཱུཾ། ཞེས་བརྗོད། ཐོག་མཐའ་མེད་པའི༴ དང་པོའི་སྐྱེས་བུ་ལའོ། །ཨོཾ་བཛྲ་མཧཱ་ཧཱུཾ། ཞེས་བརྗོད། འདི་ནི་རྣལ་འབྱོར་མ་ཀུན་གྱི་སོགས། རྒྱལ་བས་བཞེད། ཨ་སྲིད་པ་ངོ་བོ༴ སོགས། དམ་པ་བྱེད་པར་གྱུར། ཨོཾ་བཛྲ་གནྡྷེ་ཨ། བདག་ཉིད་རྡོ་རྗེ་འཆང་ཆེན་པོ་སྐུ་མདོག་སྔོན་པོ། ཞལ་གཅིག་ཕྱག་གཉིས་པ། གཡས་རྡོ་རྗེ་དང༌། གཡོན་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་སྐུ་མདོག་སྔོན་མོ་གྲི་གུག་དང༌།
ཐོད་པ་འཛིན་པ་དང་མཉམ་པར་སྦྱོར་བ། གཉིས་ཀའང་རུས་པའི་རྒྱན་གྱིས་བརྒྱན་པའི་མིག་ཏུ་གཏི་མུག་རྡོ་རྗེ་མ༴ ནས། ཐུགས་ཀར་ཐུགས་རྡོ་རྗེ་མ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་རྡོ་རྗེ་འཆང་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ གཉིས་སུ་མེད་པར་ཐིམ། རྡོ་རྗེ་ཆེ་དང་དྲིལ་བུ་ཆེ། །སོགས། སློབ་མའི་ཚོགས་རྣམས་བསྡུ་བར་གྱིས། །ཤེས་རབ་བཅུ་དྲུག་ལོན་པ་ལ། །སོགས་ནས། ཡིད་ཀྱི་ལུས་ནི་བསྟན་ཕྱིར་རོ། །སངས་རྒྱས་རྣམས་ནི་ཐམས་ཅད་ཀྱི། །གསང་གསུམ༴ ནས། རྡོ་རྗེ་དབང་བསྐུར་ཆེན་པོ་སྦྱིན། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། བུམ་པའི་ཆུས་སྤྱི་བོ་ནས་དབང་བསྐུར། ཆུའི་ལྷག་མ་ཡར་ལུད་པ་ལས། རྡོ་རྗེ་འཆང་ཆེན་པོས་དབུ་བརྒྱན། ཨོཾ་སུ་པྲ༴ ཨོཾ་བཛྲ་པུཥྤེ་ཨཱཿཧཱུྃ། ནས། ཤབྷ་ཨཱཿཧཱུྃ། དེ་ལྟར་ན་བླ་མའི་སྐུའི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི་དྲི་མ་དག་ལམ་བསྐྱེད་རིམ་བསྒོམ་པ་ལ་དབང༌། འབྲས་བུ་སྤྲུལ་པའི་སྐུའི་གོ་འཕང་མངོན་དུ་འགྱུར་བའི་སྐལ་བ་ཅན་དུ་བྱས་པ་ཡིན་ནོ། །ཞེས་བརྗོད་དེ་བུམ་པའི་དབང་ངོ༌། །དེ་ནས་གསང་བའི་དབང་གི་དོན་དུ། མཎྜལ་ཕུལ། ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ནས། ཧེ་རུ་ཀ་དཔལ་རྡོ་རྗེ་ཡིད་ཀྱིས་དགེས། །དེ་ནས། བཅོམ་ལྡན་ཞི་བ། ནས། བྱིང་བ་སྐྱབས་མེད་བདག་ལ་
སྐྱོབས། །ཨོཾ་ཨཱཿཧཱུཾ། གདོང་བཅིངས། དེ་ནས་བླ་མ་ཧེ་རུ་ཀ་ཡབ་ཡུམ་ཐབས་ཤེས་སྙོམས་པར་ཞུགས་པའི་སྒྲས། དེ་བཞིན་གཤེགས་པ་རྣམས་སྤྱན་དྲངས་ནས་ཞལ་དུ་ཞུགས། རྗེས་ཆགས་ཀྱི་མེས་འོད་དུ་ཞུ། རྡོ་རྗེའི་ལམ་ནས་ཡུམ་གྱི་མཁར་བབས་པའི་བྱང་ཆུབ་སེམས་ཀྱི་ཐིག་ལེ་མུ་ཏིག་གི་རྡོག་མ་ལྟ་བུ་བདག་གི་ལྕེ་ཐོག་ཏུ་བཞག །ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་ལ་དབང་བསྐུར་ལྟར། །སོགས། དབང་བསྐུར་རོ། །ཨོཾ་ཨཱཿ ཧཱུྃ། ཐིག་ལེ་མགྲིན་པར་ཐིམ་པས་བདེ་བ་ཆེན་པོའི་ཡེ་ཤེས་སྐྱེས་པར་བསམ་མོ། །ཨོཾ་ཨཱཿཧཱུྃ། གདོང་བསལ། དེ་ལྟར་ན་རྫས་གསང་བ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་བསྐུར་བ་ཐོབ། ངག་གི་དྲི་མ་དག །ལམ་ཙཎྜ་ལི་སྒོམ་པ་ལ་དབང༌། འབྲས་བུ་ལོངས་སྤྱོད་རྫོགས་པའི་སྐུའི༴ ཞེས་བརྗོད། གསང་དབང་ངོ༌། །དེ་ནས་ཤེས་རབ་ཡེ་ཤེས་ཀྱི་དབང་གི་དོན་དུ། མཎྜལ་གླིང་བཞི་རི་རབ་ནས། ཤེས་རབ་ཡེ་ཤེས་ཀྱི་དབང་བསྐུར་སོགས། གོང་ལྟར། བསྟོད་པ་གསོལ་བཏབ་གསང་དབང་ལྟར་བྱས་ལ། ཨོཾ་ཨཱཿཧཱུྃ། གིས་གདོང་བཅིངས། བླ་མས། དགའ་སྟེར། སོགས། རྟག་ཏུ་གྱིས། ཞེས་རིག་མ་སྦྱིན། རིག་མས་བཤང་གཅི་དག་ནི།སོགས། སྤྲོ་གྱུར་ཏམ། དྲིས་པའི་ལན་དུ། བཤང་གཅི་དག་ནི། སོགས། སྤྲོ་གྱུར་ཏོ། །རིག་མས། ཨེ་མ་ང་ཡི་པདྨ༴ སོགས་མཆོག་གི་དངོས་གྲུབ་མེད། བྷནྫ་མོ་ཀྵ་ཧོ། །
ཞེས་པང་དུ་བྱོན། ཡུམ་གྱི་མཁའ་མི་དམིགས་ནས། ཨཱཿས་མཚན་པ། ཡབ་ཀྱི་གསང་གནས་མི་དམིགས་ནས། ཧཱུྃ་གིས་མཚན་པ། བདག་ཉིད་ཧེ་རུ་ཀ་ཡབ་ཡུམ་རྗེས་སུ་ཆགས་པས་སྙོམས་པར་ཞུགས་ནས་ལུགས་འབྱུང་དང་ལུགས་བཟློག་གི་དགའ་བཞི་མངོན་དུ་བྱས་པར་གྱུར། ཨོཾ་ཨཱཿཧཱུཾ། གདོང་གཡོགས་བསལ་ཏེ། དེ་ལྟར་ན་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ། ཡིད་ཀྱི་དྲི་མ་དག།ལམ་ཕོ་ཉའི་ལམ་སྒོམ་པ་ལ་དབང༌། འབྲས་བུ་ཆོས་ཀྱི་སྐུ། ཤེས་རབ་ཡེ་ཤེས་ཀྱི་དབང་ངོ༌། །དེ་ནས་དབང་བཞི་པའི་དོན་དུ། །མཎྜལ་བསྡུས་པ་ཕུལ། མགོན་པོ་ཐུགས་རྗེ་ཆེ་ལྡན་པས། །དབང་བསྐུར་གསུམ་པོ་བདག་ལ་གནང༌། །རྣམ་པ་ཀུན་གྱི་མཆོག་གྱུར་པའི། །བཞི་པ་ཡང་ནི་བྱིན་གྱིས་རློབས། ལན་གསུམ་གྱིས་གསོལ་བ་བཏབ། ཨོཾ་ཨཱཿཧཱུཾ། ཞེས་གདོང་གཡོགས་བཅིངས། ཡེ་ཤེས་འདི་ནི་ཆེས་ཕྲ༴ སོགས། ཁྱོད་རང་ཡང་ནི་དེ་ཡིས་ཕ། །ཞེས་མཉམ་པར་བཞག་གོ །ཨོཾ་ཨཱཿཧཱུྃ། གདོང་གཡོགས་བསལ་ལོ། །དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ། ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག །ལམ་རྡོ་རྗེའི་རྦ་རླབས་སྒོམ་པ་ལ་དབང༌། འབྲས་བུ་ངོ་བོ་ཉིད་སྐུའི་གོ་འཕང་མངོན་དུ་འགྱུར་པའི་སྐལ་བ་ཅན་དུ་བྱས་པ་ཡིན་ནོ། །དབང་བཞི་པའོ། །གཙོ་བོས་ཇི་ལྟར༴ སོགས་ལན་གསུམ། མཎྜལ་བསྡུས་པ་ཕུལ་བ་ལས།
བཀའ་དྲིན་གཏང་རག་གི །ཞེས་འདོན་པ་སྤོས། དེང་ནས་བརྩམ་སྟེ༴ སོགས་ལན་གསུམ། དེ་ལྟར་ན་དབང་གི་ཆུ་རྒྱུན་གྱིས་ལུས་ཐམས་ཅད་གང༌། དྲི་མ་ཐམས་ཅད་དག །ཆུའི་ལྷག་མ་ཡར་ལུད་པ་ལས། གཙོ་བོ་ཡབ་ཡུམ་གཉིས། གཽ་རི་དང་པུཀྐ་སི་ལ་མི་བསྐྱོད་པ། ཙཽ་རི་དང་ཤ་བ་རི་ལ་རྣམ་པར་སྣང་མཛད། བཻ་ཏ་ལི་དང་ཙཎྜ་ལི་ལ་རིན་ཆེན་འབྱུང་ལྡན། གྷསྨ་རི་དང་ཌོམྦྷི་ནི་ལ་འོད་དཔག་མེད། ལུས་དཀྱིལ་གྱི་ལྷ་ཐམས་ཅད་ལ་རྡོ་རྗེ་སེམས་དཔས་དབུ་བརྒྱན་པའམ། སོ་སོའི་རིགས་བདག་གིས་རྒྱས་བཏབ། དབང་འབྲིང་དུ་ལེན་ན། དབང་ལྷ་སྤྱན་དྲངས་མཆོད་ཅིང་གསོལ་བ་བཏབ་པ་ཡན་ཆད་རྒྱས་པ་བཞིན་བྱས་ལ། རྡོ་རྗེ་ཆེ་དང༌། སོགས། སློབ་མའི་ཚོགས་རྣམས་བསྡུ་བར་གྱིས། །ཞེས་པས་བླ་མ་འི་སྐུའི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི༴ སོགས། སྤྲུལ་པའི་སྐུའི་བག་ཆགས་རྒྱུད་ལ་བཞག །ཇི་ལྟར་འདས་པའི། སོགས། རྒྱུན་གྱིས་དབང་བསྐུར་རོ། །ཞེས་ཀུན་རྫོབ་བྱང་ཆུབ་སེམས་ཀྱི༴ ཞེས་སོགས་གོང་ལྟར་རོ། །དགའ་སྟེར༴ སོགས། རྟག་ཏུ་གྱིས། ཞེས་ཕྱག་རྒྱའི་བྷ་གའི་དཀྱིལ་འཁོར་དུ། སོགས། གོང་ལྟར་རོ། །ཡེ་ཤེས་འདི་ནི༴ སོགས། དེ་ཡི་ཕ་ཞེས་སོགས། དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ། ཞེས་གོང་ལྟར་རོ། །དབང་བསྡུས་པ་ལེན་པར་འདོད་ན། དབང་ལྷ་སྤྱན་དྲངས། མཆོད་པ་དང་གསོལ་བཏབ་སྔ་མ་དང་འདྲ་བར་བྱས་ལ། བཅོམ་ལྡན་དེ་བཞིན་གཤེགས་པ༴ ནས་
ཥིཉྩ་ཏུ་མཾ་གྱི་བར་དང༌། སངས་རྒྱས་རྣམས་ཀྱི༴ ནས། ཥིཉྩ་ཧཱུཾ་གི་བར་སྒྲུབ་ཐབས་བཞིན་ལས། ཞེས་གསུངས་ཞིང༌། སངས་རྒྱས་རྣམས་ཀྱི་ནས། དབང་གི་ཆུ་རྒྱུན་གྱིས་སྨིན་མཚམས་ཡན་ཆད་གང༌། བུམ་པའི་དབང་ཐོབ། སྤྱི་བོའི་འཁོར་ལོ་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །ལག་པ་རྣམ་པར་སྣང་མཛད་བརྗོད། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོར་འཛིན་འགོད། །མགྲིན་པ་ཡན་ཆད་གང༌། གསང་བའི་དབང་ཐོབ། ལྟེ་བ་སྤྲུལ་པའི་འཁོར་ལོ་ལས་ཀྱི་ཕྱག་རྒྱ། སྙིང་ཁ་ཆོས་ཀྱི་འཁོར་ལོ་ཆོས་ཀྱི་ཕྱག་རྒྱ། མགྲིན་པ་ལོངས་སྤྱོད་ཀྱི་འཁོར་ལོ་ཕྱག་རྒྱ་ཆེན་པོ། སྤྱི་བོ་བདེ་ཆེན་གྱི་འཁོར་ལོ་དམ་ཚིག་གི་ཕྱག་རྒྱའོ། །སྙིང་ག་ཡན་ཆད་གང༌། ཤེས་རབ་ཡེ་ཤེས་ཀྱི་དབང་ཐོབ། མིག་ཏུ་གཏི་མུག་རྡོ་རྗེ་མ༴ སོགས། བདག་མེད་རྣལ་འབྱོར་མ། །ལྟེ་བ་ནས་བརྒྱུད་ལུས་ཐམས་ཅད་གང༌། བཞི་པའི་དབང་ཐོབ། ལུས་ངག་ཡིད་གསུམ་གྱི་དྲི་མ་བག་ཆག་དང་བཅས་པ་དག །ཆུའི་ལྷག་མ་ཡར་ལུད་པ་ལས་གཙོ་བོ་ཡབ་ཡུམ་དང་གཽ་རི་ཞེས་སོགས་གོང་བཞིན་བསམས་ཏེ། འདིར་དེ་ཙམ་ཞིག་གོ །ཞེས་པ་ལུས་དཀྱིལ་དང་ལམ་དུས་ཀྱི་དབང་གི་ཆུ་བོ་མ་ནུབ་བར་ལེན་པའི་རིམ་པ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་བསྒྲིགས་པ་སྟེ། དཔལ་རྟག་བརྟན་དུའོ།། །།ཞུས་སོ།།