ཤོག་གྲངས་ ༦༠༡ ནས་ ༦༣༥ བར།
མི་སྐྱེ། གཙང་མའི་གནས་ལྔ་དང་འོག་མིན་སོགས་དང་། ལྕང་ལོ་ཅན་སོགས་ན་བདག་འཛིན་རྩ་བ་ཆོད། ཆོས་ཀྱི་བདེན་པ་མཐོང་བའི་མཐོང་ལམ་ཐོབ་དགོས། དེ་མིན་ན་མི་སྐྱེ། འོན་ཏེ་མཐོང་ལམ་མ་ཐོབ་དམ་ཚིག་སྡོམ་པ་ལ་སྐྱོན་ཕྲ་མོ་ཡང་མེད་ཅིང་། དགེ་བ་ཁོ་ན་དང་སྨོན་ལམ་ལ་འབད་ན། དགའ་ལྡན་སོགས་ཞིང་ཆུང་ངུ་གཅིག་ཏུ་སྐྱེ་རུང་ཙམ་སྟེ་དཀའ་བར་གདའོ། །ཞེས་སོགས་དཀའ་ཚུལ་རྒྱས་པར་དཔེ་དང་བཅས་པ་གསུངས་ཤིང་། དེ་བས་ན་གང་ཟག་ཉོན་མོངས་པ་ཅན་སངས་རྒྱས་ཀྱི་ཞིང་དུ་སྐྱེ་བའི་རེ་བ་ཡོད་པ་མི་སྲིད་པ་ཡིན་ཏེ། འོན་ཀྱང་མགོན་པོ་འོད་དཔག་ཏུ་མེད་པའི་སྨོན་ལམ་གྱི་དབང་གིས་ཞིང་དེ་རུ་སྐྱེ་བར་མགོན་པོ་ཉིད་ཀྱི་ཞལ་གྱིས་བཞེས་པ་ཡིན་པས་ན། བདེ་བ་ཅན་གྱི་ཞིང་ཁམས་སུ་སྐྱེ་བའི་སྨོན་ལམ་སྒོ་ཐམས་ཅད་ནས་འབད་དགོས་སོ། །ཞེས་དང་། བདེ་བ་ཅན་སངས་རྒྱས་གཞན་གྱི་ཞིང་ཁམས་བས་ཁྱད་པར་ལྷག་སྟེ། ཐ་མལ་པ་ཉོན་མོངས་པ་དང་བཅས་པའི་གང་ཟག་རྣམས་སྐྱེ་རུང་བས་ལྷག་པ་དང་། དེར་སྐྱེས་ན་བསམ་པའི་དོན་ཐམས་ཅད་ཀྱང་བསམ་མ་ཐག་ནས་འགྲུབ་ཅིང་། ཉོན་མོངས་པ་དག་གིས་ཕྲ་བ་བས་ཀྱང་མི་གོས་པ་དང་། །
གཞན་སངས་རྒྱས་ཀྱི་ཞིང་དུ་འགྲོ་བར་ཆོག་པས་ལྷག་པ་དང་། གཞན་ཞིང་ཁམས་ལས་སངས་རྒྱས་མྱུར་བ་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པའི་བདེ་བ་ཅན་ལས་ཟུན་ཐག་ཉེ་བའི་ཞིང་ཁམས་གཞན་མེད་པས་བདེ་བ་ཅན་དུ་སྐྱེ་བའི་སྨོན་ལམ་ལ་འབད་པ་ཤིན་ཏུ་གལ་ཆེ། ཞེས་གསུངས་སོ། །དེ་དང་མཐུན་པར་འོད་དཔག་ཏུ་མེད་པའི་ཞིང་བཀོད་ཀྱི་མདོ་དང་། པདྨ་དཀར་པོ་དང་། ད་ལྟའི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱི་རྒྱལ་པོ་དང་། བདེ་བ་ཅན་གྱི་ཞིང་བཀོད་ཀྱི་མདོ་རྣམས་དོན་མཐུན་ཏེ། དམ་པའི་ཆོས་སྤང་བ་དང་མཚམས་མེད་པ་བྱས་པ་མ་གཏོགས་སེམས་ཅན་སུ་ཡང་རུང་བས་བསོད་ནམས་རྒྱ་ཆེན་པོ་བསགས་ཤིང་། སྨོན་ལམ་བཏབ་ན་ཞིང་དེར་སྐྱེ་བར་གསུངས་ལ། ཁྱད་པར་དུ་ཐུགས་རྗེ་ཆེན་པོ་ཡི་དམ་དུ་བྱས་ན་ཞིང་དེར་སྐྱེ་བར་མདོ་རྒྱུད་ཉི་ཤུ་རྩ་གཅིག་སོགས་ཐམས་ཅད་ནས་རྒྱ་ཆེར་གསུངས་སོ། །དེས་ན་ཚེ་འདིར་བདེ་སྐྱིད་ཕུན་སུམ་ཚོགས་ཤིང་ཕྱི་མ་བདེ་བ་ཅན་དུ་སྐྱེ་སྟེ། མྱུར་དུ་སངས་རྒྱས་པར་འདོད་པའི་མི་ཡོད་ན་ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ཡི་དམ་དུ་ཟུངས་ཤིག །ཆོས་ལོག་དང་ཆོས་ཟབ་མོ་ནོར་དོགས་དང་བརྒྱུད་པ་བཟང་
ངན་མི་འགྱེད་པའི་དོགས་པ་བྱས་པས་དོན་མེད་ཀྱི་གོལ་སར་ལྟུང་དོགས་པའི་ཐེ་ཚོམ་ཅན་ཡོད་ན། ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ལ་ཡི་དམ་གྱིས་དང་གོལ་ས་མེད་པར་ཐག་ཆོད་བྱུང་ངོ་། །བྱུང་ཁུངས་བརྒྱུད་པའི་ལོས་རྒྱུས་སུ་ཡི་གེར་ཡོད་པར་ལྟོས། མདོར་ན་བརྒྱུད་པ་འདི་དང་ཆོས་འདི་དང་ལྷ་འདི་བས་ལྷག་པ་འཁོར་འདས་ཀྱི་ཞིང་ན་མི་སྲིད་དེ། ཌོམ་བྷི་ཧེ་རུ་ཀའི་རྣམ་འཕྲུལ་རྣལ་འབྱོར་གྱི་དབང་ཕྱུག་གྲུབ་ཆེན་རི་མགོ་པའི་གསུངས་ལས། འདི་ལ་སྐལ་ལྡན་གསན་པར་ཞུ། །དགོས་ཆེད་མན་ངག་འདི་ལྟ་སྟེ། །སྤྱན་རས་གཟིགས་དབང་སྤྲུལ་པ་སྟེ། །སྐུ་ཡི་སྤྲུལ་པ་པདྨ་དང་། །གསུང་གི་སྤྲུལ་པ་དམ་པ་དང་། །ཐུགས་ཀྱི་སྤྲུལ་པ་ས་ར་ཧ། །དབྱེར་མེད་དུས་གསུམ་མཁྱེན་པ་དང་། །ཀརྨ་པ་དང་ཆོས་ཀྱི་རྗེ། །རོལ་པའི་རྡོ་རྗེ་ཞྭ་ནག་ཅན། །སྤྱིར་ཕྱོགས་མེད་ཀྱི་བླ་མ་མང་ལགས་ཀྱང་། །ཚེ་རབས་ཀྱི་བླ་མ་ཡིན་པར་ངེས། །མོས་གུས་གསོལ་བ་དེ་རུ་ཐོབ། །ལུས་ངག་ཡིད་གསུམ་བྱིན་གྱིས་རློབས། །མཆོག་གི་དངོས་གྲུབ་ཐོབ་པ་ཡིན། །བྱ་བའི་རྒྱུད་དང་སྤྱོད་པའི་རྒྱུད། །རྣལ་འབྱོར་རྒྱུད་དང་བླ་མེད་རྒྱུད། །དེ་ཡང་ཕ་རྒྱུད་མ་རྒྱུད་དང་། །གཉིས་མེད་རྒྱུད་
སྡེ་མང་ལགས་ཀྱང་། །ཞག་བདུན་ཙམ་གྱིས་དངོས་གྲུབ་ཐོབ། །རྒྱུད་སྡེ་བཞི་ཡི་རྩ་བ་སྟེ། །རྒྱལ་བ་རྒྱ་མཚོ་སྤྱན་རས་གཟིགས། །དཔའ་བོ་རྒྱ་མཚོ་དཔའ་མོའི་ཚོགས། །དམ་ཅན་རྒྱ་མཚོ་ལ་སོགས་པ། །སྔོན་ཚེ་རབས་ཡི་དམ་འབྲེལ་པ་ཅན། །བསགས་པའི་དབང་གིས་དུས་འདིར་མཇལ། །དེ་ཉིད་བསྐྱེད་རྫོགས་ཟུང་འཇུག་ཏུ། །ལུས་དང་སྲོག་ལ་མ་ལྟ་བར། །ནོར་ཟང་ཟིང་བསམ་པ་སྨོས་ཅི་དགོས། །སྙིགས་དུས་བསྒྲུབ་པ་དང་དུ་ལོངས། །རང་འདོད་བསམ་པ་རྫོགས་པ་དང་། །གཞན་དོན་ཕྲིན་ལས་དེ་ལ་མཛོད། །ཅེས་གསུངས་པའི་དོན་སྙིང་ལ་འཆང་བར་བྱ་དགོས་སོ། །འོ་ན་དེ་ཙམ་གོང་འོག་བར་གསུམ་དུ་ཆོས་འདི་ལ་བསྟོད་ར་འབའ་ཞིག་བྱེད་པའི་དགོས་པ་ཅི་ཞེ་ན། གཤིན་རྗེའི་གཤེད་ཀྱི་རྒྱུད་ལས། སྔགས་ནི་ཡོན་ཏན་འབྱུང་འགྱུར་ཏེ། །སྔགས་པ་དག་ནི་མ་བྱས་ན། །ཇི་ལྟར་ཡིད་བཞིན་ནོར་བུ་ཡང་། །གང་གིས་བསྔགས་པ་མ་བྱས་ན། །དེ་ལ་འདོད་དོན་མི་སྟེར་རོ། །དད་པས་སངས་རྒྱས་དད་པས་ཆོས། །དད་པས་དགེ་འདུན་དད་པས་ལམ། །དེད་པའི་བླ་མ་དད་པའི་ཕ། །དད་པའི་ལམ་ཆེན་དད་པའི་གྲུ། །དད་པ་ཡིད་བཞིན་ནོར་
ཡིན་ཏེ། །དེ་ཡི་ཕྱིར་ན་བསྔགས་པ་ཡིས། །རང་སེམས་དད་པ་བསྐྱེད་པའོ། །ཞེས་གསུངས་སོ། །འོ་ན་དེ་ཙམ་བསྔགས་པ་དང་། ཕན་ཡོན་བཤད་པ་ནི་ཆུ་བྲན་རྟག་ཏུ་ཀུ་ཅོ་སྒྲོགས་ཟེར་བའི་དཔེ་བཞིན་དུ་བསྟོད་ར་ཙམ་སྟེ། ཡང་དག་པ་མ་ཡིན་ནོ་སྙམ་དུ་ཡིད་ལ་བསམས་ན་དངོས་གྲུབ་མི་ཐོབ་པའི་རྐྱེན་བྱེད་པས་བཤགས་དགོས་ཏེ། ཐུགས་རྗེ་ཆེན་པོའི་གཟུངས་ཀྱི་ཕན་ཡོན་མདོར་བསྡུས་པ་ལས་ཕན་ཡོན་རྒྱ་ཆེར་གསུངས་ནས། ཐེ་ཚོམ་གྱི་བསམ་པ་ཅུང་ཟད་ཅིག་བསྐྱེད་པར་གྱུར་ན། གདོན་མི་ཟ་བར་གང་སྨོན་པའི་འབྲས་བུ་དེ་མངོན་པར་གྲུབ་པར་མི་འགྱུར་བ་ལགས་སོ། །ཞེས་དང་། གཤིན་རྗེའི་གཤེད་ཀྱིས་རྒྱུད་ལས། གལ་ཏེ་ཡིད་གཉིས་ཟ་གྱུར་ན། །བསམ་པར་འགྱུར་རམ་དད་པ་རྣམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བ་ཐེ་ཚོམ་མེད། །ཅེས་དང་། སྤྲུལ་པའི་རྒྱལ་པོའི་ཞལ་ནས། ཆོས་ལ་ཐེ་ཚོམ་ཟ་མི་རུང་བར་བསྟན་པ་ནི། ཡང་དག་པར་རྫོགས་པའི་སངས་རྒྱས་ཀྱིས་ཞལ་ནས་གསུངས་པའི་བཀའ། སློབ་དཔོན་གྲུབ་པ་ཐོབ་པ་རྣམས་ཀྱིས་མཛད་པའི་བསྟན་ཆོས་རྣམས་མི་བདེན་པར་གཅིག་ཀྱང་མེད་དེ། ཆོས་ཀྱི་ནང་ན་བརྫུན་མི་
ཤོང་། སྒོས་ཐུགས་རྗེ་ཆེན་པོའི་ཆོས་འདི་རིགས་དྲུག་སྤྱི་ལ་ཕན་པའི་ཆོས་ཡིན་པས། ཡིན་ནམ་མིན་སྙམ་པའི་ཐེ་ཚོམ་དང་། བདེན་ནམ་མི་བདེན་སྙམ་པའི་ཡིད་གཉིས་དང་། བྱའམ་མི་བྱ་སྙམ་པའི་ནེམ་ནུར་སྤངས་ལ། ཡིད་ཆེས་པའི་སྒོ་ནས་བརྩོན་འགྲུས་ཀྱིས་བསྒྲུབ་པ་གལ་ཆེའོ། །ཞེས་གསུངས་སོ། །གལ་ཏེ་བསོད་ནམས་ཟད་པ་ཁ་ཅིག་གིས། གདུགས་དཀར་གྱི་སྔགས་ཨ་ན་ལེའི། གཅན་གཟན་སྲུང་བར་གསུངས་པ་མ་བདེན་པ་སོགས་ལོ་རྒྱུས་ངན་པ་རྒྱུ་མཚན་མ་ཤེས་པ་དག་འདྲེན་ཅིང་ཡི་གེ་དྲུག་པའི་ཕན་ཡོན་ཡང་དེ་དང་འདྲ་བར། སྨྲ་ང་གི་དགེ་རྩ་ཐམས་ཅད་བཅོམ་ནས་རྡོ་རྗེ་དམྱལ་བར་གཏན་ཡུལ་བྱེད་པ་ཡིན་ཏེ། ལོ་རྒྱུས་དེ་ཡང་དོན་མ་ནོར་བའི་ལོ་རྒྱུས་ཏེ། གདུགས་དཀར་གྱི་དུས་རྟགས་གྲངས་གསུམ་གྱི་བསྙེན་པ་ཚད་དུ་བསྐྱལ་བས་སྔགས་དེ་བྲིས་ཤིང་རབ་ཏུ་གནས་ནས་བཏགས་ན། ལས་ཀྱི་རྣམ་སྨིན་མིན་ན་གཅན་གཟན་ཐུབ་པར་གསུང་གི །སུ་ཡིན་གྱིས་བྲིས་པས་ཐུབ་པར་མ་བཤད་ལ། ལས་ཀྱི་རྣམ་སྨིན་ཡིན་མིན་ཀྱང་སངས་རྒྱས་མིན་པས་ཤེས་པར་དཀའོ། །དཔལ་སྒྲོལ་མ་རལ་པ་གྱེན་བརྫེས་ཀྱི་རྟོགས་པ་ཆེན་པོ་ལས། དེ་ཕྱིར་རྨོངས་པས་ལས་འདི་ཡི། །
སྔགས་ཀྱི་དངོས་གྲུབ་མ་མཐོང་ནས། །སྔགས་ཀྱི་དངོས་གྲུབ་མེད་དོ་ཞེས། །འདི་སྐད་དུ་ནི་ཚིག་སྨྲ་བ། །གང་གིས་སངས་རྒྱས་བསྟན་པ་ནི། །ས་སྟེང་འདིར་ན་རབ་སྤངས་པ། །བསྐལ་པ་བྱེ་བ་མང་པོ་ཡིས། །དེ་ཚེ་འགྲུབ་པར་ག་ལ་འགྱུར། །དེ་ཕྱིར་འདིར་ནི་མི་བཟད་པའི། །འཇིགས་ཆེན་མནར་མེད་འཚོད་པར་འགྱུར། །ཡང་སོས་དང་ནི་ཐིག་ནག་དང་། །རབ་ཏུ་ཚ་བའི་དམྱལ་བར་ནི། །དེ་ནི་བསྐལ་པ་ཆེན་པོར་གནས། །དམ་ཆོས་སྣང་བ་བྲལ་བའི་ཕྱིར། །དམྱལ་བ་མི་བཟད་མུན་པ་རུ། །བྱིས་པ་སྐྱེ་བོ་འཚོད་པར་བྱེད། །དམ་པའི་ཆོས་ལ་བརྙས་པ་དང་། །མི་ཤེས་མུན་པས་བསྒྲིབས་པ་སྟེ། །ཡེ་ཤེས་བྱིས་པའི་ངོ་བོ་འམ། །རྨོངས་པ་ལོག་པའི་ང་རྒྱལ་ཅན། །རིགས་པའི་རྒྱལ་པོ་བརྙས་བྱེད་པ། །མི་བྱེད་དམྱལ་བར་ལྟུང་བར་འགྱུར། །ཞེས་བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་ཏོ། །འོ་ན་དེང་སང་ཡི་གེ་དྲུག་པ་དུང་ཕྱུར་དང་དུང་ཕྱུར་མང་པོ་ཐོན་མཁན་མང་པོ་སྣང་ལ། དེ་དག་ལ་ཚེ་འདིར་ཕན་ཡོན་འབྱུང་བར་གསུངས་པས་དངོས་གྲུབ་ཕྲ་མོ་རེ་ཡང་ཐོབ་མཁན་དཀོན་པར་སྣང་བས་ཕྱི་མའི་ཕན་ཡོན་ཡང་དེ་དང་འདྲ་བར་མེད་པ་དོགས་སོ་ཞེ་ན།
འདི་ལ་ཕན་ཡོན་མེད་པ་མ་ཡིན་ཏེ། སྡིག་པ་མ་བྱུང་བ་དང་། དབང་ལུང་མ་ཐོབ་པ་དང་། ཐོབ་ཀྱང་དམ་ཚིག་མེད་པ་དང་། ཆོ་ག་སྒྲུབ་ཐབས་མེད་པ་དང་། མཆོད་པ་ཚོགས་སྦྱིན་སྲེག་མེད་པ་དང་། ཏིང་ངེ་འཛིན་མ་གསལ་བར་སེམས་གཞན་དུ་ཡེངས་བ་སོགས་མི་ནག་སྔགས་འདོན་དུ་སོང་བའི་སྐྱོན་ཡིན་གྱི། ཕན་ཡོན་མེད་པ་མ་ཡིན་ཏེ། །དཔུང་གིས་ཞུས་པའི་རྒྱུད་ལས། མཆོད་པ་མེད་ཅིང་མི་གཙང་བཟླས་བརྗོད་བྱས། །གུག་སྐྱེད་ཡི་གེ་ལྷག་ཆད་གྱུར་པ་ཡིས། །གསང་སྔགས་དངོས་གྲུབ་རྒྱ་ཆེར་མི་སྟེར་རོ། །ཞེས་དང་། དེ་བཞིན་མི་ཡི་སྐལ་པ་གཟིགས་ནས་ནི། །འདོད་པ་བཞིན་དུ་གསང་སྔགས་དངོས་གྲུབ་སྩོལ། །ཡུལ་དང་དུས་དང་ཆོ་ག་ལས་རྣམས་དང་། །སྡིག་པ་བྱང་ཞིང་བསོད་ནམས་བསགས་པ་དང་། །གུས་དང་བཟླས་བརྗོད་ཀུན་ལ་གཟིགས་ནས་ནི། །དེ་དག་གསང་སྔགས་འབྲས་བུ་རྣམ་པར་སྩོལ། །ཅི་ཙམ་སྡིག་པ་མང་པོས་རབ་གང་ཞིང་། །ཅི་ཙམ་ལས་དཀར་བསོད་ནམས་མ་བསགས་དང་། །ཇི་སྙེད་ཆོ་ག་མེད་པར་བཟླས་པ་དང་། །དེ་སྲིད་གསང་སྔགས་དངོས་གྲུབ་མི་འཐོབ་བོ། །ཆོ་ག་ཉམས་སམ་བར་ཆད་སྔགས་གཞན་བཟླ། །
བཟློས་པ་བཏང་ངམ་གཞན་ལ་འབྱིན་གྱུར་ན། །དུས་གསུམ་མཆོད་པ་ལ་ནི་བརྩོན་བྱས་ནས། །སླར་ཡང་འབུམ་བཟླས་བསྒྲུབ་ལ་འཇུག་པར་བྱ། །སྟོང་ཕྲག་བཅུའམ་བརྒྱད་དམ་བདུན་ནམ་བཞི། །བཟླས་མཐར་དེ་ལ་མར་གྱིས་སྦྱིན་བསྲེག་བྱ། །ཡང་ན་མ་གྲུབ་ནས་སམ་ཏིལ་ནག་གམ། །ཡུངས་ཀར་མར་ལ་བསྲེས་ལ་སྦྱིན་བསྲེག་བྱ། །ཞེས་གསུངས་སོ། །དེས་ན་ཕན་ཡོན་བཤད་པ་དེ་དག་ཐེ་ཚོམ་མེད། གཤིན་རྗེ་འཇིགས་བྱེད་རྒྱུད་ལས། ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བས་མི་སྲིད་ན། །འདོད་ཆགས་བྲལ་བས་བཤད་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཞེས་གསུངས་སོ། །འཇིག་རྟེན་གྱི་ལྷ་དང་འདྲེས་བྱས་པའི་སྔགས་རྣམས་ལ་ཡང་ནུས་པ་ཆེན་པོ་ཡོད་ན། སངས་རྒྱས་སྣང་བ་མཐའ་ཡས་དང་། ཐུགས་རྗེ་ཆེན་པོས་གསུངས་པའི་སྔགས་ཡི་གེ་དྲུག་པ་ལ་ཕན་ཡོན་རྒྱ་ཆེན་པོ་ཡོད་པར་ཐེ་ཚོམ་ག་ལ་ཡོད་དེ། རྣམ་སྣང་མངོན་བྱང་ལས། དགའ་རབ་དབང་ཕྱུག་ལ་མྱོས་བྱེད་ཀྱི་རིག་སྔགས་ཡོད་པས། འདོད་ཁམས་ཀྱི་ལྷ་ཐམས་ཅད་མྱོས་པ་དང་། མེ་ཏོག་གི་ཚལ་དང་འདོད་ཡོན་སྣ་
ཚོགས་སྤྲུལ་ནས་རང་ཉིད་སྤྱོད་ཅིང་གཞན་ལ་སྦྱིན་ནོ། །དབང་ཕྱུག་ཆེན་པོ་ལ་ཡིད་མགྱོགས་བྱ་བའི་སྔགས་ཡོད་པས་སྟོང་གསུམ་ཁམས་ཀྱི་སེམས་ཅན་རྣམས་ཀྱི་དགོས་པ་བསྒྲུབ། ལོངས་སྤྱོད་སྣ་ཚོགས་སྤྲུལ་ནས་གཙང་མའི་རིས་ཀྱི་ལྷའི་བུ་དེ་རྣམས་ལ་སྦྱིན་ཞིང་རང་ཉིད་ཀྱང་སྤྱོད་དོ། །མིག་འཕྲུལ་གྱི་སྔགས་ཀྱིས་གཟུགས་རྣམ་པ་སྣ་ཚོགས་སྟོན་པ་དང་། ལྷ་དང་མི་རྣམས་ཀྱི་སྔགས་ཀྱིས་སྒྱུ་མ་རྣམས་སྟོན་ཏེ། གསང་སྔགས་དག་གིས་དུག་དང་རིམས་མེད་པར་བྱེད་པ་དང་། མ་མོ་ཞེས་བྱ་བ་ལྷ་མོ་རྣམས་ཀྱི་སྔགས་ཀྱིས་སེམས་ཅན་རྣམས་ལ་ནད་འགོ་བ་བཏང་བ་དང་། ཡང་སྔགས་ཀྱི་ནུས་པས་མེའི་ཚ་བ་མེད་པར་བྱས་ནས་གྲང་བར་བྱེད་ནུས་པ་འདི་རྣམས་ལ་རྗེས་སུ་དཔག་ནས་གསང་སྔགས་ཀྱི་ནུས་པ་ལ་ཡིད་ཆེས་ཤིང་དད་པར་བྱའོ། །ཞེས་གསུངས་པ་ཡང་ཤིན་ཏུ་བླུན་པ་དེའི་རང་བཞིན་ཡིན་ནའང་། སྔགས་ཀྱི་ཡི་གེ་འགའ་ཞིག་ཟོས་པ་དང་། བཏགས་པས་མཚོན་ཆ་དང་གཟའ་གདོན་བཟློག་པ་དང་། ནམ་མཁའ་ལྡིང་གི་སྔགས་སོགས་འགའ་ཞིག་གིས་ལྷོག་པ་དང་གཉེན་དང་ཐབས་ཤུ་སོགས་ནད་ཟུག་གཟེར་ཅན་འཕྲལ་དུ་སེལ་ནུས་པ་སོགས་ལ་རྗེས་སུ་དཔག་ནས་ཀྱང་གསང་སྔགས་ལ་ཡིད་ཆེས་པར་
བྱའོ། །འོ་ན་སྔགས་ཕལ་པ་དེ་དག་གི་ནུས་པ་ནི་འཇིག་རྟེན་པས་མཐོང་ཞིང་ཐོས་མེད་ཀྱི། དེའི་ནུས་པས་དེ་དག་ཅི་ལས་བྱུང་སྙམ་ན། རྣམ་སྣང་མངོན་བྱང་ལས། །གསང་སྔགས་ཀྱི་མཐུ་ནི་གསང་སྔགས་རྣམས་ལས་བྱུང་བ་ཡང་མ་ཡིན། རྫས་ལ་འཇུག་པ་ཡང་མ་ཡིན། སྦྱོར་བ་པོ་ལས་ཀྱང་འཇུག་པ་མ་ཡིན་མོད་ཀྱིས། སྔགས་ཀྱི་བྱིན་རླབས་ནི། ཆོས་ཉིད་ལས་འབྱུང་སྟེ། རྟེན་འབྲེལ་ཟབ་མོ་ལས་གྲུབ། ཅེས་གསུངས་ཏེ། དཔེར་ན་རྔའི་སྐད་བཞིན་དུ་རྒྱུ་རྐྱེན་རྟེན་འབྲེལ་ཚོགས་པ་ལས་བྱུང་བའོ། །དེ་ལྟར་སྔགས་གཞན་ནི་རྟེན་འབྲེལ་མ་འཚོགས་པ་ལས་བྱིན་རླབས་འབྱུང་དཀའ་བར་བཤད་པ་གོང་དུ་བཤད་པ་ལྟར་ཡིན་ཀྱང་། ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ནི་ཐམས་ཅད་མ་འཚོགས་ཀྱང་བྱིན་རླབས་འཇུག་པ་ཁྱད་པར་དུ་འཕགས་ཏེ། སྐྱེས་མཆོག་ཀརྨ་པཀྴིས་སྤུང་རིའི་རྩེར་གཏོར་མ་མཛད་པ་ན་འདམ་ཆེན་སྤང་རིའི་རྩེ་ནས་ཚུར་སྤྲིན་དཀར་པོ་ཤེལ་ལྟ་བུ་གངས་རི་དང་ཐ་མི་དད་པའི་ནང་དུ༔ ཐུགས་རྗེ་ཆེན་པོ་སྐུ་མདོག་སེར་ལ་དམར་བའི་མདངས་ཅན་གར་སྟབས་སུ་བཞུགས་པའི་སྟེང་འོག་ཕྱོགས་མཚམས་མཁའ་འགྲོ་རྒྱ་མཚོས་བསྐོར་བ་ཞིག་གིས། འགྲོ་བ་ཀུན་ལ་ངེད་
ཀྱིས་འོད་ཟེར་བཀྱེ་བ་ཡིན་གྱིས། ད་ཕྱིས་ཡི་གེ་དྲུག་པའི་ཕྲིན་ལས་དཔག་ཏུ་མེད་པ་འབྱུང་། ཕྱོགས་རིས་མེད་པར་སྟོན་ཞིག་གསུངས་པ་ཡིན། དེ་ཕྱིས་སྒྲུབ་ཐབས་ཀྱི་མཇུག་ཏུ་དབང་མ་ཐོབ་པ་དང་། སློབ་དཔོན་གྱི་ཆོས་མ་རྫོགས་པར་ཉམས་སུ་ལེན་པ་རྣམས་ཀྱང་ཕྲིན་ལས་ཐུགས་རྗེ་ཆེན་པོ་དང་མཉམ་པར་གྱུར་ཅིག །ཅེས་བྲི་བར་མཛད་དེ། གྲུབ་ཐོབ་ཆེན་པོའི་ལུགས་ཀྱིས་ཐུགས་རྗེ་ཆེན་པོའི་སྒྲུབ་སྐོར་རྣམས་ལ་མོས་པའི་གང་ཟག་གིས་ཉམས་སུ་བླངས་ན་ཤེས་མི་ཤེས་ཐོབ་མ་ཐོབ་ཚང་མ་ཚང་དག་མ་དག་ཇི་ལྟར་བྱུང་ཡང་བྱིན་རླབས་རྩོལ་མེད་དུ་འཇུག་པ་ཡིན་ཏེ། །འདི་ནི་ཐུགས་རྗེ་ཆེན་པོའི་རྒྱུད་རྣམས་ནས་ཀྱང་ཉོན་མོངས་པའི་སེམས་ཀྱིས་སམ་ཀུ་རེ་དང་རྐྱལ་ཀའི་ཆད་ཙམ་དུའང་བདག་གིས་རིག་པ་འདི་བརྗོད་ན་ཕན་ཡོན་འདི་དག་མ་འགྲུབ་ན་བདག་གིས་དེ་བཞིན་གཤེགས་པ་བསླུས་པ་ལགས་སོ། །ཞེས་གསུངས་པ་ཉིད་དོ། །ཞེས་ཀརྨ་པའི་ཆོས་འབྱུང་ནས་གསུངས་སོ། །དེས་ན་དད་པ་བརྟན་པོས་བསྒྲུབས་ན་འདིའི་ཕན་ཡོན་དེ་དག་མེད་མི་སྲིད་དེ། རྡོ་རྗེ་འཇིགས་བྱེད་ཀྱི་རྒྱུད་ལས། དད་པ་བརྟན་པོས་བསྒྲུབས་པ་ན། །ནམ་མཁའ་མེད་པར་གྱུར་ན་ཡང་། །གསང་སྔགས་
དངོས་གྲུབ་མེད་མི་སྲིད། །ཅེས་གསུངས་སོ། །དེའི་དོན་རྒྱུད་ཀྱི་རྒྱལ་པོ་པདྨ་ཟབ་པ་ལས། གསང་སྔགས་ཐེ་ཚོམ་མེད་པ་དང་། །ཡིད་ཆེས་ཚད་མ་སྐྱེས་པ་དང་། །ཞེས་གསུངས་པའི་དོན་ནོ། །འོ་ན་ཐུགས་རྗེ་ཆེན་པོ་རྒྱལ་བ་རྒྱ་མཚོའི་ཆོས་འདི་ཁོ་ནས་ཆོག་པར་བྱེད་དེ། ཆོས་གཞན་ཉམས་སུ་མི་ལེན་ནམ་ཞེ་ན། འདི་ཉམས་སུ་བླངས་བས་ཆོས་ཐམས་ཅད་ཉམས་སུ་བླངས་བར་འགྱུར་ཏེ། འདི་ལ་མ་ཚང་བའམ་མ་འཐུས་པ་གཅིག་ཀྱང་མེད་དོ། །སྐྱབས་འགྲོ་དང་ཚོགས་བསགས་ཀྱི་ཉན་རང་གི་ཉམས་ལེན་ཐམས་ཅད་ཚང་། སེམས་བསྐྱེད་ཀྱིས་རྒྱུ་མཚན་ཉིད་ཀྱི་ལམ་རིམ་ཐམས་ཅད་ཚང་། བསྐྱེད་རྫོགས་ཀྱིས་གསང་སྔགས་ཀྱི་ཉམས་ལེན་ཐམས་ཅད་ཚང་། རྫོགས་རིམ་འོད་གསལ་ལ་འཇུག་པས། ཕྱག་རྫོགས་དབུ་གསུམ་སོགས་ཟབ་ཆོས་ཐམས་ཅད་ཚང་། འཁོར་ལོ་ལྔའི་གདམས་པས་གཏུམ་མོ་དང་། ལྷ་སྐུ་སྒྱུ་མ་ལྟ་བུའི་སྒྱུ་ལུས། ཉལ་དུས་རྫོགས་རིམ་བསྒོམས་པས་འོད་གསལ་ཟིན་པས་འོད་གསལ། དེའི་བག་ཆགས་དང་བསྐྱེད་རིམ་རྨི་ལམ་ཟིན་པས་རྨི་ལམ་དང་། འཆི་དུས་སྤྱི་བོར་རིགས་བདག་ལ་སེམས་གཏད་པས་འཕོ་བ། བསྐྱེད་རྫོགས་ད་ལྟའི་བག་
ཆགས་ཀྱིས་བར་དོ་ཟིན་པས་བར་དོ་སྟེ། ནཱ་རོ་དང་ནི་གུའི་ཆོས་དྲུག་དང་སྙན་བརྒྱུད་དང་བསྲེ་འཕོའི་དོན་ཐམས་ཅད་ཚང་། ཐུགས་ཀའི་ཧྲིལ་སེམས་གཏད་པས་རྣམ་རྟོག་ཞི་བས་ཞི་གནས། རྫོགས་རིམ་བསྒོམས་ནས་རང་སེམས་སྟོང་པ་ཉིད་དུ་ལྷག་གི་མཐོང་བས་ལྷག་མཐོང་། བསྐྱེད་རྫོགས་ཟུང་འཇུག་སྟེ་ཞི་ལྷག་ཟུང་འཇུག་དང་དོན་གཅིག་ལ། དང་པོ་སྐྱབས་སེམས། དངོས་གཞི་བསྐྱེད་རྫོགས་ཟུང་འཇུག་བསྔོ་བ་སྟེ་དམ་པ་ཞི་བྱེད་ཀྱི་དོན་ཐམས་ཅད་ཚང་། བསྐྱེད་རིམ་ལུས་དབེན། ཡིད་བཟླས་ངག་དབེན། སེམས་ཏིང་ངེ་འཛིན་དབེན། རྫོགས་རིམ་འོད་གསལ་ཟུང་འཇུག་སྟེ། རིམ་ལྔ་ཡང་ཚང་། དབེན་གསུམ་གོང་ལྟར་འཁོར་ལོ་ལྔའི་ཡན་ལག་བྷོ་པས། སྲོག་རྩོལ་གཏུམ་མོ་སྟེ་སྦྱོར་དྲུག་ཀྱང་ཚང་། སེམས་བསྐྱེད་བླ་མ་རིགས་བདག་གམ་དབྱེར་མེད་བླ་མའི་རྣལ་འབྱོར། ཡི་དམ་བསྒོམ་པ་དང་རྫོགས་རིམ་ནི་ཕྱག་ཆེན་མཇུག་བསྔོ་བ་སྟེ། བཀའ་བརྒྱུད་ཀྱི་རྟོགས་ཆོས་ལྔ་ལྡན་ཡང་ཚང་། ཚོགས་ཞིང་གི་སྐབས་སུ་བླ་མ་བཅོམ་ལྡན་འདས་འཇིག་རྟེན་དབང་ཕྱུག་ཅེས་སྤྱན་དྲངས་ནས་མཆོད་པས་བླ་མ་མཆོད་པ་ཡང་ཚང་། གཏོར་བསྔོས་སྐབས་སུ་ཆོས་སྐྱོང་མཆོད་
གཏོར་ཡང་ཚང་། སྔོན་འགྲོ་ལ་དཀར་གཏོར་སོགས་འཇིག་རྟེན་པའི་མཆོད་པ་དང་། བགེགས་གཏོར་སོགས་མདོས་གླུད་ཀྱིས་གཏོར་མ་ཐམས་ཅད་ཚང་། སྡིག་པ་བཤགས་པས་རྡོར་སེམས་སྒོམ་བཟླས་ཚང་། ལུས་ལོངས་སྤྱོད་ཕུལ་བས་མཎྜལ་ཚང་། ཕྲེང་སྔགས་བསྟོད་པའི་གཤམ་དེར་གསོལ་འདེབས་ཏིང་ངེ་འཛིན་གྱིས་དབང་བླངས་པ་ཚང་།། མདོར་ན་རྒྱལ་བ་རྒྱ་མཚོའི་བདག་བསྐྱེད་འདི་ཁོ་ན་ཉམས་སུ་བླངས་ན་འདི་ལ་མ་ཚང་བའི་ཆོས་གཅིག་ཀྱང་མེད་དོ། །དེས་ན་འདི་ལྟ་བུ་ཁ་ཙམ་མིན་པས་རྩེ་གཅིག་ཏུ་ཉམས་སུ་བླངས་བ་དེ་ཐུགས་རྗེ་ཆེན་པོའི་ཡང་སྤྲུལ་ལམ་དུས་ཀྱི་ཐུགས་རྗེ་ཆེན་པོ་ཡང་ཡིན་ཏེ། ཐུགས་རྗེ་གསང་འདུས་ཀྱི་རྒྱུད་ལས། མ་འོངས་བསྟན་པའི་སྒྲོན་མེ་འདི། །ཤཱཀ་ཐུབ་མྱ་ངན་འདས་ནས་ཀྱང་། །ལོ་ནི་སུམ་སྟོང་ཉེ་བ་ན། །རྡོ་རྗེ་གདན་གྱི་བྱང་ཕྱོགས་ངོས། །རི་བོ་ནག་པོ་བཅུ་གསུམ་འདས། །ཁ་བ་ཅན་གྱི་རྒྱལ་ཁམས་སུ། །འགྲོ་མགོན་ཐུགས་རྗེ་ཆེན་པོའི་འདུལ་ཞིང་དེར། །ཐུགས་རྗེའི་སྤྲུལ་སྲས་བརྒྱུད་འཛིན་གྱིས། །ཡིག་བདུན་བསྟན་པ་འཛིན་སྐྱོང་སྲུང་། །རིམ་པ་བཞིན་དུ་དོན་གཉིས་སྤྱོད། །རྒྱུད་མཆོག་འདི་ཡང་དེར་སྣང་
འགྱུར། །ཞེས་སྣང་བ་མཐའ་ཡས་ཀྱིས་བཀའ་སྩལ་ཏོ། །འོ་ན་གསང་འདུས་ཀྱི་ལུང་འདི་རྒྱལ་བ་རྒྱ་མཚོ་ལ་མི་འབྱོར་སྙམ་ན། གསང་བ་འདུས་པའི་ཕྱི་སྒྲུབ་རྒྱལ་བ་རྒྱ་མཚོ་ཡིན་ཞིང་། སྔགས་ཡི་གེ་བཅུ་པ་རྒྱུད་ལས་གསུངས་ཤིང་། གསང་འདུས་ཀྱི་ཆོས་བདག་རྗེ་ཆོས་གྲགས་རྒྱ་མཚོ་ཡིན་པར་ལུང་བསྟན་ཅིང་རཏྟས་ཆོས་གྲགས་རྒྱ་མཚོ་ལ་དབང་ལུང་ཕུལ་ཞིང་། རྒྱལ་བ་རྒྱ་མཚོ་དང་ངོ་བོ་བརྒྱུད་པ་གཅིག་ཕྱིར་མཁས་གྲུབ་ལུང་རིགས་ཉི་མས་རིལ་བུ་བུམ་སྒྲུབ་བྱེད་ན་རྒྱལ་བ་རྒྱ་མཚོའི་ཆོ་གས་ཁོག་ཕུབ་ནས་བྱེད་རུང་གསུངས་སོ། །ཡང་འདི་ལྟར་བྱེད་བཤད་པ་ལྟར་ཚུལ་བཞིན་དུ་ཉམས་སུ་བླངས་བ་དེ་ཨོ་རྒྱན་གྱི་ཡང་སྤྲུལ། ལམ་དུས་ཀྱི་པདྨ་འབྱུང་གནས་ཀྱང་ཡིན་པར་གསུངས་ཏེ། སྤྲུལ་སྐུ་སངས་རྒྱས་གླིང་པའི་གཏེར་ཁ་ལུང་བསྟན་བཀའ་རྒྱ་མ་ལས། མདོར་ན་ཨུ་རྒྱན་ངས་བསྟན་ཆོས་རྣམས་ལ། །གཞུང་བཞིན་སུ་དང་སུ་ཡིས་སྤྱོད་པ་ཀུན། །ཐམས་ཅད་ང་ཡི་སྤྲུལ་པ་ཡིན་པར་ངེས། །ཕྱི་རབས་ཀུན་གྱིས་ཐེ་ཚོམ་སོམ་ཉི་སྤོངས། །གུས་པས་བཀུར་སྟི་ཕུ་དུད་འབྲེལ་པ་ཐོགས། །ཞེས་གསུངས་སོ། །འོ་ན་རྒྱལ་བ་རྒྱ་མཚོ་འདི་ནི་ཨོ་རྒྱན་རིན་པོ་ཆེས་བསྟན་པའི་ཆོས་ཡིན་ནམ་ཞེ་ན། འདི་
ནི་གསང་སྔགས་གསར་རྙིང་གཏེར་ཁ་གསུམ་ཞལ་འཆམ་པའི་ཨོ་རྒྱན་རིན་པོ་ཆེ་ཉིད་ཀྱིས་ཞལ་གཟིགས་དང་བསྟུན་ནས་མཛད་པའི་ལྷ་ལྔ། རྒྱུད་དང་བསྟུན་ནས་མཛད་པའི་ལྷ་དགུ་ཡིན་ནོ། །འོ་ན་ལྷ་ལྔ་རྒྱུད་ལ་མ་བཤད་དམ་ཞེ་ན་བཤད་དེ། རྒྱུད་ལས་དཀྱིལ་འཁོར་མཎྜལ་ལྟར་བསྒོམ་པ་དང་། དཀྱིལ་འཁོར་དུ་བསྒོམ་པ་དང་། རང་གི་ཕུང་པོ་ལ་བསྒོམ་པའི་ལུགས་གསུམ་མཆིས་ན། །ཞེས་གསུངས་པའི་མཎྜལ་ལྟར་བྷེ་པ་ནི། ལྷ་ལྔ། དཀྱིལ་འཁོར་དུ་བྷེ་པ་ལྷ་དགུ། ཕུང་པོ་ལ་བྷེ་པ་ལུས་དཀྱིལ་ཡིན་ལ། ཡང་ལྷ་ལྔ་འདི་པདྨ་རྒྱལ་པོའི་རྒྱུད་ཀྱི་དགོངས་པ་ཡིན་ཏེ། པདྨས་རང་གི་རིགས་མཚོན་ནོ། །ཞེས་པ་སྐུ་མདོག་དམར་པོ་བསྟན་ནས། མཁས་གྲུབ་ལུང་རིགས་ཉི་མས་གསུངས་སོ། །ཡང་འདི་ཚུལ་བཞིན་ཉམས་སུ་མ་ལོན་ཀྱང་འདི་ལ་དད་ཅིང་མོས་པའི་སྒོ་ནས་ཡི་དམ་བྱས་ཚད་སྐལ་ལྡན་ཡིན་ཏེ། ཐུགས་རྗེ་ཆེན་པོ་གསང་འདུས་ཞུས་ལེན་ལས། སྙིགས་དུས་གཏེར་ལ་མོས་པའི་སྐལ་ལྡན་རྣམས། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་པས་དགའ་བ་བསྒོམ། །ཁོ་མོའི་ཚིག་འདི་རིན་ཆེན་གསེར་བས་དཀོན། །སྙིགས་
མའི་རྗེས་འཇུག་སྙིང་ནས་ཆོས་གྱིས་ཨང་། །ཞེས་ཡེ་ཤེས་ཀྱི་མཁའ་འགྲོ་མཚོ་རྒྱལ་གྱིས་གསུངས་སོ། །འོ་ན་རྒྱལ་བ་རྒྱ་མཚོ་འདི་གཏེར་མ་མིན་སྙམ་ན། གཏེར་སྟོན་གྲུབ་ཐོབ་དངོས་གྲུབ་དང་། གཏེར་སྟོན་མངའ་བདག་ཉང་དང་། གཏེར་སྟོན་སངས་རྒྱས་གླིང་པ་དང་། རཏྣ་གླིང་པ་དང་བཞིའི་གཏེར་ནས་བྱོན་ཅིང་རྒྱུད་པ་ཡང་འདི་ལ་དབྱེར་མེད་དུ་ཐིམ་པ་ཡིན་ནོ། །འོ་ན་དེ་ཙམ་ཟབ་ཅིང་ཁུངས་བཙུན་ན་ནག་རྒྱལ་ཕག་གསུམ་ཞེས་ཀཾ་ཚང་གི་ཆོས་ཀྱི་རྩ་བ་ཡིན་པར་ནི་ཡོངས་སུ་གྲགས་ཀྱང་། ཕག་མོ་མགོན་པོ་སོགས་དང་། དུས་ཕྱིས་ཀུན་རིག་དང་བདེ་མཆོག་སྒྲོལ་དཀར་སོགས་ཤིན་ཏུ་དར་ལ་འདི་ནི་ཤིན་ཏུ་དཀོན་ཅིང་བཀའི་བརྒྱུད་པ་མ་ཆད་ཙམ་ལས་མི་སྣང་བ་ཅི་ཞེ་ན། གྲུབ་ཆེན་ཀརྨ་པཀྴིསམཛད་པའི་རྒྱལ་བ་རྒྱ་མཚོའི་ལོ་རྒྱུས་ལ་འདི་སྐད་གསུངས། རྗེ་རས་ཆུང་བའི་མགུར་གྱི་ནང་ན་ཡང་། ན་ནིང་གི་ལོ་ལ་དཀའ་དགུ་སྤྱད། །དོ་ཅིག་གི་ལོ་ལ་མཚར་དགུ་མཐོང་། །མ་གཅིག་གྲུབ་པའི་རྒྱལ་མོ་མཐོང་། །མཁའ་འགྲོ་རྒྱ་མཚོའི་སྲོག་སྙིང་ཡོད། །གསུངས་པའི་དོན་ཡང་འདི་ཡིན་ནོ། །བླ་མ་མཁའ་འགྲོས་བཀའ་རྒྱས་བཏབ་ཅིང་མཉམ་པའི་ཕྱིར། བརྒྱུད་པ་འཛིན་པ་རེ་རེ་མ་
གཏོགས་པ་གཞན་ལ་གསང་བར་འདུག །དེས་རྗེ་བཙུན་ཟངས་རི་བ་ལ་གནང་། ཟངས་རི་བས་སུ་ལའང་མ་བསྟན་པས་སྦས་ཤིང་བརྒྱུད་པ་མི་འཆད་པའི་ཕྱིར། འགྲོ་མགོན་རས་པ་ལ་གནང་བར་འདུག །སངས་རྒྱས་རས་ཆེན་པ་ལ་བུ་སློབ་གནམ་གྱི་སྐར་མ་ཙམ་ཡོད་ན་ཡང་། བླ་མ་རིན་པོ་ཆེ་སྤོམ་བྲག་པ་ལ་གནང་། གཞན་སུ་ལ་མ་སྤེལ་གསུངས་ནས་བཀའ་རྒྱས་བཏབ་པ་ལས། བླ་མ་མཚུར་ཕུ་བས་དབང་ལུང་ནོད། ཚོགས་དང་མཆོད་པ་མང་པོ་བགྱིས་ནས་ཞུས་པ་ལགས། བཀའ་བརྒྱུད་རྣམས་ལ་ཕྱི་ནང་གསང་གསུམ་དེ་ཁོ་ན་ཉིད་ཀྱིས་ཡི་དམ་ཡོད་པ་ལ་འདི་གསང་བའི་ཡི་དམ་ལགས། ཤིན་ཏུ་གཉེན་ཅིང་ཕྲག་དོག་ཆེ་བས། གཞན་ལ་མ་སྤེལ་བའི་རྒྱུ་མཚན་དེ་ཡིན་པར་འདུག །ཅེས་གསུངས་སོ།། ༈ ད་ནི་རྩོམ་པའི་དོན་ཅུང་ཟད་བཤད་ན། རྣལ་འབྱོར་དོན་ཡོད་སྤྱོད་པའི་རྒྱུད་ལས། དེ་བཞིན་གཤེགས་པའི་བཀའ་ལ་བཅོས་ལྷད་དང་འབྲི་བསྒྱུར་བྱས་ན། ཆོས་ཅི་བྱས་ན་ཡང་འབྲས་བུ་མེད་ཅིང་ཉམས་སོ། །དེ་ཅིའི་ཕྱིར་ན། སངས་རྒྱས་ཀྱི་བཀའ་སོ་མ་ཐོབ་པའི་རྣལ་འབྱོར་པ་ལྟ་ཅི་སྨོས་ཀྱི། ས་བཅུའི་བྱང་ཆུབ་སེམས་དཔའ་རྣམས་ཀྱིས་ཀྱང་ཚིག་གི་སྒྲོ་
སྐུར་མ་བཅུག་པའོ། །ཞེས་གསུངས་ཏེ་བཀའ་ལ་བཅོས་ལྷད་ནི་རྒྱུད་དང་མདོ་རྣམས་སུ་ལྷད་བཅུག་པ་སྟེ། དཔེར་ན་མཁས་པ་ཁ་ཅིག་གིས་གདུགས་དཀར་ལྷ་ཡུལ་མ་དང་། མདོ་ཕྲེང་བ་ཅན་སོགས་འགྲེས་བཤང་བའི་ཚུལ་གྱིས་རྒྱས་པར་མཛད་པར་གྲགས་པ་ལྟ་བུ་ཡིན་གྱི། འདི་ནི་དེ་ལྟར་མ་ཡིན་ནོ། །དྲི་མེད་འོད་ལས། རྒྱུད་རྣམས་ལ་རང་སྟོབས་ཀྱིས་འབྲེལ་པ་གདུག་པའི་སློབ་དཔོན་དུ་གསུངས་ལ། ནམ་མཁའ་ཀློང་ཡངས་ལས། གསང་བའི་མན་ངག་མ་གོ་བར། །སློབ་མ་མ་བྱས་སློབ་དཔོན་རིང་། །ཁུང་ནས་བརྒྱུད་པའི་མན་ངག་ཟླུལ། །མ་ནོར་ཡིན་པར་མི་བརྩི་བར། །རང་བཟོ་ཁ་ཚབ་ཆེ་བ་ལས། །ཡིད་ཆེས་བྱེད་ཅིང་དམ་པར་འཛིན། །ལྟ་བ་དམན་ནམ་ངོ་སྲུང་བྱེད། །ཅེས་གསུངས་པས། རྒྱུད་དོན་རང་སྟོབས་ཀྱིས་འགྲེལ་པ་དང་། སློབ་དཔོན་མ་བསྟེན་མན་ངག་མ་གོ་བ། བརྩོམ་པར་མི་རུང་ཡང་། འདི་དེ་མ་ཡིན་ཏེ་རང་སྟོབས་ཀྱི་མ་ཡིན་རྒྱ་བོད་ཀྱི་གཞུང་མན་ངག་གི་རྗེས་སུ་འབྲངས་སོ། །སློབ་དཔོན་ལ་བསྟེན་ཅིང་མན་ངག་ཐོབ་ནས་བྲིས་སོ། །ནམ་མཁའི་ཀློང་ཡངས་ལས། རང་ལ་དོན་གྱིས་གདེང་མེད་པར། །དྲེགས་ཤིང་ང་རྒྱལ་མཁས་འདོད་
ནས། །ཚིག་ཙམ་ལུང་ལས་ཁུངས་ཕྱུང་ནས། །བརྩལ་བཤད་ཐོ་ཅོས་གཞུང་ཉམས་བྱེད། །དམྱལ་བར་ངན་འགྲོར་གཏན་ཡུལ་འཁྱམས། །ཞེས་གསུངས་པས། གཅན་འཕྲང་ལས། བྱིན་རླབས་ཉམས་མྱོང་ཆུ་རྒྱུན་ཆད། །སློབ་དཔོན་མ་བསྟེན་དབང་མ་མནོས། །ཆོས་འཆད་བྱེད་པའི་རྣམ་སྨིན་ནི། །ལྕགས་ཀྱི་དྲྭ་བར་ལུས་བཅུག་ནས། །ཞེས་སོགས་དང་། མན་ངག་ངེས་དང་དྲོད་མེད་པར། །ང་ཡི་བཀའ་ལས་བཟང་བ་མེད། །དེ་སྐད་ཟེར་ཞིང་གཞན་བསླུས་ནས། །ཞེས་དང་། སྤྲུལ་པོའི་རྒྱལ་པོས་ཀྱང་དགོངས་པ་དང་བདག་གི་བླ་མའི་བཀའ་བཞིན་དུ་མ་བགྱིས་པར། རིག་ཆོག་དང་རལ་ཆོད་བྱས། ཆོས་གཞུང་བཞིན་དུ་མ་བཤད་པར། སྙན་ཚིག་དང་རང་བཟོ་བཙུད། ཆོས་སེམས་དང་མ་འདྲེས་པར། ཟས་ནོར་དང་འདོད་པའི་དབང་དུ་སོང་ནས། བླ་མ་དང་། །ཆོས་དང་། བདག་ཉིད་གསུམ་བདུད་ལ་རིན་མེད་དུ་བཙོངས་ནས་སྒྲོ་སྐུར་དང་མི་ཁས་ཕོག་ནས། གསང་སྔགས་ཆེ་བའི་ཡོན་ཏན་གཏོར་ནས་བཟློག་ཐབས་མེད་པར་སོང་གདའ་བ་གཟིགས་སམ། ལྷ་ཇོ་བོ་ཐུགས་རྗེ་ཆེན་པོ་བླ་མ་དཀོན་མཆོག་རིན་པོ་ཆེ་རྣམས། གསང་
སྔགས་ཆེ་བའི་ཡོན་ཏན་དང་ལྡན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། ཅེས་གསུངས་པས། དེ་ལྟ་བུའི་སྐྱོན་དང་ལྡན་ན་ཤིན་ཏུ་མི་རུང་བ་ཡིན་ནའང་། རང་ལ་ངེས་ཤེས་ཀྱི་གདེང་ཅུང་ཟད་ཐོབ། ང་རྒྱལ་ཆེ་ཤིང་མཁས་འདོད་ཀྱིས་བྲིས་པ་མ་ཡིན། ཉམས་མྱོང་ཆུ་རྒྱུན་མ་ཆད་པའི་སློབ་དཔོན་བསྟེན་ཞིང་དབང་ཞུས་མན་ངག་ངེས་པའི་དྲོད་ཅུང་ཟད་ཐོབ། བླ་མའི་བཀའ་བཞིན་བསྒྲུབས་ཤིང་རལ་ཆོད་མ་བྱས། གཞུང་བཞིན་བཤད་ཅིང་སྙན་ངག་དང་རང་བཟོ་མ་བཙུད། རང་གཞན་བྱང་ཆུབ་ལ་འགོད་པའི་བསམ་པ་ཁ་ཙམ་མིན་པས་བྲིས་ཀྱིས་ཟས་ནོར་དང་སྙན་གྲགས་འདོད་ཕྱིར་བརྩམས་པ་མ་ཡིན་པས། སྐྱོན་དེ་དག་འདི་ལ་མི་འཇུག་གོ །དེས་ན་སྤྱིར་སངས་རྒྱས་ཀྱི་བསྟན་པ། དགོས་ཐུགས་རྗེ་ཆེན་པོ། ཡང་དགོས་རྒྱལ་བ་རྒྱ་མཚོའམ་རྒྱུད་གཞུང་སོར་བཞག་གི་དབང་དུ་བཤད། རྣམ་གཡེང་མེད་པར་མཚམས་བསྡམས་ནས་བྱས། ཐར་པ་ཐོབ་པའི་ལམ་དངོས་ཡིན་པས། འདི་ནི་བཅོམ་ལྡན་འདས་ཀྱི་བཀའ་བཞིན་དུ་སྤྱི་བོར་ལེན་རིགས་པ་ཡིན་ཏེ། གང་ཞིག་རྒྱལ་བའི་བསྟན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་
ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་རྒྱུད་བླ་མ་ལས་གསུངས་སོ། །ཡང་བོད་ཁ་ཅིག་ཏུ་བྱུང་བར་གྲགས་པ་ལྟར་མདོ་རྒྱུད་སྔར་ནས་གྲགས་པའི་གཞུང་རྣམས་ཞུ་དག་དང་འགྱུར་བཅོས་ལ་སྙེད་འདོགས་ནས་གསུང་རབ་བཅོས་པ་དང་། འགྲེས་བཤང་བའི་རིག་པས་མང་དུ་བཏང་བ་དང་། ཆོས་གང་དང་གང་ལ་ཡང་ཆོས་དེ་ཉིད་ཀྱི་བྱུང་ཁུངས་འདིས། མཁས་གྲུབ་རྣམས་ཀྱིས་མཛད་པ་ཐམས་ཅད་མི་འཐད་པར་ལུང་རིགས་དུ་མས་བཀག་ནས། སླར་ཆོས་དེའི་ལྟ་གྲུབ་གསར་དུ་བཞག་པ་དང་། ཡི་དམ་གྱིས་གསུངས་པ་དང་། གཏེར་ནས་ཐོན་པ་སོགས་ཀྱང་མིན། སྔོན་རྒྱ་བོད་དུ་མེད་ཅིང་མ་གྲགས་པའི་ཆོས་ཞིག་རང་གིས་རྟོག་པས་བརྟགས་ནས་གསར་དུ་རྩོམ་པ་མི་རུང་སྟེ། ཨོ་རྒྱན་རིན་པོ་ཆེས། རྒྱལ་བའི་བཀའོ་ལོ་ནས་གསེབ་ཕུབ་ལྟར་ལྷད། །གདམས་པ་ཚོང་འདུས་འོ་མ་བཞིན་དུ་འཆལ། །ཞེས་གསུངས་སོ། །འདི་ལ་སྐྱོན་དེ་དག་ཡོད་པ་མ་ཡིན་ཏེ། ཆོས་འདིའི་བརྒྱུད་པ་མཁས་གྲུབ་རྣམས་ཀྱིས་དགོངས་པ་གསལ་བར་བྱས་པ་ཡིན་ཞིང་། གཞུང་དོན་གོ་ཕྱིར་རྩོམ་པ་ཡིན་གྱིས་གསུང་རབ་དང་གཞུང་བཅོས་པ་
མེད་དོ། །འོ་ན་ཁྱེད་ཅག་ཆོས་ཀྱི་སྤྱན་དང་བྲལ་བའི་སོ་སོའི་སྐྱེ་བོས་ཆོས་འདི་གླེགས་བམ་འདི་ལྟར་འབྲི་རུང་ངམ་ཞེ་ན་རུང་སྟེ། ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྒྱུད་ཆེན་པོ་པདྨ་རྒྱལ་པོ་ལས། བཅོམ་ལྡན་འདས་པདྨ་རྣམ་པར་འབྱེད་པས་ཕྱག་བརྐྱངས་ཏེ་སྤྱན་རས་གཟིགས་ཀྱི་སྤྱི་བོར་བཞག་ནས། སྤྱིར་བྱང་ཆུབ་སེམས་དཔའ་ཐམས་ཅད་ལ་གཏད་།ཁྱད་པར་དུ་པདྨ་རིགས་ཀྱི་བྱང་ཆུབ་སེམས་དཔའ་ཐམས་ཅད་ལ་གཏད་དོ། །ཉེ་བར་ཡིད་ལ་ཟུངས་ཅིག་ཅེས་པར་གཏད་དོ། །བཀུར་སྟི་གི་གནས་སུ་སྦྱིན་པའོ། །འཕགས་པ་སྤྱན་རས་གཟིགས་ཀྱི་དབང་པོའི་བཅོམ་ལྡན་འདས་ལ་འདི་རྣམས་ནི་འཕགས་པ་ཉན་ཐོས་དང་རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་གྱིས་སྙིང་རྗེ་ཆེན་པོ་དང་ལྡན་ན་སོ་སོའི་སྐྱེ་བོས་ཀྱང་ཉན་པ་དང་བཤད་པ་དང་ཚུལ་བཞིན་དུ་ཡིད་ལ་བྱེད་པ་དང་། གསེར་གྱིས་བྲིས་ཏེ་གླེགས་བམ་དུ་བྱས་ནས་མཆོད་པ་ལྔས་རྟག་ཏུ་མཆོད་པ་དང་། སྤྱི་བོར་བཞག་པ་དང་། ཡང་ཡང་གསན་པར་བྱ་བ་དང་། བཀུར་སྟི་ཆེན་པོ་བྱ་བ་ངས་གནང་ངོ་། །ཞེས་གསུངས་པའི་ཕྱིར། བདག་གིས་ཀྱང་རང་ཉིད་དྲན་པ་གསོ་བའི་ཕྱིར་བརྗེད་ཐོ་དང་། རང་དང་སྐལ་མཉམ་རྨོངས་པའི་གང་
ཟག་གཞུང་མང་པོ་ལྟ་བར་མི་ནུས་པ་ལ་ཕན་པ་དང་། བདག་ལྟ་བུའི་གང་ཟག་རྟོག་གེ་བ་ཐེ་ཚོམ་ཆེ་བ་དག་གི་ཐེ་ཚོམ་བསལ་བ་དང་། ཆོས་འདི་ལ་མོས་པའི་གང་ཟག་དམན་པ་དག་ངེས་ཤེས་འདྲེན་ཕྱིར་དང་། གཞུང་འདི་ལ་སྔོན་ཆད་འགྲེལ་པ་བྱེད་མཁན་མ་བྱུང་བ་སྣང་བའི་ཕྱིར། ཆོ་ག་འདིའི་ཞབས་ཏོག་ཆག་ཕྱི་དང་། ཆོས་འདི་བཀའ་མ་ཆད་ཙམ་ནུབ་ལ་ཉེ་བར་སྣང་བས་བསྟན་པ་གསལ་བའི་ཕྱིར་དུ། སེམས་ཅན་ཐམས་ཅད་ལ་སྙིང་བརྩེ་བས་ཀུན་ནས་བསླངས་ཏེ། བདག་རང་དང་འབྲེལ་ཐོགས་ཀྱི་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་འདོད་པས་རྒྱུ་བྱས་ཏེ། ཆོས་འདི་ཁོ་ན་ལ་ཉམས་ལེན་གཙོ་བོར་བྱེད་པའི། རྣལ་འབྱོར་པ་རཱ་ག་ཨ་སྱས་ཆུ་སྦྲུལ་གྱི་ལོ་སྣོན་ཟླ་བ་ནས་བཟུང་སྟེ་ཐུན་མཚམས་རྣམས་སུ་བྲིས་ཏེ་གྲོ་ཞུན་ཟླ་བའི་ཚེས་གྲངས་བཟང་པོ་ལ་འགྲུབ་པར་སྦྱར་བ་ཡིན་ཞིང་། མཁས་འདོད་དང་གྲགས་པ་དང་བཀུར་སྟི་འདོད་ཕྱིར་སོགས་མ་ཡིན་པས་ཉེས་པ་མེད་དམ་སྙམ། འོན་ཀྱང་སོ་སོའི་སྐྱེ་བོའི་ཕྱིར་མ་རྟོགས་པ་དང་། ཕྱོགས་རྟོག་དང་ལོག་པར་རྟོག་པ་དང་། མ་འབྲེལ་པ་དང་འགལ་བ་དང་། སྦ་འོས་གསལ་བར་བཀོད་པ་དང་། གཞུང་
དོན་འཁྲུགས་པ་དང་། དེ་སོགས་རྩོམ་ཉེས་པའི་ཆ་ཅི་དང་ཅི་མཆིས་པ་ཐམས་ཅད་རབ་ཏུ་འགྱོད་པས་བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་ལྷ་དགུ་དང་རྒྱ་མཚོ་ལྔའི་ལྷ་ཚོགས་ཐམས་ཅད་ཀྱི་དྲུང་དུ་མཐོལ་ལོ་བཤགས་སོ། །བྱང་ཞིང་དག་ནས་འདི་དང་ཕྱི་མའི་སྒྲིབ་པར་མི་འགྱུར་བར་བྱིན་གྱིས་བརླབ་ཏུ་གསོལ། ཐོས་པའི་མཆོད་ཡོན་རྒྱ་མཚོས་ལེགས་གཏམས་ཤིང་། །རྣམ་བཀྲ་རིག་པའི་མེ་ཏོག་ཀུན་ཏུ་བཀྲམ། །ཞེས་སོགས་ནས། རྩོམ་པ་སྡེབ་ལེགས་སྙན་པའི་རོལ་མོ་སོགས། །འཕགས་རྣམས་དགྱེས་བྱེད་མཆོད་པ་བཞེས། །ཞེས་གསུངས་པ་ལྟར། མདོ་རྒྱུད་ཕྱོགས་མེད་རྒྱ་མཚོ་ལྟ་བུ་ལ། ཐོས་བསམ་བྱས་ནས་དེ་དག་གི་ལུང་མང་དུ་དྲང་བ་འདི་ནི་འཕགས་པ་རྣམས་དགྱེས་པའི་མཆོད་ཡོན་ཡིན་ལ། རྣམ་པར་བཀྲ་བའི་རིག་པ་རྣོན་པོས་ལེགས་པར་བརྟགས་ནས་ལུང་དེ་དག་གང་ལ་གང་སྐབས་སུ་བབ་པ་ཤེས་ཤིང་མ་འཆུགས་པར་སྦྱར་བའི་རིག་པའི་མེ་ཏོག་དང་། གཞན་ཡང་གཞུང་དོན་ཁ་སྦྲུམ་པ་རྣམས་རིགས་པས་ཤོ་མང་གི་སུལ་ལྟར་འབྱེད་པ་ཡང་མེ་ཏོག་ཡིན་ལ། དེ་ལ་ཕྱི་རབས་དག་བལྟས་ཤིང་ཉམས་སུ་བླངས་ན་སྡོམ་པ་གསུམ་ལྡན་རྡོ་རྗེ་འཛིན་པ་ཚུལ་ཁྲིམས་ཀྱི་དྲི་
བསུང་ཅན་དུ་འགྱུར་བས་བདུག་སྤོས། འདི་གཞན་དག་ལ་ལེགས་པར་འཆད་ནས་བསྟན་པ་སྤྱི་དང་བྱེ་བྲག་གིས་ཆོས་འདིའི་བསྟན་པ་གསལ་གདུལ་བྱའི་རྨོངས་པ་གསལ་བས་མར་མེ་ཡིན་ལ། འདིའི་བར་སྐབས་འཐད་མི་འཐད་དང་བཞེད་ལུགས་སོ་སོའི་དབྱེ་བ་ཅུང་ཟད་ཡོད་པས་ཉེས་པའི་ཆ་སྦྱངས་བའི་དྲི་ཆབ་ཡིན་ལ། འདིའི་དོན་བསྒོམ་ན་བདེ་གསལ་མི་རྟོག་པ་ཟུང་དུ་འཇུག་པའི་བདེ་སྟོང་ཟུང་འཇུག་གི་རོ་མྱོང་བར་འགྱུར་པས་ཏིང་ངེ་འཛིན་གྱི་ཟས་ཏེ་ཞལ་ཟས་ཡིན། འདི་ལྟར་རྩོམ་པ་འདི་ནི་ཆོས་འདི་ལ་མོས་པ་རྣམས་ཀྱི་རྣ་བར་སིམ་པར་སྐྱེ་བས་རོལ་མོ་ཡིན་ཞིང་། འཕགས་པ་རྣམས་ནི་འདི་ལྟ་བུའི་མཆོད་པས་དགྱེས་པ་བསྐྱེད་ནུས་ཀྱི་གཞན་ཟང་ཟིང་གི་མཆོད་པས་འཁོར་ལོས་སྒྱུར་བའི་རྒྱལ་སྲིད་མཆོད་ཀྱང་རང་ཉིད་ཚོགས་རྫོགས་མོད་ཀྱི། འཕགས་པ་རྣམས་ཐུགས་དགྱེས་པ་བསྐྱེད་མི་ནུས་ཀྱི། འཁོར་བའི་བདེ་འབྱོར་ཐམས་ཅད་ཉེས་སྐྱོན་གྱིས་འབྱུང་གནས་སུ་གཟིགས་པའི་ཕྱིར་དང་། འདི་བརྩོམ་པ་ལས་ཐར་པ་བྱང་ཆུབ་འབྱུང་བའི་གནས་སུ་གཟིགས་པའི་ཕྱིར་རོ། །དེས་ན་བདག་གིས་འདི་བརྩམས་པ་ལས་ངལ་བ་གང་ཐོབ་པའི་བསོད་ནམས་དེས། ཐུགས་རྗེ་ཆེན་པོ་རྒྱལ་
བ་རྒྱ་མཚོ་ལྷ་དགུ་ལྷ་ལྔའི་ཚོགས་ལ་འབུལ་ལོ། །དེའི་དགེ་བས་སེམས་ཅན་ཐམས་ཅད་མྱུར་དུ་བྱང་ཆུབ་ཐོབ་པ་དང་། ཐུབ་པའི་བསྟན་པ་ཡུན་རིང་དུ་གནས་པ་དང་། བསྟན་འཛིན་དམ་པ་རྣམས་སྐུ་ཚེ་དང་ཕྲིན་ལས་རྒྱས་པར་གྱུར་ཅིག །དེའི་དགེ་བས་བདག་དང་བདག་གི་འབྲེལ་ཐོགས་ཐམས་ཅད་ཀྱིས་གཙོར་བྱས་སེམས་ཅན་ཐམས་ཅད་ཀྱི་ལུས་འདི་བོར་མ་ཐག་ཏུ། སྐད་ཅིག་ལག་པ་བརྐྱང་བསྐུམ་ཙམ་ལ་ནུབ་ཕྱོགས་བདེ་བ་ཅན་གྱི་ཞིང་དུ་མེ་ཏོག་པདྨ་ལས་བརྫུས་ཏེ་སྐྱེ་བར་གྱུར་ཅིག །སྐྱེས་མ་ཐག་ཏུ་པདྨ་ཁ་བྱེ་ནས་འོད་དཔག་ཏུ་མེད་པའི་ཞལ་མཐོང་བར་གྱུར་ཅིག །བྱང་ཆུབ་མ་ཐོབ་ཀྱི་བར་དུ་ཞིང་དེ་རྟག་ཏུ་འཛིན་ཅིང་རིམ་གྱིས་བྱང་ཆུབ་ཐོབ་པར་གྱུར་ཅིག །འོད་དཔག་མེད་ཀྱི་སྐུ་ཚེ་དང་། སྤྱན་རས་གཟིགས་ཀྱི་ཕྲིན་ལས། གསང་བའི་བདག་པོའི་མཐུ་སྟོབས། འཇམ་དཔལ་དབྱངས་ཀྱི་མཁྱེན་རབ། འཛམ་ལྷའི་རིགས་ལྔའི་དངོས་གྲུབ། སློབ་དཔོན་པདྨའི་ནུས་མཐུ་ཐམས་ཅད་གཅིག་ཏུ་བསྡུས་པ་ལྟ་བུར་བདག་ལ་ད་ལྟ་ཉིད་དུ་གྱུར་ཏེ། སེམས་ཅན་ཐམས་ཅད་ཐར་པ་དང་ཐམས་ཅད་མཁྱེན་པའི་ས་ལ་བདག་ཁོ་ནས་འཇོག་ནུས་པར་གྱུར་ཅིག །ཆོས་དབྱིངས་རྣམ་པ་དག་པ་བསམ་ལས་
འདས་པ་དང་། རྒྱུ་འབྲས་རྟེན་འབྲེལ་བསླུ་བ་མེད་པ་དང་། ཐུགས་རྗེ་ཆེན་པོའི་ལྷ་ཚོགས་རྣམས་ཀྱི་ཐུགས་རྗེའི་མཐུས་དེ་ཁོ་ན་བཞིན་དུ་གྱུར་ཅིག །འོ་ན་དེང་སང་སྙིགས་མའི་མཐའ་ལ་ཐུག་པར་ཉེ་བས་ཆོས་ཐམས་ཅད་ཆ་ཆ་ནས་འགྲིབ་པའི་དུས་ཡིན་པས་ཁྱོད་ཀྱིས་འདི་བྲིས་ཀྱང་གསལ་བར་མི་ནུས་སོ་ཞེ་ན། སྟོན་པའི་བསྟན་པ་དང་ཆོས་རྣམས་འགྲིབ་ཅིང་བསྟན་པའི་མཇུག་ཏུ། ཐུགས་རྗེ་ཆེན་པོ་ཡི་གེ་དྲུག་པའི་བསྟན་པ་དར་བར་ཨོ་རྒྱན་རིན་པོ་ཆེ་དང་སྲོང་བཙན་སྒམ་པོ་སོགས་ཀྱིས་ལུང་བསྟན་ཅིང་། ཁྱད་པར་རས་ཆུང་བས་བསྒྱུར་བའི་ཆོས་ཐམས་ཅད་རྒྱུན་རིང་བར་གསུངས་ལ། སངས་རྒྱས་ཕྱི་མ་སྟེ་རྒྱལ་བ་བྱམས་པའི་བསྟན་པ་མུ་མཐའ་ཚེ་ལོ་དྲུག་བརྒྱ་ཐུབ་ཅིང་། འཕགས་པ་གནས་བརྟན་བཅུ་དྲུག་གིས་ཤཱཀྱ་ཐུབ་པའི་བསྟན་པ་ལ་མ་བསྡུས་ཀྱི་བར་དུའང་། ཆོས་འདི་མི་ནུབ་པར་བདེན་ཚིག་འགྲུབ་པའི་གྲུབ་ཆེན་ཀརྨ་པཀྴིསསྨོན་ལམ་བཀྲ་ཤིས་དང་བཅས་པའང་ཡོད་དེ། རྗེ་བཙུན་མི་ལས་རས་ཆུང་པ་ལ་གསུངས་པ་ཡང་ཁྱོད་ཀྱི་མན་ངག་ཕྲན་བུས་ཀྱང་སེམས་ཅན་མང་པོ་ལ་ཕན་ཐོགས་པས་སྣོད་ལྡན་གྱི་གང་ཟག་ལ་ལེགས་པར་སྦྱིན། ཁྱོད་ཀྱི་ཆོས་བརྒྱུད་ཀྱང་ཇེ་བཟང་
ཇེ་དར་ལ་འགྲོ་བ་ཡོད། ཅེས་དང་། ཆོས་བརྒྱུད་ཆུ་བོའི་གཞུང་དང་ལྡན། །སྨིན་གྲོལ་དོན་གཉིས་ལྷུན་གྲུབ་འབྱུང་། །ཞེས་ལུང་བསྟན་པ་དང་། རས་ཆུང་བ་ཉིད་ཀྱིས་མ་འོངས་ལུང་བསྟན་མང་དུ་གསུངས་ཤིང་། སླར་ཡང་ཚེ་ལོ་བཅུ་པའི་བར། །ང་ཡི་བསྟན་པ་དར་བར་འགྱུར། །ཞེས་གསུངས་སོ། །རིན་པོ་ཆེ་ཀརྨ་པཀྴིསམཛད་པའི་རྒྱལ་བ་རྒྱ་མཚོའི་ཡིག་རྙིང་གི་གཤམ་ནི། སློབ་དཔོན་རིན་པོ་ཆེ་ཀརྨ་པའི་ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྒྲུབ་ཐབས་ལགས་པས་ཀུན་གྱིས་བྲིས་ཤིག །སྒྲུབས་ཤིག །དབང་སྐུར་ཅིག །ཤོད་ཅིག །ཁྲོམ་ཆོས་རྒྱ་ཆེན་པོས་གཞན་དོན་གྱིས་ཤིག །བླ་མ་ཡི་དམ་མཁའ་འགྲོའི་བྱིན་གྱིས་བརླབས་ཀྱིས། ལུང་མ་མནོས་ཀྱང་དཔེ་གང་གིས་བྲིས་པ་དང་མཐོང་བར་འགྱུར་བ་རྣམས་ཀྱང་བདག་གཞན་གྱི་དོན་ཉི་མ་ཤར་བ་ལྟ་བུར་གྱུར་ཅིག །ཆུ་བོའི་རྒྱུན་ལྟར་བྱིན་རླབས་ལྷུན་གྱིས་གྲུབ་ཅིང་། ཐུགས་རྗེ་ཆེན་པོ་ཉིད་དང་མཇལ་བ་ལྟ་བུར་གྱུར་ཅིག །སློབ་དཔོན་པདྨའི་བཀྲ་ཤིས་ཤོག །ཐུགས་རྗེ་ཆེན་པོའི་བཀྲ་ཤིས་ཤོག །དཔའ་བོ་རྒྱ་མཚོའི་བཀྲ་ཤིས་ཤོག །ཊཱཀི་རྒྱ་མཚོའི་བཀྲ་ཤིས་ཤོག །དམ་ཅན་རྒྱ་མཚོའི་བཀྲ་ཤིས་ཤོག །ཕྱི་མའི་
མུ་མཐར་ཐུག་གི་བར་དུ་བཀྲ་ཤིས་པར་གྱུར་ཅིག །ཅེས་གསུངས་སོ། །སརྦ་མངྒ་ལཾ།། ཛ་ཡནྟ། བཀྲ་ཤིས།། །། ༈ ན་མོ་ཨཱརྱ་ལོ་ཀི་ཤྭ་ར་ཡེ། །གང་སྔོན་ཐུགས་བསྐྱེད་སྨོན་ལམ་བླ་མེད་ཅིང་། །བར་དུ་སྤྱད་པ་སྤྱོད་པ་མཐར་ཕྱིན་པས། །ཐ་མར་ཐམས་ཅད་མཁྱེན་པ་མཆོག་བརྙེས་པ། །འཕགས་མཆོག་བརྩེ་བའི་བདག་ཉིད་ཁྱོད་ཕྱག་འཚལ། །དུས་གསུམ་རྒྱལ་བ་མ་ལུས་ཐམས་ཅད་ཀྱི། །བརྩེ་ཆེན་སྙིང་རྗེའི་རྡུལ་མང་ཇི་སྙེད་པ། །གཅིག་བསྡུས་མཁྱེན་བརྩེའི་རི་དབང་ལྟ་བུའི་སྐུ། །མཐའ་ཡས་འགྲོ་བའི་བརྟན་གནས་གང་དེར་འདུད། །རབ་མང་ཇི་སྙེད་འགྲོ་ཀུན་དོན་སླད་དུ། །རབ་འཇིགས་དམྱལ་བར་གནས་ལ་མི་འཇིགས་པར། །རབ་འཕགས་ལྷག་བསམ་བརྩོན་པ་མི་བསྙེལ་བར། །རབ་མཆོག་སེམས་དཔའི་གཙོ་ལ་གུས་པས་བསྟོད། །བདག་གཞན་སྒོ་གསུམ་དགེ་ཚོགས་མཆོད་པ་འབུལ། །སྔོན་བསགས་སྡིག་པའི་ལས་ཀུན་མཐོལ་ཞིང་བཤགས། །འཕགས་སྐྱེའི་དགེ་བ་ཀུན་ལ་ཡི་རང་ཞིང་། །འགྲོ་ལ་སྨན་ཕྱིར་ཆོས་འཁོར་བསྐོར་བར་བསྐུལ། །མྱ་ངན་མི་འདའ་རྟག་ཏུ་བཞུགས་པར་གསོལ། །དེ་ལྟར་ལེགས་དཔྱད་
རྣམ་དཀར་དགེ་བ་དང་། །ཁྱད་པར་འཕགས་པ་མཆོག་གི་སྐུ་རྟེན་དང་། །རིགས་པའི་ཆོ་གའི་དོན་འགྲེལ་ལེགས་བཞེངས་པའི། །དགེ་བའི་རྩ་བ་ཇི་སྙེད་ཐོབ་པ་དང་། །གཞན་ཡང་བདག་གཞན་དུས་གསུམ་ལེགས་བྱས་པའི། །དགེ་ཚོགས་རྒྱ་མཚོ་ཟད་པ་མེད་པ་དག །རྒྱལ་བ་སྲས་བཅས་སྤྱན་སྔར་མཆོད་པ་འབུལ། །དྲི་མེད་བསྟན་པ་ཡུན་དུ་དར་རྒྱས་ཤོག །འདིས་མཚོན་དགེ་ཚོགས་མ་ལུས་གཅིག་བསྡུས་ནས། །དྲིན་ཆེན་བླ་མ་ཀརྨ་ཆགས་མེད་དང་། །ཁྱད་པར་སྤྲུལ་སྐུ་ཀརྨའི་མཚན་ཅན་གྱིས། །ས་ལམ་འགལ་རྐྱེན་མ་ལུས་།རབ་ཞི་ཞིང་། །བསྟན་འགྲོའི་དོན་ཆེན་སྒྲུབ་པ་ལ་སོགས་པ། །ཟག་མེད་ཐུགས་དགོངས་ཡོངས་སུ་རྫོགས་ཕྱིར་བསྔོ། །ལེགས་བྱས་དགེ་ཀུན་བདག་མཆེད་ལ་སོགས་པ། །ཉེ་འབྲེལ་སློབ་མ་སྦྱིན་བདག་འབྲེལ་ཐོགས་དང་། །རྟ་ཁལ་འོ་ཞོ་བལ་ལྤགས་ཤ་ཁྲག་སོགས། །སྒོ་གསུམ་དངོས་བརྒྱུད་འབྲེལ་པ་གང་ཐོགས་དང་། །དགྲ་གཉེན་བར་མས་བསྡུས་པའི་སེམས་ཅན་ཀུན། །བླ་མེད་བྱང་ཆུབ་ཐོབ་པའི་རྒྱུ་རུ་བསྔོ། །བདག་གཞན་འབྲེལ་ཐོགས་མཐའ་ཡས་སེམས་ཅན་ཀུན། །སྐྱེ་བ་འདི་ནས་ཚེ་རབས་ཀུན་ཏུ་ཡང་། །འཕགས་པའི་
ཐུགས་རྗེས་ནམ་ཡང་མི་འདོར་བར། །གནས་ངན་སྐྱེ་བའི་སྒོ་ཀུན་རབ་བཀག་ནས། །མངོན་མཐོའི་རྟེན་ཐོབ་ངེས་ལེགས་ཆོས་སྤྱོད་དེ། །ནམ་ཞིག་འཕོས་ཚེ་བདེ་ཆེན་ཞིང་སྐྱེས་ནས། །སྒྲིབ་གཉིས་བྱང་སྟེ་ས་ལམ་ཡོན་ཏན་རྫོགས། །མྱུར་དུ་སངས་རྒྱས་ཡེ་ཤེས་ཐོབ་པར་ཤོག །སླར་ཡང་ཞི་བའི་གནས་ལ་མ་ཆགས་པར། །གང་ལ་གང་འདུལ་དེ་ལ་དེར་སྟོན་པའི། །མཐའ་ཡས་འགྲོ་བ་སེམས་ཅན་མ་ལུས་པ། །ཐམས་ཅད་རྫོགས་བྱང་ཉིད་ལ་འགོད་པར་ཤོག །དེ་ལྟར་ལེགས་པར་སྨོན་པ་འདི་དག་ཀུན། །རྒྱལ་བ་སྲས་བཅས་ཐུགས་རྗེ་བསླུ་མེད་དང་། །ཆོས་ཉིད་བདེན་དང་དགེ་བའི་མཐུ་ཡིས་ནི། །གེགས་མེད་མྱུར་དུ་འགྲུབ་པ་ཉིད་གྱུར་ཅིག །དཀོན་མཆོག་གསུམ་ལ་ཕྱག་འཚལ་ལོ། །ཏདྱ་ཐཱ། །པཉྩ་དྲི་ཡ་ཨ་ཝ་བོ་དྷ་ན་ཡེ་སྭཱ་ཧཱ། འདོད་གསོལ་ཤམ་སྨོན་འདི་ནི་ཀརྨ་བུད་དྷའམ། མཚན་གཞན་ཀརྨ་པྲ་ཀཱིརྟིས་སྦྱར་བའོ།། ༈ འདིས་མཚོན་དུས་གསུམ་ལེགས་བསགས་བསོད་ནམས་ཚོགས། །ཐུགས་རྗེ་ཆེན་པོ་དགུ་ལྔའི་ལྷ་ལ་འབུལ། །རྗེས་སློབ་བདག་གཞན་མ་རྒན་ཡིད་ཅན་འགྲོ་བ་རྣམས། །སྣང་མཐའི་ཞིང་དུ་མངོན་འཚང་རྒྱ་ཕྱིར་བསྔོ། །རྒྱལ་བ་རྒྱ་མཚོའི་
དོན་འབྲེལ་ཆ་ཚང་འདི། །རྒྱལ་བསྟན་སྤྱི་དང་ཕན་པའི་བཙས་སུ་བྲིས། །རྒྱལ་སྲས་སྤྱོད་པའི་མཛད་པ་ལྷུན་གྱིས་གྲུབ། །རྒྱལ་བའི་རྗེས་འཛིན་མངོན་སངས་རྒྱས་གྱུར་ཅིག །ཅེས་སྨོན་ཚིག་གཉིས་པོ་འབྲི་བ་པོས་བགྱིས་སོ། །དགེའོ།། འཇིག་རྟེན་དབང་ཕྱུག་ཆོ་གའི་ཟིན་བྲིས་སྐོར། །ཐར་བའི་ལམ་ཆེན་དོན་འགྲེལ་འདི་དག་དང་། །པདྨ་ཟབ་དང་པདྨ་རྒྱལ་པོའི་རྒྱུད། །རྩ་བའི་བསྙེན་ཟིན་ཕྱི་སྒྲུབ་ནང་སྒྲུབ་དང་། །གསང་སྒྲུབ་དྲིལ་སྒྲུབ་ཡང་གསང་སྒྲུབ་པ་དང་། །ནང་སྒྲུབ་གསང་སྒྲུབ་དྲིལ་སྒྲུབ་སྟ་གོན་ཟིན། །ལུས་དཀྱིལ་བསྙེན་ཚད་རྗེས་ཆོག་ཟིན་བྲིས་དང་། །རྫོགས་རིམ་འཁོར་ལོ་ལྔ་དང་མན་ངག་བཅས། །བསྐྱེད་རིམ་ཉལ་བ་འཆི་བ་ལམ་ཁྱེར་རྣམས། །གཏོར་འབུལ་ཟིན་བྲིས་བསྐང་དཔུང་རྒྱས་བསྡུས་གཉིས། །དྲིན་ཆེན་བླ་མ་ཀརྨ་ཨ་རཱ་གས། །མ་རྒན་རྗེས་འཇུག་བརྒྱུད་འཛིན་ལག་ཏུ་གནང་། །པོད་ཆེན་གཅིག་ཏུ་ཁོ་བོས་ལེགས་པར་བསྡུས། །དགེ་བས་རྒྱལ་བསྟན་ཉིན་བྱེད་དཀྱིལ་ལྟར་རྒྱས། །བསྟན་འཛིན་སྐྱེས་བུའི་མཛད་ཕྲིན་ཕྱོགས་བཅུར་རྒྱས། །བདག་གཞན་འགྲོ་རྣམས་ཐུགས་རྗེ་ཆེན་པོ་ཡི། །གོ་འཕང་ཐོབ་ནས་བདེ་ཆེན་ཞིང་སྐྱེས་ཤོག །དམ་ཆོས་འདི་ཉིད་
དར་ཞིང་རྒྱས་པ་དང་། །འཇིགས་བྱེད་ཆེན་པོ་མ་ཧཱ་ཀཱ་ལས་སྲུངས། །མཐོང་ཐོས་དྲན་རེག་འགྲོ་རྣམས་མ་ལུས་པ། །བདེ་བ་ཅན་དུ་སྐྱེ་བའི་རྒྱུ་རུ་བསྔོ། །རྨོངས་བརྟུལ་ཨ་ཡུན་དེས་བྲིས་ནས་སུ། །དམ་ཆོས་གླེགས་བམ་དཔེ་ཛིའི་ཚུལ་དུ་ཕུལ། །ཐུགས་རྗེ་ཆེན་པོའི་ལྷ་ལྔའི་ཟིན་བྲིས་ཀྱི་རྩམ་དོན་དང་། ཐུན་མིན་ཟབ་ཁྲིད་བཅས་པ་ཚང་བས་མཁྱེན་པར་མཛོད་ཅིག། །། བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།