Nitartha Digital Library
Tibetan
མཁས་གྲུབ་ཀརྨ་ཆགས་མེད་ཀྱི་གསུང་འབུམ།

3 occurrences of འབེན་
[Clear Hits]


  
  
  
  
  
  
  
  
མགོན་པོ་སྟག་ཞོན་གྱི་སྒྲུབ་སྐོར།
  
  
  
  
  
  
  
  
  
  
  
  
  
  
  
 
 
  
  
  
  
  
  
  
  
  
  
  


3 occurrences of འབེན་
[Clear Hits]

 
previousམགོན་པོ་སྟག་ཞོན་གྱི་སྒྲུབ་སྐོར།next

མགོན་པོ་སྟག་ཞོན་གྱི་སྒྲུབ་སྐོར།


CMR029_Page_0103
[མ་དཔེ་གཟིགས་ན་འདིར་གནོན།]

མགོན་པོ་སྟག་ཞོན་གྱི་སྒྲུབ་སྐོར་བཞུགས་སོ། ༈ མ་ཧཱ་ཀཱ་ལ་ཡ། ཡེ་ཤེས་མགོན་པོ་སྟག་ཞོན་སྒྲུབ་ཐབས། དཔལ་གཏོར་ཟུར་གསུམ་བརྒྱན་ལྡན་བཤམས། །རང་ཉིད་ཡི་དམ་གསལ་བར་བསྒོམ། ༈ མདུན་དུ་གྲུ་གསུམ་པད་ཉིའི་སྟེང་། །ཧཱུྃ་ལས་མགོན་པོ་སྐུ་མདོག་ནག །ཞལ་གདངས་མཆེ་གཙིགས་སྤྱན་གསུམ་བསྒྲད། །དབུ་སྐྲ་གྱེན་བརྫེས་ཐོད་སྐམ་བརྒྱན་། །དུར་ཁྲོད་ཆས་བརྒྱད་བེར་ནག་གསོལ། །ཆིབས་སུ་དཔའ་གཏུམ་སྟག་ལ་ཆིབས། །བྱ་ཁྲ་བརྒྱད་ནི་ཀླད་ན་ལྡིང་། །སྟག་གཟིག་དོམ་དྲེད་ཕྱི་ན་འབྲང་། །གསེར་གྱི་སེང་བརྒྱད་ཟུར་ན་འགྱིང་། །རེ་མ་ཏི་དང་སྡེ་བརྒྱད་ཚོགས། །སྣང་སྲིད་དྲེགས་པའི་འཁོར་དང་བཅས། །ས་བོན་འོད་ཀྱིས་སྤྱན་འདྲེན་ནོ། །སྤྱན་འདྲེན་མཆོད་བསྟོད་བྱས་ནས་ཀྱང་། །མགོན་པོའི་ཐུགས་ཀར་ཉི་མའི་སྟེང་། །ཧཱུྃ་མཐིང་སྔགས་ཀྱིས་གཡས་སུ་བསྐོར། །རང་ཉིད་ཡི་དམ་འོད་ཟེར་གྱིས། །བསྐུལ་བས་སྔགས་ཕྲེང་གཡས་སུ་འཁོར། །གང་བཅོལ་ལས་རྣམས་སྒྲུབ་པར་བསྒོམ། །ཨོཾ་མ་ཧཱ་ཀཱ་ལ་ཏྲི་ཡཾ་ཛཿ དཔལ་འབྱོར་མངའ་ཐང་རྒྱས་འདོད་ན། །བེར་གྱི་སུལ་ནས་རིན་པོ་ཆེ། །སྣ་ཚོགས་ཆར་དུ་འབེབས་པར་བསམ། །དྲག་


CMR029_Page_0104
[མ་དཔེ་གཟིགས་ན་འདིར་གནོན།]

པོར་བྱེད་ན་བར་གྱི་སུལ། །སྣ་ཚོགས་མཚོན་ཆའི་ཆར་བབས་ནས། །དགྲ་བགེགས་མྱལ་མྱལ་གཏུབས་པར་སྒོམས། །རྒྱུན་དུ་མགོན་པོ་དེ་ཡི་འོད་ཟེར་གྱིས། །སྣང་སྲིད་འཁོར་འདས་མཐུ་དང་སྟོབས། །བསྡུས་ནས་བདག་ལ་ཐིམ་པར་སྒོམས། །བར་ཆད་གནོད་པ་ཞི་འདོད་ན། །འོད་ཟེར་དཀར་པོ་འཕྲོས་པ་ཡིས། །གནོད་པ་གང་ཡིན་ཞི་བར་སྒོམས། །གང་འདོད་སྔགས་ཀྱི་ཤམ་བུ་ནི། །པུཎྜིང་ཤཱནྟི་པ་ཤང་དགྲ་བོ་མཱ་ར་ཡ་ཕཊ། །འདོད་དགུ་སྣང་སྲིད་ཚེ་བསོད་རབ་འབྱམས་པུཊྚི་ཀུ་རུ་ཡེ་སྭཱ་ཧཱ། ནད་གདོན་བར་ཆད་ཤཱནཾ་ཀུ་རུ་ཡེ་སྭཱ་ཧཱ། འདོད་དགུ་སྣང་སྲིད་ཐམས་ཅད་པཱ་ཤཾ་ཀུ་རུ་ཡེ་སྭཱ་ཧཱ། དགྲ་བགེགས་གནོད་བྱེད་མཱ་ར་ཡ་ཧཱུྃ་ཕཊ། ཨོཾ་ནི་ཡེ་ཤེས་ལྔ་ཡིན་ཏེ། །མ་ཧཱ་ཀཱ་ལ་མགོན་པོའི་སྲོག །ཏྲི་ནི་དྲེགས་པ་ཀུན་གྱི་སྲོག་།ཡམ་ནི་མྱུར་བྱེད་རླུང་གི་ཤུགས། །ཛནི་མྱུར་དུ་འགུགས་པའོ། །སྔགས་བཟླས་མཆོད་པའི་ཕན་ཡོན་ནི། །མེ་དང་རྒྱལ་པོ་ཆུ་དང་དུག །མ་རུངས་ལྕེ་སྤྱང་ལ་སོགས་པའི། །འཇིགས་པ་ཀུན་ལས་ཐར་བ་དང་། །ཚེ་དང་བསོད་ནམས་ཤིན་ཏུ་རྒྱས། །འཁོར་དང་ལོངས་སྤྱོད་དབང་དུ་འདུ། །དགྲ་དང་བགེགས་སོགས་གནོད་བྱེད་ཀུན། །མེ་ལྕེ་ཁ་ཡི་སྦྲང་མ་བཞིན། །རིགས་རྒྱུད་བཙན་དར་རྐང་འགྲོ་འཕེལ། །མི་ནུབ་རྒྱལ་མཚན་འཇིག་རྟེན་དུ། །གྲགས་པ་ཆེན་པོ་བླ་མེད་འགྱུར། །བར་མ་དོ་ཡི་ཆེ་ན་ཡང་། །དག་པའི་ཞིང་དུ་ཁྲིད་པར་བྱེད། །འཕགས་པ་སྤྱན་རས་གཟིགས་དབང་


CMR029_Page_0105
[མ་དཔེ་གཟིགས་ན་འདིར་གནོན།]

གི །སྤྲུལ་པ་མགོན་པོ་ནག་པོ་འདི། །བཀྲ་ཤིས་རྒྱུད་འཇམ་མི་ནོར་འཕེལ། །འགུ་ཞིང་ལྡོག་པའི་དོགས་པ་མེད། །རྟ་དང་ནོར་གྱི་ལྷ་ཡང་ཡིན། །འདི་ཡི་དབང་ནི་རྒྱུན་ཐོབ་ཅིང་། །རྒྱུད་དང་མན་ངག་འགའ་མཐོང་ཕྱིར། །རྣལ་འབྱོར་རཱ་ག་ཨ་སྱས་ཡིས། །འཕྲལ་དུ་མར་མེའི་ངོགས་ལ་བྲིས། །ཉེས་པ་མཆིས་ན་ལྷ་ལ་བཤགས། །དགེ་བས་ཐུབ་བསྟན་དར་བ་དང་། །ཡོན་བདག་བཀྲ་ཤིས་བདེ་ལེགས་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།


previousམགོན་པོ་སྟག་ཞོན་གྱི་སྒྲུབ་སྐོར།next