དཔལ་ཚེ་བདག་ནག་པོའི་ཕྲིན་ལས་ཀྱི་དགོངས་པ་ཐམས་ཅད་རྫོགས་པའི་རྒྱུད་ཆེན་པོ།
རྒྱ་གར་སྐད་དུ། ཤྲཱི་ཨཱ་ཡུཿཔ་ཏི་ཀཱ་ལ་ཀརྨཱ་ཤ་ཡ་སརྦ་པཱུརྞྞ་མ་ཧཱ་ཏནྟྲ། བོད་སྐད་དུ། དཔལ་ཚེ་བདག་ནག་པོའི་ཕྲིན་ལས་ཀྱི་དགོངས་པ་ཐམས་ཅད་རྫོགས་པའི་རྒྱུད་ཆེན་པོ། བཅོམ་ལྡན་འདས་དཔལ་ཚེ་བདག་ནག་པོ་ཕྲིན་ལས་ཐམས་ཅད་རྫོགས་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཆོས་ཐམས་ཅད་ལྷུན་གྱིས་རྫོགས་པའི་རང་བཞིན་རྡོ་རྗེ་ཡོངས་སུ་བཀོད་པའི་སྙིང་པོ་འོག་མིན་གྱི་གནས་མཁའ་དབྱིངས་རྣམ་པར་དག་པའི་ཀློང་། རང་བཞིན་ལྷུན་གྱིས་གྲུབ་པའི་གཞལ་ཡས་ཁང་ན། འཁོར་རྡོ་རྗེ་སྙིང་པོ་ཉིད་ཀྱི་རང་བཞིན་དང་དུས་གསུམ་གཅིག་པའི་སངས་རྒྱས་རྣམས་དང་། མ་སྐྱེས་པའི་ལམ་ལ་འདུན་པའི་རིག་པ་ཅན་རྣམས་དང་། ས་ལ་གནས་པའི་བྱང་ཆུབ་སེམས་དཔའ་རྣམས་དང་། ཁྲོ་བོའི་ཚོགས་དྲེགས་པ་ཅན་རྣམས་དང་། འཐོམས་པ་བདུད་ཀྱི་ཚོགས་དང་། ཁྲག་སྐྱུག་མ་མོའི་ཚོགས་དང་། ཕུང་བྱེད་མངག་པའི་ཚོགས་དང་། གདུག་པ་གསུམ་པོའི་ཚོགས་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ལ་འཁོར་རྣམས་ཀྱིས་ཡོངས་སུ་འདུན་པར་གྱུར་ཏོ། །བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་དེས་འཁོར་རྣམས་ཡོངས་སུ་འདུན་པར་གཟིགས་ནས། ཆོས་ཐམས་ཅད་ཀུན་ཏུ་མི་གཡོ་བ་ཞེས་བྱ་བའི་སྣང་བས་ཁྱབ་པར་མཛད་དོ། །དེ་ནས་འཁོར་ཐམས་ཅད་སེམས་འགྲོགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སེམས་འགྲོགས་པར་གཟིགས་ནས་འཁོར་རྣམས་ལ་ཉིད་ཀྱི་རང་བཞིན་འདི་བསྟན་ཏོ། །ཆོས་རྣམས་མ་སྐྱེས་ཡེ་ནས་གཉིས་སུ་མེད། །རྒྱུ་དང་རྐྱེན་མེད་རང་བྱུང་གནས། །དེ་ལས་ཀུན་འབྱུང་རང་བྱུང་ཐབས་བསམ་ཡས། །འགྲོ་བ་མ་ལུས་ང་ཡི་རང་བཞིན་ལས། །མ་གཡོ་མི་གཡོ་གཡོ་མེད་ཅིར་ཡང་གསལ། །སྙིང་པོ་ཉིད་ལས་གཡོ་བ་ཅི་ཡང་མེད། །ཅེས་གསུངས་སོ། །དེ་ནས་འཁོར་རྣམས་ཀྱིས་རང་གི་དེ་ཉིད་སོ་སོ་མ་ཡིན་པར་རྟོགས་པར་གྱུར་ཏོ། །དེ་ནས་རྡོ་རྗེ་སྙིང་པོ་དེས། བཅོམ་ལྡན་འདས་རྡོ་རྗེ་འཆང་ཆེན་པོ་ལ་འདི་སྐད་ཅེས་
གསོལ་ཏོ། །ཀུན་གྱི་རང་བཞིན་ཉིད་ལགས་པར། །གསང་སྔགས་ངོ་བོ་དེ་ཁོ་ན། །དུས་གསུམ་སངས་རྒྱས་ཉིད་ལས་མེད། །ཉིད་པས་ཆེ་བ་རྒྱས་པར་མཛོད། །ཅེས་གསོལ་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་དེས། མི་རྟོག་པ་རང་བྱུང་གི་དགོངས་པ་ཆེན་པོ་ལས་འོད་ཟེར་བྱེ་བ་ཕྲག་ས་ཡ་ཕྱོགས་བཅུར་བཀྱེའོ། །འོད་ཟེར་དེས་ཞིང་ཁམས་ཐམས་ཅད་དུ་སྣང་བས་ཁྱབ་པར་མཛད་ནས། སངས་རྒྱས་ཐམས་ཅད་ཀྱི་དགོངས་པ་བརྒྱུད་དེ་སླར་བསྡུས་སོ། །སངས་རྒྱས་ཐམས་ཅད་ཀྱི་རང་བཞིན། ཆོས་ཐམས་ཅད་ཀྱི་རྩ་བ། རྡོ་རྗེ་འཆང་ཆེན་པོ་ཉིད་དུ་མཛད་ནས་སྦྱོར་བའི་དོན་འདི་ཉིད་གསུངས་པར་གྱུར་ཏོ། །ལྷུན་གྱིས་གྲུབ་པའི་གནས་ལ་གནས་པ་དེ། །ལུས་དབང་སེམས་ཡུལ་འཛིན་ཆགས་གྲོལ། །ཀུན་གཞི་ཉིད་ལས་བྱེ་བྲག་གསུམ། །རྩ་བ་གཅིག་ལས་ལྔ་གཉིས་བརྒྱད། །བཅོ་བརྒྱད་བཞི་དང་ལྡན་པའི་ལྷ། །ཚེ་སྲོག་ཀུན་དབང་གཙོ་དང་འཁོར། །གཉིས་སུ་མེད་པའི་རང་བཞིན་དུ། །སྟོན་པས་འབྲས་བུ་ལྷུན་གྲུབ་བཤད། །འདབ་བརྒྱད་དྭངས་མ་བཞི་དབུས་ན། །སྟོན་པ་རང་བཞིན་དེ་འཁོར་རྫོགས། །ལྷག་པའི་སྐུ་ལྔ་ཡེ་ཤེས་ལྔ། །རྩ་ལམ་འཁོར་ལོ་རིམ་བརྒྱུད་གནས། །ལྷུན་གྲུབ་མཆོད་པ་རང་གནས་ཐིམ། །རིག་པའི་ཡེ་ཤེས་རང་ལས་འཆར། །སྟོན་པས་འབྲས་བུ་གཉིས་འགྲུབ་བཤད། །ཡུམ་གྱི་བྷ་ག་གསང་བའི་གནས། །རྣམ་བཞིའི་ཕོ་བྲང་ལྷུན་གྱིས་གྲུབ། །སྒོ་ཁྱམས་བྷ་ག་སྣ་རྩེ་ལ། །ཡོན་ཏན་ལྷུན་གྲུབ་རིན་པོ་ཆེ། །རྡོ་རྗེ་གསང་བའི་ལམ་སྦྱངས་ནས། །སྟོན་པའི་གཙོ་འཁོར་བསྟན་པའི་དུས། །མཉམ་རྫོགས་གཅིག་ཏུ་ལྷན་ཅིག་སྐྱེས། །བདེ་བའི་ཡེ་ཤེས་རྒྱུན་ལམ་བཅད། །སྟོན་པས་གསང་བའི་སྒོ་ནས་བཅད། །དེ་ནས་བཅོམ་ལྡན་འདས་ལ་རྡོ་རྗེ་སྙིང་པོས་གསོལ་པ། ཀྱེ་ཧོ། རྡོ་རྗེ་འཆང་བ་ཁྲོ་བོའི་རྒྱལ། །རྣམ་དག་ཆོས་སྐུའི་རང་བཞིན་ལས། །འགྲོ་བ་འདུལ་ཕྱིར་སྤྲུལ་སྐུར་བསྟན། །འཁོར་གྱི་དྲེགས་པ་ཕོ་མོར་བསྟན། །དཀྱིལ་འཁོར་ཡོངས་སུ་རྫོགས་པར་མཛོད། །ཅེས་ཞུས་སོ། །དེ་ནས་བཅོམ་ལྡན་འདས་
ཀྱིས་ཁྲོ་བོ་འབྱུང་བའི་དགོངས་པ་ལ་བཞུགས་པས། འཇིག་རྟེན་གསུམ་པོ་རབ་ཏུ་གཡོས་ཏེ། ལྡེག་རབ་ཏུ་ལྡེག་ཅིང་ཀུན་ཏུ་ལྡེག །འུར་འུར་རབ་ཏུ་འུར་འུར་ཀུན་ཏུ་འུར་རོ། །ཆེམ་ཆེམ་རབ་ཏུ་ཆེམ་ཀུན་ཏུ་རབ་ཏུ་ཆེམ་མོ། །མཐའ་མཐོ་ན་དབུས་དམའ། དབུས་མཐོ་ན་མཐའ་དམའ་བར་གྱུར་ཏོ། །འཇིག་རྟེན་གསུམ་པོ་འཇིག་ལ་ཁད་ནས། འཁོར་ཐམས་ཅད་བརྒྱལ་ཏེ་ལུས་ས་ལ་བརྡབས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལས་ཐམས་ཅད་ཡོངས་སུ་རྫོགས་པར་གྱུར་པའི་ཕྱིར་ང་རོ་ཆེན་པོས་བསྡིགས་སོ། །ཧེ་ཧེ་ཨེ་ཧུར་ཐུམས་ཛ་ཞེས་བསྒྲགས་པས། འཇིག་རྟེན་གསུམ་དང་བཅས་པའི་སྲོག་འཕྲོག་པར་གྱུར་ཏོ། །དེར་ཕྱོགས་བཅུའི་བདེ་བར་གཤེགས་པ་ཐམས་ཅད་ཀྱང་། འཁོར་དེར་སྐད་ཅིག་མ་གཅིག་ལ་ལྷགས་ནས་སྲོག་གི་སྙིང་པོ་ཐམས་ཅད་མདོངས་གསོལ་དུ་ཕུལ་ལོ། །བཅོམ་ལྡན་འདས་ཀྱིས་རྔམ་པའི་སྒྲ་བཏོན་པས་སྲོག་དང་ལས་ཐམས་ཅད་འདུས་པར་གྱུར་ཏོ། །ཨཱ་ཨཱ་ཨཱ་ཨེ་ཀ་ཞེས་རབ་ཏུ་བརྗོད་དོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས། འཁོར་རྣམས་ལ་གཟིགས་ཏེ། ལྷུན་གྱིས་གྲུབ་པའི་དཀྱིལ་འཁོར་འདི་གསུངས་སོ། །རང་བཞིན་མི་གནས་མཉམ་ཉིད་ལས། །ལྷུན་གྲུབ་ཡེ་ཤེས་གཞལ་ཡས་ཁང་། །རིན་ཆེན་དུར་ཁྲོད་བརྟན་པར་གནས། །ཕྱི་ནང་གཉིས་མེད་བརྡལ་ཁྱབ་གསལ། །གྲུ་བཞི་སྒོ་བཞི་རྟ་བབས་མཛེས། །རྩེ་མོ་གནམ་ལྕགས་འབར་བཅས་མཐོ། །ལྷ་བརྒྱད་ཀླུ་བརྒྱད་ཞིང་དར་རོ། །དྲ་བ་དྲ་ཕྱེད་ཞིང་དང་སྦྲུལ། །གླང་ཆེན་འབྲུག་དང་སེང་གེ་སྟག །རུས་སྦལ་ཆུ་སྲིན་གནམ་ལྕགས་ཐོག །ཞིང་དང་ཞིང་ཆུང་ཐོད་བུ་ཁྱུད། །ཁ་ཁྱེར་ལྷ་མོ་མཆོད་སོགས་མཛེས། །ཨེ་ཡི་ཕོ་བྲང་ཐོད་མཁར་བཞི། །ལྕགས་མཁར་བཅུ་དྲུག་འོབས་བཅུ་གཉིས། །ཁྱམས་དང་གྲུ་ཆད་སྒོ་ཁྱུད་ལྡན། །རྒྱལ་ཆེན་པོ་ཡི་ཕོ་བྲང་ན། །ཀླུ་འབུམ་གཉན་ཁྲི་ས་བདག་སྟེང་། །ཕྱོགས་སྐྱོང་མ་ཧེ་ཉི་ཟླའི་གདན། །གཞན་ཡང་ཞིང་སྐྱོང་ཉི་མར་བཅས། །དབུས་ན་ཟིལ་གནོན་ལྷུན་གྲུབ་སྐུ། །མཐིང་ནག་དུག་ཆེན་དུག་ལྔ་འཇོམས། །དབུ་གསུམ་ཕྱག་དྲུག་ཞབས་བཞིར་བགྲད། །གཡས་པ་ཀུ་མུ་ཏ་འདྲ་བས། །རོ་ཉེ་ཟ་དང་རྔམ་པར་གཟིགས། །གཡོན་པ་རཱ་
ག་གཉན་ཁྲི་གསོལ། །དབུས་མཐིང་དགྲ་བགེགས་དོན་སྙིང་རོལ། །འཁོར་ལོ་རལ་གྲི་རྡོ་རྗེ་གཡས། །བེ་ཅོན་གཏུན་ཤིང་སྡིགས་མཛུབ་གཡོན། །གླང་ཆེན་ལ་སོགས་དུར་ཁྲོད་ཆས། །རིགས་བཞི་རྒྱན་དང་རིན་པོ་ཆེ། །དབུ་ལ་ཁྲག་འཐུང་ལྔ་དང་སྦྲུལ། །ཀླུ་བརྒྱད་མགོ་བཅད་དོ་ཤལ་སྙིང་། །གནོད་སྦྱིན་མགོ་བཅད་དེ་བཞིན་དབུ། །བདུད་མོ་མཐིང་ནག་ཐོད་སྦྲུལ་འཁྱུད། །ཡ་མ་དྲེགས་པ་རུས་སྦལ་ལྟོར། །བྱ་ཁྱུང་སྤྱི་བོ་ཕྲག་སོར་ཁྱུང་། །སྟག་དང་སེང་གེ་སག་ནུ་མ། །ཞེ་སྡང་གདུག་པ་སྟ་ཟུར་གཉིས། །ཁྲོ་ཆུང་ཕྱི་ནང་བར་ཁྱམས་གང་། །ཙིཏྟ་ཧཱུཾ་ཞེས་རྩ་བའི་སྔགས། །ཐོད་མཁར་བླ་རྐུན་མོན་པ་བཞི། །འོབས་ན་བདུད་ཕོ་བདུད་མོ་དང་། །མོན་པ་རིགས་བཞི་ཕོ་ཉའི་ཚུལ། །ལྕགས་མཁར་ཤ་ཟ་ཀི་ཀང་ཚོགས། །གྲུ་ཆད་སྡེ་བརྒྱད་དྲེགས་པ་བཅུ། །ཁྱམས་ལ་འཆི་བདག་བདུད་ཀྱི་ཚོགས། །མོན་པ་མོན་མོ་རུས་སྦལ་སྦྲུལ། །མདུན་ན་མགོ་དགུ་ཡབ་ཡུམ་དང་། །སྲིན་མོ་ལྕགས་ཐག་བླ་རྐུན་དགུ། །ལྷུན་གྱིས་གྲུབ་པའི་ཕྱག་རྒྱར་གསལ། །ཡོངས་སུ་རྫོགས་པའི་དཀྱིལ་འཁོར་དུ། །གཉིས་མེད་རིག་པའི་རང་བཞིན་དུ། །སྟོན་པས་བཅའ་གཞི་རྫོགས་པར་བཤད། །དེ་ནས་ཡང་བཅོམ་ལྡན་འདས་ལ་རྡོ་རྗེ་སྙིང་པོས་གསོལ་པ། སྤྲུལ་པ་ལས་ཀྱི་སྦྱོར་བ་ལ། །རྣམ་གྲངས་དུ་དང་ལྡན་པར་བྱེད། །དགོས་པའི་རྟོག་ཆེན་ཅི་ཕྱིར་འདྲེལ། །བརྣག་པའི་མཐའ་རུ་གང་གིས་བསྡུ། །དགོས་པས་ངེས་པར་བསྟན་པ་གང་། །གསང་སྔགས་ངོ་བོ་གང་ལ་གཞག །སྔ་མའི་དོན་འདི་དགོངས་པར་གསུངས། །ཞེས་གསོལ་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས། དྲི་བ་ལྔ་ཡི་ཡོན་ཏན་འདི་གསུངས་སོ། །དང་པོ་མདོ་ཡི་རྩ་བ་གསུམ། །ཕྱི་དང་ནང་དང་གསང་བའོ། །ཕྱི་ལ་རྩ་བ་ཡན་ལག་གཉིས། །རྩ་བ་གཟིར་དང་རང་གཤེད་དབབ། །ཡན་ལག་འཁོར་ལོ་ལོ་ཐོག་གཞོམ། །དྲེགས་དགུ་གཉིས་པའི་ལས་སུ་བཤད། །ནང་ལ་རྩ་བ་ཡན་ལག་གཉིས། །རྩ་བ་བཞི་དང་ཡན་ལག་དྲུག །རྒྱུ་དང་འཁོར་ལོ་ཙིཏྟ་གསང་། །སྤོགས་དང་
དམར་ལེན་རྩ་བར་འདྲེལ། །ལོ་ཐོག་གཞོམ་དང་སྲོག་དབྲོག་གཟེར། །ཕྱག་རྒྱས་བསྲུང་དང་ལྟས་ངན་ནད། །སྤྱི་དྲིལ་ང་གཉིས་ལྡན་པར་བཤད། །གསང་སྐོར་དྲག་སྔགས་མདོ་རྩ་བཞི། །དབང་སྡུད་གབ་དོན་དྲག་པོ་དགུ། །རྩ་བ་ཆེན་པོར་མདོ་འདྲེལ་བའོ། །དབང་སྡུད་བརྒྱད་གཉིས་རྩ་བ་བཞི། །བཅུ་གཉིས་ཐུན་མོང་སྦྱོར་བར་བཤད། །གབ་དོན་རྩ་བ་ཡན་ལག་གཉིས། །རྩ་བ་དྲུག་གི་དྲང་དོན་ནི། །གཉེར་སྲེག་བསྣོལ་མར་ལྟོ་བཤད་བརྒྱད། །རྟེན་དང་དུག་མདའ་ལས་དེ་བཞིན། །ཡན་ལག་སྲུང་བ་ལས་གཉིས་ལྡན། །དེ་བཞིན་བཅུ་དྲུག་རྫོགས་པར་བཤད། །མགོ་དགུའི་སྦྱོར་བ་རྣམ་པ་གཉིས། །རྩ་བ་དང་ནི་ཡན་ལག་གོ། །རྩ་བ་བཞི་གཉིས་བསད་དང་གཟིར། །ཡན་ལག་ཐུན་མོང་ཁྱད་པར་དང་། །རྩལ་འགྲན་དྲག་པོས་འཇོམས་པའོ། །ཐུན་མོང་སྦྱོར་བ་དྲུག་གཉིས་ལྡན། །ཁྱད་པར་རང་བཤད་རྒྱུད་དང་ལྡན། །ཀུན་གྱི་རྗེས་གཅོད་བཞི་རུ་གསུངས། །རྩལ་འགྲན་བཅུ་གསུམ་དེ་བཞིན་ལྔ། །དེ་བཞིན་ལྔ་བཅུ་གཅིག་ཏུ་བཤད། །དྲག་པོ་མངོན་ཕྱུང་སྦྱོར་བ་ལྔ་ཡིས་རྫོགས། །ཐུན་མོང་སྦྱོར་བ་དེ་བཞིན་ལྔ་དང་ལྡན། །ཁྱད་པར་ལས་ཀྱི་རིམ་པ་དེ་བཞིན་བཞི། །གསང་བའི་སྦྱོར་བ་ལྔ་གཉིས་ཡིན། །ཡང་གསང་སྦྱོར་བ་རྣམ་གཉིས་ལྡན། །སྦྱོར་བ་དྲུག་གཉིས་ཐབས་དང་ལྡན། །མཆོག་གི་སྦྱོར་བ་སྲེག་པ་ལྔ་དང་སྲིན་མོའི་སྦྱོར་བ་བཅུ། །སྙིང་པོ་དོན་གྱི་སྦྱོར་བ་གསུམ་དུ་གནས། །ཐུན་མོང་སྦྱོར་བ་དྲུག་པོ་ལྔ། །ཁྱད་པར་གསུམ་དང་གསང་མཆོག་གསུམ། །བཅུ་དང་གཅིག་ལས་སུམ་ཅུར་འགྱུར། །དེ་བཞིན་དྲག་པོའི་ལས་ལ་དྲུག་ཅུ་རྩ་དགུར་བཤད། །དགོས་པའི་དོན་ཆེན་གཉིས་དང་འདྲེལ་པ་བཞི། །མཐའ་རུ་བསྲེག་དང་འཁོར་ལོ་མནན་པས་བསྡུ། །དགོངས་པའི་དོན་གསུམ་དེ་བཞིན་གསུམ། །བགྲོད་པ་གསུམ་གསུམ་གསལ་བ་གསུམ། །དེ་བཞིན་དགོངས་པའི་འབྲས་བུ་གསུམ། །ཞིང་ཁམས་ཁྲོམ་ཚོགས་མཉམ་དགོངས་ནས། །དོན་གཉིས་སྣང་སྟོང་དངོས་མེད་པ། །ལུང་དང་མན་ངག་ཀུན་དགོངས་ཡིན། །ངོ་བོ་ཆོས་
དང་ཆོས་ཅན་དང་། །ཆོས་ཉིད་དབྱེར་མེད་ལྷུན་གྱིས་གྲུབ། །སྣང་བ་སྒྱུ་མ་ལྷུན་གྲུབ་ལ། །སྒྱུ་མའི་བདེ་བ་མངོན་དུ་འཆར། །ཆོས་ཉིད་ཡེ་ཤེས་ལྷུན་གྲུབ་ལ། །སྣ་ཚོགས་སྣང་ལ་ངོས་གཟུང་མེད། །གང་མཐོང་དེ་ཉིད་ཁོ་ན་བས། །གསང་སྔགས་ངོ་བོ་དེ་ཁོ་ནའོ། །དཔལ་ཚེ་བདག་གི་དགོངས་རྒྱུད་ནག་པོ་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ཀྱིས་འཁོར་དེ་དག་ལ་ཆོས་ཐམས་ཅད་འབྱུང་བའི་གཞི་འདི་གསུངས་སོ། །སྣང་སྲིད་འཁོར་འདས་བརྐམ་ཆགས་ཆོས། །རྒྱུ་མེད་ཚུལ་གྱི་རྐྱེན་དང་བྲལ། །འབྱུང་བ་ལྔ་དང་རིགས་ལྔ་ཡེ་ཤེས་ལ། །རང་བྱུང་འགག་མེད་སྟོང་བདག་མེད། །རྒྱུ་རྐྱེན་མི་རྟོག་ངང་ལས་བྱུང་། །འདོད་པའི་རྒྱུན་དག་རྐྱེན་དག་སྟོང་། །དོན་དམ་ཆོས་སྐུ་སྐྱེ་མེད་ལས། །སྤྲོས་མེད་དོན་དམ་སྙིང་པོ་ཉིད། །རྒྱུ་འབྲས་རོ་གཅིག་མཉམ་ཉིད་དང་། །ཀུན་གསལ་འབྲས་བུ་དོན་གཅིག་ཕྱིར། །ཕྱི་ནང་ཆོས་ཀུན་རྒྱུ་རྐྱེན་བྲལ། །བརྐམ་ཆགས་སྡུག་བསྔལ་སྟོང་བདག་མེད། །སྡུག་བསྔལ་ཉིད་ན་ཡེ་ཤེས་དེ། །འགྲོ་བ་རབ་གྲོལ་ཡེ་སངས་རྒྱས། །བདེན་གཉིས་མི་རྟོག་སྟོང་བདག་མེད། །རྩོལ་བསྒྲུབ་བྱ་བྱེད་འཆིང་བའི་ནད། །རྩ་བ་ཀུན་འདུས་དོན་གཅིག་ལ། །བསྒོམ་བསྒྲུབ་བྱ་རྩོལ་རྩལ་མེད་རྒྱན། །ཆོས་ཀུན་སྐྱེ་མེད་སྙིང་པོ་རྩལ་མེད་པས། །ནམ་མཁའི་དཔེ་བཞིན་སྟོང་བདག་མེད། །སྐྱེ་མེད་ནམ་མཁའ་རྩོལ་སེམས་བྲལ། །དོན་དམ་ཆོས་ཉིད་མ་སྐྱེས་པས། །དཔེ་མེད་ནམ་མཁའ་ལྟ་བུར་བཤད། །རྩ་བ་གཅིག་པས་ཐམས་ཅད་མཁྱེན། །ངོ་བོ་མེད་ཕྱིར་ཅིར་སྣང་སྲིད། །མ་སྐྱེས་པས་ན་ཐམས་ཅད་འབྱུང་། །སངས་རྒྱས་སྐུ་གསུང་ཡེ་ཤེས་ཐུགས། །སེམས་ཅན་ལུས་ངག་བག་ཆགས་ལ། །སྣང་སྲིད་ཆོས་རྣམས་ཀུན་གྱི་གཞི། །སྙིང་པོ་བྱང་ཆུབ་སེམས་ལས་བྱུང་། །སངས་རྒྱས་ཞིང་དང་ཕོ་བྲང་གནས། །ཀུན་ཡིན་གང་མིན་རང་རིག་ཉིད། །ཡེ་ཤེས་ཐིག་ལེ་གཅིག་ལ་གསལ། །སྲིད་པ་གསུམ་དུ་སྣང་བ་ཡང་། །ལམ་ལྔ་རྒྱུད་ལྔ་གནས་ལྔ་འཁོར། །ལ་སོགས་སྡུག་བསྔལ་མཉམ་ལ་སོགས། །སྡུག་བསྔལ་རྩལ་མེད་མཉམ་པར་གནས། །
ཐབས་ཀྱི་ཕྱག་རྒྱས་རང་གྲོལ་བའོ། །ཆོས་སྐུ་སྐྱེ་འགག་མེད་པ་ལས། །དྲག་སྔགས་ཡེ་ཤེས་རོལ་པར་ཤེས། །དཔལ་ཚེ་བདག་གི་དགོངས་རྒྱུད་ནག་པོ་ལས། ཆོས་ཉིད་ཀྱི་དོན་གཏན་ལ་དབབ་པའི་ལེའུ་སྟེ་གཉིས་པའོ།། །།དེ་ནས་འཁོར་གྱི་དམ་པ་རྡོ་རྗེ་སྙིང་པོས་བཅོམ་ལྡན་འདས་རྡོ་རྗེ་འཆང་ཆེན་པོ་ལ་གསོལ་པ། རྒྱུད་ཅེས་བྱ་བ་ཅི་ལྟར་ལགས། །འཁོར་ལོ་ཞེས་བྱ་ཇི་ལྟར་དབྱེ། །ཚེ་སྲོག་བདག་པོའི་དོན་གང་ལགས། །སྦྱོར་བའི་རིམ་པས་ལས་གང་བྱེད། །གསང་སྔགས་ངོ་བོར་གང་གིས་བཏགས། །ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་དྲི་བ་ལྔའི་དོན་རྒྱས་པར་བཤད་དོ། །རྒྱུད་ཅེས་བྱ་བ་གསུམ་ཡིན་ཏེ། །གཞི་དང་ལམ་དང་འབྲས་བུའི་རྒྱུད། །ལྟ་སྤྱོད་འཁོར་ལོ་དབང་དམ་ཚིག །ལམ་གྱི་རིམ་པ་སྦྱོར་བའི་ཚད། །ངོ་བོ་འདྲེལ་བཅས་རྒྱུ་དང་རྐྱེན། །ཕྱི་དང་ནང་དང་གསང་བ་སྟེ། །རང་བཞིན་གནས་པ་མངོན་བྱེད་པའི། །ཐབས་ཀྱི་རྒྱུད་ནི་གསུམ་དང་ལྡན། །དེ་མཚོན་མངོན་པས་རྒྱུད་ཅེས་བྱ། །འཁོར་ལོ་ཞེས་སུ་བསྟན་པ་ཡང་། །རྟེན་འདྲེལ་བསམ་གཏན་གཟུགས་བརྙན་སྔགས། །སྲེག་བྱེད་མནན་པ་ཡེ་ཤེས་རིག །དེ་ཡི་རིམ་པ་རྒྱས་པ་ན། །སྣང་སྲིད་ཕྱི་ནང་འཁོར་བའི་ཆོས། །རྟེན་འདྲེལ་བཅུ་གཉིས་ཚུལ་གྱིས་ནི། །རྟེན་འདྲེལ་སྲིད་པའི་འཁོར་ལོ་བཤད། །རང་ལུས་བརྟན་པའི་སྐུ་ཉིད་གསལ། །སྤྱི་བོ་མགྲིན་པ་སྙིང་ལྟེ་བ། །གསང་བ་རྗེས་འཇུག་རྟེན་དྲུག་ན། །སེ་རུ་སུམ་ཅུ་གཉིས་བཅུ་དྲུག །བརྒྱད་དབུས་དྭངས་མ་དྲུག་ཅུ་བཞི། །བཞི་བཅུ་དྲུག་དང་ལྡན་པར་གནས། །ཡོན་ཏན་དྲག་སྔགས་དུ་མས་མཛེས། །ཧཱ་དང་ཨོཾ་དང་ཨེ་དང་ཨཱ། །རཾ་ཡཾ་དབུས་ན་རྐྱེན་དང་སྡུད། །སྲོག་ཤིང་སི་ར་དྲི་དང་རྒྱུ། །དེ་བགྲོད་ཕྱག་རྒྱ་ཆོས་སྐུར་གསལ། །བསམ་གཏན་གནས་པའི་འཁོར་ལོར་བཤད། །གཟུགས་བརྙན་འཁོར་ལོ་དུར་ཁྲོད་ཀྱི། །རོ་རས་ཞིང་ལྤགས་རྒྱ་ཤོག་ལ། །སྨེ་བ་ལྔ་དང་རུས་པ་བསྐུ། །གང་དམིགས་རྟེན་གྱི་འཁོར་ལོ་བཅའ། །ཁ་སྦྱར་རུས་སྦལ་ཕག་མོའི་ལྟོར། །བཅས་
ལ་གཟུགས་བརྙན་འཁོར་ལོར་བཤད། །གཅོད་པ་སྔགས་ཀྱི་འཁོར་ལོ་ནི། །མཚོན་ཆའི་འཁོར་ལོ་མེ་དང་འདྲ། །སྲོག་གཟུགས་རྩ་གཅོད་བག་ཆགས་བསྲེག །གཡོན་སྐོར་འོག་ནས་གཅོད་པ་ནི། །ཆུ་ཡི་འཁོར་ལོ་རླུང་དང་འདྲ། །སྐྱེལ་ཞིང་རིང་དལ་བླ་གནས་སྡུད། །དབུགས་ཀྱི་རྟ་བསྐྱོན་རླུང་གི་རྐྱེན། །རྐྱེན་དང་ཕྲད་ན་ལྟེ་བ་འཁོར། །ལྟེ་བའི་རྐྱེན་གྱིས་རྩིབས་དག་གཅོད། །གཅོད་པ་སྔགས་ཀྱི་འཁོར་ལོར་བཤད། །སྲིད་པ་མེ་ཡི་འཁོར་ལོ་དག །ས་ཆུ་དུག་གི་རྟེན་འདྲེལ་གྱིས། །སྦྱོར་བ་ཀུན་སྲོག་ཚེ་དཔལ་བསྐྱེད། །ཞི་རྒྱས་དབང་དྲག་ལྷུན་གྱིས་གྲུབ། །མཆོག་ཏུ་མེ་ཡི་འཁོར་ལོར་བཤད། །མནན་པ་འཁོར་ལོ་ལས་ཀྱི་མཐར། །ཁ་སྦྱོར་ཕོ་མོའི་ཐོད་པ་ལ། །རིམ་པ་གསུམ་བྲི་སྟེང་དང་འོག །རྒྱ་གྲམ་གྲུ་གསུམ་སྦྲུལ་དང་མེ། །རི་རབ་རུས་སྦལ་མཆོད་རྟེན་གྱི། །མནན་སྔགས་མིང་རུས་སྙིང་པོ་ཁམས། །ཐོད་པར་སྙིང་པོའི་བཅུད་བསྡུད་ལ། །གནད་དགུ་མི་ནད་འཇོམས་དགུ་ཡིན། །མནན་པ་ཐོད་པའི་འཁོར་ལོར་བཤད། །ཡེ་ཤེས་རིག་པའི་འཁོར་ལོ་ཡིན། །ཐམས་ཅད་ལྷུན་གྱིས་གྲུབ་པ་ཡི། །རོལ་པ་མ་འགགས་ཅིར་ཡང་གསལ། །དོན་གཉིས་མངོན་དུ་སྤྱོད་པར་བྱེད། །རང་བྱུང་འཁོར་ལོ་རང་རིག་པས། །ཡེ་ཤེས་ཉི་མའི་འཁོར་ལོར་བཤད། །དེ་ཕྱིར་འཁོར་ལོ་ཞེས་སུ་བཤད། །ཚེ་སྲོག་བདག་པོ་གང་གསུངས་པ། །སྣང་སྲིད་འཁོར་འདས་སྣང་སྟོང་གི། །ཡོན་ཏན་སྲོག་དང་སྦྱོར་བའི་ལས། །ཡོན་ཏན་དབང་པོ་ཚེ་བཀྲག་ཀུན། །འབྲུ་གཉིས་དག་ལ་བསྡུས་ནས་འཆར། །སྐྱེ་མེད་རྣམ་དག་དབྱིངས་སུ་ཐིམ། །ལས་དང་སྦྱོར་བ་སྨིན་ཞིང་རྒྱས། །དེ་ཕྱིར་ཚེ་སྲོག་བདག་པོར་བཤད། །སྦྱོར་བའི་རིམ་པས་བརྒྱ་བརྒྱད་བཅུ། །ཆེ་བའི་ཡོན་ཏན་དུ་མ་བྱེད། །གང་བརྩམས་འབྲས་བུ་སྨིན་ཞིང་རྒྱས། །དེ་ཕྱིར་སྦྱོར་བའི་ལས་སུ་བཤད། །གསང་སྔགས་ངོ་བོ་གཉིས་མེད་ལས། །འཁོར་བ་སྒྱུ་མ་ལྷུན་གྱིས་གྲུབ། །གཞི་རྩ་མེད་ཅིང་ཐོག་མཐའ་མེད། །འདས་པའི་ཡེ་ཤེས་ལྷུན་གྱིས་གྲུབ། །གང་མཐོང་ཅིར་སྣང་བྱང་ཆུབ་སེམས། །སེམས་ཕྱིར་མ་གསལ་རང་རིག་པ། །བདེ་བ་ཆེན་པོར་དོན་ལ་ཐེབས། །
དེ་ཕྱིར་གསང་སྔགས་ངོ་བོར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ཡོན་ཏན་དྲིས་པའི་ལེའུ་སྟེ་གསུམ་པའོ།། །།དེ་ནས་ཡང་བཅོམ་ལྡན་འདས་ཀྱིས་རྒྱུད་ཀྱི་དོན་གཏན་ལ་དབབ་པ་འདི་གསུངས་སོ། །དེ་ཡང་རྣམ་པ་བདུན་དུ་དབབ། །གསུམ་པ་སྤྱོད་པའི་ཁྱད་པར་ནི། །བྱ་བ་མེད་པར་ཀུན་རྫོགས་པས། །རྩོལ་བྲལ་གདེང་གསུམ་ལྡན་པ་ཡི། །བླང་དོར་རེ་དོགས་མེད་པར་སྤྱོད། །སྦྱོར་སྒྲོལ་བྱ་བ་གང་བྱས་ཀྱང་། །སེམས་ཕྱིར་གང་ཡང་བྱས་སྣང་མེད། །ལས་ཀྱི་སྦྱོར་བ་དུ་མ་ཡང་། །གང་ལྟར་བྱས་ཀྱང་འབྲས་བུ་འབྱུང་། །ལམ་གཉིས་ལྔ་ཡི་ས་བགྲོད་ཀྱང་། །སེམས་དཔའི་ལས་སུ་གོལ་བ་མེད། །ཆགས་སྡང་ལྔ་ཡིས་ལམ་སྤྱད་ཀྱང་། །འཇིག་རྟེན་པ་ལ་གཞི་རྩ་མེད། །རང་བཞིན་ལྷུན་གྲུབ་སྤྱོད་པའི་མཆོག །དམྱལ་སོགས་ཚ་གྲང་ཀུན་སྤྱད་ཀྱང་། །འཁོར་བ་ཉིད་ན་ཡེ་ཤེས་སྤྱོད། །ལྷ་ཡི་སྐུ་དང་ཆ་ལུགས་དག །འདོད་དགུ་ལྷུག་པར་ཅི་སྤྱད་ཀྱང་། །སྣང་སྟོང་གཉིས་མེད་ཡེ་ཤེས་སྐུ། །གང་ལྟར་བལྟས་པ་དེ་ལྟར་སྣང་། །རྟོག་སྒྲིབ་སྐྱོན་ཡོན་ཡོངས་ཀྱིས་མེད། །གཏུབ་བརྡུང་དྲག་པོའི་སྤྱོད་པ་ཡང་། །གར་དགུ་ཚུལ་དགུ་ཁྲོ་བོའི་སྤྱོད། །ཆོས་ཉིད་ཞེ་སྡང་ཁྲོས་པས་གྲོལ། །ཡེ་ཤེས་ངེས་པར་གཏན་ལ་དབབ། །རང་བྱུང་དག་པའི་སྤྱོད་པར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། བྱ་བ་མེད་པའི་སྤྱོད་པའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་ཀྱིས་བརྟུལ་ཞུགས་བགྲོད་པའི་དབང་འདི་གསུངས་སོ། །སློབ་མ་དབང་གཞན་ཐོབ་པ་ལ། །བགྲོད་པ་མཐར་ཕྱིན་རྫོགས་པའི་དབང་། །ངོ་བོ་སེམས་ཀྱི་ཆོས་ཉིད་ལ། །རྣམ་གྲངས་གཉིས་དང་རྫས་ཀྱི་དབང་། །རིམ་པ་བརྟུལ་ཞུགས་རང་དབང་རྫོགས། །དཔེར་ན་རྒྱལ་པོ་འབྲུ་གུ་ལ། །རྒྱལ་སར་མ་བཏོན་ས་མི་ཐོབ། །དབང་ཐོབ་རྒྱལ་སྲིད་མངའ་བརྙེས་ཚུལ། །བདག་དབང་མཚོན་པའི་རིམ་པ་ནི། །སེམས་ཉིད་དབེན་པའི་བདེ་གནས་སུ། །རང་ཉམས་བརྟན་པའི་མཚམས་བཅད་ནས། །མཎྜལ་ཆེན་པོའི་བྱ་བ་བརྩམ། །སྔོན་དུ་འགྲོ་བའི་ལས་རྫོགས་ནས། །དུར་ཁྲོད་བརྡལ་
བའི་རྒྱུ་བླངས་ལ། །ཐུགས་ཀྱི་སྤྲུལ་པ་མཁའ་ཁྱབ་སྤྲོ། །གུགས་རྒྱལ་དྲི་ཡིས་ཁྲུས་བྱས་ལ། །མཎྜལ་དབུས་སུ་བརྟན་པར་བཞག །བསམ་གཏན་བུམ་པས་རྟེན་སྦྱངས་ལ། །ལུས་ལ་གཤིན་རྗེའི་དཀྱིལ་འཁོར་བརྟག །ཙིཏྟ་འོད་ཀྱི་ཕོ་བྲང་དུ། །ཚེ་སྲོག་བདག་པོའི་དཀྱིལ་འཁོར་བརྟན། །བརྟན་པ་རྙེད་ཕྱིར་ཚོགས་གཏོར་ལ། །བྱ་བའི་རིམ་པ་བསྒྲུབ་པ་བརྩལ། །བརྟུལ་ཞུགས་རིམ་པའི་རྟེན་དུ་བཞག །མཚན་ལྡན་བཀྲ་ཤིས་གཟུངས་མ་འདམ། །རྒྱལ་རིགས་རྗེ་རིགས་སྔགས་སྐྱེས་མ། །མཁའ་ཁྱབ་རྡོ་རྗེ་མདས་མ་རེག །ལུས་དང་ཡན་ལག་དབང་པོ་འཇམ། །སྐེ་རིང་ཕྲ་འཇམ་ཚིགས་མིག་ཟླུམ། །དཔྲལ་བའི་དབྱེས་ཆེ་སྨིན་དཀྱུས་རིང་། །མིག་ཕྲ་དཀྱིལ་ནག་ཨུཏྤལ་མདོག །ཤེས་རབ་སྤྱོད་པའི་རྣལ་འབྱོར་ལྡན། །ལུས་ལ་ལྷ་ཡི་དཀྱིལ་འཁོར་བརྟག །ཙིཏྟར་རྫོགས་པའི་དཀྱིལ་འཁོར་བརྟག །བྷ་ག་གསང་བའི་ཕོ་བྲང་དུ། །ལྷུན་གྱིས་གྲུབ་པའི་དཀྱིལ་འཁོར་བརྟག །བདེ་བ་ཆེན་པོའི་རྟེན་དུ་གཟུང་། །རྡོ་རྗེ་གསང་བའི་ཆུ་རྒྱུན་གྱིས། །དཀྱིལ་འཁོར་ལྔ་དང་སློབ་མ་བཀྲུ། །གསང་བ་ལྷུན་གྱིས་གྲུབ་པ་ཡི། །དཀྱིལ་འཁོར་ལྷ་ལ་གསོལ་བ་གདབ། །བྱིན་བརླབ་བརྟུལ་ཞུགས་འཇུག་པ་བརྩམ། །ཡོལ་བས་བར་བཅད་མེ་ཏོག་ལྡན། །སྡིག་པ་བཤགས་དང་སྡོམ་པ་དབོག །དམ་ཚིག་བསྒྲགས་ལ་མེ་ཏོག་དོར། །དཀྱིལ་འཁོར་ལྷ་ཡི་རྣམ་པ་བསྟན། །ལྕེ་ལ་བདུད་རྩི་ལུང་བསྟན་བཞག །བུ་དེ་བརྒྱན་ཞིང་ཕྱག་རྒྱ་བསྒོམ། །ཚོགས་ལ་རོལ་ལ་ལྷ་ངོ་བསྟན། །རྫས་དང་དཀྱིལ་འཁོར་བྱིན་གྱིས་བརླབ། །སློབ་མ་གཞུག་ཕྱིར་གསོལ་བ་གདབ། །ལྷུན་གྲུབ་རང་བཞིན་གནས་པའི་ཕོ་བྲང་ནས། །ཡེ་ཤེས་རྒྱ་མཚོ་ལྷུན་གྱིས་གྲུབ་པའི་ལྷ། །མ་ལུས་མཉམ་པའི་རྒྱལ་པོ་དགོངས་སུ་གསོལ། །སློབ་མ་མཚན་ལྡན་ཡུམ་གྱི་དཀྱིལ་འཁོར་དུ། །བརྟུལ་ཞུགས་དྲག་པོའི་སྟོབས་ཀྱིས་གཞུག་ཏུ་གསོལ། །བདེ་ཆེན་མཉམ་པའི་ཕོ་བྲང་གསང་བ་རུ། །རིག་པ་བརྟུལ་ཞུགས་སྟོབས་ཀྱིས་གཞུག་ཏུ་གསོལ། །སློབ་མས་མེ་ཏོག་ཐོགས་ལ་བརྡའ་ཕྱག་བཙལ་ལ་གསོལ་བ་གདབ་པོ། །སྟོན་པའི་སྒྲོན་མ་བཅོམ་ལྡན་འདས། །ལྷ་དང་སློབ་དཔོན་དགོངས་སུ་གསོལ། །དྲེགས་པ་སྟོབས་ཀྱི་ཚུལ་བསྟན་པ། །འགྱུར་
མེད་བདེ་ཆེན་ཕོ་བྲང་ནས། །དྲེགས་པའི་ལྷ་ཚོགས་དགོངས་སུ་གསོལ། །བྷ་ག་གསང་བའི་ཕོ་བྲང་ནས། །མཉམ་པའི་རྒྱལ་པོ་དགོངས་སུ་གསོལ། །དམ་ཚིག་དཀའ་ཐུབ་སྡོམ་པའི་མཆོག །རིག་པའི་རྒྱལ་པོ་བདག་ལ་སྩོལ། །གསང་བའི་ཡེ་ཤེས་བདག་ལ་སྩོལ། །ཡེ་ཤེས་རོལ་པ་བདག་ལ་སྩོལ། །མེ་ཏོག་རིན་ཆེན་དམིགས་དབྱིག་ཀྱང་བསྡུས་ལ། །བདེ་ཆེན་ཕྱི་ཡི་འཇུག་པ་བརྩམ། །ཕུང་པོ་ལྷ་ཡི་དཀྱིལ་འཁོར་བསྟན། །བམ་ཆེན་ཐུགས་ཀྱི་དཀྱིལ་འཁོར་བསྟན་དུ་ཡང་། །འཇུག་པ་ནང་གི་ལྷ་ངོ་བསྟན། །གཟུངས་མ་ལུས་ཀྱི་དཀྱིལ་འཁོར་དུ། །གསང་བ་ཕྱི་ཡི་ལྷ་ངོ་བསྟན། །ཙིཏྟ་ནང་གི་ལྷ་ངོ་བསྟན། །བྷ་ག་གསང་བའི་ཕོ་བྲང་དུ། །གདོང་གཡོགས་དང་ལྡན་སྤྲོ་བ་བསྐྱེད། །བཀྲ་ཤིས་མཚན་ལྡན་གསང་བའི་ཕོ་བྲང་དུ། །གཉིས་མེད་སངས་རྒྱས་ཉིད་དང་མཉམ་སྦྱོར་བའི། །བྱང་ཆུབ་སེམས་ཉིད་མི་འགྱུར་བདེ་བའི་མཆོག །ཕོ་བྲང་ལྷུན་གྱིས་གྲུབ་པར་བཞུགས་པ་དང་། །སྨེ་བ་ལྔ་དང་བདུད་རྩིར་སྦྱོར་བའི་སེམས། །བཀྲ་ཤིས་མཚན་ལྡན་བདེ་བའི་བརྟུལ་ཞུགས་སྦྱིན། །མི་འགྱུར་བརྟན་པའི་སྐུ་དང་ཡེ་ཤེས་བགྲོད། །དེ་ནས་གསང་བའི་གཟུངས་མ་སྤྲོ་བ་བསྐྱེད་པར་བྱའོ། །ཧོ། བདེ་ཆེན་གསང་བའི་ཕོ་བྲང་དུ། །ཐབས་ཆེན་གསང་བའི་བདེ་ཕབ་ནས། །དབུ་མའི་རྩ་བརྒྱུད་ས་བོན་བསྲེག །བྷ་གའི་གནས་སུ་ཆོས་སྐུར་བསྐྱིལ། །རྩ་ལམ་འོད་འཕྲོས་ལོངས་སྤྱོད་སྐུ། །མཉམ་པར་གནས་པ་བྱང་ཆུབ་སྐུ། །སྤྲོས་བྲལ་ཀུན་ཁྱབ་སྤྲུལ་པའི་སྐུ། །བརྟན་པ་ཐོབ་པ་རྡོ་རྗེའི་སྐུ། །ཡབ་ཡུམ་མཉེས་པས་མཉེས་པར་བྱའོ། །དེ་ནས་གསང་བ་སྦྱོར་བའི་བརྡས། །ཡེ་ཤེས་ཉི་ཟླའི་ཐིག་ལེ་ཡི། །བདེ་བས་གང་བར་བྱས་པ་ལ། །སྦྱོར་བ་དག་པའི་བྱིན་རླབས་ལས། །རྩ་རྒྱུད་བདེ་ཕབ་ཐིག་ལེ་བསྐྱིལ། །བྱང་ཆུབ་སེམས་དང་སྨེ་བ་བསྲེ། །བཀྲ་ཤིས་མཚན་ལྡན་བུམ་པར་བསྐྱིལ། །བརྟུལ་ཞུགས་རབ་འབྱམས་དབང་བསྐུར་བྱ། །ཧོ། རིག་པའི་སྟོབས་ལྡན་སྦྱོར་བའི་གནས། །འཁྲུལ་པའི་བག་ཆགས་སྤྲིན་ལྟ་བུ། །ཡེ་ཤེས་རོལ་པའི་སྒྲོན་མ་གསལ། །མཉམ་པའི་ཤུགས་ཀྱི་བརྟུལ་ཞུགས་ལོངས། །ཨེ་ཀ་ཡ་མ་པྲ་ཏཱིཙྪ་ཧོ། མེ་ཏོག་དོར་
ལ་མ་གོལ་གདགས། །མཚན་ལྡན་བཀྲ་ཤིས་ཕོ་བྲང་དང་། །དྲག་པོ་སྟོབས་ཀྱིས་ལྷ་ངོ་བསྟན། །བཀྲ་ཤིས་བུམ་པས་དབང་བསྐུར་བྱ། །ཧོ། ཡེ་ཤེས་ལྷུན་གྲུབ་བུམ་པ་ཡིས། །བརྟུལ་ཞུགས་དག་པའི་དབང་བསྐུར་བས། །འགྲོ་བ་རྣམ་དག་ཆོས་སྐུར་གསལ། །རང་བྱུང་ཡེ་ཤེས་དབང་ཐོབ་ཤོག །ཨེ་ཀ་ཡ་མ་གུ་ཧྱ་བྷ་ག་བོ་དྷི་ཙིཏྟ་ཧོ། འབྲས་བུ་ཁྲག་འཐུང་ཡེ་ཤེས་ལྔར། །རྫོགས་པའི་ཕྱག་རྒྱར་ལྷུན་གྲུབ་པའོ། །དེ་ནས་དུར་ཁྲོད་རྒྱན་གྱི་དབང་སྦྱིན་པ་ནི། གླང་ཆེན་སྟག་ཤམ་ཞིང་ལྤགས་སྦྲུལ། །ཐོད་པ་སྙིང་ཕྲེང་ཀེང་རུས་བརྒྱན། །མེ་རི་དུར་ཁྲོད་དབང་བསྐུར་བས། །དྲེགས་པའི་སྟོབས་དང་ལྡན་པར་ཤོག །ཨེ་ཀ་ཡ་མ་ཧ་སྡི། མ་ཧཱ་ནཱ་ག་ཀ་པཱ་ལཾ། ཙིཏྟ་ཛྭ་ལ་ནི་རི་ཧོ། དེ་ནས་ཕྱག་མཚན་སྦྱིན་པ་ནི། །ཧོ། འཁོར་བ་འདྲལ་བྱེད་འཁོར་ལོ་དང་། །ཉོན་མོངས་གཅོད་པའི་རལ་གྲི་དང་། །ཆོས་ཉིད་མཚོན་པའི་རྡོ་རྗེ་ཡིས། །སྐུ་གསུམ་མཉམ་པའི་དབང་ཐོབ་ཤོག །ཨེ་ཀ་ཡ་མ་ཙཀྲ་ཁཌྒ་བཛྲ་ཧོ། བེ་ཅོན་དུག་ལྔ་ཡེ་ཤེས་ལྔ་རུ་སྒྲོལ། །གཏུན་ཤིང་གདུག་པ་གནས་སུ་འཇོམས། །སྡིགས་མཛུབ་དུག་གསུམ་སྐུ་གསུམ་ངང་དུ་རྫོགས། །རིག་པ་སྟོབས་ཀྱི་སྒོ་གསུམ་དབང་ཐོབ་ཤོག །ཨེ་ཀ་ཡ་མ་བྷི་ཧ་ཧུ་ཏི་སར་པ་ཧོ། མཉམ་པའི་བརྟུལ་ཞུགས་སྦྱིན་པ་ནི། །ཧོ། རྡོ་རྗེ་པདྨ་མཉམ་སྦྱར་ནས། །པདྨ་རཀྟ་བྱང་ཆུབ་སེམས། །བམ་ཆེན་སྨེ་བ་དོན་དང་སྦྱར། །བརྟུལ་ཞུགས་རོལ་པའི་དབང་བསྐུར་བས། །མི་ཟད་རྒྱན་གྱི་དབང་ཐོབ་ཤོག །ཨེ་ཀ་ཡ་མ་གུ་ཧྱ་རཀྟ། བོ་དྷི་ཙིཏྟ་ཧོ། མཱཾ་ས་རཀྟ་ཙིཏྟ་ཧོ། པཱུ་ཛ་ཀེཾ་ནི་རཾ་ཏི་ཧོ། དཔའ་བརྟུལ་སྔགས་ཀྱིས་བྱིན་བསྐྱེད་པའི། །བམ་ཆེན་རོ་ལ་མཉམ་པར་རོལ། །རྡོ་རྗེ་བརྗིད་པའི་དབང་ཐོབ་ནས། །བདེ་ཆེན་མཉམ་ཉིད་ཐོབ་པར་ཤོག །ཨེ་ཀ་ཡ་མ་ཨ་དྷི་པ་ཏ་སིདྡྷི་ཧོ། ལོངས་སྤྱོད་རྫོགས་པའི་དབང་བསྐུར་བྱ། །འཆི་མེད་རང་བྱུང་ར་སཱ་ཡན། །བཀྲ་ཤིས་མཚན་ལྡན་ལྷག་པའི་རྫས། །འཕེལ་འགྲིབ་མེད་པའི་དབང་བསྐུར་བས། །རིགས་ལྔ་ཡེ་ཤེས་ལྔ་ཡི་དབང་ཐོབ་ཤོག །ཨེ་ཀ་ཡ་མ་སརྦ་པཉྩ་ཨ་མྲྀ་ཏ། ཛྙཱ་ན་ཤུཌྜྷ་ཧོ། བཀྲ་ཤིས་དངོས་གྲུབ་གའུ་རུ། །མི་འགྱུར་བརྟན་པའི་ཚེ་བསྐྱིལ་
ནས། །རང་རྟགས་ཚེ་ཡི་དབང་བསྐུར་བས། །འཆི་མེད་རྟག་པའི་དབང་ཐོབ་ཤོག །ཨེ་ཀ་ཡ་མ་ཨཱ་ཡུརྫྙཱ་ན་སིདྡྷི་ཧོ། སྣོད་ཀྱི་འཇིག་རྟེན་གཏོར་གཞོང་དུ། །བཅུད་ཀྱི་སེམས་ཅན་གཏོར་མར་གསལ། །འབྱུང་བ་རྣམ་ལྔ་གཏོར་མའི་རྒྱུ། །ལྷུན་གྲུབ་ཀུན་འབྱུང་གཏོར་མའི་རྒྱན། །འཛིན་ཆགས་མེད་པའི་སྟོབས་ཀྱིས་རོལ། །ཨེ་ཀ་ཡ་མ་མ་ཧཱ་བ་ལིནྟ་པཱུ་ཛ་ཧོ། དམ་ཚིག་བསྒྲགས་ལ་མནའ་ཆུ་བླུད་པར་བྱའོ། །སྣོད་མེད་བརྟུལ་ཞུགས་ཞན་པ་ལ། །སྤེལ་ཞིང་བསྒྲགས་ན་རྡོ་རྗེ་ཁྲོ་བོ་དང་། །གཏུམ་པོ་གནོད་སྦྱིན་རྡོ་རྗེ་དབང་ཆེན་གྱིས། །ལུས་བྲལ་མགོ་གཤག་ཙིཏྟ་ཁྲག་ཏུ་འཐུང་། །ཨེ་ཀ་ཡ་མ་ཀཱ་ཡ་ཝཱཀ་ཙིཏྟ་རཀྟ་ཁཱ་ཧི་ཧོ། ཁྱོད་ཀྱི་རྡོ་རྗེ་འཆང་ཆེན་ང་ཡིན་པས། །བཀའ་ཡི་ཟུར་ཡང་བཅག་པར་བྱ་བ་མིན། །བསྒོ་བ་བྱོས་ལ་དམ་ཚིག་སྲོག་ལྟར་སྲུངས། །གལ་ཏེ་འདས་ན་རྡོ་རྗེ་དམྱལ་བར་ལྟུང་། །ཨེ་ཀ་ཡ་མ་དུན་ར་ཀ་ཏི་ཧོ། འདི་ནི་རྡོ་རྗེ་དམྱལ་བའི་ཆུ། །ཚུལ་འདི་བསྲུངས་ན་དངོས་གྲུབ་ཐོབ། །ཉམས་ན་ཙིཏྟ་གཤག་སྟེ་འཕོ། །རྡོ་རྗེའི་ཆུ་འདི་ཁྱོད་ཀྱིས་ལོངས། །བཛྲ་ཀྲོ་དྷ་ཨེ་དམ་ཧོ། འདོད་པ་ལྔ་ཡི་ཚོགས་ལ་རོལ། །རྒྱུད་གསུམ་ལྷུག་པའི་མན་ངག་བསྟན། །རྡོ་རྗེ་འཛིན་པའི་གྲལ་ཐོབ་ཡིན། །བརྟུལ་ཞུགས་གསང་བའི་བགྲོད་པ་གསུམ། །ཐོབ་ན་མི་ལྡོག་ས་ལ་གནས། །བརྟུལ་ཞུགས་གསང་བའི་དབང་དུ་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། བརྟུལ་ཞུགས་དབང་གི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་ཀྱིས་དམ་ཚིག་གཟུངས་ཀྱི་དོན་འདི་གསུངས་སོ། །དེ་དག་རྒྱས་པ་འདི་ལྟ་སྟེ། །དཀའ་ཐུབ་དམ་ཚིག་སྡོམ་པའི་མདོ། །ཆོས་རྣམས་མ་ལུས་བྱང་ཆུབ་སེམས། །འཁོར་འདས་ལྷུན་གྲུབ་ངང་དུ་འདུས། །དེ་མཚོན་དམ་ཚིག་སྲོག་ལྟར་བསྲུང་། །དམ་ཚིག་རྣམ་པ་གཉིས་ཡིན་ཏེ། །ཐུན་མོང་ཁྱད་པར་རིམ་པར་གསུངས། །ཐུན་མོང་རྩ་བ་ཡན་ལག་གཉིས། །སྐུ་གསུང་ཐུགས་དང་བཅོ་ལྔ་ཡིས། །བསྡུས་ཏེ་བསྲུང་མཚམས་ཤེས་པའོ། །ཁྱད་པར་ཁོ་ན་དཀའ་ཐུབ་དང་། །བསྲུང་བ་བཅུ་གཉིས་གཅིག་ཏུ་གསུངས། །གསང་བའི་ལམ་ནི་རྟོགས་
པས་ལམ་མི་བཟུར། །དྲག་སྔགས་ཐུན་མཚམས་ཁྲི་བར་གཏམ་མི་བྱ། །འཇིག་རྟེན་པ་དང་དམན་ལ་ཕྱག་མི་བཙལ། །ཁྲོ་བོའི་ཆས་དགུ་གར་དགུ་གསལ་བར་བརྟག །མཚན་ལྡན་གཟུངས་མ་བླང་དོར་མེད་པར་སྤྱད། །རྡོ་རྗེའི་ར་བའི་རྫིང་ནི་མི་བཤིག་མངོན་དུ་སྤྱད། །རེ་དོགས་སོམ་ཉི་མེད་པར་གཟིར་ཞིང་གཞོམ། །ཚ་བ་གསུམ་དང་རུལ་གསུམ་མྱང་བར་སྤྱད། །འཁོར་ལོ་གཟིར་མཐའ་སྦྱིན་བསྲེག་མནན་པ་ཟོར། །ལུས་ཀྱི་དབང་པོ་གཞན་གྱིས་མཐོང་མི་བྱ། །ཤེས་རབ་སྤྱོད་པས་བླ་མའི་ཟུར་མི་བཅག །ཁྱད་པར་ངག་ལས་ཁོ་ནའི་དཀའ་ཐུབ་བཤད། །སྤྲུལ་པའི་ཁྱད་པར་དམ་ཚིག་བསྲུང་བར་གསུངས། །རྡོ་རྗེའི་རྨང་གི་རི་མི་བཤིག །མངོན་འབྱུང་བརྟུལ་ཞུགས་དོགས་མེད་སྤྱད། །གཅན་ཟན་རྒྱལ་པོ་གསད་མི་བྱ། །ཟ་མ་ཏོག་ཏུ་དུག་མི་བླུག །རིན་ཆེན་ལྷ་བྲན་ཡང་བྲག་བསྲེག་མི་བྱ། །གངས་ཀྱི་ཞུན་ཆུ་བཏུང་བ་མིན། །བདུད་རྩི་སྣོད་ངན་ནང་མི་བླུག །མི་ཤིས་སྣོད་དུ་མདངས་མི་དབབ། །སྣོད་ངན་སེང་གེའི་ཞོ་མི་བླུག །ཡིད་བཞིན་ནོར་བུ་བསྲེག་མི་བྱ། །བྱ་ཁྱུང་གཤོག་པ་བཅག་པ་མིན། །གནམ་ལྕགས་ཨུར་མོ་ནང་མི་འཐབ། །སྟག་གཟིག་རོལ་པའི་ལྷག་མི་བཏུང་། །རྡོ་རྗེས་གཏམ་པའི་བྲག་མི་བཤིག །རྡོ་རྗེའི་ར་བའི་རྨང་མི་འདྲུལ། །མུན་པ་སེལ་བའི་སྒྲོན་མི་གསད། །རྡོ་རྗེ་ཆུ་བོའི་རྐ་མི་གཅད། །རྒྱལ་པོའི་ཕྱག་རྒྱའི་རྟགས་མི་དབྱི། །རྡོ་རྗེའི་རྫོང་གི་བྲག་མི་བཤིག །རིན་ཆེན་རྒྱལ་མཚན་རྩེ་མི་དབྲོག །ལྷག་པའི་དམ་ཚིག་བསྲུང་བར་བཤད། །བརྟུལ་ཞུགས་ལམ་ལས་ཅིག་ཅར་བགྲོད། །འབྲས་བུ་བགྲོད་ཐོབ་ལྷུན་གྱིས་གྲུབ། །ལས་དང་སྦྱོར་བ་ཀུན་དང་ལྡན། །མཐུ་སྟོབས་བྱིན་རླབས་ཤུགས་ཀྱིས་འབྱུང་། །དམ་ཅན་རྒྱ་མཚོ་དེར་གནས་འགྲུབ། །དེ་མ་ཡིན་ན་མཛེ་དང་གཡན། །དུས་མིན་ཚེ་ཟད་མནར་མེད་འཕོ། །ལེགས་ཉེས་བགྲོད་མེད་གཉིས་གར་བྱེད། །བསྲུང་ལས་འདས་ཤིང་གཉིས་སུ་མེད། །རང་བཞིན་གནས་དང་ཤུགས་ཀྱིས་རྫོགས། །ལྟ་བའི་དམ་ཚིག་ཆེན་པོར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། དཀའ་ཐུབ་དམ་ཚིག་གི་ལེའུ་སྟེ་དྲུག་པའོ།། །།
དེ་ནས་འཁོར་གྱི་ནང་ནས་རྡོ་རྗེ་སྙིང་པོ་སྟན་ལས་ལངས་ནས། བཅོམ་ལྡན་འདས་ལ་གསོལ་པ། རྒྱལ་བ་ཀུན་གྱི་རང་བཞིན་དངོས། །གསང་སྔགས་ངོ་བོ་དེ་ཉིད་ལགས། །འཇིག་རྟེན་འདས་དང་མ་འདས་པའི། །དྲེགས་པ་མཐུ་རྩལ་ལྡན་པ་ཀུན། །བཀའ་བཞིན་ཉན་པ་ཅི་ཡི་ཕྱིར། །ལྷུན་གྲུབ་ཕྱག་རྒྱ་ཟིལ་གནོན་སྐུ། །གཉེན་པོ་གང་གིས་འདུལ་བ་ལགས། །དྲག་པོའི་གདུལ་བྱ་གང་ལགས་པ། །འཁོར་ལ་རྒྱས་པར་བཤད་དུ་གསོལ། །ཞེས་གསོལ་བས། བཅོམ་ལྡན་འདས་ཀྱིས་དྲི་བ་གསུམ་པའི་དོན་འདི་གསུངས་སོ། །བསྐལ་པ་རྫོགས་ལྡན་བྱ་བ་ལ། །རིགས་ལས་གོལ་བའི་དྲེགས་པ་ལྔ། །ནག་པོ་གསོད་བྱེད་འཐོམ་པའི་གཙོ། །སྲིན་མོ་ཁ་འདར་ཁྲག་སྐྱུག་གཙོ། །རྩུབ་འཁོར་སྲོག་བཅད་ཡཀྴའི་གཙོ། །ཞེ་སྡང་གདུག་པ་སྦྲུལ་མགོའི་གཙོ། །དྲེགས་པ་བཅོ་བརྒྱད་བགེགས་རིགས་སྟོང་ཕྲག་བརྒྱད་ཅུའི་གཙོ། །དེ་ཡི་བདག་པོ་ཕུང་བྱེད་ཆེ། །ཀཱ་ལི་ཨཱ་ཡུ་ཆང་གིས་དྲེགས། །འབྱུང་བ་བཞི་ཡི་རྔམ་འོག་ནས། །ལུས་ཆེ་ཡན་ལག་རགས་ལ་རྔམས། །སྐྲ་དང་ཁ་སྤུ་ཨག་ཚོམ་རྩུབ། །སྟོད་སྨད་སྲིན་པོ་ཞུན་གྱི་གོས། །མགོ་དང་སྙིང་ཕྲེང་སྦྲུལ་གྱིས་བརྒྱན། །མཚོན་ཆ་མེ་རླུང་ཧ་ལའི་དབལ། །ཐོག་དང་སེར་བ་བུ་ཡུག་འབེབས། །རྒྱུ་མ་གློ་སྙིང་ཐོད་ཁྲག་འཐུང་། །ནག་པོ་སྡེར་ཆེན་མི་ལྤགས་གོན། །ཐོད་རློན་འབྲུ་མར་ཆང་ཁྲག་འཐུང་། །བྲན་མོ་གཡོག་མོ་ཕྲ་མེན་མ། །རིགས་ངན་མོ་རྣམས་འཁོར་དུ་བྱས། །ཆགས་སྡང་མེ་རླུང་རབ་ཏུ་ཁོལ། །སྲོག་ཆགས་ཀུན་བསད་མངལ་ནུ་སྐེམས། །རྣམ་བཞིའི་འཁོར་ལ་གནོད་ཅིང་འཚེ། །མྱུར་དུ་གསོད་ཅིང་ཤ་རློན་ཟ། །དེད་དཔོན་བཞི་ནི་འཁོར་ལ་སྦོ། །དེ་ལྟ་བུ་ཡི་ཀཱི་ལཱི་ལྔ། །སངས་རྒྱས་བསྟན་པ་འཇིག་ལ་ཉེ། །འགྲོ་བ་མ་ལུས་ཕུང་ལ་ཁད། །དེ་དག་འདུལ་ཕྱིར་སངས་རྒྱས་སྐུ། །ཕྱག་རྒྱ་ཟིལ་གནོན་འཇིགས་པར་སྟོན། །དེ་ཡང་ཇི་ལྟ་བུ་ཞེ་ན། །ལྷ་ཡི་དབང་ཕྱུག་དེད་དཔོན་རྒྱལ་བ་རུ། །སྲིད་མཚོ་རིགས་ཀྱི་བདག་པོར་གྲགས་པ་ཞིག །གསང་སྔགས་རིགས་སུ་དེ་ཉིད་འཆེས། །བགྲོད་
པ་ཕྲ་མོའི་སྒོར་ཞུགས་ནས། །བརྡ་དོན་མ་རྟོགས་ལྷུག་པར་སྤྱད། །དམ་པ་མ་ཐོབ་པ་ལ་སྤྱད། །རང་ཉམས་མ་རྙེད་བརྐམ་ཆགས་སྤྱོད། །རིགས་ངན་མོ་རྣམས་གྲོགས་སུ་སྤྱད། །ཤ་ཆེན་ཀེང་རུས་ཁྲག་ལ་རོལ། །གསང་སྔགས་བཀའ་བསྒོ་ལོག་པ་ཡིས། །དུས་མ་ཡིན་པར་ནད་དར་ཏེ། །སྡུག་བསྔལ་ཉམས་མྱོང་ཚེ་འཕོས་ནས། །ན་རག་རྡོ་རྗེ་དམྱལ་བར་ལྟུང་། །སྡུག་བསྔལ་རབ་མྱང་ཚ་གྲང་སྤྱོད། །ཕལ་པའི་སྡུག་བསྔལ་བརྒྱ་འགྱུར་མྱང་། །ཏིལ་སྦྱངས་ཚོད་གཟུང་བརྒྱ་ཡི་ནང་། །མི་དང་ལྷ་ཡི་ལོ་ཚད་ཞག །ལྷ་ལས་ལོ་རེ་དམྱལ་བའི་ཞག །རྡོ་རྗེ་དམྱལ་བའི་ལོ་རེར་ཏིལ་རེ་མཐར་ཟད་ནས། །དམྱལ་བ་ཕལ་པའི་གནས་སུ་འཕོས། །ཚ་གྲང་གནས་ན་སྡུག་བསྔལ་གདུངས། །ལྕགས་གཟེར་ཐོ་ལུམ་མེ་དཔུང་བསྲེག །བསྲེགས་ཤིང་ཐིག་འདེབས་ཐིག་ནག་ཁོལ། །སྤུ་གྲིའི་རི་དང་ནགས་ཚལ་བསྲེག །པདྨ་ཨུཏྤལ་པདྨ་ཆེ། །གས་དང་གས་ཆེན་རོ་མྱགས་འདམ། །ཆུ་བོ་རབ་རིབ་གྲང་བཙོན་བརྒྱད། །བསྐལ་པ་བཞིན་དུ་འོ་དོད་དང་། །ཉི་ཚེ་བ་བརྒྱད་གཅིག་ཏུ་གནས། །སྡུག་བསྔལ་དཔག་མེད་རབ་མྱོང་ནས། །བདེ་བས་ཤིན་ཏུ་དྲེལ་བར་འགྱུར། །ཕྱི་ནང་ཡི་དྭགས་གནས་སུ་སྐྱེས། །གཟུགས་ཆེ་སྐེ་དང་རྐང་ལག་ཕྲ། །རྣག་ཁྲག་ངན་སྐྱུགས་ལྕགས་མེ་འབར། །སྲིན་མོ་དང་ནི་གཅན་གཟན་གདུག །སྡུག་བསྔལ་ཉམས་སུ་རབ་མྱོང་ནས། །མཐའ་རུ་རྫུ་འཕྲུལ་དྲེགས་པའི་གནས། །ལྕགས་མཁར་བརྒྱད་གཉིས་བཅུ་གཉིས་འོབས། །ཐོད་མཁར་དབུས་ན་ཤ་ཁྲག་ཟ། །རྔམ་ཞིང་ང་རོས་འཁོར་རྣམས་མངག །དེ་ལྟའི་རྣམ་སྨིན་མང་བསགས་པའི། །གནས་སུ་རཱུ་ཏྲ་ཀཱ་ལིར་སྨིན། །དེ་ཡིས་འཇིག་རྟེན་ཕུང་བྱེད་ནས། །རྒྱལ་བའི་ཐུགས་རྗེས་བསྒྲལ་བར་དགོངས། །སངས་རྒྱས་ཀུན་གྱི་ཐུགས་བརྒྱུད་ནས། །བྱིན་རླབས་མཐུ་རྩལ་སྟོབས་འགྲན་ཏེ། །ནག་པོ་དེ་ཉིད་གདུལ་བའི་ཕྱིར། །སངས་རྒྱས་
ཆོ་འཕྲུལ་སྣ་ཚོགས་མཛད། །སྟོང་པའི་རང་བཞིན་བདེ་སྟོང་ཀྱང་། །སྟོངས་པས་ནག་པོའི་སྡེ་མ་སྟོངས། །ནག་པོ་རྔམ་ནས་སངས་རྒྱས་སྐྲག །སངས་རྒྱས་རྡུལ་སྙེད་ཞིང་ཁམས་འཁོད། །ནག་པོ་འཁོར་དང་བཅས་པ་ལ། །དེས་མ་བསྐྱོད་ཕྱིར་སྟོབས་ཅན་གསུམ། །ཡ་མ་བཛྲ་ཧ་ཡའི་སྐུ། །རང་རང་ཆ་བྱད་ལག་ཆ་འཁོར། །སྔགས་ཚིག་དྲག་པོ་རྔམ་བཟླས་ནས། །ནག་པོ་འཁོར་དང་བཅས་པ་ལ། །ལུས་ངག་བཀོལ་ཕྱིར་མེ་རླུང་སྤྲུལ། །དུག་དང་མཚོན་ཆའི་ཆར་ཕབ་པས། །ནག་པོ་འཁོར་བཅས་དགའ་མགུ་ནས། །ཤ་ཁྲག་རོ་དང་བདུད་རྩིར་གྱུར། །མངའ་བརྙེས་སྡེ་ལས་རྒྱལ་ལ་ཁད། །དེས་མ་ཐུལ་ཕྱིར་སངས་རྒྱས་ཀྱིས། །ཀྲོ་དྷ་བཛྲ་ཨུ་ཙུཤྨ་སྤྲུལ་ཏེ། །བཛྲ་རཀྴ་འཁོར་བཅས་ཀྱིས། །ནག་པོ་བསྒྲལ་ལ་བཟའ་བར་རྔམས། །གྷུ་ཧྱ་མ་ཏྲཾ་ང་རོར་བཏོན། །ཛྙཱ་ན་རཾ་གྱིས་སྲས་མཆོག་སྤྲུལ། །ཀཱི་ལ་ཙིཏྟའི་དཀྱིལ་དུ་གཟས། །བཏབ་པས་སྨེ་བ་བརྩེགས་པ་རྒྱལ། །རྡོ་རྗེ་སྲིན་པོའི་འཁོར་བརླགས་ནས། །ནག་པོ་དྲེགས་པའི་ཚེ་བཀྲག་ཕྲོགས། །གསང་སྔགས་ངོ་བོ་དེ་ཁོ་ནས། །དྭངས་མ་ཆེན་པོ་ལྔ་ཡི་དངོས། །ཡེ་ཤེས་ལྔ་ཉིད་རྟོག་པ་ཡི། །རིགས་ལྔའི་ངོ་བོ་སྤྱི་ཡི་གཟུགས། །ནག་པོ་ཆ་མཐུན་བརྗིད་པའི་སྐུ། །ཟིལ་གནོན་ཕྱག་རྒྱ་ཆེན་པོ་ཉིད། །སྟོང་ཉིད་མ་སྐྱེས་མ་འགགས་པའི། །ལྷུན་གྲུབ་ཛྙཱ་ནས་ཐམས་ཅད་མཁྱེན། །ལྷུན་པོ་རི་རབ་བརྟན་ལྟར་བརྗིད། །རྣམ་ཐར་དབུ་གསུམ་སྐུ་གསུང་ཐུགས། །རྒྱུད་དྲུག་འཁོར་བ་བསྒྲལ་བའི་རྟགས། །ཕ་རོལ་ཕྱིན་ཕྱག་ཡེ་ཤེས་དྲུག །སྐྱེ་བ་རྣམ་བཞི་དག་པའི་རྟགས། །ཚད་མེད་ཞབས་བཞི་རྫུ་འཕྲུལ་རྐང་། །སྲ་བྱེད་བརྟན་པས་ཐམས་ཅད་གནོན། །མཉེན་བྱེད་བསྐྱིལ་ཞིང་སྡུད་པའི་དབང་། །གསལ་བྱེད་ཁྲག་ཆུང་བག་ཆགས་བསྲེག །གཡེང་བྱེད་རྐྱེན་མེད་རང་ཤུགས་ལྡན། །སྣང་བྱེད་གོ་འབྱེད་ཁེབས་འོག་ཆུད། །རྒྱུ་རྐྱེན་ཐབས་ལ་རག་མ་ལུས། །བདེ་བའི་སྐུ་ཉིད་སྟོང་བདག་མེད། །སྟོང་ལས་ཀུན་སྐྱེས་བསམ་དཔག་དཀའ། །ནག་པོ་གདུལ་ཕྱིར་སྣ་ཚོགས་སྐུ། །ཡ་མ་བཛྲ་ཁྱམས་ཁང་ཁྱུང་། །དེ་བཞིན་གཉིས་ལྡན་སེང་གེ་སྟག །གདུག་པའི་ཡེ་ཤེས་ཁྲོ་ཆུང་འབར། །ཚུལ་དགུ་ཆས་དགུ་རྒྱན་དགུ་དང་། །གར་དགུ་སྟབས་དགུ་རྔམས་སྒྲ་དགུ། །ཐོད་སྦྲུལ་རིན་པོ་ཆེ་ལ་སོགས། །
གསོད་བྱེད་ཁྲག་འཐུང་ཚོགས་ཀུན་གནོན། །འཁོར་ལོ་རལ་གྲི་རྡོ་རྗེ་འཕེན། །བེ་ཅོན་གཏུན་ཤིང་སྡིགས་མཛུབ་བརྡེག །ནག་པོ་དྲེགས་པ་བསྒྱེལ་ཏེ་མནན། །རྔམ་པའི་དྲག་སྔགས་དྲག་པོ་བསྒྲག །ཨེ་ཀ་ཡ་མ་རུ་དྲ་མ་ཏྲ་མཱ་ར་ཡ་རྦད། དུན་ཧུར་ཐུཾ་ཛ། ནག་པོ་བསྒྲལ་ཏེ་སྒྲིབ་པ་སྦྱངས། །གཤེད་བདག་ཡང་སྤྲུལ་འཁོར་ཚོགས་ཀྱིས། །ནག་པོ་འཁོར་མནན་རང་འཁོར་བསྡུས། །མདངས་ཕུལ་སྣམ་ནས་བཏོན་ཏེ་བཞག །ཞལ་དུ་གསོལ་བས་བདེ་བ་བསྙེན། །ནག་པོ་འཁོར་བཅས་བརྒྱལ་སངས་ཏེ། །བདག་ཅག་རྒྱལ་བའི་འཁོར་ལགས་པས། །འཁོར་ལ་ཐུགས་རྗེ་མ་ཆུང་བར། །བྲན་འཁོར་ཕོ་ཉའི་ལས་སྐལ་བྱེད། །བཀའ་བཞིན་བགྱིད་ཀྱིས་བཀའ་ལ་ཐོགས། །ཡུན་དུ་རྒྱལ་བའི་བསྟན་པ་བསྲུང་། །རྣམ་བཞིའི་འཁོར་ལ་ཡུན་དུ་འཚོ། །སྲོག་གི་སྙིང་པོ་འདི་བཞེས་ལ། །བཀའ་དྲིན་བགྱིད་ཀྱིས་འཁོར་དུ་ཞོག །ཅེས་གསོལ་ཏོ། །དཔལ་ཚེ་བདག་གི་དགོངས་རྒྱུད་ནག་པོ་ལས། དྲེགས་པ་ཅན་ནག་པོ་འཁོར་དང་བཅས་པ་བཏུལ་བའི་ལེའུ་སྟེ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་གདུག་པ་གསུམ་གྱི་ནད་ཞུགས་པའི་མཚན་ཉིད་དང་། ཞུགས་པའི་རྟགས་དང་། ནད་དེ་འདོན་པའི་གཉེན་པོའི་སྔགས་བརྡེག་པ་དང་། བརྡེག་པའི་ཐབས་བཤད་དོ། །མཛེ་རིགས་དྲག་པོའི་ནད་དར་ནས། །འཇིག་རྟེན་འགྲོ་བ་མི་ཡུལ་དུ། །གདུག་པ་གསུམ་གྱི་ནད་དར་ཏེ། །ཛྭ་ལ་ཛི་ཏི་ཡ་ང་བ། །མེ་རུ་འཁྲུགས་ཏེ་ཕུང་ལ་ཁད། །དེ་ལ་དྲག་སྔགས་རྣོ་དབལ་མཚོན། །དམོད་པ་དྲག་པོ་ལས་ཀྱི་ནད། །ཉེན་ལྔ་སྨིན་པ་འདི་ལྟ་སྟེ། །རིགས་དང་རྩོལ་བ་ཐབས་རླངས་དང་། །བྱད་ཀྱི་གཏད་ཁྲམ་གནད་གཟིར་སོགས། །དེ་ལྔའི་སྐྱོན་གྱིས་ནད་ལྔ་ལྡང་། །རྒྱལ་རིགས་མགོ་ནས་རུས་ནད་བསྐྱེད། །ཤ་སྐེམ་མདོག་དམར་ཟུག་པ་ཆེ། །ཤི་ཕྲད་ཉིན་མཚན་དྲིལ་གཏོར་བརྡེག །དཀའ་ཐུབ་ལྡན་པས་མདངས་བླངས་བཟའ། །ས་ནཱ་སྔགས་རྣམས་མ་ཕྱི་སོར་བཞག་བྱས་ག་སྙིང་གཟེར་རོ་མྱག་རྦད། ཁྲག་ལ་མྱོག་ཏི་ཡཾ་ཤག་རྦད། དུག་ཕྱུང་ཁྲག་ཤིག་ཙིཏྟ་གཏུབ་རྦད། ཁམ་ཤག་ཐུམ་རིལ་ཧྲིལ་མྱག་རྦད། ཙིཏྟ་མ་མ་དབུགས་ལ་ཐད་གཟེར་རྦད། ས་ནཱ་ག་རྩལ་ཧུར་ཐུམས་རྦད། སྲོག་ལ་ཐུན་རྦད་བྷྱོ། རྗེ་རིགས་ལག་
གཡས་ཚ་བ་སྐེམ། །སྙིང་གཟེར་དགུ་པ་དྲིལ་ལ་གདོན། །ས་ནཱ་ག་མ་ཏྲག་སྙིང་གཟེར་རྦད། ས་ནཱ་ག་སྙིང་གཟེར་དུན་རྦད། ས་ནཱ་ག་ཙིཏྟ་སྙིང་གཟེར་རྦད། ས་ནཱ་ག་དུ་མེ་སྙིང་གཟེར་རྦད། ས་ནཱ་ག་ཀྵྀ་ཏྲི་སྙིང་གཟེར་རྦད། ས་ནཱ་ག་སྙིང་གཟེར་ཐུན་ཕྱུང་སྙིང་གཟེར་རྦད། ས་ནཱ་ག་ཁཾ་ཤག་སྙིང་གཟེར་རྦད། ས་ནཱ་ག་སྲོག་ཏིག་སྙིང་གཟེར་རྦད། ས་ནཱ་ག་ཐུམ་རིལ་སྙིང་གཟེར་རྦད། ས་ནཱ་ག་སྙིང་གཟེར་སྦུར་ནན་རྦད། བྲམ་ཟེ་ལག་གཡོན་ཁྲག་ཆུ་སྐེམ། །ཉི་ཤུ་རྩ་གཅིག་རྣལ་མ་གདོན། །ས་ནཱ་ག་སྙིང་གཟེར་ཛ། ས་ནཱ་ག་སྙིང་གཟེར་དུ་ན་ཕྱུང་རྦད། ས་ནཱ་ག་སྙིང་གཟེར་ཙིཏྟ་ཁ་ལ་ནན་རྦད། ས་ནཱ་ག་སྙིང་གཟེར་ཐུན་ནན་རྦད། ས་ནཱ་ག་སྙིང་གཟེར་དུ་རཾ་རྦད། ས་ནཱ་ག་སྙིང་གཟེར་ཡཾ་ཟློག་རྦད། ས་ནཱ་ག་སྙིང་གཟེར་སྲོག་ལ་རྦད། ས་ནཱ་ག་སྙིང་གཟེར་ཙིཏྟ་རོ་མྱག་རྦད། ས་ནཱ་ག་སྙིང་གཟེར་ཐུམ་རིལ་རྦད། ས་ནཱ་ག་སྙིང་གཟེར་རྩལ་རྨུགས་རྦད། ས་ནཱ་ག་སྙིང་གཟེར་ནན་འདྲིད་རྦད། ས་ནཱ་ག་སྙིང་གཟེར་དྲེང་ཤག་རྦད། ས་ནཱ་ག་སྙིང་གཟེར་ཙིཏྟ་ཁས་རྦད། ས་ནཱ་ག་སྙིང་གཟེར་ཁྲག་ཐིབས་རྦད། ས་ནཱ་ག་སྙིང་གཟེར་སྦུར་ནན་རྦད། ས་ནཱ་ག་སྙིང་གཟེར་ཧི་ནན་རྦད། ས་ནཱ་ག་སྙིང་གཟེར་ཨུ་ནན་རྦད། ས་ནཱ་ག་སྙིང་གཟེར་ཨེ་ནན་རྦད། ས་ནཱ་ག་སྙིང་གཟེར་སྲོག་ལ་དུན་དུན་རྦད། ས་ནཱ་ག་སྙིང་གཟེར་ཙིཏྟ་རུ་ཐུམ་རྦད། ས་ནཱ་ག་སྙིང་གཟེར་ཧ་ལ་ཧ་ལ་ཕྱུང་རྦད། དམངས་རིགས་རྐང་གཡས་ཞྭ་གྲུམ་གཡོ། །སྙིང་གཟེར་བདུན་གྱིས་འཇོམས་ཤིང་གདན། །ས་ནཱ་ག་སྙིང་གཟེར་སྦུར་ནན་རྦད། ས་ནཱ་ག་སྙིང་གཟེར་འདྲིད་ཕྱུང་རྦད། ས་ནཱ་ག་སྙིང་གཟེར་སྲོག་ལ་མྱོག་རྦད། ས་ནཱ་ག་སྙིང་གཟེར་དུ་རཾ་རྦད། ས་ནཱ་ག་སྙིང་གཟེར་ཡཾ་བཟློག་རྦད། ས་ནཱ་ག་སྙིང་གཟེར་ཙིཏྟ་རྦད། ས་ནཱ་ག་སྙིང་གཟེར་ཨུ་ནན་གཟེར་བྱུང་རྦད། གདོལ་པ་རྐང་གཡོན་རྣག་ལ་འཇུག །ཁོང་པ་སྦོ་བ་རྣག་ལ་འཇུག །གདུག་པ་ལྟོ་དཀྲུག་སྔགས་ཀྱིས་འཇོམས། །སརྦ་དུ་རཾ་ཨེ་ནན་འདྲིད་ཕྱུང་ཙིཏྟ་སྙིང་ཁྲག་གཟེར་ཐུམ་རིལ་རྦད། བ་སུ་རིགས་དྲུག་རྩར་འཇུག་ཕོལ་འབྲས་གཡོ། །ཧེ་ས་འབྲུ་བརྒྱད་ཐུན་མོང་གནོན། །ཧེ་ས་ཡ་མ་ཐི་སར་ཡ་ས་ནཱ་ག་སྙིང་གཟེར་སྦུར་ནན་རྦད། སྨན་
དང་འཕྱེ་བོ་རླུང་སྒོར་འཇུག །མཛེ་རླུང་ཁྲག་སྐྱེ་ཚ་གྲང་འཁྲུགས། །བཅུ་གཅིག་པ་ཡི་སྔགས་ཀྱིས་གནོན། །ས་ནཱ་ག་སྲོག་ལ་དུན་དུན་རྦད། ས་ནཱ་ག་ཙིཏྟ་ཐུམ་རིལ་ཤག །ས་ནཱ་ག་ཙ་རྦད་ཐུམ་རིལ་ཤག །ས་ནཱ་ག་དུན་ལིང་ཐུམ་རིལ་ཤག །ས་ནཱ་ག་སྲོག་ལ་ཧུར་ཐུམ་རིལ་ཤག །ས་ནཱ་ག་སྙིང་གཟེར་སྦུར་ནན་ཐུམ་རིལ་ཤག །ས་ནཱ་ག་དུ་མེ་མ་མ་སྲོག་གཟིར་རྦད་ཐུམ་རིལ་ཤག །ས་ནཱ་ག་ཙ་ཏྲི་ཤུ་ལ་གཟིར་ནན་ཐུམ་རིལ་ཤག །ས་ནཱ་ག་ནྲྀ་ཏྲི་ཡཾ་ཤིག་གཟིར་ཐུམ་རིལ་ཤག །རྐང་གཅིག་བུ་ག་རྩ་གཉིས་འཇུག །གཞོགས་སྐམ་སྦུབ་པ་ནད་ཀྱི་རྒྱུ། །སྙིང་གཟེར་བཅུ་གཅིག་དྲིལ་བས་གདོན། །ས་ནཱ་ག་སྲོག་ལ་དྲེང་ཤག་ཐུམ་རིལ་དུན་དུན་ཛ། ས་ནཱ་ག་སྲོག་ལ་དྲེང་དྲེང་ཛྭ་ཛྭ་ཐུམ་རིལ་ཤག །ས་ནཱ་ག་སྲོག་ལ་དུན་དུན་ཤག །ས་ནཱ་ག་ཙིཏྟ་ཐུམ་རིལ་ཤག །ས་ནཱ་ག་རྩ་ལ་རྦད་ཐུམ་རིལ་ཤག །ས་ནཱ་ག་ཐུམ་ལིང་ཐུམ་རིལ་ཤག །ས་ནཱ་ག་ཁཾ་ཤག་ཐུམ་རིལ་ཤག །ས་ནཱ་ག་སྙིང་གཟེར་སྦུར་ནན་ཐུམ་རིལ་ཤག །ས་ནཱ་ག་དུ་མེ་ལ་མ་སྲོག་གཟིར་རྦད་ཐུཾ་རིལ་ཤག །ས་ནཱ་ག་ཙི་ཏྲི་ཤུ་གཟིར་ནན་ཐུཾ་ཤག་ནྲྀ་ཏྲི་ཡཾ་རྦད། གེལ་པ་སོ་དང་སེན་ལ་འཇུག །ལྕེ་འཐིབ་ཀླུ་ནད་བརླང་པོ་གཏོང་། །བཅུ་གཅིག་དང་པོ་བདུན་པའི་ཐ་མ་དང་། །ལོག་དཀྲུག་རྣལ་མ་སྡེབ་ལ་གདོན། །ས་ནཱ་ག་སྲོག་ལ་དྲེང་ཤག་ཐུཾ་རིལ་དུན་དུན་ཛ་ཛ། ས་ནཱ་ག་སྙིང་གཟེར་སརྦ་ཨུ་ནན་གཟེར་ཕྱུང་རྦད། སརྦ་དུ་རཾ་ཨི་ནན་འདྲིད་ཕྱུང་ཙིཏྟ་སྙིང་གཟེར་ཐུཾ་རིལ་ཤག་རྦད། མགོ་མང་ཁ་ཟས་རོ་ལ་འཇུག །ལྕེ་ཡི་དབང་པོ་རོ་དང་བྲལ། །དགུ་དང་བཅུ་གཅིག་དབུས་སྡེབ་གདོན། །ས་ནཱ་ག་དུག་ཕྱུང་སྙིང་གཟེར་རྦད། ས་ནཱ་ག་ཐུཾ་ལིང་ཐུམ་རིལ་ཤག །གདུག་པ་ཆེན་པོ་སྙིང་ལ་འཇུག །སྨྱོ་འབོག་འཚེལ་མཛེ་སྡུག་བསྔལ་མྱོང་། །བཅུ་གཅིག་དབུས་དང་བསམ་གཏན་སྔགས། །ཉིན་མཚན་བསྣོལ་མར་བཟླས་པས་གདོན། །ས་ནཱ་ག་དུཾ་ལིང་ཐུཾ་རིལ་ཤག་རྦད། སརྦ་ཙིཏྟ་རོ་མྱགས་ཁ་ཐམ་སྲོག་གཟིར་སྦུར་ནན་འདྲིད་ཕྱུང་ཧྲི་ཤག་ཛ། ས་ཡམས་རྗེན་ཤུན་དྲི་ལ་འཇུག །ནང་ཁྲོལ་ལྔ་ཟ་མཛེ་ཡམས་བསྐྱེད། །ཕྱག་རྒྱ་བསམ་གཏན་རྣལ་མས་གདོན། །ས་ནཱ་ག་སརྦ་ཙིཏྟ་རོ་མྱགས་ཁ་ཐམ་སྲོག་གཟིར་སྦུར་ནན་འདྲིད་
ཕྱུང་ཧྲི་ཤག་རྦད། ལྟོ་འཕྱེ་རྩ་བཞི་སྦུབས་ལ་འཇུག །བད་ཀན་ཁྲག་རླུང་མཁྲིས་ནད་བསྐྱེད། །སྐྱོ་དུབ་སེམས་གཡེར་འཆལ་དང་འཐིབས། །ཤི་ཕྲད་མགོ་དང་དགུ་པའི་དབུས། །སྡེབ་ལ་བཟླས་ལ་དྲག་པོ་གདོན། །ས་ནཱ་ག་ཙིཏྟ་རོ་མྱགས་རྦད། ཁྲག་ལ་མྱོག་ཏི་རྦད། སྲོག་ལ་མུག་ཏི་རྦད། དུག་ཕྱུང་ཁྲམ་ཤིང་རྦད། ས་ནཱ་ག་དུག་ཕྱུང་སྙིང་གཟེར་རྦད། འཐོམས་པ་ཚིགས་ལ་འཇུག་པ་སྟེ། །རྐང་ལག་ཞྭ་གྲུམ་ལུས་སྐེམ་སྦྲིད། །སྔགས་ནི་དགུ་བདུན་གོང་བཞིན་སྡེབ། །ས་ནཱ་ག་མ་ཏྲག་སྙིང་གཟེར་རྦད། ས་ནཱ་ག་ཙི་ཏྲི་སྙིང་གཟེར་ཙིཏྟ་རྦད། ས་ནཱ་ག་སྙིང་གཟེར་སྦུར་ནན་རྦད། ས་ནཱ་ག་སྙིང་གཟེར་འདྲིད་ཕྱུང་རྦད། མགོ་དགུ་མགོ་ལྔ་ཁ་ཟས་འཇུག །ཟས་ལ་རོ་མེད་ལྡིབ་དང་ལྐུགས། །ཤི་ཕྲད་དྲག་པོ་མགོ་མས་གདོན། །ས་ནཱ་ག་ཁམ་ཤག་ཐུཾ་རིལ་ཧྲིལ་མྱགས་རྦད། ཙ་ཏྲི་མ་མ་དབུགས་ལ་ཟང་གཟེར་རྦད། རྩལ་ཧུར་ཐུཾ་རྦད། སྲོག་ལ་ཐུན་རྦད་བྷྱོ། ས་བདག་ས་སྲིན་ཁ་མིག་འཇུག །རྨ་དང་སྲིན་དང་ལིང་ཏོག་འབྲས། །ཤི་ཕྲད་དང་མགོ་གཉིས་སྡེབ་ལ། །བཅུ་གཅིག་དབུས་མ་བསྣོན་པས་གདོན། །ས་ནཱ་ག་ཁྲག་ལ་མྱོག་ཏི་རྦད། ཁམ་ཤག་ཐུཾ་རིལ་ཧྲིལ་མྱགས་རྦད། ས་ནཱ་ག་དུཾ་ལིང་ཐུཾ་རིལ་ཤག་རྦད། གཉན་གྱི་ནད་རིགས་སྐམ་དང་འཇའ། །བསམ་གཏན་བཅུ་གཉིས་བཞི་པ་མགོར། །སྡེབ་ལ་སྲེག་དང་ཁྲུས་བྱས་ཐོན། །ས་ནཱ་ག་རྩལ་རྦད་ཐུཾ་རིལ་བྷྱོ། སརྦ་ཙིཏྟ་རོ་མྱགས་ཁ་ཐམ་སྲོག་གཟིར་སྦུར་ནན་འདྲིད་ཕྱུང་ཧྲི་ཤག་རྦད། ཀླུ་བརྒྱད་ཀླུ་སྲིན་དགངས་དང་འཐིབས། །འགུལ་དང་འཕྲིགས་དང་ཚ་ཞིང་ཟ། །དྲག་སྔགས་མགོ་བདུན་གུ་འཕྲད་གདོན། །ས་ནཱ་ག་སྙིང་གཟེར་སྦུར་ནན་རྦད། ས་ནཱ་ག་སྙིང་ལ་ཏྲིག་སྙིང་གཟེར་རྦད། ས་ནཱ་ག་ཙིཏྟ་རོ་མྱགས་རྦད། གདུག་པ་གསུམ་དང་མ་མོར་བསྡོང་། །རིམས་ནད་སྨྱོ་འབོག་ལྕི་འཐིབས་ན། །བཅུ་གཅིག་དུ་མེ་འབྲུ་དགུས་གདོན། །དུ་མེ་སུ་སྲོག་གཟིར་རྦད། ཐུཾ་རིལ་ཤག །གདུག་པ་གསུམ་དང་རྒྱལ་པོའི་ནད། །སྨྱོ་འབོག་སྙིང་ཕྱུང་སུ་ལ་ཁྲོལ། །ཙ་ཏྲི་འབྲུ་དགུ་ཕྱེ་ལ་གདོན། །ཙ་ཏྲི་ས་ནཱ་ག་ཐུཾ་རིལ་གཟིར་ཤིག །གདུག་པ་གསུམ་དང་བཙན་གྱི་ནད། །
གྲི་ཟེར་ཁྲོ་ཞིར་རང་ཉམ་ཆུང་། །ཛ་ཡཾ་འབྲུ་བཅུ་ཕྱེ་ལ་གདོན། །ས་ནཱ་ག་ཛ་ཡཾ་གཟེར་ཐུཾ་རིལ་ཤག་རྦད། མཛེ་འདྲེ་ཐེའུ་བྲང་གདུག་པའི་ནད། །བློ་བུར་ཧུར་ཐུམ་ཡིད་འཁྲུགས་ཡོད། །རོ་ནྲྀ་འབྲུ་ཏྲྀ་ཡང་དགུ་ཕྱེ་ནས་གདོན། །ས་ནཱ་ག་རོ་ནྲྀ་ཏྲྀ་ཡང་གཟིར་ཐུཾ་རིལ་ཤག །འཇུག་པ་ངེས་པའི་ཚད་མས་བརྟག །ནད་རྟགས་ཤེས་ནས་སྔགས་རེ་གདོན། །རྟགས་མེད་འཁྲུགས་ན་རྣོ་དབལ་བཏགས། །མཛེ་ཡམས་བསྲུང་བའི་སྦྱོར་བར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ནད་བརྟགས་ལ་གདོན་པའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་དབང་སྡུད་ཀྱི་རྩ་བ་འདི་གསུངས་སོ། །སྔོན་དུ་འགྲོ་བ་བརྟན་བྱས་ལ། །གཟུགས་གཉིས་བཅའ་འམ་ལྡིང་ཐབས་བཏག །ཐོད་པའམ་ཁྱུ་མཆོག་རྭ་རུ་གཞུག །གྲུ་གསུམ་རྩང་བཅས་རེ་བར་གདབ། །ལས་ཀྱི་ཚེ་བདག་གསལ་བྱས་ལ། །བླ་སྲོག་ནུས་པ་བདག་དབང་བསྡུ། །ལིངྒ་གཟུགས་དང་རྟེན་ལ་བསྡིམ། །ཉི་ཤུ་རྩ་གཅིག་སྦྱོར་བ་བརྩམ། །གཟིར་བ་བརྒྱ་བརྒྱ་བསད་པ་སྟོང་། །ཐོན་ནས་ཕུར་པ་སྙིང་གར་གདབ། །གདུག་པ་ཀླུ་དང་རྟེན་ལ་མནན། །ས་བརྐོ་ཕོ་ཉ་བླ་འགུགས་མནན། །ས་བདག་དབང་ཆེན་ཕོ་བྲང་གདབ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨེ་ཀ་ཧེ་ཀ་གྷྲི་མ་ཧེ་ཀང་ཏྲི་ཡ། ཧེ་ས་བྷི་ས་མ་ཛ་ཏཱ། ཀུན་སྨན་པ་ཛ་ནི་ཛ་སད་ཀ་ར་ཡ་ཧཱུཾ་ཕཊ། ཨེ་ཀ་ཧེ་དུན་རཀྴ་རྦད། ཡ་ཧེ་སར་རཀྴ་རྦད། ཁར་ག་ཙ་དུར་རཀྴ་རྦད། ཐ་ཀང་ཀུ་མ་ཛ་ནི་རཀྴ་རྦད། སད་ཀ་ར་ཡ་དགྲ་བོའི་སྲོག་ལ་མཱ་ར་ཡ་རྦད། ཡ་མ་ཨེ་མ་ཧེ་ཀ་ར་ཛ་གྷྲི་མནན་མ་ལ་ཧེ་སང་ཛ་ཐུན་ནན། པྲ་ཡ་མ་ས་ར་ནཱ་ག་ཐི་བར་ན་ནན། ནྲྀ་ཏྲི་སྟྭམ་བྷ་ཡ་ནན། ཡུང་དཀར་ཡུངས་ནག་ཕུར་པ་ཁྲག །སོ་སོར་བྲིས་ལ་མཚོན་གྱིས་གཏུབ། །དབང་སྡུད་ལན་གཉིས་རྫོགས་པར་བཤད། །དྲག་པོའི་སེར་བ་འདི་ལྟ་སྟེ། །ཡུལ་གྱི་ལྷ་རྟེན་ཀླུ་དང་བཙན། །སེར་སྲུང་དྲི་མ་སྔོ་སྣ་ས། །བསྲེས་ལ་ཁྲག་གི་སྦལ་པ་གཉིས། །ལྟོ་སྦྱར་ཞིང་རས་སྔགས་ཀྱིས་གྲིལ། །ཐོད་པ་ཁྲག་སྣ་དང་བཅས་པ། །འབྲུ་གསུམ་གྲུ་གསུམ་དུག་ཁྲག་བྲན། །ཐོད་པ་དབྱར་དཔྱིད་
མཚམས་སུ་གཞུག །སྟོན་ཟླ་གསུམ་ལ་གཟུགས་བླངས་ལ། །རྫས་ཀྱིས་སྦལ་པའི་བར་དུ་གཞུག །གོང་གི་ཐུན་བྲབ་ཕུར་པས་བརྡེག །བརྒྱད་དང་བཅུ་གཅིག་ཉ་བཅུ་དགུ། །ཉི་ཤུ་དགུ་ལ་དབབ་པར་བརྩམ། །ཨེ་ཀ་ཧེ་ཀ་ཡ་མ་ཧེ་སང་པྲ་མ་སར་པྲོཾ། ཧྲིལ་དྲག་ཏུ་པྲོཾ་པྲོཾ་ཧྲིལ། པྲོཾ་པྲོཾ་ཤར་ཤར་ཧྲིལ་བྷྱོ། དེ་བ་ཛ་ཡ་མ་ནཱ་ག་སྙིང་གཟེར་རོ་མྱགས། པྲོཾ་པྲོཾ་ཤར་ཤར་དྲག་ཏུ་ཕོབ། ཡ་མ་རཀྴ་ནཱ་ག་དུན་རྦད་ནཱ་ག་སྙིང་གཟེར་ས་ཏྲི་ནན་རྦད། ལས་གཉིས་ཡན་ལག་རྫོགས་པར་བཤད། དཔལ་ཚེ་བདག་གི་དགོངས་རྒྱུད་ནག་པོ་ལས། དྲག་སྔགས་དབང་སྡུད་ཀྱི་ལེའུ་སྟེ་དགུ་པའོ།། །།དེ་ནས་ཡང་བཅོམ་ལྡན་འདས་ཀྱིས་གབ་པ་མངོན་དུ་ཕྱུང་བའི་སྦྱོར་བ་འདི་གསུངས་སོ། །བསྲུང་དང་གཟིར་དང་བཤིག་དང་བསད། །མནན་དང་བསྲེག་དང་ཟོར་ཐུན་མཐར། །དྲིལ་བའི་འཁོར་ལོ་འདི་ལྟ་སྟེ། །རྒྱ་ཤོག་གྲུ་བཞི་ཆ་གཉིས་ལ། །སྨེ་བ་ལྔ་དང་ནི་རང་བྱུག །ཐིག་སྐོར་རིམ་པ་གསུམ་དུ་བསྐོར། །དབུས་སུ་གྲུ་གསུམ་ཟླ་གམ་གསུམ། །མིང་རུས་སྲུང་བ་སྐབས་ཀྱིས་བྲི། །དེ་ཡི་ཕྱི་རིམ་འཁྲུལ་མིག་བཅུ། །རྩ་བ་དྲག་སྔགས་གང་རུང་དགོད། །ཡང་ལོགས་རྩིབས་ཆེན་བཅུ་གཉིས་ལ། །སྤུ་གྲི་སྦྱོར་བ་བཀང་ལ་འཕྲོ། །སྲིད་པའི་རུས་སྦལ་ལྟོ་བར་བཅའ། །ཞག་དགུའམ་ཟླ་ཕྱེད་སྦྱོར་བ་བརྩམ། །འཁོར་ལོ་ཐོད་པ་ཀླུ་དང་རྟེན། །སྦྱོར་བ་དམིགས་དང་སྐབས་ཀྱིས་མནན། །རྗེས་གཅོད་གཟིར་དང་ཁ་གསོ་ཟོར། །རིམ་པ་དེ་བཞིན་ཤེས་པར་བྱ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་པོའི་སྔགས་འདི་བཏོན་ནོ། །ཨེ་ཀ་ཡ་མ་གྷྲི་མ་ཛ་ནི་ར་མ་ཡ། སརྦ་ཤ་ཏྲཱུ་སྟམ་བྷ་ཡ་ནན། འདྲིད་དུག་ཕྱུང་རྦད། ས་ནཱ་ག་སྙིང་གཟེར་སྦུར་ནན་རྦད། ཁམ་ཤག་རྦད། སརྦ་ཨུ་ནན་འདྲིད་ཕྱུང་། རོ་མྱགས་ཐུཾ་རྦད། པྲོཾ་པྲོཾ་ཤར་ཤར། ཧྲིལ་ཧྲིལ་ཕོབ། པྲོཾ་ཤར་ནཱ་ག་དེ་བ་ཛ་ཡཾ་ས་ཏྲི་སྙིང་གཟེར་སྦུར་ནན། པྲོཾ་ཤར་ཧྲིལ་བྷྱོ། རཾ་ཐུན་པྲོཾ་ཤར་ཧྲིལ་ཕོབ། ཨེ་ཀ་ཡ་མ་གྲཾ་གྲཾ་རཾ་ཙིཏྟ་ནན། འདྲིད་ཕྱུང་རྦད། དྲག་པོ་ལས་ཀྱི་རིམ་བསྡུས་པ། །ལྷུན་གྱིས་
གྲུབ་པའི་ཚེ་བདག་གིས། །སྦྱོར་བ་དག་པའི་ཚེ་བདག་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། གབ་པ་མངོན་དུ་ཕྱུང་བའི་ལེའུ་སྟེ་བཅུ་པའོ།། །།དེ་ནས་ཡང་བཅོམ་ལྡན་འདས་ཀྱིས། མགོ་དགུ་པའི་སྦྱོར་བ་དྲིལ་བའི་འཁོར་ལོ་འདི་གསུངས་སོ། །རྩ་བ་གཅིག་ལ་ཡན་ལག་ལྔ། །སྙིང་པོ་ཉིད་ལས་ཡེ་ཤེས་ཀྱི། །འོད་དང་ཟེར་གྱི་ཚུལ་ཅན་གྱིས། །གདུག་པའི་གནས་སུ་མཚམས་དང་སྦྱར། །དུར་ཁྲོད་རས་དང་ཤོག་བུ་ལ། །ཐིག་སྐོར་རིམ་པ་བཞི་རུ་བསྐོར། །དབུས་སུ་གྲུ་གསུམ་ཟླ་གམ་གསུམ། །མིང་རུས་གང་དམིགས་བསྲུང་བ་བྲི། །ཕྱི་རིམ་རྩིབས་བཞིའམ་ཁྱམས་ཁང་བཞིར། །བྱས་ལ་སྤུ་གྲི་རྫོགས་པར་དགོད། །ཡང་ལོགས་འཁྲུལ་མིག་བཅུ་དྲུག་ལ། །རྩ་བའི་དྲག་སྔགས་དེ་བཞིན་དགོད། །ཐ་མ་སྦྲུལ་གདུག་ཆེན་པོས་བསྡམ། །ཁ་སྦྱར་དུག་ཆུ་ཚ་བ་ཁྲག །བསྐུས་ལ་དོར་ཅིང་ལིངྒར་སྦྱར། །ཞག་དགུ་གསལ་གསུམ་གནད་དགུ་བདོག །ཉིན་དགུ་གཏོར་ལ་མཚན་དགུ་དྲིལ། །གསད་པའི་ལས་དེ་མཐའ་རུ་མནན། །ཞག་དགུ་གཟིར་བཤིག་མནན་པ་ཟོར། །ཆུ་དྲིལ་གཏའ་གཞུག་ཟོར་ཐབས་གཟིར། །ཡན་ལག་ལས་དེ་སྐབས་ཀྱིས་བླངས། །མཐའ་མ་ས་ཡི་འཁོར་ལོ་བཅའ། །མཎྜལ་དབུས་སུ་མེ་ཐབ་བཅའ། །ཁ་ཁྱེར་ཆག་གང་གྱེན་དང་ཐུར། །ནང་དུ་ཡཾ་རཾ་སྙིང་པོ་བྲི། །ལིངྒའི་སྙིང་གར་ཧོམ་ཤིང་མནན། །ཤ་གསུམ་ཁྲག་གསུམ་དུག་སྣ་གསུམ། །འོ་མ་ཏིལ་ནག་ཉུང་ནག་མར། །ཕྱི་རིམ་རྒྱ་གྲམ་བཞི་ལ་དགོད། །མཐའ་མ་མེ་རི་གཟུགས་དང་མིང་། །བསྐོར་ལ་ཞག་ལྔ་ཐུན་བྲབ་གཟིར། །ཞག་གསུམ་བསྲེག་ཅིང་མཆོད་པ་བསྟབ། །མཐའ་རུ་མནན་པ་ཐལ་བ་གདབ། །ལས་ཀྱི་རྗེས་གཅོད་བརྣག་པའི་མཆོག །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ནོ། །ཨེ་ཀ་ཧེ་དུ་ན་ཡ་མ་རཀྴ་ཛ། མུན་ཏྲི་ཤཾ་ཙ་ཏྲི་ཤུ་སྙིང་། དགྲ་བོའི་སྲོག་ལ་ཤ་ཏྲུཾ། མཱ་ར་ཡ་རྦད། སྲོག་སྟྭམ་བྷ་ཡ་ནན། སྲོག་ལ་ནི་ཤག་ཧུར་ཡམ་ཐུན་བྱེ། པྲོཾ་པྲོཾ་ཤར་ཤར་ཧྲིལ་ཧྲིལ་དྲག་ཏུ་ཕོབ། པྲོཾ་པྲོཾ་ཤར་ཤར་ཧྲིལ་ཧྲིལ་ཐུཾ་བྱེ། ནཱ་ག་ཛ་ཡཾ་སྙིང་གཟེར་ཙིཏྟ་
ཧུར་ཡ་ནན། པྲོཾ་པྲོཾ་ཤར་ཤར་ཧྲིལ་བྷྱོ། དེ་བ་རཾ་པྲོཾ་ཤར་ནཱ་ག་བཾ་རཾ། ཐུམ་ཧྲིལ་ཤར་བྷྱོ། སརྦ་ཤ་ཏྲུཾ་སྟམ་བྷ་ཡ་ནན། འདྲིད་རྦད། སརྦ་ཨུ་ནན་ཡང་བཟློག་ཧུར་ཡཾ། ཁ་འདྲིད་ཕྱུང་རྦད། ས་ནཱ་ག་སྙིང་གཟེར་སྦུར་ནན། ཐུཾ་རིལ་ཤག་རྦད། སརྦ་རཾ་ཐུན་སྲོག་ལ་མྱོག །ཐུན་རྦད། བཾ་རཾ་ཛྭ་ལ་རཾ། ལས་རྣམས་རྩ་བ་བཅས་པ་ཡི། །སྤྲུལ་པའི་སྦྱོར་བ་རྩ་བར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། མགོ་དགུ་པའི་ལེའུ་སྟེ་བཅུ་གཅིག་པའོ།། །། དེ་ནས་ཡང་བཅོམ་ལྡན་འདས་ཀྱིས་དྲག་པོ་མངོན་དུ་ཕྱུང་བ་ལས་ཀུན་གྱི་བྱ་བ་སྦྱིན་སྲེག་གི་སྦྱོར་བ་འདི་གསུངས་སོ། །དང་པོ་ཡིད་མཐུན་བདེ་བ་ཡི། །གནས་དང་ཡོ་བྱད་རྫོགས་པར་བཤམ། །མཎྜལ་ས་དཀར་སྤོས་དང་ལྡན། །དབུས་སུ་མེ་ཐབ་ཟླུམ་པོར་བརྩིག །ཁྲུ་གང་ཁ་ཁྱེར་མཛུབ་གང་བ། །སོར་བཞི་ཞིང་དུ་རྣམ་པར་བརྟག །ནང་དུ་ཆག་གང་ཐུར་དུ་བརྐོ། །དཀར་བའི་ནང་དུ་འདབ་མ་བརྒྱད། །གེ་སར་དུང་གི་དབྱིབས་ཅན་དེ། །ཐ་མ་འཁོར་ཡུག་དཀར་པོར་བྱ། །ཧོམ་ཤིང་ལྕང་མ་གླང་མ་དང་། །ཕང་མ་དག་ལ་ཁྲུ་གང་བྱ། །དེ་ཉིད་ཡམ་ཤིང་སོར་བརྒྱད་ལ། །དབྱིབས་དང་ཁ་དོག་དཀར་ལ་ཟླུམ། །འབྲས་དང་ནས་ཆན་རྩི་མར་དང་། །མེ་ཏོག་སྣ་ཚོགས་གུ་གུལ་དཀར། །འོ་མ་དང་བཅས་མཆོད་པར་དབུལ། །ཚོགས་བསག་སྲིའུ་གསོ་ལ་སྦྱར། །ལྷ་བསྐུལ་སྔགས་བཅས་མཆོད་པར་བསྲེག །ཞི་བར་གྱུར་ཅེས་བརྗོད་ལ་སྔགས། །ཐལ་འཇིམ་ཉ་ཕྱིས་རས་ཁང་ནང་། །གཏུམས་ལ་ཞི་བའི་ས་རུ་སྦ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཞི་བའི་སྔགས་འདི་བཏོན་ནོ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཧུར་ཁཾ་བཾ་རིལ་ཆེ་གེ་མོ་ཤཱནྟིཾ། ཨཱ་ཡུརྫྙཱ་ན་སརྦ་ཏེ། དགྲ་དང་གནོད་བྱེད་ལོག་འདྲེན་དང་། །ཕས་ཕམ་དང་ནི་ཞི་བར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ཐམས་ཅད་ཞི་བའི་ལེའུ་སྟེ་བཅུ་གཉིས་པའོ།། །།དེ་ནས་ཡང་བཅོམ་ལྡན་འདས་ཀྱིས་ཐམས་ཅད་རྒྱས་པའི་སྦྱིན་སྲེག་གི་སྦྱོར་བ་འདི་གསུངས་སོ། །དུར་ཁྲོད་ལྗོན་ཤིང་ནགས་ཚལ་དུ། །རིན་པོ་ཆེ་ཡི་མཎྜལ་ལ། །མེ་ཐབ་གྲུ་
བཞི་ཁྲུ་གང་སེར། །ཁ་ཁྱེར་མཐོ་གང་ཆག་གང་ཐུར། །སོར་གཉིས་ཞེང་ལྡན་འཁོར་ལོས་མཛེས། །ནང་དུ་གསེར་དང་ལྡོང་རོས་བསྐུ། །ས་ལ་འཁོར་ལོ་སེར་རྩིབས་བཅུ། །ལྷོ་ཤིང་སེར་པོ་དྲི་ཆེན་དྲི། །གསེར་གྱི་གའུ་ཀཱ་པ་ལ། །རྒྱས་པར་འདོད་པའི་མིང་བཅས་གཞག །བུ་རམ་སྦྲང་རྩི་བདུད་རྩིའི་བཅུད། །ཚིལ་སྣ་ཤིང་ཏོག་མེ་ཏོག་དྲི། །རྩི་མར་ཞོ་དང་བཅས་པ་དབུལ། །བདུན་ནམ་ལྔ་རུ་སུམ་ཡར་བསྲེག །སྐུལ་ཚིག་དང་བཅས་སྔགས་ཆུ་སྦྱར། །གའུ་ཁ་སྦྱར་ཚས་ཀྱིས་གྲིལ། །རིགས་རྒྱུད་ནོར་ལྡན་གོས་ཀྱིས་གཏུམས། །གསེར་ལ་སོགས་པས་སེར་པོར་བསྐུ། །སྐྱེད་མོས་ཚལ་དང་ལུ་མར་སྦ། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་སྔགས་འདི་བཏོན་ཏོ། །སརྦ་ཆེ་གེ་ཨུ་པ་ཏ་ཡ། བུར་བུ་བ་སིདྡྷི་ཧོ། ཐམས་ཅད་མ་ལུས་རྒྱས་པ་ཡི། །སྦྱོར་བ་དམ་པ་འདི་བཟུང་བྱ། །དཔལ་ཚེ་བདག་གི་དགོངས་རྒྱུད་ནག་པོ་ལས། ཐམས་ཅད་རྒྱས་པའི་ལེའུ་སྟེ་བཅུ་གསུམ་པའོ།། །།དེ་ནས་ཡང་བཅོམ་ལྡན་འདས་ཀྱིས་དབང་དུ་བྱ་བའི་སྦྱོར་བ་འདི་གསུངས་སོ། །དུར་ཁྲོད་དབང་བསྒྱུར་ཟིལ་གནོན་དུ། །མཎྜལ་ཁྲུ་གང་རྒྱར་ཁྲུ་གསུམ། །ཁྲག་གིས་བྱུག་ལ་མེ་ཐབ་བཅའ། །དབུས་སུ་ཟླ་གམ་དམར་པོ་ལ། །ཙནྡན་ཁྲག་དང་རྒྱ་སྐྱེགས་བསྐུ། །ནང་དུ་ལྕགས་ཀྱུ་དམར་པོར་བྱ། །ཛཿདང་ཧྲཱྀཿཡིས་གང་བར་བྱ། །ཁ་ཁྱེར་ཨཱ་ཀཪྴ་ཡིས་བསྐོར། །ཐ་མར་ཞགས་བསྡོག་ལྕགས་ཀྱུ་འཁྱིལ། །དབང་དྲག་ཡི་གེ་ཧྲཱྀཿཤམ་བྲི། །འོམ་བུ་སྨྱག་ཤད་རྒྱ་ཚིལ་ཤིང་། །མངལ་ཁྲག་རྒྱ་སྐྱེགས་ཙནྡན་ཆུ། །ཧོམ་ཁུང་གྲུ་གང་ཡམ་ཤིང་བསྐུ། །ཆགས་པའི་བརྡའ་ཡིས་ཡམ་ཤིང་གདབ། །སྔགས་ཀྱང་བར་མ་ཆད་པར་བཟླས། །འཁོར་ལོ་ཙནྡན་རྒྱ་སྐྱེགས་བྲི། །མུ་ཁྱུད་རིམ་པ་གསུམ་དུ་བསྐོར། །ནང་དང་ཟླ་གམ་གང་འདོད་མིང་། །མུ་ཁྱུད་གཉིས་པར་རྩ་བའི་སྔགས། །ཐ་མར་ལྕགས་ཀྱུ་ཞགས་བསྡོག་བཅུ། །དབང་དུ་བྱ་བའི་སྤུ་གྲིས་གང་། །ཁ་སྦྱར་བར་སྣང་དགུང་ལ་བཅའ། །ཕོ་ཉ་བསྐུལ་ལ་དབང་དུ་བྱ། །ཞག་བདུན་བར་དུ་ལས་རྨིགས་བརྟགས། །མཐའ་རུ་སྲིན་མོའི་སྒྲོམ་ལ་གཏད། །སྦྱོར་བ་ཀུན་ལྡན་
བེ་བག་ཏ། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཆེ་གེ་སརྦ་ཨཱ་ཀཪྴ་ཡ་ཧྲི་ཤ་ཡ་དྲེང་དྲེང་དུན་དུན་ཛ། གདུག་པ་ཀུན་གྱི་མཆོག་ཏུ་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ཐམས་ཅད་དབང་དུ་བྱ་བའི་ལེའུ་སྟེ་བཅུ་བཞི་པའོ།། །།དེ་ནས་ཡང་བཅོམ་ལྡན་འདས་ཀྱིས་དྲག་པོའི་སྦྱོར་བ་འདི་གསུངས་སོ། །དུར་ཁྲོད་གཉན་རི་གདུག་པ་རུ། །ཕུང་ས་གསུམ་ལ་མཎྜལ་བྱ། །ཁྲག་དང་དུག་གིས་ཆག་ཆག་གདབ། །དབུས་སུ་མེ་ཐབ་གྲུ་གསུམ་ལ། །ཁ་ཁྱེར་གསུམ་དང་ལྡན་པར་བྱ། །མཐོ་གང་མཛུབ་གང་ཆག་གང་དུ། །ནང་ལ་སོགས་པར་རིམ་བཞིན་བྱ། །ནང་དུ་རྒྱ་སོལ་ཁ་ཁྱེར་དམར། །རྩང་དང་ཐོད་པ་མེ་རི་བྱ། །རྒྱུ་རྟེན་ལིངྒ་དབུས་དང་ལྔ། །ཧོམ་ཤིང་ཁྲུ་གང་དྲག་པོ་གཟུག །ཟླ་གམ་གནོད་པའི་གཟུགས་མིང་བཞག །ཐོད་པའི་ལིངྒ་འོག་ཏུ་མནན། །ཐ་མ་རྒྱ་གྲམ་ཕུར་པ་ཁྲག །བཅུ་གཉིས་རྩིབས་ལ་མེ་རི་ལྡན། །ཤ་སྣ་ཁྲག་སྣ་དེ་བཞིན་ཚིལ། །དུག་སྣ་སྔོ་སྣ་འོ་མ་ཆང་། །ཁྲག་དང་མར་ཁུ་རྫས་ཀྱིས་བསྐོར། །ཐུན་རྫས་བདུག་རྫས་རྒྱ་གྲམ་ལ། །བར་སྣང་གཅོད་པའི་འཁོར་ལོ་བཅའ། །དུར་ཁྲོད་རས་དང་རོ་ཡི་རྫས། །ཤོག་བུ་དག་ལ་བཞི་རུ་བསྐོར། །དབུས་སུ་གྲུ་གསུམ་ཟླ་གམ་གསུམ། །མིང་རུས་ཁམས་དང་བསྲུང་བ་བྲི། །ཕྱི་རིམ་ལྕགས་མཁར་བཅུ་གཉིས་ལ། །རྩ་བའི་དྲག་སྔགས་ཀུན་གྱི་ལུས། །ཡང་ལོགས་རྩིབས་ཆེན་བཅུ་གཉིས་ལ། །གཅོད་ཅིང་སྲེག་པའི་སྤུ་གྲིས་མཛེས། །མཐའ་མ་སྦྲུལ་གྱི་ར་བས་བསྐོར། །མུན་ནམ་ཁྱམས་ལ་གནོད་པའི་གདོན། །བྲིས་ལ་རུས་སྦལ་ལྟོ་བར་བཅའ། །བར་སྣང་མེ་ཐབ་སྟེང་དུ་བཅའ། །ཐོད་པ་ཁ་སྦྱོར་སྟེང་མ་ལ། །ནང་དུ་རྒྱ་གྲམ་སྦྲུལ་གྱིས་བསྐོར། །ཐོད་པ་སྙིང་གའི་བཅུ་བསྡུ་བྲི། །རང་ལ་མནན་སྔགས་ཆང་བཅས་དགོད། །འོག་མ་མོ་ཡི་ཐོད་པ་ལ། །གྲུ་གསུམ་སྦྲུལ་དང་མེ་རི་བྲི། །གཟུགས་དང་སྙིང་པོ་མིང་རུས་བྲི། །བྲིས་ལ་ལིངྒ་བར་དུ་གཞུག །ཞག་བདུན་གསལ་གསུམ་དྲག་སྔགས་བཟླས། །ཉིན་མཚན་གུང་
ལ་བསྐུལ་ཞིང་བསྟབ། །རྫས་དང་ལིངྒ་མིང་བྱང་བསྲེག །དྲག་སྔགས་བཅུ་བསྡུས་རྫས་རེ་དབུལ། །བདག་དང་བུམ་པ་མེ་ཐབ་ལ། །ལྷ་ཡི་ང་རྒྱལ་ཟིལ་གནོན་དུ། །སྔགས་དང་བཅས་པས་གསལ་བར་བརྟག །གཤིན་རྗེའི་གཤེད་དང་ཡང་འཁོར་ཀུན། །མེ་ཐབ་ཕྲིན་ལས་བཞི་ཀ་ལ། །གསལ་བར་བྱས་ལ་ལས་ལ་མངག །མཐའ་རུ་གདུག་པའི་ཀླུ་ལ་གཏད། །ཐལ་བ་མནན་པའི་ཕྱོགས་དག་ཏུ། །ཟོར་དུ་འཕང་བ་ཐུན་བྲབ་ལའོ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ནོ། །དགྲ་བོའི་སྲོག་ལ་ཧུར་ཤ་ཡག །མཱ་ར་ཡ་རཾ། ཁཾ་རཾ་ཛ་རཾ། ཞེས་ཁ་བསྐང་བའོ། །ཉེ་བར་གྱུར་པའི་སྦྱོར་བ་འདི། །འཁོར་ལོ་ཧོམ་སྦྲེལ་དྲག་པོར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། དྲག་པོ་ཧོམ་གྱི་ལེའུ་སྟེ་བཅོ་ལྔ་པའོ།། །།དེ་ནས་ཡང་བཅོམ་ལྡན་འདས་ཀྱིས་ལྷུན་གྱིས་གྲུབ་པའི་སྦྱིན་བསྲེག་གི་སྦྱོར་བ་འདི་གསུངས་སོ། །དང་པོ་ཡིད་མཐུན་བདེ་བ་ཡི། །དུར་ཁྲོད་བདེ་བའི་གནས་དག་ཏུ། །རང་སེམས་དབེན་པའི་མཚམས་བཅད་ལ། །རྟེན་གཞི་ས་དང་ཉམས་དགའ་ཡིས། །བཤམས་ལ་མཎྜལ་ཁྲུ་གང་བརྩིག །རྒྱ་རུ་དཔག་ཚད་འབྱོར་ཚད་ལ། །རིན་ཆེན་བདུད་རྩི་དུག་ཁྲག་བྱུག །མཎྜལ་དབུས་ཀྱི་གཞི་ཉིད་ལ། །རྒྱས་པའི་ཐབ་ཁུང་གྲུ་བཞི་པ། །དཔངས་སུ་ཁྲུ་གང་ལེགས་པར་བྱ། །སྟེང་དུ་མཐོ་གང་དཔངས་ཚད་ཅན། །ཞི་བའི་ཐབས་ཁུང་ཟླུམ་པོར་བརྩེག །དེ་སྟེང་དབང་གི་ཟླ་གམ་ཡང་། །གོང་མའི་ཚད་དུ་དཔག་ལ་བརྩེག །ཡང་སྟེང་དྲག་པོའི་ཐབ་ཁུང་སྟེ། །མཐོ་གང་གྲུ་གསུམ་ཁ་ཁྱེར་གསུམ། །རྒྱ་སོལ་རོ་སོལ་ནག་པོ་ལ། །རྩང་དང་ཐོད་ཕྲེང་མེ་རི་འབར། །ཟླ་གམ་རྒྱ་སྐྱེགས་མངལ་ཁྲག་གིས། །ཞི་བ་རས་དཀར་ཅོང་ཟི་བྱུག །རྒྱས་པ་གསེར་དང་ལྡོང་རོས་ཀྱིས། །ཁ་དོག་སོ་སོ་རིས་སུ་དབྱེ། །ཐོད་པ་འཁོར་ལོ་ལིངྒ་མིང་། །མཐིང་ནག་དར་བཅས་དབུས་སུ་གཞུག །སྟེང་དུ་རྡོ་རྗེ་རྒྱ་གྲམ་གདབ། །དེ་སྟེང་ལིངྒ་རྒྱ་གྲམ་དབུས། །རཾ་ལཾ་ཡཾ་བཞི་ཡཾ་དབུས་ལྡན། །སེང་ལྡེང་ཚེར་ནག་ཕུར་བུ་མདའ། །དམེ་ལག་
གདུག་པའི་ཧོམ་ཤིང་གཟུག །དབང་ལ་ལྕགས་ཀྱུ་ཛཿདང་ཡཾ། །བྲིས་ལ་ཐམས་ཅད་དབང་དུ་འགྱུར། །ཞི་བའི་དལ་ལ་ཨ་དང་ལྡན། །རྒྱས་པ་སེར་པོ་གང་འདོད་མིང་། །ཁ་ཁྱེར་འཁོར་ལོ་སེར་པོ་བྲི། །ཧོམ་ཤིང་ཁ་དོག་གང་བཞིན་སྦྱར། །བསྲེག་རྫས་དྲིལ་ལ་སོ་སོར་དབྱེ། །འབྲས་དང་འོ་མ་མེ་ཏོག་ཅན། །ཞི་བའི་ཐབ་ཁུང་ལྷ་ལ་དབུལ། །གདུག་པ་གསུམ་པོ་སྦྱོར་བར་བརྟག །མངལ་ཁྲག་སྐྱེར་དཀར་སྟག་ཤ་ཆེན། །དབང་གི་ལྷ་ལ་དེ་བཞིན་དབུལ། །མངར་དང་སྦྲང་རྩི་བདུད་རྩི་ཡིས། །མེ་ཏོག་འབྲས་བུ་རྩི་མར་མཚན། །མི་ཤ་རྟ་ཤ་ཕག་ཤ་སྦྲུལ། །དྲག་པོས་བསད་པའི་སྐབས་སུ་དབུལ། །ཁྱི་ཕག་བྱ་ཤ་ཚིལ་དང་ཁྲག །གདུག་པ་གསུམ་པའི་སྦྱོར་བར་བརྟག །ཤ་སྣ་ཁྲག་སྣ་འོ་མ་དུག །སྦྱོར་བ་དྲག་པོ་བྱད་བཟློག་པའོ། །ཚིལ་དང་གླང་རུ་ཡུགས་མོའི་ཁྲག །ཐེ་བྲང་ལ་སོགས་བྱད་དགྲོལ་བའོ། །ཏིལ་དང་ཡུངས་ནག་རྒྱ་ཚིལ་བྲུན། །གཞན་གྱི་བསྲུང་མ་བཟློག་ཅིང་གཟིར། །དུག་གི་རི་ལུ་མིང་རུས་བཅས། །བརྒྱ་དང་འོ་མ་སྔོ་སྣ་ཆང་། །ཁྲག་དང་མར་ཁུ་ཀུན་ལ་སྦྱར། །དྲག་པོའི་བྲུབ་ཁུང་དག་ཏུའོ། །རང་ཡང་ཟིལ་གནོན་གསལ་བར་བྱ། །ཐབ་ཁུང་བཞི་ལ་ཟིལ་གནོན་གསལ། །གཤིན་རྗེ་མ་མོ་བདུད་ཀྱིས་བསྐོར། །ཤ་ཁྲག་དྲག་པོའི་རྫས་ལ་རོལ། །བསྐུལ་དང་ཐུན་བྲབ་ལིངྒ་བསྟབ། །དེ་བཞིན་ལྷ་ལ་མཆོད་ཅིང་བསྟོད། །གང་བརྩམས་ཐོགས་མེད་འགྲུབ་པར་བཤད། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་ལྷུན་གྱིས་གྲུབ་པའི་སྔགས་འདི་བཏོན་ཏོ། །དགྲ་བོའི་སྲོག་ལ་དུན་རྨུགས་ཤན་ཛ། བུར་བུ་བ་སི་ཏི། ཤཱན་ཏི་ཨཱ་ཡུརྫྙཱ་ན་མཱ་ར་ཡ་རྦད། སརྦ་ཨེ་རཾ་ཁ་རཾ་ཛྭ་ལ་རཾ། དེ་ཡིས་ཉེ་བར་འཇོམས་པ་ཡིན། །དེ་བཞིན་བར་སྣང་འཁོར་ལོ་ཡང་། །ཐིག་སྐོར་རིམ་པ་བཞི་རུ་བསྐོར། །དབུས་སུ་གྲུ་གསུམ་ཟླ་གམ་གསུམ། །ཕྱི་ནང་ཡང་ལོགས་མཐའ་མ་གསུམ། །འཕྲུལ་མིག་རྩིབས་ཆེན་བཅུ་གཉིས་ལྡན། །དབུས་སུ་བརྣག་པའི་མིང་རུས་གཟུགས། །ཟླ་གམ་བླ་དང་རུས་ཁམས་བལྟ། །
འཕྲུལ་མིག་དེ་བཞིན་རྩ་བའི་སྔགས། །རྩིབས་ཆེན་གཉིས་ལ་དགོད་པ་ནི། །ལྷུན་གྱིས་གྲུབ་པའི་སྤུ་གྲི་བྲི། །བཀོད་ལ་ཁ་སྦྱར་བར་སྣང་བཅའ། །ཞག་བདུན་གསུམ་དུ་དྲག་སྔགས་བཟླས། །བཞི་རུ་ལས་ཀྱི་སྦྱིན་བསྲེག་བསྲེ། །ཞི་བ་དབང་དྲག་རྒྱས་པ་མཐར། །རྫས་དང་སྦྱོར་བ་ཕྱེ་ལ་བྱ། །ལྷ་དང་དྲག་སྔགས་ཧྲིལ་བསྡེབ་པའོ། །དེ་དག་ཐོན་ནས་ཐོད་པ་གདོན། །འཁོར་ལོ་དང་བཅས་ཞབས་འོག་གཞུག །ཡ་མ་མཆོག་ཕུར་སྙིང་གཟེར་ཁྲི། །ཐོད་པ་ལ་སོགས་རྗེས་དྲིལ་བས། །ཀླུ་གཟེར་གདུག་པའི་ཀླུ་ལ་གཏད། །ས་སྲོས་བཅུ་དྲུག་ཚེས་གཅིག་ལ། །ཕུར་པ་བཏབ་ལ་ལྟོ་བཤལ་བཀོལ། །ཐོད་པ་སྟེང་དུ་དྲག་པོར་བསྲེག །དབང་ཆེན་ཕོ་བྲང་རྒྱ་གྲམ་མནན། །ཁ་གསོ་ལས་མཐར་ཐལ་བ་དག །རང་རང་ཁུང་བུ་དང་བཅས་སྦ། །མཐའ་རུ་ཐུན་བསྐུལ་ཟོར་གྱིས་བསྐྱོད། །སྦྱོར་བ་ལྷུན་གྱིས་གྲུབ་པར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ལྷུན་གྱིས་གྲུབ་པའི་སྦྱིན་སྲེག་གི་ལེའུ་སྟེ་བཅུ་དྲུག་པའོ།། །།དེ་ནས་ཡང་བཅོམ་ལྡན་འདས་ཀྱིས་སྲོག་དམར་ལེན་གྱི་སྦྱོར་བ་འདི་གསུངས་སོ། །དང་པོར་དབེན་པའི་བདེ་གནས་སུ། །བགྲོད་པ་གསུམ་གྱིས་དབང་ཐོབ་པས། །གདེང་གསུམ་ཆེ་བ་གསུམ་བཅས་ལ། །སྔགས་ཀྱི་དམོད་པ་གསུམ་དུ་དབྱེ། །བསད་དང་སྲུང་བ་མཐའ་རུ་བཞག །ཀུན་གྱི་མཐའ་རུ་མནན་དང་ཟོར། །རྩོལ་མེད་རང་ཤུགས་ལྷག་པར་སྦྱར། །དེ་དག་གང་བརྩམས་འབྲས་བུར་བཅས། །ལྷུན་གཉིས་དོན་གཉིས་རང་གསལ་བའོ། །དེ་ཡི་རིམ་པ་འདི་ལྟ་སྟེ། །དུར་ཁྲོད་རས་ལ་ལྔ་རུ་བསྐོར། །དབུས་སུ་གྲུ་གསུམ་ཟླ་གམ་གསུམ། །ཕྱི་རིམ་རྡོ་རྗེ་རྒྱ་གྲམ་ལྡན། །ཡང་ལོགས་མུ་ཁྱུད་ཟླུམ་པོར་ལྡན། །མཐའ་མ་འཁོར་ལོ་རྩིབས་བཅུ་གཉིས། །རུས་སྦལ་ཕག་མོ་ལིངྒའི་གཟུགས། །དེ་བཞིན་རུས་སྦལ་རྩིབས་བཅུ་གཉིས། །མཚོན་ཆ་ནང་བསྟན་སྤུ་གྲིས་དགང་། །མཚོན་ཆ་བསྣོལ་ལ་ཐབས་ཀྱིས་དབུལ། །དེ་ལ་དགོད་པ་འདི་ལྟ་སྟེ། །དབུས་སུ་བརྣག་པའི་གཟུགས་མིང་རུས། །ཟླ་གམ་ལོ་ཁམས་སྲུང་བའི་ལྷ། །རྒྱ་གྲམ་རྩ་བའི་དྲག་སྔགས་ལུས། །རྒྱ་གྲམ་རྩེ་
མོར་སྙིང་པོར་བརྣག །རྭ་མཚམས་དེ་བཞིན་མིང་དང་རུས། །རྩིབས་དང་དམར་ལེན་སྤུ་གྲིས་སོ། །མུ་ཁྱུད་གང་གྲུབ་བསད་པའི་སྔགས། །ལྟོ་སྦྱོར་དྲག་པོ་ཉེ་བའི་གདོན། །རྣོ་དབལ་མཚོན་ཆས་འབིགས་ཤིང་གཅོད། །འཁོར་ལོ་མཚོན་ཆ་མེ་དབལ་སྔགས། །གཅོད་ཅིང་འབིགས་པར་རང་བཅས་ཡིན། །སྲེག་ཅིང་སྐྱེལ་བ་ཤུགས་ཀྱི་མཆོག །གཟིར་ཞིང་གནོན་པ་ཐོག་སེར་ས། །སྐྱོམ་ཞིང་གཡེང་བ་ཆུ་རླུང་འཁྲུག །དེ་དག་ལས་ཀྱི་རིམ་པ་ཡང་། །དུག་ཁྲག་ཚ་བ་ངར་བླུད་ལ། །ཁ་སྦྱོར་ཐོད་པ་དུ་མར་བཅའ། །ལིངྒ་དང་བཅས་དོང་དུ་བརྣག །མཐིང་ནག་ཁ་བཅད་ཞག་གསུམ་བསྐུལ། །ཡུལ་ལ་རྦད་ཅིང་དམོད་པ་གདབ། །གསལ་གསུམ་བརྣག་པ་རྟེན་ལས་འཕོ། །དེ་ཡི་ལུས་སྲོག་ཕྱེད་པར་ངེས། །ཐོན་ནས་ཐོད་པ་གཟིར་ལ་གདབ། །བཅས་དང་གཟིར་མཐའ་ཐོད་མཁར་བཅའ། །དགོངས་པ་ཀུན་ལ་ཁ་གསོ་བྱ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དམར་ལེན་སྔགས་ཀྱི་རྒྱལ་པོ་འདི་བཏོན་ནོ། །ཨེ་མྱགས་ཡ་རྔུབས་མུག་ཤག་ཀ་དུན། དགྲ་བོའི་སྲོག་ལ་ཧུར་ཐུམ་ཛ། ཙིཏྟ་དྲེང་ཤག་རྦད་ཙ་ཤག་ཐུམས་རིལ་ཤག་རྦད། དགྲ་བོ་ཙིཏྟ་དྲེང་ཤག་ཛ། སྲོག་ལ་ཧུར་ཐུམས་རྦད། དགྲ་བོའི་སྲོག་སྟྭམ་བྷ་ཡ་ནན། དགྲ་བོའི་སྲོག་ལ་ཧུར་ཐུཾ་རི་ལི་ལི་བྷྱོ། དེ་དག་བསད་པའི་སྦྱོར་བ་བཤད། །དེ་ནས་ཡང་བཅོམ་ལྡན་འདས་ཀྱིས་གདུག་པ་གསུམ་སོགས་བསྲུང་བའི་སྦྱོར་བ་འདི་གསུངས་སོ། །དེ་ཡི་སྦྱོར་བ་འདི་ལྟ་སྟེ། །དུར་ཁྲོད་རྒྱུ་ལ་འཁོར་ལོ་བཅའ། །ཕག་མོའི་ལྟོ་བར་མུ་ཁྱུད་བཞི། །བསྐོར་ལ་དབུས་སུ་གྲུ་གསུམ་དང་། །དེ་བཞིན་ཟླ་གམ་ལྡན་པར་བྱ། །ཕྱི་རིམ་རྡོ་རྗེ་རྒྱ་གྲམ་ལྡན། །ཡང་ལོགས་མཚོན་ཆའི་རྩིབས་བཅུ་གཉིས། །དེ་བཞིན་མཐའ་མའི་རྩིབས་བཅུ་དྲུག །མཚོན་ཆའི་རྒྱལ་པོ་གཉིས་བཅས་ལ། །དྲག་པོ་འཇོམས་པའི་སྔགས་རྣམས་དགོད། །དབུས་སུ་དལ་དང་གདུག་པའི་མིང་། །ཟླ་གམ་དེ་བཞིན་གདུག་པའི་མིང་། །རྒྱ་གྲམ་རྭ་བརྒྱད་རྩ་བའི་སྔགས། །ཕྱི་རིམ་བསྲུང་བ་ཐམས་ཅད་པ། །ཡང་ལོགས་བཅུ་བཞི་གདུག་པ་གཟིར། །མཚོན་
ཆ་མུ་རན་གནོད་པའི་གདོན། །བཀོད་ལ་ཁ་སྦྱོར་ཐོད་པར་དོར། །གསལ་གསུམ་སྔགས་བཟླས་ཞག་གསུམ་གཟིར། །མཐའ་རུ་བཀའ་རྟེན་འོག་ཏུ་མནན། །འཕོ་བ་ཆེན་པོ་ལས་སུ་གསུངས། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་སྔགས་ཀྱི་རྒྱལ་པོ་འདི་བཏོན་ཏོ། །སརྦ་ཙིཏྟ་ཡཾ་ཤག་རྦད། ཧུར་ཁཾ་འདྲིད་ནན་སྙིང་གཟེར་རྦད། ས་ནཱ་ག་སྙིང་གཟེར་རྦུར་ནན། ཧ་ལ་ཡཾ་ཐུན་གཟིར་ཧུར་ཐུཾ་ཛ་ཤག་རྦད། ཤྲི་བཛྲ་ཀྲོ་དྷ། ཨོཾ་ཡ་མ་ཡ། མ་མ་རུ་ལུ་རུ་ལུ་མ། བཛྲ་དུན་ཏིཾ་ཀཱི་ལ་ཡ་ཏ། རུ་ཏྲ་དྷ། ད་རུ་མེ། མ། མུན་མུན་པ། རཱ་ཛ་ཛ་དེ་བ་ཨ། རཀྴ་ར། རག་མོ་མཾ། ཏིར་ཏི་ཀ་དུ། རུ་ཏྲ་ནྲྀ། ཡཀྴ་ཀྵ། ཡ་ཀྵ། ཤུ་ལ་ཙ། བཛྲ་སཱ་དྷུ་ཏྲི། རུ་ཏྲི་ཏུ། ས་ནཱ་ག་ཕུ། དེ་དག་སྦྱར་བ་རྒྱས་པ་ཡང་། །ལུས་དང་སྤུ་གྲི་སྲོག་དང་སྙིང་། །སྦྱོར་བ་བཞི་རུ་བསྡེབ་པས་གཅོད། །ལུས་དང་སྤུ་གྲིའི་མཚམས་དེ་རུ། །སྙིང་པོ་བརྡ་ཡིས་གཟིར་བྱ་སྦྱོར། །དེ་ཡི་ལས་དང་སྦྱོར་བ་གཟིར། །དབང་པོ་སྟོབས་དང་ནུས་པ་དབྲལ། །སྤུ་གྲི་བཅུ་གཅིག་གཟིར་དང་བཅའ། །མཚམས་སུ་སྲོག་གི་ཡི་གེ་རེ། །སྙིང་གི་དཀྱིལ་ནས་འཕྲོག་པར་བྱེད། །ཟེ་ལ་ཁབ་འདུས་དཔེ་ཚུལ་བཞིན། །བཏོན་ནས་ཁྱམས་ཁང་ཨེ་ལ་ཐིམ། །རང་དབང་མེད་པར་སྲོག་དབྲོག་པའི། །དམ་པ་མཆོག་ཏུ་འདི་གསུངས་སོ། །གཞན་ཡང་གདུག་པའི་ནད་ཟུག་ན། །རྫས་བཅས་པ་ཡི་རིམ་པ་གསུངས། །ལྕི་ཞིང་འཐིབས་ན་རྒྱལ་རིགས་དུག །དྲོ་ཞིང་ཚ་ན་རྗེ་རིགས་དུག །གྲང་ཞིང་བསིལ་ན་བྲམ་ཟེའི་དུག །ཡང་ཞིང་གཡོ་ན་དམངས་ཀྱི་དུག །གླུ་གར་མཚན་མོ་ན་བ་དང་། །ཡན་ལག་ཞ་གྲུམ་གཞོགས་སྐམ་དང་། །ལྕི་ཞིང་ཁྲག་སྐྱེ་ཀླུས་ཟིན་པའི། །ནད་ཀྱི་རྟགས་སུ་དེ་གཟུང་བྱ། །ཚ་ཞིང་བརྩེ་ན་ཡང་རྟགས་ཡིན། །སྤྱང་དུག་ཚེར་མ་གླང་ཆུ་བསྐུ། །ཚ་ཞིང་འབྲུམ་བུ་འོང་བ་ལ། །སྤོས་དང་བཙོད་ཁུ་ཚྭ་སྣ་བསྐུ། །བེམས་དང་བས་ལྡག་ཀོར་ཙེ་ལ། །ར་དུག་ལོང་རྟོལ་གུ་གུལ་བསྐུ། །རྨ་དང་སེར་ག་འབྱུང་བ་ལ། །ཀ་ར་བཱི་ར་དྲི་ཆེན་དུག །ག་པུར་ཙནྡན་སྐར་ཆུ་བསྐུ། །མ་ཚོར་ཤ་རོ་ཀོར་ཚེ་ལ། །ཁྲག་ངན་བཏོན་ལ་རྔབས་ཀྱིས་གྲངས། །མུ་ཟི་དྲི་ཆེན་ལྡོང་རོས་བསྐུ། །ན་ཚ་མེད་
པའི་རྨ་ཤུ་ལ། །ཏི་ཙ་མར་དཀར་གླ་བ་བསྐུ། །ཚ་ཞིག་རྐང་ལག་ན་མྱོང་སྦྲིད། །གུ་གུལ་ར་དུག་རྭ་གཞོབ་བསྐུ། །ལུས་ལ་གཟེར་དང་སྐྲངས་པ་ན། །ར་ཚ་རྒྱ་ཚ་ཁ་རུ་ཚ། །ར་དུག་བ་སྤུ་དྲི་ཆུ་བསྐུ། །ཚིག་གཅིག་ཆད་ག་པུར་རྒུན་འབྲུ་གླ་བ་བསྐུ། །ཤུ་བ་བས་ལྡག་ཕག་ཚིལ་བསྐུ། །ཤ་རོ་ལྡོང་རོས་དབྱི་མོ་ཚ། །སྣ་ཚོགས་ཐབས་ཀྱིས་མནན་ལ་བསྐུ། །དུག་སྣ་མུ་ཟི་སྐར་ཆུ་བསྐུ། །བྱུག་དང་བསྐུ་བའི་སྦྱོར་བའོ། །གཞན་ཡང་ཐབས་ཀྱི་རིམ་པ་ནི། །དྲི་ཆེན་དྲི་ཆུ་བྱང་ཆུབ་སེམས། །བརྟག་པ་གསུམ་དང་སྔགས་བཏབ་ལ། །ཟོས་ན་ནད་སོས་དུག་ལས་ཐར། །མདོག་འཇམ་ཚེ་རིང་སྐད་གདངས་སྙན། །སྲུང་བ་ཀུན་གྱི་མཆོག་ཏུ་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། དམར་ལེན་རྩ་བའི་ལེའུ་སྟེ་བཅུ་བདུན་པའོ།། །།དེ་ནས་སྲོག་དམར་ལེན་གྱི་སྦྱོར་བ་ཁྱད་པར་འདི་གསུངས་སོ། །གཟིར་དང་སྲོག་དབྲོག་བསད་པ་ཡི། །མཐའ་རུ་དྲག་པོ་ཧོམ་སྦྲེལ་བརྩམ། །ཤིན་ཏུ་དབེན་ལ་ཉམས་དགའི་སར། །སེམས་ཉིད་དབེན་པའི་མཚམས་བཅད་ལ། །སྣང་སྟོང་གཉིས་མེད་སྒྱུ་མའི་སྐུ། །ཡེ་ནས་ལྷུན་གྲུབ་ཕྱོགས་དང་བྲལ། །ཡེ་ཤེས་རོལ་པའི་ཐབས་བསམ་ཡས། །འདི་དེ་དེ་དང་སྨིན་པའི་ལས། །རིམ་པའི་མཆོག་བསྡུས་འདི་ལྟ་སྟེ། །ས་གསུམ་མཁའ་རྒོངས་ཆུ་ཤུལ་ལ། །མཎྜལ་ཁྲུ་གང་དཔངས་སུ་བརྩིག །དབུས་སུ་ཁྲུ་གང་མེ་ཐབ་སྦྱར། །ཁ་ཁྱེར་གསུམ་ལྡན་དབུས་སུ་བརྐོ། །ཁ་ཁྱེར་མཐོ་གང་མཛུབ་ཆག་གང་། །སོར་གཉིས་ཞེང་ལྡན་རྩང་ཐོད་མེ། །རྒྱ་སོལ་ཁྲག་ཆེན་དག་གིས་བསྒྱུར། །དབུས་སུ་རྒྱ་གྲམ་ལྗང་གུ་ལ། །རྭ་བཞིར་ཡཾ་བཞི་སྙིང་པོ་རླུང་། །སྐྱེ་མེད་བསྐྱོད་པས་ལས་ཀུན་བྱེད། །རྒྱ་གྲམ་ལྟེ་བར་ཨེ་དང་རཾ། །གཡེངས་པའི་སྟོབས་ཀྱིས་སྤོར་ཞིང་སྲེག །ལོགས་ལ་ཇ་གསུམ་ཡ་ཡིས་འཕུལ། །སྲོག་དང་དབང་པོ་བླ་རྟེན་འགུགས། །ཕྱི་རིམ་རྒྱ་གྲམ་ཟླ་གམ་མིང་དང་གཟུགས། །བླ་དང་ཤེས་པ་འཆག་ཅིང་བརྟེན། །དེ་ཡི་ཕྱི་རིམ་རྒྱ་གྲམ་ལ། །རྩ་བའི་སྔགས་བཅས་དུག་ཁྲག་ཆང་། །
འོ་མ་དང་བཅས་མེ་དབལ་འཇོམས། །ཡང་ལོགས་རྩིབས་ཆེན་བཅུ་གཉིས་ལ། །སྲེག་པའི་སྤུ་གྲི་དེ་བཞིན་རྫས། །དུག་གི་རི་ལུ་བརྒྱ་རྩ་བརྒྱད། །མིང་བྱང་བག་ཕྱེ་ཏིལ་མར་བཙོ། །མི་རྟ་ཁྱི་ཤ་མཆོད་པའི་རྫས། །དེ་བཞིན་ཉ་སྦྲུལ་སྦལ་པའི་ཤ །ར་དུག་རེ་ལྕག་བ་སྤྲུ་དགོད། །བྱ་ཕག་ཤ་ཚིལ་འགྱིང་བག་བཅའ། །ཏིལ་དང་ཉུང་ནག་ཚ་བ་གསུམ། །མར་ཁུ་འོ་མ་མྱོས་པའི་ཁྲག །བསྲེག་རྫས་མཆོད་པ་དྲག་པོར་དབུལ། །ཡུངས་ཀར་སྐེ་ཚེ་མནོལ་ཁྲག་ཐུན། །གཟུགས་དང་མིང་བཅས་སྔོན་དུ་བཏབ། །མཐའ་རུ་རྫས་རྒོད་བསྲེག་པ་བདུག །དབུས་ཀྱི་རྒྱལ་ཆེན་ཕོ་བྲང་དུ། །བརྒྱུད་ཆད་པ་དང་གོམ་བདུན་པ། །གཅིན་དང་ཤ་ཤུ་དྲི་མ་སྐྲ། །རྟེན་པ་བསྲེས་ལ་ལིངྒ་བཅའ། །ཐོད་པ་ཟླ་གམ་དབུས་ཉིད་དུ། །མིང་རུས་དང་བཅས་སྔོན་དམར་བསྡམ། །བཞི་བཅས་རེ་རེ་གན་རྐྱལ་མནན། །རྒྱལ་ཆེན་པ་ཡི་སྙིང་ག་རུ། །ཧོམ་ཤིང་ཁྲུ་གང་ཟུར་གསུམ་པ། །གདུག་པའི་ཤིང་ལ་དུག་ཁྲག་བསྐུ། །མིང་བྱང་དང་བཅས་བཙུག་ལ་བརྣག །དབུས་ཀྱི་རྒྱལ་ཆེན་ཕོ་བྲང་དང་། །བུམ་པའི་གཞལ་ཡས་སྔགས་པ་རྣམས། །ཡེ་ཤེས་རང་གསལ་སྟོང་བདག་མེད། །ཆོས་སྐུའི་ངང་ལས་ཕྱག་རྒྱའི་སྐུ། །ཡེ་ཤེས་ལྷུན་གྲུབ་ཟིལ་གནོན་གྱི། །ཡུམ་དང་གསོད་བྱེད་དྲེགས་པ་དང་། །རུས་སྦལ་བྱ་ཁྱུང་ཕག་མོ་སྦྲུལ། །སྟག་དང་སེང་གེ་ཁྲོ་ཆུང་བཅས། །དབུ་ལ་ཁྲག་འཐུང་ཧེ་རུ་ཀ །དུར་ཁྲོད་ཆས་དགུ་རྒྱན་དང་ལྡན། །དྲུག་བཞི་དྲུག་སྟོང་འཁོར་དང་བཅས། །གསལ་བར་བརྟག་ལ་དྲག་སྔགས་བཟླས། །ནམ་མཁའི་འཁོར་ལོར་ས་ལ་བྲི། །སྔགས་དང་རུས་ཁམས་མིང་བཏབ་ལ། །སྦྱོར་བ་དང་ལྡན་བར་སྣང་བཅའ། །བླ་རྐུན་རྦད་ཅིང་རྦད་སྔགས་སྦྱིན། །བླ་དང་ཚེ་བཀྲག་ནུས་པ་འགུགས། །ཐུན་བྲབ་གཟེར་སྔགས་རྒྱ་ཡིས་བཏབ། །རྟེན་གྱི་གཟུགས་དག་བསྟབ་པ་བྱ། །བསྐུལ་བ་དང་བཅས་དྲག་སྔགས་ནུས། །རྫས་ཀྱི་མཆོད་པ་མེ་སྦར་བསྲེག །རྐྱེན་གྱི་འདུ་འཕྲོ་སྦྱོར་བ་མིན། །རྩོལ་བྲལ་ཇི་བཞིན་ལྷུན་གྱིས་གྲུབ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་བསྲེག་པ་དྲག་
པོའི་སྦྱོར་བའི་སྔགས་འདི་བཏོན་ནོ། །ཨེ་མྱག་ཡ་རྔུབས་མུག་ཤག་ཀ་དུན། དགྲ་བོའི་སྲོག་ལ་ཧུར་ཐུམས་ཛཿརམ་ཤ་རྦད་ཛྭ་ལ་རཾ། དེ་ནས་བཅོམ་ལྡན་འདས་ཀྱིས་བླ་རྐུན་གྱི་ཕོ་ཉ་ལས་ལ་མངག་པ་འདི་གསུངས་སོ། །བསྐལ་པ་བརྒྱད་ཁྲི་བཞི་སྟོང་འཁོར་བའི་གཞལ་ཡས་ནས། །ལྕགས་མཁར་སྒོ་མེད་བཅུ་དྲུག་འབར་བའི་ནང་ཤེད་ནས། །འོབས་ཆེན་བཅུ་གཉིས་འབར་བའི་དཀྱིལ་འཁོར་ནས། །ཐོད་མཁར་འབར་བ་བཞི་ཡི་དབུས་ཕྱོགས་ནས། །ཕོ་བྲང་ལྕགས་མཁར་སྤུ་གྲིས་གཏམས་པའི་ནང་། །ཀླུ་འབུམ་གཉན་ཁྲི་ས་བདག་སྟོང་གི་གདན། །ལྟོ་འཕྱེ་ཕྱོགས་སྐྱོང་མ་ཧེ་བརྫིས་པའི་ཁྲི། །ཐབས་དང་ཤེས་རབ་ཉི་ཟླའི་གདན་སྟེང་ནས། །སྲོག་བདུད་འཇམ་དཔལ་ཚེ་བདག་ནག་པོ་བཞེངས། །རྔམ་པའི་ཚུལ་གྱིས་བླ་རྐུན་དགྲ་ལ་ཁྱེ། །ཚེ་བདག་ལས་ཀྱི་སྤྲུལ་པ་མངོན་ཕྱུང་བ། །ཤར་གྱི་ཕྱོགས་ནས་བླ་འགུགས་པ། །དུང་གི་མོན་པ་སེང་གེའི་མགོ། །དབུ་དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོ་བལྟ་ཞིང་འཛིན། །སྙིང་དགུས་དགྲ་བོ་ཡིད་ལ་གནོན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོ་བླ་དང་ཕྲོལ་ལ་ཤོག །ཀ་ལ་དུན་ཏིང་ཙིཏྟ་རོ་མྱགས་སྲོག་ལ་ཐུམ་རི་ལི་ལི་བྷྱོ། ལྷོ་ཡི་ཕྱོགས་ནས་བླ་འགུགས་པ། །ལྕགས་ཀྱི་མོན་པ་སྟག་གི་མགོ། །དབུ་དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོ་བལྟ་ཞིང་འཛིན། །སྙིང་དགུས་དགྲ་བོ་ཡིད་ལ་གནོན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོ་བླ་དང་ཕྲོལ་ལ་ཤོག །ཧ་ལ་ཧ་ལ་དུན་ཏིང་ཙིཏྟ་རོ་མྱགས་སྲོག་ལ་ཐུམ་རི་ལི་ལི་བྷྱོ། ནུབ་ཀྱི་ཕྱོགས་ནས་བླ་འགུགས་པ། །བསེ་ཡི་མོན་པ་དྲེད་ཀྱི་མགོ། །དབུ་དགུ་སྤྱན་དགུ་ཞལ་དགུ་གདངས། །
ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོ་བལྟ་ཞིང་འཛིན། །སྙིང་དགུས་དགྲ་བོ་ཡིད་ལ་གནོན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོའི་བླ་དང་ཕྲོལ་ལ་ཤོག །ར་ག་ཧོ་ཏི་དུན་ཏིང་རོ་མྱགས་སྲོག་ལ་ཐུམ་རི་ལི་ལི་བྷྱོ། བྱང་གི་ཕྱོགས་ནས་བླ་འགུགས་པ། །གསེར་གྱི་མོན་པ་ཁྱུང་ཆེན་མགོ། །དབུ་དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོ་བལྟ་ཞིང་འཛིན། །སྙིང་དགུས་དགྲ་བོ་ཡིད་ལ་གནོན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོའི་བླ་དང་ཕྲོལ་ལ་ཤོག །ཀརྨ་བྷ་ཏིང་དུན་ཏིང་རོ་མྱགས་སྲོག་ལ་ཐུམ་རི་ལི་ལི་བྷྱོ། དགུ་བསྐོར་ཐུན་དབབ་བསྟབ་པ་བྱ། །སྲོག་བདུད་ཚེ་བདག་ནག་པོ་ནི། །སྐུ་ཡང་ཆེ་ལ་དྲེགས་ཤིང་རྔམས། །སྐུ་ནི་ནམ་མཁའི་ཁམས་དང་མཉམ། །གསུང་གི་ང་རོ་འབྲུག་ལྟར་སྒྲོགས། །ཐུགས་ནི་སྟོང་གསུམ་ཁྱབ་པར་བལྟ། །ཞལ་ནི་ཧོམ་ཁུང་གདངས་པ་འདྲ། །ལྗགས་ནི་ཧོམ་གཟར་བརྐྱངས་པ་འདྲ། །ཚེམས་ནི་ཧོམ་ཤིང་བཙུགས་པ་འདྲ། །མཆེ་བ་རྩང་ཕུར་གཏམས་པ་འདྲ། །ཁྱོད་ནི་སྲོག་འགུགས་བདག་པོ་ཡིན། །གྲུ་གསུམ་བགྲད་པའི་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། ཡུམ་ཆེན་གསོད་བྱེད་རྒྱལ་མོ་ནི། །མཐིང་ནག་འཇིགས་ཚུལ་རྔམ་སྟབས་འགྱིངས། །ནད་གཏོང་རྒྱལ་མོ་ཞལ་གདངས་ཤིག །དགྲ་བགེགས་བསྟབས་པོ་ཁ་རཾ་ཁཱ་ཧི། གསོད་བྱེད་ཡ་མ་རཱ་ཛ་ནི། །སྨུག་ནག་འཇིགས་པ་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། དྲེགས་པ་ཕྱག་ན་རྡོ་རྗེ་ནི། །སྟོབས་ཆེན་དྲག་པོ་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། རུས་སྦལ་རྒྱལ་པོ་མི་ཟན་ནི། །ཚེ་སྲོག་འཆང་བ་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། བྱ་ཁྱུང་
རྒྱལ་པོ་ག་རུ་ཎ། །ཀླུ་འདུལ་མཁའ་ལྡིང་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། སྒྲོལ་བྱེད་ཚེ་བདག་མགོ་དགུ་པ། །སྤྲུལ་པ་ཆེན་པོ་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། བདུད་མོ་ཁྲག་གི་རལ་པ་ཅན། །ནད་གཏོང་སྲིན་མོ་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། སུམ་ཅུ་རྩ་གསུམ་གནས་ཀྱི་ཡང་སྟེང་ན། །བདུད་པོ་ཡེ་མེད་འཕྲུལ་གྱི་རྒྱལ་པོ་བཞུགས། །འཆི་བདག་རྒྱལ་པོ་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། རྒྱ་མཚོ་ཆེན་པོའི་གཏིང་རུམ་ནས། །གཤིན་རྗེ་བྱེ་བ་དགུ་ཁྲི་བཞུགས། །ལས་ཀྱི་མཐའ་སྡུད་ཞལ་གདངས་ཤིག །སྡང་དགྲ་གནོད་བགེགས་ཁ་རཾ་ཁཱ་ཧི། དེ་ནས་བཅོམ་ལྡན་འདས་ཀྱིས་དྲེགས་པའི་ཚོགས་ལ་བསྟོད་པ། མཆོད་པ་བསྟབ་པ་འདི་གསུངས་སོ། །ཆོས་ཀྱི་དབྱིངས་ཀྱི་ཕོ་བྲང་ན། །དྲག་པོ་ཨེ་ཡི་གཞལ་ཡས་ནས། །ཀླུ་འབུམ་གཉན་ཁྲི་ས་བདག་སྟོང་གི་གདན། །ལྟོ་འཕྱེ་ཕྱོགས་སྐྱོང་མ་ཧེ་བརྫིས་པའི་ཁྲི། །ཐབས་དང་ཤེས་རབ་ཉི་ཟླའི་གདན་སྟེང་ན། །དུག་ལྔ་བརྐམ་ཆགས་འཇོམས་པའི་ལྷ། །སྲོག་བདུད་ཚེ་བདག་ནག་པོ་ནི། །གཏུམ་ཆེན་དུས་མཐའི་བསྐལ་པའི་མེ་ལྟར་འབར། །སྐུ་མདོག་ནག་པོ་དུག་ཆེན་འཁྱིལ་པ་འདྲ། །སྐུ་ཡང་རྔམ་ཆེན་དྲེགས་པའི་སྐུ། །དབུ་གསུམ་ཕྱག་དྲུག་ཞགས་བཞི་བགྲད། །གཡས་དཀར་ཀླུ་བརྒྱད་ཞལ་དུ་གསོལ། །གཡོན་དམར་གཉེན་ཁྲི་ཀླུ་འབུམ་གསོལ། །དབུས་ཞལ་མཐིང་ནག་རྔམས་པ་ཡིས། །སྐུ་དགྲར་གྱུར་པའི་ལས་ངན་དང་། །ས་བདག་ཀླུ་སྲིན་སྡེ་བརྒྱད་ཀྱི། །དབང་པོ་ལྔ་དང་ཙིཏྟ་གསོལ། །ཕྱག་དྲུག་མཚོན་ཆ་འབར་བ་ཡིས། །ཞེ་སྡང་ཀླུ་གཉན་ས་བདག་དང་། །དགྲ་བགེགས་མགོ་ལུས་ཚལ་པར་གཤོག །སྐུ་ལ་དུར་ཁྲོད་རྒྱན་ཆས་དང་། །ཀླུ་ཆེན་བརྒྱད་ཀྱི་མགོ་བཅད་ནས། །དོ་ཤལ་སྙིང་གི་ཕྲེང་བས་བརྒྱན། །དབུ་ལ་བདུད་དང་སྲིན་མོ་དང་། །བཙན་དང་མུ་སྟེགས་རྒྱལ་པོ་ཡི། །མགོ་བོ་ཐོད་པའི་ཕྲེང་བས་བརྒྱན། །རྒྱལ་རིགས་སྙན་གྱི་གྲོང་ཁྱེར་བརྒྱན། །
རྗེའི་རིགས་མགུར་ཆུ་ཚངས་སྐུད་བརྒྱན། །བྲམ་ཟེའི་རིགས་ཀྱིས་ཕྱག་གདུབ་བརྒྱན། །དམངས་རིགས་ཞབས་གདུབ་ལྷུ་ཚིགས་བརྒྱན། །རིགས་ངན་གདོལ་པ་ཞབས་འོག་བཏིང་། །བ་སུ་རིགས་དྲུག་ཟས་སུ་ཟ། །མཆེ་བ་དགུ་ཁྲི་རྩང་ཕུར་གཏམས། །སྤྱན་ནས་དུག་གི་ཚ་ཚ་འཕྲོ། །ཤངས་ནས་རླུང་ནག་འཚུབ་མ་ལྡང་། །དབུ་སྐྲ་སྨ་ར་བ་སྤུ་ལས། །གདུག་རྩུབ་དམར་ནག་མེ་ཆེན་འབར། །དམ་ཉམས་དགྲ་བོ་སྡིག་ཅན་དང་། །གདུག་པའི་ཀླུ་གཉན་ས་བདག་སྲེག །གང་ལ་བྱ་བ་ཁྱོད་ཤེས་ཀྱིས། །དམིགས་པ་གང་ཡིན་མངོན་དུ་སྒྲོལ། །རྩ་རྒྱུད་ཀླད་ཁྲག་རྦ་ཀློང་སྐོམས། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལ་ཁ་རཾ་ཁཱ་ཧི། གཡོན་གྱི་ཕྱོགས་ནས་ཡུམ་གཅིག་མ། །བདུད་མོ་གསོད་བྱེད་རྒྱལ་མོ་ནི། །སྐུ་མདོག་མཐིང་ནག་བརྗིད་པ་ལ། །དབུ་ལ་སྦྲུལ་ནག་རལ་པས་གཏིབས། །རལ་པ་ཟར་བུ་རེ་རེ་ལ། །གསེར་དང་མུ་ཏིག་རྒྱན་འཕྱང་མ། །གདོལ་པའི་ཀླུ་དང་ཐོད་པ་ཡིས། །དབུ་དང་ཕྱག་ཞབས་ལྷུ་ཚིགས་བརྒྱན། །ཞལ་ནས་མི་རོ་རྟ་ར་འབྲུལ། །སྤྱན་ནས་ཁྲག་འཛག་ཟུ་ལུ་ལུ། །ཤངས་ནས་རླུང་ནག་འཚུབ་མར་འཁྱིལ། །གཡས་པས་དགྲ་བོའི་སྙིང་ཕྱུང་འཁྱུད། །གཡོན་པ་ལྕང་ལོ་སྙིང་ཁྲག་སྟོབ། །དྲག་ཏུ་བསྐུལ་ཞིང་རྦད་ཙམ་ན། །མ་མོའི་ཀིང་ཀང་དགྲ་ལ་འབེབས། །མོ་གདོན་འབུམ་སྡེ་གཟིར་ཞིང་འཇོམས། །གང་ལ་བྱ་བ་ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །རྩ་རྒྱུད་ཀླད་ཁྲག་རྦ་ཀློང་སྐོམས། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་
བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། ཚེ་བདག་ཐུགས་ཀྱི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་ཕྱུང་ནི། །གསོད་བྱེད་ཡ་མ་རཱ་ཛ་ནི། །སྐུ་མདོག་སྨུག་ནག་འཇིགས་ཚུལ་ཅན། །རྔམས་ཤིང་དྲེགས་པས་དགྲ་བགེགས་འདུལ། །རྣ་བའི་གྲོང་ཁྱེར་སྦྲུལ་གྱིས་བརྒྱན། །ཚངས་པའི་མགོ་བཅད་དོ་ཤལ་བྱས། །བདུད་དང་མུ་སྟེགས་རྒྱལ་པོ་ཡི། །ཙིཏྟའི་ཕྲེང་བས་རྒྱན་དུ་བྱས། །གཡས་པ་འཁོར་ལོ་རྩིབས་བཅུ་བསྣམས། །ཉམས་པ་ཀུན་གྱི་མགོ་ལས་གཤོག །གཡོན་པས་ཙིཏྟ་དམར་པོ་བསྣམས། །དགྲ་བོའི་དོན་སྙིང་སྤར་གྱིས་འདེབས། །རྔམས་ཤིང་དྲེགས་པའི་ཆ་བྱད་ཀྱིས། །སྡེ་བརྒྱད་ཀུན་གྱི་སྦྱོར་བ་འཇོམས། །བསྐུལ་ཞིང་དྲག་ཏུ་རྦད་ཙ་ན། །ས་བདག་ཀླུ་གཉན་གཟིར་ཞིང་མནན། །ཀླུ་ནད་མཛེ་ཤུ་ཀ་རུ་མཆོད། །གང་ལ་བྱ་བ་ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །རྩ་རྒྱུད་ཀླད་ཁྲག་རྦ་ཀློང་སྐོམས། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། ཡ་མའི་ཐུགས་ཀྱི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་ཕྱུང་བ། །དྲེགས་པ་ཕྱག་ན་རྡོ་རྗེའི་སྐུ། །སྐུ་མདོག་ལྗང་ནག་འབར་བ་ནི། །ཕྲིན་ལས་སྣ་ཚོགས་མཛད་པའི་རྟགས། །སྐུ་ཡི་འགྱིང་བག་བརྗིད་པ་ནི། །གདུག་པ་ཐམས་ཅད་འདུལ་བའི་རྟགས། །ཞལ་གདངས་མཆེ་བ་གཙིགས་པ་ནི། །ཁམས་གསུམ་དབང་དུ་སྡུད་པའི་རྟགས། །མཆེ་བ་དགུ་ཁྲི་གཏམས་པ་ནི། །དགྲ་བོའི་སྲོག་རྩ་
གཅོད་པའི་རྟགས། །ཀླུ་བརྒྱད་གདན་དུ་བཏིང་བ་ནི། །ཀླུ་གཉན་ས་བདག་གཟིར་བའི་རྟགས། །གཉན་ཁྲི་ཀླུ་འབུམ་གསོལ་བ་ནི། །ཀླུ་ནད་མཛེ་ཤུ་ཀ་རུ་གཅོད་པའི་རྟགས། །རིགས་བཞིའི་སྦྲུལ་གྱིས་སྐུ་ལ་བརྒྱན་པ་ནི། །ཀླུ་ནད་མཛེ་ཤུ་དགྲ་ལ་གཏོང་བའི་རྟགས། །རིན་པོ་ཆེ་ཡི་སྐུ་ལ་བརྒྱན་པ་ནི། །འདོད་དགུ་རེ་བ་ཡིད་བཞིན་སྐོང་བའི་རྟགས། །ཕྱག་གཡས་རྡོ་རྗེ་རྩེ་དགུ་བསྣམས་པ་ནི། །དམ་ཉམས་མགོ་ལུས་གཤོག་པའི་རྟགས། །གཡོན་པ་ཙིཏྟའི་ཕྲེང་བ་བསྣམས་པ་ནི། །དགྲ་བོའི་དོན་སྙིང་ཁོང་ནས་འབྱིན་པའི་རྟགས། །གང་ལ་བྱ་བ་ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །རྩ་རྒྱུད་ཀླད་ཁྲག་རྦ་ཀློང་སྐོམས། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། དྲེགས་པ་ཆེན་པོའི་ཐུགས་ཀྱི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་ཕྱུང་བ། །རུས་སྦལ་རྔམས་པ་མི་ཟན་ནི། །ཉོན་མོངས་ལྔ་ཡི་རྩ་བ་གཅོད། །འབྱུང་བ་ལྔ་ཡི་རྩ་བ་སྐོམས། །ལུས་སྲོག་གཉིས་ཀྱི་རྩ་མདངས་འདྲེལ། །སྐྱེ་བ་མེད་པའི་ཁམས་ལ་སྡུད། །དྭངས་མ་ཁྲག་གི་སྙིང་པོ་འཆང་། །ཐུགས་ཀྱི་གསང་མཛོད་འབར་བ་རུ། །བཀྲག་མདངས་བཅུད་ཀྱི་སྙིང་པོ་འཆང་། །དཀོན་མཆོག་དབུ་འཕང་སྨོད་པ་དང་། །རྒྱལ་བའི་བཀའ་ལ་གཅོག་པ་དང་། །སྡང་བའི་དགྲ་དང་གནོད་པའི་བགེགས། །སྐུ་དགྲར་འོས་པ་མ་ལུས་ཀུན། །གཤེད་ཀྱི་གསང་མཛོད་འབར་བར་ཆུབ། །རྟག་ཏུ་འཁྱམས་པའི་གནས་སུ་ཁྲིད། །རྩ་བཞི་དྭངས་མ་སྟོབས་ཀྱིས་ནོན། །དམོད་པ་དྲག་པོའི་མཚོན་ཆས་ཆོད། །ཡན་ལག་ལྔ་དང་གསང་བ་རུ། །མཆོད་རྟེན་དྲུག་གི་དགྲ་བགེགས་གནོན། །དགྲ་བགེགས་ལས་ངན་གདུག་པ་རྣམས། །སྤུ་གྲིའི་དབལ་ལས་ཤོར་ར་རེ། །གང་ལ་བྱ་བ་
ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །རྩ་རྒྱུད་ཀླད་ཁྲག་རྦ་ཀློང་སྐོམས། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། ཚེ་བདག་ནག་པོའི་སྤྱི་གཙུག་ན། །གསེར་གྱི་བྱ་ཁྱུང་ག་རུ་ཎ། །བྱ་ཁྱུང་རྒྱལ་པོ་དམ་ཚིག་ཅན། །བྱ་ཁྱུང་རྒྱལ་པོ་མཐུ་བོ་ཆེ། །འཁོར་ལོ་འབར་བའི་གཤོག་རྩེ་ཡིས། །ཉམས་པའི་མགོ་ལུས་ཚལ་པར་གཤོག །རལ་གྲི་འབར་བའི་གཤོག་པ་ཅན། །དགྲ་བོའི་སྲོག་རྩ་རྩད་ནས་གཅོད། །སྤུ་གྲི་འབར་བའི་ཐེབ་གཤོག་གིས། །དགྲ་བོ་ཉམས་པའི་མགོ་ལུས་ཕྲོལ། །ཡེ་ཤེས་འབར་བའི་གཤོག་ཟེར་གྱིས། །ཉོན་མོངས་གདུག་རྩུབ་རྩད་ནས་བསྲེག །སྤུ་བྲན་སྤུ་གྲི་དཔལ་ཆེན་གྱིས། །ཉམས་པ་ཀུན་གྱི་སྲོག་རྩ་གཅོད། །སྤྱན་གཉིས་ཉི་ཟླ་འཁྱིལ་པ་ཡིས། །ཞེ་སྡང་ཀླུ་མཚོ་གཏིང་ནས་སྐེམ། །གནམ་ལྕགས་འབར་བའི་སྡེར་མོ་ཡིས། །ཀླུ་གཉན་ས་བདག་དྲངས་ཀྱིན་གསོལ། །གནམ་ལྕགས་འབར་བའི་རྡོ་རྗེའི་མཆུས། །ས་བདག་ཀླུ་སྲིན་ཀླུ་བདུད་གསོལ། །ཁྱུང་གི་གཤོག་པ་བརྡབས་པ་ཡིས། །གདུག་པའི་གནས་ཁང་རྨངས་ནས་བཤིག །ཁྱུང་ཆེན་རྔམས་པའི་ང་རོ་ཡིས། །ཀླུ་གཉན་ས་བདག་ཟིལ་གྱིས་གནོན། །གང་ལ་བྱ་བ་ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །རྩ་རྒྱུད་ཀླད་ཁྲག་རྦ་ཀློང་སྐོམས། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་
བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། ཡང་སྤྲུལ་དུག་གི་ཁྱུང་ཆེན་གཉིས། །མཚོན་ཆ་འབར་བའི་གཤོག་པ་ཡིས། །གདུག་པ་འདུལ་བའི་ལས་ངོ་ལོངས། །བསྲེག་རྫས་མཆོད་པ་འདི་བཞེས་ལ། །ཀླུ་ནད་མཛེ་ཤུ་ཀ་རུ་ཆོད། །སྟག་དང་སེང་གེ་རྔམས་པ་ཡིས། །ཉམས་པའི་ཤ་ཁྲག་རོ་ལ་རོལ། །ཞེ་སྡང་དུག་སྦྲུལ་ནག་པོ་གཉིས། །ཁ་ནས་མེ་འབར་དུག་ལྔ་བསྲེག །དགྲ་བོའི་ཁོང་དུ་དུག་མདའ་རྒྱོབ། །དགྲ་བོའི་ཁང་ཁྱིམ་རྨངས་ནས་ཤིག །གང་ལ་བྱ་བ་ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །ལུས་སྲོག་དབང་པོ་རྟེན་དང་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །ཞེ་སྡང་དྲག་པོའི་སྦྱོར་བ་ཆོམ། །བསྲེག་རྫས་མཆོད་པ་འདི་བཞེས་ལ། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བ་གཏན་གཞིའི་རྔམས་ཀྱིས་ནོན། །གདུག་རྩུབ་མེ་ལྷའི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། ཤར་གྱི་ཕྱོགས་ནས་བླ་འགུགས་པ། །དུང་གི་མོན་པ་སེང་གེའི་མགོ། །མོན་པ་བླ་རྐུན་རྔམ་པའི་གདོང་། །སྡང་དགྲ་གནོད་བགེགས་མཆོད་པར་བཞེས། །ལྷོ་ཡི་ཕྱོགས་ནས་བླ་འགུགས་པ། །ལྕགས་ཀྱི་མོན་པ་སྟག་གི་མགོ། །མོན་མོ་ནག་པོ་གཡུ་ཡི་རལ་པ་ཅན། །སྡང་དགྲ་གནོད་བགེགས་མཆོད་པར་བཞེས། །ནུབ་ཀྱི་ཕྱོགས་ནས་བླ་འགུགས་པ། །བསེ་ཡི་མོན་པ་དྲེད་ཀྱི་མགོ། །མོན་མོ་ཚེ་འཕྲོག་རལ་པ་ཅན། །སྡང་དགྲ་གནོད་བགེགས་མཆོད་པར་བཞེས། །བྱང་གི་ཕྱོགས་ནས་བླ་འགུགས་པ། །གསེར་གྱི་མོན་པ་ཁྱུང་ཆེན་མགོ། །མོན་མོ་བླ་རྐུན་སྙིང་ལ་གཟེར་འདེབས་མ། །སྡང་དགྲ་གནོད་བགེགས་མཆོད་པར་བཞེས། །ཧེ་ལེ་ཁྱབ་པ་ཤར་གྱི་བདུད། །བདུད་མོ་མཁའ་འགྲོ་རལ་གཅིག་མ། །སོབ་དར་འཁྲིག་པ་ལྷོ་ཡི་བདུད། །བདུད་མོ་ཁྲག་འཐོར་མྱོས་བྱེད་མ། །ནག་པོ་འཛུམ་མེད་ནུབ་ཀྱི་བདུད། །བདུད་མོ་རྡོ་རྗེ་མཆེ་གཙིགས་མ། །རལ་པ་སྤྱི་བཅིངས་བྱང་གི་བདུད། །བདུད་མོ་ལས་ཀྱི་ཁྲོ་གཉེར་མ། །རྒྱ་མཚོ་ཆེན་པོའི་གཏིང་རུམ་ནས། །དུག་མཚོ་
འཁྱིལ་པའི་ནང་ཤེད་ནས། །གཤིན་རྗེ་བྱེ་བ་དགུ་ཁྲི་བཞུགས། །ཆིབས་སུ་ཆུ་གླང་སྔོན་པོ་བཅིབས། །སྐུ་ལ་ལྕགས་ཀྱི་ཞུན་ཁྲབ་གསོལ། །ཐོད་པ་ཞིང་ཆུང་སྦྲུལ་གྱིས་བརྒྱན། །གཡས་ན་རལ་གྲི་ཁ་མང་བསྣམས། །དམ་ཉམས་སྲོག་རྩ་དམར་དུ་ཆོད། །ཕྱག་ན་ལྕགས་ཀྱི་རལ་གྲི་བསྣམས། །དགྲ་བགེགས་ལས་ངན་གཟིར་ཞིང་བསྲེག །ལག་པ་དགུ་ཁྲིས་ཚོགས་ཀྱང་འགྱེད། །ཡང་སྤྲུལ་བྱེ་བ་ལས་ལ་འགྱེད། །དེ་ཕྱིར་བྱེ་བ་དགུ་ཁྲི་བྱ། །ལས་ཀྱི་མཐའ་སྡུད་ཁྱོད་ཡིན་གྱི། །སྡང་བའི་དགྲ་དང་གནོད་པའི་བགེགས། །གདུག་པའི་ས་བདག་ཀླུ་གཉན་རྣམས། །གཏད་དོ་ལས་ཀྱི་མཐའ་སྡུས་ཤིག །དགྲ་བགེགས་ལས་ངན་མཆོད་པར་བཞེས། །འོ་མ་དུག་ཆུ་ཆང་དང་ཁྲག །མེ་ལ་འབུལ་ཞིང་དྲག་ཏུ་བཟླས། །དྲག་པོའི་གནས་སུ་ཐུན་བྲབ་ལ། །ཐལ་བ་ཐུན་ཟོར་ཐོད་པ་དགང་། །མནན་པ་གདུག་པའི་ཀླུ་ལ་གཏད། །ཁ་རླངས་དུག་ལ་མུ་ཟི་དང་། །བྲུན་གསུམ་ཚ་ཡི་རི་ལུས་བདུག །ཡིད་ཀྱི་དུག་ལ་བྱ་བག་ཚིལ། །གུ་གུལ་རྟ་བོང་མུ་ཟིས་བདུག །མཐོང་བའི་དུག་ལ་གླ་བའི་ཁྲག །བྱ་དང་ཉ་ཡི་མཁྲིས་པས་བདུག །རེག་པའི་དུག་ལ་རྫས་རྒོད་ཀུན། །བསྲེག་ལ་བདུག་སྟེ་ཕྱིང་པས་དགབ། །དྲག་སྔགས་བཟླས་ཤིང་ཡུལ་ལ་རྦད། །ཡུངས་ཀར་བྲབ་ལ་བསྐོར་བ་བྱ། །བྱེ་བ་སུམ་བརྒྱ་ཛྭ་ལ་གདུངས། །གུག་རྒྱལ་ཆུ་ཡིས་དག་པར་བཀྲུ། །དུག་དང་ཁྲག་གིས་ངར་བླུད་ལ། །རྐང་དང་ཤ་རོ་བེམས་ལ་བརྡེག །ཐུན་བརྡེག་ཞལ་གྱི་དམོད་པ་དབབ། །གདུག་པ་གསུམ་པའི་དུག་རོ་གདོན། །སྲུང་བ་ཀུན་གྱི་མཆོག་ཏུ་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། བསྲུང་བ་ཁྱད་པར་བསྟན་པའི་ལེའུ་སྟེ་བཅོ་བརྒྱད་པའོ།། །།དེ་ནས་ཡང་བཅོམ་ལྡན་འདས་ཀྱིས་སྲོག་དམར་ལེན་གྱི་སྦྱོར་བ་རང་གཤེད་རང་ལ་དབབ་པའི་སྦྱོར་བ་འདི་གསུངས་སོ། །དུས་གསུམ་མཆོག་གསུམ་བདེ་གནས་སུ། །རང་ཉམས་བརྟན་པའི་མཚམས་བཅད་ལ། །ཡེ་ཤེས་རིག་པའི་བདེ་ཀློང་ནས། །མཁའ་ལྔ་ཁྱབ་པའི་འཁོར་བསྡུས་ལ། །གཟུང་འཛིན་ཆོས་ཉིད་དབྱིངས་སུ་བསྒྲལ། །
སྟོབས་ཆེན་གཞན་སོགས་གཟན་ལ་དབབ། །རང་རྒྱུད་ཡི་གེ་གཤེད་མར་བླངས། །བདུད་དང་ཕན་བྱེད་རང་རྩལ་བར། །བདེ་བའི་ཐིག་ལེ་ངང་ལས་ཤར། །ཤུགས་ཀྱི་རིན་ཆེན་འཕེལ་འགྲིབ་མེད། །གྲུ་གསུམ་རྐྱེན་གཉིས་ཆ་བསྙམས་ལ། །མུ་ཁྱུད་རིམ་པ་བཞི་རུ་བསྐོར། །དབུས་ཀྱི་ཕོ་བྲང་རྒྱ་ཆེན་པོར། །སྤྱི་གཙུག་ཙོག་པུ་སྐྱིལ་ཀྲུང་དུ། །དམིགས་པ་ནག་པོའི་སྙིང་པོ་བྲི། །ཕྱི་རིམ་རྒྱ་གྲམ་རྩ་བའི་སྔགས། །ཡང་ལོགས་མུ་ཁྱུད་གཡེང་དང་སྐེམ། །རང་གཞན་གང་འགྲུབ་བསད་པའི་སྔགས། །ཕྱི་ནང་མགོ་བསྟན་མིང་རུས་སར། །ལྟོ་སྦྱར་རང་གཤེད་གཟན་ལ་དབབ། །མཐའ་མ་མཚོན་ཆའི་རྩིབས་བཅུ་བཞི། །རྩེ་མོ་ནང་བསྟན་བསད་པའི་སྔགས། །སྤུ་གྲི་རང་བཅས་གསུམ་གཉིས་འཕོ། །སྐབས་དང་སྦྱོར་ལ་རྩ་བ་བརྩམ། །མཚོན་ཆ་ཁ་སྦྱོར་དུག་ཆུ་ཁྲག །ཚ་བ་གསུམ་དུ་ལྡན་བྱས་ལ། །ལིངྒ་ཕག་མོའི་ལྟོ་བར་བཅའ། །གྲུ་གསུམ་སུམ་བརྩེགས་རྩང་བཅས་སུ། །ཐོད་པ་རུས་སྦལ་ནང་བཅས་མནན། །ཞག་གསུམ་དྲག་སྔགས་རྔམ་ཚིག་བཟླས། །དྲག་ཏུ་བསྐུལ་ལ་བླ་མས་མངག །དམོད་ཚིག་དང་བཅས་མཚན་ཡང་བརྗོད། །དཔང་གཟུག་དམ་བདར་གདུང་བ་བཀླག །ཐོན་ནས་མཆོག་ཕུར་ཁྲི་ཡིས་གདབ། །འཁོར་ལོ་ཐོད་པ་ཚས་ཀྱིས་གྲིལ། །ནམ་མཁའ་བར་སྣང་ས་ལ་མནན། །གསུམ་གསུམ་དྲུག་དང་གསུམ་དུ་དབྱེ། །རང་ཡང་ཆེ་བའི་ང་རྒྱལ་བསྐྱེད། །གུ་རུས་སེང་གེའི་ཁོག་བཤིག་ན། །སྒྱུ་མ་སྐུ་ཡི་ཕུང་པོ་ལ། །ཐུགས་ཀྱི་མྱུ་གུ་བདེ་བའི་མཆོག །རིན་པོ་ཆེ་ཡི་རྒྱལ་སར་གདོན། །ཐོད་པ་སེང་གེའི་ཁོག་པར་མནན། །སློབ་མ་དལ་ཞུགས་སྡིག་སོག་ན། །ཙོག་པུའི་སྙིང་གར་སྡིག་པ་གཞུག །དམ་བརྡར་མནའ་ཆུ་ཕུར་པས་བསྡིག །ཐོད་པ་སྟག་གི་འཛུམ་ལ་མནན། །དམ་འདྲེས་ཡི་དམ་སྔགས་གཅིག་ན། །སེང་གེ་མཆེ་སྦྱར་གཅེར་བུ་ཁྲིད། །ཀླད་པར་ཁྲག་གི་སྦལ་པ་གཞུག །དམེ་ཁྲག་ནད་ཁྲག་རྐྱེན་བླངས་བསྐུ། །ཐོད་པ་གཟིག་གི་ཐིག་ལེར་མནན། །སྔགས་པ་ནག་པོ་སྤྱི་ཡི་སྤུན། །སྤྱི་གཙུག་སྙིང་གར་བསེ་སྦལ་བྲི། །བཅུག་ལ་ཕག་རྒོད་ཛྭ་ལའི་ཁྲག །ཐོད་པ་མན་
པའི་གླིང་དུ་མནན། །བོན་པོའི་རིགས་གཉིས་འཛིན་པ་ལ། །སྐེ་ལ་སྡིག་པ་ཀླད་པར་སྦལ། །སྙིང་ལ་ཕག་རྒོད་གསང་བར་སྦྲུལ། །བཅུག་ལ་ལུས་ལ་ནད་ཁྲག་བསྐུ། །ཐོད་པ་སྲིན་མོའི་སྒྲོམ་དུ་མནན། །དྲག་པོ་གནམ་ལྕགས་ནང་འགྲས་ན། །རྟོག་མེད་མཉམ་ཉིད་རྫོགས་པའི་སྐུ། །བདེ་ཆེན་ཁྱབ་གསལ་རྟོག་མེད་ལས། །ཕྱག་རྒྱ་གཟི་བརྗིད་སྟོབས་དཔག་མེད། །ལུས་ལ་ཡེ་ཤེས་འཁོར་ལོ་བཅའ། །ཀུན་གྱི་ཐུགས་ཀར་སཱུརྱ་ཡི། །ཙཀྲ་ཡེ་ཤེས་སྟོང་འཕྲོས་གསལ། །གཞན་གྱི་རྒྱན་གཅིག་བྲིས་ལ་གཟིར། །རང་གཤེད་ཕྱག་རྒྱ་རང་ལ་བསྐོར། །དྲག་སྔགས་རྣལ་དཀྲུག་བསྣོལ་མར་བརྡེག །ཐོད་པ་འབྲོང་གི་ཐོད་པར་མནན། །དེ་ཡིས་ཐམས་ཅད་འཇོམས་པར་གསུངས། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ནོ། །ཨེ་མྱག་ཡ་རྔུབས་མུག་ཤག་ཀ་དུན་གུ་རུ་ནྲྀ་ཛ་ཧུར་ཐུམས་ཛ། སྲོག་ལ་ཡཾ་ཤག་ཧྲི་མྱག་རྦད། དགྲ་བོའི་སྲོག་ལ་མཱ་ར་ཡ་ནྲྀ་ཡ། དྲེང་ཤག་ཧུར་ཡཾ་རྦད། དགྲ་བོའི་ཙིཏྟ་ནྲྀ་ཧུར་ཐུམས་ཛ། སྲོག་ལ་མཱ་ར་ཡ་རྦད། དགྲ་བོའི་ཙིཏྟ་ཡཾ་ཤག་ནྲྀ་ཧུར་ཐུམས་ཛ། ཁ་སྲོག་ཐུན་རྦད། དགྲ་བོའི་སྲོག་ལ་དུན་ནྲྀ་ཙིཏྟ་ཛ་སྲོག་མ་ར་ཡ་རྦད། དགྲ་བོའི་ཙིཏྟ་ཡཾ་ཧུར་ཐུམས་ཛ། སྲོག་དྲེང་ཤག་མཱ་ར་ཡ་རྦད། སྤུ་གྲི་ཉིད་སོ་སོའི་སྒོ་ནས་བརྡེག་པའོ། །དེ་ནས་ཡང་བཅོམ་ལྡན་འདས་ཀྱིས། སྤྱི་དྲིལ་ལ་བརྡེག་པའི་སྦྱོར་བ་དམ་པ་འདི་གསུངས་སོ། །ཁྱད་པར་དམར་ལེན་དྲག་པོ་ཡི། །རང་གཤེད་དྲིལ་ལ་དབབ་པའི་ལས། །བརྡ་དོན་ཐབས་ཀྱིས་དྲིལ་བའི་མཆོག །བ་དང་འོ་མ་ཞོ་དང་མར། །ཞུན་མར་སྣུམ་གྱི་སྙིང་པོ་བཅུད། །སྙིང་པོའི་སྦྱོར་བ་བསད་པ་མཆོག །གཡེང་མིན་བརྟན་པར་གྲོལ་དབང་བཅས། །སྟོབས་ལྡན་སྦྱོར་བའི་སྙིང་ཕྱུང་འདི། །གང་མཐུན་རྒྱུ་ལ་གཟུགས་བརྙན་བྱ། །དཔའ་བརྟུལ་དྲག་པོའི་སྟོབས་ཀྱིས་སྤྱད། །གདུག་བྱེད་ཕག་མོའི་ལྟོ་བ་རུ། །སྲིད་པའི་ཁྱམས་ཁང་དྲོད་སྡུད་བཅའ། །ཁྱམས་ཁང་ལྟོ་ན་བརྣག་པའི་གཟུགས། །སྤྱི་གཙུག་སྙིང་གར་མཚོན་ཆ་བཅའ། །མུ་ཁྱུད་བཞི་དག་མིང་རུས་བྲི། །ཕྱི་རིམ་རྒྱ་གྲམ་རྩ་བའི་སྔགས། །
ཡང་ལོགས་བཅུ་གཉིས་སྤུ་གྲི་མཚོན། །རྩ་བ་སྤུ་གྲིའི་བར་ན་ཁྱམས། །ཆུ་སྲིན་ཁང་པ་མུ་ཁྱུད་ཟླུམ། །ལྟོ་སྦྱོར་ནང་ལ་ཕས་ཀྱི་ཕྱི། །མུ་ཁྱུད་བར་དུ་མིང་རུས་ཁམས། །བསྐུལ་ཞིང་ལུས་ལ་རྒ་བ་དབབ། །རུས་སྦལ་ལྟོ་བའི་ཕྱོགས་མཚམས་ལས། །རྩིབས་ཆེན་བཅུ་གཉིས་རྩེ་མོ་ནང་། །གསད་པ་ཕོ་མོའི་སྤུ་གྲིས་གང་། །འཁྲུལ་མིག་བར་ཁྱམས་མིང་རུས་གང་། །དོན་གཉིས་བསྡུས་ལ་སྦྱོར་བ་བརྩམ། །ཁ་སྦྱོར་དུག་ཁྲག་ཚ་བ་ནད། །སྨེ་བ་དང་བཅས་ཐོད་པ་དོང་། །རྒྱུ་རྟེན་ལིངྒའི་གཞི་བཅའ་མིང་། །རུས་ཁམས་ནག་པ་རྟེན་དུ་བཞག །ཞལ་གྱི་ཐུན་དབབ་རྟེན་ལ་བསྡིམ། །ཞག་གསུམ་ཁྲི་བཞི་སྒྲ་སྤང་བྱ། །དྲག་སྔགས་འོད་ཟེར་རང་ཤུགས་འཕྲོ། །ཤ་ཟ་གསོད་བྱེད་ཕོ་ཉ་བསྐུལ། །ཀུན་གྱི་ཡེ་ཤེས་འོད་འཕྲོ་ལས། །རང་རྒྱུད་རྩ་བའི་འཁོར་ལོ་ལས། །སྙིང་གི་རྩ་བཞི་དྭངས་མ་ན། །རྩ་བའི་འབྲུ་བརྒྱད་རྣལ་མའི་གནས། །རྩ་བྲན་བརྒྱད་དང་སུ་ལ་བཞིན། །དྲག་པོ་རྩ་བའི་འབྲུ་བཅུ་གཉིས། །རྩ་མདུད་རང་གཤེད་འབྲུ་བཅུ་བཞི། །ལྟེ་བར་བཅས་པའི་སྙིང་པོ་གསུམ། །དེ་ལས་རང་བདུད་གཤེད་ལ་བསླང་། །གནས་པའི་ཡི་གེ་འདི་ལྟ་སྟེ། །ཙིཏྟ་དབུས་ཀྱི་སི་ར་ལ། །དམར་ནག་ཡ་གཉིས་དབུས་ན་ནི། །མེ་ཆུ་ལས་ཀྱི་འཁྲུལ་མིག་སྐྱོན། །དྭངས་མ་བཞི་ཡི་སི་ར་ལ། །ཆོས་ཉིད་རྩ་ལ་ཨེ་དང་མྱགས། །མེ་ལོང་ཡེ་ཤེས་གསལ་བའི་འོད། །གནས་པའི་སྲོག་རྟེན་གསོ་ཞིང་འཇོམས། །བསྐུལ་ན་རང་སྲོག་རྩ་སྦུབ་གཅོད། །རྟེན་དང་བག་ཆགས་དྭངས་སྙིགས་འབྱེད། །དེ་བཞིན་ཡོན་ཏན་མེ་ཁམས་ལ། །ཡ་རྔུབས་གནས་པ་སྲོག་རྟེན་འཇོམས། །མཉམ་པ་ཉིད་ཀྱི་བརྐམ་ཆགས་འཇོམས། །གཉིས་ལས་བདེ་ཁྲིད་ནད་རླངས་བསྐྱེད། །ཡེ་ཤེས་སི་ར་དྭངས་མ་ཆུ། །མུག་དང་ཤག་གནས་སྡུད་ཅིང་སྐྱོམ། །སྟོང་པའི་ཡེ་ཤེས་རང་གནས་འཇོམས། །ཁྲག་དང་ཚ་བ་དམུ་ཆུ་བསྐྱེད། །རང་རྒྱུད་སི་ར་དྭངས་མ་རླུང་། །བག་ཆགས་འཕེལ་འགྲིབ་འཕེན་དང་ཕུལ། །ཀ་དང་དུན་གནས་རླུང་ནད་བསྐྱེད། །བྱ་བའི་ཡེ་ཤེས་བསྐྱོད་བདུད་འཇོམས། །ལས་ནི་རྣམ་ཤེས་དྭངས་མ་འདེགས། །དེ་བསྐུལ་དེ་འོད་དེ་མཚོན་ཆས། །དེ་གཅོད་
དེ་ཉིད་བསྲེག་ཅིང་སྐེམས། །དེ་ལས་དེ་བྱུང་རྩ་མདུད་བསྐུལ། །མདུད་པ་བཞི་ལ་མཚོན་ཆའི་འབྲུ། །བཞི་གཉིས་གསུམ་གཉིས་བསྣོལ་མར་གནས། །ཆོས་ཉིད་མདུད་པ་སྲོག་ལས་ནི། །དེ་བཞིན་རང་རྒྱུད་ཧུར་ཐུམས་ཛ། །ཡོན་ཏན་མདུད་པ་བྱང་ཁྲག་སྙིང་ཐུགས་ནས། །ཡེ་ཤེས་རིམ་དང་ཤག་དང་རྦད། །རང་འདོད་མེ་དང་མཚོན་ཆར་འཆར། །དེ་ཡིས་དེ་བཅད་བག་ཆགས་བསྲེག །རྩ་བྲན་བརྒྱད་དང་སུལ་བཞི་ལ། །འོད་ཟེར་འཕྲོ་ཞིང་ཐིམ་ཕོག་པས། །ནད་དང་མཚོན་ཆས་རང་སྔགས་བསྐུལ། །རང་གཤེད་བདུད་ཀྱི་མཚོན་ཆར་འབེབས། །ཡེ་ཤེས་ཀློང་དུ་ཐིག་ལེར་འདུ། །བག་ཆགས་ཁྲག་ཁོལ་མེ་མར་གསོད། །ཀུན་འདུས་དཀར་ནག་མཚམས་སུ་ཐིམ། །ཧུར་ཐུཾ་ཛཿཡིས་ནྲྀ་ཕྲོགས་ནས། །གཟུགས་བརྙན་གྲོགས་ཀྱི་འཁོར་ལོ་འཕྲོ། །སྲིད་པའི་ཁྱམས་ཁང་རྟེན་ལ་སྡུད། །དེ་ཡིས་རང་གཤེད་རང་ལ་འབེབས། །ཚེ་དྲིལ་ནག་པོའི་དུག་མདའ་ཡིན། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་གཅིག་ཏུ་དྲིལ་བའི་དྲག་སྔགས་བསྣོལ་མ་བཏོན་ཏོ། །ཨེ་མྱགས་ཡ་རྔུབས་མུག་ཤག་ཀ་དུན། དགྲ་བོའི་སྲོག་ལ་ཧུར་ཐུཾ་ཛ། རྩ་ཁྲག་སྙིང་ཐུམས་རིལ་རཾ་ཤག་རྦད། དགྲ་བོའི་ཙིཏྟ་དྲེང་ཤག་ཛ། སྲོག་ལ་ཧུར་ཐུམས་རྦད། དེ་དག་སྦྱོར་བ་དམ་པ་ཡིན། །སྣང་སྣང་མ་ཡིན་དྲིལ་ལས་བརྡེག །མནན་པ་གདུག་པའི་ཀླུ་ལ་གཏད། །དེ་ཡིས་ལས་དེ་མ་སྨིན་ན། །སྲིད་པ་སྔགས་ཀྱི་འབྱུང་བ་དཀྲུག །མནན་པ་གཉན་དང་དཀྱིལ་འཁོར་འོག །འཁོར་ལོ་དུག་ཤིང་བསྣོལ་དུ་གཞུག །སྲོག་ཐུཾ་རཾལ་ནྲྀ་ཛ། རཾ་སྙིང་བཾ་ལ་ཐུན་ཤག་རྦད། དགྲ་བོའི་སྲོག་དྲེང་ཐུམས་ཙིཏྟ་ཤག་ཏུར་ཛ་ལ་རྦད། ལས་ཀྱི་རྒྱལ་པོ་འཕྱོང་ཆེན་ཡིན། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་གཟིར་ཞིང་མནན་པའི་སྔགས་འདི་བཏོན་ནོ། །དགྲ་བོའི་སྲོག་ལ་ཧུར་ཐུཾ་ཛ་ཙིཏྟ་གཟིར་ནན་སྲོག་སྟྭམ་བྷ་ཡ་ནན། དགྲ་བོའི་སྲོག་ལ་ཐུཾ་རཾ་ལི་ལི་བྷྱོ། འདི་དེས་ལས་གསུམ་རྫོགས་པར་བྱེད། །རང་གཤེད་དྲིལ་བའི་སྦྱོར་བར་བཤད། །དཔལ་ཚེ་བདག་གི་དགོངས་
རྒྱུད་ནག་པོ་ལས། རང་གཤེད་རང་ལ་དབབ་པའི་ལེའུ་སྟེ་བཅུ་དགུ་པའོ།། །།དེ་ནས་ཡང་བཅོམ་ལྡན་འདས་ཀྱིས་སྲོག་ལེན་གསང་བའི་དུག་མདའ་ཁོང་དུ་བསྐྱལ་བའི་སྦྱོར་བ་འདི་གསུངས་སོ། །ལས་རྣམས་ཀུན་གྱི་མཆོག་བསྡུས་པ། །རྩ་བ་གཅིག་ཏུ་དྲིལ་བ་ཡིན། །ལས་ཀྱི་གནད་དང་བསྐྱོད་པའི་ཐབས། །བར་མཚམས་སྦྱོར་བ་ཀུན་དང་ལྡན། །རི་ནག་དུར་ཁྲོད་དམེ་གྲི་མནོལ། །གཡུལ་བཀྱེ་ས་ཆུ་དུག་རླངས་ལ། །སྟེགས་བུ་ཧོམ་ཁུང་ཐོད་པ་འཐོལ། །ཁྲག་སྣ་དུག་སྣ་ལིངྒ་མིང་། །བཅས་ལ་མཐིང་ཁ་དྲིད་མོས་དགབ། །རྡོ་ཕྱེ་ལྕགས་ཕྱེ་ཟངས་ཕྱེ་དང་། །ཐལ་ཆེན་མནོལ་ཁྲག་ཉུང་དཀར་ཐུན། །གསལ་གསུམ་ཐུན་སྔགས་དགུ་སྐོར་བརྡེག །ཐུན་བརླབ་ཤ་ཟ་མཚོན་ཆར་གསལ། །འོད་ཀྱིས་ལུས་བསྡུས་ཐུན་ལ་ཐིམ། །ཁྲག་ཁོལ་དུག་རླངས་ཁེངས་ཤིང་འཆོལ། །ཟོར་བསྐྱོད་བསྲུང་བའི་གོ་ཆ་དྲལ། །ལུས་དང་ཤ་རུས་དེ་བཞིན་དབྲལ། །ཙིཏྟའི་སྒོ་ཕྱེ་སྒོ་དགུར་འཇུག །དེ་ནས་བཅོམ་ལྡན་འདས་ཀྱིས་ལོ་ཐོག་གཞོམ་པའི་སྦྱོར་བ་འདི་གསུངས་སོ། །ལས་ཀྱི་རིམ་པ་གསུམ་ཡིན་ཏེ། །རྣལ་མ་བཟློག་དང་ལྟོ་དཀྲུག་གསུམ། །དང་པོ་ཚ་གསུམ་སྔོ་སྣ་གསུམ། །ཚ་བ་གསུམ་དང་ཧ་ལ་ལྔ། །གཟུགས་བརྙན་སོར་བཞི་སྔགས་ཀྱིས་དྲིལ། །མོན་ཐོད་ནང་དུ་བྲུན་གསུམ་བསྡིམ། །ཁྲི་ཚོ་བརྒྱད་དུ་དྲིལ་ལ་དབབ། །དམིགས་པའི་ཡུལ་དང་བསྲུང་བ་བརྣག །དེས་མ་ཕེབས་ན་སྦྱོར་བ་བཟློག །དམིགས་པའི་ཡུལ་ནས་གཟུགས་བླངས་ལ། །ཚ་བའི་རྒྱལ་པོ་དེ་བཞིན་གསུམ། །བསྐུས་ལ་གཟུགས་བརྙན་བར་དུ་གཞུག །བྲུན་གསུམ་འབྲུ་གསུམ་མོན་ཐོད་བསྡིམ། །དུག་ཤིང་རྫས་རྒོད་བརྒྱད་ཀྱིས་བདུག །དམིགས་པའི་རྟེན་ལ་གཟིར་བར་བྱ། །དེས་མ་ཕེབས་ན་སྦྱོར་བ་གཞན། །དུག་དང་མནོལ་ཁྲག་སྦལ་པ་གཉིས། །བག་ཟན་བསྲེས་ལ་སོར་བཞིའི་ཚད། །གཉིས་བྱས་བར་དུ་གསོན་མ་གཞུག །ལྕགས་ཕུར་ཁྲི་བཞི་དྲིལ་ཞིང་གཟིར། །མཐའ་རུ་ཡུལ་དབུས་ཆུ་མིག་དཀྲུག །རྫས་རྒོད་བརྒྱད་ཀྱི་དུད་པས་བདུག །གསལ་བར་ཁྱད་པར་ཟིལ་གནོན་བརྟག །ཆུ་རྒོད་འཁྱགས་པ་རི་ལྟར་གཏིབས། །དམ་པའི་སྦྱོར་བ་
དྲག་སྔགས་བརྡེག །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ནོ། །ཨེ་མྱགས་ཡ་རྔུབས་མུག་ཤག་ཀ་དུན། པྲོཾ་ཤན་ནག་ཧུར་ཡམ་ཧྲི་ལ་བྷྱོ། བྷྱོ་ཧྲིལ་ཡ་མ་ཧུར་རི་ཤར་ཤར་པྲོཾ་ཐུན། དགྲ་བོའི་སྙིང་གཟེར་ཧྲིལ་ཡཾ་ཕུ་ཧུར། ཐུམས་ཛ། ཤར་བྷྱོ་དྲག་ཏུ་ཕོབ། གསང་བ་སྙིང་གི་དཀྱིལ་དུ་གཟུང་། །ལས་ཀྱི་མཆོག་ཆེན་ནག་པོར་གསུངས། །དེ་ནས་བཅོམ་ལྡན་འདས་ཀྱིས་བརྣག་པ་མངོན་དུ་འཕོ་བའི་སྦྱོར་བ་འདི་གསུངས་སོ། །གསང་བའི་སྦྱོར་བ་གསང་བཅུད་གབ་སྦས་མཆོག །རང་ལ་རང་ཆས་གབ་བཞིན་གསང་། །སྦྱོར་བ་རིམ་པ་ལྔ་དང་ལྡན། །རྩ་བའི་རྒྱལ་པོ་རྩ་བ་གསུམ། །བསེ་བྱའི་ཤ་དང་བསེ་ཞོ་མཁྲིས། །མ་བསྲུངས་ཞེ་སྡང་ལུས་ལས་བསྡུ། །བདུན་ཁྲིའི་མཐའ་རུ་ཡུལ་དང་སྤྲད། །ནམ་མཁའ་བར་སྣང་ས་ལ་གསུམ། །མལ་ལམ་ཡ་ཐེམ་མ་ཐེམ་ལ། །བསྐུ་ཞིང་རྦད་པས་སྦྱོར་བ་འདུ། །སྦྱོར་བ་ལོ་འམ་དུས་ན་སྨིན། །འགྲེང་དང་རྐང་བཞིའི་ལུས་ལ་བསྐུ། །སྦྱོར་བས་ཟླ་བ་དུས་ན་སྨིན། །གར་བསྒྱུར་གསར་པའི་ཤ་ལ་སྦྱར། །གུ་ཧྱ་ཙིཏྟ་སོ་མ་ཧ། །དེ་བཞིན་གཉེན་པོ་སྟོབས་དཔག་མེད། །ག་པུར་སྐྱེར་ཆུ་ཁ་རུ་ཚ། །ཟིལ་པ་ཤུགས་དྲངས་རྡོ་རྗེའི་ཆུ། །ཡུངས་ཀར་ཁནྡ་དྲུག་བསྲེས་ལ། །སྔགས་ཀྱི་རྒྱལ་པོ་ཁྲི་གསུམ་བསྡིམ། །ལུས་ལ་བསྡུས་ཏེ་འཐུངས་པས་འཇོམས། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ནོ། །ཧུར་ཡཾ་ཙ་མ་རི་ཐུཾ། ཙིཏྟ་ཁས་མྲ་ར་རྦད། ཨེ་བཾ་རཾ་ཏལ་ཙམ་རི་ཕྱུང་། ཧུར་ཐུཾ་ཛྭ་ལ་རཾ། དེ་ནས་བཅོམ་ལྡན་འདས་ཀྱིས་སྦྱོར་བ་སྨིན་པའི་དོན་འདི་གསུངས་སོ། །བསྲུང་དང་བསད་པ་ལོ་ཏོག་གཞོམ། །བསྟན་པ་ཆེ་ལ་གཉན་ཕྱིར་སྔགས། །བསླུ་བའི་བག་ཆགས་གནས་སྦྱངས་ནས། །སྐུ་གསུང་ཐུགས་ཀྱི་བདེ་བ་ཐོབ། །དབུགས་ཀྱི་རྟར་བསྐྱོན་རྐྱེན་བྱས་ནས། །སྲོག་བདུད་རང་གཤེད་རྒྱུད་ལས་སློང་། །སངས་རྒྱས་དགོངས་དོན་ཡོངས་སུ་དག །གསང་ལམ་སྒོ་དགུའི་རྟེན་བསྲེགས་ནས། །དྭངས་གཉིས་ཤེས་པ་འབྲུ་གཉིས་སྡུད། །བདེ་བའི་ཡེ་ཤེས་ཐིག་ལེ་མཉམ། །དྭངས་
མ་མཁའ་དབྱིངས་བདེ་ལམ་བགྲོད། །སྐུ་ལྔ་ཡེ་ཤེས་ལྔ་རུ་སྨིན། །ཀུན་ཏུ་བཟང་པོའི་བདེ་ཆེན་གནས། །ཕུང་པོ་སྒྱུ་མའི་གནས་སྦྱངས་ནས། །མཚན་དང་དཔེ་བྱད་ལོངས་སྤྱོད་སྐུར། །ལྷུན་གྲུབ་ཡེ་ཤེས་སྐུ་རུ་རྫོགས། །བག་ཆགས་ལས་དབང་འགྲོ་བ་དྲུག །འབྲུ་སྡེབས་རྟེན་སྦྱངས་ཙ་ནའི་འབྲུ། །ཙིཏྟ་དཀར་ནག་སྡིག་སྦལ་རྐྱེན། །ཐུན་སྦལ་ལྕགས་ལྟར་འཁོལ་ཞིང་ཞུ། །འབྲུ་གསུམ་གནད་ཀྱིས་འཕྲོག་བྱེད་ཅིང་། །སེང་གེའི་སྡེར་བཞིན་བཟུང་ནས་འཇོག །རང་དབང་མེད་པར་རྟེན་ལ་བསྡུ། །ཐོད་པའི་ལིངྒ་ཁྱམས་ཁང་གླིང་། །གསང་མཛོད་གནས་སུ་འཆང་ཞིང་བསྲེག །སྤོགས་པ་མེད་པར་ལས་རྣམས་འཇོམས། །དྲག་སྔགས་དམོད་པ་ཟོར་ལ་བསྐྱོན། །དགུ་དཀོར་དམོད་ལ་ཡང་སྔགས་སྡེབས། །དེ་ཡིས་འཕོ་ཐོབ་བཀོད་པ་སྨིན། །སྲོག་མེད་གསད་དང་གཅད་དུ་མེད། །སྲོག་མེད་སྐྱེས་བུའི་ལོག་རྟོག་ཙམ། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པ་ཡོད་མ་ཡིན། །སྲོག་ཏུ་འཛིན་པ་འཁྲུལ་པ་སྟེ། །བདེ་བའི་གནས་ལས་རིང་པར་འགྱུར། །དུས་གསུམ་སངས་རྒྱས་ཐུགས་རྗེས་ཀྱང་། །བྱང་ཆུབ་སེམས་ལ་དཔྱད་དུ་མེད། །སེམས་དེ་མ་སྐྱེས་སྟོང་བདག་མེད། །སྟོང་པ་ཉིད་ནི་འབྱུང་གནས་པ། །རྟེན་དང་རྟེན་མེད་རང་གྲོལ་བ། །འདོད་པ་ཆེན་པོས་ཡེ་སངས་རྒྱས། །ཞེ་སྡང་རྣམ་དག་མངོན་སངས་རྒྱས། །ཕྲག་དོག་དབང་རྫོགས་དེར་སངས་རྒྱས། །གཏི་མུག་ཐིག་ལ་སྤྲོས་མེད་རྒྱས། །ང་རྒྱལ་མངོན་པའི་བདེ་ཆེན་རྒྱས། །སྐུ་ལྔ་ལམ་ལྔ་སྤང་བྱ་ལྔ། །མགོ་ཟླུམ་རང་རྒྱལ་སེམས་དཔའ་དང་། །བྱ་བ་སྤྱོད་པ་རྣལ་འབྱོར་གྲགས། །སྐུ་ལྔ་བདེ་བའི་ཡེ་ཤེས་ལྔ། །བསྐྱེད་དང་རྫོགས་དང་ཆེན་པོའི་ངང་། །བདེ་ཆེན་སངས་རྒྱས་ཕུག་པ་རྐྱང་། །རང་སྔགས་དང་བཅས་རྟེན་ལ་འཕོ། །འགྱུར་བ་མེད་པའི་སྦྱོར་བ་ཡིན། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཐུན་སྔགས་དྲག་པོ་འདི་བཏོན་ནོ། །ཨེ་མྱགས་ལ་རྔུབས་མུག་ཤག་ཀ་དུན། དགྲ་བོའི་སྲོག་ལ་ཐུན་བྷྱོ། ནྲྀ་ར་ཛ་ཡཾ་རཾ་ཤག་ཙིཏྟ་རྦད། དགྲ་བོའི་སྲོག་
ལ་ཧུར་ཡཾ་ཐུཾ་རི་ལི་ལི་བྷྱོ། དྲག་པོ་སྔགས་ཀྱིས་སྦྱོར་བའི་མཆོག །དུག་མདའ་ཁོང་དུ་བསྐྱལ་བ་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། སྔགས་ཀྱི་ཡོན་ཏན་རྫོགས་པའི་ལེའུ་སྟེ་ཉི་ཤུ་པའོ།། །།དེ་ནས་ཡང་བཅོམ་ལྡན་འདས་ཀྱིས་བསམ་གཏན་རང་རྒྱུད་ཀྱི་འཁོར་ལོ་འདི་གསུངས་སོ། །ཉམས་དགའ་དབེན་པའི་བདེ་གནས་སུ། །བདེ་བའི་གནས་ལ་བདེ་བའི་མཆོག །བདེ་བ་ཆེན་པོའི་དོན་ཉིད་ལས། །བདེ་བའི་ཡེ་ཤེས་རང་གསལ་བརྟག །ཡེ་གེ་སྒྲ་བཅས་སྨིན་པར་གཟུངས། །སྒྲ་ཉིད་དོན་དམ་སྙན་པར་གྲགས། །ཡི་གེའི་འཁོར་ལོ་བདག་ཉིད་རྫོགས། །བརྡའ་དོན་སྤྲད་པའི་གདམས་ངག་ཡིན། །སྐུ་ཉིད་ཕྱག་རྒྱ་བརྟན་གསལ་ལ། །སྦྱི་བོ་སུམ་ཅུ་རྩ་གཉིས་མཛེས། །བདེ་བ་ཆེན་པོ་ཧ་ཉིད་དབུས། །ཨོཾ་དང་གབ་པའི་རྩ་བ་བཅུ། །བཤིག་པ་ལྔ་དང་ཡ་ཡིས་གང་། །ཆོས་ཀྱི་འཁོར་ལོ་འདབ་བརྒྱད་དབུས། །ཨ་དང་རྩ་བ་བཅུ་གཉིས་པ། །འདབ་བརྒྱད་སུལ་བཞི་གང་བར་མཛེས། །དྭངས་མ་བཞི་ཡི་རྩ་སྦུབས་ན། །དམར་ལེན་འབྲུ་བརྒྱད་བཅུ་གཉིས་གང་། །ལྟེ་བ་དྲུག་ཅུ་རྩ་གཉིས་ལ། །མགོ་དགུའི་རྩ་བ་བཅུ་དྲུག་དང་། །དྲུག་པོ་གནོད་སེར་དྲུག་ཅུ་གཅིག །འབྲུ་གཉིས་གནས་མཐུན་ལྟོ་སྦྱོར་བ། །མེ་རླུང་འཁོར་ལོ་བསད་དང་བསྐོར། །རྒྱ་གྲམ་དག་དང་རྩིབས་དྲུག་པ། །ཡཾ་རཾ་དབུས་ཉིད་བག་ཆགས་དྲུག །རྩ་གསུམ་སྲོག་ཤིང་བདེ་ཆེན་ལས། །རྐྱེན་གྱིས་སྦྱོར་ན་གང་ཞིག་འབར། །ཙིཏྟའི་སྟེང་ན་ཐིག་ལེ་ཧཱུཾ། །ཀུན་གྱི་བྱེད་པ་བསྐུལ་ཞིང་འཕྲོ། །ཡཾ་ལས་ཡེ་ཤེས་བདེ་བ་བྲོད། །བདེ་བ་ལུས་ལ་འབར་ཞིང་གང་། །བག་ཆགས་ས་བོན་དྲུག་བསྲེགས་ནས། །གྱེན་དུ་འབར་ཞིང་ཕྱག་རྒྱར་གསལ། །བདེ་ཆེན་ཧཱུཾ་ལས་བདེ་བའི་རྒྱུན། །བསྐུལ་ཞིང་སྤྱོད་པས་ཞུ་ཞིང་འབར། །ཡུམ་ཡང་རྟོག་མེད་དེ་བཞིན་ཉིད། །གསང་ལམ་ཁྲུས་བྱས་དགྲམ་བཀྲམ་ལ། །རྩ་ལམ་འོད་འཕྲོ་བག་ཆགས་སྦྱོངས། །བྷ་གའི་གནས་སུ་ཕོ་བྲང་བཏབ། །རང་གི་བདེ་བ་དབབ་ཅིང་བསྐྱིལ། །རྩ་ལམ་བགྲོད་པ་ཤུགས་ཀྱིས་གང་། །
བདེ་བའི་ཡེ་ཤེས་ཤུགས་ཀྱིས་མྱོང་། །སེམས་ཀྱི་དམིགས་པ་རྟོག་མེད་མཉམ། །རྡོ་རྗེའི་བར་དུ་ཐུན་མོང་བདེ། །ཐུན་མོང་བུམ་པའི་བགྲོད་པ་ཐོབ། །རྡོ་རྗེའི་སྐེད་པ་མཆོག་དགའ་བསྐྱེད། །ཁྱད་པར་གསང་བའི་རིམ་པ་ཐོབ། །རྡོ་རྗེ་གསང་བའི་བྷ་ག་ལ། །བདེ་བའི་ཡེ་ཤེས་རང་ཉམས་བསྟར། །ས་ཧ་ཛ་ཡི་བདེ་བ་སྐྱེས། །བདེ་བ་ཆེན་པོ་ཉིད་དུ་རྫོགས། །བདེ་བའི་ཡེ་ཤེས་བྷ་གར་མནོས། །རྟོག་མེད་པ་དང་མཉམ་པར་གནས། །ཡུམ་གྱི་བདེ་བའི་ཡེ་ཤེས་ལ། །མཉམ་པ་ཉིད་ཀྱིས་རོ་ཡི་ཚོར། །དགའ་བྲལ་དགའ་བ་རོ་དང་ལྡན། །མཉམ་པ་ཉིད་ཀྱི་ངང་དུ་རྫོགས། །བྷ་གར་བསྐྱལ་བ་ཆོས་ཀྱི་སྐུ། །འདབ་བརྒྱད་གང་ཞིག་ཕྱག་རྒྱར་གསལ། །བདེ་བའི་ཡེ་ཤེས་ལོངས་སྤྱོད་སྐུ། །རྩ་ལམ་ཤིན་སྤྲོས་བྱང་ཆུབ་སྐུ། །ནཱ་སའི་ལམ་བརྒྱུད་གཉིས་དོན་སྦྱངས། །སྤྲུལ་པས་འགྲོ་དོན་མཛད་པའི་སྐུ། །བདེ་བའི་ཡེ་ཤེས་ནམ་མཁའི་བཅུད། །འདོད་ཆགས་ཆེན་པོའི་ཚུལ་གྱིས་སུ། །ཡེ་ཤེས་འཁོར་ལོ་ཡོངས་རྫོགས་བསྡུ། །རྡོ་རྗེ་གསང་བའི་ལམ་ལས་དྲངས། །བསྒྲུབ་པར་བྱ་བའི་ལུས་སུ་བཟུང་། །འདོད་ཆགས་ཉིད་ན་ཡེ་ཤེས་ཏེ། །ཕྱག་རྒྱ་བསྟེན་པས་རང་གྲོལ་བའོ། །འཆི་མེད་ཚེ་ཡི་དབང་ཐོབ་བསྟན། །བསྐུལ་བ་གཅིག་གི་མན་ངག་ཡིན། །བདེ་བའི་རོ་ཡིས་གང་ཞིག་འབར། །ཡབ་ཡུམ་གཉིས་སུ་མཉམ་པར་གནས། །གནས་པ་བརྟན་པ་མན་ངག་ཡིན། །མཆོད་དང་རྡོ་རྗེའི་བཟླས་པ་ལ། །དབུགས་དང་ཚོར་བ་ཞེན་ཆགས་བྲལ། །ཉམས་མྱོང་བརྟན་པའི་མན་ངག་ཡིན། །ཆོས་སྐུ་འགག་མེད་ལྷུན་གྱིས་གྲུབ། །ཡེ་ཤེས་ཆེན་པོའི་ཕྱག་རྒྱར་གསལ། །བྱ་བ་ཆེན་པོར་ཐམས་ཅད་རྫོགས། །འཆི་འཕོ་མེད་པར་ལྷུན་གྱིས་གྲུབ། །རྟེན་དང་མི་གནས་དྲང་པོར་གནས། །རྡོ་རྗེའི་སྐུ་རུ་ངང་གསལ་བ། །སྐུ་ལ་མི་ཟད་རྒྱན་འཁོར་ལོ། །མི་གཡོ་མི་བསྐྱོད་ཆོས་ཉིད་རྒྱས། །འཁོར་འདས་སྣང་སྲིད་རང་གྲོལ་ཡིན། །འདི་ནི་བདེ་དང་སྨིན་པའི་ལས། །སྦྱོར་མེད་སྦྱོར་འདས་སྦྱོར་བའི་མཆོག །འདི་ལ་ཁྱེའུ་དང་བུ་མོ་ཞེས། །ཁ་དོག་དབྱིབས་དང་
མཚན་མ་རུ། །བརྟགས་ཤིང་ཞེན་པ་ཡོད་མ་ཡིན། །ཐིག་ལེ་གཅིག་གི་ངང་ལས་འདས། །མི་གཡོ་གཡོས་མེད་གཡོ་བ་མེད། །མ་སྦྱངས་སྦྱངས་མེད་ས་ཡི་མཆོག །ཟིལ་གྱིས་གནོན་པའི་ས་རུ་བསྟན། །སྲ་བྱེད་ས་ནི་རྡོ་རྗེའི་ས། །འགྱུར་བ་མེད་པར་ལྷུན་གྱིས་གྲུབ། །མ་བཙལ་བགྲོད་ཐོབ་མེད་པའི་ལམ། །བདེ་ལམ་འཇོག་པ་རྒྱན་ལྡན་ལམ། །རང་རྒྱུད་པ་ཡི་འཁོར་ལོ་ལ། །འཁོར་ལོའི་གནས་སུ་འཁོར་ལོ་བསྟན། །དམ་ཚིག་འཁོར་ལོ་བསྟན་པར་གསུངས། །ལྷ་ཡི་འཁོར་ལོ་ལགས་ཐོབ་ནས། །ཡེ་ཤེས་འཁོར་ལོས་དབང་བསྐུར་བྱ། །རིག་པའི་འཁོར་ལོས་ཐོག་ཏུ་དབབ། །ཤུགས་ཀྱིས་འཁོར་ལོས་འཕེན་ཞིང་འཇོམས། །འཁོར་ལོ་རང་གནས་སྦྱོར་བར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། བསམ་གཏན་རང་རྒྱུད་ཀྱི་འཁོར་ལོ་བསྟན་པའི་ལེའུ་སྟེ་ཉི་ཤུ་གཅིག་པའོ།། །།དེ་ནས་ཡང་བཅོམ་ལྡན་འདས་ཀྱིས་སྲིན་མོ་ལྕགས་ཐག་མགོ་དགུ་མའི་སྦྱོར་བ་འདི་གསུངས་སོ། །ལྔ་བརྒྱ་དུས་ཀྱི་ཐ་མ་ལ། །རྒྱལ་བའི་བཀའ་ལས་འདས་པ་དང་། །མཚམས་མེད་ལྔ་ལ་སྤྱོད་པ་དང་། །དགོན་པའི་གནས་སུ་ཕྲ་མ་དང་། །དམ་ཆོས་དགེ་བཅུ་སྨོད་པ་དང་། །བདེན་པའི་དོན་བོར་ལོག་ལྟ་སྤྱོད། །དེ་ཚེ་སྔགས་ཀྱི་དམོད་པ་བོར། །དུར་ཁྲོད་ཤིན་ཏུ་དབེན་པ་རུ། །མཆོག་གསུམ་ཚང་བའི་གནས་བཙལ་ལ། །གདེང་གསུམ་སྔགས་ཀྱི་དམོད་པ་བཅའ། །དེ་ཡང་རྣམ་པ་གཉིས་ཡིན་ཏེ། །ལུས་སྲོག་དབྱེ་དང་ལོ་ཏོག་གཞོམ། །དང་པོའི་སྦྱོར་བ་འདི་ལྟ་སྟེ། །རྒྱ་ཤོག་དུར་ཁྲོད་རོ་རས་ལ། །སྨེ་བ་ལྔ་ཡི་ཐོད་བཅས་ལ། །ནི་རཾ་སུ་ཡིས་མདོག་བཏོན་ལ། །ཐིག་སྐོར་རིམ་པ་བཞི་རུ་བསྐོར། །དབུས་སུ་གྲུ་གསུམ་བརྣག་པའི་གཟུགས། །རུས་ཁམས་མིང་དང་སྙིང་པོ་བྲི། །ཟླ་གམ་དབང་སྡུད་བསྲུང་བའི་ལྷ། །ཕྱི་རིམ་རྒྱ་གྲམ་འཕེན་པའི་སྔགས། །རྩ་བར་དྲིལ་བའི་འབྲུ་བརྒྱད་དགོད། །ཡང་ལོགས་བཅུ་གཉིས་འཁོར་ལོའི་རྩིབས། །བླ་དང་སྲོག་འགུགས་དྲག་པོ་དགོད། །
ཐ་མའི་རྩིབས་ཆེན་བརྒྱད་གཉིས་ལ། །མཚོན་ཆའི་རྩེ་མོའི་སྔགས་མགོའི་ནང་། །ལུས་སྲོག་འབྱེད་ལ་ནད་བདག་དགོད། །བར་དུ་འཁོར་ཡུག་ལྟོ་སྦྱོར་མིང་། །བཀོད་པ་ཕག་མོའི་ལྟོ་བར་བཅའ། །གྲི་ཁྲག་ནད་ཁྲག་དུག་ཆུས་བསྐུ། །ཁ་སྦྱོར་ཚོན་གྱིས་རྒྱ་གྲམ་བསྡམ། །སྤྱང་ཀི་དར་མའི་ཐོད་པར་གཞུག །ལིངྒ་དུག་དང་གྲོག་མཁར་ས། །མཁར་རྒོད་དག་ལ་མཆོག་ཏུ་བྱ། །གཞི་བཅས་ཐོད་ཆེན་ནང་དུ་བརྣག །གྲུ་གསུམ་མཎྜལ་ལྷོ་ནུབ་ཏུ། །ཆག་གང་ཐུར་དུ་བརྐོས་ལ་གཞུག །དམེ་ཁྲག་ནལ་ཁྲག་ར་རོག་ཁྲག །ཡུགས་ས་ཕོ་མོ་གྲི་བོའི་ཁྲག །ཐོད་ཆེན་ལིངྒ་དེ་བཞིན་མནན། །ལྕགས་ཕྱེ་ཟངས་ཕྱེ་རྡོ་ཕྱེ་དང་། །ཡུངས་ཀར་ཐལ་ཆེན་དུག་ངར་བཅས། །ཐོད་ཚལ་ནང་དུ་དུག་ངར་བཤམ། །སྔགས་པས་གསལ་གསུམ་ཟིལ་གནོན་བསྒོམ། །མདུན་ན་ཞིང་བསྣོལ་ཉི་མ་ལ། །སྤྲུལ་པའི་མ་མོ་སྲོག་གཅོད་མ། །མགོ་དགུ་ཕྱག་ཀྱང་བཅོ་བརྒྱད་ལ། །ཀྵ་དང་རག་མོ་ཐུགས་ཀར་བསྟན། །དབུ་དགུའི་སྟེང་མ་བྱ་ཡི་དབུ། །དུར་བྱ་ཁྲ་དང་བཞད་ཀྱི་དབུ། །ནང་ཁྲོལ་གློ་སྙིང་ཟ་ཞིང་རྔམས། །བར་གྱི་དབུ་གསུམ་དུད་འགྲོའི་དབུ། །དོམ་དང་དྲེད་དང་ཆུ་སྲིན་དབུ། །རྩ་དང་ཁྲག་དང་ནང་ཁྲོལ་ཟ། །རྩ་བའི་དབུ་གསུམ་ཁྲོ་མོ་སྟེ། །གཡས་དཀར་གཡོན་དམར་དབུས་མཐིང་ལ། །མཆེ་བ་ཟངས་ཡག་མི་རོ་འབྲུལ། །སྤྱན་ནས་ཁྲག་འཛག་དུག་རླངས་ཤངས། །སྐུ་སྟོད་ཞིང་ལྤགས་ཐོད་པ་སྦྲུལ། །སྐུ་སྨད་རེ་ལྡེ་དྲིལ་བུ་ཁྲག །ཕྱག་གཡས་དགུ་ན་བསྣམས་པ་ནི། །མངོན་དུ་སྒྲོལ་བའི་སྙིང་སྦྲམ་འཛིན། །གཡོན་པ་དགུ་ན་ཐོད་ཟོར་བསྐྱོད། །སྟག་དང་སྤྱང་ཀི་བ་གླང་མོན། །གྲི་བོ་སྣོལ་མོ་ཁྱི་ནག་ཕག །འཐོམ་ནག་གཡས་ལ་དུག་ཁྲག་ཟོར། །ཞབས་བརྒྱད་དྲེགས་པའི་སྙིང་གར་བརྫིས། །འགྲོ་བ་སྒྲོལ་ཕྱིར་གར་སྟབས་འགྱིངས། །སྐྲ་དང་བ་སྤུ་མེ་རུ་འབར། །དེ་ལ་བཀའ་བསྒོ་བསྐུལ་ཞིང་མངག།འཁོར་ལོ་ཐོད་པར་ཐུན་ཕབ་ལ། །དང་པོ་ཐུན་དེ་རབ་གནས་བརླབ། །བརྒྱ་ཚོ་གཉིས་ཀྱིས་དབང་དུ་བསྡུ། །གསུམ་པས་ཐུན་གྱི་རྫས་ལ་བསྡིམ། །བཞི་པས་ཤ་ཟ་མཚོན་ཆར་བརླབས། །ལྔ་པས་རླངས་
འཕྲོ་ལྡེག་ཅིང་འཆོལ། །དྲུག་པས་བླ་དང་ཚེ་སྲོག་བསྡུ། །བདུན་པས་དཀར་ནག་མཚམས་སུ་བསྡིམ། །བརྒྱད་པས་སྲོག་གི་མེ་མར་བསད། །དགུ་པས་དྭངས་སྙིགས་རྒྱུད་ལས་དབྱེ། །དགུ་སྐོར་ཐུན་གྱིས་བརྣག་པ་ཡི། །ལས་གྲུབ་མཐའ་རུ་མནན་གཟིར་བྱ། །བྲག་དམར་སྲིན་མོའི་སྒྲོམ་དུ་མནན། །མནན་པའི་སྟེང་དུ་དམིགས་བྱ་ལ། །བསད་པའི་ཐུན་ཟོར་ཡང་ཡང་བརྡེག །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་གབ་པ་འདི་བཏོན་ཏོ། །ཨེ་བཾ་རཾ་ཁཾ་ཤིག་ཙིཏྟ་རྔུབས་རྩལ་དྲེང་ཛ། ཨེ་བཾ་རཾ་ཁཾ་ཤིག་ཙིཏྟ་རྔུབས། དགྲ་བོའི་སྲོག་ལ་ཐུན་རྨུགས་ལིང་ཤག་རྦད། ཨེ་བཾ་རཾ་ཁཾ་ཤིག་ཙིཏྟ་རྔུབས། དགྲ་བོའི་སྲོག་ལ་དྲེང་དྲེང་ཡཾ་ཡཾ་ཐུཾ་རི་ལི་ལི་བྷྱོ། ཙིཏྟ་གཟིར་ཐུཾ་སྟྭཾ་བྷ་ཡ་ནན། དེ་ནས་བཅོམ་ལྡན་འདས་ཀྱིས་སྲིན་མོ་ལས་ལ་སྐུལ་བ་འདི་གསུངས་སོ། །ཚེ་བདག་ཐུགས་ཀྱི་ཡང་སྤྲུལ་མོ། །སྲིན་མོ་གཅོད་པར་བྱེད་པ་བྷྱོ། །ཆོས་སྐུ་གཉིས་སུ་མེད་པ་ལས། །འཇམ་དཔལ་ཚེ་བདག་ནག་པོའི་སྐུ། །ཐུགས་ཀྱི་སྤྲུལ་པ་མགོ་དགུ་མ། །ཡང་སྤྲུལ་བདུད་དང་ཤ་ཟའི་ཚོགས། །མ་ལུས་འཇོམས་པའི་མཐུ་མོ་ཆེ། །དུག་དང་ཁྲག་གི་མཚོ་དཀྱིལ་ནས། །དུག་རླངས་མུན་ནག་གཏིབས་པ་ན། །སྲིན་མོ་ཁ་འདར་མགོ་དགུ་མ། །བདུད་དང་མུ་སྟེགས་བྲན་དུ་འཁོལ། །སྲིད་པའི་མ་མོ་ལས་ལ་བསྐུལ། །དོམ་དང་ཁྱི་མོ་བླ་ལ་འགྱེད། །དྲག་ཏུ་བསྐུལ་བ་མཆིས་ཙ་ན། །སྟོང་གསུམ་ཤ་ལ་རོལ་ཅིང་གསོལ། །ང་ཡི་ཤ་སྐལ་གང་ན་ཡོད། །སྟོང་གསུམ་ཟོས་ཀྱང་ང་མ་འགྲངས། །སྟོང་གསུམ་ཁྲག་ལ་མྱོས་ཤིང་འཐུང་། །ང་ཡི་ཁྲག་སྐལ་གང་ན་ཡོད། །སྟོང་གསུམ་ཁྲག་གིས་ང་མ་འགྲངས། །དགྲ་བོའི་ཤ་དང་ཁྲག་ལ་རོལ། །དྲག་ཏུ་བསྐུལ་བ་མཆིས་ཙ་ན། །རི་རབ་རྩེ་ནས་སྙིལ་ཀྱིན་འོང་། །རྒྱ་མཚོ་གཏིང་ནས་རླབ་ཅིང་འོང་། །དགྲ་བོའི་ཁྲག་ལ་མྱོས་ཤིང་འོང་། །དྲག་ཏུ་བསྐུལ་བ་མཆིས་ཙ་ན། །རང་ཤ་རང་གིས་ཟ་ཞིང་འོང་། །རང་ཁྲག་རང་གིས་འཐུང་ཞིང་འོང་། །རང་ཤ་ཟོས་ཀྱང་ང་མ་འགྲངས། །རང་ཁྲག་འཐུངས་ཀྱང་ང་མ་ངོམས། །དགྲ་བོའི་ཤ་དང་ཁྲག་ལ་རོལ། །དྲག་ཏུ་བསྐུལ་བ་
མཆིས་ཙ་ན། །གནམ་ས་རི་ཀླུང་བཟློག་ཅིང་འོང་། །རི་རབ་སྒོང་རྡོར་འཕེན་ཞིང་འོང་། །དམ་ཉམས་དགྲ་ལ་ཟོར་ཐུན་རྒྱོབ། །དྲག་ཏུ་བསྐུལ་བ་མཆིས་ཙ་ན། །ལུས་ཅན་མ་ལུས་བྲན་དུ་འཁོལ། །དམ་ལས་འདས་པའི་ཙིཏྟ་འབྱིན། །དགྲ་བོའི་ཁོང་ནས་ཙིཏྟ་ཕྱུང་། །དྲག་ཏུ་བསྐུལ་བ་མཆིས་ཙ་ན། །སྣང་སྲིད་བྷྱོ་བཟློག་མེ་ཡིས་བསྲེག །དགྲ་བོའི་ལུས་སྲོག་བག་ཆགས་བསྲེག །དྲག་ཏུ་བསྐུལ་བ་མཆིས་ཙ་ན། །ལུས་ཅན་བླ་ལ་རྦད་ཅིང་རྒྱུག །སྤྲུལ་པའི་ཁྱི་མོ་ནག་མོ་དགུ། །དགྲ་ལ་རྦོད་ལ་བླ་དང་ཕྲོལ། །དྲག་ཏུ་བསྐུལ་བ་མཆིས་ཙ་ན། །སྟོང་གསུམ་ནད་ཀྱི་དྲ་བར་འཆང་། །དམ་ཉམས་དགྲ་ལ་རིམས་ནད་ཕོབ། །དྲག་ཏུ་བསྐུལ་བ་མཆིས་ཙ་ན། །སྣང་སྲིད་ལུས་སྲོག་དྭངས་སྙིགས་འབྱེད། །དགྲ་བོའི་ལུས་སྲོག་དྭངས་སྙིགས་ཕྱེ། །ཚེ་བཀྲག་བསྡུས་ལ་རྩ་རྒྱུད་ཆོད། །སྲིན་མོ་ལྕགས་ཐག་མགོ་དགུ་མ། །སྤྱན་ནས་ཁྲག་འཛག་ཟུ་ལུ་ལུ། །ཤངས་ནས་དུག་ཁྲག་བུན་ནེ་བུན། །སྙན་ནས་འབྲུག་སྒྲ་དི་རི་རི། །ཞལ་གྱི་རྔམ་སྒྲས་སྟོང་གསུམ་ཕུང་། །གཡས་པ་དགུ་ན་སྙིང་སྦྲམ་དགུ། །ཐོགས་ནས་དགྲ་བོའི་ཙིཏྟ་འབྱིན། །གཡོན་པ་དགུ་ན་ཐོད་པ་དགུ། །དགྲ་ལ་ཁྲག་མདའ་དུག་ཟོར་འཕེན། །དགྲ་བོའི་ཁོང་དུ་དུག་མདའ་རྒྱོབ། །ཀླད་པ་འཐོན་ལ་ཀླད་ཁྲག་ཆོམ། །ལུས་སྲོག་ཕྲོལ་ལ་ཙིཏྟ་གཏུབས། །ཁྲག་མདའ་དུག་ཐུན་ཕུང་ཟོར་རྒྱོབ། །སྔགས་པའི་སྐུ་དགྲ་སྒྲོལ་ལ་ཤོག །བྱས་ལ་ཕོ་ཉ་བླ་དེད་ཀྱི་སྔགས་བཟླས་ལ་དགྲ་ལ་རྦད་དོ། །འཁོར་ལོ་ཐུན་བརྡེག་ལས་ཀྱི་མཆོག །དེ་ནས་ཡང་བཅོམ་ལྡན་འདས་ཀྱིས། སྲིན་མོ་གཟིར་ཏེ་ཉེ་བར་ལས་ལ་མངག་པ་འདི་གསུངས་སོ། །གྲོག་མཁར་རྒྱ་ཚིལ་ས་དམར་ལ། །བོང་བུའི་བདུད་རྩིས་ལེགས་སྦྲུས་ལ། །སྲིན་མོའི་ལྡེར་སོ་གོང་བཞིན་བཅའ། །ཁ་ཁྱེར་གསུམ་སྙིང་གར་གྲུ་གསུམ་དོ་བྲིས་ལ་ཡང་ལྡན་གོང་དུ་བརྐོ། །སྙིང་པོ་འབྲུ་གཉིས་འབྲུ་དགུ་གཞུག །དྲག་སྔགས་བཟླས་ལ་སྟོབས་ཀྱིས་གཟིར། །སྲིན་མོ་བོས་ལ་ཁྲག་གིས་བྲན། །ཕུར་པས་བསྡིགས་ལ་དབང་དུ་བསྡུ། །སྲིན་མོ་བཀའ་ནོད་ཞབས་འོག་གཞུག །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས།
གཟིར་དང་སྤོགས་པའི་དྲག་སྔགས་འདི་བཏོན་ཏོ། །ཨེ་ཀ་ཡ་མ་བཾ་རཾ་རག་མོ་ཡཾ་ཧུར་ཐུཾ་ཛ། དུན་དུན་ཏྲིག་ནན། ཁཾ་བཾ་རཾ་ཏེ་ཤག་ཙིཏྟ། དགྲ་བོའི་སྲོག་ལ་ཧུར་ཐུམས་ཛ། མཱ་ར་ཡ་རྦད། སྙིང་གའི་སྙིང་པོ་སྔགས་བཏོན་ལ། །ལིངྒའི་མིང་རུས་བརྣག་པ་གཞུག །ཞག་གསུམ་ཐུན་བྲབ་རོ་ཁང་མནན། །འབྱུང་བ་དཀྲུག་པས་ལས་རྣམས་འགྲུབ། །རག་མོ་དཀོན་མོའི་སྤོགས་པར་བཤད། །དེ་ནས་བཅོམ་ལྡན་འདས་ཀྱིས་འབྲས་བུ་གཞོམ་པའི་སྦྱོར་བ་འདི་གསུངས་སོ། །དམེ་ཐོད་ནང་དུ་མེ་ལོང་བསག །གསེར་དངུལ་ཟངས་ལྕགས་རྡོ་ནག་བཞག །ར་དམར་ནལ་བུ་ཁྱི་ནག་སྙིང་། །སྟེང་དུ་གླིང་བཞི་རྩིབས་བརྒྱད་དགབ། །དེ་སྟེང་སྲིན་མོའི་སྐུ་བཞག་ལ། །མཐིང་ནག་དར་གྱིས་བཀབ་ལ་བཞག །ཁྲག་སྣ་གསུམ་དང་དུག་བསྲེས་ལ། །ལིངྒ་མིང་བྱང་གཡག་རུར་གཞུག །རྨྱུག་མ་ཚིགས་གསུམ་སྨིན་པ་ལ། །ལྟས་ངན་སྒྲོ་བཞིས་བསྒྲོན་ལ་བཞག །ཞག་ལྔའི་བར་དུ་དྲག་སྔགས་བཟླས། །གསེར་དེ་ཞུ་ཞིང་འཕེལ་ཆད་ན། །མདའ་ལྕགས་བླུགས་ལ་དགྲ་ལ་བརྡེག །སྲིན་མོ་དྲག་ཏུ་བསྐུལ་ལ་འཕང་། །དྲག་སྔགས་སྦྱོར་བ་གཉིས་སུ་བྱ། །བཾ་རཾ་ཁཾ་ཤིག་ཙིཏྟ་རྔུབས་འུར་ཏོག་ཕྲཾ་ཤར་ཛ་ལ་རཾ་སྨེ་ཤ་ཧྲིལ། ཧུར་ཁཾ་ཤ་ཡེང་པྲོཾ་ཤར་སིང་ཁྲོལ་བྷྱོ། མ་བྱུང་སྤོགས་ན་སྔགས་འདི་བཟླ། །ཁཾ་ཙིཏྟ་བཾ་ཤག་རྔུབས་རཾ་པྲོཾ་ཧྲིལ་ཏོག་ཤར་ཛ་ལ་འུར་རཾ་ཛ། སྨ་ཤ་བྷྱོ། སྲིན་མོའི་ལས་འདི་རྒྱས་པར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ལོ་ཐོག་མཐའ་སྡུད་ཀྱི་ལེའུ་སྟེ་ཉི་ཤུ་གཉིས་པའོ།། །།དེ་ནས་ཡང་བཅོམ་ལྡན་འདས་ཀྱིས་ལས་ཀུན་གྱི་མཐའ་སྡུད་དུ་གཤིན་རྗེ་བྱེ་བ་དགུ་ཁྲིའི་སྦྱོར་བ་འདི་གསུངས་སོ། །དུར་ཁྲོད་གདུག་པའི་དབེན་གནས་སུ། །རང་སེམས་དབེན་པའི་མཚམས་བཅད་ལ། །རྟེན་རྫས་དམ་རྫས་གྲི་བོའི་སྙིང་། །ཐོད་པ་རི་མོ་བདེ་ལྡན་དེར། །དྲག་པོའི་ཧོམ་ཁུང་གྲུ་གསུམ་རྩང་། །བརྣག་པའི་རྟེན་གཟུགས་རྒྱུ་རྐྱེན་དྲུག །བ་ཡི་ལྕི་བ་ས་དམར་དྲུག །འགར་ཏའི་ཨཱ་མི་འཁར་རྐང་ལ། །ལིངྒ་སོར་བརྒྱད་དབང་པོ་དོད། །ནད་
ཁྲག་ཚ་བ་དུག་ཆུ་བསྐུ། །རི་ཤོ་དང་ནི་གྲོ་ག་ལ། །དེ་ཡི་མིང་དང་རུས་བྲིས་ལ། །སྙིང་གར་གླན་ལ་སྔོ་དམར་བསྡམ། །ཐོད་པར་བཅུག་ལ་དོང་དུ་གཞུག །ཞིང་རས་རོ་རས་ཞབས་མ་ལ། །སྨེ་བ་ལྔ་ཡི་ཐོད་པ་བྱ། །གཅོད་པའི་འཁོར་ལོ་ཆ་གཉིས་བྲི། །དབུས་ནས་ཐིག་སྐོར་བཞི་རུ་བསྐོར། །དབུས་སུ་གྲུ་གསུམ་ཟླ་གམ་གསུམ། །ཕྱི་རིམ་འཁྲུལ་མིག་རྒྱ་གྲམ་ལྡན། །ཡང་ལོགས་རྩིབས་ཆེན་བཅུ་གཉིས་བཅའ། །མཐའ་མ་གདུག་པའི་ར་བས་བསྐོར། །སྲིད་པའི་རུས་སྦལ་ལྟོ་བར་བཅའ། །དེ་ལ་གནས་པའི་རིམ་པ་ནི། །དབུས་སུ་བརྣག་པའི་སྙིང་པོ་གཟུགས། །ཟླ་གམ་གསུམ་ལ་བསྲུང་བའི་ལྷ། །རྒྱ་གྲམ་རྩ་བའི་དྲག་སྔགས་ལུས། །ཡང་ལོགས་རྩིབས་ལ་སྤུ་གྲི་རྦད། །གདུག་པའི་གསེབ་ཏུ་རྩ་བའི་སྔགས། །མཚམས་དང་མུ་རན་མིང་རུས་ཁམས། །བཀོད་ལ་ཚ་བ་དུག་ཆུས་བསྐུ། །ཐོད་པའི་སྟེང་དུ་འཁོར་ལོ་བཅའ། །དྲག་སྔགས་དམོད་པ་ཞག་དགུར་བཟླས། །རང་ཡང་ཟིལ་གནོན་སྐུ་རུ་གསལ། །བྱེ་བ་དགུ་ཁྲི་མདུན་དུ་བསྐྱེད། །ཞིང་བསྣོལ་རཱུ་ཏྲའི་གདན་སྟེང་ན། །ཆུ་གླང་སྔོན་པོ་སྦྲུལ་རིས་ཅན། །ཐོད་པ་ནོར་བུས་བརྒྱན་པ་ལ། །ཉི་ཟླ་དང་བཅས་གདན་ལ་གནས། །སྐུ་མདོག་སྔོ་ནག་གཏུམ་ཁྲོ་བརྗིད། །སྐུ་སྟོད་གླང་ཆེན་སྟག་ཤམ་ཞིང་། །སྦྲུལ་དང་ཐོད་པ་རིན་པོ་ཆེས། །དབུ་དང་ལྷུ་ཚིགས་ཕྱག་ཞབས་བརྒྱན། །ཞལ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་ཞལ། །གཡས་པ་གསུམ་ན་རལ་གྲི་དང་། །བེ་ཅོན་ལྕགས་ཀྱི་རི་རབ་བསྣམས། །གཡོན་པ་གསུམ་ན་ལྕགས་ཀྱུ་དང་། །ཞགས་པ་རྡོ་རྗེ་རྒྱ་གྲམ་བསྣམས། །ཞལ་གདངས་སྦྲུལ་དང་མི་རོ་འབྲུལ། །སྟོད་ནས་མེ་འབར་འདབ་ཆགས་ལྡིང་། །སྨད་ནས་ཁྲག་འཛག་གཅན་གཟན་རོལ། །ཐུགས་ཀར་ཉི་མར་ཡ་དང་སྔགས། །དྲེགས་པའི་ཚུལ་དུ་ལས་ལ་བརྩོན། །རྦད་པའི་དྲག་སྔགས་གཏུམ་པར་བཟླས། །མཐའ་རུ་ཐོད་པ་ཞབས་འོག་གཞུག །ལྕགས་ཕུར་གཤིན་རྗེའི་སྐུར་བསྒོམས་ལ། །གཟིར་བ་ཁྲི་ཡིས་སྙིང་གར་གདབ། །ཕོ་ཉས་བཀུག་ལ་རྟེན་ལ་བསྡིམ། །འཁོར་ལོ་ལིངྒ་
ཐོད་པར་བཅའ། །རྫས་ཀྱི་ལིངྒ་ཕག་པར་གྲིལ། །དར་དང་རེ་བ་སྐུད་པས་བསྡམ། །གཉན་སར་གདུག་པའི་ཀླུ་ལ་གཏད། །དཔང་གཟུག་འོ་དོད་ཆོ་ངེས་གདབ། །འབྱུང་བ་ཕོ་བྲང་དོན་ཡོད་བསམ། །མནན་སྔགས་བརྒྱ་རྩ་བརྒྱད་ཀྱིས་བཅག །ལས་ཀྱི་ཁ་གསོ་ཐུན་དང་སྦྱར། །དྲག་སྔགས་བསྟུད་ལ་ལྕི་བར་བཟླས། །བླ་དག་བྱུང་ན་དྲག་སྔགས་བརྡེག །བླ་ཆེན་བཞི་ལ་རྣལ་མ་བརྡེག །སྤྲུལ་པ་བརྒྱད་པོ་དབུས་ནས་སོ། །ཡང་སྤྲུལ་བཅུ་གཉིས་མཐའ་ནས་སོ། །ཆགས་སྡང་ལྔ་ལྔ་འབྱུང་བ་དཀྲུག །གཟིར་དང་མནན་པ་ཁ་གསོ་ཟོར། །དྲག་སྔགས་སྤུ་གྲི་བདུན་དུ་སྦྱོར། །དེ་ཡིས་མ་ལུས་འཇོམས་ཤིང་འཕོ། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨེ་ཀ་ཡ་མ་ཧུར་ཡཾ་ཐིབས། དགྲ་བོའི་སྲོག་ལ་བཾ་རིལ་དུན་ཛཿ། བཾ་མྱགས་མཱ་ར་ཡ་རྦད། ཙ་ཚ་དུན་རིལ་བཾ་ལཾ་སྲོག་ལ་མྱགས། མཱ་ར་ཡ་རྦད་མཱ་ར་ཡ་མྱགས་ཙ་ཚ། དུན་རིལ་བཾ་སྲོག་ལ་རྦད། སྲོག་དུན་བཾ་མྱགས། ཙ་ལ་དུན་རྦད། མཱ་ར་ཡ་ཛཿསྲོག་ལ་སྦུར་ནན། སྙིང་གཟེར་རྦད། སྲོག་སྟྭམྦྷ་ཡ་ནན། སྲོག་ལ་ཐུན་བྷྱོ། དྲེང་ཤག་རྦད། སྦྱོར་བ་དེ་ཡིས་མ་ལུས་ཀུན། །འཇོམས་ཤིང་དྭངས་སྙིགས་འབྱེད་པར་བཤད། །དེ་ནས་ཡང་བཅོམ་ལྡན་འདས་ཀྱིས་ལས་སྣ་ཚོགས་ལ་བསྐུལ་བ་འདི་གསུངས་སོ། །ཧཱུཾ་བསྐལ་པ་བརྒྱད་ཁྲི་བཞི་སྟོང་འདས་པའི་ཕ་རོལ་ན། །འབྱུང་བ་རྟེན་གཞི་རྔམས་ཀྱི་འོག་ཤེད་ན། །རྒྱ་མཚོ་ཆེན་པོའི་གཏིང་རུམ་ན། །མུན་ཁང་ལྕགས་ཁང་སྒོ་མེད་ན། །རཱུ་ཏྲ་དྲེགས་པའི་གདན་སྟེང་ན། །གཤིན་རྗེ་བྱེ་བ་དགུ་ཁྲི་བཞུགས། །སྐུ་མདོག་མཐིང་ནག་རྔམ་པ་ལ། །དབུ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་ཞལ། །ཕྱག་དྲུག་ཕྱག་མཚན་འབར་བ་ནི། །གཡས་ཀྱི་དང་པོ་རལ་གྲི་འབར། །དགྲ་བོའི་སྲོག་རྩ་གཅོད་ཅིང་གསོལ། །གཡས་ཀྱི་བར་མ་ཞིང་དབྱུག་བསྣམས། །ཁམས་གསུམ་མ་ལུས་རྡུལ་དུ་རློག །ཐ་མ་ལྕགས་ཀྱི་རི་རབ་
བསྣམས། །དགྲ་བགེགས་ལས་ངན་གཅོད་ཅིང་གཟིར། །གཡོན་གྱི་དང་པོ་བེ་ཅོན་བསྣམས། །དགྲ་བོ་མ་ལུས་མགོ་ལུས་འཇོམས། །བར་མ་ལྕགས་ཀྱུས་དགྲ་སྙིང་འབྱིན། །ཐ་མ་ཞགས་པས་དགྲ་བོ་འགུགས། །དགྲ་བོ་ལས་ངན་སྡིག་ཅན་རྣམས། །ཁྱམས་ཁང་གནས་སུ་ཁྲིད་ལ་ཤོག །སྐུ་ལ་ལྕགས་ཀྱི་ཚེམ་ཚེམ་གསོལ། །ཞིང་དང་ཐོད་པ་སྦྲུལ་གྱིས་བརྒྱན། །སྐུ་སྨད་སྟག་ལྤགས་ཞིང་ཆུང་བརྒྱན། །སྟོད་ནས་ང་རྒྱལ་མེ་ཆེན་འབར། །སྨད་ནས་འདོད་ཆགས་ཁྲག་ཏུ་འབྲུབ། །སྐེད་ན་ཞེ་སྡང་སྦྲུལ་གྱིས་བརྒྱན། །ཞལ་ནས་དུག་གི་རླངས་པ་འདོན། །ཤངས་ནས་ཕྲག་དོག་འཚུབས་མར་འཁྱིལ། །སྙན་ནས་སྟོང་གསུམ་འབྲུག་སྒྲ་སྒྲོགས། །ཐུགས་ལས་སྤྲུལ་པ་ཕྱོགས་བཅུར་འགྱེད། །ཕོ་ཉ་བྱེ་བས་དགྲ་བོ་འགུགས། །ཡང་སྤྲུལ་དགུ་ཁྲིས་སྲོག་དབུགས་འཕྲོག །ལས་ཀྱི་མཐའ་སྡུད་ཁྱོད་ཡིན་གྱིས། །དགྲ་བོ་དམ་ཉམས་སྡིག་ཅན་རྣམས། །ལག་ཏུ་གཏད་དོ་ཤོར་ར་རེ། །འདི་ནི་བཀའ་གཅོག་དམ་དྲལ་ཡིན། །འདི་ལ་སངས་རྒྱས་མི་གནས་ཀྱིས། །འདི་ལ་དམ་ཚིག་གཉན་མི་གནས། །འདི་ལ་སྙིང་རྗེའི་གནས་མེད་ཀྱིས། །རྒྱ་མཚོ་ཆེན་པོའི་གཏིང་དུ་སྦོས། །ལྕགས་ཀྱི་རི་རབ་འོག་ཏུ་ནོན། །བྱེ་བ་དགུ་ཁྲི་དགྲ་ལ་བྷྱོ། །ལྕགས་མཁར་བཙོན་རར་དགྲ་བོ་ཆུག །དགྲ་བོའི་ཕོ་རྒྱུད་མོ་རྒྱུད་ཆོད། །བཅོལ་བའི་ལས་རྣམས་བསྒྲུབ་པར་མཛོད། །བྱེ་བ་དགུ་ཁྲིའི་སྦྱོར་བར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ལས་ཀྱི་མཐའ་སྡུད་ཀྱི་ལེའུ་སྟེ་ཉི་ཤུ་གསུམ་པའོ།། །།དེ་ནས་ཡང་བཅོམ་ལྡན་འདས་ཀྱིས་སྦྱོར་སྒྲོལ་གྱི་ལས་ལ་གོལ་བ་འདི་གསུངས་སོ། །སྦྱོར་དང་སྒྲོལ་བའི་ལས་རྣམས་ནི། །རྩོལ་བསྒྲུབ་རྟགས་དང་དཔེ་ལ་མཚོན། །རིག་པ་གཉིས་མེད་མ་རྟོགས་ན། །གོལ་བས་མུ་སྟེགས་རྟག་པར་འགྱུར། །བསྙེན་བསྒྲུབ་སྔགས་དོན་ཡོངས་རྫོགས་པ། །བྱ་བྱེད་ཐོབ་བྱ་འཐོབ་བྱེད་ལ། །རང་ཉམས་འཁྲུལ་པ་རང་ལ་ལྡོག །དེ་ཡི་རིམ་པ་འདི་ལྟ་སྟེ། །སྦྱོར་
བ་མི་ཤེས་སྦྱོར་བྱེད་པ། །གཉིས་སུ་མེད་པའི་སྦྱོར་བ་མ་ཤེས་ན། །རྟགས་ལ་དོན་གྱི་ངོ་བོར་འཛིན་པ་ཡིས། །མངལ་གྱི་གྲོང་ཁྱེར་བརྒྱུད་པའི་བདུད་ཀྱིས་ཟིན། །ཐབས་ལམ་གསང་བའི་སྤྱོད་པ་བརྟེན་ཤེས་ན། །རང་རྒྱུད་འཁོར་ལོ་རྩ་ལམ་བདེ་བས་གང་། །བསྐུལ་འབར་དབབ་བསྐྱིལ་བྱ་བྱེད་དོན་དང་ལྡན། །སྣང་སྲིད་ཆགས་པའི་སྤྱོད་པས་མེས་སྦར་ཀྱང་། །གཉིས་མེད་ཕྱག་རྒྱ་ལྷུན་གྲུབ་འབྲས་བུ་སྨིན། །བདེ་བ་ཆེན་པོ་རང་ལ་ཤར་བར་བཤད། །སྒྲོལ་བ་མི་ཤེས་སྒྲོལ་བྱེད་པ། །སྐྱེ་ཤི་མེད་པའི་དོན་དང་མི་ལྡན་ན། །རྩོལ་བས་སྒྲོལ་བ་མུ་སྟེགས་འཁྲུལ་པ་སྟེ། །ལས་ཀྱི་སྲིན་པོས་བཅིངས་པའི་བདུད་ཀྱིས་ཟིན། །བྱར་མེད་རྫོགས་པའི་སྲོག་ཀྱང་བཅད་དུ་མེད། །སྲོག་ཏུ་འཛིན་པ་ལོག་རྟོག་འཁྲུལ་པ་ཡིན། །རང་གྲོལ་གཉིས་མེད་རང་ཤུགས་ས་རུ་གྲོལ། །ཡེ་ཤེས་ཆེན་པོའི་ཕྱག་རྒྱར་རང་གྲོལ་ན། །ཁམས་གསུམ་སེམས་ཅན་ལོག་པའི་སྲོག་བཅད་ན། །སྒྲིབ་བྱང་ཚོགས་ལྡན་འབྲས་བུར་ལྷུན་གྱིས་གྲུབ། །སྤྱད་དུ་མེད་པའི་ཕྲིན་ལས་མ་ཤེས་ན། །དཔེ་ལ་མཚོན་བྱེད་རང་བཟོར་སྤྱོད་པ་དག །ལས་ཀྱི་རྣམ་སྨིན་མཉམ་པའི་བཙོན་རར་ཆུང་། །རྩོལ་བ་བྱས་པས་རྟག་པའི་བདུད་ཀྱིས་ཟིན། །ཕྲིན་ལས་ལྷུན་གྲུབ་སྤྱད་དུ་མེད་ཤེས་ན། །ལྷ་སྲིན་ཀུན་གྱི་མིང་དང་མཚན་སྨོས་ནས། །ལས་ལ་མངགས་ཤིང་ཕོ་ཉ་ཀུན་བཀྱེ་ཡང་། །བླང་དོར་མེད་པས་འབྲས་བུ་སངས་རྒྱས་ཉིད། །མ་བཙལ་མ་བསྒྲུབ་རྫོགས་ཏེ་ཡེ་སངས་རྒྱས། །བསྙེན་བསྒྲུབ་རྩོལ་མེད་སྔགས་དོན་མ་ཤེས་ན། །ཕྱི་ནང་རྟགས་ལ་ཞེན་པས་བསྙེན་ཞིང་བསྒྲུབ་པ་ཡིས། །མི་དགེ་བསོག་ལ་རྩོལ་བའི་རང་བདུད་རང་ལ་འཁོར། །མནར་བའི་དམྱལ་བའི་གནས་ལ་ཐེ་ཚོམ་མེད། །བསྙེན་བསྒྲུབ་རྩོལ་མེད་སྔགས་ཀྱི་དོན་ཤེས་ན། །སྲིད་གསུམ་རྩོལ་འཕྲོ་འདུས་པའི་སྲོག་མདངས་ལ། །ལྷ་སྲིན་ཀུན་གྱི་སྲོག་སྙིང་དྲིལ་བའི་མཆོག །དྲག་པོ་ཨེ་དང་ཡན་ལག་སྦྱོར་བ་ནི། །རྡོ་རྗེའི་བཟླས་པ་ཡེ་ཤེས་རོལ་པར་ཤེས། །གང་མཐོང་ཅིར་སྤྱད་མཐའ་གཉིས་རང་སར་
གྲོལ། །བསྒོམ་དུ་མེད་པའི་དོན་དང་མི་ལྡན་ན། །མཚན་མའི་ཁྲོ་བོ་གཞན་ནས་རྩོལ་བསྒོམ་པ། །མུ་སྟེགས་འཁྲུལ་པའི་སྤྱོད་ལམ་རྟག་པར་གོལ། །ཆོས་ཉིད་མི་དམིགས་སྟོང་པ་ནམ་མཁའ་ལས། །སྐྱེ་མེད་སྐྱེ་བའི་ཆོ་འཕྲུལ་དུ། །རང་རིག་ཕྱག་རྒྱ་ལྷུན་གྱིས་གྲུབ་པའི་སྐུ། །གཉིས་མེད་ཡེ་ཤེས་རྫོགས་ལོངས་སྤྱོད། །རྟག་ཆད་མཐའ་གཉིས་གྲོལ་བས་སངས་རྒྱས་སྐུ། །ཕུང་པོ་མི་གནས་སངས་རྒྱས་རང་གནས་པའོ། །རྟོག་དཔྱོད་འདས་པའི་སངས་རྒྱས་ལྷུན་གྱིས་གྲུབ། །འདི་མེད་རང་འཆིང་དོན་མེད་རྟག་ཆད་མཐའ། །ནམ་མཁའ་རིན་ཆེན་རྒྱ་མཚོ་ལྷུན་པོ་ལྟར། །དོན་གཉིས་སྨིན་པས་ཡོན་ཏན་ཅིར་ཡང་སྣང་། །མ་བཅིངས་གྲོལ་མེད་བགྲོད་པའི་འབྲས་བུ་སྨིན། །སྣང་སྲིད་འཁྲུལ་པ་དུག་ལྔའི་སྨག་རུམ་ནས། །སངས་རྒྱས་དྲག་སྔགས་ཡེ་ཤེས་ཉི་མ་ཤར། །བདུད་བཞིའི་གནས་སུ་ཆོས་སྐུ་བདེ་བས་བཅོམ། །བླ་མེད་སངས་རྒྱས་བདེ་ཆེན་རང་ལ་ཤར། །སྦྱོར་སྒྲོལ་བྱ་རྩོལ་རྟག་ཆད་མཐའ་ལས་འདས། །གཉིས་སུ་མེད་པར་ལྷུན་གྱིས་གྲུབ་པར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། བྱ་རྩོལ་བྲལ་བའི་ལེའུ་སྟེ་ཉི་ཤུ་བཞི་པའོ།། །།དེ་ནས་ཡང་བཅོམ་ལྡན་འདས་ཀྱིས་འཁོར་རྣམས་ལ་གསང་བ་སྔགས་ཀྱི་དྲག་སྔགས་འདི་གསུངས་སོ། །གསང་བའི་གསང་རྒྱུད་རིམ་པའི་གནས། །བདེ་བའི་ཡེ་ཤེས་རང་ལ་འཆར། །བདེ་བའི་ཡེ་ཤེས་རང་གསལ་བ། །བདེ་བ་ཆེན་པོ་མཉམ་པའི་ངང་། །བདེ་བའི་དབང་ཕྱུག་འགག་པ་མེད། །ལྷུན་གྱིས་གྲུབ་པའི་བདེ་བར་གནས། །འདི་དག་བདེ་བའི་ལམ་ཅན་ནོ། །རྒྱས་དང་བསྡུས་པའི་བྱེ་བྲག་གིས། །སྡེབ་དང་རྐྱང་པ་ཤིས་ཚད་གསུམ། །ཉེ་དང་འགྱངས་དང་དབང་དང་ལྡན། །དེ་ཡི་རིག་པ་འདི་ལྟ་སྟེ། །གཟུགས་བརྙན་འཁོར་ལོ་ཆག་གང་ལ། །ལུས་དང་སྤུ་གྲི་མཚམས་དག་ཏུ། །མུ་ཁྱུད་བཞི་ཡི་འཁོར་ལོ་ལ། །གང་བསྒྲུབ་བསད་པའི་སྔགས་ཀྱིས་མཛེས། །ཁྲོ་བོ་ནང་ལ་མ་མོ་དབུས། །
གནོད་སྦྱིན་ཕྱི་རུ་ཤེས་པར་བྱ། །རང་གི་འཁོར་ལོ་ལྟོ་བསྡེབ་པའོ། །བརྟན་པ་ལྷུན་པོ་གསལ་བ་ཡི། །ཙིཏྟ་གསང་བའི་ཕོ་བྲང་ན། །བརྒྱད་དང་བཅུ་གཉིས་རྩེ་དབུས་ཧཱུཾ། །ཁྲོ་བོའི་སྔགས་དང་མ་མོ་དབུས། །གནོད་སྦྱིན་ཕྱི་རུ་ཤེས་པར་བྱ། །མན་ངག་གསང་བའི་སྡེབ་ཏུ་བྱ། །དྲག་པོའི་ལུས་ལ་བསྙེན་པའི་སྔགས། །ཁྲོ་བོ་ལུས་ལ་མ་མོ་གདགས། །དེ་བཞིན་དྲེགས་པའི་གང་བསྒྲུབ་བསྙེན། །དེ་བཞིན་རྦད་དང་བསད་པ་སྦྱར། །དམོད་པ་ཞལ་གྱི་སྡེབ་ཏུ་གསུངས། །རང་གཤེད་དྲག་པོས་བསད་པའི་སྔགས། །ལུས་ལ་སྤུ་གྲི་མཚམས་དག་ཏུ། །རང་སྔགས་ནང་ལ་གཤེད་མ་ཕྱི། །དྲག་པོ་བསད་དང་རང་སྔགས་སྡེབ། །ལས་ཀྱི་གཤེད་སྔགས་བརྒྱ་བརྒྱ་བསྐུལ། །དེ་དག་རང་གཤེད་གསུམ་སྡེབ་ཡིན། །དེ་བཞིན་དྲག་པོ་སྔགས་ཀྱིས་སྡེབ། །བཅུ་གཉིས་ལུས་ལ་སྙིང་པོ་ཡི། །སྤུ་གྲིའི་སྦྱོར་བ་ཤིས་པ་སྟེ། །ལས་ཀྱི་ཁ་འཁྱིལ་ཡུན་དུ་བདེ། །མན་ངག་གནད་མདའི་སྦྱོར་བ་ཡིན། །ལུས་ལ་སྤུ་གྲི་བསྣོལ་མར་སྡེབ། །དགྲ་བོ་འདུལ་བའི་རྣོ་དབལ་ཡིན། །ལས་ཀྱི་བཤན་པ་རྩུབ་འགྱུར་ཏེ། །དྲུག་འགྱུར་སྦྱོར་བ་སྟོབས་དཔག་མེད། །སྔགས་ནི་ཡོན་ཏན་ཀུན་རྫོགས་པས། །ལྷ་དང་བདག་པོ་ལས་འཁོར་ཀུན། །རང་རང་སོ་སོར་སྡེབ་ལ་དཀྲུག །བདེ་བྱེད་ཚངས་པའི་གནས་ལས་འཕང་། །རིག་པ་བདེ་བའི་ཀློང་དུ་བསྡུས། །ཡེ་ཤེས་ཉི་མའི་འོད་ལས་འཕྲོས། །གང་འགྲུབ་ལས་ཀྱི་ཕོ་ཉ་ལ། །མངག་པ་རྦད་པའི་མཐའ་རུ་འགྱུར། །དགྲ་བོའི་སྲོག་ལ་ཐུཾ་རི་ལི་ལི། །ཕོ་ཉ་བླ་དེད་བརྒྱ་བརྒྱ་མངག །དེ་ཡིས་ཐམས་ཅད་འཇོམས་ཤིང་འགུགས། །དྲག་པོ་སྔགས་ཀྱི་གསང་སྡེབ་ནི། །དང་པོ་ལུས་བསྲུང་རྩ་བ་སྟོང་། །དེ་འོག་ཁ་ཆིངས་གཟེར་བ་སྟོང་། །མཁའ་འགྲོ་ཁ་གཟན་དགྲ་ལ་འཕང་། །མཐའ་རུ་སྲོག་རྩ་གཟུངས་ཐག་གཅོད། །མནན་པ་གཟིར་དང་ཕུར་པ་གདབ། །དྲག་པོ་སྔགས་ཀྱི་སྤྱི་སྡེབ་ཡིན། །དོ་ར་ནང་གི་དྲག་པོ་ཡིན། །ལུས་ནི་གསང་ཞིང་ལྕི་བར་གནས། །མཚམས་སུ་སྙིང་པོ་བྷནྡྷ་མིང་། །གཟིར་
བྱ་གང་དམིགས་གསལ་བར་བདོ། །མཐའ་རུ་སྤུ་གྲིས་གཟིར་ཞིང་གཅོད། །དྲག་ཅིང་འདྲིལ་ལ་འབར་བར་གདབ། །སྲུང་བ་ཀུན་ལ་ཤིས་པ་ཡིན། །ལུས་སྲོག་འབྱེད་པ་དྲག་པོའི་སྔགས། །ལུས་ཀྱིས་གསལ་ལ་དག་པར་བཟླས། །སྙིང་པོ་རུས་ཁམས་མིང་བཅས་པའི། །གཅད་པ་ལྔ་ཡི་བརྡའ་སྦྱར་བ། །ལྕེ་ལ་དིག་པ་ཡིད་ལ་གསལ། །ཡུལ་གྱི་རྣམ་པ་གསལ་བར་བརྟག །མིང་བསྡུ་མི་འགུག་ངང་སར་གསལ། །གཅོད་བྱེད་སྤུ་གྲི་རྣོ་དབལ་མཚོན། །གང་ཡང་རྣོ་མྱུར་ཚད་ལྡན་པས། །ཆེ་དྲིལ་དྲག་ལ་འཕར་ཞིང་འདྲིལ། །དེ་ཡིས་དཀར་ནག་རྟེན་ལ་བརྡེག །བསྲུང་དང་གོ་ཆ་ཤ་ལྤགས་རུས། །དྲག་ཅིང་དཀར་ནག་སྒོ་ཕྱེ་ནས། །རྩ་བཞི་བཅད་ནས་རྩ་མདུད་དགྲོལ། །དྭངས་མ་བཞི་བསྡུས་ཐིག་ལེ་འབར། །ནཱ་ག་གཟུགས་ཅན་སྟོང་བདག་མེད། །སྙིགས་མ་ལ་གཉིས་མེ་འབར་ཁྲག །དེ་དབུས་སྦལ་པ་ནྲྀ་དང་སྡིག །སྔགས་ཀྱིས་མེ་བསད་སྡིག་སྦལ་གཤག །ཡི་གེ་ཧུར་ཐུཾ་ཛ་ཡིས་འཕྲོག །སྐྱེ་བའི་ཆོ་འཕྲུལ་ཨེ་ལ་བསྡུ། །སྲིད་པའི་ཁྱམས་ཁང་གནས་སུ་བྱ། །ཤ་ཁྲག་ལུས་ལ་ཤ་ཟ་རོལ། །གསང་བ་སྔགས་ཀྱི་དྲག་སྔགས་ཡིན། །དཔལ་ཚེ་བདག་གི་དགོངས་རྒྱུད་ནག་པོ་ལས། གསང་བ་སྔགས་ཀྱི་དྲག་སྔགས་བསྟན་པའི་ལེའུ་སྟེ་ཉི་ཤུ་ལྔ་པའོ།། །།དེ་ནས་ཡང་བཅོམ་ལྡན་འདས་ཀྱིས་ལྟས་ངན་དང་ཆོ་འཕྲུལ་དབབ་པ་འདི་གསུངས་སོ། །སྲམ་དང་ཕྱི་བའི་ཐོད་པ་རུ། །བྱི་ལ་སྲེ་མོང་སྲིན་བྱའི་ཁྲག །སྤུ་དང་ཤ་སྦྱར་ཞབས་མས་གྲིལ། །དེ་བཞིན་གར་འབེབས་ཡུལ་མིང་སྔགས། །ཁྲག་གིས་བྲིས་ལ་ཐོད་པར་གཞུག །ཁྲི་བདུན་བཟླས་ལ་ཞིང་རས་གྲིལ། །གསོ་བདེ་སྲོད་ལ་དམིགས་པའི་འགྲམ་ལ་གཞུག །ཟླ་བ་བདུན་ནས་ལྟས་ངན་འབབ། །སེམས་ཀྱི་ལྟ་ལ་ཆེ་དམིགས་བྱ། །སྦྲུལ་དང་སྦལ་པའི་གསོབ་བཤུས་ལ། །དགྲ་ཡི་ས་ཆུ་གདུག་པའི་ས། །དུག་ཆུས་སྦྲུས་ལ་དེ་ཉིད་གཟུགས། །གང་དམིགས་བཅས་པ་སྔགས་ཀྱིས་གྲིལ། །གསོབ་དེ་བརྒྱངས་ལ་ཚ་བ་བསྐུ། །དྲག་སྔགས་ཚད་ལྡན་ལམ་ལ་གཞུག །
གདུག་པ་གཟུགས་ཀྱི་ཆོ་འཕྲུལ་འབྱུང་། །ཐོད་པ་ངུར་མ་གཉིས་བཙལ་ལ། །དམེ་མནོལ་གྲི་ཁྲག་ཁ་མིག་བཏོད། །དུག་དང་སྨེ་བ་ལུད་ངན་བསྐུ། །གང་དམིགས་མིང་དང་ཕོབ་ཡ་གཞུག །མཁར་གྱི་དྲེས་དང་བང་འོག་སྦ། །ཐོད་པ་འཐབ་དང་རྒྱུག་པ་འབྱུང་། །ཁྲ་དང་འུག་པ་སྲིན་བྱའི་སྙིང་། །ཤ་ཁྲག་དང་བཅས་བག་ཟན་དུག །དགྲ་ཡི་ཁང་པར་ཚ་བ་སྦྱར། །མནོལ་ཁྲག་བསྐུས་ལ་བྱ་གཟུགས་བྱ། །གང་དམིགས་མིང་རུས་སྔགས་ཀྱིས་གྲིལ། །ཁྲི་བརྒྱད་བཟླས་ལ་ཞབས་མས་གཏུམས། །མཁར་གྱི་རྩེ་དང་སྐེད་དུ་སྦ། །བྱ་དེ་སྐད་འབྱིན་སྡེར་མཆུས་འཛིངས། །ལྟས་ངན་སྡིག་པའི་ཐན་སྐད་འབྱིན། །ལྟས་ངན་སྲོད་ཀྱི་སྨག་ལ་འབབ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨེ་ཀ་ཧི་དུན་ཡང་ཨེ་ཨཾ་ཀ་དུན་མྱགས་རྔུབས་ཤག་མུག་ཏྲི་ལིང་སརྦ་སྤུ་རཾ་ལིང་སྦུར། ནཱ་ག་རཱ་ཛ་ཧ་ཡ་ཀ་པ་ཧ་ཧྱ་ཧ་ལ་ཧལ་ཀི་ལི་ཧས་ཕོབ། སྔགས་ཀྱི་རྒྱལ་པོ་གང་དམིགས་ལ། །ལུས་དང་ཡན་ལག་སྦྱོར་ཤེས་ན། །ལྟས་ངན་ཆོ་འཕྲུལ་དབབ་པར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ལྟས་ངན་དབབ་པའི་ལེའུ་སྟེ་ཉི་ཤུ་དྲུག་པའོ།། །།དེ་ནས་ཡང་བཅོམ་ལྡན་འདས་ཀྱིས་དྲག་པོ་སྔགས་ཀྱི་ཡོན་ཏན་འདི་གསུངས་སོ། །ཨེ་ཡི་ཡེ་ཤེས་འདི་རྣམས་ཡི་གེ་ཡིན་ནམ་དཔྱད་ཡེ་ཤེས་ལས་བྱུང་བ། །དྲག་པོ་འཇོམས་ཤིང་སྲོག་སྙིང་སྡུད། །ལྷུན་གྲུབ་ཚེ་བདག་སྙིང་པོར་རྫོགས། །ཀ་ཡི་ཡེ་ཤེས་ལས་བྱུང་བ། །སྦྱོར་བ་ལས་ཀྱི་རྒྱལ་པོར་འདུས། །སྤྲུལ་པ་མགོ་དགུའི་སྙིང་པོ་རྫོགས། །ཡ་ཡི་ཡེ་ཤེས་ལས་བྱུང་བ། །ཡ་མ་ཐུགས་ཀྱི་སྙིང་པོ་སྟེ། །རླུང་གི་སྟོབས་ཀྱིས་འཕེན་ཞིང་འཕུལ། །མ་ཡི་ཡེ་ཤེས་ལས་བྱུང་བ། །བདུད་མོ་སྲོག་གི་སྙིང་པོ་ཡིན། །བསྐྱེད་དང་སྡུད་པའི་དབང་པོ་རྫོགས། །ཧེ་ཡི་ཡེ་ཤེས་ལས་བྱུང་བ། །དགྱེས་པའི་གར་དགུས་གདུག་པ་འཇོམས། །བྱ་ཁྱུང་རྒྱལ་པོའི་སྙིང་པོར་རྫོགས། །དུན་གྱི་ཡེ་ཤེས་ལས་བྱུང་བ། །སྲོག་དང་དབང་
པོ་ལས་བསྡུས་ནས། །ལས་ཀྱི་ཚེ་བདག་སྲོག་བདུད་འཇོམས། །སྙིང་གི་ཡེ་ཤེས་ལས་བྱུང་བ། །གདུག་པ་གནས་སུ་འཇོམས་དང་འཕོ། །ཁྱུང་མོ་སྨུག་ནག་སྙིང་པོར་རྫོགས། །ཁྲག་གི་ཡེ་ཤེས་ལས་བྱུང་བ། །དྲེགས་པ་གནོད་སྦྱིན་གདུག་པ་འཇོམས། །གསང་བདག་རྡོ་རྗེའི་སྙིང་པོ་རྫོགས། །ར་ཡི་ཡེ་ཤེས་ལས་བྱུང་བ། །བསྲེག་ཅིང་སྐེམ་ལ་གནས་སུ་སྤོར། །ཞེ་སྡང་གདུག་པའི་སྙིང་པོར་རྫོགས། །མ་ཡི་ཡེ་ཤེས་ལས་བྱུང་བ། །ཕོ་ཉ་ལས་ལ་མངག་པ་སྟེ། །སྲིད་པའི་དབང་མོ་བདུད་མོར་རྫོགས། །ཙ་ཡི་ཡེ་ཤེས་ལས་བྱུང་བ། །སྣང་སྲིད་མདངས་བླ་བསྡུས་ནས་འཆང་། །སྲིད་པའི་རུས་སྦལ་སྙིང་པོར་རྫོགས། །ཡ་ཡི་ཡེ་ཤེས་ལས་བྱུང་བ། །ལས་ཀྱི་རླུང་གིས་འཕུལ་ཞིང་སྐྱོམ། །ཡ་མ་རཱ་ཙའི་སྙིང་པོ་རྫོགས། །མྱགས་ཀྱི་ཡེ་ཤེས་ལས་བྱུང་བ། །ཁམས་གསུམ་དབང་ལ་ལས་བསྒྱུར་བ། །རྔུབས་ཀྱི་ཡེ་ཤེས་ལས་བྱུང་བ། །ཚ་གྲང་ནད་སྨིན་འབྲས་བུ་རྒྱས། །མུག་གི་ཡེ་ཤེས་ལས་བྱུང་བ། །ཕོ་ཉ་ཤ་ཟ་རང་དབང་བསྒྱུར། །ཛཿཡིས་སྲེག་བྱེད་དྲོད་དབང་བསྒྱུར། །རཾ་གྱིས་སྦོར་བྱེད་དྲུག་དྲུག་བསྲེག །ཤ་ནི་སྲིན་པོས་བདེ་བར་སྒྲོལ། །རུ་ཡིས་ཆོས་ཉིད་གསལ་བར་བྱེད། །ཐུམ་གྱིས་ཆགས་སྡང་གནས་སུ་འཇོམས། །དཔལ་ཚེ་བདག་གི་དགོངས་རྒྱུད་ནག་པོ་ལས། སྔགས་ཀྱི་ཡོན་ཏན་གྱི་ལེའུ་སྟེ་ཉི་ཤུ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་སྲོག་དམར་ལེན་གྱི་རྩ་བ་འབྲུ་བཞིར་བསྡུས་པའི་སྦྱོར་བ་འདི་གསུངས་སོ། །དུར་ཁྲོད་དབེན་པའི་བདེ་གནས་སུ། །རང་སེམས་དབེན་པའི་མཚམས་བཅད་ལ། །དཔལ་བརྟུལ་དམོད་པའི་དྲག་སྔགས་བཟླས། །དུར་ཁྲོད་རྒྱུ་ལ་ཙཀྲ་བཅའ། །མུ་ཁྱུད་བཞི་དང་ལྡན་པར་བསྐོར། །ལྟེ་བ་གྲུ་གསུམ་མ་ར་ནྲྀ། །གཉིས་པ་རྒྱ་གྲམ་ཨེ་དུན་ཀ་ཡཾ་དགོད། །གསུམ་པས་མཚོན་ཆའི་རྩིབས་བརྒྱད་ལ། །སྲོག་ལ་དྲེང་དྲེང་སྲོག་ལ་གསུམ། །དུན་དུན་བཞི་ལ་སྲོག་ལ་རྦད་དང་ལྔ། །ཁཾ་ཤག་དྲུག་པ་ཙ་རྦད་བདུན། །སྲོག་ལ་ཞེས་པ་བརྒྱད་དུ་དགོད། །ཡང་
ལོགས་ཆུ་ཡི་མུ་ཁྱུད་ལ། །གང་གྲུབ་བསད་སྔགས་ལྟོ་སྡེབས་དགོད། །ཐ་མའི་མཚོན་ཆའི་རྩིབས་བཅུ་ལ། །མྱོག་དང་རྦད་དང་ཁྱེར་དང་ཕྱུང་། །མུག་དང་ཏིང་དང་ལིང་དང་ཤག །ལོང་དང་རྦད་རྣམས་རྫོགས་པར་དགོད། །སྲིད་པའི་རུས་སྦལ་ལྟོ་ན་གནས། །ཁ་སྦྱར་རྫས་ཀྱི་སྦལ་པར་གཞུག །ཚོན་སྐུད་ལྔ་དང་ཕག་མོའི་ལྟོར། །གཟིར་ལ་མཆོག་ཕུར་སྙིང་གར་གདབ། །ཐོད་པ་བཅས་ལ་ཀླུ་ལ་གཟིར། །གཉན་དང་མཆོད་རྟེན་ནག་པོ་ལ། །གཏད་པའི་ལས་ཚོགས་གང་གི་ཚུལ། །ཉིན་མཚན་གསུམ་གྱིས་གང་བརྩམ་འགྲུབ། །ཁ་སོ་ཉིན་ཞག་ཕྲུགས་གཅིག་སྦྱར། །ཕྱག་རྒྱ་བསམ་གཏན་ཟིལ་གནོན་བསྒོམ། །རང་ཡང་རང་ལ་གབ་པར་བཤད། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་སྔགས་འདི་བཏོན་ཏོ། །ཨེ་དུན་ཀ་ཡཾ་དགྲ་བོའི་སྲོག་དྲེང་ནྲྀ་སྲོག་ལ་དུན་དུན། སྲོག་ལ་རྦད་ཁཾ་ཤག་ཙ་རྦད། སྲོག་ལ་མྱོག་རྦད་ཁྱེར་ཕྱུང་མུག་ལིང་ཤིག་ཤོད་རྦད། སྦྱོར་བ་ཀུན་གྱི་མཆོག་བསྡུས་པའི། །ལས་ཀྱི་རྩ་བ་དྲིལ་བར་གསུངས། །སེམས་ཀྱི་དྲོད་བརྟག་རྨི་ལམ་མིན། །སྐུ་ཡི་ཕུང་པོ་གནས་སྦྱངས་ནས། །རིན་ཆེན་རྒྱལ་བར་ཐུགས་འཕང་སྟེ། །གཉིས་སུ་མེད་པའི་རང་རིག་གསལ། །རང་བྱུང་ཡེ་ཤེས་རང་འབར་བའོ། །དེ་ནས་ཡང་བཅོམ་ལྡན་འདས་ཀྱིས་སྲུང་བ་འདི་གསུངས་སོ། །རིག་པ་གཉིས་མེད་དོན་གསལ་བའི། །རང་རིག་རྡོ་རྗེའི་ཕྱག་རྒྱར་གསལ། །སྐུ་གསུམ་བདེ་བའི་རིག་པ་རྫོགས། །སྒྱུ་མའི་ཡེ་ཤེས་རང་ཤར་བའི། །དོན་གྱི་མན་ངག་དྲག་པོའི་སྔགས་རྒོད་ལ། །བསད་གསོ་དབབ་བཅད་ལྟས་ངན་ཐོག་སེར་ལས། །ཀུན་འདུས་རྣམ་རྟོག་ཆེན་པོ་རང་ལས་འབྱུང་ཞིང་འཆར། །དེ་ཡི་སྦྱོར་བ་དྲག་པོ་ལྔ་དང་ལྡན། །ལྔ་ཡི་མཆོག་ཏུ་སྙིང་པོ་དོན་གྱི་ལས། །དེ་ལས་འབྲུ་བཞི་འབྲུ་བརྒྱད་རྩ་བའི་སྔགས། །འབྲུ་བཞི་གསད་གསོ་ལས་འདི་སྲུང་བའི་མཆོག །དྭངས་མ་བཞི་ཡི་རྩ་ལས་ཡེ་ཤེས་བཞི་ཤར་བ། །དུག་ལྔའི་ལས་དང་གདུག་པའི་སྦྱོར་བ་ཀུན་འཇོམས་
ཡིན། །དེ་ཡི་སྦྱོར་བ་རྒྱས་པ་འདི་ལྟ་སྟེ། །དུར་ཁྲོད་རས་སམ་ཤོག་བུ་གྲུ་བཞི་ལ། །སྦྱར་བ་ལྔ་དང་ཚ་བ་དུག་ཆུའི་བརྒྱངས། །ལས་ཀྱི་འཁོར་ལོ་མུ་ཁྱུད་བཞི་རུ་བསྐོར། །དབུས་སུ་གྲུ་གསུམ་ཟླ་གམ་གསུམ་དང་ལྡན། །དེ་ཡི་ཕྱི་རིམ་རྒྱ་གྲམ་རྭ་བཞི་བྱ། །ཡང་ལོགས་མུ་ཁྱུད་ཟླུམ་པོ་ཆུ་ཡི་རིས། །ཐ་མར་རྩིབས་ཆེན་བཅུ་གཉིས་རྩེ་མོ་ནང་དུ་བསྟན། །སྲིད་པའི་ཁྱམས་ཁང་ཕག་མོའི་ལྟོ་བར་བཅའ། །དེ་ལ་གནས་ཤིང་དགོད་པའི་རིམ་པ་ནི། །གྲུ་གསུམ་གང་གནོད་མིང་དང་སྙིང་པོ་བྲི། །ཟླ་གམ་གསུམ་ལ་སྡོད་སྟོངས་ཀྱང་པའི་མིང་རྣམས་བྲི། །རྒྱ་གྲམ་རྭ་བཞིར་རྩ་བའི་འབྲུ་བཞི་དགོད། །ཆུ་རི་མུ་ཁྱུད་རྦོད་གཏོང་གདུག་པའི་མིང་། །བཅུ་གཉིས་རྩིབས་ལ་གཅོད་ཅིང་གཟིར་བའི་སྔགས། །བཀོད་ལ་ཁ་སྦྱར་དར་དང་སྔོ་དམར་བསྡམས། །ཐོད་པ་དུར་མར་བཅུག་ལ་གྲུ་གསུམ་རྩར་བཅས་བརྣག །ཕྱག་རྒྱ་ཟིལ་གནོན་གསལ་བས་ཞག་ལྔ་དྲག་ཏུ་གཟིར། །ལིངྒའི་སྙིང་གར་མཆོག་གི་ཕུར་པ་གདབ། །དྲག་ཏུ་བསྐུལ་ཞིང་དམིགས་པ་དུད་པས་བདུག །ཕྱིང་པས་བཀབ་ལ་ཡུངས་ཀར་བྲབ་ལ་བཀྲུ། །ལས་དེ་ཐོན་ནས་བཀའ་རྟེན་འོག་ཏུ་མནན། །ཀླུ་དང་ས་བདག་གཉན་དང་ལྷ་གདོན་དང་། །གཤིན་རྗེ་མ་མོ་ཞི་ཁྲོ་ཕུར་པ་ཁྱུང་། །དྲེགས་པ་ཅན་དང་བོན་པོའི་རིགས་གཉིས་འཛིན། །བདུད་དང་མུ་སྟེགས་བཙན་དང་རྒྱལ་པོ་དམུ། །ཐེ་བྲང་གཤིན་རྔོག་ཕུང་བདག་རིག་འཛིན་སྲི། །རང་རང་མིང་དང་སྙིང་པོ་སྦྱར་བས་བཅད། །དྲག་སྔགས་སྦྱོར་བ་ལ་སོགས་བརྒྱད་དུ་གསུངས་སོ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨོཾ་ཧེ་ཨ་དུན་ཀ་ལ་ཡང་དུན་ཀ་ཡཾ། སརྦ་ཙིཏྟ་རོ་མྱགས་ཁ་ཐཾ་འདྲིད་ཕྱུང་ཤག་རྦད། སྲོག་ལ་དྲེང་དྲེང་ཤག་དུན་དུན་ཨེ་ཡེ་བར ། ཡ་མ་ཧུར་ཐུཾ་ཛ་ཛ། ས་ནཱ་ག་སྙིང་གཟེར་སྦུར་ནན། ཁཾ་ཤག་རྩ་ལ་རྦད། ས་ནཱ་ག་ཛ། ས་ནཱ་ག་ཐུཾ། ས་ནཱ་ག་རྦད། ས་ནཱ་ག་ཙིཏྟར་མ་ཐུན་རྦད། ཁཾ་ཛྭ་ལ་རམ་སརྦ་ཤ་ཏྲུཾ་ནན། འདྲེད་ཡཾ་བཟློག་སྦུར་ནན། ཏྲིག་ནན། ཨེ་ཀ་ཡ་མ་ཤིག་འདྲིད་ཕྱུང་། ཁཾ་ཤག་ཏྲིག་ནན། སྦུར་ནན། སརྦ་ཤ་ཏྲུཾ་སྟྭམྦྷ་ཡ་ནཱན་ཤ་རྦད། འདི་དག་སྦྱོར་བ་དམ་པ་སྟེ། །ལས་རྣམས་ཀུན་གྱི་རྩ་བར་བཤད། །དཔལ་ཚེ་བདག་གི་
དགོངས་རྒྱུད་ནག་པོ་ལས། དམར་ལེན་འབྲུ་བཞི་རྩ་བའི་ལེའུ་སྟེ་ཉི་ཤུ་བརྒྱད་པའོ།། །།དེ་ནས་ཡང་བཅོམ་ལྡན་འདས་ཀྱིས་ཐོག་སེར་གྱི་སྦྱོར་བ་འདི་གསུངས་སོ། །ཨེ་མའོ་གསང་བའི་ལམ་ཅན་འདི། །སངས་རྒྱས་ཀུན་གྱི་དགོངས་པ་འདི། །ཆོས་ཉིད་ཉེ་བར་གཏན་ལ་འབེབས། །ཡེ་ཤེས་ཉི་མ་རང་ལས་འཆར། །འདི་ལ་གནས་ཤིང་བསྲུང་བ་ནི། །རྒྱུད་ཀྱི་རྒྱལ་པོ་འཛིན་པ་དང་། །འཆང་ཞིང་རབ་ཏུ་རྟོགས་པ་ལ། །བཀའ་ཡི་བྱིན་རླབས་ཤུགས་ལས་འབྱུང་། །དེ་དོན་རྒྱས་པ་འདི་ལྟ་སྟེ། །གཉན་ར་འདུག་པའི་བདེ་གནས་སུ། །དཔའ་བརྟུལ་སྔགས་ཀྱི་འཁོར་ལོ་བཅའ། །དུར་ཁྲོད་གནས་ནས་དཔའ་བོ་ཡིས། །གོས་སུ་བཅའ་བའི་རྒྱུ་བླངས་ལ། །གོས་ལ་སྨེ་བས་ཐོད་པ་བྱ། །དེ་ལ་བོད་པའི་འཁོར་ལོ་བྲི། །ཐིག་སྐོར་རིམ་པ་བཞི་རུ་བསྐོར། །དབུས་སུ་ཕོ་བྲང་ཟླུམ་པོ་ལ། །གདུག་པའི་གཟུགས་དང་ཡུལ་གྱི་མིང་། །སེར་བ་དྲག་ཏུ་ཕོབ་ཅེས་བྲི། །ཟླ་གམ་གསུམ་པ་སེར་སྲུང་དང་། །ཡུལ་ལྷའི་སྦྱོར་བ་གཞོམ་པ་བྲི། །ཕྱི་རིམ་རྡོ་རྗེ་རྒྱ་གྲམ་བྲི། །རྩ་བའི་དྲག་སྔགས་འབྲུ་བཞི་དགོད། །ཡང་ལོགས་རྩིབས་ཆེན་བཅུ་གཉིས་ལ། །ཆུ་དྲིལ་ཟོར་གྱི་དབབ་པ་དགོད། །ཐ་མའི་རྩིབས་ཆེན་བཅུ་དྲུག་ལ། །ཐབས་དང་དྲག་པོ་གཟིར་བ་ཡིས། །ལོ་ཏོག་གཞོམ་པའི་སྤུ་གྲི་དགོད། །ཁ་སྦྱོར་ཚོན་སྐུད་བརྐྱང་པས་སྔགས། །ཐོད་ཆེན་སྤྱང་སྦྲུག་ས་ཤུན་དུ། །གཅོད་པའི་འཁོར་ལོ་ཚ་ར་གཞུག །གྲི་ཁྲག་ཁྱི་ཁྲག་རྟ་ནག་ཁྲག །དོང་བུར་སྔགས་བསྡིམ་ཟོར་དུ་འབར། །སྔོ་སྣ་ནལ་ཁྲག་དུག་སྣ་ཞོ། །ཞབས་མར་སྔགས་བསྡིམ་ཐལ་གྱི་རྫས། །ལྕགས་ཕུར་སེང་ལྡེང་རྫས་རྒོད་རྣམས། །དུག་གིས་ངར་བླུད་དྲག་སྔགས་དཀྲུག །སྤོགས་པ་དྲག་པོས་གཟིར་བའི་རྫས། །དགུན་ཟླ་གསུམ་ལ་ཉིན་ཞག་གཅིག །ཆུ་དྲིལ་ཁྲི་ཚོ་ཞིབ་ཏུ་བསྡིམ། །དཔྱིད་ཟླ་གསུམ་ལ་ཟོར་དྲིལ་བརྡེག །ཞག་རེ་དོང་དུ་རྦོད་པར་བསྡིམ། །དབྱར་ཟླ་གསུམ་གྱི་ཉ་སྟོང་ལ། །ཞག་གསུམ་ཉ་ལ་གཏའ་མ་གཞུག །ཡུལ་དབུས་ཀླུ་དང་ལྷ་རྟེན་ལ། །ཐོད་ཆེན་སྤྱང་ཐོད་སྦྲུལ་གཞུག་དང་། །སྟོན་ཟླ་ཉ་སྟོང་རྣམས་བཟློག་བརྡེག །བརྒྱ་པ་བཅུ་པར་ཁྲག་ལ་བསྡིམ། །
སྟོང་གི་བར་དུ་རྫས་རྣམས་བསྡིམ། །ཁྲི་བར་ཕུར་པ་དགུག་རྫས་བསྡིམ། །དྲག་སྔགས་རྣལ་བཟློག་འབྱུང་བ་དཀྲུག །ཟོར་དྲིལ་ཐབ་དང་གཟིར་ལས་སྦྱར། །དེ་ཡིས་ཐམས་ཅད་མ་ལུས་འཇོམས། །སྨན་དང་རྩི་ཤིང་ལོ་ཏོག་ལ། །དྲག་པོ་གནམ་ལྕགས་སེར་བ་འབེབས། །ཚེས་བརྒྱད་ས་སྲོས་བཞི་ཡི་འཇིང་། །ཉ་ཡི་སྲོད་འཁོར་བཅུ་གཅིག་ཡོལ། །ཉི་ཤུ་དགུ་ཡི་མདུང་གང་ལ། །དབབ་པ་གསུམ་པའི་སྦྱོར་བ་བརྩམ། །གྲུབ་ན་གཏའ་མ་གདུགས་ཀྱི་གསོ། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨེ་དུན་ཀ་ཡཾ། ཨཱུ་ཁཾ་པྲོཾ་པྲོཾ་ཧྲི་ལ་ཕོབ། ཤར་ཤར་ཧྲིལ་དྲག་ཏུ་ཕོབ། ཡཾ་ཀ་དུན་ཏེ། པྲོཾ་ཤར་ཧྲིལ་བྷྱོ། ཀ་དུཾ་རཾ་ཕོབ་ཀ་ཨེ་ཡཾ་དུན་ནཱ་ག་སྙིང་གཟེར་པྲོཾ་ཡ་ཧྲིལ་ཤར། ཆུ་མིག་ལྷ་རྟེན་ལ་དམིགས་ཤིང་། །ཟོར་ཐབ་སྦྱོར་བ་ཐོད་པ་ཟངས། །མི་ལག་མི་སོག་ཐལ་འཇིམ་ཟོར། །གཟུགས་བརྙན་གཉིས་པར་རྟེན་བཞག་ལ། །འབྱུང་བ་དཀྲུགས་ལ་ཁྲི་བཞི་བསྡིམ། །གར་དམིགས་ཀླུ་གནས་ཕུར་པ་གདབ། །ཆུ་རྒོད་དྲག་པོ་རི་བསྙིལ་འདྲ། །རང་ཡང་རང་ལ་གབ་པར་བཤད། །དེ་ནས་བཅོམ་ལྡན་འདས་ཀྱིས། དྲག་པོ་གནམ་ཐོག་འཕང་བའི་སྦྱོར་བ་འདི་གསུངས་སོ། །དེ་བཞིན་གནས་དང་མཚམས་བཅད་ལ། །ཐོག་རྒོད་གྲི་ཐོག་ཉམས་ཅན་དུ། །མེ་ལོང་གསེར་དང་ཐོག་ལྕགས་ཟངས། །རྡོ་ནག་ཡུངས་ཀར་རྒྱལ་པོ་སྤུངས། །རྟ་ནག་རབས་ཆད་ཁྱི་ནག་ཁྲག །དུག་སྣ་དང་བཅས་སྟེང་འོག་རྟེན། །ཡུལ་དང་བཅས་པའི་མིང་རུས་ཁམས། །ལིངྒ་རྟེན་དང་རྒྱ་གྲམ་དབུས། །ཐིག་སྐོར་རྩེ་མོ་དྲུག་པ་བྲི། །རྒྱ་གྲམ་འབྲུ་བཞི་སྔགས་ཀྱི་ལུས། །ཐོད་སྐོར་སྤུ་གྲི་ཚན་རེས་དགང་། །གསེར་ཐོག་གཞུ་དང་སྤེལ་དང་གཅག །འཕངས་པ་བསྲུང་དང་གཅུན་ལ་དབབ། །གསེར་གྱི་མི་འགྱུར་བརྟན་པའོ། །སྤོས་དང་བདུད་རྩིས་བསངས་ལ་བཀྲུ། །དྲག་སྔགས་འཁོར་ལོ་བསྐོར་ལ་གཞུག །དྲི་མདའ་དུག་མདའ་ལྟས་ངན་མདའ། །བཅས་ལ་གསེར་བླུགས་དགྲ་ལ་འཕང་། །ཉ་དང་ཉི་ཤུ་དགུ་ལ་ཤིས། །སྔགས་པ་ཟིལ་གནོན་ཕྱག་རྒྱར་གསལ། །
ལུས་ལ་ཡེ་ཤེས་འཁོར་ལོ་བཅའ། །འཁོར་ལོ་བསྲུང་བའི་དྲག་སྔགས་སྤྲོ། །ཆེ་བའི་ང་རྒྱལ་དྲག་པོས་བསྐུལ། །སྔགས་ལ་ལྟས་ངན་ཏྲི་མདའ་སྦྱར། །དུག་མདའ་ཐོག་རྒོད་གཅུན་དང་སྡེབ། །གནམ་ཐོག་ཆེན་པོ་རང་འདོད་དབབ། །སྦྱོར་བའི་རྒྱལ་པོ་ཁོང་དུ་གཞུག །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨེ་དུན་ཀ་ཡཾ། རཾ་ཐུན་རོ་མྱག་ཛྭ་ལ་རཾ་ཁཾ་རཾ། རཾ་ཐུན་མཱ་ར་ཡ་ནྲྀ་ཛ་ཁཾ་ཁྱེར་ལཾ་རཾ། རག་ཐུཾ་རོ་མྱག་ཁས་རྦད། ཨེ་ཡཾ་ཁཾ་རཾ་ཏྲག་ཆེམ་སྲོག་ལ་ཐུན་བྷྱོ། སརྦ་ཙིཏྟ་སྦུར་ནན་ཁམ་ཤག་རྦད་བྷྱོ། དགྲ་བོའི་སྲོག་ལ་ཧུར་ཐུཾ་ནན་འདྲིད་རྦད། སརྦ་ཤ་ཏྲུཾ་ཧྲི་མྱགས་རྦད། ཁ་ཐཾ་བྷིག་ནན། ལས་འདི་སྣང་སྣང་བྱ་བ་མིན། །ཐོག་སེར་སྐྱིན་ཐང་སྦྱོར་བར་བཤད། །དེ་ནས་ཡང་བཅོམ་ལྡན་འདས་ཀྱིས་ལྟས་ངན་གྱི་སྦྱོར་བ་འདི་གསུངས་སོ། །སྤྲེལ་དང་བྱི་ལ་ཝ་ཐོད་དང་། །སྦྲུལ་དང་སྲིན་བྱ་ཕག་ཤ་དང་། །གཟུགས་དང་མིང་རུས་བཅས་ལ་བཅའ། །དྲག་སྔགས་ཁྲི་བདུན་དུག་ཆུ་བསྐུ། །ཚེས་བརྒྱད་སྲོད་ལ་མཁར་ལ་གཞུག །གཟུགས་རྣམས་འཐབ་ཅིང་སྒྲ་འབྱིན་དུ། །སྦྱོར་བ་སྨིན་ནས་རྟེན་རྣམས་གདོན། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྐུ་གསུང་ཐུགས་རྡོ་རྗེ་ལས་དྲག་སྔགས་འདི་བཏོན་ཏོ། །ཨེ་དུན་ཀ་ཡཾ་རུ་སྡི་ནན་དུ་ཏིང་ཧས་ཕོབ། ལས་ཀྱི་རྒྱལ་པོ་འབྲུ་བཞི་ཡིས། །འབྱུང་བ་བཞི་དཀྲུག་དྭངས་མ་སྡུད། །ཡེ་ཤེས་བཞི་ཡི་ཐིག་ལེ་རྫོགས། །སྔགས་ཀྱི་འོད་ཟེར་འཕོ་ཞིང་འདྲིལ། །ཀུན་གྱི་རྩ་བ་དྲིལ་བར་བཤད། །དཔལ་ཚེ་བདག་གི་དགོངས་རྒྱུད་ནག་པོ་ལས། ཐོག་སེར་སྦྱོར་བའི་ལེའུ་སྟེ་ཉི་ཤུ་དགུ་པའོ།། །།དེ་ནས་ཡང་བཅོམ་ལྡན་འདས་ཀྱིས་རྒྱུད་ཀྱི་དོན་འཁོར་ལ་གདམས་པ་འདི་གསུངས་སོ། །རྒྱུད་ནི་འདྲེལ་པ་གསུམ་དང་བཅས། །ཆོས་དང་ཆོས་ཅན་ཉིད་གཅིག་པ། །ཡུལ་སེམས་གཉིས་འཛིན་རང་སྣང་ཤུགས། །ལྟ་སྤྱོད་མན་ངག་ཐབས་ཅིག་དང་། །གཞི་ལམ་འབྲས་བུ་རོ་གཅིག་གནས། །འཁོར་འདས་སྣང་སྲིད་དོན་ལ་གཅིག །བདེ་དང་སྡུག་བསྔལ་རྒྱུ་མཐུན་འདས། །རང་
བཞིན་བདག་ཉིད་ངང་དུ་རྫོགས། །བདེ་བ་ཉམས་དང་འོད་གསལ་རོ། །སོ་མ་ལྷུག་པ་རྫོགས་ཏེ་གནས། །ཐབས་དང་ཐབས་ཉིད་ཐབས་བསམ་ཡས། །བྱ་བ་མེད་པར་རང་ཤར་འདི། །ཨ་དང་ཡང་དག་སྒྱུ་མར་སྦྱར། །ཨེ་དང་སྐྱེ་བའི་ཆོ་འཕྲུལ་རྫོགས། །མ་སྐྱེས་སྐྱེ་བ་གནས་ལས་འདས། །སྐྱེ་འཇིག་འགག་པ་སྟོང་བདག་མེད། །བདེ་བའི་ཡེ་ཤེས་རོ་ཉིད་མཉམ། །རྒྱུད་ཀྱི་རྒྱལ་པོ་འཛིན་པ་དང་། །མཉམ་པའི་དོན་ལ་དྲོད་ལེན་པ། །སངས་རྒྱས་ཉིད་དང་སྐལ་བ་མཉམ། །འདི་ལ་ཡུན་གྱི་དོན་ལྡན་པས། །ཆེ་བས་ཆེ་བའི་ཡོན་ཏན་རྫོགས། །རང་ལུས་རྡོ་རྗེ་སེམས་དཔའ་མེད། །ཡན་ལག་རྡོ་རྗེ་སྟོང་བདག་མེད། །སྟོང་པ་ཉིད་ལས་གཞན་མེད་པས། །སྙིང་པོ་དོན་གྱི་སྦྱིན་པ་ཡིན། །སྦྱོར་དང་སྦྱོར་བ་རང་བཞིན་པས། །རང་ཉམས་བདེ་བའི་སྦྱོར་བར་བཤད། །འདི་དེ་བདེ་དང་སྨིན་པའི་མཆོག །ཟུང་དུ་ཟུངས་མཚམས་ཀུན་སྤངས་ཏེ། །ཡོན་ཏན་མ་ལུས་ཀུན་ལྡན་པའི། །འདི་ལ་འཇིག་རྟེན་དངོས་གྲུབ་མཆོག །མ་ལུས་འབྱུང་ཕྱིར་སྙིང་པོའི་དོན། །རྒྱལ་བ་ཀུན་གྱི་ཐིག་ལེ་ཅན། །ང་ཡི་འཕྲུལ་གྱི་དགོངས་པ་འདི། །བཀའ་ཡི་བསྟན་པ་མ་ལུས་ཀྱི། །སྙིང་པོ་མཆོག་དང་དོན་ཟབ་པས། །རྒྱལ་བའི་དགོངས་པ་དྲིལ་བ་ཡིན། །ང་ཡི་སྦྱོར་བ་མེ་ལྕེ་འདི། །ཁྲོ་ཚོགས་གང་གི་སྟོབས་བསྡུས་ཡིན། །ང་ཡི་སྟོབས་ཀྱི་དྲག་སྔགས་འདི། །བགྲོད་པ་ཐོབ་པའི་གོ་མཚོན་མཆོག །ང་ཡི་གསང་བའི་སྒྲོན་མ་འདི། །མ་རིག་འཁར་བའི་བདེ་ལམ་ཡིན། །འདི་ལ་གནས་ཤིང་བསྒྲུབ་པ་དང་། །འདོད་པའི་དངོས་གྲུབ་ལེན་པ་དང་། །ཕྱག་རྒྱ་ཆེན་པོ་རབ་སྦྱོར་བ། །འབྲས་བུར་ངེས་པའི་ཐབས་སུ་བཤད། །མཉམ་པའི་རྒྱལ་པོར་རྒྱས་པར་བསྔགས། །གསང་བའི་བདག་པོར་ལེགས་གསུངས་པའི། །ཉེ་བར་གྱུར་པའི་རྒྱུད་འདི་ལ། །བགྲོད་པའི་སྟོབས་ཀྱིས་གང་ལེན་པ། །སངས་རྒྱས་ཀུན་གྱི་དགོངས་པ་འཛིན། །རྣལ་འབྱོར་བདེ་བའི་ལམ་ཅན་ལ། །ང་ཡང་དམ་ལས་མི་གཡེལ་བསྲུང་། །སངས་རྒྱས་ཀུན་གྱིས་བསྔགས་པ་ཡིན། །
དོན་གཉིས་མངོན་དུ་སྤྱོད་པའི་ཕྱིར། །ཚད་མ་བཞི་ཡིས་རབ་བརྟགས་པའི། །དོན་གྱི་དགོངས་པ་འདུས་པ་འདི། །རྩོལ་དང་བསྒྲུབ་པའི་མཐའ་ལས་འདས། །འཕྲོ་འདུ་སྦྱོར་བའི་གཡང་ས་བཅད། །རྒྱུ་རྐྱེན་བགྲོད་པའི་སར་མ་ལྷུང་། །རྫས་དང་རྟགས་ལ་རྟེན་མི་འཆའ། །མཆོད་དང་ཐུགས་དམ་བསྐང་མི་དགོས། །ཐམས་ཅད་ངོ་བོ་མ་བཅོས་པ། །ཁོ་ན་ཆོས་ཉིད་གཅིག་པ་ལས། །ལྷུན་གྲུབ་རང་བྱུང་ལོངས་སྤྱོད་སྐུ། །ལས་དང་སྦྱོར་བ་སྣ་ཚོགས་སྤྲུལ། །སྐུ་གསུམ་མ་བཙལ་བགྲོད་ཐོབ་མེད། །དེ་དག་ཆོས་ཉིད་རོལ་པའི་རྒྱ། །ཆོས་ཉིད་རིག་པ་རང་བྱུང་དཔལ། །ཡེ་ཤེས་ཆེན་པོ་རང་གསལ་བ། །འཁོར་འདས་དབྱིངས་དང་ཡེ་ཤེས་གསལ། །ཡུལ་སེམས་གཉིས་འཛིན་འཁྲུལ་པས་གོལ། །ངོ་བོ་མི་དམིགས་གཉིས་ཀྱིས་དབེན། །སྣང་སྟོང་གཉིས་མེད་ཡེ་ཤེས་སྐུ། །འཛིན་རྟོག་མཐའ་གཉིས་རང་བཞིན་མེད། །མེད་པའི་ངང་ལས་སྙིང་པོ་གནས། །སྒྱུ་མ་ལྷུན་གྲུབ་ཡུལ་ལ་རོལ། །འཁོར་བ་མ་སྤངས་རང་སར་གསལ། །གསལ་བ་མཚན་ཉིད་ལྷུན་གྱིས་གྲུབ། །འདི་དེ་བདེ་དང་སྨིན་པའི་ལས། །སངས་རྒྱས་གསུང་གི་ཟབ་མོ་གནས། །ཆེ་བས་ཆེ་བའི་ཡོན་ཏན་ལྡན། །མོས་དབང་སྤྱོད་པའི་རྣལ་འབྱོར་རྣམས། །བགྲོད་པ་དབང་གི་ཕྱག་རྒྱར་བཏབ། །རིག་པའི་བརྡ་ཡིས་མེད་ཅིང་བསྙད། །རྡོ་རྗེ་སྟོང་བདག་ཆེ་བར་གནས། །སེམས་ཅན་སངས་རྒྱས་མ་ལུས་ཀུན། །རྒྱུད་འདི་བཟུང་ཞིང་བསྟན་པར་བྱ། །བཅོམ་ལྡན་འདས་ཀྱིས་གསུངས་པ་ལ་འཁོར་ཐམས་ཅད་རྗེས་སུ་ཡི་རངས་ནས་མངོན་པར་བསྟོད་དོ། །དཔལ་ཚེ་བདག་གི་དགོངས་རྒྱུད་ནག་པོ་ལས། རྒྱུད་གཏད་པའི་ལེའུ་སྟེ་སུམ་ཅུ་པའོ།། །། རྒྱུད་ཀྱི་སྙིང་པོ་དམ་པ་ཞེས་བྱ་བ་སངས་རྒྱས་ཐམས་ཅད་ཀྱི་དགོངས་པ་གཅིག་ཏུ་བསྡུས་པ་ལྷའི་ཡུལ་དུ་གྲགས་པ་རྫོགས་སོ།། །།