ཡུམ་སྲས་བཤད་པ།
ཡུམ་སྲས་བཤད་པ། གཉིས་པ་རྩ་བ་ལ། ཚིག་དོན་དང་། བརྒལ་ལན་གྱིས་གཏན་ལ་འབེབས་པའོ། །དང་པོ་ལ། དངོས་དང་། མཐའ་དཔྱད་པ་གཉིས། དང་པོ་ལ། བསྟོད་པ་དང་། ཕྱག་འཚལ་བ་གཉིས། དང་པོ་ལ། མཁྱེན་གསུམ་གྱི་ཡོན་ཏན་གྱི་སྒོ་ནས་བསྟོད་པ་དང་། འཕགས་བཞིའི་ཡུམ་བྱེད་པས་བསྟོད་པའོ། །དང་པོ་ལ། གཞི་ལམ་རྣམ་མཁྱེན་གསུམ་ལས། དང་པོ་ནི། ཉན་ཐོས་དང་རང་རྒྱལ་རང་དོན་དུ་འབྲས་བུ་སྡུག་ཀུན་ཉེ་བར་ཞི་བའི་
ཉེར་ཞི་བའི་འཚོལ་བ་པོ་རྣམས་ཆོས་ཅན། ཁྱོད་ཉེར་ཞིར་འཁྲིད་པའི་ཐབས་ཡོད་དེ། ཆོས་ཀུན་གང་ཟག་གི་བདག་མེད་དུ་ཤེས་པའི་གཞི་ཤེས་གང་ཡིན་པ་དེ་ཉིད་ཀྱིས་འཁྲིད་པ་དེ་ཉིད་ཀྱིས་འཁྲིད་པར་མཛད་པའི་ཕྱིར། གཉིས་པ་ནི། འགྲོ་ལ་ཀུན་དུ་ཕན་པ་སྒྲུབ་པར་བྱེད་པའི་བྱང་འཕགས་རྣམས་ཆོས་ཅན། ཁྱོད་ཀྱིས་འབྲས་བུ་འཇིག་རྟེན་ཏེ་རིགས་ཅན་གསུམ་གྱི་དོན་སྒྲུབ་པའི་ཐབས་ཡོད་དེ། ལམ་གསུམ་བདག་མེད་པར་ཤེས་པའི་ལམ་ཤེས་གང་ཡིན་པ་ཉིད་ཀྱིས་འཁྲིད་པར་མཛད་པའི་ཕྱིར། གསུམ་པ་ནི། ཐུབ་པ་སངས་རྒྱས་རྣམས་ཆོས་ཅན། འབྲས་བུ་ཐེག་གསུམ་གྱི་ལམ་རྫོགས་པའི་བརྗོད་བྱ་རྣམ་པ་ཀུན་དང་ལྡན་པའི་མདོ་སྡེ་སྣ་ཚོགས་པ་འདི་གསུང་བའི་ཐབས་ཡོད་དེ། ཤེས་བྱ་ཐམས་ཅད་བདག་མེད་དུ་མཁྱེན་པའི་རྣམ་མཁྱེན་གང་དང་ཡང་དག་པར་ལྡན་པས། དེ་ལ་བརྟེན་ནས་གསུངས་པའི་ཕྱིར། གཉིས་པ་ནི། ཡུམ་མཁྱེན་གསུམ་ཆོས་ཅན། རང་སྲས་འཕགས་བཞིའི་བཞེད་དོན་སྒྲུབ་པའི་ཡོན་ཏན་དང་ལྡན་ཏེ། རང་སྲས་ཉན་ཐོས་འཕགས་པ་བྱང་ཆུབ་སེམས་དཔའ་འཕགས་པའི་ཚོགས་དང་བཅས་པ་སྟེ། རང་སྲས་རང་རྒྱལ་འཕགས་པ་དང་རང་སྲས་སངས་རྒྱས་འཕགས་པ་རྣམས་ཀྱི་བཞེད་དོན་སྒྲུབ་པའི་ཕྱིར། གཉིས་པ་ཕྱག་འཚལ་བ་ནི། རྗེ་བཙུན་བྱམས་མགོན་ཆོས་ཅན། ཁྱོད་ཀྱིས་རྒྱན་རྩོམ་པའི་ཐོག་མར་མཁྱེན་གསུམ་ལ་ཕྱག་འཚལ་བ་ཡིན་ཏེ། དེ་ལ་འདུད་པའི་ཕྱིར། གཉིས་པ་ལ། དགག་གཞག་སྤང་གསུམ་ལས། ཁ་ཅིགམཆོད་བརྗོད་དུ་མཁྱེན་གསུམ་གྱི་གོ་རིམ་བཤད་པ་འདི་མདོའི་གླེང་གཞིའི་གོ་རིམ་དང་མཐུན་པར་བསྟོད་པ་ཡིན་ཟེར་ན། མི་འཐད་པར་ཐལ། འཕགས་སེང་གཉིས་ཀས་མཆོད་བརྗོད་གླེང་གཞི་དང་སྦྱར་བའི་བཤད་
པ་མཛད་པའི་ཕྱིར་དང་། སློབ་དཔོན་གྱིས་གླེང་གཞིའི་བཤད་པ་དགོས་འབྲེལ་གྱི་མཇུག་ཏུ་མཛད་པའི་ཕྱིར། ཁ་ཅིག་ཉན་ཐོས་ཀྱི་རིགས་ཅན་ཐེག་གསུམ་ལ་རིམ་གྱིས་གཞུག་པའི་ཆེད་དུ་དང་པོར་གཞི་ཤེས་ལ་བསྟོད་པ་ཡིན་ཟེར་ན། རྒྱན་གྱི་ཆེད་དུ་བྱ་བའི་གདུལ་བྱ་ཉན་ཐོས་ཀྱི་རིགས་ཅན་ཡོད་པར་ཐལ། དམ་བཅའ་འཐད་པའི་ཕྱིར། འདོད་ན། མངོན་རྟོགས་རྒྱན་ཆོས་ཅན། ཐེག་པ་ཐུན་མོང་བའི་བསྟན་བཅོས་ཡིན་པར་ཐལ། བསྟན་བཅོས་གང་ཞིག །ཁྱོད་ཀྱི་ཆེད་དུ་བྱ་བའི་གདུལ་བྱ་ཐེག་པ་མཆོག་དམན་གྱི་རིགས་ཅན་གཉིས་ཀ་ཡོད་པའི་ཕྱིར། འདོད་མི་ནུས་ཏེ། ཐེག་ཆེན་ཐུན་མོང་མ་ཡིན་པའི་བསྟན་བཅོས་ཡིན་པའི་ཕྱིར། ཁ་ཅིག །གདུལ་བྱ་ཐེག་པ་གསུམ་ལ་རིམ་གྱིས་གཞུག་པའི་ཕྱིར་དེ་ལྟར་བསྟོད་པ་ཡིན་ཟེར་ན་ཡང་གོང་གི་དེས་ཁེགས་སོ། །ཁ་ཅིག །ལམ་ཤེས་ཐོབ་པ་ལ་གཞི་ཤེས་ཐོབ་པ་སྔོན་དུ་འགྲོ་དགོས་པའི་རྒྱུ་མཚན་གྱིས་དེ་ལྟར་བསྟོད་པ་ཡིན་ཟེར་ན། དམན་ལམ་སྔོན་དུ་མ་སོང་བའི་བྱང་སེམས་སྦྱོར་ལམ་ཆོས་མཆོག་ཆེན་པོ་བ་དེ་ལ་གཞི་ཤེས་ཡོད་པར་ཐལ། དམ་བཅའ་དེའི་ཕྱིར། ཁ་ཅིག །ལམ་ཤེས་ཐོབ་པ་ལ། སྐྱེས་བུ་འབྲིང་དང་ཐུན་མོང་བའི་ལམ་གྱིས་བསྡུས་པའི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་ཐོབ་པ་སྔོན་དུ་འགྲོ་དགོས་པའི་རྒྱུ་མཚན་གྱིས་ཡིན་ཟེར་ན། དམན་ལམ་སྔོན་དུ་མ་སོང་བའི་བྱང་སེམས་སྦྱོར་ལམ་པས་མི་རྟག་སོགས་བཅུ་དྲུག་མངོན་སུམ་དུ་རྟོགས་པར་ཐལ། དམ་བཅའ་དེའི་ཕྱིར། ཁ་ཅིག །སྐྱེས་བུ་ཆེན་པོའི་ལམ་རིམ་རྒྱུད་ལ་སྐྱེ་བ་ལ། སྐྱེས་བུ་འབྲིང་གི་ལམ་ལ་བློ་སྦྱོང་བ་སྔོན་དུ་འགྲོ་དགོས་པ་ཤེས་པའི་ཆེད་དུ་དེ་
ལྟར་བསྟོད་པ་ཡིན་ཟེར་བ་ཡང་མི་འཐད་དེ། འབྲིང་དང་ཐུན་མོང་བའི་ལམ་ལ་བློ་སྦྱོང་དགོས་ཀྱང་། འབྲིང་གི་བསམ་པ་དེ་རང་ཉིད་གཅིག་པུའི་ཆེད་དུ་ཐར་པ་དོན་གཉེར་གྱི་བློ་ལ་བྱེད་དགོས་པའི་ཕྱིར། ཁ་ཅིག །སྐབས་འདིར་དངོས་སུ་བསྟན་པའི་ཡུམ་ཡིན་ན། འཕགས་རྒྱུད་ཀྱི་མཁྱེན་པ་ཡིན་པས་ཁྱབ་ཟེར་ན། ཉན་ཐོས་མཐོང་ལམ་པའི་ཡུམ་ཆོས་ཅན། དེར་ཐལ། དེའི་ཕྱིར། དེར་ཐལ། ཉན་ཐོས་ཞི་བ་འཚོལ་རྣམས་ཞེས་སོགས་ཀྱི་ཚིག་རྐང་དང་པོས་དངོས་སུ་བསྟན་པའི་ཡུམ་ཡོད་པའི་ཕྱིར་ཏེ། ཚིགས་རྐང་དང་པོས་ཉན་ཐོས་མཐོང་ལམ་པའི་ཡུམ་དངོས་སུ་བསྟན་པའི་ཕྱིར། རྩ་བར་འདོད་མི་ནུས་ཏེ། ཉན་ཐོས་ཀྱི་སྦྱོར་ལམ་ཆོས་མཆོག་ཆེན་པོའི་ཡེ་ཤེས་དེ་ཁྱོད་ཡིན་པའི་ཕྱིར་རོ། །མཆོད་བརྗོད་ཡུལ་དུ་གྱུར་པའི་ཡུམ་ཡིན་ན་མཁྱེན་གསུམ་གང་རུང་ཡིན་པས་ཁྱབ་ཟེར་ན། མཁྱེན་གསུམ་ཆོས་ཅན། དེར་ཐལ། དེའི་ཕྱིར། འདོད་ན། མ་ཡིན་པར་ཐལ། གཞི་ཤེས་ཀྱང་མ་ཡིན། ལམ་ཤེས་ཀྱང་མ་ཡིན། རྣམ་མཁྱེན་ཡང་མ་ཡིན་པའི་ཕྱིར་རོ། །ཁ་ཅིག །དངོས་པོ་བརྒྱད་པོ་མཆོད་བརྗོད་ཡུལ་དུ་གྱུར་པའི་ཡུམ་ཡིན་ཟེར་ན། ཆོས་སྐུ་དེ་ཡིན་པར་ཐལ། བརྒྱད་ཀ་དེ་ཡིན་པའི་ཕྱིར། འདོད་མི་ནུས་ཏེ། རྟག་པ་ཡིན་པའི་ཕྱིར། ཁ་ཅིག །སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་ཡིན་ན་སྐབས་འདིར་བསྟན་བྱའི་གཙོ་བོར་བྱས་ནས་བསྟན་པའི་ཡུམ་ཡིན་པས་ཁྱབ་ཟེར་ན། སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཐེག་དམན་གྱི་གཞི་ཤེས་ཆོས་ཅན། དེར་ཐལ། དེའི་ཕྱིར། འདོད་ན། གཉེན་པོ་ཕྱོགས་ཀྱི་གཞི་ཤེས་ཡིན་པར་ཐལ། འདོད་པའི་ཕྱིར། ཁྱབ་པ་ཡོད་དེ། སྐབས་འདིའི་བསྟན་
བྱའི་གཙོ་བོར་གྱུར་པའི་གཞི་ཤེས་ཡིན་ན། སྐབས་གསུམ་པའི་བསྟན་བྱའི་གཙོ་བོར་གྱུར་པའི་གཞི་ཤེས་ཡིན་དགོས། དེ་ཡིན་ན་གཉེན་པོ་ཕྱོགས་ཀྱི་གཞིས་ཤེས་ཡིན་དགོས་པའི་ཕྱིར་རོ། །ཁ་ཅིག །མཁྱེན་གསུམ་འཕགས་བཞིའི་ཡུམ་ཡིན་ཟེར་ན། མཁྱེན་གསུམ་སངས་རྒྱས་འཕགས་པའི་ཡུམ་ཡིན་པར་ཐལ། དམ་བཅའ་དེའི་ཕྱིར། འདོད་ན། དེ་སྐྱེད་བྱེད་ཡིན་པར་ཐལ། འདོད་པའི་ཕྱིར། འདོད་ན། དེའི་སྔ་ལོགས་སུ་གྲུབ་པར་ཐལ། འདོད་པའི་ཕྱིར། ཁ་ཅིག །འཕགས་པ་དེའི་ཡུམ་ཡིན་ན། འཕགས་པ་དེའི་རྒྱུ་ཡིན་པས་མ་ཁྱབ་པར་ཐལ། རྒྱལ་བའི་སྲས་ཡིན་ན་རྒྱལ་བའི་འབྲས་བུ་ཡིན་པས་མ་ཁྱབ་པའི་ཕྱིར། མ་གྲུབ་ན། སངས་འཕགས་ཀྱི་རྒྱུར་གྱུར་པའི་བྱང་འཕགས་ཆོས་ཅན། དེར་ཐལ། དེའི་ཕྱིར། དེར་ཐལ། རྒྱལ་སྲས་ཡིན་པའི་ཕྱིར་ན་མ་ཁྱབ། འོ་ན། སྐམ་ལས་སྐྱེས་པའི་པདྨོ་ཆོས་ཅནམཚོ་ལས་སྐྱེས་པར་ཐལ། མཚོ་སྐྱེས་ཡིན་པའི་ཕྱིར། འདོད་མི་ནུས་སོ། །ཁ་ཅིག །རང་སྲས་འཕགས་པའི་བཞེད་དོན་སྒྲུབ་ནུས་ཀྱི་འཕགས་རྒྱུད་ཀྱི་མཁྱེན་པ་དེ་སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད་ཟེར་ན། རང་རྒྱལ་གྱི་མཐོང་ལམ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། འཕགས་རྒྱུད་ཀྱི་མཁྱེན་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ཤུགས་ལ་བསྟན་པའི་ཕྱིར། ཁ་ཅིག །རང་སྲས་འཕགས་པ་སྐྱེད་པའི་ཡོན་ཏན་ལྡན་པའི་ཆ་ནས་རྒྱན་རྩོམ་པ་པོའི་བསྟོད་ཕྱག་གི་ཡུལ་དུ་དམིགས་པ་དེ་རྒྱན་གྱི་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད་ཟེར་ན། སྟོན་པ་ཤཱཀྱ་ཐུབ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེར་ཐལ། མཆོག་གི་སྤྲུལ་
སྐུ་ཡིན་པའི་ཕྱིར། རྩ་བར་འདོད་མི་ནུས་སོ། །ཁ་ཅིག །ཡུམ་ཡིན་ན་མཁྱེན་པ་ཡིན་པས་ཁྱབ་ཟེར་ན། སྙིང་རྗེ་ཆེན་པོ་ཆོས་ཅན། དེར་ཐལ། དེའི་ཕྱིར། དེར་ཐལ། ཚོགས་ལམ་སྐད་ཅིག་དང་པོ་ལ་གནས་པའི་སེམས་དཔའི་ཡུམ་ཡིན་པའི་ཕྱིར། དེ་དེར་ཐལ། དེའི་ཡུམ་ཡོད་པའི་ཕྱིར། རྒྱུད་བླ་ལས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་སྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་གསུངས་པའི་ཕྱིར། ཁ་ཅིག །ཡུམ་ལ་ཤེས་པས་ཁྱབ་ཟེར་བ་ལ་སྐྱོན་འཕེན་པ་གཞན་དག་གིས། ཡུམ་སྒྱུ་མ་ལྷ་མཛེས་ཆོས་ཅན། དེར་ཐལ། དེའི་ཕྱིར། དེར་ཐལ། སྟོན་པ་ཤཱཀྱ་ཐུབ་པའི་ཡུམ་ཡིན་པའི་ཕྱིར་ཏེ། དེའི་ཡུམ་ཡོད་པའི་ཕྱིར་ན་མ་ཁྱབ། སྲས་སྒྲ་གཅན་འཛིན་དེ་ཤཱཀྱ་ཐུབ་པའི་སྲས་ཡིན་པར་ཐལ། སྒྱུ་མ་ལྷ་མཛེས་དེའི་ཡུམ་ཡིན་པའི་ཕྱིར། འདོད་ན། བྱང་ཆུབ་སེམས་དཔའ་ཡིན་པར་ཐལ། རྒྱལ་བའི་སྲས་ཡིན་པའི་ཕྱིར། གཉིས་པ་རང་ལུགས་ནི། མཆོད་བརྗོད་ཀྱི་སྐབས་སུ་དང་པོར་གཞི་ཤེས། དེ་ནས་ལམ་ཤེས། དེ་ནས་རྣམ་མཁྱེན་ལ་བསྟོད་པ་དེ་རྒྱན་གྱི་ཆེད་དུ་བྱ་བའི་གདུལ་བྱའི་ལམ་ཉམས་ལེན་གྱི་རིམ་པ་དང་མཐུན་པར་བསྟོད་པ་ཡིན་ཏེ། སྐྱེས་བུ་འབྲིང་དང་ཐུན་མོང་པའི་ལམ་གྱི་རིམ་པ་ལ་བློ་མ་སྦྱངས་པར་སྐྱེས་བུ་ཆེན་པོའི་ལམ་རིམ་གྱིས་བསྡུས་པའི་སྙིང་རྗེ་ཆེན་པོ་མི་སྐྱེ། དེ་མ་སྐྱེས་ན་ཐེག་ཆེན་སེམས་བསྐྱེད་དང་ལམ་ཤེས་སོགས་མི་སྐྱེ་བས་སྐྱེས་བུ་ཆེན་པོའི་ལམ་རིམ་རྒྱུད་ལ་སྐྱེ་བ་ལ་འབྲིང་དང་ཐུན་མོང་བའི་ལམ་རིམ་ལ་བློ་སྦྱོང་བ་སྔོན་དུ་འགྲོ་དགོས་པ་ཤེས་པའི་ཆེད་དུ་ཡིན་པའི་ཕྱིར།
སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་ལ་སྐབས་འདིར་དངོས་སུ་བསྟན་པའི་མཁྱེན་པ་གསུམ་དུ་གྲངས་ངེས་ཏེ། དེ་ལ་དེ་གསུམ་དུ་དབྱེར་ཡོད། དེ་ལས་མང་མི་དགོས་ཤིང་ཉུང་ན་མི་འདུ་བའི་ཕྱིར། སངས་འཕགས་ཀྱི་ཡུམ་དེ་ལ་སྒྲས་བརྗོད་རིགས་ཀྱིས་དབྱེ་ན། དེའི་སྐྱེད་བྱེད་ཀྱི་ཡུམ་དང་། དེའི་བཞེད་དོན་སྒྲུབ་བྱེད་ཀྱི་ཡུམ་གཉིས་ལས། ཕྱི་མ་ལ། དེ་སྐྱེད་བྱེད་མ་ཡིན་པའི་བཞེད་དོན་སྒྲུབ་བྱེད་ཀྱི་ཡུམ་དང་། སྐྱེད་བྱེད་ཀྱི་བཞེད་དོན་སྒྲུབ་བྱེད་ཀྱི་ཡུམ་གཉིས་ཡོད་དེ། རྣམ་མཁྱེན་དང་པོ་དང་། ས་བཅུའི་ཡེ་ཤེས་གཉིས་པ་ཡིན་པའི་ཕྱིར། སངས་རྒྱས་འཕགས་པའི་ཡུམ་ཡིན་ན། དེའི་སྐྱེད་བྱེད་ཡིན་པས་ཁྱབ་པ་དང་། རྣམ་མཁྱེན་གྱི་སྲས་ཡིན་ན། དེའི་འབྲས་བུ་ཡིན་པས་ཁྱབ་སྟེ། འགྲེལ་པ་ལས། སངས་རྒྱས་ལ་སོགས་པ་སྐྲུན་པར་མཛད་པ་ནི་གདོན་མི་ཟ་བར་སྲིད་པ་ཉིད་དོ། །ཞེས་དང་། རྣམ་བཤད་ལས། མཁྱེན་པ་སྔ་མས་འཕགས་པ་ཕྱི་མ་སྐྱེད་ཅིང་། ཉེར་ཞི་ལ་སོགས་པའི་བཞེད་དོན་སྒྲུབ་པར་བྱེད་པས་ཡུམ་དང་སྲས་ནི་བསྐྱེད་བྱ་སྐྱེད་བྱེད་དུ་ཤེས་པར་བྱའོ། །ཞེས་གསུངས་པའི་ཕྱིར། རང་སྲས་འཕགས་པའི་བཞེད་དོན་ཕུན་ཚོགས་སྒྲུབ་བྱེད་ཀྱི་ལམ་ཞུགས་ཀྱི་མཁྱེན་པ་དེ་འདིར་བསྟན་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད། རང་སྲས་འཕགས་པའི་བཞེད་དོན་ཕུན་ཚོགས་སྒྲུབ་བྱེད་ཀྱི་སྐབས་འདིར་དངོས་སུ་བསྟན་པའི་འཕགས་རྒྱུད་ཀྱི་མཁྱེན་པ་དེ་སྐབས་འདིར་དངོས་སུ་བསྟན་པའི་མཆོད་བརྗོད་ཡུལ་དུ་གྱུར་པའི་ཡུམ་གྱི་མཚན་ཉིད། རྩོད་པ་སྤོང་བ་ལ་ཁ་ཅིག །མཁྱེན་གསུམ་གང་རུང་ཡིན་ན། སྐབས་འདིར་
དངོས་སུ་བསྟན་པའི་མཆོད་བརྗོད་དུ་གྱུར་པའི་ཡུམ་ཡིན་པས་ཁྱབ་པར་ཐལ། དེར་གྲངས་ངེས་པའི་ཕྱིར་ན་མ་ཁྱབ། འདོད་ན། སྔར་བཀག་ཟིན། མ་ཁྱབ་མཚམས་སུ། མངོན་རྗེས་གང་རུང་ཡིན་ན་ཚད་མ་ཡིན་པས་ཁྱབ་པ་ཐལ། ཚད་མ་ལ་མངོན་རྗེས་ཀྱི་དེ་གཉིས་སུ་གྲངས་ངེས་པའི་ཕྱིར། ཁྱབ་པ་འགྲིག །ཡང་ཁ་ཅིག །རྣམ་མཁྱེན་ཆོས་ཅན། སངས་འཕགས་ཀྱི་ཡུམ་ཡིན་པར་ཐལ། དེའི་བཞེད་དོན་སྒྲུབ་བྱེད་ཀྱི་ཡུམ་ཡིན་པའི་ཕྱིར་ན་མ་ཁྱབ། ཡང་ཁོ་ན་རེ། དམན་ལམ་སྔོན་དུ་མ་སོང་བའི་ཐེག་ཆེན་གྱི་ཚོགས་ལམ་ཆོས་ཅན། རང་སྲས་འཕགས་པའི་བཞེད་དོན་ཕུན་སུམ་ཚོགས་སྒྲུབ་བྱེད་ཀྱི་ལམ་ཞུགས་ཀྱི་མཁྱེན་པ་ཡིན་པར་ཐལ། འདིར་བསྟན་མཆོད་བརྗོད་ཡུལ་དུ་གྱུར་པའི་ཡུམ་ཡིན་པའི་ཕྱིར། འདོད་མི་ནུས་ཏེ། ཁྱོད་ཀྱི་སྲས་སུ་གྱུར་པའི་འཕགས་པ་མེད་པའི་ཕྱིར། དེར་ཐལ། ཚོགས་སྦྱོར་ལ་གནས་པའི་དམན་ལམ་སྔོན་མ་སོང་གི་འཕགས་པ་མེད་པའི་ཕྱིར་ཟེར་ན། རང་སྲས་འཕགས་པའི་བཞེད་དོན་ཕུན་ཚོགས་སྒྲུབ་ནུས་ཀྱི་མཁྱེན་པ་ཡིན་ན། འཕགས་རྒྱུད་ཀྱི་མཁྱེན་པ་ཡིན་པས་ཁྱབ་པར་ཐལ། དམན་ལམ་སྔོན་དུ་མ་སོང་བའི་ཐེག་ཆེན་གྱི་ཚོགས་ལམ་དེ་དེ་མ་ཡིན་པའི་ཕྱིར། འདོད་ན། དམན་ལམ་སྔོན་དུ་མ་སོང་བའི་ཐེག་ཆེན་གྱི་སྦྱོར་ལམ་ཆོས་མཆོག་ཆེན་པོ་ཆོས་ཅན། དེར་ཐལ། དེའི་ཕྱིར། རྟགས་སྔར་བསྒྲུབ་ཟིན་ཏོ། །ཁ་ཅིག །རྣམ་མཁྱེན་སྐད་ཅིག་ཐ་མ་ཆོས་ཅན། གོང་གི་མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། ཁྱོད་ཀྱི་སྲས་སུ་གྱུར་པའི་འཕགས་པ་མེད་པའི་ཕྱིར། དེར་ཐལ། ཁྱོད་ཀྱི་རིགས་འདྲ་ཕྱི་མར་གྱུར་པའི་མཁྱེན་པ་མེད་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར། ཟེར་ན་མི་འཐད་དེ། རྣམ
་མཁྱེན་སྐད་ཅིག་ཐ་མ་ཆོས་ཅན། ཁྱོད་ཀྱི་རིགས་འདྲ་ཕྱི་མར་གྱུར་པའི་ཤེས་པ་ཡོད་པར་ཐལ། ཁྱོད་ཤེས་པ་གང་ཞིག །རང་གི་རིགས་འདྲ་ཕྱི་མར་མཚམས་སྦྱོར་བའི་ཕྱིར། ཕྱི་མ་དེར་ཐལ། རིག་པ་ཡིན་པའི་ཕྱིར། མ་ཁྱབ་ན། སྐྱེ་བ་ཕྱི་མ་ཡོད་པའི་སྒྲུབ་བྱེད་རྣམ་དག་མེད་པར་ཐལ་ལོ། །གཞན་ཡང་། རིག་པ་སྐད་ཅིག་དང་པོ་ཆོས་ཅན། ཁྱོད་ཀྱི་རིགས་འདྲ་སྔ་མར་གྱུར་པའི་རིག་པ་མེད་པར་ཐལ། ཁྱོད་རིག་པ་སྐད་ཅིག་དང་པོ་ཡིན་པའི་ཕྱིར། ཁྱབ་པ་ཡོད་དེ། རིག་པ་སྐད་ཅིག་ཐ་མ་ཡིན་ན་རང་གི་རིགས་འདྲ་ཕྱི་མར་གྱུར་པའི་ཤེས་པ་མེད་དགོས་པའི་ཕྱིར་རོ། །གཉིས་པ་བརྒལ་ལན་ལ། ས་བཅད་འགའ་ཞིག་གྱིས་ཀྱང་། སྤྱི་དོན་དུ་རིགས་པ་ཆགས་པ་རྣམས་ཀྱིས་ཤེས་པར་བྱའོ།། །།