དཔལ་མགོན་ཞལ་བཞི་པའི་གཏོར་འབུལ་དང་བསྟོད་པ།
དཔལ་མགོན་ཞལ་བཞི་པའི་གཏོར་འབུལ་དངོས་གྲུབ་ཀུན་འབྱུང་དང་བསྟོད་པ་རྔམས་པའི་སྒྲ་སྒྲོགས་བཅས་བཞུགས་སོ། །
བདེ་ཆེན་ལྷན་སྐྱེས་དགའ་བའི་རང་བཞིན་ལས། །སྣང་སྟོང་སྲིན་པོའི་རོལ་གར་གདོང་བཞི་པ། །ཡུམ་བཞི་སྲིད་གསུམ་དྲེགས་པའི་སྡེ་དང་བཅས། །ཐོགས་མེད་རྫུ་འཕྲུལ་ཤུགས་ཀྱིས་གནས་འདིར་གཤེགས། །མདུན་དུ་འཇིགས་རུང་དུར་ཁྲོད་ཆེན་པོའི་དབུས། །ཁྲག་ཞག་རྦ་ཀློང་འཁྲུགས་པའི་ཆོས་འབྱུང་ནང༌། །པད་ཉི་མི་རོ་བརྩེགས་པའི་གདན་ཁྲི་ལ། །དགྱེས་བཞིན་བཞུགས་ཏེ་རྣལ་འབྱོར་སྡོངས་གྲོགས་མཛོད། །ས་གཞི་བར་སྣང་ནམ་མཁའི་ཁྱོན་འགེང་བའི། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་དང༌། །སྦྱངས་རྟོགས་སྦར་བྱས་དམར་ཆེན་གཏོར་མའི་ཚོགས། །གུས་པས་འབུལ་ལོ་ཐུགས་དམ་བསྐང་གྱུར་ཅིག །བདེ་ཆེན་རྒྱལ་པོ་བཅོམ་ལྡན་ཧེ་རུ་ཀ །ཁྲོ་བོའི་སྐུར་བསྟན་རྡོ་རྗེ་ནག་པོ་ཆེ། །མཁའ་འགྲོའི་གཙོ་མོ་ཡུམ་བཞི་འཁོར་བཅས་ལ། །སྙིང་ནས་འདུད་དོ་བཅོལ་བའི་འཕྲིན་ལས་མཛོད། །རྡོ་རྗེ་འཆང་སོགས་རྩ་བརྒྱུད་བླ་མ་ཡིས། །བཀའ་བསྒོས་གཡར་དམ་གཉན་པོ་དགོངས་མཛོད་ལ། །སྡེ་འདིར་ཕྱི་ནང་ཉེར་འཚེ་ཀུན་ཞི་ཞིང༌། །ཆབ་སྲིད་དཔལ་འབྱོར་རྒྱས་པའི་ལས་མཛོད་ཅིག །ཁྱད་པར་ཉེས་མེད་ཉེས་པར་བལྟ་བའི་དགྲ། །བསྒྲལ་བའི་ཞིང་བཅུ་ཚང་བའི་སྡིག་ཅན་འདི། །གཉེན་དང་རྩ་ལག་རྒྱུད་དང་བཅས་པ་ཀུན། །ལོ་དང་ཟླ་བ་ཞག་ཏུ་མ་བཞག་པར། །ལྟས་དང་ཆོ་འཕྲུལ་འཇིགས་པས་
སྤ་བཀོང་སྟེ། །ནད་དང་གནོད་པའི་གནམ་ལྕགས་ཐོག་མདའ་ཡིས། །ཚེ་སྲོག་དབང་ཐང་ཟས་ནོར་ལོངས་སྤྱོད་ཀུན། །ཐལ་བའི་རྡུལ་དུ་རློག་ཅིག་ས་མ་ཡ། །བསྐུལ་ལོ་ཞིང་སྐྱོང་ཆེན་པོ་ལས་ལ་བསྐུལ། །རྦད་དོ་ནག་པོ་ཆེན་པོ་དགྲ་ལ་རྦད། །མཐུ་རྩལ་དུས་ལ་བབ་ཀྱི་མཐུ་མ་ཆུང༌། །དམ་བཞག་དུས་ལ་བབ་ཀྱི་དམ་མ་འདྲལ། །ཡུམ་ཆེན་མ་མོས་དལ་ཡམས་དགྲ་ལ་ཐོངས། །དྲེགས་པ་སྡེ་བརྒྱད་འཁྲུགས་པས་ཆོ་འཕྲུལ་སྟོན། །གྲི་ཐོགས་བཤན་པའི་ཚོགས་ཀྱིས་དགྲ་བོ་འདིའི། །སྲོག་རྩ་ཆོད་ལ་སྙིང་ཁྲག་ཞལ་དུ་སྟོབ། །མདོར་ན་བདག་ཅག་དཔོན་སློབ་དགེ་འདུན་སྡེ། །ཀུན་གྱི་སྲུང་མའི་གཙོ་བོར་མངའ་གསོལ་གྱི། །ཉིན་གསུམ་བྱ་ར་མཚན་གསུམ་མེལ་ཚེ་ཡིས། །ལས་བཞིའི་འཕྲིན་ལས་སྒྲུབ་ལ་མ་གཡེལ་ཞིག །དཔལ་ལྡན་བླ་མའི་སྐུ་ཚེ་མཛད་འཕྲིན་རྒྱས། །དགེ་འདུན་ཐུགས་མཐུན་བསླབ་གསུམ་ཉམས་ལེན་དང༌། །མདོ་སྔགས་བཤད་སྒྲུབ་བསྟན་པའི་བྱ་བ་ཀུན། །གེགས་མེད་ལྷུན་གྱིས་གྲུབ་པའི་བཀྲ་ཤིས་སྩོལ། །དུས་གཏོར་དང་དམིགས་བསལ་གྱི་སྐབས་མ་གཏོགས་རྒྱུན་ལྡན་ལས་མཛོད་ཅིག །ཅེས་པའི་མཚམས་ནས། མདོར་ན་ཞེས་པ་དང་སྦྱོར། ཞེས་དཔལ་མགོན་ཞལ་བཞི་པ་ལ་གཏོར་འབུལ་བྱེད་ཚུལ་བསྡུས་པ་འདི་ནི། མདོ་སྔགས་ཡོངས་སུ་རྫོགས་པའི་བཤེས་གཉེན་ཆེན་པོ་དུས་འཁོར་དཔོན་སློབ་འཇམ་དབྱངས་གྲགས་པ་དང༌། སྨྲ་བའི་ཁྱུ་མཆོག་རྡོ་རྗེ་
འཛིན་པ་དཀོན་མཆོག་དར་རྒྱས། ལས་སྣེ་མང་དང་བཅས་ནས་གྲྭ་ཚང་གི་ཚོགས་འདོན་དུ་དགོས་ཚུལ་ལྟར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །༈ བརྐྱངས་བསྐུམས་གར་གྱིས་རོལ་པས་དྲག་པོ་ཆུང་མ་དང་བཅས་རྣམ་གནོན་ངན་སོང་སྲིད་པ་གནས་ནས་སྐྲོད། །ཤེས་རབ་ཕག་མོར་རྗེས་ཆགས་རོལ་བས་སྲིད་མཐར་སྦྱོར་ཞིང་མི་འགྱུར་ལྷན་སྐྱེས་བདེ་ཆེན་བདུད་རྩི་འཐུང༌། །ཁྲོ་ཆགས་བརྗིད་ལྡན་གཟི་འབར་གཟུགས་སྐུའི་མཁའ་དབྱིངས་རབ་དཀར་རུས་པའི་རྒྱན་ཕྲེང་རྒྱུ་སྐར་ཚོམ་བུས་མཛེས། །ཧེ་རུ་ཀ་དཔལ་དཔའ་བོའི་དབང་ཕྱུག་དེ་ལ་བཏུད་ནས་དཔལ་མགོན་ཞལ་བཞི་པ་ལ་བསྟོད་པར་བགྱི། །དམར་ཆེན་དྲི་སྣོམ་གཅན་གཟན་ང་རོ་རྒྱུད་མར་སྒྲོགས་ཤིང་རོ་ལངས་ཀྱིས་གང་རབ་འཇིགས་དུར་ཁྲོད་ན། །རྦ་རླབས་ནམ་མཁའི་མཐར་འཁྱུད་བམ་ཆེན་མགོ་ཕྲེང་ལྦུ་བ་རབ་གསལ་ཁྲག་ཞག་རྒྱ་མཚོ་འཁྲུགས་པའི་ཀློང། །འུར་འུར་ནག་པོའི་དུད་སྤྲིན་དང་འདྲེས་གྲང་བའི་ཕ་མཐའ་ཟ་བྱེད་ཡེ་ཤེས་མེ་དཔུང་འབར་བའི་དབུས། །པད་ཉི་དགྲ་བོ་བསྣོལ་མའི་གདན་ལ་བརྐྱངས་བསྐུམས་གར་མཛད་ལྷ་མཆོག་མཧཱ་ཀཱ་ལ་ཁྱོད་ལ་བསྟོད། །ཡན་ལག་རགས་ཤིང་ལྟོ་བ་རབ་འཕྱང་མི་སྡུག་སྲིན་པོའི་གཟུགས་ཅན་མདོག་ནག་མུན་པའི་དཀྱིལ་འཁོར་རྫོགས། །དམར་སེར་མེ་ཡི་རལ་བ་གསིག་ཅིང་བཅུ་གཉིས་ཉི་མ་འབར་བའི་སྡང་མིག་ཡོན་པའི་ཚ་ཟེར་འཕྲོ། །ལྗགས་འདྲིལ་ཁྲག་གིས་རབ་བསྒོས་མཆེ་བ་རྣོན་པོ་བཞི་བཞི་གཙིགས་ཤིང་གཏུམ་དྲག་ཧ་ཧའི་གད་རྒྱངས་མཐར། །ཀྵིཾ་ཀྵིཾ་ཕེཾ་ཞེས་མཁའ་འགྲོ་དབང་དུ་སྡུད་ཅིང་ས་གསུམ་དཀྱིལ་འཁོར་ཡངས་པའི་ཁྱོན་ཀུན་འདར་བར་བྱེད། །གྲི་
གུག་གིས་གཏུབ་དགྲ་སྙིང་ཁྲག་དྲོན་གྱིས་གང་ཐོད་པ་ཞལ་དུ་སྟོབ་ཅིང་དགྱེས་པའི་རྐན་སྒྲ་སྒྲོགས། །གནམ་ལྕགས་རལ་གྲིས་བདུད་རིགས་མགོ་བོ་བྲེགས་ཏེ་བརྒྱ་ཕྱེད་ཕྲེང་བ་ཁྲག་གི་རྒྱུན་ལྡན་མགུལ་བར་འཛིན། །མདུང་ཐུང་བགེགས་ཀྱི་ལྟོ་བར་བསྣུན་པའི་རྒྱུ་རློན་ག་ཤལ་ལ་འཁྲིལ་སྦྲུལ་ནག་ཆུན་པོ་སྟོང་གིས་སྤྲས། །གཡེར་ཁའི་སྒྲ་ལྡན་འོག་པག་གིས་བཅིང་སྟག་ཤམ་གཡོ་བའི་གར་མཁན་རྡོ་རྗེ་ནག་པོ་གདོང་བཞི་པ། །གང་གི་ཕྱོགས་བཞིར་མིག་སྨན་མར་གད་རོ་ཧི་ཏེ་ཀ་གསེར་གྱི་བྲག་རི་རབ་མཐོའི་རྩེ་མོ་ཅན། །མུན་ནག་དང་འདྲེས་མེ་ལྕེའི་གོས་གྱོན་གད་མོ་རྒོད་ཅིང་ས་ཆེན་གཡོ་བའི་གོམ་སྟབས་བསྒྱུར་བ་བཞིན། །གཡུང་མོ་གཏུམ་མོ་སྲིན་མོ་སིངྒ་ལི་ཞེས་རབ་ཏུ་ཁྲོ་ཞིང་རྔམས་པའི་ཡུམ་ཆེན་སྲིན་མོ་བཞི། །བདུད་ཀྱི་དཀྱིལ་འཁོར་སྲེག་བྱེད་གཟི་བྱིན་མེ་དཔུང་འབར་བའི་འཁོར་ཚོགས་དམ་ཅན་རྒྱ་མཚོར་བཅས་ལ་བསྟོད། །མདོར་ན་མཐའ་ཡས་འགྲོ་བའི་དོན་སླད་བརྟན་གཡོའི་དངོས་ཀུན་མི་འགྱུར་ལྷན་སྐྱེས་བདེ་བའི་འཁོར་ལོ་ཆེར། །སྡོམ་མཛད་དཔའ་བོ་རྣལ་འབྱོར་མ་རྣམས་ཡོངས་ཀྱི་དབང་ཕྱུག་མཆོག་གི་གནས་དེར་བགྲོད་པ་མ་རྫོགས་པ། །དེ་སྲིད་ཧེ་རུ་ཀ་ཡི་བཀའ་རྟགས་རྡོ་རྗེའི་རི་མོས་གཙུག་མཛེས་ལེགས་ལྡན་ནག་པོ་འཁོར་བཅས་ཀྱིས། །སངས་རྒྱས་བསྟན་ལ་གནོད་པའི་བགེགས་ཀྱི་དཔུང་ཚོགས་སྡེ་དང་བཅས་པ་ཐལ་བར་རློག་པའི་འཕྲིན་ལས་མཛོད། །འདིར་སྨྲས་པ། དཔལ་གྱི་མགོན་པོ་རྡོ་རྗེ་གདོང་བཞི་པར། །བསྟོད་པའི་རོལ་མོ་རྔམས་པ་སྒྲ་སྒྲོགས་འདི། །བྱེད་པོ་ཧེ་རུ་ཀ་ཡི་ཞབས་བསྟེན་པའི། །ྋབཙུན་པ་དཀོན་མཆོག་བསྟན་པའི་སྒྲོན་མེ་ཡིན། །