དཔལ་གསང་བ་འདུས་པའི་བཤད་པའི་རྒྱུད་ཡེ་ཤེས་རྡོ་རྗེ་ཀུན་ལས་བཏུས་པའི་ཊཱིཀྐ། །

---

^{[མ་དཔེ་གཟིགས་ན་འདིར་གནོན།]}

དཔལ་གསང་བ་འདུས་པའི་བཤད་པའི་རྒྱུད་ཡེ་ཤེས་རྡོ་རྗེ་ཀུན་ལས་བཏུས་པའི་ཊཱིཀྐ་བཞུགས་སོ། །

---

^{[མ་དཔེ་གཟིགས་ན་འདིར་གནོན།]}

དཔལ་གསང་བ་འདུས་པའི་བཤད་པའི་རྒྱུ་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱ་ཆེར་བཤད་པ། རྒྱུད་བཤད་ཐབས་ཀྱི་མན་ངག་གསལ་བར་བསྟན་པ་ཞེས་བྱ་བ།གང་གི་ཐུགས་རྗེའི་འོད་ཟེར་རྨད་བྱུང་བ། །བདག་གི་སྙིང་ལ་ཞུགས་པས་གསུང་རབ་གནད། །ཇི་བཞིན་འབྱེད་པར་ནུས་པའི་བློ་གྲོས་མཆོག །སྩོལ་མཛད་འཇམ་དབྱངས་བླ་མ་དེ་ལ་འདུད། །ཤིན་ཏུ་ཕྲ་བ་གཉིས་སུ་མེད་པའི་རྒྱུད། །ཀུན་གྱི་དགོངས་པ་འགྲེལ་བའི་བཤད་ཐབས་ཀྱི། །མན་ངག་ཟླ་མེད་རྒྱན་བདུན་རབ་གསལ་བར། །སྟོན་མཛད་ཡེ་ཤེས་རྡོ་རྗེ་ཀུན་ལས་བཏུས། །རྡོ་རྗེ་འཆང་ཆེན་གཉིས་པ་ཀླུ་སྒྲུབ་ཀྱི། །མན་ངག་ལས་ནི་དཔལ་ལྡན་ཟླ་བ་ཡིས། །ཇི་བཞིན་གསལ་བར་བཤད་པའི་རྗེས་ཞུགས་ནས། །ཇི་ལྟར་

---

^{[མ་དཔེ་གཟིགས་ན་འདིར་གནོན།]}

ནུས་བཞིན་བདག་གིས་འདིར་བཤད་བྱ། །རྡོ་རྗེ་འཆང་གིས་རང་གི་དགོངས་ཟབ་རྣམས། །འདི་ལྟར་གྱིས་ལ་ཤོད་ཅིག་ཅེས་གསུངས་པའི། །བཤད་ཐབས་མན་ངག་བྱིན་པ་ཇི་བཞིན་དུ། །རྒྱུད་སྡེ་བཤད་པར་འདོད་རྣམས་གུས་པས་ཉོན།། །།འདིར་དཔལ་གསང་བ་འདུས་པའི་བཤད་པའི་རྒྱུ་ཡེ་ཤེས་རྡོ་རྗེ་ཀུན་ལས་བཏུས་འཆད་པ་ལ་བཞི། །མཚན་གྱི་རྣམ་གྲངས། །འགྱུར་མཛད་པའི་ཕྱག །གཞུང་དངོས་ཀྱི་དོན། །མཇུག་གི་དོན་ནོ། །དང་པོ་ནི། རྒྱུད་འདིའི་མཚན་ལ་རྒྱ་གར་གྱི་སྐད་དུ་ཤྲཱི་ཛྙཱ་ན་བཛྲ་ས་མུཙྪ་ཡ་ནཱ་མ་མཧཱ་ཡོ་ག་ཏནྟྲ་ཞེས་པ། །བོད་ཀྱི་སྐད་དུ་བསྒྱུར་ན་ཤྲཱི་ནི་དཔལ་དང༌། ཛྙཱ་བཛྲ་ནི་ཡེ་ཤེས་རྡོ་རྗེ་དང༌། ས་མུཙྪ་ཡ་ནི་ཀུན་ལས་བཏུས་པ་དང༌། ནཱ་མ་ནི་ཞེས་བྱ་བ་དང༌། མཧཱ་

---

^{[མ་དཔེ་གཟིགས་ན་འདིར་གནོན།]}

ཡོ་ག་ནི་རྣལ་འབྱོར་ཆེན་པོ་དང༌། ཏནྟྲ་ནི་རྒྱུད་ཅེས་བྱ་བའོ། །དེ་ལ་དཔལ་ནི་ཕུན་སུམ་ཚོགས་པའི་དོན་ཡིན་ལ། དེ་ཡང་གཉིས་སུ་མེད་པའི་ཡེ་ཤེས་དང་ཚོགས་གཉིས་རྫོགས་པ་སོགས་ལ་བཤད་པས། །གཞུང་ལ་ནི་བརྗོད་བྱའི་སྒོ་ནས་བཏགས་པའོ། །ཡེ་ཤེས་ནི་སྣང་མཆེད་ཐོབ་གསུམ་གྱི་ཡེ་ཤེས་དང༌། རྡོ་རྗེ་ནི་དེ་དག་གི་འབྱུང་གནས་འོད་གསལ་ཡིན་ཏེ། འདི་ཉིད་ལས། ཡེ་ཤེས་གསུམ་རྡོ་རྗེ་ལས་ཡང་དག་པར་བྱུང་བའི་ཡེ་ཤེས་གསུམ་རྡོ་རྗེའི་རང་བཞིན་ནོ། །ཞེས་དང༌། གསུམ་པོ་དེ་དང་དེ་འོད་གསལ་བ་ལས་བྱུང་བས་རྡོ་རྗེའི་ངོ་བོའོ། །ཞེས་གསུངས་པ་བཞིན་ནོ། །གཞུང་ལ་དེ་ལྟར་བཏགས་པ་ཡང་བརྗོད་བྱའི་སྒོ་ནས་སོ། །ཀུན་ལས་བཏུས་པ་འདི་རྣལ་འབྱོར་བླ་མེད་ཀྱི་རྒྱུད་ཀུན་ལས་རྒྱུད་བཤད་ཐབས་ཀྱི་གནད་རྣམས་བསྡུས་ནས་སྟོན་པའོ། །རྣལ་འབྱོར་གྱི་དོན་ནི་རྒྱུད་ཕྱི་མ་ལས། །ཐབས་དང་ཤེས་རབ་སྙོམས་འཇུག་པ། རྣལ་འབྱོར་ཞེས་ནི་བཤད་པ་ཡིན། །གང་ཞིག་དངོས་མེད་ཤེས་རབ་སྟེ། །ཐབས་ནི་དངོས་པོའི་མཚན་ཉིད་དོ། །ཞེས་ཐབས་ཤེས་གཉིས་མཉམ་པར་སྦྱོར་བའི་དོན་རྣལ་འབྱོར་གྱི་དོན་དུ་གསུངས་པའོ། །དེ་ལ་སྣང་བའི་ཡེ་ཤེས་སྟོང་པ་ནི་ཤེས་རབ་དང༌། སྣང་བ་མཆེད་པའི་ཡེ་ཤེས་ཤིན་ཏུ་སྟོང་པ་ནི་ཐབས་ཡིན་ལ། དེ་གཉིས་མཉམ་པར་སྦྱོར་བའི་སྙོམས་པར་འཇུག་པ་ནི་སྣང་བ་ཉེར་ཐོབ་སྟོང་པ་ཆེན་པོ་སྟེ། དེ་ནི་སྦས་དོན་གྱི་རྣལ་འབྱོར་རོ། །ལམ་གྱི་སྣང་བ་དང་མཆེད་པའི་ཡེ་ཤེས་གཉིས་ཀ་དོན་དམ་པ་ལ་དམིགས་ཤིང་སྣང་བ་དང་བཅས་པར་འདྲ་བ་ལ།

---

^{[མ་དཔེ་གཟིགས་ན་འདིར་གནོན།]}

སྣང་བའི་ཡེ་ཤེས་ལ་དངོས་པོ་མེད་པ་ཞེས་གསུངས་པའི་དངོས་པོ་མེད་པ་ནི། རང་བཞིན་མེད་པའི་སྟོང་པ་རྟོགས་པ་ཡིན་ལ། འདིར་སྟོང་བ་ཤེས་རབ་ཤས་ཆེ་ཞིང་བདེ་བ་ཤས་ཆུང་བས་དངོས་པོ་མེད་པ་ཞེས་གསུངས་སོ། །མཆེད་པའི་ཡེ་ཤེས་ལ་དངོས་པོ་ཞེས་གསུངས་པའི་དངོས་པོ་ནི་བདེ་བ་ཡིན་ལ། འདིར་བདེ་བ་ཤས་ཆེ་ཞིང་སྟོང་པ་ཤས་ཆུང་བས་དངོས་པོ་ཞེས་གསུངས་སོ། །ཉེར་ཐོབ་ནི་བདེ་སྟོང་ཆ་མཉམ་པོར་འཇུག་པས་ཐབས་ཤེས་གཉིས་སྙོམས་པར་འཇུག་པའི་རྣལ་འབྱོར་རོ། །ཡང་མཆོག་ཏུ་བདེ་བའི་ཡེ་ཤེས་དང་དོན་དམ་བདེན་པ་འོད་གསལ་གཉིས་རོ་གཅིག་ཏུ་ཞུགས་པའི་དོན་དམ་ནི་ཐམས་ཅད་དངོས་པོ་མེད་པའམ་ཐམས་ཅད་སྟོང་པའི་ཤེས་རབ་དང། ཡོངས་སུ་དག་པའི་སྒྱུ་མའི་སྐུ་ཀུན་རྫོབ་ནི་དངོས་པོའི་མཚན་ཉིད་ཀྱི་ཐབས་ཡིན་ལ། དེ་གཉིས་ངོ་བོ་གཅིག་ཏུ་སྦྱོར་བའི་གཉིས་སུ་མེད་པའི་ཡེ་ཤེས་ཟུང་འཇུག་ནི་བདེན་གཉིས་ཀྱི་ཐབས་ཤེས་གཉིས་སྙོམས་པར་འཇུག་པའི་མཐར་ཐུག་གི་རྣལ་འབྱོར་རོ། །ཆེན་པོ་ཞེས་པ་ནི། རྣལ་འབྱོར་བླ་ན་མེད་པ་ལ་རྣལ་འབྱོར་ཆེན་པོར་བྱས་པའི་ཆེན་པོ་ཡིན་གྱི། རྣལ་འབྱོར་ཆེན་པོའི་རྒྱུད་ཡིན་པ་ཙམ་གྱིས་རྣལ་འབྱོར་བླ་མེད་ཀྱི་རྒྱུད་དུ་མི་འགྱུར་ཏེ། རྡོ་རྗེ་རྩེ་མོ་ལས་རྩེ་མོ་ལ་རྣལ་འབྱོར་ཆེན་པོའི་རྒྱུད་དུ་གསུངས་པ་དང༌། སྤྱོད་བསྡུས་ལས་དཔལ་མཆོག་དང་པོ་ལ་རྣལ་འབྱོར་ཆེན་པོའོ་རྒྱུད་དུ་གསུངས་པ་དང། སྤྱོད་བསྡུས་ལས་དཔལ་མཆོག་དང་པོ་ལ་རྣལ་འབྱོར་ཆེན་པོའི་རྒྱུད་དུ་གསུངས་པས་སོ། །རྒྱུད་ཀྱི་དོན་ནི་རྒྱུད་ཕྱི་མ་ལས། །རྒྱུད་ནི་རྒྱུན་ཞེས་བྱ་བར་གྲགས། །

---

^{[མ་དཔེ་གཟིགས་ན་འདིར་གནོན།]}

རྒྱུན་དེ་རྣམ་པ་གསུམ་འགྱུར་ཏེ། །གཞི་དང་དེ་བཞིན་རང་བཞིན་དང༌། མི་འཕྲོགས་པ་ཡིས་རབ་ཕྱེ་བ། གཞི་དང་ངང་བཞིན་རྒྱུ་ཡིན་ཏེ། །དེ་བཞིན་མི་འཕྲོགས་འབྲས་བུའོ། །གཞི་ནི་ཐབས་ཞེས་བྱ་བ་སྟེ། གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་གསུངས་པ་ལྟར་རོ། །རྐང་པ་ལྔ་པ་ནི་མན་ངག་སྙེ་མར་དྲངས་པ་ལས། རང་བཞིན་རྣམ་པ་རྒྱུ་ཡིན་ཏེ། ཞེས་བསྒྱུར་བ་ལྟར་ལེགས་སོ། །རྒྱུའི་རྒྱུད་དང་ཐབས་ཀྱི་རྒྱུད་དང་འབྲས་བུའི་རྒྱུད་གསུམ་འབྲེལ་ཆགས་པར་འབྱུང་བ་ནི་རྒྱུད་ཀྱི་དོན་རྒྱུན་ཆགས་པ་ཡིན་ལ། དེ་ཡང་ཚིག་གི་སྒོ་ནས་གོང་འོག་འཁྲུགས་པ་ཡོད་ཀྱང༌། དོན་གྱི་སྒོ་ནས་འབྲེལ་ཆགས་པར་སྟོན་པ་ལ་ནཱ་རོ་ཏ་པས་བཤད་པ་ཉིད་ལེགས་པར་མཐོང་ངོ་། །རྒྱུའི་རྒྱུད་ནི་སྒྲུབ་པ་པོ་རིན་པོ་ཆེ་ལྟ་བུའི་གང་ཟག་དང༌། ཐབས་ཀྱི་རྒྱུད་ནི་རིན་གཉིས་ཀྱི་བསྙེན་སྒྲུབ་ཡན་ལག་བཞི་དང༌། འབྲས་བུའི་རྒྱུད་ནི་གཞན་གྱིས་འཕྲོག་པར་མི་ནུས་པའི་མི་སློབ་པའི་ཟུང་འཇུག་ལ་ནཱ་རོ་ཏ་པས་བཤད་ལ། །ཤཱནྟི་པ་དང་ཨ་བྷ་ཡས་རྒྱུ་རྒྱུད་སེམས་ཀྱི་རབ་བཞིན་སྟོང་ཉིད་དང། རྒྱལ་བས་བྱིན་གྱིས་སེམས་ཉིད་ལ་བཤད་དེ། །གཉིས་པ་ནི། སངས་རྒྱས་དང་ཞེས་སོགས་ཏེ་གོ་བར་ཟད་དོ། །གསུམ་པ་ལ་གཉིས། སྤྱིའི་དོན། ཡན་ལག་གི་དོན་ནོ། །དང་པོ་ལ་གསུམ། གླིང་གཞི་མ་གསུངས་པའི་རྒྱུ་མཚན། གཞན་འཇུག་པའི་ཡན་ལག་དགོས་འབྲེལ། །འདུས་པའི་བཤད་རྒྱུད་དུ་འགྲོ་ཚུལ་ལོ། །དང་པོ་ནི། རྒྱུད་འདི་ལ་འདི་སྐད་བདག་གིས་ཐོས་ཞེས་སོགས་ཀྱི་གླེང་གཞི་མ་གསུངས་པའི་རྒྱུ་མཚན་གང་ཡིན་སྙམ་ན། རྒྱུད་འདི་

---

^{[མ་དཔེ་གཟིགས་ན་འདིར་གནོན།]}

ཉིད་ལས་འདི་ཡེ་ཤེས་རྡོ་རྗེ་ཀུན་ལས་བཏུས་ཀྱི་བདེ་བ་ཆེན་པོའི་ལེའུ་ཞེས་པ་རིན་པ་གཉིས་པར་གསུངས་པས། ཡེ་ཤེས་རྡོ་རྗེ་ཀུན་ལས་བཏུས་ཀྱི་དུམ་བུ་ཕྱི་མ་གཅིག་ཏུ་སྣང་བས་འདིར་གླེང་གཞི་མ་གསུངས་སོ། །རྡོ་རྗེ་སྙིང་པོ་རྒྱན་གྱི་རྒྱུད་ལས་འདོད་ཆགས་ཆེན་པོའི་ཐབས་རྒྱུད་ཀྱི་དབྱེ་བ་གསུངས་པའི་སྐབས་སུ། །ཀུན་ལས་བཏུས་པ་འབུམ་ཕྲག་གཅིག །ཅེས་གསུངས་པས་ཡེ་ཤེས་རྡོ་རྗེ་ཀུན་ལས་བཏུས་ལ་རྒྱུད་ཤིན་ཏུ་རྒྱས་པ་ཅིག་ཡོད་པར་གསལ་ལ། སློབ་དཔོན་ཨ་ལཾ་ཀ་ཀ་ལ་ཤས་ཀྱང་ཡེ་ཤེས་རྡོ་རྗེ་ཀུན་ལས་བཏུས་ལ་རྒྱུད་རྒྱས་བསྡུས་གཉིས་ཡོད་པར་བཤད་པའི་འདི་རྒྱུད་བསྡུས་པ་ཡིན་ལ། འོན་ཀྱང་བསྡུས་པ་ཚང་བ་དེ་ཡང་མ་འགྱུར་སྣང་ངོ་། །གཉིས་པ་ནི། དགོས་པ་ལ་སོགས་པ་མ་མཐོང་བའི་གཞུང་ལ་ནི་དད་པའི་རྗེས་སུ་འབྲང་བ་རྣམས་ཀྱང་འཇུག་པར་མི་འགྱུར་ན། ཆོས་ཀྱི་རྗེས་སུ་འབྲང་བ་རྣམས་ལྟ་སྨོས་ཀྱང་ཅི་དགོས། དེའི་ཕྱིར་རྒྱུད་འདི་ལ་ཐོག་མར་དགོས་པ་ལ་སོགས་པ་བཞི་བརྗོད་པར་བྱ་དགོས་ན། བརྗོད་པར་བྱ་བ་ནི་གང་ཞིག །དགོས་པ་ནི་ཇི་ལྟ་བུ། དགོས་པའི་དགོས་པ་ནི་ཅི་ཞིག ། འབྲེལ་པ་ནི་གང་སྙམ་ན། བརྗོད་པར་བྱ་བ་ནི་རྒྱུད་བཤད་ཐབས་ཀྱི་མན་ངག་རྒྱན་བདུན་ཡན་ལག་དང་བཅས་པའོ། །དགོས་པ་ནི་རྒྱུད་འདི་ལ་བརྟེན་ནས་དོན་དེ་རྣམས་ལེགས་པར་རྟོགས་པའོ། །དགོས་པའི་དགོས་པ་ནི་དེ་ཁོང་དུ་ཆུད་ནས་རྒྱུད་དོན་ཉམས་སུ་བླངས་པས། །མཆོག་སངས་རྒྱས་དང༌། འབྲིང་གྲུབ་པ་

---

^{[མ་དཔེ་གཟིགས་ན་འདིར་གནོན།]}

བརྒྱད་དང༌། ཐ་མ་ཞི་སོགས་ཀྱི་དངོས་གྲུབ་ཐོབ་པའོ། །འབྲེལ་པ་ནི་ཉིད་དགོས་དགོས་པ་དང༌། བརྗོད་བྱའོ་དོན་རྟོགས་པ་རྗོད་བྱེད་གཞུང་ལ་རག་ལས་པའོ། །གསུམ་པ་ལ་གཉིས། དངོས་ཀྱི་དོན། །དོན་དེ་རྒྱུད་འདིའི་གཞུང་གིས་བསྟན་ཚུལ་ལོ། །དང་པོ་ནི། རྒྱུད་འདི་སྤྱིར་ཐབས་རྒྱུད་ཡིན་པར་ནི་རྡོ་རྗེ་སྙིང་པོ་རྒྱན་ལས་གསུངས་ལ། བྱེ་བྲག་ཏུ་བཤད་པའི་རྒྱུད་ཡིན་པར་ནི་སྤྱོད་བསྡུས་དང་སྒྲོན་གསལ་ལས་གསུངས་ཤིང༌། དེ་ཡང་སྐབས་སྟོབས་ཀྱིས་འདུས་པའི་བཤད་རྒྱུད་དུ་བཞེད་པ་ཡིན་ནོ། །དེ་ནི་གཙོ་བོའི་དབང་དུ་བྱས་ནས་ཡིན་གྱི། གཞན་རྣམ་འབྱོར་བླ་ན་མེད་པའི་རྒྱུད་མཐའ་དྲུག་དང་ཚུལ་བཞིའི་འཆིང་བས་བཅིངས་པ་ཐམས་ཅད་ཀྱི་འཆད་ཚུལ་སྟོན་པས། །གསང་འདུས་ཁོ་ནའི་འཆད་བྱད་དུ་མི་གཟུང་ངོ། །འོ་ན་རྒྱུད་འདིས་དཔལ་འདུས་པ་འཆད་པའི་བཤད་ཐབས་ཀྱི་མན་ངག་ཇི་འདྲ་ཞིག་བསྟན་པས་འདུས་པའི་བཤད་རྒྱུད་དུ་འགྲོ་སྙམ་ན། བཤད་ཐབས་ཀྱི་མན་ངག་ནི། གླེང་བསླང་བ་རྣམ་པ་ལྔའི་རྒྱན་དང༌། མཐའ་དྲུག་གི་རྒྱན་དང༌། བཤད་པའི་ཚུལ་བཞིའི་རྒྱན་དང༌། འཚང་རྒྱ་བའི་ཚུལ་བཞིའི་རྒྱན་དང༌། བཤད་པའི་དབྱེ་བ་རྣམ་པ་གཉིས་ཀྱི་རྒྱན་དང༌། ཉན་པའི་གང་ཟག་རྣམ་པ་ལྔའི་རྒྱན་དང༌། དགོས་པ་བདེན་པ་གཉིས་ངེས་པའི་རྒྱན་ཏེ། རྒྱན་བདུན་ཡིན་ནོ། །དེ་ལ་རྒྱན་དང་པོས་ནི་གང་བཤད་པར་བྱ་བའི་བཤད་གཞི་ཁྱད་པར་ལྔ་དང་ལྡན་པ་ཅིག་སྟོན་སྟེ། དེ་ནི་འདུས་པའི་རྩ་བའི་རྒྱུད་ལྟ་བུའོ། །ཁྱད་པར་ལྔ་ལྡན་གྱི་རྩ་རྒྱུད་དེའི་དགོངས་པ་འགྲེལ་བའི་ཚུལ་ནི་མཐའ་དྲུག་དང་ཚུལ་བཞིར་ངེས་ལ།

---

^{[མ་དཔེ་གཟིགས་ན་འདིར་གནོན།]}

དེ་ནི་རྒྱན་གཉིས་པ་དང་གསུམ་པས་སྟོན་ནོ། །དེས་དགོངས་པ་བཀྲལ་བའི་ལམ་རྣམས་ཚེ་གཅིག་ལ་འཚང་རྒྱ་བའི་ལམ་གྱི་རིམ་པར་བསྡུ་ན་བཞིར་འདུ་ལ། དེ་ནི་རྒྱན་བཞི་པས་སྟོན་ནོ། །དེ་ལྟ་བུའི་ལམ་དེ་བསྟན་པར་བྱ་བའི་ཡུལ་ནི་རིན་པོ་ཆེ་ལྟ་བུ་ལ་སོགས་པའི་གང་ཟག་ལྔར་ངེས་ལ་དེ་ནི་རྒྱན་དྲུག་པས་སྟོན་ནོ། །དེ་རྣམས་ལ་ལམ་དེ་འཆད་པའི་ཚུལ་ནི་བཤད་པའི་དབྱེ་བ་གཉིས་སུ་ངེས་ལ་དེ་ནི་རྒྱན་ལྔ་པས་སྟོན་ནོ། །དེ་ལྟར་བཤད་པས་རྒྱུད་དོན་ལ་གོ་བ་ཇི་འདྲ་ཞིག་སྐྱེ་ན། ཀུན་རྫོབ་སྒྱུ་མ་དང་དོན་དམ་འོད་གསལ་གཉིས་ཀྱི་དོན་ལ་ངེས་པ་རྙེད་པ་ཅིག་དགོས་ཏེ། དེ་ནི་རྒྱན་བདུན་པས་སྟོན་ནོ། །དོན་དེ་དག་མདོར་བསྡུ་ན་བཤད་གཞིའི་རྒྱུད་འདི་འདྲ་བ་ཞིག །དགོངས་པ་འགྲེལ་ཚུལ་འདི་འདྲ་ཞིག་གིས་བཀྲལ་བའི་དོན་རྣམས། ལམ་བགྲོད་པའི་རིམ་པ་འདི་འདྲ་ཞིག་ཏུ་བསྡུས་ནས། ཉན་པ་པོ་འདི་ལྟ་བུ་ཞིག་ལ། བཤད་ལུགས་གཉིས་པོ་འདི་འདྲ་ཞིག་བྱས་ནས། གོ་བའི་གཙོ་བོ་འདི་འདྲ་ཞིག་གི་དོན་ངེས་པ་ཅིག་བྱུང་ན། རྩ་བའི་རྒྱུད་ཀྱི་དོན་ཕྱིན་ཅི་མ་ལོག་པར་ཤོད་པ་ཡིན་ནོ་ཞེས་སྟོན་པ་ཡིན་ནོ། །གཉིས་པ་ནི། སྔར་བཤད་པའི་དོན་དེ་རྣམས་རྒྱུད་འདིས་ཇི་ལྟར་བསྟན་པ་ནི། བྱམས་པ་ལ་སོགས་པ་ཞེས་པ་ནས། འདི་ནི་མཐར་ཐུག་པའི་དབང་དུ་བྱས་པའོ། །ཞེས་པའི་བར་གྱིས་བཤད་པའི་ཚུལ་བཞིའི་རྒྱན་གྱི་ཡིག་དོན་མ་གཏོགས་པ་སྤྱི་དང་སྦས་པ་དང་མཐར་ཐུག་པའི་ཚུལ་གསུམ་བསྟན་ཏོ། །བྱམས་པས་གསོལ་བ་ཞེས་པ་ནས། སྒྲ་ཇི་བཞིན་མ་ཡིན་པས་

---

^{[མ་དཔེ་གཟིགས་ན་འདིར་གནོན།]}

བཤད་པའོ། །ཞེས་པའི་བར་གྱིས་མཐའ་དྲུག་གི་རྒྱན་གྱི་དབྱེ་བ་དང་རེ་རེའི་དོན་རྣམས་དང༌། ཡི་གེའི་དོན་བསྟན་ཏོ། །མཐའ་དྲུག་དང་ཚུལ་བཞི་ཚང་བའི་བཤད་པ་རྣལ་འབྱོར་བླ་མེད་ཀྱི་རྒྱུད་མ་གཏོགས་པ་ལ་མི་རུང་ཡང༌། ཡི་གེའི་དོན་དང་སྒྲ་ཇི་བཞིན་པ་ལ་སོགས་པའི་བཤད་པ་འགའ་ཞིག་རྒྱུད་སྡེ་འོག་མ་ལ་ཡང་རུང་བས། མཐའ་དྲུག་དང་ཚུལ་བཞིའི་བཤད་པ་ཕྱོགས་རེ་བ་ཡན་ཆད་འཇུག་པའི་རྒྱུད་ཀུན་གྱི་རྣམ་གཞག་སྟོན་པ་ནི། བྱང་ཆུབ་སེམས་དཔའ་ཆེན་པོས་གསོལ་པ་ཞེས་པ་ནས། རྟོག་པ་ལ་གནས་སོ། །ཞེས་པའི་བར་རོ། །རྒྱུད་ཀྱི་དགོངས་པ་འགྲེལ་བའི་ཐབས་ཀྱི་གཙོ་བོ་མཐའ་དྲུག་དང་ཚུལ་བཞིའི་རྒྱན་གྱི་བཤད་པ་བསྟན་ཟིན་མོད་ཀྱང༌། རྒྱུད་བཤད་ཐབས་ཀྱི་མན་ངག་རྒྱན་བདུན་ཀ་ཚང་བར་སྟོན་པ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ་ཞེས་པ་ནས། དེའི་མཐའ་ནི་གནས་སོ། །ཞེས་པའི་བར་རོ། །འདི་ནི་རགས་པ་སྟེ། རྒྱས་པར་ནི་ཚིག་དོན་གྱི་སྐབས་སུ་འཆང་པར་འགྱུར་རོ། །གཉིས་པ་ལ་གསུམ། རྒྱུད་སྟོན་པའི་མཚམས་སྦྱོར། མཚམས་སྦྱར་ནས་རྒྱུད་བཤད་པའི་རིམ་པ། དེ་ལྟར་བཤད་པས་འཁོར་རྣམས་ཚིམ་པའི་ཚུལ་ལོ། །དང་པོ་ནི། གལ་ཏེ་རྒྱུད་ཉུང་ངུ་འདིས་འདུས་པ་ལ་སོགས་པའི་རྒྱུད་བཤད་ཐབས་ཀྱི་མན་ངག་རྣམས་སྟོན་ན། འདི་རྣམས་རྒྱས་པར་རྒྱུད་གང་ལས་གསུངས་སྙམ་ན། བཅོམ་ལྡན་འདས་ཀྱིས་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་རྒྱས་པ་ལས་ཇི་སྐད་དུ་གསུངས་པ་ཇི་ལྟ་བ་དེ་བཞིན་དུ་འདིར་བསྡུས་ནས་གསུངས་པའོ། །ཁུ་དང་ནག་ཚོས་བསྒྱུར་བ་ལ་ཇི་

---

^{[མ་དཔེ་གཟིགས་ན་འདིར་གནོན།]}

སྐད་དུ་ཞེས་པ་ཡོད༌ལ། མར་པ་ལྷོ་བྲག་པས་བསྒྱུར་བ་ལ་མེད་དོ། །གཉིས་པ་ལ་གསུམ། རྒྱུད་ཀྱི་དགོངས་པ་འགྲེལ་བའི་སྒོ། །བཤད་པར་བྱ་བའི་རྒྱུད་ཀྱི་རྣམ་གཞག །རྒྱུད་བཤད་ཐབས་ཀྱི་མན་ངག་ཚང་བར་བསྟན་པའོ། །དང་པོ་གཉིས། །ཚུལ་བཞིའི་བཤད་པ ། མཐའ་དྲུག་གི་བཤད་པའོ། །དང་པོ་ལ་གཉིས། ཚུལ་གསུམ་གྱི་དོན་བཤད་པ། །ཡིག་དོན་སྐབས་འདིར་མ་བཤད་པའི་རྒྱུད་མཚན་ནོ། །དང་པོ་ལ་གསུམ། སྦས་པའི་དོན་བཤད་པ། སྤྱིའི་དོན་བཤད་པ། མཐར་ཐུག་པའི་དོན་བཤད་པའོ། །དང་པོ་ལ་གཉིས། དོན་དངོས། དེ་སྦས་དོན་དུ་བསྟན་པའོ། །དང་པོ་ལ་བཞི། སྣང་བ་སེམས་ཀྱི་སྦས་དོན། །འདོད་ཆགས་ཆོས་ཀྱི་སྦས་དོན། །ཀུན་རྫོབ་སྒྱུ་མའི་སྦས་དོམ། །འདོད་ཆགས་ཆོས་སྦས་ཀྱི་བསྔགས་པའོ། །དང་པོ་ལ་གཉིས། སྣང་བ་སེམས་ཀྱི་རིམ་པ་དང་རྣམ་གྲངས་མདོར་བསྟན་པ། །སྣང་བ་སེམས་ཀྱི་རིམ་པ་དང་རྣམ་གྲངས་རྒྱས་པར་བཤད་པའོ། །དང་པོ་ལ་གསུམ། །སྣང་བ་གསུམ་ལ་ཞུ་བ་མཛད་པ། རྡོ་རྗེ་ངོ་བོར་བཤད་པའི་ལན། དེ་ཉིད་ཞུས་ལན་གྱིས་བཤད་པའོ། །དང་པོ་ནི། ཞུས་པ་ཞེས་ཁྱད་པར་གྱི་གཞིར་དྲང་ངོ་། །གང་གིས་ན། བྱམས་པ་ལ་སོགས་པ་བླ་ན་མེད་པའི་བྱང་ཆུབ་ཐོབ་པར་འདོད་ཅིང༌། སེམས་ཅན་ཐམས་ཅད་མྱ་ངན་ལས་བཟླ་བར་འདོད་པའི་སེམས་པ་དྲུག་སྟོང་གིས་སོ། །གང་ལ་ན། བཅོམ་ལྡན་འདས་ལའོ། །དེའི་དོན་སྒྲོན་གསལ་ལས། སྐལ་བ་ཕུན་སུམ་ཚོགས་པ་ཉིད་ཀྱི་ཕྱིར་དང་མི་མཐུན་པའི་ཕྱོགས་མ་

---

^{[མ་དཔེ་གཟིགས་ན་འདིར་གནོན།]}

ལུས་པར་བཅོམ་པས་བཅོམ་ལྡན་འདས་སོ། །ཞེས་གསུངས་ཏེ། བྷ་ག་ཝན་ཞེས་པའི་བྷ་ག་ནི་སྐལ་བ་ལ་འཇུག་ལ། དེ་ནི་སཾ་བྷུ་ཊ་ལས། དབང་ཕྱུག་དང་ནི་གཟུགས་བཟང་དང༌། དཔལ་དང་གྲགས་དང་ཡེ་ཤེས་དང༌། བརྩོན་འགྲུས་ཕུན་སུམ་ཚོགས་པ་སྟེ། དྲུག་པོ་རྣམས་ལ་སྐལ་ཞེས་བྱ། །ཞེས་གསུངས་པ་ལྟར་དབང་ཕྱུག་ལ་སོགས་པའི་སྐལ་བ་དྲུག་དང་ལྡན་པས་སྐལ་ལྡན་ནམ་བཅོམ་ལྡན་ནོ། །གཞན་ཡང་བྷ་ག་ལ་དེས་ཚིག་གི་ཚུལ་གྱིས་བྷ་ག་ཝན་བཅོམ་པ་སྟེ། མི་མཐུན་པའི་ཕྱོགས་ཉོན་མོངས་གསུམ་མམ་སྒྲིབ་པ་གཉིས་སམ་བདུད་བཞི་མ་ལུས་པར་བཅོམ་པས་ན་བཅོམ། །དེ་འདི་ལ་ལྡན་པས་ན་བཅོམ་ལྡན་ཏེ། རྡོ་རྗེ་རྩེ་མོ་ལས། ཉོན་མོངས་ལས་དང་དེ་བཞིན་སྐྱེ། །ཉོན་མོངས་ཤེས་བྱའི་སྒྲིབ་དེ་རྣམས། གང་ཡང་མི་མཐུན་ཕྱོགས་ཆོས་བཅོམ། །དེ་འདིར་བཅོམ་ལྡན་འདས་སུ་བཤད། །ཅེས་སོ། །འཇིག་རྟེན་པའི་ལྷ་ཆེན་པོ་རྣམས་ལའང་བཅོམ་ལྡན་དང་ལེགས་ལྡན་གྱི་སྒྲ་འཇུག་པས། དེ་ལས་ཁྱད་པར་དུ་བྱ་བའི་ཕྱིར་རུ་འདས་ཞེས་པ་བཀས་བཅད་ཀྱིས་བསྣན་གྱི་སྐད་དོད་ལ་མེད་དོ། །ཅི་ཞིག་ཞུས་ན། བཅོམ་ལྡན་འདས་ཞེས་པོས་ནས། རྒྱུད་རྣམས་ལས་མ་རིག་པ་དང་སེམས་ལས་བྱུང་བ་དང་སེམས་ཞེས་བགྱི་བ་སྟེ་ཐ་སྙད་བཏགས་པ་རྣམས་ཀྱི་རིམ་པ་ཅི་ལྟར་ལགས་ཞེས་ཞུས་སོ། །འོག་ཏུ་རྣལ་འབྱོར་གྱི་རྒྱུད་དུ་མཐའ་དྲུག་གི་བཤད་པ་ཇི་ལྟར་ལགས་ཞེས་དྲིས་པའི་ལན་དུ། མཐའ་དྲུག་གི་དབྱེ་བ་དང༌། དེ་རྣམས་རེ་རེའི་དོན་བཤད་པ་ཞུས་པའི་ལན་དུ། །དེ་རྣམས་ཀྱི་བཤད་པ་

---

^{[མ་དཔེ་གཟིགས་ན་འདིར་གནོན།]}

གསུངས་པ་བཞིན་དུ། །ཚུལ་བཞི་ལ་ཡང་ཚུལ་བཞིར་བཤད་པ་ཇི་ལྟར་ལགས་ཞེས་ཞུས་པ་དང༌། དེའི་ལན་བཤད་པ་དོན་གྱིས་འཐོབ་པས་སྔོན་དུ་དྲིས་ལན་དེ་ལྟར་བྱ་ལ། དེ་ནས་ཚུལ་བཞིའི་སྦས་དོན་གསུམ་གྱི་ནང་ནས་སེམས་ཀྱིས་སྦས་པའི་ལན་ཞུས་པ་དང་དེའི་ལན་སྦྱར་བར་བྱའོ། །གཉིས་པ་ནི། བཅོན་ལྡན་འདས་འོད་གསལ་གྱི་དེ་བཞིན་ཉིད་དུ་གཤེགས་པ་ཐམས་ཅད་ཀྱི་སྐུ་རྡོ་རྗེ་རྣམ་སྣང་དང༌། གསུང་རྡོ་རྗེ་འོད་དཔག་མེད་དང༌། ཐུགས་རྡོ་རྗེ་མི་བསྐྱོད་པ་གསུམ་དབྱེར་མི་ཕྱེད་པའི་རྡོ་རྗེ་འཆང་གིས་དྲིས་པའི་ལན་བཀའ་སྩལ་པ་ནི། ཞུ་བ་པོ་རྣམས་ལ་རྡོ་རྗེ་ལ་སོགས་པའི་རིགས་ལས་སྐྱེས་པས་ན་རིགས་ཀྱི་བུ་ཞེས་བོས་ནས། ལེགས་པར་ཉོན་ཅིག་དང་བཤད་པར་བྱའོ་ཞེས་ཉན་པར་བསྐུལ་ལོ། །ཡེ་ཤེས་གསུམ་ནི་མ་རིག་པ་ལ་སོགས་པ་སྔར་བསྟན་པ་གསུམ་མོ། །རྡོ་རྗེ་ནི་འོད་གསལ་ལོ། །དེ་ལས་ཡང་དག་པར་བྱུང་བའི་ཡེ་ཤེས་གསུམ་རྡོ་རྗེའི་རང་བཞིན་ནོ། །ཁུའི་འགྱུར་ནག་ཚོས་བཅོས་པ་ལས། རྡོ་རྗེ་ལས་ཡང་དག་པར་བྱུང་བའི། །ཞེས་འབྱུང་ལ། མར་འགྱུར་ལས། རྡོ་རྗེ་ལས་ཡང་དག་པར་བྱུང་བ་དེའི་ཕྱིར་ཞེས་འབྱུང་ངོ་། །གལ་ཏེ་མ་རིག་པ་ལ་སོགས་པ་གསུམ་གྱི་དོན་དྲིས་པའི་ལན་དུ། དེ་གསུམ་གྱི་ངོས་འཛིན་མ་བཤད་པར་དེ་གསུམ་རྡོ་རྗེ་ལས་བྱུང་བས་སམ་བྱུང་བའི་རྡོ་རྗེའི་རང་བཞིན་དུ་བཤད་པ་མ་འབྲེལ་ལ། ལུགས་མཐུན་དུ་འཇུག་པའི་མ་རིག་པ་ལ་སོགས་པ་གསུམ་ནི་འོད་གསལ་གྱི་རྒྱུ་ཡིན་པས། དེ་གསུམ་འོད་གསལ་ལས་འབྱུང་བར་བཤད་པ་

---

^{[མ་དཔེ་གཟིགས་ན་འདིར་གནོན།]}

ཡང་མི་འཐད་དོ་སྙམ་ན། ཡེ་ཤེས་གསུམ་ལ་ལུགས་མཐུན་དུ་འོད་གསལ་དུ་འཇུག་པ་དང༌། ལུགས་ལྡོག་ཏུ་འོད་གསལ་ལས་འབྱུང་བ་གཉིས་ཡོད་ཀྱང༌། དྲི་བའི་སྐབས་སུ་མ་རིག་པ་དང་ཞེས་ལུགས་ལྡོག་ནས་འབྱུང་བའི་རིམ་པ་དྲིས་པས། ཡེ་ཤེས་གསུམ་འོད་གསལ་ལས་འབྱུང་བར་བཤད་པ་མི་འཐད་པ་མིན་ལ། མ་རིག་པ་ལ་སོགས་པ་གསུམ་ཇི་ལྟར་ལགས་ཞེས་དྲིས་པ་ནི། སྐབས་འདིར་དེ་གསུམ་གང་ལས་འབྱུང་བའི་རིམ་པ་དང༌། དེ་གསུམ་ཉིད་ཀྱིའམ་རིམ་པ་དྲིས་པ་ཡིན་པས་ལན་མ་འབྲེལ་བ་མེད་དོ། །དེས་ན་མར་འགྱུར་ལྟར་རྒྱུ་མཚན་དུ་བྱས་ན་ལགས་པས། བྱུང་བའི་ཞེས་འདོད་ནའང་དོན་ནི་དེ་ལྟར་བྱའོ། །འོ་ན་དེ་ལས་བྱུང་བའི་རྒྱུ་མཚན་གྱིས་དེའི་རང་བཞིན་ནོ་ཞེས་པ་མ་འབྲེལ་ལོ་སྙམ་ན། རང་བཞིན་གྱི་སྐད་དོང་སྲ་བྷཱ་བ་ནི་རང་བཞིན་དང་དངོས་པོ་དང་འབྱུང་བ་དང་གསུམ་ག་ལ་དྲང་དུ་རུང་བས། རྒྱ་གར་བའི་མཁས་པ་རྣམས་ཀྱིས་དེ་ལྟར་བཤད་པ་མང་ངོ་། །གསུམ་པ་ལ་གཉིས། ཞུ་བ༌། ལན་ནོ། །དང་པོ་ནི། བྱམས་པས་གསོལ་པ། བཅོམ་ལྡན་འདས་ཞེས་བོས་ནས། ཡེ་ཤེས་གསུམ་རྡོ་རྗེ་ལས་བྱུང་བས་རྡོ་རྗེའི་ངོ་བོའི་ཞེས་གསུངས་པའི་རྡོ་རྗེ་གང་ཡིན། དེ་ལས་བྱུང་བའི་རིམ་པ་ཇི་ལྟར་ལགས་ཞེས་ཞུས་སོ། །གཉིས་པ་ལ་བཞི། མ་རིག་པའི་འབྱུང་རིམ་དང་རྣམ་གྲངས། སྣང་བ་མཆེད་པའི་འབྱུང་རིམ་དང་རྣམ་གྲངས། སྣང་བའི་འབྱུང་རིམ་དང་རྣམ་གྲངས། དེ་རྣམས་ཀྱི་དོན་བསྡུ་བའོ། །དང་པོ་ནི། ཡེ་ཤེས་གསུམ་གྱི་འབྱུང་གནས་སུ་བཤད་པའི་རྡོ་རྗེ་ནི། བཅོན་ལྡན་འདས་ཀྱིས་ལན་

---

^{[མ་དཔེ་གཟིགས་ན་འདིར་གནོན།]}

བཀའ་སྩལ་པ། ཆགས་པ་འདོད་ཆགས་མཆེད་པ་དང༌། དེས་མཚོན་ནས་ཆགས་བྲལ་སྣང་བ་དང༌། ཆགས་པ་བར་མ་ཉེར་ཐོབ་གསུམ་མེད་པའི་ཡང་དག་པའི་མཐའ་འོད་གསལ་ལོ། །དེ་ནི་ཤིན་ཏུ་རྟོགས་པར་དཀའ་བ་ཉིད་དང༌། རང་བཞིན་གྱིས་འགག་པ་མེད་པ་དང༌། རང་བཞིན་གྱིས་སྐྱེ་བ་མེད་པའོ། །ཁྱད་པར་དེ་གསུམ་ནི་ཡུལ་གྱི་འོད་གསལ་དང་ཡུལ་ཅན་གྱི་འོད་གསལ་གཉིས་ཀ་ལ་ཡོད་ཅིང༌། གཞི་དུས་དང་ལམ་དུས་ཀྱི་འོད་གསལ་གཉིས་ཀ་ལ་ཡང་ཡོད་དོ། །འོན་ཀྱང་འདིར་ཡེ་ཤེས་གསུམ་གང་ལས་སྐྱེ་བའི་འོད་གསལ་ནི་དུས། གཉིས་ཀར་ཡུལ་ཅན་གྱི་འོད་གསལ་ལ་བྱའོ། །འཆི་བའི་འོང་གསལ་སེམས་ཅན་རྣམས་ཀྱིས་ཉམས་སུ་མྱོང་མོད་ཀྱང་ངེས་པར་དཀའ་སྟེ། སྔོན་པོ་མཐོང་ཡང་སྐད་ཅིག་མ་མི་ངེས་པ་བཞིན་ནོ། །འོད་གསལ་དེའི་རྐྱེན་གྱིས་མ་རིག་པ་སྣང་བ་ཉེར་ཐོབ་ཀྱི་ཡེ་ཤེས་སྐྱེ་སྟེ། མ་རིག་པ་ཞེས་བྱ་བ་དང༌། སྣང་བ་ཉེ་བར་ཐོབ་པ་དང༌། སྟོང་པ་ཆེན་པོ་ཞེས་འབྱུང་བ་རྣམས་ནི་མིང་གི་རྣམ་གྲངས་སོ། །སྟོང་པ་ཆེན་པོ་དེ་ཡང་རྟོགས་པ་སྟེ་ངེས་པར་དཀའ་བའོ། །ངེས་དཀའ་བ་འོན་ཀྱང་གཉིས་སྣང་དག་པའི་ངེས་དཀའ་བ་མིན་གྱི་གཉིས་སུ་སྣང་བ་དང་བཅས་པར་བརྗོད་པར་བྱའོ། །འོག་ནས་རྣམ་པར་ཤེས་པ་གསུམ་ག་རྟོགས་དཀའ་བར་གསུངས་པས། ཚིག་ཐ་མ་གཉིས་པོ་འདི་འོག་མ་གཉིས་ལ་སྦྱར་བ་ཡང་དོན་གྱིས་འཐོབ་བོ། །གཉིས་པ་ནི། འོད་གསལ་ལས་དངོས་སུ་བྱུང་བའི་མ་རིག་པའི་རྐྱེན་གྱིས་སེམས་ལས་བྱུང་བ་སྣང་བ་མཆེད་པའི་ཡེ་ཤེས་སྐྱེ་ཏེ།

---

^{[མ་དཔེ་གཟིགས་ན་འདིར་གནོན།]}

དེའི་མིང་གི་རྣམ་གྲངས་ལ་ནི། སྣང་བ་མཆེད་པ་དང༌། ཤིན་ཏུ་སྟོང་པ་ཞེས་གསུངས་སོ། །འདིར་སྔ་མའི་རིགས་འགྲོས་ཀྱིས་སེམས་ལས་བྱུང་བ་ཞེས་ཀྱང་འབྱུང་བར་རིག་པས། །འོག་གི་སེམས་ལས་བྱུང་བ་ཞེས་པ་འདིར་སྦྱར་རོ། །གསུམ་པ་ནི། སེམས་ལས་བྱུང་བའི་རྐྱེན་གྱིས་སེམས་སྣང་བའི་ཡེ་ཤེས་སྐྱེ་སྟེ། དེའི་མིང་གི་རྣམ་གྲངས་ལ་ནི། སྣང་བ་དང༌།སྟོང་བ་ཞེས་ཀྱང་བྱའོ། །འདིར་ཡང་སེམས་ཞེས་པའི་རྣམ་གྲངས་ཀྱང་བསྣན་ནོ། །སྣང་མཆེད་གཉིས་ནི་འོད་གསལ་ལས་བརྒྱུད་ནས་བྱུང་བ་ཡིན་ནོ། །ཁུའི་འགྱུར་ནག་ཚོས་བཅོས་པ་ལས་སེམས་དང་སེམས་ལས་བྱུང་བའོ། །བདག་དང་མ་རིག་པ་དང་བདག་མེད་པ་དང་གསུམ་པོ་ཞེས་འབྱུང་ལ། མར་འགྱུར་ལས། །སེམས་དང་སེམས་ལས་བྱུང་བ་དང་མ་རིག་པའི་བདག་ཉིད་བདག་མེད་པའོ་ཞེས་འབྱུང་ཡང་འགྱུར་སྔ་མ་ལྟར་བདེ་བ་འདྲའོ། །བཞི་པ་ནི། བདག་ཏུ་འདོད་པའི་གཞིར་གྱུར་པས་ན་བདག་སྟེ་སེམས་དང༌། མ་རིག་པ་དང༌། འདིའི་དུས་ན་བདག་གི་སྒྲས་བསྟན་པའི་སེམས་དེ་མེད་པས་ན་བདག་མེད་པ་སྟེ་སེམས་ལས་བྱུང་བ་དང༌། གསུམ་པོ་བདག་དེ་དང་མ་རིག་པ་དང་སེམས་བྱུང་དེ་རྡོ་རྗེ་འོད་གསལ་བ་ལས་བྱུང་བས་ན་གསུམ་པོ་དེ་ལ་རྡོ་རྗེའི་ངོ་བོའི་ཞེས་གསུངས་སོ། །ལན་གསུངས་པ་དེ་ནས་བྱམས་པ་ལ་སོགས་པ་དེ་དག་དུས་དེའི་ཚེ་ལན་དེ་ལ་ངོ་མཚར་བ་ཐོབ་པར་གྱུར་ཏེ། རེ་ཞིག་ཅང་མི་སྨྲ་བར་གྱུར་ཏོ། །གཉིས་པ་ལ་གསུམ། འཁོར་ལ་དྲི་བའི་ཕྱིར་དུ་བསྐུལ་བ། བསྐུལ་ནས་ཞུས་པ། །ཞུས་པའི་ལན་བཤད་པའོ། །དང་པོ་ནི།

---

^{[མ་དཔེ་གཟིགས་ན་འདིར་གནོན།]}

ཡེ་ཤེ་གསུམ་རྡོ་རྗེའི་ངོ་བོ་ཡིན་ཚུལ་ཞུས་པའི་ལན་བཤད་ཟིན་པ་དེ་ནས་སྔར་བཀའ་སྩལ་པ་ལ་ལྟོས་ནས་ཡང་བཀའ་སྩལ་བ་ནི། རིགས་ཀྱི་བུ་དག་ཅིའི་ཕྱིར་ཅང་མི་སྨྲ་བར་གྱུར་པས་འདུག་ཅེས་འཁོར་ལ་དྲི་བའི་ཕྱིར་བསྐུལ་ལོ། །གང་གིས་ན། །བཅོམ་ལྡན་འདས་ཞེས་སོགས་ཏེ་བཤད་ཟིན་ཏོ། །གཉིས་པ་ནི། བསྐུལ་བའི་རྗེས་དེ་ནས་བྱང་ཆུབ་སེམས་དཔའ་ཆེན་པོ་དེ་རྣམས་ཀྱིས། བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ་ཞབས་ལ་མགོས་གཏུགས་ནས། སྔ་མ་ལ་ལྟོས་ནས། གཞན་ཡང་ཞུས་པ་ནི། ངོ་མཚར་བའི་ཚིག་གིས་ཨེ་མའོ་སྟོན་པ་ཞེས་བོས་ནས། རྣམ་པར་ཤེས་པ་གསུམ་གྱི་དབྱེ་བ་སྟེ་སོ་སོའི་ངོས་འཛིན་ལུགས་ལྡོག་ཏུ་འབྱུང་བའི་རིམ་པ་འཕྲོས་དང་བཅས་པ་བཤད་དུ་གསོལ་ཞེས་པའོ། །བཅོམ་ལྡན་འདས་དང་བདེ་བར་གཤེགས་པ་གཉིས་སྨོས་པ་ནི་ནན་ཏན་དུ་ཞུས་པའི་དོན་ཏོ། །རྟོགས་པར་དཀའ་བ་ནི་ཐོས་བསམ་གྱི་སྒོ་ནས་དང༌། མཆོག་ཏུ་ཟབ་པ་སྟེ་རྟོགས་པར་དཀའ་པ་ནི་སྒོམ་བྱུང་གི་སྒོ་ནས་སོ། །སྤྱོད་བསྡུས་སུ་དྲངས་པ་ལ། སླར་ཡང་ཞུས་པ། ཞེས་དང༌། མཆོག་ཏུ་རྟོགས་པར་དཀའ་བ་ཞེས་འབྱུང་ངོ་། །གསུམ་པ་ལ་གཉིས། འོད་གསལ་ལས་ལུགས་ལྡོག་ཏུ་སྐྱེ་བའི་རིམ་པ། །རིམ་པ་དེ་ཉིད་གསལ་བར་བཤད་པའོ། །དང་པོ་ལ་གཉིས། སྤྱིའི་དོན། ཡན་ལག་གི་དོན་ནོ། །དང་པོ་ལ་གསུམ། ལུགས་ལྡོག་གི་རིམ་པ་འདི་བར་སྲིད་དང་སྐྱེ་སྲིད་གཉིས་གང་གི་དབང་དུ་མཛད་པ། འཁོར་བ་

---

^{[མ་དཔེ་གཟིགས་ན་འདིར་གནོན།]}

ལྡོག་འཇུག་གཏན་ལ་ཕབ་པ་ལ་བརྟེན་ནས་ལམ་གྱི་གནད་ངོས་བཟུང་བ། ཕུང་པོ་དང་སྐྱེ་མཆད་སོགས་ཐམས་ཅད་རླུང་སེམས་འདྲེས་པ་ཙམ་དུ་གསུངས་པའི་དགོངས་པ་བསྟན་པའོ། །དང་པོ་ནི། འདིར་འོང་གསལ་ལས་སེམས་ཡིད་རྣམ་ཤེས་གསུམ་འབྱུང་བ་དང༌། རླུང་ལས་མེ་ལ་སོགས་པ་རིམ་པར་སྐྱེ་བར་གསུངས་པ་འདི། །ཚེ་འདི་ཡི་མཐའ་ཡི་འཆི་བའི་འོད་གསལ་ལས་བར་སྲིད་འགྲུབ་པའི་ཚུལ་ཡིན་ནམ། །འོན་ཏེ་བར་སྲིད་འཆི་བའི་འོད་གསལ་ལས་སྐྱེ་སྲིད་འགྲུབ་པའི་ཚུལ་ཡིན་ཞེ་ན། འོད་གསལ་ལས་སེམས་ཡིད་རྣམ་ཤེས་གསུམ་རིམ་གྱིས་འབྱུང་བ་ཡན་ཆད་གཞི་དུས་ཀྱི་འཆི་སྲིད་གཉིས་ལས་བར་དོ་དང་སྐྱེ་སྲིད་འགྲུབ་པའི་རིམ་པ་དང༌། སྔར་བཤད་པ་ལྟར་རྫོགས་རིམ་གྱི་སྐབས་སུ་ཡང་སྦྱར་དུ་རུང་མོད་ཀྱང༌། འབྱུང་བ་སྐྱེ་རིམ་སོགས་ཚད་བར་ནི་གཞིའི་བར་དོའི་འཆི་བའི་འོད་གསལ་ལས་སྐྱེ་སྲིད་འགྲུབ་པའི་རིམ་པ་ལ་སྦྱར་དགོས་ཀྱི། རྒྱུད་ཀྱི་གཞུང་འདི་རྣམས་སྤྱོད་བསྡུས་སུ་དྲངས་པའི་བཤད་པ་བྱེད་པ་རྣམས་ཀྱིས། འཆི་སྲིད་ལས་བར་སྲིད་འགྲུབ་པའི་རིམ་པ་ལ་འདི་ཐམས་ཅད་འཆད་པ་ནི་མི་འཐད་དེ། རྡོ་རྗེ་ཕྲེང་བ་དང་འགལ་བའི་ཕྱིར་ཏེ། དེ་ཉིད་ལས། བཤད་སྒོ་གསང་བའི་དབུས་ན་གནས། །མིང་ནི་མ་སྐྱེས་རྩ་ཆེན་ནོ། །དེ་ཡང་རྣམ་ཤེས་དང་བྲལ་བ། །ཡེ་ཤེས་ལུས་ནི་བདག་མེད་པ། དེར་ནི་སྐྱེ་པ་སྲོག་གི་མཆོག །སྲོག་ཆགས་རྣམས་ཀྱི་མཆོག་ཏུ་བརྗོད། །རྣམ་པར་ཤེས་པའི་ངོ་བོ་བརྟེན། །ཐོག་མར་འབྱུང་བ་བཞི་པོ་ལ། སྐྱེད་པ་ཡི་ནི་ངོ་བོར་བྱེད། དེ་

---

^{[མ་དཔེ་གཟིགས་ན་འདིར་གནོན།]}

ཚེ་རང་གི་གནས་སུ་ཐིམ། རྣམ་ཤེས་ལས་ནི་སྐྱེས་པའི་རླུང༌། དེ་ལས་མེ་ནི་སྐྱེ་བར་འགྱུར། །མེ་ལས་ཆུ་ནི་འབྱུང་བར་འགྱུར། དེ་ལས་ས་ནི་ཡང་དག་སྐྱེ། དེ་དག་རྣམས་ལས་ཕུང་པོ་འབྱུང༌། ཞེས་གསང་གནས་དེར་སྲོག་རླུང་གི་བཞོན་པ་ཅན། གྱི་རྣམ་ཤེས་ཐིམ་པའི་འོད་གསལ་ལས་རྣམ་ཤེས་དང་རླུང་མེ་སོགས་རིམ་གྱིས་སྐྱེ་བར་བཤད་པ་དང༌། རྒྱུད་འདིར་བཤད་པ་གཉིས་དོན་གཅིག་པའི་ཕྱིར་རོ། །ལུང7།དེ་དག་གི་དོན་ཞིབ་ཏུ་བཤད༌། བར་སྲིད་གང་དུ་སྐྱེ་བའི་གནས་ཇི་ལྟ་བུ་སྙམ་ན། དེར་ནི་སྐྱེ་བ་ལེན་ཞེས་བྱ་སྟེ། མ་སྐྱེས་པའི་རྩ་ཆེན་པོ་ཞེས་པའི་རྩ་གསང་གནས་ཀྱི་ཐོག་མ་ནས་ཐ་མ་བཤད་སྒོའི་བར་དུ་གསང་གནས་ཀྱི་དབུས་སུ་གནས་པའི་མའི་མངལ་གྱི་གནས་གསང་གནས་དེར་ནི་སྐྱེ་བ་ལེན་ནོ། །རྩ་དེ་བེམ་པོ་ཡིན་པས་རྣམ་ཤེས་དང་བྲལ་བའོ། །སྐྱེ་བ་ལེན་པའི་མངལ་གྱི་གནས་དེ་ནི། དེ་ཁོ་ན་ཉིད་གྲུབ་པ་ལས། སྐྱེ་འགྲོའི་གཙོ་བོ་གང་ཡིན་པ་དེ། རླུང་དང་བཅས་པའི་ཁུ་བའི་ཐིགས་པ་རྣམས་དང༌། ལྷན་ཅིག་བཙུན་མོའི་ཚིགས་ལ་བབ་པ་རྙེད་པ་ན། ལྟེ་བའི་འོག་ཏུ་ཁ་ཐུར་དུ་བལྟས་པའི་པདྨ་དམར་པོ་འདབ་མ་བརྒྱད་པའི་ནང་དུ། ཁྲག་འཛག་པའི་ལྷག་མ་ཀུན་ཏུ་བཟུང་སྟེ། དེའི་རྗེས་ལ་པདྨའི་ཁ་ཟུམ་པར་འགྱུར་རོ། །དེར་ཡང་ཁྲག་དང་ཁུ་པ་གཉིས་ཀ་ཡང་ཆུ་དང་འོ་མ་འདྲེས་པ་བཞིན་དུ་གྱུར་ནས་གོང་བུ་གཅིག་ཏུ་གྱུར་ཏེ། རང་གི་རང་བཞིན་རྩོམ་པར་བྱེད་དོ། །དེ་ནས་རྗེས་སུ་འགྲོ་བའི་རིམ་གྱིས་ནུར་ནུར་པོ་ལ་སོགས་པར་ཡོངས་

---

^{[མ་དཔེ་གཟིགས་ན་འདིར་གནོན།]}

སུ་གྱུར་པས་རིམ་གྱིས་སྐྱེ་སྟེ། ཞེས་གསུངས་པ་ལྟར་ལྟེ་བའི་འོག་ན་གནས་པའི་གསང་གནས་ཀྱི་འཁོར་ལོའོ། །དགའ་བོ་མངལ་འཇུག་ལས་ཀྱང་ཕོ་བའི་འོག་ལོང་ཁའི་གོང་གི་བར་ན་གནས་པར་བཤད་པ་དང་མཐུན་ནོ། །གཞུང་ཁ་ཅིག་ལས། །མ་སྐྱེས་པའི་ཆ་ཞེས་དང༌། ཁ་ཅིག་ལས། མ་སྐྱེས་པའི་རྩ་ཞེས་འབྱུང་ངོ། །སུ་ཞིག་སྐྱེ་ཞེ་ན། ཡེ་ཤེས་ལུས་ནི་ཞེས་པ་ཡེ་ཤེས་ཀྱི་ལུས་ཅན་བར་དོ་ལ་རྡོ་རྗེ་ཕྲེང་བའི་འགྲེལ་པས་བཤད་པ་ལྟར་བར་དོའོ། །བདག་མེད་པ་ནི་དེ་ལེན་པ་པོའི་བདག་གི་རྫས་སུ་མེད་པའོ། །བསྐལ་པ་དང་པོའི་མི་འབྱུང་བ་རགས་པའི་ལུས་སྤངས་པ་ལ་ཡེ་ཤེས་ཀྱི་ལུས་ཅན་དང་ཡིད་ཀྱི་རང་བཞིན་གྱི་ལུས་ཞེས་རྣམ་གཞག་ཏུ་གསུངས་པས། རབ་དོའི་ལུས་ཀྱང་དེ་དང་འདྲ་བས་ཡེ་ཤེས་ཀྱི་ལུས་ཞེས་གསུངས་སོ། །སྲོག་ཆགས་རྣམས་ཀྱི་སྲོག་སྟེ་རླུང་གི་མཆོག་ནི་སྲོག་འཛིན་གྱི་རླུང་ངོ་། །དེའི་བཞོན་པ་ཅན་གྱི་བར་དོའི་རྣམ་ཤེས་ཀྱི་ངོ་བོ་ལ་བརྟེན་ནས། བར་དོ་སྲིད་པ་ཚོལ་བ་དེའི་ཚེ་རང་གི་སྐྱེ་གནས་སུ་ཁུ་ཁྲག་གིས་བསྡུས་པའི་འབྱུང་བ་བཞི་ལ་ཐིམ་ནས། རང་གི་ངོ་བོ་སྔོན་ལས་ཀྱིས་སྐྱེད་པར་བྱེད་དོ། །ཞི་བ་འོད་ཀྱི་འགྱུར་དར་མ་བརྩོན་འགྲུས་ཀྱིས་བཅོས་པ་ལས། དྲོད་སྐྱེས་པ་ཡི་ངོ་བོར་བྱེད། ཅེས་འབྱུང་ཡང༌། །འགྱུར་མ་བཅོས་པ་ལས། སྐྱེད་པ་ཡི་ནི་ངོ་བོར་བྱེད། ཅེས་འབྱུང་བ་འགྲེལ་པའི་བཤད་པ་དང་མཐུན་ནོ། །གཉིས་པ་ལ་བཞི། །སྐྱེ་བ་ལུགས་ལྡོག་བཤད་པ། ཐིམ་པ་ལུགས་འབྱུང་བཤད་པ། དེ་གཉིས་ཀྱི་དོན་བསྡུས་ཏེ་བསྟན་པ། དེ་ལ་བརྟེན་ནས་ལམ་གྱི་གནད་བསྟན་

---

^{[མ་དཔེ་གཟིགས་ན་འདིར་གནོན།]}

པའོ། །དང་པོ་ལ་གསུམ། །འཆི་བའི་འོད་གསལ་ལས་སྣང་བ་གསུམ་འབྱུང་བའི་རྣམ་གཞག །སྐྱེ་འཆིའི་སེམས་ལས་འཕྲོས་པའི་དོན། སྣང་བ་ལས་རླུང་མེ་སོགས་སྐྱེ་བའི་དོན་བཤད་པའོ། །དང་པོ་ནི། དེ་ལ་ཚེ་འདིའི་འཆི་སྲིད་ཀྱི་འོད་གསལ་དང༌། བར་དོའི་འཆི་སྲིད་ཀྱི་འོད་གསལ་རྣམས་དོན་དམ་བདེན་པར་བཤད་པ་ནི། དེའི་ཚེ་སྤྲོས་པ་ཐམས་ཅད་ཞི་ནས་སྤྲིན་མེད་པའི་ནམ་མཁའ་བཞིན་དུ་ཉམས་སུ་མྱོང་བ་དང༌། དོན་དམ་བདེན་པ་མངོན་སུམ་དུ་རྟོགས་པ་གཉིས་རྣམ་པ་འདྲ་བས་ཉེ་བར་བཏགས་པ་ཡིན་གྱི། དོན་དམ་བདེན་པ་དངོས་མངོན་སུམ་དུ་བྱས་པ་མིན་ཏེ། ལུས་ཅན་ཐམས་ཅད་འབད་པ་མེད་པར་གྲོལ་བའི་སྐྱོན་དུ་འགྱུར་བའི་ཕྱིར་དང༌། དེ་ཁོ་ན་ཉིད་ཀྱི་དོན་ཐོས་བསམ་གྱིས་ལེགས་པར་གཏན་ལ་མ་ཕེབས་པ་ལ་ཡང་འོད་གསལ་དེ་ཉམས་སུ་མྱོང་བ་འབྱུང་བའི་ཕྱིར་རོ། །བཏགས་པའི་འོད་གསལ་ཉམས་སུ་མྱོང་ཡང་མི་ངེས་པ་སྲིད་ལ། མཚན་ཉིད་པ་དོན་གྱི་འོད་གསལ་མངོན་སུམ་དུ་བྱས་ཀྱང་མ་ངེས་སོ་ཞེས་སྨྲ་བར་མི་ནུས་ཏེ། འཕགས་པ་མ་ཡིན་པ་ཐམས་ཅད་ལ་དེ་ལྐོག་ཏུ་གྱུར་པའི་ཕྱིར་རོ། །དེའི་ཕྱིར་མ་ཤི་བའི་སྔོན་དུ་བདག་མེད་པའི་དོན་གཏན་ལ་ཕེབས་པའི་བུའོ་འོད་གསལ་སྐྱོང་རྒྱུ་མེད་ན། ཐབས་གཞན་གྱིས་འཆི་བའི་དུས་ཀྱི་མའི་འོད་གསལ་དང་བསྲེ་ནུས་ཀྱང༌། དེའི་ཚེ་དེ་ཁོ་ན་ཉིད་ཀྱི་དོན་རྟོགས་པ་མིན་ནོ། །ཚེ་འདིའི་འཆི་སྲིད་ཀྱི་འོད་གསལ་ལས་བར་དོ་འགྲུབ་པ་ནི་འོད་གསལ་ལས་རྣམ་ཤེས་ཉེར་ཐོབ་སྐྱེས་པ་ན་

---

^{[མ་དཔེ་གཟིགས་ན་འདིར་གནོན།]}

བར་དོ་གྲུབ་པ་ཡིན་ཏེ། འཆི་སྲིད་དགགས་པ་དང་བར་སྲིད་འགྲུབ་པ་སྲང་མདའི་མཐོ་དམན་བཞིན་དུ་མཉམ་པར་གསུངས་པའི་ཕྱིར་དང༌། བར་དོ་རྫུས་སྐྱེས་ཀྱི་ཡན་ལག་དང་ཉིང་ལག་དུས་ཅིག་ཅར་དུ་འགྲུབ་པའི་ཕྱིར་རོ། །འོན་ཀྱང་ཉེར་ཐོབ་ལས་མཆེད་པ་དང་དེ་ལས་སྣང་བ་གྲུབ་པའི་མཐར་རང་བཞིན་རྣམས་སྐྱེའོ། །མཁས་པ་ཁ་ཅིག་རྡོ་རྗེ་ཕྲེང་བ་ལས། སྣང་བ་གསུམ་གྱི་མཚན་ཉིད་ཅན། གང་འདིར་རྣམ་ཤེས་གསུམ་ཐོབ་པ། སེམས་ཅན་ཁམས་ནི་མ་ལུས་པའི། །རང་བཞིན་རྩ་བ་འདི་ཡིན་ནོ། །ཞེས་གསུངས་པས་བར་དོའི་སེམས་ཅན་འགྲུབ་པ་ལ་སྣང་བ་གསུམ་ག་རྒྱུར་དགོས་ཞེས་གསུངས་མོད་ཀྱང༌། ལུང་དེ་ནི་སྣང་བ་གསུམ་སེམས་ཅན་ཐམས་ཅད་ཀྱི་ལུས་འགྲུབ་པའི་རྒྱུར་མི་སྟོན་གྱི། སེམས་ཅན་ཐམས་ཅད་ཀྱི་རང་བཞིན་བརྒྱད་ཅུའི་རྩ་བར་སྟོན་པ་ཡིན་ནོ། །བར་དོ་ཤི་བའི་འོད་གསལ་ལས་བྱུང་བའི་རྣམ་ཤེས་ཉེར་ཐོབ་ནི། སྐྱེ་བའི་སྲིད་པ་ཞེས་བྱ་བ་སྐྱེ་གནས་སུ་དང་པོར་ཉིང་མཚམས་སྦྱོར་བའི་སེམས་སོ། །ཉེར་ཐོབ་དེ་ལས་སྐྱེས་པའི་ཡིད་ནི་སྣང་བ་མཆེད་པ་དང༌། དེ་ལས་སྐྱེས་པའི་སེམས་ནི་སྣང་བའོ། །གཉིས་པ་ནི། འདུས་པའི་སྐོར་རྣམས་ནས་ཐ་མའི་འཆི་སེམས་ཀྱི་འོད་གསལ་ནམ་མཁའ་སྤྲིན་མེད་པའི་རྣམ་པ་ཅན་དུ་སྣང་བ་དང༌། དེ་ཉིད་ཐབས་མཁས་པའི་མན་ངག་གིས་ཟིན་པས། དོན་དམ་པའི་བདེན་པ་ལ་དམིགས་པའི་ལམ་གྱི་འོད་གསལ་དང་བསྲེ་ནུས་པ་དང༌། དང་པོའི་སྐྱེ་བ་ལེན་པའི་སེམས་ནམ་མཁའ་གཡའ་དག་པ་ལྟ་བུའི་སྣང་བ་དེ་བསྡུས་ནས། ཉེར་ཐོབ་མུན་པའི་རྣམ་པ་ལྟ་བུའི་ངོ་བོར་

---

^{[མ་དཔེ་གཟིགས་ན་འདིར་གནོན།]}

བཤད་པས། ཚོགས་དྲུག་ལས་རྫས་ཐ་དད་པའི་ཀུན་གཞིའི་རྣམ་ཤེས་ཉིད་འཆི་སེམས་དང་སྐྱེ་སེམས་སུ་མི་བཞེད་པར་གསལ་ཏེ། དེ་མ་ཡིན་ན། ཀུན་བཞིའི་རྣམ་ཤེས་དམིགས་རྣམ་བརྟན་ཆགས་པར་འདོད་པས། སྐད་ཅིག་སྔ་ཕྱི་ལ་ནམ་མཁའ་གཡའ་དག་དང༌། མུན་པའི་རྣམ་པ་ཅན་དུ་དམིགས་རྣམ་འགྱུར་བ་མི་འཐད་ཅིང༌། དེ་ལ་དོན་ལྔ་དང། སེམས་ཅན་ཏེ་དབང་པོ་ལྔར་རྒྱངས་ཆད་དུ་སྣང་བ་བརྟན་པར་གནས་པ་དང༌། གཉིས་སྣང་རགས་པ་ཐམས་ཅད་ལོག་པ་འགལ་བའི་ཕྱིར་དང༌། ཀུན་གཞིའི་རྣམ་ཤེས་ལམ་དུས་སུ་རྟག་ཏུ་ལུང་མ་བསྟན་དུ་གནས་པ་དང༌། ལམ་དུས་སུ་བདག་མེད་པའི་དོན་འཛིན་བྱེད་དུ་སྐྱེད་ནུས་པ་འགལ་བའི་ཕྱིར་རོ། །གཞན་ཡང་ཐམས་ཅད་སྟོང་པའི་ངོ་བོར་གྱུར་བའི་འཆི་བའི་འོད་གསལ་གྱི་ཤེས་པ་དང༌། སྟོང་ཆེན་གྱི་ངོ་བོར་གྱུར་པའི་ཉེར་ཐོབ་ཀྱི་སེམས་གཉིས་ཀུན་གཞིའི་རྣམ་ཤེས་ཀྱི་རིགས་འདྲ་སྔ་ཕྱིར་འདོད་ན། ཤིན་ཏུ་སྟོང་པ་དང་སྟོང་པའི་ངོ་བོར་གྱུར་པའི་སྣང་མཆེད་གཉིས་ཀྱང་ཀུན་གཞིའི་རིགས་འདྲ་སྔ་ཕྱི་ལ་བཞག་དགོས་ལ། དེ་ལྟ་ན་གཞི་དུས་ཀྱི་སྟོང་པ་བཞིའི་སེམས་དེ་ཉིད་དང་རིགས་མཚུངས་པའི་ཤེས་པ་ལམ་དུས་ཀྱི་སྟོང་པ་བཞིའི་ངོ་བོར་སྐྱེད་པས། །དེ་དག་ཀྱང་ཡིད་ཤེས་ལ་མི་བྱེད་པར་ཀུན་གཞི་ལ་བྱེད་དགོས་པར་ཧ་ཅང་ཐལ་བར་འགྱུར་ཞིང༌། ཕྱག་རྒྱ་ཆེན་པོ་ཐིག་ལེ་ལས་དགའ་བ་བཞི་སྣང་མཆེད་ཐོབ་གསུམ་འོད་གསལ་དུ་བཤད་པས། དགའ་བ་བཞི་ཡང་ཀུན་གཞིའི་རིགས་འདྲ་སྔ་ཕྱི་ལ་གཞག་

---

^{[མ་དཔེ་གཟིགས་ན་འདིར་གནོན།]}

དགོས་པར་འགྱུར་རོ། །དེའི་ཕྱིར་སྣང་མཆེད་ཐོབ་གསུམ་ནི་ཡིད་ཀྱི་ཤེས་པ་ཡིན་ལ། ཡིད་ཀྱི་ཤེས་པ་ཉིད་ཀུན་ནས་ཉོན་མོངས་དང་རྣམ་བྱང་གི་ཆོས་ཐམས་ཅད་ཀྱི་རྩ་བ་དང༌། དེ་ཉིད་ལ་སེམས་དང་ཡིད་དང་རྣམ་ཤེས་གསུམ་དུ་རྒྱུད་འདིར་གསུངས་པས། ཚོགས་དྲུག་ལས་རྫས་ཐ་དད་པའི་ཀུན་གཞི་འདོད་པ་རྣམས། །ཡིད་ཀྱི་ཤེས་པ་ལས་རྫས་ཐ་དད་པའི་སེམས་ཤིག་ཀུན་བྱང་གི་རྩ་བར་འདོད་པ་དང༌། སེམས་ཀུན་གཞི་དང༌། ཡིད་ཉོན་ཡིད་དང༌། དེ་མ་ཐག་ཡིད་གཉིས་དང༌། རྣམ་ཤེས་ཚོགས་དྲུག་ལ་འདོད་པ་རྣམས་དང་མི་མཐུན་ནོ། ། དོན་གྱི་དབང་འདི་གཟིགས་ནས་དཔལ་ལྡན་ཟླ་བ་གྲགས་པས་ཀུན་གཞིའི་རྣམ་ཤེས་དྲང་དོན་དུ་བཤད་དེ། དེ་ལྟར་འཆད་པའི་མདོའི་ཤེས་བྱེད་དང༌། ཀུན་གཞི་ཁས་མི་ལེན་པ་ལ་གནོད་པ་བསྟན་པའི་སྤང་དཀའ་བ་རྣམས་ཀྱི་སྐྱོན་སྤོང་ཟླ་བའི་ལུགས་ཀྱིས་མཛད་ཚུལ་ནི་གཞན་དུ་བཤད་ཟིན་ཏོ། །མདོ་སྡེ་ལས་ཀུན་གཞིའི་རྣམ་ཤེས་བཞག་མ་བཞག་གི་ཚུལ་གཉིས་བཀའ་སྩལ་པ་བཞིན་དུ། རྗེ་བཙུན་བྱམས་པས་ཀྱང་དེ་དག་གི་དོན་རྣམ་པར་འགྲེལ་བ་ན། དབུས་མཐའ་དང་མདོ་སྡེ་རྒྱན་དང་ཆོས་ཉིད་རྣམ་འབྱེད་དུ་ཀུན་གཞི་རྣམ་པར་བཞག་པ་དང༌། ཕྱི་རོལ་མེད་པའི་ཕྱོགས་བཤད་ལ། མངོན་རྟོགས་རྒྱན་དང་རྒྱུད་བླ་མ་ལས་ཀུན་གཞིའི་རྣམས་ཤེས་རྣམ་པར་མ་བཞག་པ་དང༌། ཕྱི་རོལ་མ་བཀག་པའི་ཕྱོགས་བཤད་དོ། །དེ་བཞིན་རྒྱུད་དེ་རྣམས་ལས་ཀྱང་ཀུན་གཞིའི་རྣམ་ཤེས་རྣམ་པར་བཞག་པ་དང་རྣམ་པར་མ་བཞག་པའི་ཕྱོགས་གཉིས་ཡོད་ལ། འདུས་པ་རྩ་བཤད་

---

^{[མ་དཔེ་གཟིགས་ན་འདིར་གནོན།]}

དང༌། དེའི་དགོངས་པ་འགྲེལ་བ་འཕགས་པ་ཡབ་སྲས་ཀྱི་གཞུང་རྣམས་སུ་ཡང་ཕྱོགས་ཕྱི་མའི་ལུགས་བཞེད་པ་ཡིན་ནོ། །གལ་ཏེ་འདུས་པའི་ལུགས་ཀྱིས་ཚོགས་དྲུག་ལས་ངོ་བོ་ཐ་དད་པའི་ཀུན་གཞི་དང་ཉོན་ཡིད་མི་བཞེད་ན་རྡོ་རྗེ་ཕྲེང་བ་ལས། རྣམ་ཤེས་ཚོགས་བརྒྱད་བྱང་ཆུབ་སེམས་དཔལ་བརྒྱད་དང་སྦྱར་བ་དང༌། ཀུན་གཞིའི་རྣམ་ཤེས་བཀུག་ནས་ནི། བག་ཆགས་ནང་དུ་སྤྱོད་པར་བྱེད། བག་ཆགས་ཀྱིས་ནི་རྣམ་ཞེས་བཟུང༌། །བག་ཆགས་དང་འདྲེས་རིམ་པ་ལས། རང་གི་བག་ཆགས་བསྒོས་པ་ཡིས། དེ་རྣམས་ཟླ་མཚན་དུས་སུ་ནི། མངལ་གྱི་རྩ་ལ་འཇུག་པ་ནི། དེ་རྗེས་ཁུ་ཁྲག་ཞུ་ཐིག་ལེ། འདྲེས་པ་རུ་ནི་གྱུར་པ་དང༌། ཇི་ལྟར་ཆང་རོས་མྱོས་པ་བཞིན། །ཀུན་གཞིའི་རྣམ་ཤེས་བག་ཆགས་ལས། རྣམ་པར་ཤེས་པ་སྐྱེ་བར་འགྱུར། །ཞེས་ཁུ་ཁྲག་འདྲེས་པའི་ཐིག་ལེའི་ནང་དུ་ཀུན་གཞིའི་རྣམ་ཤེས་ཞུགས་པ་ལས་རྣམ་ཤེས་སྐྱེ་བར་གསུངས་པ་མི་འཐད་དོ་སྙམ་ན། རྒྱུད་འདིར་ཀུན་གཞི་དང་ཉོན་ཡིད་ཅེས་གསུངས་པ་ནི་གཞུང་གཞན་ནས་བཤད་པ་དང་མིང་འདྲ་ཡང་དོན་མི་འདྲ་སྟེ། ལུང་དེའི་གོང་ཉིད་དུ། བག་ཆགས་ཉོན་མོངས་ཅན་གྱི་ཡིད། ཅེས་དང༌། ཉོན་ཡིད་བྱམས་པ་དང་སྦྱོར་བའི་སྐབས་སུ་ཡང༌། བག་ཆགས་ཡུལ་གྱི་བདག་ཉིད་ཅན། བྱམས་པ་རུ་ནི་རྣམ་པར་ཤེས། ཞེས་གསུངས་པས་ཉོན་མོངས་པའི་བག་ཆགས་ལ་ཉོན་ཡིད་དུ་བཤད་ལ། ཀུན་གཞི་བཀུག་ནས་བག་ཆགས་ཀྱི་ནང་དུ་སྤྱོད་པའི་དོན་ནི། ཉོན་མོགས་པའི་བག་ཆགས་

---

^{[མ་དཔེ་གཟིགས་ན་འདིར་གནོན།]}

ཀྱིས་རྣམ་ཤེས་བཟུང་བ་སྟེ་བསླད་པའི་དོན་ནོ། །ཉོན་ཡིད་ཅེས་པའི་བག་ཆགས་དང་འདྲེས་པའི་རྣམ་ཤེས་མངལ་དུ་འཇུག་པར་བཤད་པའི་ཀུན་གཞི་ཞེས་པ་ནི་ཀུན་བྱང་གི་ཆོས་ཀུན་གྱི་རྩ་བར་གསུངས་པའི་ཡིད་ཀྱི་ཤེས་པ་ཡིན་གྱི། གཞུང་གཞན་ནས་བཤད་པའི་ཀུན་གཞི་མིན་ཏེ། ཉོན་ཡིད་བཞིན་ནོ། །དེ་ལས་རྣམ་ཤེས་སྐྱེ་བ་ནི་འཆི་བའི་འོད་གསལ་ལས་རྣམ་ཤེས་སྐྱེ་བར་སྔར་བཤད་པ་དེ་ཉིད་དོ། །འོ་ན་རྣམ་ཤེས་ཚོགས་དྲུག་ཏུ་མ་འདུས་པའི་རྣམ་ཤེས་གཉིས་མེད་པས་བྱམས་པ་ཉོན་ཡིད་དང༌། ཀུན་བཟད་ཀུན་གཞི་དང་སྦྱར་བ་མི་འཐད་དོ་སྙམ་ན། དེ་ལྟ་ན་གཟུགས་ཕུང་དུ་མ་འདུས་པའི་འབྱུང་བ་བཞི་དང་མིག་སོགས་ལྔ་མེད་པས། གཟུགས་ཕུང་རྣམ་སྣང་དང་སྦྱར་བའི་འོག་ཏུ་འབྱུང་བཞི་ལྷ་མོ་བཞི་དང་མིག་སོགས་ས་སྙིང་དང་སྦྱོར་བ་ཡང་མི་འཐད་པར་འགྱུར་རོ། །དེས་ན་དག་པ་སོ་སོར་སྦྱོར་བ་ལ་ལྡོག་པ་ཐ་དད་པས་ཀྱང་ཆོག་སྟེ། དཔེར་ན་ཡིད་ཀྱི་སྐྱེ་མཆེད་བྱང་ཆུབ་སེམས་དཔའི་རྣམ་དག་དང་རྣམ་ཤེས་ཀྱི་ཕུང་པོ་དེ་བཞིན་གཤེགས་པའི་རྣམ་དག་ཏུ་བཤད་པ་བཞིན་ནོ། །འོ་ན་འདུས་པའི་ལེའུ་གཉིས་པར་རྣམ་སྣང་གིས་གསུངས་པའི་བྱང་ཆུབ་སེམས་ཀྱི་རྣམ་འགྲེལ་དུ། ཇི་ལྟར་ཁབ་ལོང་དང་ཉེ་བས། ལྕགས་ནི་མྱུར་དུ་ཡོངས་སུ་འཁོར། དེ་ལ་སེམས་ནི་ཡོད་མིན་ཏེ། སེམས་དང་ལྡན་བཞིན་སྣང་བར་འགྱུར། །དེ་བཞིན་ཀུན་གཞིའི་རྣམ་ཤེས་ནི། བདེན་མིན་བདེན་པ་བཞིན་དུ་ནི། །གང་ཚེ་འགྲོ་འོང་གཡོ་པར་འགྱུར། །དེ་ཚེ་སྲེད་པ་འཛིན་པར་བྱེད། །ཇི་ལྟར་རྒྱ་མཚོ་ལ་ནི་ཤིང༌། །

---

^{[མ་དཔེ་གཟིགས་ན་འདིར་གནོན།]}

སེམས་ནི་མེད་ཀྱང་གཡོ་བར་འགྱུར། །དེ་བཞིན་ཀུན་གཞིའི་རྣམ་ཤེས་ནི། །ལུས་ལ་བརྟེན་ནས་གཡོ་བ་ཡིན། །ཞེས་ཀུན་གཞིའི་རྣམ་ཤེས་ཀྱིས་སྲིད་པ་འཛིན་པར་གསུངས་པ་ནི་ཇི་ལྟར་དྲང་ཞེ་ན། དེ་ནི་སེམས་ལས་དོན་གཞན་པའི་ཕྱི་རོལ་བཀག་ནས། སེམས་ཙམ་ཞིག་རང་བཞིན་གྱིས་གྲུབ་པ་མ་བཀག་པའི་སེམས་ཙམ་གསུངས་པ་ནི། བྱིས་པ་ཐམས་ཅད་སྟོང་པར་བསྟན་པ་ལ་སྐྲག་པ་སྤང་བའི་ཕྱིར་ཡིན་གྱི། །ངེས་དོན་གྱི་དེ་ཉིད་མིན་པ་དང༌། རྣལ་འབྱོར་སྤྱོད་པ་པ་རྣམས་ཀྱིས་གནས་གྱུར་པའི་སེམས་ཀྱི་དག་པ་རང་བཞིན་གྱིས་གྲུབ་པ་ཅིག་སོ་སོ་རང་རིག་པའི་སྤྱོད་ཡུལ་དུ་གྲུབ་པ་ཁས་བླངས་པ་བཀག་པའི་ཚེ། །སེམས་བདེན་པ་མེད་ན་འཇིག་རྟེན་སྔ་མ་ནས་འདིར་འོང་བ་དང༌། འདི་ནས་ཕྱི་མར་འགྲོ་བའི་གཡོ་བའི་བྱ་བ་མི་འཐད་དོ་སྙམ་པའི་རྩོད་པ་ཁོང་ན་གནས་པའི་ལན་དུ། ལྕགས་དང་ཤིང་ལ་སེམས་མེད་ཀྱང་ཡོད་པ་ལྟར་གཡོ་བ་བཞིན་དུ། ཀུན་གཞི་བདེན་པར་མེད་ཀྱང་བདེན་པར་ཡོད་པ་ལྟར་འགྲོ་འོང་གི་གཡོ་བ་དང་བཅས་པར་སྣང་ངོ་ཞེས་སྟོན་པ་ཡིན་པས། གཞུང་གཞན་ནས་བཤད་པ་ལྟར་གྱི་ཀུན་གཞིའི་རྣམ་ཤེས་རང་གི་མཚན་ཉིད་ཀྱིས་གྲུབ་པ་ཁས་ལེན་པ་ནི་མིན་ནོ། །གལ་ཏེ་ཀུན་གཞི་རང་གི་མཚན་ཉིད་ཀྱི་གྲུབ་པ་ཁས་མི་ལེན་ཀྱང༌། ཚོགས་དྲུག་ལས་ངོ་བོ་ཐ་དད་པའི་སྒྱུ་མ་ལྟ་བུ་ཀུན་བྱང་གི་ཆོས་ཀུན་གྱི་ས་བོན་ཐམས་ཅད་པ་ཁས་ལེན་ནོ་སྙམ་ན། དེ་འདྲའི་ཀུན་གཞི་ཁས་ལེན་ན་ཀུན་གཞིའི་བག་ཆགས་སྨིན་པ་ལས་གཟུགས་སྒྲ་སོགས་སུ་

---

^{[མ་དཔེ་གཟིགས་ན་འདིར་གནོན།]}

སྣང་བ་ཙམ་དུ་ཟད་ཀྱི་ཕྱི་རོལ་གྱི་དོན་མེད་པར་ཁས་བླང་དགོས་ན། གཞུང་དེ་ཉིད་ལས། ཤེས་པས་ཤེས་བྱ་རྟོགས་པ་སྟེ། ཞེས་བྱ་མེད་པར་ཤེས་པ་མེད། དེ་ལྟ་ན་ནི་རིག་བྱ་དང༌། རིག་བྱེད་མེད་ཅེས་ཅིས་མི་འདོད། །ཅེས་ཕྱིའི་ཤེས་བྱ་དང་ནང་གི་ཤེས་པ་གཉིས་ཡོད་མེད་མཚུངས་པས་གཅིག་མེད་ན་ཅིག་ཤོས་མེད་པར་གསུངས་ལ། འདི་ནི་འཇུག་པར་དོན་ཤེས་གཉིས་དོན་དམ་དུ་མེད་མཉམ་དང་ཐ་སྙད་དུ་ཡོད་མཉམ་ཡིན་པས་བདེན་གཉིས་གང་དུ་ཡང་དེ་གཉིས་ལ་ཡོད་མེད་ཀྱི་ཁྱད་པར་འབྱེད་པ་མི་འཐད་པར་གསུངས་པ་དང་ཁྱད་མེད་པས་ན། ཕྱི་རོལ་མེད་པའི་ཤེས་པ་ཡོད་པ་སློབ་དཔོན་གྱི་བཞེད་པ་མིན་ནོ། །དེའི་ཕྱིར་ཡིད་ཀྱི་ཤེས་པ་ལས་ངོ་བོ་ཐ་དད་པའི་ཀུན་གཞི་མི་བཞེད་པས། ཀུན་གཞི་ཞེས་གསུངས་པ་ནི། སྤྱིར་སེམས་རིག་ཅིང་གསལ་ཙམ་ལ་ཀུན་གཞིར་བཞག་པ་དང་། ཁྱད་པར་དུ་ཡིད་ཀྱི་ཤེས་པ་ལ་ཡིན་ཏེ། སེམས་སྤྱི་ཙམ་རང་བཞིན་གྱིས་གྲུབ་པ་བཀག་པའི་ལན་དུ། སེམས་བདེན་པར་མེད་པ་ལ་བྱ་བྱེད་རུང་བའི་ཚུལ་ཡིན་པའི་ཕྱིར་དང༌། སྲིད་པར་སྐྱེ་བ་འཛིན་པའི་སེམས་ཡིད་ཤེས་ཡིན་པར་སྔར་བསྒྲུབས་པའི་ཕྱིར་རོ། །གསུམ་པ་ནི། རྒྱུད་འདིར་རྣམ་པར་ཤེས་པ་དེའི་བཞོན་པ་རླུང་ངོ་། །ཞེས་པའི་དོན་ནི། །རྡོ་རྗེ་ཕྲེང་བ་ལས། རྣམ་ཤེས་ལས་ནི་སྐྱེས་པའི་རླུང༌། ཞེས་གསུངས་པ་ལྟར་སྣང་བ་ལས་རླུང་སྐྱེ་བའི་དོན་དུ་གཟུང་གི། སྣང་བའི་རང་དུས་ཀྱི་བཞོན་པའི་རླུང་སྟོན་པ་མིན་ནོ། །རླུང་དེ་ལས་མེ་དང་དེ་ལས་ཆུ་དང་དེ་ལས་ས་སྐྱེ་བར་གསུངས་པ་ནི། ཁུ་ཁྲག་གི་དབུས་སུ་

---

^{[མ་དཔེ་གཟིགས་ན་འདིར་གནོན།]}

རྣམ་ཤེས་ཞུགས་ནས་ཉིང་མཚམས་སྦྱར་བའི་ཚེ་འབྱུང་བ་བཞི་ཀ་ཡོད་པས་འབྱུང་བ་སྔར་མེད་གསར་དུ་སྐྱེ་བ་མིན་ནོ། །འོ་ན་ཅི་ཞེ་ན། རྡོ་རྗེ་ཕྲེང་བ་ལས། །སྲ་བའི་ཁམས་དང་ཆུ་ཉིད་དང༌། དེ་བཞིན་མེ་དང་རླུང་དག་ནི། རྣམ་པར་ཤེས་པས་བླངས་ནས་ནི། སྲིད་གསུམ་གནས་སུ་སྐྱེ་བར་འགྱུར། །ཞེས་གསུངས་པས། སྣང་བ་ལས་ཤེས་པའི་རྟེན་བྱེད་པའི་ནུས་པ་ཁྱད་པར་བ་ཐོབ་པའི་རླུང་སྐྱེ་ལ། དེ་ལས་ཀྱང་ཤེས་པའི་རྟེན་བྱེད་པའི་ནུས་པ་ཁྱད་པར་བ་ཐོབ་པའི་མེའི་ཁམས་སྐྱེ་སྟེ་གཞན་གཉིས་ཀྱང་དེ་བཞིན་ནོ། །འདི་བཞིའི་སྐྱེ་ཚུལ་ནི་ཐིམ་པ་ལུགས་འབྱུང་གི་ས་ཆུ་ལ་ཐིམ་པ་སོགས་ཀྱི་སྐབས་དང་སྦྱར་ནས་གོ་དགོས་སོ། །འབྱུང་བ་དེ་རྣམས་ལས་ཕུང་པོ་ལ་སོགས་པ་འབྱུང་བར་གསུངས་པ་ནི། དེ་རྣམས་སྔར་མེད་གསར་དུ་བྱུང་བ་མིན་གྱི་སྔར་ཐོབ་ཟིན་པ་རྣམས་མངལ་དུ་ཡོངས་སུ་རྫོགས་པར་གྱུར་པའོ། །སྣང་བ་ལས་རང་བཞིན་འབྱུང་བའི་ཚུལ་ནི་འཆད་པར་འགྱུར་རོ། །གཉིས་པ་ནི། དེ་ལྟར་སྔར་བཤད་པའི་སྐྱེ་བའི་རིམ་པ་ཅན་དེ་རྣམས་མཐར་འཆི་བའི་ཚེ་ཐིམ་པའམ་འགག་པའི་རིམ་པ་ཇི་ལྟར་ཡིན་སྙམ་ན། དང་པོ་ཡས་མར་སྐྱེ་བའི་རིམ་པ་ལྟར་འཆི་བ་ན་མས་ཡར་ཐིམ་པར་འགྱུར་ཏེ། རྡོ་རྗེ་ཕྲེང་པ་ལས། ཇི་ལྟར་སྐྱེ་བ་དེ་ལྟའི་གནས། ཐིམ་པར་འགྱུར་རོ་རང་བཞིན་ལས། ཞེས་དང༌། རླུང་རྣམས་མཆོག་ཏུ་ནུབ་པ་ནི། གང་གི་ཡང་དག་ཤེས་པ་ནི། འཆི་བའི་སྐད་ཅིག་མཚན་ཉིད་ཤེས། ཕན་ཚུན་དུ་ནི་ཡང་དག་སྡུད། །སྐྱེ་བའི་རིམ་ལྟར་

---

^{[མ་དཔེ་གཟིགས་ན་འདིར་གནོན།]}

ཐིམ་པར་འགྱུར། ཞེས་སོ། །དེའི་རིམ་པ་ནི་འཕགས་པ་ལྷའི་བདག་བྱིན་བརླབས་ལས། ས་ཡི་ཁམས་ནི་ཆུ་ལ་ཐིམ། །ཆུ་ནི་མེ་ལ་ཐིམ་པར་འགྱུར། །མེ་ནི་ཕྲ་བའི་ཁམས་ལའོ། །རླུང་ནི་སེམས་ལ་ཐིམ་པར་འགྱུར། །སེམས་ནི་སེམས་ལས་བྱུང་ལ་ཐིམ། སེམས་ལས་བྱུང་བ་མ་རིག་པར། །དེ་ཡང་འོད་གསལ་བར་འགྲོའོ། །སྲིད་པ་གསུམ་པོ་འདི་ལྟར་འགག །ཅེས་གསུངས་ཤིང༌། ལས་མཐའ་རྣམ་འབྱེད་ཀྱི་དོན་སྒྲོན་གསལ་ལས་ཀྱང་དེ་དང་མཐུན་པར་བཤད་པ་ལྟར། འོད་གསལ་ལས་ཉེར་ཐོབ་འབྱུང་བ་ནས་ཆུ་ལས་ས་སྐྱེ་བའི་རིམ་པ་ལྟར་ཐིམ་རིམ་ངེས་པ་ཡིན་གྱི། །སྐྱེ་རིམ་གཞན་གསུངས་པ་རྣམས་ལ་དེ་ལྟར་དུ་ཐིམ་པའི་ངེས་པ་མེད་དོ། །ས་ལ་སོགས་པ་ཐིམ་པའི་དོན་ནི་མན་ངག་སྙེ་མ་ལས། ཐིམ་པ་ནི་ས་ལ་སོགས་པའི་རིམ་པ་སྟེ། ལྷོད་པ་ཉིད་དང༌། རོ་བྲོ་བ་མེད་པ་ཉིད་དང༌། མེ་དྲོང་ཞན་པ་ཉིད་དང༌། ལུས་ལ་སོགས་པའི་གཡོ་བ་ཞན་པ་ནི། སྣང་བ་ལ་སོགས་པ་རླུང་དུ་སོན་པ་ན། རིམ་པས་རང་ཉིད་ཇི་ལྟ་བར་རང་བཞིན་རྣམས་ཞན་པར་གྱུར་ནས་འགག་གོ །ཞེས་བཤད་པ་ལྟར་ལུས་ལྷོད་པ་སོགས་སུ་གྱུར་ཏེ། འབྱུང་བ་རགས་པས་ཤེས་པའི་རྟེན་བྱེད་པའི་ནུས་པ་རྣམས་རིམ་གྱིས་བྲི་ནས་རང་བཞིན་བརྒྱད་བུའི་རྟོག་པ་རྣམས་འགག་པའོ། །འོ་ན་ས་ཆུ་ལ་ཐིམ་པ་ཞེས་སོགས་སྔ་མ་ཕྱི་མ་ལ་ཐིམ་པའི་དོན་གང་ཡིན་ཞེ་ན། སྔ་མ་རྣམས་ཀྱི་ནུས་པ་བསྡུས་ནས་ཕྱི་མའི་ནུས་པ་གསལ་དུ་སོང་བ་ན། སྔ་མའི་ནུས་པ་ཕྱི་མ་ལ་འཕོས་པ་འདྲ་བ་ཅིག་བྱུང་བ་ལ་དེར་བཏགས་པའོ། །ས་ཆུ་ལ་

---

^{[མ་དཔེ་གཟིགས་ན་འདིར་གནོན།]}

ཐིམ་པ་ལས་སྨིག་རྒྱུ་ལྟར་སྣང་པ་དང། ཆུ་མེ་ལ་ཐིམ་པ་ལས་དུ་བ་ལྟར་སྣང་བ་དང༌། མེ་རླུང་ལ་ཐིམ་པ་ལས་མཁའ་སྣང་ལྟར་སྣང་བ་དང༌། ཁམས་ཕྲ་བ་སྣང་བ་གསུམ་དུ་སོང་བ་ལས་མར་མེ་ལྟར་སྣང་བ་དང༌། རང་བཞིན་ཀུན་ཏུ་སྣང་བ་ཐིམ་པ་ལས་སྦྲིན་མེད་པའི་ནམ་མཁའ་དང་འདྲ་ཞིང༌། རྟག་ཏུ་སྣང་བ་འོད་གསལ་བ་ཙམ་དུ་གྱུར་པར་སྒྲོན་གསལ་ལས་གསུངས་ཏེ། རྒྱུད་ཕྱི་མར་བཤད་པའི་མཚན་མ་ལྔ་ཐིམ་རིམ་ལྔ་ལས་འབྱུང་བར་བཤད་པའོ། །དེ་ལ་ཁམས་ཕྲ་བ་ནི་རླུང་སྟེ། དེ་ཡང་རང་བཞིན་གྱི་རྟོག་པ་རྣམས་གཡོ་བར་བྱེད་པའི་རླུང་ཡིན་གྱི། རླུང་ཐམས་ཅད་དེར་ཐིམ་པ་མིན་ཏེ། སྣང་བ་གསུམ་དང་འོད་གསལ་གྱི་དུས་ནའང་རླུང་སེམས་གཉིས་མཉམ་དུ་འཇུག་པས་སོ། །རླུང་དེ་སྣང་བ་གསུམ་དུ་སོང༌། ཞེས་གསུངས་པ་ནི། རླུང་རྣམ་ཤེས་ལ་ཐིམ་ཞེས་སྣང་བ་གསུམ་སོ་སོར་མ་ཕྱེ་བར་སྤྱིར་བསྡོམས་པ་ལ་རླུང་ཐིམ་པར་བཤད་པ་དང་འདྲ་བས་རགས་པ་ཡིན་ལ། ཞིབ་ཏུ་བྱེད་ན་སྤྱོད་བསྡུས་དང་བདག་བྱིན་བརླབས་ལས་རླུང་སྣང་བ་ལ་ཐིམ་པར་གསུངས་པས་རླུང་སྣང་བ་དང་པོ་ལ་ཐིམ་པའི་དོན་ནོ། །རང་བཞིན་ཀུན་ཏུ་སྣང་བ་ཐིམ་པར་གྱུར་པ་ལས། ཞེས་ལོ་ཆེན་དང་འགོས་ཀྱིས་བསྒྱུར་བ་ལ། པ་ཚབ་ཀྱིས། རང་བཞིན་ཀུན་ཏུ་སྣང་བ་ལ་ཐིམ། །ཞེས་བསྒྱུར་ཡང༌། སྣང་བ་གསུམ་གྱི་སྔ་མ་གཉིས་ཕྱི་མ་གཉིས་ལ་དང༌། ཕྱི་མ་འོད་གསལ་དུ་ཐིམ་པའི་རིམ་པ་སོ་སོར་མ་ཕྱེ་བར་སྤྱིར་བསྡོམས་ནས། རྣམ་

---

^{[མ་དཔེ་གཟིགས་ན་འདིར་གནོན།]}

ཤེས་འོད་གསལ་དུ་ཐིམ་པར་གསུངས་པ་དང་འདྲ་བས་སྣང་བ་གསུམ་འོད་གསལ་དུ་ཐིམ་པ་ལ་བྱའོ། །དེར་རང་བཞིན་ཞེས་གསུངས་པ་ནི་སྣང་བ་གསུམ་ལ་རང་བཞིན་གྱི་སྣང་བ་ཞེས་ཟེར་བས། སྣང་བའི་མིང་ཡིན་གྱི་དེའི་དུས་སུ་རང་བཞིན་ཐིམ་པར་སྟོན་པ་མིན་ཏེ། རླུང་ཐིམ་པ་ནི་རང་བཞིན་གཡོ་བའི་རླུང་ཐིམ་པ་ཡིན་པའི་ཕྱིར་རོ། །དེས་ན་སྣང་བའི་རང་བཞིན་ཞེས་པ་རང་བཞིན་གྱི་མིང་ཡིན་ལ། རང་བཞིན་གྱི་སྣང་བ་ཞེས་པ་སྣང་བའི་མིང་ངོ་། །སྣང་བ་གསུམ་ཀྱི་དུས་སུ་ཉམས་ཇི་ལྟ་བུ་འཆར་བའི་ཚུལ་ནི་སྤྱོད་བསྡུས་ལས། སྟོན་གྱི་ནམ་མཁའ་སྤྲིན་མེད་པ་ལ་ཟླ་འོད་དང་ཉི་འོད་དང་མཚམས་ཀྱི་སྨག་གིས་ཁྱབ་པ་བཞིན་དུ་འབྱུང་བར་བཤད་པ་ལྟར་ཤེས་པར་བྱའོ། །སྤྱོད་བསྡུས་ལས་སྣང་བ་གསུམ་དང་འོད་གསལ་བཞི་སྔ་མ་ཕྱི་མ་ལ་ཐིམ་པ་དང༌། སྣང་བ་གསུམ་གྱི་མཚན་ཉིད་སོ་སོར་ཕྱེ་ནས་བཤད་ཀྱང༌། དང་པོར་སྨིག་རྒྱུ་ལྟ་བུ་ལ་འོད་ཟེར་ལྔ་དང་ལྡན་པར་མཐོང་བའི་གཉིས་པ་ནི་སྣང་བ་སྟེ་ཟླ་བའི་འོད་ཟེར་ལྟ་བུའོ། །ཞེས་མཚན་མ་བཞི་བསྡུས་ནས་གསུངས་ལ། །སྒྲོན་གསལ་ལས་མཚན་མ་བཞི་རྒྱས་པར་བཤད་ཀྱང་སྣང་བ་གསུམ་འོད་གསལ་དུ་འཇུག་རིམ་དང༌། སྣང་བ་གསུམ་གྱི་མཚན་ཉིད་རྣམས་སོ་སོར་མ་ཕྱེ་བར་བསྡུས་ནས་གསུངས་པ་ནི། གཅིག་ན་བསྡུས་པ་ཅིག་ཤོས་ན་རྒྱས་པས་ཕན་ཚུན་སྦྱར་བར་བྱའོ། །འོ་ན་ཁམས་ཕྲ་བ་སྣང་བ་ལ་ཐིམ་པ་ན་མར་མེ་ལྟར་སྣང་བ་དང༌། སྣང་བ་དང་པོའི་དུས་སུ་ནམ་མཁའ་ལ་ཟླ་འོད་ཤར་བ་བཞིན་འབྱུང་བར་བཤད་པ་འགལ་སྙམ་ན། ཀུན་རྟོག་གཡོ་བའི་རླུང་ཐིམ་པའི་དུས་

---

^{[མ་དཔེ་གཟིགས་ན་འདིར་གནོན།]}

དང༌། དེའི་རྗེས་སུ་སྣང་བ་དང་པོ་སྐྱེས་པའི་དུས་ཀྱི་ཁྱད་པར་ཡིན་པས་མི་འགལ་ལོ། །དེ་ལྟར་མཚན་མ་ལྔ་དང་ཟླ་འོད་ལྟར་སྣང་བ་ལ་སོགས་པ་རྣམས་སྒྲོན་གསལ་དང་སྤྱོད་བསྡུས་ལས་རྫོགས་རིམ་གྱི་ལམ་གྱི་འོད་གསལ་དུ་འཇུག་པའི་རིམ་པ་ལ་བཤད་ཀྱང་འཆི་བའི་རིམ་པ་ལ་ཡང་དེ་བཞིན་དུ་འཆར་བས་གཞི་ལས་གཉིས་ཀའི་སྐབས་ལ་སྦྱར་བར་བྱ་སྟེ། དེ་གཉིས་མཚན་ཉིད་མཚུངས་པའི་ཕྱིར་རོ། །དེའི་ཕྱིར་རྡོ་རྗེ་ཕྲེང་བའི་འོད་གསལ་དུ་འཇུག་པའི་ཐིམ་རིམ་རྣམས་མདོར་བྱས་ལས་ལྷག་མོས་འོད་གསལ་དུ་སྡུད་པ་ལ་སྦྱར། སྒྲོན་གསལ་ལས་བར་དོར་འཚང་རྒྱ་བའི་འཆི་བའི་འོད་གསལ་དུ་འཇུག་པའི་རིམ་པ་དང༌། ཚེ་འདིར་འཚང་རྒྱ་བའི་རྫོགས་རིམ་གྱི་སྐབས་གཉིས་ལ་སྦྱར། རྣམ་གཞག་ལས་ཐ་མལ་པའི་འཆི་བའི་རིམ་པ་དང། རྫོགས་རིམ་གྱི་སྐབས་གཉིས་ལ་སྦྱར་ཏེ། རྡོ་རྗེའི་ཚིག་གཅིག་ཡིན་ཀྱང་དེ་རྣམས་ཀུན་ལ་སྦྱར་དུ་རུང་བ་ཡིན་ནོ། །དེས་ནི་སྐྱེ་བ་བརྒྱུད་ནས། འཚང་རྒྱ་བས་སད་དུས་ཀྱི་འོད་གསལ་དང་གཉིད་དུས་ཀྱི་འོད་གསལ་སྦྱངས་པས། འཆི་བའི་འོད་གསལ་དང་བསྲེ་ནུས་པའི་གདམས་ངག་ལ་ངེས་པ་སྟེར་ལ། དེའི་གནད་ཀྱིས་གང་ཟག་དེས་སད་དུས་ཀྱི་སྒྱུ་ལུས་རྗེས་མཐུན་པ་དང༌། གཉིད་ཀྱི་སྟོང་པ་རྣམས་ཀྱི་མཐར་རྨི་ལམ་གྱི་སྒྱུ་ལུས་སྦྱངས་པ་ལ་བརྟན་པ་རྙེད་ན། བར་དོ་དང་བསྲེ་ནུས་པའི་གདམས་ངག་ལ་ངེས་པ་རྙེད་པར་འགྱུར་རོ། །འཆི་དུས་དང་ལམ་གྱི་ཐིམ་རིམ་འདི་དག་དང་པོར་སྐྱེ་བ་རྣམས་ཕྱིས་ཐིམ་

---

^{[མ་དཔེ་གཟིགས་ན་འདིར་གནོན།]}

པ་དང༌། ཕྱིས་སྐྱེ་བ་རྣམས་སྔོན་ལ་ཐིམ་པའི་ཆ་ནས། ལུགས་ལྡོག་གི་རིམ་པ་འདྲ་བ་ཅིག་ཡོད་ཀྱང༌། སྟོང་པ་བཞིའི་རིམ་པའི་དབང་དུ་བྱས་ནས་ཐིམ་རིམ་ལུགས་འབྱུང་དང༌། སྐྱེ་རིམ་རྣམས་ལུགས་ལྡོག་ཏུ་བྱས་སོ། །གསུམ་པ་ནི། སྤྱོད་བསྡུས་ལས་བདག་དང་བདག་གིར་བཟུང་བ་ལ་བརྟེན་ནས་ལས་དགེ་མི་དགེ་བྱས་ཏེ། བདེ་འགྲོ་དང་ངན་འགྲོར་འཁོར་བའི་འཁོར་བར་འཇུག་པའི་རིམ་པ་བརྒྱད་སྟོང་པ་ལ་སོགས་པའི་མདོ་གསུམ་གྱིས་བསྒྲུབས་ཤིང༌། དེ་རྣམས་ཀྱི་དོན་གསལ་བར་ཀླུ་སྒྲུབ་ཀྱི་ཞལ་སྔ་ནས། གལ་ཏེ་འདི་ཀུན་སྟོང་པ་དང༌། སྐྱེ་མེད་ངོ་བོ་ཉིད་ཡིན་ན། བདེ་དང་སྡུག་བསྔལ་སོགས་འཇུག་འདིར། །ཇི་ལྟར་ལས་ཀྱིས་འཁོར་བར་འགྱུར། །བདག་ཏུ་རློམ་པར་གྱུར་མ་ཐག །འདོད་ཆགས་ལ་སོགས་དྲི་མ་ཡིས། བརྟགས་པས་གཞན་གྱི་དབང་གྱུར་པས། བྱིས་པ་སྡུག་བསྔལ་གྱིས་ཉོན་མོངས། འདི་དག་ཐམས་ཅད་སེམས་ཙམ་སྟེ། སྒྱུ་མའི་རྣམ་པར་ཡང་དག་འབྱུང༌། དེ་ནས་དགེ་དང་མི་དགེའི་ལས། །དེས་ནི་བདེ་འགྲོ་ངན་འགྲོར་སྐྱེ། །ཞེས་པས་བསྟན་པར་གསུངས་ཏེ། འདི་ནི་མདོ་སྡེ་དང་རྒྱུད་སྡེ་གཉིས་ཀའི་ལུགས་ཐུན་མོང་བའོ། །དེ་དག་གིས་ནི་བདག་དང་བདག་གིར་འཛིན་པའི་ཡུལ་སུན་ཕྱུང་སྟེ་བདག་མེད་པའི་ལྟ་བ་རྙེད་ནས། དེའི་དོན་བསྒོམས་པས་འཁོར་བ་ལྡོག་པར་བསྟན་ནོ། །སྔར་བཤད་པ་ལྟར་གྱི་ལུགས་འབྱུང་དང་ལུགས་ལྡོག་གི་སྐྱེ་འཆི་བརྒྱུད་པའི་རིམ་པ་ནི་འཁོར་བར་འཇུག་རིམ་བླ་མེད་ནས་བཤད་པ་ཐེག་པ་གཞན་དང་རྒྱུད་སྡེ་འོག་མ་ནས་མ་བསྟན་པའོ། །དེ་ཡང་སྤྱོད་བསྡུས་

---

^{[མ་དཔེ་གཟིགས་ན་འདིར་གནོན།]}

ལས་བཤད་པའི་རྒྱུད་ལ་བརྟེན་ནས་རླུང་གི་བཞོན་པ་ཅན་གྱི་སྣང་བ་གསུམ་ཇི་ལྟར་བ་བཞིན་མི་ཤེས་པས། ལས་གཉིས་ཀྱི་འབྲས་བུ་མྱོང་བའི་མཐར་དོན་དམ་པའི་བདེན་པའི་དཀྱིལ་འཁོར་འཆི་བའི་འོད་གསལ་དུ་འཇུག་པའི་རིམ་གྱིས་ཞུགས་ནས། ཆོས་ཀྱི་དབྱིངས་འཆི་བའི་འོད་གསལ་གྱི་རྒྱུ་མཐུན་པའི་འབྲས་བུ་བར་དོ་གྲུབ་སྟེ། ལས་གཉིས་ཀྱིས་བསྐུལ་བས་འགྲོ་བ་ལྔའི་འཁོར་བར་འཁོར་བར་གསུངས་པའོ། །འཆི་བའི་དུས་སུ་རླུང་ཐིམ་པའི་རིམ་པ་ལས་སྟོང་པ་བཞི་འཆར་བའི་རླུང་སྡུང་བའི་གནས་མཐར་ཐུག་པ་ནི་སྙིང་ཁ་ཡིན་ཏེ། རྡོ་རྗེ་ཕྲེང་བ་ལས། །ཉོན་མོངས་ཅན་ཡིད་སྲོག་རླུང་ཉིད། ཐོག་མར་འཕོ་བའི་དུས་སུ་ནི། །ཉ་ཡི་རྣམ་པ་ལྟ་བུར་འགྱུར། །ཞེས་འཕོ་བ་དང་པོའི་དུས་སུ་སྲོག་འཛིན་གྱི་རླུང་ཆགས་པར་བཤད་ཅིང། །དེའི་གནས་ཀྱང་དེ་ཉིད་ལས། སྲོག་གི་རླུང་ནི་སྙིང་ཁར་གནས། །ཞེས་གསུངས་པས་འཆགས་པའི་ཚེ་དང་པོ་སྙིང་ཁར་སྲོག་རླུང་འཆགས་ལ། དང་པོ་གང་ནས་སྐྱེ་བའི་རིམ་པ་དེས་སླར་སྡུད་པར་གསུངས་པའི་ཕྱིར་རོ། །སྤྱོད་བསྡུས་ལས་ཀྱང༌། ཡང་དེ་རྣམས་མི་ཤིགས་པ་ཐོབ་ནས་དངོས་པོ་མེད་པར་འགྱུར་རོ། །ཞེས་དང༌། དེ་ལྟར་ལུས་ལ་གནས་པའི་སྐབས་སུ་ཐམས་ཅད་བྱས་ཏེ། མཐར་མི་ཤིགས་པར་ཞུགས་ནས་ཡང་ཐ་མལ་པའི་ལུས་ལ་བརྟེན་ཏེ་དེ་བཞིན་དུ་ཐམས་ཅད་བྱེད་དོ། །ཞེས་རླུང་གི་བྱེད་ལས་ཀྱི་སྐབས་སུ་གསུངས་ལ། མི་ཤིགས་པ་ནི་སྤྱོད་བསྡུས་སུ། །སྙིང་གི་དབུས་ན་མི་ཤིགས་པ། །གསལ་ཞིང་མར་མེ་དག་

---

^{[མ་དཔེ་གཟིགས་ན་འདིར་གནོན།]}

དང་མཚུངས། །མི་འགྱུར་མཆོག་ཏུ་ཕྲ་བ་སྟེ། ཨ་ནི་གཙོ་བོ་དམ་པའོ། །ཞེས་དྲངས་པ་ལས་སྙིང་ཁ་ན་གནས་པར་གསུངས་པའི་ཕྱིར་རོ། །རྡོ་རྗེ་ཕྲེང་བ་ལས་སྙིང་ཁའི་རྩ་བརྒྱད་ལས་གྱེས་ནས་རྩ་སྟོང་ཕྲག་དོན་གཉིས་སུ་འགྱུར་བར་གསུངས་པས། རྩ་འཆགས་པ་ཡང་ཐོག་མར་སྙིང་ཁ་ནས་འཆགས་སོ། །དེས་ན་སའི་དངོས་གཞིར་བར་དོ་གང་དུ་ཞུགས་པའི་ཁུ་ཁྲག་འདྲེས་པའི་གནས་དེ་ལུས་ཀྱི་སྙིང་ཁ་ཡིན་ལ། དེ་ནས་ཡན་མན་དུ་ལུས་འཆགས་པ་དང༌། མཐར་འཆི་བ་ན་སྙིང་ཁ་ནས་རྣམ་ཤེས་ཀྱིས་ལུས་འདོར་བར་བཤད་པ་དང་འདུས་པའི་བཤད་རྒྱུད་རྣམས་མཐུན་ནོ། །བཞི་པ་ནི། དེ་ལྟར་ཐེག་པ་གཉིས་ཐུན་མོང་བའི་འཁོར་བ་ལྡོག་འཇུག་ཤེས་པས་ནི། བདག་འཛིན་འཁོར་བའི་རྩ་བར་མཐོང་ནས་དེ་ལྡོག་པ་ལ་ཐེག་པ་གཉིས་ཀའི་ལུགས་ཀྱིས་བདག་མེད་པའི་ལྟ་བ་ཕུག་ཐག་ཆོད་པར་གོ་དགོས་པར་མཐོང་ནས་དེ་ངེས་པར་འཚོལ་བར་བྱེད་ལ། ཐུན་མོང་མ་ཡིན་པའི་སྐྱེ་འཆིའི་རིམ་པ་ཤེས་ན་ནི། ཐབས་མཁས་པ་དང་བྲལ་བ་རྣམས་ལ་སྟོང་པ་བཞིའི་མཐར་རླུང་སེམས་ཙམ་ལས་བར་དོ་གྲུབ་ནས་སྲིད་པའི་འཁོར་ལོ་བསྐོར་བ་དེ་ཉིད། ཐབས་མཁས་ཀྱི་མན་ངག་དང་ལྡན་པས་སྟོང་པ་རྣམས་ཀྱི་མཐར་རླུང་སེམས་ཙམ་ལ་གྲུབ་པའི་སྒྱུ་མའི་སྐུར་བསྐྱེད་པའི་བར་དོ་ལོངས་སྐུར་འཁྱེར་ཤེས་པ་ཡིན་ཏེ། སྤྱོད་བསྡུས་ལས། དེ་ལྟར་བྱིས་པ་སོ་སོའི་སྐྱེ་བོ་སྲིད་པ་བར་མ་ཞེས་བྱ་བ་ནི་འཁོར་བའི་རྒྱུར་འགྱུར་རོ། །དེ་ཉིད་བླ་མ་བརྒྱུད་པའི་རིམ་གྱིས་དེ་བཞིན་གཤེགས་པ་ཐམས་ཅད་ཀྱི་མན་ངག་ཐོབ་པ་རྣམས་ནི།

---

^{[མ་དཔེ་གཟིགས་ན་འདིར་གནོན།]}

བདག་ལ་བྱིན་གྱིས་བརླབས་པ་ཞེས་བྱ་བ་འདི་ལྟར་རྩིག་པའམ་རས་རིས་མེ་ལོང་གི་ནང་དུ་ཉེ་བར་སྣང་བ་བཞིན་དུ། །རྡོ་རྗེའི་སྐུའི་ངོ་བོ་ཉིད་ཀྱིས་བདག་ཉིད་སྤྲུལ་ཏེ། ཞེས་གསུངས་པའི་ཕྱིར་རོ། །བར་དོ་ལོངས་སྐུའི་ལམ་འཁྱེར་ཤེས་ན་འཆི་རིམ་ཇི་ལྟ་བ་བཞིན་སྟོང་བ་བཞི་བསྐྱེད་ནས་འཆི་བ་ཆོས་སྐུར་འཁྱེར་ཤེས་པར་འགྱུར་ལ། དེ་གཉིས་ཤེས་ན་སྐྱེ་བ་སྤྲུལ་སྐུར་འཁྱེར་བ་ཡང་ཤེས་པར་འགྱུར་རོ། །འཆི་བའི་ཚེ་རླུང་སྙིང་ཁར་བསྡུས་པ་ལས་སྟོང་པ་བཞིའི་རིམ་གྱིས་འོད་གསལ་དུ་འཇུག་པ་བཞིན་དུ། ལམ་དུས་སུ་དེ་ལྟར་བྱེད་པ་འདི་མགོན་པོ་ཀླུ་སྒྲུབ་ཀྱི་ལུགས་དམ་པ་ཡིན་ཏེ་རིམ་ལྔ་ལས། མགོ་བོ་ནས་ནི་རྐང་པའི་བར། །ཇི་སྲིད་སྙིང་ཁར་ཕྱིན་པའི་བར། །རྣལ་འབྱོར་ཡང་དག་མཐའ་ལ་འཇུག །རོལ་པོར་འཛིན་པ་ཞེས་བཤད་དོ། །ཞེས་སྤྱི་བོ་ནས་མར་སྡུས་པའི་མཐའ་དང༌། རྐང་པ་ནས་ཡར་སྡུས་པའི་མཐའ་གཉིས་ཀ་སྙིང་ཁར་བསྟན་པའི་སྒོ་ནས་འོད་གསལ་དུ་འཇུག་པར་གསུངས་ལ། ཡང་དེ་ཉིད་ལས་དབུགས་ཀྱི་རླུང་ནི་མེ་ལོང་ལ། །ཇི་ལྟར་ཀུན་ནས་ཐིམ་གྱུར་པ། དེ་བཞིན་རྣལ་འབྱོར་ཡང་དག་མཐར། ཡང་དང་ཡང་དུ་འཇུག་པར་བྱེད། ཅེས་མེ་ལོང་ལ་ཧས་བཏབ་པའི་རླངས་པ་རྣམས་ཕྱོགས་ཀུན་ནས་དབུས་སུ་འདུ་བ་ལྟར། ལུས་ཀྱི་སྟེ་འོག་ལ་སོགས་པའི་རླུང་རྣམས་ཀྱང་དབུས་སྙིང་ཁར་འདུས་ནས་འོད་གསལ་མངོན་དུ་བྱེད་པར་གསུངས་སོ། །དོན་འདི་ལྷ་མོ་བཞིས་ཞུས་པ་ལས་ཀྱང་གསུངས་ཏེ་དེའི་རྣམ་བཤད་

---

^{[མ་དཔེ་གཟིགས་ན་འདིར་གནོན།]}

དུ་བཤད་ཟིན་ཏོ། །དེས་ན་སེམས་དབེན་གྱི་སྟོང་པའི་ཡེ་ཤེས་རྣམས་འདྲེན་པར་བྱེད་པའི་རྡོར་བཟླས་ཀྱིས་ཀྱང་རླུང་རྣམས་སྙིང་ཀའི་རྩ་འཁོར་གྱི་དབུས་སུ་སྡུད་དགོས་པའི་གནད་རྣམས་ནི་རྡོ་རྗེ་ཕྲེང་བའི་ལེའུ་དྲུག་པ་དང༌། སྐུ་གསུང་ཐུམས་ཀྱི་སྙིང་པོའི་ལེའུ་དང༌། ལྷ་མོ་བཞིས་ཞུས་པ་ལས་ཤེས་དགོས་པར་ཡོད་ལ། འདིར་ནི་མང་བས་འཇིགས་ནས་མ་བྲིས་སོ། །རླུང་རྣམས་ཕྱོགས་མཚམས་གཞན་ནས་སྙིང་ཁར་བསྡུས་ཏེ་རིམ་གྱིས་ཐིམ་པ་ལས་སྟོང་པ་བཞི་འཆར་བའི་རིམ་པ་ཐུན་མོང་མ་ཡིན་པ་འདི་མ་ཤེས་ན། བྱང་ཆུབ་ཀྱི་སེམས་སྤྱི་བོ་ནས་གསང་གནས་ཀྱི་རྩའི་བར་དུ་བབ་པའི་རིམ་པ་ལས་དགའ་བ་བཞི་སྐྱེ་བ་དང་སྟོང་པ་བཞི་ཁྱད་མེད་པར་བཟུང་བས། འཕགས་སྐོར་གྱི་ལུགས་ཐུན་མོང་མ་ཡིན་པ་རྣམས་མི་ཐོན་ནོ། །དེ་ཡང་དེ་འདྲ་བའི་དགའ་བཞི་ལ་སྟོང་པ་བཞིར་བྱས་པ་ཅིག་ཀྱང་ཡོད་པར་འདོད་མོད་ཀྱང༌། དེ་ཙམ་གྱིས་འདིའི་སྟོང་པ་བཞིའི་ཡེ་ཤེས་རྫོགས་པར་ངོས་མི་ཟིན་ནོ། །གསུམ་པ་ནི། རྒྱུད་འདིར་ཕུང་པོ་ལྔ་དང་སྐྱེ་མཆེད་དྲུག་ལ་སོགས་པ་ཐམས་ཅད་རླུང་སེམས་འདྲེས་པར་བཤད་པའི་དོན་གང་ཡིན་ཞེ་ན། འདི་ལ་བོད་ཀྱི་སྔོན་གྱི་འདུས་པ་བ་མང་པོས་གཞུང་དེ་དང་རྡོ་རྗེ་ཕྲེང་བ་ལས། སྙིང་པོར་གྱུར་པ་རང་སྲོག་ལས། ཁམས་གསུམ་ན་ནི་གཞན་མེད་དང༌། སྒྱུ་མ་རླུང་གི་ཁམས་གསུམ་པ། རྨི་ལམ་རྨི་བ་བཞིན་དུ་མཐོང༌། ཞེས་སེམས་ཅན་རང་རང་གི་སྲོག་སྟེ་རླུང་ལས་གཞན་པ་ཁམས་གསུམ་ན་མེད་པར་གསུངས་པ་དང༌། ཡང་དེ་ཉིད་ལས། སྐྱེ་དང་གནས་དང་འཇིག་པ་དང༌། །སྲིད་

---

^{[མ་དཔེ་གཟིགས་ན་འདིར་གནོན།]}

པ་བར་མར་གནས་པ་སྟེ། །ཇི་སྲིད་འཇིག་རྟེན་གྱིས་བརྟགས་པ། སེམས་ཀྱི་རླུང་གི་རྣམ་འཕྲུལ་ལོ། །ཞེས་གསུངས་པ་དང༌། དགོངས་པ་ལུང་སྟོན་ལས་ཀྱང༌། བྱང་ཆུབ་སེམས་ལས་རླུང་འབྱུང་ཞིང༌། །ནམ་མཁའ་ལ་ནི་རྣམ་གནས་པ། སེམས་ཅན་ཀུན་གྱི་སྲོག་གྱུར་ཞིང༌། ལྔ་ཡི་བདག་ཉིད་བཅུ་མིང་ཅན། །རྟེན་འབྲེལ་བཅུ་གཉིས་ཞེས་གྲགས་པ། ངོ་བོ་ཉིད་རྣམ་གསུམ་དུ་འགྱུར། །ཞེས་བཤད་པ་རྣམས་ཀྱིས་ནི་ཀུན་རྫོབ་ཀྱི་བདེན་པ་ནི་རླུང་སེམས་ཙམ་ཞིག་ཏུ་ཟད་པར་སྟོན་ནོ། །དེ་ཡང་ཕྱི་རོལ་མེད་པས་སེམས་ཙམ་ཞིག་ཏུ་ཟད་ལ། སེམས་ཀྱི་འགྲོ་འོང་གི་བྱ་བ་ལ་རླུང་དུ་བཏགས་པ་ཡིན་གྱི་དེ་མ་གཏོགས་པའི་རླུང་མེད་དོ། །དོན་དེ་ནི་རྗེ་བཙུན་ཀླུ་སྒྲུབ་ཀྱང་བཞེད་དེ་རིགས་པ་དྲུག་ཅུ་པ་ལས། འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་ཡང་དག་འདུ། །ཞེས་སོགས་གསུངས་པའི་ཕྱིར་རོ། །སྒྲོན་གསལ་ལས། དེ་ལྟར་ཕྱི་རོལ་གྱི་རྣམ་པའི་སྨོན་པའི་འབྲས་བུས་དེ་ཡང་མེད་དེ། །སྨོན་ལམ་ལ་སོགས་པའི་ཉེ་བར་དམིགས་པ་མེད་པའི་ཕྱིར་རོ། །དེ་བས་ན་ཕྱི་རོལ་གྱི་དངོས་པོ་ལྟ་བུར་བསྒོམ་པ་དམིགས་སུ་མེད་ཅིང་ཡོད་པ་མ་ཡིན་ཏེ། སེམས་ཀྱི་རང་བཞིན་ཡིན་པའི་ཕྱིར་རོ། །ཞེས་ངར། སེམས་རྣམ་པར་ཤེས་པ་གསུམ་ལ་སྦྱར་བར་བྱའོ། །ཞེས་པ་སྟེ། གཟུགས་ལ་སོགས་པ་ནི་སེམས་འདི་ཉིད་དོ་ཞེས་ཤེས་པར་བྱའོ། །ཞེས་གསུངས་པས་ཟླ་བ་གྲགས་པ་ཡང་ཐ་སྙད་དུ་ཕྱི་རོལ་མེད་པའི་སེམས་ཙམ་ཞིག་བཞེད་པ་ཡིན་ནོ་ཞེས་འཆད་དོ། །འདི་ནི་འཐད་པར་མ་

---

^{[མ་དཔེ་གཟིགས་ན་འདིར་གནོན།]}

མཐོང་སྟེ། ཟླ་བ་གྲགས་པས་ཕྱི་རོལ་དང་ཤེས་པ་གཉིས་ལ་བདེན་གཉིས་གང་དུ་ཡང་ཡོད་མེད་ཀྱི་ཁྱད་པར་འབྱེད་པར་མི་ནུས་པས་བདེན་པར་མེད་མཉམ་དང་ཐ་སྙད་དུ་ཡོད་མཉམ་དུ་གསུངས་པས། སློབ་དཔོན་དེའི་བཞེད་པ་མིན་ལ། ཐ་སྙད་དུ་ཕྱི་རོལ་འགོག་ན་དེ་འདྲའི་གནོད་པ་ཅིག་སེམས་ཐ་སྙད་དུ་ཡོད་པ་ལ་ཡང་ངེས་པར་འཇུག་ལ། །ཐ་སྙད་དུ་སེམས་ཡོད་པའི་སྒྲུབ་བྱེད་ཅིག་འདོད་ན་དེ་འདྲའི་སྒྲུབ་བྱེད་ཅིག་ཕྱི་རོལ་ལ་ཡང་ངེས་པར་རྙེད་པས་འཕགས་པའི་བཞེད་པ་ཡང་མིན་ཏེ། འདི་རྣམས་རྒྱས་པར་གཞན་དུ་བཤད་པས་འདིར་མ་སྤྲོས་སོ། །སྒྲོན་གསལ་གྱི་ལུང་སྔ་མའི་དོན་ནི། རྣམ་ཐར་སྒོ་གསུམ་གྱི་འབྲས་བུ་ལ་སྨོན་པ་མེད་པ་སྟོན་པའི་སྐབས་ཡིན་ལ། འབྲས་བུ་ལ་སྨོན་པ་འགོག་པའི་གཙོ་བོ་ཡང་ཕྱི་རོལ་བེམ་པོ་ལ་མིན་གྱི་ཐར་པ་ལ་ཡིན་ལ། དེ་ལ་བདེན་ཞེན་གྱི་དམིགས་པའི་ཡུལ་མེད་པ་རྒྱུ་མཚན་དུ་བྱས་ནས་འགོག་པའི་སྐབས་སུ་ཕྱི་རོལ་ཞེས་གསུངས་པ་ནི་སེམས་ཀྱིས་བཏགས་པ་ཙམ་ལས་ཕྱི་རོལ་ཏེ་དོན་གཞན་དུ་གྱུར་པ་འགོག་པ་ཡིན་ལ། དེའི་རྒྱུ་མཚན་དུ་སེམས་ཀྱི་རང་བཞིན་ཡིན་ཞེས་པ་ནི་སེམས་ཀྱིས་བཏགས་པ་ཙམ་གྱི་རང་བཞིན་ཡིན་པར་སྟོན་པས་ཕྱི་རོལ་ཐ་སྙད་དུ་འགོག་པ་མིན་ནོ། །ལུང་གཉིས་པའི་དོན་ནི་སེམས་དབེན་ཐོབ་པའི་རྣལ་འབྱོར་པས་གཟུགས་སྒྲ་སོགས་ཅིར་སྣང་ཐམས་ཅད་སེམས་གསུམ་གྱི་ངོ་བོར་སྒོམ་པའི་ཚུལ་སྟོན་པ་ཡིན་གྱི་ཕྱི་རོལ་མེད་པའི་ཁུངས་མོན་ནོ། །དེ་ལྟ་མ་ཡིན་ན་གཟུགས་སྒྲ་སོགས་རྟག་ཏུ་ལྷར་སྒོམ་པར་བཤད་པས་ལྷ་མིན་པའི་

---

^{[མ་དཔེ་གཟིགས་ན་འདིར་གནོན།]}

གཟུགས་སྒྲ་སོགས་མེད་པར་འགྱུར་རོ། །དེ་བཞིན་དུ་འདུས་པའི་སྐོར་རྣམས་ནས་སེམས་དབེན་གྱི་སྐབས་སུ་སེམས་ཙམ་དུ་བཤད་པའི་ཙམ་གྱི་སྒྲས་ཀྱང་ཕྱི་དོན་མི་འགོག་གི །ཡེ་ཤེས་དེའི་དུས་ན་རང་བཞིན་གྱི་རྟོག་པ་ཡོད་པ་གཅོད་པའི་དོན་ནོ། །གལ་ཏེ་ཕྱི་དོན་ཡོད་ན་རླུང་སེམས་ཙམ་ལས་དོན་གཞན་མེད་པར་གསུངས་པའི་དོན་གང་ཡིན་སྙམ་ན། མི་སློབ་པའི་ཟུང་འཇུག་འཇའ་ལུས་རྡོ་རྗེ་སེམས་དཔའི་སྐུ་ཚེ་འདི་ཉིད་ལ་འགྲུབ་པར་གསུངས་པའི་ཉེར་རྒྱུ་ནི་སློབ་པའི་ཟུང་འཇུག་གི་སྐུ་ཡིན་ལ། དེའི་ཉེར་རྒྱུ་ནི་སྒྱུ་ལུས་ཀྱི་སྐུའོ། །དེ་ནི་རླུང་སེམས་ཙམ་ཞིག་ལས་བསྒྲུབ་པའི་རྡོ་རྗེ་སེམས་དཔའི་སྐུ་ཡིན་ལ། དེས་ན་དེ་གང་ལས་སྒྲུབ་པའི་གཞི་གཏན་ལ་དབབ་པར་བཞེད་ནས། རླུང་སེམས་ཙམ་གྱི་ལུས་གསུངས་པ་ཡིན་ནོ། །དེ་ལྟར་ན་རླུང་སེམས་ཙམ་གྱི་ལུས་སུ་གསུངས་པ་འདི་ནི་ངའོ་སྙམ་པའི་སེམས་ཅན་གྱི་ཐ་སྙད་འདོགས་པའི་གཞིར་གྱུར་པའི་གཉུག་མའི་ལུས་ནི་རླུང་སེམས་ཙམ་གྱི་ལུས་སུ་ཟད་པས། དེ་ལས་ངོ་བོ་ཐ་དད་པའི་གཉུག་མའི་ལུས་མེད་པར་སྟོན་པ་ཡིན་གྱི། ཕྱི་རོལ་མེད་པ་དང༌། རྣམ་སྨིན་གྱི་ལུས་རགས་པ་རྣམས་སེམས་ཅན་གྱི་ལུས་མིན་ཞེས་སྟོན་པ་མིན་ནོ། །འདི་ལྟར་སེམས་ཅན་གྱི་ལུས་ནི་གཉིས་ཏེ། གནས་སྐབས་པ་དང༌། གཉུག་མ་པའི་ལུས་སོ། །དེའི་དང་པོ་ནི་རླུང་སེམས་ཙམ་གྱི་ལུས་ལས་གཞན་པའི་རྣམ་རྨིན་གྱི་འབྱུང་ལུས་རགས་པ་ལ་སོགས་པའི་ལུས་སོ། །གཉིས་པ་ནི་རླུང་སེམས་ཙམ་ལས་གྲུབ་

---

^{[མ་དཔེ་གཟིགས་ན་འདིར་གནོན།]}

པའི་ལུས་སོ། །ལུས་རགས་པ་ནི་དང་པོ་མངལ་དུ་ཉིད་མཚམས་སྦྱར་བ་ལ་སོགས་པའི་སྐབས་སུ་མ་སྐྱེས་ཀྱང་སེམས་ཅན་གྱི་ལུས་མེད་པ་མིན་ལ། དེ་བཞིན་དུ་ཤི་བའི་ཚེ་འབྱུང་ལུས་རགས་པ་དོར་ཡང་སེམས་ཅན་གྱི་ལུས་མི་ལྡོག་པས། གཉུག་མའི་ལུས་མིན་ཏེ། ཆུ་ལ་ཚ་བ་བཞིན་ནོ། །རླུང་སེམས་ཙམ་གྱི་ལུས་ནི་གནས་སྐབས་དེ་རྣམས་ཐམས་ཅད་དུ་ཡང་མི་ལྡོག་པས་གཉུག་མའི་ལུས་ཏེ། ཆུ་ལ་གཤེར་བ་བཞིན་ནོ། །ད་ལྟ་གཟུགས་ལུས་རགས་པའི་སྐབས་སུ་ཡང་གཉུག་མའི་ལུས་ནི་རླུང་སེམས་ཙམ་ཞིག་གི་ལུས་ཡིན་པས། ལུས་རགས་པ་ནི་དེའི་གནས་ཁང་དང་འདྲའོ། །གཉུག་མའི་ལུས་རླུང་སེམས་ཙམ་དུ་བཤད་པའི་སེམས་ནི་དབང་ཤེས་མིན་གྱི་ཡིད་ཀྱི་ཤེས་པ་དང༌། རླུང་ཡང་སྲོག་འཛིན་ལས་གཞན་པའི་རླུང་མིན་གྱི་སྲོག་འཛིན་དང༌། དེ་ཡང་ཕྲ་རགས་གཉིས་ལས་ཕྲ་བའི་རླུང་ཡིད་དང་མི་འབྲལ་བའི་སེམས་ཀྱི་རྟེན་ནོ། །འཆི་བའི་མཐར་ལུས་རགས་པ་འདི་ལས་ལོགས་སུ་བྱེ་བའི་བར་དོའི་ལུས་འགྲུབ་པ་དང༌། གྲོང་འཇུག་ནུས་པས་ལུས་རགས་པ་འདི་ལས་རླུང་སེམས་ཙམ་ཞིག་ལོགས་སུ་འབྱེ་བར་ནུས་པ་བཞིན་དུ། མཆོག་ཏུ་གྱུར་པའི་མན་ངག་དང་ལྡན་པས་ཀྱང་ལུས་རགས་པ་ལས་མ་བསྒྲུབས་ཀྱང་རླུང་སེམས་ཙམ་ལས་སྒྱུ་ལུས་རྡོ་རྗེ་འཆང་གི་སྐུར་ལྡང་ནུས་པ་ཡིན་ནོ། །དོན་གྱི་དབང་འདི་གཟིགས་ནས་རིམ་ལྔ་ལས། དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། རྣལ་འབྱོར་པ་ཡི་ལུས་སུ་འབྱུང༌། སྒྱུ་མའི་ལུས་ཞེས་དེ་ལ་བཤད། །ཅེས་

---

^{[མ་དཔེ་གཟིགས་ན་འདིར་གནོན།]}

རླུང་སེམས་ཙམ་ལས་སྒྱུ་མའི་སྐུ་སྒྲུབ་པར་བཤད་པ་བཞིན་དུ། སྤྱོད་བསྡུས་དང་སྒྲོན་གསལ་ལས་ཀྱང་རླུང་སེམས་ཙམ་ལས་སྒྱུ་མའི་སྐུ་སྒྲུབ་པར་བཤད་དོ། །ཚེ་འདི་ལ་འཚང་རྒྱ་བའི་རྣམ་སྨིན་གྱི་ལུས་ཕྲ་རགས་གཉིས་ཀའི་ཉེར་ལེན་ལས་སྒྱུ་མའི་སྐུ་སྒྲུབ་ན། །དེའི་ནང་ནས་རླུང་སེམས་གཉིས་ཙམ་ལས་སྒྲུབ་པར་བཤད་པ་མི་མཐད་དེ། དཔེར་ན་སྣལ་མ་ཀུན་ལས་སྣམ་བུ་སྒྲུབ་པས། དེའི་ནང་ནས་སྣལ་མ་ཉག་མ་གཉིས་ཙམ་ཞིག་ལས། སྣམ་བུ་སྒྲུབ་ཅེས་འདོད་དུ་མི་རུང་བ་བཞིན་ནོ། །དེ་ལྟར་ན་ཀུན་རྫོབ་ཀྱི་བདེན་པ་ཞེས་ཀྱང་བྱ། བདག་ལ་བྱིན་གྱིས་བརླབ་པ་ཞེས་ཀྱང་བྱ། སྒྱུ་མའི་ལུས་ཞེས་ཀྱང་བྱ་བ། །འཕགས་པ་ཡབ་སྲས་ཀྱིས་རྒྱུད་སྡེ་མཐར་ཐུག་པའི་དོན་བཀྲལ་བ་རྣམས་ཀྱི་སྙིང་པོ་འདི་ཇི་ལྟ་བ་བཞིན་མ་ཤེས་ན། མཆོག་གི་དངོས་གྲུབ་འདོད་ཀྱང་མི་འགྲུབ་པས་ངལ་བ་ཙམ་དུ་ཟད་པར་གསུངས་ཏེ་རིམ་ལྔ་ལས། བདག་ལ་བྱིན་གྱིས་བརླབ་བའི་རིམ། གང་གིས་རྙེད་པར་མ་གྱུར་པ། །མདོ་སྡེ་རྒྱུད་དང་རྟོག་པ་ལ། །དེ་ཡི་ངལ་བ་དོན་མེད་འགྱུར། །ཞེས་གསུངས་སོ། །ངེས་ན་ཤིན་ཏུ་ངོ་མཚར་ལ་རྨད་དུ་བྱུང་བའི་གཏམ་དེ་ལུགས་གཞན་ནས་མི་གསལ་ཞིང༌། ལུགས་འདི་ལ་རིང་དུ་འདྲིས་པར་བྱས་པས་ཀྱང་དོན་རགས་པ་ཡང་ཤིན་ཏུ་རྙེད་དཀའ་བར་སྣང་བས། རྒྱས་པར་གཏན་ལ་དབབ་དགོས་མོད་ཀྱང༌། གཞན་དུ་བཤད་པར་འདོད་པས་འདིར་ཕྱོགས་ཙམ་ཅིག་ལས་མ་བསྟན་ཏོ། །གཉིས་པ་ཡན་ལག་གི་དོན་ནི། བཅོམ་ལྡན་འདས་ཀྱིས་ཞུས་པའི་ལན་

---

^{[མ་དཔེ་གཟིགས་ན་འདིར་གནོན།]}

བཀའ་སྩལ་པ་ནི། གང་ཞིག་བར་སྲིད་འཆི་བའི་འོད་གསལ་ལས་བྱུང་བའི་རྣམ་པར་ཤེས་པ་དེ་ཉིད་སེམས་སྣང་བ་དང་ཡིད་མཆེད་པ་དང་རྣམ་པར་ཤེས་པ་ཉེར་ཐོབ་ཅེས་བྱ་བ་སྟེ་རྩ་བའོ་ཞེས་ཚིག་རྣམ་པར་སྦྱར་རོ། །རྣམ་པར་ཤེས་པ་ཞེས་པ་དང་པོ་ནི་སྣང་བ་གསུམ་སོ་སོར་མ་ཕྱེ་བའི་སྤྱི་ཡིན་ལ། རྣམ་ཤེས་ཞེས་པ་གཉིས་པ་ནི་དེ་ལས་ཕྱེ་བའོ། །དེ་ནི་འོད་གསལ་ལས་དངོས་སུ་དང༌། གཞན་གཉིས་བརྒྱུད་ནས་འབྱུང་ངོ་། །སུ་ཞིག་གི་རྩ་བ་ཡིན་སྙམ་ན། ཆགས་སོགས་ཀུན་ནས་ཉོན་མོངས་པ་དང༌། དད་སོགས་རྣམ་པར་བྱང་བའི་བདག་ཉིད་ཅན་གྱི་ཆོས་ཐམས་ཅད་ཀྱི་རྩ་བའོ། །སྤྱོད་བསྡུས་ལས། རྣམ་པར་ཤེས་པ་ནི་འོད་གསལ་བ་ལས་བྱུང་བའོ། །དེ་ཉིད་ནི་སེམས་དང་ཡིད་ཅེས་བྱ་སྟེ། ཀུན་ནས་ཉོན་མོངས་པ་དང་རྣམ་པར་བྱང་བའི་བདག་ཉིད་ཅན་གྱི་ཆོས་ཐམས་ཅད་ནི་དའི་རྩ་བ་ཅན་ཡིན་ནོ། །ཞེས་འབྱུང་ངོ་། །སྣང་བ་དེ་ལས་རྣམ་པར་རྟོག་པ་གཉིས་སྐྱེ་བར་འགྱུར་ཏེ། བདག་ཏུ་རྟོག་པ་དང་གཞན་དུ་རྟོག་པའོ། །རྣམ་པར་ཤེས་པ་རྟོག་པ་དེའི་བཞོན་པ་ནི་ཀུན་རྟོག་གཡོ་བའི་རླུང་ངོ་། །རླུང་དེ་ལས་ནི་མེ་སྐྱེའོ། །མེ་དེ་ལས་ནི་ཆུ་སྐྱེའོ། །ཆུ་དེ་ལས་ནི་ས་སྐྱེའོ། །རླུང་དང་ཀུན་རྟོག་དང་འབྱུང་བ་དེ་རྣམས་ལས་ནི་རྣམས་ལས་ནི་གཟུགས་དང་ཚོར་བ་ལ་སོགས་པའི་ཕུང་པོ་ལྔ་དང༌། མིག་ལ་སོགས་པའི་སྐྱེ་མཆེད་དྲུག་དང༌། ཡུལ་གཟུགས་ལ་སོགས་པའི་ཡུལ་ལྔ་རྣམས་འབྱུང་སྟེ། ཕུང་པོ་ལ་སོགས་པ་དེ་དག་ཐམས་ཅད་ཀྱི་གཞི་ནི་རྣམ་པར་ཤེས་པ་དང༌། རླུང་གཉིས་མར་གྱི་ནང་དུ་མར་བཅུག་པ་བཞིན་དུ་འདྲེས་པར་གྱུར་པའོ། །

---

^{[མ་དཔེ་གཟིགས་ན་འདིར་གནོན།]}

སྤྱོད་བསྡུས་ལས། སྐྱེ་མཆེད་དྲུག་དང་དབང་པོ་ལྔ་རྣམས་ཏེ། ཞེས་བསྒྱུར་མོད་ཀྱང༌། རྡོ་རྗེ་ཕྲེང་བ་ལས་སྐྱེ་མཆེད་དྲུག་མིག་ལ་སོགས་པ་ལ་བཤད་དོ། །སྣང་བ་གསུམ་ལུགས་ལྡོག་ཏུ་སྐྱེས་པ་དེ་ནས་རྣམ་པར་ཤེས་པ་གསུམ་གྱི་རང་བཞིན་གྱི་རྟོག་པ་ཡུལ་དུ་སྣང་བ་ལ་རབ་ཏུ་སྤྱོད་པ་རྣམས་གསལ་བར་ཉམས་སུ་མྱོང་བར་འགྱུར་ཏེ། སྣང་བའི་རྒྱུ་ལ་བརྟེན་ནས་རང་བཞིན་བརྒྱད་ཅུའི་རྟོག་པ་རྣམས་འབྱུང་བར་འགྱུར་རོ། །རྒྱུད་ཀྱི་འགྱུར་ལས། རྣམ་པར་ཤེས་པ་གསུམ་གྱི་རང་བཞིན་གྱི་སྣང་བ་རབ་ཏུ་འབྱུང་བ་རབ་ཏུ་གསལ་བར་སྤྱོད་པ་ཞེས་བསྒྱུར་ཡང༌། སྤྱོད་བསྡུས་སུ་འདི་དྲངས་པ་ལས། རྣམ་པར་ཤེས་པ་གསུམ་གྱི་རང་བཞིན་སྣང་བ་ལ་རབ་ཏུ་སྤྱོད་པ། ཞེས་བསྒྱུར་བ་ལེགས་སོ། །འདིར་ཁ་ཅིག་སྤྱོད་བསྡུས་ལས་དེ་ལ་ཡེ་ཤེས་རེ་རེ་འབྱུང་བ་ལ་རང་བཞིན་འབྱུང་བ་རྣམ་པར་གཞག་པར་བྱ་སྟེ། ཞེས་ཡེ་ཤེས་གསུམ་སོ་སོའི་རང་བཞིན་གྱི་རྟོག་པ་རྣམས་གསུངས་པས། སྐྱེ་བའི་ཚེ་ཉེར་ཐོབ་དང་པོར་སྐྱེ་དེ་ལས་རང་བཞིན་བདུན་དང་དེ་ནས་མཆེད་པ་སྐྱེ་དེ་ལས་རང་བཞིན་བཞི་བཅུ་དང༌། དེ་ནས་སྣང་བ་སྐྱེ་དེ་ལས་རང་བཞིན་སོ་གསུམ་སྐྱེ་ལ། འགག་པའི་ཚེ་རང་བཞིན་སོ་གསུམ་འགག་པའི་རྗེས་སུ་སྣང་བ་འགག་ཅིང་གཞན་རྣམས་ཀྱང་དེ་བཞིན་འགག་པར་འདོད་དོ། །དེ་ནི་མི་འཐད་དེ་རྒྱུད་འདི་ལས་སྐྱེ་བའི་ཚེ་སྣང་བ་གསུམ་རྫོགས་པའི་འོག་ཏུ་རང་བཞིན་གྱི་རྟོག་པ་རྣམས་སྐྱེ་བར་གསུངས་པའི་ཕྱིར་དང༌། འཕགས་པ་ལྷས་རླུང་ཐིམ་པའི་

---

^{[མ་དཔེ་གཟིགས་ན་འདིར་གནོན།]}

འོག་ཏུ་སྣང་བ་ཐིམ་པར་གསུངས་ལ། དེ་ནི་ཀུན་རྟོག་གི་བཞོན་པའི་རླུང་ཡིན་པའི་ཕྱིར་རོ། །གཞན་ཡང་རྩ་བཤད་ཀྱི་རྒྱུད་དང་འཕགས་པ་ཡབ་སྲས་ལྔ་པོ་གང་གི་གཞུང་ནས་ཀྱང་ཡེ་ཤེས་གསུམ་དང་རང་བཞིན་གྱི་རྟོག་པ་སྤེལ་ནས་སྐྱེ་བ་མ་གསུངས་པའི་ཕྱིར་རོ། །རྟོག་པ8།ཚན་གསུམ་ཡེ་ཤེས་གསུམ་དང་སྤེལ་ནས་མ་སྐྱེས་ཀྱང༌། ཡེ་ཤེས་གསུམ་སོ་སོའི་རང་བཞིན་དུ་འཇོག་པ་མི་འགལ་ཏེ། འདི་ལྟར་རྟོག་པ་ཚན་གསུམ་ཡེ་ཤེས་གསུམ་གྱི་རང་བཞིན་དུ་བཤད་པ་ནི་དེ་གསུམ་གྱི་མཚན་ཉིད་དུ་སྤྱོད་བསྡུས་ལས་གསུངས་ལ། །མཚན་ཉིད་ནི་འདིར་མཚོན་པར་བྱེད་པའོ། །དེ་ཡང་སྤྱོད་བསྡུས་ལས། དེ་བཞིན་དུ་རྣམ་པར་ཤེས་པ་སྣང་བ་ཡང་གཟུགས་མེད་པ་ལ་འདོད་ཆགས་དང་འདོད་ཆགས་དང་བྲལ་བ་དང༌། འདོད་ཆགས་བར་མ་ལ་སོགས་པའི་རང་བཞིན་རྣམས་ལས་རྗེས་སུ་དཔག་པར་བྱའོ་ཞེས་རང་བཞིན་གྱི་སྣང་རྗེས་སུ་དཔོག་པར་གསུངས་པས་དེ་དེའི་མཚོན་བྱེད་དོ །དཔོག་ལུགས་ནི་རང་བཞིན་གྱི་རྟོག་པ་ལ་ཤས་ཆེ་ཆུང་བར་མ་གསུམ་སྣང་བས། དེ་རྣམས་སྐྱེད་པའི་སྣང་བ་རླུང་གི་བཞོན་པ་ཅན་ལ་གཡོ་བ་ཤས་ཆེ་ཆུང་བར་མ་གསུམ་ཡོད་པར་དཔོག་གོ །དེ་ལྟར་ན་རྣམ་རྟོག་གཡོ་བ་ཤས་ཆུང་བ་བདུན་གང་རུང་གི་རྟོག་པ་ནི། སྣང་བ་རླུང་གི་བཞོན་པ་ཅན་གྱི་གཡོ་བ་ཤས་ཆུང་བའི་ལག་རྗེས་ཡིན་པས་ཉེར་ཐོབ་ཀྱི་འབྲས་བུར་བཞག་སྟེ། གཞན་གཉིས་ལའང་དེའི་རིགས་པ་སྦྱར་རོ། །ལམ་སྒོམས་སྟོབས་ཀྱི་ཡེ་ཤེས་གསུམ་འདྲེན་ནུས་བའི་རྣལ་འབྱོར་པས་ནི་དེ་གསུམ་མངོན་

---

^{[མ་དཔེ་གཟིགས་ན་འདིར་གནོན།]}

གྱུར་དུ་ངེས་ནུས་པས་རྟགས་ལས་རྗེས་སུ་དཔོག་པ་མིན་ནོ། །དེའི་ཕྱིར་རང་བཞིན་གྱི་སྣང་བ་རྗེས་སུ་དཔག་དགོས་པ་ནི་དེ་འདྲ་མིན་པའི་གང་ཟག་ལ་ཡིན་པས། དབང་ཤེས་ཐམས་ཅད་སྣང་བ་གསུམ་གང་རུང་དུ་འདོད་པ་མི་འཐད་དེ། དབང་ཤེས་ནི་རྟགས་ལས་དཔག་མི་དགོས་པར་མངོན་སུ་དུ་ངེས་པའི་ཕྱིར་རོ། །གང་ཟག་ཐ་མལ་པས་ནི་སྐྱེ་འཆི་ལ་སོགས་པའི་དུས་སུ་སྣང་བ་གསུམ་འོད་གསལ་དང་བཅས་པ་ཉམས་སུ་མྱོང་ཡང༌། དེ་ལ་མངོན་སུམ་གྱི་སྟོབས་ཀྱིས་ངེས་པ་འདྲེན་མི་ནུས་སོ། །གཉིས་པ་ལ་གསུམ། འོད་གསལ་ལས་མ་རིག་པ་སྐྱེ་ཚུལ་རྣམ་གྲངས་དང་བཅས་པ། །མ་རིག་པ་ལས་མཆེད་པ་སྐྱེ་པ་རྣམ་གྲངས་དང་བཅས་པ། མཆེད་པ་ལས་སྣང་བ་སྐྱེ་བ་རྣམ་གྲངས་དང་བཅས་པའོ། །དང་པོ་ནི། སྣང་བ་གསུམ་འོད་གསལ་ལས་འབྱུང་བ་མདོར་བསྟན་པ་དེ་ལ། འོད་གསལ་བ་ནི་སྔར་རང་བཞིན་གྱིས་མ་སྐྱེས་པ་རང་བཞིན་གྱིས་གནས་པ་མེད་པ། རང་བཞིན་གྱིས་འགག་པ་མེད་པ། ད་གཟོད་རང་བཞིན་གྱིས་སྐྱེ་བ་མེད་པ། དོན་དམ་པའི་བདེན་པ་ཆགས་པ་མེད་པའི་མཐའ་འོ། །ཁྱད་པར་གྱི་ཆོས་དེ་རྣམས་ནི་ཡུལ་དང་ཡུལ་ཅན་གྱི་འོད་གསལ་དང༌། གཞི་དང་ལམ་གྱི་དུས་ཀྱི་འོད་གསལ་ལ་ཇི་ལྟར་རིགས་པར་སྦྱར་རོ། །འོད་གསལ་བ་དེ་ལས་ལུགས་ལྡོག་ཏུ་དངོས་སུ་བྱུང་བ་ནི་མ་རིག་པའོ། །དེ་ནི་སྟོན་གྱི་ནམ་མཁའ་སྤྲིན་མེད་པ་ལ་མཚམས་ཀྱི་སྨག་གི་མུན་པའི་སྣང་བས་ཁྱད་པ་བཞིན་དུ་སྣང་བ། གཟུང་འཛིན་རགས་པའི་རྣམ་པ་

---

^{[མ་དཔེ་གཟིགས་ན་འདིར་གནོན།]}

དང་བྲལ་བ། དེའི་ངོ་ན་ལུས་དང་ངག་གི་སྣང་བ་མེད་པ། ཕྲ་ཞིང་བདག་མེད་པ། སྲོག་དང་རྩོལ་བ་མི་རྒྱུ་བས་རྒྱུ་བ་མེད་པའོ། །ཉེར་ཐོབ་མ་རིག་པ་དེའི་རང་བཞིན་ཏེ་མཚོན་པར་བྱད་པའི་མཚན་ཉིད་ནི། ཆགས་པ་བར་མ་སོགས་བདུན་ནོ། །ནག་ཚོའི་འགྱུར་ཕལ་ཆེ་བ་ལས། དེའི་རང་བཞིན་ཉིད་དང༌། ཞེས་འབྱུང་ལ། མར་འགྱུར་ཁ་ཅིག་ལས། དེའི་རང་བཞིན་ལྟ་བ་དང༌། ཞེས་དང༌། ཁ་ཅིག་ལས། དེའི་རང་བཞིན་ཆགས་པ་བར་མ། ཞེས་འབྱུང་བ་ནི་ཕྱི་མ་དག་སྟེ། སྤྱོད་བསྡུས་དང་མཐུན་པའི་ཕྱིར་རོ། །འདིར་ཆགས་པ་བར་མ་རང་བཞིན་དུ་བཤད་པ་འདོད་ཆགས་ཀྱི་རྟོག་པ་གསུམ་གྱི་བར་མའོ། །འཁྲུལ་པ་ནི་སྨིག་རྒྱུ་ལ་ཆུར་འཛིན་པ་སོགས་སོ། །རྣམ་པར་གཡེང་བ་ནི་དམིགས་པ་ལ་རྩེ་གཉིས་སུ་འཇུག་པའི་ཐེ་ཚོམ་མོ། །དྲན་པ་མེད་པ་ནི་བརྗེད་ངས་པའོ། །ལེ་ལོ་ནི་དགེ་བ་ལ་མི་སྤྲོ་བའོ། །མི་སྨྲ་བ་ནི་སྨྲ་སྙིང་མི་འདོད་པའོ། །མི་གསལ་བ་ནི་ཡིད་སུན་པའི་སྐྱོ་བའོ། །གཉིས་པ་ནི་མ་རིག་པ་ལས་ལུགས་ལྡོག་ཏུ་དངོས་སུ་བྱུང་བ་ནི་སེམས་ལས་བྱུང་བ་སྣང་བ་མཆེད་པ་སྟེ། དེ་ནི་སྟོན་གྱི་ནམ་མཁའ་སྤྲིན་མེད་པ་ལ་ཉི་མའི་སྣང་བས་ཁྱད་པར་ལྟ་བུར་ཤིན་ཏུ་གསལ་བར་སྣང་བ། གཟུང་འཛིན་རགས་པའི་སྣང་བ་དང་བྲལ་བ། དེའི་དོན་ལུས་དང་ངག་གི་སྣང་བ་མེད་པའོ། །སྨིག་རྒྱུ་ལྟ་བུ། ཞེས་པ་ནི་གསལ་བར་སྣང་བའི་དཔེ་གཉིས་པ་ཡིན་གྱི་སྣང་ངོ་ན་སྨིག་རྒྱུ་ལྟ་བུ་འཆར་བ་མིན་ནོ། །མཆེད་པ་དེའི་རང་བཞིན་ནི་འདོད་ཆགས་ཀྱི་རྟོག་པ་དང༌། དགའ་བ་ཆུང་ངུ་དང༌། མཆོག་ཏུ་དགའ་བ་ཆེན་པོ་དང༌། དྲག་པོ་ལ་སོགས་པའི་རྟོག་པ་

---

^{[མ་དཔེ་གཟིགས་ན་འདིར་གནོན།]}

བཞི་བཅུའོ། །མཆེད་པའི་ཡེ་ཤེས་ལ་ཀུན་རྫོབ་ཏུ་ནི་མངོན་སུམ་གྱི་སྐྱེས་པའི་གཟུགས་དང༌། ལྷ་མོའི་ཚོགས་དང༌། མཚན་མ་སྟེ་ལིང་ག་དང༌། རྡོ་རྗེའི་བརྡས་བསྟན་ནོ། །གསུམ་པ་ནི། སེམས་ལས་བྱུང་བ་མཆེད་པ་ལས་ལུགས་ལྡོག་ཏུ་དངོས་སུ་བྱུང་བ་ནི་སེམས་སྣང་བ་སྟེ། དེ་ནི་སྟོན་གྱི་ནམ་མཁའ་སྤྲིན་མེད་པ་ལ་ཟླ་བའི་སྣང་བས་ཁྱབ་པ་བཞིན་དུ་སྣང་ཞིང༌། གཟུང་འཛིན་ལ་སོགས་པ་མེད་པ་ཤིན་ཏུ་གསལ་བ་ཆུའི་ནང་གི་ཟླ་བ་ལྟ་བུའོ། །དེའི་རང་བཞིན་ནི་འདོད་ཆགས་དང་བྲལ་བ་ལ་སོགས་པའི་རྟོག་པ་སོ་གསུམ་མོ། །སྣང་བ་ལ་ཀུན་རྫོབ་ཏུ་ནི་མངོན་སུམ་གྱི་བུད་མེད་དང་བྷ་ག་དང༌། པད་མ་དང༌། ལྷ་མའི་ཚོགས་ཀྱི་བརྡས་བསྟན་ནོ། །ཀུན་རྫོབ་ཏུ་ཞེས8་པ་ནི་སྔར་བཤད་པའི་སྤྲིན་མེད་ཀྱི་ནམ་མཁའ་བཞིན་དུ་སྣང་བ་དོན་དམ་པའི་མཚན་ཉིད་དུ་བཤད་པ་ལ་ལྟོས་ནས་སམ། ཡང་ན་བཅོས་མའི་མཚན་ཉིད་དོ། །ཕྱི་མ་གཉིས་ཀྱི་ཤུགས་ཀྱིས་མ་རིག་པ་ལ་མ་ནིང་དང་རྟགས་གཉིས་སྦྱོར་བའི་བརྡས་བསྟན་པ་ནི་ཀུན་རྫོབ་ཏུའོ། །དེ་ལྟར་ན་ཀུན་རྟོག་གཡོ་བའི་རླུང་ཐིམ་མ་ཐིམ་གཉིས་ལས། མ་ཐིམ་པའི་ཚེ་རང་བཞིན་བརྒྱད་ཅུའི་རྟོག་པ་འཇུག་གོ །ཀུན་རྟོག་གི་རླུང་ཐིམ་པ་ལ་སྣང་བ་གསུམ་གྱི་བཞོན་པའི་རླུང་ཐིམ་མ་ཐིམ་གཉིས་ལས། མ་ཐིམ་པ་ནི་སྣང་བ་གསུམ་སྐྱེ་བའི་དུས་ཡིན་ལ། ཐིམ་པ་ནི་འོད་གསལ་འཆར་བའི་དུས་སོ། །རླུང་ཐིམ་པའི་རིམ་པ་ཡང་ཐིམ་པ་ཤས་ཆེ་ཆུང་གི་དབང་གིས་སྟོང་པ་བཞི་ལ་ཡང་རིམ་པ་ཤིན་ཏུ་མང་བ་ཅིག་འོང་ངོ་། །སྣང་བ་སེམས་སྦས་ཀྱི་

---

^{[མ་དཔེ་གཟིགས་ན་འདིར་གནོན།]}

སྐབས་འདིར་འོད་གསལ་བཤད་པ་ནི་སེམས་གསུམ་འབྱུང་བའི་གནས་བསྟན་པའི་ཕྱིར་དུ་ཡིན་ནོ། །གཉིས་པ་ལ་གཉིས། གཞིའི་སྐབས་དང༌། ལམ་གྱི་སྐབས་སོ། །དང་པོ་ནི། སྔར་བཤད་པའི་བར་དོ་གང་དུ་ཞུགས་ནས་འཆི་བའི་འོད་གསལ་ཉམས་སུ་མྱོང་བའི་གནས་དང༌། དེ་ལས་སྐྱེ་བའི་རིམ་པ་སྟོན་པ་ནི། ཕའི་རྡོ་རྗེ་དང་མའི་པད་མ་ཡང་དག་པར་སྦྱོར་བར་བྱེད་པ་ན། ཤེས་རབ་ཀྱི་ཡེ་ཤེས་འདོད་ཆགས་དང་བྲལ་བའི་སྣང་བ་འབྱུང་བར་བྱེད་པ་ལ། ཕ་རང་གི་རྡོ་རྗེ་པད་མར་སྲུབ་པའི་འབད་པ་ལས་མེ་སྟེ་དྲོད་སྐྱེའོ། །འདོད་ཆགས་དང་བྲལ་བའི་སྣང་བ་ཞེས་པ་འོག་ཏུ་བྱུང་ཡང་འདིར་འབྲེལ་ཏེ། དེ་ནི་སྣང་བ་དང་པོའི་མིང་གི་རྣམ་གྲངས་ཡིན་པའི་ཕྱིར་རོ། །མེ་དེ་ལས་ཕའི་ཁམས་དཀར་པོ་དང་མའི་ཁམས་དམར་པོའི་ཐིགས་པ་གཉིས་ཀྱི་ཆུ་བྱུང་བ་མའི་སྐྱེ་གནས་སུ་འདྲེས་པ་ནི་བར་དོ་འཇུག་པའི་གནས་ཏེ། དེ་ནི་ནུར་ནུར་པོའི་རྣམ་པ་དང༌། དེ་ནས་དེ་སྨིན་པ་ལས་མེར་མེར་པོའི་རྣམ་པའོ། །འདིར་བཤད་པའི་རིམ་པ་བཞིན་དུ་མཛོད་འགྲེལ་དང་ལུང་གི་མངལ་འཇུག་ལས་བཤད་ལ། །རྣམ་གཞག་དང་སའི་དངོས་གཞིར་དང་པོར་མེར་མེར་པོ་གསུངས་ཀྱང་དོན་འདྲའོ། །དེ་ནས་དེ་སྨིན་པ་ལས་ནར་ནར་པོའི་རྣམ་པ་དང༌། དེ་ནས་དེ་སྨིན་པ་ལས་གོར་གོར་པོ་དག་གོ །དེ་ནས་དེ་སྨིན་པ་ལས་ཁུ་བ་དང་ཁྲག་གི་གོང་བུ་འཁྲང་འགྱུར་རྣམས་སོ། །ནུར་ནུར་པོ་ལ་སོགས་པ་དེ་རྣམས་ནི་ཁུ་བ་དང་ཁྲག་གིས་བསྐྱེད་པའོ། །མངལ་དུ་སྐྱེ་བ་བཟུང་བ་ཕྱི་རོལ་དུ་བཙས་པའི་རྗེས་དེ་ནས་ཕོ་མའི་དབང་པོ་

---

^{[མ་དཔེ་གཟིགས་ན་འདིར་གནོན།]}

གཉིས་མཉམ་པར་སྤྱོར་བ་ལས། འདོད་ཆགས་སེམས་ལས་བྱུང་བ་དང༌། འདོད་ཆགས་དང་བྲལ་བ་སེམས་དང༌། བར་མའི་འདོད་ཆགས་རྣམ་པར་ཤེས་པ་རབ་ཏུ་སྐྱེ་བ་ཤེས་པར་བྱའོ། །ནག་ཚོའི་འགྱུར་ལས། བར་མའི་འདོད་ཆགས་རབ་ཏུ་སྐྱེ་བས་དེས་ན་ཤེས་པ་ཞེས་བྱ་སྟེ། དེས་ན་རྣམ་པར་ཤེས་པ་གསུམ་ཞེས་བརྗོད་དོ། །ཞེས་འབྱུང་ལ། །མར་བའི་འགྱུར་ལས། བར་མའི་འདོད་ཆགས་ཤེས་པར་བྱ་སྟེ། ཞེས་བྱུང་ངོ་། །རང་བཞིན་གྱི་རྟོག་པ་ལ་ཆགས་སོགས་གསུམ་དང༌། སྣང་མཆེད་ཐོབ་གསུམ་ལ་དེ་གསུམ་དུ་བཤད་པ་གཉིས་ལས། འདིར་ཕྱི་མ་ཡིན་ནོ། །དེ་ལ་སྣང་བ་ལ་ཆགས་བྲལ་ཞེས་པ་ནི་བདེ་བ་ཤས་ཆུང་བས་ཡིན་ལ། མཆེད་པ་ལ་ཆགས་པར་བྱས་པ་ནི་བདེ་བ་ཤས་ཆེ་པའོ། །ཉེར་ཐོབ་ལ་ཆགས་པ་བར་མར་བྱས་པ་ནི་ཆགས་པ་དང་ཆགས་བྲལ་གཉིས་མཉམ་པོར་སྤྱོར་བའི་དོན་ནོ། །ཚུལ་འདི་ནི་གཞི་དུས་དང་ལམ་དུས་ཀྱི་འདོད་ཆགས་ཆོས་སྦས་གཉིས་ཀ་ལ་བཤད་དུ་རུང་བས་གཞི་ལས་སྦྱོར་ན་དགའ་བ་གསུམ་ལ་བྱ་ལ། ལམ་ལ་སྦྱོར་ན་སྤྱི་བོ་ནས་གསང་གནས་སུ་བྱང་སེམས་བབས་པའི་རིམ་པ་ལས་བྱུང་བའི་དགའ་བ་གསུམ་དང༌། སྙིང་ཁར་རླུང་སེམས་བསྡུས་པའི་རིམ་པ་ལས་བྱུང་བའི་སྣང་མཆེད་ཐོབ་གསུམ་སྟེ་གཉིས་ལ་བྱའོ། །དེའི་སྔ་མ་ཐ་མལ་པས་ངེས་ཀྱང་ཕྱི་མ་མངོན་སུམ་གྱི་སྟོབས་ཀྱིས་ངེས་པར་དཀའ་བ་ནི་བཤད་ཟིན་ཏོ། །གཉིས་པ་ནི། །གཞི་དང་ལམ་གྱི་དུས་སུ་དབང་པོ་གཉིས་མཉམ་པར་སྦྱོར་བ་ལས་དགའ་

---

^{[མ་དཔེ་གཟིགས་ན་འདིར་གནོན།]}

བ་གསུམ་སྐྱེ་བ་དེའི་ཕྱིར་དེ་མངོན་དུ་བྱེད་པའི་ཐབས་ནི་ཕྱག་རྒྱ་གསུམ་གྱི་སྒོ་ནས་ཡིན་ཏེ། འདི་ལྟར་ལུས་ཀྱི་ཕྱག་རྒྱའི་ཐབས་སུ་གྱུར་པ་ནི་ཡབ་ཡུམ་གཉིས་ཀྱི་སྐྱིལ་ཀྲུང་བཅིང་བ་ལ་སོགས་པ་དང༌། གསུང་གི་ཕྱག་རྒྱའི་ཐབས་སུ་གྱུར་པ་ནི་ཡབ་ཡུམ་གཉིས་ཀྱི་ངག་ཨཱ་ལི་ཀཱ་ལི་ལས་ཡང་དག་པར་བྱུང་བའི་སྔགས་སུ་བྱ་བ་དང༌། སེམས་ཀྱི་ཕྱག་རྒྱའི་ཐབས་སུ་གྱུར་པ་ནི་གཉིས་ཀ་ལྷག་པར་དམིགས་པའི་ཏིང་ངེ་འཛིན་བརྟན་པའོ། །དེ་ནས་ཕྱག་རྒྱའི་གཟུགས་ལ་སོགས་པའི་ཡུལ་ལྔ་ལ་ལོངས་སྤྱོད་པ་ནི་ཡབ་ཡུམ་གཉིས་ཀྱི་དང་པོ་གཉིས་མཉམ་པར་སྦྱོར་བའི་ཐབས་སུ་གྱུར་པ་སྟེ། དེའི་སྔོན་དུ་བྱ་བའི་རིམ་པའོ། །དེ་ནི་དེ་ཁོ་ན་ཉིད་གྲུབ་པ་ལས་དང་པོར་གཟུགས་ལ་ལྟ་བ་དང༌། དེ་ནས་འཇམ་ཞིང་ངེས་པའི་གསུང་གིས་ཐུགས་འཛིན་པར་མཛད་པ་དང༌། དེའི་འོག་ཏུ་དྲི་ཞིམ་པོས་འཐུག་པོར་བྱུགས་པའི་དྲི་བསུང་ཆགས་པ་སྣོམ་པ་དང༌། དེ་ནས་འཁྱུད་པར་གསུངས་ཏེ། མ་མཆུའི་སྦྲང་རྩི་འཇིབ་པ་ནི་རོ་ལ་སྤྱོད་པའོ། །གསུམ་པ་ལ་གཉིས། སྒྱུ་མའི་སྐུ་གང་ལས་སྒྲུབ་པའི་གཞི་སེམས་གསུམ་གྱི་རིམ་པ། རིམ་པ་དེ་ལས་བདེ་ཆེན་སྒྱུ་མའི་སྐུ་སྒྲུབ་པ་དཔེའི་སྒོ་ནས་བསྟན་པའོ། །དང་པོ་ལ་གཉིས། སྤྱིའོ་དོན། ཡན་ལག་གི་དོན་ནོ། །དང་པོ་ནི། རྒྱུད་འདིར་རྡོ་རྗེ་དང་པད་མ་སྦྱོར་བ་སེམས་དང་སེམས་བྱུང་སྦྱོར་བའི་ཐབས་སུ་གསུངས་པའི་དོན་ནི་རིམ་ལྔ་ལས། སྒྱུ་མ་དག་ནི་ཐམས་ཅད་ལས། བུད་མེད་སྒྱུ་མ་ཁྱད་པར་འཕགས། ཡེ་ཤེས་གསུམ་གྱི་དབྱེ་བ་ནི། །གསལ་བར་འདི་ལས་

---

^{[མ་དཔེ་གཟིགས་ན་འདིར་གནོན།]}

མཚོན་པར་འགྱུར། །འདོད་ཆགས་ཉིད་དང་ཆགས་བྲལ་དང༌། །དེ་ཡི་བར་དེ་གསུམ་པོ་ནི། །དབང་པོ་གཉིས་ནི་མཉམ་སྦྱོར་བའི། རྡོ་རྗེ་པདྨ་འདུས་ལས་སོ། །ཞེས་དབང་པོ་གཉིས་སྦྱར་བ་ལས་སྣང་མཆེད་ཐོབ་གསུམ་གྱི་ཡེ་ཤེས་སྐྱེ་བར་གསུངས་པས་བཤད་དོ། །དེ་ལ་སྤྱིར་ཡེ་ཤེས་གསུམ་སྐྱེད་པའི་ཐབས་ནི། ནང་གི་རྐྱེན་སྲོག་རྩོལ་སྒོམ་པ་དང༌། ཕྱིའི་རྐྱེན་ཕྱག་རྒྱ་ལ་བརྟེན་པ་གཉིས་གསུངས་པའི་དང་པོ་ལ་ནི། སྟེང་གི་སྣ་རྩེར་འོད་ཀྱི་ཐིག་ལེ་སྒོམ་པ་དང༌། གསང་བའི་སྣ་རྩེར་རྫས་ཀྱི་ཐིག་ལེ་སྒོམ་པ་དང༌། །སྙིང་ཁའི་སྣ་རྩེར་སྔགས་ཀྱི་ཐིག་ལེ་སྒོམ་པའི་སྲོག་རྩོལ་གསུམ་ཡོད་ལ། དེ་གསུམ་ནི་རྒྱུད་ཕྱི་མ་དང༌། རྡོ་རྗེ་ཕྲེང་བ་དང༌། ལྷ་མོ་བཞིས་ཞུས་པའི་བཤད་རྒྱུད་ཀྱིས་རྩ་བའི་རྒྱུད་ཀྱི་དོན་གསལ་བར་མཛད་པ་ལས་འབྱུང་ངོ་། །གཉིས་པ་ནི་རྒྱུད་གཞན་ལས་ཀྱང་འབྱུང་མོད་ཀྱང་གསལ་བར་ནི་བཤད་རྒྱུད་འདིར་གསུངས་སོ། །འོ་ན་སྟོང་པ་བཞི་དང་དགའ་བ་བཞི་དོན་གཅིག་གམ་དོན་ཐ་དད་པ་ཡིན་སྙམ་ན། འདི་ལ་ཕྱག་ཆེན་ཐིག་ལེར། །གང་འདིར་དགའ་བ་དེ་སྣང་བ། །སྣང་བ་མཆེད་པ་མཆོག་ཏུ་བཤད། །ཁྱད་དགའ་ཉེ་བར་ཐོབ་པར་ཤེས། ལྷན་ཅིག་སྐྱེས་དེ་འོད་གསལ་བའོ། །ཞེས་དགའ་བ་བཞི་སྣང་མཆེད་ཐོག་གསུམ་འོད་གསལ་དུ་བཤད་དོ། །སྤྱི་བོ་ནས་ནོར་བུའི་བར་དུ་བྱང་ཆུབ་ཀྱི་སེམས་བབ་པ་ལས་དགའ་བ་བཞི་འབྱུང་བའི་གནས་ནི་རྡོ་རྗེ་ཕྲེང་བ་ལས། བདེ་ཆེན་འཁོར་ལོ་སྤྱི་བོ་ལ། དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོ་

---

^{[མ་དཔེ་གཟིགས་ན་འདིར་གནོན།]}

མཆོག་དགའ་དང༌། བྲལ་དགའ་ཆོས་ཀྱི་འཁོར་ལོ་གནས། སྦྲུལ་པའི་འཁོར་ལོ་ལྷན་ཅིག་སྐྱེས། དགའ་བ་ཉམས་སུ་མྱོང་བར་བྱེད། །ཅེས་སྤྱི་བོ་ནས་བཟུང་སྟེ་མགྲིན་པར་མ་སླེབ་པར་དང༌། མགྲིན་པ་ནས་བཟུང་སྟེ་སྙིང་ཁར་མ་སླེབ་བར་དང༌། སྙེང་ཁ་ནས་ལྟེ་བར་མ་སླེབ་བར་དང༌། ལྟེ་བ་ནས་རྡོ་རྗེ་ནོར་བུའི་བར་རྣམས་རིམ་པ་བཞིན་ཡས་བབས་ཀྱི་དགའ་བ་བཞིའི་གནས་དང༌། བྱང་སེམས་ཕྱིར་ལོག་པ་ན་ལྟེ་བ་ནས་སྤྱི་བོའི་བར་བཞི་ནི་མས་བརྟན་གྱི་དགའ་བ་བཞིའི་གནས་སུ་གསུངས་སོ། །རིམ་ལྔའི་འགྲེལ་པ་ལཀྵྨཱིས་མཛད་པ་སོགས་ལས་སྤྱི་གཙུག་ནས་བྱང་སེམས་འཛག་པའི་ཚེ་སྣང་བ་དང༌། ཡན་ལག་ཐམས་ཅད་ཀྱི་ཚིགས་ལ་ཁྱབ་པའི་དུས་སུ་སྣང་བ་མཆེད་པ་དང༌། །རྡོ་རྗེའི་རྩེ་མོ་ལས་ཐིག་ལེ་གཅིག་སྤྲོས་པའི་ཚེ་ཉེར་ཐོབ་དང༌། རྩེ་མོ་དེ་ཉིད་དུ་བསྟན་པ་ན་འོད་གསལ་སྐྱེ་བ་དང༌། །ཡང་དང་པོ་གཉིས་འདྲ་ལ། །རྡོ་རྗེའི་རྩ་བའམ་དབུས་སུ་ཕྱིན་པ་ན་ཉེར་ཐོབ་དང༌། །ནོར་བུའི་ནང་ན་གནས་པ་ན་འོད་གསལ་སྐྱེ་བ་དང། དེ་རྣམས་དགའ་བ་བཞིར་ཡང་བཤད་དོ། །རིམ་ལྔའི་འགྲེལ་པ་ཐུབ་པ་དཔལ་གྱིས་མཛད་པ་ལས་བྱང་ཆུབ་ཀྱི་སེམས་རྡོ་རྗེའི་རྩ་བར་སླེབ་པ་ན་སྣང་བ་དང༌། །ནོར་བུའི་དབུས་སླེབ་པ་ན་ཉེར་ཐོབ་དང༌། །ནོར་བུའི་རྩེ་མོར་འོད་གསལ་སྐྱེ་བར་བཤད་པའི་ཤུགས་ཀྱིས། རྡོ་རྗེའི་རྩ་བ་ནས་ནོར་བུའི་མགྲིན་པའི་བར་དུ་སླེབ་པ་ན་མཆེད་པ་སྐྱེ་བར་འདོད་དགོས་སོ། །དེ་རྣམས་ནི་འདུས་པའི་སྐོར་ནས་བྱུང་བ་བརྗོད་པ་ཡིན་གྱི། གཞན་དགའ་བ་བཞིའི་སྐྱེ་ཚུལ་མི་འདྲ་བ་མང་དུ་བཤད་དོ། །དེ་ལ་

---

^{[མ་དཔེ་གཟིགས་ན་འདིར་གནོན།]}

འདུས་པའི་རྩ་བཤད་དང༌། འཕགས་སྐོར་ལྔའི་གཞུང་ནས་དགའ་བ་བཞི་སྟོང་པ་བཞིར་བཤད་པ་མ་བྱུང་ངོ་། །སྤྱོད་བསྡུས་ལས། རྡོ་རྗེ་དང་པདྨ་སྙོམས་པར་ཞུགས་པ་ལས། སྤྱི་བོ་ནས་བརྩམས་ཏེ་རྩ་བདུན་ཁྲི་ཉིས་སྟོང་ལས་བྱང་སེམས་འཇུ་བས་ཆགས་པ་དང་ཆགས་བྲལ་དང་བར་མའི་རིམ་གྱིས་འབབ་བོ། །ཞེས་གསུངས་ཤིང༌། དེ་དང་འདྲ་བ་རེ་སྒྲོན་གསལ་ལས་འབྱུང་བ་མ་གཏོགས་པ་ཡབ་སྲས་ལྔའི་གཞུང་ནས། བྱང་སེམས་ཞུ་བ་གནས་འདིར་སླེབ་པ་ན་དགའ་བའམ་སྟོང་པ་འདི་སྐྱེ་གསལ་བར་གསུངས་པ་མེད་པར། སྔར་ཐིམ་རིམ་གྱི་སྐབས་སུ་བཤད་པ་ལྟར་རླུང་ཐིམ་པས་སྣང་བ་དང་སེམས་ཐིམ་པས་མཆེད་པ་སོགས་སྐྱེ་བར་བཤད་པ་ཙམ་མོ། །འཕགས་སྐོར་གྱི་རྗེས་འབྲང་གཞན་ཕལ་མོ་ཆེས་ནི་སྤྱི་བོ་ནས་གསང་གནས་རྡོ་རྗེའི་བར་དུ་བྱང་སེམས་བབས་པའི་རིམ་པ་ལས་སྐྱེ་བའི་སྟོང་བ་བཞི་མ་གཏོགས་པ། སྣང་མཆེད་ཐོབ་གསུམ་འོད་གསལ་དང་བཅས་པའི་ཡེ་ཤེས་ལམ་གྱིས་བསྡུས་པ་གཞན་མ་བཤད་ཅིང་མི་འདོད་དོ། །རང་གི་ལུགས་ནི། བྱང་སེམས་སྤྱི་བོ་ནས་གསང་གནས་ཀྱི་བར་དུ་བབས་པ་ལས་བྱུང་བའི་དགའ་བཞི་ལ་སྣང་མཆེད་ཐོབ་གསུམ་འོད་གསལ་དང་བཞིར་འཇོག་པ་ཅིག་ཀྱང་འདོད་མོད་ཀྱང༌། ཕྱི་མ་བཞི་གཙོ་བོ་ནི་སྔར་བཤད་པ་ལྟར་སྙིང་ཁར་རླུང་སེམས་འདུས་པའི་རིམ་པ་ཉིད་ལས་འབྱུང་བ་ཡིན་པས། དེ་འདྲ་བའི་སྣང་མཆེད་ཐོབ་གསུམ་འོད་གསལ་དང་བཞི་ནི། བྱང་སེམས་སྤྱི་བོ་ནས་

---

^{[མ་དཔེ་གཟིགས་ན་འདིར་གནོན།]}

གསང་གནས་ཀྱི་བར་དུ་རིམ་གྱིས་བབས་པ་ལས་བྱུང་བའི་དགའ་བཞི་དང་དོན་མི་གཅིག་གོ །དེས་ན་སྙིང་ཁར་སྔགས་ཀྱི་ཐིག་ལེ་མི་ཤིགས་པ་སྒོམ་པ་དང༌། དེ་ལ་དམིགས་ནས་རྡོ་རྗེའི་བཟླས་པ་བྱས་པས་དྲངས་པའི་སྟོང་པ་བཞི་ནི་སྙིང་ཁར་ལུང་སེམས་འདུས་པའི་རིམ་པ་ཉིད་ལས་འབྱུང་བ་ཡིན་པས། དེ་ལ་བྱང་སེམས་སྤྱི་བོ་ནས་འབབ་པ་ཡོད་ཀྱང༌། སྙིང་ཁ་བར་དུ་འདུ་ཞིང༌། །ལུས་ཀྱི་སྨན་ནས་ཀྱང་ཡར་ལ་སྙིང་ཁ་བར་དུ་འདུ་བར་སྔར་རིམ་ལྔའི་ལུང་དྲངས་ནས་བཤད་དོ། །དེའི་ཕྱིར་དེ་ལ་ནི་ལུས་ཀྱི་སྟོད་སྨད་ནས་བྱང་ཆུབ་ཀྱི་སེམས་སྡུས་པ་ན་སྙིང་ཁར་འདུ་བ་ཡིན་གྱི་གསང་གནས་སུ་འགྲོ་བ་མིན་ནོ། །ཕྱག་རྒྱ་ལ་བརྟེན་ནས་སྟོང་པ་བཞི་སྐྱེད་པ་ལ་ཡང་སྤྱི་བོ་ནས་གསང་གནས་ཀྱི་བར་དུ་བྱང་ཆུབ་ཀྱི་སེམས་བབས་པ་ལས་བྱུང་བའི་དགའ་བཞིའི་ངོ་བོར་གྱུར་པའི་སྟོང་པ་བཞི་ཡང་ཡོད་མོད་ཀྱང༌། གཙོ་བོར་གྱུར་བའི་སྟོང་པ་བཞི་ནི་སྙིང་ཁར་རླུང་སེམས་འདུས་པ་ལས་བྱུང་བ་ཡིན་པས། རྒྱུད་འདིར་སྒྱུ་མའི་སྐུ་གང་ལས་སྒྲུབ་པའི་གཞི་སེམས་སེམས་བྱུང་ཉེར་ཐོབ་གསུམ་བཤད་པ་ཡང་སྙིང་ཁར་རླུང་སེམས་འདུས་པ་ལས་བྱུང་བ་ཡིན་ཏེ། །སྒྱུ་མའི་སྐུ་སྒྲུབ་པ་ནི་འཆི་བའི་སྟོང་བ་ལས་བར་དོ་འགྲུབ་པའི་རིམ་པ་བཞིན་དུ་སྒྲུབ་པ་ཡིན་ལ། འཆི་རིམ་ཇི་ལྟ་བ་བཞིན་དུ་སྟོང་པ་རྣམས་སྐྱེད་པ་ལ་ནི་རླུང་སེམས་རྣམས་སྙིང་ཁར་འདུ་དགོས་པའི་ཕྱིར་རོ། །དོན་དེ་ལ་དགོངས་ནས་སྤྱོད་བསྡུས་ལས་ཀྱང༌། །རང་གི་ཕྱག་རྒྱ་དང་ལྷན་ཅིག །རིལ་པོར་འཛིན་པའམ། །གཞིག་པའི་རིམ་གྱིས་དོན་

---

^{[མ་དཔེ་གཟིགས་ན་འདིར་གནོན།]}

དམ་པའི་བདེན་པ་ལ་འཇུག་གོ །ཞེས་གསུངས་ཏེ། རིལ་འཛིན་གྱིས་སྙིང་ཁར་སྡུས་པའི་ཁུངས་དྲངས་ཟིན་ལ། རྗེས་གཞན་ཞིག་གིས་སྡུས་པའི་གནས་ཀྱང་དེ་དང་འདྲ་བའི་ཕྱིར་རོ། །དེ་ཡང་རྡོ་རྗེ་བཟླས་པ་མཐར་ཕྱིན་པས། སྙིང་ཁར་རླུང་སེམས་སྡུས་པ་ལ་གོམས་པ་བརྟན་པའི་མཐུས། ཕྱག་རྒྱ་དང་མཉམ་པར་སྦྱར་བ་ན་བསམ་གཏན་གཉིས་གང་རུང་གི་རྣལ་འབྱོར་དྲན་པའི་སྒོ་ནས་བསྡུས་པ་ན། ཕྱག་རྒྱ་དང་སྙོམས་པར་ཞུགས་པའི་རྐྱེན་གྱིས་ཀྱང༌། བྱང་སེམས་སྤྱི་བོ་ནས་བརྩམས་ཏེ་ཞུ་བ་རྣམས་ལུས་ཀྱི་སྟོང་སྨད་ཀུན་ནས་སྙིང་ཁར་འདུ་བ་ཡིན་ནོ། །འདི་ནི་རྡོ་རྗེ་བཟླས་པ་མཐར་མ་ཕྱིན་པའི་དུས་སུ་ཡང༌། རྡོར་བཟླས་ཀྱིས་སྟོང་པ་བཞི་འདྲེན་ནུས་པའི་མཚམས་ནས་ཀྱང་ཤེས་རབ་ནུས་ཏེ། དེའི་མན་ངག་ནི་གཞན་དུ་བསྟན་པར་བྱའོ། །ནང་གི་རྐྱེན་སྲོག་རྩོལ་གཉིས་དང་ཕྱིའི་རྐྱེན་ཕྱག་རྒྱ་ལ་བརྟེན་ནས་སྙིང་ཁར་རླུང་སེམས་འདུས་པའི་རིམ་པ་ལས་སྟོང་པ་བཞིའི་ཡེ་ཤེས་སྐྱེད་པ་འདི་ནི་གསང་འདུས་འཕགས་ལུགས་ཀྱི་ཁྱད་པར་གྱི་ཆོས་བླ་ན་མེད་པ་ཅིག་ཏུ་འདུག་ཀྱང༌། གསལ་བར་མ་ཐོན་སྣང་བས་ལེགས་པར་རྩད་གཅད་པར་བྱའོ། །འོ་ན་བྱང་སེམས་སྤྱི་བོ་ནས་གསང་གནས་ཀྱི་བར་དུ་བབས་པའི་རིམ་པ་ལས་དགའ་བཞི་སྐྱེས་པའི་སྟོང་པ་བཞི་པོ་འདི། སྔར་བཤད་པའི་སོ་སོ་བ་དེ་དག་གང་གི་རྗེས་སུ་འབྲང་བར་བྱ་སྙམ་ན། །རྡོ་རྗེ་ཕྲེང་བ་ལས་བཤད་པ་ནི་དགའ་བཞི་སྐྱེ་བའི་གནས་ཡིན་ཀྱང༌། དགའ་བ་དེ་རྣམས་སྟོང་པ་བཞིར་

---

^{[མ་དཔེ་གཟིགས་ན་འདིར་གནོན།]}

དེར་མ་བཤད་ལ། གནས་གང་དུ་སྐྱེ་དཔྱོད་ན། བྱང་སེམས་ཞུ་བ་གནས་གང་དུ་སླེབ་པ་ན་སྔར་བཤད་པ་ལྟར་གྱི་སྣང་བ་གསུམ་སོ་སོའི་མཚན་ཉིད་དང་ལྡན་པ་སྐྱེ་བར་འདུག་དཔྱད་པས་ཤེས་ཏེ། འོན་ཀྱང་ཐུབ་པ་དཔལ་གྱིས་བཤད་པ་ལྟར་བྱས་ན། །སྣང་བ་གསུམ་གྱི་མཚན་ཉིད་ཚང་སྟོབས་ཆེ་བར་མངོན་ནོ། །སྲོག་རྩོལ་གཉིས་ཀྱིས་སྟོང་པ་བཞི་དྲངས་པ་ནི། དེ་གཉིས་ཀྱིས་རླུང་དབུ་མར་བཙུད་པའི་མཐུས་ཡིན་ལ། ཕྱག་རྒྱ་ལ་བརྟེན་ནས་སྟོང་པ་བཞི་འདྲེན་པ་ལ་ཡང་རྡོ་རྗེ་ཕྲེང་བར་བཤད་པ་ལྟར་དཔའ་བོ་དང་རྣལ་འབྱོར་མའི་གསང་གནས་ཀྱི་རྩེའི་རྩ་གཉིས་ཕྲད་པའི་དབང་གིས་རླུང་དབུ་མར་བཙུད་པའི་མཐུས་འཆར་བ་ཡིན་ནོ། །དེའི་གནད་ཀྱིས་འོག་སྒོའི་པད་མའི་སྣ་རྩེར་རྫས་ཀྱི་ཐིག་ལེ་སྒོམ་པ་སྲོག་རྩོལ་དུ་གསུངས་པ་ཡིན་ཏེ། དེའི་མན་ངག་ཀྱང་གཞན་དུ་བཤད་པར་བྱའོ། །གཉིས་པ་ནི། རྡོ་རྗེ་བཟླས་པ་མཐར་ཕྱིན་པའི་རྡོ་རྗེ་དང༌། ཕྱག་རྒྱའི་པདྨ་གཉིས་མཉམ་པར་སྦྱོར་བ་ནི་སེམས་སྣང་བ་དང༌། སེམས་ལས་བྱུང་བ་སྣང་བ་མཆེད་པ་དག་གི་སྐྱེད་པའི་ཐབས་སུ་གྱུར་པའོ། །སེམས་དང་སེམས་ལས་བྱུང་བ་དག་ཆ་མཉམ་པར་སྦྱོར་བའི་ཉེར་ཐོབ་ནི། བདེ་བ་ཆེན་པོའི་ཏིང་ངེ་འཛིན་སྒྱུ་མའི་ལུས་ཀྱི་ཐབས་སུ་གྱུར་པའོ། །སྤྱོད་བསྡུས་སུ་འདི་དྲངས་པའི་འགྱུར་ལ། སེམས་དང་སེམས་ལས་བྱུང་བའི་རྣལ་འབྱོར་ཆེན་པོ་ནི་བདེ་བ་ཆེན་པོའི་ཏིང་ངེ་འཛིན་ཏོ། །དེ་ནི་སྒྱུ་མའི་དཔེས་ཉེ་བར་མཚོན་པ་སྟེ། ཞེས་འབྱུང་ཡང༌། རྒྱུད་ཀྱི་གཞུང་ལོགས་སུ་བསྒྱུར་བའི་འགྱུར་གཉིས་ཀ་ལས་

---

^{[མ་དཔེ་གཟིགས་ན་འདིར་གནོན།]}

སྔ་མ་བཞིན་དུ་འབྱུང་བ་དག་པར་མངོན་ཏེ། ཡེ་ཤེས་གསུམ་ལས་སྒྱུ་མའི་སྐུ་སྒྲུབ་པ་སྟོན་པར་སྣང་བའི་ཕྱིར་དང༌། བདེ་བ་ཆེན་པོའི་ཏིང་ངེ་འཛིན་ནི་སྒྱུ་མའི་སྐུར་བཤད་ལ། སེམས་དང་སེམས་བྱུང་སྦྱོར་བ་ནི་ཉེར་ཐོབ་ཡིན་པའི་ཕྱིར་རོ། །སྣང་མཆེད་གཉིས་ཉེར་ཐོབ་ཀྱི་རྒྱུ་ཡིན་པས་དེའི་དུས་ན་མེད་ཀྱང༌། ཉེར་ཐོབ་སྣང་བ་དང་མཆེད་པ་གཉིས་མཉམ་པར་སྦྱར་བ་ཡིན་པར་གསུངས་པ་ནི། སྟོང་པའི་ཤེས་རབ་དང་བདེ་བའི་ཐབས་གཉིས་རེ་རེ་ཤས་ཆེ་བ་དེ། འདིའི་དུས་སུ་གཉིས་ཀ་ཆ་མཉམ་པར་གྱུར་པའི་དོན་ནོ། །སྐབས་འདིར། །བདེ་བ་ཆེན་པོ་ཞེས་གསུངས་པ་ནི། བདེ་བ་ཆེན་པོའི་ཡེ་ཤེས་དང་དེའི་གཞོན་པའི་རླུང་གཉིས་ངོ་བོ་གཅིག་ཏུ་སྐྱེས་པའི་སྒྱུ་མའི་སྐུ་ཡིན་གྱི། བདེ་བ་ཆེན་པོའི་ཡེ་ཤེས་ཙམ་མིན་ནོ། །སྲོག་རྩོལ་གཉིས་བསྒོམས་པས་རླུང་སྙིང་ཁར་བསྡུས་པའི་རིམ་པ་ལས་སྟོང་པ་བཞིའི་ཡེ་ཤེས་སྐྱེད་པའི་ཏིང་ངེ་འཛིན་བརྟན་པ་ན་ཕྱག་རྒྱ་གཉིས་དང་སྦྱར་བ་ལས། རྣལ་འབྱོར་མའི་རྒྱུད་དང་ཐུན་མོང་བའི་དགའ་བཞི་དང༌། འདུས་པ་རྩ་བཤད་ཀྱི་དོན་འཕགས་པ་ཡབ་སྲས་ཀྱིས་བཀྲལ་བའི་ཐུན་མོང་མ་ཡིན་པའི་སྟོང་པ་གང་སྐྱེད་འདོད་པ་སྐྱེད་པར་ནུས་མོད་ཀྱང༌། སྟོང་པ་གསུམ་གྱི་གཙོ་བོ་ནི་ཕྱི་མ་ཡིན་ནོ། །རྣལ་འབྱོར་མའི་རྒྱུད་ལས་དགའ་བ་གསུམ་གྱི་གནས་སྐབས་ཀྱི་རླུང་སེམས་གཉིས་ཙམ་ལས་སྒྱུ་མའི་སྐུ་སྒྲུབ་པ་དང༌། དགའ་བ་བཞི་ལ་ལྷན་སྐྱེས་ཀྱི་སྐབས་ཀྱི་རླུང་སེམས་ཙམ་ལས་ཟུང་འཇུག་གི་སྐུ་སྒྲུབ་པའི་ཚུལ་གསལ་བར་མ་བསྟན་ལ། །

---

^{[མ་དཔེ་གཟིགས་ན་འདིར་གནོན།]}

ཐབས་རྒྱུད་འདུས་པ་ལ་སོགས་པའི་དོན་འཕགས་པ་ཡབ་སྲས་ཀྱིས་བཀྲལ་བ་ལ། སྟོང་པ་དང་པོ་གསུམ་གྱི་སྐབས་ཀྱི་རླུང་སེམས་ཙམ་ལས་སྒྱུ་མའི་སྐུ་སྒྲུབ་པ་དང༌། སྟོང་པ་བཞི་པའི་སྐབས་ཀྱི་རླུང་སེམས་ཙམ་ལས་ཟུང་འཇུག་གི་སྐུ་སྒྲུབ་པའི་ཚུལ་ཤིན་ཏུ་གསལ་བར་བསྟན་ནོ། །གལ་ཏེ་སྲོག་རྩོལ་གཉིས་བསྒོམ་པས་སྟོང་པ་བཞི་འདྲེན་ནུས་པའི་མཚམས་དམའ་མོ་ནས་ཀྱང་ཉེར་ཐོབ་མུན་ནག་ལྟ་བུ་དྲན་པ་བརྗེད་པའི་ངོ་བོ་ཉིད་ཤར་བའི་རྗེས་སུ། །དྲན་མེད་དེ་སངས་པ་ན་སྤྲིན་མེད་པའི་ཐོ་རངས་ཀྱི་དུས་ཀྱི་ནམ་མཁའ་ཟླ་ཉིའི་འོད་དང་མཚམས་ཀྱི་སྨག་གིས་མ་བསླད་པ་ལྟ་བུའི་ཉམས་འཆར་བ་སྣང་བ་མ་ཡིན་ནམ། །རྡོར་བཟླས་མཐར་ཕྱིན་པའི་མཐོན་པོར་སླེབ་པ་ན་སྣང་མཆེད་ཐོབ་གསུམ་ཙམ་ལས་ཐམས་ཅད་སྟོང་པ་འོད་གསལ་གྱི་ཡེ་ཤེས་སྐྱེ་བར་མ་བཤད་པ་མི་འཐད་དོ་སྙམ་ན། འོད་གསལ་ལ་དཔེ་དོན་གཉིས་ལས་དོན་གྱི་འོད་གསལ་སྒྱུ་ལུས་མན་ཆད་དུ་མི་སྐྱེ་བ་ལ་དགོངས་ནས་སྣང་བ་གསུམ་ཙམ་ཞིག་བཤད་ཀྱི་དཔེའི་འོད་གསལ་མི་སྐྱེ་བ་མིན་ནོ། །གཉིས་པ་ནི། དེ་ལྟར་རྣམ་ཤེས་གསུམ་གྱི་སེམས་དང་དེའི་བཞོན་པའི་རླུང་ཙམ་ལས་སྒྱུ་ལུས་རྡོ་རྗེ་འཆང་གི་སྐུར་ལངས་པ་དེ་ནི། སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པ་ཡིན་ལ། དེ་བས་ན་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་ཀྱི་ཞིང་ན་བཞུགས་པའི་དེ་བཞིན་གཤེགས་པ་རྣམས། །སྒྱུ་མ་ལྟ་བུ་ནས་མེ་ལོང་གི་གཟུགས་རྙན་ལྟ་བུའི་བར་གྱི་སྒྱུ་མའི་དཔེ་བཅུ་གཉིས་ཀྱིས་བདེ་བ་ཆེན་པོའི་

---

^{[མ་དཔེ་གཟིགས་ན་འདིར་གནོན།]}

ཏིང་ངེ་འཛིན་སྒྱུ་མའི་སྐུ་ཉེ་བར་མཚོན་པར་གྱུར་པ་ཡིན་ནོ། །སྤྱོད་བསྡུས་སུ་དྲངས་པ་ལས། དེ་བས་ན་ཞེས་འབྱུང་བ་ལེགས་སོ། །སྒྱུ་མ་དཔེར་བླངས་པ་གཅིག་ལས་མེད་ཀྱང་སྒྱུ་མའི་དཔེ་བཅུ་གཉིས་ཞེས་གསུངས་པ་ནི། དཔེའི་ཐོག་མས་གཞན་རྣམས་ཀྱང་མཚོན་པའམ། སྒྱུ་མའི་ལུས་ཀྱི་དཔེ་ཡིན་པ་ལ་དགོངས་སོ། །དཔེ་རྣམས་ལ་ལྟ་བུ་ཞེས་སྦྱར་ན་དོན་ལ་འགྲོ་མོད་ཀྱང་ལྟ་བུ་ཞེས་དཔེར་བཀོད་པའི་དོན་ནོ། །དེ་ལ་རླུང་སེམས་ཙམ་ལས་རྡོ་རྗེ་འཆང་གི་སྐུར་སྐྱེད་པ་ན་ཡན་ལག་དང་ཉིང་ལག་ཚང་ཡང་རླུང་སེམས་ཙམ་ལས་མེད་པས་སྒྱུ་མའི་མི་ལྟ་བུའོ། །གར་ཡང་ཁྱབ་པ་ནི་ཆུ་ཟླ་ལྟ་བུའོ། །ཤ་རུས་ལ་སོགས་པ་དང་བྲལ་བས་མིག་ཡོར་ཏེ་མིའི་གྲིབ་མའི་ལུས་ལྟ་བུའོ། །སྐད་ཅིག་གིས་གཡོ་བ་ནི་སྨིག་རྒྱུ་ལྟ་བུའོ། །རླུང་སེམས་ཙམ་ལས་གྲུབ་པའི་ལུས་ཡིན་པ་ནི་རྨི་ལམ་དུ་ལུས་རགས་པ་ལས་ཟུར་དུ་བྱེ་པའི་རྨི་ལམ་གྱི་ལུས་ལྟ་བུའོ། །རྣམ་སྨིན་གྱི་ལུས་དང་རྒྱུད་གཅིག་ཏུ་གཏོགས་ཀྱང་གཞན་དུ་སྣང་བ་ནི་སྒྲ་བརྙན་ལྟ་བུའོ། །སྐུ་དེའི་རྟེན་དང་བརྟེན་པའི་དཀྱིལ་འཁོར་བ་ནི་དྲི་ཟའི་གྲོང་ཁྱེར་ལྟ་བུའོ། །གཅིག་ཡིན་ཀྱང་དུ་མར་སྣང་བ་ནི་མིག་འཕྲུལ་ལྟ་བུའོ། །སྐུའི་ཁ་དོག་རྣམ་པ་ལྔ་ཐགས་པ་མེད་ཅིང་མ་འདྲེས་པར་སྣང་བ་ནི་དབང་པོའི་གཞུ་འཇའ་ཚོན་ལྟ་བུའོ། །རྣམ་སྨིན་གྱི་ལུས་ཀྱི་ཕུང་པོའི་ནང་ན་གནས་པ་ནི་སྤྲིན་གྱི་གསེང་ན་གློག་འགྱུ་བ་ལྟ་བུའོ། །སྟོང་པའི་ངང་ནས་ཐོལ་གྱིས་བཞེངས་པ་ནི་ཤིན་ཏུ་དྭངས་པའི་ཆུ་ལས་ཆུ་བུར་རྡོལ་བ་ལྟ་བུའོ། །

---

^{[མ་དཔེ་གཟིགས་ན་འདིར་གནོན།]}

ཡན་ལག་དང་ཉིང་ལག་ཐམས་ཅད་ཅིག་ཅར་དུ་ཡོངས་སུ་རྫོགས་པ་ནི་མེ་ལོང་ལ་རྡོ་རྗེ་འཆང་གི་གཟུགས་བརྙན་ཤར་བ་ལྟ་བུའོ། །དེ་རྣམས་ནི་སླབ་པའི་སྒྱུ་མའི་སྐུ་མཚོན་ཚུལ་ཡིན་གྱི། །མི་སློབ་པའི་སྒྱུ་མའི་སྐུ་མཚོན་པ་ལ་སྦྱོར་བའི་ཚེ་དཔེ་དྲུག་པ་དང་བཅུ་པ་ནི་དེའི་སྐབས་དང་མཐུན་པར་སྦྱར་རོ། །དཔེ་ཐ་མ་འདི་ལ་རིམ་ལྔ་ལས། །མེ་ལོང་དྲི་མ་མེད་པ་ལས། དངོས་དང་དངོས8་མིན་ལས་གྲོལ་བའི། །རྡོ་རྗེ་སེམས་དཔའ་ལེགས་བྲིས་པ། རྣམ་པར་ཀུན་གྱི་མཆོག་ལྡན་ཞིང༌། སྐུ་ནི་ལྟ་བས་མི་ངོམས་པའི། །གཟུགས་བརྙན་གསལ་བར་སྣང་བ་ནི། སློབ་མ་བཟང་པོ་དེ་ལ་བསྟན། །དེ་ལ་རང་བྱིན་བརླབ་ཅེས་བཤད་ཅེས་གསུངས་པ་ལ་བརྟེན་ནས་རྡོ་རྗེ་འཆང་གི་བྲིས་སྐུ་མེ་ལོང་གི་ནང་དུ་ཤར་བ་ལ་བལྟས་བཞིན་པའི་དང་ནས་སྒྱུ་མའི་སྐུ་བསྒོམ་པར་འདོད་པ་སྣང་མོད་ཀྱང༌། དེ་ནི་སློབ་དཔོན་གྱིས་སློབ་མ་ལ་སྒྱུ་ལུས་འཆད་པའི་ཆེ། དེ་རྣམས་དཔེར་བཞག་ནས་སློབ་མ་ལ་ངག་གིས་བསྟན་པས་ཆོག་གི །དེ་ལྟར་བྱེད་མི་དགོས་ཏེ། །དེ་ལྟ་མ་ཡིན་ན་དཔེ་གཞན་རྣམས་ཀྱིས་སྒྱུ་ལུས་སྟོན་པ་ལ་ཡང་དེ་འདྲ་བ་རེ་བྱ་དགོས་པར་འགྱུར་རོ། །དེས་ན་སྒྱུ་ལུས་དཔེའི་སྒོ་ནས་འཆད་པ་ལ་རྒྱས་པར་ན་དཔེ་བཅུ་གཉིས། བསྡུས་ན་རིམ་ལྔར་གསུངས་པ་ལྟར་མེ་ལོང་གི་གཟུགས་བརྙན་ལ་སོགས་པའི་དཔེ་གསུམ་ཡིན་ནོ། །སྟོན་པ་ལ་དེ་ལྟར་ཡིན་གྱི། རྣལ་འབྱོར་པས་མཚོན་བྱེད་དཔེའི་སྒྱུ་ལུས་རྒྱུད་ལ་སྐྱེད་པ་ལ་ནི་རྨི་ལམ་གྱི་དཔེ་ཉིད་དེ་རྣམས་ཀྱི་

---

^{[མ་དཔེ་གཟིགས་ན་འདིར་གནོན།]}

མཆོག་ཡིན་ཏེ། རྨི་ལམ་གྱི་སྒྱུ་ལུས་ཀྱིས་དོན་གྱི་སྒྱུ་ལུས་མཚོན་ནུས་པ་འདྲ་བ་དཔེ་གཞན་ལ་མེད་པའི་ཕྱིར་རོ། །འདི་ལྟར་རྨི་ལམ་གྱི་ལུས་ཀྱི་སྔོན་དུ་གཉིད་ཀྱི་སྟོང་པ་གསུམ་འགྲོ་བར་སྤྱོད་བསྡུས་ལས་གསུངས་ལ། །དེས་ནི་མཚོན་བྱ་དོན་གྱི་སྒྱུ་ལུས་ཀྱི་སྔོན་དུ་སེམས་དབེན་གྱི་སྟོང་པ་གསུམ་འགྲོ་བ་ལེགས་པར་མཚོན་ནུས་ཏེ། དཔེ་གཞན་ལ་དེ་མེད་དོ། །དེས་ནི་གཉིད་ཀྱི་སྟོང་པ་བཞི་འཛིན་པ་སྔོན་དུ་བཏང་བའི་མཐར་རྨི་ལམ་གྱི་སྒྱུ་ལུས་སུ་ལྡང་བ་གོ་བས། གཉིད་དུ་སོང་ནས་རྨི་ལམ་མ་ཤར་ཚུན་ཆད་ཀྱི་གཉིད་ཀྱི་གདམས་དག་དང༌། རྨི་ལམ་གྱི་གདམས་དག་གི་གོ་རིམ་ལ་རྨད་དུ་བྱུང་བའི་ངེས་པ་རྙེད་དོ། །དེ་ནས་གཉིད་ཀྱི་སྟོང་པ་རྣམས་ཀྱི་མཐར་རླུང་སེམས་ཙམ་ལས་གྲུབ་པའི་རྨི་ལམ་གྱི་སྒྱུ་མའི་སྐུར་ལྡང་ནུས་པ་ཞེས་ལ། དེས་ནི་སེམས་དབེན་གྱི་སྟོང་པ་རྣམས་ཀྱི་མཐར་རླུང་སེམས་ཙམ་གྱི་སྒྱུ་མའི་སྐུར་ལྡང་བ་ལེགས་པར་མཚོན་ནུས་ཏེ། དེ་ཡང་དཔེ་གཞན་ལ་མེད་དོ། །དེ་ནས་དེའི་མཐར་རྨི་ལམ་གྱི་སྒྱུ་མ་ལོངས་སྐུ་སད་པའི་ཚེ་སྤྲུལ་སྐུར་བསྒྱུར་བ་ཤེས་ལ། དེས་ནི་དོན་གྱི་སྒྱུ་མ་ལོངས་སྐུས་སྤྲུལ་པའི་སྐུ་འཛིན་པ་ལེགས་པར་མཚོན་ནུས་ཏེ། དེ་ཡང་དཔེ་གཞན་ལ་མེད་དོ། །དེ་ལྟར་དཔེའི་རྨི་ལམ་གྱི་ཐོག་མཐའ་བར་གསུམ་གྱིས། །དོན་གྱི་སྒྱུ་ལུས་ཀྱི་ཐོག་མཐའ་བར་གསུམ་ལེགས་པར་མཚོན་ནུས་པའི་སྤྱོད་བསྡུས་ཀྱི་དགོངས་པ་འདི་ནི། གཉིད་དང་རྨི་ལམ་གྱི་གདམས་པ་རྣམས་ཀྱི་སྙིང་པོ་མཐར་ཐུག་པར་སྣང་ལ།

---

^{[མ་དཔེ་གཟིགས་ན་འདིར་གནོན།]}

འདི་ལེགས་པར་ཤེས་ན་སྒྱུ་ལུས་ཀྱི་སྐབས་སུ་གཉིད་དང་རྨི་ལམ་གྱི་གདམས་པ་རྣམས་འོང་བའི་རྒྱུ་མཚན་ཡང་དག་པར་ཤེས་པ་དང༌། བསྲེ་བ་རྣམས་ཀྱི་གནད་མཐར་ཐུག་པར་ཤེས་སོ། །སྤྱོད་བསྡུས་ཀྱི་གཞུང་ནས་འབྱུང་བའི་གཉིད་དང་རྨི་ལམ་གྱི་གདམས་པའི་གནད་མི་ཤེས་ན། གདམས་པ་དེ་དག་གི་གནད་མཐར་ཐུག་པ་རྣམས་མི་ཤེས་པས་གཟུགས་བརྙན་གྱིས་ཚིམ་པ་ཙམ་མོ། །འདི་དག་ཀྱང་འདིར་དཔེའི་སྐབས་སུ་བབ་སྣང་བས་མདོ་ཙམ་བརྗོད་ཀྱི། རྒྱས་པར་གཞན་དུ་བཤད་པར་བྱའོ། །སྤྱོད་བསྡུས་སུ་རྒྱུད་འདི་དྲངས་པའི་དཔེ་བཅུ་གཉིས་དང༌། འདིར་བཤད་པའི་བཅུ་གཉིས་མཐུན་ལ། བདག་བྱིན་བརླབས་ལས་གྲིབ་མ་ཞེས་པ་ནི་མིག་ཡོར་གྱི་དོན་ཡིན་ལ། མིག་འཕྲུལ་གྱི་དོད་ལ་སྤྲིན་འབྱུང་ངོ་། །དཔེས་དོན་མཚོན་ཚུལ་རིམ་ལྔའི་འགྲེལ་པ་དག་ལས་གཞན་དུ་བཤད་མོད་ཀྱང༌། བཤད་པ་སྔ་མ་ཉིད་འགྲིག་པར་མཐོང་ངོ་། །བཞི་པ་ལ་གསུམ། །འདོད་ཆགས་ཆོས་སྦས་མེད་ན་སྟོང་པ་གསུམ་དང་བདེ་བ་ཆེན་པོ་མི་རྙེད་པར་བསྟན་པ། བདེ་ཆེན་སྒྱུ་མའི་སྐུ་ལ་མོས་པ་ཙམ་གྱི་ཕན་ཡོན། འདོད་ཆགས་ཆོས་སྦས་ལ་བརྟེན་ནས་སྟོང་པ་གསུམ་མཚོན་ཏེ་བདེ་ཆེན་ལ་གནས་པའི་ཚུལ་ལོ། །དང་པོ་ནི། ཇི་ལྟར་ཏེ་དཔེར་ན་འོ་མ་སྲུབས་པ་ལས་མར་འབྱུང་བ་དེ་བཞིན་དུ། །པད་མར་རྡོ་རྗེ་སྲུབས་པ་ལས་རྡོ་རྗེའི་སྒྲས་བསྟན་པའི་ཐབས་ཀྱི་ཡེ་ཤེས་མཆེད་པ་ཉེ་བར་བརྟགས་པ་སྟེ་འབྱུང་བའི་ཕྱིར་དང༌།

---

^{[མ་དཔེ་གཟིགས་ན་འདིར་གནོན།]}

ཇི་ལྟར་ཏིལ་བཙིར་བ་ལས་ཏིལ་མར་འབྱུང་སྟེ་དེ་བཞིན་དུ་པད་མར་རྡོ་རྗེ་བཙིར་བ་ལས་པདྨའི་སྒྲས་བསྟན་པའི་ཤེས་རབ་ཀྱི་ཡེ་ཤེས་སྣང་བ་ཉེ་བར་བརྟགས་པ་སྟེ་འབྱུང་བའི་ཕྱིར་ན། རྡོ་རྗེ་དང་པདྨ་སྦྱོར་བ་ཡོད་ན་ཡེ་ཤེས་གཉིས་འབྱུང་བའི་རྗེས་སུ་འགྲོ་བ་གྲུབ་བོ། །དེས་ནི་ཐབས་ཤེས་སྦྱར་བའི་ཉེར་ཐོབ་ཀྱི་རྗེས་འགྲོ་ཡང་སྟོན་ཏོ། །ཇི་ལྟར་འོ་མ་དང་ཏིལ་དག་གིས་ཡང་དག་པའི་མངོན་པར་འདུ་བྱ་བ་སྲུབ་པ་དང་བཙིར་བ་མེད་པར། མར་དང་ཏིལ་མར་མི་འབྱུང་བ་དེ་བཞིན་དུ་སྙོམས་པར་འདུག་པའི་སྔོན་དུ་ཨཱཿདང་ཧཱུཾ་གི་སྔགས་ཀྱིས་ཕོ་མོའི་དབང་པོའི་རྟེན་གཉིས་རྡོ་རྗེ་དང་པད་མར་སྐྱེད་པ་སོགས་དང༌། ལྷ་ཡབ་ཡུམ་དུ་དམིགས་པའི་སེམས་ཀྱི་ཕྱག་རྒྱས་མངོན་པར་འདུས་བྱས་པའི་རྡོ་རྗེ་དང་པདྨ་མཉམ་པར་སྦྱར་བ་མེད་པར། རྣམ་པར་ཤེས་པ་སྟོང་པ་གསུམ་ཉེ་བར་མཚོན་པར་མི་ནུས་སོ། །ཞེས་པས་ནི་དབང་པོ་གཉིས་སྦྱོར་བ་ལོག་ན་ཡེ་ཤེས་གསུམ་སྐྱེ་བ་ལྡོག་པའི་ལྡོག་པ་བསྟན་ཏོ། །ཐ་མར་འཆི་བ་ལ་སོགས་པའི་སྐབས་སུ་དབང་པོ་གཉིས་མཉམ་པར་སྦྱར་བ་མེད་ཀྱང་དེའི་རྒྱུད་ལ་སྣང་མཆེད་ཐོབ་གསུམ་སྐྱེ་བས། རྗེས་སུ་འགྲོ་ལྡོག་ནི་ལམ་གྱི་སྐབས་ལ་དགོངས་ལ། དེ་ཡང་ལྟེ་བ་ལ་སོགས་པའི་རྩ་འཁོར་གྱི་དབུས་སུ་དམིགས་པ་གཏོད་པ་ལ་སོགས་པའི་ལུས་ལ་གནད་དུ་བསྣུན་པའི་རྣལ་འབྱོར་གྱིས་རླུང་ཨ་བ་དྷཱུ་ཏཱིར་བཙུད་པ་ལས་སྟོང་པ་བཞི་སྤྱི་ཙམ་པ་དང༌། སྙིང་ཁར་མི་ཤིགས་པ་

---

^{[མ་དཔེ་གཟིགས་ན་འདིར་གནོན།]}

སྒོམ་པ་དང༌། དེ་ལ་དམིགས་ནས་རྡོར་བཟླས་བྱས་པ་ལས་སྟོང་པ་བཞི་ཁྱད་པར་ཅན་སྐྱེ་བ་ཕྱག་རྒྱ་ལ་མ་ལྟོས་པར་འབྱུང་བ་ཡང་ཡོད་པས། །འདིར་ཕྱག་རྒྱ་དང་སྟོང་པ་གསུམ་རྗེས་སུ་འགྲོ་ལྡོག་ངེས་པར་གསུངས་པ་ནི། སྒྱུ་མའི་སྐུ་སྒྲུབ་ནུས་པའི་སེམས་དབེན་གྱི་སྟོང་པ་གསུམ་རྫོགས་པར་སྐྱེ་བ་ཕྱག་རྒྱ་ལ་ངེས་པར་ལྟོས་པ་ལ་དགོངས་པ་ཡིན་ཏེ། དེ་མེད་ན་སེམས་དབེན་གྱི་མཚན་ཉིད་འགའ་ཞིག་ཚང་བའི་ཡེ་ཤེས་གསུམ་སྐྱེ་ཡང༌། མཚན་ཉིད་རྫོགས་པ་མི་སྐྱེ་བའི་ཕྱིར་རོ། །དེ་ལ་དགོངས་ནས་རིམ་ལྔ་ལས་ཀྱང༌། གང་ཞིག་ཆུ་སྐྱེས་རྡོ་རྗེས་སྦྱོར། །ཀུན་རྫོབ་ཏུ་ཡང་མེད་གྱུར་ན། །ལན་ཅིག་ཙམ་ཞིག་མྱོང་ནས་ཀྱང༌། རྣལ་འབྱོར་སྟོབས་ཀྱིས་འགྲུབ་པར་འགྱུར། །ཞེས་གསུངས་སོ། །གང་ཤེས་རབ་ཀྱི་བྷ་ག་དང་ཐབས་ཀྱི་ལིང་ག་ཡང་དག་པར་སྤྱོར་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་སྒྱུ་མའི་སྐུ་མི་རྙེད་དོ། །འདིས་ནི་དབང་པོ་གཉིས་སྦྱོར་བ་ལོག་ན་སྒྱུ་ལུས་ལྡོག་པའིལྡོག་པ་བསྟན་ལ། འོག་ནས་རྗེས་འགྲོ་སྟོན་ནོ། །སྔ་མས་ནི་དབང་པོ་གཉིས་སྦྱོར་དང་སེམས་དབེན་གཉིས་ཀྱི་རྗེས་སུ་འགྲོ་ལྡོག་བསྟན་ནོ། །སྒྱུ་ལུས་དང་སེམས་དབེན་གྱི་སྟོང་པ་གསུམ་རྒྱུ་འབྲས་ཡིན་པས་རྗེས་སུ་འགྲོ་ལྡོག་ངེས་ལ། སེམས་དབེན་དང་དབང་པོ་གཉིས་སྦྱོར་གཉིས་རྗེས་སུ་འགྲོ་ལྡོག་ངེས་པས་ན། སྒྱུ་ལུས་དང་ཡང་རྗེས་སུ་འགྲོ་ལྡོག་ངེས་པར་འགྱུར་རོ། །ཚུལ་དེ་རྣམས་ནི་ནང་གི་སྲོག་རྩོལ་རྡོ་རྗེ་བཟླས་པ་སོགས་དང་སེམས་དབེན་དང༌། སྒྱུ་མའི་

---

^{[མ་དཔེ་གཟིགས་ན་འདིར་གནོན།]}

ལུས་ཀྱིའང་རྗེས་སུ་འགྲོ་ལྡོག་ལ་སྦྱར་བར་བྱའོ། །འདོད་ཡོན་ལམ་བྱེད་ཀྱི་གཙོ་བོ་འདི་སྒྱུར་མའི་སྐུ་སྒྲུབ་པའི་ཆེད་དུ་གསུངས་པ་འདིས་ནི། ཕྱིའི་ཕྱག་རྒྱ་ལ་བརྟེན་པ་དང༌། ནང་གི་ལུས་ལ་གནད་དུ་བསྣུན་པའི་ཐབས་གཞན་ཐམས་ཅད་ཀྱང་མཐར་རླུང་སེམས་ཙམ་ལས་སྒྱུ་མའི་སྐུ་སྒྲུབ་པའི་ཆེད་དུ་བསྟན་པ་ཡིན་པས། སྐྱེ་འཆི་བར་དོ་གསུམ་སྐུ་གསུམ་དུ་འཆར་བའི་ལམ་འཁྱེར་འཕགས་པ་ཡབ་སྲས་ཀྱིས་བཤད་པ་འདི་ཉིད། ཐབས་དང་ཤེས་རབ་ཀྱི་རྒྱུད་གཉིད་ཀའི་མན་ངག་གི་གནད་མཐར་ཐུག་པར་གཟུང་བར་བྱའོ། །གཉིས་པ་ནི། ཐེག་པ་འདིའི་ལམ་གཞན་ཚང་བ་མི་དགོས་ཀྱི། སྒྱུ་ལུས་བདེ་བ་ཆེན་པོའི་ཏིང་ངེ་འཛིན་འབའ་ཞིག་སྟེ་གཅིག་པུ་ལ། དེ་མངོན་དུ་བྱས་པ་མི་དགོས་ཀྱི་ལེགས་པར་ཤེས་ནས་ལྷག་པར་མོས་པ་ཙམ་གྱིས་ཀྱང་ལས་དང་པོ་པའི་ས་བསྐྱེད་རིམ་མཐར་ཕྱིན་པ་ལ་གནས་པ་དང་འདྲ་བའི་ཕན་ཡོན་འཐོབ་པར་འགྱུར་ཏེ། དེར་མ་ཟད་ཐེག་པ་འདི་ལས་ཕྱིར་མི་ལྡོག་པ་སྟེ་ལམ་འདིར་རིགས་ངེས་པའི་ས་ལ་ཡང་སློབ་བཞིན་པར་འགྱུར་རོ། །ཕན་ཡོན་འདི་ལྟ་བུ་མཐོང་བའི་བློ་གྲོས་ཅན་གྱིས་ནི་ཕྱི་དང་ནང་གི་ལུས་ལ་གནད་དུ་བསྣུན་པའི་ཐབས་ལ་མཁས་པས་དྲངས་པའི་བདེ་བ་ཆེན་པོས། བདག་མེད་པའི་དོན་ཕུ་ཐག་ཆོད་པའི་ལྟ་བའི་ཡུལ་སྒོམ་པའི་བདེ་སྟོང་དབྱེར་མེད་ཀྱི་ཡེ་ཤེས་གསུམ་སྐྱེད་པ་དང་སྔར་བཤད་པ་ལྟར་རྡོ་རྗེའི་སྐུ་གང་ལས་སྒྲུབ་

---

^{[མ་དཔེ་གཟིགས་ན་འདིར་གནོན།]}

པའི་གཞི་གཉུག་མའི་ལུས་རླུང་སེམས་ཙམ་དུ་ཟད་པའི་ཆུལ་ལ་ངེས་པ་བརྟན་པོ་རྙེད་ནས། སྟོང་པ་རྣམས་ཀྱི་རླུང་སེམས་ཙམ་ལས་སྒྱུ་མའི་སྐུ་འགྲུབ་པའི་ཚུལ་ལ་ཡང་དང་ཡང་དུ་ཤིན་ཏུ་ངོ་མཚར་བའི་བསམ་པས་མོས་པ་བརྟན་པོ་བསྐྱེད་པར་བྱའོ། །གསུམ་པ་ནི། གང་རྡོ་རྗེ་དང་པདྨ་མཉམ་པར་སྦྱོར་བའི་བདེ་བས་རང་བཞིན་གྱི་སྣང་བ་གསུམ་ཡང་དག་པ་སྟེ་ཕྱིར་ཅི་མ་ལོག་པར་ཉེ་བར་མཚོན་པར་བྱེད་པ་དེ་ནི། བདེ་བ་ཆེན་པོ་སྒྱུ་མའི་སྐུའི་གོ་འཕང་ལ་རབ་ཏུ་གནས་པར་འགྱུར་རོ། །ཞེས་པ་འདིས་ནི་དབང་པོ་གཉིས་སྦྱར་བ་ཡོད་ན་སྒྱུ་ལུས་འབྱུང་བའི་རྗེས་འགྲོ་སྟོན་ཏོ། །སྔར་བཤད་པ་འདི་དག་གི་གནད་ཤེས་ན། ལམ་འདིར་ཞུགས་པས་དང་པོ་ཉིད་ནས་འདོད་ལྷ་ཡབ་ཡུམ་གྱི་རྣམ་པ་ཅན་དུ་སྒོམ་པ་སོགས་ཀྱི་གནད་རྣམས་ཤེས་ཤིང་སྟོང་ཉིད་ལ་སེམས་རྩེ་གཅིག་ཏུ་གནས་པར་བྱས་པའི་མཐུས་རླུང་ལས་སུ་རུང་བ་ཙམ་ལས་སྐྱེས་པའི་བདེ་བ་དང༌། ལུས་ཀྱི་རྩ་འཁོར་གྱི་གནད་དུ་བསྣུན་པ་དང་བྲལ་བའི་རླུང་འགྲོ་འོང་སྒོམ་པར་བཤད་པ་དང༌། ལུས་ཀྱི་རྩ་འཁོར་གྱི་གནད་དུ་བསྣུན་པ་མེད་པའི་རླུང་ཕྱི་རོལ་ཏུ་འགྲོ་བ་བཀག་ནས་བསྒོམས་པས་དྲངས་པའི་བདེ་བ་ཆེར་སྐྱེས་པ་དང་སྟོང་པ་གཉིས་སྦྱར་བའི་བདེ་སྟོང་སྟོམ་པ་རྣམས་རྣལ་འབྱོར་བླ་མེད་ཀྱི་རྫོགས་རིམ་ཡིན་ནོ་སྙམ་དུ་འཛིན་པ་རྣམས་ལྷག་མ་མེད་པར་ལྡོག་པར་འགྱུར་བས་དོན་ཤིན་དུ་ཆེའོ། །གཉིས་པ་ནི། དེ་ལྟར་སྔར་བཤད་པའི་སྣང་བ་སེམས་གསུམ་གྱི་སྦས་པ་དང༌། འདོད་ཆགས་

---

^{[མ་དཔེ་གཟིགས་ན་འདིར་གནོན།]}

ཆོས་ཀྱི་སྦས་པ་དང༌། ཀུན་རྫོབ་སྒྱུ་མའི་སྦས་པ་གསུམ་བཤད་པ་འདི་ནི། ཚུལ་བཞིའི་ནང་ནས་སྦས་པའི་དོན་གྱི་བཤད་པའོ། །དེ་ལྟར་ཡང་སྒྲོན་གསལ་ལས། འདོད་ཆགས་ཆོས་ནི་རབ་སྟོན་དང༌། །ཀུན་རྫོབ་བདེན་པ་རྟོགས་པ་དང༌། །ཡེ་ཤེས་གསུམ་པོ་རྣམ་བརྟག་པའི། །སྙིང་པོ་ཡོད་པས་སྦས་པའོ། །ཞེས་སོ། །ཆག་འགྱུར་ལས། ཀུན་རྫོབ་བདེན་པ་བསྟན་པ་དང༌། ཞེས་འབྱུང་ངོ་། །སྦས་པའི་སྐད་དོད་ནི་སྙིང་པོ་ཅན་ལ་ཡང་འགྲོ་བས། སྙིང་པོ་ཡོད་པས་སྦས་པའོ། །ཞེས་བསྒྱུར་མོད་ཀྱང༌། སྦས་པའི་སྒྲ་དོན་ནི་གསངས་པའི་དོན་ཡིན་པས། དངོས་སུ་མི་གསལ་བར་ཁོང་ན་ཡོད་པ་ལ་སྙིང་པོ་ཡོད་པ་ཞེས་བྱས་སོ། །དེས་ན་སྦས་བཤད་ཀྱི་སྦས་པ་ཐམས་ཅད་པ་ཆབ་ཀྱིས་སྙིང་པོ་ཅན་དུ་བསྒྱུར་བ་འགྱུར་མི་ལེགས་སོ། །ཁོང་ན་སྙིང་པོའི་ཚུལ་དུ་ཡོད་རྒྱུ་ནི་འདོད་ཆགས་ཀྱི་ཆོས་ལ་སོགས་པ་གསུམ་པོ་ཉིད་ཡིན་པས། དེ་དག་གི་སྙིང་པོ་གཞན་གསུམ་འཆད་པ་དོན་དུ་མ་མཐོང་ངོ་། །གསུམ་པོ་དེ་ཙམ་ཞིག་སྦས་དོན་དུ་གསུངས་པ་ནི་གཙོ་བོ་ལ་དགོངས་ཀྱི། དེ་ཙམ་དུ་མ་ངེས་ཏེ། སྒྲོན་གསལ་ལས་གསང་བ་གསུམ་ཚུལ་བཞིར་བཤད་པའི་སྐབས་སུ་འཇུག་གནས་ལྡང་བ་གསུམ་སྦས་པར་བཤད་པས། རྡོ་རྗེ་བཟླས་པ་སྦས་དོན་དུ་གསུངས་པ་ཡེ་ཤེས་གསུམ་གྱི་སྦས་པའི་ཁོངས་སུ་སྡུད་དགོས་པ་བཞིན་ནོ། །དེས་ན་ལུས་དབེན་ཀྱང་སྦས་པ་དེའི་ཁོངས་སུ་བསྡུའོ། །གཉིས་པ་

---

^{[མ་དཔེ་གཟིགས་ན་འདིར་གནོན།]}

ལ་གཉིས། ཞུ་བ། ལན་ནོ། །དང་པོ་ནི། སྦས་དོན་གསུངས་པའི་འོག་ཏུ་བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་བ་ནི། བཅོམ་ལྡན་འདས་ཞེས་པོས་ནས། ཚུལ་བཞིའི་སྤྱི་དོན་གྱི་བཤད་པ་ཇི་ལྟར་ལགས་ཞེས་པའོ། །གཉིས་པ་ནི། བཅོམ་ལྡན་འདས་ཀྱིས་ལན་བཀའ་སྩལ་བ་ནི། ཉན་ཐོས་ལ་སོགས་པ་དབང་པོ་གཉིས་སྦྱོར་གྱི་ཆགས་པ་ལམ་དུ་བྱེད་པའི་འདོད་ཆགས་དང་བྲལ་བའི་ཆོས་སྤྱོད་པ། རྣམ་པར་རྟོག་པའི་བག་ཆགས་ལས་མ་གྲོལ་བ་སྟེ་ཉོན་མོངས་པའི་བག་ཆགས་གཉིས་སྦྱོར་གྱི་ཆགས་པ་ལམ་བྱེད་ཀྱི་ཐབས་མཁས་ཀྱི་སྦྱོང་བར་མི་ནུས་པ་རྣམས་ཀྱིས། རྣལ་འབྱོར་བླ་ན་མེད་པ་ཆེན་པོའི་རྒྱུད་དག་ཏུ་བཙུན་མོའི་བྷ་ག་ལ་བཞུགས་ཞེས་པ་དང༌། སོགས་ཀྱི་སྒྲས་བསྡུས་པ་སྔར་བཤད་པ་ལྟར་དབང་པོ་གཉིས་མཉམ་པར་སྦྱོར་བ་མེད་ན་བདེ་བ་ཆེན་པོ་མི་རྙེད་པར་གསུངས་པ་ལ་སོགས་པ། འདོད་ཆགས་ཀྱི་ཀུན་སྤྱོད་ཀྱི་ཆོས་གསལ་བར་བྱེད་པ་ངོ་མཚར་ཅན་གྱི་རྡོ་རྗེའི་ཚིག་ཐོས་ན། །འདི་ནི་བཀའ་མ་ཡིན་ནོ་ཞེས་སྨོད་པར་བྱེད་པ་དེ་དག་དང་མི་འགལ་བར་ཐུན་མོང་དུ་གྲགས་པའི་སྒོ་ནས་དེ་དག་གི་དོན་བཤད་པ་ནི། སྤྱིའི་དོན་དུ་བཤད་པར་གསུངས་པའོ། །དེ་ནི་སྒྲོན་གསལ་ལས་རྡོ་རྗེ་བཙུན་མོ་ཤེས་རབ་དང༌། དེས་ཉོན་མོངས་འཇོམས་པ་བྷ་གར་བཤད་པ་ལྟ་བུའོ། །འདི་ཡིག་དོན་དུ་གསུངས་ཀྱང་སྤྱི་དོན་དུ་མི་འགལ་ལ། འདི་འདྲ་བ་ནི་ཆགས་བྲལ་གྱི་ལམ་པའི་སྨོད་ཚིག་སྤོང་བ་ཙམ་གྱི་དོན་ཡིན་གྱི། རང་གི་ལམ་ལ་

---

^{[མ་དཔེ་གཟིགས་ན་འདིར་གནོན།]}

སློབ་པ་ལ་དེ་མི་དགོས་སོ་སྙམ་དུ་མི་གཟུང་ངོ་། །དེ་གང་ཟག་གང་དང་ཐུན་མོང་དུ་གྱུར་པས་སྤྱོ་དོན་དུ་བཞག་པ་ནི། གཙོ་བོར་མཚན་ཉིད་ཀྱི་ཐེག་པ་པ་ཡིན་མོད་ཀྱང༌། རྒྱུད་སྡེ་འོག་མའི་གདུལ་བྱས་ཀྱང་དེ་ལ་སྨོད་པ་བཟློག་པའི་ཕྱིར་དུ་དེ་དག་དང་ཐུན་མོང་པ་ཡང་ཡོད་དེ། གཞན་ཡང་རྡོ་རྗེ་འཆང་གིས་གསུངས་པའི་བྱང་ཆུབ་ཀྱི་སེམས་ཀྱི་གཞུང་སྤྱི་དོན་དུ་བཤད་པས་རྣམ་ཐར་གསུམ་སྟོན་པ་ལྟ་བུ་ནི་ཐེག་པ་གཞན་དང་རྒྱུད་སྡེ་འོག་མ་པ་གཉིས་ཀ་དང་ཐུན་མོང་བའོ། །དེ་བཞིན་དུ་སྐྱབས་སུ་འགྲོ་བ་དང་སྨོན་འཇུག་གི་བྱང་ཆུབ་ཀྱི་སེམས་ཐུན་མོང་བ་ལ་སོགས་པ་མང་སྟེ། དེ་རྣམས་ཀྱང་རང་གི་ལམ་ལ་སློབ་པ་ལ་དགོས་པའི་སྒོ་ནས་བཤད་པའོ། །བསྐྱེད་རིམ་རྣམས་སྤྱི་དོན་དུ་གསུངས་པ་ལ་ཁ་ཅིག་རྒྱུད་སྡེ་འོག་མ་གསུམ་དང་ཐུན་མོང་བ་ཡིན་པས་སྤྱི་དོན་ཡིན་ཞེས་ཟེར་ལ། གཞན་དག་སྤྱི་དོན་དུ་བཤད་པའི་བསྐྱེད་རིམ་གྱི་ཆ་ཤས་རྣམས་བསྐྱེད་རིམ་པ་ལ་ཡོང་པས། བསྐྱེད་རིམ་དང་ལྡན་པ་ཡིན་གྱི། དངོས་གྲུབ་རྣམས་ཀྱིའམ་སྔགས་པ་རིགས་གཉིས་ཀྱི་སྤྱི་ནི་མིན་ནོ་ཞེས་ཟེར་རོ། །དེ་ལ་བླ་མེད་ཀྱི་བསྐྱེད་རིམ་ལྷ་ཡབ་ཡུམ་ཞལ་སྦྱོར་དུ་གནས་པ་དང༌། ལྷ་མངལ་ནས་སྐྱེད་པ་ལྟ་བུ་ནི་རྒྱུད་སྡེ་འོག་མ་པ་དང་ཐུན་མོང་བ་མིན་ནོ། །བླ་མེད་ཀྱི་བསྐྱེད་རིམ་ཕལ་མོ་ཆེ་སྲིད་པ་སྐྱེ་འཆི་བར་དོའི་རིམ་པ་ལྟར་སྐྱེད་པ་ཡིན་ལ། སྐྱེད་ཆོག་དེ་ཡང་རྒྱུད་སྡེ་འོག་མ་ལ་མེད་དོ། །དེས་ན་བསྐྱེད་རིམ་གྱི་གཙོ་བོ་རྣམས་ཐུན་མོང་བ་མིན་

---

^{[མ་དཔེ་གཟིགས་ན་འདིར་གནོན།]}

ཀྱང༌། དེའི་སྐབས་སུ་གསུངས་པའི་སྐྱེད་ཆོག་ཐུན་མོང་བ་ནི་མང་དུ་ཡོད་པས་དེ་རྣམས་རྒྱུད་སྡེ་འོག་མ་པ་ལ་ལྟོས་ནས་སྤྱི་དོན་དུ་འཆད་ན་རུང་ངོ་། །འདིར་སྤྱི་ཞེས་པའི་ཐུན་མོང་བ་ནི་ཐེག་པ་གཉིས་སམ། །རྒྱུད་སྡེ་མཆོག་དམན་ནམ། དངོས་གྲུབ་གཉིས་སྒྲུབ་པའི་གང་ཟག་གཉིས་ལ་ལྟོས་ནས་གཞག་དགོས་ལ། དེ་ལྟར་བྱས་ན་བསྐྱེད་རིམ་ནི་གཙོ་བོར་ཕྱི་མའི་དབང་དུ་བྱས་ནས་སྤྱི་དོན་དུ་འགྱུར་རོ། །བླ་མེད་ཀྱི་བསྐྱེད་རིམ་གྱིས་རྫོགས་རིམ་གྱི་རྟོགས་པ་ཡོངས་སུ་རྫོགས་པ་སྐྱེ་བའི་རྒྱུད་སྨིན་པར་བྱེད་ནུས་པ་བཞིན་དུ། རྒྱུད་སྡེ་འོག་མའི་ལྷའི་རྣལ་འབྱོར་རྣམས་ཀྱིས་མི་ནུས་པས་བསྐྱེད་རིམ་ལ་ཡང་དེ་དག་ལ་ལྟོས་ནས་ཁྱད་པར་ཤིན་ཏུ་ཆེ་བ་ཡོད་དོ། །འདིར་སྤྱི་དོན་ཚུལ་གཅིག་ལས་མ་གསུངས་ཀྱང༌། སྒྲོན་གསལ་ལས་ཚུལ་གཉིས་གསུངས་ཏེ། མདོ་སོགས་ལ་ནི་རབ་ཞུགས་པའི། །འགྱོད་པ་ཟློག་པར་བྱེད་ཕྱིར་དང༌། བསྐྱེད་པའི་རིམ་དང་ལྡན་པ་དག །སྤྱི་ཡི་དོན་ནི་ཡིན་པར་གསུངས། ཞེས་གསུངས་པས་རྒྱུད་རྒྱས་པ་ན་དེ་ལྟར་བཞུགས་པར་གསལ་ལོ། །གསུམ་པ་ལ་གཉིས། དངོས་ཀྱི་དོན། དེ་མཐར་ཐུག་ཏུ་བསྟན་པའོ། །དང་པོ་ལ་གཉིས། །ཞུ་བ། ལན་ནོ། །དང་པ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་ཞེས་བོས་ནས། དབང་པོ་གཉིས་སྦྱོར་གྱི་འདོད་ཆགས་ཀྱི་ཆོས་སྤྱོད་པའི་ཆོས་ཀྱི་ཚུལ་དུ་ཚུལ་བཞིའི་མཐར་ཐུག་པར་བཤད་པ་ཇི་ལྟར་ལགས་ཞེས་ཞུས་སོ། །གཉིས་པ་ལ་གཉིས། མདོར་བསྟན་པ། རྒྱས་པར་བཤད་

---

^{[མ་དཔེ་གཟིགས་ན་འདིར་གནོན།]}

པའོ། །དང་པོ་ནི། ཞུས་པའི་རྗེས་དེ་ནས་བཅོམ་ལྡན་འདས་ཀྱིས་དེའི་ལན་བཀའ་སྩལ་པ། བྱང་ཆུབ་སེམས་དཔའ་རྣམས་ལ་ལེགས་སོ་ཞེས་བྱ་བ་བྱིན་ཏེ། བྱིན་ཚུལ་ནི། ཞུ་བ་དེ་ལེགས་སོ་ལེགས་སོ་ཞེས་སྤྲོ་བ་སྐྱེད་པའི་དོན་དུ་ལན་གཉིས་སུ་བསྐྱང་ནས། བྱང་ཆུབ་སེམས་དཔའ་ཆེན་པོ་སྙིང་རྗེ་་གསུམ་གྱི་ནང་ནས་མཆོག་དམིགས་པ་མེད་པའི་སྙིང་རྗེ་དང་ལྡན་པ་རྣམས་ཉོན་ཅིག །ཅེས་ཉན་པར་བསྐུལ་ལོ། །མཐའ་ཞེས་པ་ནི་མུའི་ཚིག་སྟེ་མཐར་ཐུག་པ་ནི་མུར་ཐུག་པའི་དོན་ནོ། །མཐར་ཐུག་པ་དེ་ལ་ནི་གཉིས་ཡོད་དེ། འོད་གསལ་བ་ཞེས་བྱ་བ་དང་ཡང་དག་པའི་ཚུལ་ཞེས་བྱ་བ་ཟུང་འཇུག་གོ །ཡང་དག་པའི་ཚུལ་ཞེས་པ་ཟུང་འཇུག་ཡིན་པར་འདིར་མ་བཤད་ཀྱང༌། སྒྲོན་གསལ་ལས་མཐར་ཐུག་ལ་འོད་གསལ་དང་ཟུང་འཇུག་གཉིས་བཤད་པས་ཤེས་ལ། སྤྱོད་བསྡུས་ལས་ཀྱང༌། ཡང་དག་པའི་ཚུལ་གྱི་བདག་ཉིད་ཅན་གྱི་ཏིང་ངེ་འཛིན་ཞེས་བྱ་བ་དེ་གང་ལགས། སྨྲས་པ་གང་བདེན་པ་གཉིས་གཉིས་སུ་མེད་པའི་རྣམ་བའི་མཚན་ཉིད་ཅན་དེ་ནི། ཡང་དག་པའི་ཚུལ་གྱི་བདག་ཉིད་ཅན་གྱི་ཏིང་ངེ་འཛིན་ཞེས་བྱ་བ་དེ་གང་ལགས། སྨྲས་པ་གང་བདེན་པ་གཉིས་གཉིས་སུ་མེད་པའི་རྣམ་བའི་མཚན་ཉིད་ཅན་དེ་ནི། ཡང་དག་པའི་ཚུལ་གྱི་བདག་ཉིད་ཅན་གྱི་ཏིང་ངེ་འཛིན་ཏེ། ཞེས་གསལ་བར་གསུངས་སོ། །གཉིས་པ་ལ་གསུམ། །མཐར་ཐུག་ཐོབ་པའི་ཐབས་ཀྱི་ཞུས་ལམ། སྟོང་པ་གསུམ་འོད་གསལ་གྱི་མཐར་འགྱུར་བའི་ཞུས་ལན། རྒྱས་བཤད་ཀྱི་སྐབས་འདིར་ཟུང་འཇུག་མ་བཤད་པའི་རྒྱུ་མཚན་ནོ། །དང་པོ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་ཞེས་བོས་

---

^{[མ་དཔེ་གཟིགས་ན་འདིར་གནོན།]}

ནས་ཐབས་གང་གིས་མཐར་ཐུག་པ་ཐོབ་པ་ལགས། ཞེས་ཞུས་སོ། །བཅོམ་ལྡན་འདས་ཀྱིས་དེའི་ལན་བཀའ་སྩལ་པ། །གཟུགས་ལ་སོགས་པའི་ཕུང་པོ་བཞི་དང་འབྱུང་བཞིའི་ཁམས་བཞི་དང༌། མིག་ལ་སོགས་པའི་སྐྱེ་མཆེད་བཞི་དང༌། སོགས་ཀྱི་སྒྲས་བསྡུས་པ་རྒྱུད་ཀྱིས་བསྡུས་པའི་ཡུལ་བཞི་དང༌། གཞི་དུས་ཀྱི་མེ་ལོང་ལྟ་བུ་ལ་སོགས་པའི་ཡེ་ཤེས་བཞི་སྟེ། རགས་པ་ཉི་ཤུ་ཐིམ་པར་རྣམ་གཞག་ལས་རྡོ་རྗེ་ཕྲེང་བའི་དོན་བཤད་པ་དང༌། མ་བཤད་པའི་དབང་པོ་དང་ཡུལ་གྱི་ལྷག་མ་ཐིམ་པའི་མཐར་སྣང་བ་གསུམ་མངོན་དུ་འགྱུར་བ་ཡིན་པས། དེ་རྣམས་ཀྱི་མཐའ་ནི་སྟོང་པ་གསུམ་མོ་ཞེས་གསུངས་སོ། །སྟོང་པ་གསུམ་སྔ་མ་ཕྱི་མ་ལ་ཐིམ་པའི་མཐར་འོད་གསལ་མངོན་དུ་འགྱུར་བས་སྟོང་པ་གསུམ་གྱི་མཐའ་འོད་གསལ་ལོ་ཞེས་གསུངས་སོ། །གཉིས་པ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་སྟོང་པ་གསུམ་འོད་གསལ་བའི་མཐར་འགྱུར་བའི་ཡུན་ཇི་ལྟར་ལགས། ཞེས་ཞུས་པ་ན། བཅོམ་ལྡན་འདས་ཀྱིས་དེའི་ལན་བཀའ་སྩལ་པ། ཇི་ལྟར་ཏེ་དཔེར་ན་མེས་ཤིང་བསྲེགས་ཏེ་ཐལ་བར་འགྱུར་བ་ལ་དུས་རིང་པོ་ཐོགས་པ་དེ་བཞིན་དུ། སྟོང་པ་དང་པོ་ཤེས་རབ་ཀྱི་ཡེ་ཤེས་ཐོབ་ནས་འོད་གསལ་བར་འཇུག་པ་ལ། ཡེ་ཤེས་དེ་ཡུན་རིང་པོས་རྣམ་པར་སྦྱོང་བར་བྱེད་དགོས་སོ། །ཇི་ལྟར་ཏ་ལའི་ལོ་མ་ཐལ་བར་བྱེད་པ་སྔ་མ་བས་ཡུན་ཐུང་བ་དེ་བཞིན་དུ། །སྟོང་གཉིས་པ་ཐབས་ཀྱི་ཡེ་

---

^{[མ་དཔེ་གཟིགས་ན་འདིར་གནོན།]}

ཤེས་ཐོབ་ནས་འོད་གསལ་དུ་འཇུག་པ་ལ། ཡེ་ཤེས་དེ་སྔ་མ་ལ་ལྟོས་ན་དེ་བས་ཡུན་ཐུང་བར་རྣམ་པར་སྦྱོང་བར་བྱེད་དོ། །ཇི་ལྟར་རས་བལ་གྱི་འདབ་མ་བསྲེགས་པས་ཐལ་བར་འགྱུར་བ་ལ་ཡུན་ཐུང་དུས་ཆོག་པ་དེ་བཞིན་དུ། སྟོང་པ་གསུམ་པ་སྣང་བ་ཉེ་བར་ཐོབ་པའི་ཡེ་ཤེས་ཐོབ་ནས་འོད་གསལ་དུ་འཇུག་པ་ལ། ཡེ་ཤེས་དེ་མཆོག་ཏུ་སྟེ་ཤིན་ཏུ་མྱུར་བར་རྣམ་པར་སྦྱོང་བར་བྱེད་དོ། །དུས་ཀྱི་རིམ་པ་སྔར་བཤད་པ་དེ་ལྟར་ཡིན་པ་དེ་བས་ན། ཤིང་དང་ཏ་ལའི་ལོ་མ་དང་རས་བལ་གྱི་འདབ་མ་ཐལ་བར་འགྱུར་བའི་ཡུན་རིང་ཐུང་དེ་བཞིན་དུ། །སྟོང་པ་དང་ཤིན་ཏུ་སྟོང་པ་དང་སྟོང་པ་ཆེན་པོ་རྣམས་སྦྱངས་ནས་མཐར་འོད་གསལ་བར་འགྱུར་བའི་རིམ་པ་ཤེས་པར་བྱའོ། །ཞེས་འཇུག་བསྡུས་སོ། །སྔར་སྟོང་པ་བཞིའི་ལུགས་ལྡོག་གི་རིམ་པ་ལས་མ་བཤད་ཀྱང༌། འདིར་ལུགས་འབྱུང་གི་རིམ་པ་བཤད་ལ། ཐམས་ཅད་སྟོང་པའི་ངོས་འཛིན་སྟོང་པ་གཞན་གསུམ་བཞིན་གསལ་བར་མ་གསུངས་ཀྱང༌། སྟོང་པ་གསུམ་སྤྲིན་མེད་པའི་ནམ་མཁའ་ལ་ཉིད་འོད་དང༌། །ཟླ་འོད་དང༌། མཚམས་ཀྱི་སྨག་གིས་ཁྱབ་པ་བཞིན་དུ་འཆར་བར་གསུངས་པའི་ཤུགས་ཀྱིས་ནམ་མཁའི་རང་མདོག་ཇི་བཞིན་དུ་མི་ཐོན་པའི་རྒྱུ་གསུམ་པོ་དེ་དང་བྲལ་བའི་ཐོ་རངས་ཀྱི་དུས་ཀྱི་ནམ་མཁའ་གཡའ་དག་བཞིན་དུ་ཐམས་ཅད་སྟོང་པ་འཆར་བར་གོ་ནུས་སོ། །སྣང་བ་གསུམ་གྱི་ཆོས་ཉིད་གསུམ་ཀྱང་སྟོང་པ་གསུམ་དུ་བཞག་པས་ཆོག་མོད་ཀྱང༌།

---

^{[མ་དཔེ་གཟིགས་ན་འདིར་གནོན།]}

རྣམ་རྟོག་ཚན་གསུམ་གྱི་སྟོང་པའི་སྣང་བ་གསུམ་ཡང་སྟོང་པ་གསུམ་དུ་འཇོག་པ་ཡིན་ཏེ། སྟོང་པ་གསུམ་ནི་དེ་དག་གི་རྣམ་གྲངས་སུ་གསུངས་པས་སོ། །ལམ་གྱི་ནུས་པ་ཆེ་ཆུང་གི་དབང་གིས་རླུང་ཐིམ་རིམ་ལ་རིམ་པ་མང་པོ་ཞིག་འོང་བས། ཀུན་རྟོག་བརྒྱད་ཅུ་ཐིམ་པ་ལ་རགས་པ་དང་འབྲིང་དང་ཕྲ་བ་ཐིམ་པའི་རིམ་པ་མང་ངོ་། །དེའི་ཕྱིར་རང་རང་གི་ཐད་ཀ་ལ་ལྟོས་པའི་རང་བཞིན་གྱི་རྟོག་པས་སྟོང་པ་དང༌། ཡེ་ཤེས་གསུམ་གཞན་གཅིག་ལ་ལྟོས་ནས་ཀུན་རྟོག་མ་ལུས་པར་ཐིམ་པ་མིན་པ་འོང་བ་རྣམས་ཕྱེད་ན་སྟོང་པ་རྣམས་ཀྱི་ཁྱད་པར་རྣམས་ཤེས་པར་འགྱུར་རོ། །རླུང་དབུ་མར་བསྡུས་ནས་ཐིམ་པ་ལས་སྟོང་པ་བཞིའི་ཐིམ་རིམ་གསལ་པོ་བྱུང་བ་ན་ཕལ་ཆེར་བཞི་ག་བར་མ་ཆད་དུ་འོང་མོད་ཀྱང༌། །གཉིས་སྣང་ཕྲ་མོ་ཡང་དག་པར་གྱུར་ནས་དེ་ཁོ་ན་ཉིད་ཀྱི་དོན་དང་རོ་གཅིག་ཏུ་གྱུར་པའི་དོན་གྱི་འོད་གསལ་དུ་འཇུག་པ་ལ་ནི། སེམས་དབེན་གྱི་ཡེ་ཤེས་ཐོབ་ནས་ཀྱང་རིང་དུ་ཐོགས་ན། དེ་མ་ཐོབ་པའི་གོང་གི་སྟོང་པ་གསུམ་དཔེའི་འོད་གསལ་དང་བཅས་པ་ཐོབ་ཀྱང་རིང་དུ་ཐོགས་པ་ལྟ་ཅི་སྨོས། དེ་ཁོ་ན་ཉིད་དོན་དམ་བདེན་པའི་འོད་གསལ་ཕར་ཕྱིན་ཐེག་པ་བ་དང་ཁྱད་མེད་ཀྱང༌། ཞུ་བདེའི་རིགས་འདྲ་བརྒྱུད་པའི་བདེ་བ་ཆེན་པོས་དེ་ཁོ་ན་ཉིད་ཀྱི་དོན་མངོན་སུམ་དུ་རྟོགས་པའི་འོད་གསལ་ནི། མཐར་ཐུག་གི་དོན་དུ་འཇོག་གི་སྤྱི་དོན་དུ་བཞག་ཏུ་མི་རུང་བ་དང༌། བྱང་སེམས་ཞུ་བ་ལས་དངོས་སམ་བརྒྱུད་ནས་སྐྱེས་པའི་ཞུ་བ་དེས་ངེས་པ་མིན་པའི་

---

^{[མ་དཔེ་གཟིགས་ན་འདིར་གནོན།]}

སྟོང་ཉིད་ངེས་པ་རྣམས་ཕར་ཕྱིན་པ་ལ་ལྟོས་ནས་སྤྱི་དོན་དུ་འཇོག་པ་གཉིས་མི་འགལ་ལོ། །གསུམ་པ་ནི། འོ་ན་མདོར་བསྟན་དུ་གཉིས་བྱུང་བ་ལ། རྒྱས་བཤད་དུ་འོད་གསལ་བཤད་ནས་ཟུང་འཇུག་མི་འཆད་པ་ཅི་ཡིན་སྙམ་ན། སྔར་སློབ་མི་སློབ་ཀྱི་སྒྱུ་ལུས་བཤད་པ་ཉིད་ཀྱི་གོ་ནུས་པས་འདིར་མ་བཤད་དེ། རིམ་ལྔའི་ཡ་གྱལ་གྱི་སྒྱུ་ལུས་དང༌། ཟུང་འཇུག་གི་སྐུ་གཉིས་དོན་གྱི་འོད་གསལ་ཐོབ་པའི་འོག་ཏུ་འབྱུང་མི་འབྱུང་གི་ཁྱད་པར་མ་གཏོགས་པ། རྒྱུ་རླུང་སེམས་གཉིས་ཙམ་ལས་མཚན་དཔེའི་རྣམ་པ་ཅན་གྱི་རྡོ་རྗེ་སེམས་དཔའི་སྐུར་ལྡང་བའི་མཚན་ཉིད་རྣམས་མཚུངས་པའི་ཕྱིར་དང༌། དེའི་དུས་ཀྱི་དོན་གྱི་འོད་གསལ་དང༌། དེའི་སྔོན་གྱི་དོན་གྱི་འོད་གསལ་གཉིས་ཀྱང་མཚན་ཉིད་མཚུངས་པའི་ཕྱིར་རོ། །གཉིས་པ་ནི། །འོད་གསལ་དང་ཟུང་འཇུག་འདི་ནི་མཐར་ཐུག་པའི་དབང་དུ་བྱས་པའོ། །སྒྲོན་གསལ་ལས་ཀྱང༌། འོད་གསལ་བ་ནི་རབ་སྟོན་དང༌། ཟུང་དུ་འཇུག་པ་རྟོགས་པ་སྟེ། རྣམ་པ་གཉིས་སུ་མཐའ་བཤད་དེ། །མཐའ་ནི་མུར་ཐུག་པ་ཡི་ཚིག །ཅེས་གསུངས་སོ། །འདིར་མཐར་ཐུག་ཅེས་པ་གང་གི་མཐར་ཐུག་པ་ཡིན་ཞེ་ན། ཁ་ཅིག་འོད་གསལ་ཕར་ཕྱིན་དང༌། ཟུང་འཇུག་སྔགས་ཀྱི་མཐར་ཐུག་དང༌། གཞན་དག་འོད་གསལ་དངོས་པོའམ་ཆོས་ཉིད་དང༌། ཟུང་འཇུག་ཡེ་ཤེས་སམ་ལམ་གྱི་མཐར་ཐུག་དང་། ལ་ལ་འོད་གསལ་རྒྱུད་དང༌། ཟུང་འཇུག་

---

^{[མ་དཔེ་གཟིགས་ན་འདིར་གནོན།]}

འབྲས་བུའི་མཐར་ཐུག་ཏུ་འདོད་དོ། །དེ་ལ་འོད་གསལ་གང་གི་མཐར་ཐུག་པ་ནི་རྒྱུད་འདི་ཉིད་ལས། ཕུང་པོ་ལ་སོགས་པའི་མཐའ་སྟོང་པ་གསུམ་དང༌། དེ་གསུམ་གྱི་མཐའ་འོད་གསལ་དུ་གསུངས་པས་བསྟན་ལ། དེ་ཡང་རགས་པ་རྣམས་རིམ་གྱིས་ཐིམ་པའི་མཐར་སྟོང་པ་གསུམ་སྔ་མ་ཕྱི་མ་ལ་ཐིམ་ནས་འོད་གསལ་དུ་ཐུག་པ་ནི། སྣང་བ་གསུམ་གྱི་སྐབས་སུ་གཉིས་སྣང་མ་དག་ལ། སེམས་དབེན་གྱི་ཉེར་ཐོབ་དོན་གྱི་འོད་གསལ་དུ་ཞུགས་པ་ན། གཉིས་སྣང་ཕྲ་མོ་ཡང་དག་ནས་ཆུ་ལ་ཆུ་བཞག་པ་བཞིན་དུ་རོ་གཅིག་ཏུ་ཞུགས་པའོ། །དེ་ཕྱིར་ལྷན་ཅིག་སྐྱེས་པའི་བདེ་བའི་སེམས་དེ་ཁོ་ན་ཉིད་ཀྱི་མཐར་ཐུག་པ་ནི། འོད་གསལ་གྱི་མཐར་ཐུག་ལུགས་སོ། །དེ་འདྲ་བའི་འོད་གསལ་ནི་སྔགས་བླ་མེད་ཀྱི་རྫོགས་རིམ་ཐུན་མོང་མ་ཡིན་པ་ཡིན་པས། དེ་ཕར་ཕྱིན་གྱི་ཐེག་པ་ནས་མི་སྟོན་ལ། ཆོས་ཉིས་རྐྱང་པ་འདིར་མཐར་ཐུག་གི་འོད་གསལ་མིན་ཞིང༌། འདིའི་གོང་ན་སློབ་པའི་ཟུང་འཇུག་ཡོད་པས་རྒྱུའི་མཐར་ཐུག་ཀྱང་མིན་ནོ། །ཟུང་འཇུག་གི་མཐར་ཐུག་ལུགས་ནི། ཡུལ་ཅན་བདེ་བའི་སེམས་ཡུལ་དོན་དམ་བདེན་པའི་མཐར་ཐུག་པ་དང༌། ཤིན་ཏུ་ཕྲ་བའི་རླུང་འོད་ཟེར་ལྔའི་གཉུག་མའི་ལུས་རྡོ་རྗེ་སེམས་དཔའི་སྐུ་མཚན་དཔེས་བརྒྱན་པའི་མཐར་ཐུག་པ་སྟེ་སོན་པ་གཉིས་དུས་གཅིག་ཏུ་ཐུགས་དང་སྐུར་ཚོགས་པའོ། །མཐར་ཐུག་ལུགས་ཏེ་ལྟར་ཡིན་གྱི་ལམ་གྱི་བགྲོད་པ་མཐར་ཐུག་པ་མིན་པས། དེ་གཉིས་ཀ་སློབ་ལམ་ན་ཡང་ཡོད་

---

^{[མ་དཔེ་གཟིགས་ན་འདིར་གནོན།]}

དོ། །འོ་ན་བདེན་གཉིས་ལ་ལྟོས་ནས་ཚོགས་པ་དང་ཡ་གྱལ་གྱི་མཐར་ཐུག་གཉིས་སུ་བྱས་པའི་ཕྱི་མ་ལ་ཀུན་རྫོབ་ཀྱི་མཐར་ཐུག་དང༌། །དོན་དམ་གྱི་མཐར་ཐུག་གཉིས་དགོས་པ་ལ། དོན་དམ་འོད་གསལ་གྱི་མཐར་ཐུག་བཤད་ནས་ཀུན་རྫོབ་སྒྱུ་མའི་མཐར་ཐུག་མི་འཆད་པར། །དེ་སྦས་དོན་དུ་འཆད་པ་ཇི་ལྟར་ཡིན་ཞེ་ན། དྲི་བ་འདི་ལ་ནི་ཐོག་མར་ཟུང་དུ་འཇུག་ལུགས་བཤད་དགོས་པས་དེ་ཇི་ལྟར་ཡིན་སྙམ་ན། རིམ་ལྔ་ལས་ཟུང་འཇུག་ལ་རྣམ་དབྱེ་མང་པོ་ཞིག་གསུངས་ཀྱང། གཙོ་བོ་ནི། དེ་ཉིད་ཤེས་པས་རིམ་པ་བཞིན། །རང་བྱིན་བརླབས་དང་འོད་གསལ་ཤེས། །དེ་དག་ཁོ་ན་འདུས་པ་གང༌། འདི་ནི་ཟུང་འཇུག་རིམ་པའོ། །ཞེས་རང་བྱིན་བརླབས་དང་འོད་གསལ་གཉིས་ཟུང་དང༌། ད་གཉིས་འདུས་པ་ཟུང་འཇུག་ཏུ་བཤད་པ་དང། ཀུན༌རྫོབ་དང་ནི་དོན་དམ་གྱི། རྣམ་དབྱེ་སོ་སོར་ཤེས་ནས་ནི། གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་ཀུན་རྫོབ་དང་དོན་དམ་གཉིས་ཟུང་དང༌། དེ་གཉིས་འདྲེས་པ་ཟུང་འཇུག་ཏུ་གསུངས་པ་འདི་ཡིན་ནོ། །དེ་ལ་དོན་གྱི་འོད་གསལ་བ་མ་ཐོབ་གོང་དུ་རླུང་འོད་ཟེར་ལྔ་ལས་བསྒྲུབས་པའི་སྒྱུ་མའི་སྐུ་ཡོད་དུས་སུ། །སེམས་དོན་དམ་བདེན་པ་དང་རོ་གཅིག་ཏུ་སོང་བའི་འོད་གསལ་མེད་ལ། ཟུང་འཇུག་མ་ཐོབ་པའི་གོང་དུ་བདེ་བའི་སེམས་དོན་དམ་དང་རོ་གཅིག་ཏུ་སོང་བའི་འོད་གསལ་ཡོང་དུས་སུ། །ལུས་སྒྱུ་མའི་སྐུར་སོང་བའི་ཀུན་རྫོབ་མེད་པས་རེས་འཇོག་ཏུ་གྱུར་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར་ཟུང་འཇུག་མེད་དོ། །ནམ་ཞིག་ལུས་རང་བྱིན་བརླབ་ཅེས་པ་ཀུན་རྫོབ་སྒྱུ་མའི་སྐུའི་མཐར་སོན་པ་དང༌། སེམས་འོད་གསལ་ཞེས་པ་དོན་དམ་བདེན་པའི་མཐར་སོན་པ་གཉིས་དུས་གཅིག་ཏུ་རྒྱུད་གཅིག་ལ་ཚོགས་པ་ན་རེས་འཇོག་མེད་པར་མཉམ་དུ་འདུས་པས་ན་ཟུང་འཇུག་ཐོབ་བོ། །འོ་ན་སློབ་པའི་ཟུང་འཇུག་ལ་གནས་པས་དུས་རྟག་ཏུ་དོན་གྱི་འོད་གསལ་ལ་མཉམ་པར་འཇོག་མི་ནུས་པས། དེ་ལས་ལངས་པའི་ཚེ་ཟུང་འཇུག་ལ་མི་གནས་པར་འགྱུར་རོ་ཞེ་ན། ཟུང་འཇུག་གི་གཙོ་བོ་དང་པོར་ཐོབ་པ་ལ་དེ་འདྲ་ཞིག་ཐོབ་དགོས་ཞེས་པའི་དོན་ཡིན་གྱི་ཟུང་འཇུག་ལ་གནས་པ་ལ་དེ་གཉིས་ཚོག་པ་ལ་གནས་དགོས་ཞེས་པ་མིན་ཏེ། ཟུང་འཇུག་འཇོག་ཚུལ་དུ་མ་ཞིག་ཡོད་པའི་ཕྱིར་ན། དེ་ལ་མི་གནས་ཀྱང་ཚུལ་གཞན་གྱི་སྒོ་ནས་ཟུང་འཇུག་ལ་གནས་པའི་ཕྱིར་དང༌། སྔར་བཤད་པའི་ཟུང་འཇུག་དེ་མངོན་དུ་བྱེད་ནའང་ཇི་ལྟར་འདོད་པ་བཞིན་བྱ་བར་ནུས་པའི་ཕྱིར་རོ། །དང་པོར་ཐོབ་པའི་ཟུང་འཇུག་སྐུ་མཚན9།དཔེས་བརྒྱན་པ་གང་ལས་གྲུབ་པའི་རླུང་ནི་དོན་གྱི་འོད་གསལ་གྱི་བཞོན་པའི་རླུང་ཡིན་ཏེ། འོད་གསལ་དང་ཟུང་འཇུག་གི་སྐུ་མཉམ་དུ་ཚོགས་པའི་ཚེ་སྣང་བ་གསུམ་དག་པའི་ཕྱིར་རོ། །འོད་གསལ་དེ་ལས་ལངས་པའི་ཚེ་རླུང་དེ་མེད་ཀྱང་སྐུ་དེའི་རིགས་འདྲ་རྒྱུན་མ་ཆད་དུ་གནས་སོ། །སེམས་དབེན་གྱི་མཐར་འབྱུང་བའི་སྒྱུ་ལུས་གང་ལས་སྒྲུབ་པའི་རླུང་ནི་དོན་གྱི་འོད་གསལ་གྱི་རླུང་མིན་ཞིང༌། དེས་ཉེར་ལེན་བྱས་པའི་རླུང་

---

^{[མ་དཔེ་གཟིགས་ན་འདིར་གནོན།]}

ཡང་མིན་པས། ཀུན་རྫོབ་སྒྱུ་མའི་སྐུ་ཙམ་ཞིག་ཡིན་ཀྱང༌། ཀུན་རྫོབ་ཀྱི་མཐར་ཐུག་པ་མིན་ནོ། །དེའི་ཕྱིར་སྒྱུ་ལུས་ཡ་གཅིག་པ་མཐར་ཐུག་ཏུ་མ་བཤད་ཅིང༌། དོན་གྱི་འོད་གསལ་ཡ་གཅིག་པ་མཐར་ཐུག་ཏུ་མཛད་དོ། །སེམས་དོན་དམ་བདེན་པའི་མཐར་ཐུག་པ་ཙམ་ཞིག་ཕ་རོལ་ཏུ་ཕྱིན་པའི་ཐེག་པ་ནས་མང་དུ་སྟོན་མོད་ཀྱང༌།ལྷན་སྐྱེས་ཀྱི་བདེ་བའི་སེམས་དང་རོ་གཅིག་པའི་འོད་གསལ་ཐུན་མོང་མ་ཡིན་པར་འཇོག་པ་མི་འགལ་ལོ། །གཉིས་པ་ནི། འོ་ན་ཚུལ་བཞིའི་བཤད་པའི་སྐབས་སུ་ཡིག་དོན་གྱི་བཤད་པ་མ་བྱུང་བའི་རྒྱུ་མཚན་གང་ཡིན་སྙམ་ན། འོག་ནས་མཐའ་དྲུག་གི་སྒྲ་ཇི་བཞན་པའི་བཤད་པ་ཡི་གེའི་དོན་དུ་གསུངས་པ་དེས་གོ་ནུས་པར་དགོངས་ནས་སྐབས་འདིར་མ་བཤད་དོ། །ཡིག་དོན་གྱི་མཚན་ཉིད་ནི། སྒྲོན་གསལ་ལས། སྒྲ་ཙམ་ལ་ནི་རབ་གཞོལ་བའི། །ཕྱི་རོལ་བསྟན་བཅོས་མཁས་པ་ཡིས། དེ་ཡི་བཀོད་པས་རབ་བསྟན་པ། །ཡི་གེའི་དོན་ནི་ཡིན་པར་བཤད། །ཅེས་ནང་རིག་པའི་སྡེ་སྣོད་ལས་ཕྱི་རོལ་ཏུ་གྱུར་པ་སྒྲའི་བསྟན་བཅོལ་ལ་མཁས་པ་རྣམས་ཀྱིས། སྒྲའི་གཞུང་ལ་གཞོལ་བདེའི་བཀོད་པས་ཏེ་དེ་ནས་འབྱུང་བ་བཞིན་དུ་ཚིག་དོན་རབ་ཏུ་བཤད་པ་ནི་ཡིག་དོན་དུ་གསུངས་པ་ལྟར་རོ། །དེ་ལྟར་ན་གཞུང་དེ་ལ་སྒྲའི་གཞུང་དང་བསྟུན་ནས། རང་རང་གི་དོན་སྟོན་པའི་ནུས་པ་གང་ཐོན་པའི་ཆ་ནས་བཤད་པ་ནི་ཡིག་དོན་གྱི་བཤད་པ་དང༌། ཆ་དེ་ནས་གཙོ་བོར་མ་བྱས་

---

^{[མ་དཔེ་གཟིགས་ན་འདིར་གནོན།]}

པར་གཞུང་དེའི་དོན་དེ་སྔར་བཤད་པའི་གང་ཟག་གཉིས་ཀྱི་ཤེས་བྱ་དང་ཉམས་སུ་བླང་བྱ་ཐུན་མོང་བར་སོང་བའི་སྒོ་ནས་བཤད་པ་ནི་སྤྱི་དོན་གྱི་བཤད་པ་ཡིན་པས། དེ་གཉིས་འཆད་ཚུལ་མི་འདྲ་བ་ཡིན་གྱི། ཡིག་དོན་གྱི་བཤད་པའི་སྒོ་ནས་བསྟན་པའི་དོན་དེ་གང་ཟག་གཉིས་ཀྱི་ཐུན་མོང་དུ་མི་འགྱུར་བ་དང༌། སྤྱི་དོན་གྱི་བཤད་པའི་སྒོ་ནས་བསྟན་པའི་དོན་ནི་ཡིག་དོན་འཆད་ཚུལ་གྱི་སྒོ་ནས་བཤད་དུ་མི་རུང་བ་ནི་མིན་ནོ། །གཉིས་པ་མཐར་དྲུག་གི་བཤད་པ་ལ་གསུམ། ཞུ་བ་མཛད་པ། ཞུས་པའི་ལན་མདོར་བསྟན་པ། རྒྱས་པར་བཤད་པའོ། །དང་པོ༌ནི། ཚུལ་གསུམ་གྱི་བཤད་ཐབས་གསུངས་པའི་རྗེས་སུ་རྗེ་བཙུན་བྱམས་པས་གསོལ་པ། བཅོམ་ལྡན་འདས་ཞེས་བོས་ནས། དེ་བཞིན་གཤེགས་པ་ཐམས་ཅད་ཀྱིས་གསུངས་པའི་རྒྱུད་བཤད་ཐབས་ཀྱི་མན་ངག །བླ་ན་མེད་པའི་རྣལ་འབྱོར་གྱི་རྒྱུད་དུ་འབྱུང་བའི་མཐའ་དྲུག་བཤད་པའི་དབྱེ་བ་ཇི་ལྟར་ལགས་ཞེས་ཞུས་སོ། །གཉིས་པ་ལ་གཉིས། །སྤྱིའིདོན། ཡན་ལག་གི་དོན་ནོ། །དང་པོ་ལ་གསུམ། །བཤད་པ་གཉིས་རྒྱུད་གང་ལ་འཇུག་པ། དེ་ལ་འཇུག་པའི་བཤད་པ་གཉིས་འགལ་མི་འགལ། །མཐའ་དྲུག་གི་བཤད་པའི་འཇུག་ཚུལ་བསྟན་པའོ། །དང་པོ་ནི། གལ་ཏེ་རྒྱུད་བཤད་ཐབས་ཀྱི་མན་ངག་མཐའ་དྲུག་དང་ཚུལ་བཞི་ཡིན་ན། བཤད་པ་དེ་གཉིས་རྒྱུད་སྡེ་བཞི་གང་ལ་འཇུག་པ་ཡིན་སྙམ་ན། འདི་ལ་ཚུལ་བཞིའི་བཤད་པ་ནི་གཞུག་གཅིག་ལ་དོན་བཞི་ཀའི་བཤད་པ་འཇུག་པ་ཡིན་ལ། རྒྱུད་སྡེ་འོག་མའི་དོན་

---

^{[མ་དཔེ་གཟིགས་ན་འདིར་གནོན།]}

དང༌། ཡིག་སྤྱིའི་དོན་གཉིས་གཞི་མཐུན་ཡོད་མོད་ཀྱང༌། དེ་ལ་ཚུལ་ལྷག་མ་གཉིས་ཀྱི་བཤད་པ་མི་འཇུག་པས་ཚུལ་བཞིས་བཤད་པ་འཇུག་པ་ནི་རྣལ་འབྱོར་བླ་མེད་ཁོ་ན་ལ་བྱའོ། །མཐའ་དྲུག་གི་བཤད་པ་ཚང་བ་རྒྱུ་སྡེ་འོག་མ་ལ་མེད་ཀྱང༌། དེའི་ཕྱོགས་གཅིག་སྒྲ་ཇི་བཞིན་པའི་བཤད་པ་ནི་རྒྱུད་སྡེ་འོག་མ་གསུམ་ག་ལ་འཇུག་པར་རྒྱུད་འདིར་གསུངས་པས་དེ་ནི་རྒྱུད་སྡེ་བཞི་ཀའི་ཐུན་མོང་ངོ་། །ཕ་རོལ་ཏུ་ཕྱིན་པ་དང་རྒྱུད་སྡེ་འོག་མ་ལ། བདེན་གཉིས་སྟོན་པའི་ཆ་ནས་དྲང་དོན་དང་ངེས་དོན་དུ་བཞག་པ་ཡོད་མོད་ཀྱང༌། མཐར་དྲུག་གི་ཡ་གྱལ་གྱི་དྲང་ངེས་ཀྱི་བཤད་པ་ནི་དེ་དག་ལ་མི་འཇུག་སྟེ། དེ་རྣམས་མིང་འདྲ་ཡང་དོན་མི་འདྲ་བའི་ཕྱིར་རོ། །འདི་ལྟར་དེ་དག་གི་དྲང་ངེས་ནི་གཞུང་ཕན་ཚུན་དུ་འགལ་བས་སོ་སོ་བ་ཡིན་ལ། འདིར་ནི་དྲང་ངེས་གཉིས་ཀྱི་བཤད་པ་གཞུང་གཅིག་ལ་བྱེད་པའི་ཕྱིར་དང༌། དྲང་ངེས་སུ་འཇོག་ཚུལ་ཡང་མི་མཐུན་པའི་ཕྱིར་རོ། །འོ་ན་སྤྱོད་བསྡུས་ལས། འཇའ་ཚོན་ལྟ་བུའི་སྐུ་དག་ནི། །དེ་ཉིད་བསྒོམས་པས་ཐོབ་པར་འགྱུར། །ཞེས་སྤྱོད་རྒྱུད་རྣམ་སྣང་མངོན་བྱང་ནས་གསུངས་པས་འདི་སྒྱུ་ལུས་ཀྱི་ཤེས་བྱེད་དུ་དྲངས་པ་དང༌། སྒྲོན་གསལ་ལས་ཀྱང་རྒྱུད་དེར་ལྷའི་སྐུ་དག་པ་དང་མ་དག་པ་གཉིས་གསུངས་པ་དག་མ་དག་གི་ལྷའི་རྣལ་འབྱོར་གཉིས་ཡོད་པའི་ཤེས་བྱེད་དུ་དྲངས་པས་རྒྱུད་སྡེ་འོག་མར་སྦས་དོན་དང་མཐར་ཐུག་གི་བཤད་པ་གཉིས་མེད་པ་མི་འཐད་ཅིང༌། ཡང་སྒྲོན་གསལ་ལས། འདིའི་དོན་

---

^{[མ་དཔེ་གཟིགས་ན་འདིར་གནོན།]}

ཐེག་པ་ཆེན་པོའི་མདོ་སྡེ་ལས་ཀྱང༌། དགོངས་པས་བཤད་པས་སྟོན་ཏེ། སྐྲ་ཙམ་ཁྱོན་གཅིག་ལ་ཡང་སངས་རྒྱས་ནི། རྣམ་མང་གང་གཱའི་ཀླུང་གི་བྱེ་སྙེད་བཞུགས། །ཞེས་བྱ་བ་དང༌། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །ཅེས་བྱ་བ་གསུངས་པས་ལྷའི་དེ་ཁོ་ན་ཉིད་སྟོན་པ་ཡིན་ཏེ། ངེས་པའི་དོན་ཏོ། །ཞེས་ཕ་རོལ་ཏུ་ཕྱིན་པའི་མདོ་སྡེས་ཀྱང་ཟུང་འཇུག་གི་ལྷའི་སྐུ་སྟོན་པར་གསུངས་པའི་ཕྱིར་དང༌། དེ་ཡང་ངེས་དོན་དུ་བཤད་པས་དེ་དག་ལ་ངེས་དོན་གྱི་བཤད་པ་དང༌། །ཚུལ་བཞིའི་མཐར་ཐུག་གི་དོན་བཤད་པ་ཡང་ཡོད་དོ་སྙམ་ན། འདི་ལ་བརྗོད་པར་བྱ་སྟེ། རྣམ་སྣང་མངོན་བྱང་གི་ལུང་གིས་དེ་ཁོ་ན་ཉིད་ཀྱི་དོན་བསྒོམས་པས་འཇའ་ཚོན་ལྟ་བུའི་སྐུ་འགྲུབ་པར་གསུངས་ཤིང༌། སྒྱུ་ལུས་ཀྱང་འཇའ་ཚོན་ལྟ་བུའི་ལུས་ཡིན་ལ། དོན་དམ་པའི་དེ་ཁོ་ན་ཉིད་བསྒོམས་པས་ཐོབ་པ་ཡང་ཡིན་པ་ཙམ་ལ་དགོངས་ནས་སྒྱུ་ཡུལ་གྱི་སྐབས་སུ་ལུང་དེ་དྲངས་པ་ཡིན་ལ། །དེ་ཙམ་གྱིས་ལུང་དེ་སྒྱུ་ལུས་བསྟན་པར་མི་འགྱུར་ཏེ། དཔེར་ན་སྒྲ་བྱས་པ་དེ་སྒྲ་མི་རྟག་པ་ཡིན་ཀྱང་སྔ་མ་བརྗོད་པོའི་ཚིག་གིས་ཕྱི་མ་བརྗོད་མི་དགོས་པ་བཞིན་ནོ། །དེ་བཞིན་དུ་སྒྲོན་གསལ་དུ་དྲངས་པས་ཀྱང་ལྷའི་རྣལ་འབྱོར་ལ་དག་མ་དག་གཉིས་སུ་བྱེད་པ་ཙམ་སྟོན་མོད་ཀྱང༌། རྫོགས་རིམ་ཟུང་འཇུག་གི་སྐུ་སྐྱེད་པ་ལུང་དེས་སྟོན་པར་མི་བཞེད་དེ། དེ་དག་ནི་ཕ་རོལ་ཏུ་ཕྱིན་པའི་ཐེག་པ་པ་དང༌། རྒྱུད་སྡེ་འོག་མ་པ་ལ་གསང་བར་བྱ་བ་ཡིན་པར་ལན་དུ་མར་གསུངས་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར་རོ། །སྐྲ་ཙམ་ཁྱོན་ལ་ཞེས་སོགས་ཀྱི་མདོ་སྡེས་ཟུང་འཇུག་གི་སྐུ་བསྟན་པར་གསུངས་པ་ཡང་སྐྲ་རྩེ་ཙམ་གྱི་ཁྱོན་ན་སངས་རྒྱས་གངྒཱའི་ཀླུང་གི་བྱེ་མའི་གྲངས་དང་མཉམ་པར་བཞུགས་པ་རྣམས་ཟུང་འཇུག་གི་སྐུ་བརྙེས་པ་ལ་དགོངས་པ་ཡིན་གྱི། མདོ་དེས་ཟུང་འཇུག་གི་ལྷའི་སྐུ་བསྟན་པར་བཞེད་པ་མིན་ཏེ། ལེའུ་དགུ་པའི་སྒྲོན་གསལ་ལས་རྡོ་རྗེའི་སྐུ་སྐྱེད་པ་ཐེག་པ་གཞན་དང་ཐུན་མོང་མ་ཡིན་པར་གསུངས་པའི་ཕྱིར་རོ། །དེས་ན་དེ་འདྲ་བའི་རིགས་སྤྱོད་བསྡུས་སོགས་ལས་གསུངས་པ་ནི་སྔར་བཤད་པ་ལྟར་དང༌། ཁ་ཅིག་ནི་དོན་གྱི་ཕྱོགས་མཐུན་ཙམ་ལུང་དུ་དྲངས་པ་ཡིན་གྱི། དེ་དག་གིས་འདིའི་རྫོགས་རིམ་རྣམས་སྟོན་པར་བཞེད་པ་མིན་ནོ། །དེ་བཞིན་དུ་ཆོས་ཀྱི་དེ་ཉིད་སྟོན་པ་ན་སྒྲ་འགལ་བས་དོན་གཞན་སྟོན་པ་དང༌། སྒྲ་དྲང་ཐད་དུ་དེ་ཁོ་ན་ཉིད་སྟོན་པ་ཡང་ཐེག་པ་གཞན་དང་རྒྱུད་སྡེ་འོག་མ་ལ་ཡོད་མོད་ཀྱང༌། མཐའ་དྲུག་གི་ཡ་གྱལ་ཀྱི་དགོངས་དགོངས་མིན་གྱི་བཤད་པ་གཉིས་མེད་དེ། །དེའི་གཙོ་བོའི་དོན་ནི་རྒྱུད་འདིར་བཤད་པ་ལྟར་མཐར་ཐུག་ཏུ་བཤད་པ་དེ་ཉིད་ཡིན་ལ། དེ་ལས་གཞན་པའི་དགོངས་དགོངས་མིན་གྱི་བཤད་པ་ཡང༌། གཞན་དང་ཐུན་མོང་མ་ཡིན་པའི་དོན་རྣམས་ལ་བཤད་སྣང་བའི་ཕྱིར་རོ། །སྒྲ་ཇི་བཞིན་པ་མ་ཡིན་པའི་བཤད་པ་ལ་ཡང་གཉིས་ལས་ཕ་རོལ་ཏུ་ཕྱིན་པ་ལ་སོགས་པ་ནས་བཤད་པའི་སྒྲ་ཇི་བཞིན་པ་མ་ཡིན་པ་ནི། ལུང་དེ་ནས་ཇི་ལྟར་བཤད་པ་དེ་ལྟར་དུ་དོན་གཟུང་དུ་མི་རུང་བ་ཡིན་ལ། མཐའ་

---

^{[མ་དཔེ་གཟིགས་ན་འདིར་གནོན།]}

དྲུག་གི་ཡ་གྱལ་གྱི་སྒྲ་ཇི་བཞིན་མ་ཡིན་པ་ནི། འཇིག་རྟེན་པ་དང་བསྟན་བཅོས་ལ་གྲགས་པ་ལྟར་མེད་ཀྱང༌། དེ་བཞིན་གཤེགས་པས་བརྡ་མཛད་པ་ཙམ་ལ་བཞག་པ་ཡིན་ལ། དེ་ནི་ངན་སོང་སྦྱོང་རྒྱུད་ནས་ཀོ་ཊཱ་ཁྱ་ལ་སོགས་པའི་སྒྲས་ཕྱག་ན་རྡོ་རྗེའི་མཚན་བཅུ་བསྟན་པར་གསུངས་པས་རྒྱུད་སྡེ་འོག་མ་དང་ཡང་ཐུན་མོང་བའོ། །གཉིས་པ་ནི། མཐའ་དྲུག་གི་བཤད་པ་འཇུག་པའི་གཞུང་ལ་ཚུལ་བཞིའི་བཤད་པ་རུང་ངམ་མི་རུང་སྙམ་ན། འདི་ལ་པཎྜི་ཏ་སྐལ་ལྡན་གྲགས་པ་ནི་དེ་གཉིས་ཤིན་ཏུ་ཐ་དད་དོ་ཞེས་འགལ་བར་འདོད་མོད་ཀྱང༌། །མི་འཐད་དེ་རྩ་རྒྱུད་ལེའུ་གསུམ་པ་ལས། རིན་ཆེན་ཁ་དོག་སྣ་ལྔ་པ། ཡུངས་ཀར་གྱི་ནི་འབྲུ་ཚོད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །ཞེས་གསུངས་པ་འདི་སྒྲོན་གསལ་ལས་ཚུལ་བཞིས་བཤད་པར་གསུངས་ལ། །སྤྱོད་བསྡུས་ལས་དྲང་ངེས་གཉིས་ཀྱིས་བཤད་པའི་ཕྱིར་རོ། །དེའི་ཕྱིར་བླ་མ་རྡོག་ལུགས་པ་རྣམས་གཞུང་གཅིག་གིས་བཤད་པ་གཅིག་གམ་གཉིས་ལས་མི་སྟོན་ན་མཐའ་དྲུག་དང༌། །གསུམ་མམ་བཞི་སྟོན་ན་ཚུལ་བཞིས་བཤད་པ་ཡིན་པར་གསུང་པ་ཡང་མ་ངེས་སོ། །འོ་ན་ཚུལ་བཞིས་བཤད་དུ་རུང་བ་ཐམས་ཅད་དྲང་ངེས་གཉིས་ཀྱིས་བཤད་པ་དང༌། དྲང་ངེས་གཉིས་ཀྱིས་བཤད་དུ་རུང་བ་ཐམས་ཅད་ཀྱང་ཚུལ་བཞིས་བཤད་པས་ཆོག་གམ་མི་ཆོག་སྙམ་ན། །ལེའུ་དྲུག་པར། །སྣ་ཡི་རྩེ་མོར་ཡུངས་ཀར་བསམ། །ཞེས་སོགས་རྐང་པ་བཞི་སྒྲོན་གསལ་གྱི་དྲང་ངེས་གཉིས་སུ་བཤད་པ་

---

^{[མ་དཔེ་གཟིགས་ན་འདིར་གནོན།]}

ན། །དྲང་དོན་ལ་གཞིའི་འདོད་ཆགས་ཆོས་སྦས་དང༌། བསྐྱེད་རིམ་པའི་ཕྲ་མོ་སྒོམ་པ་གཉིས་དང༌། ངེས་དོན་ལ་རྡོར་བཟླས་དང༌། མ་དག་པའི་སྒྱུ་མ་དང༌། དག་པའི་ལྷའི་དེ་ཁོ་ན་ཉིད་བཤད་པས། །ཚུལ་བཞིའི་བཤད་པ་རུང་བ་རྣམས་ཀྱི་དོན་ལ་དྲང་ངེས་གཉིས་སུ་བསྡུས་ཀྱང་ཆོག་པས། ཚུལ་བཞིའི་བཤད་པ་འཇུག་པ་ལ་དྲང་ངེས་གཉིས་ཀྱིས་ཀྱང་བཤད་དུ་རུང་བར་མངོན་ཏེ། འོན་ཀྱང་སོ་སོར་བཤད་པ་ནི་དབྱེ་བསྡུའི་དབང་དུ་མཛད་པའོ། །དྲང་ངེས་གཉིས་ཀྱིས་བཤད་པ་རུང་བ་ལ་ཚུལ་བཞིར་བཤད་དུ་རུང་བའི་ངེས་པ་མེད་དེ། །དྲང་དོན་ལ་ཡིག་སྤྱི་གཉིས་ཡོད་མེད་དང༌། ངེས་དོན་ལ་སྦས་མཐར་གཉིས་ཡོད་མེད་ཅི་རིགས་སུ་འགྱུར་བའི་ཕྱིར་རོ། །ཚུལ་བཞིས་འཆད་པ་རྣམས་བསྡུས་ན་དྲང་ངེས་གཉིས་ཀྱིས་བཤད་དུ་རུང་བ་འདི་ལྟར་བྱས་ན། རྒྱུད་འདིར་མཐར་ཐུག་གི་དོན་ཉིད་དགོངས་དགོངས་མིན་དང༌། སྒྲ་ཇི་བཞིན་པའི་དོན་ཡིག་དོན་དུ་གསུངས་པ་དང༌། སྒྲོན་གསལ་ལས། ལེའུ་རེ་རེའི་མཐར་མཐའ་དྲུག་གི་བཤད་བའོ། །ཞེས་གསུངས་པ་དང༌། མཐའ་དྲུག་གིས་ནི་འཆིང་བས་བཅིངས་པས། ཞེས་གསུངས་པ་དང། བདེ་བར་གཤེགས་གསུང་མཆོག་ཏུ་ཕྲ་བ་རྣལ་འབྱོར་རྒྱུད། །མཐར་དྲུག་བྲལ་བས་ངེས་པར་རྟོགས་ཞེས་གང་སྨྲ་བ། ཞེས་གསུངས་པ་རྣམས་ཀྱང་ལེགས་པར་དྲངས་པར་འགྱུར་རོ། །ཚུལ་བཞི་དང་དྲང་ངེས་ཀྱི་བཤད་པ་གཉིས་མི་འགལ་ན། མཐའ་དྲུག་ག་ལྷག་མ་བཞི་དང་ཚུལ་བཞིའི་བཤད་པ་འགལ་ལམ་མི་འགལ་སྙམ་

---

^{[མ་དཔེ་གཟིགས་ན་འདིར་གནོན།]}

ན། སྔར་དྲངས་པའི་ལེའུ་གསུམ་པའི་གཞུང་དེ་ལ་རིམ་ལྔར་དགོངས་བཤད་དུ་གསུངས་ཤིང༌། ཚུལ་བཞི་ཀྱང་བཤད་པས་ན། དགོངས་བཤད་དང་ཚུལ་བཞིར་བཤད་པ་གཉིས་མི་འགལ་ལོ། །ལེའུ་དྲུག་པ་ལས། སྣ་ཡི་རྩེ་མོར་ཡུངས་ཀར་བསམ། །ཞེས་སོགས་གསུངས་པ་རིམ་ལྔར་དགོངས་བཤད་དུ་གསུངས་ལ། སྒྲོན་གསལ་ལས་དྲང་ངེས་གཉིས་ཀྱིས་བཤད་པས་ན། གཞུང་གཅིག་ལ་ཚུལ་བཞི་དང་དྲང་ངེས་གཉིས་དང་དགོངས་བཤད་དེ་བཤད་པ་བདུན་རུང་བ་ཡོད་དོ། །དགོངས་མིན་དང་སྒྲ་ཇི་བཞིན་པ་ཡིན་མིན་གསུམ་ལ་ཚུལ་བཞིར་བཤད་པ་ཡབ་སྲས་ཀྱི་གཞུང་ན་མི་གསལ་ལོ། །སྒྲ་ཇི་བཞིན་པ་ནི་ལུགས་གཞན་ནས་ལུང་དེ་ནས་ཇི་ལྟར་བཤད་པ་བཞིན་དུ་དོན་གཟུང་དུ་རུང་བ་ལ་བྱེད་མོད་ཀྱང༌། །འདིར་དེ་ཙམ་གྱིས་མི་ཆོག་སྟེ་དངོས་ཟིན་གྱི་དོན་ལས་དོན་གཉིས་པ་མེད་པ་ཅིག་ལ་གཙོ་བོར་བཤད་དོ། །རིམ་ལྔའི་འགྲེལ་པ་ནོར་བུའི་ཕྲེང་བ་ལ་སོགས་པར་གཞུང་གཅིག་ལ་ཚུལ་བཞིའི་ནང་ཚན་གྱི་དབྱེ་བ་བརྒྱད་དང༌། མཐའ་དྲུག་སྟེ་བཤད་པ་བཅུ་བཞི་བྱེད་པ་ནི་མི་འཐད་དེ། །དགོངས་དགོངས་མིན་དང༌། སྒྲ་ཇི་བཞིན་པ་ཡིན་མིན་གཉིས་གཞི་གཅིག་ལ་འདུ་བ་འགལ་བའི་ཕྱིར་རོ། །གསུམ་པ་ནི། མཐའ་ནི་རྩེ་མོའམ་སྒོ་སྟེ། དྲུག་ཏུ་བཞག་པ་ནི། དྲང་ངེས་གཉིས་དོན་མཐའ་དང། དགོངས་དགོངས་མིན་གཉིས་སྒྲ་མཐའ་དང༌། སྒྲ་ཇི་བཞིན་པ་ཡིན་མིན་གཉིས་སྒྲ་དོན་གཉིད་ཀའི་མཐའ་ལ་བརྟེན་པའོ་ཞེས་བོད་ཀྱི་མཁས་པ་རྣམས་གསུང་ངོ་། །དེ་ལ་དང་པོ་གཉིས་ནི།

---

^{[མ་དཔེ་གཟིགས་ན་འདིར་གནོན།]}

སྒྲོན་གསལ་ལས། སྐལ་ངན་རྣམས་ལ་རྒྱལ་བ་ཡིས། །སྦས་ཏེ་བཤད་པ་དྲང་བའི་དོན། །ཡང་དག་དོན་ནི་རབ་སྟོན་ཕྱིར། ངེས་པའི་དོན་ཡང་གསུངས་པ་ཡིན། ཞེས་གསུངས་པ་ལྟར་ཤེས་པར་བྱ་སྟེ། དཔེར་ན་སྣའི་རྩེ་མོར་ཡུངས་ཀར་གྱི་ཚད་ཙམ་གྱི་རིན་ཆེན་ཁ་དོག་སྣ་ལྔ་པ་བསྒོམ་པར་གསུངས་པ་འདིས། །ཁ་དོག་སྣ་ལྔའི་རླུང་ལྡང་འཇུག་གསུམ་ཡིག་གསུམ་དང་དབྱེར་མེད་པར་སྦྱོར་བའི་རྡོ་རྗེ་བཟླས་པ་སྒོམ་པ་དངོས་སུ་མི་མངོན་པར་སྦས་ནས། དངོས་ཟིན་ལ་སྟེང་གི་སྣ་རྩེར་རྡོ་རྗེ་ལ་སོགས་པའི་ཕྱག་མཚན་རྣམ་པ་ལྔ་བསྒོམ་པར་བཤད་པ་ལྟ་བུའོ། །དེ་ལ་ཕྱག་མཚན་བསྒོམ་པ་ནི་དྲང་དོན་དང། རླུང་སྒོམ་པ་ནི་ཡང་དག་པའི་དོན་ངེས་དོན་ནོ། །གཞུང་དེའི་དངོས་ཟིན་གྱི་དོན་དེ་ལས་ད་དུང་ཡང་དག་པའི་དོན་གཞན་དྲང་དུ་ཡོད་པས་དྲང་དོན་ཞེས་བྱ་ལ། །དོན་གཞན་དུ་དྲངས་པ་དེ་ལས་སླར་ཡང་དོན་གཞན་དྲང་དུ་མེད་ཅིང༌། དེར་ངེས་པས་ངེས་པའི་དོན་ནོ། །གཞུང་གཅིག་ལ་དངོས་ཟིན་གྱི་དོན་དང་དེ་ལས་གཞན་པའི་དོན་གཉིས་བྱས་ནས་དྲང་ངེས་ཀྱི་བཤད་པ་བྱ་དགོས་པས་དྲང་ངེས་ཀྱི་བཤད་པ་གཉིས་ནི་དོན་སོ་སོ་བར་ངེས་ལ་གཞུང་ནི་གཅིག་ཏུ་ངེས་སོ། །སྐལ་ངན་རྣམས་ལ་ཞེས་པ་ནི་དྲང་དོན་དུ་བཤད་པའི་བསྐྱེད་རིམ་ལྟ་བུ་དེ་སྐལ་ངན་ཁོ་ན་ལ་བཤད་པར་སྟོན་པ་མིན་ཏེ། རིན་པོ་ཆེ་ལྟ་བུས་ཀྱང་བསྐྱེད་རིམ་སྒོམ་དགོས་པས། དེ་ལའང་བཤད་དགོས་པའི་ཕྱིར་རོ། །དེས་ན་ངེས་དོན་མི་མངོན་པར་སྦས་

---

^{[མ་དཔེ་གཟིགས་ན་འདིར་གནོན།]}

པ་དེ་སྐལ་ངན་ལ་སྦས་ཞེས་པའི་དོན་ནོ། །འདི་ནི་འདུས་པར་རྫོགས་རིམ་ཕལ་ཆེར་མི་མངོན་པར་སྦས་ཏེ་རྒྱས་བཏབ་ནས་གསུངས་པ་ནི་སྐལ་ངན་ལ་གསངས་པ་ཡིན་པར་བསྟན་ཏོ། །དེ་ལྟར་ཡིན་ན་སྐལ་བཟང་ལ་མི་སྦེད་ཅེས་པར་འགྱུར་ལ་འདུས་པའི་གདུལ་བྱའི་གཙོ་བོ་ཡང་སྐལ་བཟང་ཡིན་པས་དེའི་དབང་དུ་བྱས་ནས། ངེས་དོན་གསལ་བར་སྟོན་དགོས་པ་ལ། །དེ་ལྟར་མི་འཆད་པར་སྐལ་ངན་གྱི་དབང་དུ་བྱས་ནས་སྦས་ཏེ་སྟོན་པ་མི་རིགས་སོ་ཞེ་ན་སྐྱོན་མེད་དེ་སྐལ་ངན་ལ་ངེས་དོན་སྦས་པ་ཡིན་ཀྱང༌། སྐལ་ངན་ཁོ་ནའི་དབང་དུ་བྱས་ནས་སྦས་པ་མིན་པའི་ཕྱིར་རོ། །འདི་ལྟར་རྩ་བའི་རྒྱུད་དུ་སྐལ་བཟང་གི་དབང་དུ་བྱས་ནས་ཤིན་ཏུ་གསལ་བར་སྟོན་དགོས་ན། བཤད་པའི་རྒྱུད་དོན་མེད་པར་འགྱུར་རོ། །འོ་ན་རྩ་རྒྱུད་དུ་གསལ་བར་བསྟན་པས་ཆོག་བཞིན་དུ་དེ་ལྟར་མི་སྟོན་པར་བཤད་རྒྱུད་དུ་སྟོན་པ་ཅི་ཡིན་ཞེ་ན། རྩ་བའི་རྒྱུད་དུ་རྒྱས་བཏབ་ནས་མི་གསལ་བར་སྟོན་པ་དང༌། དེ་བཤད་རྒྱུད་ལ་རག་ལས་པ་དང༌། དེ་ཡང་རྩ་བཤད་ཕྱིན་ཅི་མ་ལོག་པར་སྦྱར་ནས་སྟོན་ཤེས་པའི་བླ་མ་ལ་རག་ལས་པར་མཛད་པ་ནི། སློབ་དཔོན་ལེགས་པར་བསྙེན་བཀུར་བ་མེད་པར་རྒྱུད་ལ་རང་དགར་འཇུག་པ་དགག་པའི་ཕྱིར་ཡིན་ཏེ། བླ་མ་ཡུན་རིང་པོར་སྒོ་ཐམས་ཅད་ནས་མཉེས་པར་བྱེད་པ་ནི་ཐེག་པ་འདི་ལ་དངོས་གྲུབ་ཀྱི་རྩ་བ་ཡིན་པའི་ཕྱིར་རོ། །དྲང་ངེས་ནི་གཞུང་གཅིག་དྲང་དོན་དང་ངེས་དོན་གཉིས་ཀར་མི་བྱ་ཡི་གཞུང་གཅིག་གི་དོན་ལ་དྲང་ངེས་གཉིས་སུ་བཤད་དུ་རུང་བ་ལ་བྱའོ། །དགོངས་པ་དང་དགོངས་མིན་

---

^{[མ་དཔེ་གཟིགས་ན་འདིར་གནོན།]}

ནི་སྒྲོན་གསལ་ལས། མཆོག་འདོད་སེམས་ཅན་རྣམས་ཀྱི་ཕྱིར། ཆོས་ཀྱི་དེ་ཉིད་རབ་སྟོན་པ། །འགལ་བའི་ཚིག་གི་སྦྱོར་བ་ཡིས། །གསུངས་པ་གང་ཡིན་དགོངས་བཤད་དེ། །དབང་པོ་དམན་པའི་སེམས་ཅན་རྣམས། རྟོགས་ཕྱིར་མཆོག་ཏུ་གསལ་བ་ཡིས། དེ་ཉིད་ངེས་པར་སྟོན་པ་ནི། །དགོངས་པ་མིན་པས་བཤད་པའོ། །ཞེས་གསུངས་པ་ལྟར་ཤེས་པར་བྱ་སྟེ། བསྟན་བྱའི་དོན་དེ་ཁོ་ན་ཉིད་དུ་མཚུངས་པ་ལ། མཆོག་གི་དངོས་གྲུབ་འདོད་པའི་སེམས་ཅན་དབང་པོ་རྣོན་པོའི་དབང་དུ་མཛད་ནས་དོན་དེ་ལ་སྒྲ་དེ་འགལ་བའི་ཚིག་གིས་གསུངས་པ་ནི་དགོངས་བཤད་དང༌། གསང་བའི་སྣོད་དུ་རུང་བའི་སེམས་ཅན་དབང་པོ་རྟུལ་པོའི་དབང་དུ་མཛད་ནས། སྒྲ་དྲང་ཐད་དུ་གསལ་པོར་བསྟན་པ་ནི་དགོངས་པ་མིན་པས་བཤད་པའོ། །ཆོས་ཀྱི་དེ་ཉིད་ནི་རྒྱུད་འདི་ལས། མཐར་ཐུག་པར་བཤད་པ་དེ་ཉིད། ཅེས་འོད་གསལ་དང་ཟུང་འཇུག་ལ་གསུངས་པ་ནི་གཙོ་བོའི་དོན་ལ་དགོངས་ཀྱི་དོན་དེར་ངེས་པ་ནི་མིན་ཏེ། ལེའུ་དང་པོའི་འགྲེལ་པ་ལས། འདུས་པའི་དོན་དེ་བཞིན་གཤེགས་པ་རྣམས་ཀྱིས་ཀྱང་མི་ཤེས་ན། བྱང་ཆུབ་སེམས་དཔའ་རྣམས་ཀྱིས་ལྟ་ཅི་སྨོས། །ཞེས་གསུངས་པའི་སྔ་མ་རིན་པོ་ཆེ་ལྟ་བུའི་གང་ཟག་དང་ཕྱི་མ་ཙན་དན་ལྟ་བུ་ལ་སོགས་པ་ལ་བྱས་ནས་དེ་དགོངས་བཤད་དུ་གསུངས་པ་དང། ལེའུ་བཅུ་གཉིས་པའི་འགྲེལ་པར་སྦྱོར་བ་ཡན་ལག་དྲུག་དགོངས་བཤད་དུ་གསུངས་པ་དང༌། ལེའུ་བདུན་པར་རིག་མ་འདུ་བྱ་བ་དང་

---

^{[མ་དཔེ་གཟིགས་ན་འདིར་གནོན།]}

རྡོ་རྗེ་དང་པད་མ་འདུ་བྱ་བ་ཡང་དགོངས་མིན་དུ་གསུངས་པས་སོ། །དེས་ན་དགོངས་བཤད་དང་དགོངས་མིན་གྱི་དོན་ནི་བདེ་སྟོང་སྦྱར་བ་དང་མ་སྦྱར་བའི་དེ་ཁོ་ན་ཉིད་དུ་ཡང་མ་ངེས་སོ། །འོ་ན་སྔར་སྐལ་ངན་ལ་ངེས་དོན་སྦས་པར་གསུངས་པ་དང༌། འདིར་དབང་པོ་དམན་པའི་དབང་དུ་མཛད་ནས་དེ་ཁོ་ན་ཉིད་ཀྱི་དོན་གསལ་བར་སྟོན་པའི་དགོངས་མིན་བཞག་པ་གཉིས་འགལ་ལོ་སྙམ་ན། སྔར་གྱི་སྐལ་ངན་ནི་ཚེ་དེ་ལ་རྫོགས་རིམ་ཁྱད་པར་ཅན་རྣམས་སྐྱེ་བའི་སྐལ་བ་མེད་པ་ཡིན་ལ། འདིའི་དབང་པོ་དམན་པ་ནི་དབང་པོ་རྟུལ་ཡང་རྫོགས་རིམ་ཁྱད་པར་ཅན་མང་པོ་སྐྱེ་བའི་སྐལ་བ་ཡོད་པས། དེའི་སྒོ་ནས་ཀྱང་ཁྱད་པར་ཡོད་ལ། ཡང་སྔར་གྱི་ངེས་དོན་སྦས་པ་ནི་གཞུང་གཅིག་གིས་དྲང་ངེས་ཀྱི་དོན་གཉིས་ཀ་སྟོན་པ་ན་དངོས་ཟིན་དྲང་དོན་ཡིན་པས་སྦས་པ་ཡིན་ལ། འདིར་ནི་གཞུང་གཅིག་ལ་དོན་གཉིས་མེད་པའི་མ་སྦས་པ་ཡིན་པས་ཁྱད་པར་ཆེའོ། །དགོངས་བཤད་མཛད་པ་རྣམས་ལའང་སྒྲུབ་འགལ་པ་ཤས་ཆེ་བ་དང་གཙོ་བོ་ཡིན་པས་དེ་ལྟར་བཤད་ཀྱི། །གཞུང་དེ་ལ་སྒྲ་དྲང་ཐད་དུ་གསལ་བར་སྟོན་པ་མེད་པ་ནི་མིན་ནོ། །རིགས་པ་འདི་དགོངས་མིན་ལ་ཡང་ཤེས་པར་བྱ་སྟེ། སྒྲོན་གསལ་ཞིབ་ཏུ་བལྟས་པ་ལས་ཤེས་པར་བྱའོ། །སྒྲ་ཇི་བཞིན་པ་ཡིན་མིན་ནི། །སྒྲོན་གསལ་ལས། དཀྱིལ་འཁོར་སོགས་དང་རྟོག་པ་ལ། སྤྱོད་པ་ཇི་ལྟ་ཇི་ལྟར་གསུངས། དོན་རྒྱས་བཤད་པ་གང་ཡིན་པ། དེ་ནི་ཇི་བཞིན་སྒྲར་གསུངས་སོ། །ཀོ་ཊ་ཁྱ་ལ་སོགས་པའི་སྒྲ། འཇིག་རྟེན་བསྟན་བཅོས་ལ་མེད་ཅིང༌། དེ་བཞིན་གཤེགས་

---

^{[མ་དཔེ་གཟིགས་ན་འདིར་གནོན།]}

པའི་བརྡར་གྱུར་པ། །དེ་ནི་ཇི་བཞིན་མིན་པར་བསྒྲགས། །ཞེས་གསུངས་པ་ལྟར་ཤེས་པར་བྱ་སྟེ། རྒྱུད་སྡེ་འོག་མ་གསུམ་དུ་དོན་གསལ་བར་གསུངས་པ་ལ་སོགས་པ་ནི་ཇི་ལྟར་བཤད་པའི་དོན་ལས་དོན་གཞན་གཉིས་པ་མེད་པས་སྒྲ་ཇི་བཞིན་པའོ། །འདི་ཡང་ཕལ་ཆེ་བས་ཡིན་གྱི། མ་ངེས་པ་འགའ་རེ་ནི་སྣང་ངོ་། །འཇིག་རྟེན་པ་དང་སྒྲའི་བསྟན་བཅོས་ལ་མིང་དེ་དོན་དེ་ལ་འཇུག་པ་མེད་ཀྱང༌། དེ་བཞིན་གཤེགས་པས་མིང་དེ་དོན་དེ་ལ་གློ་བུར་དུ་བརྡ་མཛད་ནས་བཞག་པ་ཀོ་ཊ་ཁྱ་ལ་སོགས་པ་རྣམས་ནི་སྒྲ་ཇི་བཞིན་མ་ཡིན་པའོ། །འདི་དང་དགོངས་བཤད་གཉིས་མི་འགལ་ལོ། །འོ་ན་དགོངས་མིན་དང་སྒྲ་ཇི་བཞིན་པ་གཉིས་འགལ་ལམ་མི་འགལ་སྙམ་ན། དགོངས་མིན་ནི་གཙོ་ཆེར་དེ་ཁོ་ན་ཉིད་ཀྱི་དོན་སྟོན་པ་དང༌། སྒྲ་ཇི་བཞིན་པ་ནི་དེ་མི་གཙོ་བའི་ཁྱད་པར་ཡོད་ཀྱང་འགལ་བ་མེད་པར་སེམས་སོ། །གཉིས་པ་ནི། བཅོམ་ལྡན་འདས་ཀྱིས་ལན་བཀའ་སྩལ་པ། དགོངས་པས་བཤད་པ་དང་ཞེས་སོགས་སོ། །གཉིས་པ་ལ་གཉིས། ཞུ་བ། ལན་ནོ། །དང་པོ་ནི། བྱམས་པས་གསོལ་པ། སྟོན་པས་གདུལ་བྱ་བ་ཐུགས་བརྩེ་བ་ཉེ་བར་བཞག་སྟེ། བཅོམ་ལྡན་འདས་མཐའ་དྲུག་གི་ཚིག་རེ་རེའི་བཤད་པ་བསྟན་དུ་གསོལ་ཞེས་ཞུས་སོ། །གཉིས་པ་ལ་གསུམ། དགོངས་པ་དང་དགོངས་མིན་གྱི་དོན་བཤད་པ། །དྲང་བ་དང་ངེས་པའི་དོན་བཤད་པ། །སྒྲ་ཇི་བཞིན་པ་དང་ཇི་བཞིན་པ་མ་ཡིན་པའི་དོན་བཤད་པའོ། །དང་པོ་ནི། བཅོམ་ལྡན་འདས་ཀྱིས་ལན་བཀའ་སྩལ་པ། །དོན་གང་

---

^{[མ་དཔེ་གཟིགས་ན་འདིར་གནོན།]}

མཐར་ཐུག་པར་བཤད་པ་འོད་གསལ་ལམ་ཟུང་འཇུག་དགོངས་པས་བཤད་པ་ནི་དགོངས་པས་བཤད་པ་སྟེ། དེ་ནི་འདི་ལྟ་སྟེ། སྣང་བ་གསུམ་རྣམ་པར་དག་པའི་དོན་འོད་གསལ་སྟོན་པ་ན། །འདོད་ཆགས་མ་ཡིན་པ་དང༌། འདོད་ཆགས་དང་བྲལ་བ་མ་ཡིན་པ་དང༌། ཆགས་པ་བར་མ་ཉེ་བར་མི་དམིགས་པ་ཞེས་བྱ་བ་ལ་སོགས་པ་སྣང་བ་གསུམ་ལ་སྒྲ་འགལ་བའི་ཚིག་གིས་བསྟན་ཞིང་དེ་བཀག་པས། འོད་གསལ་སྟོན་པ་ལ་སོགས་པའི་རྡོ་རྗེའི་ཚིག་རྣམས་ནི་དགོངས་པས་བཤད་པའོ། །དོན་འོད་གསལ་སྟོན་པ་ན་དོན་གྱི་འོད་གསལ་མངོན་དུ་བྱས་པའི་དོན་ལུས་དང་ངག་དང་ཡིད་ཀྱི་སྣང་བ་མེད་པ་དང་ཆོས་ཀྱི་བདག་མེད་པ་དང༌། ཐམས་ཅད་སྟོང་པ་དང། རང་བཞིན་གྱིས་རྣམ་པར་དག་པ་དང༌། དེའི་ཕྱིར་ན་འོད་གསལ་བ་ཞེས་བྱ་བ་ལ་སོགས་པ་སྒྲ་དྲང་ཐད་དུ་གསལ་པོར་བསྟན་པའི་རྡོ་རྗེའི་ཚིག་རྣམས་ནི་དགོངས་པ་མ་ཡིན་པའི་བཤད་པའོ། །འདི་གཉིས་ཀྱི་དོན་འདིར་བཤད་པ་ལྟར་མ་ངེས་པ་ནི་སྔར་བཤད་ཟིན་པས་སྐལ་ལྡན་གྲགས་པ་ལ་སོགས་པས་ངེས་པར་འདོད་མོད་ཀྱང་མི་འཐད་དོ། །གཉིས་པ་ནི། ཁུ་བ་ལ་སོགས་པའི་དོན་གཉིས་པ་ཡང་བསྟན་པར་བཞེད་ཀྱང་དངོས་ཟིན་ལ་ག་པུར་དང། ཁྲག་ཆེན་པོ་དང༌། ཙན་དན་དམར་པོ་དང༌། རྡོ་རྗེ་དང༌། པདྨ་དང༌། ཕྱག་རྒྱ་ཞེས་བྱ་བ་ལ་སོགས་པའི་གསང་སྔགས་ཀྱི་གཞུང་གི་རྡོ་རྗེའི་ཚིག་རྣམས་ཀྱི་དངོས་ཟིན་གྱི་དོན་ནི། ད་དུང་དོན་མི་མཐུན་པ་གཉིས་པ་ཅིག་དྲང་དུ་ཡོད་པས་དྲང་པའི་དོན་ཏོ། །གཞུང་གཅིག་ཏུ་དེ་ཉིད་ཀྱི་ག་

---

^{[མ་དཔེ་གཟིགས་ན་འདིར་གནོན།]}

པུར་ཞེས་པའི་དོན་གཉིས་པ་ནི། སྨན་ག་པུར་ལས་གཞན་པའི་ཁུ་བ་དང༌། ཁྲག་ཆེན་པོའི་དོན་གཉིས་པ་ནི་མིའི་ཁྲག་ཕལ་པ་ལས་གཞན་པའི་ཟླ་མཚན་གྱི་ཁྲག་དང༌། ཙན་དན་དམར་པོའི་དོན་གཉིས་པ་ནི་སྨན་ཙན་དན་དམར་པོ་ལས་གཞན་པ་དེའི་ཁུ་བ་དང་བསྲེས་པའི་བུད་མེད་ཀྱི་རཀྟའོ། །རྡོ་རྗེ་ཞེས་པའི་དོན་གཉིས་པ་ནི་རྩེ་ལྔ་པ་ལ་སོགས་པའི་རྡོ་རྗེ་ལས་གཞན་པའི་སྐྱེས་པའི་མཚན་མ་སྟེ་ཐབས་སོ། །པད་མ་ཞེས་པའི་དོན་གཉིས་པ་ནི་འདབ་མ་བརྒྱད་པ་ལ་སོགས་པའི་མེ་ཏོག་ལས་གཞན་པའི་བུད་མེད་ཀྱི་བྷ་ག་མཚན་མ་སྟེ་ཤེས་རབ་བོ། །ཕྱག་རྒྱ་ཞེས་པའི་དོན་གཉིས་པ་ནི་ལག་པའི་ཕྱག་རྒྱ་ལ་སོགས་ལས་གཞན་པའི་བཙུན་མོ་ཞེས་བྱ་བ་ལ་སོགས་པའི་རྡོ་རྗེའི་ཚིག་རྣམས་ཀྱི་དོན་ནི་ངེས་པའི་དོན་ཏོ། །དེས་ན་སྐལ་ལྡན་གྲགས་པ་ལ་སོགས་པས་དྲང་དོན་གྱིས་རྫོགས་རིམ་བཀག་པའི་བསྐྱེད་རིམ་ཙམ་ཞིག་སྟོན་ཞེས་པ་དང༌། དེས་དོན་གྱིས་སྟོང་ཉིད་སྟོན་གྱི་རྫོགས་རིམ་སྟོན་པའི་ངེས་པ་མེད་ཟེར་བ་ནི་མ་ངེས་པ་ཡིན་ནོ། །དྲང་ངེས་ཀྱི་དོན་དེ་འདྲ་བ་ནི་རེ་རེ་ཡང་བསྐྱེད་རྫོགས་གཉིས་ཀའི་ཡན་ལག་ཏུ་འགྱུར་བས་རིམ་པ་རེ་རེའི་ཡན་ལག་ཏུ་མ་ངེས་སོ། །གསུམ་པ་ནི། ནང་གི་ཏིང་ངེ་འཛིན་དང་ཕྱིའི་བྱ་བ་ལ་སོགས་པའི་ཆ་གཉིས་ཀ་སྟོན་པ་རྣལ་འབྱོར་གྱི་རྒྱུད་དང༌། ཕྱི་ནང་གི་ཀུན་སྤྱོད་ཆ་མཉམ་པར་སྟོན་པ་སྤྱོད་པའི་རྒྱུད་དང༌། ཕྱིའི་བྱ་བ་ཤས་ཆེར་སྟོན་པ་བྱ་བའི་རྒྱུད་རྣམས་སུ་སྔགས་དང་ཕྱག་རྒྱ་ལ་སོགས་པ་དོན་གསལ་སྟེ་སྒྲ་དྲང་ཐད་དུ་གསུངས་པ་

---

^{[མ་དཔེ་གཟིགས་ན་འདིར་གནོན།]}

ནི་སྒྲ་ཇི་བཞིན་པ་སྟེ། དེ་ནི་འདི་ལྟ་སྟེ། ཐིག་ཚོན་གྱིས་དཀྱིལ་འཁོར་བྲི་བ་སོགས་དང༌། ལྷ་ཉེར་སྤྱོད་སོགས་ཀྱིས་མཆོད་པ་སོགས་ཀྱི་མཆོད་སྦྱིན་དང༌། གཏོར་མའི་ཆོ་ག་དང༌། སྨན་གྱི་སྦྱོར་བ་རྣམས་དང༌། ཞི་བ་དང༌། སོགས་པའི་རྒྱས་པ་དང་དབང་དང་དྲག་པོ་ལ་སོགས་པའི་ལས་ཀྱི་ཚོགས་རྣམས་དང༌། དེ་བཞིན་དུ་འཇིག་རྟེན་པའི་དངོས་གྲུབ་ཆེན་པོ་བརྒྱད་ཀྱི་སྒྲུབ་པ་གསུངས་པ་རྣམས་ནི་དངོས་ཟིན་གྱི་དོན་ལས་དོན་མི་མཐུན་པ་གཞན་གཉིས་པ་མེད་པས་སྒྲ་ཇི་བཞིན་པ་སྟེ། སྒྲ་ཇི་བཞིན་པའི་དོན་འདི་ནི་ཚུལ་བཞིའི་ཡི་གེའི་དོན་གྱི་བཤད་པ་ཡང་ཡིན་ནོ། །སྒྲ་ཇི་བཞིན་པ་ལ་རྒྱུད་སྡེ་འོག་མ་གསུམ་གསུངས་པས་ནི། རྣལ་འབྱོར་བླ་མེད་ཀྱི་རྒྱུད་ལ་སྒྲ་ཇི་བཞིན་པར་བཤད་པ་མེད་པར་སྟོན་པ་མ་ཡིན་པས། །བླ་མེད་ཀྱིའང་ལས་ཚོགས་སོགས་སྒྲ་ཇི་བཞིན་པར་བཤད་པ་གཟུང་ངོ་། །འོན་ཀྱང༌། ལེའུ་བཞི་པའི་ཐུགས་ཀྱི་དཀྱིལ་འཁོར་ལ་ངེས་དོན་གྱི་བཤད་པ་དགོངས་པ་ལུང་སྟོན་ལས་གསུངས་པ་དང༌། ཉེར་སྤྱོད་ཀྱི་མཆོད་པ་ལ་ངེས་དོན་གྱི་བཤད་པ་རྡོ་རྗེ་ཕྲེང་བར་གསུངས་པ་སོགས་མང་བས། དེ་རྣམས་སྒྲ་ཇི་བཞིན་པར་གསུངས་པ་ནི་ཕལ་ཆེ་བའི་དབང་དུ་མཛད་པའོ། །སྒྲ་ཇི་བཞིན་པས་ཕྱིའི་སྤྱོད་པ་ཙམ་སྟོན་གྱི་གཞན་སྟོན་མི་ནུས་ཞེས་སྐལ་ལྡན་གྲགས་པ་སོགས་སྨྲ་བ་ནི་མི་འཐད་དེ། ལེའུ་གཉིས་པའི་རྨད་དུ་བྱུང་བའི་བསྟོད་པས་བདེན་གཉིས་སོ་སོ་བ་དང༌། ཟུང་འཇུག་གི་རྫོགས་རིམ་བསྟན་པ་རྣམས་འགྲེལ་བས་སྒྲ་ཇི་བཞིན་པར་བཤད་པའི་ཕྱིར་རོ། །ཀོ་ཊཱ་ཁྱ། ཀོ་ཊཱ་ཝ། ཀོ་ཊཱ། ཀོ་ཊཱ་ཝཤྩ།

---

^{[མ་དཔེ་གཟིགས་ན་འདིར་གནོན།]}

ཀོ་ཊཱ་ར་ག །ཀོ་ལ་ཁྱ། ཀོ་ལ་ཝ། ཀོ་ལ། ཀོ་ལ་ཝཤྩ། ཀོ་ལ་སྟ་ཐ་ཞེས་པ་འདིས་དབང་པོ་ལྔ་དང་ཡུལ་ལྔ་གསུངས་ཏེ། དེ་ལྟ་བུ་ལ་སོགས་པ་འཇིག་རྟེན་པ་དང་སྒྲའི་བསྟན་བཅོས་ལ་མིང་དེ་དོན་དེའི་དངོས་ཀྱི་མིང་དུ་འཇུག་པར་མ་གྲགས་ཀྱང༌། སྟོན་པས་དེ་ལྟར་བརྡ་མཛད་པའི་རྡོ་རྗེའི་ཚིག་རྣམས་ནི་སྒྲ་དེ་དོན་དེ་ལ་འཇུག་པར་མ་གྲགས་པས་ན་སྒྲ་ཇི་བཞིན་མ་ཡིན་པས་བཤད་པའོ། །བརྡ་བཅུ་པོ་དེས་རླུང་བཅུ་བསྟན་པར་སངས་རྒྱས་མཉམ་སྦྱོར་ལས་གསུངས་སོ། །སྐལ་ལྡན་གྲགས་པས་སྒྲ་ཇི་བཞིན་མ་ཡིན་པས་བརྡ་ཙམ་སྟོན་གྱི་བསྐྱེད་རྫོགས་གང་ཡང་སྟོན་མི་ནུས་ཞེས་ཟེར་མོད་ཀྱང༌། དེའི་ངེས་པ་ཡང་མི་སྣང་ངོ་། །གཉིས་པ་བཤད་པར་བྱ་བ་རྒྱུད་ཀྱི་རྣམ་གཞག་ལ་གསུམ། །རྒྱུད་སྡེ་ལྔའི་གཞུང་གི་གྲངས། གཞུང་དེ་རྣམས་ཀྱི་མིང་གི་མཐའ། །མིང་ཅན་གྱི་རྒྱུད་ཀྱི་དོན་བཤད་པའོ། །དང་པོ་ལ་གཉིས། ཞུ་བ། ལན་ནོ། །དང་པོ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་བླ་ན་མེད་པའི་རྣལ་འ་བྱོར་གྱི་རྒྱུད་དང༌། ནང་གི་ཏིང་ངེ་འཛིན་ཤས་ཆེ་ཞིང་ཕྱིའི་བྱ་བ་ཤས་ཆུང་བའི་ཚུལ་གྱིས་སྟོན་པའི་གཉིས་ཀའི་རྒྱུད་དང༌། དེ་གཉིས་ཆ་མཉམ་པོར་སྟོན་པའི་སྤྱོད་པའི་རྒྱུད་དང༌། དེ་གཉིས་ཕྱིའི་བྱ་བ་ཤས་ཆེ་ཞིང་གཙོ་ཆེར་མཆོག་བསྒྲུབ་པའི་ཚུལ་སྟོན་པའི་བྱ་བའི་རྒྱུད་དང༌། གཙོ་ཆེར་ཐུན་མོང་གི་དངོས་གྲུབ་སྒྲུབ་པ་གཙོ་བོར་སྟོན་པའི་རྟོག་པའི་རྒྱུད་རྣམས་ཀྱི་གཞུང་གི་ཚད་ཇི་ལྟར་ལགས་ཞེས་

---

^{[མ་དཔེ་གཟིགས་ན་འདིར་གནོན།]}

ཞུས་སོ། །སྐབས་འདིར་རྒྱུད་སྡེ་ལྔའི་རྣམ་གཞག་སྟོན་པ་ནི། །སྔར་སྒྲ་ཇི་བཞིན་པའི་སྐབས་སུ་རྒྱུད་སྡེ་གསུམ་གསུངས་པས། མཐའ་དྲུག་གི་བཤད་པ་ཚང་བ་དང་ཕྱོགས་རེ་འཇུག་པའི་གཞིར་རྒྱུད་སྡེ་ལྔ་ཀ་གཟུང་དུ་རུང་བ་ལ་འཕྲོས་ནས་གསུངས་སོ། །གཉིས་པ་ནི། བཅོམ་ལྡན་འདས་ཀྱིས་ལན་བཀའ་སྩལ་པ། བླ་ན་མེད་པའི་རྣལ་འབྱོར་ཆེན་པོའི་རྒྱུད་ཀྱི་མིང་གི་གཙོ་བོ་ལ་སྟོང་ཕྲག་བཅུ་གཉིས་ཞེས་བྱ་སྟེ། རྒྱུད་ཀྱི་མིང་གི་གསལ་བའི་དབྱེ་བ་རྒྱས་པར་བྱ་ན་གྲངས་མེད་དོ། །དེ་དག་ཀྱང་ཤོ་ལོ་ཀའི་གྲངས་མིན་གྱི་རྒྱུད་ཀྱི་གཞུང་སོ་སོའི་གྲངས་ཡིན་ཏེ། བྱ་རྒྱུད་ལ་སྟོང་ཕྲག་བཞི་ལས་མ་གསུངས་པ་ལ། དོན་ཡོད་ཞགས་པའི་ཆོ་ག་ཞིབ་མོད་ལྟ་འགྱུར་བ་ལ་སྟོང་ཕྲག་བརྒྱད་ཡོད་པར་བཤད་པའི་ཕྱིར་རོ། །རྒྱུད་འདིར་རྣལ་འབྱོར་ཆེན་པོའི་རྒྱུད་ཀྱི་ཚད་གསུངས་པ་ནི་ཐབས་རྒྱུད་ཀྱི་ཡིན་ཞེས་ཁ་ཅིག་གསུང་མོད་ཀྱང༌། ཐབས་ཤེས་ཀྱི་རྒྱུད་གཉིས་ཀའི་ཐུན་མོང་བར་གསལ་ཏེ། རྣལ་འབྱོར་ཆེན་པོའི་རྒྱུད་དོན་བཤད་པ་རྒྱུད་གཉིས་ཀའི་ཐུན་མོང་པར་སྣང་བའི་ཕྱིར་རོ། །སྡོམ་འབྱུང་ལས། རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲགས། །ཞེས་གསུངས་ཤིང༌། སངས་རྒྱས་ཐོད་པར་ཡང་དེ་དང་འདྲ་བར་གསུངས་པ་ཡང་རྒྱུད་འདི་ལྟར་ན་རྒྱུད་གཉིས་ཀྱི་གསལ་བའི་དབྱེ་བ་ཐམས་ཅད་ཀྱི་གྲངས་མིན་པར་གསལ་ལོ། །གཉིས་ཀའི་རྒྱུད་ཀྱི་མིང་ནི་སྟོང་ཕྲག་དྲུག་གོ །སྤྱོད་པའི་རྒྱུད་ཀྱི་མིང་ནི་སྟོང་ཕྲག་

---

^{[མ་དཔེ་གཟིགས་ན་འདིར་གནོན།]}

བརྒྱད་དོ། །བྱ་བའི་རྒྱུད་ཀྱི་མིང་ནི་སྟོང་ཕྲག་བཞིའོ། །རྟོག་པའི་རྒྱུད་ཀྱི་མིང་ནི་སྟོང་ཕྲག་བཞིའོ། །དེ་དག་གི་མིང་གཅིག་ཏུ་བསྡོམས་ན་སྟོང་ཕྲག་སུམ་ཅུ་རྩ་བཞིའོ། །བྱ་བའི་རྒྱུད་ལ་མཆོག་དང་ཐུན་མོང་སྒྲུབ་པ་གཙོ་བོར་སྟོན་པའི་དབྱེ་བས་བྱ་བ་དང་རྟོག་པའི་རྒྱུད་ཅེས་གཉིས་སུ་ཕྱེ་བ་ཙམ་ཡིན་པས། ཕྱོགས་གཞན་ནས་རྒྱུད་སྡེ་བཞིར་བསྡུས་པ་དང་མི་འགལ་ལོ། །གཉིས་པ་ནི། རྒྱུད་དང་རྟོག་པའི་མིང་གི་མཐའ་མའི་ཡི་གེ་ཇི་སྙེད་པ་ནི། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་སྟེ་འདི་རྣམས་ནི་རྒྱུད་སྡེའི་མིང་གི་ཡི་གེ་ཐ་མ་རྣམས་སོ། །དཔེ་ཁ་ཅིག་ལས་ཀྵ་འབྱུང་བ་ནི་སྟོང་ཕྲག་སོ་བཞིའི་གྲངས་དང་འགྲིག་པ་ལྟར་སྣང་ཡང་སྒྲོར་གསལ་ལས། ཇི་སྲིད་ཡ་ར་ལ་ཧའི་བར། ཞེས་གསུངས་པས་ཀྵ་མེད་པ་དག་པར་མངོན་ནོ། །སྤྱོད་བསྡུས་སུ་ཡང་གསལ་བྱེད་བགྲངས་པ་ན་ཀྵ་ཡིག་མ་བྱུང་སྟེ། དེ་ནི་ཀ་དང་ཥ་བརྩེགས་པ་ཡིན་པས་ལོགས་པ་མེད་པ་ལ་དགོངས་སོ། །དེ་རྣམས་ཀྱི་མཐའ་ཅན་ནི་དཔེར་ན་ཛྙཱ་ན་བཛྲ་ས་མུཙྪ་ཡ་ཞེས་པ་ཡེ་ཤེས་རྡོ་རྗེ་ཀུན་ལས་བཏུས་པ་ཡའི་མཐའ་ཅན་དང། བཛྲ་མཱ་ལ་ཞེས་བ་རྡོ་རྗེ་ཕྲེང་བ་ལའི་མཐའ་ཅན་ལྟ་བུ་སྟེ། །དེ་འདྲ་བ་སྟོང་ཕྲག་བཅུ་གཉིས་ལ་སོགས་པའོ། །སྒྲོན་གསལ་ལས་ཀྱང༌། ཇི་སྲིད་ཡ་ར་ལ་ཧའི་བར། ཀ་ཁ་གྷ་མཐའ་ཎ་ཛའི་མཐའ། །ད་དྷའི་མཐའ་དང་མ་མཐར་བཅས། དེ་དེའི་རྩ་བ་ཡི་གེ་གསུམ། །ཞེས་གསུངས་ཏེ། གསལ་བྱེད་ཀྱི་མཐའ་ཅན་གྱིས་ནི་དབྱངས་ཀྱི་མཐའ་ཅན་གྱི་རྒྱུད་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱང་མཚོན་པ་ཡིན་ནོ། །དེ་དེའི་རྩ་བ་ཡི་གེ་གསུམ། །ཞེས་པས་ནི། རྒྱུད་སྡེ་བཞི་པོ་ཐམས་ཅད་ཀྱི་རྩ་བ་འདུས་པ་ཡིན་པར་སྟོན་ལ། ཡི་གེ་གསུམ་ནི་བོད་ཀྱི་མཁས་པ་རྣམས་ས་མ་ཛ་ཞེས་པ་ལ་བཞེད་ལ། ནཱ་རོ་པ་ལ་སོགས་པས་ༀ་ཨཱཿཧཱུཾ་ལ་བཞེད་དོ། །དེ་ནི་རྒྱུད་ཕྱི་མ་ལས་གསང་བ་འདུས་པ་ཞེས་པའི་འདུ་རྒྱུའི་གསང་བ་ནི་སྐུ་གསུང་ཐུགས་གསུམ་ལ་བཤད་པས། ༀ་ཨཱཿཧཱུཾ་གསུམ་ལ་བྱེད་ན་འདུ་རྒྱུའི་གསང་བ་གསུམ་ལ་བྱ་ལ། ས་མ་ཛ་ལ་བྱེད་ན། དེ་གསུམ་འདུས་པ་ལ་བྱ་སྟེ་དོན་གཅིག་ཏུ་བྱའོ། །དེ་ལྟ་མ་ཡིན་པར་རྡོ་རྗེ་གསུམ་དུ་རྒྱུད་སྡེ་རྣམས་ཀྱི་དོན་འདུ་བ་ཙམ་ལ་བཤད་ན་སྐབས་དོན་སྟོར་བར་འགྱུར་ཏེ། འདི་ནི་འདུས་པ་རྒྱུད་སྡེ་ཀུན་གྱི་རྩ་བར་སྟོན་པའི་སྐབས་ཡིན་པའི་ཕྱིར་རོ། །རྩ་བའི་དོན་ནི་དཔེར་ན། ཤིང་སྡོང་པོའི་རྩ་བ་ལས་ཡལ་ག་དང་ལོ་མ་སོགས་གྱེས་པས། དེ་རྣམས་དེར་འདུ་བ་བཞིན་དུ། །འདུས་པའི་ལམ་དུ་རྒྱུད་སྡེ་ཀུན་གྱི་ལམ་རྣམས་འདུ་བས་འདུས་པ་རྩ་བར་གསུངས་སོ། །འདུས་ཚུལ་ནི་རྒྱུད་སྡེ་ཀུན་གྱི་དོན་མདོར་བསྡུ་ན་མཆོག་དང་ཐུན་མོང་སྒྲུབ་པ་གཉིས་སུ་འདུ་ལ། །དེ་གཉིས་སྒྲུབ་པའི་གནད་རྣམས་ཡོངས་སུ་རྫོགས་པར་རྒྱུད་འདིས་སྟོན་པའོ། །དེ་བཞིན་དུ་མདོ་སྡེའི་ཆོས་ཕུང་བརྒྱད་ཁྲི་བཞི་སྟོང་གི་དོན་རྣམས་ཐར་པ་དང་ཐམས་ཅད་མཁྱེན་པ་སྒྲུབ་པར་འདུ་ལ། དེའི་ལམ་གྱི་གནད་ཐམས་ཅད་ཀྱང་འདི་ནས་སྟོན་པས་མདོ་སྡེ་ཀུན་གྱིའང་སྣོད་དུ་གསུངས་ཏེ། སྒྲོན་གསལ་ལས། ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་བཞི་སྟོང་གསུངས་

---

^{[མ་དཔེ་གཟིགས་ན་འདིར་གནོན།]}

པ་ཡི། །དཔལ་ལྡན་འདུས་འདི་སྣོད་ཡིན་ཏེ། དེ་བས་དེ་ནི་རྒྱུད་ཀྱི་རྩེ། །ཞེས་གསུངས་སོ། །དེ་ཉིད་ཀྱི་ཕྱིར་ན་རྒྱུད་འདི་ལ་ཤིན་ཏུ་ངོ་མཚར་བའི་བསྔགས་པ་མང་དུ་གསུངས་ཏེ། དགྲ་ནག་གི་རྒྱུད་ལས། །རྒྱུད་ཀྱི་མཐར་ཐུག་འདུས་པ་སྟེ། མ་བྱུང་འབྱུང་བར་མི་འགྱུར་རོ། །ཞེས་དང༌། འཇམ་དཔལ་གྱི་ཞལ་གྱི་ལུང་ལས་ཀྱང༌། །སངས་རྒྱས་ཀུན་གྱི་འདུས་པའི་རྒྱུད། །གསང་ཆེན་གསང་བ་ཆེས་གསང་བ། །གོང་ན་མེད་པའི་ལུང་ཆེན་པོ། །ཞེས་དང༌། །གསང་བ་གྲུབ་པ་ལས་ཀྱང༌། དཔལ་ལྡན་འདུས་ལས་མཆོག་གཞན་མེད། །འཇིག་རྟེན་གསུམ་གྱི་རིན་ཆེན་འགྱུར། །སྙིང་པོ་ལས་ནི་སྙིང་པོ་མཆོག །རྒྱུད་ཀུན་གྱི་ནི་བླ་མའི་བླ། །བསྟན་དང་བཤད་པས་རྣམ་གནས་ན། །རྫོགས་པའི་རྣལ་འབྱོར་རིམ་པ་ཉིད། འདུས་པ་གང་གིས་མི་ཤེས་པ། དེ་ཡིས་དངོས་གྲུབ་ཇི་ལྟར་ཐོབ། །ཐེ་ཚོམ་ཐམས་ཅད་གཅོད་བྱེད་ཅིང༌། མི་ཤེས་རབ་རིབ་སེལ་བྱེད་པ། སངས་རྒྱས་རིན་ཆེན་ཟ་མ་ཏོག །དཔལ་ལྡན་འདུས་པ་ཡོངས་སྤངས་ནས། རྣམ་རྟོག་ཏུ་མས་བརྟགས་པ་ཡི། །རྨོངས་པ་དངོས་གྲུབ་འདོད་གྱུར་པ། །མཁའ་ལ་ཁུ་ཚུར་བརྡེག་པ་དང༌། །སྨིག་རྒྱུའི་ཆུ་ལ་འཐུང་བ་བཞིན། །ཞེས་གསུངས་སོ། །དེ་ལྟར་ཀ་ཁ་ག་གྷ་ལ་སོགས་པའི་ཡི་གེའི་མཐའ་ཅན་གྱི་རྒྱུད་སྡེ་ཀུན་གྱི་རྩ་བ་ཡིན་པར་བསྟན་པ་ནི། ཡེ་ཤེས་རྡོ་རྗེ་ཀུན་ལས་བཏུས་ཀྱི་དགོངས་པ་ཡིན་ལ། ཆོས་ཕུང་བརྒྱད་ཁྲི་བཞི་སྟོང་གི་མདོ་སྡེ་ཀུན་གྱི་སྣོད་དུ་གྱུར་པ་ནི་བཤད་རྒྱུད་རྡོ་རྡེ་ཕྲེང་བའི་

---

^{[མ་དཔེ་གཟིགས་ན་འདིར་གནོན།]}

དགོངས་པའོ། །གསུམ་པ་ལ་གཉིས། ཞུ་བ། ལན་ནོ། །དང་པོ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ་བཅོམ་ལྡན་འདས་ཞེས་པོས་ནས་རྒྱུད་ལྔ་པོ་དེ་རྣམས་ཀྱི་ཐབས་གང་གིས་བསྒྲུབ་བྱ་སྒྲུབ་པའི་བྱེད་པ་དང༌། རྒྱུད་དོན་གཏན་ལ་འབེབས་པའི་ཆོ་ག་སྟེ་ཐབས་དག །བསྒྲུབ་པར་བྱ་བའི་འབྲས་བུ་དང༌། སྒྲུབ་པ་པོའི་རྟེན་དེ་རྣམས་གང་ལགས་ཞེས་ཞུས་སོ། །གཉིས་པ་ལ་ལྔ། རྣལ་འབྱོར་ཆེན་པོའི་རྒྱུད་ཀྱི་དོན། །སྤྱོད་པའི་རྒྱུད་ཀྱི་དོན། །བྱ་བའི་རྒྱུད་ཀྱི་དོན། །རྟོག་པའི་རྒྱུད་ཀྱི་དོན་བཤད་པའོ། །དང་པོ་ནི། བཅོམ་ལྡན་འདས་ཀྱིས་ལན་བཀའ་སྩལ་པ། དོན་དམ་པའི་བདེན་པ་འོད་གསལ་བ་ལས་བདག་བྱིན་གྱིས་བརླབ་པ་དག་པའི་སྒྱུ་མའི་སྐུའི་རིམ་གྱིས་ལངས་ཏེ། བཙུན་མོའི་འཁོར་གྱི་དབུས་སུ་ཡང་དག་པར་བཞུགས་ཞེས་ཚིག་རྣམ་པར་སྦྱར་རོ། །སྐུའི་ཆ་ལུགས་ཇི་འདྲ་བ་ཞེ་ན། ཆགས་པ་དང་བྲལ་བའི་གཟུགས་སྤངས་ནས། །ཆགས་ཅན་ལྟར་སྣང་བའི་འཁོར་ལོས་སྒྱུར་བའི་གཟུགས་ཀྱིས་སོ། །བྱ་བ་ཅི་ཞིག་མཛད་པས་བཞུགས་ཤེ་ན། བཙུན་མོའི་བྷ་ག་ལ་རོལ་བའི་ཚུལ་གྱིས་སོ། །དེ་ལྟར་མཛད་པའི་དགོས་པ་ནི། འདོད་ཡོན་ལ་ཆགས་པ་ལམ་དུ་བྱས་པ་ལས་བྱུང་བའི་བྱང་ཆུབ་ཀྱི་གནས་ཏེ་གོ་འཕང་འཐོབ་པ་རབ་ཏུ་བསྟན་པའི་ཕྱིར་རུ་སྟེ་འདི་ནི་བསྒྲུབ་བྱའོ། །དེ་ཡང་བདེ་བ་ཆེན་པོས་དེ་ཁོ་ན་ཉིད་ངེས་པའི་བདེ་སྟོང་དབྱེར་མེད་ཀྱི་ཏིག་ངེ་འཛིན་གྱིས་གོ་འཕང་དེ་སྒྲུབ་པར་བྱེད་པ་ཡིན་ཏེ་འདི་ན་བྱེད་པའོ། །བགྲོད་བྱ་མིན་པ་ལ་བགྲོད་པ་ལ་སོགས་པ་

---

^{[མ་དཔེ་གཟིགས་ན་འདིར་གནོན།]}

འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བའི་རྡོ་རྗེའི་ཚིག་རྣམས་ཀྱི་དོན་མཐའ་དྲུག་གང་གིས་རབ་ཏུ་དཔྱོད་པར་བྱེད་པ་ནི་ཆོ་གའོ། །མཐའ་དྲུག་གིས་རྒྱུད་དོན་དཔྱད་དེ་རྟེན་དེས་བསྒྲུབ་པར་བྱ་བ་སྒྲུབ་པར་བྱེད་པ་ནི་སྒྲུབ་པ་པོའོ། །དེ་འདྲ་བ་དེ་ནི་བླ་ན་མེད་པའི་རྣལ་འབྱོར་གྱི་རྒྱུད་ལ་གནས་སོ། །གཉིས་པ་ནི། རིག་པའི་ལྷ་མོ་རྣམས་ཀྱིས་ཡོངས་སུ་བསྐོར་ཏེ་དེ་རྣམས་དང་ལྷན་ཅིག་དཀྱིལ་འཁོར་གྱི་འཁོར་ལོ་དགོད་པ་སྟེ་བཀོད་པའི་གོ་འཕང་ནི་བསྒྲུབ་པར་བྱའོ། །དཀྱིལ་འཁོར་བཀོད་པ་དེ་ལ་དམིགས་པ་ལས་བྱུང་བའི་ལྷའི་རྣལ་འབྱོར་ནི་བྱེད་པའི་ལས་སོ། །བསྒྲུབ་པར་བྱ་བ་ལ་སོགས་པ་རྣམ་པ་བཞི་ལས་བརྩམས་པའི་དེ་ཁོ་ན་ཉིད་རྣམ་པ་བཅུ་རབ་ཏུ་དཔྱོད་པར་བྱེད་པ་ནི་ཆོ་གའོ། །དེ་ཉིད་བཅུ་རི། །རྡོ་རྗེ་སྙིང་པོ་རྒྱན་གྱི་རྒྱུད་ལས། དཀྱིལ་འཁོར་ཏིང་འཛིན་ཕྱག་རྒྱ་དང༌། སྟང་སྟབས་འདུག་སྟངས་བཟླས་བརྗོད་དང༌། སྦྱིན་སྲེག་མཆོད་པ་ལས་སྦྱོར་དང༌། སླར་སྡུད་པ་ཡི་རྣམ་པ་ནི། ཕྱི་ཡི་དེ་ཉིད་བཅུ་ཡིན་ནི། ཞེས་ཕྱིའི་དེ་ཉིད་བཅུ་གསུངས་པ་ནི། འདིར་གཉིས་ཀའི་རྒྱུད་ཅེས་གསུངས་པ་རྣལ་འབྱོར་རྒྱུད་ཀྱི་ཡིན་ཏེ། འདི་དང་སྒྱུ་འཕྲུལ་དྲ་བ་ལས་གསུངས་པའི་དེ་ཉིད་བཅུ་ནི་འདྲ་བར་སྣང་ངོ་། །དེ་ལ་ཏིང་ངེ་འཛིན་ནི་དང་པོ་སྦྱོར་བ་ལ་སོགས་པ་དང༌། སྟང་སྟབས་ནི་གཡས་བརྐྱང་ལ་སོགས་པ་དང༌། འདུག་སྟངས་ནི་རྡོ་རྗེ་སྐྱིལ་ཀྲུང་ལ་སོགས་པ་དང༌། ལས་ལ་སྦྱོར་བ་ནི། བསྲུང་ཞིང་སྤྱན་དྲང་བ་ལ་

---

^{[མ་དཔེ་གཟིགས་ན་འདིར་གནོན།]}

སོགས་པ་དང༌། གཤེགས་སུ་གསོལ་བ་ནི་མཆོད་བསྟོད་སོགས་སྔོན་དུ་འགྲོ་བས་གཤེགས་སུ་གསོལ་བ་ལ་རེབ་ཞི་བཤེས་གཉེན་གྱིས་སྒྱུ་དྲའི་འགྲེལ་བར་བཤད་ལ། །ཀུན་སྙིང་གི་འགྲེལ་བར་ལས་ལ་སྦྱོར་བ་ཞི་སོགས་ཀྱི་ལས་ལ་སྦྱོར་བ་ལ་བཤད་དོ། །ལྷག་མ་ནི་གོ་སླའོ། །དེ་ཉིད་སྣང་བ་ལས་སྔར་དང་ཐ་སྙད་ཅུང་ཟད་མི་འདྲ་བའི་དེ་ཉིད་བཅུ་གསུངས་མོད་ཀྱང༌། དོན་ནི་འདྲ་བར་སྣང་ངོ་། །དེ་ལྟར་དེ་ཉིད་བཅུའི་རྒྱུད་དོན་དཔྱད་དེ་རྟེན་དེས་ལམ་དེ་སྒྲུབ་པར་བྱེད་པ་ནི་སྒྲུབ་པ་པོའོ། །དེ་འདྲ་བའི་ཁྱད་པར་བཞི་དང་ལྡན་པ་དེ་ནི་གཉིས་ཀའི་རྒྱུད་ཅེས་པ་རྣལ་འབྱོར་རྒྱུད་ལ་གནས་སོ། །གསུམ་པ་ནི། ཕྱིའི་ཁྲུས་དང་གཙང་སྦྲ་ལ་སོགས་པའི་ལས་ཀྱི་བྱ་བ་གྲངས་སྣ་ཚོགས་པ་རྒྱ་ཆེན་པོ་ནི་ཐབས་གང་གིས་སྒྲུབ་པའི་བྱེད་པ་ཡིན་ལ། འདིས་ནི་ནང་གི་ལྷའི་རྣལ་འབྱོར་ཡང་མཚོན་པ་ཡིན་ནོ། །བྱ་བའི་རྒྱུད་ཀྱི་སྔགས་དང་ཕྱག་རྒྱ་ལ་དམིགས་པ་སྟེ་བརྩམས་པའི་མཚན་ཉིད་དེ་རྣམས་བཟླས་བརྗོད་ཡན་ལག་བཞི་ལ་སོགས་པའི་སྒོ་ནས་རབ་ཏུ་དཔྱོད་པར་བྱེད་པ་ནི་ཆོ་གོའོ། །དེ་ལྟར་དཔྱད་པའི་ཐབས་དེས་བསྒྲུབ་པར་བྱ་བ་ནི་སངས་རྒྱས་ཀྱི་གོ་འཕང་ངོ་། །དེ་ལྟར་རྟོགས་ནས་སྒྲུབ་པར་བྱེད་པའི་རྟེན་ནི་སྒྲུབ་པ་པོའོ། །དེ་འདྲ་བའི་ཁྱད་པར་བཞི་དང་ལྡན་པ་ནི་སྤྱོད་པའི་རྒྱུད་ལ་གནས་པའོ། །བཞི་པ་ནི། ཤས་ཆེར། །ལྷའི་རྣལ་འབྱོར་སྒོམ་པ་སོགས་ནང་གི་བྱ་བ་ལ་འཇིགས་པར་དམིགས་པ་སྟེ་ལྟ་ཞིང་ཤིན་ཏུ་གཙང་བར་བྱེད་པའི་གཙང་སྦྲ་ལ་གནས་པ་དང༌། ཕྱི་ནས་ཡེ་ཤེས་སེམས་

---

^{[མ་དཔེ་གཟིགས་ན་འདིར་གནོན།]}

དཔའ་རང་ལ་འཇུག་པའི་བདེ་བ་དམ་པ་སྟེ་མཆོག་མེད་པ་དང༌། ཤས་ཆེར་བདག་ཉིད་ལྷར་ང་རྒྱལ་བྱེད་པའི་སྙེམས་པ་མེད་པ་དང༌། སྔར་བཤད་པ་ལྟར་གྱི་རྨད་དུ་བྱུང་བའི་སྤྱོད་ཡུལ་ལ་སྤྱོད་པ་མ་ཡིན་པའི་ཚུལ་གྱིས་ཕྱིའི་བྱ་བ་མང་པོ་སྒྲུབ་པར་བྱེད་པ་ནི་བྱེད་པའོ། །སྐྱོན་ནི་སྐྱེ་རྒ་སོགས་ཀྱི་འཁོར་བའི་རྒུད་པའོ། །དེའི་རྒྱུའི་རྟོག་པ་ནི་ཉོན་མོངས་ཀྱི་རྩ་བ་དངོས་པོ་ལ་བདེན་པར་འཛིན་པའོ། །དེ་དང་བཅས་པའི་ཚུལ་གྱིས་རྒྱུད་ཀྱི་དོན་རབ་ཏུ་དཔྱོད་པ་ནི་ཆོ་གའོ། །ཐབས་དེས་རྒྱུད་དོན་རྟོགས་པའི་རྟེན་ནི་སྒྲུབ་པར་བྱེད་པ་པོའོ། །བསྒྲུབ་བྱ་ནི་སྔར་བཞིན་ནོ། །དེ་འདྲ་བའི་ཁྱད་པར་བཞི་དང་ལྡན་པ་དེ་ནི་བྱ་བའི་རྒྱུད་ལ་རབ་ཏུ་གནས་པའོ། །སློབ་དཔོན་སངས་རྒྱས་གསང་བས་བྱ་རྒྱུད་རྡོ་རྗེ་གཙུག་ཏོར་དང༌། རྣམ་འཇོམས་ཀྱི་རྒྱུད་རྒྱས་པ་དྲངས་ནས་རང་ལྷར་བསྐྱེད་པ་བསྟན་པ་དང༌། བྱ་རྒྱུད་སོ་སོ་གཞན་དག་ཏུ་རང་ལྷར་སྐྱེད་པ་གསལ་བར་མ་བཤད་པ། །རླུང་ཕྱིར་འགྲོ་བ་བཀག་ནས་རང་ལྷར་སྒོམ་པ་མི་ནུས་པའི་དབང་དུ་མཛད་པར་བཤད་ལ། སློབ་དཔོན་བྱང་ཆུབ་མཆོག་གིས་ཀྱང་བྱ་རྒྱུད་ཕལ་ཆེ་བར་རང་ལྷར་སྒོམ་པ་མི་གསལ་ཡང༌། ལག་ན་རྡོ་རྗེ་དབང་བསྐུར་བའི་རྒྱུད་དང༌། དེ་ཁོ་ན་ཉིད་བཅུ་པ་ལས་བཤད་པས། བྱ་བའི་རྒྱུད་ལས་རང་ལྷར་སྒྲུབ་པ་མ་བསྟན་ཏོ་སྙམ་དུ་མི་བསམ། ཞེས་གསུངས་པས། བྱ་རྒྱུད་ལ་རང་ལྷར་སྐྱེད་པ་མེད་པར་གསུངས་པ་ནི་བྱ་རྒྱུད་ཕལ་ཆེ་བ་དང༌། གདུལ་བྱའི་ཁྱད་པར་འགའ་ཞིག་ལ་

---

^{[མ་དཔེ་གཟིགས་ན་འདིར་གནོན།]}

དགོངས་ཀྱི་བྱ་རྒྱུད་ཐམས་ཅད་ཀྱི་དབང་དུ་བྱས་པ་མིན་ནོ། །རྒྱུད་འདི་ཉིད་ལས་ཀྱང་སྤྱོད་རྒྱུད་ཀྱི་སྐབས་སུ། །བྱ་བའི་རྒྱུད་ཀྱི་ཕྱག་རྒྱ་དམིགས་པའི་མཚན་ཉིད། ཅེས་གསུངས་པས། ལྷའི་རྣལ་འབྱོར་ཡོད་པའི་བྱ་རྒྱུད་དང་སྤྱོད་རྒྱུད་གཉིས་ལྷའི་རྣལ་འབྱོར་མཚུངས་པས་དེ་གཉིས་བསྡུས་ནས་བཤད་ཅིང༌། ལྷའི་རྣལ་འབྱོར་མ་བཤད་པའི་བྱ་རྒྱུད་ལ་བྱ་བའི་རྒྱུད་ཅེས་བཏགས་པ་ཙམ་མོ། །དེ་དག་ལས་ཆོས་ཀྱི་བདག་མེད་གསལ་བར་མ་བསྟན་པའི་རྒྱུད་རྣམས་ལ་དགོངས་ནས། མཚན་འཛིན་གྱི་རྟོག་པས་རབ་ཏུ་དཔྱོད། ཅེས་ཀྱང་གསུངས་སོ། །འདི་རྣམས་རྒྱས་པར་ནི་རྡོ་རྗེ་འཆང་གི་ལམ་གྱི་རིམ་པར་བཤད་ཟིན་པས་འདིར་མ་སྤྲོས་སོ། །ལྔ་པ་ནི། སྔགས་དང་སྨན་དང་སྦྱིན་སྲེག་དང༌། རྫས་ཕྱེ་མ་དང༌། མིག་སྨན་དང༌། རྐང་མགྱོངས་ལ་སོགས་པ་དངོས་གྲུབ་ཆེན་པོ་བརྒྱད་ནི་བསྒྲུབ་པར་བྱ་བའོ། །བརྒྱད་ནི་འདིར་དངོས་སུ་དྲུག་སྨོས་ནས་གཉིས་མ་བསྟན་ལ། །ལྷ་མོ་བཞིས་ཞུས་ལས། རྫས་བརྒྱད་ཡན་ལག་བསྒྲུབ་པ་བཤད། །རི་ལུ་མིག་སྨད་དངོས་གྲུབ་དང༌། ས་འོག་རལ་གྲིའི་དངོས་གྲུབ་དང༌། ནམ་མཁར་འཕུར་དང་མི་སྣང་དང་། །ཤི་བ་མེད་དང་ནད་འཇོམས་སོ། །ཞེས་གསུངས་སོ། །རྡོ་རྗེ་གུར་ལས་ཀྱང༌། མིག་སྨན་དང་ནི་རྐང་མགྱོགས་དང༌། རལ་གྲི་དང་ནི་ས་འོག་འགྲུབ། །རི་ལུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །ཞེས་གསུངས་སོ། །གཙོ་བོར་དངོས་གྲུབ་བརྒྱད་སྒྲུབ་པ་རྟོག་པའི་རྒྱུད་ཀྱི་དོན་རབ་ཏུ་དཔྱོད་པར་བྱེད་པ་ནི་ཆོ་གའོ། །

---

^{[མ་དཔེ་གཟིགས་ན་འདིར་གནོན།]}

དེ་རྟོགས་ནས་དེ་རྣམས་སྒྲུབ་པར་བྱེད་པ་ནི་བྱེད་པའོ། །བྱེད་པ་དེ་གང་ལ་གནས་པའི་རྟེན་ནི་སྒྲུབ་པ་པོའོ། །དེ་འདྲ་བའི་ཁྱད་པར་བཞི་དང་ལྡན་པ་ནི་རྟོག་པའི་རྒྱུད་ལ་གནས་པའོ། །གསུམ་པ་རྒྱུད་བཤད་ཐབས་ཀྱི་མན་ངག་ཚང་བར་བསྟན་པ་ལ་གཉིས། ཞུ་བ། ལན་ནོ། །དང་པོ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། །བཅོམ་ལྡན་འདས་བླ་ན་མེད་པའི་རྣལ་འབྱོར་གྱི་རྒྱུད་རྣམས་ཀྱི་བཤད་ཐབས་རྒྱན་རྣམ་པ་བདུན་ཇི་ལྟར་ལགས་ཞེས་ཞུས་སོ། །སྔར་བཤད་ཐབས་ཀྱི་སྒོ་གཉིས་ཞུས་མོད་ཀྱང༌། བཤད་ཐབས་ཀྱི་མན་ངག་ཚང་བ་ཤེས་པའི་ཕྱིར་དུ་ཞུས་སོ། །གཉིས་པ་ལ་གཉིས། རྒྱན་བདུན་སོ་སོའི་གྲངས་ཀྱི་དབྱེ་བ། །རྒྱན་བདུན་སོ་སོའི་མིང་གི་དབྱེ་བའོ། །དང་པོ་ནི། བཅོམ་ལྡན་འདས་ཀྱིས་ལན་བཀའ་སྩལ་པ། གླེང་བསླང་བའི་རྒྱན་ལ་གྲངས་རྣམ་པ་ལྔ་དང། ཚིག་དང་དོན་གྱི་མཐའི་རྒྱན་ལ་མཐའ་དྲུག་གིས་བཤད་པ་རྣམ་པ་དྲུག་དང༌། འཚང་རྒྱ་བའི་རིག་པ་སྟེ་ཚུལ་གྱི་རྒྱན་ལ་ལམ་གྱི་རིམ་པ་རྣམ་པ་བཞི་དང༌། ཚུལ་གྱི་བཤད་པའི་རྒྱན་ལ་བཤད་པའི་ཚུལ་རྣམ་པ་བཞི་དང༌། སློབ་མ་ལ་འཆད་ཚུལ་གྱི་རྒྱན་ལ་བཤད་པའི་དབྱེ་བ་རྣམ་པ་གཉིས་དང༌། རྒྱུད་ལ་འཇུག་པ་གང་ཟག་གི་རྒྱན་ལ་གང་ཟག་རྣམ་པ་ལྔའི་སློབ་མ་བརྟག་པ་སྟེ་དེའི་མཚན་ཉིད་བཤད་པ་དང༌། དགོས་པའི་རྒྱན་ནི་བདེན་པ་རྣམ་པ་གཉིས་ཀྱི་དགོས་པ་ངེས་པ་རྣམས་སོ། །གཞུང་ཚིག་ཉུང་ལ་དོན་གྱི་གནས་མང་པོའི་འདུས་པའི་རྒྱུད་རྟོགས་དཀའ་བ་ལ་འཇུག་པ་རྣམས་ཀུན་ཏུ་

---

^{[མ་དཔེ་གཟིགས་ན་འདིར་གནོན།]}

འཁྲུལ་བར་འགྱུར་བ་ནི་རྒྱན་བདུན་ཇི་ལྟ་བ་བཞིན་དུ་མི་རྟོག་པས་ཡིན་ཏེ། སྒྲོན་གསལ་པ་ཚབ་ཀྱིས་བསྒྱུར་བ་ལས། འདུས་པའི་རྒྱུད་ནི་གཞུང་ཉུང་ཞིག །དོན་མང་རྟོགས་པར་དཀའ་བ་ལ། །རྣམ་པ་ཀུན་ཏུ་འཁྲུལ་འགྱུར་ཏེ། རྒྱན་བདུན་རྟོགས་པར་དཀའ་ཕྱིར་རོ། །ཞེས་གསུངས་སོ། །རྒྱན་བདུན་པོ་དེ་ཉིད་ཀྱིས་བླ་ན་མེད་པའི་རྣལ་འབྱོར་གྱི་རྒྱུད་བཤད་དགོས་ཀྱི་དེ་དོར་བའི་བཤད་ཐབས་གཞན་གྱིས་ནི་རྒྱུད་དོན་རྫོགས་པར་མི་རྙེད་དེ། །སྒྲོན་གསལ་པ་ཚབ་ཀྱིས་བསྒྱུར་བ་ལས། གང་ཕྱིར་བཤད་རྒྱུད་རྗེས་འབྲངས་ནས། རྣམ་བཤད་ཤིན་ཏུ་རྙེད་དཀའ་སྨྲས། །འདི་ཉིས་ཀྱིས་ནི་རྣལ་འབྱོར་རྒྱུད། །བཤད་ཀྱིས་རྣམ་པ་བཞིན་དུ་མིན། །ཞེས་གསུངས་སོ། །ཆག་ལོ་ཙཱ་བས། བཤད་པའི་རྒྱུད་ཀྱི་རྗེས་འབྲངས་ནས། གསུང་བཤད་ཤིན་ཏུ་རྙེད་པར་དཀའ། །རྣལ་འབྱོར་རྒྱུད་ནི་འདི་ཉིད་ཀྱིས། ངེས་པར་བྱེད་ཀྱི་གཞན་དུ་མིན། །ཞེས་བསྒྱུར་ཏེ་འགྱུར་གཉིས་པོ་དེ་སྔོན་གྱི་འགྱུར་ལས་ལེགས་པར་སྣང་ངོ་། །དེ་ན་བཤད་ཐབས་ཀྱི་རྒྱན་བདུན་ལེགས་པར་རྟོགས་པ་ནི། །འདུས་པ་དང་དེ་འདྲ་བའི་རྩི་བའི་རྒྱུད་རྣམས་འཆད་པ་ལ་ཤིན་ཏུ་གལ་ཆེ་བ་ཡིན་ནོ། །འདིར་རྒྱན་བདུན་སོ་སོ་ལ་དབྱེ་བ་མཛད་པའི་རྒྱན་གྱི་གྲངས་ནི་ཉེར་བརྒྱད་ཡིན་ལ། དེ་ཡང་བརྒྱན་པར་བྱ་བའི་གཞི་ནི་འདུས་པའི་རྒྱུད་ལྟ་བུའོ། །དེ་གང་གིས་བརྒྱན་པར་བྱེད་པ་ནི་བདུན་ནམ་ཉེར་བརྒྱད་དོ། །བརྒྱན་ཚུལ་བསྡུས་ན་ངོ་བོ་ཐ་མི་དད་པའི་རྒྱན་དང༌། ཐ་དད་པའི་རྒྱན་གཉིས་སུ་འདོད་དོ། །དང་པོ་ནི། ཁ་ཅིག་མཐའ་

---

^{[མ་དཔེ་གཟིགས་ན་འདིར་གནོན།]}

དྲུག་གིས་བཤད་པ་དང༌། ཚུལ་བཞིས་བཤད་པ་དང༌། ཚད་དང༌། བཤད་པའི་དབྱེ་བ་གཉིས་ཏེ་བཅུ་གསུམ་དུ་འདོད་ལ། གཞན་དག་ནི་རྒྱུད་ཀྱི་མིང་དང་བཅུ་བཞིར་འདོད་དོ། །གཉིས་པ་ནི་དེ་དག་གི་ལྷག་མ་བཅུ་བཞིར་འདོད་དོ། །བྱེད་པ་པོ་དང་དགོས་པ་དང་གང་ཟག་དང་བདེན་གཉིས་ངེས་པའི་རྒྱན་རྣམས་རྒྱུད་ཀྱི་གཞུང་ལས་ངོ་བོ་ཐ་དད་དུ་ཡོད་མོད་ཀྱང༌། ལྷག་མ་རྣམས་ནི་ཆ་གཉིས་ཀར་བཤད་དུ་རུང་བར་སྣང་ངོ་། །རྒྱན་གྱི་དོན་ནི་དཔེར་ན་རང་བཞིན་གྱི་རྒྱན་གཟུངས་བཟང་པོ་ལ་མཛེས་བྱེད་ཀྱི་རྒྱན་གཙུག་རྒྱན་ལ་སོགས་པས་སྤུད་ན་ཡིད་ལ་དགའ་བ་སྐྱེད་པ་བཞིན་དུ། །འདིར་ཡང་རང་བཞིན་གྱི་རྒྱན་རྒྱུད་ཀྱི་གཞུང་བཟང་པོ་ལ་བཤད་ཚུལ་གཉིས་ལ་སོགས་པའི་རྒྱན་གྱིས་བརྒྱན་པ་ན་མཁས་པའི་ཡིད་འཕྲོག་པར་བྱེད་པས་རྒྱན་ནོ། །གཉིས་པ་ལ་བདུན། གླེང་བསླང་གི་རྒྱན་གྱི་མིང་གི་དབྱེ་བ། མཐའ་དྲུག་གི་རྒྱན་གྱི་མིང་གི་དབྱེ་བ། རིགས་པ་བཞིའི་རྒྱན་གྱི་མིང་གི་དབྱེ་བ། ཚུལ་བཞིའི་རྒྱན་གྱི་མིང་གི་དབྱེ་བ། འཆད་ཚུལ་གྱི་རྒྱན་གྱི་མིང་གི་དབྱེ་བ། གང་ཟག་གི་རྒྱན་གྱི་མིང་གི་དབྱེ་བ། བདེན་གཉིས་ངེས་པའི་རྒྱན་གྱི་མིང་གི་དབྱེ་བའོ། །དང་པོ་ནི། སྔར་གླེང་བསླང་གི་རྒྱན་ལ་རྣམ་པ་ལྔར་གསུངས་པ་དེ་རྣམས་གང་ཞེ་ན། གླེང་བསླང་བ་རྣམ་པ་ལྔའི་རྒྱན་ནི་འོག་ནས་འབྱུང་བ་འདི་ལྟ་སྟེ། དེའི་དང་པོ་ནི་འདུས་པ་ཞེས་པ་ལྟ་བུ་རྒྱུད་ཀྱི་མཚན་ནམ་མིང་ཡིན་ཏེ། སྒྲོན་གསལ་ལས། རྒྱུད་ཀྱི་མཚན་ནི་མིང་ཡིན་ལ། ཞེས་གསུངས་སོ། །སྒྲོན་གསལ་ལས་

---

^{[མ་དཔེ་གཟིགས་ན་འདིར་གནོན།]}

མིང་དངོས་སུ་མ་སྨོས་པ་ལ་ཁ་ཅིག་བླ་མ་ལ་སོགས་པ་གོང་མའི་མཚན་དངོས་སུ་མི་བརྗོད་པ་དང་འདྲ་བར་མཚན་བརྗོད་དཀའ་བས་རྒྱུད་ཀྱི་རྒྱན་དུ་ཆེའོ་ཟེར་མོད་ཀྱང༌། བཤད་རྒྱུད་ལས་རྩ་བའི་རྒྱུད་མང་པོ་ཞིག་གི་དབང་དུ་མཛད་ནས་གསུངས་པས་བྱེ་བྲག་པ་གཅིག་གི་མཚན་མ་སྨོས་པར་སྤྱིར་མཛད་པ་ཡིན་ལ། སྒྲོན་གསལ་གྱིས་ཀྱང་རྒྱུད་ལྟར་སྤྱིར་བཤད་ཀྱང་སྐབས་ཀྱི་སྟོབས་ཀྱིས་འདུས་པ་ལ་གོ་བར་ནུས་སོ། །དེ་ཡང་ཐོག་མར་བཤད་པར་བྱ་བའི་རྒྱུད་ཀྱི་མཚན་གང་ཡིན་སྙམ་དུ་དོགས་ནས་འདྲི་བ་ལ་རྒྱུད་ཀྱི་མཚན་འདིའོ་ཞེས་མིང་སྨོས་དགོས་སོ། །གཉིས་པ་ནི། མཚན་དེ་དག་ལྡན་པའི་རྒྱུད་འདི་ཆེད་དུ་བྱ་བའི་གདུལ་བྱ་ཅི་འདྲ་བ་ཞིག་གི་དབང་དུ་མཛད་སྙམ་ནས་འདྲི་བ་ལ། གདུལ་བྱའི་སྐྱེ་བོ་དབང་པོ་རྣོན་པོ་དབང་པོ་གཉིས་སྦྱོར་ཀྱི་འདོད་ཆགས་ཤད་ཆེ་བ་ཅན་གྱི་རྒྱུད་མཚན་དུ་བྱས་ནས་སམ་དེའི་དོན་དུ་གསུངས་པ་ཡིན་ཏེ། སྐྱེ་བོ་འདོད་ཆགས་ཅན་དོན་དུ། །ཞེས་གསུངས་སོ། །དེས་ནི་ཆགས་བྲལ་གྱི་སྤྱོད་པ་ཅན་མཚན་ཉིད་ཐེག་པའི་གདུལ་བྱ་དང༌། འདོད་ཡོན་ལ་ཆགས་པ་ལམ་བྱེད་ཙམ་ཞིག་ཡོད་ཀྱང་དབང་པོ་གཉིས་སྦྱོར་གྱི་ཆགས་པ་ལམ་དུ་བྱེད་མི་ནུས་པས་རྒྱུད་སྡེ་འོག་མའི་གདུལ་བྱའི་དབང་དུ་བྱས་ནས་རྒྱུད་འདི་གསུངས་པ་མ་ཡིན་པར་སྟོན་ཏོ། །གསུམ་པ་ནི་རྒྱུད་དེའི་ཐོག་མའི་མཛད་པ་པོ་གང་སྙམ་པ་ལ། བྱེད་པ་པོ་ནི་ཆགས་བྲལ་གྱི་ཆ་ལུགས་དོར་ནས་ཆགས་ཅན་གྱི་རྣམ་པ་ཅན་འཁོར་ལོས་སྒྱུར་བའི་ཆ་ལུགས་སུ་བྱས་པའི་རྡོ་རྗེ་སེམས་དཔའ་ཡིན་ཏེ། འདི་ཡི་བྱེད་པོ་རྡོ་རྗེ་

---

^{[མ་དཔེ་གཟིགས་ན་འདིར་གནོན།]}

སེམས། །ཞེས་སོ། །བཞི་པ་ནི་འོ་ན་གཞུང་དེའི་ཚད་གང་སྙམ་པ་ལ། ཚད་ནི་བཞི་སྟེ། ལེའུ་དང༌། ཆོ་ག་དང༌། དུམ་པུ་དང༌། རིམ་པར་ཕྱེ་བའོ། །ལེའུ་དེ་བཞིན་ཆོ་ག་དང༌། དུམ་བུ་དེ་བཞིན་རིམ་པར་ཕྱེ། །དེ་ནི་རྣམ་པ་བཞིར་འགྱུར་ཞིང༌། གཞུང་ཉིད་ཀྱི་ནི་གྲངས་ཡིན་ནོ། །ཞེས་སོ། །པ་ཚབ་ཀྱིས་བསྒྱུར་བ་ལས། དེ་ནི་རྣམ་པ་བཞིར་འགྱུར་བ། གཞུང་ལའང་གྲངས་ཀྱིས་ཀྱང་ཡིན་ནོ། །ཞེས་དང། །ཆག་འགྱུར་ལས། གཞུང་ཉིད་ཀྱིའང་གྲངས་ཀྱིས་སོ། །ཞེས་འབྱུང་བས་ཚད་ལ་བརྗོད་བྱའི་དོན་གྱི་གྲངས་དང༌། རྗོད་བྱེད་གཞུང་གི་གྲངས་ཀྱི་ཚད་གཉིས་སུ་བྱས་ཏེ། དེ་གཉིས་རེ་རེ་ལ་ལེའུ་སོགས་བཞི་བཞིའོ། །དེ་ཡང་འདུས་པ་ལྟ་བུ་ཞིག་ལ་མཚོན་ན་གཞུང་གི་གྲངས་ཚད་ནི་ལེའུ་བཅུ་བདུན། །ཆོ་གའི་སྐད་དོད་ཀལྤ་ཞེས་པ་རྟོག་པ་ལ་ཡང་འགྲོ་བས་རྟོག་པ་བཅུ་བདུན། །དུམ་བུ་བཅུ་བདུན། །རིམ་པར་ཕྱེ་བ་བཅུ་བདུན་ཏེ། །མདོར་ན་གཞུང་ལ་ལེའུ་དུ་ཡོད་པའི་ཚད་དོ། །དོན་གྱི་ཚད་ནི་དོན་གྱི་ལེའུ་སོགས་ཡིན་ལ་དེ་ཡང་པ་རི་ཙྪེདཿཡོངས་སུ་གཅོད་པ་སྟེ། དོན་གྱི་ཁྱད་པར་འདིས་མི་མཐུན་ཕྱོགས་འདི་དང་འདི་གཅོད་ཅེས་པའོ། །རྟོག་པར་བྱེད་པས་ན་རྟོག་པ་སྟེ་ཞི་སོགས་ཀྱི་ལས་ཚོགས་ཐབས་འདིས་སྒྲུབ་པར་བྱེད་པའི་རྟོག་པའམ་ཆོ་ག་ཞིབ་མོའོ། །དུམ་བུར་བྱེད་པས་ན་ཁཎྜ་སྟེ་དུམ་བུ་ཡིན་ལ། དེ་ཡང་རིམ་པ་ལྔ་དང་ཡན་ལག་དྲུག་ལ་སོགས་པ་ལམ་གྱི་རིམ་པ་ཚན་ཚན་དུ་བྱས་པའོ། །རིམ་པར་ཕྱེ་པ་ནི་བསྐྱེད་པ་དང་རྫོགས་པའི་རིམ་པར་བྱས་པ་ལྟ་

---

^{[མ་དཔེ་གཟིགས་ན་འདིར་གནོན།]}

བུའོ། །བོད་ཀྱི་མཁས་པ་སྔ་མ་རྣམས་དེ་བཞིན་རྒྱུད་ཀྱི་ནུས་པ་ལ་ཚད་དུ་བྱས་པར་འཆད་ལ། ཤྲཱདྡྷཱཀ་རས། ལེའུ་ནི་རྣམ་པ་བཅུ་བདུན་ཏེ། ཆོ་ག་ཉི་ཤུར་མཁས་པས་བཤད། །དུམ་བུ་ཕྱི་མའི་རྒྱུད་དང་ནི། བཤད་པའི་རྒྱུད་རྣམས་གྲགས་པ་ཡིན། །བསྐྱེད་དང་རྫོགས་པའི་སྒྲུབ་ཐབས་དག །སྲིད་པ་སྐྱེ་འཆིའི་རིམ་པ་ཡི། །དབྱེ་བ་བརྗོད་པ་རིམ་པ་ཡིན། །ཞེས་བཤད་ཅིང༌། སྒྲོན་གསལ་གྱི་འགྲེལ་བཤད་རབ་ཏུ་སྒྲོན་གསལ་ལས། ཡོངས་སུ་གཅོད་པས་ལེའུ་སྟེ། རྟོག་པ་ཉིད་ཀྱིས་ཆོ་གར་འགྱུར། །སྤྲོས་པ་མང་བས་དུམ་བུ་སྟེ། །སྒྲིབ་པ་མེད་པས་རིམ་པར་ཕྱེ། །ཞེས་འཆད་དོ། །ལྔ་པ་ནི། མིང་ལ་སོགས་པར་མ་ཟད་རྒྱུད་འདིའི་དགོས་པའང་ཅི་ཞིག་ཡིན་སྙམ་པ་ལ། དགོས་པ་ནི་མཆོག་སངས་རྒྱས། འབྲིང་གྲུབ་ཆེན་བརྒྱད། །ཐ་མ་ཞི་སོགས་ཀྱི་དངོས་གྲུབ་ཡིན་ཏེ། དགོས་པ་ཡང་ནི་བཤད་བྱ་སྟེ། ཞི་སོགས་བྱ་བའི་ཆོ་ག་དང༌། །དེ་བཞིན་གྲུབ་པ་བརྒྱད་དང་ནི། །སངས་རྒྱས་ཀྱང་ནི་མཆོག་ཡིན་ནོ། །ཞེས་སོ། །དེ་རྣམས་ནི་དགོས་པའི་དགོས་པར་བྱ་ཞིང༌། དགོས་པ་གསུམ་ཡང་ཚེ་འདི་ཉིད་ལ་འགྲུབ་པའི་དབང་དུ་བྱས་པའོ། །དེ་ལྟར་ན་མཐའ་དྲུག་དང་ཚུལ་བཞིའི་བཤད་པ་རྫོགས་པར་འཇུག་པའི་བཤད་གཞི་ནི་མིང་འདི་ཞེས་བྱ་བའི་མཚན་ཅན། །གདུལ་བྱའི་གཙོ་བོ་དང་པོ་གཉིས་སྦྱོར་གྱི་ཆགས་པ་ལམ་དུ་བྱེད་ནུས་པའི་དོན་དུ་བཙུན་མོ་དང་མཉམ་པར་སྦྱོར་བའི་གཟུགས་ཅན་གྱི་རྡོ་རྗེ་སེམས་དཔས་གསུང་པ་ལ། དོན་དང་གཞུང་གི་ཚད་འདི་ལྟ་བུ་དང་ལྡན་ཞིང༌། ཚེ་འདི་ལ་དངོས་གྲུབ་གསུམ་སྟེར་བར་ནུས་པ་སྟེ་ཁྱད་པར་ལྔ་དང་ལྡན་པ་ཞིག་གོ་

---

^{[མ་དཔེ་གཟིགས་ན་འདིར་གནོན།]}

ཞེས་བཤད་གཞི་ངོས་འཛིན་པའོ། །གཉིས་པ་ནི། སྔར་བསྟན་པའི་རྒྱུད་ཀྱི་དོན་མཐའ་དྲུག་ཏུ་བཤད་པ་ནི་འོག་ནས་འབྱུང་བ་འདི་ལྟ་སྟེ། དོན་དེ་ལ་སྒྲ་དེ་འཇུག་པ་འགལ་བའི་དགོངས་པས་བཤད་པ་དང། དོན་དེ་ལ་སྒྲ་དྲང་ཐད་དུ་བསྟན་པའི་དགོངས་པ་མ་ཡིན་པས་བཤད་པ་གཉིས་ནི་དོན་གྱི་གཙོ་བོ་གཅིག་ཡིན་པས་སྒྲ་མཐའ་ལ་བརྟེན་པའོ། །དངོས་ཟིན་གྱི་དོན་ལས་གཞན་དུ་དྲང་དུ་ཡོད་པས་དྲང་བའི་དོན་དང༌། གང་དུ་དྲངས་པ་རྫོགས་པ་དེ་ལས་གཞན་དུ་དྲང་དུ་མེད་པས་ན་ངེས་པའི་དོན་གཉིས་ཀྱི་བཤད་པ་ནི་གཞུང་གཅིག་ལ་འཇུག་པས་དོན་མཐའ་ལ་བརྟེན་པའོ། །ཕལ་ཆེར་དོན་གཉིས་པ་ལ་དྲང་དུ་མེད་ཅིང་དོན་གསལ་བར་བསྟན་པའི་སྒྲ་ཇི་བཞིན་པ་དང༌། འཇིག་རྟེན་པ་དང་སྒྲའི་བསྟན་བཅོས་ལ་སྒྲ་དེ་དོན་དེ་ལ་འཇུག་པར་མ་གྲགས་ཤིང༌། སངས་རྒྱས་ཀྱིས་གློ་བུར་དུ་བརྡ་མཛད་པ་ཙམ་གྱི་སྒྲ་ཇི་བཞིན་མ་ཡིན་པར་བཤད་པ་གཉིས་ནི་སྒྲ་དོན་གཉིས་ཀའི་མཐའ་ལ་བརྟེན་པའོ། །གསུམ་པ་ནི། སྔར་བསྟན་པའི་རིགས་པ་སྟེ་འཚང་རྒྱ་བའི་ཚུལ་རྣམ་པ་བཞི་ནི་གང་དུ་སྐྱེ་བའི་རྒྱུད་དང༌། དང་པོའི་བཅའ་གཞི་གླེང་གཞི་དང་གདོན་མི་ཟ་བར་བསྟན་པའི་གནས་ངེས་པའི་ཚིག་དང༌། འབྲས་བུ་ལ་ཉེ་བར་སྦྱོར་བའི་རྒྱུ་རྣམས་སོ། །འདི་ལ་ཆགས་བྲལ་དང༌། །ཆགས་ཅན་གྱི་འཚང་རྒྱ་བའི་ཚུལ་བཞི་གཉིས་སྒྲོན་གསལ་ལས་གསུངས་པའི་དང་པོ་ནི། མི་ཡི་སྐྱེ་བར་འཁྲུངས་པ་ནི། རྒྱུད་ཅེས་བྱ་བ་ཡིན་པར་བརྗོད། །བཙུན་མོའི་འཁོར་གྱི་ནང་ནས་ནི། །རབ་ཏུ་འབྱུང་བ་གླིང་གཞི་ཡིན། །

---

^{[མ་དཔེ་གཟིགས་ན་འདིར་གནོན།]}

འདུལ་ལས་སྡོམ་པ་བསྟན་པ་ནི། ངེས་པའི་ཚིག་ཅེས་བཤད་པ་ཡིན། །འབྲས་བུ་འདོད་པས་ཆོས་སྤྱོད་པ། །དེ་ནི་རྒྱུ་ཞེས་བརྗོད་བྱ་སྟེ། །འདི་ནི་འདོད་ཆགས་བྲལ་ཆོས་ཀྱི། །རིག་པ་རྣམ་པ་བཞིར་འདོད་དོ། །ཞེས་མཚན་ཉིད་ཀྱི་ཐེག་པའི་ལུགས་ཀྱིས་འདོད་པ་ཁམས་སུ་འཚང་རྒྱ་བ་ལ། །དང་པོར་འཛམ་བུ་གླིང་པའི་མིའི་རིགས་སུ་སྐྱེས་པའི་རྒྱུད་དང༌། དེ་ནས་བཙུན་མོའི་འཁོར་གྱི་ནང་ནས་ངེས་པར་འབྱུང་བ་དང་པོའི་བཅའ་གཞི་གླེང་གཞི་དང༌། དེ་ནས་འདུལ་བ་ལས་གསུངས་པའི་སྡོམ་པ་སྲུང་བའི་ངེས་ཚིག་དང། དེ་ནས་བྱང་ཆུབ་འདོད་ནས་དཀའི་བའི་ཆོས་སྤྱོད་པའི་ཉེ་རྒྱུ་བཞིའི་སྒོ་ནས་འཚང་རྒྱ་བར་གསུངས་པའོ། །གཉིས་པ་ནི། །འདོད་ཆགས་ཆོས་ཀྱི་ཚུལ་གྱིས་ནི། དོན་གསལ་རྟོགས་ཕྱིར་བཤད་པར་བྱ། །རིགས་ལྔའི་སངས་རྒྱས་སྐྱེད་པ་ནི། །རྒྱུད་ཅེས་བྱ་བ་ཡིན་པར་བརྗོད། །སླར་ཡང་རིགས་གཅིག་གྱུར་པ་ནི། གླིང་གཞི་ཡིན་པར་རབ་ཏུ་བསྟན། །རྡོ་རྗེ་ལ་སོགས་གཟུང་བ་ཉིད། །ངེས་པའི་ཚིག་ནི་ཡིན་པར་བཤད། སྒེག་པ་ལ་སོགས་སྤྱོད་པ་ནི། །རྒྱུ་ཞེས་བྱ་བ་ཡིན་པར་བཤད། །ཅེས་གསུངས་པའོ། །འཚང་རྒྱ་བའི་ཚུལ་བཞི་གཉིས་བཤད་པ་ལ་ཁ་ཅིག་ན་རེ། །དང་པོ་ནི་ཆོས་ཕུང་བརྒྱད་ཁྲི་བཞི་སྟོང་གི་དོན་དང༌། གཉིས་པ་ནི་རྒྱུད་སྔ་སྟོང་ཕྲག་སོ་བཞིའི་དོན་བསྡུ་བའི་ཕྱིར་ཡིན་ཞེས་འདོད་ལ། །གཞན་དག་ནི་ཆགས་ཅན་གྱི་ལམ་གྱིས་འཚང་རྒྱ་ཚུལ་མ་ནོར་བར་ཤེས་པའི་གོལ་ས་ཤེས་པར་བྱ་བའི་ཕྱིར་རམ། །ཡང་ན་ལམ་སྲིད་ཚད་ཀྱི་དབང་དུ་བྱས་ནས་སྔ་མའི་ཚུལ་བཞི་བཤད་ཅེས་ཟེར་མོད་ཀྱང༌།

---

^{[མ་དཔེ་གཟིགས་ན་འདིར་གནོན།]}

འཐད་པར་མ་མཐོང་ངོ་། །འོ་ན་འདིའི་དོན་གང་ཡིན་སྙམ་ན། མཚན་ཉིད་ཀྱི་ཐེག་པ་ཆེན་པོ་ནས་དང་པོར་འོག་མིན་གྱི་རྟེན་ལ་འཚང་རྒྱ་བའི་ཚུལ་གཅིག་དང། དེར་སངས་རྒྱས་པ་སླར་ཡང་སྤྲུལ་པས་འདོད་པ་ཁམས་སུ་འཚང་རྒྱ་བའི་ཚུལ་གཉིས་གསུངས་ལ། །ཐེག་པ་དམན་པའི་སྡེ་སྣོད་ནས་སྔ་མ་མ་བཤད་ཅིང༌། འདོད་པ་ཁམས་ཀྱི་མིའི་རྟེན་ལ་དང་པོར་འཚང་རྒྱ་བའི་ཚུལ་བཤད་དོ། །དེ་ལྟར་ན་མཚན་ཉིད་ཀྱི་ཐེག་པ་ཐུན་མོང་བའི་རྣམ་གཞག་འདོད་པའི་རྟེན་ལ་འཚང་རྒྱ་ཚུལ། །བསྐལ་བ་གྲངས་མེད་མང་པོར་སྔོན་དུ་ཚོགས་བསགས་པའི་སོ་སོ་སྐྱེ་བོ་སྲིད་པ་ཐ་མ་པ་ཞིག་གིས་འཚང་རྒྱ་བའི་ཚུལ་དེ། །འདིར་རིན་པོ་ཆེ་ལྟ་བུའི་གང་ཟག་ལམ་ཐུན་མོང་བས་རྒྱུད་སྦྱངས་པའི་སོ་སོ་སྐྱེ་བོ་འདོད་པའི་རྟེན་ཅན་པ་ཅིག་གིས་ཚེ་དེ་ཉིད་ལ་འཚང་རྒྱ་བའི་དཔེར་བླངས་ནས་ཆགས་ཅན་ཀྱིས་ལམ་བགྲོད་པའི་ཚུལ་ཅིག་སྟོན་བཞེང་ནས་འཚང་རྒྱ་ཚུལ་གཉིས་བཤད་པ་ཡིན་ཏེ། རྣམ་གཞག་རིམ་པར་སྤྲུལ་པའི་སྐུ་འདོད་ཁམས་ཀྱི་འཛམ་བུ་གླིང་པའི་མིའི་རྟེན་ལ་འཚང་རྒྱ་བའི་རིམ་པ་དང་བསྟུན་ནས། མིའི་སྲིད་པ་སྐྱེ་བའི་རིམ་པ་ལྟར་བསྒོམ་པའི་བསྐྱེད་རིམ་བསྒོམ་པ་བསྟན་པར་གསུངས་པ་བཞིན་ནོ། །དེས་ན་ཐེག་པ་གཞན་གྱི་ལུགས་ཀྱིས་འདོད་པར་འཚང་རྒྱ་བ་ལ། མིར་སྐྱེ་བ་བླངས་པ་ཅིག་དགོས་པ་དེ་བཞིན་དུ། །འདིར་ཡང་ཐ་མལ་བའི་ཕུང་སོགས་ཀྱི་སྣང་ཞེན་དོར་ཏེ། །རིགས་ལྔ་དང་འབྲེལ་བའི་སངས་རྒྱས་སུ་བདག་ཉིད་བསྐྱེད་ནས་སྐྱེ་བ་བླངས་པ་འདྲ་བའི་རྒྱུད་ཅིག་དགོས་སོ། །དེས་ནི་

---

^{[མ་དཔེ་གཟིགས་ན་འདིར་གནོན།]}

བསྐྱེད་པའི་རིམ་པ་ཐམས་ཅད་སྟོན་ནོ། །ཐེག་པ་གཞན་ལ་མིར་སྐྱེས་པ་དེ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་མཛད་དགོས་པ་དེ་བཞིན་དུ། །འདིར་ཡང་སླར་ཡང་རིགས་གཅིག་ཏུ་གྱུར་པའི་གླེང་གཞི་ཅིག་དགོས་སོ། །རིགས་གཅིག་ཏུ་གྱུར་པ་ལ་གཉིས་ལས་དང་པོ་ནི། རིགས་ལྔ་དང་འབྲེལ་བའི་ལྷའི་སྐུ་རྣམས་མཐར་གཏུགས་ན་གསང་ཆེན་རྡོ་རྗེ་འཆང་གི་རིགས་གཅིག་ཏུ་འགྱུར་ལ། དེ་ལ་ནི་ལུས་དབེན་གྱི་གསང་ཆེན་རིགས་གཅིག་པ་དང༌། སྒྱུ་ལུས་ཀྱི་གསང་ཆེན་རིགས་གཅིག་པ་དང༌། ཟུང་འཇུག་གིས་གསང་ཆེན་རིགས་གཅིག་པ་དང་གསུམ་ཡོད་དོ། །གཉིས་པ་ནི། འཁོར་འདས་ཀྱི་ཆོས་སྣ་ཚོགས་པ་ཐམས་ཅད་དེ་ཁོ་ན་ཉིད་དུ་རོ་གཅིག་པའི་འོད་གསལ་ལྷན་ཅིག་སྐྱེས་པའི་ཡེ་ཤེས་སོ། །དེ་གཉིས་ནི་སྣང་ཕྱོགས་དང་སྟོང་ཕྱོགས་ཀྱི་རྫོགས་རིམ་གཉིས་ཡིན་ནོ། །དེ་གཉིས་ནི་ལྷའི་འཁོར་ལོ་སོགས་ཆེས་མི་འདྲ་བར་སྤྲོས་པ་དུ་མའི་གཞི་དང་རྩ་བ་ཡིན་པས་གླང་གཞིའོ། །ཐེག་པ་གཞན་གྱི་ལྟར་ན་རབ་ཏུ་བྱུང་བ་དེས་འདུལ་བའི་ཀུན་སྤྱོད་ལ་ངེས་པར་གནས་དགོས་པ་དེ་བཞིན་དུ། །འདིར་ཡང་རྡོ་རྗེའི་དབང་དང་དམ་ཚིག་ལ་སོགས་པ་དབང་བསྐུར་བ་དང། དམ་ཚིག་ཚང་བར་བཟུང་བ་དགོས་ལ། དེ་ནི་གདོན་མི་ཟ་བར་བསྟན་དགོས་པས་ངེས་པ་ཞེས་གསུངས་ལ། དེ་ལྟར་བྱ་དགོས་པའི་གནས་ཡིན་པས་ཚིག་ཅེས་གསུངས་ཏེ། དེའི་སྐད་དོད་པཱ་ད་ནི་གནས་ལའང་འཇུག་པའི་ཕྱིར་རོ། །ཐེག་པ་གཞན་གྱི་ལྟར་ན་འབྲས་བུ་འདོད་ནས་དཀའ་སྤྱད་སྤྱད་དགོས་པ་བཞིན་དུ། འདིར་ཡང་སྒེག་པ་ལ་སོགས་པའི་ཉམས་དགུ་དང་ལྡན་པའི་

---

^{[མ་དཔེ་གཟིགས་ན་འདིར་གནོན།]}

སྤྱོད་པ་གསུམ་གང་རུང་སྤྱད་དགོས་པ་ཡིན་ནོ། །དེ་ལྟར་དཔེ་དོན་དུ་སྦར་བས་ནི་ཐེག་པ་འདིར་དང་པོའི་གདུལ་བྱའི་གཙོ་བོ་དབང་པོ་གཉིས་སྦྱོར་གྱི་འདོད་ཆགས་ཅན་ཡིན་པས་འདོད་པའི་རྟེན་ཁྱད་པར་བ་ལ་འཚང་རྒྱ་དགོས་པ་དང༌། དེ་ལ་གནས་ལུས་ལོངས་སྤྱོད་ཐ་མལ་པའི་སྣང་ཞེན་རྣམས་ལོག་ནས། གཞལ་ཡས་ཁང་དང་ལྷ་ལ་སོགས་པའི་མཆོག་གི་སྣང་ཞེན་ཁྱད་པར་ཅན་སྐྱེ་བ་བླངས་པ་དང་འདྲ་བའི་བསྐྱེད་རིམ་ཞིག་ངེས་པར་གཞི་རྟེན་དུ་དགོས་པ་དང༌། རབ་ཏུ་མ་བྱུང་བའི་ཚེ་རྟགས་ཆ་ལུགས་སྣ་ཚོགས་སུ་ཡོད་ཀྱང༌། རབ་ཏུ་བྱུང་བ་ན་རབ་བྱུང་གི་རྟགས་ཅན་དུ་ཁྱད་པར་མེད་པ་བཞིན་དུ། །ཆོས་མི་འདྲ་བ་སྣ་ཚོགས་པ་རྣམས་དེ་ཁོ་ན་ཉིད་དང་རོ་གཅིག་ཏུ་སྦྱོར་བའི་ཟབ་མོའི་རྫོགས་རིམ་དང༌། ལྷ་མི་འདྲ་བ་དུ་མ་རྣམས་རྡོ་རྗེ་འཆང་དུ་བསྡུས་པའི་རྒྱ་ཆེ་བའི་རྫོགས་རིམ་གཉིས་དགོས་པ་དང༌། རེ་གཉིས་ཀྱི་སྣོད་རུང་དུ་འགྱུར་བ་ལ་དབང་རྣམ་པར་དག་པ་རྫོགས་པར་ཐོབ་པ་དང༌། རྩ་བ་དང་ཡན་ལག་གི་དམ་ཚིག་རྣམས་ངས་པར་བསྟེན་དགོས་པ་དང༌། ལམ་གཉིས་པ་བོགས་འབྱིན་བའི་ཐབས་ཁྱད་པར་བ་ནི་ཉེ་བའི་རྒྱུ་སྤྱོད་པ་ཡིན་ཞེས་ངེས་པ་ཆེན་པོ་སྟེར་བས་ན། ལམ་གཉིས་དཔེ་དོན་དུ་སྦྱར་བ་ནི་དོན་ཆེན་པོ་ཅན་ནོ། །བཤད་གཞིའི་རྒྱུད་བཤད་ཚུལ་གཉིས་ཀྱི་སྒོ་ནས་བཤད་པའི་རྒྱུད་དོན་ལམ་གྱི་རིམ་པར་བསྒྲིགས་ནས་ཆགས་ཅན་འཚང་རྒྱ་བའི་ལམ་གྱི་ཚུལ་བཞིར་འདུ་བ་འདི། །མཐའ་དྲུག་དང་ཚུལ་བཞིའོ་འོག་ཏུ་འོང་རྒྱུ་ཡིན་པས། དོན་དབང་

---

^{[མ་དཔེ་གཟིགས་ན་འདིར་གནོན།]}

བཙན་པར་བྱས་ལ་དེ་བཞིན་དུ་ཤེས་པར་བྱའོ། །བཞི་པ་ནི། ཚུལ་བཞིའི་བཤད་པའི་རྒྱན་རྣམ་པ་བཞི་ནི། ཡི་གེའི་དོན་ནས་མཐར་ཐུག་པའི་བར་རྣམས་ཏེ་བཤད་ཟིན་ཏོ། །ལྔ་པ་ནི། །སློབ་མ་ལ་བཤད་པའི་དབྱེ་བ་རྣམ་པ་གཉིས་ནི། འདི་ལྟ་སྟེ། ཚོགས་པ་ལ་བཤད་པ་དང༌། སློབ་མ་ལ་བཤད་པའོ། །ཚོགས་པ་དང་སློབ་མ་གཉིས་ལ་བཤད་པ་ནི། སྒྲོན་གསལ་ལས། ཇི་བཞིན་སྒྲ་དང་དགོངས་མིན་དང༌། །དྲང་བའི་དོན་དུའང་གང་འགྱུར་དང༌། ཡི་གེའི་དོན་དང་སྤྱི་ཡི་དོན། །ཚོགས་པ་ལ་བཤད་ཡིན་པར་བརྗོད། །ཇི་བཞིན་མིན་སྒྲ་ངེས་དོན་དང༌། །དེ་བཞིན་དགོངས་ཏེ་བཤད་པ་དང༌། སྦས་དང་མཐར་ཐུག་པ་རྣམས་ནི། སློབ་མ་ལ་ནི་བཤད་པར་འདོད། །ཅེས་གསུངས་ཤིང༌། །སློབ་མ་ལ་བཤད་པའི་གང་ཟག་ནི་རིན་པོ་ཆེ་ལྟ་བུ་དང༌། །ལྷག་མ་བཞི་ཆགས་བཤད་ཀྱི་གང་ཟག་ཏུ་གསུངས་སོ། །གལ་ཏེ་མཐའ་དྲུག་དང་ཚུལ་བཞིའི་ལྔ་ཚན་རེ་རེ་ཚོགས་དང་སློབ་མ་ལ་སོ་སོར་བཤད་ན། རིན་པོ་ཆེ་ལྟ་བུ་ལ་བསྐྱེད་རིམ་མི་འཆད་པར་འགྱུར་ལ། དེ་ལྟ་ན་དེའི་ལམ་ལ་རིམ་པ་གཉིས་མེད་པར་འགྱུར་རོ། །ཚོགས་བཤད་ཀྱི་གང་ཟག་ལ་དགོས་བཤད་སོགས་ལྔ་མི་འཆད་ན་དེ་དག་ལ་རྒྱུད་འཆད་པའི་ཚེ་གཞུང་མང་པོ་ཞིག་གཞག་དགོས་པས། རྒྱུད་གཞུང་མ་ལུས་པ་བཤད་དུ་མི་རུང་བར་འགྱུར་རོ། །དེ་ལྟར་འདོད་དུ་ནི་མི་རུང་སྟེ་སྒྲོན་གསལ་ལས། གསང་བ་འདུས་པ་འདི་ལ་དེ་ཁོ་ན་ཉིད་རྟོགས་པ་རྣམས་ཀྱིས་མཐོང་བའི་ཆོས་ཉིད་ལ་ཚེ་འདི་ཉིད་དུ་སངས་རྒྱས་ཉིད་ཐོབ་པར་ཐོས་ཤིང༌། རྒྱུད་

---

^{[མ་དཔེ་གཟིགས་ན་འདིར་གནོན།]}

ཀྱི་གཞུང་མ་ལུས་བ་ཐོས་ཀྱང༌། མཐའ་དྲུག་གི་ཚིག་གི་དབྱེ་བས་རྒྱུད་ཀྱི་དོན་ལ་རྨོངས་པ་དང་མ་བྲལ་བ་ཙན་དན་ལྟ་བུའི་གང་ཟག་ལ་སོགས་པའི་ཉན་པ་པོ་རྣམས། སེམས་ཇི་ལྟར་བ་བཞིན་དུ་རངས་པ་མ་ཐོབ་པར་གྱུར་པ་དེ་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་དེ་དག་གིས་གསུང་རྡོ་རྗེའི་ཚིག་ཐོས་ནས་རབ་ཏུ་དུས་སོ་ཞེས་བྱ་བ་གསུངས་སོ། །ཞེས་གསུངས་ལ། དེ་ལྟར་སྔོན་བྱུང་ལ་འཁོར་ཀྱི་བྱང་སེམས་རྣམས་དུས་པ་ནི་རྗེས་འཇུག་གི་གདུལ་བྱ་ཙན་དན་ལྟ་བུ་ལ་སོགས་བ་ལ་བྱ་དགོས་པའི་ཕྱིར་དང༌། དེའི་རྗེས་སུ་སྔོན་བྱུང་ལ་དེ་བཞིན་གཤེགས་པ་རྣམས་ཀྱིས་ཁྱེད་རྣམས་མ་ངུ་ཞིག་ཅེས་པ་ནི་རིན་པོ་ཆེ་ལྟ་བུའི་གང་ཟག་རིམ་པ་གཉིས་ཀྱི་ཕྱོགས་གཉིས་ཀ་ལ་འཇིགས་པ་མེད་པས། དབང་པོ་དམན་པ་རྣམས་དབུགས་འབྱིན་ཞིང༌། དེ་རྣམས་ཀྱི་ཤེས་རབ་ཀྱི་རབ་རིབ་ཀྱི་སོམ་ཉི་བསལ་ནས། དེ་ཁོ་ན་ཉིད་རྟོགས་པར་བྱེད་པར་སྒྲོན་གསལ་ལས་གསུངས་པའི་ཕྱིར་རོ། །དེས་ན་སྒྲོན་གསལ་གྱི་བཤད་པ་གཉིས་འགལ་བར་འགྱུར་རོ་སྙམ་ན། ཇི་སྐད་དུ་བཤད་པའི་སྐྱོན་ཡོད་པའི་ཕྱིར་བཤད་པ་གཉིས་ཀྱི་གང་ཟག་རེ་རེ་ལ་རྒྱུད་རྫོགས་པར་མི་འཆད་པ་མིན་ནོ། །འོན་ཀྱང་ཙན་དན་ལ་སོགས་པ་རྣམས་ལ་དབང་པོ་མ་སྦྱངས་པའི་དུས་སུ་རྫོགས་རིམ་རྫོགས་པར་མི་སྟོན་པས། སྒྲོན་གསལ་གྱི་སྐབས་གཞན་དུ་ཡང་སེམས་དབེན་ལ་སོགས་པ་རྣམས་དེ་རྣམས་ལ་གསང་བར་བྱ་བར་གསུངས་ལ། དབང་པོ་སྦྱངས་ནས་འོས་སུ་གྱུར་པ་ན་དེ་དག་ཀྱང་སྟོན་

---

^{[མ་དཔེ་གཟིགས་ན་འདིར་གནོན།]}

པས་མི་འགལ་ལོ། །དེ་ལྟ་ནའང་བཤད་པའི་དབྱེ་བ་གཉིས་སོ་སོར་མཛད་པ་ནི། སྒྲ་ཇི་བཞིན་པ་ལ་སོགས་པ་ལྔས་ཕལ་ཆེར་བསྐྱེད་རིམ་དང༌། གཞན་ལྔས་ཕལ་ཆེར་རྫོགས་རིམ་སྟོན་པ་ཡིན་ཏེ། སྒྲོན་གསལ་ལས། བདེ་གཤེགས་རྣམས་ཀྱིས་གདུལ་བྱ་ལ། རིམ་པ་གཉིས་ལ་བརྟེན་ནས་ནི། །བཤད་པའི་དབྱེ་བ་གསུངས་པ་ཡིན། །ཞེས་གསུངས་པའི་ཕྱིར་རོ། །དེས་ན་ཙན་དན་ལྟ་བུ་ལ་སོགས་པ་བཞི་ལ་ནི་ཚེ་དེ་ལ་རིམ་པ་དང་པོ་སྐྱེ་སླ་ཞིང༌། རིམ་པ་གཉིས་པ་སྐྱེ་དཀའ། །རིམ་པ་དང་པོ་རྫོགས་པར་སྐྱེ་སྲིད་ཀྱང་རིམ་པ་གཉིས་པ་རྫོགས་པར་མི་སྐྱེ་ལ། རིན་པོ་ཆེ་ལྟ་བུ་ལ་ནི་རྫོགས་རིམ་ཡང་སྐྱེ་བར་སླ་ན་རིམ་པ་དང་པོ་ལྟ་ཅི་སྨོས་རིམ་པ་གཉིས་པ་རྫོགས་པར་སྐྱེ་བ་ཡིན་ན་དང་པོ་ལྟ་ཅི་སྨོས། །དེའི་ཕྱིར་སྒྲ་ཇི་བཞིན་པ་ལ་སོགས་པ་ལྔའི་བཤད་པ་ནི་ཙན་དན་ལྟ་བུ་ལ་སོགས་པའི་བཤད་པར་གསུངས་ལ། ལྷག་མ་ལྔའི་བཤད་པ་ནི་སློབ་མ་ལ་བཤད་པར་གསུངས་ཀྱི། ཚན་པ་དེ་གཉིས་གཅིག་གང་ལ་བཤད་པ་ལ་གཞན་དེ་མི་འཆད་པ་མིན་ནོ། །འོ་ན་གང་ཟག་དེ་ལྔ་ཀ་སློབ་མ་ཡིན་བཞིན་དུ། རིན་པོ་ཆེ་ལྟ་བུ་གཅིག་པུ་ལ་སློབ་མ་དང༌། གཞན་ལྔ་ལ་སློབ་མར་མི་བྱེད་པ་དང༌། གཞན་བཞི་ལ་ཚོགས་པ་ཞེས་ཟེར་ལ། རིན་པོ་ཆེ་ལྟ་བུ་ལ་དེ་སྐད་མི་ཟེར་བའི་རྒྱུ་མཚན་གང་ཡིན་སྙམ་ན། རིན་པོ་ཆེ་ལྟ་བུ་ཉིད་ལ་སློབ་མ་ཞེས་ཟེར་བ་ནི་སློབ་མའི་གཙོ་བོར་གྱུར་པས་ཡིན་ཏེ། དཔེར་ན་རྒྱལ་པོ་འཁོར་བཅས་འགྲོ་བ་ལ་རྒྱལ་པོ་འགྲོའོ་ཞེས་གཙོ་བོའི་སྒོ་ནས་བརྗོད་པ་བཞིན་ནོ། །ཚོགས་པའི་དོན་ནི་ཐུན་མོང་གི་

---

^{[མ་དཔེ་གཟིགས་ན་འདིར་གནོན།]}

དོན་ཡིན་ལ། དེ་ཡང་སློབ་མ་གཙོ་ཕལ་གཉིས་ཀ་ཚོགས་པ་ཡིན་པས་སྐྱོན་མེད་དོ། །ཚོགས་པའི་དོན་ནི་ཐུན་མོང་གི་དོན་ཡིན་ལ། དེ་ཡང་སློབ་མ་གཙོ་ཕལ་གཉིས་ཀ་ཚོགས་པ་ཡིན་པས་སྐྱོན་མེད་དོ། །དེ་ལྟ་ནའང་ཚོགས་བཤད་ཀྱི་གང་ཟག་ལ་གཞན་གཞིར་མཛད་པ་ནི། དཔེར་ན་སྨོན་འཇུག་གི་བྱང་ཆུབ་ཀྱི་སེམས་བསྐྱེད་པ་ཐེག་པ་ཆེན་པོ་གཉིས་ཀའི་ཐུན་མོང་པ་ཡིན་ཀྱང༌། སྨོན་སེམས་ཀྱི་སེམས་བསྐྱེད་པ་དང༌། འཇུག་སེམས་ཀྱི་བསླབ་བྱ་ཕྱིན་དྲུག་ལ་ཕར་ཕྱིན་གྱི་ལམ་ཞེས་ཐ་སྙད་བྱེད་པ་བཞིན་དུ། བསྐྱེད་རིམ་གང་ཟག་ལྔ་ཀའི་ཐུན་མོང་བ་ཡིན་ཀྱང༌། གང་ཟག་བཞིའི་རྒྱུད་ལ་སྐྱེ་བའི་ལམ་གྱི་དབང་དུ་བྱས་ན་བསྐྱེད་རིམ་གཙོ་བོ་ཡིན་ཞིང༌། རྫོགས་རིམ་མིན་པས། རིམ་པ་དང་པོའི་ལམ་དང༌། དེའི་བཤད་པ་ལ་གང་ཟག་དེ་བཞིའི་ལམ་དང༌། དེའི་བཤད་པ་ཞེས་ཐ་སྙད་མཛད་དོ། །དེ་རྣམས་ལེགས་པར་ཤེས་ན་ཕར་ཕྱིན་གྱི་ལམ་དུ་བཤད་པ་ཙམ་ལ་འཁྲུལ་ནས། སེམས་བསྐྱེད་པ་གཉིས་རྒྱུད་ལ་སྐྱེད་པ་ལ་ནན་ཏན་དུ་བྱེད་པ་ཐེག་པ་འདི་ལ་མི་དགོས་སོ་སྙམ་པ་དང༌། བསྐྱེད་རིམ་ཐུན་མོང་གི་དངོས་གྲུབ་སྒྲུབ་པའི་ཐབས་སུ་གསུངས་པ་ལ་འཁྲུལ་ནས། མཆོག་སྒྲུབ་པ་ལ་བསྐྱེད་རིམ་ལ་མྱོང་བ་ལེགས་པར་བསྐྱེད་པ་མི་དགོས་སྙམ་པའི་ལོག་རྟོག་རྣམས་ལྡོག་པར་འགྱུར་རོ། །དྲུག་པ་ནི། གང་ཟག་རྣམ་པ་ལྔའི་སློབ་མ་བརྟག་པ་ཞེས་སྔར་གསུངས་པ་ནི། འདི་ལྟ་སྟེ། རིན་པོ་ཆེ་ལྟ་བུ་ལ་སོགས་པ་ལྔའོ། །དེ་ལ་རིན་པོ་ཆེ་ལྟ་བུའི་གང་ཟག་ནི། རྙེད་པར་དཀའ་ཞིང་འདོད་པའི་འབྲས་བུ་འབྱིན་པས་རིན་པོ་ཆེ་དང་འདྲ་བ་ཡིན་ཏེ། དེ་ནི་ཁས་བླངས་པའི་ཚུལ་ཁྲིམས་

---

^{[མ་དཔེ་གཟིགས་ན་འདིར་གནོན།]}

ཡོངས་སུ་དག་པ་དང༌། ཐོས་པའི་ཕོ་རོལ་ཏུ་སོན་པས་མཁས་པ་དང༌། །དགེ་བ་ལ་མཁས་ཤིང་སྤྲོ་བའི་སྒྲིན་པ་དང༌། འགོ་སྨོས་པས་གོ་བའི་ཤེས་རབ་དང་ལྡན་པ་དང༌། བླ་ན་མེད་པའི་ཐེག་པར་རིགས་ངེས་ཤིང་སད་པས་རྒྱུད་གཅིག་པ་སྟེ་མི་འགྱུར་བ་དང༌། རང་གི་ཆོས་ཐོས་ནས་ཏེ་ཐོས་པའི་དོན་གཞན་ལ་ཡང་དག་པར་སྟོན་ནུས་པ་སྟེ། སྒྲོན་གསལ་ལས། ཚུལ་ཁྲིམས་དག་ཅིང་མཁས་ལ་སྒྲིན། །ཤེས་རབ་ལྡན་ཞིང་རྒྱུད་གཅིག་པ། །ཐོས་ནས་ལེགས་པར་སྟོན་པ་ནི། །རིན་ཆེན་ཞེས་བྱའི་གང་ཟག་གོ །ཞེས་དང་། རིན་པོ་ཆེ་ལྟ་བུའི་གང་ཟག་དགེ་བའི་རྩ་བ་ཡོངས་སུ་སྨིན་པ། ཐོས་པའི་ཕ་རོལ་ཏུ་སོན་པ། སངས་རྒྱས་ཉིད་མངོན་པར་འདོད་ཅིང་རིགས་ངེས་པའོ། །ཞེས་ཀྱང་གསུངས་སོ། །ཙན་དན་ལྟ་བུ་ནི། ཐོས་པ་ཆུང༌། ཐོས་པ་ལ་བསྐུལ་ན་ངས་ཤེས་སོ་ཞེས་ང་རྒྱལ་ཆེ་བ། ལུང་རིགས་ཀྱི་དོན་ལེགས་པར་མ་ངེས་པས་རྩ་བ་མེད་པ། རྩོད་པ་ན་མང་དུ་སྨྲ་བ། སྐྱོན་དེ་རྣམས་བསལ་ནས་ཡོན་ཏན་དང་ལྡན་པར་རྗེས་སུ་གཟུང་དཀའ་བ་སྟེ། ཙན་དན་འབྲས་བུ་མེད་པ། །དྲི་ཆུང་བ། ཚེར་མ་མང་བ། སྦྲུལ་གདུག་པས་དཀྲིས་པས་དྲུང་དུ་ཉེར་མི་རུང་བ་དང་འདྲ་བ་ཡིན་ཏེ། ཐོས་པ་ཉུང་ཞིང་ང་རྒྱལ་ལྡན། །རྩ་བ་མེད་པར་མང་དུ་སྨྲ། །རྗེས་སུ་གཟུང་བར་མི་ནུས་པ། ཙན་དན་ཞེས་བྱའི་གང་ཟག་གོ །ཞེས་སོ། །པད་མ་ལྟ་བུ་ནི། དཀར་ཆོས་ཀྱི་རྩ་བ་དད་པ་དང་ལྡན་པ། སྙིང་རྗེ་ཆེ་བ། ཤེས་རབ་དང་ལྡན་པ། ཆོས་ཐོས་པས་བློ་ཡི་ཁ་འབྱེ་བ་སྟེ་ཤེས་རབ་འཕེལ་བ།

---

^{[མ་དཔེ་གཟིགས་ན་འདིར་གནོན།]}

ཚིགས་མེད་པའི་འོད་མའི་ཕྱོག་གཅིག་ནས་ཆུ་བླུགས་པ་འཇིགས་པ་བཞིན་དུ། ཐོས་པའི་དོན་ཤེས་པ་རིང༌དུ་མི་གནས་པ་སྟེ། དེ་ནི་པདྨ་དྲི་ཞིན་པ། །དགའ་བ་བསྐྱེད་པའི་ཡོན་ཏན་དང་ལྡན་པའི་པདྨ་ཁ་ཕྱེ་བ། པདྨའི་ལྟེ་བར་ཆགས་པའི་ཟིལ་པ་རྣམས་ཉི་མ་ཤར་བ་དང་མེད་པར་འགྱུར་པ་དང་འདྲ་བ་ཡིན་ཏེ། དད་དང་ལྡན་ཞིང་སྙིང་རྗེ་ཤེས། །ཐོས་ན་བློ་ཡི་ཁ་འབྱེ་ལ། །ཚིགས་མེད་འོད་མ་བཞིན་འཛག་པ། །པདྨ་ཞེས་བྱའི་གང་ཟག་གོ །ཞེས་སོ། །པདྨ་དཀར་པོ་ལྟ་བུ་ནི། གཟུང་བྱའི་ཆོས་ཀྱི་ཚིག་དོན་གྲོགས་ལས་ལྷག་པར་མང་དུ་ཐོས་ནས་འཛིན་ནུས་ཀྱང༌། གཞན་ལ་སྟོན་པའི་ནུས་པ་མེད་པ་སྟེ། དེ་ནི་བུམ་པའི་ནང་དུ་རས་བལ་ས་བོན་གྱིས་བཀང་བ་འཕེལ་ནས་སླར་མི་ཐོན་པའམ། པད་དཀར་རང་གི་དྲི་ལྟེ་བའི་སྦུབས་སུ་འཁོར་ནས་གཞན་དུ་འཕྲོ་བ་མེད་དང་འདྲ་སྟེ། གཟུང་བྱ་མང་དུའང་ཐོས་གྱུར་ཀྱང་། །སྟོན་པ་ཡི་ནི་ནུས་མེད་པ། །བུམ་པའི་རས་བལ་ས་བོན་འདྲ། །པད་དཀར་ཞེས་བྱའི་གང་ཟག་གོ །ཞེས་སོ། །ཨུཏྤལ་ལྟ་བུ་ནི། གཞལ་བྱའི་དངོས་པོ་མ་ལུས་པ་བླ་མ་ལས་ཐོས་ཤིང༌། ཐོས་ནས་ཀྱང་ཚིག་དོན་འཛིན་པ་ལ་རྣམ་པར་མཁས་ལ། བཟུང་བ་རྣམས་སྐད་ཅིག་གིས་ཏེ་རིང་པོར་མི་ཐོགས་པར་བརྗེད་པར་འགྱུར་བ་སྟེ། དེ་ནི་ཨུད་པ་ལ་ཆུ་ན་གནས་པའི་ཚེ་དྲི་ཞིམ་པོ་མང་པོ་འཛིན་ཞིང་རྙིང་པ་མེད་ལ། ཆུ་ནས་བཏོན་མ་ཐག་རྙིང་ཞིང་དྲི་ཡལ་བ་དང་འདྲ་སྟེ། དེ་ནི་མ་ལུས་ཐོས་གྱུར་ལ། །འཛིན་པ་ལ་ནི་

---

^{[མ་དཔེ་གཟིགས་ན་འདིར་གནོན།]}

རྣམ་པར་མཁས། །སྐད་ཅིག་གིས་ནི་བརྗེད་འགྱུར་བ། ཨུཏྤལ་ཞེས་བྱའི་གང་ཟག་གོ །ཞེས་སོ། །གཉིས་པ་ནི་དབང་པོ་ཐ་མ། ལྔ་པ་ནི་འབྲིང༌། གསུམ་པ་དང་བཞི་པ་ནི་དབང་པོ་རབ་སྟེ། དེ་བཞི་དད་པའི་རྗེས་སུ་འབྲང་བ། དང་པོ་ནི་དབང་པོ་ཡང་རབ་ཆོས་ཀྱི་རྗེས་སུ་འབྲང་བར་ལཀྵྨཱིས་བཤད་དོ། །ཕྱི་མ་བཞི་ཀ་དགེ་རྩ་མ་སྨིན་པ་དམན་པ་ལ་མོས་པར་སྒྲོན་གསལ་ལས་བཤད་དོ། །དེ་ལ་ཨུད་པ་ལ་དང་པདྨ་དཀར་པོ་ལྟ་བུ་ནི་ཉན་པ་པོར་རུང་སྟེ། །ཐོས་པའི་དོན་བརྗེད་ཀྱང༌། སེམས་ལ་བག་ཆགས་བཞག་པས་ཕྱིས་འབྲས་བུ་འབྱུང་བའི་ཕྱིར་རོ། །འཆད་པ་པོ་དང་སྒྲུབ་པ་པོར་མི་རུང་སྟེ། ཐོས་པའི་དོན་བརྗེད་པས་ད་ལྟ་ཉིད་དུ་བསྟན་པ་དང་བསྒོམ་རྒྱུ་མེད་པའི་ཕྱིར་རོ། །པདྨ་དང་ཙན་དན་ལྟ་བུ་ནི་ཉན་པ་པོ་དང་སྒྲུབ་པ་པོར་རུང་ལ་འཆད་པ་པོར་མི་རུང་སྟེ། ཚིག་གི་ཡོན་ཏན་མེད་པ་དང་གཞན་གྱིས་བཟུང་བར་མི་ནུས་པའི་ཕྱིར་རོ། །རིན་པོ་ཆེ་ལྟ་བུ་ནི་འཆད་པ་པོར་རུང་ལ། དེ་ཉིད་ཀྱིས་ན་ཉན་པ་པོ་དང་སྒྲུབ་པ་པོར་ཡང་རུང་ངོ་ཞེས་སྔོན་གྱི་འདུལ་པ་པ་རྣམས་གསུངས་ཏེ། རྗེས་སུ་བཟུང་བར་མི་ནུས་པ་ནི་དེ་ལས་ཕ10།རོལ་པོས་ཆོས་བཟུང་བར་མི་ནུས་པ་ལ་བྱས་པའི་ལུགས་སོ། །ཨུཏྤལ་དང་པདྨ་དཀར་པོ་ལྟ་བུས་ཉན་པའི་ཚེ་བླ་མ་ལས་གང་ཐོས་པའི་ཆོས་རྣམས་ཀྱི་ཚིག་དོན་མི་བརྗེད་པར་འཛིན་མི་ནུས་པར་བཤད་ལ། །ཆོས་ཀྱི་གྲྭར་གང་ཐོས་ཀུན་མི་བརྗེས་པར་འཛིན་མི་ནུས་ཀྱང༌། སྒྲུབ་པ་པོ་དང་འཆད་པ་པོར་རུང་བ་མི་འགལ་ལོ། །བདུན་པ་

---

^{[མ་དཔེ་གཟིགས་ན་འདིར་གནོན།]}

ལ་གསུམ། །དངོས་ཀྱི་དོན། །བདེན་པ་གཉིས་ཀྱི་ངོས་འཛིན། །དོན་དམ་ལ་བརྩམས་པའི་དྲིས་ལན་ནོ། །དང་པོ་ནི། བདེན་པ་གཉིས་སུ་སྦྱར་ཏེ་གསུངས་པའི་དགོངས་པ་ངེས་པའི་རྒྱན་ནི། འདི་ལྟ་སྟེ། ཀུན་རྫོབ་ཀྱི་བདེན་པ་སྒྱུ་མའི་སྐུ་དང༌། དོན་དམ་པའི་བདེན་པ་འོད་གསལ་བ་གཉིས་སོ་སོ་བ་དང་ཟུང་དུ་འཇུག་པ་ཇི་ལྟ་བ་བཞིན་ངེས་པའོ། །སྒྲོན་གསལ་ལས། རྒྱན་ནི་དྲུག་པོ་དེ་རྣམས་ཀྱིས། །བདེན་གཉིས་རྣམ་པར་ངེས་བྱས་པ། །དེ་ནི་རྒྱན་གྱུར་བདུན་པ་སྟེ། །རྫོགས་པའི་རིམ་པ་སྒྲུབ་པའོ། །ཞེ་གསུངས་པས་འདིར་བདེན་གཉིས་ངེས་པ་རྒྱན་བདུན་པར་བྱ་དགོས་ལ། དེ་ཡང་རྒྱན་སྔ་མ་དྲུག་ཀས་བདེན་པ་གཉིས་ངེས་པར་བྱ་བར་གསུངས་སོ། །དེའི་དོན་ནི། བཤད་གཞིའི་རྒྱུད་འདི་དགོངས་པ་འགྲེལ་བའི་སྒོ་གཉིས་ཀྱིས་བཀྲལ་བའི་ལམ་གྱི་རིམ་པ་བཞི། །བཤད་པའི་དབྱེ་བ་རྣམ་པ་གཉིས་ཀྱིས་གང་ཟག་ལྔ་ལ་བཤད་པས། རྒྱུད་དོན་ལ་གོ་བའི་གཙོ་བོ་ཇི་འདྲ་ཞིག་སྐྱེད་ན། །བདེན་གཉིས་ཀྱི་དོན་ཕྱིན་ཅི་མ་ལོག་པར་ངེས་པ་ཅིག་སྐྱེད་པ་ཡིན་ནོ། །དེས་ན་འདུས་པའི་རྩ་རྒྱུད་རྒྱན་བདུན་གྱི་སྒོ་ནས་བཤད་པ་ཐམས་ཅད་ནི་གདུལ་བྱ་ལ་ཟུང་འཇུག་གི་གོ་བ་སྐྱེད་པའི་ཆེད་ཡིན་པས། དེའི་གནད་ཟིན་པ་ཤིན་ཏུ་གལ་ཆེའོ། །དེ་ཡང་སྔར་བཤད་པ་ལྟར་གཉུག་མའི་ལུས་རླུང་འོད་ཟེར་ལྔ་ལས་འཇའ་ལུས་རྡོ་རྗེ་སེམས་དཔའི་སྐུ་གྲུབ་པའི་ཀུན་རྫོབ་པ་དང༌། ལྷན་ཅིག་སྐྱེས་པའི་བདེ་བས་དེ་ཁོ་ན་ཉིད་ཀྱི་དོན་མངོན་སུམ་དུ་རྟོགས་པའི་འོད་གསལ་དོན་དམ་

---

^{[མ་དཔེ་གཟིགས་ན་འདིར་གནོན།]}

པ་གཉིས་དུས་གཅིག་ཏུ་མངོན་དུ་བྱས་པའི་གོ་འཕང་ངོ་། །དེ་འདྲ་བའི་བདེན་གཉིས་ཟུང་འཇུག་ངེས་པ་ལ་སྔོན་དུ། །བདེན་གཉིས་རེ་རེ་བ་ཀུན་རྫོབ་སྒྱུ་མའི་ལུས་དང༌། དོན་དམ་འོད་གསལ་གཉིས་ཕྱིན་ཅི་མ་ལོག་པར་ངེས་དགོས་པས། །སེམས་དབེན་གྱི་མཐར་རླུང་སེམས་ཙམ་ལས་མ་དག་པའི་སྒྱུ་མའི་སྐུར་ལངས་པའི་བདག་བྱིན་བརླབས་དང། རྟེན་དེ་ལ་གནས་ནས་བསམ་གཏན་གཉིས་ཀྱི་སྣང་བ་གསུམ་དག་པའི་འོད་གསལ་མངོན་དུ་བྱེད་ཚུལ་རྣམས་ལེགས་པར་ཤེས་པར་བྱའོ། །སྒྱུ་མའི་སྐུ་དེ་གང་ལས་སྒྲུབ་པའི་གཞི་ནི། སེམས་དབེན་གྱི་སྟོང་པ་གསུམ་དང་དེའི་བཞོན་པའི་རླུང་ཡིན་པས། ནང་གི་རྐྱེན་རྡོ་རྗེ་བཟླས་པ་ལ་སོགས་པའི་སྲོག་རྩོལ་བསྒོམ་པ་དང༌། ཕྱིའི་རྐྱེན་ཕྱག་རྒྱ་དང་སྦྱར་བ་ལས། ཐུན་མོང་མ་ཡིན་པའི་སྡུད་རིམ་གྱི་སྒོ་ནས་སེམས་དབེན་གྱི་ཡེ་ཤེས་གསུམ་བསྐྱེད་ཚུལ་ཤེས་དགོས་སོ། །འདིར་ཡང་སེམས་དེ་ཁོ་ཉིད་ཀྱི་དོན་ལ་གནས་པ་དང༌། ལུས་རླུང་འོད་ཟེར་ལྔ་ལྡན་གཉིས་ཚོགས་པར་ཡོད་པས། འོད་གསལ་དང་སྒྱུ་མའི་སྐུ་གཉིས་ཀྱི་སོ་སོའི་རྒྱུར་བྱས་ཀྱང་ཆོག་སྟེ། བདེན་གཉིས་སོ་སོ་བའི་རྫོགས་རིམ་ཤེས་པ་ལ་སེམས་དབེན་ལེགས་པར་ཤེས་དགོས་ཚུལ་ལོ། །དེ་ལྟར་ཤེས་ཤིང་ཉམས་སུ་མྱོང་བ་ལ། དེ་འདྲེན་པའི་རྒྱའི་གཙོ་བོ་སྲོག་རྩོལ་གསུམ་བསྒོམ་པ་ལེགས་པར་ཤེས་དགོས་པས་ངག་རྣམ་པར་དབེན་པ་ཤེས་པར་བྱའོ། །ངག་དབེན་གྱི་གཡས་གཡོན་གྱི་རླུང་སྙིང་ཁའི་ཨ་བ་དྷཱུ་ཏཱིའི་དབུས་ཀྱི་མི་ཤིགས་པ་ལ་སྡུས་པ་ལ་འོག་

---

^{[མ་དཔེ་གཟིགས་ན་འདིར་གནོན།]}

སྒོའི་ཕྲ་མོ་བསྒོམས་པ་ལས་བྱུང་བའི་ལྷན་ཅིག་སྐྱེད་པའི་དགའ་བ་མཉམ་གཞག་དང་རྗེས་ཐོབ་ཏུ་གང་ཤར་ཐམས་ཅད་དེའི་རྣམ་རོལ་ཏུ་བལྟ་བ་དང༌། དེ་ཡང་ལྷར་བལྟ་བའི་ལུས་དབེན་སྒོམ་པ་སྔོན་དུ་འགྲོ་བའི་ཚུལ་ལེགས་པར་ཤེས་ནས་བསྒོམ་པ་དགོས་སོ། །དེ་འདྲ་བའི་རྫོགས་རིམ་ཡོངས་སུ་རྫོགས་པ་རྒྱུད་ལ་སྐྱེ་བའི་དགེ་བའི་རྩ་བ་སྨིན་པ་ལ་ནི། སྐྱེ་ཤི་བར་དོ་གསུམ་སྐུ་གསུམ་དུ་འཁྱེར་བའི་སྒོ་ནས་རྒྱུད་སྦྱོང་བའི་རིམ་པ་དང་པོའི་རིགས་པའི་རྣལ་འབྱོར་དྲན་པ་གཅིག་པ་དང༌། ཕྲ་མོའི་དཀྱིལ་འཁོར་རྟོག་པའི་རྣལ་འབྱོར་ཐུན་བཞིར་བསྒོམ་པའི་ཚུལ་ཤེས་ནས་སྒོམ་པ་དགོས་སོ། །དེ་སྒོམ་པའི་སྣོད་རུང་དུ་བསྒྲུབ་པ་ལ་ནི། དབང་ཡོངས་སུ་རྫོགས་པ་རྣམ་པར་དག་པ་ཅིག་ཐོབ་པ་དང༌། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམས་ཚུལ་བཞིན་དུ་བསྲུང་བ་ཅིག་དགོས་པས། རྒྱུད་ཀྱི་དོན་བཤད་པ་ཐམས་ཅད་ཀྱང་ཟུང་འཇུག་ལ་ངེས་པ་སྐྱེད་པའི་ཆེད་ཡིན་ལ། ལམ་སྒོམ་པ་ཐམས་ཅད་ཀྱང་སློབ་མི་སློབ་ཀྱི་ཟུང་འཇུག་རྒྱུད་ལ་སྐྱེད་པའི་ཆེད་ཡིན་ནོ། །དེའི་ཕྱིར་རྒྱན་བདུན་གྱི་བཤད་པས་དགའ་བ་སྐྱེད་པའི་གཙོ་བོ་ནི། བདེན་གཉིས་སོ་སོ་བ་དང་དབྱེར་མེད་པའི་དོན་ངེས་པའི་སྒོ་ནས། ཐབས་ལ་མཁས་པ་དང་བྲལ་བ་ལ་སྐྱེ་ཤི་བར་དོ་གསུམ་དུ་ཤར་ནས་འཁོར་བའི་འཁོར་ལོ་བསྐོར་བ་དེ། །ཐབས་མཁས་པའི་མན་ངག་དང་ལྡན་པ་ལ། འཆི་བ་འོད་གསལ་ཆོས་ཀྱི་སྐུ། །

---

^{[མ་དཔེ་གཟིགས་ན་འདིར་གནོན།]}

བར་དོ་ལོངས་སྤྱོད་རྫོགས་པའི་སྐུ། །སྐྱེ་བ་སྤྲུལ་པའི་སྐུར་འཆར་བའི་བདེན་པ་གཉིས་ཀྱི་གདམས་ངག་རྙེད་ནས་རྨད་དུ་བྱུང་འབི་དགའ་བདེ་ཡང་ཡང་དུ་འདྲེན་པ་ལ་བྱའོ། །གཉིས་པ་ནི། སྟོན་པས་རིགས་ཀྱི་བུ་ཞེས་ཞུ་བ་པོ་རྣམས་ལ་བོས་ནས། ཀུན་རྫོབ་སྒྱུ་མའི་སྐུ་ནི་སེམས་ཀྱི་ཆ་མི་བརྟན་པ་དང༌། རླུང་གི་ཆ་གཡོ་བར་བྱེད་པའོ་ཞེས་རླུང་སེམས་གཉིས་ལ་གསུངས་སོ། །ཀུན་རྫོབ་དེའི་བདེན་པ་ནི་སྐུ་དེ་ཆུའི་ཟླ་བ་ལྟ་བུར་གསལ་བར་སྣང་ཞིང་མི་སླུ་བའོ། །དོན་དམ་པའི་བདེན་པ་ནི། ནང་སྟོང་པ་ཉིད་ནས་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་བཅུ་དྲུག་དང༌། དེ་ནས་དངོས་པོ་སྟོང་པ་ཉིད་དང༌། དངོས་པོ་མེད་པ་སྟོང་པ་ཉིད་གཉིས་ཏེ་ཆོས་དང་གང་ཟག་གཉིས་ཀའི་བདག་གིས་སྟོང་པས་སྟོང་པ་ཆེན་པོ་བཅོ་བརྒྱད་དོ། །དོན་དམ་པ་དེའི་མཐའ་ནི་གནས་སོ། །ཞེས་པ་ནི་དོན་དམ་བདེན་པ་སྟོང་ཉིད་དང་རོ་གཅིག་པའི་དོན་གྱི་འོད་གསལ་གྱི་ཡེ་ཤེས་ཟུང་འཇུག་གི་རྒྱུར་འགྱུར་བས་གནས་ཞེས་གསུངས་པའམ། ཡང་ན་དོན་དམ་བདེན་པ་ཆོས་ཐམས་ཅད་ཀྱི་རྩ་བ་དང་གཞི་ཡིན་པས་གནས་སོ། །དེ་ལྟར་རྒྱན་བདུན་གྱི་བཤད་ཐབས་ཀྱིས་འདུས་པའི་རྒྱུད་འཆད་པའི་ཚུལ་ཡེ་ཤེས་རྡོ་རྗེ་ཀུན་ལས་བཏུས་པ་ལ་བརྟེན་ནས། སྒྲོན་གསལ་གྱིས་བཤད་པར་རྒྱུད་ཉུང་ངུ་འདིར་མེད་པ་འགའ་ཞིག་བཀོད་པ་ནི་རྒྱུད་རྒྱས་པ་ན་ཡོད་པར་མངོན་ལ། རྒྱུད་ཀྱི་གཞུང་རེ་རེ་ལ་མཐའ་དྲུག་དང༌། ཚུལ་བཞི་གང་རུང་གི་བཤད་པ་སྦྱར་བ་ནི་མགོན་པོ་ཀླུ་སྒྲུབ་ཀྱི་མན་ངག་ལ་ཡོད་པ་སྒྲོན་

---

^{[མ་དཔེ་གཟིགས་ན་འདིར་གནོན།]}

གསལ་དུ་བཀོད་པ་ཡིན་ནོ། །གསུམ་པ་ལ་གཉིས། ཞུ་བ། ལན་ནོ། །དང་པོ་ནི། བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། དོན་དམ་པའི་བདེན་པ་སྟེ་འོད་གསལ་ལ་རབ་ཏུ་གནས་པའི་རྣལ་འབྱོར་པ་ཆེན་པོས། ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ལ་བརྟེན་ནས། སེམས་ཅན་གྱི་ཞི་བ་ལ་སོགས་པའི་དོན་ཇི་ལྟར་སྤྱད་པར་བགྱི་ཞེས་ཞུས་ཏེ། འདིས་ནི་དོན་གྱི་འོད་གསལ་མངོན་དུ་བྱས་པའི་འོག་ཏུ། །དང་པོ་སྦྱོར་བ་དང་དཀྱིལ་འཁོར་རྒྱལ་མཆོག་གིས་གཞན་དོན་སྒྲུབ་པ་གཉིས་ཀྱང་འཕེན་པས། རྫོགས་རིམ་པའི་ཏིང་ངེ་འཛིན་གསུམ་ག་སྟོན་པར་གཟུང་ངོ་། །དེ་ན་ཏིང་ངེ་འཛིན་གསུམ་གྱི་ལྷའི་རྣལ་འབྱོར་ལ་བསྐྱེད་རིམ་དང་རྫོགས་རིམ་གཉིས་སུ་ཡོད་ལ། དེ་ཡང་འཕགས་པ་ཡབ་སྲས་ཀྱི་གཞུང་ནས་བཤད་པ་ལྟར་བསྐྱེད་རིམ་པས་སྔགས་ཀྱི་སྐུ་དང༌། རྫོགས་རིམ་པས་ཡེ་ཤེས་ཀྱི་སྐུ་སྐྱེད་པའི་ལྷའི་སྐྱེད་ཆོག་སོ་སོར་ཤེས་ན་ཤེས་པ་ཡིན་ཏེ། དེ་ལྟར་མི་ཤེས་པ་རྣམས་ཀྱིས་ནི། ལྷ་ཡི་སྐུ་སྐྱེད་པའི་ཆོ་ག་ཐམས་ཅད་བསྐྱེད་རིམ་དུ་འཆད་པར་སྣང་ངོ་། །གཉིས་པ་ནི། བཅོམ་ལྡན་འདས་ཀྱིས་ལན་བཀའ་སྩལ་པ། ཇི་སྲིད་དུ་ཞི་བ་ལ་སོགས་པའི་ལས་ཀྱིས་སེམས་ཅན་གྱི་དོན་མི་བྱེད་པ་དེ་སྲིད་དུ་རྣལ་འབྱོར་པ་ཆེན་པོ་དེ་ཡང་དག་པའི་མཐའ་འོད་གསལ་ལ་མཉམ་པར་བཞག་སྟེ་གནས་པར་འགྱུར་རོ། །གང་དུ་སེམས་ཅན་གྱི་དོན་བྱ་བར་མཐོང་ན་དེའི་ཚེ་བདག་ལ་བྱིན་གྱིས་བརླབ་པ་དག་པའི་སྒྱུ་མའི་སྐུ་

---

^{[མ་དཔེ་གཟིགས་ན་འདིར་གནོན།]}

སྐྱེད་པའི་རིམ་གྱིས་ཡང་དག་པའི་མཐའ་འོད་གསལ་ལས་ལངས་ཏེ། ཞི་རྒྱས་དབང་དྲག་ལ་སོགས་པས་སེམས་ཅན་གྱི་ནད་ཞི་བ་དང་དཔལ་འབྱོར་རྒྱས་པ་སོགས་ཀྱི་དོན་བྱས་ནས། ཡང་དག་པའི་མཐའ་འོད་གསལ་ཉིད་དུ་འཇུག་པར་བྱེད་དོ། །འདི་མི་སློབ་པའི་ཟུང་འཇུག་ལ་སྦྱོར་ན་འོད་གསལ་ལས་བཞེངས་པ་དང༌། སླར་ཡང་འཇུག་པ་གཞན་སྣང་ཙམ་ཡིན་ཏེ། སངས་རྒྱས་རྣམས་འོད་གསལ་ལ་རྟག་ཏུ་མཉམ་པར་བཞག་པའི་ཕྱིར་རོ། །སློབ་པའི་ཟུང་འཇུག་ལ་བྱེད་ན་སྒྲ་སོར་བཞག་བྱས་ཀྱང་ཆོག་གོ །བཞི་པ་མཇུག་གི་དོན་ལ་གཉིས། རྒྱུད་ཡོངས་སུ་རྫོགས་པའི་དོན། །གང་གིས་བསྒྱུར་བའི་ཚུལ་ལོ། །དང་པོ་ནི། །རྒྱན་བདུན་འཕྲོས་དང་བཅས་པ་གསུངས་པའི་རྗེས་དེ་ནས། བྱམས་པ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་སྟོན་པས་ལན་ལེགས་པར་བཀའ་སྩལ་པ་དེ་ལ་དང་པོར་དགའ་ཞིང་བར་དུ་མགུ་ལ་ཐ་མར་ཡི་རངས་ཏེ། །ཆོས་ཀྱི་དོན་ངེས་པའི་དབང་གིས་སེམས་ལ་དགའ་བ་དང༌། ཡིད་བདེ་བ་སྐྱེས་ནས་འོད་གསལ་བའི་དོན་ལ་དམིགས་ཏེ་ཅང་མི་སྨྲ་བར་འཁོད་པར་གྱུར་ཏོ། །དཔལ་ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བ་བླ་ན་མེད་པའི་རྣལ་འབྱོར་ཆེན་པོའི་རྒྱུད་ཀྱི་རྒྱ་ཆེར་བཤད་པ་ལས། །བདེ་བ་ཆེན་པོ་སྟོང་པ་བཞིའི་ཡེ་ཤེས་དང༌། སྒྱུ་མའི་སྐུ་ལ་སོགས་པ་སྟོན་པའི་ལེའུ་སྟེ་རིམ་པ་གཉིས་པའི་རྒྱ་ཆེར་བཤད་པའོ། །རྫོགས་སོ་ཞེས་པ་ནི་ཡང་དག་པར་གྲུབ་པའི་དོན་ནོ། །གཉིས་པ་ནི། རྒྱ་

---

^{[མ་དཔེ་གཟིགས་ན་འདིར་གནོན།]}

གར་གྱི་མཁན་པོ་པཎྜིཏ་འཇམ་པའི་དབྱངས་ཀྱིས་བྱིན་གྱིས་བརླབས་པ་ཛྙཱ་ན་ཀ་རའི་ཞལ་སྔ་ནས་དང༌། ཞུ་ཆེན་གྱི་ལོ་ཙཱ་བ་ཁུ་སྟོན་དངོས་གྲུབ་ཀྱིས་དང་པོར་རྒྱ་སྐད་ལས་བོད་སྐད་དུ་བསྒྱུར་ཅིང༌། ཚིག་དོན་ལ་ཞུས་དག་བྱས་ནས། འཆད་ཉན་གྱིས་ཀྱང་གཏན་ལ་ཕབ་པ། སླད་ནས་བླ་མ་དེ་ཉིད་དང༌། ལོ་ཙཱ་བ་དགེ་སློང་ནག་ཚོ་ཚུལ་ཁྲིམས་རྒྱལ་བས་ཚིག་དོན་ལ་ཞུས་དག་བྱས་ཤིང་འཆང་ཉན་གྱིས་གཏན་ལ་ཕབ་པའོ། །ཡེ་ཤེས་རྡོ་རྗེ་ཀུན་ལས་བཏུས། །རྣལ་འབྱོར་ཆེན་པོའི་གསལ་བྱེད་ཡིན། །ཡེ་ཤེས་རང་བཞིན་འཁོར་བ་དང༌། མྱ་ངན་འདས་པའི་ངོ་བོའོ། །དེ་གཉིས་དབྱེར་མེད་རྡོ་རྗེ་སྟེ། །ཀུན་འདིར་འདུས་པས་ཀུན་ལས་བཏུས། །དེ་སྟོན་པ་ལ་དེར་བཏགས་ནས། གཞུང་ལས་མིང་དོན་བཙལ་བ་ཡིན། །ཞེས་པ་ནི་ལོ་ཙཱ་བས་སྦྱར་བ་སྟེ། དོན་གོ་བར་སླ་ལ། །རང་གི་ལུགས་ཀྱི་མིང་དོན་ནི་བཤད་ཟིན་ཏོ། །གང་ཞིག་རྟོགས་ན་རྣལ་འབྱོར་ཆེན་པོའི་རྒྱུད། །ཤིན་ཏུ་རྟོགས་དཀར་རྣམས་ཀྱི་འཆད་ཚུལ་ལ། །མ་རྨོངས་བློ་གྲོས་སྣང་བ་རྒྱས་འགྱུར་བ། །དེ་ནི་ཡེ་ཤེས་རྡོ་རྗེ་ཀུན་ལས་བཏུས། །རྒྱུད་དོན་ཀུན་གསལ་འདབ་སྟོང་རབ་རྒྱས་ཤིང༌། །རིམ་གཉིས་སྦྲང་རྩིའི་བཅུད་ཀྱི་ཟིལ་མངར་ཅན། །དྲང་ངེས་འབྱེད་པའི་དྲི་བསུང་རབ་འཕྲོ་བ། །རྣམ་བཤད་ཉིད་བྱེད་འོད་ཀྱིས་ལེགས་

---

^{[མ་དཔེ་གཟིགས་ན་འདིར་གནོན།]}

པར་ཕྱེ། །ལུང་དང་རིགས་པའི་འདབ་གཉིས་བསྐྱོད་པ་ཡིས། །གསུང་རབ་དེ་ཉིད་མཁའ་ལ་ལྡིང་འདོད་ཅིང༌། །ཟབ་ལམ་སྦྲང་རྩིའི་རོ་ལ་རོལ་འདོད་པའི། །སྐལ་བཟང་བུང་པའི་ཚོགས་རྣམས་དགའ་བར་གྱིས། རྩ་རྒྱུད་མཐར་ཐུག་བཤད་ཚུལ་མཐར་ཐུག་གིས། །བཤད་པའི་དགོངས་པ་བདག་འདྲས་དཔག་དཀའ་བས། །ཇི་བཞིན་མིན་བཤད་འགལ་བ་ཅི་མཆིས་པ། དྲི་མེད་སྤྱན་ལྡན་ཀུན་ལ་སྙིང་ནས་བཤགས། །རྡོ་རྗེ་འཆང་དབང་འཕགས་པ་ཡབ་སྲས་ལྔའི། །གཞུང་ལ་རིང་དུ་འདྲིས་ཤིང་ཁྱད་པར་དུ། །བཤད་རྒྱུད་ལྔ་པོ་ཕན་ཚུལ་ལེགས་བསྒྲིགས་ནས། །ལེགས་པར་བཤད་ལས་ཟླ་ཟེར་ཀུན་ཏ་ལྟར། །རབ་དཀར་དགེ་བ་ཇི་སྙེད་བསགས་པ་དེས། །ལམ་གྱི་མཐར་ཐུག་འདི་དང་མི་འབྲལ་ཞིང༌། །སྐལ་བཟང་རྣམ་དཔྱོད་ལྡན་པ་དུ་མ་ཡིས། །བསྟན་པའི་སྙིང་པོ་ཡུན་རིང་འཛིན་པར་ཤོག །ཅེས་དཔལ་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ཀྱི་རྒྱ་ཆེར་བཤད་པ་རྒྱུད་བཤད་ཐབས་ཀྱི་མན་ངག་གསལ་བར་བསྟན་པ་ཞེས་བྱ་བ་འདི་ནི། དཔལ་གསང་བ་འདུས་པའི་རྣལ་འབྱོར་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས། འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དཀའ་བཞི་པ་རིན་ཆེན་དཔལ་ལོ། །

---

^{[མ་དཔེ་གཟིགས་ན་འདིར་གནོན།]}

འདིས་ཀྱང་བསྟན་པ་རིན་པོ་ཆེ་ཕྱོགས་དུས་ཀུན་ཏུ་རྒྱས་པར་བྱེད་ནུས་པར་གྱུར་ཅིག །ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུ་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཚར་འདི་སྤེལ། །སརྦ་མངྒ་ལཾ། །