གཉིས་པ། སངས་རྒྱས་ཀྱི་གདུང་ཇི་ལྟར་སྤེལ་བ་བསྟན་པའི་ལེའུ།
༈ ད་ནི་ལེའུ་གཉིས་པ་འགྲོལ་ཏེ། ཨེ་མ་ཧོ། ཞེས་པའི་དོན་ནི། ཨེ་ནི་ངོ་བོ་ཀ་དག་གི་དབྱིངས། མ་ནི་རང་བཞིན་ལྷུན་གྲུབ་ཀྱི་དབྱིངས། ཧོ་ནི་ཐུགས་རྗེ་ཀུན་ཁྱབ་ཀྱི་དབྱིངས་སོ། །གསང་མཛད་རང་བཞིན་ཚིག་འདི་ཡང་། །ཞེས་པའི་དོན་ནི། གསང་མཛད་ཅེས་པ་ལོག་ལྟ་ཅན་ལ་གོང་མའི་ཡོན་ཏན་རྔམས་པོ་ཆེ་རྣམས་བརྗོད་ན་མི་དགའ་བར། མི་བདེན་ངེས་སོ། །བརྫུན་ནོ་ཞེས། ཐེག་པ་ཐུན་མོང་པ་རྣམས་སྡིག་གསོག་པ་འབྱུང་། སྡིག་བསགས་ན་སེམས་ཅན་སྟོང་བསྒྲལ་བས་འདི་ལ་སྐུར་པ་བཏབ་པ་བརྒྱའི་ཆར་ཡང་མི་ཉེ་སྟོང་གི་ཆར་ཡང་མི་ཉེ་བར་སྡིག་ཆེ་བས། སངས་རྒྱས་ལ་རྒྱབ་ཀྱིས་ཕྱོགས་པས་གསང་བར་བྱའོ། །རང་བཞིན་ཞེས་(༢༧)པ་དངོས་པོ་གཤིས་ཀྱི། ཚིག་འདི་ཡང་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། རང་བྱུང་ཡེ་དག་ཆེན་པོར་ནི། །ཞེས་པའི་དོན་ནི། རང་བྱུང་ཞེས་པ་དངོས་པོ་གཤིས་ཀྱི་གནས་ལུགས་ལ། ཡེ་དག་ཅེས་པ་འཁྲུལ་པའི་དྲི་མ། དཔེ་ཉི་མའི་དཀྱིལ་འཁོར་དང་མཚུངས་སོ། །ཆེན་པོར་ནི་ཞེས་པ་ཐེག་པ་ཐམས་ཅད་ཀྱི་ཡང་རྩེ་སངས་རྒྱས་ཐམས་ཅད་ཀྱི་དགོངས་པ་གོང་ན་མེད་པ་སུས་ཀྱང་མ་བྱས་པའོ། །སྤེལ་ཚིག་གསང་བ་འདི་ལྟར་སྣང་། །ཞེས་པའི་དོན་ནི། སྤེལ་ཚིག་ཅེས་པ་སངས་རྒྱས་ཇི་ལྟར། གསང་བ་ཞེས་པ་ལོག་ལྟ་ཅན་ལ། འདི་ལྟར་སྣང་ཞེས་པ་འདི་ན་མར་གསུངས་པ་བཞིན་ནམ་མཁའ་ལ་ཕྱིས་འབྱུང་བ་ལ་ཡང་བརྗོད་དོ། །ཡེ་ཐོག་དང་པོའི་སངས་རྒྱས་ནི། །ཞེས་པའི་དོན་ནི། ཡེ་ཐོག་ཅེས་པ་གར་ཡང་རྒྱ་མ་ཆད་པའི་མིང་མེད་དེའོ། །དང་པོའི་ཞེས་པ་དངོས་པོ་གཤིས་ཀྱི། སངས་རྒྱས་ནི་ཞེས་པ་ངོ་བོ་རང་བཞིན་ཐུགས་རྗེ་གསུམ་མོ། །དང་པོ་མངོན་འཕགས་དྲན་པ་མགོན། །ཞེས་པའི་དོན་ནི། དང་པོ་ཞེས་པ་སངས་རྒྱས་དང་སེམས་ཅན་རྒྱབ་མ་གྱེས་པའི་དུས་སུ་ཤེས་རིག་ཀུན་བཟང་ཡུམ་གྱི། མངོན་ཞེས་པ་སྒྲོན་མ་སྐུ་གསུམ་དུ། འཕགས་ཞེས་པ་གཞི་ལས་ཐུགས་རྗེ། དྲན་པ་ཞེས་པ་རང་མདངས་སུ། མགོན་ཞེས་པ་ཁམས་གསུམ་སེམས་ཅན་གྱི་མགོན་དུ་ཡེ་གདོད་མ་ནས་བྱོན་ནོ། །ཇི་ལྟར་དུ་བྱོན་ན་ཆོས་སྐུ་ལས་ལོངས་སྐུ། ལོངས་སྐུ་ལས་སྤྲུལ་པའི་སྐུ་རྡོ་རྗེ་འཆང་། སྐུ་གསུམ་གྱི་མཛད་པ་སུམ་ཅུ་རྩ་དྲུག་མཐར་ཕྱིན་པར་བྱོན་ནོ། །ཕྱག་རྒྱ་རང་དྲན་འཁོར་ལོ་ནི། །ཞེས་པའི་དོན་ནི། ཕྱག་རྒྱ་ཞེས་པ་ཞི་ཁྲོའི། རང་དྲན་ཞེས་པ་རང་མདངས་སུ། འཁོར་ལོ་ནི་ཞེས་པ་སྐུ་གསུང་ཐུགས་མི་ཟད་པ་རྒྱན་གྱི། གཞི་ལས་འཕགས་པའི་ཁྱད་པར་ཚིག །ཅེས་པའི་དོན་ནི། གཞི་ལས་ཞེས་པ་དང་པོའི་ཆོས་ཉིད་ཀ་དག་ལས། འཕགས་པའི་ཞེས་པ་རིག་པ་སྐུ་དང་འོད་དུ། ཁྱད་པར་ཚིག་ཅེས་པ་འདུས་མ་བྱས་ཡེ་ཤེས་གསུམ་གྱི་གསུང་བསྟན་པ་ཐམས་ཅད་ཀྱི་བུ་གཅིག་པོ་འདིའོ། །སྤྱི་ཕུད་སྔོན་གྱི་ཐོག་མར་(༢༨)བྱུང་། །ཞེས་པའི་དོན་ནི། སྤྱི་ཕུད་ཅེས་པ་གོང་ན་མེད་པའོ། །སྔོན་གྱི་ཞེས་པ་བསྐལ་པ་ཀུན་གྱི་ཐོག་མར་བྱུང་བའོ། །ཐོག་མར་བྱུང་ཞེས་པ་མདོ་རྒྱུད་ཀུན་གྱི་ཐོག་མར་རང་བྱུང་གི་རྒྱུད་འདི་བྱུང་བའོ། །འདི་དུས་ཁྲག་ཁྲིག་བདུན་ཅུ་ཡིས། །ཞེས་པའི་དོན་ནི། འདི་དུས་ཞེས་པ་ཆོས་ཉིད་ཀྱི་ནམ་མཁའ་ལ་དབྱིངས་གསུམ་བསྡུས་པའི་རང་སྒྲར་རྒྱུད་འདི་བྱོན་ནོ། །ཁྲག་ཁྲིག་བདུན་ཅུ་ཡིས་ཞེས་པ་འགྲོ་བ་དེ་ཙམ་ཞིག་གིས་སྒྲ་ཐོས་པ་ཙམ་གྱིས་སངས་རྒྱས་སོ། །ཕྱག་རྒྱ་འདི་ནི་དམ་པའོ། །ཞེས་པའི་དོན་ནི། བསྟན་པ་ཐམས་ཅད་ཀྱི་བཙས་འདི་རང་གཅིག་པུའོ། །ཞེས་པའོ། །དེའི་འོག་ཏུ། སྙིང་པོ་བརྒྱན་པའི་བསྐལ་པ་ལ། །ཞེས་པ་ལ། དེའི་འོག་ཏུ་སྟོན་པ། སྡེ་སྣོད་དང་པོའི་སངས་རྒྱས་མགོན། །བསྟན་པ་ཐམས་ཅད་ཀྱི་བུ་གཅིག་པོ་འདིའི་མཚན། མངའ་མཛད་ཕྱག་རྒྱ་འཁོར་ལོ་ལས། །འཁོར་ནི་འཛིན་པ་བྱེ་བ་ལྔ། །ཞེས་པ་གྲངས་དེ་ཙམ་ཞིག་བྱུང་སྟེ་སངས་རྒྱས་སོ། །ཕྱག་རྒྱ་འདི་ནི་དམ་པའོ། །ཞེས་པ་ནི་གོང་མའོ་ཡང་རྩེའོ་མཆོག་གོ་ཅེས་སོ། །དེའི་འོག་ཏུ་སྟོན་པ། སྤྱི་མེས་དང་པོ་ཕ་རོལ་མགོན། །བསྟན་པ་རྒྱུད་འདིའི་མཚན། དཀྱིལ་འཁོར་སྙིང་པོ་རང་སྤྲོས་པས། །བསྐལ་པ་གསེར་གྱི་ཡི་གེ་ལ། །ས་ཡ་དྲུག་གི་ཕྱག་རྒྱར་བཟུང་། །དེའི་འོག་ཏུ་སྟོན་པ། སྔོན་ཐོག་དང་པོ་འཕགས་པ་མགོན། །བསྟན་པ་རྒྱུད་འདིའི་མཚན། ཕྱག་རྒྱ་དངོས་པོ་ཉིད་སྣང་བས། །བསྐལ་པ་འོད་ཟེར་འགྱེད་པ་ལ། །བདུན་འབུམ་གྱིས་ནི་འབྲས་བུའོ། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། འཇིག་རྟེན་དྲ་བ་མགོན་པོ་ཡིས། །སྤྲོས་བྲལ་ཕྱག་རྒྱ་འདི་སྤྲོས་ཏེ། །བསྐལ་པ་མེ་ཏོག་མཛེས་པ་ལ། །བསྟན་པའི་འབྲས་བུ་ཕྱལ་ཡས་པས། །ཕྱག་རྒྱ་འདི་ནི་དམ་པའོ། །སྙིང་པོ་སྟོང་གི་སྤྱི་ཕུད་མགོན། །བསྟན་པ་འདིའི་མཚན། སྙིང་པོ་དམ་པའི་འཁོར་ལོ་ལས། །བསྐལ་པ་རྩོད་པའི་སྙིང་པོ་ལ། །གྲངས་མེད་བཞི་ཡི་སྙིང་པོའོ། །འོད་ལྡན་དང་པོ་སེམས་ཅན་མགོན། །སྤྲོས་མེད་སྙིང་པོ་རང་སྒྲ་ལས། །བསྐལ་པ་སྣང་བའི་སྒྲོན་མ་ལ། །བན་བུན་སྟོང་ཕྲག་ཕྱག་རྒྱར་བཟུང་། །མཛེས་པའི་དང་(༢༩)པོ་འགྲོ་བའི་མགོན། །ཡང་དག་སྙིང་པོ་རྣམ་སྤྲོས་ཏེ། །བསྐལ་པ་རགས་པའི་ཡན་ལག་ལ། །ཉར་ཉེར་བརྒྱ་ཡི་གྲངས་ཀྱིས་ནི། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །ཕྱག་རྒྱ་འདི་ནི་དམ་པའོ། །ཞེས་པ་རྒྱུད་གསུངས་པས། འདི་བཟུང་ནས་སངས་རྒྱས་ཕྱག་མཛད་དོ། །དེའི་འོག་ཏུ་སྟོན་པ། ཐུགས་བརྩེ་སྙིང་པོ་ཉན་ཐོས་མགོན། །ཕྱག་རྒྱ་ཡན་ལག་ལམ་སྤྲོས་ཏེ། །ཞེས་གསུངས་སོ། །བསྐལ་པ་དུང་གི་སྒྲ་དག་ལ། །གྲེང་གྲེང་བཅུ་ཡི་དམ་པར་རོ། །ཞེས་པ་གསུངས་པ་སངས་རྒྱའོ། །དེའི་འོག་ཏུ་སྟོན་པ། མི་ཕམ་ཟང་མ་སྒྲ་བྲལ་མགོན། །ཡང་དག་ངེས་པའི་རྒྱུད་ལས་ནི། །ཞེས་པ་རྒྱུད་འདིས། བསྐལ་པ་དྲ་བའི་འོད་ཟེར་ལ། །དུང་ཕྱུར་གསུམ་གྱིས་ལམ་རྒྱལ་བཟུང་། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། སྙིང་པོ་སེམས་རྣལ་བདུད་རྩི་མགོན། །ངེས་པའི་ས་བོན་རབ་བསྒྲགས་པས། །ཞེས་པ་རྒྱུད་འདི་གསུངས་པས། བསྐལ་པ་ཚངས་པའི་དབྱངས་ཅན་ལ། །འབུར་རྡུལ་བདུན་གྱིས་ངེས་པར་བཟུང་། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། རང་བཞིན་དྲག་པོ་ཏིང་འཛིན་མགོན། །ཕྱག་རྒྱ་འཁོར་ལོ་བདེན་སྤྲོས་ཏེ། །ཞེས་པ་རྒྱུད་ཀྱི་ཐུགས་རྗེ། བསྐལ་པ་སྨྲ་བའི་གཞི་དག་ལ། །ཕྱལ་ཕྱོལ་དགུ་ཡིས་དམ་པར་བཟུང་། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སྟོན་པ། གསང་བ་ཕྱག་རྒྱ་ལྷ་མིན་མགོན། །ཡང་གསང་འཁོར་ལོ་རྣམས་སྤྲོས་ཏེ། །ཞེས་པ་རྒྱུད་ཀྱི་ཐུགས་རྗེ། བསྐལ་པ་འབུམ་པ་རེག་ལྡན་ལ། །ཡལ་ཡོལ་དྲུག་ཅུས་སྙིང་པོའོ། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དེའི་འོག་ཏུ་སངས་རྒྱས། རིམ་པ་ལྔ་པ་གཙུག་ཕུད་མགོན། །ཞེས་པ་བྱོན། བླ་མེད་སྙིང་པོ་ཡོངས་སྤྲོས་པས། །ཞེས་པ་སེམས་ཅན་རྣམས་ལ་རྒྱུད་འདི་གསུངས་ཤིང་རེག་པས། བསྐལ་པ་ཡང་གསལ་རབ་འབྱམས་ལ། །ཁྲག་ཁྲིག་བྱེ་བ་དགུ་བརྒྱ་ཡིས། །ཞེས་པ་འགྲོ་བའི་གྲངས། བླ་ན་མེད་པའི་གསང་བའོ། །ཞེས་པ་སངས་རྒྱས་སོ། །དེའི་འོག་ཏུ་སངས་རྒྱས། འཇིག་རྟེན་ཐོག་མ་ཤེས་རབ་(༣༠)མགོན། །བདེ་ཆེན་སྙིང་པོ་ཡོངས་སྤྲོས་ཏེ། །ཞེས་པ་རྒྱུད་གསུངས་ཤིང་བསྒྲགས་པས། བསྐལ་པ་བཀོད་པ་ཆེན་པོ་ལ། །འབུམ་ཕྲག་དྲུག་ཅུ་རྩ་བཞི་ཡིས། །ཞེས་པ་ལྷ་ཚངས་ཆེན་གྱི་འགྲོ་བའི་གྲངས། ལྷ་ཡི་ལྷར་ནི་འདི་ཉིད་དོ། །ཞེས་པ་འདུས་བྱས་ཀྱི་ལྷ་རྣམས། འདུས་མ་བྱས་རིགས་ལྔའི་ཚོམ་བུར་གྲོལ་ལོ། །དེའི་དུས་སུ་སངས་རྒྱས། འཆང་བ་རྣམས་ཀྱི་ཐོག་མ་མགོན། །ངེས་པའི་འབྲས་བུ་འདི་སྤྲོས་ཏེ། །ཞེས་པ་རྒྱུད་འདི་འགྲོ་བ་རྣམས་ལ་བཏགས་པས། བསྐལ་པ་རིན་ཆེན་སྤུངས་པ་ལ། །ས་ཡ་དགུ་བཅུའི་མགོན་པོ་ཡིས། །རྒྱས་པར་བསྔགས་ཏེ་དམ་པར་རོ། །
ཞེས་པ་ས་ཡ་དགུ་བཅུ་གྲོལ་ཏེ་སངས་རྒྱས་པས་སྟོན་པ་དོན་རྒྱས་པར་གྲོལ་ལོ། །འདི་ནི་དུས་སུ་སངས་རྒྱས། ཡང་རྗེས་འབྱུང་བ་མེ་འོད་མགོན། །དངོས་པོ་བསྒྱུར་བའི་ཕྱག་རྒྱ་ནི། །ཞེས་པ་ཟག་བཅས་ཟག་མེད་དུ་སངས་རྒྱ་བ་ལ་ཟེར་རོ། །སྙིང་པོ་ཉིད་དུ་སྤྲོས་པ་ལས། །ཞེས་པ་ཆོས་ཐམས་ཅད་ཀྱི་ཡང་སྙིང་དུ་གསུངས་པས། བསྐལ་པ་རབ་ཏུ་གཡོ་མེད་ལ། །རབ་མཐའ་བཅུ་ཡི་མགོན་པོ་ཡིས། །ཞེས་པ་སངས་རྒྱས་འདི་ཡིས། སྙིང་པོ་སྙིང་གི་དྭངས་མར་རོ། །ཞེས་པ་རྒྱུད་འདི་ཤེས་རིག་ཀུན་བཟང་གི་རང་མདངས་ཐིག་ལེ་ལྔའོ་ཞེས་པའོ། །དེའི་འོག་ཏུ་སངས་རྒྱས། ཆགས་མེད་རྡུལ་བྲལ་དྲི་མེད་མགོན། །གསང་ཆེན་ངེས་པ་ཉིད་དུ་སྟེ། །ཞེས་པ་རྒྱུད་ཆེན་འདི་བབས་ཏེ། བསྐལ་པ་གཡོ་སྒྱུ་བྲལ་བ་ལ། །བྱེ་བ་དགུ་ཁྲིའི་གྲངས་མགོན་གྱིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདུ་བའི་ཕྱག་རྒྱ་ཉིད་དུ་འོ། །ཞེས་པ་ཆོས་ཐམས་ཅད། དེའི་འོག་ཏུ་སངས་རྒྱས། དྲན་པ་དྲི་མེད་བསམ་གཏན་མགོན། །དྲི་མེད་ངེས་པའི་གསང་ཚིག་སྤྲོས། །ཞེས་པ་རྒྱུད་སྤེལ་བས། བསྐལ་པ་མཐའ་ལྡན་སེང་གེ་ལ། །ཉལ་ཉིལ་སུམ་ཅུའི་རྒྱལ་བ་ཡིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ནི་བདེན་ཚིག་དམ་པར་རོ། །ཞེས་པ་དོན་དམ་པའི་གསུང་རབ་བྱོན་ནོ། །དེའི་འོག་ཏུ་སངས་རྒྱས། དམ་པའི་སྐྱེས་བུ་ཆོས་ཀྱི་མགོན། །སངས་རྒྱས་ཤེས་རབ་ས་བོན་སྤྲོས། །ཞེས་རྒྱུད་འདི་གསུངས་ཤིང་བཏགས་པས། བསྐལ་པ་གདུང་བ་སེལ་བ་ལ། །(༣༡)སང་སེང་དགུ་ཁྲིའི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །དམ་པའི་ཕྱག་ནི་ཡང་དམ་དུའོ། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། སྤྱི་ཕུད་སྟོང་གི་ཡེ་ཐོག་མགོན། །སྔགས་ཀྱི་རྩ་བ་འདི་བསྔགས་པས། །ཞེས་རྒྱུད་འདི་གསུངས་པས། བསྐལ་པ་དུང་གི་སྙིང་པོ་ལ། །ཁ་ཡོལ་སྟོང་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །གསང་ཆེན་དམ་པར་རབ་བཟུང་བའོ། །ཞེས་པ་ཕྱག་གི་གནས་མཛད་དོ། །དེའི་འོག་ཏུ་སངས་རྒྱས། སངས་རྒྱས་དྲ་བ་མགོན་པོ་ཡིས། །ཕྱག་རྒྱ་ཉིད་དུ་གདུང་བཟུང་བས། །ཞེས་པ་རྒྱུད་འདི། བསྐལ་པ་བྱེ་བའི་སྙིང་པོ་ལ། །ཉག་ཐག་ཁྲི་ཡི་གདུང་འཛིན་པས། །ཞེས་པ་གྲངས་ལས་འདས་པར། འདི་ཉིད་སྙིང་པོའི་དོན་དུ་འོ། །ཞེས་པ་ངེས་པའི་འགྲོ་དོན་ལ་དགོངས་པའོ། །དེའི་འོག་ཏུ་སངས་རྒྱས། ཡང་དག་གསང་བ་པདྨ་མགོན། །སྙིང་གི་སྙིང་པོ་དཀྱིལ་བཟུང་བས། །ཞེས་པ་རྒྱུད་འདི་གསང་བ་བླ་མེད་ཀྱི་ཡང་སྙིང་ཡིན་པས། བསྐལ་པ་ཡོངས་སུ་བརྩེ་བ་ལ། །དེང་དིར་སྟོང་གི་ཡང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ནི་སྙིང་ལ་ཡང་དག་སྤྲོས། །ཞེས་པ་ངོ་བོ་རང་བཞིན་ཐུགས་རྗེ་གཅིག་ཏུ་དྲིལ་བ་བསྟན་པའི་བུ་གཅིག་པོ། དེའི་འོག་ཏུ་སངས་རྒྱས། སེམས་ཅན་སྙིང་བརྩེ་མེ་ཏོག་མགོན། །དྲན་གཞི་དང་པོར་རང་བཟུང་བས། །ཞེས་པ་རྒྱུད་ཀྱི་མཚན། བསྐལ་པ་ཡོད་པ་རབ་མཆོག་ལ། །རྡུལ་མེད་དགུ་ཡི་གསང་འཛིན་པ། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །གསང་ཆེན་སྟོང་གི་དམ་པར་རོ། །ཞེས་པ་སངས་རྒྱས་སྟོང་གིས་ཕྱག་མཛད་པའོ། །དེའི་འོག་ཏུ་སངས་རྒྱས། བསྐལ་པ་དྲ་བ་ཉི་འོད་མགོན། །དམ་པའི་སྙིང་པོ་ངེས་ཕབ་པས། །ཞེས་པ་རྒྱུད་འདི་བསྟན་ལ། བསྐལ་པ་གླང་པོ་ཡོངས་རྫོགས་ལ། །རབ་རྡུལ་ཉིད་ཀྱི་རྗེས་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་ཤིང་ཕྱག་མཛད་དོ། །སྟོང་ཉིད་གསལ་བའི་མིག་ཏུ་སྤྲོས། །ཞེས་པ་ཕྱོགས་སུ་མ་ལྷུང་བའི་ལྟ་བ། གཉིས་སུ་མེད་པའི་སྒོམ་པ། གོལ་སྒྲིབ་བྲལ་བའི་སྤྱོད་པ། ཀ་ནས་དག་པའི་འབྲས་བུའོ། །ཞེས་(༣༢)པའོ། །དེའི་འོག་ཏུ་སངས་རྒྱས། ཡོངས་རྫོགས་འཁོར་ལོ་རིགས་ཀྱི་མགོན། །སེམས་ཀྱི་དངོས་པོ་དམ་པར་བཟུང་། །ཞེས་པ་རྒྱུད་འདི། བསྐལ་པ་བླ་ན་མེད་པ་ལ། །ཁྲི་ཕྲག་དྲུག་ཅུའི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །གསང་ཆེན་འཁོར་ལོ་ཉིད་དུའོ། །ཞེས་པ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ། དེའི་འོག་ཏུ་སངས་རྒྱས། དྲི་མེད་དག་པ་ཆོས་ཀྱི་མགོན། །ཡང་གསང་ངེས་པའི་ལུང་འདི་སྤྲོས། །ཞེས་པ་རྒྱུད་འདི་གསུངས་ཤིང་བཏགས་པས། བསྐལ་པ་རྩོད་པ་རང་གྲོལ་ལ། །ཉལ་ཉིལ་ཉིད་ཀྱི་འཕེལ་གདུང་གིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །རིམ་པ་མངོན་པར་རབ་སྤྲོས་པའོ། །ཞེས་པ་དམ་པ་རིགས་བརྒྱ་རིག་པའི་མདངས་ཡིན་ཡང་ཐེག་པའི་བློ་དང་ལྷ་ངོ་བསྟུན་ནོ། །དེའི་འོག་ཏུ་སངས་རྒྱས། ཡང་གསང་དང་པོ་ཐོག་མ་མགོན། །རྡོ་རྗེ་ཡང་དག་དམ་བཟུང་བས། །ཞེས་པ་རྒྱུད་འདི། བསྐལ་པ་ཁྱུང་ཆེན་གཤོག་རྫོགས་ལ། །འབུམ་ཕྲག་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །ཕྱག་རྒྱ་རང་རྫོགས་ཉིད་དུ་འོ། །ཞེས་པ་ཕྱག་མཛད་པའི་དགོངས་པའོ། །དེའི་འོག་ཏུ་སངས་རྒྱས། སྣང་མཛད་དང་པོ་མར་མེ་མགོན། །བླ་མེད་རྡོ་རྗེ་སྙིང་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་མདའ་ཡི་ཡོངས་བཟུང་ལ། །རྔ་ཡབ་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །རིགས་ལྡན་རྣམས་ཀྱི་ཕྱག་ཏུ་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། ཡིད་ཤེས་དང་པོ་གནས་གསུམ་མགོན། །བྱ་བ་བྱོན། སྙིང་ཐིག་རྩ་བའི་དྭངས་མར་སྤྲོས། །ཞེས་པ་རྒྱུད་འདི། བསྐལ་པ་རིག་པའི་སྟོབས་ཅན་ལ། །ཁ་ཡེལ་དྲུག་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །གོང་འཕེལ་ཕྱག་རྒྱ་དམ་པར་སྤྲོས། །ཞེས་པ་ཉམས་སུ་བླང་ཚད་དང་བཅས་པར་གསུངས་སོ། །དེའི་འོག་ཏུ་སངས་རྒྱས། དཔའ་བོ་འཇིགས་སངས་དང་པོའི་མགོན། །དྲི་མ་(༣༣)མེད་པའི་སྙིང་དུ་བབས། །ཞེས་པའི་རྒྱུད་འདི། བསྐལ་པ་དྲན་བསམ་བྲལ་བ་ལ། །ཡལ་ཡོལ་སྟོང་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་སྐྱོན་དང་བྲལ་བར་རོ། །ཞེས་པ་དྲི་མ་མེད་པའི་རྒྱུད་ལ་ཕྱག་མཛད་དོ། །དེའི་འོག་ཏུ་སངས་རྒྱས། དྲག་པོ་ཆགས་བྲལ་བདེ་བའི་མགོན། །ཆགས་མེད་རང་རིག་ཕྱག་རྒྱ་སྤྲོས། །
ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་མྱ་ངན་བྲལ་བ་ལ། །དུང་ཕྱུར་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །མེད་པ་རྣམས་ཀྱི་དང་པོར་རོ། །ཞེས་པ་ཟག་པ་མེད་པའི་དོན་ལ་ཕྱག་མཛད་དོ། །དེའི་འོག་ཏུ་སངས་རྒྱས། ཆོས་སྐུ་དངོས་དག་དྲི་མེད་མགོན། །དམ་པ་གསུང་གི་སྙིང་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཟིལ་གྱིས་གནོན་པ་ལ། །ས་ཡ་ཉིད་ཀྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་ཡང་དག་ཉིད་དུའོ། །ཞེས་པ་ཡང་དག་པའི་སྙིང་པོར་བཟུང་ཞིང་ཕྱག་མཛད་དོ། །དེའི་འོག་ཏུ་སངས་རྒྱས། ཡང་སངས་རྒྱས་པ་སྒྱུ་མ་མགོན། །ཚིག་བྲལ་བདེན་པའི་སྙིང་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཆོས་ཀྱི་འཁོར་ལོ་ལ། །བྱེ་བ་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །ངེས་པའི་ལམ་གྱི་དྭངས་མར་རོ། །ཞེས་པ་ངེས་པའི་དོན་དུ་བཟུང་ནས་ཕྱག་མཛད་དོ། །དེའི་འོག་ཏུ་སངས་རྒྱས། སྟོང་པ་ཉིད་ནི་དགེ་ལྡན་མགོན། །ཞེས་པ་བྱོན། གསང་བའི་ཡང་གསང་ཆེན་པོ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་པདྨ་བརྩེགས་པ་ལ། །ཁ་ཡེལ་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །སྣང་བ་རྣམས་ཀྱི་ཐོག་མར་རོ། །ཞེས་པ་བྱིན་བརླབས་མངོན་སུམ་པ་ལ་ཕྱག་མཛད་དོ། །དེའི་འོག་ཏུ་སངས་རྒྱས། སྐྱེས་བུ་བྱེད་པ་འོད་ཟེར་མགོན། །ཞེས་པ་བྱོན། འབྲས་བུ་རྫོགས་པའི་རིག་པ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ངང་པའི་དབྱངས་(༣༤)ཅན་ལ། །རྡུལ་མཐའ་བཞི་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་མངོན་པར་རང་འཐད་དོ། །ཞེས་པ་སྐུ་གསུམ་དབང་པོའི་སྤྱོད་ཡུལ་དུ་བྱོན་པ་ལ་ཕྱག་མཛད་དོ། །དེའི་འོག་ཏུ་སངས་རྒྱས། ཤེས་རབ་མིག་རྙེད་སྒྱུ་འཕྲུལ་མགོན། །སེམས་ཉིད་ཐོག་མའི་དཀྱིལ་འཁོར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ལྷ་ཡི་ཕྱག་སོར་ལ། །ཉལ་ཉིལ་བདུན་གྱི་གདུང་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །སྙིང་པོ་རང་དག་གནད་དུ་འོ། །ཞེས་པ་ཆོས་ཐམས་ཅད་ཡང་སྙིང་དུ་ཕྱག་མཛད་དོ། །དེའི་འོག་ཏུ་སངས་རྒྱས། བདེ་བ་དམ་པ་དངོས་གྲུབ་མགོན། །གསང་ཆེན་སྙིང་པོ་དམ་པར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཡན་ལག་མེད་པ་ལ། །སང་སེང་དྲུག་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་ཡང་དག་དམ་པར་རོ། །ཞེས་པ་ཡང་དག་པའི་དོན་འདི་ལ་ཕྱག་མཛད་དོ། །དེའི་འོག་ཏུ་སངས་རྒྱས། དངོས་པོ་རང་དག་སྟོང་པའི་མགོན། །སྐྱོབ་པ་དམ་པའི་ཕྱག་རྒྱ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །བསྐལ་པ་གྲངས་མཐའ་ལོག་པ་ལ། །སྟོང་ཕྲག་དགུ་ཡི་གྲངས་འཛིན་པས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །རྫོགས་པའི་སངས་རྒྱས་ཉིད་དུ་འོ། །ཞེས་པ་འདི་རང་གཅིག་པུ་ལ་ཕྱག་མཛད་དོ། །དེའི་འོག་ཏུ་སངས་རྒྱས། ཆོས་ཀྱི་གྲགས་པ་གཉིས་མེད་མགོན། །ཡང་གསང་རང་བྱུང་ཚིག་འདི་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་ཡོངས་སུ་གྲོལ་བྱེད་ལ། །ཉལ་ཉིལ་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །མཉམ་པ་རང་གནད་ཉིད་དུ་འོ། །ཞེས་པ་སེམས་ཅན་དང་སངས་རྒྱས་མཉམ་པར་རྒྱུད་འདིས་བསྟན་པས་ཕྱག་མཛད་དོ། །དེའི་འོག་ཏུ་སངས་རྒྱས། ཡེ་ནས་གསང་བ་དྲི་མེད་མགོན། །བྱིན་རླབས་རང་བྱུང་ཡི་གེ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་སེང་གེ་རྩལ་(༣༥)སྤྲུག་ལ། །ཁྲག་ཁྲིག་བདུན་གྱི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་དམ་པའི་ཐུགས་དཀྱིལ་དུའོ། །ཞེས་པ་ཐུགས་ལ་བཅངས་ཤིང་ཕྱག་མཛད་དོ། །དེའི་འོག་ཏུ་སངས་རྒྱས། མི་ཕམ་དང་པོ་སངས་རྒྱས་མགོན། །བྱ་བ་བྱོན། གསང་བ་ཐུགས་ཀྱི་བུ་གཅིག་པར། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་དགའ་བས་མྱོས་པ་ལ། །དུང་ཕྱུར་ཕྱེད་དང་དགུ་གདུང་གིས། །ཞེས་པ་དེ་ཙམ་ཞིག་སངས་རྒྱས་སོ། །འདི་ཉིད་དམིགས་མེད་རང་དམ་མོ། །ཞེས་པ་རྩོལ་བ་དང་བྲལ་བ་ལ་ཕྱག་མཛད་དོ། །དེའི་འོག་ཏུ་སངས་རྒྱས། དྲན་སྤངས་མངོན་འཕགས་རང་བཞིན་མགོན། །འབྱུང་བའི་སྒྲ་དང་བྲལ་བར་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་འདུ་བ་ཆེན་པོ་ལ། །ཁ་ཡེལ་ལྔ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་རང་བྱུང་གསལ་བར་རོ། །ཞེས་པ་ཚིག་དོན་བྱིན་རླབས་མངོན་སུམ་པར་ཕྱག་མཛད་དོ། །དེའི་འོག་ཏུ་སངས་རྒྱས། བར་མའི་དང་པོ་སྐྱེ་མེད་མགོན། །འདི་ནི་ཕྱག་རྒྱ་རབ་བཏབ་སྟེ། །ཞེས་པ་རང་བཞིན་གྱི་རྒྱུད་ཀྱི་དོན་རྟོགས་ཏེ། །བསྐལ་པ་ཁུ་བྱུག་རང་བྱུང་ལ། །ཐར་ཐེར་གསུམ་གྱི་རྟགས་ཤར་བས། །ཞེས་པ་སངས་རྒྱས་ཀྱི་སྐུ་གསུང་ཐུགས་ཀྱིས་འདི་ནི་རབ་ཏུ་བསྔགས་པའོ། །ཞེས་པ་རྒྱལ་མཚན་གྱི་རྩེ་ལ་བཞུགས་ཏེ། མཆོད་པ་དཔག་ཏུ་མེད་པས་མཆོད་ཅིང་གསོལ་བ་ཇི་ལྟར་བཏབ་པ་དངོས་སུ་འབྱུང་ངོ་། །དེའི་འོག་ཏུ་སངས་རྒྱས། འཇིག་རྟེན་གྲངས་བསྐལ་ཨུཏྤལ་མགོན། །གསང་ཆེན་རབ་རྒྱས་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་རབ་ཏུ་མཐོང་བ་ལ། །འབུམ་ཕྲག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་སྙིང་གི་དཀྱིལ་དུ་ཕོབ། །ཅེས་པ་ཐུགས་ལ་བཅངས་ཤིང་ཕྱག་མཛད་དོ། །དེའི་འོག་ཏུ་སངས་རྒྱས། འདས་པའི་དང་པོ་དྲ་བ་མགོན། །སྙིང་པོ་གསང་བ་ཡང་དག་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་བུད་མེད་རང་འདུལ་ལ། །ཕྱལ་ཕྱོལ་དགུ་ཡི་རྒྱལ་བ་(༣༦)ཡིས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་རང་རིག་དམ་པར་རོ། །ཞེས་པ་རྒྱུད་མཐོང་ཐོས་རེག་ཚད་ཀྱི་སེམས་ཅན་བར་དོར་གྲོལ་བར་མཛད་པ་ལ་ཕྱག་མཛད་དོ། །དེའི་འོག་ཏུ་སངས་རྒྱས། གཉིས་འདས་དང་པོ་ཞིང་ཁམས་མགོན། །རྡོ་རྗེ་ཆེན་པོའི་གསང་ཚིག་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་རང་སྒྲ་ཟད་པ་ལ། །ས་ཡ་གཉིས་ཀྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་གཟིགས་དང་རབ་མཁྱེན་བཟུང་། །ཞེས་པ་བྲིས་བཅངས་བཀླགས་ཀུན་ཆུབ་པར་མཛད་དེ་ཕྱག་མཛད་དོ། །དེའི་འོག་ཏུ་སངས་རྒྱས། གྲུབ་མཐའ་ཐོག་མ་གཉིས་པར་མགོན། །འདུལ་ཚིག་སྙིང་པོ་བླ་མ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་དགེ་ལྡན་ཆེན་པོ་ལ། །འབུམ་ཕྲག་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །སྙིང་པོ་རྣམས་ཀྱི་ཡང་སྙིང་དུའོ། །ཞེས་པ་གསང་བ་བླ་མེད་ཀྱི་རྒྱུད་བཅུ་བདུན་གྱི་ནང་ནས་ཀྱང་ཕྱག་མཛད་དོ། །དེའི་འོག་ཏུ་སངས་རྒྱས། མཛད་པ་བཞི་ཐོག་ཐོད་རྒལ་མགོན། །བླ་ན་མེད་པའི་ངེས་ལུང་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །བསྐལ་པ་སེང་གེ་ཡང་ན་བྲམ་ཟེ་བསྒྱིངས་པ་ལ། །ཁྲི་ཕྲག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་གསང་བའི་ཚིག་ཏུའོ། །ཞེས་པ་བཀའ་རྒྱ་དང་བཅས་ཏེ་ཕྱག་མཛད་དོ། །དེའི་འོག་ཏུ་སངས་རྒྱས། མཐའ་བྲལ་ཡོངས་རྫོགས་སྐྱོན་བྲལ་མགོན། །བྲལ་གསང་ཚིག་འདི་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་སྐྱེད་པར་བྱེད་པ་ལ། །སྟོང་ཕྲག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །མེད་ཚིག་རྫོགས་པར་ཡང་དག་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། ཡེ་རྫོགས་དང་པོའི་སྒྱུ་མ་མགོན། །ཡང་གསང་འབར་བ་འོད་ཟེར་འཕྲོས། །ཞེས་པ་ནམ་མཁའ་ལ་ཐུགས་རྗེའི་འོད་ལྔ་རུ་འཁྱིལ་ལ་(༣༧)དཀར་བ་དཀར་ལ་དམར་བ་དམར་ལ་སེར་བ་སེར་ལ་ལྗང་བ་ལྗང་ལ་མཐིང་བ་མཐིང་ལ་བཤད་མི་ཤེས་པར་འཕྲོས་སོ། །བསྐལ་པ་རབ་ཏུ་འཕགས་པ་ལ། །ཁྲག་ཁྲིག་གཉིས་ཀྱི་གདུང་འཕེལ་བས། །ཞེས་པ་འོད་ཟེར་མཐོང་ཚད་སངས་རྒྱས་སོ། །འདི་ཉིད་ངེས་པའི་གསང་ཆེན་པོ། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། དྲི་མ་དངོས་བྲལ་བདེ་བའི་མགོན། །འདི་ཉིད་ལམ་རྒྱལ་དམ་པར་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་ཡང་གསང་ཆེན་པོ་ལ། །ཁྲག་ཁྲིག་བདུན་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཚིག་རིམ་པར་དང་པོར་སྤྲོས། །ཞེས་པ་ཐེག་པའི་ཡང་རྩེར་མཛད་དེ་ཕྱག་མཛད་དོ། །དེའི་འོག་ཏུ་སངས་རྒྱས། འདུས་པ་རྣམས་ཀྱི་ཐོག་མ་མགོན། །ངེས་པའི་གསང་ཆེན་རབ་བསྔགས་ཏེ། །ཞེས་པ་རྒྱུད་གསུངས་ཞིང་སྤེལ་བས། བསྐལ་པ་གསེར་འོད་དམ་པ་ལ། །ཡང་འཕེལ་དགུ་ཁྲིའི་མགོན་པོ་ཡིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་ཏེ། འདི་ཀུན་གསང་ཆེན་སྙིང་དུ་ཕབ། །ཅེས་པ་ཕྱག་མཛད་དོ། །དེའི་འོག་ཏུ་སངས་རྒྱས། ཡང་འབྱེད་སྟོང་གི་དང་པོ་མགོན། །གསང་བའི་སྙིང་པོ་ཡང་གསང་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་ལེ་ལོ་ཡེ་དག་ལ། །ཐེར་ཟུག་དགུ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་ཏེ། འདི་ཡང་སྙིང་ཐིག་གསང་བར་ཕབ། །ཅེས་པ་ཕྱག་མཛད་དོ། །དེའི་འོག་ཏུ་སངས་རྒྱས། གསང་བ་ཀུན་གྱི་སྔོན་ཐོག་མགོན། །ཕྱག་རྒྱ་སྙིང་གི་དཀྱིལ་དུ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་དྲི་མེད་བཟང་པོ་ལ། །ཉར་ཉེར་ལྔ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཚིག་བླ་མེད་སྙིང་ལ་བབས། །ཞེས་པ་ཟབ་པར་བསྟན་ཏེ་ཕྱག་མཛད་དོ། །དེའི་འོག་ཏུ་སངས་རྒྱས། སྟོན་པའི་དང་པོ་ནམ་མཁའ་མགོན། །ཡང་བསྡུས་རང་བྱུང་ཚིག་འདི་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་ཐར་ཆགས་ཆེན་པོ་ལ། །ཉལ་(༣༨)ཉིལ་དྲུག་གི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་མཛད་དོ། །འདི་ཉིད་བསམ་གཏན་འཁོར་ལོར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། སྟོང་པའི་ཡང་མཛོད་དམ་པ་མགོན། །འདི་ཀུན་གཡོ་མེད་རང་བྱུང་ཚིག །ཅེས་པ་རྒྱུད་འདི་སྤེལ་བས། རྫོགས་པ་དངོས་དག་བསྐལ་པ་ལ། །འབུམ་ཕྲག་དགུ་ཡི་ཡང་གདུང་གིས། །ཞེས་པ་འགྲོ་བ་དེ་ཙམ་ཞིག་སངས་རྒྱས་སོ། །འདི་ཀུན་ངེས་པའི་འབྲས་བུར་སྤྲོས། །ཞེས་པ་རྒྱུད་འདི་གསུངས་ཤིང་ཕྱག་མཛད་དོ། །དེའི་འོག་ཏུ་སངས་རྒྱས། དང་པོ་གསང་འཛིན་དངོས་གྲུབ་མགོན། །འདི་ཡང་མཛད་ཆེན་ཡང་དག་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །བསྐལ་པ་གྲངས་གདལ་གསང་ཆེན་ལ། །ཁ་ཡེལ་གསུམ་གྱི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །འདི་ཀུན་ཡང་དག་ལམ་ཉེར་བཟུང་། །ཞེས་པ་སངས་རྒྱས་པ་ནི་འདི་ལས་མྱུར་བ་མ་བྱོན་པས་ཕྱག་མཛད་དོ། །དེའི་འོག་ཏུ་སངས་རྒྱས། དྲི་མེད་རང་ཟད་འབྱུང་བྲལ་མགོན། །དཀྱིལ་འཁོར་ཀུན་དག་རྩ་བ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །བསྐལ་པ་མོ་མཚན་རྒྱུན་གཅོད་ལ། །ཐར་ཐེར་བརྒྱ་ཡི་གདུང་འཕེལ་བས། །ཞེས་པ་འགྲོ་བ་དེ་ཙམ་ཞིག་སངས་རྒྱས་པར་བྱས་སོ། །གསང་བ་ཡང་ཞུན་ཐིགས་པར་བཟུང་། །ཞེས་ཕྱག་མཛད་དོ། །དེའི་འོག་ཏུ་སངས་རྒྱས། མོས་ཆེན་རྣམས་ཀྱི་དང་པོ་མགོན། །སྙིང་པོ་མིག་དག་ཕྱག་རྒྱ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་བས། བསྐལ་པ་འཁོར་བའི་མུན་སེལ་ལ། །འབུམ་ཕྲག་ལྔ་ཡི་ཡང་གདུང་གིས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཉིད་སྤྲོས་ཏེ་དམ་དུའོ། །ཞེས་ཕྱག་མཛད་དོ། །དེའི་འོག་ཏུ་སངས་རྒྱས། སེམས་རིག་ཀུན་གྱི་སྤྱི་ཕུད་མགོན། །ང་མེད་སྔོན་དུ་ཕྱག་རྒྱ་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་སྔ་མོ་སྟོང་ལྡན་ལ། །བྱེ་བ་དགུ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་སོ། །ངེས་ཤེས་ཀུན་གྱི་ཐོག་མར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། བསླབ་གནས་(༣༩)ཀུན་གྱི་དང་ཐོག་མགོན། །ཕྱག་རྒྱ་མིག་ལྡན་སྟོང་དུ་སྤྲོས། །ཞེས་པ་རྒྱུད་གསུངས་ཤིང་སྤེལ་བས། བསྐལ་པ་སྒྱུ་མ་སྣང་མཛད་ལ། །ཡལ་ཡོལ་གསུམ་གྱི་ཡང་གདུང་གིས། །ཞེས་པ་དེ་ཙམ་ཞིག་སངས་རྒྱས་སོ། །འདི་ཚིག་གོང་མའི་གོང་མས་བཟུང་། །ཞེས་པ་སངས་རྒྱས་སྔོན་མ་སྔོན་མས་ཕྱག་མཛད་དོ། །དེའི་འོག་ཏུ་སངས་རྒྱས། རིམ་པ་སྔོན་གྱི་སྐྱེད་བྱེད་མགོན། །བབས་བྱུང་མེད་སྣང་ཕྱག་རྒྱས་སྤྲོས། །ཞེས་པ་རྒྱུད་གསུངས་ཤིང་སྤེལ་ལོ། །བསྐལ་པ་སྙིང་རྗེ་འདུལ་བ་ལ། །སང་སེང་ལྔ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །སྙིང་པོ་གསང་བ་ཆེན་པོར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། འཇིགས་པ་ཀུན་བྲལ་སེང་གེ་མགོན། །སངས་རྒྱས་སྲས་ནི་གཅིག་པ་སྤྲོས། །ཞེས་པ་རྒྱུད་འདི་གསུངས་ཤིང་སྤེལ་ལོ། །ཐུབ་པའི་སྐུ་མདོག་དང་བསྟུན་ནས་ད་ལྟ་གསེར་ལས་བཞེངས་པར་བྱའོ། །བསྐལ་པ་བཟང་པོ་རབ་གང་ལ། །སྟོང་ཕྲག་བདུན་གྱི་གདུང་འཕེལ་བས། །ཞེས་པ་སངས་རྒྱས་དེ་ཙམ་ཞིག་འབྱུང་བར་བྱས་སོ། །འབྱུང་བའི་རང་སྒྲ་བྲལ་བར་བཟུང་། །ཞེས་རྡོ་རྗེ་གདན་གྱི་སྟེང་གི་ནམ་མཁར་བཟུང་སྟེ་ཕྱག་མཛད་དོ། །དེའི་འོག་ཏུ་སངས་རྒྱས། རྫོགས་པའི་ཡང་ཐོག་ཐ་མ་མགོན། །དོན་དགོངས་ཉག་གཅིག་རྣལ་དུ་བཟུང་། །ཞེས་པ་རྒྱུད་འདི་བཟུང་ཞིང་སྤེལ་བས། །བསྐལ་པ་རྩོད་ལྡན་ཆེན་པོ་ལ། །བརྒྱ་ཕྲག་དགུ་ཡི་གདུང་འཕེལ་བས། །ཞེས་པ་དེ་ཙམ་ཞིག་སངས་རྒྱས་པར་བྱས་སོ། །འདི་ཚིག་རྩོད་དང་བྲལ་བར་བཟུང་། །ཞེས་པ་ཕྱག་མཛད་དོ། །དེའི་འོག་ཏུ་སངས་རྒྱས། དྲན་པ་ཟད་པའི་ཡེ་ཤེས་མགོན། །སྙིང་པོ་རང་ཚིག་གཅིག་པར་གོ། །ཞེས་པ་ཐིག་ལེ་ཉག་གཅིག་ཏུ་ཕྱག་མཛད་དོ། །བསྐལ་པ་རྩོད་དང་ལྡན་པ་ལ། །བཅུ་ཕྲག་དགུ་ཡི་གདུང་འཛིན་པས། །ཞེས་དེ་ཙམ་སངས་རྒྱས་པར་བྱེད་དོ། །ངེས་པའི་ཕྱག་རྒྱ་དམ་པར་བཟུང་། །ཞེས་པ་ཕྱག་མཛད་དོ། །དེ་ལྟར་བརྗོད་ཀྱིས་མི་ལངས་པའི། །ཞེས་པའི་དོན་ནི། དེ་ལྟར་ཞེས་པ་སངས་རྒྱས་ཀྱི་གདུང་སྤེལ་བ། བརྗོད་ཀྱིས་ཞེས་པ་ཚིག་ཏུ། མི་ལངས་པའི་(༤༠)ཞེས་པ་ཐུག་པ་མེད་དེ་འཁོར་བ་སྟོངས་པ་མང་པོ་བྱས་སོ། །སངས་རྒྱས་རྣམས་ཀྱི་བྱིན་བརླབས་ལས། །ཞེས་པའི་དོན་ནི། སངས་རྒྱས་ཞེས་པ་འཛིན་རྟོག་སངས་ནས་རང་རིག་རྒྱས་པའོ། །རྣམས་ཀྱི་ཞེས་པ་མ་ལུས་པའི། བྱིན་བརླབས་ལས་ཞེས་པ་གཞི་གསུམ་གྱི། དེ་ཡང་སྐུ་ཞི་ཁྲོའི་གཞི་རིས་མེད། གསུང་སྒྲ་སྐད་ཀྱི་གཞི་བརྗོད་མེད། ཐུགས་དྲན་རིག་གི་གཞི་བསམ་མེད་དོ། །རང་བྱུང་ཆེན་པོའི་ཡི་གེར་ནི། །ཞེས་པའི་དོན་ནི། རང་བྱུང་ཞེས་པ་གཞི་གསུམ་ལས། ཆེན་པོའི་ཞེས་པ་བསམ་དུ་མེད། བརྗོད་དུ་མེད། རིས་སུ་མེད། མིང་མེད། ཡི་གེར་ནི་ཞེས་པ་རྒྱུད་སངས་རྒྱས་སྲས་གཅིག་པོ། བསྟན་པ་ཐམས་ཅད་ཀྱི་བུ་གཅིག་པོ་འདི། སོ་སོ་རང་རང་གི་སྒྲ་དང་མཐུན་པའི་ཡི་གེར་བྱོན་ནོ། །གནས་པའི་ཀ་དག་ཆེན་པོ་ཡི། །ཞེས་པའི་དོན་ནི། གནས་པའི་ཞེས་པ་རང་བཞིན་ལྷུན་གྲུབ་ཏུ། ཀ་དག་ཅེས་པ་ངོ་བོ། ཆེན་པོ་ཞེས་པ་ཐུགས་རྗེ་ཀུན་ཁྱབ། བབས་ལས་འདི་ཀུན་རང་བྱུང་ཤར། །ཞེས་པའི་དོན་ནི། བབས་ལས་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། འདི་ཀུན་ཅེས་པ་རྒྱུད་ཚིག །རང་བྱུང་ཤར་ཞེས་པ་སུས་ཀྱང་བྱས་པ་མེད་པར་ནམ་མཁའ་ལ་སྒྲ་དོན་དབྱེར་མི་ཕྱེད་པར། བྱིན་རླབས་རིམ་པ་འདི་ཀུན་ཡང་། །ཞེས་བྱིན་རླབས་ཞེས་པ་སངས་རྒྱས་ཐམས་ཅད་ཀྱི། རིམ་པ་ཞེས་པ་ལེའུ་བདུན་པ། འདི་ཀུན་ཡང་ཞེས་པ་ཚིག །ཐོག་མ་བབས་ལས་རང་བསྟན་ནོ། །ཞེས་པའི་དོན་ནི། ཐོག་མ་ཞེས་པ་རྒྱ་མ་ཆད་པའི། བབས་ལས་ཞེས་པ་ངོ་བོར་རང་བཞིན་ཐུགས་རྗེ་གསུམ་གྱི། རང་བསྟན་ནོ་ཞེས་པ་ཡེ་གདོད་མ་ནས་སོ། །སངས་རྒྱས་ཀྱི་གདུང་ཇི་ལྟར་སྤེལ་བ་བསྟན་པའི་ལེའུ་སྟེ་གཉིས་པ་རྫོགས་སོ།། །།