སྐྱེ་བ་མེད་པའི་དོན།
རྒྱ་གར་སྐར་དུ༔ ཨ་དྷ་ན་ཡོ་གི༔ བོད་སྐད་དུ༔ སྐྱེ་བ་མེད་པའི་དོན༔ དཔལ་གཉིས་སུ་མེད་པ་ལ་ཕྱག་འཚལ་ལོ༔ རང་སྣང་རྟོགས་པའི་གདེང་ཅན་སུ་འདོད་པ༔ སྙིང་པོ་ཡང་བསྡུས་བསྟན་པ་འདི་ལ་འདུད༔ སྟོང་པ་ཉིད་ལ་མཚོན་པའི་ཚིག་མེད་ཀྱང༔ སྤྲོས་པའི་རིམ་པ་རྣམ་གྲངས་འདི་ཉིད་དོ༔ ཀྱེ་སེམས་དཔའ་ཆེན་པོ་ཉོན་ཅིག༔ མི་ཤིགས་པ་རྡོ་རྗེའི་མན་ངག་གི་དེ་ཉིད་བསྟན་པར་བྱ་བ་ལ་བདུན་ཏེ༔ རྐྱེན་གྱིས་མི་འཇིག་པའི་རིག་པ་ཕུགས་རྡུགས་ལ་རྒྱབ་གཏད་པས་བསྙེན་པའི་ལྷ་སྐྱེ་མེད་དུ་གྲོལ་བའི་མན་ངག་དང༔ ཀུན་ཏུ་ཟང་ཐལ་བའི་རིག་པ་སྣ་སེལ་མེད་པ་ལ་སྣ་གཏད་ན་མ་བསྒོམས་པར་(༣༥)རང་སར་དྭངས་པའི་མན་ངག་དང༔ གཞན་གྱིས་བསྐྱོད་པར་མི་ནུས་པ་ལྕི་བའི་རིག་པ་ལ་འཕང་གིས་བཏབ་ན་འདུས་བྱས་མ་སྤངས་པར་འགྱུར་མེད་དུ་གྲོལ་བའི་མན་ངག་དང༔ འཕྲང་བསལ་བས་དགྲ་དང་བྲལ་བ་འཇིགས་པ་མེད་པའི་རིག་པ་ལ་རྟེན་བཅས་ན་རྐྱེན་རྣམས་རྐྱེན་གྱིས་གྲོལ་བའི་མན་ངག་དང༔ ཁོད་སྙོམས་པ་མཐོ་དམན་མེད་པའི་རིག་པ་ལ་ལམ་གཏོད་ན་ཆོས་ཀྱི་དབྱིངས་ཐམས་ཅད་ལ་མངོན་དུ་སྤྱོད་པའི་མན་ངག་དང༔ སྲང་འཛུད་པ་འགྱུར་བ་མེད་པའི་རིག་པ་ལ་སྲབ་བཅུག་ན་ཉམས་གོང་ནས་གོང་དུ་འཕེལ་བའི་མན་ངག་དང༔ མཐའ་དཔྱད་པས་དབུས་ཟད་པའི་རིག་པ་ལ་ཕུགས་བརྟེན་ན་ཆོས་ཀྱི་སྐུ་ལ་ཚད་ཟིན་པའི་མན་ངག་གོ༔ ཀྱེ་སེམས་དཔའ་ཆེན་པོ༔ མི་འགྱུར་བ་རི་བོའི་གཞི་ལ་ལྔ་སྟེ༔ དྲན་པ་སད་པས་དྲན་མེད་རང་དག་པའི་གཞི་དང༔ བློ་ཡི་སྤྱོད་ཡུལ་རང་ཟད་པས་སྐྱེ་མེད་རང་དག་པའི་བཞི་དང༔ བློ་མ་བུ་ཕྲད་པས་སྐྱེས་པ་ཐམས་ཅད་རང་སྣང་དུ་གྲོལ་བའི་གཞི་དང༔ སྐྱེ་མེད་རང་སར་གྲོལ་བས་འབྲས་བུ་རྒྱུན་ཆད་མེད་པའི་གཞི་དང༔ འབྲས་བུ་རྒྱུན་ཆད་པས་ཟད་པ་ཉིད་ཟད་པ་ལ་སྦྱོར་བའི་གཞིའོ༔ ཀྱེ་སེམས་དཔའ་ཆེན་པོ༔ སྣང་བ་ཆེན་པོ་རང་སར་སྣང་བ་ལ་བཞི་སྟེ༔ སྣང་སྲིད་ཐམས་ཅད་གཞི་ལ་བཞེངས་པས་སྤྲུལ་པའི་སྐུ་རྩོལ་སྒྲུབ་དང་བྲལ་བའི་ལམ་དང༔ སྣང་སྲིད་ཐམས་ཅད་གཞིར་བཞག་པས་ལོངས་སྤྱོད་རྫོགས་པའི་སྐུ་ཡི་གཟུགས་མཐོང་བའི་ལམ་དང༔ ཁམས་གསུམ་དུས་གཅིག་ལ་གྲོལ་བས་ཆོས་ཀྱི་སྐུ་ངོས་ཟིན་པའི་ལམ་དང༔ སྲིད་པ་གསུམ་ཀ་དག་པས་སྐུ་གསུམ་གཏན་སྤྲུག་པའི་ལམ་མོ༔ ཀྱེ་སེམས་དཔའ་ཆེན་པོ༔ དག་པས་དག་པ་ཉིད་མཐོང་ནས་ཟང་ཐལ་བའི་འབྲས་བུ་ལ་གསུམ་སྟེ༔ རྒྱུ་ཐམས་ཅད་རང་སར་དེངས་པས་འབྱུང་བ་ལྔ་ལས་གྲོལ་བའི་འབྲས་བུ་དང༔ རྐྱེན་ཐམས་ཅད་རང་ཡུལ་དུ་ཆོད་པས་སྣང་བ་ཐུག་ཕྲད་དུ་གྲོལ་བའི་འབྲས་བུ་དང༔ གཅིག་ཚད་ཟིན་པས་སྣང་བ་ཐམས་ཅད་གཏན་ལ་ཕེབས་པའི་འབྲས་བུའོ༔ མན་ངག་ཀུན་གྱི་ལུས་དང་ཚད་མེད་ན༔ བསྒོམས་ཀྱང་དོན་མེད་རང་ལ་ཡིད་རེ་ཆད༔ ཆོས་རྣམས་ཀུན་གྱི་ཟད་པའི་ཚད་མེད་ན༔ འབྲས་བུ་རྣམས་ནི་དངོས་དང་ཁྱད་མེད་འགྱུར༔ (༣༦)ཞེས་བཀོད་པ་ཆེན་པོ་ལས་སྐྱེ་མེད་ཀྱི་མན་ངག་གཏན་ལ་ཕབ་པ་སྟེ་ལྔ་པ་རྫོགས་སོ༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་པར་ཤོག༔