གསུམ་པ། སྒྲུབ་པའི་ལེའུ།
དེ་ལྟར་རྗེས་སུ་གནང་བ་ཐོབ་ནས་སྒྲུབ་པ་ལ་འཇུག་པར་བྱ་སྟེ། དེ་ཡང་སྔོན་དུ་རྫས་བསག་ཅིང་སྐྱབས་འགྲོ་སེམས་བསྐྱེད་བྱ་བ་དང་། དངོས་གཞི་ལྷ་བསྒོམ་ཞིང་སྔགས་བཟླ་བ། རྗེས་རྫོགས་རིམ་བསྒོམ་ཞིང་བསྔོ་བ་བྱ་བ་དང་གསུམ་ལས། དང་པོ་ལ་གཉིས་ཏེ། རྫས་བསག་ཅིང་རྟེན་དགྲམ་པ་དང་། སྐྱབས་འགྲོ་སེམས་བསྐྱེད་བྱ་བའོ། །དང་པོ་ནི། སྤང་རྒྱན་དཀར་པོ། གླ་རྩི། མཚལ་དཀར། ཡུང་བ། ཙན་དན་དམར་པོ། ཨ་ག་རུ་ནག་པོ། སྤང་སྤོས། དབང་པོ་ལག་པ་སྡེར་མོ་ལྔ་པ། ཤུ་དག་དཀར་པོ། ཨ་རུ་ཤ་ཆེན། ཤིང་མངར། རྒྱ་སྐྱེགས་རྣམས་ཞིབ་པར་བཏགས་ལ། སྦྲང་དཀར་དང་བ་དམར་མོའི་འོ་མས་རིལ་བུ་བརྒྱ་རྩ་བརྒྱད་བྱས་ལ། དར་རམ་ཤོག་བུ་སེར་པོ་ལ་པདྨ་དམར་པོ་འདབ་བརྒྱད་མུ་ཁྱུད་རིམ་པ་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་ཧྲཱིཿ རྩེ་མོར་དྷཱིཿ འདབ་མ་རྣམས་ཀྱི་དབུས་སུ་རྩ་བའི་སྔགས། རྩེ་མོ་ལ་ཧྲཱིཿ མུ་ཁྱུད་ནང་མ་ལ་ཨཱ་ལི། བར་མ་ལ་ཀཱ་ལི། ཕྱི་མ་རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པར་བླུགས་ལ། དར་རམ་ཤོག་བུ་ལ་འཁོར་ལོ་རྩིབས་ཆེན་བརྒྱད་མུ་ཁྱུད་གསུམ་དང་ལྡན་པའི་ལྟེ་བར་རལ་གྲིའི་ཆང་ཟུང་ལ་དྷཱིཿ རྩེ་མོ་ལ་ཧྲཱིཿ རྩིབས་རྣམས་ཀྱི་དབུས་སུ་རྩ་སྔགས། རྩེ་མོར་དྷཱིཿ མུ་ཁྱུད་གསུམ་པ་ལ་ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་སྤེལ་ཚིག་དང་བཅས་པ་བྲིས་པས་བཀབ་ལ། གནས་དབེན་པར་མཎྜལ་པདྨ་སེར་པོ་འདབ་བརྒྱད་ཀྱི་དབུས་སུ་མེ་ཏོག་བཀྲམ་པའི་དབུས་སུ་ལྷུང་བཟེད་དམ་རིན་པོ་ཆེའི་སྣོད་འབྲུས་བཀང་བའི་ཁར་རིལ་བུ་འཁོར་ལོ་དང་བཅས་པ་བཞག །འཇམ་དབྱངས་ཀྱི་རྟེན་དགྲམ། མཆོད་པ་བཤམ། རྟེན་གྱི་མདུན་དུ་ལྷུང་བཟེད་འོང་བར་བྱ། དེ་ནི་རྟེན་བཤམ་པའོ། །འདིར་གཞུང་གཅིག་ནས་འཁོར་ལོ་བྲི་བ་ནི་འདི་ལྟར་བཞེད་དོ། །དར་རམ་རས་ལ་འཁོར་ལོ་རྩིབས་བཞི་པའི་ལྟེ་བར་རང་གི་སྤེལ་ཚིག །ཤར་གྱི་རྩིབས་ལ་ཧྲཱིཿ ལྷོར་སི། ནུབ་ཏུ་བཻ། བྱང་དུ་བྷཻ་རྣམས་བྲིས་པའི་དབུས་སུ་རིལ་བུ་བླུགས་ནས། ཡང་པདྨ་འདབ་བརྒྱད་མུ་ཁྱུད་གསུམ་པའི་ལྟེ་བར་རལ་གྲིའི་ཆང་ཟུང་ལ་དྷཱིཿ རྩེ་མོར་ཧྲཱིཿ བར་དུ་རྩ་སྔགས། པད་འདབ་བརྒྱད་ཀྱི་རྩེ་མོར་ཧྲཱིཿ རྩ་བར་དྷཱིཿ དབུས་སུ་རྩ་བའི་སྔགས། མུ་ཁྱུད་གསུམ་ལ། ཨཱ་ལི། ཀཱ་ལི། རྟེན་འབྲེལ་སྙིང་པོ་རྣམས་བྲིས་པས་སྟེང་ནས་དགབ། དེའི་སྟེང་དུ་དར་དམར་པོའི་གདུགས་ཕུབ་ལ་སྔ་མ་བཞིན་དུ་བྱ་གསུངས་སོ། །དེ་ལྟར་འཁོར་ལོ་གང་བྲིས་ཀྱང་སྟེང་འཁོར་གྱི་ཡིག་མགོ་ཕྱིར་བསྟན་ལ་གཡས་སྐོར་དུ་བྲི་ཞིང་། འོག་འཁོར་གྱི་ཡིག་མགོ་ཕྱིར་བསྟན་ལ་གཡོན་སྐོར་དུ་བྲི་བའི་སྣག་ཚ་མཚལ་རྒྱ་སྐྱིགས་གི་ཝཾ་གསུམ་ལ་བྱའོ། །འཁོར་ལོའི་མན་ངག་གོ། །དེ་ནས་ཟླ་བ་དང་ཉི་མ་ཡར་འཕེལ་གྱི་(༢༡)ཚེས་གཅིག་གམ་བརྒྱད་དམ་བཅོ་ལྔ་ནས་སྒྲུབ་པའི་མགོ་བརྩམ་པར་བྱ་སྟེ། ཐོ་རངས་སྔ་བར་མལ་ནས་ལངས་ཏེ་ནམ་མཁའི་དབྱིངས་སུ་དབྱངས་ཅན་མ་ལ་བཀྲ་ཤིས་ཀྱི་ལྷ་མོ་དཔག་ཏུ་མེད་པས་བསྐོར་བ་རྣམས་ཀྱིས་རྡོ་རྗེའི་གླུ་དང་བཀྲ་ཤིས་པའི་ཚིགས་སུ་བཅད་པ་དང་། ༀ་ཧྲཱིཿདྷཱིཿལ་སོགས་པའི་རིག་པ་བརྗོད་པས་བསྐུལ་བར་བསམས་ལ་ལངས་ཏེ། ཁྲུས་དང་གཙང་སྦྲ་སྔོན་དུ་སོང་ནས། སྟན་བདེ་བ་ལ་ཤར་དུ་ཕྱོགས་པས་འདུག་སྟེ། སྐྱབས་སུ་འགྲོ་བ། ཚད་མེད་པ་བཞི་སྒོམ་པ་དང་། བྱང་ཆུབ་ཏུ་སེམས་བསྐྱེད་ནས། ༀ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་གིས་ཆོས་ཐམས་ཅད་སྟོང་པ་ཉིད་དུ་བསམ། སྟོང་པའི་ངང་ལས་ྃ་ཞེས་བརྗོད་པས་ཕྱི་སྣོད་ཀྱི་འཇིག་རྟེན་ཐམས་ཅད་ཞིང་ཁམས་རྣམ་པར་དག་པ་བདེ་བ་ཅན་བཞིན་དུ་གྱུར་པའི་དབུས་ཀྱི་ནམ་མཁའ་ལ། སྃ་ལས་སེང་གེ་སྔོན་པོ་ལངས་པའི་སྟེང་དུ། པྃ་ལས་སྣ་ཚོགས་པདྨའི་སྟེང་དུ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་རྃ་ལས་ཉི་མའི་སྟེང་དུ་རང་གི་སེམས་ཉིད་ཡི་གེ་དྷཱིཿདམར་པོ་ཚེག་དྲག་དང་བཅས་པ་ལས་འོད་ཟེར་དམར་པོ་ཕྱོགས་བཅུར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས། སླར་འདུས་དྷཱིཿལ་ཐིམ་པས་རང་ཉིད་འཇམ་དཔལ་སྨྲ་བའི་སེང་གེ་སྐུ་མདོག་དམར་པོ་ཞལ་གཅིག་ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱའི་བར་ནས་ཨུཏྤ་ལའི་རྩ་བ་འཛིན་པས་སྙན་དྲུང་དུ་འདབ་མ་ཁ་བྱེ་བའི་གཡས་གཡོན་གྱི་སྟེང་དུ་རལ་གྲི་དང་པུསྟི་བསྣམས་པ། ཞབས་གཉིས་སྐྱིལ་ཀྲུང་ཕྱེད་པའམ་རྡོ་རྗེ་སྐྱིལ་ཀྲུང་གིས་བཞུགས་པའི་སྐུ་སྨད་ལ་དར་སྣ་ཚོགས་ཀྱི་ན་བཟའ་དང་སྐུ་སྟོད་ལ་ལྷའི་གོས་པཉྩ་ལི་ཀས་གཡོགས་ཤིང་། ཞལ་འཛུམ་པའི་ཐོར་ཚུགས་ཀྱི་རྩེ་མོར་ནོར་བུའི་རིན་པོ་ཆེས་བརྒྱན་པ། པདྨ་དང་ནོར་བུ་དང་ཨུཏྤ་ལའི་ཆུན་པོ་སྤེལ་བའི་ཐོད་ཀྱི་བར་ན་རིན་པོ་ཆེ་དང་ཟུར་ཕུད་ལྔ་རབ་ཏུ་གསལ་བའི་སྙན་གོང་ཨུཏྤལ་ལ་ཁ་བྱེ་ཞིང་། སྙན་ཤལ་ནོར་བུ་འཕྱང་བས་མཛེས་པ། རིན་པོ་ཆེ་དང་མེ་ཏོག་སྣ་ཚོགས་པའི་དབུ་རྒྱན། མགུལ་རྒྱན། སྙན་ཆ། དོ་ཤལ། གདུ་བུའི་སིལ་ཁྲོལ་སྣ་ཚོགས་པས་བརྒྱན་པ། གཞོན་ནུ་ལོ་བརྒྱད་ལོན་པའི་ངང་ཚུལ་ཅན་འོད་ཟེར་དམར་པོ་རབ་ཏུ་འཕྲོ་ཞིང་ཟླ་བའི་རྒྱལ་ཡོལ་ཅན་ཤིན་ཏུ་མཛེས་པ་གཅིག་ཏུ་བསམ་པའི་ཐུགས་ཀར་པདྨ་དང་ཟླ་བའི་དབུས་སུ་ྃ་ཡོངས་སུ་གྱུར་པ་ལས་འཁོར་ལོ་རྩིབས་བཞི་པའི་དབུས་སུ་རལ་གྲི་སོར་བཞི་པའི་ཆང་ཟུང་ལ་དྷཱིཿ རྩེ་མོ་ལ་ཧྲཱིཿ བར་གྱི་སྦལ་ལ་མཱུྃ། རྩིབས་ཀྱི་དབུས་སུ་རྩ་བའི་སྔགས་རྣམས་མར་མེའི་ཕྲེང་བ་བསྒྲིགས་པ་ལྟར་འོད་གསལ་བས་ཡིད་ཀྱི་མུན་པ་མ་ལུས་དག་པར་བྱེད་པར་བསམ། འདིར་བླ་མ་ཁ་ཅིག །རལ་གྲི་ཆང་ཟུང་གི་དྷཱིཿདང་རྩེ་མོའི་ཧྲཱིཿའི་བར་གྱི་སྦལ་རྩ་སྔགས། རྩིབས་ཀྱི་རྩེ་མོར་ཧྲཱིཿ རྩ་བར་དྷཱིཿ བར་དུ་རྩ་སྔགས་འགོད་པའང་བཞེད་ལ། ཁ་ཅིག་རལ་གྲི་ལ་ས་བོན་གཉིས་བཀོད་ནས། རྩིབས་ལ་དྷཱིཿརེ་རེ་སྒོམ་པ་ཡང་ཕྱག་བཞེས་སུ་མཛད་དོ། །གང་ལྟར་སྒོམ་ཡང་དམིགས་པ་(༢༢)མ་གསལ་བར་དུ་གཅེས་སོ། །དེ་ནས་ཐུགས་ཀའི་རལ་གྲི་ལས་འོད་འཕྲོས་པས། མདུན་གྱི་ལྷུང་བཟེད་ཀྱི་ནང་དུ་པདྨ་དང་ཟླ་བའི་སྟེང་དུ་རིལ་བུ་དེ་རྣམས་འོད་དུ་ཞུ་བ་ལས་ཧྲཱིཿསྔོན་པོ་འོད་དུ་འཕྲོ་བ་གཅིག་ཏུ་གྱུར་པའི་འོད་ཀྱིས་དོན་གཉིས་བྱས། ཚུར་འདུས་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྔོན་མོ་འཛུམ་ཁྲོ་རབ་ཏུ་བརྗིད་པ། ཞལ་གཅིག་ཕྱག་གཉིས་ཕྱག་མཚན་དང་བཞུགས་ཚུལ་ཡབ་དང་མཐུན་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། འོད་ཟེར་སྔོན་པོ་འཕྲོ་ཞིང་གཞོན་ནུ་མ་ལོ་བརྒྱད་ལོན་པ་ལྟ་བུའི་ཐུགས་ཀར་པདྨ་དང་ཟླ་བའི་སྟེང་དུ་པདྨ་འདབ་མ་བཞི་དང་ལྡན་པའི་དབུས་སུ་རལ་གྲིའི་ཆང་ཟུང་ལ་ཧྲཱིཿདང་རྩེ་མོར་དྷཱིཿབར་གྱི་སྦལ་ལ་མཱུྃཿའདབ་མ་རྣམས་ལ་རྩ་བའི་སྔགས་རྣམས་གཡོན་སྐོར་དུ་ཡབ་ཀྱི་འཁོར་ལོ་བས་སོར་བཅུ་ཆས་དམའ་བ་ཁ་སྦྱར་གྱི་ཚོད་དུ་ཡོད་པའི་དཔངས་མཐོ་དམན་དུ་བསམ། འདིར་ཡང་སྔ་མ་བཞིན་བླ་མ་དེ་དག་སྔགས་ཀྱི་འགྲེས་ཡབ་ཀྱིས་མཚོན་པར་བཞེད་དོ། །དེ་ལྟར་བསྒོམས་པའི་ཐུགས་ཀ་ནས་ཡིག་འབྲུ་ལས་འཕྲོས་པའི་འོད་ཟེར་གྱིས་རང་བཞིན་གྱི་གནས་དང་རི་བོ་རྩེ་ལྔ་ནས་ཡབ་ཡུམ་ཇི་ལྟར་བསྒོམ་པ་དེ་འདྲ་བའི་ཡེ་ཤེས་པ་གཉིས་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་སྤྱན་དྲངས་ལ་མཆོད་དོ། །ཡབ་ལ་ཡབ་ཡུམ་ལ་ཡུམ་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་གཉིས་སུ་མེད་པར་ཐིམ་པར་བསམ་ལ། ཐུགས་ཀའི་འཁོར་ལོ་ལས་འོད་བྱུང་བས་ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མི་ཤེས་པའི་མུན་པ་ཐམས་ཅད་བསལ་ནས་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩེ་གཅིག་ཏུ་མ་ཡེངས་པས་ཡིག་འབྲུ་རལ་གྲི་དང་བཅས་པ་ལ་སེམས་མཉམ་པར་བཞག་གོ། །འདིའི་དུས་ན་ལུས་དྲང་པོར་འདུག་ལ་སྟེང་རླུང་མནན། འོག་རླུང་བསྡམ། མིག་སྣ་རྩེར་གཏད། སེམས་ཡིག་འབྲུ་ལ་བཟུང་ལ། མིག་མ་འགུལ་བས་རླུང་དལ་བུས་ཐུབ་ཐང་དུ་ནང་དུ་བཟུང་བ་དང་། ཕྱིར་འཕང་བ་དང་དབང་དུ་གནས་པར་བྱ་བ་ནི་མན་ངག་དམ་པའོ། །དེ་ལྟར་སྒོམ་པས་སྐྱོན་བཟླས་པ་དང་སྤྲོ་བསྡུའི་རྣལ་འབྱོར་ལ་སེམས་བཟུང་བ་ནི། དེ་ལྟར་འཇམ་དཔལ་ཡབ་ཡུམ་ལ་སངས་རྒྱས་དང་བྱང་ཆུབ་སེམས་དཔའ་ས་གཞི་དང་བར་སྣང་གང་བས་བསྐོར་བར་བསམ་པ་རྣམས་ཀྱི་སྐུའི་འོད་ཀྱིས་རང་གཞན་གྱི་མི་ཤེས་པའི་མུན་པ་ཐམས་ཅད་བསལ། ཡེ་ཤེས་སྣང་བ་ཆེན་པོ་རྒྱས་པར་བསམ་ཞིང་། འཇམ་དཔལ་ཐུགས་ཀའི་དྷཱིཿལས་སྔགས་ཀྱི་ཕྲེང་བ་རྣམས་མར་མེ་ལས་མར་མེ་ཆད་པ་ལྟར་འོད་ཀྱི་ཚུལ་དུ་ཡིག་འབྲུ་རྣམས་སྣ་བུག་གཡས་སུ་ཐོན། ཡུམ་གྱི་གཡོན་དུ་ཞུགས་ཐུགས་ཀའི་ཧྲཱིཿལས་གྲོལ་བའི་ཚུལ་དུ་སྣ་བུག་གཡས་ནས་ཐོན། འཇམ་དཔལ་གྱི་གཡོན་དུ་ཞུགས་ཏེ་འགལ་མེ་ལྟར་འཁོར་བ་དང་མཉམ་དུ་བདག་གི་ཐུགས་ཀའི་སྔགས་ལས་འོད་ཟེར་ཕར་བྱུང་བ་དང་ལྷ་མོའི་ཐུགས་ཀ་ནས་(༢༣)ཚུར་བྱུང་བ་གཉིས་ལྕགས་ཀྱུ་བཞིན་དུ་སྒྲིལ་ནས་འཁོར་བར་བསམ་པའི་སྔགས་ཕྲེང་དང་འོད་ཟེར་གྱི་ཕྲེང་བར་འཁོར་བའི་ཕྲེང་བ་ལས་འོད་ཟེར་དཔག་ཏུ་མེད་པ་ཕྱིར་འཕྲོས་པའི་འོད་ཀྱིས་སངས་རྒྱས་དང་བྱང་ཆུབ་སེམས་དཔའ་དང་། ཉི་མ་དང་། ཟླ་བ་དང་། གཟའ་དང་། སྐར་མ་དང་། རྩི་ཤིང་ནགས་ཚལ་ལ་སོགས་པའི་འོད་གཟི་བརྗིད་ཚེ་བསོད་ནམས་ཤེས་རབ་ཐམས་ཅད་ཚུར་བསྡུས་ཐུགས་ཀའི་རལ་གྲི་སྔགས་དང་བཅས་པ་ལ་ཐིམ་པས་བདག་ཉིད་ཤེས་རབ་ཕུན་སུམ་ཚོགས་པར་གྱུར། ཡང་ཕྱིར་འཕྲོས་པའི་འོད་ཀྱིས་སྣོད་ཀྱི་འཇིག་རྟེན་ལ་ཕོབ། རིན་པོ་ཆེའི་གཞལ་ཡས་ཁང་དང་ཞིང་ཁམས་དག་པར་བསམ། ཡང་འོད་འཕྲོས་བཅུད་ཀྱི་སེམས་ཅན་ལ་ཕོག་པས་སེམས་ཅན་ཐམས་ཅད་འཇམ་དཔལ་གྱི་སྐུ་དང་། སྒྲ་སྐད་ཐམས་ཅད་སྔགས་ཀྱི་རྒྱལ་པོ་ཉི་ཤུ་རྩ་གཅིག་པོའི་རང་སྒྲར་བསམས་ལ། ཡང་འོད་འཕྲོས་ནུས་པ་ཐམས་ཅད་བཀུག །རང་གི་སྤྱི་བོར་ཐིམ་ཞིང་ཡེ་ཤེས་ཀྱི་སྣང་བ་རྒྱས་པར་བསམས་ལ། རྩ་བའི་སྔགས་ཅི་འགྲུབ་བཟླས་པ་བྱའོ། །
དེ་ནས་རྫོགས་པའི་རིམ་པ་ལ་སེམས་བཟུང་བ་ལ། མཚན་མ་དང་བཅས་པ་དང་། མཚན་མ་མེད་པ་གཉིས་ལས། མཚན་མ་དང་བཅས་པ་ནི། དེའི་རྗེས་ལ་མཚན་མོ་ཉལ་བའམ། འཕྲོ་གཅོད་པའི་ཚེ་གང་རུང་གི་ངང་ལ་བཞག་པར་གསུངས་ཀྱང་ཕྱག་ལེན་ལ་འདི་ལྟར་མཛད་དོ། །དེ་ཡང་སྔ་དྲོ་དང་ཕྱི་དྲོ་གུང་གི་ཐུན་རྣམས་ལ་བསྐྱེད་རིམ་བཟླས་བརྗོད་དང་བཅས་པ་ཟིན་པའི་རྗེས་ལ། རང་གི་ལྟེ་བའི་དབུས་སུ་ཟླ་བའི་དཀྱིལ་འཁོར་གྱི་སྟེང་དུ་ཐིག་ལེ་དམར་པོ་མར་མེ་འབར་བ་ལྟ་བུ་ཞིག་བསམ་པའི་འོད་ཀྱིས་སྤྱི་གཙུག་གི་ཧྃ་དཀར་པོ་མགོ་ཐུར་དུ་ལྟ་བ་ལ་ཕོག་པས་བདུད་རྩིའི་རྒྱུན་བབས་ལྟེ་བའི་མེ་ལ་ཕོག་པས་ཐིག་ལེ་དེ་ཇེ་གསལ་དུ་གྱུར་པ་ནི། དཔེར་ན་མར་མེ་ཟད་ཀ་སྣུམ་ཐིགས་བབས་པ་བཞིན་གྱུར་པས་ལུས་ངག་ཡིད་གསུམ་གྱི་མུན་པ་ཐམས་ཅད་བསལ། ཡེ་ཤེས་ཀྱི་བདུད་རྩིས་ཁེངས་པར་བསམས་ལ། དེ་ནས་ཡང་རང་གི་སྙིང་གའི་འཁོར་ལོ་འོད་དུ་གྱུར་པ་སྙིང་གི་ཁོང་སེང་དུ་མར་མེ་འབར་བ་ལྟ་བུའི་འོད་ཀྱིས་དབུས་དང་ཕྱོགས་མཚམས་བརྒྱད་དུ་བུག་པ་བཏོད་པ་ལས་འོད་འཕྲོས་པས་སྤྱི་བོའི་ཧྃ་ལ་ཕོག་བས་བདུད་རྩིའི་རྒྱུན་བབས། བུག་པ་དགུ་ནས་མར་བྱུང་བས་སྙིང་གི་ནང་ཐམས་ཅད་ཁེངས་པར་བསམས་ལ། བདེ་གསལ་མི་རྟོག་པའི་ངང་ལ་བཞག་གོ། །
གཉིས་པ་ནི། སྲོད་ཀྱི་ཐུན་གྱི་རྗེས་ལ། ཐུགས་ཀའི་རལ་གྲིའི་དྷཱིཿལས་འོད་འཕྲོས་པས་ཕྱི་སྣོད་ཀྱི་འཇིག་རྟེན་ལ་ཕོག་འོད་དུ་ཞུ་ནང་བཅུད་ཀྱི་སེམས་ཅན་ལ་ཐིམ། དེ་ཡང་འོད་དུ་ཞུ་ནས་མདུན་གྱི་དབྱངས་ཅན་མར་ཐིམ། དེ་ཡང་འོད་དུ་ཞུ་ནས་འཇམ་དཔལ་གྱི་ཐུགས་ཀར་ཐིམ། དེ་ཡང་རིམ་གྱིས་སྐུ་སྟོད་སྨད་ཐུགས་ཀའི་འཁོར་ལོ། དེ་རལ་གྲི། དེ་ཧྲཱིཿ དེ་དྷཱིཿ དྷཱིཿའོད་དུ་ཞུ་ནས་ཐིག་ལེ་དམར་པོ་(༢༤)ཞིག་ཏུ་གྱུར་པ་ལ་དར་ཅིག་སེམས་གཏད། དེ་ནས་ཐིག་ལེ་ལས་ཐིག་ལེ་སྔོན་པོ་གཅིག་ཆད་པས་གཉིས་སུ་གྱུར་པ་ལ་སེམས་གཏད། དེ་ནས་དེ་གཉིས་ཅུང་ཟད་འགུལ་བར་བསམས་ལ་རྩ་བའི་སྔགས་བརྗོད་མ་ཐག་ཐིག་ལེ་དེ་གཉིས་རྡོ་འཕངས་པ་ལྟར་ནམ་མཁར་ཡར་ཐལ་མར་ཐལ་ཕར་ཐལ་ཚུར་ཐལ་སོང་ནས་ནམ་མཁའ་དང་སེམས་ཅན་གྱིས་གར་ཁྱབ་ཏུ་སོང་བར་བསམས་ལ། རྩ་བའི་སྔགས་ཅི་འགྲུབ་བརྗོད་ལ། ཉལ་བའི་དུས་སུ་ཐིག་ལེ་དེ་གཉིས་གཅིག་ཏུ་གྱུར། དེ་ཡང་འོད་དུ་ཞུ་ནས་ནམ་མཁའ་ལ་ཐིམ་པས་སྣང་བ་ཐམས་ཅད་དམར་ལམ་གྱིས་སོང་བར་བསམས་ལ་གང་དུ་ཡང་མི་རྟོག་པའི་ངང་ལ་ཕྱམ་གྱིས་ཉལ་ལོ། །
བསྡུས་ནས་བཞག་པ་ནི། ཡབ་ཡུམ་གང་རུང་གི་ཐུགས་ཀའི་ས་བོན་ལ་དམིགས་ལ་རྩ་བའི་སྔགས་བཟླས་པས་ཆོས་ཐམས་ཅད་བརྗོད་དུ་མེད་པའི་ངང་དུ་ཕྱམ་གྱིས་གྱུར་པར་བསམས་ལ་ཉལ་ལོ། །དེ་དག་གི་མཐར་དགེ་བ་མི་དམིགས་པའི་ངང་ནས་བླ་ན་མེད་པའི་བྱང་ཆུབ་ཏུ་བསྔོའོ། །དེ་ལྟར་གྲངས་ཀྱིས་བསྙེན་པ་འབུམ་ཕྲག་བདུན། དུས་ཀྱི་བསྙེན་པ་ཞག་ཉི་ཤུ་རྩ་གཅིག །མཚན་མའི་བསྙེན་པ་འགྲུབ་པའི་རྟགས་མ་བྱུང་གི་བར་དུ་བྱའོ། །
དེ་ལྟར་བྱས་པས་བསྙེན་པ་འགྲུབ་པའི་རྟགས་གསུམ་ལས། རབ་མངོན་སུམ་དུ་འོང་བ་ནི། ལྷུང་བཟེད་ཀྱི་རིལ་བུ་རྒྱལ་པོ་བཞིར་མཐོང་བ་དང་། དབྱངས་ཅན་མར་མཐོང་བ་དང་། ཉི་མ་ཟླ་བར་མཐོང་བ་དང་། འོད་དང་དུ་བར་མཐོང་བའོ། །འབྲིང་ལ་ཉམས་སྣང་དུ་དེ་དག་འབྱུང་བའོ། །ཐ་མ་ལ་རྨི་ལམ་དུ་འོད་ཆེན་པོ་དང་། དུ་བ་དང་། རྔ་དང་། དུང་དང་། རོལ་མོའི་སྒྲ་དང་། མེ་ཏོག་འཛུགས་པ་དང་། འབྲུ་བ་དང་། ཞིང་རྨོ་བ་དང་། སྣག་ཚ་འཐུང་བ་དང་། གླུ་གར་བྱེད་པ་དང་། ཡི་གེ་འབྲི་ཀློག་དང་། ཉི་ཟླ་ཤར་བ་ལ་སོགས་པའོ། །དེ་དག་གང་བྱུང་ཡང་སྔར་བཤད་པའི་ཡོན་ཏན་དེ་དག་འབྱུང་ཞིང་གྲུབ་པའི་རྟགས་ཡིན་ནོ། །
འདི་ལྟར་སྒྲུབ་པའི་ཚེ་རྫུན་དང་། ཤ་ཆང་དང་། སྒོག་ཙོང་དང་། སྔོ་ངད་དང་། འཁོན་དང་། ཞེ་སྡང་དང་། སྡིག་གྲོགས་དང་། མྱ་ངན་དྲག་པོ་བྱེད་པའི་སར་འགྲོ་བ་དང་བྱེད་པ་དང་། སྨྲེ་སྔགས་ལ་སོགས་པ་སེམས་ལ་གནོད་པ་སྟེ། ལུས་སེམས་མི་གཙང་བ་དེ་དག་སྤངས་ལ་གཙང་སྦྲ་ཁོ་ན་གལ་ཆེའོ། །སྒྲུབ་པའི་ལེའུ་སྟེ་གསུམ་པའོ།། །།