རྒྱུ་ལམ་ཤེས།

༈ རྩ་བའི་ས་བཅད་གཉིས་པ་རྒྱུ་ལམ་ཤེས་ལ། འབྲེལ་བཀོད་པའི་སྒོ་ནས་མཚམས་སྦྱར་བ་དང་། མཚོན་བྱེད་ཀྱི་ཆོས་རྒྱས་པར་བཤད་པ་གཉིས། དང་པོ་ནི། རྣམ་པ་ཐམས་ཅད་མཁྱེན་པ་ཉིད་རྟོགས་པ་ནི། ཞེས་པའི་སྐབས་སུ་གཉིས་ཀྱི། དང་པོ་ལམ་ཤེས་ལ། མཚན་ཉིད། དབྱེ་བ། གཞུང་གིས་བསྟན་ཚུལ། རྣམ་མཁྱེན་ལས་ལོགས་སུ་ལམ་ཤེས་འཆད་པའི་རྒྱུ་མཚན་དང་བཞི། དང་པོ་གཉིས་གོང་དུ་བཤད་ཟིན། གསུམ་པ་ནི། སྐབས་གཉིས་པའི་བསྟན་བྱའི་གཙོ་བོར་གྱུར་པའི་ལམ་ཤེས་ཡིན་ན་རྒྱུ་ལམ་ཤེས་ཡིན་དགོས་ཏེ། ལམ་ཤེས་ལ། རྒྱུ་ལམ་ཤེས་དང་། སངས་རྒྱས་ཀྱི་སས་བསྡུས་པའི་འབྲས་དུས་ཀྱི་ལམ་ཤེས་གཉིས་སུ་ངེས་ཤིང་། སྐབས་དང་པོར་རྣམ་མཁྱེན་བཤད་ནས། དེའི་རྒྱུ་ངོ་ཤེས་པའི་ཕྱིར་སྐབས་གཉིས་པ་གསུངས་པའི་ཕྱིར། བཞི་པ་ནི། རྣམ་མཁྱེན་དེ་རྒྱུ་ལམ་ཤེས་ཡོད་ན་འབྱུང་ལ་མེད་ན་མི་འབྱུང་བས་ལོགས་སུ་བཞག་སྟེ། འབྲས་བུ་རྣམ་མཁྱེན་ཐོབ་པ་ནི་རྒྱུ་ལམ་ཤེས་ཉམས་སུ་ལེན་པ་ལ་རག་ལས་པའི་ཕྱིར། ངག་དོན་ནི། རྣམ་མཁྱེན་གྱི་འོག་ཏུ་ལམ་ཤེས་བཤད་པ་ཆོས་ཅན། དགོས་པ་ཡོད་དེ། རྣམ་མཁྱེན་དེ་རྒྱུ་ལམ་ཤེས་ཕན་བྱེད་དུ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་རྒྱུ་མཚན་གྱིས་དེ་ལྟར་དུ་བཤད་པའི་ཕྱིར།

གཉིས་པ་ལ། བསྡུ་བ་སྤྱིར་བསྟན་པ་དང་། དཀའ་གནས་སོ་སོར་བཤད་པ་གཉིས། དང་པོ་ལ། ལམ་ཤེས་ཀྱི་ཡན་ལག་དང་། ཡན་ལག་ཅན་གྱི་ལམ་ཤེས་གཉིས། དང་པོ་ལ། ལམ་ཤེས་མ་སྐྱེས་པ་སྐྱེད་པར་བྱེད་པའི་ཡན་ལག་དང་། སྐྱེས་ནས་གཞན་ལ་ཕན་འདོགས་པའི་ཡན་ལག་གཉིས། དང་པོ་ལ། གེགས་ཉོན་མོངས་མངོན་གྱུར་བ་དང་བྲལ་བའི་ལུས་རྟེན། མཐུན་རྐྱེན་བྱང་ཆུབ་མཆོག་ཏུ་སེམས་བསྐྱེད་པའི་བསམ་པའི་རྟེན། ཉེ་བར་ལེན་པའི་རྒྱུ་ཐེག་ཆེན་གྱི་རིགས་སད་པ་དང་གསུམ། དང་པོ་ནི། ལྷ་རྣམས་རུང་བར་བྱ་བའི་ཕྱིར། །ཞེས་སོགས་རྩ་འགྲེལ་གྱིས་བསྟན། གཉིས་པ་ནི། ཡུལ་ངེས་པ་དང་། ཞེས་སོགས་རྩ་འགྲེལ་གྱིས་བསྟན། གསུམ་པ་ནི། ཁྱབ་པ་དང་ཞེས་སོགས་རྩ་འགྲེལ་གྱིས་བསྟན། གཉིས་པ་ལ། ལམ་ཤེས་ཀྱི་རང་བཞིན་དང་། དེའི་བྱེད་ལས་གཉིས། དང་པོ་ནི། རང་བཞིན་དང་ནི་ཞེས་པ་རྩ་འགྲེལ་གྱིས་བསྟན། གཉིས་པ་ནི། དེ་ཡི་ལས་ཞེས་པ་རྩ་འགྲེལ་གྱིས་བསྟན།

གཉིས་པ་ལ། ཉན་ཐོས། རང་རྒྱལ། ཐེག་ཆེན་གྱི་ལམ་ཤེས་པའི་ལམ་ཤེས་གསུམ། དང་པོ་ནི། ལམ་ཤེས་ཉིད་ཀྱི་ཚུལ་ལ་ནི། ཞེས་སོགས་དང་། འཕགས་པ་ཉན་ཐོས་ལམ་ལ་ནི། ཞེས་སོགས་ཀྱིས་དེའི་རྒྱུ་ངེས་འབྱེད་ཆ་མཐུན་བསྟན། གཉིས་པ་ལ། རང་རྒྱལ་ལམ་གྱི་ཁྱད་ཆོས། ཁྱད་གཞི་རང་རྒྱལ་ལམ་གྱི་ངོ་བོ། དེ་ཇི་ལྟར་ཤེས་ཚུལ་དང་གསུམ། དང་པོ་ནི། རང་བྱུང་བདག་ཉིད་སོགས་དང་། གང་གང་དོན་ནི་སོགས་ཀྱིས་དེ་ལ་རྩོད་སྤོང་བསྟན། གཉིས་པ་ནི། གཟུང་དོན་རྟོག་པ་སོགས། གསུམ་པ་ནི། བཏགས་པའི་ཆོས་ཉིད་སོགས། གསུམ་པ་ལ། གནས་ལུགས་གསར་དུ་མཐོང་བའི་ཚུལ་དང་། མཐོང་ཟིན་གོམས་པའི་ཚུལ་གཉིས། དང་པོ་ནི་བདེན་དང་བདེན་ལ་སོགས་མདོར་བསྟན་དང་། རྒྱས་བཤད་ཀྱིས་བསྟན། གཉིས་པ་ལ། སྒོམ་ལམ་གྱི་བྱེད་པ་དང་། བྱེད་པ་ཅན་གྱི་སྒོམ་ལམ་གཉིས། དང་པོ་ནི། ཀུན་ནས་ཞི་དང་སོགས། གཉིས་པ་ལ། ཟག་བཅས་སྒོམ་ལམ་དང་། ཟག་མེད་སྒོམ་ལམ་གཉིས། དང་པོ་ལ། མོས་བསྔོ་རྗེས་སུ་ཡི་རང་གསུམ། དང་པོ་ནི། མོས་པ་རང་གི་སོགས་དང་། ཤེས་རབ་ཕ་རོལ་ཕྱིན་པ་ལ། ཞེས་སོགས་རྩ་འགྲེལ་གྱིས་དེའི་ཕན་ཡོན་བསྟན། གཉིས་པ་ནི། ཡོངས་སུ་བསྔོ་བ་སོགས། གསུམ་པ་ནི། ཐབས་དང་མི་དམིགས་སོགས། གཉིས་པ་ལ། སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས། དང་པོ་ནི། དེ་ཡི་ངོ་བོ་ཉིད་མཆོག་ཉིད་སོགས། གཉིས་པ་ལ་ལྔ་ལས། དང་པོ་རྣམ་དག་སྒོམ་ལམ་གྱི་རྒྱུ་དང་རྒྱུ་མ་ཡིན་པའི་རབ་དབྱེ་ནི། སངས་རྒྱས་རྟེན་དང་སོགས། གཉིས་པ་དེའི་ངོ་བོ་སྤྱིར་བསྟན་པ་ནི། འབྲས་བུ་དག་པ་སོགས། གསུམ་པ་དེའི་དབྱེ་བ་ནི། ཉོན་མོངས་ཤེས་བྱ་སོགས། བཞི་པ་སངས་རྒྱས་ཀྱི་རྣམ་དག་ཤིན་ཏུ་སྒྲུབ་པའི་ཚུལ་ནི། ས་དགུ་ལ་ནི་སོགས། ལྔ་པ་རྩོད་སྤོང་ནི། དེ་ལ་ཀླན་ཀ་སྤངས་པ་ཡིས། །ཞེས་སོགས་ཀྱིས་བསྟན་ཏོ། །

གཉིས་པ་ལ་གཉིས་ལས། དང་པོ་ལམ་ཤེས་ཀྱི་ཡན་ལག་ནི། ལྷ་རྣམས་རུང་བར་བྱ་བའི་ཕྱིར། །ཞེས་པའི་སྐབས་སུ་གཉིས་ཀྱི། དང་པོ་ལམ་ཤེས་ཀྱི་ཡན་ལག་ལ། མཚན་ཉིད། དབྱེ་བ། དོགས་གཅོད་དང་གསུམ། དང་པོ་ནི། ལམ་ཤེས་དངོས་སུ་སྐྱེ་བའི་ལུས་རྟེན་ལ་སོགས་པ་ཆོས་ལྔ་གང་རུང་གིས་བསྡུས་པའི་ལམ་ཤེས་ཀྱི་ཁྱད་ཆོས། གཉིས་པ་ལ། ལམ་ཤེས་མ་སྐྱེས་པ་བསྐྱེད་པའི་ཡན་ལག་དང་། སྐྱེས་ནས་གཞན་ལ་ཕན་འདོགས་པའི་ཡན་ལག་གཉིས། དང་པོའི་མཚན་ཉིད། ལམ་ཤེས་ཀྱི་ཡན་ལག་གང་ཞིག །ལམ་ཤེས་མ་ཐོབ་པ་ཐོབ་པའི་ཕྱིར་དུ་བརྩོན་པར་བྱེད་པའི་རྒྱུར་གྱུར་པ། དབྱེ་ན། ལུས་རྟེན། བསམ་པའི་རྟེན། ཉེ་བར་ལེན་པའི་རྒྱུ་རིགས་དང་གསུམ། དང་པོ་ནི། ཉོན་མོངས་མངོན་གྱུར་བ་དང་བྲལ་བའི་ཆོས་མཆོག་སྐད་ཅིག་ཐ་མ་ལ་གནས་པའི་བྱང་སེམས་ལྟ་བུ། གཉིས་པ་ནི། དེའི་རྒྱུད་ཀྱི་སེམས་བསྐྱེད་ལྟ་བུ། གསུམ་པ་ནི། ལམ་ཤེས་ཀྱི་རྒྱུར་གྱུར་པའི་ཡིད་ཀྱི་རྣམ་པར་ཤེས་པ་གསལ་རིག་ལྟ་བུ། གཉིས་པའི་མཚན་ཉིད། དེའི་ཡན་ལག་གང་ཞིག །ལམ་ཤེས་ཀྱི་ངོ་བོ་དང་འབྲས་བུ་གང་རུང་དུ་གྱུར་བ། དབྱེ་ན། ལམ་ཤེས་ཀྱི་རང་བཞིན་དང་དེའི་བྱེད་ལས་གཉིས། དང་པོ་ནི། གཞན་དོན་དུ་འཁོར་བར་སྐྱེ་བ་ལེན་པའི་རྒྱུ་ཉོན་མོངས་པའི་བག་ཆགས་ཆེད་དུ་གཉེར་ནས་མི་སྤོང་བའི་ཐེག་ཆེན་གྱི་མཐོང་ལམ་དང་སྒོམ་ལམ་ལྟ་བུ། གཉིས་པ་ནི། ལམ་ཤེས་ཀྱིས་བདག་རྐྱེན་བྱས་པ་ལ་བརྟེན་ནས་བྱུང་བའི་མཛད་པ་ཕྲིན་ལས་ལྟ་བུ། གསུམ་པ་ནི། སྤྱིར་སོ་སྐྱེ་ཐམས་ཅད་ཀྱི་རྒྱུད་ལ་ཉོན་ཡིད་ཡོད་པར་བཤད་པ་ནི་རགས་པ་ཙམ་སྟེ། གཞན་དུ་ཆོས་མཆོག་སྐད་ཅིག་ཐ་མ་ལ་གནས་པའི་བྱང་སེམས་ནི་སོ་སྐྱེ་ཡིན་ཡང་ཉོན་ཡིད་དང་མི་ལྡན་ཏེ། དེ་ང་རྒྱལ་དང་བྲལ་བའི་ཕྱིར་ཏེ། ང་རྒྱལ་བཅོམ་པའི་རྒྱུད་ཁོ་ན་ལ་རྟོགས་པ་སྐྱེའོ་ཞེས་བཤད་པའི་ཕྱིར། ངག་དོན་ནི། ལམ་ཤེས་ཀྱི་ཡན་ལག་ཆོས་ཅན། ཁྱོད་ལ་དབྱེ་ན་ལྔར་ཡོད་དེ། ལམ་ཤེས་སྐྱེ་བའི་ཡན་ལག་གསུམ་དང་། སྐྱེས་ནས་ཕན་འདོགས་བྱེད་གཉིས་སུ་ཡོད་པའི་ཕྱིར།

ཐེག་པ་གསུམ་རྣམ་པར་བཞག་པ་ནི་ཞེས་པའི་སྐབས་སུ་གཉིས་ཀྱི། དང་པོ་ལ། མཐར་ཐུག་ཐེག་པ་གཅིག་ཏུ་གྲུབ་ཚུལ། སེམས་ཅན་ཐམས་ཅད་འཚང་རྒྱ་ཚུལ། འཁོར་བ་ལ་མཐའ་མེད་ཚུལ། འཕྲོས་དོན་གཞན་བཤད་པ་དང་བཞི། དང་པོ་ནི། གནས་སྐབས་གདུལ་བྱ་རིགས་ཅན་གསུམ་ལ་དགོངས་ནས་ཉན་རང་བྱང་སེམས་ཀྱི་ཐེག་པ་གསུམ་དུ་བཞག་ཀྱང་། མཐར་ཐུག་ལ་ལྟོས་ནས་ཐེག་པ་གཅིག་ཏུ་གྲུབ་སྟེ། དམ་ཆོས་པད་དཀར་ལས། ཐེག་པ་གཅིག་སྟེ་གཉིས་པ་ཡོད་མ་ཡིན། །གསུམ་པ་ནམ་ཡང་ཡོད་མིན་འཇིག་རྟེན་ན། །སྐྱེས་བུ་མཆོག་རྣམས་ཐབས་ཀྱི་ཐེག་པ་གང་། །སྣ་ཚོགས་ཉེ་བར་སྟོན་པ་མཛད་མ་གཏོགས། །ཞེས་དང་། ལང་གཤེགས་ལས། ཐེག་པ་གཅིག་ཏུ་ངས་སྨྲས་ཏེ། །ཐེག་པའི་རྣམ་གཞག་ཡོད་མ་ཡིན། །བྱིས་པ་རྣམས་ནི་ཡོང་དྲང་ཕྱིར། །ཐེག་པ་ཐ་དད་ངས་བཤད་དོ། །ཞེས་གསུངས་པའི་ཕྱིར། འོ་ན། རྒྱན་ལས། ཁམས་རྣམས་དང་པོ་མོས་པ་དང་། །སྒྲུབ་པ་ཐ་དད་དབྱེ་བ་དང་། །འབྲས་བུ་ཐ་དད་མཐོང་བའི་ཕྱིར། །རིགས་ཡོད་ཅེས་ནི་ངེས་པ་ཡིན། །ཞེས་སོགས་དུ་མར་གསུངས་པ་དང་མི་འགལ་ལམ་ཞེ་ན་སྐྱོན་མེད་དེ། དེ་ནི་འཁོར་བའི་སྡུག་བསྔལ་གྱིས་དུབ་པའི་སེམས་ཅན་རྣམས་གནས་སྐབས་སུ་དམན་པའི་མྱང་འདས་ལ་བཀོད་ནས་མཐར་ཐུག་ཐེག་ཆེན་དུ་ཁ་དྲང་བ་ལ་དགོངས་པའི་ཕྱིར། གཉིས་པ་ནི། སེམས་ཅན་ཡིན་ན་འཚང་རྒྱ་ངེས་ཡིན་པས་ཁྱབ་སྟེ། དེའི་རྒྱུད་ལ་རྒྱུའི་གཙོ་བོ་རིགས་ཀྱིས་ཁྱབ་པ་གང་ཞིག །འགལ་རྐྱེན་གློ་བུར་བའི་དྲི་མ་རྣམས་སྤང་དུ་རུང་། མཐུན་རྐྱེན་སངས་རྒྱས་ཀྱི་ཕྲིན་ལས་རང་རྒྱུད་ལ་འཇུག་ཏུ་རུང་བའི་ཕྱིར། དང་པོ་གྲུབ་སྟེ། རྒྱུད་བླར། རྫོགས་སངས་སྐུ་ནི་འཕྲོ་ཕྱིར་དང་། ཞེས་སོགས་གསུངས་པའི་ཕྱིར། གཉིས་པ་གྲུབ་སྟེ། རྣམ་འགྲེལ་ལས། སེམས་ཀྱི་རང་བཞིན་འོད་གསལ་ཏེ། །དྲི་མ་རྣམས་ནི་གློ་བུར་བ། །ཞེས་གསུངས་པའི་ཕྱིར། གསུམ་པ་གྲུབ་སྟེ། རྒྱུད་བླར། གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་ཆད། །ཅེས་གསུངས་པའི་ཕྱིར། རྩ་བར་ཁྱབ་སྟེ། ཡེ་ཤེས་སྣང་བ་རྒྱན་གྱི་མདོ་ལས། ཐ་ན་ལོག་པ་ཉིད་དུ་ངེས་པའི་རྒྱུད་དུ་གྱུར་པའི་སེམས་ཅན་རྣམས་ཀྱི་ལུས་ལའང་དེ་བཞིན་གཤེགས་པའི་ཉི་མའི་དཀྱིལ་འཁོར་གྱི་འོད་ཟེར་ཕོག་པས་དེ་དག་ལ་ཕན་ཐོགས་པར་འགྱུར་ཞིང་། མ་འོངས་པའི་རྒྱུ་ཡང་དག་པར་བསྐྱེད་པས་དགེ་བའི་ཆོས་རྣམས་ཀྱི་རྣམ་པར་འཕེལ་བར་འགྱུར་རོ། །ཞེས་དང་། ཟླ་བ་སྒྲོན་མེས་ཞུས་པའི་མདོ་ལས། འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་འགའ་ཡང་མེད། །ཅེས་གསུངས་པའི་ཕྱིར། གསུམ་པ་ནི། སྤྱིར་འཁོར་བ་ལ་མཐའ་མེད་དེ། འཇུག་པ་ལས། ཐོག་མ་དང་པོ་ཐ་མ་མཐའ། །དེ་དག་མེད་པས་འཁོར་བ་ནི། །ཐོག་མ་ཐ་མ་མེད་པར་བརྗོད། །ཅེས་གསུངས་པའི་ཕྱིར། འོ་ན་བཞི་བརྒྱ་པ་ལས། ཡུལ་ལ་བདག་མེད་མཐོང་ནས་ནི། །སྲིད་པའི་ས་བོན་ལྡོག་པར་འགྱུར། །ཞེས་སོགས་ཀྱིས་མི་གནོད་དམ་ཞེ་ན་སྐྱོན་མེད་དེ། དེ་ནི་གང་ཟག་སྒོས་ཚན་པའི་འཁོར་བ་ལ་ཕྱི་མཐའ་ཡོད་པ་ཙམ་ལ་དགོངས་པའི་ཕྱིར། བཞི་པ་ལ། ཐེག་དམན་འཕགས་པ་ཐེག་ཆེན་གྱི་ལམ་གང་ནས་འཇུག་པ་དང་། ཞུགས་ཟིན་སོ་སྐྱེར་འཐད་ཚུལ་གཉིས། དང་པོ་ནི། ཐེག་ཆེན་གྱི་ཚོགས་ལམ་རང་ནས་འཇུག་དགོས་ཏེ། འཚང་རྒྱ་བ་ལ་ཐེག་ཆེན་གྱི་ལམ་ལྔ་རིམ་གྱིས་བགྲོད་དགོས་པའི་ཕྱིར། གཞན་ཡང་དེ་ཡིན་ཏེ། ཆོས་ཀྱི་བདག་མེད་མངོན་སུམ་དུ་རྟོགས་པ་ལ་དེ་དོན་སྤྱིའི་ཚུལ་དུ་རྟོགས་པའི་མཁྱེན་པ་སྔོན་དུ་འགྲོ་དགོས་པའི་ཕྱིར། གཉིས་པ་ནི། ཐེག་དམན་དགྲ་བཅོམ་གྱི་རྟོགས་པ་སྔོན་དུ་སོང་བའི་ཐེག་ཆེན་ཚོགས་སྦྱོར་བའི་རྒྱུད་ལ་གང་ཟག་གི་བདག་མེད་མངོན་སུམ་དུ་རྟོགས་པའི་རྟོགས་པ་རེས་འགའ་མངོན་དུ་འགྱུར་བའི་སྐབས་སྲིད་ཀྱང་། ཕལ་ཆེར་ས་བོན་ནུས་ལྡན་གྱི་ཚུལ་དུ་གནས་ཏེ། དེས་ཉོན་མོངས་པའི་གཉེན་པོ་གང་ཟག་གི་བདག་མེད་བསྒོམ་པ་ལ་འབད་མི་དགོས་པའི་ཕྱིར་ཏེ། དེས་ཉོན་མོངས་པ་སྤངས་ཟིན་པའི་ཕྱིར། རེས་འགའ་མངོན་དུ་འགྱུར་བའི་དུས་གང་ཞེ་ན། དེ་འདྲའི་གང་ཟག་གིས་རང་དོན་ཡིད་བྱེད་ལ་གོམས་པའི་སྟོབས་ཀྱིས་ཐེག་དམན་དུ་ལྟུང་སྲིད་ལ། དེའི་ཚེ་ཐེག་དམན་གྱི་ཚོགས་ལམ་ནས་འཇུག་མི་དགོས་ཏེ། སྔར་གྱི་དགྲ་བཅོམ་པའི་ལམ་ལ་དངོས་སུ་གནས་ནུས་པའི་ཕྱིར། རྒྱུན་ཞུགས་དང་ཕྱིར་འོང་ཙམ་གྱི་རྟོགས་པ་སྔོན་སོང་གི་ཐེག་ཆེན་ཚོགས་སྦྱོར་བའི་རྒྱུད་ལའང་གང་ཟག་གི་བདག་མེད་མངོན་སུམ་དུ་རྟོགས་པའི་ཤེས་རབ་མངོན་གྱུར་དུ་མི་ལྡན་ཏེ། དེའི་རྒྱུད་ལ་ཆོས་ཉིད་དོན་སྤྱིའི་ཚུལ་དུ་རྟོགས་པའི་ཐེག་ཆེན་གྱི་ལམ་མངོན་གྱུར་དུ་ལྡན་པའི་ཕྱིར། དེས་ན། དམན་ལམ་འཕགས་རྒྱུད་ཀྱི་མཁྱེན་པ་སྔོན་སོང་གི་ཐེག་ཆེན་ཚོགས་སྦྱོར་བ་གཉིས་ཀ་སོ་སྐྱེར་འཐད་དེ། ཐེག་ཆེན་གྱི་གང་ཟག་གང་ཞིག །ཆོས་ཉིད་དོན་སྤྱིའི་ཚུལ་དུ་རྟོགས་པའི་ཐེག་ཆེན་གྱི་སྐྱེས་བུ་ཡིན་པའི་ཕྱིར། ངག་དོན་ནི། ཉན་ཐོས་དགྲ་བཅོམ་པ་ཆོས་ཅན། ཁྱོད་ཀྱིས་ལམ་ཤེས་བསྒོམ་དགོས་ཏེ། ཁྱོད་སེམས་ཅན་གང་ཞིག །ཁྱོད་འཚང་རྒྱ་བའི་ཕྱིར།

བྱང་ཆུབ་ཏུ་སེམས་བསྐྱེད་པ་ནི་ཞེས་པའི་སྐབས་སུ་གཉིས་ཀྱི། དང་པོ་སྐབས་འདིར་བསྟན་གྱི་ཉོན་མོངས་པ་དེ་མཚན་བཏགས་གང་ཡིན་དཔྱད་པ་ལ། ཉོན་མོངས་པའི་སྒྲ་འཇུག་ཚུལ་སྤྱིར་བསྟན། འདིར་བསྟན་གྱི་ཉོན་མོངས་ངོས་བཟུང་། ཞར་ལ་སྐྱེ་བ་ལེན་ཚུལ་གྱི་དབྱེ་བ་དང་གསུམ། དང་པོ་ལ། མངོན་གྱུར། ས་བོན། བག་ཆགས་དང་གསུམ། དང་པོའི་མཚན་ཉིད། སེམས་རྒྱུད་རབ་ཏུ་མ་ཞི་བར་བྱེད་པའི་སྒོ་ནས་རང་ཡུལ་གྱི་དམིགས་རྣམ་འཛིན་བྱེད་ཀྱི་རིག་པ། མཚན་གཞི། རྩ་ཉོན། ཉེ་ཉོན། དེ་དག་དང་མཚུངས་པར་ལྡན་པའི་སེམས་སེམས་བྱུང་མཐའ་དག་གོ །གཉིས་པའི་མཚན་ཉིད། སེམས་རྒྱུད་ལ་ཉོན་མོངས་པའི་རིགས་འདྲ་སྔ་མས་བཞག་པའི་ནུས་པ་གང་ཞིག །རྐྱེན་དང་འཕྲད་ན་ཉོན་མོངས་པ་ཕྱི་མ་བསྐྱེད་པའི་རིགས་གནས། དབྱེ་ན། ཉོན་མོངས་པ་དང་ལྷན་ཅིག་ཏུ་འཇུག་པའི་ས་བོན་དང་། རང་དུས་སུ་ཉོན་མོངས་པ་འགགས་ཟིན་པའི་ས་བོན་གཉིས། དང་པོ་ནི། མ་རིག་པ་རིགས་འདྲ་སྔ་མས་ཕྱི་མ་བསྐྱེད་བཞིན་པའི་ནུས་པ་ལྟ་བུ། གཉིས་པ་ནི། མཉམ་བཞག་ལ་གནས་བཞིན་པའི་ཉན་ཐོས་འཕགས་པའི་རྒྱུད་ཀྱི་ཉོན་མོངས་པའི་ས་བོན་ལྟ་བུ། གསུམ་པའི་མཚན་ཉིད། སེམས་རྒྱུད་ལ་ཉོན་མོངས་པའི་རིགས་འདྲ་སྔ་མས་བཞག་པའི་གནས་ངན་ལེན་གྱི་དྲི་མ་ཕྲ་ཞིང་ཕྲ་བ་གང་ཞིག །རྐྱེན་དང་ཕྲད་ཀྱང་ཉོན་མོངས་པའི་རིགས་འདྲ་ཕྱི་མ་འབྱུང་བའི་ནུས་པ་གཏན་མེད་པ། ཉོན་མོངས་པའི་བག་ཆགས། དེའི་གནས་ངན་ལེན། མ་རིག་བག་ཆགས་ཀྱི་ས་རྣམས་མིང་གི་རྣམ་གྲངས་སོ། །དེ་ཡང་དང་པོ་གཉིས་ནི་ཉོན་སྒྲིབ་མཚན་ཉིད་པ་ཡིན་ལ། ཕྱི་མ་བཏགས་པ་བ་ཡིན་ནོ། །གཉིས་པ་ནི། སྔར་བཤད་པའི་ཉོན་མོངས་པ་དང་པོ་གཉིས་འདིར་བསྟན་གྱི་ཉོན་མོངས་མ་ཡིན་ཏེ། འདིར་བསྟན་གྱི་ཉོན་མོངས་པ་ནི་བྱང་སེམས་འཕགས་པས་གཞན་དོན་དུ་འཁོར་བར་སྐྱེ་བ་ལེན་པའི་རྒྱུ་བྱེད་ལ། དེས་ལས་ཉོན་གྱི་དབང་གིས་འཁོར་བར་སྐྱེ་འཆི་སྤངས་ཟིན་པའི་ཕྱིར། རྒྱུད་བླར། འཕགས་པས་འཆི་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། ཞེས་སོ། །དེས་ན་གསུམ་པའི་སྟེང་ནས་འཇོག་ཅིང་། དེ་ལ་ཡང་བྱང་ཆུབ་ཀྱི་གེགས་བྱེད་པའི་ཉོན་མོངས་པའི་བག་ཆགས་དང་། དེའི་གྲོགས་སུ་གྱུར་པའི་ཉོན་མོངས་པའི་བག་ཆགས་གཉིས་ལས། དང་པོ་མ་ཡིན་ཏེ། ཅིག་ཅར་ཉོན་མོངས་པ་དང་ཤེས་བྱའི་སྒྲིབ་པ་སྤོང་ངོ་། །ཞེས་གསུངས་པའི་ཕྱིར། དེས་ན་གཉིས་པ་ཡིན་ཏེ། དེ་བྱང་སེམས་འཕགས་པས་གཞན་དོན་དུ་ཚོགས་གསོག་པའི་ཡན་ལག་ཏུ་ཆེད་དུ་གཉེར་ནས་འཛིན་པའི་ཕྱིར། འོད་སྲུང་གིས་ཞུས་པའི་མདོ་ལས། ཇི་ལྟར་གྲོང་ཁྱེར་སྐྱེ་བོའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་སངས་རྒྱས་ཆོས་རྣམས་བསྐྱེད་ལ་ཕན། །ཞེས་དང་། ཐོགས་མེད་ཀྱིས། ཐབས་ཆེན་རྣམས་དང་ལྡན་པ་ལ། །སྲིད་པའང་ཞི་བའི་བདག་ཉིད་དེ། །ཉོན་མོངས་བྱང་ཆུབ་ཡན་ལག་གྱུར། །དེ་ཉིད་རྒྱལ་སྲས་བསམ་མི་ཁྱབ། །ཅེས་སོ། །གསུམ་པ་ལ། གང་གིས་སྐྱེ་བ་ལེན་པའི་རྒྱུ་དང་། ཇི་ལྟར་སྐྱེ་བ་ལེན་པའི་ཚུལ་གཉིས། དང་པོ་ནི། ཐེག་དམན་སློབ་པ་དང་། སོ་སྐྱེས་རྣམས་ནི་ལས་ཉོན་གཉིས་ཀྱི་དབང་གིས་སྐྱེ་བ་ལེན་ཏེ། དེས་ས་བོན་མ་སྤངས་པས་མི་འདོད་བཞིན་དུ་འཁོར་བར་སྐྱེ་འཆི་བྱེད་པའི་ཕྱིར། ཐེག་དམན་དགྲ་བཅོམ་པ་དང་བྱང་སེམས་འཕགས་པ་ནི་མ་རིག་བག་ཆགས་ཀྱི་ས་དང་། ཟག་པ་མེད་པའི་ལས་ཀྱི་རྒྱུ་ལ་བརྟེན་ནས་འཁོར་བར་སྐྱེ་བ་ལེན་ཏེ། དང་པོས་ལྷག་མེད་མྱང་འདས་ཐོབ་ཕྱིར་དུ། གཉིས་པས་གཞན་དོན་དུ་ཚོགས་གསོག་པའི་ཕྱིར་དུ་ཡིད་ཀྱི་རང་བཞིན་གྱི་ལུས་ལེན་དགོས་ཤིང་། རྒྱུ་ལས་ཉོན་གཉིས་ཟད་པར་སྤངས་པའི་ཕྱིར། གཉིས་པ་ནི། ཐེག་དམན་སློབ་པ་དང་། སོ་སོའི་སྐྱེ་བོ་རྣམས་ཉོན་མོངས་པས་ཀུན་ནས་བསླངས་ནས་ཟག་བཅས་ཀྱི་ལས་བསགས་ཏེ་འཁོར་བར་སྐྱེ་བའི་རྟེན་འབྲེལ་གཉིས་འགྲུབ་པར་བྱེད་པ་བཞིན་དུ། ཐེག་དམན་དགྲ་བཅོམ་པ་དང་བྱང་སེམས་འཕགས་པས་ཀྱང་མ་རིག་བག་ཆགས་ཀྱི་སས་རྐྱེན། ཟག་པ་མེད་པའི་ལས་ཀྱིས་རྒྱུ་བྱས་ཏེ། ཡིད་ཀྱི་རང་བཞིན་གྱི་ལུས་ལེན་པ་དང་། བསམ་གྱིས་མི་ཁྱབ་པར་གྱུར་པའི་འཆི་འཕོ་བྱེད་པར་བཤད་པ་ཡིན། ངག་དོན་ནི། བྱང་སེམས་མཐོང་ལམ་པ་ཆོས་ཅན། གཞན་དོན་དུ་འཁོར་བར་སྐྱེ་བ་ལེན་པའི་རྒྱུར་གྱུར་པའི་ཉོན་མོངས་པའི་བག་ཆགས་ཆེད་དུ་གཉེར་ནས་མི་སྤོང་བའི་རྒྱུ་མཚན་ཡོད་དེ། གདུལ་བྱའི་འཁོར་བ་ཇི་སྲིད་བར་སེམས་ཅན་གྱི་དོན་བྱེད་པར་ཞུགས་པའི་རྒྱལ་སྲས་འཕགས་པ་ཡིན་པའི་ཕྱིར།

གཉིས་པ་ཡན་ལག་ཅན་གྱི་ལམ་ཤེས་ལ། ཉན་ཐོས། རང་རྒྱལ། ཐེག་ཆེན་གྱི་ལམ་ཤེས་པའི་ལམ་ཤེས་དང་གསུམ། དང་པོ་ནི། ལམ་ཤེས་ཉིད་ཀྱི་ཚུལ་ལ་ནི། ཞེས་པའི་སྐབས་སུ་གཉིས་ཀྱི། དང་པོ་ལ། ཤེས་བྱ་ལམ་གསུམ་ངོས་བཟུང་བ། དེ་ཇི་ལྟར་དུ་ཤེས་ཚུལ། ཡུལ་ཅན་ལམ་ཤེས། མདོ་བསྟན་བཅོས་ལས་ཇི་ལྟར་དུ་བསྟན་ཚུལ་དང་བཞི། དང་པོ་ནི། གང་ཟག་གི་བདག་མེད་རྟོགས་པའི་རྟོགས་རིགས་དང་ཤེས་བྱ་ཉན་ཐོས་ཀྱི་ལམ་དོན་གཅིག །དབྱེ་ན། ཉན་ཐོས། རང་རྒྱལ། ཐེག་ཆེན་པའི་རྒྱུད་ལ་ཡོད་པའི་ཤེས་བྱ་ཉན་ཐོས་ཀྱི་ལམ་གསུམ། དེ་བཞིན་དུ། གཟུང་བ་ཆོས་ཀྱི་དང་ཤེས་བྱ་རང་རྒྱལ་གྱི་ལམ་དོན་གཅིག །དབྱེ་ན། རང་རྒྱལ་དང་ཐེག་ཆེན་པའི་རྒྱུད་ལ་ཡོད་པ་གཉིས། འཛིན་པ་ཆོས་ཀྱི་བདག་མེད་རྟོགས་པའི་རྟོགས་རིགས། ཤེས་བྱ་ཐེག་ཆེན་གྱི་ལམ་དང་། ཐེག་དམན་གྱི་ལམ། ཐེག་ཆེན་གྱི་རྟོགས་པ་རྣམས་དོན་གཅིག །དེ་ཡང་། ཉན་ཐོས་ཀྱི་རྟོགས་རིགས་ཡིན་ན་ཤེས་བྱ་ཉན་ཐོས་ཀྱི་ལམ་ཡིན་པས་ཁྱབ་ཀྱང་། ཤེས་བྱ་ཉན་ཐོས་ཀྱི་ལམ་ཡིན་ན་ཉན་ཐོས་ཀྱི་རྟོགས་རིགས་ཡིན་པས་མ་ཁྱབ་སྟེ། དཔེར་ན། བྱང་འཕགས་ཀྱི་རྒྱུད་ཀྱི་མཁྱེན་པ་དེ་ཤེས་བྱ་ཉན་ཐོས་ཀྱི་ལམ་ཡིན་ཀྱང་ཉན་ཐོས་ཀྱི་རྟོགས་རིགས་མ་ཡིན་པ་བཞིན་ནོ། །དེས་ན། ཉན་ཐོས་ཀྱི་རྟོགས་རིགས་ནི་གང་ཟག་གི་བདག་མེད་རྟོགས་པའི་རྟོགས་རིགས་ཙམ་ཡིན་ལ། དེས་རང་རྒྱལ་ལའང་རིགས་འགྲེའོ། །འོན་ཀྱང་། ཤེས་བྱ་ཉན་ཐོས་ཀྱི་ལམ་དང་ཉན་ཐོས་ཀྱི་རྟོགས་རིགས། ཤེས་བྱ་རང་རྒྱལ་གྱི་ལམ་དང་རང་རྒྱལ་གྱི་རྟོགས་རིགས་གཉིས་དོན་གཅིག་ཏུ་བྱས་ནས། དེ་དག་གང་རུང་ཡིན་ན་ཉན་ཐོས་ཀྱི་ལམ་དང་། རང་རྒྱལ་གྱི་ལམ་གང་རུང་ཡིན་པས་མ་ཁྱབ་པར་བྱས་ཀྱང་མི་འགལ་ལོ། །

གཉིས་པ་ལ་གཞན་རྒྱུད་ལ་ཡོད་པའི་ཤེས་ཚུལ་དང་། རང་རྒྱུད་ཀྱི་ཤེས་ཚུལ་གཉིས། དང་པོ་ནི། བྱང་འཕགས་ཀྱི་རྒྱུད་ཀྱི་ཆོས་ཀྱི་སྤྱན་གྱིས་གང་ཟག་གཞན་རྒྱུད་ཀྱི་བདག་མེད་རྟོགས་པའི་རྟོགས་རིགས་ཀྱི་ངོ་བོ་དམིགས་རྣམ་སྐྱེ་ཚུལ་མངོན་སུམ་དུ་ཤེས་པར་འདོད་དེ། དེས་རང་དང་རྒྱུད་ཚོད་མཉམ་པ་མན་ཆད་ཀྱིས་འཕགས་པའི་གང་ཟག་གི་དབང་པོའི་དབྱེ་བ་ཐམས་ཅད་མངོན་སུམ་དུ་ཤེས་ནུས་པའི་ཕྱིར། མདོ་ལས། འདོད་ཆགས་དང་བཅས་པའི་སེམས་ལ། འདོད་ཆགས་དང་བཅས་པའི་སེམས་སུ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་སོགས་སོ། །གཉིས་པ་ལ། རྗེས་ཐོབ་དང་། མཉམ་བཞག་ཏུ་ཤེས་ཚུལ་གཉིས། དང་པོ་ནི། བྱང་སེམས་འཕགས་པས་རྗེས་ཐོབ་ཏུ་གང་ཟག་གི་བདག་མེད་རྟོགས་པའི་རྟོགས་རིགས་རང་རྒྱུད་ལ་ཉམས་སུ་མྱོང་བའི་སྒོ་ནས་མངོན་སུམ་དུ་ཤེས་པར་བྱེད། གཉིས་པ་ནི། དེས་མཉམ་བཞག་ཏུ་གང་ཟག་གི་བདག་མེད་རྟོགས་པའི་རྟོགས་རིགས་བདེན་མེད་དུ་མི་དམིགས་པའི་ཚུལ་གྱིས་ཤེས་པ་བྱེད་དེ། རྣམ་པ་མི་དམིགས་སྒོ་ནས་ནི། ཞེས་གསུངས་པའི་ཕྱིར།

གསུམ་པ་ལ། མཚན་ཉིད་ནི། ཐེག་དམན་གྱི་ལམ་གྱི་ཚུལ་ཇི་ལྟ་བ་བཞིན་དུ་རྟོགས་ནས། རྟོགས་རིགས་ཀྱི་ཡོན་ཏན་ཡར་ལྡན་དུ་བསྐྱེད་པ་ལ་མཁས་པའི་ཐེག་ཆེན་འཕགས་པའི་མཁྱེན་པ། མཚན་གཞི། ཐེག་ཆེན་གྱི་འཕགས་ལམ་མཐའ་དག་གོ །

བཞི་པ་ནི། འདིར་བསྟན་གྱི་མདོ་དང་བསྟན་བཅོས་གཉིས་ཀ་ལས། ཤེས་བྱ་ཉན་ཐོས་ཀྱི་ལམ་དང་ལམ་ཤེས་གཉིས་ཀ་དངོས་སུ་བསྟན་ཏེ། བདེན་བཞི་མི་རྟག་ལ་སོགས་བཅུ་དྲུག་མངོན་སུམ་དུ་རྟོགས་པའི་རྟོགས་རིགས་དང་། ལམ་དེ་ཉིད་བདེན་མེད་དུ་མངོན་སུམ་དུ་རྟོགས་པའི་ལམ་གཉིས་དངོས་སུ་བསྟན་པའི་ཕྱིར། དེ་ཡང་། ལམ་ཤེས་ཉིད་ཀྱི་ཚུལ་ལ་ནི། འཕགས་པའི་བདེན་པ་བཞི་དག་གི །ཉན་ཐོས་ལམ་འདི། ཞེས་པ་རྩ་འགྲེལ་གྱིས་ཤེས་བྱ་ཉན་ཐོས་ཀྱི་ལམ་དངོས་སུ་བསྟན། རྣམ་པ་མི་དམིགས་སྒོ་ནས་ནི། ཉན་ཐོས་ལམ་འདི་ཞེས་སོགས་ཀྱིས་ཡུལ་ཅན་ལམ་ཤེས་དངོས་སུ་བསྟན། མདོ་ལས། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་བསྐྱེད་པས་དེ་མི་དམིགས་པའི་ཚུལ་གྱིས། གཟུགས་ནི་མི་རྟག་པར་ཡིད་ལ་བྱའོ། །ཞེས་པ་ནས། དགེ་བའི་རྩ་བ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བྱའོ། །ཞེས་སོ། །སྦྱོར་བ་རྣམ་མཁྱེན་ཡིད་བྱེད། དངོས་གཞི་མི་དམིགས་པ། རྗེས་དགེ་རྩ་རྫོགས་པའི་བྱང་ཆུབ་ཏུ་བསྔོ་བ་སྟེ་ཁྱད་ཆོས་གསུམ་ལྡན་དུ་གསུངས་པས་ནི་ཡུལ་ཅན་ལམ་ཤེས་དངོས་སུ་བསྟན་པ་ཡིན་ལ། མི་རྟག་པ་དང་། སྡུག་བསྔལ་བ་དང་། ཞེས་སོགས་ཀྱིས་ཤེས་བྱ་ཉན་ཐོས་ཀྱི་ལམ་དངོས་སུ་བསྟན། ཤེས་བྱ་ཉན་ཐོས་ཀྱི་ལམ་ལ་ཡང་། ཉན་རང་དང་བྱང་སེམས་ཀྱི་རྒྱུད་ལ་ཡོད་པ་གཉིས་ལས། དང་པོ་ཤུགས་དང་། ཕྱི་མ་དངོས་སུ་བསྟན་ཏོ། །ངག་དོན་ནི། ཐེག་ཆེན་གྱི་མཐོང་ལམ་ཆོས་ཅན། ཉན་ཐོས་ཀྱི་ལམ་ཤེས་པའི་ལམ་ཤེས་ཡིན་ཏེ། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་བཟུང་བའི་ཕྱིར་དུ། ཉན་ཐོས་ལམ་གྱི་དམིགས་རྣམ་གྱི་ཚུལ་ཇི་ལྟ་བ་བཞིན་དུ་རྟོགས་ནས། རྟོགས་རིགས་ཀྱི་ཡོན་ཏན་ཡར་ལྡན་དུ་བསྐྱེད་པ་ལ་མཁས་པའི་ཐེག་ཆེན་འཕགས་པའི་མཁྱེན་པ་ཡིན་པའི་ཕྱིར།

གཉིས་པ་ལ། རང་རྒྱལ་ལམ་གྱི་ཁྱད་ཆོས་དང་། ཁྱད་གཞི་རང་རྒྱལ་གྱི་ལམ་ཇི་ལྟར་ཤེས་ཚུལ་གཉིས། དང་པོ་ནི། རང་བྱུང་བདག་ཉིད་རྟོགས་པའི་ཕྱིར། ཞེས་པའི་སྐབས་སུ་གཉིས་ཀྱི། དང་པོ་རང་རྒྱལ་ལ། རྟེན་གྱི་གང་ཟག །རང་རྒྱལ་གྱི་ལམ། དེ་དག་གི་ཁྱད་ཆོས་བཤད་པ་དང་གསུམ། དང་པོ་ལ། མཚན་གཞི། མཚན་ཉིད། དབྱེ་བ་དང་གསུམ། དང་པོ་ནི། སྤྱིར་རང་རྒྱལ་ལ་བསེ་རུ་ལྟ་བུ་དང་། ཚོགས་ན་སྤྱོད་པའི་རང་རྒྱལ་གཉིས་སུ་བཤད་ཅིང་། མཐར་ཐུག་གི་ལྟ་བ་གང་ཟག་གི་བདག་མེད་ཀྱི་སྟེང་གཟུང་བ་ཆོས་ཀྱི་བདག་མེད་གཏན་ལ་འབེབས་པ་ཐེག་འབྲིང་གི་མངོན་རྟོགས་རྒྱུད་ལྡན་ཏེ། ཀུན་བཏུས་ལས། རང་སངས་རྒྱས་ཀྱི་ཐེག་པ་བ་གང་ཞེ་ན། རང་སངས་རྒྱས་ཀྱི་ཆོས་ཉིད་ངེས་པའམ་མ་ངེས་པ་ལ་གནས་པ་དང་། རང་བཞིན་གྱི་དབང་པོ་འབྲིང་པོ་དང་། བདག་རྣམ་པར་ཐར་པའི་ཕྱིར་སྨོན་ལམ་བཏབ་པ་དང་། ཞེས་སོ། །དེ་ལའང་སློབ་མི་སློབ་གཉིས་ཀ་ཡོད་པ་འཐད་དེ། སྲིད་པ་ཐ་མ་པའི་དུས་སུ་བྱང་ཆུབ་བགྲོད་པའི་རང་རྒྱལ་བཤད་པ་དང་། ཐར་ལམ་ལྔ་གསུམ་བཅོ་ལྔར་གསུངས་པ་དོན་ཡོད་པའི་ཕྱིར། གཉིས་པ་ནི། གཟུང་བ་ཆོས་ཀྱི་བདག་མེད་རྟོགས་པས་རབ་ཏུ་ཕྱེ་བའི་ཐེག་འབྲིང་གི་གང་ཟག །གསུམ་པ་ལ། ལམ་གྱི་སྒོ་ནས་དང་། མཚན་གཞིའི་སྒོ་ནས་དབྱེ་བ་གཉིས། དང་པོ་ལ། རང་རྒྱལ་ཚོགས་ལམ་པ་སོགས་ལྔ་ཡོད། གཉིས་པ་ལ། བསེ་རུ་ལྟ་བུ་དང་། ཚོགས་ན་སྤྱོད་པ་གཉིས། འདི་དག་ལ་ཁྱད་ཆོས་སྤྱིར་བཤད། མཚན་ཉིད་བསྡུས་ཏེ་བསྟན། ཉན་ཐོས་རང་རྒྱལ་གྱི་ལམ་དུ་འཇུག་ཚུལ་དང་གསུམ། དང་པོ་ལ། རིགས་དང་། དབང་པོ་དང་། གྲོགས་དང་། ལམ་བགྲོད་ཚུལ་གྱི་ཁྱད་པར་བཞི་ཡོད། དང་པོ་ལ། བསེ་རུ་ལྟ་བུ་ནི། ཐོག་མ་ཉིད་ནས་རང་རྒྱལ་ཉིད་དུ་རིགས་ངེས་པའི་རིགས་ཅན་ཡིན་ལ། ཅིག་ཤོས་ནི་དེ་ལས་གཞན་པ། གཉིས་པ་ནི། བསེ་རུ་ལྟ་བུ་དབང་རྣོན། ཅིག་ཤོས་དབང་རྟུལ་ལོ། །གསུམ་པ་ནི། བསེ་རུ་ལྟ་བུ་རང་ཉིད་གཅིག་པུར་གནས་ཏེ་གཙོ་བོར་འཕགས་ལམ་བགྲོད། ཚོགས་སྤྱོད་ནི་གྲོགས་གཞན་དང་ལྷན་ཅིག་གནས་པའི་སྒོ་ནས་འཕགས་ལམ་བགྲོད། བཞི་པ་ནི། བསེ་རུ་ལྟ་བུ་རིགས་ངེས་པ་དང་དབང་པོ་རྣོ་བས་འཕགས་ལམ་མྱུར་དུ་བགྲོད་ལ། ཅིག་ཤོས་དེ་ལས་གཞན་པའོ། །གཉིས་པ་ལ། དང་པོའི་མཚན་ཉིད། ཚོགས་སྤྱོད་ལས་དབང་པོ་རྣོ་བའི་རང་རྒྱལ་གང་ཞིག །དང་པོ་ཉིད་ནས་རང་རྒྱལ་དུ་རིགས་ངེས་པ་སྔོན་དུ་སོང་བའི་སྒོ་ནས་གྲོགས་གཞན་ལ་ལྟོས་མེད་དུ་རང་རྒྱལ་གྱི་བྱང་ཆུབ་མངོན་དུ་བྱེད་ནུས། གཉིས་པའི་མཚན་ཉིད། བསེ་རུ་ལྟ་བུ་ལས་དབང་པོ་རྟུལ་བའི་རང་རྒྱལ་གང་ཞིག །གྲོགས་གཞན་དང་ལྷན་ཅིག་གནས་པའི་སྒོ་ནས་རང་རྒྱལ་གྱི་བྱང་ཆུབ་བགྲོད་པ་དང་བགྲོད་ཟིན་པ་གང་རུང་གི་རིགས་གནས། དབྱེ་ན་ཉན་ཐོས་སྔོན་དུ་མ་སོང་བའི་ཚོགས་སྤྱོད་དང་། སོང་བའི་དེ་གཉིས། དེ་ལ་ཡང་ཉན་ཐོས་སོ་སྐྱེ་ཙམ་དང་། འཕགས་པ་སྔོན་སོང་གཉིས་ཡོད། གསུམ་པ་ལ། གང་ཟག་གང་འཇུག་པ་དང་། ལམ་གང་ནས་འཇུག་པ་གཉིས། དང་པོ་ལ། བྱེ་སྨྲ་ལྟར་ན་ཉན་ཐོས་ཀྱི་སྦྱོར་ལམ་རྩེ་མོ་ནས་ཐེག་ཆེན་དུ་འཇུག་པ་ཡོད་ལ། བཟོད་པ་ཐོབ་ནས་མེད་ཅིང་། བཟོད་པ་ཐོབ་ནས་ཀྱང་རང་རྒྱལ་གྱི་ལམ་དུ་འཇུག་པར་བཞེད་དེ། མཛོད་ལས། གཉིས་སློབ་རིགས་ལས་བཟློག་ནས་ནི། །སངས་རྒྱས་སུ་འགྱུར་གཞན་གསུམ་ཡང་། །ཞེས་སོ། །འོན་ཀྱང་བཟོད་ཆེན་ཐོབ་ནས་རང་རྒྱལ་དུ་ཡང་མི་འཇུག་སྟེ། བཟོད་ཆེན་གྱི་མཇུག་ཐོག་དེ་མ་ཐག་ཏུ་ཆོས་མཆོག་དང་། དེའི་དེ་མ་ཐག་ཏུ་འཕགས་ལམ་ཐོབ་པ་གང་ཞིག །འཕགས་ལམ་ནས་ཐེག་པ་གཞན་དུ་མི་འཇུག་པའི་ཕྱིར། མཛོད་ལས། ཆེན་པོ་འདོད་རྟོགས་སྡུག་བསྔལ་ཡུལ། །དེ་ནི་སྐད་ཅིག་གཅིག་དེ་བཞིན། །ཆོས་མཆོག་ཐམས་ཅད་ཕུང་པོ་ལྔ། །ཞེས་སོ། །སེམས་ཙམ་པ་ལྟར་ན། རྒྱུན་ཞུགས་དང་ཕྱིར་འོང་བ་རང་རྒྱལ་ལམ་དུ་འཇུག་པ་ཡོད་ཅིང་། ཕྱིར་མི་འོང་ཐོབ་ནས་དེར་འཇུག་པ་མེད་དེ། དེ་ཐོབ་ནས་འདོད་པར་ལས་ཉོན་གྱིས་སྐྱེ་བ་ལེན་པ་མེད་པའི་ཕྱིར་ཟེར། དབུ་མ་པ་རང་ལུགས་ལྟར་ན། ཕྱིར་མི་འོང་ཐོབ་ནས་ཀྱང་རང་རྒྱལ་ལམ་དུ་འཇུག་པ་ཡོད་དེ། འདོད་ཉོན་དགུ་པ་སྤངས་པའི་མ་ངེས་པའི་རིགས་ཅན་གྱི་ཉན་ཐོས་སྒོམ་ལམ་པ་རང་རྒྱལ་དགེ་བའི་བཤེས་གཉེན་དང་ཕྲད་པའི་དབང་གིས་གཟུང་བ་ཆོས་ཀྱི་བདག་མེད་ལ་ཐོས་བསམ་བྱེད་སྲིད་པའི་ཕྱིར། གཉིས་པ་ལ། དངོས་སྨྲ་བའི་ལུགས་དང་། དབུ་མ་བའི་ལུགས་གཉིས། དང་པོ་ནི། ཉན་ཐོས་རང་རྒྱལ་གྱི་ལམ་དུ་འཇུག་པའི་ཚེ། སྔར་བགྲོད་ཟིན་པའི་ལམ་གྱི་ལྷག་མ་ནས་འཇུག་པ་ཡིན་ཏེ། ཉན་རང་གཉིས་དབང་པོ་རྣོ་རྟུལ་གྱི་ཁྱད་པར་ཙམ་ལས་ཐེག་དམན་དུ་མཚུངས་པའི་ཕྱིར། ཞེས་ཟེར། གཉིས་པ་ནི། ཉན་ཐོས་རང་རྒྱལ་གྱི་ལམ་དུ་འཇུག་པའི་ཚེ་རང་རྒྱལ་གྱི་ཚོགས་ལམ་རང་ནས་འཇུག་དགོས་ཏེ། གཟུང་བ་ཆོས་ཀྱི་བདག་མེད་རྟོགས་པ་མཐར་ཐུག་པ་ལ་དེ་རྟོགས་ཟིན་རྒྱུན་དུ་བསྒོམ་པའི་སྒོམ་ལམ་སྔོན་དུ་འགྲོ་དགོས་པ་ལ་སོགས་པ་ཡིན་པའི་ཕྱིར།

གཉིས་པ་ལ། མཚན་ཉིད་དང་། དབྱེ་བ་གཉིས། དང་པོ་ནི། གཟུང་བ་ཆོས་ཀྱི་བདག་མེད་རྟོགས་པའི་ཐེག་འབྲིང་གི་མངོན་རྟོགས། གཉིས་པ་ལ། རང་རྒྱལ་གྱི་བགྲོད་བྱེད་ཀྱི་ལམ་དང་། བགྲོད་བྱའི་ལམ་གཉིས། དང་པོའི་མཚན་ཉིད། རང་རྒྱལ་གྱི་བྱང་ཆུབ་ཏུ་བགྲོད་ཟིན་པའི་ཐེག་འབྲིང་གི་མངོན་རྟོགས། མཚན་གཞི། རང་རྒྱལ་དགྲ་བཅོམ་པའི་མངོན་རྟོགས་ལྟ་བུ།

གསུམ་པ་ལ། ལམ་བགྲོད་ཚུལ་གྱི། ཚོགས་བསགས་དུས་ཀྱི། འབྲས་བུ་ཡོན་ཏན་གྱི། སྤངས་རྟོགས་ཀྱི། རྟེན་གྱི། འབྲས་བུ་འཇོག་ཚུལ་གྱི་ཁྱད་པར་དང་དྲུག །དང་པོ་ལ། ཐེག་དམན་པའི་ལུགས། ཀུན་བཏུས་སུ་བཤད་ཚུལ། རང་ལུགས་ཐུན་མོང་མ་ཡིན་པ་དང་གསུམ། དང་པོ་ལ། བསེ་རུ་ལྟ་བུ་ནི། ཚོགས་ལམ་དུ་བསྐལ་བ་བརྒྱར་ཚོགས་བསགས། སྲིད་པ་ཐ་མའི་ཚེ་བསམ་གཏན་བཞི་རིམ་གྱིས་བགྲོད་དེ། བསམ་གཏན་བཞི་པའི་རབ་མཐའ་ལ་བརྟེན་ནས། དྲོད་ནས་ཟད་མི་སྐྱེ་ཤེས་པའི་བྱང་ཆུབ་ཀྱི་བར་སྟན་ཐོག་གཅིག་ཏུ་བྱེད་དེ། མཛོད་ལས། སྟོན་དང་བསེ་རུ་བྱང་ཆུབ་བར། །བསམ་གཏན་མཐའ་བརྟེན་གཅིག་ལ་ཀུན། །ཞེས་གསུངས་པའི་ཕྱིར། ཚོགས་སྤྱོད་ནི། གྲོགས་གཞན་དང་ལྷན་ཅིག་གནས་པའི་སྒོ་ནས་སྲིད་པ་ཐ་མའི་དུས་སུ་སློབ་དཔོན་གཞན་གྱིས་གདམས་ངག་སྟོན་པ་ལ་མ་ལྟོས་པར་རང་བྱང་ཆུབ་མངོན་དུ་བྱེད་པའོ། །དེ་དག་ནི་ཉི་འོག་པའི་ལུགས་ཡིན་གྱི། ཁ་ཆེ་བྱེ་བྲག་སྨྲ་བས་བསེ་རུ་ལྟ་བུ་ཁོ་ནར་བཞེད། གཉིས་པ་ལ། ལུང་དྲང་བ། ལུང་གི་དོན་བསྡུས་ཏེ་བསྟན་པ། ལམ་བགྲོད་ཚུལ་དངོས་བཤད་པ་དང་གསུམ། དང་པོ་ནི། ཀུན་བཏུས་ལས། རང་སངས་རྒྱས་ཀྱི་ཐེག་པ་བ་གང་ཞེ་ན། རང་སངས་རྒྱས་ཀྱི་ཆོས་ཉིད་ངེས་པའམ། མ་ངེས་པ་ལ་གནས་པ་དང་། རང་བཞིན་གྱིས་དབང་པོ་འབྲིང་དང་། བདག་རྣམ་པར་ཐར་པར་བྱ་བའི་ཕྱིར་སྨོན་ལམ་བཏབ་པ་དང་། ཡིད་བྱུང་བ་དང་། འདོད་ཆགས་དང་བྲལ་བ་དང་། རྣམ་པར་གྲོལ་བར་བྱ་བའི་བསམ་པ་ཅན་དང་། བདག་ཉིད་མངོན་པར་རྟོགས་པར་བྱང་ཆུབ་པར་བྱ་བའི་བསམ་པ་ཅན་དང་། ཉན་ཐོས་ཀྱི་སྡེ་སྣོད་ཉིད་ལ་དམིགས་ནས་ཆོས་ཀྱི་རྗེས་སུ་མཐུན་པའི་ཆོས་སྒྲུབ་པ་དང་། ངེས་པར་འབྱེད་པའི་ཆ་དང་མཐུན་པ་སྔོན་མ་བསྐྱེད་པའམ། ངེས་པར་འབྱེད་པའི་ཆ་དང་མཐུན་པ་སྔོན་བསྐྱེད་པ། སྔོན་འབྲས་བུ་མ་ཐོབ་པའམ། སྔོན་འབྲས་བུ་ཐོབ་པའམ། གང་ཡང་རུང་སྟེ། སངས་རྒྱས་འབྱུང་བ་མེད་པར་བདག་ཉིད་ཀྱིས་ལམ་སྔོན་དུ་བྱས་ནས་བསེ་རུ་ལྟ་བུར་གྱུར་ཏེ། གཅིག་པུ་གནས་པའམ་རང་རྒྱལ་བར་གྱུར་ཏེ། ཚོགས་དང་སྤྱོད་པ་གང་སྡུག་བསྔལ་གྱི་མཐར་ཕྱིན་པ་ཐོབ་པའོ། །ཞེས་སོ། །གཉིས་པ་ནི། ལུང་དོན་དེ་དག་ཀྱང་བསྡུ་ན། གང་ལ་གནས་པ་རིགས་ཀྱི་ཁྱད་པར། ལམ་ཐབས་ཤེས་ཀྱི་ཁྱད་པར། དམིགས་པ་རྟེན་གྱི་ཁྱད་པར། ལམ་བགྲོད་ཚུལ་གྱི་ཁྱད་པར་དང་བཞིར་འདུས། གསུམ་པ་ལ། བསེ་རུ་ལྟ་བུ་དང་། ཚོགས་ན་སྤྱོད་པའི་ལམ་བགྲོད་ཚུལ་གཉིས། དང་པོ་ནི། རང་རྒྱལ་དུ་རིགས་ངེས་པའི་གང་ཟག་འགའ་ཞིག །ཚོགས་ལམ་གྱི་གནས་སྐབས་སུ་སངས་རྒྱས་མཉེས་པར་བྱེད་པ་ལ་སོགས་པ་བསྐལ་བ་བརྒྱའི་བར་དུ་ཚོགས་བསགས། མཁས་པར་བྱ་བའི་དངོས་པོ་དྲུག་ལ་མཁས་པར་བྱས་ཏེ། འཆི་འཕོ་ཁར་སྨོན་ལམ་གསུམ་བཏབ་ནས་དེའི་སྐྱེ་བ་ཕྱི་མ་ལ་སྲིད་པ་ཐ་མའི་དུས་སུ་སྔོན་གྱི་སྨོན་ལམ་གྱི་དབང་གིས་སློབ་དཔོན་གཞན་གྱིས་གདམས་ངག་བསྟན་པ་ལ་མི་ལྟོས་པར་འཁོར་བ་སྤངས་པའི་རྣམ་གྲོལ་ལམ་མངོན་དུ་བྱེད། དངོས་པོ་དྲུག་ནི། ཕུང་པོ་ལྔ། ཁམས་བཅོ་བརྒྱད། སྐྱེ་མཆེད་བཅུ་གཉིས། རྟེན་འབྲེལ་ཡན་ལག་བཅུ་གཉིས། ལས་རྒྱུ་འབྲས་ཀྱི་རབ་དབྱེ། འཕགས་པའི་བདེན་པ་བཞི་སྟེ། དོན་ཚན་དྲུག་གོ །སྨོན་ལམ་གསུམ་ནི། སངས་རྒྱས་དང་ཉན་ཐོས་མི་བཞུགས་པའི་འཇིག་རྟེན་གྱི་ཁམས་སུ་སྐྱེ་བར་གྱུར་ཅིག །དེར་ཡང་སློབ་དཔོན་གཞན་ལ་ལྟོས་མེད་དུ་རང་ཉིད་ཀྱིས་བྱང་ཆུབ་མངོན་དུ་བྱེད་ནུས་པར་གྱུར་ཅིག །བྱང་ཆུབ་ཐོབ་ནས་ཀྱང་གདུལ་བྱ་ལ་ལུས་ཀྱི་སྒོ་ནས་སྙིང་བརྩེ་བར་བྱེད་ཀྱི་ངག་གི་སྒོ་ནས་སྙིང་བརྩེ་བར་མ་གྱུར་ཅིག །ཅེས་པའོ། །གཉིས་པ་ལ། ཉན་ཐོས་སྔོན་དུ་མ་སོང་བ་དང་། དེ་སྔོན་སོང་གི་ཚོགས་ན་སྤྱོད་པའི་ལམ་བགྲོད་ཚུལ་གཉིས། དང་པོ་ནི། རང་རྒྱལ་མ་ངེས་པའི་རིགས་ཅན་འགའ་ཞིག་ཚོགས་ལམ་གྱི་གནས་སྐབས་སུ་གྲོགས་སྐྱེས་བུ་དམ་པ་ལ་བརྟེན་པ་དང་། དམ་པའི་ཆོས་ཉན་པ་དང་། ཚུལ་བཞིན་ཡིད་ལ་བྱེད་པའི་སྒོ་ནས་བསྐལ་བ་བརྒྱར་ཚོགས་བསགས། མཁས་པར་བྱ་བའི་དངོས་པོ་དྲུག་ལ་མཁས་པར་བྱས། འཆི་འཕོ་ཁར་སྨོན་ལམ་གསུམ་བཏབ་ནས། སྐྱེ་བ་ཕྱི་མར་སྨོན་ལམ་གྱི་དབང་གིས་སློབ་དཔོན་གཞན་གྱི་གདམས་ངག་ལ་ལྟོས་མེད་དུ་རང་བྱང་ཆུབ་མངོན་དུ་བྱེད། གཉིས་པ་ནི། ཉན་ཐོས་རིགས་མ་ངེས་པ་འགའ་ཞིག །དབང་པོ་སྦྱངས་ཏེ་རང་བཞིན་གྱིས་དབང་པོ་འབྲིང་པོར་གྱུར་པའི་ཚེ། བསྐལ་པ་བརྒྱར་ཚོགས་བསགས་པ་སོགས་གོང་ལྟར་རོ། །འདི་ལ་ཉན་ཐོས་སོ་སྐྱེ་ཙམ་དང་། འཕགས་པ་སྔོན་སོང་གཉིས། ཕྱི་མ་ལ་ཡང་རྒྱུན་ཞུགས་ཙམ་དང་། ཕྱིར་འོང་ཙམ་སྔོན་དུ་སོང་བ་གཉིས་སོ། །གསུམ་པ་ནི། ཐེག་ཆེན་གྱི་ལམ་བགྲོད་ཚུལ་དང་ཆ་འདྲ་བར་བསྐལ་ཆེན་བརྒྱ་ལ་ཆ་གསུམ་དུ་བསྒོས་པའི་རང་རྒྱལ་གྱི་ཚོགས་སྦྱོར་མཐོང་ལམ་དང་བཅས་པར་ཆ་གཅིག །སྒོམ་ལམ་ཆུང་འབྲིང་སྐོར་དྲུག་ལ་ཆ་གཅིག །ཆེན་པོ་སྐོར་གསུམ་ལ་ཆ་གཅིག་སྟེ། སྐབས་དེ་དག་ཏུ་ཚོགས་བསགས་ནས་གཞན་གྱི་གདམས་ངག་ལ་ལྟོས་མེད་དུ་རང་རྒྱལ་གྱི་བྱང་ཆུབ་མངོན་དུ་བྱེད་པའོ། །དེ་ཡང་རྩ་བར། རང་བྱུང་བདག་ཉིད་སོགས་དང་། འགྲེལ་བར། རང་སངས་རྒྱས་རྣམས་ནི་སྔོན་ཐོས་པ་ལ་སོགས་པ་མངོན་པར་འདུ་བྱས་པས་གཞན་གྱིས་བསྟན་པ་ལ་མི་ལྟོས་པར་བདག་ཉིད་ཀྱིས་རང་གི་བྱང་ཆུབ་མངོན་པར་རྟོགས་པར་འགྱུར་ཏེ། དེའི་ཕྱིར་དེ་དག་ལ་སངས་རྒྱས་ལ་སོགས་པས་བསྟན་མི་དགོས་སོ་ཞེས་བྱ་བ་ནི་ཁྱད་ཞུགས་པ་ཉིད་གཅིག་ཡིན་ནོ། །ཞེས་པའི་དོན་དུ་བཤད་དོ། །གཉིས་པ་ནི། དྲིན་ལན་བསབས་པ་ལས། རང་སངས་རྒྱས་རྣམས་ནི་བསྐལ་པ་ཆེན་པོ་བརྒྱས་མཐར་ཕྱིན་པར་འགྱུར་རོ། །ཞེས་སོ། །གསུམ་པ་ལ། གནས་པའི། རྒྱུའི། ཆོས་སྟོན་པའི་ཁྱད་པར་དང་གསུམ། དང་པོ་ནི། བསེ་རུ་ལྟ་བུ་སྐུའི་གནས་པ་གཅིག་པུར་གནས་ཤིང་། ཚོགས་ན་སྤྱོད་པ་གྲོགས་དུ་མ་དང་ལྷན་ཅིག་ཏུ་གནས། གསུང་གི་གནས་པ་གཉིས་ཀ་ཡང་གཙོ་ཆེར་སྨྲ་བཅད་དམ་པོ་ལ་གནས། ཐུགས་ཀྱི་གནས་པ་རྟེན་འབྲེལ་ཟབ་མོ་རྟོགས་པ་དང་། རྣམ་ཐར་སྒོ་གསུམ་ཡིད་ལ་བྱེད་ཅིང་གནས་སོ། །གཉིས་པ་ནི། མངོན་ཤེས་ཀྱིས་བརྟགས་ཏེ་གཞན་དོན་དུ་འགྱུར་ན་གྲོང་དང་གྲོང་ཁྱེར་ལ་སོགས་པར་བསོད་སྙོམས་ལ་རྒྱུ་བར་བཤད་ཅིང་། རྫུ་འཕྲུལ་གྱིས་མ་དད་པ་དད་པར་བྱེད། དད་པ་རྣམས་མངོན་མཐོ་དང་ངེས་ལེགས་ལ་འགོད་པར་བཤད་དོ། །གསུམ་པ་ནི། མངོན་ཤེས་ཀྱིས་གདུལ་བྱ་རྣམས་ཀྱི་དབང་པོའི་དབྱེ་བ་ཤེས་པར་བྱས་ཏེ། སྔོན་གྱི་སྨོན་ལམ་གྱི་དབང་གིས་གདུལ་བྱ་རང་རང་གི་བསམ་པ་དང་མཐུན་པར་ལུས་ཀྱི་རིག་བྱེད་ཀྱི་སྒོ་ནས་ཆོས་བསྟན་པས་ཇི་ལྟར་འདོད་པའི་རྟོགས་པ་བསྐྱེད་ནུས་པ་ཡིན་ནོ། །འདི་ཡང་གཙོ་ཆེ་བའི་དབང་དུ་བྱས་པ་ཡིན་ཅིང་། རང་སངས་རྒྱས་ཡིན་ན་སྒྲ་བཅས་སུ་ཆོས་མི་སྟོན་པས་ཁྱབ་པར་ངེས་པ་མ་ཡིན་ནོ། །བཞི་པ་ནི། བྱང་ས་ལྟར་ན་ཉན་རང་སྤངས་རྟོགས་ཁྱད་མེད་དུ་བཞེད་དེ། བྱང་སར། རང་སངས་རྒྱས་རྣམས་ནི་ཉན་ཐོས་ཇི་ལྟ་བ་བཞིན་དུ་རིག་པར་བྱ་སྟེ། ཉན་ཐོས་རྣམས་དང་ལམ་གྱི་རང་བཞིན་མཚུངས་པའི་ཕྱིར་རོ། །ཞེས་སོ། །སློབ་དཔོན་ལེགས་ལྡན་འབྱེད་སོགས་ཀྱང་དེ་ལྟར་དུ་བཞེད་དེ། རྟོག་གེ་འབར་བ་ལས། གང་ཟག་ལ་བདག་མེད་པ་ཙམ་གོམས་པར་བྱས་ནས་འབྲས་བུ་དམན་པ་འདོད་པས་དམན་པའི་ཁྱད་པར་ཐོབ་པ་ཡོད་དེ། ཉན་ཐོས་དང་རང་སངས་རྒྱས་བཞིན་ནོ། །ཞེས་སོ། །རྒྱན་འདིར་ཉན་རང་ལ་ཁྱད་པར་ཡོད་པ་འཐད་དེ། ཉན་ཐོས་དགྲ་བཅོམ་པས་གང་ཟག་གི་བདག་མེད་རྟོགས་པ་མཐར་ཐུག་ཅིང་། རང་རྒྱལ་དགྲ་བཅོམ་པས་གཟུང་བ་ཆོས་ཀྱི་བདག་མེད་རྟོགས་པ་མཐར་ཐུག་པའི་ཁྱད་ཡོད་པའི་ཕྱིར། ལྔ་པ་ནི། སྨོན་ལམ་གྱི་དབང་གིས་རང་རྒྱལ་འདོད་པའི་རྟེན་ཅན་དུ་ངེས་ཏེ། ཀུན་བཏུས་ལས། དེ་སྨོན་ལམ་གྱི་སྟོབས་ཅན་ཡིན་ཏེ། སྨོན་ལམ་གྱི་དབང་གིས་འདོད་པའི་ཁམས་ཉིད་དུ་སྐྱེ་སྟེ། སངས་རྒྱས་འབྱུང་བ་མེད་ན་རང་རྒྱལ་བར་འགྱུར་རོ། །ཞེས་སོ། །དྲུག་པ་ནི། འབྲས་གནས་བཞི་པོ་རང་རྒྱལ་ལ་མི་འཇོག་སྟེ། ཤེར་ཕྱིན་གྱི་མདོར། དེ་དག་ཉན་ཐོས་ཁོ་ན་ལ་སྦྱར་ནས་རང་རྒྱལ་ཟུར་དུ་སྨོས་པའི་ཕྱིར་ཏེ། གཞི་ཤེས་ཀྱི་འགྲེས་རྐང་རྒྱས་བཤད་ཀྱི་སྐབས་སུ། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་བྱང་ཆུབ་བོ། །ཞེས་གསུངས་པའི་ཕྱིར། ངག་དོན་ནི། རང་རྒྱལ་དགྲ་བཅོམ་པ་ཆོས་ཅན། ཉན་ཐོས་དགྲ་བཅོམ་པ་ལས་ཁྱད་པར་འཕགས་ཏེ། གཟུང་བ་ཆོས་ཀྱི་བདག་མེད་རྟོགས་པ་མཐར་ཐུག་པའི་ཕྱིར།

གཉིས་པ་ནི། གཟུང་དོན་རྟོག་པ་སྤོང་ཕྱིར་དང་། །ཞེས་པའི་སྐབས་སུ་གཉིས་ཀྱི། དང་པོ་ལ། ཤེས་བྱ་རང་རྒྱལ་གྱི་ལམ་ངོས་བཟུང་བ། དེ་ཇི་ལྟར་ཤེས་པའི་ཚུལ། ཡུལ་ཅན་ལམ་ཤེས། མདོ་བསྟན་བཅོས་ལས་བསྟན་ཚུལ་དང་བཞི། དང་པོ་གསུམ་སྔར་ལས་དཔག་སྟེ་ཤེས་པར་བྱ་ཞིང་། བཞི་པ་ལ། བསྟན་ཚུལ་དངོས་དང་། དེ་ལྟར་བསྟན་པའི་ཁྱད་ཆོས་གཉིས། དང་པོ་ནི། གཟུང་རྟོག་སྤོང་བ། འཛིན་རྟོག་མི་སྤོང་བ། རྟེན་རིགས་ཀྱི་ཁྱད་ཆོས་གསུམ་དང་ལྡན་པའི་རང་རྒྱལ་གྱི་ལམ། བདག་མེད་མངོན་སུམ་དུ་རྟོགས་པའི་ཡུལ་ཅན་ལམ་ཤེས་དངོས་སུ་བསྟན་ཅིང་། རང་རྒྱལ་རང་རྒྱུད་ཀྱི་ལམ་ནི་ཤུགས་ལ་བསྟན། འོ་ན་འདིར། འཛིན་པ་མི་སྤོང་ཕྱིར་དང་ནི། ཞེས་དང་། མདོ་ལས། ཤེས་རབ་ཀྱི་དབང་པོ་བར་མ་དང་ལྡན་པ། ཞེས་གསུངས་པ་དང་འགལ་ཞེ་ན། སྐྱོན་མེད་དེ། དེ་དག་རང་རྒྱལ་གྱི་རྟོགས་རིགས་ཀྱི་ལྡོག་པ་ཙམ་ལ་དགོངས་པའི་ཕྱིར། གཉིས་པ་ལ། གཟུང་རྟོག་སྤོང་བའི། འཛིན་རྟོག་མི་སྤོང་བའི། རྟེན་གྱི་ཁྱད་པར་དང་གསུམ། དང་པོ་ལ། མདོ་དྲང་བ་དང་། དེའི་དོན་བཤད་པ་གཉིས། དང་པོ་ནི། མདོ་ལས། ལྷའི་བུ་དག །གཟུགས་ནི་ཟབ་པ་མ་ཡིན། ཕྲ་བ་མ་ཡིན་ནོ། །ཞེས་པ་ནས། རྣམ་པར་ཤེས་པ་ནི་ཟབ་པ་མ་ཡིན། ཕྲ་བ་མ་ཡིན་ནོ། །དེ་ཅིའི་ཕྱིར་ཞེ་ན། གཟུགས་ཀྱི་རང་བཞིན་ནི་ཟབ་པ་མ་ཡིན་ཕྲ་བ་མ་ཡིན། ཞེས་གསུངས་པའི་ཕྱིར། གཉིས་པ་ནི། རང་རྒྱལ་གྱིས་གཟུང་བ་ཕྱི་རོལ་གྱི་དོན་བདེན་མེད་དུ་རྟོགས་པས་དེ་ལ་བདེན་པར་འཛིན་པའི་བདེན་འཛིན་ས་བོན་དང་བཅས་པ་རང་ལམ་དུ་སྤོང་ནུས་པའོ། །གཉིས་པ་ལ་ཡང་གཉིས་ལས། དང་པོ་ནི། མདོ་ལས། དེ་ནས་ལྷའི་བུ་དེ་དག་འདི་སྙམ་དུ་སེམས་པར་གྱུར་ཏེ། གནས་བརྟན་རབ་འབྱོར་ལ་ཆོས་ཉན་པ་རྣམ་པ་ཇི་ལྟ་བུ་དག་བཙལ་བར་བྱ་སྙམ་པ་དང་། དེ་ནས་ཚེ་དང་ལྡན་པ་རབ་འབྱོར་གྱིས་ལྷའི་བུ་དེ་དག་གི་སེམས་ཀྱི་རྣམ་པར་རྟོག་པ་སེམས་ཀྱིས་ཡོངས་སུ་ཤེས་ནས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག །བདག་ལ་ཆོས་ཉན་པ་ནི་སྒྱུ་མ་ལྟ་བུ་དང་། སྤྲུལ་པ་ལྟ་བུར་བཙལ་བར་བྱ་སྟེ། ཞེས་སོ། །གཉིས་པ་ནི། ཡུལ་གཟུང་བ་ཕྱི་རོལ་གྱི་དོན་སྒྱུ་མ་ལྟ་བུར་ཤེས་ཀྱང་། ཡུལ་ཅན་གྱི་བློ་ལ་བདེན་འཛིན་གྱི་སྒྲོ་འདོགས་རང་ལམ་དུ་གཅོད་མི་ནུས་པའོ། །གསུམ་པ་ལ། ལམ་པ་གང་ཟག་གི་རྟེན་དང་། ཆོས་ཉིད་རིགས་ཀྱི་རྟེན་གཉིས། དང་པོ་ལ་ཡང་གཉིས་ལས། དང་པོ་ནི། མདོ་ལས། དེ་ནས་ཚེ་དང་ལྡན་པ་ཤཱ་རིའི་བུ་དང་། ཞེས་པ་ནས། ལྷའི་བུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྟར་ཞེས་པ་ནས། འདི་ལེན་པར་བྱེད་པ་སུ་དག་འབྱུང་བར་འགྱུར། དེ་ནས་ཚེ་དང་ལྡན་པ་རབ་འབྱོར་གྱིས་ཉན་ཐོས་ཆེན་པོ་དེ་དག་དང་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག །ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས། བདེན་པ་མཐོང་བའི་གང་ཟག་གམ། དགྲ་བཅོམ་པ་ཟག་པ་ཟད་པ། བསམ་པ་ཡོངས་སུ་རྫོགས་པའམ། སྔོན་གྱི་རྒྱལ་བ་ལ་བྱ་བ་བྱས་པའི་དབང་དུ་བྱས་པས། སངས་རྒྱས་མང་པོ་ལ་དགེ་བའི་རྩ་བ་བསྐྱེད་པ་དག་གམ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་རིགས་ཀྱི་བུ། ཞེས་སོ། །གཉིས་པ་ནི། མདོ་དང་པོ་ལ། གང་ཟག་དྲུག་བཤད་པའི་དང་པོ་ནི། བྱང་སེམས་སྦྱོར་ལམ་པ། གཉིས་པ་ནི། མཐོང་ལམ་སྐད་ཅིག་བཅོ་ལྔ་ལ་གནས་པའི་བྱང་སེམས། བར་པ་གསུམ་ནི། བཅུ་དྲུག་པ་ལམ་རྗེས་ཤེས་ཐོབ་པའི་བྱང་སེམས། དེ་ལ་དགྲ་བཅོམ་པ་ཞེས་བྱ་སྟེ། མཐོང་སྤང་མ་ལུས་པར་སྤངས་པའི་ཕྱིར། ཟག་པ་ཟད་པ་ཞེས་བྱ་སྟེ། ཁམས་གསུམ་གྱི་ཉོན་མོངས་པ་ཟད་པར་སྤངས་པའི་ཕྱིར། བསམ་པ་ཡོངས་སུ་རྫོགས་པ་ཞེས་བྱ་སྟེ། མཐོང་ལམ་གྱི་རྟོགས་རིགས་རྫོགས་པར་ཐོབ་པའི་ཕྱིར། ཕྱི་མ་རྣམས་ཀྱིས་ནི་བྱང་སེམས་ཚོགས་ལམ་པ་བསྟན་པ་ཡིན་ནོ། །གཟུང་བ་ཆོས་ཀྱི་བདག་མེད་ནི་གཞན་དོན་དུ་མངོན་སུམ་དུ་ཤེས་པར་བྱ་བ་ཡིན་གྱི། རྟོགས་ཟིན་རྒྱུན་ལྡན་དུ་སྒོམ་པར་མི་བྱེད་པས་སྒོམ་ལམ་པ་དངོས་སུ་མ་བསྟན་ནོ། །གཉིས་པ་ལ་ཡང་གཉིས་ལས། དང་པོ་ནི། མདོ་ལས། ལྷ་རྣམས་ཀྱིས་མངོན་པར་གཏོར་བའི་མེ་ཏོག་འདི་དག་ནི་བདག་གིས་སྔོན་ཆད་ལྷའི་གནས་ན་ཡང་ཡོད་པར་མ་མཐོང་སྟེ། མེ་ཏོག་འདི་དག་ནི་སྤྲུལ་པའོ། །ཞེས་སོ། །གཉིས་པ་ནི། སྤྲུལ་པའི་མེ་ཏོག་ལ་རང་བཞིན་གྱིས་སྐྱེ་བ་མེད་ཀྱང་། ཀུན་རྫོབ་ཏུ་ཡུལ་དུས་སོ་སོར་ངེས་པའི་སྐྱེ་བ་སྣང་བ་བཞིན་དུ། དྲི་མ་དང་བཅས་པའི་སེམས་འོད་གསལ་བའི་ཆོས་དབྱིངས་ཀྱང་གནས་སྐབས་སུ་སྒྲུབ་པའི་རྟེན་བྱེད་པའི་དཔེའི་སྒོ་ནས་མཚོན་པའི་རྟེན་རིགས་ཀྱི་ཁྱད་ཆོས་སོ། །ངག་དོན་ནི། ཐེག་ཆེན་གྱི་མཐོང་ལམ་ཆོས་ཅན། རང་རྒྱལ་གྱི་ལམ་ཤེས་པའི་ལམ་ཤེས་ཡིན་ཏེ། གདུལ་བྱ་རང་རྒྱལ་གྱི་རིགས་ཅན་རྗེས་སུ་གཟུང་བའི་ཕྱིར་དུ། རང་རྒྱལ་ལམ་གྱི་དམིགས་རྣམ་གྱི་ཚུལ་ཇི་ལྟ་བ་བཞིན་དུ་རྟོགས་ནས། རྟོགས་རིགས་ཀྱི་ཡོན་ཏན་ཡར་ལྡན་དུ་བསྐྱེད་པ་ལ་མཁས་པའི་ཐེག་ཆེན་འཕགས་པའི་མཁྱེན་པ་ཡིན་པའི་ཕྱིར།

གསུམ་པ་ལ། ཐེག་ཆེན་གྱི་མཐོང་ལམ་དང་། སྒོམ་ལམ་གཉིས། དང་པོ་ནི། བདེན་དང་བདེན་ལ་བཟོད་པ་དང་། ཞེས་པའི་སྐབས་སུ་གཉིས་ཀྱི། དང་པོ་མཐོང་ལམ་ལ། ལུས་རྟེན། བསམ་པའི་རྟེན། བརྟེན་པ་མཐོང་ལམ་གྱི་རང་བཞིན་དང་གསུམ། དང་པོ་ནི། རང་སྟོབས་ཀྱིས་སྐྱེ་བ་འདོད་པའི་གླིང་གསུམ་དུ་སྐྱེ་སྟེ། དེ་རང་བཞིན་གྱིས་དབང་པོ་རྣོ་བའི་ཕྱིར། གཞན་སྟོབས་ཀྱིས་གཟུགས་ཀྱི་རྟེན་ལའང་དངོས་སུ་སྐྱེ་བ་ཡོད་དེ། རྫུ་འཕྲུལ་གྱི་སྟོབས་ཀྱིས་དེ་བཞིན་གཤེགས་པ་ལ་ཆོས་ཉན་པ་ལ་ལྷག་པའི་གཟུགས་ཀྱི་ལྷ་ལ་ལམ་ཤེས་ཀྱི་རྟོགས་པ་སྐྱེ་བར་བཤད་པའི་ཕྱིར། བསྡུ་ན། ཐེག་པ་རང་ལུགས་ཀྱི་ཆོས་མཆོག་ལ་གནས་པའི་གང་ཟག་གོ །

གཉིས་པ་ནི། ཐེག་དམན་གྱི་མཐོང་ལམ་བསམ་གཏན་ས་དྲུག་གང་རུང་ལ་བརྟེན་ཅིང་། ཐེག་པ་ཆེན་པོ་སྙིང་རྗེ་ཁྱད་པར་ཅན་གྱིས་ཟིན་པའི་བསམ་གཏན་གྱི་དངོས་གཞིའི་སེམས་ལ་བརྟེན་ནས་གཙོ་བོར་ཐོབ་སྟེ། རྒྱན་ལས། བསམ་གཏན་བཞི་པ་ཤིན་ཏུ་དག་ཐོབ་ནས། །ཞེས་སོ། །དམིགས་བསལ་ལ་སྲིད་རྩེའི་སེམས་ལ་བརྟེན་པའང་ཡོད་དེ། སྦྱོར་ལམ་སྐད་ཅིག་ཐ་མའི་ངོ་བོར་གྱུར་པའི་སྲིད་རྩེའི་དངོས་གཞིའི་སྙོམས་འཇུག་གིས་སྡུག་བསྔལ་ཆོས་བཟོད་ཀྱི་ངོ་བོར་གྱུར་བའི་འགོག་སྙོམས་དངོས་ཀྱི་སེམས་རྟེན་བྱེད་པ་ཡོད་པའི་ཕྱིར།

གསུམ་པ་ལ། མཚན་ཉིད་དང་། དབྱེ་བ་གཉིས། དང་པོ་ནི། ཐེག་པ་རང་ལུགས་ཀྱི་སྦྱོར་ལམ་རྫོགས་རྗེས་སུ་བྱུང་ཞིང་། བདག་མེད་མངོན་སུམ་དུ་རྟོགས་པའི་བདེན་པ་མངོན་རྟོགས། གཉིས་པ་ལ། ཉན་ཐོས། རང་རྒྱལ། ཐེག་ཆེན་གྱི་མཐོང་ལམ་གསུམ། དང་པོའི་མཚན་ཉིད། གང་ཟག་གི་བདག་མེད་མངོན་སུམ་དུ་རྟོགས་པའི་ཉན་ཐོས་ཀྱི་བདེན་པ་མངོན་རྟོགས། གཉིས་པའི་མཚན་ཉིད། གཟུང་བ་ཆོས་ཀྱི་བདག་མེད་མངོན་སུམ་དུ་རྟོགས་པའི་ཐེག་འབྲིང་གི་བདེན་པ་མངོན་རྟོགས། དབྱེ་ན། ཉན་རང་གཉིས་ཀ་ལ་ཤེས་བཟོད་སྐད་ཅིག་མ་བཅུ་དྲུག་ཡོད། གསུམ་པ་ལ། མཚན་ཉིད། དབྱེ་བ། སྐད་ཅིག་དུ་སྐྱེ་དཔྱད་པ། ལུང་ལས་བཤད་པའི་ཡོན་ཏན་དང་བཞི། དང་པོ་ནི། སྟོང་ཉིད་མངོན་སུམ་དུ་རྟོགས་པའི་ཐེག་ཆེན་གྱི་བདེན་པ་མངོན་རྟོགས། ཐེག་ཆེན་གྱི་ལམ་ཡིན་ན་ཐེག་ཆེན་གྱི་ལམ་ལྔ་པོ་གང་རུང་ཡིན་པས་མ་ཁྱབ་སྟེ། མཐོང་ལམ་ཡིན་ན་མཉམ་བཞག་ཡིན་པས་ཁྱབ་པ་གང་ཞིག །ས་དང་པོའི་རྗེས་ཐོབ་ཡེ་ཤེས་དེ་མཐོང་ལམ་གྱིས་བསྡུས་ཀྱང་མཐོང་ལམ་མ་ཡིན་པའི་ཕྱིར། གཉིས་པ་ལ། ཡུལ་གྱི་སྒོ་ནས་ཆོས་བཟོད་ལ་སོགས་པ་བཅུ་དྲུག་དང་། ངོ་བོའི་སྒོ་ནས་བར་ཆད་མེད་ལམ་དང་རྣམ་གྲོལ་ལམ་གཉིས། ཕྱི་མ་གཉིས་ཀྱི་མཚན་ཉིད་རིམ་བཞིན། མཐོང་སྤང་ཤེས་སྒྲིབ་ཀྱི་སྤོང་བ་གཉེན་པོས་བསྡུས་པའི་ཐེག་ཆེན་གྱི་བདེན་པ་མངོན་རྟོགས་དང་། དེའི་རྟེན་གཉེན་པོས་བསྡུས་པའི་ཐེག་ཆེན་གྱི་བདེན་པ་མངོན་རྟོགས། དང་པོ་ལ་དབྱེ་ན། འདོད་པའི་སས་བསྡུས་ཀྱི་མཐོང་སྤང་ཤེས་སྒྲིབ་དང་། ཁམས་གོང་མས་བསྡུས་པའི་མཐོང་སྤང་ཤེས་སྒྲིབ་དངོས་སུ་སྤོང་བའི་བར་ཆད་མེད་ལམ་གཉིས། གཉིས་པ་ལ་ཡང་དེས་རིགས་འགྲེ། གསུམ་པ་ལ། བཤད་པའི་རྣམ་གྲངས་དངོས་དང་། བྱེ་བྲག་གི་སྐྱེ་ཚུལ་ཞར་བྱུང་དང་བཅས་པ་གཉིས། དང་པོ་ནི། མཐོང་ལམ་ལ་སྐད་ཅིག་མ་གཅིག་ཏུ་འདོད་པ། གཉིས་སུ་འདོད་པ། བཞིར་འདོད་པ། བཅུ་དྲུག་ཏུ་འདོད་པའི་ལུགས་དང་བཞི་ལས། སྤྱིར་ལུགས་ཕྱི་མ་རང་ལུགས་སུ་ཁས་ལེན། ཕྱི་མ་ལ། ཐོགས་མེད་ཀྱི། དབྱིག་གཉེན་གྱི། སློབ་དཔོན་གྱི་ལུགས་དང་གསུམ། དང་པོ་ནི། ཐེག་ཆེན་གྱི་མཐོང་ལམ་རྫས་ཀྱི་སྒོ་ནས་སྐད་ཅིག་མ་བཅུ་དྲུག་ཏུ་བཞེད་ལ། བཅུ་དྲུག་པོ་བར་མ་ཆད་དུ་བཤད། དེ་ཡང་། སྡུག་བསྔལ། ཀུན་འབྱུང་། འགོག་པ། ལམ་མཐོང་སྤང་གི་གཉེན་པོར་གྱུར་བའི་མཐོང་ལམ་བཞིར་འདུས། དེ་རེ་རེ་ལ་སྐད་ཅིག་མ་བཞི་བཞི་ཡོད་དེ། ཀུན་བཏུས་ལས། སྡུག་བསྔལ་ལ་ཆོས་ཤེས་པའི་བཟོད་པ་གང་ཞེ་ན། གང་གིས་སྡུག་བསྔལ་མཐོང་བས་སྤང་བར་བྱ་བའི་ཉོན་མོངས་པ་སྤོང་བ་དེ་སྡུག་བསྔལ་ལ་ཆོས་ཤེས་པའི་བཟོད་པ་ཞེས་བྱའོ། །སྡུག་བསྔལ་ལ་ཆོས་ཤེས་པ་གང་ཞེ་ན། ཤེས་པ་གང་གིས་བཟོད་པའི་མཇུག་ཐོག་ཏུ་རྣམ་པར་གྲོལ་བ་མངོན་དུ་བྱེད་པའོ། །སྡུག་བསྔལ་ལ་རྗེས་སུ་རྟོག་པར་ཤེས་པའི་བཟོད་པ་གང་ཞེ་ན། སྡུག་བསྔལ་ལ་ཆོས་ཤེས་པའི་མཇུག་ཐོག་ཏུ་སྡུག་བསྔལ་ལ་ཆོས་ཤེས་པའི་བཟོད་པ་དང་། སྡུག་བསྔལ་ལ་ཆོས་ཤེས་པ་འདི་གཉིས་འཕགས་པའི་ཆོས་རྣམས་ཀྱི་རྒྱུའོ་ཞེས་སོ་སོ་རང་ལ་མངོན་སུམ་དུ་གྱུར་པའི་ཟག་པ་མེད་པའི་ཤེས་རབ་བོ། །སྡུག་བསྔལ་རྗེས་སུ་རྟོགས་པའི་ཤེས་པ་གང་ཞེ་ན། ཤེས་པ་གང་གིས་རྗེས་སུ་རྟོགས་པར་ཤེས་པའི་བཟོད་པ་དེ་ངེས་པར་འཛིན་པའོ། །དེ་བཞིན་དུ་བདེན་པ་ལྷག་མ་རྣམས་ལ་ཡང་བཟོད་པ་དང་ཤེས་པ་རྣམས་ཅི་རིགས་སུ་ཤེས་པར་བྱའོ། །དེ་ལ་ཆོས་ཤེས་པའི་བཟོད་པ་དང་། ཤེས་པ་རྣམས་ཀྱིས་ནི་གཟུང་བ་རྟོགས་སོ། །རྗེས་སུ་རྟོགས་པའི་བཟོད་པ་དང་། ཤེས་པ་རྣམས་ཀྱིས་ནི་འཛིན་པ་རྟོགས་སོ། །བཟོད་པ་དང་ཤེས་པ་ཐམས་ཅད་ལ་ཡང་མཚན་མ་མེད་པར་གནས་པའི་རྣལ་འབྱོར་ཅན་དུ་རིག་པར་བྱའོ། །ཞེས་སོ། །གཉིས་པ་ནི། རྫས་ཀྱི་སྒོ་ནས་བཅུ་དྲུག་པོ་དེ་དག་ཀྱང་། དང་པོར་འདོད་པའི་སས་བསྡུས་ཀྱི་སྡུག་བསྔལ་མཐོང་སྤང་དངོས་སུ་སྤངས་པའི་བར་ཆད་མེད་ལམ་ལ་སྡུག་བསྔལ་ཆོས་བཟོད། དེ་ལས་གྲོལ་བའི་རྣམ་གྲོལ་ལམ་ལ་ཆོས་ཤེས། ཁམས་གོང་མས་བསྡུས་པའི་སྡུག་བསྔལ་མཐོང་སྤང་དངོས་སུ་སྤངས་པའི་བར་ཆད་མེད་ལམ་ལ་རྗེས་བཟོད། དེའི་རྣམ་གྲོལ་ལམ་ལ་རྗེས་ཤེས་སོགས་སུ་བཞེད་དེ། མཛོད་ལས། འཇིག་རྟེན་པ་ཡི་ཆོས་མཆོག་ལས། །ཆོས་ཀྱི་བཟོད་པ་ཟག་པ་མེད། །འདོད་སྡུག་བསྔལ་ལ་དེ་ནས་ནི། །དེ་ཉིད་ལ་ཆོས་ཤེས་དེ་བཞིན། །སྡུག་བསྔལ་ལྷག་ལ་རྗེས་བཟོད་ཤེས། །བདེན་པ་གསུམ་ལའང་དེ་བཞིན་ནོ། །ཞེས་སོགས་གསུངས་པའི་ཕྱིར། གསུམ་པ་ནི། ཆོས་ཉིད་མཐོང་ཚུལ་གྱི་སྒོ་ནས་སྐད་ཅིག་མ་གཅིག་ཡིན་ལ། འབྲས་བུའི་མངོན་པར་རྟོགས་པ་ལ་ལྟོས་ནས་ཀྱང་སྐད་ཅིག་མ་གཅིག་ཡིན། སོ་སོའི་མངོན་པར་རྟོགས་པ་དང་ངེས་པ་འདྲེན་ཚུལ་གྱི་དབང་དུ་བྱས་ནས་སྐད་ཅིག་མ་བཅུ་དྲུག་ཡིན་ཏེ། ཐེག་ཆེན་གྱི་མཐོང་ལམ་དེས་བདེན་བཞི་ལ་ལོག་ཕྱོགས་སུ་འཛིན་པའི་སྒྲོ་འདོགས་བཅུ་དྲུག་གཅོད་བྱེད་ཀྱི་རྗེས་ཐོབ་ཀྱིས་བསྡུས་པའི་ངེས་པ་བཅུ་དྲུག་འདྲེན་པའི་ནུས་པ་བཅུ་དྲུག་མཉམ་བཞག་གི་གནས་སྐབས་སུ་རིམ་བཞིན་དུ་འབྱུང་བའི་ཕྱིར། འགྲེལ་ཆེན་ལས། བདེན་པ་རེ་རེ་ལ་ཡང་ཕྱིན་ཅི་ལོག་རྣམ་པར་བསལ་བས་སོ་སོར་རྟོགས་པའི་མངོན་པར་རྟོགས་པ་ལས་སྐད་ཅིག་མ་བཅུ་དྲུག་ཁོ་ནས་མངོན་པར་ཤེས་པ་ཡིན་ནོ། །ཞེས་སོ། །བཅུ་དྲུག་འཇོག་ཚུལ་ཡང་ཐོགས་མེད་དང་མཐུན་པར་བཞེད་དེ། འགྲེལ་ཆེན་ལས། དེ་ལ་ཆོས་ཤེས་པའི་བཟོད་པ་དང་། ཆོས་ཤེས་པས་ནི་གཟུང་བ་རྟོགས་ལ། རྗེས་སུ་ཤེས་པའི་བཟོད་པ་དང་། རྗེས་སུ་ཤེས་པས་ནི་འཛིན་པ་རྟོགས་པ་ཡིན་ནོ། །ཞེས་སོ། །གཉིས་པ་ནི། དབང་པོའི་རིམ་པས་སྐྱེ་ཚུལ་བཞིར་དབྱེ་བ་མི་འགལ་ཏེ། བྱང་སེམས་ཤིན་ཏུ་དབང་རྣོན། ཅུང་ཟད་རྣོ་བ། དབང་འབྲིང་། དབང་རྟུལ་བཞིར་སྐྱེ་ཚུལ་མི་འདྲ་བའི་ཕྱིར། དེ་ལ་དང་པོ་ནི། སྐད་ཅིག་མ་གཅིག་ཏུ་སྐྱེ་སྟེ། བྱང་སེམས་ཤིན་ཏུ་དབང་རྣོན་གྱིས་ཆོས་ཉིད་མངོན་སུམ་དུ་གསར་དུ་མཐོང་བའི་དུས་ཀྱི་སྐད་ཅིག་མ་དེ་ལ། སྡུག་བསྔལ་ཤེས། ཀུན་འབྱུང་སྤོང་། འགོག་པ་མངོན་དུ་བྱེད། ལམ་བསྒོམ་པའི་མཐོང་ལམ་གྱི་བྱེད་པ་རྣམས་རྫོགས་པར་ནུས་པའི་ཕྱིར། ལྡོག་པའི་སྒོ་ནས་བཅུ་དྲུག་ཏུ་འགྱུར་ཏེ། འདོད་པའི་སས་བསྡུས་ཀྱི་བདེན་བཞིའི་གནས་ལུགས་མངོན་སུམ་དུ་ཤེས་པའི་ཆ་ནས་ཆོས་ཤེས་བཞི། དེ་ལ་མི་སྐྲག་པའི་ཆ་ནས་ཆོས་བཟོད་བཞི། ཁམས་གོང་གི་བདེན་བཞིའི་གནས་ལུགས་མངོན་སུམ་དུ་རྟོགས་པའི་ཆ་ནས་རྗེས་ཤེས་བཞི། དེ་ལ་མི་སྐྲག་པའི་ཆ་ནས་རྗེས་བཟོད་བཞིར་འཇོག་པའི་ཕྱིར། ཀླུ་སྒྲུབ་ཀྱིས་སྐད་ཅིག་མ་གཅིག་ཏུ་བཤད་པ་ཡང་འདི་ལ་དགོངས་སོ། །གཉིས་པ་ནི། བྱང་སེམས་ཅུང་ཟད་དབང་རྣོན་གྱི་རྒྱུད་ལ་རྫས་ཀྱི་སྒོ་ནས་མཐོང་ལམ་སྐད་ཅིག་མ་གཉིས་སུ་སྐྱེ་སྟེ། དང་པོར་ཁམས་གསུམ་གྱི་མཐོང་སྤང་མཐའ་དག་དངོས་སུ་སྤོང་བའི་བར་ཆད་མེད་ལམ་གཅིག་སྐྱེ། དེ་ལ་ལྡོག་པའི་སྒོ་ནས་བཟོད་པ་བརྒྱད་དུ་འཇོག །དེའི་རྗེས་སུ་དེ་ལས་གྲོལ་བའི་རྣམ་གྲོལ་ལམ་གཅིག་སྐྱེ། དེ་ལ་ལྡོག་པའི་སྒོ་ནས་ཤེས་པ་བརྒྱད་དུ་འཇོག་པའི་ཕྱིར། གསུམ་པ་ནི། བྱང་སེམས་དབང་འབྲིང་གི་རྒྱུད་ལ་མཐོང་ལམ་རྫས་ཀྱི་སྒོ་ནས་སྐད་ཅིག་མ་བཞིར་སྐྱེ་སྟེ། དང་པོར་འདོད་པའི་སས་བསྡུས་ཀྱི་མཐོང་སྤང་མཐའ་དག་དངོས་སུ་སྤོང་བའི་བར་ཆད་མེད་ལམ་གཅིག་སྟེ། དེ་ལ་ལྡོག་པའི་སྒོ་ནས་ཆོས་བཟོད་བཞིར་འཇོགདེའི་རྗེས་སུ་དེ་ལས་གྲོལ་བའི་རྣམ་གྲོལ་ལམ་གཅིག་སྐྱེ། དེ་ལ་ལྡོག་པའི་སྒོ་ནས་ཆོས་ཤེས་བཞི། དེའི་རྗེས་སུ་ཁམས་གོང་གི་མཐོང་སྤང་མཐའ་དག་དངོས་སུ་སྤོང་བའི་བར་ཆད་མེད་ལམ་གཅིག་སྐྱེ། དེ་ལ་ལྡོག་པའི་སྒོ་ནས་རྗེས་བཟོད་བཞི། དེའི་རྗེས་སུ་དེ་ལས་གྲོལ་བའི་རྣམ་གྲོལ་ལམ་གཅིག་སྐྱེ། དེ་ལ་ལྡོག་པའི་སྒོ་ནས་རྗེས་ཤེས་བཞིར་འཇོག །བཞི་པ་ནི། བྱང་སེམས་དབང་རྟུལ་གྱི་རྒྱུད་ལ་རྫས་ཀྱི་སྒོ་ནས་སྐད་ཅིག་མ་བཅུ་དྲུག་ཏུ་སྐྱེས། དེ་ལ་ཡང་། ཐོགས་མེད་ཀྱིས་བཤད་པ་ལྟར་གྱི་སྐྱེ་ཚུལ་དང་། དབྱིག་གཉེན་གྱིས་བཤད་པ་ལྟར་གྱི་སྐྱེ་ཚུལ་གཉིས། ཆོས་བཤེས་ཀྱིས། དེ་ལྟར་ན་མཐོང་བའི་ལམ་ལ་དུས་ཇི་སྙེད་ཅིག་ཐོགས་ཤེ་ན། འདི་ནི་བྱང་ཆུབ་སེམས་དཔའི་ཤེས་རབ་དང་། བརྩོན་འགྲུས་དང་། དབང་པོའི་རྗེས་སུ་འབྲང་བས་ན་དུས་གཅིག་ཏུ་ཆད་པ་ཅི་ཡང་མེད་དོ། །དེ་བཞིན་དུ་སྤྱིའི་དུས་བསྐལ་པ་གྲངས་མེད་པ་གསུམ་ཞེས་བྱ་བའི་དུས་ཀྱང་ངེས་པ་ཅན་དུ་ནམ་ཡང་མི་འགྱུར་རོ། །ཞེས་གསུངས་པ་ལྟར་རོ། །དེ་ལ་སྐབས་འདིའི་སྐད་ཅིག་མ་ནི། སྤྱིར་སྐད་ཅིག་མ་ལ། དུས་མཐའི་དང་། བྱ་རྫོགས་ཀྱི་སྐད་ཅིག་མ་གཉིས། དང་པོ་ནི། སེ་གོལ་གཅིག་གཏོག་པའི་ཡུན་ཚད་ལ་དྲུག་ཅུ་རྩ་ལྔར་ཕྱེ་བའི་ཆ་གཅིག་ལ་ངོས་འཛིན། གཉིས་པ་ནི། བྱ་བ་གང་ཡིན་ཀྱང་བརྩམས་ནས་མ་གྲུབ་བར་གྱི་ཡུན་ཚད་དོ། །དེ་དག་ལས་འདིར་ཕྱི་མ་སྟེ། ཀུན་བཏུས་སུ། སེམས་ཀྱི་སྐད་ཅིག་བཅུ་དྲུག་པོ་འདི་དག་ནི་མཐོང་བའི་ལམ་མོ། །སེམས་ཀྱི་སྐད་ཅིག་ནི་ཤེས་བྱ་ལ་ཤེས་པར་འབྱུང་བ་ཡོངས་སུ་རྫོགས་པར་རིག་པར་བྱའོ། །ཞེས་སོ། །དེས་ན་ཤིང་ལེབ་ལྔ་ཁབ་ཀྱིས་འབུགས་པ་དང་། ཤྭ་མང་འདབ་མ་ལྔ་ཁབ་ཀྱིས་འབུགས་པའི་དཔེས་མཚོན་ཏེ་མཐོང་ལམ་སྐྱེ་ཚུལ་སྐད་ཅིག་མ་བཅུ་དྲུག་ཏུ་མཐའ་གཅིག་ཏུ་ངེས་པར་ཁས་བླངས་ཀྱང་མི་འགལ་ལམ་སྙམ་མོ། །བཞི་པ་ལ། སྤང་བྱ་ལས་གྲོལ་བའི་དང་། ཐོབ་བྱ་ཐོབ་པའི་ཡོན་ཏན་གཉིས། དང་པོ་ནི། ཇི་སྐད་དུ། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་སྐྱེས་སོ། །ཞེས་སོ། །གཉིས་པ་ནི། མདོ་ལས། ཆོས་མཐོང་བ། ཆོས་ཐོབ་པ། ཆོས་རིག་པ། ཆོས་རྟོགས་པ། སོམ་ཉི་བརྒལ་བ། ཐེ་ཚོམ་ལས་བརྒལ་བ། གཞན་གྱི་དྲིང་མི་འཇོག་པ། སྟོན་པའི་བསྟན་པ་ལས་གཞན་གྱིས་མི་བཀྲི་བ། ཆོས་རྣམས་ལ་མི་འཇིགས་པ་ཐོབ་པ། ཞེས་སོ། །དེ་ཡང་དང་པོ་བཞི་ཆོས་བཟོད་སོགས་བཞི་དང་། ཕྱི་མ་རྣམས་མཐོང་ལམ་སྤྱིའི་ཡོན་ཏན་ནོ། །ངག་དོན་ནི། ཐེག་ཆེན་གྱི་མཐོང་ལམ་ཆོས་ཅན། ལམ་ཤེས་འཆད་པའི་སྐབས་ནས་དངོས་སུ་བསྟན་པའི་མཐོང་ལམ་ཡིན་ཏེ། ཚེ་འདི་ཕྱི་གཉིས་ཀྱི་ཕན་ཡོན་ཆེན་པོ་དང་ལྡན་པའི་ཐེག་ཆེན་གྱི་བདེན་པ་མངོན་རྟོགས་ཡིན་པའི་ཕྱིར།

གཉིས་པ་ལ། སྒོམ་ལམ་གྱི་བྱེད་པ་དང་། བྱེད་པ་ཅན་གྱི་སྒོམ་ལམ་གཉིས། དང་པོ་ནི། ཀུན་ནས་ཞི་དང་ཐམས་ཅད་ལ། ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་སྒོམ་ལམ་གྱི་བྱེད་པ་ལ་མཚན་ཉིད་དང་། དབྱེ་བ་གཉིས། དང་པོ་ནི། རང་རྒྱུ་ཐེག་ཆེན་གྱི་སྒོམ་ལམ་ངོ་བོ་ཇི་ལྟ་བ་བཞིན་དུ་སྒོམ་སྟོབས་ཀྱིས་ཐོབ་པའི་དགེ་ལེགས། གཉིས་པ་ལ། གནས་སྐབས་དང་མཐར་ཐུག་གི་བྱེད་པ་གཉིས། དང་པོ་ནི། སྒོམ་ལམ་སྐད་ཅིག་གཉིས་པ་ནས་རྒྱུན་མཐའི་བར་གྱི་སྤངས་རྟོགས་ཀྱི་ཡོན་ཏན་ལྟ་བུ། གཉིས་པ་ནི། སངས་རྒྱས་སའི་སྤངས་རྟོགས་ཀྱི་ཡོན་ཏན་ལྟ་བུ། འབྲས་བུའི་སྒོ་ནས་དབྱེ་ན། ཀུན་ནས་ཞི་བའི། ཐམས་ཅད་ལ་འདུད་པའི། ཉོན་མོངས་པ་ལས་རྒྱལ་བའི། གནོད་པས་རྫི་བ་མེད་པའི། རྫོགས་པའི་བྱང་ཆུབ་སྒྲུབ་པའི། རྟེན་གྱི་ཡུལ་མཆོད་པའི་གནས་སུ་གྱུར་པའི་ཐེག་ཆེན་སྒོམ་ལམ་གྱི་བྱེད་པ་དང་དྲུག །བསྡུ་ན་སྐྱེས་བུ་བྱེད་པའི། རྣམ་སྨིན་གྱི། བདག་པོའི་འབྲས་བུ་དང་གསུམ། དང་པོ་ལ། ནང་གི་ཉེར་འཚེ་ཞི་བ་དང་། ཕྱིའི་ཉེར་འཚེ་ཞི་བ་གཉིས། དང་པོ་ལ། གནས་སྐབས་ཀྱི་འབྲས་བུའི་དབང་དུ་བྱས་ནས་བྱེད་པ་དང་པོ་གཉིས། མཐར་ཐུག་གི་འབྲས་བུའི་དབང་དུ་བྱས་ནས་བྱེད་པ་གསུམ་པ། ཕྱིའི་ཉེར་འཚེ་ཞི་བའི་དབང་དུ་བྱས་ནས་བྱེད་པ་བཞི་པ། གཉིས་པའི་དབང་དུ་བྱས་ནས་ལྔ་པ། གསུམ་པའི་དབང་དུ་བྱས་ནས་དྲུག་པ་བཞག་པ་ཡིན་ནོ། །ངག་དོན་ནི། འདིར་བསྟན་ཀུན་ནས་ཞི་བ་ལ་སོགས་པའི་བྱེད་པ་དྲུག་ཆོས་ཅན། ཐེག་ཆེན་སྒོམ་ལམ་གྱི་བྱེད་པ་ཡིན་ཏེ། རང་གི་རྒྱུར་གྱུར་པའི་ཐེག་ཆེན་གྱི་སྒོམ་ལམ་ངོ་བོ་ཇི་ལྟ་བ་བཞིན་དུ་སྒོམ་སྟོབས་ཀྱིས་ཐོབ་པའི་རྣམ་དཀར་གྱི་ཡོན་ཏན་ཡིན་པའི་ཕྱིར།

གཉིས་པ་ལ། སྤྱིར་བསྟན་པ་དང་། སོ་སོར་བཤད་པ་གཉིས། དང་པོ་ནི། བྱེད་པའི་འོག་ཏུ་སྒོམ་པའི་ལམ། ཞེས་པའི་སྐབས་སུ་གཉིས་ཀྱི། དང་པོ་སྒོམ་ལམ་ལ། ལུས་རྟེན། བསམ་པའི་རྟེན། བརྟེན་པ་སྒོམ་ལམ་གྱི་རང་བཞིན་དང་གསུམ། དང་པོ་ལ། རང་རྒྱལ་ན་འདོད་པའི་རྟེན་ཅན་དུ་ངེས་ལ། ཉན་ཐོས་ཀྱི་སྒོམ་ལམ་སྔར་མེད་གསར་དུ་སྐྱེ་བ་འདོད་གཟུགས་ཀྱི་རྟེན་དང་། ཐོབ་ཟིན་གནས་པ་གཟུགས་མེད་ཀྱི་རྟེན་ལའང་ཡོད། ཐེག་ཆེན་གྱི་སྒོམ་ལམ་འདོད་གཟུགས་གང་རུང་གི་རྟེན་ཅན་དུ་ངེས་ཀྱི། གཟུགས་མེད་ཀྱི་རྟེན་ཅན་མེད་དེ། གཟུགས་མེད་ཁམས་པ་ནི་ཐེག་ཆེན་གྱི་འཕགས་པའི་ཕྲིན་ལས་དངོས་སུ་འཇུག་པའི་རྟེན་དུ་མི་རུང་བའི་ཕྱིར་ཏེ། སྡུད་པ་ལས། བྱང་ཆུབ་ཡོན་ཏན་ཕ་རོལ་ཕྱིན་ཉམས་འགྱུར་འོང་ཞེས། །གཟུགས་མེད་ཁམས་སུ་སྐྱེ་བ་དོན་དུ་གཉེར་མི་བྱེད། །ཅེས་སོ། །གཉིས་པ་ལ། སྤྱིར་བསྟན་པ་དང་། དོགས་པ་གཅོད་པ་གཉིས། དང་པོ་ནི། ཐེག་དམན་གྱི་སྒོམ་ལམ་སྔར་མེད་གསར་དུ་སྐྱེ་བ་བསམ་གཏན་ས་དྲུག་གང་རུང་ལ་དངོས་སུ་བརྟེན་ཅིང་། ཐོབ་ཟིན་མངོན་དུ་བྱེད་པ་གཟུགས་མེད་ཀྱི་སེམས་ལ་བརྟེན་པ་ཡོད་དེ། ཉན་ཐོས་སྒོམ་ལམ་པས་སྲིད་རྩེའི་དངོས་གཞི་ལ་བརྟེན་ནས་འགོག་སྙོམས་མངོན་དུ་བྱེད་པ་ཡོད་པའི་ཕྱིར། ཐེག་ཆེན་གྱི་བསམ་གཏན་བཞི་པའི་དངོས་གཞིའི་སེམས་ལ་བརྟེན་པ་གཙོ་ཆེ་སྟེ། དེ་ཞི་ལྷག་ཆ་མཉམ་པས་དེ་ལ་བརྟེན་ནས་ལམ་སྒྲུབ་སླ་བའི་ཕྱིར། གཟུགས་མེད་ཀྱི་སེམས་ལ་དངོས་སུ་མི་བརྟེན་པ་མ་ཡིན་ཏེ། ས་དང་པོའི་མཉམ་བཞག་ཁྱད་པར་ལམ་གྱི་སྐད་ཅིག་ཐ་མའི་ངོ་བོར་གྱུར་པའི་གཟུགས་མེད་ཀྱི་དངོས་གཞིས་ས་གཉིས་པའི་དངོས་རྒྱུ་བྱེད་པ་ཡོད་པའི་ཕྱིར། གཉིས་པ་ནི། ཐེག་ཆེན་གྱི་སྒོམ་ལམ་སྐད་ཅིག་མ་དང་པོ་མཉམ་བཞག་ཏུ་ངེས་ཀྱང་དེའི་དངོས་རྒྱུ་ལ་ས་དང་པོའི་མཉམ་བཞག་ཁྱད་པར་ཅན་གྱི་ལམ་ཡང་ཡོད། རྗེས་ཐོབ་ཁྱད་པར་ཅན་གྱི་ལམ་ཡང་ཡོད་དོ། །གསུམ་པ་ལ། མཚན་ཉིད་དང་། དབྱེ་བ་གཉིས། དང་པོ་ནི། བདག་མེད་མངོན་སུམ་དུ་རྟོགས་ཟིན་སྒོམ་པར་བྱེད་པའི་རྗེས་ལ་མངོན་རྟོགས། གཉིས་པ་ལ། ཉན་ཐོས། རང་རྒྱལ། ཐེག་ཆེན་གྱི་སྒོམ་ལམ་གསུམ། དང་པོའི་མཚན་ཉིད། གང་ཟག་གི་བདག་མེད་མངོན་སུམ་དུ་རྟོགས་ཟིན་སྒོམ་པར་བྱེད་པའི་ཉན་ཐོས་ཀྱི་རྗེས་ལ་མངོན་རྟོགས། དབྱེ་ན། ཉན་ཐོས་ཀྱི་སྒོམ་ལམ་ཆུང་ངུ་ལ་སོགས་པ་དགུ། བསྡུ་ན། རྗེས་ཐོབ་ཀྱིས་བསྡུས་པའི་ཟག་བཅས་སྒོམ་ལམ་དང་། མཉམ་བཞག་གིས་བསྡུས་པའི་ཟག་མེད་སྒོམ་ལམ་གཉིས་སུ་འདུས་སོ། །གཉིས་པ་ལ་ཡང་དེས་མཚོན་ནོ། །གསུམ་པ་ལ། མཚན་ཉིད། དབྱེ་བ། སོ་སོའི་རང་བཞིན། གྲངས་ངེས་དང་བཞི། དང་པོ་ནི། སྟོང་ཉིད་མངོན་སུམ་དུ་རྟོགས་ཟིན་སྒོམ་པར་བྱེད་པའི་ཐེག་ཆེན་གྱི་རྗེས་ལ་མངོན་རྟོགས། གཉིས་པ་ནི། ངོ་བོའི་སྒོ་ནས་ཟག་བཅས་དང་། ཟག་མེད་གཉིས། རྣམ་པའི་སྒོ་ནས་ཆུང་ངུ་ལ་སོགས་པ་དགུ། གསུམ་པ་ལ། འདིར་བསྟན་གྱི་ཟག་པ་ངོས་བཟུང་བ། དེ་དང་བཅས་མ་བཅས་ཀྱི་དོན། མཚན་ཉིད་བསྡུས་ཏེ་བསྟན་པ་དང་གསུམ། དང་པོ་ནི། གཟུང་འཛིན་ཐ་དད་དུ་སྣང་བའི་ཤེས་སྒྲིབ་རྟོག་པ་ཡིན་ཏེ། ཆོས་བཤེས་ཀྱིས། རྣམ་རྟོག་དང་བཅས་པས་ཟག་བཅས་དང་། རྟོག་པ་དང་བྲལ་བས་ཟག་མེད། ཅེས་གསུངས་པའི་ཕྱིར། གཉིས་པ་ནི། ཟག་བཅས་སྒོམ་ལམ་དང་། ཤེས་སྒྲིབ་རྟོག་པ་ལྷན་ཅིག་ངེས་པར་འཇུག་པའི་ཆ་ནས་དེ་དང་བཅས་པར་འཇོག་པ་མ་ཡིན་ཏེ། དག་སའི་རྗེས་ཐོབ་ཀྱི་གནས་སྐབས་སུ་ཤེས་སྒྲིབ་རྟོག་པ་རྒྱུན་ཆགས་སུ་འབྱུང་བའི་ངེས་པ་མེད་པའི་ཕྱིར། དེས་ན་ཤེས་སྒྲིབ་རྟོག་པའི་ས་བོན་ལ་ཤེས་སྒྲིབ་རྟོག་པའི་རིགས་འདྲ་ཕྱི་མ་འབྱུང་བའི་རྐྱེན་ཀུན་རྫོབ་ཀྱི་སྤྲོས་པ་སྣ་ཚོགས་འཛིན་སྟངས་ཀྱི་ཡུལ་དུ་བྱེད་པ་ནི་ཟག་པ་དང་བཅས་པའི་དོན་ཡིན་ལ། དེ་ལས་ལོག་པ་ནི་ཟག་བཅས་མ་ཡིན་པའི་དོན་ནོ། །དེའི་ཕྱིར་ཟག་བཅས་སྒོམ་ལམ་ཡིན་ན་ཟག་མེད་ཡིན་པས་ཁྱབ་བོ། །གསུམ་པ་ལ། ཟག་བཅས་སྒོམ་ལམ་གྱི་མཚན་ཉིད། ཀུན་རྫོབ་བདེན་པ་ཡུལ་གྱི་གཙོ་བོར་བྱེད་པའི་ཐེག་ཆེན་གྱི་རྗེས་ལ་མངོན་རྟོགས། མཚན་གཞི། ཐེག་ཆེན་གྱི་སྒོམ་ལམ་རྗེས་ཐོབ་མཐའ་དག་གོ །ཟག་མེད་སྒོམ་ལམ་གྱི་མཚན་ཉིད། དོན་དམ་བདེན་པ་ཡུལ་གྱི་གཙོ་བོར་བྱེད་པའི་ཐེག་ཆེན་གྱི་རྗེས་ལ་མངོན་རྟོགས། མཚན་གཞི། ཐེག་ཆེན་གྱི་སྒོམ་ལམ་མཉམ་བཞག་མཐའ་དག་གོ །བཞི་པ་ནི། ཐེག་ཆེན་གྱི་སྒོམ་ལམ་ཆུང་ངུའི་ཆུང་ངུ་ལ་སོགས་པ་དགུར་གྲངས་ངེས་ཏེ། ཐེག་ཆེན་གྱི་སྒོམ་ལམ་དེ་ས་གཉིས་པ་ནས་བཅུ་པའི་བར་རྒྱུན་ཆགས་སུ་འབྱུང་བའི་ཕྱིར། ཁྱབ་སྟེ། ས་གཉིས་པ་དང་དེའི་ཆུང་ངུའི་ཆུང་ངུ་དོན་གཅིག་པ་ནས། ས་བཅུ་པ་དང་དེའི་ཆེན་པོའི་ཆེན་པོ་དོན་གཅིག་པའི་ཕྱིར་ཏེ། དེ་ནི་རྒྱུན་ཆགས་ཡིན་པའི་ཕྱིར། །ཞེས་སོགས་ཀྱི་དོན་ནོ། །ངག་དོན་ནི། ས་གཉིས་པའི་ཡེ་ཤེས་ཆོས་ཅན། ཐེག་ཆེན་གྱི་སྒོམ་ལམ་ཡིན་ཏེ། མཉམ་རྗེས་གཉིས་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར།

གཉིས་པ་ལ། ཟག་བཅས་དང་། ཟག་མེད་སྒོམ་ལམ་གཉིས། དང་པོ་ལ། མོས་བསྔོ་རྗེས་སུ་ཡི་རང་གི་སྒོམ་ལམ་གསུམ། དང་པོ་ནི། མོས་པ་རང་གི་དོན་དང་ནི། །ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་གྱི་མོས་པ་སྒོམ་ལམ་ལ། མཚན་ཉིད། དབྱེ་བ། ས་མཚམས། ཕན་ཡོན་དང་བཞི། དང་པོ་ནི། ཡུམ་ཤེར་ཕྱིན་དོན་གསུམ་གྱི་འབྱུང་གནས་སུ་མོས་པར་བྱེད་པའི་རྗེས་ཐོབ་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས། གཉིས་པ་ལ། རང་དོན། གཉིས་དོན། གཞན་དོན་མོས་པ་སྒོམ་ལམ་གསུམ། དང་པོའི་མཚན་ཉིད། མ་དག་སའི་སྒོམ་ལམ་གང་ཞིག །ཡུམ་ཤེར་ཕྱིན་རང་དོན་ཕུན་ཚོགས་ཀྱི་འབྱུང་གནས་སུ་མོས་པའི་འདུན་པ་མཚུངས་ལྡན་དང་བཅས་པ། དབྱེ་ན། ཆུང་ངུའི་ཆུང་ངུ་ལ་སོགས་པ་དགུ། གཉིས་པའི་མཚན་ཉིད། ས་བཅུ་པའི་ཡེ་ཤེས་མ་སྐྱེས་གོང་གི་དག་སའི་སྒོམ་ལམ་གང་ཞིག །ཡུམ་ཤེར་ཕྱིན་དོན་གཉིས་ཕུན་ཚོགས་ཀྱི་འབྱུང་གནས་སུ་མོས་པའི་འདུན་པ་མཚུངས་ལྡན་དང་བཅས་པ། དབྱེ་ན་དགུ། གསུམ་པའི་མཚན་ཉིད། ས་བཅུ་པའི་རྒྱུད་ཀྱི་སྒོམ་ལམ་གང་ཞིག །ཡུམ་ཤེར་ཕྱིན་གཞན་དོན་ཕུན་ཚོགས་ཀྱི་འབྱུང་གནས་སུ་མོས་པའི་འདུན་པ་མཚུངས་ལྡན་དང་བཅས་པ། དབྱེ་ན་དགུ། འདི་དག་ཀྱང་མཚོན་བྱེད་དཔེའི་སྒོ་ནས་ཆུང་འབྲིང་ཆེན་པོར་བཞག་པ་ཡིན་གྱི། དང་པོར་སྐྱེ་བ་ལ་ཆུང་ངུ་། བར་དུ་འབྲིང་། ཐ་མར་ཆེན་པོ་བཞག་པ་མ་ཡིན་ཏེ། གང་ཟག་གཅིག་གི་རྒྱུད་ལ་མཚོན་བྱེད་དཔེ་དགུ་ཅིག་ཅར་དུ་ཡོད་པ་མི་འགལ་བའི་ཕྱིར། གསུམ་པ་ནི། དང་པོ་ས་གཉིས་པ་ནས་བདུན་པའི་བར་དུ་ཡོད་དེ། དེར་ཉོན་ཡིད་ཀྱི་བག་ལ་ཉལ་རགས་པ་གནས་མ་གྱུར་པའི་སྟོབས་ཀྱིས་སྦྱོར་བས་རང་དོན་གཙོ་བོར་སྒྲུབ་པའི་རིགས་སུ་གནས་པའི་ཕྱིར། གཉིས་པ་ས་བརྒྱད་པ་དང་དགུ་པའི་གནས་སྐབས་ན་ཡོད་དེ། སྦྱོར་བས་རང་གཞན་གཉིས་ཀའི་དོན་འབད་མེད་དུ་སྒྲུབ་ནུས་ཤིང་། གདུལ་བྱ་གཞན་ངོར་རྗེས་ཐོབ་ཏུ་སེམས་ཅན་གྱི་དོན་བྱེད་ཚུལ་སངས་རྒྱས་དང་ཚུལ་མཚུངས་པ་མ་ཐོབ་པའི་ཕྱིར། གསུམ་པ་ས་བཅུ་པ་ན་ཡོད་དེ། དེར་རྗེས་ཐོབ་ཏུ་གདུལ་བྱ་གཞན་ངོར་སེམས་ཅན་གྱི་དོན་བྱེད་ཚུལ་སངས་རྒྱས་དང་ཚུལ་མཚུངས་པའི་ཕྱིར། འོན་ཀྱང་སྤངས་རྟོགས་ཀྱི་ངོས་ནས་མཉམ་པ་མ་ཡིན་ཏེ། ས་གཞི་དང་རྡུལ་ཕྲན་གྱི་དཔེས་གསུངས་པའི་ཕྱིར། དེ་ལྟར་ཡང་རྒྱུད་བླར། དེ་ལྟ་མོད་ཀྱི་ས་རྡུལ་དང་། །རྒྱ་མཚོ་བ་གླང་རྨིག་རྗེས་ཀྱི། །ཁྱད་པར་གང་ཡིན་སངས་རྒྱས་དང་། །བྱང་ཆུབ་སེམས་དཔའི་ཁྱད་དེ་ཉིད། །ཅེས་སོ། །བཞི་པ་ལ། མཚན་ཉིད། དབྱེ་བ། ས་མཚམས་དང་གསུམ། དང་པོ་ནི། རང་གི་རྒྱུར་གྱུར་པའི་མོས་པ་སྒོམ་ལམ་ངོ་བོ་ཇི་ལྟ་བ་བཞིན་དུ་སྒོམ་སྟོབས་ཀྱིས་ཐོབ་པའི་དགེ་ལེགས། གཉིས་པ་ལ། བསྟོད་བཀུར་བསྔགས་པའི་ཕན་ཡོན་དགུ་དགུ་སྟེ་ཉེར་བདུན། དེ་དག་ཀྱང་མོས་པ་སྒོམ་ལམ་གསུམ་ལ་རིམ་བཞིན་ནོ། །གསུམ་པ་ནི། མོས་པ་སྒོམ་ལམ་སྐད་ཅིག་གཉིས་པ་ནས་སངས་རྒྱས་སའི་བར་དུའོ། །ངག་དོན་ནི། མོས་པ་སྒོམ་ལམ་ཆོས་ཅན། ཁྱོད་ལ་དབྱེ་ན་གསུམ་དུ་ཡོད་དེ། ཁྱོད་ལ་རང་དོན། གཉིས་དོན། གཞན་དོན་མོས་པ་སྒོམ་ལམ་གསུམ་ཡོད་པའི་ཕྱིར། གཉིས་པ་ནི། ཡོངས་སུ་བསྔོ་བ་ཁྱད་པར་ཅན། ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་གྱི་བསྔོ་བ་སྒོམ་ལམ་ལ། མཚན་ཉིད། དབྱེ་བ། ཞར་བྱུང་བསྔོ་བའི་རྣམ་གཞག་དང་གསུམ། དང་པོ་ནི། རང་གི་དགེ་རྩ་རྫོགས་པའི་བྱང་ཆུབ་ཏུ་བསྔོ་བར་བྱེད་པའི་རྗེས་ཐོབ་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས། གཉིས་པ་ལ། ས་མཚམས་དང་། ཡུལ་གྱི་སྒོ་ནས་དབྱེ་བ་གཉིས། དང་པོ་ལ། མ་དག་ས་དང་། དག་སས་བསྡུས་པའི་བསྔོ་བ་སྒོམ་ལམ་གཉིས། གཉིས་པ་ཡུལ་གྱི་སྒོ་ནས་དབྱེ་ན། མོས་པ་ཁྱད་པར་ཅན་གྱི། མི་དམིགས་པའི། ཕྱིན་ཅི་མ་ལོག་པའི། དབེན་པའི་དགེ་ཚོགས་ཀྱི་རང་བཞིན་དྲན་པའི། ཐབས་ལ་མཁས་པའི། མཚན་མ་མེད་པའི། སངས་རྒྱས་ཀྱིས་སྣང་བའི། ཁམས་གསུམ་པར་མ་གཏོགས་པའི། དཔེ་ཆུང་ངུས་མཚོན་པའི། འབྲིང་གིས་མཚོན་པའི། ཆེན་པོས་མཚོན་པའི་བསྔོ་བ་སྒོམ་ལམ་དང་བཅུ་གཉིས་སོ། །གསུམ་པ་ལ། མཚན་ཉིད། དབྱེ་བ། ཁྱད་ཆོས་དང་གསུམ། དང་པོ་ནི། རང་གཞན་གྱི་དགེ་རྩ་འབྲས་བུ་ཁྱད་པར་ཅན་དུ་སྒྲུབ་པར་བྱེད་པའི་འདུན་པ་མཚུངས་ལྡན་དང་བཅས་པ། གཉིས་པ་ལ། མངོན་མཐོའི་དང་། ངེས་ལེགས་ཀྱི་བསྔོ་བ་གཉིས། ཕྱི་མ་ལ། ཐེག་དམན་དང་། ཐེག་ཆེན་གྱི་བསྔོ་བ་གཉིས་སོ། །གསུམ་པ་ལ། གང་བསྔོ་བའི་དགེ་རྩ། གང་དུ་བསྔོ་བའི་ས། གང་གིས་བསྔོ་བའི་གང་ཟག །ཇི་ལྟར་བསྔོ་བའི་ཚུལ། དེ་ལྟར་བསྔོས་པའི་དགོས་པ། བསྔོ་བ་འགྲུབ་པར་བྱེད་པའི་དབང་པོ་དང་དྲུག །དང་པོ་ནི། དུས་གསུམ་བསགས་ཡོད་ཀྱི་དགེ་བ་རྣམས་ཏེ། རྡོ་རྗེ་རྒྱལ་མཚན་གྱི་བསྔོ་བའི་མདོ་ལས། འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་སོགས་གསུངས་པའི་ཕྱིར། གཉིས་པ་ལ། འཇིག་རྟེན་པའི། ཐེག་དམན་གྱི་སར། བླ་མེད་བྱང་ཆུབ་ཏུ་བསྔོ་བ་དང་གསུམ་ཡོད། གསུམ་པ་ནི། ཇི་སྐད་དུ། རིང་བསྲེལ་ཅན་གྱི་མཆོད་རྟེན་དྲུང་། །བདེ་བར་གཤེགས་པས་བསྔགས་པས་འགྲུབ། །ཅེས་པས་མཚོན་ནོ། །བཞི་པ་ནི། བསྔོ་བ་ཁྱད་པར་ཅན་གྱི་དབང་དུ་བྱས་ཏེ་འཁོར་གསུམ་རྣམ་དག་གི་ཤེས་རབ་ཀྱིས་ཟིན་པའི་སྒོ་ནས་སོ། །ལྔ་པ་ནི། དགེ་རྩ་མི་ཟད་ཅིང་གོང་ནས་གོང་དུ་སྤེལ་བའི་ཆེད་དུའོ། །དྲུག་པ་ནི། ཕྱོགས་བཅུའི་སངས་རྒྱས་སྲས་དང་བཅས་པ་ལ་བསྔོ་བ་འགྲུབ་པའི་ཆེད་དུ་མཁྱེན་པར་གསོལ་བའོ། །ངག་དོན་ནི། ས་གཉིས་པའི་རྗེས་ཐོབ་ཡེ་ཤེས་ཆོས་ཅན། བསྔོ་བ་སྒོམ་ལམ་ཡིན་ཏེ། རང་གཞན་གྱི་དགེ་རྩ་བླ་མེད་བྱང་ཆུབ་ཏུ་བསྔོ་བར་བྱེད་པའི་རྗེས་ཐོབ་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར། གསུམ་པ་ནི། ཐབས་དང་མི་དམིགས་པ་དག་གི །ཞེས་པའི་སྐབས་སུ་གཉིས་ཀྱི། དང་པོ་རྗེས་སུ་ཡི་རང་སྒོམ་ལམ་ལ། མཚན་ཉིད། དབྱེ་བ། དོགས་གཅོད་གསུམ། དང་པོ་ནི། རང་གཞན་གྱི་དགེ་རྩ་ལ་དགའ་བ་ཡང་དག་པར་སྒོམ་པར་བྱེད་པའི་ཚོར་བ་ཡིད་བདེ་མཚུངས་ལྡན་དང་བཅས་པའི་རྗེས་ཐོབ་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས། གཉིས་པ་ལ། མ་དག་ས་དང་། དག་སས་བསྡུས་པའི་རྗེས་སུ་ཡི་རང་གཉིས། གསུམ་པ་ནི། མོས་བསྔོ་རྗེས་སུ་ཡི་རང་གསུམ་མི་འགལ་ཏེ། ཐེག་ཆེན་གྱི་ཟག་བཅས་སྒོམ་ལམ་ཐམས་ཅད་བསྔོ་བ་སྒོམ་ལམ་གྱི་ནང་དུ་འདུས་པའི་ཕྱིར་ཏེ། དེ་ཐམས་ཅད་བྱང་ཆུབ་དོན་གཉེར་གྱི་འདུན་པས་ཟིན་པའི་སྒོམ་ལམ་ཡིན་པའི་ཕྱིར། ཡིན་ཁྱབ་མཉམ་ཡང་མ་ཡིན་ཏེ། ཚོར་བ་བཏང་སྙོམས་དང་མཚུངས་ལྡན་གྱི་མོས་བསྔོ་གཉིས་རྗེས་སུ་ཡི་རང་སྒོམ་ལམ་མ་ཡིན་པའི་ཕྱིར། ངག་དོན་ནི། རང་གཞན་གྱི་དགེ་བ་ལ་དགའ་བ་ཡང་དག་པར་བསྒོམ་པའི་ས་གཉིས་པའི་རྗེས་ཐོབ་ཡེ་ཤེས་ཆོས་ཅན། རྗེས་སུ་ཡི་རང་སྒོམ་ལམ་ཡིན་ཏེ། རང་གཞན་གྱི་དགེ་བ་ལ་དམིགས་ནས་དགའ་སྤྲོ་རྒྱ་ཆེན་པོ་དང་ལྡན་པའི་རྗེས་ཐོབ་ཀྱིས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར།

གཉིས་པ་ལ། སྒྲུབ་པ་སྒོམ་ལམ་དང་། རྣམ་དག་སྒོམ་ལམ་གཉིས། དང་པོ་ནི། དེ་ཡི་ངོ་བོ་ཉིད་མཆོག་ཉིད། ཅེས་པའི་སྐབས་སུ་གཉིས་ཀྱི། དང་པོ་ཐེག་ཆེན་གྱི་སྒྲུབ་པ་སྒོམ་ལམ་ལ། མཚན་ཉིད་དང་། དབྱེ་བ་གཉིས། དང་པོ་ནི། སྒོམ་སྤང་ཤེས་སྒྲིབ་ཀྱི་སྤོང་བ་གཉེན་པོས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས། འདི་དང་ཐེག་ཆེན་གྱི་སྒོམ་ལམ་བར་ཆད་མེད་ལམ་དོན་གཅིག །གཉིས་པ་ལ། ས་མཚམས་ཀྱི་སྒོ་ནས་དབྱེ་ན། མ་དག་ས་དང་། དག་སས་བསྡུས་པའི་སྒྲུབ་པ་སྒོམ་ལམ་གཉིས། སྤང་བྱའི་སྒོ་ནས་དབྱེ་ན། སྒོམ་སྤང་གི་ས་བོན་དང་། གནས་ངན་ལེན་དངོས་སུ་སྤོང་བའི་སྒྲུབ་པ་སྒོམ་ལམ་གཉིས་སོ། །ངག་དོན་ནི། ས་གཉིས་པའི་བར་ཆད་མེད་ལམ་ཆོས་ཅན། ཐེག་ཆེན་གྱི་སྒྲུབ་པ་སྒོམ་ལམ་ཡིན་ཏེ། རང་གི་ངོ་སྐལ་གྱི་ཤེས་སྒྲིབ་དངོས་སུ་སྤོང་བར་བྱེད་པའི་བར་ཆད་མེད་ལམ་གྱི་ངོ་བོར་གྱུར་པའི་ཐེག་ཆེན་གྱི་རྗེས་ལ་མངོན་རྟོགས་ཡིན་པའི་ཕྱིར། གཉིས་པ་ནི། འབྲས་བུ་དག་པ་གཟུགས་ལ་སོགས། ཞེས་པའི་སྐབས་སུ་གཉིས་ཀྱི། དང་པོ་ལ། ཐེག་ཆེན་གྱི་རྣམ་དག་སྒོམ་ལམ། གཞུང་གི་བསྟན་དོན། འབྲས་བུ་རྣམ་དག་བྱེ་བྲག་ཏུ་བཤད་པ་དང་གསུམ། དང་པོ་ལ། མཚན་ཉིད་དང་། དབྱེ་བ་གཉིས། དང་པོ་ནི། སྒོམ་སྤང་ཤེས་སྒྲིབ་ཀྱི་རྟེན་གཉེན་པོས་བསྡུས་པའི་ཐེག་ཆེན་གྱི་རྗེས་ལ་མངོན་རྟོགས། འདི་དང་ཐེག་ཆེན་གྱི་སྒོམ་ལམ་རྣམ་གྲོལ་ལམ་དོན་གཅིག །དབྱེ་ན། ས་གཉིས་པའི་རྣམ་གྲོལ་ལམ་ནས་ས་བཅུ་པའི་རྣམ་གྲོལ་ལམ་གྱི་བར་དགུ། གཉིས་པ་ལ། ཆོས་ཅན། བསྒྲུབ་བྱའི་ཆོས། གཏན་ཚིགས་ལ་དཔྱད་པ་དང་གསུམ། དང་པོ་ནི། འདིར་དངོས་བསྟན་གྱི་རྣམ་གྲོལ་ལམ་ལ། ཉན་རང་བྱང་སེམས་སངས་རྒྱས་ཀྱི་རྣམ་གྲོལ་ལམ་བཞི་ཡོད། འོན་ཀྱང་བསྟན་བྱའི་གཙོ་བོ་ནི་ཐེག་ཆེན་གྱི་རྣམ་གྲོལ་ལམ་མོ། །གཉིས་པ་ནི། མདོ་ལས། འབྲས་བུ་རྣམ་པར་དག་པས་གཟུགས་རྣམ་པར་དག་པ། ཞེས་དང་། འདིར། འབྲས་བུ་དག་པ་གཟུགས་ལ་སོགས། །དག་པ་ཉིད་དེ། ཞེས་པའི་དོན་གང་ལ་བྱེད་ཟེར་ན། རྣམ་གྲོལ་ལམ་རང་གི་ངོ་སྐལ་གྱི་དྲི་མས་རྣམ་པར་དག་པ་ན་དེའི་ཡུལ་གཟུགས་སོགས་ཀྱང་རང་གི་ངོ་སྐལ་གྱི་དྲི་མས་རྣམ་པར་དག་པའོ། །དེའི་ཡུལ་གཟུགས་སོགས་ཀྱི་ཆོས་ཉིད་མཐོང་བ་ལ་རང་གི་ངོ་སྐལ་གྱི་དྲི་མས་རྣམ་པར་དག་པའོ། །གསུམ་པ་ནི། མདོ་ལས། དེ་ལྟར་ན་འབྲས་བུ་རྣམ་པར་དག་པ་དང་། གཟུགས་རྣམ་པར་དག་པ་འདི་ལ་གཉིས་སུ་མེད་དེ་གཉིས་སུ་བྱར་མེད། ཅེས་སོགས་དང་། འདིར། དེ་གཉིས་ཐ་དད་མ་ཡིན་ཞིང་། །དཔྱད་དུ་མེད་པས་དག་པར་བརྗོད། །ཅེས་པའི་དོན་གང་ལ་བྱེད་ཟེར་ན། ཐེག་ཆེན་གྱི་སྒོམ་ལམ་རྣམ་གྲོལ་ལམ་ངོ་སྐལ་གྱི་དྲི་མས་རྣམ་པར་དག་པ་དེའི་ཡུལ་གཟུགས་སོགས་ཀྱི་ཆོས་ཉིད་མཐོང་བ་ལ་ཡང་རང་གི་ངོ་སྐལ་གྱི་དྲི་མས་དག་པའི་ཁྱད་པར་རང་མཚན་ལ་རྫས་ཐ་དད་པ་དང་། སྤྱི་མཚན་ལ་ལྡོག་པ་སོ་སོའི་བློ་དོན་མཐུན་གྱིས་དཔྱད་དུ་མེད་པའོ། །གསུམ་པ་ལ། མཚན་ཉིད་དང་། དབྱེ་བ་གཉིས། དང་པོ་ནི། ཟག་མེད་བར་ཆད་མེད་ལམ་གྱི་སྟོབས་ཀྱིས་རང་གི་ངོ་སྐལ་གྱི་སྤང་བྱའི་ས་བོན་ལས་གྲོལ་བའི་རྣམ་གྲོལ་ལམ་དང་འགོག་བདེན་གང་རུང་དུ་གྱུར་བའི་ཡོན་ཏན། འདི་དང་དགེ་སྦྱོང་ཚུལ་གྱི་འབྲས་བུ་དོན་གཅིག །གཉིས་པ་ལ། ཉན་ཐོས། རང་རྒྱལ། བྱང་སེམས། སངས་རྒྱས་ཀྱི་རྣམ་དག་དང་བཞི། མཚན་ཉིད་རིམ་བཞིན། ཐེག་པ་ཆུང་ངུ་བའི་རྒྱུད་ཀྱི། ཐེག་པ་འབྲིང་པོ་བའི་རྒྱུད་ཀྱི། རྒྱལ་སྲས་འཕགས་པའི་རྒྱུད་ཀྱི་རྣམ་གྲོལ་ལམ་དང་འགོག་བདེན་གང་རུང་དུ་གྱུར་པ་དང་། སྒྲིབ་གཉིས་བག་ཆགས་དང་བཅས་པ་ཟད་པར་སྤངས་པའི་སྤངས་རྟོགས་གང་རུང་དུ་གྱུར་པའི་ཡོན་ཏན་ནོ། །ངག་དོན་ནི། ས་གཉིས་པའི་རྣམ་གྲོལ་ལམ་ཆོས་ཅན། འབྲས་བུ་རྣམ་དག་ཡིན་ཏེ། རང་རྒྱུ་བར་ཆད་མེད་ལམ་གྱི་ངོ་སྐལ་གྱི་སྒྲིབ་པ་ལས་གྲོལ་བའི་རྟེན་གཉེན་པོ་ཡིན་པའི་ཕྱིར། སྤྱི་དོན་སྙིང་པོར་དྲིལ་བ་བདུད་རྩིའི་ཉིང་ཁུ་ལས། ལམ་ཤེས་འཆད་པའི་སྐབས་ཏེ་གཉིས་པའོ།། །།