འཆི་ཁའི་མན་ངག་ཉམས་ངའི་གདུང་སེལ།
འཆི་ཁའི་མན་ངག་ཉམས་ངའི་གདུང་སེལ་ཞེས་བྱ་བ་བཞུགས་སོ། །སྐུ་སྐྱེ་འཆི་བྲལ་བའི་སངས་རྒྱས་དངོས། །མགོན་རིགས་བརྒྱའི་བདག་པོ་པད་འབྱུང་གིས། །སྡུག་འཆི་ཁ་སླེབས་པའི་ཉམ་ཐག་རྣམས། །ཐུགས་བརྩེ་བའི་ཕྱག་གིས་བཟུང་དུ་གསོལ། །དེ་ཡང་རང་གི་སྲོག་ལ་རྒོལ་བའི་དགྲ་ཞིག་ལོ་ཁ་ཤས་ཚུན་འོང་ནི་ངེས་ལ་འོན་ཀྱང་དེ་ཚུན་ཆད་ཞག་དུས་ནམ་འོང་ལ་ངེས་པ་ཆེར་མེད་ན་རང་ཡང་དེའི་རིང་ལྷོད་པོར་འདུག་པས་མི་ཡོང་། དགྲ་ད་ལྟར་ཐོན་ཀྱང་དེ་ཕན་བྱ་རྒྱུ་མེད་པའི་ཚད་ཀྱིས་གཞན་ལ་དཔུང་རོགས་བཅོལ་བ་དང་། རང་གིས་གོ་མཚོན་སོགས་འདུ་བྱས་ཏེ་དགྲ་དང་འཐབ་མ་རག་ཏུ་གནས་དགོས་པ་ལྟར། རང་ཅག་ལའང་འཆི་བདག་གི་དགྲ་འདི་མི་རིང་བར་འོང་ངེས་ཤིང་། དེ་ཡང་ནམ་འོང་ལ་ངེས་པ་མེད་པར་མ་ཟད་ཕལ་ཆེར་མྱུར་དུ་རང་འོང་བ་ཤས་ཆེ་བ་ལྟར་འདུག་ན། ད་དུང་རང་གིས་རང་བསླུས་ཏེ་བདེ་བར་འདུག་པ་ནི་ཆེས་ཤིན་ཏུ་མི་རིགས་པའི་གནས་སུ་བལྟས་ལ། ད་ལྟ་ནས་ངེས་འབྱུང་གི་བློ་དང་བྱང་ཆུབ་ཀྱི་སེམས་ཀྱིས་ཟིན་པའི་སྒོ་ནས་སྐྱབས་གནས་ཀུན་འདུས་གུ་རུ་ཡིད་བཞིན་ནོར་བུ་འདི་ཕྱིའི་རེ་ལྟོས་འཆའ་ཡུལ་གཅིག་ཆོག་ཏུ་བཟུང་ནས་འདོད་དོན་ལ་གསོལ་བ་སྙིང་ཐག་པ་ནས་འདེབས་པ་དང་། འདོད་དོན་ཇི་བཞིན་འགྲུབ་པའི་འགལ་རྐྱེན་གྱི་གེགས་སྦྱོང་ཞིང་མཐུན་རྐྱེན་གྱི་ཚོགས་སྒོ་ཀུན་ནས་སྤེལ་བ་དང་། འདོད་དོན་ཇི་བཞིན་འགྲུབ་པའི་སྨོན་ལམ་ཡང་ཡང་འདེབས་པ་རྣམས་བྱ་བའི་གནད་གལ་བོ་ཆེར་བཟུང་ཏེ་ནུས་རྩལ་ཅི་ཡོད་ཀྱིས་ཉིན་རེ་བཞིན་རང་བློ་ལ་གོམས་འདྲེས་སུ་བྱའོ། །དེས་ན་རྒྱུན་དུ་བླ་མའི་རྣལ་འབྱོར་ཉམས་སུ་ལེན་པའི་སྐབས་ལྟ་བུ་ལ་མཚོན་ན།
དང་པོ་ཉིད་ནས་ཀུན་སློང་སྐྱོན་ཅན་དུ་མ་སོང་བར་འཁོར་བ་སྤྱི་དང་བྱེ་བྲག་ཚེ་འདི་སྣང་ལ་སྐྱོན་དུ་ལྟ་བའི་བློ་སྣ་རྒྱས་པར་བྱ་བ་དང་། སེམས་ཅན་ཐམས་ཅད་ཡིད་འོང་གི་རྣམ་པར་བལྟས་ལ་རང་ཉམས་ལ་དཔག་པས་དེ་དག་རྒུད་པ་ལས་འདྲེན་འདོད་ཀྱི་སྙིང་རྗེའི་བློ་སྣ་རྒྱས་པར་བྱ་བ་གཉིས་ཀྱིས་ངེས་འབྱུང་དང་བྱང་སེམས་བསྒྲུབ། བློ་དེ་གཉིས་ཀྱིས་ཟིན་པའི་སྒོ་ནས་བླ་མའི་རྣལ་འབྱོར་སྒོམ་པ་སོགས་ལ་འཇུག་དགོས་ཏེ། གཞན་དུ་ན་སྲིད་པ་གཡོ་བའི་སྲེད་ལེན་གྱི་དབང་གིས་སྐྱེ་འཆིའི་དགྲ་ཁ་ལས་ཐར་དཀའ་ཞིང་། ཡོན་ཏན་མ་མཐོང་བའི་ཁ་ཙམ་གྱིས་དོན་གཉེར་གྱི་འདོད་བྱའི་གོ་འཕང་མཆོག་ཀྱང་འཐོབ་དཀའ་བའི་ཕྱིར་རོ། །དངོས་གཞི་འདོད་དོན་ལ་གསོལ་བ་འདེབས་རྒྱུ་དེ་ཡང་ཐག་མཁན་རྐང་ལག་བརྒྱད་པའི་རྣམ་ཐར་ལྟར་མ་སོང་བར། མདོ་དོན་སྙིང་པོ་གཅིག་ལ་བློ་གཏད་དགོས་པས། ཡོན་ཏན་དང་བཀའ་དྲིན་རྗེས་སུ་དྲན་པའི་ངང་ནས་སྐྱབས་གནས་ཀུན་འདུས་གུ་རུའི་བྱིན་རླབས་རང་རྒྱུད་ལ་ཞུགས། རང་གི་སྒོ་གསུམ་བླ་མ་དང་འདྲེས་ནས། བླ་མའི་འོད་གསལ་ཐུགས་ཀྱི་ཐིག་ལེར་ཚེ་འདིར་མངོན་པར་བྱང་ཆུབ་པར་མཛད་པ་ཞིག་དང་། གལ་ཏེ་ཚེ་འདིར་བཙན་ས་མ་ཟིན་ན་འཆི་ཁར་རང་དབང་འཕྲོག་པའི་གནད་གཅོད་ཀྱི་སྡུག་བསྔལ་དང་། ཆགས་སྡང་གི་ཡུལ་རྐྱེན་ངན་པ་སོགས་མི་འབྱུང་བར་རང་སེམས་བླ་མ་ལ་བསྲེ་བའི་ཏིང་ངེ་འཛིན་ལྷག་པར་ལས་སུ་རུང་སྟེ་འཆི་བ་འོད་གསལ་ལ་བརྟན་པ་ཐོབ་པ་དང་། དེ་མ་ཐོབ་པར་སྲིད་པ་བར་དོར་འབྱམས་ན་དེར་བླ་མ་རྗེས་སུ་དྲན་ཞིང་གསོལ་འདེབས་ལ་བརྩོན་པའི་མཐུས་སྐད་ཅིག་ལ་བླ་མའི་སྐུའི་སྣང་བ་དང་མཇལ་ནས་པདྨ་འོད་གླིང་སོགས་རིག་འཛིན་གྱི་ཞིང་ཁྱད་པར་ཅན་དུ་ཁྲིད་དེ་ལམ་གྱི་འཕྲོ་རྫོགས་པར་བྱེད་ཅིང་སྟོན་འཁོར་དགོངས་པ་དབྱེར་མེད་དུ་གྱུར་ནས་འཚང་རྒྱ་བ་ཞིག་བླ་མ་ཁྱེད་རང་མཁྱེན་ནོ་ཞེས་གསོལ་བ་གདབ་པ་ཡིན་ནོ། །དེ་ལྟར་གསོལ་བ་བཏབ་པ་ལྟར་འདོད་དོན་རང་རྒྱུད་ལ་འབྱོར་བའི་དཔུང་བསྐྱེད་ཅིང་གེགས་བསལ་བ་ནི་བླ་མའི་རྣལ་འབྱོར་སྐབས་ཀྱི་མཆོད་པ་དང་། དབང་བཞི་ལེན་ཚུལ་གྱི་སྐོར་རྣམས་ཚིག་ཙམ་དུ་མ་སོང་བར་དམིགས་འོག་ཏུ་ཚུད་ངེས་བྱས་པ་ལ་མ་ཚང་བ་མེད་
ཀྱང་རྟག་པར་བླ་མ་མཉེས་པའི་སྒོ་ཀུན་ནས་བསྒྲུབ་པ་དང་། དམ་སྡོམ་སྤྱི་དང་བྱེ་བྲག་བླ་མའི་དམ་ཚིག་ལས་མི་འདའ་ཞིང་ཅུང་ཟད་ཉམས་པ་རྣམས་ཀྱང་དེ་མ་ཐག་ཏུ་གསོ་བ་དང་། ཁྱད་པར་དུས་ཆེན་རྣམས་སུ་ཚོགས་འཁོར་རྒྱ་ཆེར་བྱ་བ་ཡང་གནད་དེ། དོན་དེར་སྨོན་ལམ་འདེབས་པ་ཡང་དགེ་རྩ་གང་བསྐྱེད་སྔར་གསོལ་བཏབ་ཀྱི་སྙིང་པོ་དེ་ཁོ་ན་འགྲུབ་པའི་རྒྱུར་བསྔོ་ཞིང་སྨོན་པའོ། །དེ་ནས་དགྲ་དངོས་སུ་འོང་དུས་དེ་མ་ཐག་གོ་མཚོན་བླངས་ཏེ་འཐབ་དགོས་པ་ལྟར་ནམ་ཞིག་བཟློག་ཏུ་མེད་པའི་འཆི་བ་འོང་ལ་ཉེ་བའི་ཚེ། སྔར་ངེས་འབྱུང་གི་བསམ་པ་བསྒྲུབ་པའི་སྐབས་ལྟར་འཁོར་བ་སྤྱི་དང་ཁྱད་པར་ཚེ་འདིར་ལུས་ལོངས་སྤྱོད་གཉེན་གཤེས་ལ་ཆགས་ཞེན་བཀག་པ་གལ་ཆེ་སྟེ། དུས་དེར་དེ་དག་དང་འབྲལ་བར་ཤེས་ནས་ཆགས་ཞེན་དྲག་པོ་འབྱུང་ངེས་ཤིང་། དེས་ཡང་སྲིད་ཕྱི་མ་ཉེ་བར་ལེན་པའི་ས་བོན་མཐུ་ཅན་དུ་བྱེད་པའི་ཕྱིར་རོ། །དེས་ན་འདི་ལྟར་ལུས་ལོངས་སྤྱོད་གཉེན་བཤེས་རྣམས་མཐར་འདོར་བའི་ཆོས་ཅན་དུ་གནས་པ་འཇིག་རྟེན་སྤྱིའི་ཆོས་ཉིད་ཡིན་པ་བཞིན་དེ་དག་འདོར་བའི་རེས་མོ་རང་སྟེང་དུ་བབ་པ་ལ་མི་དགའ་བ་བྱ་དོན་མེད་པར་མ་ཟད་ཚེ་འདི་ཚོ་མིན་པར་སྔར་ཡང་དེ་འདྲ་ལན་མང་ཐོབ་ཅིང་ཐོབ་པ་དེ་དག་གིས་བསླུས་ནས་འཕྲལ་ཕུག་གི་དོན་ཆེན་ལས་མ་ཉམས་པའི་སྐབས་ཀྱང་མ་བྱུང་བས་ཕན་འདོགས་པའི་ཟོལ་ཀྱིས་གནོད་པ་བྱེད་པ་ལ་ཆགས་དོན་ཅི་ལ་ཡོད། ད་རེས་སྐྱབས་གནས་བཟང་པོ་འདི་འདྲ་བ་ལ་སྐྱབས་བཅོལ་བའི་སྐལ་བཟང་རྙེད་དུས་ཐེ་ཚོམ་མེད་པའི་གསོལ་འདེབས་ཡིད་ཚིམ་ངེས་ཤིག་བྱས་ཏེ་རབ་འཆི་བ་ལ་བརྟན་པ་ཐོབ་པ་ཞིག་དང་། དེ་ཙམ་མ་བྱུང་ཡང་བར་དོ་ནས་རྔ་ཡབ་དཔལ་རིའི་ཞིང་དུ་བུ་ཕ་ཁྱིམ་དུ་འགྲོ་བ་ལྟར་སྤྲོ་བཞིན་ཕྱིན་ནས་ཞིང་དེར་རིག་འཛིན་གྱི་ལམ་ཟབ་མོ་ཉམས་སུ་བླངས་ཏེ་རང་གཞན་གཏན་དུ་འཚོ་བའི་ཆོས་ཀྱི་རྒྱལ་སྲིད་ཐོབ་པ་ཞིག་བྱ་སྙམ་པས་འཆི་བ་ལ་ཞེ་འཚེར་མེད་པར་རིག་པ་གཟེངས་བསྟོད་དེ་སྤྲོ་སེང་ངེ་བྱས་ལ། རང་ལ་ཡོད་པའི་ལོངས་སྤྱོད་ཀུན་སེར་སྣ་མེད་པར་བླ་མ་དངོས་སུ་བཞུགས་ན་དེར་འབུལ་བའམ། མིན་ཀྱང་ཚོགས་འཁོར་ལྟ་བུའི་རྒྱུར་བཏང་ནས་དྲན་པ་དང་མི་དྲན་པའི་དམ་སྡོམ་ཉམས་
པ་གསོ་ཞིང་ཕྱིན་ཆད་མི་བྱེད་པའི་དམ་བཅའ་ལེན་པ་སོགས་ཀྱིས་བསག་སྦྱང་ལ་སྒོ་ཀུན་ནས་འབད། སྔར་ཕན་ཆད་ཀྱི་དགེ་སྦྱོར་ཅི་ལྟར་བྱས་པ་ཡིད་ལ་བྱས་ཏེ་རློམ་སེམས་དང་བྲལ་བའི་ཡི་རང་མང་དུ་བསྒོམ་ཞིང་། དེ་ལྟར་སྒྲུབ་པའི་དགེ་རྩ་དེ་རྣམས་ཀྱང་གཞན་དོན་དུ་རབ་འཆི་དུས་ཀྱི་འོད་གསལ་ངོས་ཟིན་ནས་ཚེ་འདིར་འཚང་རྒྱ་བ་དང་། མིན་ཀྱང་བར་དོར་བླ་མ་དང་མཇལ་ནས་རིག་འཛིན་གྱི་ཞིང་དུ་ལམ་གྱི་འཕྲོ་སྦྱངས་ཏེ་མཁའ་མཉམ་འགྲོ་བའི་དཔུང་གཉེན་གཅིག་པུར་འགྱུར་བའི་རྒྱུར་བསྔོ་ཞིང་སྨོན་ལམ་ཤུགས་དྲག་ཏུ་བཏབ། དེ་ནས་འཆི་ཁ་དངོས་ལ་བབས་པའི་ཚེ་སྐྱབས་སེམས་སྔོན་དུ་འགྲོ་བས། རང་གི་མདུན་མཁར་ངོ་བོ་དྲིན་ཅན་རྩ་བའི་བླ་མ་ལ་རྣམ་པ་གུ་རུ་པདྨ་འབྱུང་གནས་སྐུ་དགྱེས་པའི་གཟི་མདངས་ཅན། ཞལ་རང་ལ་ཕྱོགས་ནས་ཐུགས་བརྩེ་བས་རྡོ་རྗེའི་གསུང་གིས་བུ་ཁྱེད་འཆི་བ་ལ་མ་འཇིགས་ཤིག །ཁྱོད་བདེ་བའི་ལམ་དུ་བདག་གིས་འདྲེན་པ་ཡིན་ནོ་ཞེས་དབུགས་དབྱུང་མཛད་པ་དྲན་པ་ཙམ་གྱིས་འཇིགས་སྐྲག་དང་འཁྲུལ་སྣང་རང་འགགས་སུ་འགྲོ་བ་ཞིག་བསྒོམ། དེ་ཉིད་དཀོན་མཆོག་ཀུན་འདུས་ཀྱི་ངོ་བོར་ཐག་བཅད་ལ་བློ་སྣ་མི་མང་བར་གོང་གི་སྨོན་ལམ་ཇི་ལྟར་བཏབ་པའི་དོན་དེ་ཁོ་ན་བཞིན་འགྲུབ་པའི་གསོལ་འདེབས་མགོ་བོ་འགས་པའི་ཚོད་ཙམ་བྱ། དེའི་མཐུས་བླ་མའི་སྐུ་ལས་ངོ་བོ་བྱིན་རླབས་ལ་རྣམ་པ་བདུད་རྩིའི་འོད་ཟེར་ཁ་དོག་ལྔ་ལྡན་ཉི་མ་བྱེ་བའི་འོད་ཀྱིས་ཀྱང་མཚོན་པར་དཀའ་བ་ཞིག་བུན་ཟེར་རེ་རེ་འཕྲོས་པ་རང་ལུས་ལ་ཐིམ་པ་དང་དེའི་རྐྱེན་གྱིས་རང་ལུས་འོད་དུ་ཞུ་བའི་དྭངས་མ་རླུང་སེམས་ཀྱི་རྟེན་ཐིག་ལེ་དཀར་ལ་དམར་བའི་མདངས་ཅན་སྣུམ་ལ་འདྲིལ་བ། དྭངས་ཤིང་གསལ་ལ་འོད་ཟེར་ཁ་དོག་ལྔ་འབར་བ་ཆེ་ཆུང་སྲན་མ་ཙམ་དུ་འདར་ལིང་ངེ་བྱེད་པ་ཞིག་ཏུ་གྱུར། དེ་ཉིད་གྱེན་དུ་མདའ་འཕང་བ་ལྟར་སོང་ནས་བླ་མའི་ཐུགས་ཀར་སིབ་ཀྱིས་ཐིམ་པས་རང་གི་སྒོ་གསུམ་དང་བླ་མའི་སྐུ་གསུང་ཐུགས་དབྱེར་མེད་དུ་འདྲེས། དེ་ནས་བླ་མ་ཡང་ཇེ་མཐོ་ཇེ་མཐོར་སོང་ནས་མཐར་ནམ་མཁའ་དང་ཁྲིག་གེར་འདྲེས་པའི་ངང་ལ་ཤེས་པ་ཁོང་གློད་དེ་རིག་ངོ་བསྐྱང་བཞིན་འཆིར་གཞུག །ད་དུང་མ་ཤི་ན་ཡང་སྔར་གྱི་གསོལ་
འདེབས་མན་བསྐྱར་བ་ཡིན་ནོ། །ཉམས་ལེན་དེ་རྣམས་དུས་མཚམས་སོ་སོར་མི་འཆུག་པར་ལག་ཏུ་ལོན་པའི་གྲོགས་སུ་འཕེན་པ་གཉིས་གཏོང་བ་ཡང་གལ་ཆེ་སྟེ། དེ་ཡང་དང་པོ་ནི་ད་ལྟ་ནས་ཐུན་དང་ཐུན་མཚམས་ཀྱི་དུས་རིས་སུ་ཆད་པ་མེད་པར། ད་གཟོད་རང་ཉིད་འཆི་ཁ་རུ་མཚམས་སྦྱོར་གྱི་རྣམ་རྟོག་ངན་པ་མི་རྒྱུ་བར་འདི་སྣང་ལ་ཆགས་ཞེན་འགོག་པ་དང་འཆི་བ་ལ་བྲོད་པ་བསྐྱེད་པ་སོགས་སྔར་གྱི་ཉམས་ལེན་རྣམས་ལ་བློ་རྩེ་གཅིག་ཏུ་དྲིལ་ནས་འཇུག་པར་བྱའོ་སྙམ་པའི་འཕེན་པ་ཡང་ཡང་གཏོང་བ་དང་། གཉིས་པ་ནི། ད་ལྟར་མ་ཟད་འཆི་ཁར་ཡང་བདག་གིས་འཆི་བ་འོད་གསལ་དེ་སྔར་འདྲིས་ཀྱི་མི་བཞིན་ངོས་ཟིན་ནས་བརྟན་པ་ཐོབ་པ་དང་། མིན་ཀྱང་བར་དོར་བླ་མ་ལ་གསོལ་བ་བཏབ་ནས་འདོད་དོན་ལས་མི་ཉམས་པ་ཞིག་ཅིས་ཀྱང་བྱའོ་སྙམ་པའི་འཕེན་པ་ཤུགས་དྲག་གཏོང་བ་སྟེ་འདི་ནི་གཉིད་ལས་ལྡང་བའི་འདུ་ཤེས་ཀྱི་སྐབས་སུ་ནང་དུས་སྔ་མོ་ནས་སད་པར་བྱའོ་སྙམ་པའི་འཕེན་པ་གཏོང་བ་དང་འདྲའོ། །འཆི་ཁའི་གདམས་ངག་འདི་རྣམས་ཐོས་པ་ཙམ་གྱིས་མི་ཕན་ཏེ། ནམ་ཞིག་ཐོག་བབས་སུ་འཆི་བའམ། འཆི་ནད་ཀྱིས་གཅུར་བས་འདུ་ཤེས་འཁྲུག་ཅིང་རང་དབང་དང་བྲལ་བའི་ཚེ་དེ་འདྲའི་ཉམས་ལེན་ལ་རྩོལ་བ་བྱེད་སྙིང་མི་འདོད་ཅིང་། བྱས་ཀྱང་བསམ་དུ་མི་བཏུབ་པས་ཅི་ཡང་བྱར་མེད་པའི་ཕྱིར་རོ། །དེས་ན་ད་ལྟ་ཁམས་དྭངས་བློ་གསལ་རང་དབང་ཡོད་དུས་ལེགས་པར་སྦྱངས་ནས་གདེངས་ཐོབ་པར་བྱ་བ་ནི་བདག་ལ་ཕན་པར་འདོད་པ་དག་གི་ལས་ཀྱི་གཙོ་བོ་གལ་པོ་ཆེ་ཡིན་པར་ཤེས་པར་བྱའོ། །སྨྲས་པ། ཀྱེ་མ་ཐུབ་པའི་བསྟན་པ་ཉམས་དམའ་ཞིང་། །བསྟན་འཛིན་སྐྱེས་ཆེན་ཕལ་ཆེར་གཤེགས་ཟིན་པའི། །དུས་ངན་འདི་འདྲར་སྐྱེས་པའི་ལས་ངན་བདག །དབུགས་འབྱིན་འདྲེན་པའི་སྐྱབས་དེ་གང་ན་བཞུགས། །རང་སྐྱོན་འཁྲུལ་རྟོག་ངན་པའི་རང་གཟུགས་ནི། །སྣང་བ་དགྲ་རུ་ཤར་བའི་མཐོང་སྣང་བརྒྱ། །མ་གྲུབ་གྲུབ་འདྲའི་རྫུན་གྱི་འཇའ་རིས་འདི། །འགེབ་པའི་འཕྲུལ་ཆེན་ད་ནི་རྙེད་དཀའ་མཐོང་། །དལ་འབྱོར་དོན་ཆེན་བསྟན་པའི་གདམས་ངག་ལ། །བདག་ཡིད་སོམ་ཉིར་གྱུར་པ་མ་ལགས་ཀྱང་། །ལས་སྣང་འདི་འདྲ་སྤྱོད་པའི་ལུས་
ངན་ལས། །སྐྱེས་བུའི་འདོད་དོན་འཚོལ་བའི་རེ་བ་ཕྲ། །སྣོད་ཀྱི་རྒུད་པས་སྐྱེ་འགྲོའི་བདེ་རྩ་འཕྲོག །བཅུད་ཀྱི་རྒུད་པས་རྒྱལ་ཁམས་མི་དགེར་སྦྱོར། །སྣོད་བཅུད་གཉིས་ཀས་དཀར་པོའི་མཐུ་བཅོམ་ནས། །དུས་ངན་ནན་གྱིས་འདྲེན་འདིས་སྣང་བ་སྐྱོ། །ཆོས་ལྡན་རྒྱལ་པོའི་ཁྲིམས་ཀྱི་ལམ་སྲོལ་ཞིག །སྡིག་སྤྱོད་སྐྱེ་བོའི་མགོ་འཕང་དགུང་བས་མཐོ། །བདེན་རྫུན་གོ་ནོར་ཉམས་ཆུང་བརླག་བྱེད་པའི། །ཡུལ་ཚུལ་འདི་ལ་བསམ་བཞིན་ཞེ་རེ་སྐྱོ། །བཤད་སྒྲུབ་དགོས་ཟེར་བཤད་སྒྲུབ་ཟོལ་གྱིས་སྒྲིབ། །བསྟན་དོན་ཁ་ཁྱེར་རང་དོན་ཞོར་ནས་བསྒྲུབ། །ཚུལ་ལྡན་ལ་སྨོད་གཡོག་ཅན་རྒྱལ་འཇུག་པའི། །དགོན་གྱི་གཙོ་བོ་མཐོང་ནས་ཡི་རེ་མུག །ངོ་བསྟོད་ལ་མཁས་འདུལ་ཁྲིམས་རྩ་བཞིན་དོར། །ཟུར་ཟ་ཆེ་ལ་ཕྲ་མའི་འཕྲུལ་འཁོར་བསྐོར། །སློབ་དཔོན་སྨོད་ཅིང་མགུ་བའི་དུས་མེད་པའི། །དགོན་གྱི་གྲྭ་པ་མཐོང་ནས་བདག་ཡིད་སྐྱོ། །བསླབ་སྡོམ་མནོས་ཚད་དམ་སྡོམ་ཉམས་པའི་རྒྱུ། །ཐོས་པ་བསགས་ཚད་ཆོས་སྤང་འཕེལ་བའི་གྲོགས། །བཤེས་གཉེན་བསྟེན་པའང་སྐུར་པའི་གཞིར་མཐོང་ནས། །བདག་ནི་རིང་པོ་འཚོ་ལ་སྤྲོ་བ་ཉམས། །བླ་མ་ལྷ་དང་མཆེད་ལ་ཡིད་ལོག་ཅིང་། །དྲིན་ལྡན་འགྲོ་དོན་སྤོང་བ་མ་ལགས་ཀྱང་། །རང་ཉམས་གཞན་ཕུང་འདི་འདྲས་སྐྱོབ་དཀའ་བར། །ཤེས་ནས་དྲང་པོར་བརྗོད་ལ་ནོངས་པ་ཅི། །དེ་ཕྱིར་གདམས་ངག་འདི་ལ་གོམས་པའི་མཐུས། །རིང་མིན་སྣོད་བཅུད་དག་པའི་ཞིང་གཞན་དུ། །སྐྱེ་བའི་རྟེན་འབྲེལ་བདག་ལ་མངོན་གྱུར་ནས། །དོན་ཆེན་དུས་གཅིག་འགྲུབ་པའི་སྨོན་ལམ་འདེབས། །དེ་ཚེ་ཐབས་ལ་མཁས་པའི་སྤྱོད་པ་ཡིས། །དམ་པའི་མགོན་རྣམས་མཉེས་པ་བསྒྲུབ་པ་དང་། །ཉམ་ཐག་འགྲོ་བ་དུ་མ་དབུགས་དབྱུང་བའི། །གཞན་དོན་བརྩོན་པའི་ལས་ལ་སྐྱོ་མེད་ཤོག །ཅེས་པ་འདི་ཉེར་གནས་ལྷ་དཔལ་དང་སངས་ཆོས་ཟུང་གིས་ནན་དུ་བསྐུལ་བའི་ངོར་འབྲི་ཡུལ་པདྨ་རྫོང་ཞེས་པའི་བྲག་རི་རིན་ཆེན་བརྩེགས་པ་འདྲ་བའི་མགུལ་ནས་ཆོས་མེད་མཁྱེན་ནོར་པས་སྨྲས་རིམ་བཞིན་བུ་སྨྱོན་ཨོ་རྒྱན་བསམ་འགྲུབ་ཀྱིས་ཡི་གེར་བྲིས་པ་དགེ་ལེགས་འཕེལ།