གཉིས་པ་རྣམ་བཅད་ཀྱི་དགོས་པ།
གཉིས་པ་རྣམ་བཅད་ཀྱི་དགོས་པ་ནི།
དགོས་སོགས་ཆོས་བཞི་ཡོད་པར་གོ་བ་ལ་བརྟེན་ནས་རྣམ་བཅད་དུ་ལོག་རྟོག་བཞི་དགོས་པ་དང་འབྲེལ་པ་དང་བརྗོད་བྱ་དང་ཉིང་དགོས་མེད་སྙམ་པ་བཞི་དང༌། དགོས་པ་ཕལ་ཆེར་མེད་ལས་ཆེ་སྙམ་པ་ལ་སོགས་པའི་ཐེ་ཚོམ་བཞི་སྟེ་བརྒྱད་བསལ་བ་རྣམ་བཅད་ཀྱི་དགོས་པ་ཡིན་ཏེ། བྱེ་བྲག་སྨྲ་བའི་སློབ་དཔོན་ཆོས་ཀྱི་བཤེས་གཉེན་གྱིས་མཛད་པའི་ཊཱི་ཀ་ལས། འདུལ་བའི་མདོ་ལ་བརྗོད་པར་བྱ་བ་མེད་པར་དོགས་པ་བསལ་བའི་ཕྱིར་བརྗོད་པར་བྱ་བ་བསྙད་དོ། །འབྲས་བུ་མེད་པར་དོགས་པ་བཟློག་པའི་ཕྱིར་དགོས་པ་བརྗོད་དོ། །ཐབས་མེད་པར་དོགས་པ་སྤང་བའི་ཕྱིར་འབྲེལ་པ་བཤད་དོ། །འདོད་པའི་དོན་གྲུབ་པར་བྱ་བའི་ཕྱིར་དགོས་པའི་ཡང་དགོས་པ་བསྟན་ཏོ། །ཞེས་གསུངས་པའི་ཕྱིར་རོ། །