ཉན་རང་གཉིས་ཐུབ་དབང་ལས་སྐྱེས་ཚུལ།
ཉན་རང་གཉིས་ཐུབ་དབང་ལས་སྐྱེ་ཚུལ་དང༌། སངས་རྒྱས་བྱང་སེམས་ལས་འཁྲུངས་ཚུལ་དང༌། བྱང་ཆུབ་སེམས་དཔའི་རྒྱུའི་གཙོ་བོ་གསུམ་བསྟན་པ་དང་གསུམ། དང་པོ་ལ། ཐུབ་དབང་གི་དོན་དང༌། ཉན་ཐོས་ཀྱི་དོན་དང༌། རང་རྒྱལ་གྱི་དོན་དང༌། ཐུབ་དབང་ལས་དེ་གཉིས་སྐྱེ་ཚུལ་དང་བཞི།
ཐུབ་དབང་གི་དོན།
དང་པོ་ནི། ཐུབ་པ་སངས་རྒྱས་བཅོམ་ལྡན་འདས་ལོངས་སྤྲུལ་དེ་དག་ཆོས་ཅན། ཁྱོད་ལ་ཐུབ་དབང་ཞེས་བརྗོད་པའི་རྒྱུ་མཚན་ཡོད་དེ། ཉན་རང་བྱང་སེམས་ཀྱི་ཐུབ་པ་རྣམས་ལས་ཀྱང་གོང་ན་མེད་པའི་སྐུ་གསུང་ཐུགས་ཕྲིན་ལས་ཀྱི་དབང་ཕྱུག་ཕུན་སུམ་ཚོགས་པ་ཐོབ་པ་དང༌། ཉན་རང་བྱང་སེམས་རྣམས་ཁྱོད་ཀྱི་བཀས་ཆོས་ཀྱི་སྲིད་ལ་དབང་བསྒྱུར་བར་མཛད་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར་ཏེ། རང་འགྲེལ་ལས། དེ་ལ་གོང་ན་མེད་པའི་ཆོས་ཀྱི་དབང་ཕྱུག་ཕུན་སུམ་ཚོགས་པ་མངའ་བས། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་ལས་ཀྱང་དབང་ཕྱུག་དམ་པའི་ཕུན་སུམ་ཚོགས་པ་ཉིད་དང༌། ཉན་ཐོས་ལ་སོགས་པ་རྣམས་དེའི་བཀས་མངའ་བསྒྱུར་པའི་ཕྱིར། ཞེས་གསུངས་པའི་ཕྱིར། གཉིས་པ་ཉན་ཐོས་ཀྱི་དོན་ནི། ཐེག་པ་ཆུང་ངུའི་གང་ཟག་ཆོས་ཅན། ཁྱོད་ལ་ཉན་ཐོས་ཞེས་བརྗོད་པའི་རྒྱུ་མཚན་ཡོད་དེ། ཟབ་མོ་སྟོང་ཉིད་དེ་རྟོགས་པའི་ལྟ་བ་ལ་སོགས་པ་ཉན་ཐོས་བྱང་ཆུབ་ཐོབ་བྱེད་ཀྱི་ཡང་དག་པའི་གདམས་ངག་དེ་སངས་རྒྱས་སོགས་གཞན་ལས་ཉན་ནས་སྒོམ་པར་བྱེད་ཅིང་བསྒོམ་པའི་འབྲས་བུ་ཉན་ཐོས་ཀྱི་བྱང་ཆུབ་ཐོབ་པ་ན། ཐོབ་པའི་དོན་དེ་གཞན་ལ་བཤད་ཅིང་ཐོས་པར་བྱེད་པས་ན་དེ་ལྟར་བརྗོད་པའི་ཕྱིར་རོ། །ཉན་ཐོས་ཀྱི་བྱང་ཆུབ་ཐོབ་པའི་དོན་དེ་གཞན་ལ་ཐོས་པར་བྱེད་ཚུལ་ཡོད་དེ། ཉན་ཐོས་དགྲ་བཅོམ་པ་དག་གིས་འདི་ལྟར་བདག་གིས་ཐར་བའི་ལམ་བསྒྲུབ་པའི་བྱ་བ་བྱས་ཟིན་ཏོ། །སྲིད་པའི་རྒྱུ་ཉོན་མོངས་པ་སྤངས་ཟིན་པས་རྟེན་འདི་ལས་སྲིད་པ་གཞན་དུ་སྦྱོར་པ་མི་ཤེས་སོ། །ཞེས་སོགས་གསུང་རབ་ལས་མང་དུ་འབྱུང་བ་ལྟར་ཉན་ཐོས་ཀྱི་བྱང་ཆུབ་ཐོབ་པའི་ཡོན་ཏན་རྣམས་གཞན་ལ་ཐོས་པར་བྱེད་པའི་ཕྱིར་རོ། །
ཉན་ཐོས་ཀྱི་དོན།
ཡང་ཐེག་པ་ཆུང་ངུའི་ཉན་ཐོས་ཀྱི་གང་ཟག་ཆོས་ཅན། ཁྱོད་ལ་ཐོས་སྒྲོག་ཅེས་བརྗོད་པའི་རྒྱུ་མཚན་ཡོད་དེ། འབྲས་བུའི་མཆོག་སངས་རྒྱས་ཀྱི་སྐུ་བཞིའི་མཚན་ཉིད་དང་སངས་རྒྱས་དེ་ཐོབ་བྱེད་ཐེག་པ་ཆེན་པོའི་ལམ་གྱི་མཚན་ཉིད་དང་དབྱེ་བ་ལ་སོགས་པ་སངས་རྒྱས་རྣམས་ལས་ཐོས་ནས་རང་གིས་ཉམས་སུ་མི་ལེན་པར་གཞན་དོན་དུ་གཉེར་བ་དག་ལ་སྒྲོག་པར་བྱེད་པ་ཙམ་ཡིན་པས་ན་དེ་ལྟར་བརྗོད་པའི་ཕྱིར། སྒྲ་བཤད་སྔ་ཕྱི་གཉིས་ཀ་ཉན་ཐོས་ཀྱི་སྒྲ་བཤད་ཡིན་ཏེ། ཉན་ཐོས་ཀྱི་སྐད་དོད་ཤྲ་བ་ཀ་ནི་ཉན་ཐོས་དང་ཐོས་སྒྲོག་གཉིས་ཀ་ལ་འཇུག་པའི་ཕྱིར་ཏེ། དམ་ཆོས་པདྨ་དཀར་པོ་ལས། མགོན་པོ་དེ་རིང་བདག་ཅག་ཉན་ཐོས་གྱུར། །བྱང་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ཅག་ཉན་ཐོས་མི་བཟད་འདྲ། །ཞེས་གསུངས་པའི་ཕྱིར་རོ། །གསུམ་པ་རང་རྒྱལ་གྱི་དོན་བཤད་པ་ནི། ཐེག་པ་འབྲིང་གི་གང་ཟག་ཆོས་ཅན། ཁྱོད་ལ་དེ་ཉིད་རྟོགས་པ་འབྲིང་བོའམ་དེ་ཉིད་ཁོང་དུ་ཆུད་པ་འབྲིང་པོ་ཞེས་བརྗོད་པའི་རྒྱུ་མཚན་ཡོད་དེ། དེ་ཉིད་རྟོགས་པ་ཞེས་པའི་དོན་ནི་དེ་ཉིད་རྟོགས་པས་རང་ལམ་གྱི་བྱ་བ་བྱེད་པའམ་བྱས་ཟིན་པ་ལ་བྱེད་པས་ན་དེ་ཉིད་རྟོགས་པ་ཞེས་པའི་སྒྲ་ནི་ཐེག་པ་གསུམ་གའི་མི་སློབ་པའི་གང་ཟག་ལ་འཇུག་པས་ཁྱོད་ལའང་དེ་ཉིད་རྟོགས་པའི་སྒྲ་འཇུག་པ་གང་ཞིག ཁྱོད་བསྐལ་ཆེན་བརྒྱར་བསོད་ནམས་དང་ཡེ་ཤེས་ཀྱི་ཚོགས་ལ་གོམས་པ་བསྲིངས་པས་ཚོགས་གཉིས་ཀྱི་ནུས་པ་ཉན་ཐོས་ལས་བརྒྱ་འགྱུར་དུ་འཕེལ་བའི་ཁྱད་པར་གྱིས། ཉན་ཐོས་ལས་ལྷགཚོགས་གཉིས་རྒྱ་ཆེན་པོ་དང༌། སྙིང་རྗེ་ཁྱད་པར་ཅན་དང༌། རྣམ་པ་ཐམས་ཅད་པ་མཁྱེན་པ་མེད་པས་སངས་རྒྱས་ལས་དམན་པས་ན་འབྲིང་ཞེས་བརྗོད་པའི་ཕྱིར་རོ། །
རང་རྒྱལ་གྱི་དོན།
ཡང་ཐེག་པ་འབྲིང་གི་གང་ཟག་ཆོས་ཅན། ཁྱོད་ལ་རང་སངས་རྒྱས་ཞེས་བརྗོད་པའི་རྒྱུ་མཚན་ཡོད་དེ། རང་སངས་རྒྱས་ཀྱི་སྐད་དོད་པྲ་ཏྱེ་ཀ་བུདྡྷ་ཞེས་པའི་པྲ་ཏི་སོ་སོར་དང༌། ཨེ་ཀ་གཅིག་དང༌། བུདྡྷ་སངས་རྒྱས་ཏེ་རང་ཉིད་སོ་སོར་གཞན་ལ་མ་བརྟེན་པར་གཅིག་པུར་གནས་པ་དང༌། བདག་ཉིད་གཅིག་པུའི་ཆེད་དུ་དེ་ཁོ་ན་ཉིད་ཁོང་དུ་ཆུད་ནས་གོམས་པས་འབྲས་བུ་བྱང་ཆུབའཐོབ་པས་ན་དེ་ལྟར་བརྗོད་པའི་ཕྱིར་རོ། །
ཐུབ་དབང་ལས་དེ་གཉིས་སྐྱེ་ཚུལ་བཤད་པ།
བཞི་པ་ཐུབ་དབང་ལས་དེ་གཉིས་སྐྱེ་ཚུལ་བཤད་པ་ནི།
རྩ་བར། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །
ཞེས་ཉ༷ན་ཐོ༷ས་ས༷ངས་རྒྱ༷ས་འབྲི༷ང་རྣ༷མས་ཆོས་ཅན། ཐུ༷བ་དབ༷ང་ལས་སྐྱེ༷ས་པ་ཡིན་ཏེ། ཐུབ་པའི་དབང་པོའི་གསུང་ལས་སྐྱེས་པ་ཡིན་པའི་ཕྱིར། དེར་ཐལ། ཉན་རང་རྣམས་ཐུབ་པའི་དབང་པོའི་གསུང་གིས་བསྐྲུན་པ་སྟེ་བསྐྱེད་པ་ཡིན་པའི་ཕྱིར། ཁྱབ་སྟེ། ཉན་རང་རྣམས་ཐུབ་དབང་གི་གསུང་གིས་བསྐྱེད་པ་དེ་ཉན་རང་རྣམས་ཐུབ་དབང་གིས་གསུང་ལས་སྐྱེས་པའི་དོན་ཡིན་པའི་ཕྱིར་རོ། །རང་འགྲེལ་ལས། སངས་རྒྱས་ཀྱི་སྒྲ་འདི་སངས་རྒྱས་ཀྱི་དེ་ཉིད་ཉན་ཐོས་དང་རང་སངས་རྒྱས་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་གསུམ་ཆར་ལ་འཇུག་སྟེ། ཞེས་གསུངས་པ་མི་འཐད་པར་ཐལ། སངས་རྒྱས་ཀྱི་སྒྲ་ནི་ཉན་རང་སངས་རྒྱས་གསུམ་ག་ལ་མི་འཇུག་པའི་ཕྱིར། ཞེས་ཟེར་ན་མ་ཁྱབ་སྟེ། འགྲེལ་བར་བུདྡྷའི་དོན་དེ་ཉིད་ཁོང་དུ་ཆུད་པའི་སྒྲ་དེ་གང་ཟག་གསུམ་ལ་འཇུག་པར་བཤད་པ་ཡིན་པའི་ཕྱིར་རོ། །ཐུབ་བསྟན་དགེ་ལེགས་རྒྱ་མཚོའི་འཇུག་ཊཱིཀ་རབ་གསལ་སྣང་རྒྱན་ལས། ཉན་རང་ལ་ཚོགས་མཚན་ཉིད་པ་མེད་དེ། ཉན་རང་གི་མི་སློབ་ལམ་ལ་ཚོགས་གཉིས་ཀྱི་ལག་རྗེས་ཆོས་གཟུགས་ཀྱི་སྐུ་གཉིས་དང་མཚན་དཔེ་མེད་པའི་ཕྱིར། ཁྱབ་སྟེ། བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་ཞེས་པ་ནི་ཚོགས་དེས་རང་གིས་མཐར་ཐུག་གི་སྐུ་གཉིས་འགྲུབ་པར་བྱེད་ནུས་པའི་ངོ་བོའི་སྒོ་ནས་མཐར་ཐུག་གི་སྐུ་གཉིས་འབྲས་བུར་འཛིན་པ་ཁོ་ན་ལ་ཚོགས་ཟེར་བ་ཡིན་པས་ཚོགས་གཉིས་ཀའི་ལག་རྗེས་ལ་མི་སློབ་པའི་ཚེ་སྐུ་གཉིས་དང་མཚན་དཔེ་འགྲུབ་དགོས་པའི་ཕྱིར་ཏེ། ཚོགས་གཉིས་པོ་རེ་རེའི་ལག་རྗེས་ལ་མཐར་ཐུག་གི་སྐུ་གཉིས་ཀ་འགྲུབ་ཀྱང༌། གཙོ་ཆེ་ཆུང་གི་སྒོ་ནས་ཡེ་ཤེས་ཀྱི་ཚོགས་ཀྱི་ལག་རྗེས་ལ་གཙོ་བོར་ཆོས་སྐུ་དང༌། བསོད་ནམས་ཀྱི་ཚོགས་ཀྱི་ལག་རྗེས་ལ་གཙོ་བོར་གཟུགས་སྐུ་འགྲུབ་པའི་ཕྱིར། སློབ་དཔོན་འཕགས་པའི་རིན་ཆེན་འཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་ནི། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་དེ་མདོར་བསྡུས་ན། །རྒྱལ་བོ་ཡེ་ཤེས་ཚོགས་ལས་འཁྲུངས། །དེ་ལྟ་བས་ན་ཚོགས་འདི་གཉིས། །སངས་རྒྱས་ཉིད་ནི་ཐོབ་པའི་རྒྱུ། །ཞེས་སོགས་ནས། ཚོགས་ཀྱི་སྐད་དོད་བྷ་ར་ལ་སཾ་བསྣན་པས། སཾ་ཡང་དག་པར་འགྲུབ་པ་དང༌། བྷ་ངོ་བོས་བྱང་ཆུབ་ཆེནཔོ་དང༌། ར་འཛིན་པར་བྱེད་པའི་དོན་སྟོན་བྱེད་ཡིན་པའི་ཕྱིར་རོ། །ཞེས་གསུངས་པས་སོ། །