གཞལ་བྱ་གཉིས་ཀྱི་ངོ་བོ་ངོས་བཟུང་བ་ལ་སྦྱོར་འགོད་དང་མཐའ་དཔྱད་པ།

༈ དོན་དམ་དོན་བྱེད་ནུས་པ་གང་། །ཞེས་སོགས་རྐང་པ་བཞིའི་སྐབས་སུ་སྦྱོར་བ་འགོད་པ་དང་། མཐའ་དཔྱད་པ་གཉིས། དང་པོ་ནི། དོན་དམ་པར་དོན་བྱེད་ནུས་པ་ཆོས་ཅན། དོན་དམ་དུ་ཡོད་པ་ཡིན་ཏེ། རྟོག་པས་སྒྲོ་མ་བཏགས་པར་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པ་ཡིན་པའི་ཕྱིར། ཁྱབ་སྟེ། དེ་འདྲ་བ་དེ་རང་མཚན་གྱི་མཚན་ཉིད་ཡིན་པའི་ཕྱིར། དོན་བྱེད་མི་ནུས་པའི་ཆོས་ཆོས་ཅན། ཀུན་རྫོབ་ཏུ་ཡོད་པ་ཡིན་ཏེ། རྟོག་པས་སྒྲོ་བཏགས་པའི་ཆོས་ཡིན་པའི་ཕྱིར། ཁྱབ་སྟེ། དེ་འདྲའི་ཆོས་སྤྱི་མཚན་གྱི་མཚན་ཉིད་ཡིན་པའི་ཕྱིར། དེ་ལྟར་ན་སྦྱོར་འགོད་འདི་གཉིས་འཐད་དེ། ཐར་ལམ་གསལ་བྱེད་ལས། གཞུང་འདིས་དོན་དམ་དུ་ཡོད་པ་དང་ཀུན་རྫོབ་ཏུ་ཡོད་པའི་མཚན་གཞི་ངོས་བཟུང་ནས་སྒྲུབ་བྱེད་དོན་གྱིས་འཕངས་པའི་སྒྲུབ་བྱེད་དེ་དག་རང་མཚན་གྱི་མཚན་ཉིད་དང་། སྤྱི་མཚན་གྱི་མཚན་ཉིད་དུ་བཤད་དོ། །ཞེས་གསུངས་པའི་ཕྱིར། །

༈ མཐའ་དཔྱད་པ་ལ། ཁ་ཅིག་ན་རེ། རང་ཉིད་མངོན་སུམ་དུ་རྟོགས་པའི་བློ་དོན་དམ་པས་རྟོགས་པར་བྱ་བ་དེ། དོན་དམ་བདེན་པའི་མཚན་ཉིད་དང་། རང་ཉིད་དོན་སྤྱིའི་ཚུལ་གྱིས་རྟོགས་པའི་བློ་ཀུན་རྫོབ་པའི་རྟོགས་པར་བྱ་བ་དེ། ཀུན་རྫོབ་བདེན་པའི་མཚན་ཉིད་ཟེར་ན། དང་པོ་ལ། འགོག་བདེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། འགོག་བདེན་མངོན་སུམ་དུ་རྟོགས་པའི་བློ་དོན་དམ་པ་ཡོད་པའི་ཕྱིར། དེ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཡོད་པའི་ཕྱིར་ཏེ། བདེན་བཞི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་དེ་ཡོད་པའི་ཕྱིར། དེ་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་དེ་རྣལ་འབྱོར་མངོན་སུམ་ཡིན་པའི་ཕྱིར་ཏེ། རྣལ་འབྱོར་ཤེས་པ་སྔར་བཤད་པ། །ཞེས་སོགས་རྐང་པ་གཉིས་གསུངས་པའི་ཕྱིར། བྱས་པ་ལ་ཁོ་ན་རེ། རྣམ་མཁྱེན་གྱིས་འགོག་བདེན་མངོན་སུམ་དུ་རྟོགས་པར་ཐལ། འགོག་བདེན་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཡོད་པའི་ཕྱིར། འདོད་ན། སྟོན་པས་འགོག་བདེན་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་ན། འཇུག་པའི་ཊཱིཀ་ཆེན་ལས། རིགས་པ་དྲུག་ཅུ་པའི་འགྲེལ་པར། རང་ལུགས་ལ་སྟོན་པས་འགོག་བདེན་མངོན་སུམ་གྱིས་ཤེས་པ་ཞལ་གྱིས་བཞེད་ལ། དངོས་སྨྲ་བ་མངོན་སུམ་ཚད་མ་དངོས་པོ་རང་མཚན་གྱི་ཡུལ་ཅན་དུ་འདོད་པ་དེ་ལ་དེ་མི་རུང་བ་དང་། ཞེས་གསུངས་པ་མི་འཐད་པར་ཐལ། འདོད་པའི་ཕྱིར་ཟེར་ན་མ་ཁྱབ་སྟེ། སྟོན་པས་འགོག་བདེན་དངོས་སུ་མ་རྟོགས་པ་དེ། ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། སྟོན་པས་འགོག་བདེན་མངོན་སུམ་དུ་རྟོགས་པར་ཐལ། རྣལ་འབྱོར་མངོན་སུམ་གྱིས་དེ་མངོན་སུམ་དུ་རྟོགས་པའི་ཕྱིར་ཏེ། དེ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཡོད་པའི་ཕྱིར་ཏེ། གང་ཟག་གི་བདག་མེད་རྟོགས་པའི་དེ་ཡོད་པའི་ཕྱིར་ཏེ། དེ་འདྲའི་རྣལ་འབྱོར་མངོན་སུམ་གྱི་གཟུང་ཡུལ་དུ་གྱུར་པའི་རང་མཚན་ཡོད་ལ། དེས་གང་ཟག་གི་བདག་མེད་གཟུང་ཡུལ་དུ་མི་བྱེད་པའི་ཁྱད་པར་འཐད་པའི་ཕྱིར། རྣམ་ངེས་ཊཱིཀ་ཆེན་ལས། རྣལ་འབྱོར་མངོན་སུམ་འདིའི་གཟུང་ངོར་དགག་གཞི་རང་མཚན་འབའ་ཞིག་སྣང་བ་ཡིན་གྱི། གང་ཟག་གི་བདག་བཀག་པའི་མེད་དགག་གཟུང་ངོར་ཁས་ལེན་པ་ནི་མ་ཡིན་ནོ། །ཞེས་གསུངས་པའི་ཕྱིར། མཚན་ཉིད་གཉིས་པ་ལ། བུམ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། བུམ་འཛིན་རྟོག་པས་རྟོགས་པར་བྱ་བ་གང་ཞིག །དེ་བློ་ཀུན་རྫོབ་པ་ཡིན་པའི་ཕྱིར། ཕྱི་མ་དེར་ཐལ། ལྟོ་ལྡིར་བ་ལ་དམིགས་ནས་འདི་ནི་བུམ་པའོ་སྙམ་དུ་འཛིན་པའི་རྟོག་པ་དེ་བློ་ཀུན་རྫོབ་པ་ཡིན་པའི་ཕྱིར་ཏེ། ཚད་མ་མདོ་ལས། འཁྲུལ་དང་ཀུན་རྫོབ་ཤེས་པ་དང་། །ཞེས་གསུངས་པའི་ཕྱིར། ཁ་ཅིག་ན་རེ། དོན་དམ་པར་དོན་བྱེད་ནུས་པ་རང་མཚན་གྱི་མཚན་ཉིད་དང་། དེ་ལྟར་མི་ནུས་པའི་ཆོས་སྤྱི་མཚན་གྱི་མཚན་ཉིད་ཟེར་ན། རང་མཚན་ཚད་མས་ངེས་པའི་གང་ཟག་ཡིན་ན། རང་མཚན་དོན་དམ་པར་དོན་བྱེད་ནུས་པར་ཚད་མས་ངེས་པའི་གང་ཟག་ཡིན་དགོས་པར་ཐལ། མཚན་ཉིད་དང་པོ་དེའི་ཕྱིར། འདོད་ན། སེམས་ཙམ་པ་ཆོས་ཅན། དེར་ཐལ། དེའི་ཕྱིར། གཞན་དབང་རང་མཚན་དུ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། དེ་རང་གི་མཚན་ཉིད་ཀྱིས་གྲུབ་པར་ཚད་མས་ངེས་པའི་གང་ཟག་ཡིན་པའི་ཕྱིར། རྟགས་གྲུབ་སྟེ། མདོ་སྡེ་རྒྱན་གྱི་ཆེད་དུ་བྱ་བའི་གདུལ་བྱར་གྱུར་པའི་སེམས་ཙམ་པ་དེས། གཞན་དབང་རང་མཚན་དུ་ཚད་མས་ངེས་པའི་ཕྱིར་ཏེ། དེ་འདྲའི་སེམས་ཙམ་པ་ཡོད་པའི་ཕྱིར་ཏེ། དེ་སེམས་ཙམ་པའི་ཐུན་མོང་མ་ཡིན་པའི་བསྟན་བཅོས་ཡིན་པའི་ཕྱིར། འདོད་མི་ནུས་ཏེ། སེམས་ཙམ་པས་དོན་བྱེད་མི་ནུས་པ་དང་། རང་མཚན་གྱི་གཞི་མཐུན་ཁས་ལེན་པའི་ཕྱིར་ཏེ། དེས་སྟོང་ཉིད་དེ་འདྲ་བའི་གཞི་མཐུན་དུ་ཁས་ལེན་པའི་ཕྱིར། གཞན་ཡང་། དོན་དམ་པར་ཞེས་སོགས་ཆོས་ཅན། རང་རྒྱུད་པསཁྱོད་ཁས་ལེན་པར་ཐལ། ཁྱོད་རང་མཚན་གྱི་མཚན་ཉིད་གང་ཞིག །དེས་དེའི་མཚན་ཉིད་ཁས་ལེན་པའི་ཕྱིར། འདོད་མི་ནུས་ཏེ། རང་རྒྱུད་པས་བདེན་གྲུབ་ཁས་མི་ལེན་པའི་ཕྱིར། གཞན་ཡང་། སྤྱི་མཚན་ཚད་མས་ངེས་པའི་གང་ཟག་ཡིན་ན། སྤྱི་མཚན་མཚན་ཉིད་དེར་ཚད་མས་ངེས་པའི་གང་ཟག་ཡིན་དགོས་པར་ཐལ། མཚན་ཉིད་གཉིས་པ་འཐད་པའི་ཕྱིར། འདོད་ན། སྤྱི་མཚན་ཚད་མས་ངེས་པའི་གང་ཟག་ཡིན་ན། དེ་དོན་བྱེད་མི་ནུས་པར་ཚད་མས་ངེས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། སྤྱི་མཚན་དོན་བྱེད་མི་ནུས་པར་སྒྲུབ་པའི་རྟགས་ཡང་དག་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། སྤྱི་མཚན་དངོས་མེད་དུ་སྒྲུབ་པའི་རྟགས་ཡང་དག་ཡོད་པའི་ཕྱིར་ཏེ། དེ་ལྟར་སྒྲུབ་པའི་རིགས་པ་ཡང་དག་ཡོད་པའི་ཕྱིར་ཏེ། བརྗོད་བྱ་ཉིད་ཕྱིར་དེ་དངོས་མིན། །ཞེས་པ་ནས། དེ་ནི་དངོས་མེད་མཚན་ཉིད་ཡིན། །ཞེས་པའི་བར་གྱིས་སྤྱི་མཚན་དངོས་མེད་དུ་སྒྲུབ་པའི་རིགས་པ་བརྒྱད་བསྟན་པའི་ཕྱིར། མཚན་ཉིད་དེ་ལ་སྐྱོན་འཕེན་པ་ཁ་ཅིག་ན་རེ། དོན་དམ་པར་དོན་བྱེད་ནུས་པའི་ཁྱད་ཆོས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། དེའི་ཁྱད་ཆོས་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། དེའི་ལྡོག་པ་ཁྱོད་ཀྱི་ཁྱད་ཆོས་ཡིན་པའི་ཕྱིར། བྱས་པ་ལ་ཁོ་ན་རེ། རང་མཚན་ཡིན་ན། དོན་བྱེད་ནུས་པའི་ཆོས་ཡིན་དགོས་པར་ཐལ། དེ་ཡིན་ན། མཚན་ཉིད་དེ་ཡིན་དགོས་པའི་ཕྱིར། འདོད་ན། དངོས་པོ་ཡིན་ན། དོན་བྱེད་ནུས་པའི་དངོས་པོ་ཡིན་དགོས་པར་ཐལ་ལོ། །འདོད་ན། དོན་བྱེད་ནུས་པའི་འབྲས་བུ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། དོན་བྱེད་ནུས་པ་དང་རྫས་གཅིག་ཏུ་ཐལ། འདོད་པའི་ཕྱིར་ན་མ་ཁྱབ། གཞན་ཡང་། ཁོ་ན་རེ། ཤེས་པ་ཡིན་ན། ཤེས་པའི་དངོས་པོ་ཡིན་དགོས་པར་ཐལ། དངོས་པོ་ལ་དེའི་ཕྱིར། འདོད་ན། ཤེས་པ་ཡིན་ན། ཤེས་པའི་རྫས་ཡིན་དགོས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། ཤེས་པའི་ཉེར་ལེན་དུ་གྱུར་པའི་ཤེས་པ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། ཤེས་པའི་རྫས་ཡིན་པར་ཐལ་ལོ། །འདོད་ན། ཤེས་པ་དང་རྫས་གཅིག་ཏུ་ཐལ་ལོ། །ཁ་ཅིག་ན་རེ། མཐར་ཐུག་དཔྱོད་པའི་རིག་ཤེས་ཚད་མའི་རྙེད་དོན་གྱི་གཙོ་བོ་དེ། དོན་དམ་བདེན་པའི་མཚན་ཉིད་ཟེར་ན། བུམ་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། དངོས་པོ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། གནས་ལུགས་མཐར་ཐུག་ཏུ་ཐལ་ལོ། །བྱས་པ་ལ་ཁོ་ན་རེ། བུམ་པ་དེ་མཐར་ཐུག་དཔྱོད་པའི་དེ་ཡིན་པར་ཐལ། དེ་དོན་དམ་དཔྱོད་པའི་རིག་ཤེས་ཚད་མའི་རྙེད་དོན་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། མངོན་སུམ་གྱི་ཚད་མའི་རྙེད་དོན་གང་ཞིག །མངོན་སུམ་གྱི་ཚད་མ་ཡིན་ན། དོན་དམ་དཔྱོད་བྱེད་ཀྱི་ཚད་མ་ཡིན་དགོས་པའི་ཕྱིར། ཕྱི་མ་དེར་ཐལ། དེ་ཡིན་ན་རང་གི་འཛིན་སྟངས་ཀྱི་ཡུལ་དུ་གྱུར་པའི་དོན་དམ་བདེན་པ་དཔྱོད་པའི་ཚད་མ་ཡིན་དགོས་པའི་ཕྱིར་ཟེར་ན། ཁོ་རང་ལ། ཐ་སྙད་པའི་ཚད་མ་ཡིན་ན། ཀུན་རྫོབ་དཔྱོད་བྱེད་ཀྱི་ཚད་མ་ཡིན་དགོས་པར་ཐལ། དོན་དམ་དཔྱོད་བྱེད་ཀྱི་ཚད་མ་ཡིན་ན། མཐར་ཐུག་དཔྱོད་པའི་ཚད་མ་ཡིན་དགོས་པའི་ཕྱིར། འདོད་ན། བུམ་པ་རྟོགས་པའི་རྗེས་དཔག་ཆོས་ཅན། དེར་ཐལ། དེའི་ཕྱིར། རྗེས་སུ་དཔག་པའི་ཚད་མ་ཡིན་པའི་ཕྱིར། འདོད་མི་ནུས་ཏེ། དེ་དོན་དམ་དཔྱོད་བྱེད་ཀྱི་ཚད་མ་ཡིན་པའི་ཕྱིར་ཏེ། བུམ་པ་དོན་དམ་བདེན་པ་ཡིན་པའི་ཕྱིར། ཁ་ཅིག་ན་རེ། དོན་དམ་དཔྱོད་བྱེད་ཀྱི་ཚད་མ་དང་། ཐ་སྙད་དཔྱོད་བྱེད་ཀྱི་ཚད་མ་འགལ་ཟེར་ན། དེ་མི་འཐད་དེ། རྣམ་མཁྱེན་དེ་དེ་གཉིས་ཀ་ཡིན་པའི་ཕྱིར། དེ་དེ་གཉིས་དཔྱོད་བྱེད་ཀྱི་རྣམ་མཁྱེན་ཡིན་པའི་ཕྱིར་ཏེ། དེ་ཇི་ལྟ་བ་མཁྱེན་པའི་རྣམ་མཁྱེན་དང་། ཇི་སྙེད་པ་མཁྱེན་པའི་རྣམ་མཁྱེན་གཉིས་ཀ་ཡིན་པའི་ཕྱིར། ཁ་ཅིག་ན་རེ། དོན་དམ་དཔྱོད་བྱེད་ཀྱི་ཚད་མའི་རྙེད་དོན། དོན་དམ་བདེན་པའི་མཚན་ཉིད་དང་། ཀུན་རྫོབ་དཔྱོད་བྱེད་ཀྱི་ཚད་མའི་རྙེད་དོན། ཀུན་རྫོབ་བདེན་པའི་མཚན་ཉིད་ཟེར་ན། ཤེས་བྱ་ཆོས་ཅན། མཚོན་བྱ་དང་པོ་དེར་ཐལ། མཚན་ཉིད་དེའི་ཕྱིར། མངོན་སུམ་གྱི་ཚད་མའི་རྙེད་དོན་ཡིན་པའི་ཕྱིར། ཁ་ཅིག་ན་རེ། དོན་དམ་པའི་ཚད་མའི་རྙེད་དོན། དང་པོའི་མཚན་ཉིད་དང་། ཀུན་རྫོབ་པའི་ཚད་མའི་རྙེད་དོན། གཉིས་པའི་མཚན་ཉིད་ཟེར་ན། དང་པོ་ལ་ཤེས་བྱ་ཆོས་ཅན། མཚོན་བྱ་དང་པོ་ལ་དེར་ཐལ། མཚན་ཉིད་དེའི་ཕྱིར་ཏེ། མངོན་སུམ་གྱི་ཚད་མའི་རྙེད་དོན་ཡིན་པའི་ཕྱིར། གཉིས་པ་ལ། བུམ་པ་ཆོས་ཅན། མཚོན་བྱ་གཉིས་པ་དེར་ཐལ། མཚན་ཉིད་དེའི་ཕྱིར་ཏེ། བུམ་པ་རྟོགས་པའི་རྗེས་དཔག་གི་རྙེད་དོན་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཁྱོད་རྟོགས་པའི་རྗེས་དཔག་གི་དེར་ཐལ། གཞི་གྲུབ་པའི་ཕྱིར། ཁ་ཅིག་ན་རེ། དོན་དམ་པའི་ཚད་མའི་སྣང་ཡུལ། དང་པོའི་མཚན་ཉིད། ཀུན་རྫོབ་པའི་ཚད་མའི་སྣང་ཡུལ་གཉིས་པའི་མཚན་ཉིད་ཟེར་ན། མངོན་སུམ་གྱི་ཚད་མའི་སྣང་ཡུལ་དེ་མཚན་ཉིད་དུ་ཐལ། དང་པོ་དེ་འཐད་པའི་ཕྱིར། འདོད་ན། ཚད་མའི་སྣང་ཡུལ་མཚན་ཉིད་དུ་ཐལ། འདོད་པའི་ཕྱིར། འདོད་ན། དེའི་ཡུལ་མཚན་ཉིད་དུ་ཐལ་ལོ། །འདོད་ན། བློའི་ཡུལ་མཚན་ཉིད་དུ་ཐལ་ལོ། །འདོད་ན། ཡུལ་མཚན་ཉིད་དུ་ཐལ་ལོ། འདོད་མི་ནུས་ཏེ། བློས་རིག་པར་བྱ་བ་ཡུལ་གྱི་མཚན་ཉིད་ཡིན་པའི་ཕྱིར་ཏེ། རིགས་གཏེར་ལས། ཡུལ་གྱི་མཚན་ཉིད་བློས་རིག་བྱ། །ཞེས་གསུངས་པའི་ཕྱིར། ཁ་ཅིག་ན་རེ། དོན་དམ་པའི་ཚད་མའི་སྣང་ཡུལ་དུ་གྱུར་པའི་སྒོ་ནས་དོན་དམ་པའི་ཚད་མའི་རྙེད་དོན། དང་པོའི་མཚན་ཉིད། ཀུན་རྫོབ་པའི་ཞེས་སོགས། གཉིས་པའི་མཚན་ཉིད་ཡིན་ཟེར་བ་དང་། དོན་དམ་པའི་ཚད་མས་སྣང་བའི་དབང་གིས་ཡོད་པར་བཞག་པ། དོན་དམ་དུ་ཡོད་པའི་མཚན་ཉིད། ཀུན་རྫོབ་པའི་མཚན་མ་ལ་ཞེས་སོགས་ཀུན་རྫོབ་ཏུ་ཡོད་པའི་མཚན་ཉིད་ཟེར་ན། བུམ་པ་ཆོས་ཅན། མཚོན་བྱ་ཕྱི་མ་དེར་ཐལ། མཚན་ཉིད་དེའི་ཕྱིར། དེར་ཐལ། རྗེས་སུ་དཔག་པའི་ཚད་མ་ལ་སྣང་བའི་དབང་གིས་ཡོད་པར་བཞག་པ་ཡིན་པའི་ཕྱིར་ཏེ། དེ་ལ་སྣང་བའི་དབང་གིས་བློའི་ཡུལ་དུ་བཞག་པ་ཡིན་པའི་ཕྱིར་ཏེ། དེ་ལ་སྣང་བའི་དབང་གིས་རྗེས་དཔག་གི་ཡུལ་དུ་བཞག་པ་ཡིན་པའི་ཕྱིར། རྩ་བར་འདོད་མི་ནུས་ཏེ། དོན་དམ་དུ་ཡོད་པ་ཡིན་པའི་ཕྱིར། གཞན་ཡང་། མངོན་སུམ་གྱི་ཚད་མ་ལ་སྣང་བའི་དབང་གིས་བཞག་པ་དང་། རྗེས་དཔག་གི་ཚད་མ་ལ་སྣང་བའི་དབང་གིས་བཞག་པ་གཉིས་འགལ་བར་ཐལ། ཀུན་རྫོབ་པའི་ཚད་མས་སྣང་བའི་དབང་གིས་བཞག་པ་སོགས་ལ་དེའི་ཕྱིར་ཏེ། མཚན་ཉིད་ཕྱི་མ་གཉིས་འཐད་པའི་ཕྱིར། འདོད་ན། རྗེས་སུ་དཔག་པའི་ཚད་མ་ལ་སྣང་བ་དང་། གཅིག་ཤོས་ལ་སྣང་བ་དེ་གཉིས་འགལ་བར་ཐལ་ལོ། །འདོད་མི་ནུས་ཏེ། གཞི་གྲུབ་ན། རྗེས་སུ་དཔག་པའི་ཚད་མ་ལ་སྣང་དགོས་པའི་ཕྱིར། བྱས་པ་ལ་ཁོ་ན་རེ། བུམ་པ་ཆོས་ཅན། རྟོག་པ་ལ་སྣང་བའི་དབང་གིས་ཡོད་པར་བཞག་པར་ཐལ། རྗེས་དཔག་ལ་དེའི་ཕྱིར། འདོད་ན། རྟོག་པའི་དབང་གིས་བཞག་པར་ཐལ། འདོད་པའི་ཕྱིར་ན་མ་ཁྱབ། འདོད་ན། རྟོག་པས་སྒྲོ་བཏགས་སུ་ཐལ་ལོ། །ཁ་ཅིག་ན་རེ། ཀུན་རྫོབ་པའི་ཚད་མའི་ཡུལ་ཡིན་ན། ཀུན་རྫོབ་ཏུ་ཡོད་པས་ཁྱབ་ཟེར་ན། བུམ་པ་ཆོས་ཅན། དེར་ཐལ། དེའི་ཕྱིར་ཏེ། རྗེས་སུ་དཔག་པའི་ཚད་མའི་ཡུལ་ཡིན་པའི་ཕྱིར། འདོད་མི་ནུས་ཏེ། དོན་དམ་དུ་ཡོད་པའི་ཕྱིར། བྱས་པ་ལ་ཁོ་ན་རེ། བུམ་པ་ཆོས་ཅན། ཀུན་རྫོབ་ཏུ་ཡོད་པར་ཐལ། ཐ་སྙད་དུ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། འཇིག་རྟེན་གྱི་ཐ་སྙད་དུ་ཡོད་པའི་ཕྱིར་ཏེ། འཇིག་རྟེན་གྱི་ཐ་སྙད་དུ་བུམ་པ་གྲགས་པའི་ཕྱིར། སངས་འཕགས་ཀྱིས་བུམ་པ་ཀུན་རྫོབ་ཏུ་ཁས་བླངས་པར་ཐལ། དེ་དེར་ཡོད་པའི་ཕྱིར། འདོད་ན། དེ་དེས་རྫུན་པར་ཁས་བླངས་པར་ཐལ་ལོ། །གཞན་ཡང་། དེས་བུམ་པ་བདེན་རྫུན་གཉིས་ཀར་ཁས་བླངས་པར་ཐལ། དེ་དེས་བདེན་པར་ཁས་བླངས། གཅིག་ཤོས་ཀྱང་ཁས་བླངས་པའི་ཕྱིར། འདོད་ན། དེ་དེ་གཉིས་ཀ་ཡིན་པར་ཐལ་ལོ། །བྱས་པ་ལ་ཁོ་ན་རེ། སངས་འཕགས་ཀྱིས་བུམ་པ་དོན་དམ་པར་ཁས་བླངས་པར་ཐལ། དེས་དེ་བདེན་པར་ཁས་བླངས་པའི་ཕྱིར་ན་མ་ཁྱབ། འདོད་ན། དེས་བུམ་པ་དོན་དམ་པར་ཁས་བླངས་པའི་ཁས་བླངས་ཡོད་པར་ཐལ་ལོ། །འདོད་ན། དེས་དེར་བརྗོད་པའི་ངག་ཡོད་པར་ཐལ་ལོ། །འདོད་ན། དོན་དམ་པར་རྗོད་བྱེད་སྒྲའི་བརྗོད་བྱ་ཡོད་པར་ཐལ་ལོ། །གཞན་ཡང་། ཁོ་ན་རེ། དོན་དམ་བདེན་པ་ཡིན་ན། བདེན་པ་ཡིན་དགོས་པར་ཐལ། ཀུན་རྫོབ་ཏུ་ཡོད་ན། ཀུན་རྫོབ་ཙམ་དུ་ཡོད་དགོས་པའི་ཕྱིར། འདོད་ན། མེ་ལོང་ནང་གི་བྱད་བཞིན་གྱི་གཟུགས་བརྙན་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། སྣང་བ་ལྟར་དུ་གྲུབ་པར་ཐལ། འདོད་པའི་ཕྱིར་ན་མ་ཁྱབ། འདོད་ན། བྱད་བཞིན་གྱི་གཟུགས་བརྙན་བྱད་བཞིན་དུ་ཐལ། འདོད་པ་གང་ཞིག །བརྡ་ལ་མ་བྱང་པའི་སྐྱེས་བུའི་མིག་ཤེས་ལ་དེའི་གཟུགས་བརྙན་དེར་སྣང་བའི་ཕྱིར་ཟེར་ན། ཁོ་རང་ལ། དེའི་གཟུགས་བརྙན་ཆོས་ཅན། བདེན་པ་ཡིན་པར་ཐལ། བདེན་པར་གྲུབ་པའི་ཕྱིར་ཏེ། གཞན་དབང་ཡིན་པའི་ཕྱིར། གཞན་ཡང་། དེ་ཆོས་ཅན། བདེན་པ་ཡིན་པར་ཐལ། བདེན་རྫུན་གང་རུང་གང་ཞིག །གཅིག་ཤོས་མ་ཡིན་པའི་ཕྱིར། དང་པོ་གྲུབ་སྟེ། བདེན་པ་གཉིས་པོ་གང་རུང་ཡིན་པའི་ཕྱིར། ཁ་ཅིག་ན་རེ། རྟོག་པས་སྒྲོ་མ་བཏགས་པར་ཡུལ་རང་ངོས་ནས་གྲུབ་པ་དེ། རང་མཚན་གྱི་མཚན་ཉིད། རང་འཛིན་རྟོག་པས་སྒྲོ་བཏགས་སྤྱི་མཚན་གྱི་མཚན་ཉིད་ཟེར་ན། དང་པོ་ལ། རི་བོང་གི་རྭ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟོག་པས་སྒྲོ་མ་བཏགས་པར་ཚད་མའི་ཡུལ་རང་ངོས་ནས་གྲུབ་པའི་ཕྱིར་ཏེ། དེས་སྒྲོ་མ་བཏགས་པ་གང་ཞིག །དེའི་དེར་གྲུབ་པའི་ཕྱིར། གཉིས་པ་ལ་རི་བོང་གི་རྭ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། རང་འཛིན་རྟོག་པའི་ཞེན་ཡུལ་ཡིན་པའི་ཕྱིར། མཚན་ཉིད་གཉིས་པ་ལ་སྐྱོན་འཕེན་པ་ཁ་ཅིག་ན་རེ། ཤེས་བྱ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། རང་འཛིན་རྟོག་པ་ཁྱོད་ལ་སྒྲོ་འདོགས་ཀྱི་བློ་ཡིན་པར་ཐལ། འདོད་པའི་ཕྱིར་ན་མ་ཁྱབ། འདོད་ན། རང་འཛིན་རྟོག་པ་ལོག་ཤེས་སུ་ཐལ་ལོ། །

༈ གཞུང་འདི་གྲུབ་མཐའ་སྨྲ་བ་གང་གི་དབང་དུ་བྱས་པ་ལ། ཁོ་ན་རེ། དོན་དམ་དོན་བྱེད་ནུས་པ་ཞེས་སོགས་ཀྱི་གཞུང་འདི། མདོ་སེམས་ཐུན་མོང་པའི་གཞུང་ཡིན་ཟེར་ན། དེ་མ་ཡིན་པར་ཐལ། དེ་དེ་གཉིས་ཀྱི་ནང་ནས། མདོ་སྡེ་པའི་ཐུན་མོང་མ་ཡིན་པའི་རང་གཞུང་རྣམ་དག་ཡིན་པའི་ཕྱིར་ཏེ། འདིས་བུམ་པ་དོན་དམ་བདེན་པའི་མཚན་གཞི་དང་། བུམ་པའི་དོན་སྤྱི་ཀུན་རྫོབ་བདེན་པའི་མཚན་གཞིར་བསྟན་བྱའི་གཙོ་བོར་བྱས་ནས་བསྟན་པ་གང་ཞིག །སེམས་ཙམ་པས་བུམ་པ་དོན་དམ་བདེན་པར་ཁས་མི་ལེན་པའི་ཕྱིར། གཞན་ཡང་། གཞུང་འདིས་དོན་དམ་བདེན་པའི་མཚན་གཞི་དང་། གཅིག་ཤོས་ཀྱི་མཚན་གཞི་བསྟན་བྱའི་གཙོ་བོར་བྱས་ནས་བསྟན་པའི་ཕྱིར་ཏེ། ཐར་ལམ་གསལ་བྱེད་ལས། གཙོ་བོར་དོན་དམ་བདེན་པའི་མཚན་གཞི་ངོས་འཛིན་པ་ཡིན་ཏེ། རྒྱན་འགྲེལ་དུ། ཞར་ལ་ཐེག་པ་ཐ་ཤལ་གྱི་བདེན་པ་གཉིས་ཀྱི་རྣམ་པར་བཞག་པ་བསྟན་པའི་ཕྱིར། ཞེས་གསུངས་པ་ཡང་། བདེན་གཉིས་ཀྱི་མཚན་གཞི་ངོས་འཛིན་དུ་གསལ་ཏེ། ཞེས་གསུངས་པའི་ཕྱིར། གཞན་ཡང་། བསྟན་བཅོས་འདི་མདོ་སེམས་ཐུན་མོང་བའི་བསྟན་བཅོས་སུ་ཐལ། གཞུང་འདི་དེ་ཡིན་པའི་ཕྱིར། འདོད་ན། འདི་སེམས་ཙམ་པའི་བསྟན་བཅོས་སུ་ཐལ། འདོད་པའི་ཕྱིར། འདོད་ན། བསྟན་བཅོས་འདིའི་ལྟ་བ་མཐར་ཐུག་སེམས་ཙམ་པ་ལ་སྐྱེལ་རིགས་པར་ཐལ། འདོད་པའི་ཕྱིར། འདོད་ན། དེའི་ལྟ་བ་མཐར་ཐུག་པ་དེ། དེ་ཕྱིར་གཉིས་སྟོང་གང་ཡིན་པ། །ཞེས་སོགས་ཀྱི་གཞུང་གི་སྐབས་ནས་བསྟན་པའི་ལྟ་བ་ལ་སྐྱེལ་རིགས་པར་ཐལ་ལོ། །འདོད་ན། གཟུགས་དང་གཟུགས་འཛིན་ཚད་མ་རྫས་གཞན་གྱིས་སྟོང་པར་རྟོགས་པའི་ལྟ་བ་དེ་བསྟན་བཅོས་འདིའི་སྐབས་ནས་བསྟན་པའི་ལྟ་བ་མཐར་ཐུག་ཡིན་པར་ཐལ་ལོ། །འདོད་ན། དེ་དང་དེ་འཛིན་པའི་ཚད་མ་རྫས་གཞན་མ་ཡིན་པར་ཐལ་ལོ། །བྱས་པ་ལ་ཁོ་ན་རེ། གཞུང་འདི་མདོ་སེམས་ཐུན་མོང་བའི་གཞུང་དུ་ཐལ། དེ་དེ་ཐུན་མོང་བ་ལ་སྦྱོར་རིགས་པའི་ཕྱིར་ཏེ། ཐར་ལམ་གསལ་བྱེད་ལས། དངོས་བསྟན་གྱི་དབང་དུ་བྱས་ན། མདོ་སེམས་གཉིས་ཀའི་ཐུན་མོང་བའི་དབང་དུ་བྱས་པར་བཤད་དེ། དོན་བྱེད་ནུས་པ་དོན་དམ་དུ་ཡོད་པའི་མཚན་གཞི་དང་། དོན་བྱེད་མི་ནུས་པ་ཀུན་རྫོབ་ཏུ་ཡོད་པའི་མཚན་གཞིར་དངོས་སུ་བསྟན་ལ། ཚུལ་དེ་དེ་གཉིས་ཀས་ཐུན་མོང་དུ་བཞེད་པའི་ཕྱིར། ཞེས་གསུངས་པའི་ཕྱིར་ན་མ་ཁྱབ་སྟེ། གཞུང་འདིས་དོན་བྱེད་ནུས་པ་དོན་དམ་དུ་ཡོད་པའི་མཚན་གཞི་དང་། དོན་བྱེད་མི་ནུས་པའི་ཆོས་ཀུན་རྫོབ་ཏུ་ཡོད་པའི་མཚན་གཞིར་དངོས་སུ་བསྟན་ཅིང་། དེ་ལྟར་བསྟན་པ་དེ་མདོ་སེམས་གཉིས་ཀས་ཁས་ལེན་པ་དེའི་དོན་ཡིན་པའི་ཕྱིར། ཁ་ཅིག་ན་རེ། གཞུང་འདི་དེ་ཐུན་མོང་བའི་གཞུང་དུ་ཐལ། ཐར་ལམ་གསལ་བྱེད་ལས། གཏན་ལ་དབབ་བྱའི་གཙོ་བོ་ནི། སྔར་བཤད་པ་ལྟར་དངོས་པོ་དོན་དམ་དུ་གྲུབ་མ་གྲུབ་འབའ་ཞིག་གཏན་ལ་འབེབས་པ་ཡིན་པས་མདོ་སེམས་གཉིས་ཀའི་ཐུན་མོང་བའོ། །ཞེས་གསུངས་པའི་ཕྱིར་ན་མ་ཁྱབ་སྟེ། གཞུང་འདིས་དངོས་པོ་ལ་བདེན་གྲུབ་ཀྱི་ཁྱབ་པ་བསྟན་བྱའི་གཙོ་བོར་བྱས་ནས་བསྟན་ཅིང་། མདོ་སེམས་གཉིས་ཀས་དེ་འདྲའི་ཁྱབ་པ་ཁས་ལེན་པ་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། མངོན་སུམ་རྟོག་དང་བྲལ་བ་ནི། །ཞེས་སོགས་ཀྱི་གཞུང་འདི་མདོ་སེམས་ཐུན་མོང་བའི་གཞུང་དུ་ཐལ། འདིས་མངོན་སུམ་ལ་རྟོག་བྲལ་གྱིས་ཁྱབ་པ་བསྟན་བྱའི་གཙོ་བོར་བྱས་ནས་བསྟན་པ་གང་ཞིག །དེ་གཉིས་ཀས་དེ་འདྲའི་ཁྱབ་པ་ཁས་ལེན་པའི་ཕྱིར། འདོད་ན། མངོན་སུམ་རྟོག་དང་བྲལ་བ་ནི། ཞེས་པ་ནས། བརྟེན་ནས་མིག་བློ་སྐྱེ་བར་འགྱུར། །ཞེས་པའི་བར་གྱི་གཞུང་འདི་ཡང་དེ་ཐུན་མོང་བའི་གཞུང་དུ་ཐལ། འདོད་པའི་ཕྱིར། འདོད་མི་ནུས་ཏེ། སྐབས་འདིར་གཟུང་དོན་ཅན་གྱི་དབང་མངོན་བསྟན་བྱས་གཙོ་བོ་བྱས་ནས་བསྟན་པ་གང་ཞིག །སེམས་ཙམ་པས་དེ་འདྲའི་དབང་མངོན་ཁས་མི་ལེན་པའི་ཕྱིར། ཁྱབ་སྟེ། འཐད་ལྡན་ལས། རབ་ཏུ་བྱེད་པ་ཅུང་ཟད་བཤད་པ་འདི་ཐམས་ཅད་རྣམ་པར་རིགས་པ་སྨྲ་བའི་ལུགས་ལ་སྦྱར་བར་བྱ་བ་མ་ཡིན་ཏེ། དོན་གྱི་མཐུ་ལས་ཡང་དག་སྐྱེ་བ་ཉིད་ཀྱི་ཕྱིར་རོ། །ཞེས་གསུངས་པའི་ཕྱིར། གཞན་ཡང་། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་གཞུང་འདི་ཡང་མདོ་སེམས་ཐུན་མོང་བའི་དེར་ཐལ། དོན་དམ་དོན་བྱེད་ཅེས་སོགས་དེ་ཡིན་པའི་ཕྱིར། འདོད་ན། དོན་བྱེད་ནུས་དང་མི་ནུས་ཕྱིར། །ཞེས་པའི་གཞུང་འདི་ཡང་དེར་ཐལ། འདོད་པ་གང་ཞིག །གཞུང་འདི། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་རྟགས་བསྒྲུབ་འཆད་བྱེད་ཀྱི་གཞུང་ཡིན་པའི་ཕྱིར། འདོད་ན། དེ་སེམས་ཙམ་པའི་གཞུང་དུ་ཐལ་ལོ། །འདོད་ན། སེམས་ཙམ་པས་གཞལ་བྱ་ལ་དོན་བྱེད་ནུས་པ་དང་མི་ནུས་པའི་ཆོས་གཉིས་སུ་གྲངས་ངེས་པའི་རྟགས་ལས། གཞལ་བྱ་ལ་རང་སྤྱི་གཉིས་སུ་གྲངས་ངེས་པར་སྒྲུབ་ནུས་པར་ཁས་ལེན་པར་ཐལ་ལོ། །འདོད་ན། དེས་དོན་བྱེད་མི་ནུས་པའི་ཆོས་ཡིན་ན། སྤྱི་མཚན་ཡིན་པས་ཁྱབ་པ་ཁས་ལེན་པར་ཐལ་ལོ། །འདོད་མི་ནུས་ཏེ། དེས་དོན་བྱེད་མི་ནུས་པའི་ཆོས་དང་། དོན་དམ་དུ་ཡོད་པའི་གཞི་མཐུན་ཁས་ལེན་པའི་ཕྱིར། གཞན་ཡང་། གཞན་ནི་ཀུན་རྫོབ་ཡོད་པ་སྟེ། །ཞེས་པའི་གཞུང་འདི་སེམས་ཙམ་པའི་གཞུང་དུ་ཐལ། དོན་དམ་ཞེས་སོགས་དེའི་ཕྱིར། འདོད་ན། སེམས་ཙམ་པས་དོན་བྱེད་མི་ནུས་པའི་ཆོས་ཡིན་ན། ཀུན་རྫོབ་ཏུ་ཡོད་པས་ཁྱབ་པ་ཁས་ལེན་པར་ཐལ་ལོ། །འདོད་མི་ནུས་ཏེ། དེས་དེ་ལྟར་མི་ནུས་པའི་ཆོས་དང་། དོན་དམ་དུ་ཡོད་པའི་གཞི་མཐུན་ཁས་ལེན་པའི་ཕྱིར་ཏེ། དེས་སྟོང་ཉིད་དེ་འདྲའི་གཞི་མཐུན་དུ་ཁས་ལེན་པའི་ཕྱིར། །