རྒྱུན་གྱི་བསང་མཆོད་འདུད་རྩིའི་སྤྲིན་ཆར།

༄༅། །རྒྱུན་གྱི་བསང་མཆོད་འདུད་རྩིའི་སྤྲིན་ཆར་བཞུགས། ན་མོ་པདྨཱ་ཀ་ར་ཡེ། འདིར་རྒྱུན་བསང་མདོར་བསྡུས་སུ་བྱ་བར་སྤྲོ་ན། སྐྱབས་སེམས་སྔོན་དུ་འགྲོ་བས། ཧཱུྃ། ཀ་དག་ལྷུན་གྲུབ་ཟུང་འཇུག་རིག་པའི་རྩལ། །རྣམ་རོལ་མ་འགགས་པདྨ་ཐོད་ཕྲེང་རྩལ། །དམ་ཡེ་དབྱེར་མེད་གདོད་ནས་ལྷུན་གྱིས་གྲུབ། །སྲིད་ཞི་ཀུན་ཁྱབ་འཇའ་ཟེར་ཀློང་ན་རོལ། །ཐུགས་སྲོག་འོད་ཀྱིས་མཆོད་རྫས་དངོས་འཛིན་སྦྱངས། །ཟག་མེད་བདེ་སྟོང་ཡེ་ཤེས་བདུད་རྩིའི་ཟེར། །རང་རང་ཡིད་ལ་གང་བཞེད་འདོད་དགུའི་ཆར། །མི་གཙང་ཉེས་ཀུན་སེལ་བའི་མཐུ་ལྡན་གྱུར། །རྃ་ཡྃ་ཁྃ། ༀ་ཨཱཿཧཱུྃ། ཧཱུྃ། ཆོས་ཀུན་གདོད་ནས་རོ་མཉམ་བདེ་བ་ཆེ། །དངོས་གཅིག་དུ་མར་འཆར་བའི་རོལ་གར་ལས། །འདས་དང་མ་འདས་སྣ་ཚོགས་སྐུར་སྟོན་པའི། །འཁོར་འདས་མགྲོན་གྱུར་མ་ལུས་གཤེགས་སུ་གསོལ། །རང་མཐུན་དགྱེས་པའི་གདན་ལ་བརྟན་པར་བཞུགས། །ཕྱི་མཆོད་འདོད་ཡོན་བཀྲ་ཤིས་རྫས་རྟགས་བརྒྱད། །རིན་ཆེན་སྣ་བདུན་ལྷ་མིའི་འབྱོར་པའི་ཚོགས། །ཟག་མེད་འདོད་ཡོན་ལོངས་སྤྱོད་མི་ཟད་རྒྱན། །ཀུན་བཟང་མཆོད་པའི་སྤྲིན་གྱིས་མཉེས་པར་བགྱི། །འཁོར་འདས་ཆོས་ཀུན་དག་མཉམ་ཆོས་སྐུའི་རྩལ། །ཕུང་ཁམས་སྐྱེ་མཆེད་གདན་གསུམ་ལྷའི་འཁོར་ལོར། །མ་དག་མཚན་མ་རྡུལ་ཙམ་མ་དམིགས་པས། །དག་པ་རབ་འབྱམས་དཀྱིལ་འཁོར་ཆེན་པོར་བསྟོད། །ཀྱེ། རིན་ཆེན་འབྲུ་སྨན་བཟང་ཤིང་ཕྱེ་མར་སྤོས། །འབར་བྱེད་མེ་དང་སྦྱར་བའི་དུད་པའི་སྤྲིན། །ཟག་མེད་བསང་མཆོད་བདུད་རྩིའི་སྨན་གྱི་ཆར། །མི་གཙང་ཉེས་ཀུན་སེལ་བའི་ཆུ་རྒྱུན་འདིས། །རིགས་ཀུན་ཁྱབ་བདག་གདོད་མའི་མགོན་པོ་མཆོག །དཀྱིལ་འཁོར་ཀུན་གྱི་དབང་ཕྱུག་ཧེ་རུ་ཀཿ། །དྲན་པས་གདུང་སེལ་མཚུངས་མེད་ཆོས་ཀྱི་རྗེ། །བསང་ངོ་མཆོད་དོ་བདག་རྒྱུད་བྱིན་གྱིས་རློབས། །དོན་གཉིས་མཐར་ཕྱིན་རྣམ་མཁྱེན་རྫོགས་སངས་རྒྱས། །བདེན་གཉིས་ཟུང་འབྲེལ་ལུང་རྟོགས་དམ་པའི་ཆོས། །རིག་གྲོལ་ཡོན་གནས་རྨད་བྱུང་འཕགས་ཚོགས་སྡེ། །བསང་ངོ་མཆོད་དོ་སྐྱེ་ཀུན་འབྲལ་མེད་མཛོད། །སྔ་འགྱུར་བཀའ་གཏེར་བཀའ་གདམས་ལམ་འབྲས་པ། །མར་ཤངས་བཀའ་བརྒྱུད་ཞི་གཅོད་སྦྱོར་བ་དྲུག །ཨོ་རྒྱན་བསྙེན་སྒྲུབ་བརྒྱུད་པའི་བླ་མའི་ཚོགས། །བསང་ངོ་མཆོད་དོ་སྨིན་གྲོལ་དངོས་གྲུབ་སྩོལ། །འདུས་པ་མདོ་དང་སྒྱུ་འཕྲུལ་སྒྲུབ་སྡེ་བརྒྱད། །བདེ་དགྱེས་གསང་གསུམ་དུས་ཀྱི་འཁོར་ལོ་སོགས། །རྒྱུད་སྡེ་བཞི་དྲུག་ཡི་དམ་ལྷ་ཚོགས་རྣམས། །བསང་ངོ་མཆོད་དོ་གྲུབ་གཉིས་ཆར་དུ་བསྙིལ། །གསང་བ་ཡེ་ཤེས་ཕག་ཁྲོས་སེང་གསུམ་སོགས། །ཡེ་ཤེས་ལས་དང་འཇིག་རྟེན་ཚུལ་སྟོན་པའི། །གནས་གསུམ་དཔའ་བོ་མཁའ་འགྲོ་བྱེ་བའི་ཚོགས། །བསང་ངོ་མཆོད་དོ་རྡོ་རྗེའི་ཡེ་ཤེས་བསྐྱེད། །མ་མགོན་གཟའ་རྡོར་ཞིང་སྐྱོང་དབང་མོ་སོགས། །རིག་འཛིན་ བརྒྱུད་པའི་ཐ་ཚིག་ལ་གནས་ཤིང་། །བཀའ་དང་བསྟན་སྐྱོང་དམ་ཚིག་རྗེས་གཅོད་པའི། །རྒྱུད་གསུམ ་དམ་ཅན་ཆོས་སྐྱོང་དཀར་ཕྱོགས་སྐྱོང་། །བསང་ངོ་མཆོད་དོ་ལས་བཞིའི་ཕྲིན་ལས་མཛོད། །དཔལ་མགོན་བདུན་ཅུ་དགེ་བསྙེན་ཉེར་གཅིག་དང་། །བསྟན་སྐྱོང་ཡ་མ་རྟག་ཅིང་ཁྱབ་པའི་ལྷ། །ལོ་ཟླ་ཞག་དུས་ཚེས་ལ་དབང་བ་རྣམས། །བསང་ངོ་མཆོད་དོ་སྟོང་གྲོགས་གཡེལ་མེད་མཛོད། །ཁྱད་པར་ཕྱོགས་འདིར་གནས་པའི་ལྷ་ཀླུ་གཉན། །ཡུལ་ལྷ་གཞི་བདག་འགོ་བའི་ལྷ་སྲུང་རིགས། །བརྟེན་ཅིང་མཆོད་པའི་འོས་གྱུར་མ་ལུས་པ། །བསང་ངོ་མཆོད་དོ་མཐུན་རྐྱེན་ཡིད་བཞིན་སྒྲུབས། །གཞན་ཡང་སྐྱེ་བཞི་བརྒྱུད་ལྔའི་ཕ་མ་འགྲོ། །གནོད་བྱེད་ལན་ཆགས་ཤ་འཁོན་གཉེར་ལ་སོགས། །སྣང་སྲིད་མགྲོན་དུ་གྱུར་པ་ཅི་མཆིས་པ། །བསང་ངོ་མཆོད་དོ་ཞི་དང་བདེ་ལེགས་མཛོད། །ཧཱུྃ། གདོད་ནས་ཡེ་གྲོལ་ཀུན་ཏུ་བཟང་མོའི་ཀློང་། །མ་དག་ཉེས་པའི་དྲི་མ་མ་དམིགས་ཀྱང་། སྒྱུ་མ་མཁན་གྱི་སྒྱུ་མའི་རོལ་གར་བཞིན། །ཀུན་རྫོབ་མ་དག་འཁྲུལ་པའི་ཉེས་ཀུན་བསང་། །ངེས་འབྱུང་རྣམ་པར་དག་པའི་ཆུ་གཏེར་ལས། །ཉེར་ཐོན་དད་སོགས་འཕགས་ནོར་རྣམ་བདུན་གྱིས། །རང་རྒྱུད་ཉེས་པའི་དྲི་མས་ནོངས་པ་ཀུན། །བསང་ངོ་ཐར་གྲོལ་ཡོན་གྱིས་འབྱོར་པར་མཛོད། །རྨད་བྱུང་བྱང་ཆུབ་སེམས་ཀྱི་སྤྲིན་ཆེན་ལས། །ལེགས་འོངས་རླབས་ཆེན་ཕྱིན་དྲུག་སྤྱོད་པ་ཡིས། །རང་དོན་ཡིད་བྱེད་འཁྲུལ་པའི་དྲི་མ་ཀུན། །བསང་ངོ་རྫོགས་སྨིན་སྦྱངས་པ་མཐར་ཕྱིན་མཛོད། །དབང་བཞིའི་སྨིན་པའི་རིགས་ཁམས་ས་བོན་མཆོག །རིམ་གཉིས་ལམ་གྱིས་སྨིན་པའི་འབྲས་བཟང་གིས། །རྩ་བ་ཡན་ལག་དམ་ཚིག་ཉམས་ཆག་ཀུན། །བསང་ངོ་ཚེ་གཅིག་རྫོགས་སངས་རྒྱས་པར་མཛོད། །ཡེ་གྲོལ་རིག་པ་རང་བྱུང་རྫོགས་པ་ཆེ། །ལྟ་སྒོམ་སྤྱོད་པའི་འཛིན་ཞེན་རང་གྲོལ་འདིས། །གཟུང་འཛིན་སེམས་རྟོག་འཁྲུལ་པའི་བག་ཆགས་ཀུན། །བསང་ངོ་གདོད་མའི་རྒྱལ་ས་ཟིན་པར་མཛོད། །ཕྱི་སྣོད་རྣམ་དག་པདྨ་དྲྭ་བའི་ཞིང་། །ནང་བཅུད་འགྲོ་བ་ལྷ་དང་ལྷ་མོའི་དལ། །ཚོགས་དྲུག་ཡུལ་སྣང་ཞེན་མེད་ལོངས་སྤྱོད་རྫས། །དག་པ་རབ་འབྱམས་ཆེན་པོར་བསང་མཆོད་འབུལ། །དེ་ལྟར་བསང་མཆོད་ཕུལ་བའི་བསོད་ནམས་ཀྱིས། །བདག་གཞན་འགྲོ་ཀུན་ཚོགས་གཉིས་རབ་རྫོགས་ཤིང་། །དཀོར་དང་ལོག་འཚོ་དུས་མིན་འཆི་རྐྱེན་བྱང་། །ཚེ་དང་ཆོས་སྒྲུབ་མཐའ་རུ་ཕྱིན་པར་ཤོག །རྒྱལ་བསྟན་དར་ཞིང་དེར་འཛིན་སྐུ་ཚེ་བརྟན། །བཤད་སྒྲུབ་སྡེ་རྒྱས་གངས་ལྗོངས་མཐའ་དབུས་བདེ། །སྡེ་བཞིའི་དཔལ་འབྱོར་ཡར་ངོའི་ཟླ་ལྟར་འཕེལ། །རྫོགས་ལྡན་དང་པོའི་དགའ་བ་རྒྱས་གྱུར་ཅིག །དཀོན་མཆོག་བདེན་མཐུ་འགྲོ་བའི་རྒྱུད་ལ་ཞུགས། །འགྲོ་བའི་སྣང་བློ་དགེ་བའི་ཕྱོགས་སུ་སྤྲོ། །འཐབ་རྩོད་རྒུད་སོགས་མི་ཤིས་མིང་མི་གྲགས། །ཡིད་ལ་བསམ་པ་མཐའ་དག་འགྲུབ་གྱུར་ཅིག །བླ་མའི་ཐུགས་རྗེ་སློབ་མའི་རྒྱུད་ལ་སྐྱེ། །སློབ་མའི་དད་དམ་ལྟ་སྤྱོད་རྣམ་པར་དག །བླ་སློབ་མི་འབྲལ་བཤད་སྒྲུབ་ཆོས་ཀྱིས་འཚོ། །ཐེག་མཆོག་བསྟན་པ་དར་སྨིན་བཀྲ་ཤིས་ཤོག །ཅེས་བརྗོད་ཅིང་ནོངས་བཤགས་གཤེགས་གསོལ་སོགས་སྤྱི་ལྟར་བྱའོ། །ཅེས་པའང་བཟང་ལུང་པདྨ་ལྷ་རྩེ་ནས་བཀའ་བརྒྱད་བདེ་གཤེགས་འདུས་པའི་ཚོགས་ཁང་ཆེན་པོར་བསྐྱོད་པའི་སྐབས་སུ་རིག་འཛིན་གྱི་བཙུན་པ་བྱ་བྲལ་པ་རྡོ་རྗེ་དབང་མཆོག་དགྱེས་པ་རྩལ་གྱིས་གང་ཤར་ཡུད་ཙམ་ལ་བྲིས་པ་དགེ །