ཡལ་འདབ་ཞེ་གཅིག་པ་ནས་ལྔ་བཅུ་པའི་བར།
༈ ཡལ་འདབ་ཞེ་གཅིག་པ་ནི། སྟོན་པ་འོད་མའི་ཚལ་ན་བཞུགས་སོ། །རྒྱལ་པོའི་ཁབ་དང་སྒྲ་སྒྲོགས་གཉིས་གཅིག་འབྱོར་པའི་ཚེ་གཅིག་རྒུད་དོ། །སྒྲ་སྒྲོགས་ན་ཨུ་ཏྲ་ཡ་ན་རྒྱལ་སྲིད་
བྱེད་ལ། དེ་ལ་བཙུན་མོ་ཟླ་འོད་དང་། བུ་གཙུག་ཕུད་ཅན་དང་། བློན་པོ་ཧེ་རུ་ཀ་དང་བྷི་རུ་ཀ་གཉིས་ཡོད་དོ། །རྒྱལ་པོའི་ཁབ་ན་གཟུགས་ཅན་སྙིང་པོ་རྒྱལ་སྲིད་བྱེད་དེ། དེ་ལ་བཙུན་མོ་ལུས་འཕགས་མ་དང་། བུ་མ་སྐྱེས་དགྲ་དང་། བློན་པོ་བྲམ་ཟེ་དབྱར་ཚུལ་མ་ཞེས་བྱ་བ་ཡོད་དོ། །རྒྱལ་པོའི་ཁབ་ནས་ཚོང་པ་དག་ཟོང་ཐོགས་ཏེ་སྒྲ་སྒྲོགས་སུ་ཕྱིན་ནས་སྐྱེས་ཐོགས་ཏེ་ཨུ་ཏྲ་ཡ་ནའི་གནས་སུ་སོང་བ་དང་། རྒྱལ་པོ་གཞན་འགའ་ཡོད་དམ། རྒྱལ་པོའི་ཁབ་ན་གཟུགས་ཅན་སྙིང་པོ་ཡོད་དོ། །ཨུ་ཏྲ་ཡ་ན་དེ་ལ་ཆགས་ནས། དེའི་ཡུལ་ན་ཅི་དཀོན། རིན་པོ་ཆེ་དཀོན་ནོ། །དེས་རིན་པོ་ཆེས་སྒྲོམ་བཀང་ནས་སྐྱེས་སུ་བསྐུར་རོ། །ཚོང་པས་གཟུགས་ཅན་སྙིང་པོ་ལ་སྐྱེས་དང་ཕྲིན་ཡིག་ཕུལ་བས། དེ་ཡི་ཡུལ་ན་ཅི་དཀོན། གོས་དག་དཀོན་ནོ། །དེས་ཀྱང་གོས་རིན་པོ་ཆེ་དག་གིས་སྒྲོམ་བཀང་ནས་བསྐུར་རོ། །ཨུ་ཏྲ་ཡ་ན་ལ་ནོར་བུའི་ཁྲབ་རེག་ན་བདེ་བ། གཅད་དཀའ་བ། དབུག་དཀབ་བ། དུག་འཇིལ་བ། སྣང་བའི་བདག་ཉིད་དང་ལྡན་པ་ཞིག་ཡོད་པ་དེ་རྒྱལ་པོ་གཟུགས་ཅན་སྙིང་པོ་ལ་བསྐུར་ནས། ཁྱོད་ཀྱིས་འདི་རང་ཉིད་ཀྱིས་བཅང་ཞིང་སུ་ལའང་མ་སྟེར་ཅིག་ཅེས་བྲིས་ཏེ་བསྐུར་རོ། །ཕོ་ཉས་ཕུལ་བ་དང་མཆོག་ཏུ་ཡ་མཚན་སྐྱེས་ནས། རིན་ཆེན་རྟོག་པ་དག་གིས་རིན་ཐང་གཅོད་པ་ན་རིན་པོ་ཆེ་རེ་རེའང་རིན་ཐང་མེད་པར་མཐོང་བ་རྒྱལ་པོ་ལ་ཞུས་པས། སྐྱེས་ལན་དག་གིས་ཕོངས་པ་ན་དབྱར་ཚུལ་མས་སངས་རྒྱས་ཀྱི་སྐུ་གཟུགས་རས་ངོར་བྲིས་ལ་བསྐུར་ཅིག་འདོམས་པ་ལྟར་སངས་རྒྱས་ལ་དེ་ཚུལ་ཞིབ་པར་ཞུས་པས། འབྲི་
ཆོག་པའི་བཀས་གནང་། རི་མོ་མཁན་བཀུག་སྟེ་དེ་དག་གིས་འབྲི་བར་བརྩམས་པ་ན། སངས་རྒྱས་ནི་བལྟ་བས་ཆོག་མི་ཤེས་པ་ཡིན་པས་མཚན་མ་བཟུང་བར་མ་ནུས་ནས། རས་དེ་འདུལ་སྦྱོང་བྱས། རྒྱལ་པོས་ཕུལ་བ་དང་། སྟོན་པས་དེར་གྲིབ་མ་བཏང་ནས་རི་མོ་མཁན་གྱིས་ཚོན་བཀྱེས། སྟོན་པས་བཀའ་སྩལ་པ་བཞིན། སྐུ་གཟུགས་ཀྱི་འོག་ཏུ་སྐྱབས་འགྲོ་དང་། བསླབ་པའི་གཞི་དང་། རྟེན་འབྲེལ་བཅུ་གཉིས་ལུགས་འབྱུང་ལུགས་ལྡོག་བྲིས། སྟེང་དུ། བརྩམ་པར་བྱ་ཞིང་འབྱུང་བར་བྱ། །ཞེས་པའི་ཚིགས་བཅད་གཉིས་བྲིས། དྲི་སྣ་ཚོགས་ཀྱིས་བསྒོས་ནས་དྲིལ་ཏེ་གསེར་གྱི་དོང་བུར་བཅུག །དེ་དངུལ་གྱི་དོང་བུར། དེ་ཟངས། དེའང་དྲི་སྣ་ཚོགས་ཀྱིས་བསྒོས་པའི་གོས་ཀྱིས་དཀྲིས་ཏེ་གླང་པོ་ཆེའི་རྒྱབ་ཏུ་བཀལ་ནས་ཨུ་ཏྲ་ཡ་ན་ལ། བདག་གིས་འཇིག་རྟེན་གསུམ་ལས་ཆེས་འཕགས་པའི་སྐྱེས་འདི་བསྐུར་གྱིས་དཔག་ཚད་ཕྱེད་གསུམ་ནས་གྲོང་ལམ་མཛེས་པར་བྱ་ཞིང་། བདག་ཉིད་དང་དཔུང་ཚོགས་ཡན་ལག་བཞི་དང་ལྡན་པས་བསུ་ནས་ས་ཕྱོགས་ཡངས་པར་མཆོད་པ་དང་བཀུར་སྟི་ཆེན་པོས་དབྱེ་བར་བྱའོ་ཞེས་བྲིས་ནས་བསྐུར། ཕོ་ཉ་རྣམས་ལའང་དེ་སྐད་དང་། འོག་ཏུ་བྲིས་པ་འདི་ཅི་ཡིན་ཞེ་ན། ཁས་ལེན་པ་དང་། བསླབ་གཞི་དང་། འཇིག་རྟེན་གྱི་འབྱུང་ལྡོག་གོ་ཞེས་བརྗོད། སྟེང་དུ་བྲིས་པ་འདི་ནི་སྤྲོ་བར་བྱ་བའོ་ཞེས་རྗོད་ཅིག་སྒོ་ནས་དེ་དག་གིས་སྒྲ་སྒྲོགས་འདབས་སུ་ཕྱིན་པ་དང་ཕྲིན་ཡིག་དེ་བསྐུར་བ། དེས་བཀླགས་པས་ཁྲོས་ཏེ་བློན་པོ་རྣམས་ལ་སྨྲས་པ། དེས་ང་ལ་སྐྱེས་ཇི་ལྟ་བུ་བསྐུར་ན་ངས་དཔག་ཚད་
ཕྱེད་གསུམ་བསུ་བར་བྱ། དཔུང་ཚོགས་སྟ་གོན་གྱིས་དང་འགྲོ་ལ་དེའི་ཡུལ་འཁོར་གཞོམ་མོ། །བློན་པོ་རྣམས་ན་རེ། དེས་སྐྱེས་ངན་ངོན་བསྐུར་མི་ནུས་པས་བརྟག་པར་བགྱིའོ་ཟེར་ནས་ཕྲིན་ཡིག་ནང་ལྟར་བཀུར་སྟི་ཆེན་པོས་བསུས། སྲོག་ཆགས་བརྒྱ་སྟོང་དུ་མ་དག་དང་། ནམ་མཁའ་ལ་ལྷ་འབུམ་ཕྲག་དུ་མ་ཡང་འདུས་ནས་ས་ཕྱོགས་ཡངས་པར་མཆོད་པ་ཆེན་པོ་བྱས་ཏེ་ཞལ་དབྱེ་བ་ན་ཚོང་པ་རྣམས་ཀྱིས་མཐོང་ནས། སངས་རྒྱས་ལ་ཕྱག་འཚལ་ལོ་ཞེས་མགྲིན་གཅིག་ཏུ་བརྗོད་པ་ན། དེས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པས་དེར་སྤུ་ཟིང་བྱེད་ཅིང་ཡ་མཚན་སྐྱེས་ཏེ་ཡུན་རིང་པོར་མིག་ཚུགས་སུ་བལྟས་ནས། སངས་རྒྱས་ཞེས་པ་དེ་སུ་ཡིན། དེ་དག་གིས་རྒྱ་ཆེར་བརྗོད་ཅིང་སྟེང་འོག་གི་ཚིགས་རིས་ཀྱང་བརྡ་སྤྲད། རྒྱལ་པོས་རྟེན་འབྲེལ་ལུགས་འབྱུང་ལྡོག་བརྟགས་པས་བདེན་པ་མཐོང་ནས། རིང་ན་བཞུགས་པའི་སངས་རྒྱས་ཀྱིས། །ཤེས་རབ་ཀྱི་མིག་རྣམ་པར་སྦྱངས། །གང་ལ་དེ་འདྲའི་གསོས་མངའ་བ། །སྨན་པའི་མཆོག་ལ་ཕྱག་འཚལ་ལོ། །དེས་གཟུགས་ཅན་སྙིང་པོ་ལ། ཁྱོད་ལ་བརྟེན་ནས་བདག་གིས་བདེན་པ་མཐོང་གི །བདག་དགེ་སློང་མཐོང་འདོད་པས་འགའ་ཞིག་གཏོང་བའི་རིགས་སོ་ཞེས་སྤྲིངས་སོ། །གཟུགས་ཅན་སྙིང་པོས་སྟོན་པ་ལ་ཞུས་པས། ཀ་ཏྱཱ་ཡ་ན་འཁོར་ལྔ་བརྒྱ་དང་བཅས་པ་བཏང་བ་དེར་བྱོན། རྒྱལ་པོས་བསུས་ཏེ་ས་ཕྱོགས་ཡངས་པར་སྟན་བཤམས་པ་ལ་བཞུགས་ནས་ཆོས་བསྟན་པས་འབྲས་བུ་བཞི་དང་སེམས་བསྐྱེད་གསུམ་དང་སྐྱབས་འགྲོ་ལ་བཀོད་དོ། །དེ་ན་ཁྱིམ་བདག་
རྒྱལ་དང་། སྐར་རྒྱལ་གཉིས་འདུག་པ་རབ་ཏུ་བྱུང་། བསྙེན་པར་རྫོགས་ནས་དགྲ་བཅོམ་པ་ཐོབ་བོ། །དེ་གཉིས་མྱ་ངན་ལས་འདས་པའི་ལུས་ལ་ཉེ་དུ་དག་གིས་མཆོད་པ་བྱས་ཏེ་མཆོད་རྟེན་གཉིས་བརྩིགས་སོ། །ཨུ་ཏྲ་ཡ་ན་ཉིན་རེ་བཞིན་ཀ་ཏྱཱ་ཡ་ནའི་དྲུང་དུ་ཆོས་ཉན་ནས་བཙུན་མོའི་འཁོར་ལ། འཕགས་པས་ཆོས་སྙན་པ་དག་སྟོན་པར་བྱེད་དོ་ཞེས་སྨྲས་སོ། །དེ་དག་ན་རེ། ལྷ་སངས་རྒྱས་འབྱུང་བ་འབྲས་བུ་དང་བཅས་པའོ། །ཅིའི་ཕྱིར། ཁྱོད་ཆོས་གསན་པས་སོ། །འོ་ན་ཁྱེད་ཀྱང་ཅིའི་ཕྱིར་མི་ཉན། ལྷ་བདག་ཅག་ངོ་ཚ་དང་ལྡན་ན་དེར་ཇི་ལྟར་མཆི། འདིར་བྱོན་ནས་ཆོས་སྟོན་ན་མཉན་ནོ། །རྒྱལ་པོས་འཕགས་པ་ལ་ཞུས་པས། སྟོན་པས་བཙུན་མོའི་འཁོར་གྱི་འཇུག་པ་བཀག་པས་དགེ་སློང་མ་དགོས་གསུངས། རྒྱལ་པོས་གཟུགས་ཅན་རྙིང་པོ་ལ་དགེ་སློང་མ་འགའ་ཞིག་ཐོང་ཞིག་སྨྲས། དེས་སྟོན་པ་ལ་ཞུས་པས། དགེ་སློང་མ་རི་མ། སྒྲ་སྒྲོགས་ན་ཨུ་ཏྲ་ཡ་ནའི་བཙུན་མོ་དང་བུད་མེད་རྣམས་ལ་སོམས་ཤིག །དེ་འཁོར་ལྔ་བརྒྱ་དང་བཅས་པ་སོང་ནས་ཉིན་རེ་བཞིན་བཙུན་མོའི་འཁོར་བུད་མེད་རྣམས་ལ་ཆོས་བསྟན་ཏོ། །ཨུ་ཏྲ་ཡ་ན་པི་ཝཾ་ལ་མཁས་ལ། བཙུན་མོ་ཟླ་འོད་གར་མཁས་པས་དུས་གཅིག་ན་རྒྱལ་པོས་པི་ཝཾ་སྦྲེངས་ཏེ་ཟླ་འོད་གར་བྱེད་དོ། །དེས་དེ་གར་བྱེད་པ་ན་ཆུད་འཛའ་བའི་མཚན་མ་མཐོང་ནས་བརྟགས་པས་ཞག་བདུན་ནས་འཆིའོ་སྙམ་དུ་ལག་ནས་པི་ཝཾ་ཤོར་ཏེ་ས་ལ་ལྷུང་། ཟླ་འོད་ཀྱིས་ཅི་ཡིན་དྲིས་པར་རྒྱལ་པོས་ཇི་ལྟར་གྱུར་པ་བཤད་པ་ན། བདག་རབ་ཏུ་འབྱུང་གིས་གནོངས་ཤིག །ཁྱོད་རབ་ཏུ་བྱུང་ནས་དགྲ་བཅོམ་ཐོབ་
ན་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ཡིན་ནོ། །ཀུན་སྦྱོར་ལྷག་མ་དང་བཅས་ཏེ་ལྷར་སྐྱེས་ན་ང་ལ་ལྟོས་ཤིག་གནང་ངོ་། །དེ་རབ་ཏུ་བྱུང་ནས་ཉི་མ་བདུན་པ་ལ་ཤི་སྟེ་རྒྱལ་ཆེན་རིས་བཞིའི་ལྷར་སྐྱེས་ནས་རྒྱུ་མཐོང་བས་སྟོན་པའི་སྤྱན་སྔར་སོང་སྟེ་ཆོས་ཉན་པས་བདེན་པ་མཐོང་ནས་རང་གནས་སུ་ལོག་གོ །དེས་སྔོན་གྱི་ཆེད་མདོ་བཞིན། རྒྱལ་པོ་སར་སོང་བ་དེ་གཉིད་ལོག་པ་ལ་སེ་གོལ་གྱི་སྒྲས་བསླངས་སོ། །ཁྱོད་སུ་ཡིན། བདག་ཟླ་འོད་དོ། །ཚུར་ཤོག་དགའ་མགུར་སྤྱོད། བདག་ཤི་ནས་རྒྱལ་ཆེན་རིས་བཞིའི་ལྷར་སྐྱེས་ཏེ། བདག་དང་མཇལ་བཞེད་ན་སྟོན་པའི་སྤྱན་སྔར་རབ་ཏུ་བྱུང་ཞིག་སོགས་ཀྱིས་བསྐུལ་བས། བདག་ངེས་པར་རབ་ཏུ་འབྱུང་ངོ་སྙམ་ནས་བློན་པོ་གཉིས་ལ། བདག་རབ་ཏུ་འབྱུང་གིས་ཁྱེད་གཉིས་ཀྱིས་གཙུག་ཕུད་ཅན་ཕན་པ་ལ་སྦྱོར། གནོད་པ་ལས་ཟློགས་ཤིག་གསུངས། གཙུག་ཕུད་ཅན་དང་། ཕྱི་རོལ་གྱི་སྐྱེ་བོའི་ཚོགས་ལའང་སོ་སོར་རྒྱལ་གྱིས་བློན་པོའི་ཚིག་ཉོན་ལ། སྐྱེ་བོའི་ཚོགས་ཀྱིས་བདག་རྒྱལ་སྲིད་བྱེད་པ་ན་གནོད་པ་ཅུང་ཟད་བྱས་པ་དེ་བཟོད་ཅིང་། རྒྱལ་བུས་ཅི་བསྒོ་ཐམས་ཅད་ལེགས་པ་སྒྲུབས་ཤིག་གསུངས་ནས་བསྙེན་བཀུར་བ་གཅིག་དང་བཅས་རྒྱལ་པོའི་ཁབ་ཏུ་གཤེགས་པ་ན། ཐམས་ཅད་རྒྱལ་པོ་ལ་ཆགས་ནས་མཆི་མས་བརྣངས་བཞིན་དུ་སྐྱེལ་མ་བྱས་ནས་སླར་ལོག །གཙུག་ཕུད་ཅན་ཁྲིར་འཁོད་དོ། །ཨུ་ཏྲ་ཡ་ན་རིམ་གྱིས་རྒྱལ་པོའི་ཁབ་ཏུ་སླེབས་ནས་གཟུགས་ཅན་སྙིང་པོ་ལ་སྦྲན་པས། དེས་དཔུང་ཚོགས་བཞི་དང་བཅས་པས་བསུས་ནས། བྱོན་པའི་དོན་
ཅི་ཡིན་དྲིས་པར། རབ་ཏུ་འབྱུང་བ་དང་བསྙེན་པར་རྫོགས་པའི་དོན་ཡིན་ཚུལ་སྨྲས། གཟུགས་ཅན་སྙིང་པོ་ཤིན་ཏུ་དགྱེས་ནས་ལེགས་སོ། །ལན་གསུམ་བརྗོད། སྟོན་པའི་དྲུང་དུ་ཁྲིད་ནས། ཚུར་ཤོག་གིས་བསྙེན་པར་རྫོགས་པར་མཛད་པ་ན། དེ་བསོད་སྙོམས་ལ་ཞུགས་པས་རྒྱལ་པོ་གཟུགས་ཅན་སྙིང་པོས་ཐོས་ནས་དེའི་གན་དུ་སོང་སྟེ། མི་དབང་གྲོང་ཁྱེར་སྟོང་དང་ནི། །སྒྲ་སྒྲོགས་ཀྱང་ནི་སྤྱད་བྱས་ནས། །བོར་བའི་བསོད་སྙོམས་ཚོལ་བྱེད་པ། །ཇི་ལྟར་ཡོངས་སུ་མི་གདུང་ངམ། །ཞེས་སོགས་གོང་ནས་གོང་དུ་དྲི་ལན་མཛད་དོ། །དེ་ནས་གཙུག་ཕུད་ཅན་གྱིས་རེ་ཞིག་ཆོས་ཀྱིས་རྒྱལ་སྲིད་བྱས་ནས་ཆོས་མ་ཡིན་པས་རྒྱལ་སྲིད་བྱེད་དུ་བཅུག་པ་དང་བློན་པོ་གཉིས་ཀྱིས་ལན་གསུམ་གྱི་བར་དུ་བཟློགས་པས་དེ་ཁྲོས་ཏེ། དེ་གཉིས་ཕུད་དེ་སྐྱོན་ཆགས་པ་གཞན་ཞིག་དག་བསྐོས་སོ། །དེ་གཉིས་ཀྱིས་ཡུལ་མི་ལ་གནོད་པར་བྱ་བར་བརྩམས་སོ། །རེ་ཞིག་ན་དེ་ནས་འོངས་པའི་ཚོང་པ་རྣམས། ཨུ་ཏྲ་ཡ་ནས་མཐོང་སྟེ་སྐད་ཆ་དྲིས་པས་ཚོང་པ་རྣམས་ཀྱིས་ཞིབ་ཆ་བཤད་པས། ཁྱོད་སོང་ལ་དེའི་སྐྱེ་བོའི་ཚོགས་དབུགས་ཕྱུང་ཞིག་དང་། བདག་ཀྱང་འོངས་ནས་གཙུག་ཕུད་ཅན་གྱི་སེམས་དགེ་བར་བྱའོ། །ཚོང་པ་དེ་སོང་ནས་མངའ་འོག་པ་ལ་གསང་སྟེ་སྨྲས་པ་གཅིག་ནས་གཅིག་ཏུ་བརྒྱུད་དེ་བློན་པོ་སྐྱོན་ཅན་གཉིས་ཀྱིས་ཐོས་ནས། གཙུག་ཕུད་ཅན་ལ་ལྷ། རྒྱལ་པོ་བགྲེས་པོ་འདིར་བྱོན་ནས་རྒྱལ་སྲིད་བྱེད་པར་གྲགས་སོ། །དེ་ན་རེ། ཡབ་རྒྱལ་པོ་མཛད་ན་བདག་ཉིད་གཞོན་ནུ་བྱ་སྟེ་ཅི་འགལ། དེ་གཉིས་
ན་རེ། དེ་ལྟ་བུ་ནི་གླང་པོ་ཆེའི་གཉའ་ནས་བབས་ཏེ་རྐང་ཐང་འགྲོ་བ་བཞིན་ཏེ། མི་རུང་བས་གསོད་པའི་ཐབས་མ་བྱས་ན་རང་ཉིད་བཀུམ་པར་འགྱུར་རོ། །ཟེར་ནས་ནན་གྱིས་བསྐུལ་བ་ན། དེ་སྡིག་པའི་གྲོགས་པོས་བསླུས་པའི་དབང་གིས་ཁས་བླངས། གཤེད་མ་ལ་གསོད་ཅིག །མ་གསོད་ན་ཁྱོད་ཀྱི་ཉེ་དུ་དང་བཅས་པ་ཁ་བཏགས་ཞེས་བློན་པོ་གཉིས་ཀྱིས་བསྒོ་བས། དེ་ཡང་སྐྲག་ནས་རལ་གྲི་བཟུང་སྟེ་སོང་ངོ་། །དེ་ནས་ཨུ་ཏྲ་ཡ་ནས་སྟོན་པ་ལ། བདག་གྲོང་ཁྱེར་སྒྲ་སྒྲོགས་སུ་ལྗོངས་རྒྱུ་ཞིང་མཆིའོ། །སོང་ལ་ལས་བདག་གིར་གྱིས་ཤིག་གསུངས། དེ་ལས་ཀྱིས་བདས་ནས་སོང་བ་དང་གཤེད་མ་དེ་དག་དང་ཕྲད་ནས། གཙུག་ཕུད་ཅན་ཆོས་ཀྱི་རྒྱལ་སྲིད་བྱེད་དམ་དྲིས་པས། ལྷ་ཆོས་མིན་པས་བགྱིད་དེ། གཞོན་ནུ་ནི་ཁྱོད་གསོན་པར་མི་དགའ་ཡི། བདག་ཅག་གཤེད་མ་ལགས་སོ། །རྒྱལ་པོས། སྟོན་པས་གསུངས་པ་དེ་འདི་ཡིན་པར་འདུག་སྟེ། རབ་ཏུ་བྱུང་བའི་དོན་ད་དུང་མ་ཐོབ་སྙམ་ནས། ང་རང་གི་དོན་སྒྲུབ་ཀྱི་བར་དུ་ཡུད་ཙམ་སྡོད་ཅིག་བྱས་ཏེ། ཤིང་ལྗོན་པ་ཞིག་གི་དྲུང་དུ་བསྡད་ནས་བརྩོན་འགྲུས་བརྩམས་པས་དགྲ་བཅོམ་པ་ཐོབ་སྟེ་སྨྲས་པ། ངས་ཐོབ་པར་བྱ་བ་ནི་ཐོབ་ཟིན་གྱི། ད་ཁྱོད་ཅག་འོངས་པའི་དོན་དེ་ཐོབ་པར་བྱའོ། །སོངས་ལ་གཙུག་ཕུད་ཅན་ལ་འདི་སྨྲོས་ཤིག །རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །གཞན་ཡང་ཁྱོད་ཀྱིས་ཕ་བསད་པ་དང་དགྲ་བཅོམ་པ་བསད་པས་མཚམས་མེད་གཉིས་ཏེ་བཤགས་པ་གྱིས་
དང་ལས་ཅུང་ཟད་བསྲབ་པར་འགྱུར་རོ། །ཞེས་རྗོད་ཅིག་གསུངས། ཡང་དེ་དམྱལ་བར་སྐྱེ་ན་མི་རུང་གི་རྫུ་འཕྲུལ་གྱིས་འགྲོའོ་སྙམ་ན་ལས་ཀྱིས་ནོན་པས། རྫུ་འཕྲུལ་ལྟ་ཅི་སྨོས། རྫུ་ཞེས་བྱ་བ་ཙམ་ཡང་མི་སྣང་ངོ་། །དེ་ནས་གཤེད་མ་གཅིག་གིས་རལ་གྲིས་དེ་ཡི་མགོ་བཅད་ནས་ས་ལ་བསྒྱེལ་ཏོ། །དེ་ནས་སྟོན་པས་འཛུམ་པར་མཛད་པའི་འོད་ཀྱིས་ལས་གཉིས་མཛད་དེ་ཞབས་ཀྱི་མཐིལ་དུ་ནུབ་བོ། །ཀུན་དགའ་བོས་རྒྱུ་ཞུས་པར་གཙུག་ཕུད་ཅན་སྡིག་པའི་གྲོགས་པོས་བསྐོར་བས་ཕ་དགྲ་བཅོམ་པ་བསད་པས་ངེས་པར་མནར་མེད་དུ་སྐྱེའོ། །ཀུན་དགའ་བོས་དེ་ཐོས་ནས་མཆི་མས་བརྣངས་ཏེ་འདུག་གོ །གཤེད་མ་དེ་དག་གིས་ཨུ་ཏྲ་ཡ་ནའི་ཆོས་གོས་དང་ལྷུང་བཟེད་དང་འཁར་གསིལ་ཁྱེར་ཏེ་སོང་ནས་བློན་པོ་སྐྱོན་ཅན་གཉིས་ལ་བསད་ཚུལ་སྨྲས་པས་ཤིན་ཏུ་དགའ་སྟེ། གཙུག་ཕུད་ཅན་སར་དེ་དག་ཁྲིད་ནས་ལོ་རྒྱུས་སྨྲས་པས། དེ་ན་རེ། རྒྱལ་པོ་རྒན་པོ་ལ་དཔུང་ཇི་ཙམ་འདུག །ལྷ་དེ་ལ་དཔུང་ག་ལ་མཆིས། ལྷུང་བཟེད་དང་ཆོས་གོས་དང་འཁར་གསིལ་འདི་དག་ལགས་སོ། །དེས་དེ་དག་མཐོང་ནས་བརྒྱལ་ཞིང་ས་ལ་འགྱེལ་བ་ཆུས་གཏོར་བས་སོས་ནས། རྒྱལ་པོ་འཆི་བའི་ཚེ་ཅི་སྨྲས་ཟེར། དེ་དག་གིས་རྒྱས་པར་བརྗོད་པ་དང་སྐྱོན་ཆགས་པ་དེ་གཉིས་ཕུད་ནས་ཧེ་རུ་ཀ་དང་བྷི་རུ་ཀ་གཉིས་སླར་བསྐོས་ཤིང་གཙུག་ཕུད་ཅན་རང་ཉིད་མྱ་ངན་གྱིས་གདུང་ངོ་། །དེའི་ཚེ་སྐྱོན་ཆགས་པ་དེ་གཉིས་ཀྱིས་རྒྱལ་དང་སྐར་རྒྱལ་གྱི་མཆོད་རྟེན་
ལ་ཁུང་བུ་རེ་བརྐོས། དེར་བྱི་ལའི་ཕྲུ་གུ་རེ་བཞག་ནས་ཉིན་རེ་བཞིན་ཤ་རེ་བྱིན་ནས། རྒྱལ་དང་སྐར་རྒྱལ་གཉིས། ཁྱེད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་རྫས་ཆུད་གསན་པས་བྱི་ལར་སྐྱེས་པའི་བདེན་པ་དང་བདེན་པའི་ཚིག་གིས་ཤ་ལོང་ལ་རང་རང་གི་མཆོད་རྟེན་ལ་བསྐོར་ནས་རང་གི་ཁུང་དུ་ཞུགས་ཤིག་ཅེས་བསླབས་སོ། །ལེགས་པར་ལོབས་པ་དང་། དེ་གཉིས་ཨུ་ཏྲ་ཡའི་བཙུན་མོའི་གན་དུ་སོང་ནས། ལྷ་མོ་ཁྱོད་ཀྱི་སྲས་འདི་རིད་པར་གྱུར་ན་ཅིའི་ཕྱིར་བཏང་སྙོམས་མཛད་ཟེར། ཁྱེད་གཉིས་ཀྱིས་དེ་ལ་ལས་ལྟ་བུ་བྱེད་དུ་བཅུག་ན་ད་ཁོ་མོས་ཅིར་བྱ། ཅི་བུམ་པ་ལྟུང་ན་དཔྱང་ཐག་ཀྱང་ལྟུང་བར་བགྱིའམ། དེས་སྨྲས་པ། དེའི་ཕ་བསད་ནི་ཁོ་མོས་བསང་བར་བྱ་ན། དགྲ་བཅོམ་བསད་པ་སུས་བསང། བདག་ཅག་གཉིས་ཀྱིས་བསང་ངོ། །དེའི་ཐབས་ལེགས་སོ་ཞེས་བུའི་གན་དུ་སོང་སྟེ། སྲས། ཁྱོད་ཅིའི་ཕྱིར་རིད་པར་གྱུར། ཨུ་ཏྲ་ཡ་ན་ནི་ཁྱོད་ཀྱི་ཡབ་མ་ལགས་ཏེ། བདག་སྐྱེས་པ་གཞན་དང་སྤྱད་པས་ཁྱོད་འཁྲུངས་སོ། །དེས་ཕ་བསད་པ་མ་ཡིན་ནོ་སྙམ་དུ་རིག་ནས། འོ་ན་དགྲ་བཅོམ་པ་བསད་པ་དེ་ཇི་ལྟར་སོལ་བར་བགྱི་ཟེར། སྲས། མཁས་པ་རྣམས་བསྡུའོ། །དེ་སོང་ནས་བློན་པོ་སྐྱོན་ཅན་གཉིས་ལ། བདག་གིས་ཕ་བསད་པ་བསལ་གྱིས། ཁྱེད་གཉིས་ཀྱིས་དགྲ་བཅོམ་པ་བསད་པ་སོལ་ཅིག་སྨྲས་ནས། ཤེས་ལྡན་ཐམས་ཅད་གཙུག་ཕུད་ཅན་མདུན་བསྡུས་པ་ན་དེ་གཉིས་ཀྱང་འོངས་སོ། །གཙུག་ཕུད་ཅན་གྱིས་སྨྲས་པ། ངས་དགྲ་བཅོམ་པ་བསད་པ་དེ་ཇི་ལྟར་མཐར་ཐུག་པར་བྱ། ཁ་ཅིག །དེས་དགྲ་བཅོམ་པ་ཐོབ་
པར་སུས་མཐོང་ཟེར། ཁ་ཅིག །དགྲ་བཅོམ་ནི་ཀུན་མཁྱེན་དང་འདྲ་སྟེ་ནམ་མཁའ་ལ་མཆི་འོང་ཟེར། དེ་གཉིས་ན་རེ། དགྲ་བཅོམ་པ་མེད་ན་དགྲ་བཅོམ་པ་བསད་པ་ཡང་མེད་དོ་ཟེར། ངས་མཐོང་ལམ་དུ་མངོན་སུམ་པར་རྒྱལ་དང་སྐར་རྒྱལ་གཉིས་ལྷག་མེད་དུ་མྱ་ངན་ལས་འདས་བཞིན་དུ་དེ་སྐད་ཟེར་རམ། དེ་གཉིས་ན་རེ། དེ་གཉིས་ཀྱིས་སྒྱུ་མས་འཇིག་རྟེན་བསླུས་ཏེ། དད་རྫས་ཆུད་གསན་པས་བྱི་ལར་སྐྱེས་ནས་དེང་སང་ཡང་རང་རང་གི་མཆོད་རྟེན་ན་མཆིའོ། །རྒྱལ་པོ་འཁོར་བཅས་བདེན་རྫུན་བལྟར་སོང་བ་དང་སྐྱོན་ཅན་དེ་དག་གིས། རྒྱལ་དང་སྐར་རྒྱལ་གཉིས་ཉོན་ཅིག །ཁྱེད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ། ཞེས་སོགས་སྔར་བསླབ་པའི་ཚིག་སྨྲས་པས། དེ་གཉིས་རང་རང་གི་ཁུང་ནས་བྱུང་སྟེ་ཤ་བླངས་ནས་རང་རང་གི་མཆོད་རྟེན་ལ་བསྐོར་བ་བྱས་ཏེ་རང་རང་གི་ཁུང་དུ་ཞུགས་པ་སྲོག་ཆགས་འབུམ་ཕྲག་དུ་མས་མཐོང་། དེ་ནས་རྒྱལ་པོས་དགྲ་བཅོམ་པ་མེད་པར་ལྟ་བ་སྐྱེས་ནས། ཀ་ཏྱཱ་ཡ་ན་དང་། རི་མ་འཁོར་དང་བཅས་པའི་བསོད་སྙོམས་བཅད་པས་དགེ་སློང་དང་དགེ་སློང་མ་རྣམས་སྒྲ་སྒྲོགས་ནས་སོང་ལ། ཀ་ཏྱཱ་ཡ་ན་དང་། རི་མ་གཉིས་གདུལ་བྱ་ལ་ལྟོས་པས་དེ་ན་འཁོད་དོ། །དུས་གཅིག་ན་གཙུག་ཕུད་ཅན་ཕྱིར་ཕྱུང་བ་ན། ཀཏྱཱ་ཡ་ནས་མཐོང་ནས་མཐའ་གཅིག་ཏུ་སོང་སྟེ་བསྡད་དོ། །ཡང་དེ་ནང་དུ་འོང་བ་མཐོང་ནས་མཐའ་གཅིག་ཏུ་སོང་སྟེ་བསྡད་དོ། །དེས་དེ་བློན་པོ་རྣམས་ལ་དྲིས་པས་སྐྱོན་ཆགས་པ་དེ་གཉིས་ན་རེ། ཀ་ཏྱཱ་ཡ་ནས། ཁོ་བོ་ཕ་གསོད་མཁན་གྱི་རྡུལ་གྱིས་མི་རེག་པར་བྱའོ། །ཞེས་
ཟེར་འདུག་གོ་སྨྲས་པས། རྒྱལ་པོ་ན་རེ། གང་ང་ལ་དགའ་བ་དེས་མགོ་རེག་འདིའི་སྟེང་དུ་ས་སྤར་རེ་གཏོར་ཅིག་ཟེར་ཁྲོས་པས། ཀུན་གྱིས་ས་སྤར་རེ་གཏོར་བས་དེའི་སྟེང་དུ་ས་ཕུང་ཆེན་པོར་གྱུར་ཏོ། །དེས་ས་ཕུང་དབུས་སུ་སྤྱིལ་པོ་སྤྲུལ་ནས་བཞུགས། དེ་དག་ས་འཐོར་བ་ཕྱུགས་རྫི་ཞིག་གིས་མཐོང་ནས་མི་དགའ་བཞིན་འདུག་པར། བློན་པོ་ཧེ་རུ་ཀ་དང་བྷི་རུ་ཀ་དེར་ཕྱིན་ནས་ཅི་ཡིན་དྲིས་པས། ལོ་རྒྱུས་བཤད་པ་ན། དེ་གསུམ་ངུ་བཞིན་དུ་ས་ཕྱགས་པས་ཀ་ཏྱཱ་ཡ་ན་མཐོང་བ་དང་། འཕགས་པ། འདི་ཅི་ལགས་ལས་ཡིན་ནོ། །དེ་གཉིས་ཀྱིས་སྨྲས་པ། གཙུག་ཕུད་ཅན་ལས་འདི་བགྱིས་པས་རྣམ་སྨིན་ཅིར་འགྱུར། བཀའ་སྩལ་པ་ཉི་མ་བདུན་ན་གྲོང་ཁྱེར་སྒྲ་སྒྲོགས་པས་ནོན་པར་འགྱུར་རོ། །རིམ་པ་ཇི་ལྟར་འབྱུང་། ཉི་མ་དང་པོ་ལ་རླུང་བྱུང་ནས་རྡོ་བ་དང་གསེག་མ་མེད་པར་བྱེད་དོ། །གཉིས་པ་མེ་ཏོག་གི་ཆར་བབ། གསུམ་པར་གོས། བཞི་པར་དངུལ། ལྔ་པར་གསེར། 
དེའི་འོག་ཏུ 
་ལས་མཐུན་པར་བྱས་པ་དེ་དག་སྒྲ་སྒྲོགས་སུ་འཇུག །དྲུག་པར་རིན་པོ་ཆེ། བདུན་པ་ལ་སའི་ཆར་བབ་ནས་གྲོང་ཁྱེར་ནོན་ནོ། །བདག་ཅག་གཉིས་ཀྱང་ལས་དེའི་ཆ་ཅན་ལགས་སམ། མ་ཡིན་ཏེ། ཁྱེད་གཉིས་ཀྱིས་རང་གི་ཁྱིམ་ཕུག་ནས་ཆུ་ཀླུང་བར་བརྐོར་ཆུག ཁྱིམ་དྲུང་དུ་གྲུ་ཞོག་ལ་རིན་པོ་ཆེའི་ཆར་བབ་པ་ན་རིན་པོ་ཆེས་གྲུ་བཀང་ནས་བྲོས་ཤིག་གསུངས། དེ་གཉིས་རྒྱལ་པོའི་གན་དུ་སོང་ནས། ཀ་ཏྱཱ་ཡ་ན་ཆེན་པོའི་ལུང་བསྟན་བཤད་པས་སྐྱོན་ཅན་དེ་གཉིས་ན་རེ། ལྷས་དེ་འཁོར་བཅས་ཀྱི་བསོད་སྙོམས་བཅད་ཅིང་སས་ཀྱང་བཀབ་པས་ཤིས་པའི་
ཚིག་ཅི་སྨྲ། གཙུག་ཕུད་ཅན་ནི་དེ་བདེན་སྙམ། ཧེ་རུ་ཀས་ཁྱེའུ་སྔོ་བསངས་ཀཱ་ཏྱཱ་ཡ་ན་ལ་ཕུལ་ནས། འཕགས་པ། འདི་ལ་དགེ་བའི་རྩ་བ་ཅུང་ཟད་མཆིས་ན་རབ་ཏུ་དབྱུང་དུ་གསོལ། མ་མཆིས་ན་ཉིད་ཀྱི་ཞམ་རིང་བ་ལགས་སོ། །བྷི་རུ་ཀས་བུ་མོ་སྔོ་བསངས་མ། རི་མ་ལ་ཕུལ་ནས། འཕགས་མ་འདི་ལ་དགེ་བའི་རྩ་བ་ཅུང་ཟད་མཆིས་ན་རབ་ཏུ་དབྱུང་དུ་གསོལ། མ་མཆིས་ན་ཀོའུ་ཤཱམྦྷི་ན་ཁྱིམ་བདག་གདངས་ཅན་བདག་གི་ཆུང་གྲོགས་ཡིན་པས་དེ་ལ་གཏད་དུ་གསོལ། དེ་ནས་རི་མས་སྔོ་བསངས་ཅན་ཁྲིད་ནས་རྫུ་འཕྲུལ་གྱིས་སོང་སྟེ། བུ་མོ་དེ་ཁྱིམ་བདག་གདངས་ཅན་ལ་གཏད་དོ། །ཉི་མ་དེ་ལ་རླུང་བྱུང་ནས་རྡོ་བ་དང་གསེག་མ་མེད་པར་བྱས། གཉིས་པ་ལ་མེ་ཏོག་གི་ཆར་བབ་པས་སྐྱོན་ཅན་དེ་གཉིས་ཀྱིས། རྒྱལ་པོ་ང་ལས་ནུ་བཞིན་དུ་སྟེ། མེ་ཏོག་གི་ཆར་བབ་པས་གོས་ཀྱི་ཆར་ཡང་རིང་པོར་མི་ཐོགས་པར་བབ་པར་འགྱུར་རོ་ཟེར་རིམ་པ་བཞིན་དུ། གོས་སོགས་ཀྱི་ཆར་བབ་པ་ན་སྐྱོན་ཅན་དེ་གཉིས་ནི་དགའོ། །རིན་པོ་ཆེའི་ཆར་ཕབ་པ་ན་ཧེ་རུ་ཀ་དང་བྷི་རུ་ཀ་གཉིས་རིན་པོ་ཆེས་གྲུ་བཀང་ནས་བྲོས། དེ་ནས་ཧེ་རུ་ཀས་ཕྱོགས་གཞན་ཞིག་ཏུ་ཧེ་རུ་ཀའི་ཚལ་ཞེས་བྱ་བའི་གྲོང་ཁྱེར་དང་། བྷི་རུ་ཀས་ཀྱང་བྷི་རུ་ཀའི་ཚལ་ཞེས་བྱ་བའི་གྲོང་ཁྱེར་བརྩིགས་སོ། །བདུན་པ་ལ་སའི་ཆར་བབ་པ་དང་སྒྲ་སྒྲོགས་སུ་སྒྲ་ཆེན་པོ་བྱུང་ནས་རྒྱལ་པོས། འདི་ཅི་ཡིན། ས་ཡི་ཆར་བབ་བོ། །འོ་ན་ཧེ་རུ་ཀ་དང་བྷི་རུ་ཀ་ཚོལ་ཅིག །བཙལ་བས་བྲོས་པར་ཤེས་ནས། ལྷ། དེ་གཉིས་བྲོས་སོ། །རྒྱལ་པོ་འབྲོས་པར་བརྩམས་པས་མི་མ་ཡིན་གྱིས་སྒོ་བཅད་དོ། །
ཁྱེའུ་སྔོ་བསངས་ཀྱིས། འཕགས་པ་སྒྲ་འདི་ཅི་ཡིན། བུ། སྐར་ཁུང་ནས་ཕོར་པ་ཕྱིར་ཕྱུང་ཞིག །དེས་སྐར་ཁུང་ནས་ཕོར་པ་ཕྱིར་ཕྱུང་བས། སས་ཕྱེད་ཙམ་དང་། མཐར་སས་གང་ངོ་། །ཀཏྱཱ་ཡ་ནས། ད་ནི་སྤྱོད་ཡུལ་མེད་པས་འགྲོའོ་སྙམ་པ་དང་། གཉུག་མར་གནས་པའི་ལྷ་མོ་ཞིག་གིས་ཞབས་ལ་ཕྱག་བྱས་ནས། བདག་ཀྱང་འགྲོ་བ་འཕགས་པའི་བསྙེན་བཀུར་བགྱིའོ། །དེས་ཀྱང་དང་དུ་བླངས་སོ། །དེ་ནས་འཕགས་པས་སྔོ་བསངས་ཆོས་གོས་གྱི་གྲྭར་འཛིན་ཏུ་བཅུག་སྟེ་རྫུ་འཕྲུལ་གྱིས་སྟེང་གི་ནམ་མཁའ་ལ་སོང་བ་ན་ལྷ་མོ་དེའང་ཕྱི་བཞིན་དུ་འབྲང་ཞིང་སྒྲ་སྒྲོགས་ཀྱང་སས་ནོན་ཏོ། །དེ་དག་ཁར་བ་ན་ཞེས་བྱ་བའི་རི་བྲགས་སུ་ཕྱིན་ནས་གཡུལ་གྱི་གཞི་ན་འཁོད་དོ། །ཀ་ཏྱཱ་ཡ་ནས་ཁྱེའུ་སྔོ་བསངས་གཡུལ་གྱི་གཞིར་བཞག་ནས་བསོད་སྙོམས་ལ་ཞུགས་པ་དང་ལྷ་མོ་དེའི་མཐུས་འབྲུ་འཕེལ་ནས་དེ་ན་འདུག་པའི་མིས་ཁྱེའུ་ལ། ཁྱོད་ཀྱི་མཐུས་གཡུལ་གྱི་གཞིར་འབྲུ་འཕེལ་ལོ། །མི་མིན་གྱི་ལྷ་མོ་དེའི་མཐུའོ། །དེ་དེའི་གནས་སུ་སོང་ནས་རྐང་པ་གཉིས་ལ་གཏུགས་ཏེ་ལྷ་མོ་བདག་གྲོང་དུ་མཆིས་ཏེ་སླར་འོང་གི་བར་ལྡེ་མིག་འདི་ཉར་ཚགས་གྱིས་ལ་སུ་ལའང་མ་གཏད་ཅིག །དེས་བླངས་པ་དང་མི་དེ་རི་བྲགས་སུ་སོང་ནས་སྐྱེ་བོའི་ཚོགས་བསྡུས་ཏེ་ལྷ་མོ་དེའི་མཐུས་གཡུལ་གྱི་གཞིར་འབྲུ་འཕེལ་ནས་བདག་གིས་དེ་ལ་ལྡེ་མིག་གཏད་ནས་བདག་མ་གཏོགས་སུ་ལའང་མ་སྟེར་ཅིག་ཅེས་སྨྲས་ཀྱིས། བདག་གི་བུ་གཙོ་བོར་དབང་བསྐུར་ན་ཁོ་བོ་སྲོག་དང་འབྲལ་ཏེ། དེ་ལྟ་ན་ལྷ་མོ་དེ་བདག་ཅག་གི་ཡུལ་ནས་
གར་ཡང་མི་འགྲོའོ། །དེ་དག་གིས་བུ་གཙོ་བོར་དབང་བསྐུར་བ་དང་རང་ཉིད་སྲོག་དང་ཕྲལ་ལོ། །དེ་ནས་དེ་དག་གིས་གཏོར་མ་ཐོགས་ནས་ལྷ་མོ་དེ་ལ། ཁྱོད་འདིར་བཞུགས་སུ་གསོལ། །ཁོ་མོ་ཀཱ་ཏྱཱ་ཡ་ནའི་བསྙེན་བཀུར་བྱེད་དེ་འདི་ན་གནས་མེད་དོ། །འཕགས་པས། ལྷ་མོ་ཁྱོད་ཀྱིས་གང་ལས་ལྡེ་མིག་བླངས་སོ་སོམས་ཤིག །དེས་བསམ་པས་མི་དེ་ཤི་བར་ཤེས་ནས། འཕགས་པའི་གནས་གཞིའང་བྱེད་ན་འདུག་གོ །དེ་དག་གིས་ལྷ་མོ་དང་། འཕགས་པའི་གནས་ཀྱང་བྱས་སོ། །ལྷ་མོ་དེ་མར་མེ་ཁྱེར་ནས་འཕགས་པའི་གནས་སུ་འཇུག་པ་མི་ཞིག་གིས་མཐོང་ནས། འདི་འཕགས་པའི་གནས་སུ་འདོད་པས་འགྲོའོ་སྙམ་པ་དང་། དེས་དེའི་སེམས་ཤེས་ནས་ཁྲོས་ཏེ། དེར་དལ་རིམས་བཏང་ནས་སྐྱེ་བོ་ཕལ་པོ་ཆེ་ཤིའོ། །དེ་དག་གིས་ལྟས་མཁན་ལ་སྨྲས་པས། དེས་ཇི་ལྟར་གྱུར་པ་བཤད་པ་ན། ལྷ་མོ་ལ་བཟོད་པར་གསོལ་པས། ཁོ་མོ་ལ་བསྙེན་བཀུར་བྱེད་པ་ལྟར་འཕགས་པ་ལའང་བྱེད་ན་བཟོད་དོ་ཟེར། ཀཱ་ཏྱཱ་ཡ་ནས་དེར་དབྱར་གནས་ནས་སྔོ་བསངས་ཁྲིད་དེ་ལྷ་མོ་ལ་སྨྲས་ནས་བྱོན་པ་དང་། མཚན་མ་ཅུང་ཟད་སྩོལ་ཅིག་ཟེར། ཁམ་ཕོར་བྱིན་པས་དེས་མཆོད་རྟེན་བྱས་ནས་དུས་སྟོན་བྱེད་དོ། །སྔོ་བསངས་ཆོས་གོས་ཀྱི་གྲྭ་ནས་འཇུས་ཏེ་འཕྱང་ཞིང་འགྲོ་བ་ཕྱུགས་རྫིས་མཐོང་ནས་འཕྱང་བ་པ་ཞེས་མིང་དུ་གྱུར་ཏོ། །རི་བྲགས་ཤིག་ཏུ་སྔོ་བསངས་ཤིང་ལྗོན་པའི་དྲུང་དུ་བཞག་ནས་བསོད་སྙོམས་ལ་ཞུགས་སོ། །དེ་ན་རྒྱལ་པོ་བུ་མེད་པར་ཤི་ནས་སྐྱེ་བོ་རྣམས་
འདུས་ཏེ། གང་རྒྱལ་པོར་དབང་བསྐུར་བགྲོས་པས། བསོད་ནམས་དང་དབང་ཆེ་བ་དག་ཁ་མཐུན་ནས་བཙལ་བས་ཁྱེའུ་དེ་ཤིང་དྲུང་ན་གཉིད་ལོག་པར་མཐོང་ནས། དེའི་མཚན་མ་བཟུང་བས་ཤིང་ལྗོན་པ་གཞན་གྱི་གྲིབ་མ་ཤར་དུ་གཞོལ་ཡང་ཤིང་དེའི་གྲིབ་མས་ཁྱེའུའི་ལུས་མི་གཏོང་བར་མཐོང་ནས་ཁྱེའུ་འདི་བསོད་ནམས་དང་དབང་ཆེ་བ་ཡིན་གྱིས་འདི་དབང་བསྐུར་རོ་ཞེས་སྨྲས་པས་དེ་སད་པ་ན། ཁྱེའུ་རྒྱལ་སྲིད་ལོངས་ཤིག །ཁོ་བོ་རྒྱལ་སྲིད་དོན་དུ་མི་གཉེར་གྱི། འཕགས་པ་ཀཱ་ཏྱཱ་ཡ་ནའི་བསྙེན་བཀུར་བ་ཡིན་ནོ། །འཕགས་པ་དེ་ཐོས་ནས་བསམ་པས་རྒྱལ་སྲིད་བྱེད་པའི་ལས་ཡོད་པར་མཐོང་སྟེ། བུ། ལོངས་ལ་ཆོས་ཀྱི་རྒྱལ་སྲིད་གྱིས་ཤིག །དེས་ཉན་ནས་རྒྱལ་སྲིད་བྱས་སོ། །དེ་ནས་འཕགས་པ་ཡུལ་ཀོ་ཀ་ནར་ཕྱིན་པ་ན་དེའི་མ་དེར་སྐྱེས་པས་མཐོང་ནས། བུ་རིང་མོ་ཞིག་ནས་མཐོང་ངོ་། །དེས་དེ་ལ། ཡུམ་ཞེས་བག་ཕབ། ཆོས་བསྟན་པས་བདེན་པ་མཐོང་བ་ལ་བཀོད་ནས། ཡུམ། བདག་འགྲོའོ། འོ་ན་མཚན་མ་ཅུང་ཟད་སྩོལ་ཅིག །འཁར་བ་བྱིན་པས་མཆོད་རྟེན་བྱས་ཏེ་དེར་བཙུགས་སོ། །དེ་ནས་ཡུལ་དབུས་སུ་འགྲོ་འདོད་ནས་སིནྡྷུར་ཕྱིན་པ་དང་། བྱང་ལམ་ལ་གནས་པའི་ལྷ་མོ་དེས། བདག་ལའང་མཚན་མ་ཅུང་ཟད་སྩོལ་ཅིག །བདག་དེ་ལ་མཆོད་པར་བགྱིའོ། །སྟོན་པས་ཡུལ་དབུས་སུ་ལྷམ་སྒྲོག་གུ་ཅན་མི་བཅང་བར་གསུངས་པས་དེ་ལ་སྦྱིན་ནོ་སྙམ་ནས་བྱིན་པ་དང་དེས་གནས་གཞི་བྱས། དེར་བཞག་པས་ལྷམ་གྱི་དབང་ཕྱུག་ཅེས་གྲགས་སོ། །དེ་ནས་མཉན་ཡོད་དུ་ཕྱིན་པ་དགེ་
སློང་རྣམས་ཀྱིས་མཐོང་ནས། བདེ་བར་འོངས་སམ། ཅུང་ཟད་བདེ། ཅུང་ཟད་སྡུག་བསྔལ་ལོ། །ཇི་ལྟར། སེམས་ཅན་གྱི་དོན་བྱས་པས་ནི་བདེ། གཙུག་ཕུད་ཅན་སོགས་སས་མནན་པ་ནི་སྡུག་བསྔལ་ལོ། །དགེ་སློང་རྣམས་ཀྱིས་སྟོན་པ་ལ་ཞུས་པ། ཨུ་ཏྲ་ཡ་ནས་ལས་ཅི་བགྱིས་པས་ཕྱུག་པོར་སྐྱེས་ཤིང་རབ་ཏུ་བྱུང་ནས་དགྲ་བཅོམ་སྟེ། མཚོན་གྱིས་བཀུམ། བཀའ་སྩལ་པ། སྔོན་རི་བྲགས་ཤིག་ན་རྔོན་པ་ཞིག་གིས་དེ་དང་མི་རིང་བར་རྫིང་བུ་ཞིག་ཡོད་པ་དེར་སྙི་དང་བྱ་རྒྱ་མང་པོ་བཙུགས་ནས་རི་དྭགས་དང་བྱ་མང་པོ་བསད་དོ། །རང་སངས་རྒྱས་ཤིག་དེར་འདུག་པ་དང་མིའི་དྲིས་རི་དྭགས་གཅིག་ཀྱང་མ་ཟིན་པར་ནང་པར་མཐོང་ནས་ཅི་ཡིན་སྙམ་སྟེ་ཉེ་བསྐོར་མྱུལ་བས་རང་སངས་རྒྱས་མཐོང་ནས་དུག་མདས་བསྣུན་པས། དེ་ནམ་མཁར་འཕགས་ཏེ་རྫུ་འཕྲུལ་བསྟན་པས་འགྱོད་ནས་བཟོད་པར་གསོལ་བ་དང་མྱ་ངན་ལས་འདས་སོ། །རྔོན་པ་དེས་སྤོས་ཤིང་གིས་བསྲེགས་འོ་མས་ཞི་བར་བྱས། རུས་པ་གསེར་གྱི་བུམ་པར་བཅུག །མཆོད་རྟེན་བརྩིགས་མཆོད་ནས། ཡོན་གནས་འདི་ལྟར་བུར་མི་འཚམས་པའི་ལས་བགྱིས་པ་དེའི་ཆ་ཅན་དུ་མ་གྱུར་པར་མཆོད་པའི་དགེ་བས་ཕྱུག་པོར་སྐྱེ་ཞིང་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱས་ནས་ཡོན་ཏན་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །རྔོན་པ་དེ་ནི་ཨུ་ཏྲ་ཡ་ནའོ། །ཡང་ཞུས་པ། ཀཱ་ཏྱཱ་ཡ་ན་དང་། གཙུག་ཕུད་ཅན་སོགས་ལས་ཅི་བགྱིས་པས་སས་ནོན་བཀའ་སྩལ་པ། སྔོན་རི་བྲགས་ཤིག་ན་ཁྱིམ་བདག་ཕོ་མོ་ལ་བུ་ཚ་མིང་
སྲིང་གཉིས་ཤིག་ཡོད། དེ་ཆེན་པོར་གྱུར་ཀྱང་། བུ་མོ་དེ་ལ་སློང་བ་འགའ་ཡང་མ་བྱུང་། དེར་རང་སངས་རྒྱས་ཤིག་སོང་བ་ན་བུ་མོ་དེས་ཕྱག་དར་བོར་བ་རང་སངས་རྒྱས་དེའི་མགོ་ལ་ཕོག །མོས་མཐོང་ཡང་འགྱོད་པ་མ་སྐྱེས་སོ། །སྟེས་དབང་གིས་དེའི་ཉིན་མོར་སློང་མོར་སློང་བ་བྱུང་ནས་མིང་པོས། ཁྱོད་ཀྱིས་དེ་རིང་ལས་ཅི་བགྱིས་པས་སློང་བ་འོངས། རབ་ཏུ་བྱུང་བའི་སྟེང་དུ་ཕྱག་དར་བོར་རོ་སྨྲས་པས། དེ་ཡི་རང་ངོ་། །དེར་བུ་མོ་དེས་བུ་མོ་གཞན་དག་ལ། འཇིག་རྟེན་ན་བུ་མོ་སློང་བ་མི་འོང་བ་དེས་རང་སངས་རྒྱས་ལ་ཕྱག་དར་བོར་ན་སློང་བ་འབྱུང་ངོ་། །ཞེས་སྡིག་པ་ཅན་གྱི་ལྟ་བ་བྱུང་ངོ་། །རང་སངས་རྒྱས་དེ་གཞན་ཞིག་ཏུ་སོང་བ་དང་དྲང་སྲོང་མངོན་ཤེས་ལྔ་དང་ལྡན་པ་རྣམས་ཀྱི་སྟེང་དུ་དོར་བས་དེ་རྣམས་ཀྱང་སོང་བ་དང་ཕ་མའི་སྟེང་དུ་དོར་རོ། །དེ་ན་ཁྱིམ་བདག་དགེ་བའི་ཆོས་ཅན་གཉིས་ཡོད་པ་དེས་ཆོས་ལོག་དེ་བསྣུབས་སོ། །རང་སངས་རྒྱས་ལ་ཕྱག་དར་བོར་བའི་བུ་མོ་དེ་ནི་གཙུག་ཕུད་ཅན་ནོ། །སྐྱེ་བོའི་ཚོགས་དེ་ནི་སྒྲ་སྒྲོགས་ན་གནས་པའི་སྐྱེ་བོའི་ཚོགས་སོ། །ཁྱིམ་བདག་གཉིས་ནི་ཧེ་རུ་ཀ་དང་བྷི་རུ་ཀའོ། །བུ་མོའི་མིང་པོ་དེ་ནི་ཀཱ་ཏྱཱ་ཡ་ན་ཡིན་ནོ་གསུངས། ཀ་ཏྱཱ་ཡ་ནའི་མཛད་པ་ཉིད་སྟོན་པའི་མཛད་པ་ཡིན་པ་དང་འགྲོ་ཕན་རླབས་པོ་ཆེ་ཡིན་པས་བཀོད་པར་གནང་བ་ཡིན་ནོ། །
༈ ཡལ་འདབ་ཞེ་གཉིས་པ་ནི་གོ་སླའོ། །སྐབས་འདིར། མཁས་པ་ཤཱ་རིའི་བུ་ལས་རབ་ཏུ་བྱུང་བ་དེས། ཞིང་པས་ཞིང་ལ་ཆུ་བཀྱེ་བ། མདའ་མཁན་སྨྱུག་མ་བསྲང་བ། ཤིང་བཟོས་ཤིང་རྟའི་འཁོར་ལོ་བཟོ་བ་སོགས་མཐོང་བ། སེམས་མེད་འདི་རྣམས་འདི་ལྟར་བཅོས་སུ་ཡོད་ན། སེམས་ལྡན་ལྟ་ཅི་སྨོས་སྙམ། བསམ་གཏན་ལ་བརྩོན་པ་དྲག་པོ་བསྐྱེད་དེ་མཉམ་པར་གཞག་མཁན་པོས་འཚོ་བ་སྦྱར། དེ་དགྲ་བཅོམ་དུ་ཉེ་བ་ན། ཤ་རིའི་བུ་བསོད་སྙོམས་ལས་འོང་བ། ནང་དུ་འཇུག་ན་དེའི་བར་ཆད་དུ་འགྱུར་བ་དགོངས་ནས་སངས་རྒྱས་ཀྱིས་རེ་ཞིག་ཤཱ་རིའི་བུ་དང་གཏམ་འཕྲོས་གནང་བས་འགོར་ནས་སྐབས་དེར་དགྲ་བཅོམ་ཐོབ་བོ། །༈ ཡལ་འདབ་ཞེ་གསུམ་པ་ནི། མདོ་སྡེ་ལས་༼ཨ༽གསེར་མདོག་གི་སྔོན་གྱི་སྦྱོར་བ་ཞེས་པའི་ཚིག་བསྡུ་ན། མི་རྣམས་ཚེ་ལོ་བརྒྱད་ཁྲི་བཞི་སྟོང་ཐུབ་པ་ན། གྲོང་ཁྱེར་གསེར་ཅན་དུ་རྒྱལ་པོ་གསེར་མདོག་ལ་གྲོང་ཁྱེར་བརྒྱད་ཁྲི་གྲོང་ས་ཡ་ཕྲག་ལྔ་བདུན་འབུམ། རི་འོར་བ་དྲུག་ཁྲི། བློན་པོ་ཁྲི་བརྒྱད་སྟོང་། བཙུན་མོ་ཉི་ཁྲི་ཡོད་དེ་འབྱོར་ཞིང་
རྒྱས་པས་རྒྱལ་སྲིད་ཆོས་བཞིན་སྐྱོང་ཞིང་། སྦྱིན་པ་རྒྱ་ཆེར་གཏོང་ངོ་། །གྲོང་མི་དང་ཚོང་པ་ཐམས་ཅད་ལ་ལམ་ཁྲལ་དང་དཔྱ་ཁྲལ་མི་ལེན་པར་མངའ་འོག་བདེ་ཞིང་སྐྱིད་པར་གྱུར་ཏོ། །ནམ་ཞིག་ཆར་མི་འབབ་པའི་རྒྱུ་སྐར་ངན་པ་བྱུང་ནས་ལོ་བཅུ་གཉིས་སུ་མུ་གེ་མི་བཟད་པ་འབྱུང་བའི་ལྟས་ཤར་བ་རྒྱལ་པོའི་སྙན་ལམ་དུ་ཞུས་པས་འཛམ་བུ་གླིང་པ་ཐམས་ཅད་ལ་ཁ་ཟས་ཆ་མཉམ་པར་བགོས་པས་ལོ་བཅུ་གཅིག་ཏུ་ཐམས་ཅད་བདེ་བར་འཚོ། དེ་ནས་མུ་གེས་ཉེན་པ་བཀྲེས་པ་དང་སྐོམ་སྟེ་ཤི་བ་ཡང་དུ་མ་ཞིག་གོ །རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་ཅིང་། དེའི་ཚེ་རང་སངས་རྒྱས་ཤིག་རྫུ་འཕྲུལ་གྱིས་ནམ་མཁའ་ལ་འཕུར་ཏེ་འོང་བས་ཡ་མཚན་གྱི་མིག་བགྲད་དེ་ཟས་ཀྱི་ལྷག་མ་བྲེའུ་ཆུང་གང་དེ་བསོད་ནམས་ཀྱི་ཕྱིར་ཕུལ་ནས་སྨོན་ལམ་བཏབ་པས། སྐད་ཅིག་དེར་རང་སངས་རྒྱས་ཀྱི་བྱིན་རླབས་དང་རྒྱལ་པོའི་སྨོན་ལམ་འགྲུབ་པས་ནམ་མཁའ་ལ་སྤྲིན་ལངས་ནས་རླུང་གིས་རྡུལ་ཕྱག་སྟེ། འབྲས་ཆན། ཕྱེ། ཟན་དྲོན། ཤ་དང་ཉ་ཤ །ལ་ཕུག །ལོ་མ། མེ་ཏོག །འབྲས་བུ། ཏིལ། ཏིལ་མར། བུར་མར། ཁ་ར་སོགས་བཟའ་བཅའ་མྱང་བར་བྱ་བའི་ཆར་རྒྱ་ཆེན་པོར་བབས་སོ། །གཞན་ཡང་འབྲུའི་རིགས་དང་། ཏིལ་མར་དང་། རས་ཆེན། ཟས་རྣམ་པ་སྣ་ཚོགས་ཀྱི་ཆར་ཡང་ཞག་མ་བདུན་རེ་བདུན་རེར་བབས་སོ། །གསེར་། དངུལ། ཤེལ། བཻཌཱུརྱ། མུ་ཏིག་དམར་པོ། རྡོའི་སྙིང་པོ། །སྤུག་སྟེ་རིན་པོ་ཆེ་སྣ་བདུན་གྱི་ཆར་ཡང་ཞག་བདུན་དུ་བབས་པས་
དབུལ་བ་ཡང་དག་པར་བཅད་དེ། གསེར་མདོག་ནི་སྟོན་པ་ཉིད་ཡིན་གསུངས་སོ། །༈ ཡལ་འདབ་ཞེ་བཞི་པ་ནི་གོ་སླའོ། །༈ ཡལ་འདབ་ཞེ་ལྔ་པ་ནི། ལྷས་སྦྱིན་གྱིས་མ་སྐྱེས་དགྲ་ལ་ཁྱོད་ཀྱི་ཕ་ནི་སྐྲ་ཁ་དོག་ལན་གསུམ་དུ་འགྱུར་ཡང་འདོད་ཡོན་ལ་ཞེན་པས་བུ་ལ་རྒྱལ་སྲིད་མི་གཏོད་ཀྱི། དེ་ཕ་རོལ་གནོན་པ་གྱིས་ཤིག་ཅེས་སོགས་ཕྲ་མ་མང་པོ་དག་འཇུག་པར་བྱེད་དོ། །མ་སྐྱེས་དགྲ་ཡང་དེ་ལ་ཉན་ཏེ། རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ལ་འཇམ་འབུལ་བའི་ཕྱིར་འོད་མའི་ཚལ་དུ་འགྲོ་བ་ལ། མ་སྐྱེས་དགྲས་རྡོ་རྗེ་རྩེ་གཅིག་པ་འཕངས་པས་འཇམ་གྱི་རྫིང་བུ་ལ་ཕོག་སྟེ་ཆག་ནས་སླར་ལྡོག་གོ །འདི་སྐབས་སྟོན་པས་མོའུ་འགལ་བུ་མངགས་ནས་གྲུ་འཛིན་གྱི་བུ་བྱེ་བ་ཉི་ཤུ་པ་ལས་བསོད་སྙོམས་བླངས་པའི་གསོལ་ལྷག་གཟུགས་ཅན་སྙིང་པོ་ལ་གནང་བ་སོགས་གོང་བཞིན་ནོ། །དེར་མ་སྐྱེས་དགྲ་ལ་སྐྱེ་བོ་ཐམས་ཅད་འཕྱ་སྟེ་འདི་ཡབ་ཀྱི་དགྲར་གྱུར་ཞེས་མ་སྐྱེས་པ་ནས་ལུང་བསྟན་ན་སྔོན་ནས་ཅིའི་ཕྱིར་མི་བཀུམ། ཁ་ཅིག་ན་རེ་ལུང་བསྟན་པ་ཐམས་ཅད་བདེན་ནམ་ཅི། རྒྱལ་པོས་མ་ཉེས་ཏེ། ལྷས་བྱིན་ནོ། །གཞན་དག་ན་རེ། རྒྱལ་པོ་དང་ལྷས་བྱིན་ཀྱང་མ་ཉེས་ཏེ། འདི་གནས་ནས་བསྐྲད་པར་མ་བྱས་པས་དགེ་འདུན་གྱིས་ཉེས་སོ། །དེར་རྒྱལ་པོས་
བསམ་པ་བདག་གི་ལུས་ངན་པ་འདི་ལ་བརྟེན་ནས་སྟོན་པ་དང་དགེ་འདུན་ལ་མི་སྙན་པར་བརྗོད་སྙམ་ཡིད་ཞུམ་པར་འདུག་གོ །དེ་ནས་ལྷས་བྱིན་གྱིས་རྟག་པར་བསྐུལ་ཏེ། མ་སྐྱེས་དགྲས་ཕ་རོལ་གནོན་པའི་ལས་ཁོ་ནས་དུས་འདའ་སྟེ། དང་པོར་ཡུལ་ཙམ་པ་མ་སྐྱེས་དགྲ་ལ་བྱིན་པ་དང་། དེ་ནས་མ་ག་དྷཱ་ཡང་རིལ་པོར་བྱིན་པ་དང་། དེ་ནས་བང་མཛོད་རྣམས་ཀྱང་བྱིན་པར་དང་། དེ་ནས་འཇམ་པོར་སྨྲ་བ་རྣམས་ཀྱིས་ཀྱང་མ་བཟློགས་ཏེ། ཡབ་ཀྱིས་ཚིག་རྩུབ་པོས་བཟློགས་པར་བྱས་པ་ན། དེ་ཁྲོས་ནས་ཡབ་བཙོན་ཁང་དུ་བཅུག་གོ །དེ་ལ་སྐབས་འདིའི་ཕ་རོལ་གནོན་པ་ཞེས་བྱ་བ་ནི་ལོག་པའི་སྤྱོད་པ་སྟེ། མི་འོས་པའི་དཔྱ་བསྡུད། མི་འོས་པ་ལ་ཆད་པས་གཅོད། མ་རུངས་པ་གཉའ་རེངས་སུ་འཇུག །བཟང་པོ་རྣམས་ནི་སྨད་ཅིང་བསྡིགས། ངན་པ་རྣམས་ནི་མགོ་དཔངས་གཏོད། ལྟོགས་འདོད་ཆེན་པོས་རྒྱལ་ཁམས་རླག་པར་བྱེད་པའི་བདག་ཉིད་དོ། །དེ་ནས་བཙོན་ཁང་དུ་ཡབ་ལ་ཟས་སྐྱེལ་བ་ཡང་བཀག་པ་དང་། མ་སྐྱེས་དགྲའི་མ་བཙུན་མོ་ལུས་འཕགས་མས། རྐང་གདུབ་ཀྱི་སྦུབས་ཆུས་བཀང་བ་དང་། ལུས་ལ་ལྡེ་གུས་བྱུགས་ཏེ་སོང་ནས། ཟས་སྐོམ་དེ་ཙམ་གྱིས་འཚོ་བ་ཡིན་པ་ལ་དེ་ཡང་བཀག་གོ །དེ་ནས་བཟའ་བཏུང་མེད་ཀྱང་བཅོམ་ལྡན་འདས་བྱ་རྒོད་ཕུང་པོའི་རི་ལ་ཞབས་འཆག་པར་མཛད་དེ། དེའི་འོད་ཟེར་དཀར་ཁུང་ཆུང་ངུ་ནས་འཇུག་ཅིང་། རྒྱལ་པོས་ཀྱང་དཀར་ཁུང་ནས་བཅོམ་ལྡན་འདས་ཀྱི་སྐུ་མཐོང་བས་དགའ་བ་སྐྱེས་ཏེ་དེས་འཚོའོ། །དེས་དཀར་ཁུང་ཡང་བསྲུབས་
པ་ན། སྟོན་པའི་སྐུའི་འོད་ཟེར་བཙོན་ཁང་གི་སེར་ཁ་ནས་འཇུག་ཅིང་མཐོང་བས་འཚོ་བ་ལས། དེ་ཡང་བཀག་སྟེ། སྤུ་གྲིས་རྐང་པ་ལ་རྨ་བྱུང་བ་དང་། རྒྱལ་པོའི་ཐུགས་སྡུག་བསྔལ་གྱིས་ཤིན་ཏུ་གདུངས་པ་ལ། སྟོན་པས་མོའུ་འགལ་གྱི་བུ་ལ་བཀའ་སྩལ་ཏེ། དེས་རྫུ་འཕྲུལ་གྱིས་བཙོན་ཁང་དུ་སོང་ནས། སྟོན་པའི་བཀས་རྒྱལ་པོ་ལ་ནད་མེད་པར་གྱུར་ཅིག །ངས་ཁྱོད་ལ་དགེ་བའི་བཤེས་གཉེན་གྱི་བྱ་བ་གང་ཡིན་པ་དེ་ནི་སྔར་ནས་བྱས་ཟིན་ཏེ་ངན་སོང་ལས་ཐར་པར་བྱས་སོ། །འདི་ནི་རང་གི་ལས་ཀྱི་འབྲས་བུ་མྱོང་བ་ཡིན་པས་ལས་སྐྱབས་སུ་གྱིས་ཤིག །ཅེས་སོ། །བཀའ་དེ་བདེན་པར་ཤེས་ནས་རྒྱལ་པོས་སྨྲས་པ། འཕགས་པ་ཁ་ཟས་བཟང་པོ་གང་ན་ཡོད། རྒྱལ་ཆེན་རིགས་བཞི་ལྷའི་གནས་ནའོ། །དེ་ནས་མོའུ་འགལ་བུ་ཚུར་བྱོན། སྐབས་འདིར་མ་སྐྱེས་དགྲའི་བུ་འཆར་བྱེད་བཟང་པོ་སོར་མོའི་རྩེ་མོ་ལ་ཕོལ་མིག་བྱུང་སྟེ་ངུས་སོ། །མ་སྐྱེས་དགྲས་དེའི་སོར་མོ་ཁར་བཅུག་པ་ལས་ཕོལ་མིག་ཁ་ནང་དུ་བརྡོལ་བ་དང་ས་ལ་ཕོ་བས་རྣག་ཁྲག་མཐོང་བ་ན་དེ་ལྷག་པར་ཡང་ངུའོ། །དེར་ལུས་འཕགས་མོས་སྨྲས་པ། འདི་ནི་རིགས་བརྒྱུད་ལ་ཡོད་དེ། ཁྱོད་ཀྱང་སྔོན་འདི་འདྲ་བར་གྱུར་པ་ལས། ཡབ་ཀྱིས་ཁྱོད་སྐྲག་སྟེ་ངུ་ཡིས་དོགས་ནས་རྣག་ཁྲག་ཁར་མིད་པ་ཡིན་ནོ། །དེར་མ་སྐྱེས་དགྲ་ཞེ་སྡང་དང་བྲལ་ཞིང་། བདག་གི་ཡབ་དེ་འདྲ་བར་བདག་ལ་བྱམས་ན་ཡབ་གསོན་ནོ་ཞེས་ཟེར་བ་དེ་ལ་རྒྱལ་སྲིད་ཀྱི་ཕྱེད་སྦྱིན་ནོ། །སྨྲས་པས་སྐྱེ་བོ་མང་པོ་ཞིག་རབ་ཏུ་དགའ་བས་བཙོན་ཁང་གི་ཕྱོགས་སུ་རྒྱུགས་པ་ན། གཟུགས་
ཅན་སྙིང་པོས་ཅ་ཅོའི་སྒྲ་ཆེན་པོ་ཚོར་བས་དངངས་ཏེ་དུས་ལས་འདས་ན། དེ་མ་ཐག་རྣམ་ཐོས་སྲས་ཀྱི་པང་པར་སྐྱེས་ཏེ་བདུད་རྩི་ལ་ལོངས་སྤྱོད་དོ། །རྣམ་ཐོས་བུས་ཁྱོད་སུ་ཡིན་ཞེས་དྲིས་པར། ང་ནི་རྒྱལ་བ་ཁྱུ་མཆོག་གོ་ཞེས་སྨྲས་པས་མཚན་དེ་བཞིན་དུ་གྲགས་སོ། །དེར་མ་སྐྱེས་དགྲ་ཡབ་འདས་པའི་མྱ་ངན་མི་བཟད་པས་ནོན་ཏེ། དེ་གསོང་བར་བྱ་ཕྱིར་བློན་པོ་རྣམས་ཀྱིས་ལྷོ་ཕྱོགས་ནས་འོངས་པའི་གར་མཁན་ཞིག་བོས་ཏེ་གར་བྱེད་དུ་བཅུག་ཀྱང་མྱ་ངན་མ་སངས་ཏེ། གར་མཁན་རྣམས་ཕྱིར་བྱུང་བ་ན་ཕྱོགས་དེར་སངས་རྒྱས་བྱོན་པ་མཐོང་སྟེ། དད་པ་སྐྱེས་ནས་རྫ་རྔ་བརྡུངས་ཤིང་གར་བྱས་སོ། །སྟོན་པས་འོད་ཟེར་སྤྲོ་བསྡུ་མཛད་ནས་གར་མཁན་དེ་རང་སངས་རྒྱས་རྔ་སྒྲ་ཞེས་བྱ་བར་འགྱུར་བར་ལུང་བསྟན་ཏོ། །སྐབས་དེར་སེར་སྐྱ་བཟང་མོ་རབ་ཏུ་བྱུང་བ། འོད་སྲུང་ཆེན་པོས་དགེ་བའི་བཤེས་གཉེན་གྱི་བྱ་བ་བྱས་ཟིན་ནས་གྲོང་དུ་བསོད་སྙོམས་ལ་ཕྱིན་པ་ན་བཟང་མོ་སྤྱོད་ལམ་ཀུན་ནས་མཛེས་པ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་བློན་པོ་ངན་སེམས་ཅན་ཞིག་གིས་མཐོང་སྟེ། མ་སྐྱེས་དགྲའི་མྱ་ངན་སེལ་ཕྱིར་བཟུང་ནས་གོས་དང་རྒྱན་གྱིས་བརྒྱན། རྒྱལ་པོ་ལ་ཕུལ་བ་བཟང་མོའི་སྔོན་ལས་ཀྱིས། མ་སྐྱེས་དགྲས་མཐོང་མ་ཐག་ཏུ་ཆགས་ནས་ལྷན་ཅིག་དགའ་མགུར་སྤྱད་དོ། །དེ་ནང་པ་གསོ་སྦྱོང་གི་ཚེ་བཟང་མོ་ཚོགས་ན་མི་སྣང་ངོ་། །སྐྱེ་དགུའི་བདག་མོ་ཆེན་མོས་ཇི་ལྟ་བར་གྱུར་པ་མཐོང་ནས་ཨུཏྤལའི་མདོག་མངགས་པས།
དེས་རྫུ་འཕྲུལ་གྱིས་མ་སྐྱེས་དགྲའི་ཁྱིམ་གྱི་སྐར་ཁུང་ནས་ཞུགས་ཏེ། བཟང་མོ་ཁྱོད་ཀྱིས་ཐོག་མེད་ནས་གོམས་པའི་ཁམས་གསུམ་གྱི་ཉོན་མོངས་པ་རྣམས་སྤངས་ན་ཅིའི་ཕྱིར་རྫུ་འཕྲུལ་རོ་དང་འདྲ་བ་མུ་སྟེགས་ཅན་དང་ཐུན་མོང་བ་འདི་མངོན་དུ་མ་བྱས། དེས་སྨྲས་པ། རྫུ་འཕྲུལ་གྱིས་ལམ་མི་ཤེས་སོ། །དེས་དེ་ལ་རྫུ་འཕྲུལ་གྱི་ལམ་བསྟན་ནས་བསམ་གཏན་བཞི་ལ་བརྟེན་ནས་བསྒྲུབས་ཏེ་རྒྱན་ཐམས་ཅད་ཀྱིས་བརྒྱན་བཞིན་དུ་དགེ་སློང་མའི་དབྱར་ཁང་དུ་སོང་ངོ་། །དགེ་སློང་མ་བཅུ་གཉིས་སྡེས་མཐོང་ནས་སྐྱེ་དགུའི་བདག་མོ་ཆེན་མོ་ལ་སྨྲས་པ། བདག་ཅག་ནི་རྒྱལ་པོའི་ཆུང་མ་དང་ལྷན་ཅིག་གསོ་སྦྱོང་མི་བགྱིའོ། །དེས་སྨྲས་པ། བཟང་མོ་སོང་ལ་རྒྱལ་པོ་ལ་གོས་དང་རྒྱན་ཐམས་ཅད་སླར་བྱིན། རྒྱལ་པོས་གནང་བར་གྱིས་ཏེ་གོས་ངུར་སྨྲིག་བགོས་ཏེ་ཤོག་ཅིག །དེ་ནས་བཟང་མོ་སླར་སོང་བ་དང་། མ་སྐྱེས་དགྲས་འཁྱུད་པར་བརྩམས་པས། བཟང་མོ་ངང་པའི་རྒྱལ་པོ་འདབ་མ་བརྐྱངས་པ་ལྟར་སྟེང་གི་ནམ་མཁར་འཕགས་སོ། །དེ་རྒྱལ་པོས་མཐོང་ནས་འཇིགས་ཏེ་སྨྲས་པ། ཁྱོད་ཅི་ལྷ་འམ་ཀླུ་མོ་འམ། །གནོད་སྦྱིན་སྲིན་མོ་དྲི་ཟ་མ། །བུད་མེད་འདྲེ་མོའམ་ཅི་ཡིན་པ། །དྲིས་པ་དེ་ནི་བདག་ལ་གསུངས། །བཟང་མོས། བདག་ནི་ལྷ་མོ་ཀླུ་མོ་མིན། །དྲི་ཟ་གནོད་སྦྱིན་སྲིན་མོ་མིན། །མི་དབང་བདག་ནི་བདེར་གཤེགས་ཀྱི། །བྱ་བ་བྱས་པའི་ཉན་ཐོས་མའོ། །དེ་ནས་མ་སྐྱེས་དགྲ་ཟུག་རྔུ་གཉིས་པས་གནད་དུ་བསྣུན་ནས། ཀྱེ་མ་ཀྱེ་ཧུད་སྡིག་པ་ཆེན་པོ་བྱས་སོ་སྙམ་དུ་སེམས་པ་ལས་བརྒྱལ་ནས་འགྱེལ་བ་ལ་ཆུས་
གཏོར་ཏེ་གསོས་སོ། །འཕགས་མ། མར་གཤེགས། བདག་ཉེས་པར་སྤྱོད་པའི་འདམ་དུ་བྱིང་བ་སུག་པ་ནས་དྲང་དུ་གསོལ། དེ་ནས་བཟང་མོས་དེ་རྗེས་སུ་བཟུང་བའི་ཕྱིར་བབས་ནས་སྟན་བཤམས་པ་ལ་འདུག་གོ །དེ་ནས་མ་སྐྱེས་དགྲས་གུས་པ་ཆེན་པོས་བཟང་མོའི་རྐང་པ་གཉིས་ལ་གཏུགས་ནས། འཕགས་མ། བཟོད་པར་མཛད་དུ་གསོལ། རྒྱལ་པོ་ཆེན་པོ། །བཟོད་དོ། །དེ་ནས་རྒྱན་གོས་རྒྱལ་པོ་ལ་བྱིན། རྒྱལ་པོས་གོས་ངུར་སྨྲིག་དག་ཕུལ་ནས་རྐང་པ་ལ་ཕྱག་བྱས་ཏེ། འཕགས་མ། ཁྱོད་ལ་ཇི་སྲིད་འཚོའི་བར་དུ་ཆོས་གོས་དང་། བསོད་སྙོམས་དང་། ཡོ་བྱད་རྣམས་དབུལ་བར་བགྱིའོ། །བཟང་མོས་སྨྲས་པ། ལྷ་ཕལ་ཆེར་བདག་གི་ལས་ཀྱིས་ཉེས་ཏེ་ཁྱོད་ཀྱིས་མ་ཉེས། བཅོམ་ལྡན་འདས་ཀྱིས། གང་དུ་གནས་ཀྱང་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ན་མེད། །རི་རྣམས་ཀྱི་ནི་གསེབ་ཏུ་ཞུགས་ནའང་མིན། །ཞེས་གསུངས་པས་སོ། །གཞན་ཡང་། ཇི་ལྟར་གྲིབ་མ་མི་ཡི་རྗེས་འབྲང་བ། །འདུག་ན་འདུག་ལ་འགྲོ་ན་འགུལ་བ་ལྟར། །དེ་བཞིན་དགེ་དང་མི་དགེ་གྲིབ་མ་ལྟར། །སངས་རྒྱས་སྨྲ་བ་བླ་ན་མེད་པས་གསུངས། །དེ་ནས་བཟང་མོས་རྒྱལ་པོ་ལ་ཚིག་སྙིང་སྡུད་པར་བྱེད་པ་དེ་ལྟ་བུའི་ཆོས་བསྟན་ནས་སྟེང་གི་ནམ་མཁར་འཕགས་ཏེ་དགེ་སློང་མའི་དབྱར་ཁང་དུ་སོང་ངོ་། །དེའི་ཚེ་རྒྱལ་པོ་མ་སྐྱེས་དགྲ་ལ་མཐའི་རྒྱལ་ཕྲན་བཅུ་བདུན་ཙམ། བློ་གྲོས་གཅིག་ཏུ་བྱས་ན་སོང་ལོག་སྟེ། མ་སྐྱེས་དགྲ་འདིས། ཕ་ཆོས་དང་ལྡན་པའི་
རྒྱལ་པོ་ཡང་བཀྲོངས། བདག་ཅག་རྣམས་ཀྱང་གཙེས་ཀྱི་འདི་བསད་པའམ་རྒྱལ་སྲིད་ལས་ཕྱུང་སྟེ་བསྐྲད་པར་བྱའོ་ཞེས་དཔུང་ཡན་ལག་བཞིའི་གོ་བསྐོན་ནས་འོངས། རྒྱལ་པོའི་ཁབ་ཀྱི་གྲོང་ཁྱེར་ཕྲུ་མས་བསྐོར་ཏེ་འདུག་གོ །ཀླུ་སོག་མ་མེད་ཁྲོས་པས་ཀྱང་སེར་བ་ཕབ་སྟེ་ལོ་ཏོག་རྨང་མེད་པར་བྱས། དཀའ་ཐུབ་ཀྱི་ཆུ་ལྔ་བརྒྱ་དང་། ཆུ་མིག་དང་མཚེའུ་རྣམས་ཀྱང་བསྐམས། ཆུ་གཞན་རྣམས་མཐའི་རྒྱལ་ཕྲན་རྣམས་ཀྱིས་དུག་བཏབ་སྟེ། རྒྱལ་པོའི་ཁབ་པ་རྣམས་ཀྱིས་བཏུང་དུ་མི་རུང་བར་བྱས། ཡམས་ནད་ཆེན་པོ་མི་བཟད་པ་མི་རོ་སྐྱེལ་བར་ཁྱོགས་ནས་ཁྱོགས་སུ་འདོམས་པ་དག་ཀྱང་བྱུང་། མ་སྐྱེས་དགྲ་ཉིད་ཀྱང་ནད་ཚབས་ཆེན་པོ་དག་གིས་བཏབ། དེར་ཤིན་ཏུ་སྡུག་བསྔལ་བར། མ་ལུས་འཕགས་མས་སྨྲས་པ། འདི་ནི་སངས་རྒྱས་ལ་བྱ་བ་ངན་པ་ཁོ་ནར་བྱས་པའི་མཐུ་སྟེ། ད་བཅོམ་ལྡན་འདས་ལ་བཟོད་པར་གསོལ་ཅིག །མ་སྐྱེས་དགྲས་སྨྲས་པ། ད་ནི་ངོ་ཚ་སྟེ་དྲུང་དུ་འགྲོ་མི་ཕོད་དོ། །དེ་ན་རེ། བཅོམ་ལྡན་འདས་ནི་ཙནྡན་དང་སྟེའུར་མཚུངས་པ་ཡིན་གྱི། ངེས་པར་རྗེས་སུ་འཛིན་པར་འགྱུར་རོ། །དེ་ནས་དེས་ཕོ་ཉ་ཞིག་མངགས་ཏེ། དེས་ཀྱང་རིམ་གྱིས་སྟོན་པའི་སྤྱན་སྔར་སོང་སྟེ། རྒྱལ་པོ་མ་སྐྱེས་དགྲའི་མིང་གིས་ཕྱག་འཚལ། བསྙུན་ཡང་དྲིས། མ་སྐྱེས་དགྲའི་ཞུ་བ་གསོལ་ནས། གང་འཇིག་རྟེན་ན་བུ་ངན་པ་ནི་མཆིས་ལ་ཕ་ངན་པ་ནི་མ་མཆིས་པས་དེའི་སླད་དུ་ཐུགས་བརྩེ་བས་རྒྱལ་པོའི་ཁབ་ཏུ་གཤེགས་སུ་གསོལ་ཞེས་ཞུས་པ་ན། འདུལ་བའི་དུས་སུ་དགོངས་ཏེ། མཉན་ཡོད་ནས་མ་ག་དྷཱར་རིམ་གྱིས་གཤེགས་སོ། །
དེར་ལྷ་རྣམས་ཀྱིས་རླུང་བཏང་སྟེ་དུག་བཏབ་པའི་ཆུ་རྣམས་ནི་བསྐམས། ཆར་ཕབ་པས་ཆུ་བཟང་པོ་དག་ཀྱང་བྱུང་། སངས་རྒྱས་ལ་དད་པའི་ལྷ་མཐུ་བོ་ཆེ་དག་ཀྱང་འདུས་པས་ཡམས་ནད་ཀྱང་ཞི། མཐའི་རྒྱལ་ཕྲན་རྣམས་ཀྱིས་ཀྱང་སྟོན་པ་འབྱོན་པར་ཐོས་པས་དམག་རྣམས་རང་གནས་སུ་ལྡོག་གོ །མ་སྐྱེས་དགྲས་བཅོམ་ལྡན་འདས་མཐོང་བར་ཙམ་གྱིས་དད་པ་ཆེན་པོ་སྐྱེས་ནས་བསུས་ཏེ་གྲོང་ཁྱེར་གྱི་སྒོ་ཐེམ་ལ་ཞབས་བཞག་པས་ས་གཡོ་བ་ལ་སོགས་པའི་ཆོ་འཕྲུལ་བསྟན་ཏེ། དེའི་ཚེ་ཟླ་བ་གསུམ་དུ་རྒྱལ་པོ་མ་སྐྱེས་དགྲས་ཡོ་བྱད་ཐམས་ཅད་ཀྱིས་མཆོད་པར་བྱེད་ཅིང་རྒྱལ་པོའི་ཁབ་འཚོ་བྱེད་ཀྱི་ཀུན་དགའ་ར་བ་ཨ་སྨྲའི་ཚལ་དུ་དབྱར་གནས་པས་བཞུགས་སོ། །དེ་ནས་མི་རིང་བར་དབྱར་ཟླ་འབྲིང་པོའི་ཉ་དབུས་མའི་མཚན་མོ་ཚེས་དང་གཟའ་སྐར་ཐམས་ཅད་བཟང་བར་གྱུར་པ་ལ། མཚན་མོ་ཟླ་འོད་ལ་མ་སྐྱེས་དགྲ་བློན་པོའི་ཚོགས་ཀྱིས་བསྐོར་ནས་ཁང་བཟང་དུ་སོང་སྟེ། དུས་བཟང་པོ་འདི་ལྟ་བུ་ལ་ངས་ཅི་ཞིག་བྱས་ན་བཟང་ཞེས་འཁོར་རྣམས་ལ་དྲིས་པས། སླས་ཀྱི་བུད་མེད་གཅིག་ན་རེ། འདི་ལྟ་བུ་ལ་འདོད་ཡོན་ལྔར་རོལ་ན་ལེགས་སོ་སྙམ་མོ་ཟེར། གཞན་ཞིག་ནི། གྲོང་ཁྱེར་གྱི་ཤུལ་ལམ་རྣམས་ཉུལ་ཞིང་ལྟ་རྟོག་མཛད་ན། སོགས་དང་། བུས་ནི། དཔུང་གོ་བསྐོན་ཏེ་དགྲ་གཞོམ་ན། ཞེས་དང་། བློན་པོ་རྣམས་ཀྱིས། སོ་སོར་གྱིས། སྟོན་པ་དྲུག་པོ་རེ་རེ་ནས་བསྙེན་བཀུར་ན་ཞེས་སོགས་ཡང་དག་པའི་དགེ་བ་ལ་སྤྲོ་བ་སྐྱེད་པ་འགའ་ཡང་མེད་དེ་ཕལ་ཆེར་ལོག་པར་མོས་
པ་ཤ་སྟག་འབྱུང་བ་ནི་དངོས་པོའི་སྟོབས་ཡིན་ནོ། །འཚོ་བྱེད་གཞོན་ནུ་གསོས་ན་རེ། བདག་ནི་ཨ་མྲའི་ཚལ་དུ་བཅོམ་ལྡན་འདས་བཞུགས་པ་ལ་བསྙེན་བཀུར་མཛད་ན་ལེགས་སོ་སྙམ་མོ། །དེ་རྒྱལ་པོའི་སེམས་ལ་བབ་སྟེ། དེ་མ་ཐག་རྟ་དང་གླང་པོ་ཆེ་གྲབས་གྱིས་ཤིག །གླང་པོ་ཆེ་གཏད་ཅིག །ཅེས་བསྒོས་པས་གླང་པོ་ཆེ་གླང་མོ་ལྔ་བརྒྱ་དང་བཅས་པ་བཤམས། འཚོ་བྱེད་ཀྱིས་གླང་པོ་ཆེ་ཁ་བསྒྱུར་ནས་དེའི་རྒྱབ་ཏུ་རྒྱལ་པོ་བཞུགས། ཕོ་བྲང་སླས་ཀྱི་མི་སྒྲོན་མེ་ཐོགས་པ་ལྔ་བརྒྱ་པོ་ཡང་གླང་མོ་རེ་རེའི་རྒྱབ་ཏུ་གནས་ཏེ་ཕྱི་བཞིན་སོང་ནས་རྒྱལ་པོའི་ཁབ་ནས་བྱུང་བ་ན། མ་སྐྱེས་དགྲས། ང་འཚོ་བྱེད་ཀྱིས་དཔང་པོ་བྱེད་པ་ལ་གཏོད་པར་མི་འགྱུར་གྲང་སྙམ་དུ་དོགས་པ་སྐྱེས་ནས་སྟོན་པ་ལ་འཁོར་ཇི་ཙམ། སྟོང་ཉིས་བརྒྱ་ལྔ་བཅུའོ། །འཚོ་བྱེད་ཁྱོད་ང་ལ་ཅིའི་ཕྱིར་གནོད་པ་མི་འདོད། འཁོར་དེ་སྙེད་ཡོད་ན་ལུད་པའི་སྐད་ཀྱང་མི་སྒྲག་གོ །དེས་སྨྲས་པ། ཁུ་འཕྲིག་མ་མཛད་ཅིག །སྟོན་པ་སྒྲ་ཆུང་བ་ལ་དགྱེས་པའོ། །ད་གླང་པོ་ལས་བོབས་ཤིག །དེ་བབས་ནས་རྐང་པས་ཀུན་དགའ་ར་བར་ཞུགས་ནས་སོང་སྟེ། སྟོན་པ་དགེ་འདུན་གྱི་དབུས་ན་མཚོ་ལྟར་དྭངས་ཤིང་རྙོག་པ་མེད་པར་བཞུགས་པ་མཐོང་ནས་རྒྱལ་པོས་ཕྱག་འཚལ་ཏེ། བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཐུགས་དུལ་ཅིང་ཞི་བ་བཞིན་དུ་བདག་གི་བུ་འཆར་བྱེད་བཟང་པོའང་ཞི་ཞིང་དུལ་བར་གྱུར་ཅིག །ཅེས་ཞུས་ཤིང་སྟོན་པས་ཀྱང་ལེགས་སོ་སྩལ་ཏེ་རྒྱལ་པོ་སྟན་ལ་འཁོད་ནས་ཐེ་ཚོམ་དག་ཞུས་ཤིང་སྟོན་པས་ཀྱང་ཆོས་ཀྱི་བཀའ་མཆིད་
རྒྱ་ཆེར་གསུངས་པས་རྒྱལ་པོ་དད་པ་བླ་ན་མེད་པ་ལ་བཀོད། སྔོན་གྱི་ཉེས་པར་སྤྱད་པ་དྲན་པས་མཆི་མ་ཕྱུང་ཞིང་རིང་དུ་བཤུམས་ནས་བདག་སྡིག་པའི་གྲོགས་པོས་ཟིན་པས་ཕ་ཆོས་དང་ལྡན་པ་བཀུམ་པ་ནི་བདག་བླུན་པ་ལགས་ཏེ། བདག་ནོངས་པ་ལ་ནོངས་པར་བཟུང་དུ་གསོལ། །བཀའ་སྩལ་པ། དེ་ནི་བདེན་ཏེ་འོན་ཀྱང་ཉེས་པ་ཤེས་ཤིང་མཐོང་ན་བཤགས་ཏེ་ཕྱིན་ཆད་སྡོམ་པར་བྱེད་ན་དགེ་བའི་ཆོས་མི་ཉམས་ཤིང་འཕེལ་བ་ཉིད་དུ་འདོད་པར་བྱའོ་གསུངས། དེ་ལྟར་སྟོན་པས་མ་སྐྱེས་དགྲ་གཞི་མེད་པ་དད་པ་ལ་བཀོད་དེ་སང་གདུགས་ཚོད་འབྱོན་པར་ཞུས་ནས་སོང་ངོ། །དེར་སྟོན་པས་དགེ་སློང་རྣམས་ལ་བཀའ་སྩལ་པ། མ་སྐྱེས་དགྲ་འདིས་མཚམས་མེད་བྱས་པ་མིན་ན་སྟན་འདིར་འདུག་བཞིན་དུ་བདེན་པ་མཐོང་བར་འགྱུར་བ་ལས། དེ་ལྟར་ཉམས་ཀྱིས་ཁྱེད་ཅག་སྡོང་དུམ་ཚིག་པ་ལ་ཡང་ངན་སེམས་བསྐྱེད་པར་མི་བྱ་ན། སེམས་དང་བཅས་པའི་ཡུལ་ལ་ལྟ་སྨོས་ཀྱང་ཅི་དགོས་ཞེས་གསུངས་སོ། །སངས་རྒྱས་དགེ་འདུན་དང་བཅས་པ་སང་གདུགས་ཚོད་བསོད་པས་ཚིམ་པར་བྱས། ཆོས་ཀྱང་ཉན་སྟོན་པས་སྦྱིན་པ་ལ་རྗེས་སུ་ཡི་རང་བར་མཛད་དེ་གཤེགས་སོ། །གང་གི་ཚེ་རྒྱལ་པོ་མ་སྐྱེས་དགྲ་དེ་གཞི་མེད་པའི་དད་པ་ལ་བཀོད་པ་དེ་ཕྱིན་ཆད་རང་ཉིད་ཁང་སྟེང་ངམ། གླང་པོ་ཆེའི་སྟེང་ལ་སོགས་པ་གང་ན་ཡོད་ཀྱང་སྟོན་པ་མཐོང་ན་དེ་མ་ཐག་ཚམ་ཚོམ་མེད་པར་མཆོངས་ནས་འགྲོའམ། སྟོན་པས་ཀྱང་རྫུ་འཕྲུལ་གྱིས་བར་སྣང་ལས་བླངས་ཏེ་ས་ལ་འཇོག་པར་མཛད་དོ། །
དེར་མ་སྐྱེས་དགྲས་ཞོ་ཤས་འཚོ་བ་དང་། ནང་མི་རྣམས་ལ་ཤེས་ལྡན་དག་དེང་ཕྱིན་ཆད་ང་སངས་རྒྱས་དགེ་འདུན་དང་བཅས་པ་ལ་སྐྱབས་སུ་སོང་གི་སྟོན་པ་འཁོར་རྣམ་བཞི་བཅས་ལ་སྒོ་དབྱེ་ཞིང་། ལྷས་བྱིན་སློབ་མ་དང་བཅས་པ་ལ་སྒོ་ཆོད་ཅིག །ཅེས་གསུངས། གཟུགས་ཅན་སྙིང་པོའི་སྔོན་འབྱུང་ནི། འདུལ་བ་༼ང༽དབྱེན་གྱི་གཞི་ལས་འབྱུང་སྟེ། རང་སངས་རྒྱས་ཤིག་རྫ་མཁན་གྱི་ཁང་པར་ཞུགས་པ་ན། དེར་མགྲོན་མོ་ཞིག་ཀྱང་བསྡད་པས་དེས་ཁང་པ་བཤང་ལྕི་བྱས་པས་ཕྱི་ཉིན་རྫ་མཁན་ནས་མ་བརྟགས་པར་རང་སངས་རྒྱས་སུ་འཕྲུལ་ཏེ་རབ་ཏུ་བྱུང་བ་ཁྱོད་རྐང་པ་གཉིས་སུ་སྤུ་གྲིས་དྲས་སམ་བརྗོད། སླར་ཁྲོ་བ་ཞི་ནས་བསོད་སྙོམས་ཕུལ་བ་ན། དེས་རྫུ་འཕྲུལ་བསྟན་པས་དད་དེ་ཉེས་པ་བཤགས་ཤིང་། སྐྱེ་བ་གཞན་དུ་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ནས་འདི་ལས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་པར་གྱུར་ཅིག །ཅེས་སྨོན་ལམ་བཏབ་པ་དང་ཡང་གཟུགས་ཅན་སྙིང་པོས་དྲང་སྲོང་མངོན་ཤེས་ལྔ་དང་ལྡན་པའི་བསྟི་གནས་སུ་རི་དྭགས་བསད་པས་དྲང་སྲོང་གིས་སྤྱོས་པར་དེ་ཡང་བསད་པ་ན། དྲང་སྲོང་གི་རྒྱལ་པོའི་བུར་སྐྱེས་ནས་གསོད་པར་སྨོན་ལམ་བཏབ་པ་ཡང་ཡིན་ནོ། །རྗེས་མ་འདི་འདུལ་བ་༼ག༽གོས་ཀྱི་གཞིར་འབྱུང་བ་ཨ་མྲ་སྐྱོང་མའི་སྐབས་སུ་བཤད་པའོ། །
༈ ཡལ་འདབ་ཞེ་དྲུག་པ་ནི། མིང་གི་ཁྱད་པར་ལས་སྔར་དགེ་དོན་གྱི་སྐབས་དེ་དང་མཚུངས་པས་གོ་སླའོ། །སླར་ནུ་བོ་བྱས་མི་ཤེས་ཕུ་བོ་བྱས་ཤེས་ཀྱི་རྩར་བསམ་པ་ངན་ཡང་འདུད་ཚུལ་གྱིས་འོང་བ་དངོས་སུ་ས་གས་ནས་དམྱལ་བའི་མེ་འབར་བར་ལྷུང་ངོ་། །༈ ཡལ་འདབ་ཞེ་བདུན་པ་ནི། རྒྱལ་པོ་གསལ་རྒྱལ་གྱིས་གསོལ་པ། བདག་གིས་དགེ་བ་འདི་ཙམ་བགྱིས་ན་བླ་ན་མེད་པའི་བྱང་ཆུབ་ཏུ་ལུང་བསྟན་དུ་གསོལ། བཀའ་སྩལ་པ། རྒྱལ་པོ་ཆེན་པོ་བླ་ན་མེད་པའི་བྱང་ཆུབ་ནི་ཟབ་པ། ལྟ་བར་དཀའ་བ། རྟོགས་པར་དཀའ་བ་སྟེ་ཁྱོད་ཀྱིས་སྦྱིན་པ་ལན་གཅིག་གིས་ཐོབ་པར་མི་འགྱུར། བརྒྱས་ཀྱང་མ་ཡིན། སྟོང་གིས་ཀྱང་མ་ཡིན། བརྒྱ་ཕྲག་སྟོང་གིས་ཀྱང་མ་ཡིན། འོན་ཀྱང་ཁྱོད་བྱང་ཆུབ་འདོད་ན་སྦྱིན་པ་དག་བྱིན་བསོད་ནམས་དག་བྱས། དགེ་བའི་བཤེས་གཉེན་ལ་བསྙེན་ཅིང་བཀུར་ན་ཁྱོད་ནམ་ཞིག་སངས་རྒྱས་སུ་འགྱུར་གྲང་། དེ་ནས་རྒྱལ་པོ་ངུས་ཤིང་གོས་ཀྱིས་མཆི་མ་ཕྱིས་ཏེ། བཅོམ་ལྡན་འདས་ཀྱིས་སྔོན་སྦྱིན་པ་དང་བསོད་ནམས་ཇི་སྙེད་ཅིག་མཛད་ལགས། བཀའ་སྩལ་པ། ངས་བསྐལ་པ་
གྲངས་མེད་པ་གསུམ་དུ་སྦྱིན་པ་དག་བྱིན། བསོད་ནམས་དག་བྱས། སངས་རྒྱས་བྱུང་བ་དག་མཆོད་པར་བྱས་པ་དག་ཕར་ཞོག་གི ། རེ་ཞིག་བསྐལ་པ་འདི་སྦྱིན་པ་དག་བྱིན། བསོད་སྙོམས་དག་བྱས་པ་དེ་ཉོན་ཅིག་ཅེས་མཚམས་སྦྱར་ནས་བྱང་ཆུབ་སེམས་དཔའི་སྐྱེས་རབས་མང་དུ་གསུངས་པ་ཕལ་ཆེར་འདིའི་སྔ་ཕྱིར་འབྱུང་ལ་རྒྱལ་པོ་ནོར་ཅན་དུ་གྱུར་པའི་ལོ་རྒྱུས་ཡོད་ཀྱང་། དེ་ནི་ནོར་བཟང་གི་ཡབ་དེ་ཡིན་ཞིང་དེས་གྲོང་ཁྱེར་དུ་མུ་གེ་ལོ་བཅུ་གཉིས་བྱུང་བའི་སྐབས་སྦྱིན་པ་རྒྱ་ཆེར་གཏོང་བས་དབུལ་བ་བསལ་བའི་གཏམ་དེ་ཡིན། རྒྱལ་པོ་གསལ་རྒྱལ་དད་པ་དང་ངོ་མཚར་ཆེས་བླ་ལྷག་ཏུ་གྱུར་ནས་རབ་ཏུ་དགའ་བས་རྗེས་སུ་ཡི་རངས་ཏེ་སྟོན་པའི་དྲུང་ནས་སོང་ངོ་། །༈ ཡལ་འདབ་ཞེ་བརྒྱད་པ་ནི། མདོ་སྡེ་མཛངས་༼ཨ༽བླུན་ལེའུ་སུམ་ཅུ་པར་འབྱུང་བ་དང་དོན་མཐུན་པས་བསྡུས་ཏེ་འཆད་ན། གྲོང་ཁྱེར་བ་རུ་ཏེ་ན་བྲམ་ཟེ་ནྱ་གྲོ་དྷཱ་ཞེས་བྱ་བ་ཞིག་ཡོད། མཁས་པ་རིགས་པ་དང་ལྡན་པ་དང་། སྨན་དང་གཙུག་ལག་དང་སྐར་མ་ལ་མཁས་པ་ཞིག་ཡོད་པས། ཡུལ་གྱི་རྒྱལ་པོ་དང་། མངའ་འོག་གི་རྒྱལ་ཕྲན་བརྒྱད་ཁྲི་བཞི་སྟོང་སོགས་ཐམས་ཅད་ཀྱིས་རྒྱལ་པོ་ཆེན་པོ་དང་འདྲ་བར་བསྙེན་བཀུར་བྱེད་དེ་བསྒོ་བའི་ཚིག་ཀྱང་ཉན་ཏོ། །དེའི་ཆུང་མ་ལ་བུ་བཙས་པར་མིང་སྦྱིན་པ་
ཆེན་པོ་ཞེས་བཏགས། དེར་ཆེར་སྐྱེས་པ་ན་ཕྱི་རོལ་དུ་ལྟད་མོར་ཆས་པས་སེམས་ཅན་ཐམས་ཅད་སྡུག་བསྔལ་བའི་གནས་ཚུལ་མཐོང་བས་ཡིད་དབྱུང་ནས་ཡབ་ལ་སྦྱིན་པ་རྒྱ་ཆེར་གཏོང་བར་ཞུས་པས་གནང་སྟེ། སྦྱིན་པའི་མཛོད་སྒོ་ཕྱེས་པས་བང་མཛོད་སུམ་ཆ་ཙམ་ལས་མ་ལུས་པར་ཟད་པ་ན། མཛོད་སྲུང་གིས་སྦྱིན་པའི་བར་ཆད་བྱས་པས་རྒྱ་མཚོར་ཡིད་བཞིན་གྱི་ནོར་བུ་བླང་བར་ཆས་ནས་ཡབ་ལ་ནན་ཆེར་ཞུས་པས་གནང་སྟེ་ཚོང་པ་ལྔ་བརྒྱ་ཙམ་དང་བཅས་ལམ་དུ་འཇུག་པ་ཇག་པས་ནོར་རྫས་ཀུན་ཕྲོགས་སོ། །དེ་ནས་སོང་སོང་བར་གྲོང་ཁྱེར་ད་ཤུ་པར་ཕྱིན་ནས་བྲམ་ཟེ་ཀ་བྱི་ལར་ཕྲད་པས་གསེར་སྲང་སུམ་སྟོང་བསླང་བ་ན་ཁྱེའུ་འདི་ནི་གཞན་ལས་ཁྱད་པར་དུ་འཕགས་སོ་སྙམ་མོ། །དེའི་བུ་མོ་གསེར་གྱི་མདོག་ཅན་སྐྲ་ཐོན་མཐིང་དུ་འདུག་པ་རྒྱལ་ཕྲན་བརྒྱད་ཁྲི་བཞི་སྟོང་སྙེད་ཀྱིས་བསླངས་ཀྱང་མ་སྟེར་བ་དེ་ཡིད་ཆགས་པས། ཡབ་ལ་སྦྱིན་པ་ཆེན་པོའི་བག་མར་འགྲོ་བ་ཞུས་པས་གནང་སྟེ་གསེར་བུ་མོ་བཅས་བྱིན་པས་བུ་མོ་རྒྱ་མཚོ་ནས་འཁོར་ན་བསླང་བར་ཆེད་དོ། །དེ་ནས་རྒྱ་མཚོའི་ངོགས་སུ་ཕྱིན་ཏེ་གྲུ་ལ་ཞུགས་རིན་པོ་ཆེའི་གླིང་དུ་ཕྱིན་ནས་སྦྱིན་པ་ཆེན་པོ་མང་དུ་ཐོས་པས་ནོར་བུ་བརྟགས་ནས་མང་ཉུང་གི་ཚོད་དང་བཅས་བགོས་ཏེ། རིན་པོ་ཆེ་དང་ཚོང་པ་རྣམས་གྲུར་བཅུག་སྟེ་ཕྱིར་བསླངས་ནས་རང་ཉིད་ཀླུ་ཡི་རྒྱལ་པོའི་ཕོ་བྲང་ནས་ཡིད་བཞིན་ནོར་བུ་བསམ་འཕེལ་མ་ཐོབ་བར་དུ་ཕྱིར་མི་ལྡོག་གོ་སྨྲས་པས་ཚོང་པ་རྣམས་མྱ་ངན་གྱིས་ནོན་ནས་དེད་
དཔོན་ཁྱེད་མ་བཞུད་ན་ངེད་ཅག་རང་ཡུལ་དུ་ཕྱིན་པར་མི་འགྱུར་རོ་སྨྲས་པས་གེགས་མེད་དུ་བདེ་བར་འཁོར་བར་བདག་གིས་སྨོན་ལམ་བཏབ་བོ་གསུངས་ནས། དེ་བཞིན་མཛད་དེ་ཕྱིར་འཛམ་བུའི་གླིང་དུ་བདེ་བར་སོང་ངོ་། །སྦྱིན་པ་ཆེན་པོ་རྒྱ་མཚོར་ཞུགས་ཏེ་དཀའ་བ་དཔག་ཏུ་མེད་པ་སྤྱད་ནས། ཆུ་པུས་ནུབ་ཙམ་དང་། བརླ་དྲུང་ཙམ་དང་། རྐེད་པ་ནུབ་ཙམ་དང་། ཕྲག་པ་ནུབ་ཙམ་དང་། རྐྱལ་བས་ཞག་སུམ་ཅུ་སོ་ལྔས་རི་ཞིག་གི་དྲུང་དུ་ཕྱིན་པ་དང་། ཤིང་གི་ཡལ་ག་ལ་འཇུས་ཏེ་རི་ལ་འཛེགས་ནས་ཞག་བདུན་གྱིས་རིའི་རྩེར་ཕྱིན་ཏོ། །དེར་གསེར་གྱི་པདྨོར་སྦྲུལ་གདུག་པ་འཁྲིལ་བར་བྱམས་པའི་ཏིང་ངེ་འཛིན་བསྒོམས་པས་ཞི་ནས་པདྨའི་སྟེང་ནས་ཕྱིན་པས་སྦྲུལ་གདུག་པའི་ཁྲོད་ཞག་བདུན་གྱིས་བརྟོལ། དེ་ནས་སོང་སོང་བས་སྲིན་པོའི་གླིང་དུ་སླེབས། སྲིན་པོ་སྲིན་མོ་རྣམས་མིའི་དྲི་ཚོར་ནས་བརྒྱུགས་པ་ན། བྱང་ཆུབ་སེམས་དཔའ་མཐོང་བས་ཁྲོ་བ་ཞི་སྟེ། དེ་རྣམས་ཀྱི་མཐུས་དཔག་ཚད་བཞི་བརྒྱའི་ཕ་རོལ་ཏུ་བསྐྱལ། དེ་སོགས་དཀའ་བ་དཔག་ཏུ་མེད་པས་བྱོན་ནས་ཐོག་མར་དངུལ་གྱི་མཁར། བཻཌཱུརྱའི་མཁར་རྣམས་ནས་རིན་པོ་ཆེ་རིམ་པར་དཔག་ཚད་ཉིས་སྟོང་ཁོ་ར་ཁོར་ཡུག་དང་། དཔག་ཚད་བཞི་སྟོང་ཁོ་ར་ཁོར་ཡུག་ཏུ་ཅི་འདོད་པ་ཆར་དུ་འབེབས་ནུས་པ་དག་ཀླུའི་རྒྱལ་པོ་གཉིས་ཀྱིས་སོ་སོར་ཕུལ་ཡང་ཐུགས་མ་ཚིམ་པར། ཡང་སོང་སོང་བ་ལས་གསེར་གྱི་མཁར་ནས་ཀླུའི་རྒྱལ་པོ་གཙུག་གི་ཕུད་བུ་ནས་ཡིད་བཞིན་གྱི་ནོར་བུ་རིན་པོ་ཆེ་བཀྲོལ་ཏེ་བྱང་ཆུབ་སེམས་དཔའ་ལ་ཕུལ་ནས་འདིའི་མཐུས་དཔག་ཚད་
བརྒྱད་སྟོང་ཁོ་ར་ཁོར་ཡུག་ཏུ་རིན་པོ་ཆེ་ཆར་བཞིན་དུ་འབེབས་ཏེ་ཅི་འདོད་པ་ཐམས་ཅད་འབེབས་སོ། །ཞེས་སྨྲས་པས་ཐུགས་དགྱེས་པ་བསྐྱེད་དེ། ཀླུའི་རྒྱལ་པོ་འཁོར་དང་བཅས་པས་བསྐྱལ་ནས། བྱང་ཆུབ་སེམས་དཔའ་ནོར་བུའི་མཐུས་ནམ་མཁར་འཕུར་ཏེ། རྒྱ་མཚོ་བརྒལ་པས་དེའི་འགྲམ་དུ་ཅུང་ཟད་ངལ་གསོ་བས་གཉིད་ལོག་པ་ན་རྒྱ་མཚོའི་ཀླུ་རྣམས་ཕྲག་དོག་སྐྱེས་ནས་ཕྱིར་བརྐུས་སོ། །བྱང་ཆུབ་སེམས་དཔའ་གཉིད་སད་པ་ན་ཀླུས་ནོར་བུ་བརྐུས་པར་ཤེས་ཏེ། རང་གི་མཐུ་ཅི་ཡོད་པས་རྒྱ་མཚོའི་ཆུ་བཅུས་ཏེ་བསྐམ་པར་བྱའོ་སྙམ་སྟེ། ནོར་བུ་ཕྱིར་མ་ཐོབ་བར་དུ་ལག་པ་སྟོང་པར་ཕྱིར་མི་འགྲོ་སྙམ་དུ་ཡིད་དམ་བཅས་སོ། །རྒྱ་མཚོའི་ངོགས་སུ་སོང་སྟེ་རུས་སྦལ་ཁོག་པས་ཆུ་བཅུས་སོ། །ལྷ་རྣམས་ཀྱིས་ཀྱང་གྲོགས་དན་བགྱིས་པས་རང་རང་གི་གོས་ཕུད་དེ་ཆུར་བཅུག་ནས། ལན་ཅིག་ཕྱིར་ཕྱུང་བས་རྒྱ་མཚོའི་ཆུ་དཔག་ཚད་བཞི་བཅུ་འགྲིབ་བོ། །ལན་གཉིས་པས་དཔག་ཚད་བརྒྱད་ཅུ། ལན་གསུམ་པས་དཔག་ཚད་བརྒྱ་ཉི་ཤུ་འགྲིབ་པས་ཀླུ་དེ་དག་འཇིགས་ཏེ་ནོར་བུ་གསུམ་ཆར་ཕྱག་ཏུ་ཕུལ་བས་ནམ་མཁར་འཕུར་ཏེ་རང་གནས་སུ་ཕྱིན། སྔར་གྱི་བུ་མོ་བླངས། ཕ་མ་མྱ་ངན་གྱིས་མིག་ལོང་བའང་སོས། ཡིད་བཞིན་གྱི་ནོར་བུ་རིན་པོ་ཆེ་ལ་གསོལ་བ་བཏབ་པས་རྒྱལ་པོའི་བང་མཛོད་ཐམས་ཅད་གང་བ་དང་། འཛམ་བུའི་གླིང་གི་དབུལ་ཕོངས་རྒྱུན་བཅད་དོ། །
༈ ཡལ་འདབ་ཞེ་དགུ་པ་ནི། མཛངས་༼ཨ༽བླུན་ལེའུ་ཞེ་གཉིས་པར་འབྱུང་བ་སྟེ། སྟོན་པ་མཉན་ཡོད་ན་བཞུགས་སོ། །ཡུལ་མ་ག་དྷཱ་ན་ཁྱིམ་བདག་ཅིག་ལ་བུ་ཞིག་བཙས་པ་ན་བང་མཛོད་ཀྱི་ནང་ནས་ངོ་མཚར་བ་གསེར་གྱི་གླང་པོ་ཆེའི་ཕྲུ་གུ་ཞིག་རང་བྱུང་ངོ་། །ཁྱེའུའི་མིང་གླང་པོ་སྐྱོང་ཞེས་བཏགས། ཁྱེའུ་ཇི་ཙམ་དུ་ཆེར་སྐྱེས་པ་བཞིན་གླང་པོ་ཆེའི་ཕྲུ་གུ་ཡང་སྐྱེས་ཏེ་ཁྱེའུ་དང་རྟག་ཏུ་འགྲོགས་ཤིང་གཅིན་རྟུག་ཀྱང་གསེར་དུ་བྱུང་ངོ་། །གླང་པོ་སྐྱོང་ཆེར་སྐྱེས་པ་ན་ཁྱེའུ་ལྔ་བརྒྱ་ཙམ་དང་ལྷན་ཅིག་རྩེ་བར་སྐབས་ཤིག་རང་རང་གི་ཁྱིམ་ན་ངོ་མཚར་ཆེ་བ་ཅི་ཡོད་དག་བཤད་པ་དང་། འགའ་ཞིག་ནི། ཡོ་བྱད་རྣམས་རིན་པོ་ཆེ་དང་། ཁ་ཅིག་སྐྱེད་ཚལ་ལ་སོགས་པ་རིན་པོ་ཆེ་ཡིན་པ་དང་། ལ་ལ་བང་མཛོད་རྣམས་རིན་པོ་ཆེ་སྣ་ཚོགས་ཀྱིས་གང་ངོ་ཞེས་སྨྲས་པས་གླང་པོ་སྐྱོང་གིས་གླང་པོའི་ཕྲུ་གུའི་ལོ་རྒྱུས་བརྗོད་པས་རྒྱལ་བུ་མ་སྐྱེས་དགྲའང་དེར་ཡོད་པས་ཐོས་ཏེ། བདག་རྒྱལ་པོ་ནམ་གྱུར་པའི་དུས་སུ་གླང་ཆེན་འཕྲོག་གོ་སྙམ་མོ། །ཕྱིས་རྒྱལ་པོར་གྱུར་པའི་དུས། གླང་པོ་སྐྱོང་ལ་ཁྱོད་ཀྱི་གླང་པོ་ཆེ་ང་ལ་ཕུལ་ཅིག་བསྒོའོ། །དེའི་ཕ་མ་ན་རེ། མ་སྐྱེས་དགྲ་ལྟ་བུ་ཁྲོ་ཞིང་གཏུམ་ལ་འདོད་པ་ཆེ་བ་ཡེ་མེད་དེ། རང་གི་ཕ་ཡང་གསོད་པས་ན་གླང་པོ་ཆེ་ཡང་འཕྲོག་པར་འགྱུར་བས་སྦྱིན་དགོས་སོ། །བུས་སྨྲས་པ།
ངའི་གླང་པོ་ཆེ་འདི་སུས་ཀྱང་ཕྲོགས་མི་ནུས་སོ་ཞེས་སྨྲས་ནས་སྤུན་གཉིས་གླང་པོ་ཆེ་ལ་ཞོན་ཏེ་རྒྱལ་པོའི་ཕོ་བྲང་གི་སྒོར་འོངས་པ་སྒོ་བས་མཐོང་ནས་རྒྱལ་པོ་ལ་གསོལ་བ་ན། གླང་པོ་སྐྱོང་སྤུན་གཉིས་གླང་པོ་ཆེ་ལས་མ་བབས་པར་ནང་དུ་ཤོག་ཅིག་ཅེས་གསུངས་པས། དེ་གཉིས་གླང་ཆེན་ལ་ཞོན་ཏེ་ཕོ་བྲང་གི་ནང་བར་འོངས་ནས་བབས་སོ། །རྒྱལ་པོ་ལ་ཕྱག་བྱས་ནས་བདེ་བར་གྱུར་ཅིག་སྨྲས་པས་རབ་ཏུ་དགའ་སྟེ་སྟན་བཤམས་ནས་བཟའ་བ་དང་བཏུང་བ་བྱིན་ཏོ། །གླང་པོ་སྐྱོང་གླང་པོ་ཞོག་ལ་ཁྱེད་ཅག་ཕྱིར་དེངས་ཤིག་གསུངས་པས་རྒྱལ་པོའི་བཀའ་བཞིན་སྤུན་གཉིས་རྐང་པས་ཕྱིར་འོང་བ་ན། གསེར་གྱི་གླང་པོ་རྒྱལ་པོའི་མདུན་གྱིས་དེ་ཉིད་དུ་ནུབ་སྟེ་སྒོའི་ཕྱི་རོལ་གླང་པོ་སྐྱོང་གི་དྲུང་དུ་བྱུང་བ་དང་སྤུན་གཉིས་དེ་ལ་ཞོན་ནས་ཕྱིར་སོང་། གླང་པོ་སྐྱོང་གིས། གླང་པོ་ཆེའི་དོན་དུ་རང་གི་སྲོག་ལ་རྒོལ་བར་འོང་གིས་རབ་ཏུ་བྱུང་ངོ་སྙམ་ནས། ཕ་མ་ལ་གསོལ་བས་ཀྱང་གནང་། ཕྱི་ཕྱག་འཚལ་ཏེ་གླང་ཆེན་ལ་ཞོན་ནས་རྒྱལ་བྱེད་ཀྱི་ཚལ་དུ་སོང་ནས། བཅོམ་ལྡན་འདས་ཀྱི་ཞབས་ལ་བཏུད་ནས་ཇི་ལྟར་གྱུར་པ་གསོལ་པས། ལེགས་པར་འོངས་སོ་ཞེས་བཀའ་སྩལ་པ་ན་སྐྲ་དང་ཁ་སྤུ་རང་བྱི་སྟེ་དགེ་སློང་དུ་གྱུར་ཏོ། །དེ་ལ་སྟོན་པས་བདེན་བཞིའི་ཆོས་ཅི་རིགས་བསྟན་པས་དགྲ་བཅོམ་པར་གྱུར་ཏོ། །དགེ་སློང་གླང་པོ་སྐྱོང་ཡང་དགེ་སློང་གཞན་དང་འདུག་སྟེ་གསེར་གྱི་གླང་པོ་ཆེའང་རྟག་ཏུ་དྲུང་ན་འདུག་པ་ལ། མཉན་ཡོད་པ་རྣམས་ཀྱིས་དེ་བལྟ་བའི་ཕྱིར་མི་བརྒྱ་སྟོང་དུ་མ་འདུས་པར་གྱུར་པས་རྣལ་འབྱོར་སྤྱོད་པ་ལ་འདུ་འཛི་མང་བར་གྱུར་ཏོ། །
དགེ་སློང་རྣམས་ཀྱིས་སྟོན་པ་ལ་ཞུས་པས། གླང་པོ་ཆེ་སྤོངས་ཤིག་བཀའ་སྩལ་པས། གསོལ་པ། བདག་གིས་ཀྱང་ཐོག་མ་ནས་སྤངས་པར་བསམས་ན། འགྲོར་མ་བཏུབ་བོ། །བཀའ་སྩལ་པ། ཁྱོད་ཀྱིས་འདི་སྐད་ལན་གསུམ་སྨྲོས་ཤིག །ང་ནི་སྐྱེ་བའི་ཕྱོགས་ཟད་དེ་ད་ཕྱིན་ཆད་མི་དགོས་ཞེས་སྨྲོས་ཤིག་དང་མེད་པར་འགྱུར་རོ། །དེ་ལྟར་བྱས་པས་གླང་པོ་ཆེ་སའི་ནང་དུ་ནུབ་བོ། །དགེ་སློང་རྣམས་ངོ་མཚར་ནས། གླང་པོ་སྐྱོང་གིས་བསོད་ནམས་ཅི་བགྱིས་ན་འབྲས་བུ་འདི་ལྟར་སྨིན་པར་གྱུར། བཀའ་སྩལ་པ། སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་ནས་མྱ་ངན་ལས་འདས་པའི་རིང་བསྲེལ་མང་དུ་ཡོད་པ་ལས་མཆོད་རྟེན་བྱས་པའི་ནང་དུ། ཐོག་མར་དགའ་ལྡན་ནས་བབས་ཏེ་ལྷུམས་སུ་གཤེགས་པའི་བཅིབས་པ་གླང་པོ་ཆེའི་མཆོད་རྟེན་ཞིག་ཀྱང་ཡོད་དེ། ནམ་ཞིག་གླང་ཆེན་གྱི་གཟུགས་ཅུང་ཟད་ཞིག་པ། མི་ཞིག་གིས་ཕྱག་འཚལ་དུ་འོངས་པས་མཐོང་སྟེ། འཇིམ་པ་སྦྱར་ཏེ་དེའི་སྟེང་དུ་ལྡོང་རོས་བྱུགས་ནས། བདག་མ་འོངས་པའི་དུས་སུ་རྟག་ཏུ་ཆོ་རིགས་བཙུན་ཞིང་ལོངས་སྤྱོད་ཟད་མི་ཤེས་པ་དང་ལྡན་པར་ཤོག་ཅིག་ཅེས་སྨོན་ལམ་བཏབ་བོ། །དེའི་དུས་ཀྱི་མི་དེ་ནི་དགེ་སློང་གླང་པོ་སྐྱོང་ཡིན་ལ། དེ་ཚེ་འཕོས་མ་ཐག་ལྷར་སྐྱེས། དེ་ནས་མིའི་འཇིག་རྟེན་དུ་སྐྱེས་ཏེ། རྟག་ཏུ་ཆོ་རིགས་བཙུན་ལ་བྱད་གཟུགས་བཟང་ཞིང་ལོངས་སྤྱོད་དང་ལྡན། གསེར་གྱི་གླང་པོ་ཆེ་རྟག་ཏུ་བསྲུངས་པར་གྱུར་ཏོ། །དཀོན་མཆོག་གསུམ་གྱི་རྟེན་ལ་བཀུར་སྟི་བྱས་པས་རབ་ཏུ་བྱུང་། དགྲ་བཅོམ་པ་ཐོབ་པ་ཡིན་ནོ། །ཞེས་སོ། །
སྐབས་འདིར་གསལ་རྒྱལ་གྱི་བུ་མོ་ཆོས་གོས་ཅན་དང་གླང་པོ་སྐྱོང་ཁྱིམ་ཐབ་ཏུ་གྱུར་པ་དེའང་གཞུང་གཞན་དུ་བཤད་དོ། །༈ ཡལ་འདབ་ལྔ་བཅུ་པ་ནི། སངས་རྒྱས་མཉན་ཡོད་དུ་བཞུགས་སོ། །དགེ་སློང་རྣམས་ཀྱིས་བཅོམ་ལྡན་འདས་ཀྱིས་དང་པོར་ཐུགས་བསྐྱེད་པ་དང་བསྙེན་བཀུར་མཛད་པ་ཡང་བཀའ་སྩལ་གྱི། ད་བདག་ཅག་རྣམས་ལས་ཀྱི་རྒྱུ་བ་ལུང་བསྟན་པར་བགྱིའོ། །ཞེས་ཞུས་སོ། །བཅོམ་ལྡན་འདས་ཀྱི་གདོན་མི་ཟ་བར་མཛད་པ་ནི་བཅུ་སྟེ། འགའ་ཞིག་སངས་རྒྱས་སུ་ལུང་སྟོན་པ་དང་། མང་པོ་དག་བྱང་ཆུབ་ཏུ་སེམས་བསྐྱེད་པ་དང་། གདུལ་བྱ་ཐམས་ཅད་བཏུལ་བ་དང་མཆོག་ཟུང་གཅིག་བསྟན་པ་དང་། མཚམས་བཅད་པ་དང་། སྐུ་ཚེའི་ལྔ་ཆ་བཏང་བ་དང་། ཆོ་འཕྲུལ་ཆེན་པོ་བསྟན་པ་དང་། ལྷ་ལས་བབས་པ་དང་། ཡབ་ཡུམ་བདེན་པ་ལ་བཀོད་པ་དང་། ཉན་ཐོས་ཀྱི་དགེ་འདུན་རྣམས་ལས་ཀྱི་རྒྱུ་བ་ལུང་སྟོན་དུ་འཇུག་པར་མཛད་པ་རྣམས་སོ། །སྐབས་འདིར་ལས་ཀྱི་རྒྱུ་བ་ལུང་སྟོན་པའི་དབང་དུ་མཛད་ནས། བཅོམ་ལྡན་འདས་དགྲ་བཅོམ་ཆེན་པོ་ལྔ་བརྒྱར་གཅིག་གིས་མ་ཚང་བ་དང་ལྷན་ཅིག་མཚོ་མ་དྲོས་པར་གཤེགས་སོ། །སྟོན་པས་འཇིག་རྟེན་པའི་ཐུགས་བསྐྱེད་པས། ཀླུ་དགའ་བོ་དང་ཉེ་དགའ་ཡང་དེར་འོངས་ཤིང་། རིན་པོ་ཆེའི་པདྨའི་སྡོང་པོ་ཡང་
བྱུང་ཤིང་སྡོང་པོ་ནི་རིན་པོ་ཆེ་སྣ་ཚོགས་ལས་བྱས་པ། མེ་ཏོག་རྣམས་གསེར། ཟེའུ་ནི་རིན་པོ་ཆེ་རྡོ་རྗེ་ལས་བྱས་པའི་པད་སྡོང་ཆེས་ཆེ་བ་དེའི་དབུས་སུ་གསེར་གྱི་པདྨ་འདབ་མ་སྟོང་དང་ལྡན་པ་ལ་བཅོམ་ལྡན་འདས་ཉིད་བཞུགས། གཞན་པདྨ་སོ་སོར་ཉན་ཐོས་ཆེན་པོ་རྣམས་འདུག་གོ །དེའི་ཚེ་འཕགས་པ་ཤཱ་རིའི་བུ་ནི་བྱ་རྒོད་ཕུང་པོའི་རི་ལ་སྣམ་སྦྱར་དྲུབ་བོ། །སྟོན་པས་དེ་འབོད་པར་མོའུ་འགལ་བུ་མངགས་སོ། །དེས་རྫུ་འཕྲུལ་གྱིས་ཕྱིན་ནས་སྟོན་པ་དགེ་འདུན་དང་བཅས་པ་ཁྱོད་ཀྱི་དོན་དུ་བཞུགས་ཀྱི། ད་འདོང་ངོ་། །ཤཱ་རིའི་བུས་སྨྲས་པ་རེ་ཞིག་ཆོས་གོས་དྲུབས་ལ་དེ་ནས་འགྲོའོ། །དེར་མོའུ་འགལ་བུས་ངས་གྲོགས་བྱའོ་བྱས་ནས། སོར་མོ་ལྔ་ཆར་གྱིས་དྲུབས་ཏེ་སྐད་ཅིག་དེ་ལ་ཟིན་པར་བྱས་སོ། །དེ་ནས་ཤཱ་རིའི་བུས་སྣམ་སྦྱར་དེ། རྒྱ་ཅང་ཞེས་བྱ་བའི་སྐ་རགས་ཀྱི་ཁྱད་པར་ཞིག་གིས་བསྡམས་ཏེ་མོའུ་འགལ་བུ་ལ་བསྐུར་ནས་རྒྱ་ཅང་གི་སྣེ་མོ་བྱ་རྒོད་ཕུང་པོའི་རི་ལ་བཏགས་པ་ན་མོའུ་འགལ་བུས་དྲངས་པས་བྱ་རྒོད་ཕུང་པོའི་རི་རྩ་བ་ནས་འབྱིན་པ་ཙམ་དུ་གཡོས་རི་རབ་ལ་བཏགས་ན་གླིང་བཞི་དང་བཅས་པའི་རི་རབ་རབ་ཏུ་གཡོས་ཏེ། མཚོ་མ་དྲོས་པ་ཡང་གཡོས། དགེ་སློང་རྣམས་ཀྱང་ལྡེག་ན། བཅོམ་ལྡན་འདས་བཞུགས་པའི་པད་གདན་ནི་གཡོ་བ་མེད་པར་འདུག་གོ །དེ་ནས་སྟོན་པའི་བཞུགས་གདན་གྱི་པདྨ་ལ་བཏགས་པས་འགུལ་མ་ནུས་པར་འདུག་གོ །མོའུ་འགལ་བུ་ན་རེ། རྫུ་འཕྲུལ་རྣམ་པར་རྩེས་ཟིན་གྱི་འདོང་ངོ་། །ཤཱ་རིའི་བུ་ན་རེ། ཁྱོད་སོང་ཤིག །ང་འོང་ངོ་། །དེར་
སྐད་ཅིག་ལ་མོའུ་འགལ་བུ་མཚོ་མ་དྲོས་པའི་འགྲམ་དུ་ཕྱིན་པ་ན། དེའི་ཡང་སྔོན་དུ་ཤཱ་རིའི་བུས་སླེབ་སྟེ། སངས་རྒྱས་ལ་ཕྱག་འཚལ་བ་ཡང་ཟིན། པདྨའི་སྙིང་པོར་འདུག་ཀྱང་ཟིན་ཏོ། །དེར་དགེ་སློང་རྣམས་ཀྱིས། མོའུ་འགལ་བུ་རྫུ་འཕྲུལ་དང་ལྡན་པའི་མཆོག་ཏུ་ལུང་སྟོན་ན། འཕགས་པ་ཤཱ་རིའི་བུས་ཕམ་པར་བྱས་པ་ལ་གཟིགས། ཞེས་ཞུས་པས། མཆོག་ཟུང་གི་སྔོན་གྱི་ལོ་རྒྱུས་མང་དུ་གསུངས་ནས། དེ་བཞིན་གཤེགས་པས་བརྙེས་པའི་ཏིང་ངེ་འཛིན་གྱི་མིང་གི་རྣམ་གྲངས་ཙམ་ཡང་རང་སངས་རྒྱས་ཀྱིས་མི་ཤེས། དེ་བཞིན་དུ་རང་རྒྱལ་གྱི་དེ་འདྲ་བ་ཤཱ་རིའི་བུ་དང་། ཤཱ་རིའི་བུའི་དེ་འདྲ་བ་མཽངྒལ་བུ་དང་། མོའུ་འགལ་བུས་ཐོབ་པའི་ཏིང་ངེ་འཛིན་གྱི་མིང་གི་རྣམ་གྲངས་ཙམ་ཡང་ཉན་ཐོས་གཞན་གྱིས་མི་ཤེས་སོ། །འོན་ཀྱང་མང་དུ་གནས་པ་ལ་བརྟེན་ནས་མཽངྒལ་བུ་རྫུ་འཕྲུལ་ཆེ་བའི་མཆོག་ཏུ་ལུང་བསྟན་ཏོ་གསུངས། དེ་ནས་འདི་སྐད་ཅེས་བྱ་སྟེ། འོད་སྲུང་ཆེ་དང་མཆོག་ཟུང་མཛེས་ལྡན་དང་། །བྱེ་བ་ཉི་ཤུ་ངག་དབང་བསོད་སྙོམས་ལེན། །ལེགས་འོངས་དགའ་ཡོད་གྲགས་པ་དཔལ་བསྐྱེད་དང་། །བ་ཀུ་ལ་དང་འོད་སྲུང་སྤུན་གསུམ་དང་། །གྲགས་པ་གཞན་དང་མེ་སྐྱེས་ཡུལ་འཁོར་སྐྱོངས། །ས་ག་བྱིན་པ་ཅན་དང་ལམ་ཕྲན་བརྟན། །སྦྲུལ་ཞོལ་མ་འགགས་རི་དྭགས་འཛིན་གྱི་བུ། །སྒྲ་གཅན་འཛིན་དང་དགའ་བོ་གྱད་བུ་ནོར། །ཉེ་སྡེ་བཟང་ལྡན་མཛེས་བཟང་སྦྲང་རྩི་ཅན། །རྒྱུ་ཅན་ཀཽ་དི་ནྱ་དང་ཉེ་བ་འཁོར། །འོད་བྱེད་ནམ་གྲུ་ལ་སོགས་དགྲ་བཅོམ་ཚོགས། །ཞེས་བྱའོ། །མདོ་ལས་དངོས་སུ་སྨོས་པ་དགེ་སློང་དེ་རྣམས་ཀྱིས་རང་རང་གི་ལས་
ཀྱི་རྒྱུ་བ་ལུང་བསྟན་ཅིང་། གཞན་ཡང་དགྲ་བཅོམ་པ་ལྔ་བརྒྱའི་བར་དུ་རང་རང་གི་སྔོན་གྱི་ལས་ཀྱི་རྒྱུ་བ་ལུང་བསྟན་པའི་མཐར། སྟོན་པ་བཅོམ་ལྡན་འདས་ཉིད་ཀྱིས་ལོ་དྲུག་ཏུ་དཀའ་བ་སྤྱད་དགོས་པའི་རྒྱུ་ལ་སོགས་པར་ཕྲིན་ལས་ཀྱི་རྒྱུ་བ་ཐམས་ཅད་ལུང་སྟོན་པར་མཛད་པ་ནི་དཔལ་གྱི་དུམ་བུར་འཁོད་པ་ཉིད། འདུལ་བ་སྨན་གྱི་གཞི་ལས་ཀྱི་རྒྱུ་བ་ལུང་བསྟན་པའི་དོན་བསྡུས་པ་ཏེ་སླར་མ་སྨོས་ཤིང་། མོའུ་འགལ་བུ་ལས་ཤཱ་རིའི་བུའི་རྫུ་འཕྲུལ་འཕགས་པའི་སྔོན་འབྱུང་ནི། ཝཱ་རཱ་ཎ་སཱིར་དྲང་སྲོང་དུང་དང་བྲིས་པ་གཉིས་ཡོད། རེ་ཞིག་ཆར་ཆེས་པས་འདམ་རྫབ་ཆེ་ནས་དུང་གིས་རིལ་བ་སྤྱི་བླུགས་བསྣམས་པ་རྡེག་འཆོས་པས་ཆག་ཤོར་བས་དམོད་བོར་ཏེ། ལོ་བཅུ་གཉིས་སུ་ཆར་མི་འབེབས་པ་རྒྱལ་པོ་དང་སྐྱེ་བོའི་ཚོགས་ཀྱིས་ཐོས་པས་བཟོད་པར་གསོལ་ཡང་མ་གནང་བ་བྲིས་པ་ལ་ཞུས་པས་ཆར་འབེབས་པར་དམོད་པས་དེ་མ་ཐག་ཆར་དབབ་པ་དང་། ཡང་བྲིས་པས་དགོས་པ་འགའ་ཞིག་གི་ཕྱིར་དུང་གི་རྐང་པ་གཉིས་ལ་གཏུགས་པ་ལས། དེས་རྐང་པས་རལ་པ་མནན་པས་ཁྲོས་ཏེ། ཉི་མ་འཆར་ཀའི་དུས་ཀྱི་ཚེ་ཁྱོད་སྤྱི་བོ་གས་པར་གྱུར་ཅིག །དུང་གིས་སྨྲས་པ། དེ་ལྟར་ན་ཉི་མ་འཆར་བར་མ་གྱུར་ཅིག །ཅེས་བྱས་པས་འཇིག་རྟེན་མུན་རུབ་པ་ན། ཡུལ་མི་ཐམས་ཅད་ཀྱིས་དུང་ལ་གསོལ་བ་བཏབ་པ་ན། དེས་རྒྱུ་མཚན་བརྗོད་པས་བྲིས་པས་འཇིམ་པ་ལ་མགོ་བཅས་པས་ཉི་མ་ཤར་བ་ན་འཇིམ་བག་གི་མགོ་གས་པར་གྱུར་ཏོ། །དུང་ནི་མཽངྒལ་བུ། བྲིས་པ་ནི་ཤཱ་
རིའི་བུའོ། །