ཆོས་ཀྱི་སྐུ་ཡི་དོན་བསྟན་པ།
རྒྱ་གར་སྐད་དུ༔ དྷརྨཱ་ཀཱ་ཡེ་བྷེ་ལ༔ བོད་སྐད་དུ༔ ཆོས་ཀྱི་སྐུ་ཡི་དོན་བསྟན་པ༔ ཆོས་སྐུ་བདེ་སངས་འཛིན་ལ་ཕྱག་འཚལ་ལོ༔ འཇིག་རྟེན་མུན་པའི་དམག་དཔུང་བཟློག་པའི་ཕྱིར༔ ཡེ་ཤེས་འོད་ཀྱི་དཔའ་བོ་མཚོན་ཐོགས་པས༔ བདག་འཛིན་སྡུག་བསྔལ་རྒྱ་མཚོ་ལས་བརྒལ་ཏེ༔ དྲན་བསམ་འཆིང་བའི་དགྲ་རྣམས་གསད་པར་བྱའོ༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ སྟོང་པས་སྟོང་པའི་གྲོང་ཁྱེར་བཅོམ་པའི་ཚེ༔ ང་ནི་དུས་གསུམ་འགྱུར་མེད་བདག་ཉིད་ཅན༔ ལྟ་སྒོམ་བཅིངས་པའི་གོལ་ས་གཅད་པའི་ཕྱིར༔ རྣོ་མཉེན་ངར་དང་ལྡན་པའི་རལ་གྲི་ནི༔ ཤེས་རབ་བརྟུལ་ཤུགས་ཆེན་པོས་རབ་བཟུང་ནས༔ ཐེ་ཚོམ་ལོག་རྟོག་མདུད་པ་གཅད་པར་བྱའོ༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ གསལ་བའི་ཡེ་ཤེས་ཀྱི་སྣང་བ་འཕྲོགས་པའི་ཚེ༔ ང་ནི་ལུང་ཀུན་གྱི་བདག་ཉིད་དུ་བཞུགས་སོ༔ ཆོས་ཅན་གྲངས་ཀྱི་བ་ཐག་འཛིངས་པ་དང༔ འགྱུར་མེད་གསང་འཛིན་སྤུ་གྲི་སོ་རྒལ་གྱིས༔ དད་བརྩོན་དེ་ནི་གོམས་པས་བཟུང་ནས་ནི༔ ཆགས་བྲལ་འབྱུང་བ་རང་དེངས་དབྱིངས་སུ་གཅད༔ ཨེ་མ་རྡོ་རྗེ་འཛིན་པ་ཉོན་ཅིག༔ དག་པ་ཉིད་ཀྱིས་དག་པ་བཀྲུས་པའི་ཚེ༔ ང་ནི་སྣང་བ་ཐམས་ཅད་ཀྱི་བདག་པོར་ཡེ་ཐོག་མ་ཉིད་ནས་གནས་པ་ཡིན་ནོ༔ རྐྱེན་གྱིས་བཅོས་པའི་འདུ་འཕྲོ་དུ་མ་རྣམས༔ འདུ་ཤེས་གཅིག་པའི་སྟོང་ཉིད་ར་བ་རུ༔ དྲན་པར་རང་སངས་རྒྱ་ཡིས་བཟུང་ནས་ནི༔ རྐྱེན་བཞི་རང་སར་གྲོལ་བའི་སྒོ་མོ་གཅད༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ འཛིན་པས་འཛིན་པ་རང་བཟུང་བའི་ཚེ༔ ང་ནི་འབྱེད་པ་མེད་པའི་ཆོས་ཅན་དུ་ཡེ་ཐོག་མ་ནས་གནས་སོ༔ དབྱིངས་དང་རིག་པའི་སྣང་བ་ཡུལ་ཤར་བ༔ དག་བྱེད་རྐྱེན་དང་བྲལ་བའི་ནམ་མཁར་ནི༔ རང་གནད་རྣལ་དུ་ཕབ་པའི་ལུས་གཅུན་ནས༔ བཅོས་པ་མེད་པའི་མིག་གིས་བལྟ་བར་བྱའོ༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ རྡོ་རྗེ་ལུ་གུ་རྒྱུད་ཡུལ་ཀུན་ཏུ་ཤར་བའི་ཚེ༔ ང་ནི་སྣང་བ་ཐམས་ཅད་ཀྱི་ཕུང་པོར་བཞུགས་ནས་(༣༧)སོ༔ བྱ་བྱེད་རང་བྲལ་སྣང་བ་ཡུལ་ཤར་བ༔ སྙིང་པོ་ངེས་པའི་ཐབས་དང་ལྡན་པ་ཡིས༔ སྟོང་པ་ཅིར་ཡང་སྣང་བའི་གཞི་བལྟས་ན༔ ཡེ་ཤེས་ཉིད་ནི་སྔར་མེད་ཡང་ཡང་མཐོང༔ ཨེ་མ་ཧོ༔ རྡོ་རྗེ་འཛིན་པ་ཉོན་ཅིག༔ ནམ་མཁའ་གཅིག་ལ་གསལ་བའི་ཉི་ཟླ་དུས་ཅིག་ལ་ཤར་བའི་ཚེ༔ ང་ནི་ཡུལ་གང་གིས་ཀྱང་མ་བསྒྲིབས་པར་ཡེ་ཐོག་མ་ནས་དེ་ལྟར་གནས་སོ༔ ཀྱེ་རིགས་ཀྱི་བུ་དེ་ལས་འདས་པའི་འོག་ཏུ་ཅི་ཡང་མ་ཡིན་པའི་ཤེས་པ་ཉམས་སུ་མྱོང་བར་འགྱུར་རོ༔ ཞེས་བཀོད་པ་ཆེན་པོ་ལས་ཆོས་སྐུ་ཅོག་བཞག་ཏུ་གཏན་ལ་ཕབ་པ་སྟེ་དྲུག་པ་རྫོགས་སོ༔