མཇུག་དོན།
དེ་ལྟར་ལེགས་བཤད་འདུལ་བའི་རྩ་བ་བརྟན། །གཞན་ཕན་བྱང་སེམས་ངོ་མཚར་ལོ་འདབ་རྒྱས། །གསང་ཆེན་སྨིན་གྲོལ་འབྲས་བུས་ཡོངས་གང་བའི། །རྣམ་འགྲེལ་དཔག་བསམ་སྙེ་མ་འདི་ལོངས་ཤིག །མཚུངས་མེད་རྣམ་དཔྱོད་སྟོབས་རྒྱས་རྟ་བདུན་གྱིས། །དྲངས་པའི་ལུང་རིགས་ཤིང་རྟ་ལ་ཆིབས་ནས། །ལེགས་བཤད་འོད་སྟོང་སྤྲོ་བཞིན་འདིར་ཤར་གྱིས། །རྒྱལ་བསྟན་པདྨོའི་གེ་སར་རྒོད་མིན་ནམ། །དེང་བདག་འབྱུང་ལུས་རྒ་བས་དམ་བཅིངས་ཀྱང་། །སེམས་ཀྱི་ཁྱེའུ་ཆུང་ལང་ཚོ་མ་ཉམས་པས། །རྣམ་དཔྱོོད་མེ་ལོང་ངོས་ལ་ཚིག་དོན་གཟུགས། །འཕོས་པས་ཟ་འོག་ཐགས་ལ་ངལ་གསོ་སྦྱིན། །སྐྱེ་བར་གོམས་པའི་ཤེས་རབ་མཐུ་ཆུང་ཞིང་། །དད་བརྩོན་སྙིང་སྟོབས་གོམས་ཤུགས་དམན་གྱུར་ཀྱང་། །ཡོངས་འཛིན་དམ་པའི་ཐུགས་རྗེའི་ཕྱག་བཟང་གིས། །དྲངས་པས་ལེགས་བཤད་སྨྲ་བའི་སྤོབས་པ་ཐོབ། །གང་བཤད་འདི་ནི་མདོ་རྒྱུད་སྙིང་པོའི་དོན། །ཐར་འདོད་སྐལ་ལྡན་སྐྱེ་བོ་འཇུག་པའི་སྒོ། །བླང་དོར་གསལ་བར་བྱེད་པའི་སྒྲོན་མེ་སྟེ། །འདོད་སྟེར་དཔག་བསམ་སྙེ་མ་འདི་ཡིན་ནོ། །ཇི་ལྟར་གཏིང་མཐའ་གཞལ་དཀའི་ཆུ་གཏེར་ཆེ། །ཉམ་ཆུང་རི་བོང་རྐྱལ་གྱིས་ཆོད་མིན་ལྟར། །གཞུང་དོན་རྟོགས་དཀའ་བདག་བློ་མཐུ་ཞན་ཕྱིར། །ནོངས་པར་གྱུར་གང་དམ་པ་རྣམས་ལ་བཤགས། །དེ་ལྟར་བཤད་ལས་དགེ་བ་གང་ཐོབ་དེས། །བདག་གཞན་སྲིད་ཞིའི་ཆུ་གཏེར་ལས་སྒྲོལ་ནས། །སྐུ་དང་ཡེ་ཤེས་འདུ་འབྲལ་མེད་པ་ཡི། །ཐར་མཆོག་ཀུན་བཟང་གོ་འཕང་མྱུར་ཐོབ་ཤོག །ལུང་རིགས་མན་ངག་རྗེས་འགྲོའི་རྣམ་བཤད་འདི། །དབང་ཕྱུག་རལ་པའི་རྒྱན་གྱུར་དཀྱིལ་འཁོར་ལྟར། །ཆོས་སྒྲའི་སྣང་བས་ཕྱོགས་ཀུན་ཡོངས་ཁྱབ་སྟེ། །འགྲོ་ཀུན་གདུང་སེལ་ཕན་བདེའི་དཔལ་འབར་ཤོག །གནས་སྐབས་སུ་ཡང་འཇིག་རྟེན་ཁམས་མ་ལུས། །ལྷ་ཡུལ་ཇི་བཞིན་དགའ་སྐྱིད་བདེ་བས་འཚོ། །ཁྱད་པར་བསྟན་འཛིན་སྐྱེས་བུས་ཡོངས་གང་ནས། །བསྟན་པ་དྲི་མེད་དར་ཤིང་རྒྱས་པར་ཤོག །བདག་ཀྱང་ཚེ་རབས་ཀུན་ཏུ་སྔ་འགྱུར་གྱི། །བཤད་སྒྲུབ་ཉི་ཟླའི་སྣང་བ་རབ་བཟུང་ནས། །ཐུབ་བསྟན་གླིང་བཞིའི་ཁྱོན་འདིར་རྟག་འཆར་བས། །ཕན་བདེའི་པདྨོ་འདབ་བརྒྱ་འབྱེད་པར་ཤོག །ཅེས་སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ཞེས་བྱ་བ་འདི་ནི། སྔར་མིང་དོན་མཐུན་པའི་གྲོགས་མཆོག་ཧོར་བླ་མ་དགེ་སློང་བསྟན་འཛིན་འགྱུར་མེད་ཀྱིས་བསྐུལ་ནས་རང་ལོ་ཉི་ཤུ་རྩ་བདུན་པ་ལྕགས་ཕོ་སྤྲེའུའི་ལོ་ལེའུ་གཉིས་པ་སོ་ཐར་གྱི་སྐབས་ལས་དགེ་སློང་ཕའི་སྡེ་ལྔ་ཡན་ཆད་འབྲུ་འགྲེལ་དུ་བརྩམས་པ་ཞིག་ཡོད་ནའང་། དེ་དུས་བློ་གྲོས་མ་སྨིན་པས་དམར་ནག་སྤེལ་བ་ཙམ་གྱི་ཡི་གེ་ལ་དོན་མེད་པར་མཐོང་ནས་སླར་འཕྲོའི་རྩོམ་འདུན་བསྐྱུངས་པ་ལས། ཕྱིས་མདོ་སྔགས་ཀྱི་གཞུང་ལུགས་སྨྲ་བ་རབ་འབྱམས་པ་ཕྲིན་ལས་རབ་འཕེལ་གྱིས་སྡོམ་གསུམ་བསྟན་བཅོས་ལ་རབ་རང་གཞུང་ངམ་གཞན་འགྲེལ་གང་རིགས་སུ་བྱས་པ་དང་ཐ་ནའང་གནས་འགྱུར་ཙམ་ལ་རང་ལུགས་ཀྱི་གྲུབ་མཐའི་གནད་འཁྲོལ་བ་ཞིག་ཅིས་ཀྱང་བརྩམ་དགོས་ཞེས་རིང་མོ་ནས་ཡང་ཡང་བསྐུལ་བ་དང་། ཁྱད་པར་དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་རིགས་དང་དཀྱིལ་འཁོར་ཀུན་གྱི་ཁྱབ་བདག་བཀའ་དྲིན་མཉམ་མེད་རྗེ་བླ་མ་དམ་པ་བཏེར་ཆེན་ཆོས་ཀྱི་རྒྱལ་པོའི་བཀའ་ལུང་ལྕི་བས་སྡོམ་གསུམ་རྣམ་ངེས་ཀྱི་བསྟན་བཅོས་ལེགས་བཤད་རྨད་དུ་བྱུང་བ་འདི་ཉིད་ཀྱི་ཞབས་ཏོག་ལ་དམིགས་ཤིང་རང་གི་བློ་གྲོས་ཀྱང་གོམས་པར་བྱ་བའི་ཕྱིར་འགྲེལ་པ་མཐའ་ཆོད་པ་ཞིག་འཕྲལ་དུ་རྩོམ་པར་གྱིས་ཞེས་སྩལ་བ་གུས་པའི་གཙུག་གིས་མཆོད་དེ་རྩོམ་པ་ལ་ཞུགས་པ་ན། སྔ་འགྱུར་བསྟན་པའི་མངའ་བདག་མཁྱེན་བརྩེ་ནུས་པའི་དབང་ཕྱུག་ཆེན་པོ་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུའི་ཞལ་སྔ་ནས་ཀྱང་སྡོམ་གསུམ་ལ་འགྲེལ་པ་བྱས་པ་ནི་སྔ་འགྱུར་བསྟན་པའི་གསོས་སྨན་དུ་འགྱུར་རོ་ཞེས་དབུགས་དབྱུང་བའི་བཀའ་སྩལ་ཐོབ་པས་ཀྱང་ཡིད་སྤྲོ་བར་གྱུར་ཅིང་། སྒྲ་སྙན་སྡེབ་སྦྱོར་རྩིས་སྐར་ནག་ལ་བློ་བྱང་བའི་རིག་བྱེད་པ་དགེ་སློང་ཨོ་རྒྱན་དཔལ་འབྱོར་གྱིས་ཀྱང་རྩོམ་གདན་གྱི་བྲི་གཞིའི་རྐྱེན་སྦྱར་བ་སོགས་ལ་བརྟེན་ཏེ། གཉོས་ཀྱི་དགེ་སློང་རྨོངས་པ་དྷརྨ་ཤྲཱིས་རང་ལོ་ལྔ་བཅུ་ང་ལྔ་པའི་ཐོག་ཏུ་སོན་པ་ཀུན་འཛིན་གྱི་ལོ་དབོ་ཟླ་བའི་ཚེས་དགུ་རེས་གཟའ་པ་ཝ་སངས་རྒྱུ་སྐར་ནབས་སོ་དང་རྩེ་བའི་ཕྱི་དྲོ་སེང་གེའི་དུས་སྦྱོར་ལ་ཡོན་ཏན་རིན་པོ་ཆེའི་འབྱུང་གནས་ཨོ་རྒྱན་སྨིན་གྲོལ་གླིང་གི་གཙུག་ལག་ཁང་ཆེན་པོར་སྦྱར་བའོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེ་རྒྱུན་མི་ཆད་པ་འབྱུང་པའི་གཞིར་གྱུར་ཅིག། །།
༈ སྭ་སྟི། ཟླ་མེད་སྟོན་པ་རྫོགས་སངས་རྒྱས་དེ་ཡིས། །རང་གིས་བརྙེས་པའི་ཆོས་ཀྱི་རྒྱལ་ཐབས་ལ། །འགོད་ཕྱིར་གདུལ་བྱའི་སྐལ་བ་དང་འཚམས་པར། །ཐེག་གསུམ་ཆོས་སྒོ་བརྒྱད་ཁྲི་བཞི་སྟོང་བསྟན། །སྲིད་མཚོ་ཉམ་ངའི་གྲོང་ལས་རིང་བརྒལ་ནས། །རྣམ་གྲོལ་རིན་ཆེན་ལེན་པ་གྲུ་ཡི་རྟེན། །སོ་ཐར་བྱང་སེམས་རིག་འཛིན་སྡོམ་པ་ཡི། །མཐུན་པའི་རླུང་གིས་བསྐུལ་བ་ཉིད་ལ་རག །དང་པོ་བླང་ཡུལ་མཁན་སློབ་དགེ་འདུན་ལས། །སྲོག་འཚོའི་བར་དུ་གཞན་གནོད་ལས་ལྡོག་པ། །བདག་དོན་ཉིད་དུ་དགྲ་བཅོམ་རྗེས་སློབ་ཚུལ། །འབྲས་བུ་མྱང་འདས་རྣམ་གཉིས་ཐོབ་ཕྱིར་རོ། །གཉིས་པ་སློབ་དཔོན་ཉིད་དམ་རྟེན་ལས་ཀྱང་། །བྱང་ཆུབ་བར་དུ་ཚུལ་ཁྲིམས་རྣམ་པ་གསུམ། །གཞན་དོན་ཉིད་དུ་བྱང་སེམས་རྗེས་སློབ་ཚུལ། །འབྲས་བུ་ས་བཅུའི་གོ་འཕང་ཐོབ་ཕྱིར་རོ། །གསུམ་པ་བླ་མ་དཀྱིལ་འཁོར་འཁོར་ལོ་ལས། །ནམ་མཁའ་ཇི་སྲིད་གཉིས་དོན་ཡེ་ཤེས་ཀྱི། །འཁོར་ལོར་རྒྱས་འདེབས་སངས་རྒྱས་རྗེས་སློབ་ཚུལ། །འབྲས་བུ་རྡོ་རྗེ་འཆང་གི་ས་ཐོབ་ཕྱིར། །གང་ཡང་སྲིད་པའི་འདོད་ཆགས་དུག་ཆེན་ཁམས། །སྤོང་སྦྱོང་ལམ་དུ་བྱེད་པའི་ཁྱད་པར་གྱི། །ཐབས་ལས་ཉོན་མོངས་རང་མཚན་ཉིད་སྤོང་བར། །རྣམ་དབྱེར་མེད་ཕྱིར་དོན་གྱི་དགོངས་པ་མཐུན། །དེ་ཡང་རྒྱུད་གཅིག་ཉིད་ལ་སྡོམ་པ་གསུམ། །མཚན་ཉིད་དྲུག་ལྡན་ངོ་བོ་གཅིག་ཏུ་གནས། །ལེན་ཅིང་རྟེན་དང་ཕྱིར་འཆོས་འཁྲུལ་མེད་དུ། །སྤྱོད་པ་སྡེ་སྣོད་གསུང་རབ་ཤེས་ལ་རག །གང་ཡང་གཞུང་མང་གིས་དུབ་ངལ་གསོའི་སྐྱེས། །ཚིག་ཉུང་དོན་རྒྱས་སྡོམ་གསུམ་རྣམ་ངེས་ཀྱི། །ལེགས་བཤད་རིན་ཆེན་ཤེས་བྱའི་ཆུ་ཀླུང་ཀུན། །འཁྱིལ་བ་པཎ་ཆེན་མཁྱེན་པའི་མཚོ་ལས་བྱུང་། །དེ་ཡི་ཚིག་དོན་མ་འདྲེས་མཚར་པོའི་གཟུགས། །ཇི་བཞིན་གསལ་བྱེད་འགྲེལ་པ་ནོར་བུ་ཡི། །མེ་ལོང་ཉིད་དམ་ལེགས་བཤད་འདོད་འཇོའི་ཕྱིར། །ངོ་མཚར་དཔག་བསམ་སྙེ་མར་ལྷུན་གྱིས་གྲུབ། །གང་དེ་མཁས་བཙུན་བཟང་པོས་མངོན་མཐོའི་བཤེས། །ཆོས་དཔལ་རྒྱ་མཚོའི་རྣམ་དཔྱོད་ནོར་བུའི་ཏོག །མཆོད་ལས་ཆོས་ཆར་འབེབས་བྱེད་རིགས་ཀྱི་གཅུང་། །ཀུན་དགའ་ཚུལ་ཁྲིམས་བློ་གསལ་འདོད་འཇོའི་དཔྱིད། །བྲི་བརྐོས་བྱེད་པོ་ཨོ་རྒྱན་དཔལ་འབྱོར་དང་། །ཨོ་རྒྱན་ཚོགས་གཉིས་རྡོ་རྗེ་ཆོས་བཟང་རྣམས། །སོར་འཕྲུལ་གཅིག་ལས་འབད་མེད་དུ་མ་རུ། །འཆར་བའི་ངོ་མཚར་པར་གྱིས་མཚོན་པ་གང་། །སྒྲུབ་བྱེད་དོ་དམ་དགེ་སློང་རབ་འཕེལ་དང་། །རིག་བྱེད་འཚོ་རྐྱེན་འདོད་སྟེར་གཉེར་གྱི་ལས། །འཛིན་པ་ངག་དབང་རབ་བརྟན་གྱིས་མཚོན་ཏེ། །ལས་བྱེད་ཀུན་གྱིས་བསམ་སྦྱོར་མཐུན་པར་ཞུགས། །འདིས་ཐོབ་དགེ་ཚོགས་ཤིང་རྟའི་བགྲོད་པ་ཡིས། །སྐུ་གསུམ་ལང་ཚོ་འབར་བའི་ཉི་མ་ནི། །ཕན་བདེའི་སྣང་བ་འགྱེད་ལ་འདྲོངས་པའི་དཔལ། །མཐའ་ཡས་འགྲོ་བ་ཀུན་ལ་གསལ་གྱུར་ཅིག །ཐར་འདོད་རྣམས་ཀྱིས་བསླབ་པར་བྱ་བའི་གནས་ནི་སྡོམ་པ་གསུམ་གྱི་བསླབ་བྱ་ལ་ནན་ཏན་སྙིང་པོར་བྱ་བ་ལས་གཞན་དུ་མེད་ལ། ཇི་བཞིན་པ་རང་རྒྱུད་ལ་འབྱོར་བ་ཡང་སྡེ་སྣོད་ཀྱི་གསུང་རབ་རྣམ་ལ་ལྟོས་ཤིང་དེ་དག་སོ་སོར་བསླབས་པར་མི་ནུས་པ་རྣམས་ཀྱི་དོན་དུ་སྡོམ་པ་གསུམ་གྱི་བརྗོད་བྱ་གཞུང་ཚན་གཅིག་གིས་སྟོན་པའི་བསྟན་བཅོས་སྔོན་གྱི་མཁས་པ་རྣམས་ཀྱིས་མཛད་པ་འགའ་ཞིག་འདུག་མོད། སོ་བྱང་གཉིས་ལ་ཁས་ལེན་མི་འདྲ་བའི་ཁྱད་པར་རེ་གཉིས་ཙམ་ལས་བརྗོད་བྱའི་དོན་འདྲ་ཡང་། སྔགས་སྡོམ་གནས་འགྱུར་དང་བཅས་པ་ལ་སྔགས་གསར་རྙིང་གི་དབང་ལས་མི་འདྲ་བའི་ཁྱད་པར་ཆེ་བ་ལ་དགོངས་ནས་པཎ་ཆེན་པདྨ་དབང་གི་རྒྱལ་པོའི་སྡོམ་གསུམ་རྣམ་པར་ངེས་པའི་གཞུང་ལེགས་བཤད་སྙིང་པོར་དྲིལ་བ་མཛད་ཀྱང་། འགྲེལ་པས་མ་བཤད་ན་རྟོགས་དཀའ་བས་བློ་གསལ་དོན་གཉེར་རྣམས་ལ་ཕན་པའི་ཆེད་དུ་གཅུང་མཁན་ཆེན་ལོ་ཙཱ་བ་ཉིད་ལ་རྩོམ་པར་བསྐུལ་བ་བཞིན་རྡོ་རྗེ་བྲག་རིག་འཛིན་མཆོག་སྤྲུལ་དམ་པས་ཀྱང་རང་ལུགས་འཛིན་པ་རྣམས་ལ་ཤིན་ཏུ་མཁོ་བ་ཡོང་འདུག་པས་རྩོལ་བ་བསྐྱེད་པ་ལེགས་སོ་ཞེས་པའི་གསུང་གིས་རྐྱེན་བྱས་མྱུར་དུ་གྲུབ་པའི་བརྩམ་གདན་ལས་ཐོག་མར་ཕབ་པའི་གླེགས་བམ་རྩོམ་ཕུད་དུ་ཕུལ་བར་ཤིན་ཏུ་དགྱེས་པའི་དབུགས་དབྱུང་དང་། ད་ཆ་པར་ཞིག་བྱུང་ན་དོན་གཉེར་མཐའ་དག་གིས་འགྲུབ་སླ་ཞིང་ཕན་ཆེ་བ་འདུག་པས་རྩོལ་བ་བསྐྱེད་ཅིག་པར་བཀའ་འཕྲིན་སྩལ་བ་ལས་གཅུང་ཀུན་དགའ་ཚུལ་ཁྲིམས་རྒྱ་མཚོས་འབད་རྩོལ་ཆེན་པོས་པར་དུ་བསྒྲུབས་པའི་སྙིང་སྟོབས་འཁུར་དུ་བཟུང་བའི་ཚེ་པར་བྱང་དུ་རིག་པ་འཛིན་པ་འགྱུར་མེད་རྡོ་རྗེས་ས་མོ་གླང་གི་ལོ་ལ་བཀོད་པ་བདེ་ལེགས་སུ་གྱུར་ཅིག། །།
༈ མཁན་སློབ་ཆོས་གསུམ་རིང་ལུགས་ཆེ། །འཛམ་གླིང་ས་གསུམ་ཁྱབ་པར་འཕེལ། །འགྲོ་རྒྱུད་མཆོག་གསུམ་སྣང་བ་དང་། །མི་འབྲལ་དུས་གསུམ་དགེ་ལེགས་ཤོག