སྡིག་སྦྱོང་བདུད་རྩིའི་ཐིག་པ།
སྡིག་སྦྱོང་བདུད་རྩིའི་ཐིག་པ་བཞུགས་སོ། །རང་གི་སྤྱི་བོར་པད་ཟླའི་གདན་ལ་འཇམ་དཔལ་དཀར་པོ་གཡས་མཆོག་སྦྱིན་དང་གཡོན་ཨུཏྤལའི་སྡོང་པོ་ཐུགས་ཀར་འཛིན་པ་གེ་སར་སྙན་གྱི་ཐད་དུ་གྲོལ་བའི་རྩེ་མོར་རྡོ་རྗེས་མཚན་པ་ཞི་བའི་རྒྱན་གྱིས་སྤྲས་པ་ཞིག་བསྒོམ། རང་གིས་སྔར་བྱས་ཀྱི་སྡིག་ལྟུང་ལ་འགྱོད་སེམས་དྲག་པོས་ཡིག་བརྒྱ་བཟླ་བཞིན་གསོལ་བ་རྩེ་གཅིག་ཏུ་བཏབ་པས་འཇམ་དཔལ་གྱི་སྐུ་ལས་འོད་ཟེར་ཆུ་ཤེལ་གྱི་མདོག་ལྟར་འཚེར་བ་ཞིག་བྱུང་ནས་རང་གི་ལུས་ལ་ཐིམ་པས་སྡིག་ལྟུང་ཐམས་ཅད་དག་པར་བསམ། སླར་སྐུ་དེ་ཡང་འོད་དུ་ཞུ་སྟེ་རང་ལ་ཐིམ་པར་མོས་ནས་དབྱེར་མེད་དུ་འཇོག་གོ །རྟགས་ནི་སྤྱི་ལྟར་རོ། །ཞེས་པ་འདིའང་རང་གི་སློབ་བུ་འགའ་ཞིག་ལ་ཕན་པའི་བསམ་པས་སྡོམ་ཁྲལ་པས་ཉེར་དགུའི་མཚན་མོའི་གུང་ལ་བྲིས་སོ། །༈ ཀུན་མཁྱེན་བླ་མའི་ཐུགས་བརྒྱུད་བསྐུལ་བའི་གསོལ་འདེབས་བྱིན་རླབས་འདྲེན་པའི་ཤིང་རྟ་ཞེས་བྱ་བ་བཞུགས་སོ། །བརྗོད་མེད་བློ་ལས་འདས་པའི་ཡེ་ཤེས་ནི། །རང་བྱུང་གསང་བའི་ཚིག་ཏུ་རང་ཤར་བའི། །དོན་བརྒྱུད་བསྟན་པའི་སྟོན་པ་ཀློང་ཆེན་པའི། །ཡེ་ཤེས་ཐུགས་རྗེའི་སྤྱན་གྱིས་བདག་ལ་དགོངས། །རྒྱལ་བའི་དགོངས་པ་རྒྱལ་བས་འགྲེལ་མཛད་པའི། །གང་གི་ཆོས་མཛོད་ཐེག་མཆོག་རྫོགས་པ་ཆེའི། །བསྟན་པའི་སྙིང་པོར་འཕེལ་འགྲིབ་མི་མངའ་ཡང་། །བདག་འདྲའི་བློ་ལ་ལྐོག་གྱུར་འདི་མཐོང་ནས། །དད་གུས་གདུང་བའི་དབྱངས་ཀྱིས་གསོལ་འདེབས་ན། །ད་ལྟ་བྱིན་གྱིས་རློབས་ཤིག་ཀུན་མཁྱེན་རྗེ། །ཐེག་པ་རྒྱ་མཚོར་སྣང་བའི་ཡོན་ཏན་ཀུན། །རིག་པའི་རྩལ་དུ་རྫོགས་པའི་མཁྱེན་པ་ལ། །ཀུན་མཁྱེན་དགོངས་པ་ཡིན་ཞེས་གསུངས་ན་ཡང་། །བདག་འདྲའི་བློ་ནི་བྱིས་པའི་མལ་ན་ལུས། །དད་གུས༴ད་ལྟ༴ཚེ་འདིའི་སྣང་ཞེན་ཅི་ཡང་མ་ལོག་པར། །གང་གི་རྗེས་སུ་ཞུགས་
པར་ཁས་འཆེ་ཞིང་། །ཀློང་ཆེན་མཁའ་ལྟར་ཡངས་པའི་དགོངས་པ་ལ། །ཡིད་དཔྱོད་འཇུར་བུས་བཅིངས་པ་འདི་མཐོང་ནས། །དད་གུས༴ད་ལྟར༴སེམས་རིག་ཁྱད་པར་ཞིབ་ཏུ་མ་ཕྱེས་པར། །རྟོག་མེད་ཤེས་པར་གནས་པའི་གསལ་ཆ་ལ། །ལྷག་མཐོང་རིག་པའི་རང་བཞིན་ཡིན་སྙམ་གྱིས། སྲིད་པའི་བསམ་གཏན་སྒྲུབ་ལ་ཞུགས་མཐོང་ནས། །དད་གུས༴ད་ལྟར༴སྣང་རིག་གཅིག་གོ་གཅིག་གིས་མ་བཀག་ཀྱང་། །མ་བཙལ་རིག་པའི་རང་ཚུགས་མ་ཞིག་པའི། །རང་གྲོལ་མཉམ་པའི་གནད་འདི་མ་རྟོགས་པར། །འགྱུ་ཚད་གྲོལ་བར་རློམས་པ་འདི་མཐོང་ནས། །དད་གུས༴ད་ལྟར༴རིག་གདངས་ལྷུན་གྱིས་གྲུབ་པའི་སྣང་ཆ་ཀུན། །རིག་སྟོང་ཆོས་སྐུའི་དབྱིངས་དང་རོ་མཉམ་པར། །རྗེན་ནེར་སྐྱོང་བའི་ཚུལ་འདི་མ་ཤེས་པར། །འཁྲུལ་སྣང་ལམ་དུ་བྱེད་པ་འདི་མཐོང་ནས། །དད་གུས༴ད་ལྟར༴བརྒྱུད་པའི་བྱིན་རླབས་སྙིང་ལ་སིམ་པའི་མཐུས། །ཉམས་དང་རྟོགས་པའི་ལང་ཚོ་མ་རྒྱས་པ། །རྟེན་འབྲེལ་རླུང་སེམས་འདུས་པའི་འཆར་སྒོ་ལ། །ལམ་གྱི་དྲོད་རྟགས་འཛིན་པ་འདི་མཐོང་ནས། །དད་གུས༴ད་ལྟར༴བློས་རྒྱས་བཅོས་པའི་སེམས་འཛིན་ཇི་སྙེད་པ། །ཀློང་ཡང་ངང་དུ་ལྷོད་ཚུལ་འདི་བོར་ནས། །རྒྱུ་འབྲས་ཁྱད་དུ་གསོད་པའི་སྨྱོ་སྤྱོད་ཀྱིས། །རྒྱལ་བསྟན་རྨིང་ནས་བཤིག་པ་འདི་མཐོང་ནས། །དད་གུས༴ད་ལྟར༴ཕྱི་རྒྱུད་དུས་འདིར་སྐྱེས་པའི་ལས་ངན་བདག །མགོན་ཁྱོད་མཇལ་བའི་སྐལ་བཟང་མི་ལྡན་ཡང་། །གང་གི་རྣམ་ཐར་ཆ་ཙམ་ཐོས་པའི་མོད། །དད་གུས་གདུང་བའི་སེམས་ཀྱིས་མཆི་མ་ཤོར། །ཁྱབ་བདག་གདོད་མའི་སངས་རྒྱས་ཁྱེད་ཀྱིས་ཀྱང་། །སྒྲུབ་པའི་གནས་འདིར་སྒྲུབ་ལ་ཐུགས་གཞོལ་ན། །གང་གི་རྗེས་སུ་དོན་གྱིས་ཞུགས་འདོད་རྣམས། །མི་ཚེ་སྒྲུབ་པས་མི་སྐྱེལ་ཇི་ལྟར་རིགས། །ཀྱེ་མ་ཀུན་མཁྱེན་བླ་མ་གང་དུ་བཞུགས། །ཐེག་མཆོག་ཨ་ཏིའི་བསྟན་པ་གང་དུ་གནས། །ཟབ་དོན་རོ་བཅུད་སུ་ཡིས་མྱོང་སྙམ་ཚེ། །སྡོད་ཚུགས་མེད་ཅིང་དྲན་པ་གཏིང་ནས་འཕྱོ། །གསོལ་བ་སྙིང་ནས་འདེབས་སོ་ཀུན་མཁྱེན་རྗེ། །ད་ལྟ་བྱིན་གྱིས་རློབས་ཤིག་ངག་གི་དབང་། །འདི་ནས་སྐྱེ་བའི་ཕྲེང་བ་ཐམས་ཅད་དུ། །འབྲལ་མེད་རྗེས་སུ་ཟུངས་ཤིག་བླ་མ་མཁྱེན། །
ཞེས་པ་འདི་འང་ཀུན་མཁྱེན་ཆོས་ཀྱི་རྒྱལ་པོའི་སྒྲུབ་གནས་གངས་རི་ཐོད་དཀར་གྱི་མགུལ་རང་བྱུང་རྡོ་རྗེ་གསང་བའི་ཀེའུ་ཚང་ནས་ཆོས་མེད་མཁྱེན་བརྩེའི་ནོར་བུས་བུ་སློབ་བཤད་སྒྲུབ་ཉི་མས་བསྐུལ་བའི་ངོ་མ་ལྡོག་པར་གང་དྲན་ཡི་གེར་བྲིས་པ་དགེ ། ༈ སྲིད་པའི་འགྲོ་ལ་བྱམས་བརྩེའི་ཕྱག་བརྐྱང་ནས། །ལེགས་པར་སྟོན་པའི་གསུང་གིས་དབུགས་དབྱུང་བཞིན། །བདེ་ནས་བདེ་བའི་གནས་སུ་ཁྲིད་མཛད་པའི། །དཔལ་ལྡན་བླ་མའི་ཞབས་ལ་གསོལ་བ་འདེབས། །འཕགས་པའི་ཐུགས་རྗེས་གདུལ་བར་མི་གཡོ་བའི། །དུས་མཐར་སྐྱེས་པའི་སྐྱེ་བོ་བདག་འདྲ་དང་། །གང་གི་དྲིན་གྱིས་རྟག་ཏུ་འཚོ་མཛད་པའི། དཔལ་ལྡན་བླ་མའི༴གཞན་གྱི་གཡམ་དང་ལན་མོར་མ་སོང་བར། །ཆོས་ཀྱི་རྒྱུ་མཚན་ངེས་པ་ལ་བརྟེན་ནས། །ཆོས་ལ་འཇུག་པ་ཡིན་ཞེས་གདམས་མཛད་པའི། །དཔལ་ལྡན་བླ་མའི༴གང་བཤད་སེམས་ཀྱི་གཉེན་པོར་མཐོང་ནས་སུ། །ཆོས་ལ་ཕྱོགས་ཞེན་ངང་གིས་ཞི་བའི་ཚེ། །ཐོས་བསམ་གནད་དུ་སོང་ཞེས་གདམས་མཛད་པའི། །དཔལ་ལྡན༴དོན་མེད་འཁོར་བའི་ལས་ལ་ཡིད་སྐྱོ་ཞིང་། །དོན་ཆེན་བྱང་ཆུབ་སེམས་ལ་བློ་སྦྱངས་ནས། །ཕར་ཕྱིན་སྤྱོད་ལ་སློབས་ཞེས་གདམས་མཛད་པའི། དཔལ་ལྡན༴ལོག་འཚོ་སྤངས་ནས་ལོངས་སྤྱོད་ཀྱི་ནས་འཚོ། །ཕ་ཡུལ་སྤང་ནས་མི་མེད་ནགས་ཚལ་དུ། །སྒྲུབ་པའི་རྒྱལ་མཚན་ཚུགས་ཞེས་གདམས་མཛད་པའི། །དཔལ་ལྡན་བླ་མའི༴དྲན་ཤེས་ལྕགས་ཀྱུས་ཟིན་པའི་སེམས་ཀྱི་གླང་། །ཆོས་བརྒྱད་རྒུན་ཆང་བཏུང་བས་མ་མྱོས་པར། །ལང་ཚོ་ཡོལ་བར་བགྱིས་ཞེས་གདམས་མཛད་པའི། །དཔལ་ལྡན༴དེས་ན་ལས་ངན་སྐྱེ་བོ་བདག་འདྲ་བར། །རྗེ་བཙུན་ཉིད་ལས་མགོན་སྐྱབས་གཞན་མེད་པས། །ཐུགས་རྗེའི་སྟོབས་དང་ཕྲིན་ལས་སྣ་ཚོགས་ཀྱིས། །སྐྱེ་བ་ཀུན་ཏུ་རྗེས་སུ་བཟུང་དུ་གསོལ། ཅེས་པ་འདི་ཡང་གོ་འཇོ་བ་ཆོས་ཀྱི་ཉི་མ་ནས་ཁྱེད་རང་ལ་གསོལ་འདེབས་ཞིག་རྩོམ་རོགས་ཞེས་པ་ཡང་ཡང་བསྐུལ་ངོ་མ་ལྡོག་པར་བཙུན་གཟུགས་མཁྱེན་བརྩེ་ནོར་བུས་བྲིས་པ་སྟེ་ཁོ་བོ་གསོལ་འདེབས་ཀྱི་ཡུལ་དུ་འོས་པ་ཞིག་ཡིན་ན་མིང་མ་སྨོས་པ་དང་འདི་གས་ཆོག་པ་ལགས་སོ། །
༈ ཤཱཀྱ་ཐུབ་པའི་དུས། གསང་ཆེན་རྡོ་རྗེ་ཐེག་པ་སྟོན་པའི་དཔལ། །སྐྱེ་འཆི་མི་མངའ་འཇའ་ལུས་རྡོ་རྗེའི་སྐུ། །མཚོ་སྐྱེས་པདྨ་འབྱུང་གནས་ཞེས་བྱར་འབྱུང་། །མི་འགྱུར་བརྡ་རྟགས་རྒྱན་དང་ཆ་ལུགས་སོགས། །རྫུ་འཕྲུལ་མཁའ་འགྲོས་གནས་འདིར་རི་མོར་བྲི། །༠༠༠འབྱོར་ཡོད། །འདྲ་སྐུ་རང་བྱོན་དེ་ཡི་ཐུགས་ཀ་དང་། །བྱང་ཕྱོགས་དར་ཆེན་གནམ་དུ་འཕྱར་འདྲ་དང་། །ཤར་ཕྱོགས་མཆོད་རྟེན་བརྩེགས་པ་འདྲ་བ་དང་། །ཁྱད་པར་ལྷོ་ཕྱོགས་ནོར་བུ་སྤུང་འདྲའི་རྩེར། །གཞུ་འདོམ་ཉེར་ལྔ་འཇལ་བའི་ནམ་མཁའ་རུ། །བྲག་ངོགས་གོང་འོག༠༠༠། །༠༠༠ལྡན་ངང་ནས་གཏེར་དུ་བཞག །སྒོ་གསུམ་རྫུ་འཕྲུལ་སྟོབས་ཀྱིས་ལེགས་ཕྱུང་ཤིང་། །ཟབ་གསང་གཏེར་མཛོད་གཏེར་སྒོ་གོང་མ་ལ། །མི་འགྱུར་བརྡ་རྟགས་རྡོ་རྗེའི་རྒྱ་གྲམ་གཏབ། །ཟབ་གསང་གཏེར་མཛོད་གཏེར་སྒོ་བར་མ་ལ། །འགྱུར་མེད་༠༠་ལྕགས་སྡིག་སྲིན་བུ་གདབ། །ཟབ་གསང་གཏེར་མཛོད་གཏེར་སྒོ་འོག་མ་ལ། །འཁྲུལ་མེད་བརྡ་རྟགས་གཡུང་དྲུང་གཡས་འཁྱིལ་ལ། །ཕྱོགས་བཞིར་བརྡ་ཡིག་ཧ་རི་ནི་ས་བཀོད། །དེ་བཞིན་རྒྱ་དགུ་རིམ་པའི་ཐ་རམ་མོ། །གནས་བདག་གཏེར་སྲུང་རྣམས་ལ་བཅོལ་ནས་གཏད། །ཕྱི་སྲུང་དཔལ་མགོན་སྡེ་བརྒྱད་ཚོགས་ལ་གཏད། །ནང་སྲུང་ཞིང་སྐྱོང་མཁའ་འགྲོའི་ཚོགས་ལ་གཏད། །གསང་བ་ཆོས་སྐྱོང་དགོངས་འདུས་ཚོགས་ལ་གཏད། །དུས་བབ་ང་སྤྲུལ་དམ་པ་འབྱུང་བའི་དུས། །ཕ་ནོར་བུ་ཡི་ལག་ཏུ་གཏད་ཤེས་གཅེས། །དེ་ལྟར་སྤྱོད་པ་མཛད་ཅིང་གཏེར་ལ་སྦས། །དུས་གསུམ་དགེ་ཕྱིར་བཀྲ་ཤིས་སྨོན་ལམ་བཏབ། །༈ ཡུལ་མ་གྷ་དྷ་ཡི་བྱང་ཕྱོགས་ན། །ལྷ་ཐུགས་རྗེ་ཆེན་པོས་བཟུང་བའི་ཞིང་། །བོད་གངས་ཅན་ལྗོངས་སུ་གྲགས་པ་ཡི། །གནས་དེ་ན་སུ་བཞུགས་སུ་མ་བཞུགས། །གནས་དེ་ན་འཇམ་དཔལ་སྙིང་པོ་ཡི། །རྒྱལ་ཚབ་ཀྱི་དམ་པར་དབང་བསྐུར་ཞིང་། །ཐུབ་པའི་རིང་ལུགས་སྐྱོངས་མཛད་པའི། །རྗེ་བླ་མ་བཀའ་དྲིན་ཅན་དེ་བཞུགས། །མཚན་བརྗོད་ན་ལྷུན་གྲུབ་བརྩོན་འགྲུས་ཞུ། །མཁྱེན་རབ་ནི་ཟབ་རྒྱས་ཆོས་ལ་རོལ། །ཐུགས་བརྩེ་ནི་དམན་པའི་འགྲོ་ལ་
འཇུག །ཕྲིན་ལས་ཀྱིས་རྒྱལ་བསྟན་སྐྱོང་བཞིན་པར། །ཡབ་ཇོ་འབྲོམ་བརྒྱུད་པའི་ལྟ་སྤྱོད་ཀྱི། །རྣམ་ཐར་གཙང་མ་བཟུང་ནས་ཡོད། །ལུང་སྡེ་སྣོད་ཀྱི་བདུད་རྩིར་རོལ་རོལ་ནས། །ཆོས་མངོན་རྟོགས་ཀྱི་ལང་ཚོ་ཆེས་དར་བའི། །འཁོར་བུ་སློབ་ཚོགས་པའི་འདུ་བ་ནི། །པད་ཚལ་ལ་བུང་བ་འཁོར་བ་བཞིན། །ཞབས་ཤིས་པའི་རི་མོ་བཀྲ་བ་དེ། །རྟེན་འཇིགས་མེད་ཆོས་ཀྱི་ཁྲིར་བཀོད་ནས། །གསུང་ལེགས་པར་བཤད་པའི་དགའ་སྟོན་ནི། །དུས་རྒྱུན་ཆད་མེད་པར་སྩོལ་བཞིན་བཞུགས། །གསུང་བཅུད་དེ་ལན་འགར་མྱང་བས་ཀྱང་། །བློ་ཆོས་ལ་འཁུལ་ལུགས་དེ་འདྲ་བ། །ཆོས་སྡེ་སྣོད་འཛིན་པ་ཕལ་ཆེར་གྱིས། །དུས་རིང་མོར་བསྟན་ཡང་དཀའ་བར་སེམས། །མགོན་ཁྱེད་ཀྱི་མཛད་པའི་རྣམ་ཐར་དེ། །ཆོས་བྱང་ཆུབ་ལམ་གྱི་རིམ་པ་ཡི། །དོན་གསལ་བྱེད་ཀྱི་འགྲེལ་བར་འཇོག་རུང་བ། །དམན་བདག་ལྟས་བསམ་ཀྱང་ཕྱོགས་ཙམ་ངེས། །ལས་ངན་པའི་སྐྱེ་བོ་བདག་འདྲ་ཡང་། །ཚུལ་ཐབས་ལ་མཁས་པའི་མཛད་སྤྱོད་ཀྱིས། །འཁོར་མཁས་མང་འདུས་པའི་ཆོས་གྲལ་དུ། །འཁོད་རུང་བའི་སྐལ་བ་བཟང་པོར་མཛད། །ཐུགས་དམན་ལ་བརྩེ་བའི་ཤུགས་ཕྱུངས་ནས། །ཞལ་དགྱེས་པའི་མདངས་ཀྱིས་མདུན་བསུས་ཏེ། །གསུང་གདམས་པའི་བདུད་རྩིས་བསྐྱང་བསྐྱང་བའི། །བཀའ་དྲིན་དེ་བརྗེད་མེད་ཡིད་ལ་འཁོར། །སྐུ་མིག་གིས་མཐོང་བའི་སྐལ་བཟང་དང་། །གསུང་རྣ་བར་ལྷུང་བའི་དགའ་སྟོན་གཉིས། །དུས་ད་ལྟ་བདག་ལ་ཉམས་པ་དེ། །ལས་ངན་པ་ཅི་ཞིག་བྱས་པས་ཡིན། །སྟེང་ཉིི་གཞོན་སྤྲིན་གྱི་བླ་གོས་ཅན། །ཟེར་འཛུམ་པས་པདྨའི་དོན་བྱེད་བཞིན། །ལམ་མཁའ་ལས་འགྲོ་འོང་བྱེད་པ་འདི། །མཐོང་རེས་བཞིན་ཆོས་རྗེ་བླ་མ་དྲན། །བྱེའུ་འཇོལ་མོ་གཡུ་ཡི་འདབ་གཤོག་ཅན། །ངག་སྙན་མོའི་མགྲིན་གླུ་ལེན་པ་ཡིས། །སྐྱབས་བླ་མ་བྲལ་བའི་གདུང་བ་ཡིས། །ཡིད་སྐྱོ་བ་གསོ་ལ་བརྩོན་པ་བཞིན། །ཟས་མི་གཙང་ཟོས་པའི་ཁེངས་པ་ཡིས། །བྱ་ཁྭ་ཏ་ང་རོ་འབྱིན་པ་ཡིས། །ཕ་བླ་མ་བྲལ་བའི་དྭ་ཕྲུག་གི །།མཚང་རིག་ནས་ཆེད་དུ་བརྙས་པ་འདྲ། །ཤིང་ཙན་དན་གྱི་དྲི་ངད་དང་འགྲོགས་པའི། །རླུང་སེར་བུས་ལུས་ལ་ཁྱབ་པ་འདིས། །རྗེ་བྲལ་བའི་གདུང་བ་ཆེས་ལྕི་བས། །ཁམས་
འདུས་པ་ནན་གྱིས་གསོ་བ་བཞིན། །དགུང་ཟླ་བ་ཤར་ལ་འཇའ་ཡོད་ཀྱང་། །ནུབ་ཕྱོགས་སུ་མི་རིང་གཞོལ་བ་དེ། །བུ་ཕ་ཡི་དྲུང་དུ་སྙོགས་དགོས་པའི། །བརྡ་གསལ་བར་སྟོན་ཕྱིར་འོང་པ་སྙམ། །བདེ་སྐྱིད་ལ་སྡུག་གིས་རྟག་དེད་པས། །མིང་དོན་མཐུན་ཉག་ཞེས་གྲགས་པ་འདིར། །འབངས་གྱེན་ལོག་གི་ཚུལ་དེ་མཐོང་མཐོང་ནས། །བློ་ལྷག་མེད་བླ་མའི་ཕྱོགས་སུ་ཤོར། །གནས་གྲོགས་དུས་གང་ལ་བརྟགས་ཀྱང་རུང་། །ཕ་རྗེས་དྲན་གྱིས་གསོལ་འདེབས་ཁོ་ན་རུ། །གྱུར་ཆེས་པས་གདུང་ཡུས་སྦྲང་མའི་གླུ། །ལེན་བསམ་པ་མེད་ཀྱང་ཁ་ནས་ཤོར། །ཨ་ལ་དེ་འདི་འདྲ་ཀུ་རེ་ཡིན། །ཕ་ཇོ་བོ་ཆེན་པོའི་བཀའ་བརྒྱུད་ལས། ལམ་བློ་སྦྱོངས་ཞེས་པའི་ཉམས་ལེན་ཡོད། །རྐྱེན་ངན་པའི་ཡོ་ལང་ཅི་བདོ་ཡང་། །ཞི་བདེ་བ་ཞིག་ལས་ཡོང་དོགས་མེད། །ཚིག་སྙན་པོ་མེད་པའི་གླུ་ཆུང་འདི། །མི་འགྲོ་ས་མེད་པའི་ནགས་ཁྲོད་ནས། །སྤྲང་ཆོས་མེད་མཁྱེན་ནོར་འབོད་པ་དེས། །ལག་འདུག་ཚུགས་མེད་ནས་བྲིས་པ་ཡིན། །ཧ་ཧ་ཧ། ༈ གདམས་ཟབ་བདུད་རྩིའི་ཐིག་པ་བཞུགས། སྲིད་ལམ་དུཿཁས་དུབ་པའི་འགྲོ་ཁམས་ཀྱི་ཚོགས་རྣམས། །བརྩེ་ཆེན་བྱམས་པས་དྲང་པའི་འོད་ཞགས་དེས་བཟུང་ནས། །སྨིན་གྲོལ་གདམས་ཟབ་བདུད་རྩིའི་དགའ་སྟོན་ལ་སྦྱོར་མཛད། །མཚུངས་མེད་རྒྱལ་བའི་རྒྱལ་ཚབ་དྲིན་ཆེན་རྗེ་མཁྱེན་ནོ། །ལེགས་ལེགས་སྤྱོད་པ་བཟང་འདྲའི་རིན་ཆེན་ཀྱི་སྣོད་དེ། །མང་མང་ཉེས་སྤྱོད་དུ་མའི་མི་གཙང་གིས་གཏམས་ནས། །སྙན་སྙན་ཚིག་གིས་འདོད་པའི་བཟའ་བ་རུ་སྟོན་ཀྱང་། །མཁས་མཁས་ཤེས་ལྡན་སུས་ཀྱང་ཡིད་རྟོན་ནི་མི་རུང་། །ཀ་ཡེ་རང་ཅག་འཁོར་བའི་འབྲོག་དགོན་གྱི་གནས་འདིར། །སྔོན་ཆད་ཉེས་པའི་ཁུར་ཆེན་བླངས་བ་འདིས་ཆོག་གི །རང་བརླག་ཕུང་ཁྲོལ་བསྐྱེད་པའི་འཇིག་རྟེན་གྱི་ལས་ལ། །སླན་ཆད་བསམ་བཞིན་འཇུག་པས་དགོས་པ་ཅི་མཆིས་སམ། རྟེན་ཅན་ཀིམ་པའི་འབྲས་འདྲའི་བདེ་བ་ལ་འདུན་ནས། །དོན་མེད་ཚེ་ཡི་གཡེང་བར་རྟག་པ་རུ་སྤྱོད་བཞིན། །ཕྱི་མའི་འདུན་མ་འགོག་
པའི་བསམ་ཤེས་ཅན་ཁྱེད་ཅག །འཆི་ཚེ་འགྱོད་གདུང་མ་བྱེད་རང་ལས་ལ་སོམས་ཤིག །རྒ་བའི་རྒུད་པས་མ་བཅོམ་འབྱུང་ལུས་ཀྱི་མེ་ཏོག །ཕྱི་རོལ་བགོ་བའི་འདབ་ནས་ཕང་ཕུང་དུ་བརྒྱན་ནས། །ལེགས་མཛེས་འཕྱོར་ཏེ་རང་ཉིད་མགུ་བྱེད་ལ་སེམས་འདི། །ཉོན་མོངས་རྟོག་པ་འཕེལ་བའི་རྩ་བ་རང་ཡིན་འདུག །ཕྱུགས་ལྟར་རང་བཞིན་ངོ་ཚ་ཁྲེལ་ཡོད་ལས་འདས་ཤིང་། །ལེགས་པར་སྤྱོད་ལ་མི་མོས་ཀྱ་ཀྱུ་ཡི་བློ་ཅན། །མི་དགེའི་ལས་ལ་དགྱེས་པའི་ལྟར་སྣང་གི་གྲོགས་ཀྱིས། །ནམ་ཞིག་ཕན་དུ་མ་སེམས་ད་ལྟ་ནས་བྱོལ་ཅིག །ལང་ཚོའི་པདྨོ་དགོད་པའི་རྣམ་འགྱུར་དང་ལྷན་ཅིག །བརྩེ་བའི་བཞིན་བཟང་སྟོན་དང་ངག་སྙན་གྱི་སྦྱོར་བས། །དབང་མེད་གཏན་ཡིད་འཕྲོག་པའི་བུད་མེད་ཀྱི་གཡེམ་ལ། །མ་སྤྱོད་འདི་ཕྱི་ཀུན་གྱི་སྐྱོན་ཡོན་ལ་སོམས་ཤིག །མི་རྟག་སྙིང་པོས་སྟོང་པའི་འབྱུང་འདུས་ཀྱི་ཕུང་པོ། །མི་གཙང་རྫས་ཀྱིས་སྦགས་པའི་ངན་སྣོད་ཀྱི་གོང་བུར། །མི་ཤེས་གཙང་བར་འཛིན་པའི་བློ་སྣ་དེ་བོར་ལ། མི་སྡུག་ཀེང་རུས་སྒོམ་པའི་རྣལ་འབྱོར་ལ་འབུངས་ཤིག །ཆེ་བཙུན་མིང་རྟགས་ཙམ་གྱི་ཚངས་སྤྱོད་དེ་དོར་ནས། ཕྲ་ཞིབ་བསླབ་པའི་གནད་ལ་གུས་སྦྱོར་གྱི་བརྩོན་པས། །འཆི་ཚེ་འགྱོད་པ་མེད་པའི་འདུལ་སྡོམ་ཀྱི་ཁྲིམས་ལ། །སྲོག་བཞིན་མངོན་ལྐོག་སྤོང་ལ་དུས་ཀུན་དུ་གནས་མཛོད། །བཤད་སྒོམ་མེ་ཆུ་ལྟ་བུའི་སྤང་འགལ་དུ་རྟོག་ཅིང་། །འདི་སྣང་ཞེན་པས་བསླད་པའི་ཆོས་མིན་ལ་སྤྱོད་བཞིན། །བཟླས་བརྗོད་བགྲང་ཕྲེང་ཟད་ཟད་མི་ཚེའི་མཐར་གཏུགས་ནས། །འབྲས་བུ་ཆེ་རུ་རེ་བའི་ངལ་བ་དེ་སྤོངས་ཤིག །བརྒྱ་ཕྲག་གཞུང་གི་ཟབ་བཅུད་མྱོང་བ་དེ་བོར་ནས། །གདམས་གཞན་འཚོལ་དུ་རེ་བའི་དཀའ་ཚེགས་ལ་སྤྱོད་འདི། །རྒྱ་མཚོ་དྲུང་ན་མཆིས་བཞིན་སྐོམ་གདུང་གི་གནོད་པས། འཆི་བའི་ཉེན་དུ་གྱུར་བའི་གནས་སྐབས་དང་མཚུངས་སོ། །ཀྱེ་མ་སྲིད་པའི་ཆོས་ཀྱི་མཚན་ཉིད་ལ་བསམ་ཚེ། །རང་མལ་བདེ་བར་འདུག་པའི་ལོང་སྐབས་ནི་ཅི་འཚལ། །བརྣག་དཀའ་སྡུག་བསྔལ་དྲག་པོའི་སྐྱོ་སེམས་ཤིག་བསྐྱེད་ནས། །དཀོན་མཆོག་རིན་ཆེན་གསུམ་པོ་སྐྱབས་གནས་སུ་བསྟེན་མཛོད། །ཉི་ཚེའི་བསམ་པས་མ་གོས་ལྷག་བསམ་གྱི་ཟླ་བས། འགྲོ་ཀུན་དྲིན་ལྡན་ཕ་མའི་རང་བཞིན་དུ་ཤེས་
པས། །གཞན་དོན་སྙིང་པོར་ལེན་པའི་བླ་མེད་ཀྱི་སེམས་བསྐྱེད། །མི་གཏོང་འཇམ་མགོན་གཞོན་ནུའི་རྣམ་ཐར་ལ་སློབ་མཛོད། །ཆོས་ཀུན་སྒྱུ་མ་སྤྲུལ་པའི་རྟ་གླང་གི་འཕྲུལ་བཞིན། །སྣང་དུས་ཉིད་ནས་བདེན་མེད་རྟེན་འབྲེལ་དུ་རྟོགས་པས། །ལྷན་སྐྱེས་བདག་ལྟའི་མྱུ་གུ་རྩ་བ་ནས་ཕྱུང་སྟེ། །ཀུན་མཁྱེན་ཡོན་ཏན་རྒྱ་མཚོའི་ཕ་རོལ་ལ་སྙེགས་མཛོད། །མདོར་ན་རང་ཉིད་བག་ཡོད་སྤྱོད་པ་ལ་ཞུགས་ཏེ། །རྟག་པར་སེམས་ཀྱི་གནས་སྐབས་ཅི་བཞིན་དུ་གནས་ཞེས། །ཡང་ཡང་བརྟགས་ཤིང་མ་ནོར་འཇུག་ལྡོག་ལ་བརྩོན་ནས། །ཅི་ནུས་རང་རྒྱུད་ཆོས་དང་འདྲེས་པ་ཞིག་མཛད་འཚལ། །ཅེས་པ་འདིའང་དགེ་ཚུལ་འཇམ་དབྱངས་ནས་སྔ་ཕྱི་ཡང་ཡང་བསྐུལ་ངོ་མི་ལྡོག་ཙམ་དུ་བན་གཟུགས་རྨོངས་པ་མཁྱེན་བརྩེ་ནོར་བུས་རང་ལ་མྱོང་བ་མེད་པའི་གདམས་ངག་ཡི་གེར་ཐོན་བྱུང་དུ་བྲིས་པའོ། །སརྦ་མངྒ་ལམ། །༈ ཕན་པའི་གཏམ་ཟུག་ངུའི་མགྲིན་གླུ་ཞེས་བྱ་བ། འཇམ་དཔལ་དབྱངས་ལ་ཕྱག་འཚལ་ལོ། །བདག་འདྲ་རྨོངས་པའི་མུན་དུ་ལུས་སྐྱེས་ཤིང་། །བླང་དོར་འབྱེད་པའི་ཤེས་རབ་མིག་ཟུམ་པ། །ཆོས་མིན་སྤྱོད་ཀྱི་བརྟུལ་ཞུགས་བ་ལྟ་བུས། །གདམས་པའི་བདུད་རྩི་ཁྱོད་ལ་ཇི་ལྟར་སྨྲ། །དེ་ལྟ་ནའང་རང་ལ་མོས་པའི་བུར། །གང་ཤེས་གནད་རྣམས་བསྡུས་པའི་ངག་ཅུང་ཞིག །སྡེབ་ལེགས་ཚིག་གི་སྙན་འགྱུར་ཀུན་སྤང་ནས། གོ་བདེ་ཕན་པའི་གདམས་ངག་འདི་ལྟར་སྨྲ། རང་ཅག་འཁོར་བའི་བདེ་བར་སེམས་གཡེང་ཞིང་། །འདོད་པའི་མེ་ཚོགས་སྙིང་ལ་འབར་བ་དང་། །མི་དགེ་སྤྱོད་ལ་ཞུགས་པའི་རྩ་བ་ཡང་། རང་སེམས་འདི་ཀ་ལགས་པ་ཐུབ་པས་གསུངས། དེ་ཕྱིར་རྟག་པར་དྲན་པའི་ལྕགས་ཀྱུ་འདི། རང་སེམས་གླང་བོའི་རྣ་བ་ནས་བཟུང་སྟེ། །ཉོན་མོངས་གདུག་པའི་གྲོགས་སུ་མི་གཏོང་བར། །ཡང་ཡང་བརྟགས་ཤིང་དཔྱད་པའི་བྱ་ར་མཛོད། །སྒྱུ་མ་ལྟ་བུའི་ནོར་དང་གཉེན་བཤེས་དང་། །འདུ་འཛིའི་གྲོགས་དང་འཇིག་རྟེན་ཆོས་བརྒྱད་དང་། །འདྲེས་པའི་དགེ་སྦྱོར་བཅོས་མའི་ལྟར་སྣང་ལ། །སྙིང་པོ་མེད་པའི་ཆགས་ཞེན་སྤོངས་ཤིག་བུ། །ཡར་འགྲོ་མར་འགྲོའི་ས་མཚམས་ལུས་རྟེན་
འདི། །ཐོབ་དུས་རང་གར་འདུག་པས་མི་ཕན་པས། །སྤྱོད་ལམ་ཀུན་ཏུ་ཕྱི་མར་ཕན་པའི་ལམ། །སྒྲུབ་པའི་དམ་བཅའ་མ་གཏོང་སྙིང་གི་བུ། །ཅིས་ཀྱང་སེམས་ལ་ཕན་གནོད་མི་འགྲོ་བའི། ཚེ་འདིའི་དོན་དང་འདྲེས་པའི་དགེ་སྦྱོར་དང་། ཕྲེང་བའི་རྩིས་བགྲང་བྱེད་པའི་དགེ་སྦྱོར་གྱིས། །རང་མགོ་རང་གིས་མ་སྐོར་སྙིང་གི་བུ། །འདི་ཕྱི་ཀུན་དུ་རང་ཉིད་སྐྱོབས་པའི་མགོན། །བླ་མ་མཆོག་དང་དཀོན་མཆོག་གསུམ་པོ་ལ། །བློ་གཏད་རེ་ལྟོས་གཅིག་ཏུ་སེམས་བྱས་ཏེ། །དད་པས་སྐྱབས་སུ་འགྲོ་ཞིང་ཕྱག་ཀྱང་འཚལ། །སྡིག་ལྟུང་དག་བྱེད་རྡོར་སེམས་སྒོམ་བཟླས་དང་། །ཚོགས་གཉིས་རྫོགས་ཕྱིར་མཎྜལ་འབུལ་བ་དང་། །བྱིན་རླབས་མྱུར་འཇུག་བླ་མའི་རྣལ་འབྱོར་རྣམས། །རིམ་བཞིན་སྒོམ་པའི་བརྩོན་པ་མ་དོར་ཀྱེ། །མདོར་ན་ཁྱོད་ལ་དགེ་ཆོས་ཅུང་བསྒྲུབ་པའི། །ད་སྐབས་རང་དབང་རང་ལ་ཡོད་དུས་འདིར། །དོན་མེད་ལེ་ལོའི་དབང་གིས་མ་སྡོད་པར། །སྒྲུབ་པའི་རྒྱལ་མཚན་ཚུགས་ཤིག་སྙིང་གི་བུ། །ཞེས་པ་འདིའང་རང་གི་རྗེས་སུ་འཇུག་པའི་སྙིང་གི་བུ་འཇམ་དབྱངས་བཟོད་པ་ལ་ཤེས་མེད་སྡོམ་མེད་མཁྱེན་ནོར་པས་ཁ་ཏ་བགྱིས་པའོ། །༈ དམ་ཆོས་སྒྲུབ་པའི་ཡན་ལག་ཚོགས་དུས་འདིར། །དོན་མེད་ཚེ་འདིའི་བྱ་བས་མ་གཡེང་པར། །ཉིན་མཚན་ཀུན་ཏུ་བརྩོན་པའི་གོ་བགོས་ཏེ། །སྙིང་ནས་ལྷ་ཆོས་སྒྲུབ་པའི་དུས་ལ་བབ། །ཆོས་འདིའི་སྒྲུབ་ལུགས་ཚུལ་བཞིན་མ་ཤེས་ན། །ལྟར་སྣང་དགེ་བས་མི་ཚེ་འཕུལ་སྲིད་པས། །བཤེས་གཉེན་དམ་པ་རྒྱུན་དུ་བསྟེན་ནས་སུ། །མི་ཟད་གསུང་གི་བདུད་རྩི་མྱོང་ན་ལེགས། །རང་གི་དོན་ཆེན་རང་གིས་མ་སྒྲུབ་ཀྱང་། །ཁྱོད་ནི་བདེ་བའི་གནས་སུ་འཁྲིད་བྱེད་པའི། སྐྱབས་དེ་སྲིད་པ་མེད་པའི་ཚུལ་བསམ་ལ། །བློ་སྣ་ཆོས་འབའ་ཞིག་ལ་དྲིལ་ན་ལེགས། །གཙང་མའི་རྟེན་བཟང་འདི་འདྲ་ཐོབ་དུས་སུ། །བློ་ཆེན་མི་ཡི་གོ་ས་མི་འཛིན་པར། །བླུན་པོ་ཕྱུགས་ཀྱི་གྲལ་ན་རྒྱུ་བ་དེ། །རང་གི་རང་ཉིད་ཕུང་བའི་སྔ་ལྟས་ལགས། །དུས་ངན་འདི་ལྟར་སྐྱེས་པའི་མི་རྣམས་ཀྱིས། །མི་ཚེ་འདི་ནི་རྩ་མགོའི་ཟིལ་པ་བཞིན། །མྱུར་བར་ནུབ་
པར་འགྱུར་བའི་ཚུལ་རིག་ནས། །ཆོས་ལ་སྙིང་རུས་སྐྱེད་པའི་དུས་སྐབས་ལགས། །སྙིང་ནས་བདེ་བ་གཅིག་པུ་བསྒྲུབ་འདོད་ན། །ལྷ་ཆོས་དམ་པ་ཞིག་ནི་སྒྲུབ་པར་འོས། །སྡུག་བསྔལ་བཟོད་པའི་སྙིང་སྟོབས་འདུག་གྱུར་ན། །ཁྱེད་ཅག་ཡིད་བདེ་ཁོ་ནར་བརྟེན་པར་མཛོད། །ཅེས་པ་འདི་འང་བཙུན་མ་ཞིག་གི་ངོར་མཁྱེན་བརྩེའི་ནོར་བུས་བྲིས། །༈ བཤད་སྒྲུབ་ཉི་མ་ལ་གདམས་པ་བཞུགས། བུ་དལ་གཅིག་མ་ཡེངས་བདག་ལ་གསོན། །ཆོས་རྣམ་དག་ཞིག་ཚེ་འདིར་སྒྲུབ་དགོངས་ན། །འཇིག་རྟེན་གྱི་མི་ལུགས་རྒྱབ་དུ་བོར། །དམ་པའི་རྣམ་ཐར་གྱི་རྗེས་སུ་སློབས། །བློ་སྣ་དེ་བླ་མའི་ལག་ཏུ་གཏོད། །གདམས་ངག་གི་སྙིང་པོ་སེམས་ལ་ཞོག །སྐྱིད་སྡུག་ཀུན་རྨི་ལམ་ལྟ་བུར་ལྟོས། །རང་སེམས་ལ་བརྟག་དཔྱད་ཡང་ཡང་མཛོད། །ལར་ད་ལྟའི་མི་ལ་ཡིད་རྟོན་མེད། །འདྲིས་ཆེ་ན་མཐའ་མ་ཀུན་དང་འགྲས། །མ་བསྟུན་རང་ཚུགས་བཟུང་ཙ་ན། །ཀུན་གྱིས་ཁ་ཟེར་རྒྱུན་ཆད་མེད། །སྒྲུབ་ན་རང་ཚུགས་ཤོར་དུ་ཟེར། །བཤད་ན་མདོ་ཤོར་ཁ་མཁས་ཟེར། །ཐབས་ཇི་ལྟར་བྱས་ཀྱང་བསྟེན་དཀའ་བས། །ས་ཐག་རིང་སར་བཞག་ན་དགའ། །འདུག་ན་དབེན་པའི་རི་ལ་སྡོད། །བསམ་ན་བླ་མའི་དྲིན་ལ་སོམས། །སྒྲུབ་ན་ཆོས་ཀྱི་སྙིང་པོ་ལོངས། །ཚུལ་དེ་ལྟར་མཛད་ན་སྐྱིད་པ་ལགས། །འཆི་བ་ནམ་འོང་ཆ་མེད་པས། །མི་ཚེ་རིང་པོའི་འདུག་གྲབ་དང་། །དོན་མེད་གཏམ་གྱི་བཤད་བཤད་ཀྱིས། རང་མགོ་མ་སྐོར་སྐུ་ཚེ་རིང་། །སྙིང་པོ་མེད་པའི་ནོར་རྫས་ལ། །ཆགས་པས་བསགས་བསྲུང་མི་རིགས་ཀྱང་། །སྟོན་པས་གནང་བའི་ལོངས་སྤྱོད་རྣམས། །རན་པར་སྤྱོད་ཅིག་བྱ་བྲལ་ལགས། །རང་སྐྱོན་རང་གིས་མི་མཐོང་ན། །གཞན་སྐྱོན་རང་གིས་ཅི་ལ་རིག །དེས་ན་ཕྱོགས་རིས་མེད་པ་ཡི། །དག་སྣང་འབའ་ཞིག་ཉམས་ལེན་མཛོད། །དེང་སང་སྙིགས་མའི་དུས་འདི་ལྟར། །རང་རེས་མི་གྲལ་སྙེགས་དཀའ་ཡང་། །དམ་པ་ལྷ་གྲལ་འཛིན་ནུས་པས། །སྐྱོ་བ་མི་དགོས་བློ་བདེ་མཛོད། །ཕ་རྒན་འགྲོ་ཁའི་ཁ་ཆེམས་རྣམས། །ལྷག་ལུས་མེད་པར་བུ་ལ་གདམས། །ཟ་རྒྱུ་མེད་ཀྱང་མྱོང་རྒྱུ་ཡོད། །མ་
བརྗེད་སེམས་ལ་ཡང་ཡང་ཞོག །བྱེས་པ་ལམ་ཡག་བཀྲ་ཤིས་ཤོག །གཞི་མ་བདེ་བའི་བཀྲ་ཤིས་ཤོག །བླ་སློབ་འཛོམ་པའི་བཀྲ་ཤིས་ཤོག །ཆོས་ལ་སྤྱོད་པའི་བཀྲ་ཤིས་ཤོག །མཁྱེན་ནོར་བའི་སྨྱོ་གཏམ་མོ། །༈ ཟིན་མེད་འཁོར་བའི་ལས་ལ་ཚར་དུས་ནི་མི་འདུག །འདོད་མང་བློ་ཁ་འདི་ལ་རྫོགས་དུས་ནི་མི་འདུག །སྡིག་གྲོགས་བྱིས་པའི་སེམས་ལ་མགུ་དུས་ནི་མེད་པས། །ད་ནི་དབེན་པའི་རི་ལ་བྲོས་པ་རང་ལེགས་སྙམ། །ཐོག་མེད་དུས་ནས་ཡ་ངའི་འཁོར་བ་འདིར་གནས་ཀྱང་། །སྐྱོ་སུན་ཡིད་ལ་མེད་པའི་མདོ་མེད་ཀྱི་སྡུག་རྒན། །བློ་བསམ་ནང་དུ་བསྐོར་ནས་རང་ལས་ལ་སོམས་དང་། །ད་ནི་འདི་ཕྱིའི་དོན་རྣམས་པང་བ་ནས་ཤོར་འདུག །ཀྱེ་མ་མི་ཚེའི་ཟླ་བ་ནུབ་པ་དང་ཉེ་ཞིང་། །འཇིགས་རུང་ངན་འགྲོའི་མུན་ནག་འཇུག་པ་ལ་བབས་ཀྱང་། །རང་སྙིང་རང་ལ་རྗེ་བའི་སེམས་ཙམ་ཡང་མེད་པར། །ད་དུང་ལྷོད་པོར་ཉལ་བའི་དྲེགས་མཁན་ལ་ལྟོས་དང་། །ཕ་གཅིག་བླ་མ་མཆོག་གི་གདམས་ངག་དེ་ཁྱེར་ནས། །མི་མེད་ལུང་སྟོང་རྣམས་སུ་སྡུག་རྒུར་རང་བྱེད་བཞིན། །ཆོས་བརྒྱད་ཆུ་ལ་བསྐུར་བའི་སྙིང་ཁམས་དང་བཅས་ཏེ། །འཆི་བ་སྒུག་རྒྱུ་བྱུང་ན་དགའ་བ་ཞིག་གདའ་ལགས། །ཞེས་པའི་སྐྱོ་གླུ་འདིི་ཡང་མཁྱེན་ནོར་པས་བྱང་ཕྱོགས་ཧོར་ཡུལ་དུ་བསྐྱོད་པའི་ལམ་ཁར་བརྗོད་པའོ། །༈ བྱས་བྱས་མང་པོའི་དཔལ་ཁ་ཐོབ་འདོད་ནི་མེད་ཀྱང་། །བསྟན་པའི་ཁུར་ཆེན་འདི་ཡང་ཐེག་ཚད་ཅིག་ཁྱེར་ཡོད། །འདོད་ཆེན་ཁ་མཁས་ཐུ་བའི་ལག་རྗེས་ནི་མེད་ཀྱང་། དྲང་སྲོང་བླ་མའི་ཐུགས་ལ་ཁྲེལ་བ་ནི་མེད་སྙམ། །ཧ་ཧ། བགྲང་བྱའི་ཁུར་ཀྱིས་དུབ་པའི་དྲིན་ཆེན་གྱི་མ་རྒན། །འཁྱར་འཁྱོར་ལུས་ཀྱི་འཁྲི་ཤིང་འཁར་བ་ལ་བརྟེན་བཞིན། །འབྲལ་གདུང་ངག་ནས་འཐོན་པའི་སྡུག་ཟད་ཀྱི་གླུ་ཡིས། །ཨོ་ལོའི་སྙིང་གི་ཆ་ཤས་ཕྱེ་མ་རུ་གཏོར་སོང་། །སྐྱབས་གཅིག་བླ་མའི་ཞབས་པད་དགའ་ལྡན་གྱི་གསེར་ཁྲིར། །འཁོད་ནས་མི་འཇིགས་ཆོས་རྔ་
སྒྲོགས་པ་དང་བཅས་ཏེ། །བསྐལ་བརྒྱར་རྡོ་རྗེའི་ཆོས་ལྟར་གཡོ་མེད་དུ་བཞུགས་པའི། སྐལ་བཟང་དེ་ཡང་གེགས་མེད་འགྲུབ་པ་རང་ཤོག་ཅིག །ལྟོ་གོས་བཟང་མང་རྙེད་ཀྱང་སྡུག་བསྔལ་གྱི་སྣོན་པ། །ཕུ་ནུ་མཛའ་བཤེས་མང་ཡང་ཞེ་གཅོད་ཀྱི་རྩ་བ། །ཆོས་མེད་བན་གཟུགས་འདི་ཡང་སྙིང་རྗེ་ཡི་རང་བཞིན། །དགོས་མེད་བློ་སེམས་མང་ཡང་འགྲུབ་དུས་ནི་ཅི་ཡོད། །འཆི་བདག་རང་སར་འབྱོར་བའི་ཕོ་ཉ་ཞིག་འབྱོར་ཡང་། །ཤི་གསོན་མགོ་བོ་སྐོར་བའི་བྱ་བ་ལ་གཡེང་ནས། །དལ་རྟེན་རྦབ་ལ་གཏོང་བའི་མདོ་མེད་ཀྱི་བཙུན་གཟུགས། །སྙིང་མེད་བདག་གི་སྤྱོད་ཚུལ་འདི་འདྲ་ལ་ལྟོས་དང་། །ཀྱེ་མ། གང་དྲན་ལག་ཏུ་ལེན་མིན་རང་སེམས་ལ་དབང་བས། །ཨ་རོག་གྲོགས་ཀྱི་རྣ་བར་འབབས་པ་རང་མེད་ན། །རང་མཚང་མི་ལ་སྟོན་པའི་དགོས་མེད་ཀྱི་ཅུས་ལབ། །མགྲིན་པའི་ཕུགས་སུ་སྦས་ན་ལེགས་པ་ཅིག་གོ་བྱུང་། །དཀོར་ནག་དུག་གི་འབྲས་བུའི་འཚོ་བ་རང་བསྟེན་བཞིན། །གཏན་གྱི་དོན་ཆེན་ཕུང་བའི་བྱ་བ་ལ་གཡེང་ནས། །མི་ཚེའི་ཉི་མ་འཕུལ་པ་སྙིགས་དུས་ཀྱི་གྲྭ་གཟུགས། །བདག་དང་བདག་འདྲའི་སྣང་ཚུལ་འདི་འདྲ་ལས་སྐྱོ་བ། །༈ ཆོས་མིན་མ་ཡིན་ཆོས་བཞིན་སྤྱོད་པའང་མིན། །དཔོན་ཆེན་མ་ཡིན་ཕྱི་མའི་བླ་མའང་མིན། །མི་དོན་མ་ཡིན་ཕུགས་ཀྱི་དོན་མིན་པས། །མི་ཚེ་འདའ་དགོས་འདིས་ཀྱང་སྣང་བ་སྐྱོ། །ཞིམ་པའི་ཟས་ཀྱིས་ལྟོ་བ་འགེངས་པ་དང་། ལྷན་གཅིག་མུ་ཅོར་སྨྲ་བ་འཕེལ་བ་འདི། དབྱར་སྐྱེས་སྤྲིན་གྱི་བླ་བྲེ་ལྡིང་བ་དང་། །རྨ་བྱ་དགའ་བའི་མགྲིན་གླུ་ལེན་པ་བཞིན། །༈ ཉེས་མང་འདུ་བའི་ལུས་རྒོག་ཆུ་ཤིང་དང་འདྲ་འདི། །དགྲ་གཉེན་བསམ་པ་རྫོགས་ཕྱིར་རང་མལ་དུ་བཞག་ནས། །ཡིད་ཀྱི་ཁྱེའུ་ཆུང་ལྷོ་ནུབ་ནམ་མཁའ་ཡི་ལམ་ནས། །ཕ་གཅིག་པདྨའི་དྲུང་དུ་འགྲོ་བ་ལ་ཉེ་བྱུང་།
༈ སྐུ་ཆས་ན་བཟའ་མཛེས་པའི་བླ་མ་དང་གཅིག །ཁྱིམ་གྱི་ལ་རྒྱ་འཛིན་པའི་གཙོ་བོ་དང་གཉིས། །དགོན་རྒོག་ཁ་འཛིན་དགོས་པའི་དཔོན་པོ་དང་གསུམ། །མདོ་མེད་ཁོ་བོའི་སྙིང་ལ་འདོད་པ་ཞིག་མི་སྣང་། །རང་མཚངས་མི་ལ་སྟོན་པའི་ཁ་དད་དང་ག །ཅིག །ཚུལ་བཞིན་ཉན་མཁན་མེད་པའི་ཆོས་བཤད་དངགཉིས། །དཀྱིལ་འཁོར་བཅའ་བཤམ་མཛེས་པའི་དབང་བསྐུར་དང་གསུམ། །མདོ་མེད༴སྒར་ཆས་མ་ཚང་མེད་པའི་བླ་ཆེན་དང་གཅིག །གདངས་རོལ་ཁྲོལ་པའི་གྲོང་ཆོག་སྙིང་པོ་དང་གཉིས། དཀོར་ནག་མང་པོར་སྤྱོད་པའི་གཞན་དོན་དང་གསུམ། །མདོ་མེད༴དྲན་ཚད་ངག་དུ་འདོན་པའི་བཤད་ཡམ་དང་གཅིག །རྨོངས་ཞེན་ཁོ་ནས་གྲུབ་མཐའ་འཛིན་ལུགས་དང་གཉིས། །ཡོན་ཏན་ཁོང་ན་མེད་པའི་ཆེ་འགྱིངས་དང་གསུམ། །མདོ་མེད༴ཆོས་ཟད་ཁོ་ནར་ཞེན་པའི་ཁ་ལྟ་དང་གཅིག །གླེན་པ་བཟང་ངན་མེད་པའི་འཁྲུལ་ཞིག་དང་གཉིས། །བཟླས་བརྗོད་གྲངས་ལ་དངོས་གྲུབ་རེ་བ་དང་གསུམ། །མདོ་མེད༴རྒྱུ་འབྲས་ཁྱད་དུ་གསོད་པའི་སྨྱོ་སྤྱོད་དང་གཅིག །བདག་ལྟའི་རང་ངོ་སྐྱོང་བའི་བསྒོམ་པ་དང་གཉིས། ལམ་གཞན་མེད་པར་ལྟ་བའི་ལོག་ལྟ་དང་གསུམ། མདོ་མེད༴ཕན་གནོད་ངོ་མི་ཤེས་པའི་མཁས་པ་དང་གཅིག །གྲོགས་ལ་འགྲན་སེམས་འཚོལ་བའི་མཆེད་གྲོགས་དང་གཉིས། །ཕན་ལན་ལོག་པར་འཇལ་བའི་མཛའ་བོ་དང་གསུམ། །ད་ནི་རིང་བ་ཞིག་དུ་འཇོག་སྙིང་རང་འདོད་བྱུང་། །༈ སྐུ་གསུམ་གཤིས་ལ་བཞུགས་པའི་རིག་སྟོང་གི་རང་ཞལ། །རང་སེམས་རང་སོར་བཞག་པའི་གུ་ཡངས་ཀྱི་ཀློང་ནས། །མ་མཐོང་མཐོང་བ་ཆེན་པོ་ཡང་ཡང་དུ་མཇལ་ན། །བར་མེད་བདེ་བའི་འོད་གསལ་རྗེན་པ་ཞིག་འཆར་སྐད། །འདི་བྱ་འདི་བསྒོམ་སྙམས་པའི་དམིག་གཏད་ཞིག་འདུག་ན། །རྣལ་འབྱོར་བློ་ཡི་སྤྲོས་པ་རང་མལ་ན་ཡོད་པས། །ཤེས་རློམས་རང་སེམས་སྐྱིད་པོའི་སྣང་བ་དེ་བཏང་ནས། །ཡེངས་མེད་དྲན་པའི་ངང་ནས་བར་མེད་དུ་སྒོམས་མཛོད། །སྣང་རིག་སྟོང་གསུམ་རོ་མཉམ་ཁྱབ་བརྡལ་གྱི་ཀློང་ནས། གང་ཤར་རང་སར་གྲོལ་བའི་
གདེངས་ཆེན་དེ་བརྙེས་ནས། །རྣལ་འབྱོར་རིག་འཛིན་ཞིག་པོའི་མཚན་སྙན་གྱི་ཅོད་པཎ། །བཟུང་བར་གྱིས་ཤིག་ཕ་རྒོད་བླ་མ་ཡི་བུ་དག །ལས་ངན་བཟོད་པར་ནུས་པའི་སྙིང་སྟོབས་ཅན་བདག་ནི། །ཆོས་འདི་ཐོས་པས་ཆོག་པའི་བློ་ངན་ཞིག་སྐྱེ་ན། །རྟོགས་པའི་ནོར་གྱིས་སྟོང་བའི་ལུས་རྒོག་འདི་འཁྱེར་བཞིན། །ཐག་རིང་གྲོང་མཐའ་བསྐོར་བའི་ལྟད་མོ་ལ་ཆས་འགྲོ། །ཞེས་པ་འདིའང་རྡོ་རྗེའི་མཆེད་པོ་བཤད་སྒྲུབ་ཉི་མ་དང་དགེ་འདུན་ཟུང་གིས་བསྐུལ་ངོར་མཁྱེན་ནོར་པས་བྲིས་པ་དགེ །༈ མགོན་དམ་པའི་རྗེས་ཀྱང་མ་ཟིན་ཞིང་། །བློ་ཤེས་པའི་ནུས་པ་སྟོབས་ཆུང་བས། །ཡིད་ཐེ་ཚོམ་ལམ་དུ་བྱིང་བ་ཡི། །དམན་བདག་འདྲའི་ཉམ་ཐག་འདི་ལ་གཟིགས། །སྔོན་བསོད་ནམས་ཟོང་གིས་བསྒྲུབས་པའི་ལུས། དུས་འདི་འདྲ་ལན་གཅིག་ཐོབ་མོད་ཀྱང་། །ནོར་རིགས་པའི་སྙིང་པོ་མ་ལོན་བར། །ལོ་ན་ཚོད་རྒས་དུས་ཡིད་རེ་ཕམ། །ཕ་དེད་དཔོན་འདྲ་བ་བསྟེན་པའི་མཐར། །གཞུང་བཟང་པོ་རྒྱ་མཚོ་ལྟ་བུ་ལས། །དོན་རིགས་པའི་ནོར་མ་རྙེད་པ་འགའ། །མཐོང་མཐོང་བ་འདིས་བྱས་ཡིད་རེ་ཕམ། །རྗེ་མཁས་པའི་ལེགས་བཤད་མཐོང་བའི་ཚེ། །ཡིད་དཔྱོད་པའི་གནད་གསང་མཐོང་དཀའ་ཞིང་། །ཚིག་སྤྱི་ཙམ་རག་རིམ་ཤར་བ་དང་། སླར་བརྗེད་ངས་འཕྲོག་འདིས་ཡིད་རེ་ཕམ། །ཚིག་བཤད་པའི་རི་མོར་གསལ་བ་བཞིན། །དོན་ཚོན་གྱིས་རང་སེམས་མ་བསྒྱུར་བར། །དཔེ་དཔེ་ཅན་ལྡོག་ཏེ་སྦྱོར་བ་ལ། །བློ་གོམས་པ་འདིས་ཀྱང་ཡིད་རེ་ཕམ། །གཞུང་ཟབ་མོར་ཞིབ་ཏུ་མ་སྦྱངས་ཤིང་། །སེམས་རྣམ་གཡེང་ཁོ་ནར་འཁྱམས་པ་བདག །ནོར་རིགས་པ་བྲལ་བའི་གདུང་བ་དེ། །དུས་ཀུན་ཏུ་སེལ་ཐབས་མི་འདུག་ན། །ཕ་དྲིན་ཆེན་བླ་མ་ཆོས་ཀྱི་རྗེ། །དོན་ལྷུན་གྱིས་གྲུབ་པའི་ཕྲིན་ལས་ཅན། །བུ་འདུལ་བའི་བརྩོན་འགྲུས་ཤུགས་བསྐྱེད་ལ། །ཡིད་གདུང་བ་འདི་ལས་དབྱུང་དུ་གསོལ། །ཅེས་པ་འདིའང་གཞུང་ཆེན་འགའ་ཞིག་གི་འགྲེལ་པ་མཇལ་དུས་བརྡ་དོན་ཚུལ་བཞིན་མ་མཇལ་བའི་རྐྱེན་ལས་གློ་བུར་དུ་བླ་མ་དྲན་བཞིན་ཡོད་པའི་སྐབས། རང་ལ་མོས་པའི་བུ་བཤད་སྒྲུབ་ཉི་མས་རྩོམ་པ་ཞིག་དགོས་ཟེར་བ་གཉིས་དུས་མཚུངས་པ་ལྟར་འཕྲལ་དུ་རྨོངས་ལས་ཆེས་རྨོངས་མཁྱེན་ནོར་པས་ཡིག་ལམ་དུ་སྤེལ་བ་དགེ །
༈ བདག་འདྲའི་གདུལ་དཀའི་སྙིགས་མའི་སེམས་ཅན་རྣམས། །གང་གི་ཐབས་མཁས་ཐུགས་རྗེའི་ཕྲིན་ལས་ཀྱིས། །སྐད་ཅིག་ཉིད་ལ་ལེགས་པར་གདུལ་མཛད་པའི། །དྲིན་ཆེན་བླ་མའི་ཞབས་ལ་གུས་བཏུད་ནས། །སྣ་ཚོགས་འཇིགས་པའི་འབྱུང་གནས་འཁོར་བ་ཡི། །རང་བཞིན་མཐོང་ནས་སྐྱོ་བས་བསྐུལ་བའི་གཏམ། སྡེབ་ལེགས་ངག་གི་རྒྱན་འདི་མཐོང་བའི་མོད། སླར་ཡང་དྲང་པོའི་ཚིག་གིས་ལན་འདི་ཞུ། །སྤྱིར་ན་སྔོན་གྱི་བཟང་པོའི་ལས་དབང་དང་། །བླ་མའི་གསུང་དང་ལེགས་བཤད་དམ་པའི་ཆོས། །ཐོས་དང་མཐོང་བའི་རྐྱེན་ལས་གློ་བུར་དུ། །དགོས་མེད་ཐུང་ངུའི་བློ་འདི་སྐྱེ་བ་སྲིད། །བློ་འདི་ཆོས་ལ་འཇུག་པའི་གཞི་ལགས་ཀྱང་། །ཡུལ་དང་གྲོགས་ཀྱིས་བསྒྱུར་ཉེན་ཆེས་ཆེ་བས། །སྐྱེས་མ་ཐག་ནས་ཕྱི་ལ་མི་འདོན་པར། །ནང་གི་སེམས་ལ་ཡུན་དུ་འདྲིས་ན་ལེགས། །དེ་ལྟར་གོས་པས་ནམ་ཞིག་ཡུལ་རྐྱེན་རྣམས། །ངེས་འབྱུང་འཕེལ་བའི་གྲོགས་སུ་གྱུར་པའི་ཚེ། །ཕ་ཡུལ་སྤངས་ནས་མི་མེད་རི་སུལ་དུ། །གྲོགས་མེད་གཅིག་པུར་གཤེགས་པའི་དུས་ལ་བབས། །དེ་ཚེ་རྣམ་དག་རྒྱལ་བ་དགྱེས་པའི་ལམ། །སྐལ་ལྡན་སྐྱེས་བུ་དམ་པ་འཇུག་པའི་སྒོ། །དྲི་མེད་བརྒྱུད་པའི་གདམས་ངག་རིན་པོ་ཆེ། །ཚུལ་བཞིན་ཉམས་སུ་ལེན་པའི་གནས་སྐབས་ལགས། །དེས་ན་བློ་འདིར་མྱོང་བ་མ་ཐོན་པར། །མ་གྱུར་ཆོས་པའི་ལས་ལ་འཇུག་མྱུར་ན། །ལྟར་སྣང་ཆོས་དེས་རང་ཚུགས་མི་ཟིན་པར། །ནམ་ཞིག་གྲོང་དང་ལྷག་པར་ཆེ་བ་འབྱུང་། །མ་ཕྱི་མ་ཕྱི་ངེས་འབྱུང་བློ་འདི་སྦྱོངས། །མ་སྔ་མ་སྔ་བྱ་བཏང་མཛད་མ་སྔ། །ཤེས་མེད་སྡུག་རྒན་ཁོ་བོའི་ངག་འདི་ལ། །ཡིད་རྟེན་འདུག་གམ་ཆོས་པ་རྣམ་ལ་དྲིས། །ཁོ་བོ་ཚེ་འདིའི་ལས་ལ་ཆེར་གཡེང་པས། །འཚེར་མེད་མི་ཚེ་འདི་ཡང་ཟད་ནས་ཐལ། །ད་ནི་དགོས་པའི་ཆོས་ཀྱིས་ཕོངས་བཞིན་དུ། །འོག་ནས་འོག་ཏུ་བལྟ་བར་འགྲོ་ལ་ཉེ། །བདག་ལ་ཕན་པ་འདོད་པའི་ཤེས་ལྡན་ཁྱོད། །ཡིད་བཞིན་ནོར་ལས་ལྷག་པའི་རྟེན་འདི་ལ། །བསླུ་མེད་དམ་པའི་ཆོས་ཀྱི་ཟོང་སྒྲུབ་ཏེ། །སླད་མའི་གནས་སུ་སྤྲོ་བཞིན་འདོང་བར་མཛོད། །སྙིགས་མའི་སྐྱེ་བོ་ཆོས་ལ་སྡང་བ་རྣམས། ཆོས་བཞིན་སྤྱོད་ལ་ཁྲོ་ཞིང་འཚེ་མོད་ཀྱང་། ཡེ་ཤེས་སྤྱན་ལྡན་དྲང་སྲོང་
ཆེ་རྣམས་ཀྱིས། །སྲས་བཞིན་དགོངས་པས་སེམས་ལས་ཆུང་བར་མཛོད། །དྲིན་ཆེན་བླ་མས་དྲིན་གྱིས་བསྐྱང་ན་ཡང་། །ཉམས་ལེན་དཔེ་ལ་ལུས་པའི་སྐལ་ངན་བདག །འཆི་བའི་གནས་སུ་བགྲོད་ལ་ཉེ་བའི་ཚེ། །ཆོས་འདི་འགྱོད་པ་འཕེལ་བའི་སྣོན་མ་ལགས། །ཉམས་ལེན་མ་ཚང་མེད་པ་བླ་མའི་གསུང་། །མ་ཚང་མེད་པར་དོན་གཅིག་ལ་དྲིལ་ཏེ། །རྣམ་གཡེང་མེད་པར་ཉམས་སུ་ལོངས་ཤིག་དང་། །བསླུ་མེད་འབྲས་བུ་ཚེ་འདིར་འབྱུང་བར་ངེས། །དེ་སྐད་ཤིན་ཏུ་བརྩེ་བའི་ངག་འདི་ནི། །ཤིན་ཏུ་རྨོངས་པ་མཁྱེན་བརྩེའི་ནོར་བུའི་སྡེས། ཁྲིམས་ཀྱི་ནོར་ལྡན་བཤད་སྒྲུབ་ཉི་མ་ལ། ལྷག་པའི་བསམ་པ་བཟང་པོས་གདམས་པའོ། །བཀྲ་ཤིས། ༈ བྱ་རྒྱུ་གང་ཡང་མེད་པའི་ཅོག་བཅག་གི་ཀློང་ནས། །མཐོང་རྒྱུ་ཅི་ཡང་མེད་པའི་རང་ངོ་ལ་བལྟས་ཚེ། །རྗེན་སངས་བརྗེད་དུ་མེད་པའི་ལྟ་སྒོམ་གྱི་རོ་བཅུད། །ཆེད་དུ་ལེན་པ་མེད་ཀྱང་མྱོང་རྒྱུ་ཞིག་ཡོད་སྐད། །དམིགས་གཏད་བཅོས་མའི་སེམས་འཛིན་རང་དེང་ལ་སོང་ཚེ། །གང་ཤར་ཆོས་དབྱིངས་བདེ་བའི་ཡོ་ལང་དུ་གྱུར་ནས། །མི་བདེ་མི་མགུ་མེད་པའི་གུ་ཡངས་ཀྱི་སྐྱེས་བུ། །མཁའ་ལ་ཁྱུང་ཆེན་ལྡིང་ལྟར་ཐེག་རྩེ་ལ་ཆས་འགྲོ། །རྟོག་མེད་ཀུན་གཞིའི་ཤུན་པ་རྗེས་མེད་དུ་ཡལ་དུས། །ལྷ་དང་བླ་མའི་འཛུམ་ཞལ་རྗེན་པ་རུ་མཐོང་ནས། །ཡ་མཚན་སྒྲུབ་པའི་འབྲས་བུ་རང་མལ་ནས་བརྟོལ་ཚད། །ཀུན་བཟང་དགོངས་པའི་རྒྱལ་སྲིད་ཟིན་པ་རང་ལགས་སོ། །༈ སྐྱབས་དྲིན་ཆེན་བླ་མའི་བཀའ་དྲིན་ལས། །ཆོས་ཟབ་མོ་ཐོས་པའི་ལས་ཅན་བདག །ན་ཚོད་ཀྱི་འབྲས་བུ་སྨིན་ལགས་ཀྱང་། །དོན་བསྒོམ་པའི་ཉམས་མྱོང་བྲལ་ཏེ་མཆིས། །བཤད་བཤད་ཀྱིས་མི་ཚེ་འཕུལ་ལགས་ཀྱང་། །གཞན་རྒྱུད་ལ་ཡོན་ཏན་སྐྱེ་བ་མེད། །ལྟར་སྣང་གི་དམ་ཆོས་སྒྲུབ་སྒྲུབ་པོ། །འདི་སྣང་གི་དོན་ལས་འདའ་བ་མེད། །མི་ཚེ་འདིའི་ཆ་གཉིས་ཟད་ནས་ཐལ། །ཆ་གཅིག་ད་དུང་ལུས་ནས་ཡོད། །སྔོན་བྱས་ཀྱི་ལས་ཀུན་དོན་རེ་ཆུང་། །
ད་མི་ཤེས་མུན་པ་སེམས་ལ་འཁྲིགས། །ལུས་ལང་ཚོ་རྒུད་པས་ནད་ཟུང་ལྡང་། །གྲྭ་སློབ་ཀྱི་ངོ་བསྲུང་བྱེད་རྒྱུས་དཀའ། །དཀོར་མང་པོ་བསྡུ་བསོག་དགོས་པས་ངལ། །མི་སྙན་པའི་གཏམ་གྱིས་རྣ་བ་གཙེས། །མ་བྱས་ལྐོག་བཤད་ཀྱི་མི་ཁ་ཟུག །ཕྱི་དགྲ་མགོ་ནང་ལ་འཛིན་དུས་འདིར། །ལས་ཇི་ལྟར་བྱས་ཀྱང་ཞེ་རེ་སྐྱོ། །མར་འཁོར་བའི་ལས་ལ་མཐའ་མེད་པས། །ཞེ་སྐྱོ་བས་ཕན་པ་ཅི་ལ་ཡོད། །སླད་མི་ཆོས་ཀྱི་ལུགས་དང་མ་མཐུན་ཡང་། །ལྷ་ཆོས་དང་རང་སེམས་མཐུན་ན་སྙམས། །བགྲང་ཕྲེང་གིས་བཟླས་བརྗོད་མ་ནུས་ཀྱང་། །རླུང་གནད་ལ་རང་དབང་ཐོབ་ན་སྙམས། །གླེགས་བམ་གྱི་བཞུགས་བགྲང་མ་ཤེས་ཀྱང་། །ཉམས་ལེན་གྱི་གནད་གསང་ཟིན་ན་སྙམ། །འཁྲུལ་སྣང་གི་མཐོང་རྒྱ་མི་ཆེ་ཡང་། །རང་སེམས་ཀྱི་སངས་རྒྱས་མཇལ་ན་སྙམ། །བསྲུང་མཚམས་ཀྱི་སྤྲོས་པ་མ་ཤེས་ཀྱང་། །གཞན་ཕན་གྱི་བློ་འདི་སྐྱེ་ན་སྙམས། །ཁ་དྲག་གི་དབང་ཆེན་མ་གྱུར་ཀྱང་། །ཉེས་ལྟུང་གི་རང་མགོ་ནོན་ན་སྙམ། །ཆགས་སྡང་གི་གནས་འདིར་སྡོད་པ་ལས། །ཆོས་མཐུན་གྱི་ཡུལ་དུ་འགྲོ་ན་སྙམ། སྒྲིག་ལམ་ལ་ཞུ་དག་བྱེད་རྒྱུ་ལས། །རང་སེམས་ལ་བརྟགས་དཔྱད་བཏང་ན་སྙམ། །མི་ཁོ་བོའི་བསམ་པ་དེ་ག་ཡིན། །འགྲུབ་མི་འགྲུབ་རང་གི་ལག་ན་ཡོད། །ཕ་དྲིན་ལྡན་བླ་མའི་བཀའ་དྲིན་ལས། །ཉམས་ལེན་གྱི་ཆོས་ལ་འཕོངས་པ་མེད། །སྒྲུབ་མི་སྒྲུབ་མཁྱེན་བརྩེའི་ནོར་བུས་ཤེས། །བསྒྲུབ་ཀྱང་རང་གི་དོན་ཡིན་པས། །བྱས་ཡུས་ནི་བཤད་པ་སུ་ལ་ཡོད། །ཚིག་དེ་སྐད་བརྗོད་པར་མ་བསམ་ཡང་། །འགའ་ཞིག་ནས་ཅི་མཛད་དྲིས་ལན་དང་། །སྐྱོ་སེམས་ཀྱིས་ཡང་ཡང་བསྐུལ་བ་ལས། །དབང་མེད་ཡིག་ལམ་དུ་མྱུར་བར་བྲིས། །མངྒ་ལཾ། །༈ ཁམས་གསུམ་འཁོར་བའི་འགྲོ་རྣམས་སྐྱོབས་པའི་མགོན། །ཁ་བ་ཅན་གྱི་འདྲེན་པ་ཐུགས་རྗེ་ཅན། །དུས་ངན་འགྲོ་བའི་བླ་མ་གཅིག་གྱུར་པ། །གུ་རུ་པདྨའི་ཞབས་ལ་གསོལ་བ་འདེབས། །ལས་ངན་སྙིགས་དུས་སྐྱེས་པའི་འགྲོ་ཚོགས་ལ། །བརྩེ་ཆེན་ཡེ་ཤེས་གཟིགས་པ་ཆེར་བསྐྱེད་དེ། །གང་གི་རྣམ་པར་དཀར་བའི་ཕྲིན་ལས་ཀྱི། །དཔལ་ཀུན་ཡིད་ལ་འཇོ་
བར་བྱིན་གྱིས་རློབས། །ཆོས་མིན་བསམ་པ་སྐད་ཅིག་མི་སྐྱེ་ཞིང་། །ཆོས་ལྡན་བྱ་བ་ངང་གིས་འཕེལ་བ་དང་། །དུས་རྣམས་ཀུན་ཏུ་ཨོ་རྒྱན་པདྨ་རྗེ། །སྙིང་ནས་བརྗེད་པ་མེད་པར་བྱིན་གྱིས་རློབས། །སྔོན་གྱི་ལས་དང་འཕྲལ་རྐྱེན་ངན་པ་ལས། །བྱུང་བའི་ཆོས་ཀྱི་བར་གཅོད་ཅི་མཆིས་ཀུན། །གང་གི་མཐུ་སྟོབས་ནུས་པའི་གཟི་བྱིན་གྱིས། །མྱུར་བར་ཞི་ཞིང་བཟློག་པར་བྱིན་གྱིས་རློབས། །ཞལ་བཞེས་དམ་བཅའ་བསྐུལ་བའི་གསོལ་འདེབས་དང་། །ཐུགས་རྗེའི་འཇུག་པ་མྱུར་བུལ་འགྲན་པ་བཞིན། །གྱུར་ནས་བསམ་པའི་རེ་བ་མ་ལུས་པ། །ད་ལྟ་ཉིད་དུ་འགྲུབ་པར་བྱིན་གྱིས་རློབས། །རང་བྱུང་པདྨ་དོན་གྱི་བླ་མ་རྗེའི། །འཛུམ་ཞལ་ལྷུག་པར་སྟོན་དང་ཆབ་གཅིག་པར། །ཉམས་རྟོགས་ཉི་མ་སྙིང་ལ་ཆེར་རྒྱས་ཏེ། །བློ་མུན་རང་སར་གྲོལ་བར་བྱིན་གྱིས་རློབས། །ཞེས་པ་འདིའང་སྤྲང་བན་མཁྱེན་ནོར་པས་ཆུ་ལུག་དབོ་ཟླའི་ཚེས་གཅིག་གི་མཚན་མོའི་ཐུན་གསེང་ཞིག་ཏུ་གསོལ་བ་བཏབ་པ་དགེ །