མཁའ་འགྲོའི་སྒྲུབ་ཐབས་ཡིད་བཞིན་ནོར་བུ།
ཟབ་ཆོས་པདྨ་དྲག་ཁྲོས་ལས༔ མཁའ་འགྲོའི་སྒྲུབ་ཐབས་ཡིད་བཞིན་ནོར་བུ་བཞུགས༔ དྲག་པོ་རྩལ་ལ་ཕྱག་འཚལ་བསྟོད༔ དབེན་ཞིང་དྭངས་བའི་གནས་མཆོག་ཏུ༔ མཎྜལ་དྲི་བཟང་སིདྷུ་རས༔ ཆག་ཆག་གདབ་ཅིང་ཐིག་ནས་དྲངས༔ ལྟེ་བ་གྲུ་གསུམ་དམར་རམ་མཐིང་༔ ཕྱི་རིམ་རྩིབས་བཞི་ཕྱོགས་མདོག་བསྒྱུར༔ རྡོ་རྗེ་མེ་རིས་ཐ་མ་བསྐོར༔ མཛེས་པའི་ཚོན་གྱིས་ལེགས་པར་བྱུག༔ དབུས་སུ་མཉྫིའི་ཁྲིའུ་ཁར༔ མཁའ་འགྲོའི་གཏོར་མ་རྒྱན་ལྡན་བཤམས༔ མཁའ་འགྲོ་སྡེ་ལྔའི་ཙཀ་ལི་གཟུག༔ དར་ཚོན་སྣ་ལྔའི་གུར་ཡང་ཕུབ༔ སྨན་གཏོར་མཆོད་པའི་བྱེ་བྲག་བཤམས༔ སྔོན་འགྲོའི་གཏོར་མ་ཕྱིར་བསྔོས་ནས༔ སྐྱབས་སེམས་བཏང་ཞིང་སྲུང་འཁོར་བསྒོམ༔ ཆོས་རྣམས་གདོད་ནས་དག་པའི་ཀློང་༔ རང་སེམས་རིག་པའི་ངོ་བོ་ནི༔ ཧྲཱིཿཡིག་མདངས་དང་ལྡན་པར་བསྒོམ༔ འོད་ཟེར་འཕྲོས་པས་གདོན་བགེགས་བསྐྲད༔ འགྲོ་བ་ཀུན་གྱི་སྒྲིབ་པ་སྦྱངས༔ སངས་རྒྱས་རྣམས་ལ་མཉེས་མཆོད་ཕུལ༔ ཐུགས་རྗེའི་བྱིན་རླབས་ཚུར་བསྡུས་ནས༔ ཐུགས་སྲོག་ཡི་གེ་ཧྲཱིཿལ་ཐིམ༔ སྐད་ཅིག་གནས་གྱུར་ཁྲ་ཐབས་སུ༔ སངས་རྒྱས་མཁའ་འགྲོ་མཐིང་འོད་འབར༔ ཧ་རི་ནི་སའི་སྔགས་འབྲུ་ལས༔ རིགས་བཞི་དང་བཅས་ཚོམ་བུའི་ཚུལ༔ གྲི་ཐོད་བརྐྱང་བསྐུམ་གར་སྟབས་ཅན༔ ཁ་ཊྭཱཾ་རུས་པ་དར་དཔྱངས་འཕྱོ༔ འོད་ལྔ་འབར་བའི་ཀློང་དུ་བསྐྱེད༔ ཐུགས་ཀར་ཉི་མའི་དཀྱིལ་འཁོར་སྟེང་༔ ཧྲཱིཿདང་ཧ་རི་ནི་ས་ལ༔ སྔགས་ཀྱི་ཕྲེང་བ་གཡོན་དུ་འཁོར༔ འོད་ཟེར་སྤྲོ་བསྡུའི་ཏིང་འཛིན་གྱིས༔ འབུམ་ཕྲག་མ་བརྒྱུད་མཁའ་འགྲོའི་ཚོགས༔ ཐུགས་རྗེ་བྱིན་རླབས་ནུས་མཐུའི་དཔལ༔ ལྷག་མ་མེད་པར་དབང་བསྡུས་ནས༔ བདག་མདུན་ལ་ཐིམ་ནུས་སྟོབས་རྫོགས༔ ཁམས་གསུམ་མ་ལུས་དབང་དུ་བསྡུས༔ སྲིད་གསུམ་མ་ལུས་ཟིལ་གྱིས་མནན༔ མཆོག་ཐུན་འཕྲིན་ལས་ཀུན་གྲུབ་བསམ༔ མ་ཡེངས་ཏིང་འཛིན་གསལ་གདབ་ཅིང་༔ གསང་བའི་སྙིང་པོ་འདི་བཟླའོ༔ ཧྲཱིཿམ་ཧ་རི་ནི་ས་སརྦ་སིདྡྷི་ཧཱུྃ་ཕཊ༔ འབུམ་ཚོ་གཅིག་གཉིས་གསུམ་ལ་སོགས༔ གང་ཟག་དབང་པོའི་རིམ་པས་བཟླས༔ མཆོག་གི་དངོས་གྲུབ་ཚེ་འདིར་འཐོབ༔ ཐུན་མོང་འཕྲིན་ལས་ཞར་ལ་འགྲུབ༔ མཁའ་འགྲོ་ལུས་དང་གྲིབ་བཞིན་འགྲོག༔ ཡོན་ཏན་དཔག་ཏུ་མེད་པ་འཐོབ༔ ས་མ་ཡཱ༔ རྒྱ་རྒྱ་རྒྱ༔ དེ་ཚེ་རྟགས་ཀྱི་རིམ་པ་ནི༔ ཞལ་མཇལ་ལུང་སྟོན་དྲི་བཟང་འཐུལ༔ རྨི་ལམ་བཟང་རྟགས་སྣ་ཚོགས་ཏེ༔ དབང་བསྐུར་ཆོས་འཆད་ཁྲི་སྟན་འདུག༔ རྒྱན་སྤྲས་ཁྲུས་བྱས་རྣག་ཁྲག་འཛག༔ དར་འཕྱར་དུང་འབུད་རོལ་མོ་འཁྲོལ༔ གངས་རིར་འཛེག་དང་མཆོད་རྟེན་བསྐོར༔ ཆུ་ཟམ་འགྲོ་དང་མེ་འབར་འཕུར༔ བུད་མེད་ཚོགས་ཀྱིས་བསྐོར་བ་དང་༔ ཕྱག་མཚན་རྙེད་དང་ཐོད་ཆང་འཐུང་༔ དེ་སོགས་རྣམ་པ་སྣ་ཚོགས་འབྱུང་༔ དེ་ཚེ་རྟོག་པ་མི་བསྐྱིལ་ཞིང་༔ རང་སེམས་དག་པའི་ཆ་རུ་བསམ༔ སྒྲུབ་རྫས་རྣམས་ལས་དབང་བླང་ཞིང་༔ འདོད་པའི་དོན་ལ་གསོལ་བ་གདབ༔ དགེ་བ་བསྔོ་ཞིང་མཐའ་རྒྱས་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ བསྒྲུབ་ཚེ་ཐུན་སྐབས་མཆོད་བསྟོད་འབུལ༔ བསྟོད་པ་བྱ་བ་འདི་སྐད་དོ༔ ཧཱུྃ༔ རྒྱལ་དང་རྒྱལ་བའི་ཡུམ་གྱུར་ཅིང་༔ ཤེས་རབ་མཆོག་གི་ཕྱག་རྒྱ་འཆང་༔ མ་མོ་མཁའ་འགྲོ་ཡོངས་ཀྱི་གཙོ༔ དྷཀྐི་སྡེ་ལྔར་ཕྱག་འཚལ་བསྟོད༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མཁའ་འགྲོའི་གསང་སྒྲུབ་འདི༔ ཟབ་ལུང་མ་ཚོར་གཉན་ཕུག་ཏུ༔ སློབ་དཔོན་རྗེ་ལ་ལུང་ཞུས་ནས༔ ཁོ་མོས་ཤོག་སེར་ལོགས་ལ་བཏབ༔ མ་འོངས་དོན་བསམ་གཏེར་དུ་སྦས༔ ནམ་ཞིག་དུས་ཀྱི་ཐ་མ་ལ༔ བོད་ཁམས་བདེ་བ་མཐའ་མིས་འཇོམས༔ རི་ལྕོགས་རེ་ལ་བཙན་རྫོང་བརྩིགས༔ རྒྱ་འདྲེ་འགོང་པོས་རྒྱང་གླུ་ལེན༔ དགེ་བཤེས་བན་བཙུན་སྲོག་ལས་བྱེད༔ བདུད་དང་འགོང་པོས་ས་སྟེང་ཁེངས༔ ཆོས་མེད་བཙུན་པས་སྡེ་དགོན་ཁྱབ༔ ཆོས་ལྟར་སྨྲ་ཞིང་སྡིག་ལྟར་སྤྱོད༔ གཡོ་སྒྱུ་ཟོལ་འཚོང་མནའ་ཆད་སྟོངས༔ དེ་དུས་སྦས་ཚུལ་མ་ངེས་སྤྱོད༔ སྐལ་ལྡན་སྐྱེས་བུ་ཉི་མ་གྲགས༔ གདམས་པ་འདི་དང་འཕྲད་ནས་ཀྱང་༔ རྐྱེན་བྲལ་དངོས་གྲུབ་འཐོབ་པར་ཤོག༔ ཤིན་ཏུ་གསོངས་ཤིག་ཨ་ཐམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁོ་བོ་སཱུརྱ་ཀཱིརྟིས་གནས་མཆོག་ཆེན་པོ་ཤངས་ཟབ་བུ་ལུང་ནས་ཤིང་ཡོས་ལ་སྤྱན་དྲངས་ཤིང་། ལྕགས་བྱ་ལ་ཁམས་སྲིང་མོ་རྫོང་གི་ཆགས་རུ་ཕུག་ནག་བདེ་བ་ཆེན་པོའི་ཀེའུ་ཚང་དུ་དཀྱུས་ཏེ་ཤོག་སེར་ལས་བསྒྱུར་བའོ། མངྒཱ་ལཾ། །