བཞི་བ་ལྡོག་པ་ངོས་འཛིན་གྱི་རྣམ་བཞག་བཤད་པ།

བཞི་བ་ལྡོག་པ་ངོས་འཛིན་གྱི་རྣམ་བཞག་བཤད་པ་ལ།

ཚད་མ་རྣམ་འགྲེལ་ལས། གང་ཕྱིར་དངོས་ཀུན་རང་བཞིན་གྱི། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལས། །ལྡོག་པ་ལ་ནི་རྟེན་པ་ཅན། །ཞེས་པའི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ལ། ཁ་ཅིག་ན་རེ། མི་རྟག་པའི་གཞི་ལྡོག་ཡིན་ན། མི་རྟག་པའི་ལྡོག་པ་ཡིན་པས་ཁྱབ་ཟེར་ན། གཟུགས་ཆོས་ཅན། མི་རྟག་པའི་ལྡོག་པ་ཡིན་པར་ཐལ། མི་རྟག་པའི་གཞི་ལྡོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། གཟུགས་ཆོས་ཅན། མི་རྟག་པའི་གཞི་ལྡོག་ཡིན་པར་ཐལ། མི་རྟག་པའི་མཚན་གཞི་ཡིན་པའི་ཕྱིར། རྩ་བར་འདོད་ན། གཟུགས་ཆོས་ཅན། མི་རྟག་པའི་ལྡོག་པ་མ་ཡིན་པར་ཐལ། མི་རྟག་པ་དང་ཐ་དད་ཡིན་པའི་ཕྱིར། ཁྱབ་སྟེ། མི་རྟག་པའི་ལྡོག་པ་ལ་ནི་མི་རྟག་པ་ལས་གཞན་མེད་པ་གང་ཞིག མི་རྟག་པ་མི་རྟག་པ་དང་ཐ་དད་མ་ཡིན་པའི་ཕྱིར། ཡང་ཁ་ཅིག་ན་རེ། ཤེས་བྱའི་དོན་ལྡོག་ཡིན་ན་ཤེས་བྱའི་ལྡོག་པ་ཡིན་པས་ཁྱབ་ཟེར་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་ལྡོག་པ་ཡིན་པར་ཐལ། ཤེས་བྱའི་དོན་ལྡོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་དོན་ལྡོག་ཡིན་པར་ཐལ། ཤེས་བྱའི་མཚན་ཉིད་ཡིན་པའི་ཕྱིར། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་མཚན་ཉིད་ཡིན་པར་ཐལ། གཏན་ཚིགས་རིགས་པའི་དོན་བསྡུས་ལས། མཚན་ཉིད་ནི་བློའི་ཡུལ་དུ་བྱ་རུང༌། ཞེས་གསུངས་པའི་ཕྱིར། རྩ་བར་འདོད་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་ལྡོག་པ་མ་ཡིན་པར་ཐལ། ཤེས་བྱ་དང་གཅིག་མ་ཡིན་པའི་ཕྱིར། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱ་དང་གཅིག་མ་ཡིན་ཐལ། ཤེས་བྱ་དང་ཐ་དད་ཡིན་པའི་ཕྱིར། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱ་དང་ཐ་དད་ཡིན་པར་ཐལ། མཚན་ཉིད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཤེས་བྱ་དང་གཅིག་ཡིན་ན་མཚོན་བྱ་ཡིན་དགོས་པའི་ཕྱིར། མ་གྲུབ་ན། ཤེས་བྱ་ཆོས་ཅན། ཁྱོད་དང་གཅིག་ཡིན་ན་མཚོན་བྱ་ཡིན་དགོས་པར་ཐལ། ཁྱོད་མཚོན་བྱ་ཡིན་པའི་ཕྱིར།ཁ་ཅིག་ན་རེ། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་དེ་རྣམ་མཁྱེན་གྱི་ལྡོག་པ་ཡིན་ཟེར་ན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཆོས་ཅན། རྣམ་མཁྱེན་གྱི་ལྡོག་པ་མ་ཡིན་པར་ཐལ། རྣམ་མཁྱེན་དང་གཅིག་མ་ཡིན་པའི་ཕྱིར། མ་གྲུབ་ན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་མ་ཡིན་པར་ཐལ། རྣམ་མཁྱེན་དང་ཡིན་ཁྱབ་མཉམ་མ་ཡིན་པའི་ཕྱིར། མ་ཁྱབ་ན། རྣམ་མཁྱེན་ཆོས་ཅན། ཁྱོད་དང་གཅིག་ཡིན་ན་ཁྱོད་དང་ཡིན་ཁྱབ་མཉམ་ཡིན་པས་ཁྱབ་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ཟེར་ན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཆོས་ཅན། རྣམ་མཁྱེན་དང་ཡིན་ཁྱབ་མཉམ་མ་ཡིན་པར་ཐལ། རྣམ་མཁྱེན་ཡིན་ན་ཁྱོད་ཡིན་པས་ཁྱབ་པ་མེད་པའི་ཕྱིར། མ་གྲུབ་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཡིན་པར་ཐལ། རྣམ་མཁྱེན་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་ཡིན་པར་ཐལ། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་དེ་རྣམ་མཁྱེན་གྱི་མཚན་ཉིད་ཡིན་པའི་ཕྱིར། མཁྱེན་པའི་སྐད་ཅིག་གཅིག་གིས་ཀྱང༌། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་གསུངས་པའི་ཕྱིར། གོང་དུ་འདོད་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་མ་ཡིན་ཐལ། རྣམ་མཁྱེན་དང་གཅིག་མ་ཡིན་པའི་ཕྱིར། མ་གྲུབ་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་མ་ཡིན་པར་ཐལ། རྣམ་མཁྱེན་དང་ཐ་དད་ཡིན་པའི་ཕྱིར། མ་གྲུབ་ན། དེ་ཆོས་ཅན། རྣམ་མཁྱེན་དང་ཐ་དད་ཡིན་པར་ཐལ། སྟོན་པ་ཤཱཀ་ཐུབ་ཀྱི་རྣམ་མཁྱེན་ཡིན་པའི་ཕྱིར། ཡང་ཁ་ཅིག་ན་རེ། མི་རྟག་པ་དང་གཅིག་དེ་མི་རྟག་པའི་ལྡོག་པ་ཡིན་ཟེར་ན། མི་རྟག་པ་དང་གཅིག་ཆོས་ཅན། མི་རྟག་པའི་ལྡོག་པ་མ་ཡིན་པར་ཐལ། མི་རྟག་པ་དང་གཅིག་མ་ཡིན་པའི་ཕྱིར། མ་གྲུབ་ན། མི་རྟག་པ་དང་གཅིག་ཆོས་ཅན། མི་རྟག་པ་དང་གཅིག་མ་ཡིན་པར་ཐལ། མི་རྟག་པ་དང་ཐ་དད་ཡིན་པའི་ཕྱིར། མ་གྲུབ་ན། མི་རྟག་པ་དང་གཅིག་ཆོས་ཅན། མི་རྟག་པ་དང་ཐ་དད་ཡིན་པར་ཐལ། དངོས་མེད་ཀྱི་ཆོས་ཡིན་པའི་ཕྱིར། མ་གྲུབ་ན། མི་རྟག་པ་ཆོས་ཅན། ཁྱོད་དང་གཅིག་དངོས་མེད་ཀྱི་ཆོས་ཡིན་པར་ཐལ། ཁྱོད་འདུས་བྱས་ཕྱིར། ཁ་ཅིག་ན་རེ། བདག་མེད་ཀྱི་ལྡོག་པ་དེ་བདག་མེད་ཀྱི་ལྡོག་པ་ཡིན་ཟེར་ན། བདག་མེད་ཀྱི་ལྡོག་པ་ཆོས་ཅན། བདག་མེད་པའི་ལྡོག་པ་མ་ཡིན་པར་ཐལ། བདག་མེད་དང་གཅིག་མ་ཡིན་པའི་ཕྱིར། མ་གྲུབ་ན། བདག་མེད་པའི་ལྡོག་པ་ཆོས་ཅན། བདག་མེད་དང་གཅིག་མ་ཡིན་པར་ཐལ། ཁྱོད་བདག་མེད་དང་ཡིན་ཁྱབ་མཉམ་མ་ཡིན་པའི་ཕྱིར། མ་གྲུབ་ན། བདག་མེད་པའི་ལྡོག་པ་ཆོས་ཅན། ཁྱོད་དང་བདག་མེད་གཉིས་ཡིན་ཁྱབ་མཉམ་མ་ཡིན་པར་ཐལ། བདག་མེད་ཡིན་ན་ཁྱོད་ཡིན་པས་ཁྱབ་པ་མེད་པའི་ཕྱིར། མ་གྲུབ་ན། སྡུག་བདེན་ཆོས་ཅན། བདག་མེད་ཀྱི་ལྡོག་པ་ཡིན་པར་ཐལ། བདག་མེད་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། བདག་མེད་དང་ཐ་དད་ཡིན་པའི་ཕྱིར། ཁ་ཅིག་ན་རེ། འཆི་བ་མི་རྟག་པ་མ་ཡིན་པ་ལས་ལྡོག་ན་འཆི་བ་མི་རྟག་པའི་ལྡོག་པ་ཡིན་པས་ཁྱབ་ཟེར་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པའི་ལྡོག་པ་ཡིན་པར་ཐལ། འཆི་བ་མི་རྟག་པ་མ་ཡིན་པ་ལས་ལྡོག་པའི་ཕྱིར། ཁྱབ་པ་ཁས། མ་གྲུབ་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པ་མ་ཡིན་པ་ལས་ལྡོག་པར་ཐལ། འཆི་བ་མི་རྟག་པ་མ་ཡིན་པ་ལས་ལོག་པའི་ཕྱིར། མ་གྲུབ་ན། དམ་བཅའ་བའི་འཆི་བ་མི་རྟག་པ་ཆོས་ཅན། ཁྱོད་འཆི་བ་མི་རྟག་པ་མ་ཡིན་པ་ལས་ལོག་པར་ཐལ། ཁྱོད་འཆི་བ་མི་རྟག་པ་ཡིན་པའི་ཕྱིར། རྩ་བར་འདོད་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པའི་ལྡོག་པ་མ་ཡིན་པར་ཐལ། འཆི་བ་མི་རྟག་པ་དང་ཐ་དད་ལས་མི་ལྡོག་པའི་ཕྱིར། མ་ཁྱབ་ཟེར་ན། འཆི་བ་མི་རྟག་པ་ཆོས་ཅན། ཁྱོད་དང་ཐ་དད་ལས་མི་ལྡོག་ན་ཁྱོད་ཀྱི་ལྡོག་པ་མ་ཡིན་པས་ཁྱབ་པར་ཐལ། ཁྱོད་ཁྱོད་དང་ཐ་དད་ལས་ལྡོག་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཁྱོད་དང་ཐ་དད་ལས་ལྡོག་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ཟེར་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པ་དང་ཐ་དད་ལས་མི་ལྡོག་པར་ཐལ། འཆི་བ་མི་རྟག་པ་དང་ཐ་དད་ཡིན་པའི་ཕྱིར། ཁ་ཅིག་ན་རེ། སྐྱབས་འགྲོ་དང་ཐ་དད་ལས་ལྡོག་ན་སྐྱབས་འགྲོའི་ལྡོག་པ་ཡིན་པས་ཁྱབ་ཟེར་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོའི་ལྡོག་པ་ཡིན་པར་ཐལ། སྐྱབས་འགྲོ་དང་ཐ་དད་ལས་ལྡོག་པའི་ཕྱིར། ཁྱབ་པ་ཁས། མ་གྲུབ་ན། རྟག་གཅིག་རང་དབང་ཅན་གྱི་བདག་ཆོས་ཅན། སྐྱབས་འགྲོ་དང་ཐ་དད་ལས་ལྡོག་པར་ཐལ། སྐྱབས་འགྲོ་དང་ཐ་དད་མ་ཡིན་པའི་ཕྱིར། མ་གྲུབ་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོ་དང་ཐ་དད་མ་ཡིན་པར་ཐལ། སྐྱབས་འགྲོ་དང་ཐ་མི་དད་ཡིན་པའི་ཕྱིར། མ་གྲུབ་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོ་དང་ཐ་མི་དད་ཡིན་པར་ཐལ། མེད་པ་ཡིན་པའི་ཕྱིར། མ་གྲུབ་ན། རྟག་གཅིག་རང་དབང་གི་བདག་ཆོས་ཅན། མེད་ངེས་ཡིན་པར་ཐལ། གཞི་གྲུབ་ན་ཁྱོད་མེད་པ་ཡིན་པས་ཁྱབ་པའི་ཕྱིར་རོ། རྩ་བར་འདོད་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོའི་ལྡོག་པ་མ་ཡིན་པར་ཐལ། སྐྱབས་འགྲོ་དང་གཅིག་མ་ཡིན་པ་ལས་མི་ལྡོག་པའི་ཕྱིར། མ་ཁྱབ་ཟེར་ན། སྐྱབས་འགྲོ་ཆོས་ཅན། ཁྱོད་ཀྱི་ལྡོག་པ་ཡིན་ན་ཁྱོད་དང་གཅིག་མ་ཡིན་པ་ལས་ལྡོག་པས་ཁྱབ་བར་ཐལ། ཁྱོད་ཁྱོད་དང་གཅིག་མ་ཡིན་པ་ལས་ལྡོག་པའི་ཕྱིར། མ་གྲུབ་ན། སྐྱབས་འགྲོ་ཆོས་ཅན། ཁྱོད་ཁྱོད་དང་གཅིག་མ་ཡིན་པ་ལས་ལྡོག་པར་ཐལ། ཁྱོད་ཁྱོད་དང་གཅིག་མ་ཡིན་པ་ལས་ལོག་པའི་ཕྱིར། མ་གྲུབ་ན། སྐྱབས་འགྲོ་ཆོས་ཅན། ཁྱོད་ཁྱོད་དང་གཅིག་མ་ཡིན་པ་ལས་ལོག་པ་ཡིན་པར་ཐལ། ཁྱོད་ཁྱོད་དང་གཅིག་ཡིན་པའི་ཕྱིར། མ་གྲུབ་ན། སྐྱབས་འགྲོ་ཆོས་ཅན། ཁྱོད་ཁྱོད་དང་གཅིག་ཡིན་པར་ཐལ། གཞི་གྲུབ་པའི་ཕྱིར་རོ། །