གཉིས་པ་ནང་བ་སངས་རྒྱས་པའི་གྲུབ་མཐའ་བཤད་པ།

གཉིས་པ་ནང་བ་སངས་རྒྱས་པའི་གྲུབ་མཐའ་བཤད་པ་ལ།

སྤྱིར་བསྟན་པ་དང༌། བྱེ་བྲག་བཤད་པ་དང་གཉིས། དང་པོ་ཕྱིར་བསྟན་པ། དང་པོ་ནི། ལྟ་བ་བཀར་བཏགས་ཀྱི་ཕྱག་རྒྱ་བཞི་ཁས་ལེན་པའི་ནང་བ་སངས་རྒྱས་པ་དེ། ནང་བའི་གྲུབ་མཐའ་སྨྲ་བའི་མཚན་ཉིད། ལྟ་བ་བཀར་བཏགས་ཀྱི་ཕྱག་རྒྱ་བཞི་ནི། འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་རྟག་གཅིག་རང་དབང་བའི་བདག་མེད་པ། མྱ་ངན་ལས་འདས་པ་ཞི་བ་རྣམས་སོ། །རང་སྡེ་ལ་རྟག་གཅིག་རང་དབང་བའི་བདག་ཁས་ལེན་མཁན་མེད་ཀྱང་རྫས་ཡོད་ཀྱི་བདག་ཁས་ལེན་མཁན་ཡོད་དེ། ཐེག་མཆོག་དབུ་མའི་ཟིན་བྲིས་ལས། གང་ཟག་གི་བདག་རྫས་ཡོད་སྤྱིར་དགག་པ་ནི་ཕྱི་རོལ་མུ་སྟེགས་བྱེད་རྣམས་དང༌། རང་སྡེ་ཉན་ཐོས་སྡེ་བ་བཅོ་བརྒྱད་ཀྱི་ནང་ན། སྡེ་བ་ལྔ་ཙམ་ཞིག་ཡོད་པས། ཞེས་དང༌། རང་སྡེ་གང་ཟག་གི་བདག་རྫས་ཡོད་དུ་སྨྲ་བ་རྣམས་ལ། ཞེས་གསུངས་སོ།། །།