མཐའ་འོག་བདུད་འདུལ་ཕུག་པའི་གནས་བཤད།
མཐའ་འོག་བདུད་འདུལ་ཕུག་པའི་གནས་བཤད་བཞུགས་སོ།
ན་མོ་གུ་རུ་རཏྣ་སིདྡྷི་ཧཱུྃ། མཆོག་ཏུ་མི་འགྱུར་བདེ་བ་ཆེན་པོའི་བདག་ཉིད་རིགས་རྣམས་ཀུན་གྱི་ཁྱབ་བདག་རྗེ་བཙུན་དཔལ་ལྡན་བླ་མ་མཆོག་གི་ཞབས་ཀྱི་པདྨོར་གུས་པས་ཕྱག་འཚལ་ཞིང་སྐྱབས་སུ་མཆིའོ། །བདག་སོགས་ཁམས་གསུམ་གྱི་སེམས་ཅན་ཐམས་ཅད་ལ་ཐུགས་རྗེས་གཟིགས་ཤིང་བྱིན་གྱིས་བརླབས་ཏུ་གསོལ། དངོས་འདིར་དད་ཅན་གྱི་སྐལ་ལྡན་རྣམས་ལ་གནས་མཆོག་འདི་ཉིད་ཀྱི་ཞིང་བཀོད་མདོ་ཙམ་སྟན་དུ་གསོལ་ན། ལོ་རྒྱུས་བྱུང་ཁུངས་ཀྱི་ཁོག་ཕུབ། བཀོད་པ་བཞུགས་ཚུལ་གྱི་ངོ་བསྟན། ཕན་ཡོན་དགོས་ཆེད་ཀྱི་མཚམས་སྦྱར་བ་དང་གསུམ་
གྱིས་འཆད་པར་བྱ་སྟེ། དང་པོ་ལོ་རྒྱུས་ནི། སྤྱིར་ཡང་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ཆེན་པོ་གཅིག་ཏུ་བསྡུས་པ་ལོངས་སྤྱོད་རྫོགས་སྐུ་རྣམ་པར་སྣང་མཛད་གངས་ཆེན་མཚོའི་ཕྱག་གི་ལྷུང་བཟེད་ཀྱི་སྤོས་ཆུའི་རྒྱ་མཚོ་ལས་འཁྲུངས་པའི་པདྨ་ཉི་ཤུ་རྩ་ལྔའི་ཟེའུ་འབྲུ་མཐའ་དག་སངས་རྒྱས་ཀྱི་ཞིང་ཁམས་ཁོ་ནས་གང་སྟེ་ཡོད་པའི་ཞིང་ཁམས་བཅུ་གསུམ་པ་མི་མཛེད་ཀྱི་ཞིང་ཁམས་ཅེས་པ་འོ་སྐོལ་རྣམས་ཀྱི་འཇིག་རྟེན་འདི་ཡིན། དེ་ལས་ཁྱད་པར་དུ་གླིང་བཞིའི་འཇིག་རྟེན་ལས་ལྷོའི་འཛམ་བུ་གླིང་འདི་སྐལ་བཟང་གི་སངས་རྒྱས་ཐམས་ཅད་བྱོན་ཞིང་ཆོས་འཁོར་
བསྐོར་བས་ཚེ་གཅིག་སངས་རྒྱས་ཐོབ་པའི་སྐལ་བ་ཅན་གྱི་ཞིང་ཡིན། དེ་ལས་ཁྱད་པར་དུ་བྱང་ཕྱོགས་གངས་ཅན་གྱི་ལྗོངས་བོད་ཁམས་གླིང་དགུའི་ཡུལ་འདི་ཐུགས་རྗེའི་མངའ་བདག་འཕགས་པ་སྤྱན་རས་གཟིགས་ཀྱིས་བདག་གིར་མཛད་དེ། སྤྲེའུ་བྲག་སྲིན་གྱི་རྣམ་པར་སྤྲུལ་ནས་མིའི་ས་བོན་དུ་བཀོད་ཅིང་། ཆོས་དང་ཟང་ཟིང་གིས་ལེགས་པར་བསྐྱངས་པས་བོད་ཡུལ་ཐེག་པ་ཆེན་པོའི་ཆོས་ཀྱི་གླིང་ཆེན་དུ་གྱུར་པ་འདི་ཡིན། དེ་ལས་ཁྱད་པར་དུ་གྱུར་པ་ཤར་ཕྱོགས་ཀོང་ཡུལ་ཤིང་ལོའི་ཚལ་ཙནྡ་ལྗོན་པའི་ནགས། དཀར་མོ་འབྲུའི་གླིང་། བདེ་སྐྱིད་ལོངས་སྤྱོད་ཀྱི་འབྱུང་གནས་གསང་སྔགས་རྡོ་རྗེ་ཐེག་པ་དར་བའི་ཞིང་འདི། གུ་རུ་རིན་པོ་ཆེ་པདྨ་འབྱུང་གནས་ཀྱིས་ཞབས་ཀྱིས་བཅགས་བྱིན་གྱིས་བརླབས། ཚེ་གཅིག་བྱང་ཆུབ་སྒྲུབས་པའི་གནས་སུ་མཛད་པ་ངོ་མཚར་མཆོག་ཏུ་གྱུར་པ་ལགས། དེ་ལ་གུ་རུ་རིན་པོ་ཆེ་དེ་ཉིད་ཀྱིས་སྤྱིར་བོད་ཡུལ་གྱི་རྒྱལ་ཁམས་མ་ལུས་
ཞབས་ཀྱིས་མ་བཅགས་པ་ནི་ཁབ་རྩེ་གང་ཡང་མེད་ལ། ཁྱད་པར་ཀོང་པོའི་ཡུལ་འདི་གུ་རུ་ཉིད་ཀྱི་འདུལ་ཞིང་དུ་བདག་གིར་མཛད་ཅིང་བྱིན་གྱིས་བརླབས་པ་ཡིན་ཕྱིར། ལྟ་བ་ཡུལ་གྱི་གཏེར་ལུང་གསང་བའི་བྲག་ཕུག་གུ་རུ་ཡབ་ཡུམ་ཏིང་ངེ་འཛིན་ལ་བཞུགས་པའི་སྐབས་ན། གུ་རུའི་ཞལ་ནས། འདི་ནས་ཉི་མ་ཤར་གྱི་ཕྱོགས་ན་རི་སེང་ཆེན་འགྱིངས་པ་འདྲ་བའི་ངོས་སུ་པདྨ་བདག་འཆི་མེད་ཚེའི་རིག་འཛིན་ཐོབ་པའི་གནས་མཆོག་ར་ག་ར་ཏིའམ། བྲག་ཕུག་མ་ར་ཏཱི་དང་ཆ་མཚུངས་པའི་སྒྲུབ་གནས་ཁྱད་པར་ཅན་ཡོད་པས་དེར་འགྲོ་བར་བྱའོ། །ཞེས་གསུངས་ནས་རྫུ་འཕྲུལ་གྱི་ནམ་མཁའ་ལ་འཕུར་ཏེ་སྐད་ཅིག་ལ་གནས་འདིར་ཕེབས་ནས་བཞུགས་ཤིང་། ཕྱི་རབས་ཀྱི་གང་ཟག་སྒྲུབ་པ་པོ་སུ་དང་སུས་བསྡད་ཀྱང་བར་ཆད་མེད་ཅིང་བཀྲ་ཤིས་དགེ་ལེགས་འབྱུང་བར་བྱིན་གྱིས་བརླབས་པར་མཛད། དེ་དང་
རྗེས་མཐུན་པར་དུས་ཕྱིས་ཀྱང་ཆོས་རྒྱལ་ཁྲི་སྲོང་གི་རྣམ་འཕྲུལ་གཏེར་སྟོན་ཆེན་པོ་མངའ་བདག་མྱང་ཉི་མ་འོད་ཟེར་དང་། རིག་འཛིན་ཆེན་པོ་རཏྣ་གླིང་པ་སོགས་ཀྱིས་ཀྱང་གནས་འདི་ཞབས་ཀྱིས་བཅགས་ཤིང་གཟིགས་སྣང་གཏན་ལ་ཕབ་པ་དང་། དེ་བཞིན་དུ། གྲུབ་ཆེན་ཐང་སྟོང་རྒྱལ་པོ། སྤྱན་སྔར་རི་ཁྲོད་རས་ཆེན། དབུས་སྨྱོན་ཀུན་དགའ་བཟང་པོ། རྗེ་བཙུན་མི་ཕམ་བློ་གྲོས། རིག་འཛིན་འཇའ་ཚོན་སྙིང་པོ་རྣམས་ཀྱང་རིམ་པས་བྱོན་ནས་གནས་འདིར་ཏིང་ངེ་འཛིན་གྱིས་རྩལ་སྦྱངས། རྟེན་འབྲེལ་ཟབ་མོའི་སྒོ་བསྒྲིགས། མི་དང་མི་མ་ཡིན་གྱི་གདུལ་བྱ་ལ་སྨིན་གྲོལ་ཆོས་ཀྱི་ཆར་བབས་པར་མཛད་པའི་གནས་མཆོག་ཁྱད་པར་འཕགས་པ་ཡིན་པའི་ཚུལ་ནི་སྔོན་བྱུང་ལོ་རྒྱུས་ཀྱི་ཁོག་ཕུབས་ཏུ་གསོལ་བ་ལགས། དེ་ནས་གནས་ཀྱི་ཆ་ལུགས་བཀོད་པ་བཞུགས་ཚུལ་གྱི་དབང་དུ་བགྱི་ན། རྒྱབ་རི་སེང་ཆེན་
འགྱིངས་པ་འདྲ་བས་བདུད་དཔུང་ཟིལ་གྱིས་གནོད་པ། མདུན་གཙང་ཆབ་ཀྱི་རྒྱུན་འབབས་པས་ཏིང་འཛིན་རྒྱུན་ཆད་མེད་པ། སྟེང་ནས་བྱ་སྐྱིབས་གདུགས་ལྟར་ཕུབས་པས་དཀོན་མཆོག་གིས་སྐྱབས་འོག་ཏུ་ཚུད་པ། འོག་ནས་བྲག་གཡང་གི་བ་གམ་པད་སྡོང་ཁྲི་འཕང་བརྩེགས་པ་ལྟ་བུས་སྒྲུབ་པའི་རྐང་ཚུགས་པ། གཡས་གཡོན་གྱི་རི་རྒྱུད་ཕྱག་རྒྱ་བསྣོལ་བ་ལྟ་བུས་ཐབས་ཤེས་ཟུང་འཇུག་གི་ལམ་དུ་ཆུད་པ། ཞལ་ཁ་ལྷོ་རུ་བསྟན་པས་འོད་གསལ་གྱིས་འཆར་སྒོ་རྒྱ་ཆེ་བ། འོག་བཞི་རྡོ་རྗེའི་བྲག་ལ་བསྟེན་པས་ཆོས་སྐུ་འགྱུར་མེད་ཀྱི་བསྟན་པ་ཟིན་པ། གཡང་ས་འཇིགས་སུ་རུང་བས་མི་རྟག་ངེས་འབྱུང་གིས་བློ་རྒྱུད་འཁུལ་བ། ཡུལ་གྲོང་དང་རྒྱང་གྲག་གིས་ཆོད་པས་རྣམ་གཡེང་འདུ་འཛིས་དབེན་ཅིང་མཐུན་རྐྱེན་བཙལ་སླ་བ། མཐོ་ཞིང་ཕྱོགས་ཀུན་མཐོང་བས་རིག་པ་དངས་སྙིགས་ཕྱེད་པ། ཆུ་དང་མེ་ཤིང་
འཛོམ་པས་སྒྲུབ་པ་ངང་གིས་འཕེལ་བ་ལ་སོགས་ཏེ། གནས་ཀྱི་ཕྱིའི་ཆགས་ཚུལ་དེ་ལྟ་བུ་དང་ལྡན་པ་ལགས་ཤིང་། ནང་གི་ལྷའི་བཞུགས་ཚུལ་གྱི་དབང་དུ་བགྱི་ན། སྒྲུབ་གནས་འདི་ཉིད་ཕྱི་ལྟར་དཔལ་གསང་བའི་བདག་པོ་ཕྱག་ན་རྡོ་རྗེས་བྱིན་གྱིས་བརླབས་པའི་རྟགས་སུ་ཁྱུང་གཤོག་རིན་ཆེན་འབར་བའི་སྐུ་རང་བྱོན་རྭ་དང་མཆུ་སྡེར་སྒྲོ་གཤེག་དང་ཕྱག་ཏུ་སྦྲུལ་བཟུང་བ་ཚུན་ཆོད་ཤིན་ཏུ་གསལ་བ་འདི་ཉིད་ལ་གསང་བདག་ཕྱག་རྡོར་དངོས་སུ་མོས་པས་དད་གུས་གསོལ་བ་བཏབ་ན་གཟའ་ཀླུ་ས་བདག་གཉན་ལྷོག་གི་ནད་དང་གནོད་པ་མ་ལུས་ཞི་ཞིང་སྐྱོབས་པའི་བྱིན་རླབས་དང་ལྡན་པ་ལགས། ནང་ལྟར་འཕགས་པ་སྤྱན་རས་གཟིགས་ཀྱིས་བྱིན་གྱིས་བརླབས་པའི་རྟགས་སུ་ཕུག་པའི་ཡང་ཐོག་ན་བཀའ་རྟགས་རྡོ་རིང་རང་བྱོན་གྱི་ངོས་ལ་ཇོ་བོ་ཐུགས་རྗེ་ཆེན་པོ་བཅུ་གཅིག་ཞལ་གྱི་སྐུ་དང་གཟུངས་མཆོག་
ཡི་གེ་དྲུག་པའི་སྔགས་རྣམས་རང་བྱོན་དུ་ཡོད་པ་ལ་གསོལ་འདེབས་མོས་གུས་བྱས་ན་ངན་སོང་གི་སྡུག་བསྔལ་ལས་སྐྱོབས་པའི་བྱིན་རླབས་དང་ལྡན་པ་ལགས། གསང་བ་ལྟར་ན་མགོན་པོ་ཚེ་དཔག་མེད་ཀྱིས་བྱིན་གྱིས་བརླབས་པའི་རྟགས་སུ། བྲག་གི་ངོས་གཡས་ཕྱོགས་འདི་ན་ཚེ་དཔག་མེད་ཀྱི་སྐུ་ཤིན་ཏུ་གསལ་བ་དང་། ཕུག་པའི་གཡོན་ན་འཆི་མེད་བདུད་རྩིའི་ཆུ་རྒྱུན་ལྷུང་ལྷུང་དུ་འབབ་པ་འདི་ཉིད་འཐུང་ཞིང་ཁྲུས་པས་ནད་གདོན་སྡིག་སྒྲིབ་ཐམས་ཅད་དག་ཅིང་ཚེའི་དངོས་གྲུབ་ཐོབ་པ་དང་། ཚེ་ཆུའི་འགྲམ་དུ་གཏེར་བཏོན་འཇའ་ཚོན་སྙིང་པོས་ཕྱག་མཛུབ་བཙུགས་པའི་རྗེས་ཀྱི་བྲག་ཁུངས་ན་ནད་སེལ་གྱི་སྨན་ཆུ་ངོ་མཚར་ཅན་ཡང་ཡོད་དོ། དེ་ཁོ་ན་ཉིད་ལྟར་ན་གུ་རུ་རིན་པོ་ཆེ་པདྨས་བྱིན་གྱིས་བརླབས་པའི་རྟགས་སུ། ཕུག་པའི་ཡ་ཐོད་དུ་གུ་རུ་རིན་པོ་ཆེ་ལ་སྤྲུལ་པའི་གུ་རུ་མཚན་
བརྒྱད་ཀྱིས་བསྐོར་བའི་སྐུ་རང་བྱོན་དང་དུས་དང་གང་ཟག་ཁྱད་པར་ཅན་འཛོམ་པའི་སྐབས་རྣམས་སྒྲུབ་ཕུག་ལས་བདུད་རྩིའི་ཆུ་ཟིལ་ཚན་ཆེར་འབབ་པའི་ཡ་མཚན་ཡང་ཡོད་དོ། །གཞན་ཡང་བྲག་ལོགས་ཀྱི་རྩེ་མོར་གྲུབ་ཆེན་བིར་ཝ་པ་དང་། རྗེ་བཙུན་མི་ལ་བཞད་པ་རྡོ་རྗེའི་སྐུ་རང་བྱོན་དང་། ཕུག་པའི་འོག་ཕྱོགས་སུ་ཁྲོ་བོ་ཆེན་པོ་སྟོབས་པོ་ཆེ་གླང་ཆེན་རབ་བརྟན་གྱི་གཟུགས་སུ་སྤྲུལ་ནས་སྒྲུབ་གནས་ཞབས་འདེགས་ཀྱི་ཚུལ་ཀྱང་གསལ་བར་ཡོད་ཅིང་། མདོར་ན། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། ཞེས་དང་། །གང་ལ་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། ཅེས་གསུངས་པ་ལྟར་གང་ཟག་མོས་པའི་ཁྱད་པར་གྱིས་དབང་གིས། དག་པའི་སྣང་ངོར་ནི་ཡུལ་སྣོད་བཅུད་ཐམས་ཅད་རྒྱལ་བའི་དཀྱིལ་འཁོར་དུ་ལྷུན་གྱིས་གྲུབ་པ་ཡིན་ལ། རང་སྣང་མ་དག་པའི་ངོར་ནི་སངས་རྒྱས་དངོས་སུ་
བྱོན་ཡང་དད་མོས་མི་སྐྱེ་བ་ནི་གང་ཟག་གི་རང་སྐྱོན་དུ་ཟད་ལ། སྐལ་ལྡན་དད་ཅན་གྱི་ངོར་ནི་གནས་འདི་ཤར་ཕྱོགས་མ་ར་ཏི་ཀའི་སྒྲུབ་གནས་དང་ཁྱད་མ་མཆིས་པར་ཨུ་རྒྱན་གུ་རུ་ཉིད་ཀྱིས་གསུངས་པ་ལགས།། ༈ །།དེ་ལྟར་གནས་ཀྱི་བཀོད་པ་ངོ་སྤྲད་དེ། ད་ནི་ཕན་ཡོན་དང་དགོས་ཆེད་ཀྱི་མཚམས་སྦྱར་ནས་བཤད་ན། འདི་ལྟ་བུ་ཁྱད་པར་འཕགས་པའི་སྒྲུབ་གནས་དམ་པ་འདི་དག་ཏུ་འཇིག་རྟེན་གཡེང་བ་སྤངས་ཤིང་ཉམས་ལེན་ཟབ་མོ་ལ་རྩེ་གཅིག་ཏུ་འབད་པ་ན་ཚེ་གཅིག་བྱང་ཆུབ་ཀྱི་གཏན་སྲིད་ཟིན་པར་འགྱུར་བ་ལྟ་ཅི་སྨོས་ཏེ། འཇིག་རྟེན་ཕལ་པ་དག་ཀྱང་གནས་མཆོག་འདི་ལྟ་བུ་ལ་མོས་པ་དང་གུས་པས་མཇལ་ཞིང་ཕྱག་མཆོད་ཞབས་ཏོགས་བགྱིས་པ་ཙམ་གྱིས་ཀྱང་རྒྱུ་འབྲས་རྟེན་འབྲེལ་ཟབ་མོས་འཚམས་སྦྱོར་གྱིས་མ་འོངས་པས་ན་དམ་ཆོས་ཀྱི་སྐལ་
བ་བཟང་པོ་དང་ལྡན་ཞིང་ཕྱི་མ་དག་པའི་ཞིང་དུ་སྐྱེ་བའི་སྐལ་བཟང་དུ་འགྱུར་ཞིང་། སངས་རྒྱས་བཅོམ་ལྡན་འདས་ཀྱི་ཞལ་ནས་ཀྱང་། གང་གིས་བསྐལ་པ་བྱེ་བ་བརྒྱ་སྟོང་མང་པོར་བསོད་ནམས་ཀྱི་ཚོགས་ཇི་སྙེད་བསགས་པ་ལས་ཀྱང་། གང་གིས་ངེས་འབྱུང་གི་བསམ་པས་དགོན་པའི་ཕྱོགས་སུ་གོམ་པ་བདུན་བོར་བ་དེ་ནི་ཆེས་ཆེར་ཕན་ཡོན་ཆེའོ། ཞེས་གསུངས་པ་དང་། །ཨུ་རྒྱན་རིན་པོ་ཆེའི་ཞལ་ནས། །དབེན་གནས་རི་ཐང་མཚམས་སུ་མ་བྱེད་པར། །ང་ཡིས་བསྒྲུབས་པའི་སྒྲུབ་གནས་ཀུན་ལ་གྱིས། ཞེས་གསུངས་པ་ལྟར། གུ་རུ་ཉིད་དང་སྒྲུབ་རྒྱུད་ཀྱི་སྐྱེས་ཆེན་དམ་པ་གྲུབ་པ་བརྙེས་པ་རྣམས་ཀྱིས་བྱིན་གྱིས་རླབས་པའི་དབེན་གནས་འདི་ལྟ་བུ་བསྟེན་དགོས་པ་དང་། དབེན་པར་གནས་ཀྱང་རང་རྒྱུད་མ་ཐུལ་ན་རི་དྭགས་དང་གཅན་ཟན་གྱི་ཚོགས་དང་ཁྱད་པར་མི་འབྱུང་ཚེ། སྒོ་གསུམ་དགེ་ལ་གཞོལ་ཞིང་དམ་པའི་ཆོས་དང་རང་རྒྱུད་འདྲེས་དགོས་
ལ། དེ་ལྟ་བུའི་དབེན་གནས་རི་ཁྲོད་སྒྲུབ་ཁང་བྱིན་ཆེན་རྣམས་ལ་ནི་ཁྱིམ་པ་དག་གིས་ཀྱང་བསྐུར་སྟིའི་ཡུལ་ཕྱོགས་སུ་གྱུར་པ་ཡིན་པས། དད་པའི་ནོར་དང་ལྡན་པ་རྣམས་འདུས་བྱས་འདུས་མ་བྱས་ཀྱི་ཚོགས་གསོག་སྒྲིབ་སྦྱོང་ལ་འབད་པར་ཞུ་ལགས། བཀྲ་ཤིས། གཅིག་ཞུས་ཁུལ་ལགས།