གྲངས་ཀྱི་ཁྱད་པར་ལ་བསམ་པ།
བཞི་བ་གྲངས་ཀྱི་ཁྱད་པར་ལ་བསམ་པ་ནི། ཁམས་གསུམ་མམ་རིགས་དྲུག་གི་སེམས་ཅན་རྣམས་ཀྱི་གྲངས་མང་ཉུང་དང་། སྐྱེ་བ་བཟང་ངན་གྱིས་ལུས་རྟེན་མཆོག་དམན་སོ་སོར་ཐོབ་པའི་རིམ་པ་ལ་བློས་བརྟགས་དཔྱད་ཀྱིས་དཔག་ན། བཤད་མ་ཐག་གི་མི་ལུས་ཐོབ་པ་དེ་སྲིད་པ་ཙམ་སྟེ། འདི་ལྟར་ཞེ་སྡང་གི་ལས་ངན་འགྲོ་བའི་རྟེན་ལ་ཤིན་ཏུ་བསགས་རྒྱ་ཆེ་བའི་དམྱལ་བ་ན་ཚ་གྲང་གིས་གདུང་བའི་སེམས་ཅན་གྱི་མང་ཚད་ནི། མཚན་མོའི་སྐར་མ་ཙམ་དུ་སྣང་ལ། ཡིད་སེར་སྣའི་འཆིང་བས་ལས་ངན་བསགས་པའི་ཡི་དྭགས་ནི་དེ་བས་ཉུང་ཤས་སུ་ཡོད་པས་ཉིན་མོའི་སྐར་མ་ཙམ་དང་། ཡི་དྭགས་ལ་མཚན་མོའི་སྐར་མ་བཞིན་དུ་མང་པོར་གྱུར་པའི་ཚད་དེ་ལ་ལྟོས་ན་སེམས་ཀྱི་རང་བཞིན་གཏི་མུག་པའི་འགྲོ་བ་དུད་འགྲོའི་སྡེ་ཚན་སོ་སོར་ཉིན་སྐར་ཙམ་དུ་ཉུང་བར་འདུག་ལ། དེང་སང་གི་དུས་སེམས་ཅན་དང་། ཚེ་དང་། དུས་དང་། ཉོན་མོངས་དང་། ལྟ་བ་སྟེ་སྙིགས་མ་ལྔ་བདོ་བའི་མཐར་རྒྱུ་ལས་ངན་གྱིས་འཕངས་པའི་མི་ལུས་ཙམ་སྤྱིར་ཐོབ་པ་ཡོད་ཀྱང་། སྒེར་དུ་རང་གཞན་གཉིས་ཀ་འདི་ཕྱི་གཉིས་ཕུང་ལ་སྦྱོར་ངེས་པ་ཅན་གྱི་རིགས་རྒྱལ་ཁམས་ཀུན་ཏུ་ཁྲམ་པ་ཤ་སྟག་གིས་ཡོངས་སུ་གང་སྟེ། བདེན་པའི་ལམ་དང་དྲང་པོའི་ལུགས་སྐྱོང་བ་རེ་ཟུང་ལས་མེད་པའི་དུས་མཐའ་འདིར། དམ་པའི་ཆོས་དང་ལྡན་པའི་མི་ལུས་རིན་པོ་ཆེ་དགེ་སྡིག་གི་བླང་དོར་དང་། འཁོར་འདས་ཀྱི་སྐྱོན་ཡོན་སོ་སོར་འབྱེད་ཤེས་ལ་དཀར་པོ་དགེ་བའི་ཆོས་ལ་འདུན་པ་དང་མོས་པ་སྐྱེས་སུ་རུང་བའི་ལུས་རྟེན་འདི་འདྲ་བ་ལེགས་པར་ཐོབ་པའི་དུས་ད་རེས་ཀྱི་སྐྱེ་བ་འདིར་སྤྱིར་འཁོར་བ་དང་། སྒོས་སུ་ངན་སོང་གི་སྡུག་བསྔལ་ལས་སྐྱོབ་ཤིང་ཐར་བའི་ཐབས། ཡང་དག་སྙིང་པོའི་དོན་ཐོབ་བྱའི་འབྲས་བུ་མི་བསླུ་བ་མཆོག་གམ་བཟང་པོ་གང་ཉིད། ཐོབ་པར་བྱེད་པའི་ཐབས་ཐེག་པ་ཆེན་པོའི་ལམ་མ་ནོར་བ་དེ་ཅི་ནས་ཀྱང་བསྒྲུབ་པར་མ་བྱས་པའམ་མ་འགྲུབ་ན་མི་ལུས་ཞིག་ད་ལྟ་ཐོབ་པ་འདི་ཉིད། དཔེར་ན་རིན་པོ་ཆེ་གསེར་གླིང་དུ་ཕར་ཕྱིན་ནས་ཚུར་སྟོང་ལོག་ཏུ་རང་ཁྱིམ་དུ་ལྡོག་པ་དང་འདྲ་བས་གོང་དུ་ས་བཅད་རྣམ་བཞག་བཞིའི་སྒོ་ནས་དལ་འབྱོར་རྙེད་པར་དཀའ་བའི་ཚུལ་ཤེས་པར་བྱ་བ་ཁོ་ནའོ།།