འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་བརྒྱ་རྩ་བརྒྱད་པ།
༄༅། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་བརྒྱ་རྩ་བརྒྱད་པ་བཞུགས་སོ། །
རྒྱ་གར་སྐད་དུ། ཨཱརྻ་པྲཛྙཱ་པ་ར་མི་ཏཱ་ནཱ་མ་ཨཥྚ་ཤ་ཏ་ཀ་ན། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་བརྒྱ་རྩ་བརྒྱད་པ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །འདས་དང་མ་བྱོན་ད་ལྟར་གྱི། །རྒྱལ་བ་གང་ལགས་དེ་ཀུན་གྱི། ཡུམ་ནི་དགེ་མ་ཁྱོད་ལགས་ཏེ། །ཁྱོད་ནི་ལྷ་མོ་རྒྱལ་བའི་སྲས། །རང་བཞིན་མེད་པའི་རང་བཞིན་ཅན། །སངས་རྒྱས་ཡུམ་གྱུར་དེ་ཡི་མཚན། །དགེ་མ་བདག་གིས་བརྗོད་པར་བྱ། །འབྱོར་པར་འདོད་པས་མཉན་པར་གྱིས། །ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐམས་ཅད་མཁྱེན་པ་ཉིད་དང༌། ལམ་གྱི་རྣམ་པ་ཐམས་ཅད་མཁྱེན་པ་ཉིད་དང༌། རྣམ་པ་ཐམས་ཅད་མཁྱེན་པ་ཉིད་དང༌། ཡང་དག་པའི་མཐའ་དང༌། དེ་བཞིན་ཉིད་དང༌། མ་ནོར་བའི་དེ་བཞིན་ཉིད་དང༌། གཞན་མ་ཡིན་པའི་དེ་བཞིན་ཉིད་དང༌། བདེན་པ་དང༌། དེ་ཁོ་ན་དང༌། ཡང་དག་པ་དང༌། ཕྱིན་ཅི་མ་ལོག་པ་ཉིད་དང༌། སྟོང་པ་ཉིད་དང༌། མཚན་མ་མེད་པ་ཉིད་དང༌། སྨོན་པ་མེད་པ་ཉིད་དང༌། དངོས་པོ་མེད་པ་ཉིད་དང༌། ངོ་བོ་ཉིད་མེད་པ་ཉིད་དང༌། དངོས་པོ་མེད་པའི་ངོ་བོ་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་ཀྱི་གནས་པ་ཉིད་དང༌། ཆོས་མི་འགྱུར་བ་ཉིད་དང༌། ཆོས་སྐྱོན་མེད་པ་ཉིད་དང༌། ཆོས་ཀྱི་མཚན་ཉིད་དང༌། ཆོས་བདག་མེད་པ་ཉིད་དང༌། ངོ་བོ་ཉིད་མེད་པ་ཉིད་དང༌། སེམས་ཅན་མེད་པ་ཉིད་དང༌། སྲོག་མེད་པ་ཉིད་དང༌། གསོ་བ་མེད་པ་ཉིད་དང༌། སྐྱེས་བུ་མེད་པ་ཉིད་དང༌། གང་ཟག་མེད་པ་ཉིད་དང༌། བརྗོད་དུ་མེད་པ་ཉིད་དང༌། བརྗོད་པར་བྱ་བ་མ་ཡིན་པ་དང༌། སེམས་དང༌། ཡིད་དང༌། རྣམ་པར་ཤེས་པ་དང་བྲལ་བ་དང༌། མཉམ་པ་མང་བ་དང༌། མི་མཉམ་པ་དང༌། མཉམ་པ་དང༌། བདག་གི་མེད་པ་དང༌། རྒྱགས་པ་མེད་པ་དང༌། སྤྲོས་པ་མེད་པ་དང༌། སྤྲོས་པ་དང་བྲལ་བ་དང༌། སྤྲོས་པ་ཐམས་ཅད་ལས་ཤིན་ཏུ་འདས་པ་དང༌། སངས་རྒྱས་ཐམས་ཅད་ཀྱི་ཡུམ་དང༌། བྱང་ཆུབ་སེམས་དཔའ་ཐམས་ཅད་བསྐྱེད་པ་དང༌། ཉན་ཐོས་ཐམས་ཅད་འཛིན་པ་དང༌། རང་སངས་རྒྱས་ཐམས་ཅད་བསྐྲུན་པ་དང༌། འཇིག་རྟེན་ཐམས་ཅད་འཛིན་པ་དང༌། བསོད་ནམས་ཀྱི་ཚོགས་ཟད་མི་ཤེས་པ་བསགས་པ་དང༌། ཡེ་ཤེས་འབབ་པ་དང༌། རྫུ་འཕྲུལ་མཛད་པ་དང༌། ལྷའི་མིག་རྣམ་པར་སྦྱོང་བར་མཛད་པ་དང༌། ལྷའི་རྣ་བ་རབ་ཏུ་དང་བར་མཛད་པ་དང༌། ཕ་རོལ་གྱི་སེམས་ཤེས་པར་མཛད་པ་དང༌། སྔོན་གྱི་གནས་རྗེས་སུ་དྲན་པར་མཛད་པ་དང༌། འཆི་འཕོ་བ་དང༌། སྐྱེ་བ་ཤེས་པར་མཛད་པ་དང༌། ཉོན་མོངས་པ་ཐམས་ཅད་ཟད་པར་མཛད་པ་དང༌། འཕགས་པ་དང༌། གཙང་པ་དང༌། བསངས་པ་དང༌། དྲན་པ་ཉེ་བར་བཞག་པ་ལ་གནས་པ་དང༌། ཡང་དག་པར་སྤོང་བའི་ཤུགས་དང་ལྡན་པ་དང༌། རྫུ་འཕྲུལ་གྱི་རྐང་པ་བཞིའི་ཞབས་དང་ལྡན་པ་དང༌། དབང་པོ་སྦྱོང་བར་མཛད་པ་དང༌། སྟོབས་མཛད་པ་དང༌། ཁ་ན་མ་ཐོ་བ་མེད་པ་དང༌། བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེས་མཛེས་པར་བྱས་པ་དང༌། ནོར་བདུན་སྦྱིན་པར་མཛད་པ་དང༌། འཕགས་པའི་ལམ་ཡན་ལག་བརྒྱད་པ་སྟོན་པ་དང༌། མཐར་གྱི་གནས་པའི་སྙོམས་པར་འཇུག་པ་དགུ་སྟོན་པར་མཛད་པ་དང༌། དབང་བཅུ་སྒྲུབ་པ་དང༌། ས་བཅུ་གནས་པར་མཛད་པ་དང༌། སྟོབས་བཅུ་ཡོངས་སུ་རྫོགས་པར་མཛད་པ་དང༌། ཟད་པར་གྱི་སྐྱེ་མཆེད་བཅུས་མཛད་པར་བྱས་པ་དང༌། ཤེས་པ་བཅུ་འབབ་པ་དང༌། བག་ལ་ཉལ་བ་བཅུའི་དགྲ་འཇིག་པར་མཛད་པ་དང༌། བསམ་གཏན་རྣམས་བསྒྲུབ་པར་མཛད་པ་དང༌། གཟུགས་མེད་པའི་ཁམས་ལས་ཡང་དག་པར་འདའ་བར་མཛད་པ་དང༌། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱིས་བསྟོད་པ་དང༌། ཤེས་པ་ཐམས་ཅད་མཛད་པ་དང༌། ནང་སྟོང་པ་ཉིད་དང༌། ཕྱི་སྟོང་པ་ཉིད་དང༌། ཕྱི་ནང་སྟོང་པ་ཉིད་དང༌། སྟོང་པ་ཉིད་སྟོང་པ་ཉིད་དང༌། ཆེན་པོ་སྟོང་པ་ཉིད་དང༌། དོན་དམ་པ་སྟོང་པ་ཉིད་དང༌། འདུས་བྱས་སྟོང་པ་ཉིད་དང༌། འདུས་མ་བྱས་སྟོང་པ་ཉིད་དང༌། མཐའ་ལས་འདས་པ་སྟོང་པ་ཉིད་དང༌། ཐོག་མ་དང་ཐ་མ་མེད་པ་སྟོང་པ་ཉིད་དང༌། དོར་བ་མེད་པ་སྟོང་པ་ཉིད་དང༌། རང་བཞིན་སྟོང་པ་ཉིད་དང༌། ཆོས་ཐམས་ཅད་སྟོང་པ་ཉིད་དང༌། རང་གི་མཚན་ཉིད་སྟོང་པ་ཉིད་དང༌། མི་དམིགས་པ་སྟོང་པ་ཉིད་དང༌། དངོས་པོ་མེད་པ་སྟོང་པ་ཉིད་དང༌། ངོ་བོ་ཉིད་སྟོང་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་དང༌། མ་བྱུང་བ་དང༌། མ་སྐྱེས་པ་དང༌། མ་འགགས་པ་དང༌། ཆད་པ་མེད་པ་དང༌། རྟག་པ་མེད་པ་དང༌། དོན་གཅིག་པ་མ་ཡིན་པ་དང༌། ཐ་དད་པ་མ་ཡིན་པ་དང༌། འོང་བ་མེད་པ་དང༌། འགྲོ་བ་མེད་པ་དང༌། རྟེན་ཅིང་འབྲེལ་བར་འབྱུང་བ་རྣམ་པར་སྒོམ་པ་དང༌། རབ་ཏུ་རྟག་པར་བྱ་བ་མ་ཡིན་པ་དང༌། རྣམ་པར་ཤེས་པར་བྱ་བ་མ་ཡིན་པ་དང༌། གཞི་མེད་པ་དང༌། མཚན་ཉིད་མེད་པ་དང༌། བརྟག་པར་བྱ་བ་མ་ཡིན་པ་དང༌། རིག་པར་བྱ་བ་མ་ཡིན་པ་དང༌། ཐོག་མ་དང༌། ཐ་མ་འཇིག་པ་མེད་པར་མཛད་པ་དང༌། གཡོ་བ་མེད་པ་དང༌། གཉིས་མེད་པ་དང༌། གཉིས་མེད་པ་མ་ཡིན་པ་དང༌། ཞི་བ་དང༌། བློ་འཇུག་པ་རྣམ་པར་སྤངས་པ་དང༌། གཉེན་པོ་མེད་པ་དང༌། མ་གོས་པ་དང༌། ནམ་མཁའི་ལམ་དང་འདྲ་བ་དང༌། ཡོད་པ་དང༌། མེད་པར་བརྗོད་པ་མ་ཡིན་པ་དང༌། ཞི་བ་དང༌། རྨི་ལམ་གྱི་ངོ་བོ་ཉིད་དང༌། སྒྱུ་མ་ལྟ་བུའི་ཆོས་ཉིད་དང༌། མགལ་མེ་བསྐོར་བ་དང་འདྲ་བར་ཆོས་ཐམས་ཅད་རོ་གཅིག་པ་ཉིད་དོ། །སུ་ཞིག་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་བརྒྱ་རྩ་བརྒྱད་པ་འདོན་པ་དེ་ངན་སོང་ཐམས་ཅད་ལས་རབ་ཏུ་ཐར་བར་འགྱུར་རོ། །སངས་རྒྱས་ཐམས་ཅད་ཀྱིས་དགོངས་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱིས་ཀྱང་རྟག་པར་རྒྱུན་དུ་སྲུང་བ་དང༌། སྐྱོབ་པ་དང༌། སྦེད་པ་བྱེད་པར་འགྱུར་རོ། །དེའི་གསང་སྔགས་ཀྱི་ཚིག་འདི་དག་ཀྱང་རྟག་ཏུ་རྒྱུན་མི་འཆད་པར་དྲན་པར་བྱའོ། །བཅོམ་ལྡན་འདས་མ་འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་པར་མོས་པ་ལ་བྱམས་པ་ཡོན་ཏན་དཔག་ཏུ་མེད་པ་དང་ལྡན་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱིས་རྣམ་པ་ཐམས་ཅད་མཁྱེན་པ་ཉིད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བཞེས་པ་ལ་ཕྱག་འཚལ་ལོ། །འདི་ལྟ་སྟེ། ཨོཾ་པྲཛྙཱེ་པྲཛྙཱེ། མ་ཧཱ་པྲཛྙཱེ། པྲཛྙཱེ་ཨ་ཝ་བྷཱ་སེ། པྲཛྙཱེ་ཨ་བ་ལོ་ཀ་ཀ་རི། ཨཱ་ཛྙཱ་ན་བ་དི་མ་ནི། སིདྡྷི་སུ་སིདྡྷི། སི་ཏ་མ་ན་བྷ་ག་བ་ཏི། སརྦ་ག་སུན་དྷ་རི་བྷ་ག་བ་ཏི། བ་ཏ་ས་ལི། པྲ་ས་རི་ཧ་ཏ་སེ། ས་མ་ཤ་ས་ཀ་རི། ཏིཥྛཱ་ཏིཥྛཱ། ཀམྦ་ཀམྦ། ཙ་ལ་ཙ་ལ། ར་བ་ར་བ། གརྫ་གརྫ། ཨཱ་གཙྪ་ཨཱ་གཙྪ་བྷ་ག་བ་ཏི། མ་ན་མཱ་བི་ལམྦ་སྭཱ་ཧཱ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་ན། ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་བཟུང་བར་འགྱུར་རོ། །རྟག་ཏུ་བཟླས་བརྗོད་བྱས་ན་དེའི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །དེ་ནས་ཤི་འཕོས་ནས་ཀྱང་སྐྱེ་བ་དྲན་པ་དང༌། ཡིད་གཞུང་ཞིང་ཤེས་རབ་མཚུངས་པ་མེད་པར་འགྱུར་རོ། །དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཆོས་མ་ལུས་པ་བཟུང་བར་འགྱུར་རོ། །གསང་སྔགས་དང་རིག་སྔགས་ཐམས་ཅད་ཀྱང་ཡོངས་སུ་བཟུང་བར་འགྱུར་རོ། །འདི་ནས་ཤི་འཕོས་ནས་ཀྱང་སྐྱེ་བ་དྲན་པ་དང༌། ཡིད་གཞུང་ཞིང་ཤེས་རབ་ཆེན་པོར་འགྱུར་རོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་བརྒྱ་རྩ་བརྒྱད་པ་རྫོགས་སོ།། །།