གོ་དོན་སྤྱི་ལྟར་བཤད་པ།
ཞི༷་ཁྲོ༷་འདུས་པའི༷་ལྷ༷་ལ༷་ཕྱ༷ག་འཚ༷ལ་ལོ༷༔ དྲུག༷་པ༷་ཞི་༷ཁྲོ༷འི་བསྒོ༷མ་ཁོ༷ག་ལ༷་ཡང༷་གཉི༷ས༔ གོ་དོན་སྤྱི་ལྟར་བཤད་པ་དང་། ཆོ་ག་བྱེ་བྲག་ཏུ་བཤད་པ་གཉིས་ཏེ། དང་པོ་ལ་ཡང་ཐུན་མོང་དང་ཐུན་མོང་མ་ཡིན་པ་གཉིས་ཀྱི། དང་པོ་ནི། སྦྱང་གཞི་ཆོས་ཉིད་དེ་བཞིན་ཉིད་འཆིང་གྲོལ་ཐམས་ཅད་དང་བྲལ་བའི་གནས་ལུགས་ཡེ་ནས་རྣམ་དག་ལྷུན་གྲུབ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་སྐུ་གསུམ་རང་ཆས་སུ་བཞུགས་པ་ནི། ཐུགས་ཏིག་ལས། གཞི་གནས་རིག་པ་ངོ་བོ་རང་བཞིན་དང་༔ ཐུགས་རྗེ་གསུམ་སྟེ་རྒྱལ་བའི་སྙིང་པོ་ལ༔ སྐུ་གསུམ་རང་ཆས་བཞུགས་པར་བཤད་པ་ཡིན༔ ཞེས་དང་། མུ་ཏིག་ཕྲེང་བ་ལས། གནས་ལུགས་རྣམ་པ་མང་བཤད་ཀྱང་། །ཡེ་ཤེས་རྣམ་པ་གསུམ་ཡིན་ནོ། །ཞེས་སོ། །རིག་པའི་ཡེ་ཤེས་དེ་ཉིད་རང་ངོ་མ་ཤེས་པས་གཉིས་འཛིན་དུ་འཁྲུལ་ནས་འཁོར་བའི་བག་ཆགས་སྣ་ཚོགས་པའི་རང་བཞིན་དུ་གྱུར་པ་ནི། སྒྲ་ཐལ་འགྱུར་ལས། རྒྱུ་གཅིག་རྩ་བ་དབྱེར་མེད་དེ། །རང་ངོ་ཡིན་པར་མ་ཤེས་པས། །འདི་ནི་འཁོར་བའི་ཐོག་མའོ། །ཞེས་སོ། །ཀུན་གསལ་ལས། གཞི་ཉིད་རང་ངོ་མ་ཤེས་པས། །གཟུང་འཛིན་སྐྱེས་པའི་དུས་ན་འཁྲུལ། །སྣོད་བཅུད་སྲིད་པ་རིམ་བཞིན་ཆགས། །ཞེས་སོ། །དེས་ན་བརྟན་གཡོ་འཁོར་འདས་ཐམས་ཅད་ལ་ཁྱབ་ཆོས་སུ་གནས་ཏེ། བརྟག་གཉིས་ལས། འདི་ཉིད་ཡེ་ཤེས་ཆེན་པོ་སྟེ། །ཐམས་ཅད་ལུས་ལ་རྟག་ཏུ་གནས། །དངོས་དང་དངོས་མེད་བདག་ཉིད་གཙོ། །གཉིས་དང་གཉིས་སུ་མེད་པའི་ཚུལ། །བརྟན་དང་གཡོ་བ་ཁྱབ་ནས་གནས། །ཞེས་དང་། རྒྱུད་བླ་མར། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་དཔེར་ན་འདམ་རྫབ་ཀྱིས་བཏུམ་པའི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །སྦྱང་བྱ་ནི། གང་གིས་གནས་ལུགས་དེ་ཉིད་སྒྲིབ་བྱེད་ཀྱི་མེད་སྣང་གློ་བུར་བའི་དྲི་མ་ཕྲ་རགས་རྣམས་ཏེ། རྒྱུད་བླ་མ་ལས། ཉོན་མོངས་ཤེས་བྱ་སྙོམས་འཇུག་གི། སྒྲིབ་གསུམ་ལས་ནི་ངེས་གྲོལ་ཏེ། །ཞེས་དང་། མུ་ཏིག་ཕྲེང་བ་ལས། ཆ་མེད་རྡུལ་དང་བཅས་པའི་ཕྱིར། །འོད་གསལ་གཉིས་(ཉིད་)ཀྱང་བག་ལ་ཞ། །ཞེས་སོ། །དཔེར་ན་ནོར་བུའི་ཕྱི་རོལ་གྱི་འདམ་རྫབ་བཞིན་ནོ། །སྦྱོང་བྱེད་ནི། རིམ་གཉིས་ཀྱིས་བསྡུས་པའི་ཐབས་ཤེས་ཟུང་འཇུག་གི་བྱེད་རྩོལ་དང་བཅས་ཏེ། སྙིང་པོའི་རྩ་རྒྱུད་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། དེའི་རྒྱུད་ཕྱི་མ་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པ་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པ་སྦྱོར་བས་ཐོབ། །ཅེས་སོ། །དཔེར་ན་ནོར་བུའི་སྟེང་གི་འདམ་རྫབ་སྦྱོང་བའི་བྱེད་རྩོལ་བཞིན་ནོ། །སྦྱངས་འབྲས་ནི། དེའི་སྟེང་གི་དྲི་མ་རྣམ་དག་ཏུ་གྱུར་ཏེ་ཚོགས་སྦྱོར་ལ་སོགས་པའི་རྟོགས་པ་རྣམས་གནས་སྐབས་ཀྱི་འབྲས་བུ་དང་། ནམ་ཞིག་རང་གི་ཡེ་ཤེས་མངོན་དུ་གྱུར་པ་ནི་མཐར་ཐུག་གི་འབྲས་བུ་སྟེ། རྒྱུད་བླ་མར། ཆུ་མཚོ་སོགས་བཞིན་འདོད་ཆགས་སོགས། །གློ་བུར་ཉོན་མོངས་དག་པ་ནི། །མདོར་ན་མི་རྟོག་ཡེ་ཤེས་ཀྱི། །འབྲས་བུ་ཡིན་པར་རབ་ཏུ་བརྗོད། །རྣམ་པ་ཀུན་གྱི་མཆོག་ལྡན་པའི། །སངས་རྒྱས་སྐུ་ནི་ངེས་ཐོབ་པ། །དེ་ནི་རྗེས་ལ་ཐོབ་པ་ཡི། །ཡེ་ཤེས་འབྲས་བུ་ཡིན་པར་བསྟན། །ཅེས་སོ། །དཔེར་ན་ནོར་བུའི་སྟེང་གི་འདམ་རྫབ་མཐའ་དག་སྦྱངས་ཏེ་ནོར་བུའི་ཡོན་ཏན་མངོན་དུ་གྱུར་པ་ལྟ་བུའོ། །དེ་ལྟར་བསྒྲུབ་གཞི་ངོས་མ་ཟིན་ན་སྒྲུབ་བྱེད་ཀྱང་ངལ་བ་དོན་མེད་ལྟ་བུ་སྟེ། བཅོས་མ་གློ་བུར་བའི་འཁྲུལ་སྣང་ལྷར་བསྒོམ་པ་ནི་བསྐྱེད་རིམ་ཡང་དག་ཏུ་མི་འགྱུར་བར། ས་པཎ་གྱིས། བརྒྱ་ལ་བསྐྱེད་རིམ་བསྒོམ་ན་ཡང་། །སྦྱང་གཞི་སྦྱོང་བྱེད་སྦྱང་བྱ་དང་། །སྦྱངས་འབྲས་ངོ་མ་འཕྲོད་པ་རུ། །རང་བཟོའི་དཀྲོང་བསྐྱེད་བསྒོམ་པར་ཟད། །ཅེས་དང་། རྡོ་རྗེ་སྙིང་འགྲེལ་ལས། རྒྱུ་འདྲར་དེ་ལས་སྐྱེ་བ་ཡི། །འབྲས་བུ་ཐམས་ཅད་དུ་མཐོང་གི། ཀོ་ཊ་པ་ཡི་ས་བོན་ལས། །སཱ་ལུའི་འབྲས་བུ་འབྱུང་བ་མེད། །ཅེས་སོ། །བསྒྲུབ་གཞི་ངོས་བཟུང་བ་དེ་ལ་མིང་གི་སྒོ་ནས་ལྷ་ཞེས་ཇི་ལྟར་གྲུབ་ན། ཨ་བྷི་ངྷ་ན་ལས། མི་འཆི་བ་དང་ལྷག་པར་བརྟན། །འདོད་དོན་སྟེར་དང་ཞི་བ་དང་། །ལུས་གནས་ཕན་པར་སྒྲུབ་པ་དང་། །བཀུར་བར་འོས་ཕྱིར་ལྷ་ཞེས་བྱ། །ཞེས་པ་གང་དང་སྦྱར་ཀྱང་འབྲེལ་ཆགས་པའོ། །གཉིས་པ་ཐུན་མོང་མ་ཡིན་པ་ལ། ཕྱི་ལྟར་རང་གི་ཕུང་ཁམས་སྐྱེ་མཆེད་ཀྱིས་བསྡུས་པའི་འཁོར་འདས་ཀྱི་ཆོས་ཐམས་ཅད་ཡེ་ནས་སངས་རྒྱས་སུ་ལྷུན་གྱིས་གྲུབ་པ་ཡིན་ཏེ། སེང་གེ་རྩལ་རྫོགས་ལས། ཕུང་པོ་ལྔ་ལ་སངས་རྒྱས་ལྔ། །འབྱུང་བ་ལྔ་ལ་ཡུམ་ལྔར་རྟོགས། །ཉོན་མོངས་ལྔ་ལ་ཡེ་ཤེས་ལྔ། །ཡུལ་ལྔ་ལ་ནི་འོད་ལྔའི་སྐུ། །སྲིད་པ་གསུམ་ཉིད་སངས་རྒྱས་ཞིང་། །གཉིས་མེད་ལྟ་བའི་རང་ལུས་ཡིན། །ཞེས་སོ། །ནང་ལྟར་སྙིང་ཁར་ཞི་བའི་ལྷ་ཚོགས་དང་། དེ་ཡི་རང་གདངས་དུང་ཁང་དུ་ཁྲོ་བོའི་ལྷ་ཚོགས་ཏེ། མདོར་ན་རྡོ་རྗེའི་ལུས་ཐམས་ཅད་ཞི་ཁྲོ་རབ་འབྱམས་ཀྱི་རང་བཞིན་གནས་པ་ནི། ནོར་བུ་ཕྲ་བཀོད་ལས། ཨེ་མ་རིག་པའི་གནས་ལུགས་འདི། །རང་རང་ཙིཏྟའི་དཀྱིལ་ན་གནས། །ཡབ་དང་ཡུམ་གྱི་ཚུལ་དུ་གནས། །ཡབ་ཀྱི་ཆ་འཛིན་ཐབས་ཀྱི་སྐུ། །ཡུམ་གྱི་ཆ་འཛིན་ཤེས་རབ་སྐུ། །འོད་དང་འོད་ཟེར་ཚུལ་དུ་གནས། །དབྱིངས་དང་རིག་པ་རབ་བརྒྱན་ཏེ། །ལྷུན་རྫོགས་ཐིག་ལེ་ཆེན་པོར་གནས། །དེ་ནི་ཞི་བའི་བཞུགས་ཚུལ་ལོ། །རང་རང་མགོ་ལ་ཁྲོ་བོར་གནས། །ཡབ་དང་ཡུམ་དུ་མངོན་པར་སྣང་། །ཁྲོ་དང་ཁྲོ་མོའི་གཟུགས་འཆང་ཞིང་། །ཡེ་ཤེས་ལྔ་ལྔ་དག་དང་ལྡན། །སྐུ་ཡི་ཡེ་ཤེས་རེ་རེ་ལ། །དབུ་ཡི་ཡེ་ཤེས་ལྔ་ལྔའོ། །རང་བཞིན་འོད་ཀྱི་ཐིག་ལེ་ཡི། །རྩ་ནང་ཐིག་ལེའི་སྐུ་ལྟར་གནས། །ཆེ་བ་ནམ་མཁའི་ཁམས་དང་མཉམ། །ཆུང་ཚད་རྟ་རྔ་བཅུ་གཤག་ཙམ། །གསལ་ཚད་ཉི་ཟླའི་དཀྱིལ་འཁོར་འདྲ། །དེ་ཡང་གསལ་འཚེར་གཟི་བརྗིད་ལྡན། །འགྲོ་དང་འོང་དུ་གནས་པའོ། །ཞེས་སོ། །གསང་བར་དེ་དག་ཀུན་ཀྱང་རང་རིག་མཐའ་བྲལ་སྟོང་གསལ་དབྱེར་མེད་རང་བྱུང་གི་ཡེ་ཤེས་གཅིག་གི་རོལ་པར་སེམས་དང་ཡེ་ཤེས་རང་སྣང་བ་ཙམ་དུ་ཟད་དེ། དཔལ་མདའ་བསྣུན་ཞབས་ཀྱིས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་དངོས་གྲུབ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་དང་། སྒྱུ་འཕྲུལ་ལམ་རིམ་ལས། གཞལ་ཡས་ཁང་དང་དཀྱིལ་འཁོར་དང་། །འཕྲོ་ཚོགས་འདུ་འཕྲོ་མང་པོ་ཡང་། །སེམས་ཀྱི་ཆོ་འཕྲུལ་ཆེན་པོ་ཡིན། །དེ་བས་རྣམ་བདུན་རིག་པའི་ངང་། །ཞེས་སོ། །དེ་ལྟར་གདོད་མ་ནས་སངས་རྒྱས་སུ་གྲུབ་ན་ལམ་གྱི་ཆོས་རྣམས་ཀྱི་དགོས་པ་དོར་རོ་ཞེ་ན། དཔེར་ན་གསེར་དངུལ་གྱི་རྡོ་རྣམས་རིན་པོ་ཆེའི་ཁམས་སུ་གྲུབ་ཀྱང་བཞུ་བཏུལ་མ་བྱས་པར་གསེར་དངུལ་དུ་མི་འགྱུར་བ་བཞིན་དུ། འདིར་ཡང་ཡེ་ནས་ཡེ་ཤེས་སུ་གྲུབ་པ་ཡིན་ལ་ཡིན་བཞིན་དུ་མུན་ཁང་གི་ལྷ་ལ་སྒྲོན་མེ་བཏེག་པ་ལྟར་གསལ་བཏབ་པས་འཁོར་བའི་ཀུན་རྟོག་ཡེ་ཤེས་སུ་གྲོལ་བ་ཆབ་རོམ་ཆུར་ཞུ་བ་ལྟ་བུ་ལས། སྦྱང་གཞི་དང་སྦྱོང་བྱེད་ཐ་དད་དང་གནས་འགྱུར་བ་སྣམ་བུ་ཚོས་ཀྱིས་བསྒྱུར་བའམ། ལྕགས་གསེར་དུ་བསྒྱུར་བ་ལྟ་བུ་ནི་མི་འདོད་དེ། སྒྱུ་འཕྲུལ་གསང་སྙིང་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཀྱང་རྒྱལ་བས་མི་བརྙེས་སོ། །ཞེས་སོ། །