དཔལ་ལྡན་ལྷ་མོ་དུད་སོལ་མའི་ལས་བྱང་ཕྲིན་ལས་ཀུན་འགྲུབ།
དཔལ་ལྡན་ལྷ་མོ་དུད་སོལ་མའི་ལས་བྱང་ཕྲིན་ལས་ཀུན་འགྲུབ་བཞུགས་སོ། །
ན་མོ་ཧེ་བཛྲ་ཡེ། དགྱེས་མཛད་བླ་མའི་ཞབས་ལ་ཕྱག་འཚལ་ནས། །དཔལ་ལྡན་ལྷ་མོའི་གཏོར་ཆོག་བསྡུས་པ་བྲི། །མ་གཅིག་ལྷ་མོའི་བཀའ་གནོང་བྱིན་གྱིས་རློབས། །མཆོད་གཏོར་འདུ་བྱས་རང་ཉིད་ཡི་དམ་བསྒོམ།། །མདུན་དུ་དམིགས་རྟེན་ཡོད་དམ་མེད་ཀྱང་རུང་། །མི་དམིགས་ངང་ལས་སྐད་ཅིག་བསྐྱེད་པ་ནི། །མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་མཚོའི་དབུས། །ཐོད་པ་སྐམ་རློན་གཞལ་ཡས་སུ། །ཨོཾ་ལས་དུད་སོལ་ལྷ་མོ་ནག །ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤག་ཏི་རྩེ་གསུམ་འཛིན། །དུར་ཁྲོད་ཆས་རྒྱན་མི་རོ་གསོལ། །བ་
གླང་གླང་ལྤགས་རེ་ལྡེ་བགོས། །སྦྲུལ་རྒྱན་ཞབས་གཉིས་ལྕགས་སྒྲོག་གསོལ། །བོང་བུ་དམར་ག་ཆིབས་པའོ། །འདི་ཡན་ཤོ་ལོ་ཀ་གཉིས་ཞྭ་དམར་པས་མཛད། །སྙིང་འཕྲོག་མ་གསུམ་རིགས་བཞི་དང་། །མ་མོ་བརྒྱད་དང་ཕྲ་མེན་བརྒྱད། །སྒོ་མ་བཞི་སོགས་འཁོར་བཅས་གསལ། །གནས་གསུམ་འབྲུ་གསུམ་ཧཱུྃ་ཡིག་ལས། །འོད་འཕྲོས་འཁོར་བཅས་སྤྱན་དྲངས་གྱུར། བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའི་མཐིང་དཀྱིལ་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནས། །གྲུ་གསུམ་འབར་
བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་པའི་གཟུགས། །ཞལ་གཅིག་ཕྱག་བཞི་བོང་བུ་བཅིབས། །འཁོར་ཡང་ནག་པོ་འབུམ་སྡེའི་ཚོགས། །གནས་འདི་ཉིད་དུ་གཤེགས་སུ་གསོལ། །ད་ལྟ་སྙིགས་མ་ལྔ་ཡི་དུས། །དམ་ཅན་གཤེགས་པར་མི་འོས་ཀྱང་། །སྔོན་ཚེ་བྱང་ཆུབ་ཤིང་གི་དྲུང་། །ཐུབ་པ་ཆེན་པོའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །སངས་རྒྱས་བསྟན་པ་སྲུང་བ་དང་། །འགྲོ་ཀུན་བདེ་ལ་འགོད་པའི་ཕྱིར། །དཔལ་ལྡན་ལྷ་མོ་གཤེགས་སུ་གསོལ། །གསང་སྔགས་སྲུང་མ་དམ་ཚིག་ཅན། །འཁོར་བཅས་དགྱེས་ཤིང་བཞུགས་སུ་གསོལ། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨོཾ་དྲི་ཤ་ཡ་ཛཿ ཛཿཧཱུྃ་བཾ་ཧོཿ ས་མ་ཡ་ནྟཾ། ས་མ་ཡ་ཧོ༔ དཔལ་ལྡན་ལྷ་མོ་དུད་པའི་སོལ་བ་མ་ཁྱོད་ཀྱིས་བདག་ལ་སྐུ་མངོན་སུམ་དུ་སྟོན་ཅིག །སྐུ་མངོན་སུམ་དུ་མི་སྟོན་ན་སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པའི་སྤྱན་སྔར་ཇི་ལྟར་ཁས་བླངས་དམ་བཅས་པ་བཞིན་དུ། སངས་རྒྱས་ཀྱི་བསྟན་པ་བསྲུང་བ་དང་། བདག་ཅག་དཔོན་སློབ་མི་ནོར་འཁོར་
དང་བཅས་པ་རྣམས་ལ་ཡམས་ནད་རིམས་ནད་ཀྱི་གནོད་པ་ཞི་བ་དང་། ཡིད་ལ་འདོད་པ་ཐམས་ཅད་འགྲུབ་པར་གྱིས་ཤིག །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཨེ་ཨ་ར་ལི་ཧྲིང་ཧྲིང་ཛཿ མ་མོའི་ལྕེ་ལ་དམ་ཚིག་གི་བདུད་རྩི་བྱིན་པར་བསམས་ལ། ཨོཾ་ཧ་ན་ཧ་ན་མ་ཏི་པྲ་མ་ནི་ཧཱུྃ་ཕཊ༔ བྷྱོ་ཡང་ཐོག་དྲུག་བརྩེགས་འཕྲུལ་གྱི་ལྡིང་ཁང་ནས། །མ་གཅིག་དཔལ་ལྡན་ལྷ་མོ་དུད་སོལ་མ། །སྐུ་ནི་མི་འགྱུར་རི་རབ་ལྷུན་པོ་འདྲ། །ཚངས་པའི་འབྲུག་སྒྲ་ནམ་མཁའི་དབྱིངས་སུ་སྒྲོག །ཐུགས་ཀྱི་དཔལ་བེའུ་ཡེ་ཤེས་ལྔ་དང་ལྡན། །།མགུལ་གྱི་བུམ་པ་རྨ་བྱའི་མགྲིན་པ་འདྲ། །ལྗགས་ནི་པདྨ་ལེ་བརྒན་གྲི་སོ་འདྲ། །ཕན་འདོགས་མྱུར་དུ་བསྒྲུབ་པའི་མཁའ་འགྲོ་མ། །དཔལ་ལྡན་དབང་ཕྱུག་མ་ལ་ཕྱག་འཚལ་ལོ། །ཧཱུཾ། ཨུ་དུམ་ཨུཏྤལ་ལ་དང་པདྨ་དང་། །དབང་པོ་རྣམ་ལྔ་མཛེས་པའི་མེ་ཏོག་འདི། །དཔལ་ལྡན་ལྷ་མོའི་དབུ་ལ་འབུལ་ལགས་ན། །བདག་གི་བསམ་པའི་དོན་ཀུན་འགྲུབ་གྱུར་ཅིག །ཚིལ་ཆེན་སྤོས་ཀྱི་དུད་པ་མང་པོའི་དྲི། །གུ་གུལ་སྦྱར་བའི་སྤྲོས་དང་ཨ་ག་རུ། །བདག་གིས་གུས་པའི་ཡིད་ཀྱིས་འབུལ་ལགས་ན། །དཔལ་
ལྡན་ལྷ་མོའི་ཤངས་མཆོག་ཚིམ་གྱུར་ཅིག །ཉི་ཟླ་ལྟར་གསལ་རིན་ཆེན་འོད་འབར་དང་། །ཞུན་མར་སྟོང་གསུམ་ཀུན་ནས་གསལ་བྱེད་འདི། །དཔལ་ལྡན་ལྷ་མོའི་སྤྱན་ལ་འབུལ་ལགས་ན། །བདག་གི་སྒྲིབ་གཉིས་མུན་པ་སེལ་གྱུར་ཅིག །ལེགས་པར་སྦྱར་བའི་དྲི་དང་བདུད་རྩི་ལྔ། །དུ་རུ་ཀ་དང་མཆོད་པར་འོས་པ་བཞིན། །དཔལ་ལྡན་ལྷ་མོའི་ཐུགས་ལ་མཆོད་པ་འབུལ། །བདག་གི་བསམ་པའི་དོན་ཀུན་འགྲུབ་གྱུར་ཅིག །དགྲ་བགེགས་བསྒྲལ་བའི་ཤ་དང་རྟ་ཡི་ཤ །བྱ་དང་ཁྱི་ཡི་ཤ་དང་བ་ལང་ཤ །འབྲུ་སྣ་ཚོགས་པའི་འབྲས་ཆེན་བཤོས་འདི་དག །དཔལ་ལྡན་ལྷ་མོའི་ཞལ་དུ་འབུལ་ལགས་ན། །བདག་གི་འདོད་པའི་དོན་ཀུན་འགྲུབ་གྱུར་ཅིག །རྔ་ཆེན་འབྲུག་གི་སྒྲ་ལྟར་ཆེར་སྒྲོག་ཅིང་། །མི་རྐང་གླིང་བུ་ཀུན་ནས་སྙན་པ་ཡི། །ཅང་ཏེའུ་ཆོས་ཀུན་སེམས་སུ་སྟོན་པའི་སྒྲ། །དཔལ་ལྡན་ལྷ་མོའི་སྙན་ལ་མཆོད་པ་འབུལ། །བདག་གི་བསམ་པའི་དོན་ཀུན་འགྲུབ་གྱུར་ཅིག་་ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ས་པཱ་རི་ཝཱ་ར་བཛྲ་པུབྦེ་དྷ་པེ་སོགས། ཤབྷ་པུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། གཏོར་མ་འབུལ་བ་ནི། ཨོཾ་སཾ་ཤོ་དྷ་ནི་
ཧཱུྃ་ཕཊ༔ ཨོཾ་སྭ་བྷ་ཝས་སྦྱང་། སྟོང་པའི་ངང་ལས་གཏོར་མའི་ནང་དུ་ཧ་སེར་པོ་གསེར་གྱི་མདོག་ལྟ་བུ་དེ་ཞུ་བ་ལས་གཏོར་མའི་ཁ་དོག་ངན་པ་ཐམས་ཅད་བཅོམ་ནས་ཁ་དོག་ཕུན་སུམ་ཚོགས་པོ། དེའི་སྟེང་དུ་ཧོ་དཀར་པོ་དུང་གི་མདོག་ལྟ་བུ་དེ་ཞུ་བ་ལས་དྲི་ངན་པ་ཐམས་ཅད་བཅོམ་ནས་དྲི་ཕུན་སུམ་ཚོགས་པ། དེའི་སྟེང་དུ་ཧཱུྃསྔོན་པོ་བེ་ཌཱུརྱའི་མདོག་ལྟ་བུ་དེ་ཞུ་བ་ལས་རོ་ངན་པ་ཐམས་ཅད་བཅོམ་ནས་རོ་ཕུན་སུམ་ཚོགས་པར་གྱུར། །ཨོཾ་ཨཱཿཧཱུྃ་ཧ་ཧོ༔ ལན་གསུམ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ༀ་མ་ཧཱ་མཾ་ས་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། མ་ཧཱ་བ་སུ་ཏ་ལ་ཁཱ་ཧི། ༀ་ཨི་དཾ་བ་ལིང་གྷི་ཧྥ་གྷི་ཧྥ་པ་ཡ་ཧཱུྃ་ཕཊ། དཔལ་ལྡན་ལྷ་མོ་དུད་པའི་སོལ་བ་མ། འཁོར་ཤན་པ་མ་གསུམ། རིགས་བཞིའི་མཁའ་འགྲོ། དུར་ཁྲོད་ཀྱི་མ་མོ། ཕྲ་མེན་མ་བརྒྱད། སྒོ་མ་བཞི། འཁོར་ནག་མོ་འབུམ་སྡེ་ལ་སོགས་པ་སྲིད་པའི་མ་མོ་བྱེ་བ་འབུམ་སྡེ་དང་བཅས་པ་ཐམས་ཅད་ལ་དམ་རྫས་བདུད་རྩིའི་གཏོར་མ་རྒྱ་ཆེན་པོ་འདི་འབུལ་ལོ། །ཡོངས་སུ་བཞེས་ལ། སྤྱིར་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་ཆེ་བ་ཕྱུངས། དཔལ་
ལྡན་བླ་མའི་ཕྲིན་ལས་སྒྲུབས། །སེམས་ཅན་གྱི་བདེ་སྐྱིད་སྤེལ། ཁྱད་པར་དུ་བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་བདུད་དང་བར་ཆད་ཐམས་ཅད་ཞི་བ་དང་ཚེ་དང་བསོད་ནམས་རྒྱས་པ་དང་། རླུང་མཁྲིས་བད་ཀན་ལས་གྱུར་པའི་ནད་ཀྱི་རིགས་ཐམས་ཅད་ཞི་བ་དང་། ཆག་ཆེ་ཉམ་ང་བཀྲ་མི་ཤིས་པ་ཐམས་ཅད་བཟློག་པའི་ཕྲིན་ལས་མཛོད་ཅིག །བྷྱོ༔ རྒྱ་མཚོའི་ཀློང་ནས་མེ་འབར་ཁྱོད། །མཚོ་རྣམས་སྐེམ་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་ལ་བཞུགས། །རྫོང་དང་སྐག་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེའི་ལྕམ་མོ་བདུད་ཀྱི་ཡུམ། ༈ །འདོད་པ་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་སྲུང་བ་ཡི། །དཔལ་ལྡན་ལྷ་མོ་ཁྱོད་ལ་བསྟོད། །ཅེས་སམ། རྒྱས་པར་བསྟོད་རིང་མས་བསྟོད། བསྙེན་པ་བྱ་བ་ནི། ལྷ་མོའི་ཐུགས་ཀའི་ཧཱུཾ་ཡིག་གི་ཟླ་ཚེས་ཟླ་བའི་དཀྱིལ་འཁོར་དུ་གྱུར་པའི་འོད་ཟེར་ཤངས་བུག་ནས་འཕྲོས་པས་ཕྱོགས་བཅུའི་སངས་རྒྱས་བྱང་ཆུབ་སེམས་
དཔའ་དཔའ་བོ་མཁའ་འགྲོ་ཐམས་ཅད་ཀྱི་བདུད་རྩིའི་བཅུད་དང་སྨན་ཐམས་ཅད་ཀྱི་ནུས་པ་བསྡུས་ནས། ལྷ་མོའི་སྤྱི་བོའི་གཙུག་ཏུ་ཁཾ་ལས་བྱུང་བའི་བུམ་པ་དཀར་པོའི་ནང་དུ་ཞུགས་བུམ་པའི་ཁ་ནས་བདུད་རྩི་དཀར་པོ་འོ་མའི་རྒྱུན་ལྟ་བུ་ལྷུད་ལྷུད་བབས་པས། ལྷ་མོའི་སྤྱི་བོ་དང་ཞལ་ནས་ཞུགས་པས། སྐུ་ལུས་ཐམས་ཅད་གང་ལྷ་མོ་བཀྲག་མདངས་ཕུན་སུམ་ཚོགས་པར་གྱུར། བདུད་རྩིའི་བཅུད་ཐུགས་ཀའི་ཟླ་བའི་དཀྱིལ་འཁོར་ལ་འདུས་པས། ལྷ་མོའི་སྐུ་མདོག་དུང་ངམ་ཀུན་དྷའི་མདོག་ལྟར་དཀར་པོར་གྱུར། ལྷ་མོའི་སྐུ་ལུས་ཐམས་ཅད་ངང་ལྟེམ་མེ་གང་བ་མ་ཤོང་ལྷུད་པའི་ཚུལ་དུ་ཞལ་ནས་བདུད་རྩིས་ཆུ་རྒྱུན་འོ་མ་ལྟ་བུར་བབས། རང་དང་བསྲུང་བྱ་ནད་པའི་སྤྱི་བོའི་ཚངས་བུག་དང་ཁ་ནས་ཞུགས་ལུས་ཐམས་ཅད་ངང་ལྟེམ་གྱིས་གང་། ནད་རླུང་མཁྲིས་བད་ཀན་རིམས་ནད་ཡམས་ནད་ཐམས་ཅད་དང་དམ་ཚིག་ཉམས་ཆག་ཐམས་ཅད་དང་མ་མོ་འཁྲུག་པའི་ཁ་རླངས་། གདུག་རྩུབ་ཐམས་ཅད་བ་སྤུའི་ཁུང་བུ་ནས་རླངས་པ་སྔོ་དམར་གྱི་ཚུལ་དུ་བུད་ནས། ནམ་མཁའ་ལ་འཇའ་ཡལ་བ་ལྟར་རིམ། མེ་ལོང་ལ་ཧས་བཏབ་པ་ལྟར་བསམས་ལ་སྔགས་བཟླས། །
ༀ་ཧཱུྃ་ཤྲཱི་ཡ་དེ་ཝ་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ནད་སརྦ་ཤཱིནཾ་ཀུ་རུ་སྭཱ་ཧཱ། ཐུན་མཚམས་ཐུན་གཏོར་འབུལ་འདོད་ན། གཏོར་མར་དགྲ་བགེགས་བཀུག་གཞུག་སོགས་ལེགས་པར་བྱས་ལ། བྷྱོཿ དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་འཇིགས་བྱེད་ཡི་དྭགས་ཁ། །དམ་ཚིག་སྲུང་ལ་ཁྲག་དགའ་མོ། །ཀི་ལི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་སུ། །ཚོགས་དང་ཕོ་ཉར་བཅས་པ་རུ། །གཙིགས་བྱེད་ལྷ་མོ་དུད་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་ནས་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱེད་ཀྱིས་འགྲུབ་པར་གྱིས། །བདག་གིས་ལས་ནི་ཅི་བྱེད་ཀྱང་། །དེ་ལ་ཀུན་གྱིས་གྲོགས་གྱིས་ཤིག །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ གྱི་སྣ་གྱི་རྩྭ་སརྦ་དུཏྟཾ་བྷཀྵ་བྷཀྵ། ཕྲོ་ཕུ་ཕྲོ་ཕོ་སྭཱ་ཧཱ། སེ་གོལ་གསུམ་གདབ། ཅེས་ཐུན་གཏོར་གཏོར་ཆེན་དྲུང་དུའམ་ཕྱི་རོལ་དུ་ཕུལ། རྟེན་གཏོར་དང་བྲིས་སྐུ་ཡོད་ན་དེ་ལ་ཐིམ་པར་བསམ། མེད་ན་ལྷ་མོའི་ཞལ་ནས་རྣལ་འབྱོར་པ་ཐམས་ཅད་ཀྱི་དོན་ཐམས་ཅད་བདེ་བར་བསྒྲུབ་བོ། །ཞེས་གསུངས་ནས་བདག་གི་གནས་སུ་གཤེགས་པར་བསམ། རྒྱུ་དུས་ནི་ཚེས་གཅིག་གི་ཐོ་རངས་དང་། རྒྱུན་དུ་ཉིན་གུང་མཚན་གུང་རྒྱུའོ། །ཉི་ཤུ་བཞི་དང་ཉི་ཤུ་དྲུག་
ལ་མཆོད་པ་བྱ། ཞེས་གསེར་འོད་ནས་གསུངས་སོ། །འདིར་བྲིས་ཉེས་པ་གང་མཆིས་ལྷ་མོ་འཁོར་དང་བཅས་ལ་བཤགས་ཤིང་། དགེ་བས་སངས་རྒྱས་ཀྱི་བསྟན་པ་དར་ཞིང་རྒྱས་པར་གྱུར་ཅིག །ཅེས་ཨོ་རྒྱན་རིག་འཛིན་གྱིས་བསྐུལ་བ་ལྟར། །ཨ་རཱ་གས་ཁྲུམས་ཟླ་བའི་ཡར་ཚེས་གསུམ་ལ་རེག་ཟིན་དུ་བྱས་པའོ།། སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།