རྒྱུན་བསང་ཉུང་འདུས་དགོས་འདོད་ཀུན་འབྱུང་།
རྒྱུན་བསང་ཉུང་འདུས་དགོས་འདོད་ཀུན་འབྱུང་བཞུགས་སོ།
ན་མོ་པྲ་ཝ་ཀཱ་ར་ཡེ། བསང་གི་ཆོ་ག་ཉུང་བསྡུས་འདིར་དགོད་བྱ། །རྒྱས་པར་འཛམ་གླིང་སྤྱི་བསང་བྱེད་པའི་དུས། །ཁ་འཛིན་གོང་དུ་འདི་ཉིད་འདོན་པར་བྱ།བསྡུས་པ་འདི་ཉིད་རྐྱང་པས་ཐམས་ཅད་ཚང་། །རྒྱུན་བསང་འདོད་ན་ཕྱེ་མར་འབྲུ་སྣ་སོགས། །ཇ་ཁུག་ནང་དུ་བསྡུས་ལ་ཚག་བྱས་ནས། །རྒྱུན་དུའམ་ནི་ཡང་ན་ནམ་འདོད་དུ། །ཤུག་ཕྱེའི་དུད་པ་བཏང་བྱས་ལ། །འོ་ཕུད་ཇ་ཕུད་གང་འཛོམ་བྲན་ལ་འདོན། །ཐབ་བསང་བྱེད་ན་ཐབ་ཀའི་ནང་དུའམ། །ཐབ་ཀའི་གོང་དུ་དུད་པ་བྱས་ལ་འདོན། །གྱེར་སྒོམ་སྦྲག་སྟེ་དམིགས་པ་གསལ་བར་བྱ། །བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བ་མ་ལུས་སངས་རྒྱས་ཐོབ་པའི་ཕྱིར། །བདག་གིས་བསང་དང་མཆོད་པ་
འབུལ་བར་བྱ། །ཆོས་ཀུན་ཡེ་ནས་རྣམ་དག་ཆོས་ཀྱི་སྐུ། །སྟོང་པའི་རང་མདངས་སྐད་ཅིག་དྲན་རྫོགས་སུ། །རང་ཉིད་རྡོ་རྗེ་གྲོ་ལོད་སྐུ་མདོག་སྨུག །ཞལ་གཅིག་སྤྱན་གསུམ་མཆེ་བས་མ་མཆུ་མནན། །རྡོ་རྗེ་ཕྱར་ཞིང་ཕུར་པ་བགེགས་ལ་གཟིར། །ཕོད་ཁ་ཆོས་གོས་མི་མགོའི་ཕྲེང་བས་བརྒྱན། །ཞབས་གཉིས་བརྐྱང་བསྐུམ་སྟག་མོའི་སྟེང་ན་འགྱིང་། །ཡེ་ནས་དམ་ཡེ་དབྱེར་མེད་གཟི་བརྗིད་འབར། །ཐུགས་ཀར་ཉི་སྟེང་ཧཱུྃ་དམར་མེ་དཔུང་འབར། །ཧཱུྃ་ལས་འོད་ཟེར་ཕྱོགས་བཅུར་འཕྲོས་པ་ཡིས། །བསང་མགྲོན་ཐམས་ཅད་ནམ་མཁར་སྤྱན་དྲངས་
གྱུར། །ཧྲཱིཿ གདོད་ནས་རྣམ་དག་སྐུ་གསུམ་ཞིང་ཁམས་ནས། །འཇིག་རྟེན་འདས་དང་མ་འདས་བསང་མགྲོན་རྣམས། །དད་པ་དམ་ཚིག་དབང་གིས་སྤྱན་འདྲེན་ན།ཐུགས་རྗེའི་ཐུགས་དམ་དབང་གིས་གནས་འདིར་གཤེགས། །ནམ་མཁའ་བར་སྣང་ས་གཞི་སོ་སོ་ལ། །ཡིད་སྤྲུལ་འོས་ཤིང་འཚམ་པའི་གདན་ལ་བཞུགས། །བདག་དང་ཡོན་བདག་གུས་པས་ཕྱག་འཚལ་ལོ། །རང་གི་ཐུགས་ལས་རཾ་ཡཾ་ཁཾ་འཕྲོས་པས། །བསང་རྫས་མཆོད་རྫས་མི་
གཙང 
་དྲི་མ་སྦྱངས། །ཨོཾ་ཨཱཿཧཱུྃ་གིས་ཟག་མེད་བདུད་རྩིར་གྱུར། །ཀུན་བཟང་མཆོད་སྤྲིན་ནམ་མཁའ་གང་བས་མཆོད། །སོ་སོའི་ཡོན་ཏན་རྣམས་ལ་གུས་པས་བསྟོད། ཀྱཻ། བསང་གི་རྒྱུད་བྱུང་གང་ནས་བྱུང་། །སྔོན་ཚེ་འདས་དུས་བསྐལ་པ་ལ། །བཅོམ་ལྡན་ཤཱཀྱ་ཐུབ་པ་ཉིད། །རྒྱལ་པོ་ཆོས་ཀྱི་དབང་ཕྱུག་གྱུར། །དེ་ཡིས་སངས་རྒྱས་མཆོད་པའི་ཕྱིར། །དྲི་བཟང་སྤོས་ཀྱི་བསང་མཆོད་བརྩམས། །སྤོས་ཀྱི་རིལ་བུ་གཅིག་བསྲེགས་ནས། །སིལ་སྙན་དཀྲོལ་ཞིང་བསང་མཆོད་མཛད། །སྤོས་ཀྱི་ན་བུན་ཆེན་པོ་ཡིས། །ཞག་བདུན་བར་དུ་འཛམ་གླིང་ཁྱབ། །རྒྱལ་པོ་བསོད་ནམས་ཚོགས་
ཆེན་རྫོགས། །བྱང་ཆུབ་མཆོག་གི་ལུང་བསྟན་ཐོབ། །དེ་ནས་བསང་བྱུང་གང་ནས་བྱུང་། །ཤཱཀ་ཐུབ་བསྟན་པའི་ཐོག་མ་ལ། །དཔལ་མགོན་འཕགས་པ་ཀླུ་སྒྲུབ་ཀྱིས། །འཛམ་གླིང་སྤྱི་བསང་བསྡུས་པ་བརྩམས། །རྡོ་རྗེ་གདན་གྱི་གནས་མཆོག་ཏུ། །རྡོ་ལས་གྲུབ་པའི་གཙུག་ལག་བཞེངས། །ལྷ་ཁང་བརྒྱ་དང་རྩ་བརྒྱད་འགྲུབ།དེ་ནས་བསང་བྱུང་གང་ནས་བྱུང་། །ཤཱཀ་ཐུབ་བསྟན་པའི་དབུས་མ་ལ། །སློབ་དཔོན་པདྨ་འབྱུང་གནས་ཀྱིས། །ཞི་བརྔན་བསང་གསུམ་ཆོ་ག་བརྩམས། །བོད་ཀྱི་ལྷ་འདྲེ་དམ་ལ་ཐོགས། །དཔལ་གྱི་བསམ་ཡས་ལ་སོགས་པའི།།གཙུག་ལག་ཁང་ཆེན་བརྒྱ་རྩ་འགྲུབ། །ཕྲན་བུ་སྟོང་དང་རྩ་གཉིས་འགྲུབ། །དེ་ནས་བསང་བྱུང་གང་ནས་བྱུང་། སེམས་དཔའ་རང་བྱུང་རྡོ་རྗེ་ཡིས། །འཛམ་གླིང་སྤྱི་བསང་རྒྱས་པ་བརྩམས། །དགེ་བསྙེན་རྡོ་རྗེ་རྒྱལ་པོ་སོགས། །བོད་ཀྱི་ལྷ་འདྲེ་ཆེ་དགུ་འདུས། །ཡ་མཚན་རྟགས་དང་ཆོ་འཕྲུལ་བསྟན། །སོག་གི་ཆུ་ལ་ལྕགས་ཟམ་ཚུགས། །སྔོན་དུས་སྲིད་པ་དེ་བཞིན་དུ། །ད་ལྟ་རྣལ་འབྱོར་བདག་ཅག་གིས། །དྲི་བཟང་ཤིང་རྩི་སྣ་ཚོགས་དང་། །ཕྱེ་མར་འབྲུ་
སྣ་ཟས་ཕུད་བསྲེགས། །དྷཾ་ལས་ལྷ་མོ་བདུག་སྤོས་མ། །སྐུ་མདོག་སྔོན་མོ་ལང་ཚོ་རྒྱས། །ཕྱག་གཡས་ཁྲུས་བུམ་ཉམས་གྲིབ་བཀྲུ། །ཕྱག་གཡོན་སྨན་གྱི་གཞོང་པ་ནས།སྨན་གྱི་དུད་སྤྲིན་སྟོང་གསུམ་ཁྱབ། །དུད་པའི་ཆ་ཤས་རེ་རེ་ལས། །བཀྲ་ཤིས་རྫ་ས་རྟགས་རིན་ཆེན་བདུན། །འདོད་ཡོན་སྣ་ཚོགས་ཆར་དུ་འབེབས། །འདི་འདྲའི་ཡ་མཚན་བསང་མཆོད་འདི། །བཛྲ་དྷུ་པེས་བྱིན་གྱིས་རློབས། །ལྷ་དང་སྲུང་མ་ཐམས་ཅད་བསང་། ཀྱཻ། འཁོར་འདས་ཀུན་ལ་ཁྱབ་པའི་ལྷ། །ཆོས་སྐུ་ཡུམ་ཆེན་ཤེར་ཕྱིན་བསང་། །སངས་རྒྱས་ཀུན་གྱི་སྤྱི་མེས་ལྷ། །ཆོས་སྐུ་ཀུན་བཟང་ཡབ་ཡུམ་བསང་། །སངས་རྒྱས་ཐམས་ཅད་འདུས་པའི་སྐུ། །དྲུག་པ་རྡོ་རྗེ་འཆང་ཆེན་བསང་། །ངེས་པ་ལྔ་ལྡན་ལོངས་སྤྱོད་རྫོགས། །ལོངས་སྐུ་རྒྱལ་བ་རིགས་ལྔ་བསང་། །འཛམ་གླིང་བྱེ་བ་ཕྲག་བརྒྱ་ན། །སྤྲུལ་སྐུ་སངས་རྒྱས་སྟོང་རྩ་བསང་། །གྲུ་འཛིན་བྱེ་བ་ཕྲག་བརྒྱ་ན།སྤྱན་རེས་གཟིགས་དབང་དེ་ཉིད་བསང་། །རི་བོ་རྩེ་ལྔ་བྱེ་བ་བརྒྱར། །འཇམ་དབྱངས་བྱེ་བ་ཕྲག་བརྒྱ་བསང་། །ལྕང་ལོ་ཅན་གནས་བྱེ་བ་བརྒྱར། །ཕྱག་རྡོར་བྱེ་བ་ཕྲག་བརྒྱ་
བསང་། །ཟངས་མདོག་དཔལ་རི་བྱེ་བ་བརྒྱར། །པད་འབྱུང་བྱེ་བ་ཕྲག་བརྒྱ་བསང་། །ཨོ་རྒྱན་གནས་མཆོག་བྱེ་བ་བརྒྱར། །ཕག་མོ་བྱེ་བ་ཕྲག་བརྒྱ་བསང་། །སྨན་ལྷ་ཚེ་དཔག་མི་འཁྲུགས་པ། །སངས་རྒྱས་སྤྲུལ་སྐུ་ཐམས་ཅད་བསང་། །སྒྲོལ་མ་འོད་ཟེར་ཅན་མ་སོགས། །འཇིགས་སྐྱོབ་འཕགས་མ་ཐམས་ཅད་བསང་།གསར་རྙིང་མདོ་སྔགས་ལ་སོགས་པའི། །བརྒྱུད་པའི་བླ་མ་ཐམས་ཅད་བསང་། །བདེ་དགྱེས་གསང་གསུམ་དུས་འཁོར་སོགས། །རྒྱུད་སྡེ་བཞི་ཡི་ལྷ་ཚོགས་བསང་། །བཀའ་དགོངས་ཕུར་གསུམ་ཞི་ཁྲོ་སོགས། །ཐེག་པ་དགུ་ཡི་ལྷ་ཚོགས་བསང་། །ས་སྙིང་བྱམས་པ་ལ་སོགས་པའི། །ཉེ་གནས་བྱང་སེམས་ཐམས་ཅད་བསང་། །གནས་བརྟན་བཅུ་དྲུག་དགྲ་བཅོམ་སོགས། །འཕགས་པ་ཉན་རང་ཐམས་ཅད་བསང་། །བེར་གུར་ཕྱག་བཞི་ཕྱག་དྲུག་སོགས། །ཕོ་རྒྱུད་མགོན་པོ་ཐམས་ཅད་བསང་། །དུད་སོལ་རེ་ཏི་སྔགས་སྲུང་སོགས། །མོ་རྒྱུད་ལྷ་མོ་ཐམས་ཅད་བསང་། །མ་ནིང་སྟག་ཞོན་སྲིན་མགོན་སོགས། །དཔལ་མགོན་དྲག་པོ་ཐམས་ཅད་བསང་། །ཛཾ་ལྷ་རིགས་ལྔ་ནོར་རྒྱུན་སོགས། །
ནོར་ལྷ་གཏེར་བདག་ཐམས་ཅད་བསང་། །རྣམ་སྲས་ཚོགས་བདག་རེ་མན། །གནོད་སྦྱིན་དབང་པོ་ཐམས་ཅད་བསང་། །དཔལ་མགོན་བདུན་ཅུ་རྩ་ལྔ་སོགས། །འཇིག་རྟེན་ཁམས་ཀྱི་སྲུང་མ་བསང་། །གནས་མཆོག་ཉི་ཤུ་རྩ་བཞི་ཡི། །མཁའ་འགྲོ་ཞིང་སྐྱོང་ཐམས་ཅད་བསང་། །བདུད་མགོན་སེང་གདོང་ཡབ་ཡུམ་སོགས། །གནས་ཆེན་ཀུན་གྱི་སྲུང་མ་བསང་། །དུར་ཁྲོད་བདག་པོ་ཡབ་ཡུམ་དང་། །ངེ་ནེ་མ་སོགས་དཀོར་སྲུང་བསང་། །དམ་ཅན་མགར་བ་དམར་ནག་སོགས། །དྲེགས་པའི་བཀའ་སྲུང་ཐམས་ཅད་བསང་། །དྲེགས་པའི་སྡེ་དཔོན་སུམ་ཅུ་དང་། །སྔགས་བདག་དྲེགས་ཆེན་བཅོ་བརྒྱད་བསང་། །མྱུར་མགྱོགས་དྲེགས་པ་ཉི་ཤུ་དང་། །གཏེར་སྲུང་དམ་ལྡན་ཐམས་ཅད་བསང་། །ཏི་སེ་ལྷ་བཙན་དཀར་པོ་སོགས། །མངའ་རིས་སྐོར་གསུམ་གཞི་བདག་བསང་། །གཉན་ཆེན་ཐང་ལྷ་ཡར་བཞུད་སོགས། །དབུས་ གཙང ་རུ་བཞིའི་གཞི་བདག་བསང་། །ཤར་གྱི་རྨ་གཉན་སྤོམ་ར་སོགས། །མདོ་ཁམས་སྒང་དྲུག་གཞི་བདག་བསང་། །ཡར་ལྷ་ཤམ་པོ་ལ་སོགས་པའི། །རྗེ་ཡི་མགུར་ལྷ་བཅུ་གསུམ་བསང་། །ཀོང་
བཙུན་དེ་མོ་ལ་སོགས་པའི། །བོད་ཁམས་བརྟན་མ་བཅུ་གཉིས་བསང་། །བཀྲ་ཤིས་ཚེ་རིང་མཆེད་ལྔ་སོགས། །སྒྲུབ་བརྒྱུད་སྲུང་མ་ཐམས་ཅད་བསང་། །རྡོ་རྗེ་གཡུ་སྒྲོན་མཆེད་ལྔ་སོགས། །བཀའ་སྲུང་ལྷ་སྨན་ཐམས་ཅད་བསང་། །དགེ་བསྙེན་མཁའ་རི་ལ་སོགས་པའི། །དགེ་བསྙེན་ཉི་ཤུ་རྩ་གཅིག་བསང་། །ཇོ་བོ་སྤྲུག་བཙན་ལ་སོགས་པའི། །གདོང་རིགས་ཕོ་ལྷ་ཐམས་ཅད་བསང་། །དམག་དཔོན་དབྱི་རྒྱལ་ལ་སོགས་པའི།།ཕྱོགས་བཞི་གཉན་ཆེན་སྡེ་བཞི་བསང་། །ལོ་ཟླ་ཞག་དུས་སྤར་སྨེ་སོགས། །འབྱུང་བའི་ལྷ་ཚོགས་ཐམས་ཅད་བསང་། །ལྟོ་འཕྱེ་ལྷ་མོ་བརྟན་མ་སོགས། །ས་བདག་གཉན་པོ་ཐམས་ཅད་བསང་། །རོལ་པ་སྐྱ་བདུན་ལ་སོགས་པའི། །བཙན་རྒོད་དྲག་པོ་ཐམས་ཅད་བསང་། །སྔགས་བདག་སྨྱོ་ཁ་མཁར་ནག་སོགས། །ཀླུ་བདུད་ཀླུ་བཙན་ཐམས་ཅད་བསང་། །མདོ་ཁམས་སྒང་ལ་དབང་མཛད་པའི། །ཟངས་རི་འབར་བ་རྩེ་དགུ་བསང་། །ངོམ་ཡུལ་ཀུན་ལ་མངའ་མཛད་པའི། །སྐྱེས་བུ་་་་འདི་ལྡེབ་གཅིག་ཆད་འདུག །ནོར་ལྷ་རྣམས་ཀྱིས་ནོར་གཡང་ཕོབ། །གཞི་བདག་རྣམས་ཀྱིས་སྡོང་
གྲོགས་མཛོད། །གྲིབ་དང་མི་ གཙང ་སངས་གྱུར་ཅིག །ཕོག་ཐུག་འགྲམ་འཁྲུགས་བྱང་གྱུར་ཅིག །ནད་གདོན་བར་ཆད་ཞི་བར་མཛོད། །འཐབ་རྩོད་འཁྲུག་ལོང་ཞི་བར། མཛོད། །ཡམས་ནད་རིམས་ནད་ཞི་བར་མཛོད། །ཀག་ངན་མུ་གེ་ཞི་བར་མཛོད། །གོད་ཁ་གྱོད་གྱུར་ཞི་བར་མཛོད། །ཚེ་དང་བསོད་ནམས་རྒྱས་པར་མཛོད། །ལོ་ལེགས་ནོར་ཕྱུགས་འཕེལ་བར་མཛོད། །རྐང་བཞི་ཕྱུགས་ཀྱི་དངོས་གྲུབ་སྩོལ། །བང་མཛོད་འབྲུ་ཡི་དངོས་གྲུབ་སྩོལ། །རྨ་གཡང་ཟས་ཀྱི་དངོས་གྲུབ་སྩོལ། །ལྷབ་ལྷུབ་གོས་ཀྱི་དངོས་གྲུབ་སྩོལ།། ༈་རྩ་བརྒྱུད་བླ་མ་ཐམས་ཅད་ཀྱིས། །བྱིན་རླབས་འཇུག་པའི་ཁ་འཛིན་མཛོད། །ཡི་དམ་ལྷ་ཚོགས་ཐམས་ཅད་ཀྱིས། །དངོས་གྲུབ་ཐོབ་པའི་ཁ་འཛིན་མཛོད། །སངས་རྒྱས་བྱང་སེམས་ཐམས་ཅད་ཀྱིས། །བྱང་ཆུབ་ཐོབ་པའི་ཁ་འཛིན་མཛོད། །མཁའ་འགྲོ་ཆོས་སྐྱོང་ཐམས་ཅད་ཀྱིས། །བར་ཆད་ཞི་བའི་ཁ་འཛིན་མཛོད། །ནོར་ལྷ་གཏེར་བདག་ཐམས་ཅད་ཀྱིས། །ཚེ་བསོད་རྒྱས་པའི་ཁ་འཛིན་མཛོད། །ཡུལ་ལྷ་གཞི་བདག་ཐམས་ཅད་ཀྱིས། །ཅི་བསམ་འགྲུབ་པའི་ཁ་འཛིན་
མཛོད། །ཀྱེ།་འཆི་མེད་ཚེ་ཡི་དངོས་གྲུབ་དེ། །ཁུ་ཡེ་ཕྱུ་དང་གཡང་དུ་ལེན། །འཛད་མེད་ནོར་གྱི་དངོས་གྲུབ་དེ། །ཁུ་ཡེ་ཕྱུ་དང་གཡང་དུ་ལེན། །བང་མཛོད་འབྲུ་ཡི་འཕེལ་གཡང་དེ། །ཁུ་ཡེ་ཕྱུ་དང་གཡང་དུ་ལེན། །མི་འཕེན་རྟ་ཧྲག་དར་གཡང་དེ། །ཁུ་ཡེ་ཕྱུ་དང་གཡང་དུ་ལེན། །རྨ་གཡང་ཟས་ཀྱི་དངོས་གྲུབ་དེ།ཁུ་ཡེ་ཕྱྭ་དང་གཡང་དུ་ལེན། །རྒྱུད་འཛིན་རིགས་ཀྱི་དངོས་གྲུབ་དེ། །ཁུ་ཡེ་ཕྱུ་དང་གཡང་དུ་ལེན། །ཕྱག་རྒྱ་ཆེན་པོའི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །ཕྲུ་ཧཱུྃ་གཡང་ཧཱུྃ་བདེ་ལེགས་ཧཱུྃ། །བསང་མགྲོན་ཀུན་གྱི་སྤྱན་སྔ་རུ། །དངོས་དང་ཡིད་ཀྱིས་མཆོད་པ་འབུལ། །ཉེས་པའི་ཚོགས་རྣམས་ཅི་མཆིས་བཤགས། །སྤྱན་དྲངས་པ་ཡི་བསང་མགྲོན་རྣམས། །སོ་སོ་རང་རང་གནས་སུ་གཤེགས། །བཀྲ་ཤིས་ཀུན་གྱི་བཀྲ་ཤིས་པ། །ཕུན་སུམ་ཚོགས་པའི་བཀྲ་ཤིས་ཤོག །བསང་མཆོད་ཕུལ་བའི་དགེ་བ་འདིས། །བདག་ཅག་ཡོན་མཆོད་འཁོར་བཅས་རྣམས། །ཚེ་འདིར་ཚེ་རིང་ནད་མེད་ཅིང་། །བསོད་ནམས་མངའ་ཐང་འཕེལ་ཞིང་རྒྱསོ། །ནམ་ཞིག་འདི་ནས་ཚེ་འཕོས་ཚེ། །
བདེ་བ་ཅན་གྱི་ཞིང་ཁམས་སུ། །བརྫུས་སྐྱེས་སྤྲུལ་སྐུ་ཐོབ་པར་ཤོག །ཅེས་བརྗོད་སྟོང་པའི་ངང་ལ་བཞག །ཅེས་པ་འདི་ནི་ཐབ་བསང་དང་། །རྒྱུན་བསང་བྱེད་ན་ནངས་སྔ་དང་། །གསུར་ཆེན་བྱེད་ན་ནུབ་ཀྱང་རུང་། །འདི་ཉིད་ཁོ་ན་བཏོན་པས་འཐུས། །བསང་ཡིག་རྒྱས་པར་སྦྱར་འདོད་ན། །འཛམ་གླིང་སྤྱི་བསང་འཇུག་ཉིད་དུ། །འདི་ཡི་སྦྲུལ་ཤད་གཉིས་ཡོད་པས། །སྟོད་སྨད་གཉིས་དེ་རེ་རེའི་ཆོག །བར་དེ་ཚར་གྲངས་བདུན་ནམ་བཅུ་། །འདོན་ཞིང་དེ་ནས་མཇུག་དེ་འདོན། །འདི་ཉིད་ཆག་མེད་རབ་ཡིན་ཏེ། །ཡང་ན་ཡར་ངོ་ཆག་མེད་བྱ། །ཡང་ན་ནམ་འདོན་བྱེད་པ་སྟེ། །དང་པོ་སྐར་མ་བཟང་པོར་བྱ། །དེ་ནས་ནམ་འདོད་བྱེད་པས་ཆོག །འདི་བྲིས་ཉེས་པ་མཆིས་ན་ལྷ་ལ་བཤགས། །དགེ་བས་འགྲོ་ཀུན་བྱང་ཆུབ་ཐོབ་པར་ཤོག །རྒྱུན་བསང་ཉུང་བསྡུས་ཁྱེར་བདེ་འདི་ནི། །༧ དགེ་སློང་རཱ་ག་ཨ་སྱ་ཞེས་བྱའི་རྣལ་འབྱོར་པས། །ཤིང་རྟ་སྨིན་དྲུག་ཟླ་བའི་ཡར་ཚེས་དྲུག །སྔ་དྲོའི་ཐུན་ལ་རྫོགས་པར་སྦྱར་བ་ལས། །འབྲེལ་ཐོགས་སེམས་ཅན་ཐམས་ཅད་ཀུན། །བདེ་ཆེན་དག་པའི་ཞིང་དུ་སྐྱེ་བར་ཤོག །སྐྱེས་ནས་གཞན་དོན་དཔག་མེད་མཛད་པར་ཤོག །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།