བམ་པོ་ཆེན་པོ་ལྔ་པ།
རྒྱ་གར་སྐད་དུ། ཀུ་ལ་པཉྩ་བུདྡྷ་ན་མཿ། བོད་སྐད་དུ། རིགས་ལྔ་བདེ་བར་གཤེགས་པ་ལ་ཕྱག་འཚལ་ལོ། །མ་ཧཱ་ཡོ་གའི་དོན་དུ་བསྒྲུབ་པའི་ཐབས་འདི་བསྟན་ཏོ། །རི་ནི་ཉམས་དགའ་མདངས་བཟང་བའི། །ཡིད་འོང་གནས་སུ་འདུག་ནས་ནི། །
བྱིན་བརླབས་མཚམས་བཅད་བརྟན་བྱས་ནས། །དཀྱིལ་འཁོར་འདོམ་གང་གྲུ་བཞི་པ། །དྲི་སྣ་ལྔ་ཡིས་མཎྜལ་བྱའོ། །ཐིག་བཞི་བཏབ་པས་དཀྱིལ་འཁོར་བརྒྱད། །མཎྜལ་བརྒྱད་པའི་གཞུང་བཞིན་བྲི། །དེ་ཡི་རྩེ་མོ་བརྒྱད་ལ་ཡང་། །ཡིད་བཞིན་ནོར་བུ་འབར་བ་བྲི། །དེ་ཡི་དབུས་སུ་བསམ་པ་ཡང་། །སྲིད་གསུམ་བྷནྡྷ་བཟང་ཀོང་ཡུག །ཡེ་ནས་མ་བཅོས་རང་འབྱུང་སྣོད། །དཔལ་དང་ལྡན་པའི་སྣོད་བཞག་ལ། །དེ་ཡི་ནང་དུ་བླུགས་པའི་སྨན། །ཡེ་ནས་རང་འབྱུང་བདུད་རྩི་ལྔ། །ཤ་ཆེན་བཤང་གཅི་ཁུ་བ་ཁྲག །དག་པའི་རྒྱུ་སྟེ་བདུད་རྩིའི་དངོས། །སྟོང་ལས་སྦྱར་བས་ཡེ་ནས་དག །བཏག་དང་བཙག་དང་གཞལ་བ་ཡི། །ཉི་ཟླ་གསལ་བའི་དཀྱིལ་འཁོར་དུ། །འབྲུ་ལྔ་ཡེ་ཤེས་འཕྲོ་འདུ་ལས། །སྟོང་ཁམས་ཁྱབ་པར་དོན་བྱས་ཏེ། །བཅུད་ཀྱི་དམ་པ་ཀུན་བསྡུས་ནས། །དུས་གསུམ་སངས་རྒྱས་མཆོད་པའི་ཕྱིར། །བཀའ་བཞིན་བསྟན་པའི་དངོས་གྲུབ་བླང་། །མུ་ཏིག་དཀར་པོ་དྲི་མེད་ལྟར། །སྒྲུབ་པ་པོས་ནི་ནན་ཏན་བྱའོ། །འགུ་ཡ་ལག་པའི་ཕྱག་རྒྱ་ཡིས། །གཞུང་བཞིན་བརྟན་ནས་འཕྲོ་འདུ་བྱ། །དེ་དབུས་ཀླུ་བདག་ས་བོན་གྱིས། །དངོས་གྲུབ་དམ་པ་བླང་བར་བྱ། །དགུ་པའི་སྔགས་ཀྱིས་བཏབ་ནས་ནི། །ལེ་ལོ་མེད་པའི་བརྩོན་འགྲུས་ཀྱིས། །བར་ཆད་མེད་པའི་འཕྲོ་འདུ་བྱའོ། །ཨོཾ་གྱིས་ཡེ་ཤེས་འོད་ཕྱུང་ཞིང་། །ཨཱཿཡིས་མེས་བསྲེགས་ཐལ་བར་འགྱུར། །ཧཱུྃ་གིས་བདུད་རྩི་རྣམ་པར་དག །གསལ་ལ་འབྱུང་འཇུག་ལྷན་ནེ་བོས། །རྟགས་དང་མཚན་མ་བདུན་གྱིས་འབྱུང་། །འོད་དང་དུ་བ་དྲི་དང་སྒྲ། །ལྷ་མོའི་གཟུགས་ཀྱང་སྟོན་པར་འགྱུར། །མང་དུ་འཕེལ་ན་བསྒྲུབ་རྫས་ཡིན། །དེ་ལ་ཡ་མཚན་བསྐྱེད་མི་བྱ། །མཚན་མའི་རྟགས་དག་མ་བྱུང་ན། །བསྐང་གསོའི་ཆོ་ག་རྒྱ་བསྐྱེད་ཅིག ། སྤོགས་ཐགས་བསྐྱར་ལ་རྩལ་ཤུགས་དབྱུང་། །དམ་ཚིག་ཆེན་པོ་བསྐང་བའི་ཕྱིར། །བསྒྲུབ་རྫས་རྣམས་ཀྱང་བསྟར་ནས་གཞག །དེ་ནས་མཆོད་ཅིང་དངོས་གྲུབ་བླང་། །སློབ་མ་ལ་ཡང་དབང་བསྐུར་རོ། །བླ་མ་ལུང་ལྡན་
དེས་ཀྱང་ནི། །ཚིགས་སུ་བཅད་པ་འདི་དག་བརྗོད་དོ། །གདོད་ནས་མ་སྐྱེས་རྣམ་དག་ཆོས་ཀྱི་དབྱིངས། །དག་དང་མ་དག་མི་རྟོག་རྟོག་ལས་འདས། །སྔ་མ་འདས་དང་ད་ལྟར་ཕྱིས་འབྱུང་བ། །དུས་གསུམ་གཅིག་ལ་སྐུ་བསྟན་ཕྱི་བཤོལ་མེད། །དངོས་གྲུབ་སྣ་ཚོགས་རླབས་ཆེན་འབར་བ་ཅན། །སུ་འདོད་སྦྱིན་གྱིས་ད་ལྟ་འདི་ལ་ལོང་། །སྐལ་བརསྦྲེབས་དང་གཏི་མུག་མུན་ནག་ལ། །སྤྲིན་མཐོངས་ཉི་ཤར་ཁུད་པར་དྲོ་བ་བཞིན། །བདུད་རྩི་རྒྱལ་པོ་དབང་ཆེན་འདི་བྱིན་པས། །རིག་འཛིན་རྒྱལ་པོ་གཙོ་བོའི་གོ་འཕང་ཐོབ། །ཚེ་དང་སྐོངས་དང་ཡིད་དུ་འོང་། །བགེགས་རྣམས་ཞི་བ་ལ་སོགས་ཏེ། །ནད་དང་བྲལ་ནས་ཅི་འདོད་པའི། །ཡོན་ཏན་རྩ་བརྒྱད་འདི་ཡིས་ཐོབ། །ཞེས་བཀའ་བསྩལ་ནས། དེ་ནས་ཡང་བཅོམ་ལྡན་འདས་རིགས་ལྔ་བདེ་བར་གཤེགས་པས་བཀའ་སྩལ་ཏོ། །བཅོམ་ལྡན་འདས་ཀྱིས་ལུང་འདི་ལས། །དབང་བསྐུར་གནང་བ་གང་ཡིན་པ། །འཁོར་རྣམས་ཀུན་གྱིས་ཐོབ་པར་ཤོག །ཞེས་བཀའ་སྩལ་ཏོ། །ཡང་འཁོར་ཉེ་བའི་སྲས་མཆོག་དམ་པ་འཇམ་དཔལ་ལ་སོགས་པས་དབང་མནོས་ནས། ཡང་རིགས་ལྔ་དང་རིགས་རྒྱ་མཚོའི་གཙོ་བོ་ལ་ལུང་གི་དོན་ཞུས་པ། རྟོག་པ་དང་མི་རྟོག་པའི་དོན་ཇི་ལྟར་བལྟ། དོན་གྱི་འབྲས་བུ་གང་ལགས་ཞེས་གསོལ་པ་ལས། ཀུན་དུ་བཟང་པོ་དང་རིགས་ལྔ་བདེ་བར་གཤེགས་པས་བཀའ་སྩལ་པ། ཚངས་དང་དྲང་སྲོང་གཙང་མ་ཟ། །དེ་དག་གྲོལ་བར་ངས་མ་བཤད། །ཀླུ་དང་བྲམ་ཟེ་གཙང་མ་ཟ། །དེ་དག་གྲོལ་བར་ངས་མ་བཤད། །བྱོལ་སོང་རྩྭ་མཆོག་ཟ་བ་ཡང་། །ཇི་སྲིད་འཚོ་བའི་བར་དུ་ཟ། །དེ་དག་གྲོལ་བར་ངས་མ་བཤད། །ཡང་དག་དོན་གྱི་ལུང་འདི་ཉོན། །རྣལ་འབྱོར་ཐབས་དང་ལྡན་པས་ནི། །ཆོས་སྐུ་གཅིག་ལས་ཐ་དདཔའི། །རིགས་ལྔའི་ཁ་དོག་འདི་བཤད་དོ། །འདི་ལྟར་རྟོགས་ན་གྲོལ་ཞེས་བཤད། །རང་བཞིན་ཡེ་ནས་དག་པའི་རྫས། །མཉམ་པའི་དབྱིངས་སུ་རབ་རྟོགས་ན། །གཉིས་མེད་དོན་གྱིས་ཟིན་པ་ཡིན། །ཇི་ལྟར་དམིགས་པ་བཞིན་དུ་འགྲུབ། །དངོས་དང་དངོས་
མེད་རྟོག་པའི་མཚན། །གཙང་དང་མི་གཙང་རྟོག་པའི་མཚན། །མཁས་པས་དབུས་ལ་གནས་མི་འགྱུར། །ཡེ་ཤེས་སྐུ་ལྔ་བསྟན་པའི་ཕྱིར། །བྱང་ཆུབ་སེམས་ནི་དཀར་བས་ན། །དྲི་མེད་དཀར་བས་ཡེ་ཤེས་སྐུའོ། །རཀྟ་ཆགས་མེད་དམར་བས་ན། །ཆགས་མེད་རྣམ་དག་ཆོས་ཀྱི་སྐུའོ། །མཾ་ས་ཡིད་བཞིན་རིན་ཆེན་སྔོ། །སྣ་ཚོགས་འབྱུང་གནས་མཉམ་ཉིད་སྐུའོ། །རིན་ཆེན་གསེར་མདོག་སྣང་མཛད་དེ། །མངོན་འབྱུང་སྤྲུལ་པ་ཆོས་ཀྱི་སྐུའོ། །དྲི་ཆུ་དག་བྱེད་ལྗང་གུའི་མདོག །ཀུན་དུ་དོན་གྲུབ་ལས་རབ་སྐུའོ། །སྐུ་ལྔ་ལྷུན་གྲུབ་བདུད་རྩི་འདི། །སོ་སོའི་ལུས་ལ་གནས་པ་ཡིན། །དྲི་ཆེན་དྲི་ཆུ་རཀྟ་དང་། །མཾ་ས་སེམས་ཆུ་འདི་རྣམས་ཀུན། །སེམས་ཅན་རྟོག་པ་བཟློག་པའི་ཕྱིར། །གཙོ་རུ་དང་དུ་བླང་བར་བྱའོ། །གཙང་སྨེ་མེད་པར་ཀུན་གྱིས་སྤྱོད། །འདི་དག་གྲོལ་བར་ངས་བཤད་དོ། །ཐེ་ཚོམ་མེད་པས་དངོས་གྲུབ་ཐོབ། །སྤྱོད་པའི་སྐྱེས་བུ་རྣལ་འབྱོར་པས། །ཚེ་འདི་ཉིད་ལ་གྲུབ་པར་འགྱུར། །ཅེས་བཅོམ་ལྡན་འདས་རིགས་ལྔ་བདེ་བར་གཤེགས་པས་བཀའ་སྩལ་ཏོ། །འདི་ཡན་ཆད་མ་ཧཱ་ཡོ་གའི་དོན་གྱི་ལུང་དང་སྒྲུབ་ཐབས་བདུད་རྩི་ཆེན་པོ་འབུམ་སྔེ་ལས་བཏུས་པའི། བམ་པོ་ཆེན་པོ་ལྔ་པ།། །།