ལམ་གྱི་དངོས་གཞི་ཐག་གཅིག་ཐོག་ཏུ་བཅད་པས་བྱ་བྲལ་ཟང་ཐལ་རྗེན་པར་འགགས་བསྡམས་པ།
གཉིས་པ་ལམ་གྱི་དངོས་གཞི་ཐག་གཅིག་ཐོག་ཏུ་བཅད་པས་བྱ་བྲལ་ཟང་ཐལ་རྗེན་པར་འགགས་བསྡམས་པ་ལ། རྡོ་རྗེ་རྒྱལ་པོའི་གྲུབ་མཐའི་ངེས་ཚིག་བཤད་པ་དང་། ངེས་ཚིག་དེ་ལྡན་གྱི་ངོ་བོ་ཉིད་དུ་ཐག་བཅད་པའོ། །
དང་པོ་ནི། སྤྱིར་གཉིས་སུ་མེད་པའི་རྡོ་རྗེ་རང་བྱུང་གི་ཡེ་ཤེས་ལ་ལྟ་བསྒོམ་སྤྱོད་གསུམ་དང་གཞི་ལམ་འབྲས་བུའི་ཆོས་ཐམས་ཅད་རྫོགས་པས་ན་རྫོགས་པ་ཆེན་པོ་ཡིན་ལ། རིམ་པ་གཉིས་པས་རིམ་པ་གཉིས་པ་ཡིན་པས་ཀྱང་རྫོགས་རིམ་ཆེན་པོ་ཞེས་བྱ་བར་དོན་གྱིས་གནས་པས་ན་ལྟ་བསྒོམ་སྤྱོད་འབྲས་ཐམས་ཅད་རྫོགས་པ་ཆེན་པོར་གྲུབ་ཅིང་ཀུན་གྱི་རྩེ་མོར་གྱུར་བས་ནའོ། །རིག་པ་རང་ཤར་དང་ཀུན་བྱེད་རྒྱལ་པོའི་རྒྱུད་ལས། རྫོགས་ཆེན་ཨ་ཏི་ཡོ་ག་ལ། །གཅིག་རྫོགས་གཉིས་རྫོགས་ཐམས་ཅད་རྫོགས། །ཞེས་དང་། རྡོ་རྗེ་སེམས་དཔའ་སྙིང་གི་མེ་ལོང་ལས། རྫོགས་པ་ཆེན་པོའི་ངེས་ཚིག་ནི། །རིག་པ་བྱ་བྲལ་ངང་ལ་ཡེ་ཤེས་རྫོགས་པས་རྫོག༵ས། །བསྒོམ་པ་རྟོག་མེད་ངང་ལ་ཡེ་ཤེས་དྲི་མེད་རྫོགས་པས་རྫོག༵ས། །སྤྱོད་པ་བཅོས་མེད་ངང་ལ་ཡེ་ཤེས་གདལ་བ་རྫོགས་པས་རྫོག༵ས། །ལྟ་བ་དགག་སྒྲུབ་མེད་པའི་ངང་ལ་ཡེ་ཤེས་རྟོག་མེད་རྫོགས་པས་རྫོག༵ས། །འབྲས་བུ་དམིགས་མེད་ངང་ལ་ཡེ་ཤེས་ཉི་ཤུ་རྩ་ལྔ་རྫོགས་པས་རྫོག༵ས། །ཞེས་དང་། སྟོང་ཉིད་གསལ་ལ་མ་ཡེངས་པས་ན་པ༵། །བྱ་བ་མེད་པར་སྣང་བས་པ༵། །གསལ་ལ་འཛིན་པ་མེད་པས་པ༵། །འབྲས་བུ་ཚད་དང་ལྡན་པས་པ༵། །ཐེག་པ་ཀུན་གྱི་རྩེ་མོར་གྱུར་བས་ཆེ༵། །གནས་ལུགས་དོན་ལ་ཡེངས་པ་མེད་པས་ཆེ༵། །ཡེ་ཤེས་སྒྲོན་མ་ལྟ་བ་ཀུན་གྱི་རྩེ་མོར་གྱུར་བས་ཆེ༵། །གསལ་ལ་མ་ཡེངས་བསྒོམ་པ་ཀུན་གྱི་རྩེ་མོར་གྱུར་པས་ཆེ༵། །རང་བྱུང་མ་བཅོས་སྤྱོད་པ་ཀུན་གྱི་རྩེ་མོར་གྱུར་བས་ཆེ༵། །འཛིན་མེད་རང་གསལ་འབྲས་བུ་ཀུན་གྱི་རྩེ་མོར་གྱུར་བས་ཆེ༵། །ཞེས་དང་། རིག་པ་ཡེ་ཤེས་ཉི་ཤུ་རྩ་ལྔས་བརྒྱན་པས་པོ༵། །སུམ་བརྩེགས་དབྱེར་མེད་མཉམ་པས་གནས་པས་པོ༵། །ཞེས་སོགས་གསུངས་པ་དང་། རོང་ཟོམ་པས་འདིར་རང་བཞིན་རྫོགས་པ་ཆེན་པོ་ནི་རིམ་པ་གཉིས་པས་རིམ་པ་གཉིས་པའོ། །ཞེས་སོ། །