ཞུས་ལེན་རྒན་མོ་མཛུབ་བཙུགས་ཀྱིམགུར་མ།
༄༅། །ཞུས་ལེན་རྒན་མོ་མཛུབ་བཙུགས་ཀྱིམགུར་མ་བཞུགས་སོ།། སྤྲུལ་སྐུ་ཨོ་རྒྱན་བསྟན་འཛིན་ནས་མཁན་ཆེན་རིན་པོ་ཆེ་ལ་ཞུ་བ་འདི་ལྟར། དགུང་སྔོན་གྱི་ལྷ་ལམ་ཡངས་པའི་ངོགས། །ཆུ་འཛིན་གྱི་རྒྱུ་བ་ལང་ལིང་གཡོ། །ནམ་མཁའནས་ཁུ་འཕངས་ཐར་ཐུར་འབབ། །སྒྲ་བརྒྱ་པའི་གསུང་སྙན་ལྷོང་ལྷོང་སྒྲོགས། །རྗེ་འགྲོ་བའི་མགོན་པོ་དབུས་ཕྱོགས་བྱོན། །ཕ་མེད་ཀྱི་དྭ་ཕྲུག་རྗེས་སུ་ལྷག །གཉེན་འབྲེལ་གྱི་གྲོགས་དང་སོ་སོར་བྱེ། །ཡིད་སྐྱོ་བའི་ཉམས་ཤིག་ཤར་ནས་བྱུང་། །སྐྱེད་ཚལ་གྱི་ཨུཏྤལ་བཞད་པའི་དུས། །རྩི་བཅུད་ལ་རོལ་པའི་རྐང་དྲུག་རྣམས་། །དེ་མཐོང་བས་དམ་ཆོས་ཚོལ་ལུགས་དྲན། །སེམས་ཉིད་སྐྱོ་བ་བྱུང་ནས་ཐལ། །གཡུ་ལྗོན་གྱི་ཚང་ཚིང་འཁྲིགས་དབུས་སུ། །རྩེད་འཇོ་ལ་རོལ་པའི་ཀུ་ཤུའི་ཚོགས། །དུསནམ་ཞིག་ལྷོ་མོན་ཕྱོགས་སུ་ཆས། །དེ་སེམས་འཁོར་
སྐྱེ་བའི་ཉམས་ཞིག་ཤར། །རེག་འཇམ་གྱི་མལ་བསྟན་བདེ་བ་དང་། །ཟིལ་བུ་ཡི་རླུང་གིས་གཡོ་བའི་ཚེ། །དྲིན་འཁོར་མཐའ་བྲལ་བའི་གསང་གསུམ་དྲན། །འདྲེན་བྱེད་དུ་མཆི་མའི་ཆར་རྒྱུན་འབེབ། །རྗེ་འགའ་རེ་ཤར་གྱི་ཕྱོགས་སུ་བཞུགས། །རྗེ་འགའ་རེ་བྱང་གི་ཕྱོགས་སུ་ལུས། །དུས་ལྷན་དུ་འགྲོགས་པའི་སྨོན་ལམ་ཞུ། །ཞེས་པའང་། སྤྲེལ་ལོ་སྤྲེལ་ཟླ་ར་བའི་ཚེས་༡༠ ཉིན་ཟུར་མང་བདུད་རྩི་དིལ་༼འཁྱིལ་༽གྱི་ཝེར་ཕུག་རྡོ་རྗེའི་ཁྱུང་རྫོང་འོད་གསལ་དགའ་བའི་ཚལ་གྱི་རི་རྩེ་ལ། མཁན་ཆེན་བླ་མ་གཙོས་གྲོགས་མཆེད་རྣམས་དང་ལྷན་ཅིག་སྐྱོ་སངས་ལ་འགྲོ་སྐབས་དཔལ་ལྡན་བླ་མའི་གསང་གསུམ་ཡིད་ལ་དྲན་ནས་ཨོ་ཊི་ཡ་ནས་ཐོལ་བྱུང་སྨྲས་ཚེ། ༈ །མཚུངས་མེད་བླ་མ་དམ་པ། གང་ཤར་དབང་པོས་བླ་མ་ཕྱི་རུ་མི་བཞུགས་རིག་གདོང་འདི་རུ་འདུས་ཚུལ་གྱི་ལན་དུ་རྒན་མོ་མཛུབ་བཙུགས་ཀྱི་གདམས་པ་འདི་ལྟར། ཐ་སྙད་ཚུལ་མཐོང་གི་སྣང་ངོར། ཤར་
ནུབ་སོ་སོ་རུ་བཞུགས་ཀྱང་། །དོན་ལ་རིག་རྩལ་གྱི་རོལ་པ། །རིག་གདོང་འདི་རུ་ནི་འདུས་པས། །ཡིད་སྐྱོའི་སེམས་ཕྲེང་ནི་མི་དགོས། །རྣམ་པ་ཐ་དད་ལྟར་སྣང་ཡང་། །གཅིག་པུའི་རོ་གར་དུ་འདུག་པས། །གསང་གསུམ་བྱིན་རླབས་ཀྱི་ཕུང་པོ། །ཡིད་ལ་འབྲལ་མེད་དུ་བཞུགས་པས། །རྟག་ཏུ་གསེར་ཞལ་ན་མཇལ་ཆོག །གུ་ཡངས་བློ་བདེ་ཡི་ངང་ནས། །བག་ཕེབ་རང་སེམས་ལ་གཟིགས་དང་། །རྩ་གསུམ་ཀུན་འདུས་ཀྱི་དྲིན་ཅན། །མཆོག་གསུམ་ཡིད་བཞིན་གྱི་ཕུང་པོ། །སྐྱབས་གཅིག་མཉམ་མེད་ཀྱི་གསང་གསུམ། །མ་རྩལ་ལྷན་གྲུབ་ཀྱི་ངང་ནས། །རང་བྱུང་འཕོ་མེད་དུ་མཇལ་འདུག །གཉིས་འཛིན་ཨ་འཐས་ཀྱི་སྒྲོག་གིས། །རིག་པའི་བུ་ཆུང་འདི་མ་བཅིངས། །གཏད་མེད་རྒྱ་ཡན་གྱི་ངང་དུ། །རྩོལ་བཅས་གཡས་ཆུང་དུ་བོར་
ཐོང་། །རྩོལ་མེད་རང་བབ་ཀྱི་ངང་ནས། །མ་ཡེངས་མི་སྒོམ་པར་ཞོག་དང་། །རིག་སྟོང་གཉུག་མ་ཡི་དགོས་པ། །རང་བབ་ཤུགས་འབྱུང་དུ་མའོ། །ཞེས་པ་འདི་འང་། མ་ཧཱཔཎྜི་ཏཆེན་པོ་མཁན་ཆེན་བླ་མ་ཨཀཱ་ར་ཤི་ལིས་༼འགྱུར་མེད་ཚུལ་ཁྲིམས་༽མིང་གིས་ཐོལ་བྱུང་སྨྲས་པ་དགེ། །།