བཞི་པ། ཟག་པ་མེད་པར་བསྟན་པའི་ལེའུ།
༈ ད་ནི་ལེའུ་བཞི་པ་འགྲོལ་ཏེ། ཨེ་མ་ཧོ། ཞེས་པའི་དོན་ནི། ཨེ་བྱ་རྩོལ་མེད་པའི་དོན་ལ། མ་རང་གསལ་གཏིང་བཀྲག་ཕྱེད་པའི་མཚར་བ། ཧོ་མཐའ་དབུས་ཕྱོགས་དང་བྲལ་བའི་ཆེན་པོའི་རང་སྒྲའོ། །འདི་ལྟར་ཡང་གསང་དོན་ཉིད་ལ། །ཞེས་པའི་དོན་ནི། འདི་ལྟར་ཞེས་པ་རྒྱུད་དོན་རིག་པ་མངོན་སུམ་གྱི་གནད་བསྟན་པ། ཡང་གསང་ཞེས་པ་ཆོས་ཉིད་མངོན་སུམ་གྱི་དོན་ལོག་ལྟ་ཅན་གྱི་རིགས་ལ་གསང་བ་བས་ཀྱང་ཆེས་གསང་སྟེ་རླུང་གི་ཕྱོགས་ཙམ་དུ་ཡང་བརྗོད་པར་མི་བྱའོ། །དོན་ཉིད་ལ་ཞེས་པ་བར་དོ་དང་ཚེ་ཕྱི་མ་ཙམ་ལ་མི་ལྟོས་པར། དུས་གསུམ་སངས་རྒྱས་ཐམས་ཅད་ཀྱི་གནས་ལུགས། དགེ་སྡིག་ཀུན་དང་བྲལ་བའི་སྙིང་པོའོ། །འཇུག་པར་འདོད་པའི་སྐལ་བ་རབ། །ཅེས་པའི་དོན་ནི། འཇུག་པར་ཞེས་པ་ཐེག་པ་ཐམས་ཅད་ཀྱི་ཡང་རྩེ། སངས་རྒྱས་ཐམས་ཅད་ཀྱི་ལྟ་ཕུགས། མན་ངག་ཐམས་ཅད་ཀྱི་ཉིང་ཁུ། འབྲས་བུ་ཐམས་ཅད་ཀྱི་མངའ་བདག ཡོད་མེད་གཅིག་བྲལ་གྱི་ལྟ་བ་ནམ་མཁའི་མདུང་སྐོར། སྐུ་གསུམ་ལག་འཆང་ཟག་བཅས་མི་སྣང་བར་ལོ་བཅུ་ན་གདོན་མི་ཟ་བར་སངས་རྒྱ་བའི་གསང་བ་སྙིང་ཐིག་ཡང་གསང་དམ་པ་ལ། འདོད་པའི་ཞེས་པ་རྟོགས་ལྡན་ནམ་རྣལ་འབྱོར་པའམ། པཎྜི་ཏའམ། སྟོན་པའམ། དགེ་སློང་ངམ། དགེ་ཚུལ་ལམ། དགེ་བསྙེན་ནམ། རྒྱལ་པོའམ། བློན་པོའམ། འབངས་སམ། རིགས་ཀྱི་བུའམ། རིགས་ཀྱི་བུ་མོའམ། སྐལ་བ་རབ་ཅེས་པ་ཚོགས་གཉིས་བསགས་བསགས་པའོ། །སྒྲིབ་གཉིས་སྦྱངས་སྦྱངས་པའོ། །སེམས་ཅན་གྱི་དོན་དུ་ཐུགས་བསྐྱེད་བསྐྱེད་པའོ། །ཕྱི་ནང་གསང་བ་གསུམ་གྱིས་སྨིན་(༥༢)ཟིན་ཟིན་པའོ། །སྔོན་དུ་ལུས་ངག་ཡིད་རྣམས་ཀྱི། །ཞེས་པའི་དོན་ནི། སྔོན་དུ་ཞེས་པ་ཟག་བཅས་མི་སྣང་བར་གྲོལ་བར་བྱེད་པའོ། །ལུས་ངག་ཅེས་པ་རང་གི། ཡིད་རྣམས་ཀྱི་ཞེས་པ་གསུམ་པོའི། མངོན་པར་ཞེན་པ་བཟློག་པའི་ཕྱིར། །ཞེས་པའི་དོན་ནི། མངོན་པར་ཞེས་པ་རྟགས། ཞེན་པ་ཞེས་པ་ཚེ་འཁོར་བ་ཐོག་མཐའ་མེད་པ་ནས་ལུས་ངག་ཡིད་གསུམ་ལ། བཟློག་པའི་ཕྱིར་ཞེས་པ་ཆོས་ཉིད་ཀྱི་རང་སྒྲ་བླ་མ་དམ་པའི་གདམས་ངག་གི་གནད་ཀྱིས། སྔོན་དུ་སྤྱོད་པ་བརྩམ་པར་བྱ། །ཞེས་པའི་དོན་ནི། སྔོན་དུ་ཞེས་པ་ལུས་ངག་ཡིད་གསུམ་ཀྱི་ཞེན་པ་བཟློག་པར་བྱ་བའི། སྤྱོད་པ་ཅེས་པ་ལུས་ངག་ཡིད་གསུམ་གྱི། བརྩམ་པར་བྱ་ཞེས་སྐལ་བ་ཅན། གཅིག་ནས་གཉིས་གསུམ་ལས་མང་ན་མཁའ་འགྲོ་མའི་བཀའ་ཆད་འབྱུང་ངོ་། །དེ་ཡང་རབ་དུར་ཁྲོད་འབྲིང་ལུང་སྟོང་ཐ་མ་ཡང་དབེན་པའི་རི་ལ་ཕྱིན་ཏེ། ཚོགས་གཏོར་བཤམས་ལ་ལུས་དུར་ཁྲོད་ཀྱི་རུས་པ་དང་དུང་དང་ཀར་ཤ་པ་ནིས་བརྒྱན་ལ། ཅང་ཏེའུ་དཀྲོལ་ཞིང་ཚོགས་དང་གཏོར་མ་བླ་མ་ཡི་དམ་དྷཱ་ཀི་ལ་ཕུལ་ལ་གསོལ་བ་བཏབ། ཡུལ་བདག་ལ་གཏོར་མ་ཞིག་བྱིན་ཏེ་སྤྱོད་པ་རྩོམ་པ་ལ་བར་ཆད་མ་བྱེད་ཅིག་བྱས་ལ་བཀའ་བསྒོ། འབྱུང་པོ་ལ་གཏོར་མ་ཞིག་བྱིན་ཏེ་བརྟུལ་ཞུགས་ཀྱིས་བསྐྲད་ལ་བཏང་། རང་ཉིད་ཕྱག་ན་རྡོ་རྗེའམ་དྷཱ་ཀི་མར་བསྒོམས་ལ། ཨེ་ཝཾ་ལ་སོགས་པའི་ཡི་གེས་རྒྱས་བཏབ་ལ། ཕཊ་སྒྲ་དྲག་པོ་ཞིག་བརྗོད་ལ། སྔོན་དུ་ལུས་ཀྱི་སྤྱོད་པ་ཞག་གསུམ་བརྩམ་པར་བྱའོ། །ལུས་ནི་རྒྱུག་དང་ཉལ་བ་དང་། །ཞེས་པའི་དོན་ནི། ལུས་ནི་ཞེས་པ་རང་གི། རྒྱུག་དང་ཞེས་པ་ཡར་མར་ཕར་ཚུར་ལ། ཉལ་དང་ཞེས་པ་ཁ་སྦུབ་དང་གན་རྐྱལ་དང་། གཞོགས་དང་། རྐང་ལག་བསྐུམ་པ་དང་བརྐྱང་པའོ། །ལངས་དང་ཡན་ལག་བསྐྱོད་པ་དང་། །ཞེས་པའི་དོན་ནི། ལངས་དང་ཞེས་པ་ལྐོག་རྩེར་ལངས་འཕྲོ་ལ་ཐང་ལ་སྡོད་པ་དང་།
སྡོད་འཕྲོ་ལ་ལངས་པའོ། །ཡན་ལག་ཅེས་པ་རྐང་ལག་བཞི། བསྐྱོད་དང་ཞེས་པ་ཕར་ཚུར་དང་བརྐྱང་བསྐུམ་དང་། བསྐོར་བ་དང་ནི་ཕྱག་བྱ་(༥༣)དང་། །ཞེས་པའི་དོན་ནི། བསྐོར་བ་ཞེས་པ་བླ་མའི་སྐུ་རྟེན་དང་ཆོས་ཁུག་དང་། མཆོད་རྟེན་དང་རི་དང་བྲག་དང་རྡོ་དང་ས་དང་ཆུ་དང་ཕྱུགས་དང་མི་ཕལ་པ་ལའོ། །དང་ནི་ཞེས་པ་དེ་རྣམས་ལ་ཡང་། ཕྱག་བྱ་དང་ཞེས་པ་ཤར་ལྷོ་ནུབ་བྱང་སྟེང་འོག་ལྷ་མི་ཕྱུགས་ས་རྡོ་ལ་སོགས་པ་ལ། རེས་རང་གི་བླ་མ་ལ་ཡང་ཕྱག་མི་བྱའོ། །ཡན་ལག་བསྐོར་དང་མགོ་སྒྲིལ་དང་། །ཞེས་པའི་དོན་ནི། ཡན་ལག་ཅེས་པ་རང་གི། བསྐོར་དང་ཞེས་པ་ནང་དང་ཕྱིན་ག་ལོག་དང་། གཡས་གཡོན་གཉིས་རེ་མོས་ཀྱིས། མགོ་སྒྲིལ་དང་ཞེས་ཕར་ཧྲིལ་ཚུར་ཧྲིལ་ཡར་ཀྱོག་མར་ཀྱོག་བྱའོ། །ཇི་ལྟར་དྲན་པའི་ལས་རྣམས་དང་། །ཞེས་པའི་དོན་ནི། ཇི་ལྟར་ཞེས་པ་རང་གིས། དྲན་པའི་ཞེས་པ་སྙིང་ལ། ལས་རྣམས་དང་ཞེས་པ་ལྷག་མ་མེད་པར། གར་དང་ཕྱག་རྒྱ་བསྒྱུར་བ་དང་། །ཞེས་པའི་དོན་ནི། གར་དང་ཞེས་པ་ཞི་ཁྲོ་དང་། དཔའ་བོ་དང་དཔའ་མོའི། ཕྱག་རྒྱ་ཞེས་པ་ཞི་ཁྲོ་དང་ཡོད་པ་མེད་པ་ཚོགས་དང་གཏོར་མ་དང་འཁྲིག་པ་དང་། ཤོག་ཅིག་པ་དང་མ་ཡོང་ཞིག་བྱ་བའི། བསྒྱུར་བ་དང་ཞེས་པ་ཕྱག་འཚལ་འཕྲོ་ལ་བང་རྒྱུག་པ་དང་རྒྱུག་འཕྲོ་ལ་མགོ་སྒྲིལ་བ་ལ་སོགས་པའོ། །ཇི་ལྟར་དམིགས་པའི་ལས་རྣམས་བྱ། །ཞེས་པའི་དོན་ནི། ཇི་ལྟར་ཞེས་པ་རང་གི། དམིགས་པའི་ཞེས་པ་ཡིད་ལ། ལས་རྣམས་བྱ་ཞེས་པ་དྲན་ཚད། འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་ལུས་ཀྱི་སྤྱོད་པ། སུ་ཡིས་ཞེས་པ་སྐལ་ལྡན། བྱས་པའི་ཞེས་པ་ཉམས་ལེན། ལུས་ཀྱི་མངོན་ཞེན་རང་བཅད་ནས། །ཞེས་པའི་དོན་ནི། ལུས་ཀྱི་ཞེས་པ་རང་གི། མངོན་ཞེན་ཞེས་པ་ཚེ་འཁོར་བ་ཐོག་མ་མེད་པ་ནས། རང་བཅད་ནས་ཞེས་པ་དེ་ལྟར་བྱས་པས། ལུས་ཀུན་རུ་ཤན་ཕྱེད་པར་ནི། །ཞེས་པའི་དོན་ནི། ལུས་ཀུན་ཞེས་པ་བཟང་ངན་དང་མཛེས་སྡུག་དང་མི་ཕྱུགས་ཀྱི་ཆགས་སྡང་ཐམས་ཅད་ཏིག་མེད་དུ་ཁྲེས་ཀྱི་འགྱུར་རོ། །རུ་ཤན་ཞེས་པ་འཁོར་འདས་ཀྱི། ཕྱེད་པར་ནི་ཞེས་པ་འདི་ཉིད་དུ། འདི་ཡིས་འགྱུར་རོ་སྤྲུལ་པའི་སྐུ། །ཞེས་པའི་དོན་ནི། འདི་ཡིས་ཞེས་པ་རྒྱུད། འགྱུར་རོ་(༥༤)ཞེས་པ་ཆོས་ཉིད་ཀྱི་རང་སྒྲ་བཞིན་ཉམས་སུ་བླངས་ན། སྤྲུལ་པའི་སྐུ་ཞེས་པ་རྡོ་རྗེ་འཆང་ནས་བརྒྱུད་པ་ཟམ་མ་ཆད་པ་ལ་ཆོས་ཉིད་ཀྱི་རང་སྒྲ་བྱུང་བའོ། །དེས་ནི་ལུས་བྱ་རྩོལ་མེད་པར་རྟོགས་ཏེ། སངས་རྒྱས་ཐམས་ཅད་ཀྱི་སྐུ་གསལ་སྟོང་དབྱེར་མེད་གཉིས་སུ་མེད་པར་འགྱུར་བའི་དགོས་པ་ཡོད་དོ། །དེ་འདས་ངག་གི་སྤྱོད་པ་བརྩམ། །ཞེས་པའི་དོན་ནི། དེ་འདས་ཞེས་པ་ལུས་ཀྱི་དྲི་མ་དག་པའི་རྟགས། ནམ་མཁའ་ལ་སྤྲིན་དང་ཁུ་རླངས་ཁ་ཆར་དང་། རླུང་དང་ཡུལ་ཉེས་དང་། དགྲ་དང་ཆོམ་རྐུན་མེད་པར། ནམ་མཁའ་དྭངས་པ་རླུང་དང་སེར་བུ་མེད་པར་འཇའ་དང་འོད་དུ་འཁྲུགས་པ་བྱུང་ན་ལུས་ཀྱི་སྡིག་པ་དག་པའོ། །གོང་མ་རྣམས་ལོག་ནས་བྱུང་ན་བསྐྱར་ལ་བྱའོ། །ལུས་ངག་ཡིད་གསུམ་འདྲའོ། །ངག་གི་ཞེས་པ་རང་གི། སྤྱོད་པ་བརྩམ་ཞེས་པ་ཞག་གསུམ་དུ། སྔགས་དང་ཁ་ཏོན་ཆོས་ཀྱི་སྒྲ། །ཞེས་པའི་དོན་ནི། སྔགས་དང་ཞེས་པ་ལྷ་ཐམས་ཅད་དང་། འདྲེ་ཐམས་ཅད་ཁྱད་མེད། ཁ་ཏོན་ཞེས་པ་བསྟོད་པ་དང་སྨོན་ལམ་དང་། གསོལ་ཚིག་དང་། ལྷ་འདྲེའི་བསྟོད་ཚིག་གོ། །ཆོས་ཀྱི་སྒྲ་ཞེས་པ་འཆད་པ་སློབ་པའི་ལད་མོ་བྱའོ། །ཡོད་དང་མེད་དང་སྣང་བ་དང་། །ཞེས་པའི་དོན་ནི། ཡོད་དང་ཞེས་པ་ཆོས་ཡོད་ནོར་ཡོད་གྲོགས་ཡོད་ཟས་ཡོད་ཅེས་པ་སྨྲའོ། །དེའི་མཇུག་ལ་ནད་ཡོད་གདོན་ཡོད་མི་དགེ་བ་ཡོད་ཅེས་སྨྲའོ། །མེད་དང་ཞེས་པ་ཆོས་མེད་ནོར་མེད་གྲོགས་མེད་ཟས་མེད་གོས་མེད་ལས་མེད་སེམས་མེད་མི་དགེ་བ་མེད་དོ་ཞེས་སྨྲའོ། །སྣང་དང་ཞེས་པ་སངས་རྒྱས་སྣང་ངོ་། །འཁོར་བ་སྣང་ངོ་། །ས་ཆུ་མེ་རླུང་ནམ་མཁའ་སྣང་ངོ་། །ལ་སོགས་པ་བྱའོ། །མི་སྣང་ངོ་ཞེས་པ་སངས་རྒྱས་དང་འཁོར་བ་མི་སྣང་ངོ་བྱའོ། །ཡིད་དཔྱོད་ཚིག་ནི་སྣ་ཚོགས་བརྗོད། །ཅེས་པའི་དོན་ནི། ཡིད་དཔྱོད་ཅེས་པ་དྲན་ཚད། ཚིག་ནི་ཞེས་པ་ཅི་བྱུང་བྱུང་། སྣ་ཚོགས་ཁ་རུ་ཐོན་ཚད་གདོན་ནོ། །གཏད་མེད་དུ་གྲོལ་ལོ། །བྱོལ་སོང་སྣ་ཚོགས་བརྡ་སྐད་དང་། །ཞེས་པའི་དོན་ནི། བྱོལ་སོང་ཞེས་པ་ཡང་དག་པའི་དོན་ལ་བྱོལ་ནས་ངན་པ་སྡུག་བསྔལ་གྱི་ལས་ལ་སོང་བའོ། །སྣ་ཚོགས་ཞེས་པ་རྟ་དང་གླང་པོ་ལ་སོགས་པའི་དུད་འགྲོ་ཐམས་ཅད་དང་། དོམ་དྲེད་སྤྲེའུ་ཅེ་སྤྱང་ཁྱི་(༥༥)ལ་སོགས་པ་དང་། ཀང་ཀ་རྨ་བྱ་རྒོད་ལ་སོགས་པའི་བྱ་ཐམས་ཅད་ཀྱི། བརྡ་སྐད་དང་ཞེས་པ་དེ་རྣམས་ཀྱི་ཟས་ཟ་བ་དང་། འཁྲིག་པ་སྤྱོད་པ་དང་ཕྲུག་གུ་ཡོད་པའི། སྐད་ནི་རྣམ་པ་སྣ་ཚོགས་པ། །ཞེས་པའི་དོན་ནི། སྐད་ནི་ཞེས་པ་གོང་མ་རྣམས་ཀྱི། རྣམ་པ་ཞེས་པ་སོ་སོ་རང་རང་གི་འདྲ་བའི། སྣ་ཚོགས་པ་ཞེས་པ་དེ་དག་ཐམས་ཅད་ཀྱི་སྐད་གདོན་ནོ། །འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་སྐད་སྣ་ཚོགས་དང་ཡོད་མེད་དང་ཆོས་འཆད་པ་དང་། སྔགས་བརྗོད་པ་ལ་སོགས་པ། སུ་ཡིས་ཞེས་པ་སྐལ་བ་ཅན། བྱས་པའི་མི་ཞེས་པ་ཉམས་སུ་བླངས་པའི། ངག་གི་མངོན་ཞེན་རང་ཆོད་ནས། །ཞེས་པའི་དོན་ནི། ངག་གི་ཞེས་པ་རང་གི། མངོན་ཞེན་ཞེས་པ་ཚེ་འཁོར་བ་ཐོག་མ་མེད་པ་ནས། རང་ཆོད་ནས་ཞེས་པ་སྤྱོད་པ་བྱས། འཁོར་འདས་རུ་ཤན་འདིས་ཕྱེད་དོ། །ཞེས་པའི་དོན་ནི། འཁོར་འདས་ཞེས་པ་གཏན་གྱི་བདེ་སྡུག་གཉིས་སོ། །རུ་ཤན་ཞེས་པ་འཛིན་པ་ཡོད་མེད་དོ། །འདིས་ཕྱེད་དོ་ཞེས་པ་ཆོས་ཉིད་ཀྱི་རང་སྒྲ་བཞིན་ཉམས་སུ་བླངས་ན། ངག་བྱ་རྩོལ་མེད་པར་རྟོགས་ཏེ། སངས་རྒྱས་ཐམས་ཅད་ཀྱི་གསུང་བརྗོད་དུ་མེད་པ་དང་། གཉིས་སུ་མེད་པར་འགྱུར་བའི་དགོས་པ་ཡོད། དེ་ལྟར་རང་ཉིད་ཉམས་སུ་བླངས་པར་འགྱུར་ལ་གཞན་དག་བདེན་ཞེན་གྱི་ཀོ་ལོང་དང་རང་བྲལ་བར་འགྱུར་རོ། །དེ་འདས་ཉིད་ཀྱི་འོག་ཏུ་ཡང་། །
ཞེས་པའི་དོན་ནི། དེ་འདས་ཞེས་པ་ངག་ནི་རུ་ཤན་ཕྱེད་པའི་རྟགས་ཐོན་ནས། ཉིད་ཀྱི་ཞེས་པ་བར་དུ་ལུས་ངག་ཡིད་གསུམ་རྣལ་དུ་དབབ་བོ། །དེ་ཡང་ལུས་ཀྱི་ཞག་གསུམ་ཐལ་ནས་ཞག་གཅིག་ལུས་རྣལ་དུ་དབབ་སྟེ། མལ་སྟན་བདེ་བ་ལ་ཉལ་ལ་བསྡད་དོ། །ངག་གི་ཞག་གསུམ་སོང་བ་དང་ཞག་གཅིག་གིས་ངག་རྣལ་དུ་དབབ་སྟེ་སུ་ལའང་མི་སྨྲ་བར་བརྡ་ཙམ་ཡང་མི་བྱ་བར་ལུས་དང་བསྟུན་ནོ། །དེ་བཞིན་སེམས་རུ་ཤན་འབྱེད་པ་ཞག་གསུམ་ཚར་ནས། ཡང་ཞག་གཅིག་སེམས་རྣལ་དུ་འབེབས་ཙམ་ན་ལུས་ངག་ཡིད་གསུམ་ཕྲུགས་ལ། དྲན་བསམ་འཕྲོ་བཅད་ལ་བཞག་གོ། །འོག་ཏུ་ཡང་ཞེས་པ་ཞག་བརྒྱད་སོང་བའི། སེམས་ཀྱི་སྤྱོད་པ་བརྩམ་(༥༦)པར་བྱ། །ཞེས་པའི་དོན་ནི། སེམས་ཀྱི་ཞེས་པ་རང་གི། སྤྱོད་པ་ཞེས་པ་ཞེན་པ་འབྲེལ་བའི། བརྩམ་པར་བྱ་ཞེས་པ་ཞག་གསུམ་དུ། དགའ་དང་མི་དགའ་བདེ་སྡུག་དང་། །ཞེས་པའི་དོན་ནི། དགའ་དང་ཞེས་པ་ཡོད་པ་ལ་བསམ་པ་དང་། མི་དགའ་ཞེས་པ་མེད་པ་དང་ཤི་ན་སྙམ་པའོ། །བདེ་སྡུག་དང་ཞེས་པ་ལུས་ངག་ཡིད་གསུམ་བདེ་བར་བསྒོམ་སྡུག་པར་བསྒོམ་པའོ། །རྟག་དང་མི་རྟག་ལ་སོགས་པ། །
ཞེས་པའི་དོན་ནི། རྟག་དང་ཞེས་པ་ཐམས་ཅད་རྟག་པར་བསྒོམ་པ་དང་། མི་རྟག་ཅེས་པ་ཐམས་ཅད་མི་རྟག་པར་བསྒོམ་པ་དང་། ལ་སོགས་པ་ཞེས་པ་བསམ་སྤྱོད་ཀྱི་སྒོམ་དྲན་པར་བྱའོ། །ལྟ་སྒོམ་སྤྱོད་པའི་བསམ་པ་དང་། །ཞེས་པའི་དོན་ནི། ལྟ་སྒོམ་ཞེས་པ་མཐའ་དང་བྲལ་བ་དང་། གསལ་འགྲིབ་མེད་པར་ཁྱེར་བསྒོམ་བྱའོ། །རེས་འདུས་པ་དང་རྨུགས་པར་ཁྱེར་བསྒོམ་བྱའོ། །སྤྱོད་པའི་ཞེས་པ་ཤུགས་འབྱུང་དང་འདུས་པར་བསྒོམ་མོ། །བསམ་པ་དང་ཞེས་པ་ཡར་ལོག་མར་ལོག་ཏུ་བསྒོམ་མོ། །ཆོས་དང་ཆོས་མིན་ལ་སོགས་དང་། །ཞེས་པའི་དོན་ནི། ཆོས་དང་ཞེས་པ་དགེ་བའི་ཕྱོགས་བསམ་པ་དང་། ཆོས་མིན་ཞེས་པ་མི་དགེ་བ་བསམ་པ་དང་། ལ་སོགས་དང་ཞེས་པ་ཐམས་ཅད་བསམ་པའོ། །འདོད་ཆགས་ཞེ་སྡང་གཏི་མུག་དང་། །ཞེས་པའི་དོན་ནི། འདོད་ཆགས་ཞེས་པ་ལུས་ཀྱི་ཡུལ་དུ་རེག་བྱ་འཇམ་པ་དང་། མིག་གི་ཡུལ་དུ་གཟུགས་སྡུག་པ། རྣ་བའི་ཡུལ་དུ་སྒྲ་སྙན་པ་དང་། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་མངར་བ། དེ་དག་ཐམས་ཅད་དྲིལ་ནས་ཕོ་མོའི་འཁྲིག་པའི་བདེ་བའོ། །དེ་དག་ལ་སོགས་པ་བསམ་མོ། །ཞེ་སྡང་ཞེས་པ་འཐབ་པ་དང་རྩོད་པ་འཕྲོག་པའི་བསམ་པ་བྱའོ། །གཏི་མུག་ཅེས་པ་མི་ཤེས་པ་མི་གསལ་བ་འཐིབས་པ་ཉོག་པ་བྱིང་བའི་བསམ་པ་བྱའོ། །དགེ་དང་མི་དགེ་ལ་སོགས་པ། །ཞེས་པའི་དོན་ནི། དགེ་དང་ཞེས་པ་བསོད་ནམས་ཀྱི་ཚོགས་གསོག་པ་དང་ཆོས་བྱ་བའི་བསམ་པ་བྱའོ། །མི་དགེ་ཞེས་པ་སྡིག་དང་རྐུ་བ་དང་འཕྲོག་པའི། ལ་སོགས་པའི་ཞེས་པ་བསམ་ངན་ལ་སོགས་པ་(༥༧)བསྒོམ་པར་བྱའོ། །བསམ་སྤྱོད་རྣམ་པ་སྣ་ཚོགས་བྱ། །ཞེས་པའི་དོན་ནི། བསམ་སྤྱོད་ཅེས་པ་དྲན་ཚད་ལ། རྣམ་པ་ཞེས་པ་མི་འདྲ་བ། སྣ་ཚོགས་བྱ་ཞེས་པ་སྤྲོ་ཞིང་བསྒོམ་པར་བྱའོ། །དེ་ཡང་དགེ་འཕྲོ་ལ་མི་དགེ་བ་ཡག་འཕྲོ་ལ་མི་ཡག་པ་བསྒོམ་པར་བྱའོ། །འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། འདི་ལྟར་ཞེས་པ་སེམས་ཀྱི་སྤྱོད་པ། སུ་ཡིས་ཞེས་པ་སྐལ་བ་ཅན། བྱས་པའི་མི་ཞེས་པ་ཉམས་སུ་བླངས་པའི། སེམས་ཀྱི་མངོན་ཞེན་རང་ཆོད་ནས། །ཞེས་པའི་དོན་ནི། སེམས་ཀྱི་ཞེས་པ་རང་གི། མངོན་ཞེན་ཞེས་པ་ཚེ་འཁོར་བ་ཐོག་མ་མེད་པ་ནས། རང་ཆོད་ནས་ཞེས་པ་ཉམས་སུ་བླངས་པ་ཙམ་གྱིས། འཁོར་འདས་རུ་ཤན་ཕྱེད་པའོ། །ཞེས་པའི་དོན་ནི། འཁོར་འདས་ཞེས་པ་ཁམས་གསུམ་གྱི་སེམས་ཅན་དང་སྐུ་དང་ཞིང་ཁམས་སོ། །རུ་ཤན་ཞེས་པ་དག་མ་དག་གཉིས་སོ། །ཕྱེད་པའོ་ཞེས་པ་འཛིན་པ་བྲལ་བའོ། །དེ་ནས་ཞག་གཅིག་སེམས་རྣལ་དུ་ཕབ་ལ་ཞག་བཅུ་གཉིས་སུ་རུ་ཤན་འབྱེད་པའི་སྤྱོད་པ་བརྩམ་མོ། །དེ་ལྟར་ལོ་རེ་ལན་རེ་ཅི་ལ་ཐུག་ཀྱང་བྱའོ། །དེས་ནི་སེམས་བྱ་རྩོལ་མེད་པར་རྟོགས་ཏེ། སངས་རྒྱས་ཐམས་ཅད་ཀྱི་ཐུགས་བསམ་དུ་མེད་པ་དང་། གཉིས་སུ་མེད་པར་འགྱུར་བའི་དགོས་པ་ཡོད་དོ། །དེ་ལྟར་སྔོན་དུ་འགྲོ་བྱས་ནས། །ཞེས་པའི་དོན་ནི། དེ་ལྟར་ཞེས་པ་ལུས་ངག་ཡིད་གསུམ་རུ་ཤན་ཕྱེ་བས། སྔོན་དུ་ཞེས་པ་ཆོས་ཉིད་མངོན་སུམ་དུ་ངོ་སྤྲོད་པའོ། །འགྲོ་བྱས་ནས་ཞེས་པ་ལུས་ངག་ཡིད་གསུམ་གྱི་ཞེན་པ་ལོག་པར་དེ་མ་བྱས་ན་ཞེན་པ་མ་ལོག་པས་བསྒོམ་དུ་མི་འདོད་དོ། །དེས་ན་སྤྱོད་པ་རྩོམ་པ་གནད་རབ་ཏུ་ཆེའོ། །མངོན་སུམ་དོན་ལ་ལྟ་བའི་ཕྱིར། །ཞེས་པའི་དོན་ནི། མངོན་སུམ་ཞེས་པ་དབང་པོའི་སྤྱོད་ཡུལ་དུ་མངོན་ལ་གང་མངོན་ན་ཆོས་སྐུ་ལོངས་སྐུ་སྤྲུལ་སྐུ་གསུམ། དོན་ལ་ཞེས་པ་མ་ནོར་བའི། ལྟ་བའི་ཕྱིར་ཞེས་པ་ནང་གི་ནམ་མཁའ་རིག་པའི་ཡེ་ཤེས་ཙིཏྟ་ནས། བར་གྱི་ནམ་མཁའ་རྩ་སྦུག་ལ་བཙུད་དེ། ཕྱིའི་ནམ་མཁའ་རླུང་དང་སེར་(༥༨)བུ་མེད་པ་ལ། རྒྱང་ཞགས་ཆུའི་སྒྲོན་མས། ལུས་ངག་ཡིད་ནི་རབ་ཏུ་གཅུན། །ཞེས་པའི་དོན་ནི། ལུས་དང་ཞེས་པ་འདུག་སྟངས་གསུམ། ངག་ཡིད་ཅེས་པ་བསླབ་པར་བྱ་བ་དང་། གནས་པར་བྱ་བ་དང་། གཏད་པའི་འབེམ་དང་མ་བྲལ་བར། རབ་ཏུ་གཅུན་ཞེས་པ་བྱ་བ་དགུ་ཕྲུགས་སུ་བཏང་ལ། ལུས་ནི་སེང་གེ་ལྟ་བུ་དང་། །ཞེས་པའི་དོན་ནི། ལུས་ནི་ཞེས་པ་རང་གི། སེང་གེ་ཞེས་པ་ཆོས་སྐུའི་བཞུགས་སྟངས་ཏེ། ལྟ་བུ་དང་ཞེས་པ་ཙོག་ཚུགས་སུ་འདུག་སྟེ་ལག་པ་གཉིས་རྐང་པའི་ནང་ན་མར་བཙུགས་ལ། མཇིང་པ་ཨེན་ཙམ་དགྱེ་བར་བྱའོ། །དྲང་སྲོང་དང་ནི་གླང་ཆེན་ཚུལ། །ཞེས་པའི་དོན་ནི། དྲང་སྲོང་ཞེས་པ་ནི་སྤྲུལ་སྐུའི་བཞུགས་སྟངས་ཏེ། དང་ནི་ཞེས་པ་ནི་སྤྲུལ་སྐུའི་བཞུགས་སྟངས་ཙོག་པུ་བྱས་ལ་ལག་པ་གཉིས་པུས་མོ་ལ་བསྣོལ་ལ་འཁྱུད་དོ། །གླང་ཆེན་ཚུལ་ཞེས་པ་ལོངས་སྐུའི་བཞུགས་སྟངས་ཏེ། གློས་ཕབ་ལ་ཉལ་ཏེ་ལག་པ་གཉིས་ཀྱི་གྲུ་མོ་ས་ལ་བཙུགས་ལ་ལག་པའི་མཐིལ་གྱིས་ཨོག་ཀོ་བརྟེན། རྐང་པ་གཉིས་པུས་བྲང་སྦྱར་ལ་ཕྱིར་ཕུལ་བ་བཞིན་བྱའོ། །འདི་ལས་གཡོ་བར་མ་བྱས་ན། །ཞེས་པའི་དོན་ནི། །འདི་ལས་ཞེས་པ་བཞུགས་སྟངས་གསུམ་མོ། །གཡོ་བར་ཞེས་པ་དུས་རྒྱུན་དུ། མ་བྱས་ན་ཞེས་པ་གཞན། སངས་རྒྱས་སུམ་སྟོང་ཉིད་དང་ཡང་། །ཞེས་པའི་དོན་ནི། སངས་རྒྱས་ཞེས་པ་སྐུ་གསུམ་གྱི་འཛིན་པ་སངས་ནས་ཕྱོགས་བྲལ་ཀ་དག་ཏུ་རྒྱས་པའོ། །སུམ་སྟོང་ཞེས་པ་གྲངས་སོ། །ཉིད་དང་ཡང་ཞེས་པ་རང་ལ་ཡེ་ནས་གནས་པ། སྐལ་བ་དག་ནི་མཉམ་པ་ཡིན། །ཞེས་པའི་དོན་ནི། སྐལ་བ་ཞེས་པ་དུས་གསུམ་གྱི་སངས་རྒྱས་དང་། དག་ནི་ཞེས་པ་རང་དང་།
མཉམ་པ་ཡིན་ཞེས་པ་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད། ངག་ནི་ཇི་ལྟར་ལྐུགས་པ་བཞིན། །ཞེས་པའི་དོན་ནི། ངག་ནི་ཞེས་པ་རང་གི། ཇི་ལྟར་ཞེས་པ་དཔེ། ལྐུགས་པ་བཞིན་ཞེས་པ་གཞན་ལ་མི་སྨྲ་བར། སུ་དང་བརྡ་ཙམ་ཉིད་མི་བྱ། །ཞེས་པའི་དོན་ནི། སུ་དང་ཞེས་པ་འགྲོ་བ་ཆེ་ཆུང་མེད་པར། བརྡ་ཙམ་ཞེས་པ་ཡི་(༥༩)གེ་དང་ལག་གི། ཉིད་མི་བྱ་ཞེས་པ་རྦད་ཀྱིས་བཅད་དོ། །ཆགས་སྡང་གི་དམག་སྲུང་བའི་ལྕགས་རི་ཡིན་པས་གལ་ཆེའོ། །མ་ཚུགས་ན་ངག་རུ་ཤན་འབྱེད་པའི་སྤྱོད་པ་བརྩམ་པར་བྱའོ། །དེས་ངག་གི་ཆགས་སྡང་རང་གྲོལ་ལ། རང་གཞན་གཉིས་ཀ་འགྲོའོ། །འདི་ལྟར་སུ་ཡིས་བྱས་པའི་མི། །ཞེས་པའི་དོན་ནི། །འདི་ལྟར་ཞེས་པ་སྨྲ་བ་བཅད་པ། སུ་ཡིས་ཞེས་པ་སྐལ་བ་ཅན། བྱས་པའི་མི་ཞེས་པ་ཉམས་ལེན། སེམས་ཀྱི་འཕྲོ་འདུ་རང་ཆོད་དོ། །ཞེས་པའི་དོན་ནི། སེམས་ཀྱི་ཞེས་པ་རང་གི། འཕྲོ་འདུ་ཞེས་པ་ཆགས་སྡང་གི། རང་ཆོད་དོ་ཞེས་པ་ངག་བཅད་པས། འདི་ལྟར་ལུས་ངག་སུས་གཅུན་པ། །ཞེས་པའི་དོན་ནི། འདི་ལྟར་ཞེས་པ་གོང་དུ་བསྟན་པའི་གནད། ལུས་ངག་ཅེས་པ་རང་གི། སུས་གཅུན་པ་ཞེས་པ་དབེན་པའི་གནས་སུ། ཆོས་ཀྱི་དབྱིངས་ཀྱི་སྣང་བ་ལ། །ཞེས་པའི་དོན་ནི། ཆོས་ཀྱི་ཞེས་པ་ངོ་བོ་བརྗོད་ལས་འདས་པའི། དབྱིངས་ཀྱི་ཞེས་པ་རང་བཞིན་རྣམ་པར་དག་པའོ། །སྣང་བ་ལ་ཞེས་པ་ཐུགས་རྗེ་ཀུན་ཁྱབ་ཀྱི། འདི་ཡིས་གོམས་པར་འགྱུར་བ་ཡིན། །ཞེས་པའི་དོན་ནི། འདི་ཡིས་ཞེས་པ་ཉམས་སུ་ལེན་ཚུལ། གོམས་པར་ཞེས་པ་སངས་རྒྱས་ཀྱི་དགོངས་པ་ལ། འགྱུར་བ་ཡིན་ཞེས་པ་འདི་ཉིད་དུ། དེ་ལྟར་ལུས་ལ་སོགས་པ་ཡི། །ཞེས་པའི་དོན་ནི། དེ་ལྟར་ཞེས་པ་ཉམས་ལེན། ལུས་ལ་ཞེས་པ་ཝ་མོའི་ཟུར་འགྲོས། སྐྱེས་བུའི་རྒྱངས་སྟབས། བྱ་རྒོད་ཀྱི་དཔུང་སྟངས། གྱད་ཀྱི་དོར་སྟབས་སོ། །སོགས་པ་ཡི་ཞེས་པ་བཞུགས་སྟངས་དང་གཟིགས་སྟངས་གང་འཐད་པ་བྱའོ། །གནད་ཀུན་རབ་ཏུ་གཟིར་བ་ཡིས། །ཞེས་པའི་དོན་ནི། གནད་ཀུན་ཞེས་པ་ཉམས་སུ་ལེན་པའི། རབ་ཏུ་ཞེས་པ་ལུས་དང་ངག་དང་ཡིད་དག་རླུང་དང་སྒོ་དང་ཡུལ། གཟིར་བ་ཡིས་ཞེས་པ་རབ་ཏུ་དབེན་ཞིང་བཙན་པ། དོམ་དྲེད་དང་ནི་མི་རྒོད་ཀྱི་འགྱུ་བ་མེད་པ། ཁ་ཤར་ལྷོའམ་ལྷོ་ནུབ་བམ་ལྷོར་ལྟ་བ། ཧ་ཅང་དམའ་ཞིང་འཐིབས་པ་མ་ཡིན་པ། ཧ་ཅང་མཐོ་ཞིང་གྲང་བ་མ་ཡིན་པ། རླུང་སེར་བུའི་བཤོར་མེད་ཅིང་ནམ་(༦༠)མཁའ་རྒྱ་ཆེ་བའི་གནས་སུ། རིག་པ་ཉིད་དང་མངོན་སུམ་དུ། །ཞེས་པའི་དོན་ནི། རིག་པ་ཞེས་པ་གཞི་འཛིན་པ་དང་། མཚན་ཉིད་འཛིན་པ་དང་། ཉིད་དང་ཞེས་པ་འབྱེད་བྱེད་ཀྱི་ཤེས་རབ་དང་བཅས་པའོ། །མངོན་སུམ་དུ་ཞེས་པ་དབང་པོའི་སྤྱོད་ཡུལ་དུ་མངོན་པས་གསུམ། བླ་མའི་ལུང་ལས་ཤེས་པ་ཡིན། །ཞེས་པའི་དོན་ནི། བླ་མའི་ཞེས་པ་ཆོས་ཉིད་ཀྱི། ལུང་ལས་ཞེས་པ་ངོ་སྤྲོད་པའི་དུས་སུ་སློབ་མ་བཞུགས་སྟངས་དང་གཟིགས་སྟངས་བྱེད་དུ་བཅུག་ལ་ནམ་མཁའ་ལ་ཅི་མཐོང་ཤོད་ཅིག་བྱས་པས། ཤེས་པ་ཡིན་ཞེས་པ་སྣང་བ་གཞན་དང་མི་འདྲ་སྟེ། ལྟ་སྙིང་འདོད་ལ་འཁྲབ་སྙིང་འདོད། བཤད་སྙིང་འདོད་ལ་གསང་སྙིང་འདོད། དཔེར་ན་གཡུ་འམ་གསེར་སྦྲམ་རྙེད་པའམ། མཛེས་མཐུན་ནང་འཕྲད་པ་ལྟ་བུ་འབྱུང་ངོ་། །དབྱིངས་དང་རིག་པའི་ལྟ་སྟངས་ནི། །ཞེས་པའི་དོན་ནི། དབྱིངས་དང་ཞེས་པ་ནང་དབྱིངས་ཙིཏྟ། བར་དབྱིངས་རྩ་ཤེལ་གྱི་སྦུ་གུ། ཕྱིའི་དབྱིངས་ནམ་མཁའ་སྟོང་པའོ། །རིག་པ་ཞེས་པ་ལུ་གུ་རྒྱུད་ཀྱི་གནད། ལྟ་སྟངས་ནི་ཞེས་པ་ཆོས་སྐུའི་ལྟ་སྟངས་ལྡོག་པའི་ཚུལ་དུ་ལྟ་བ། ལོངས་སྐུའི་ལྟ་སྟངས་ཟུར་གྱིས། སྤྲུལ་སྐུའི་ལྟ་སྟངས་ཕབ་པའི་ཚུལ་གྱིས། སྒྲིབ་བྱེད་བྲལ་བའི་ནམ་མཁའ་ལྟར། །ཞེས་པའི་དོན་ནི། སྒྲིབ་བྱེད་ཅེས་པ་རི་དང་སྤྲིན་དང་ཁུ་རླངས་ཁ་ཆར་གྱིས། བྲལ་བའི་ཞེས་པ་དེ་རྣམས་མེད་ཅིང་རྒྱ་ཆེ་ལ་དྭངས་པའི། ནམ་མཁའ་ལྟར་ཞེས་པ་དུས་རྒྱུན་དུ། ལུས་ཀྱི་གནད་འདུག་སྟངས་གསུམ། ངག་གི་གནད་སྨྲ་བ་བཅད་པ། རླུང་གི་གནད་དལ་བ་བརྟན་པ། སྒོའི་གནད་ཕབ་དང་ལྡོག་དང་ཟུར་གྱིས་ལྟ་བ། སེམས་ཀྱི་གནད་གཏད་པའི་འབེམ་དང་མ་བྲལ་བར། དབྱིངས་ཀྱི་ནང་དུ་ལུ་གུ་རྒྱུད། །ཅེས་པའི་དོན་ནི། དབྱིངས་ཀྱི་ཞེས་པ་ནམ་མཁའི། ནང་དུ་ཞེས་པ་མཐོངས་ལ། ལུ་གུ་རྒྱུད་ཅེས་པ་དཔེར་ན་རིན་པོ་ཆེ་ལ་མཁས་པས་བྱས་པའི་ལུ་གུ་རྒྱུད་འདྲ་བའམ། ཤེལ་དཀར་གྱི་མེ་ལོང་འདྲ་བའམ། ཉ་མིག་གི་རྣམ་པ་ལ། ཆུ་ཐིགས་ཀྱི་རྣམ་པའམ། རྟ་(༦༡)རྔའི་མདུད་པ་ལྟ་བུ་འཇའ་ཚོན་གྱི་རྣམ་པར་འཆར་རོ། །རྣམ་པར་བཞག་ཅིང་འབྲལ་མི་བྱ། །ཞེས་པའི་དོན་ནི། རྣམ་པར་ཞེས་པ་ཤེས་པ། བཞག་ཅིང་ཞེས་པ་ནམ་མཁའ། འབྲལ་མི་བྱ་ཞེས་པ་ཐིག་ལེ་སྟོང་པའི་སྒྲོན་མ་དང་རྒྱང་ཞགས་ཆུའི་སྒྲོན་མ་གཉིས། འདི་ལྟར་སུ་ཡིས་མཐོང་བའི་མི། །ཞེས་པའི་དོན་ནི། འདི་ལྟར་ཞེས་པ་ཐིག་ལེ་སྟོང་པའི་སྒྲོན་མ། སུ་ཡིས་ཞེས་པ་སྐལ་བ་ཅན། མཐོང་བའི་མི་ཞེས་པ་ནམ་མཁའ་ལ། ཐོག་མའི་ཀུན་ཏུ་བཟང་པོ་དང་། །ཞེས་པའི་དོན་ནི། ཐོག་མའི་ཞེས་པ་དུས་གསུམ་གྱི་སངས་རྒྱས་ཐམས་ཅད་ཀྱི། ཀུན་ཏུ་ཞེས་པ་དུས་གསུམ། བཟང་པོ་དང་ཞེས་པ་འཁྲུལ་མ་མྱོང་བའི་སངས་རྒྱས། སྐལ་བ་ཉིད་ནི་མཉམ་པ་ཡིན། །ཞེས་པའི་དོན་ནི། སྐལ་བ་ཞེས་པ་ཐོག་མ་མེད་པ་ནས་བསོད་ནམས་བསགས་སྟོབས། ཉིད་ནི་ཞེས་པ་ཡང་དག་པའི་དགོངས་པ། མཉམ་པ་ཡིན་ཞེས་པ་སྐུ་གསུང་ཐུགས་དང་ཡོན་ཏན་འཕྲིན་ལས་ཐམས་ཅད་དོ། །དེ་ནས་ཐིག་ལེ་མཐོང་བ་ཡིན། །ཞེས་པའི་དོན་ནི། དེ་ནས་ཞེས་པ་བསྒོམས་པས། ཐིག་ལེ་ཞེས་པ་མི་འགྱུར་ཞིང་ཀུན་ལ་ཁྱབ་པའི། མཐོང་བ་ཡིན་ཞེས་པ་དང་པོ་ཐིག་ལེ་སྟོང་པའི་སྒྲོན་མ་རྟ་རྔ་ལྟ་བུ། དེ་གཏད་སྣང་བ་གོང་འཕེལ་བས། །ཞེས་པའི་དོན་ནི། དེ་གཏད་ཅེས་པ་སྟོང་པའི་སྒྲོན་མ་ཙཀྵུ། སྣང་བ་ཞེས་པ་ཆོས་ཉིད་ཀྱི། གོང་འཕེལ་བས་ཞེས་པ་ཉམས་སོ། །རང་ངོ་མཐོང་ལས་འདི་ལྟར་རོ། །ཞེས་པའི་དོན་ནི། རང་ངོ་ཞེས་པ་ཁྲེགས་ཆོད་ལྟོས་མེད་ཀྱི་སྟེང་དུ། མཐོང་ལས་ཞེས་པ་ཐིག་ལེ་སྟོང་པའི་སྒྲོན་མ། འདི་ལྟར་རོ་ཞེས་པ་གོང་ནས་གོང་དུ། ཡར་མཚམས་ལས་ནི་སོར་བཞི་ལས། །ཞེས་པའི་དོན་ནི། ཡར་མཚམས་ཞེས་པ་མིག་གི། ལས་ནི་ཞེས་པ་དཔྲལ་བ་ནས། སོར་བཞི་ལས་ཞེས་པ་ཕར་ནམ་མཁའ་ལ། བྲལ་བའི་སྐྱེས་བུ་སྐལ་བཟང་ལ། །ཞེས་པའི་དོན་ནི། བྲལ་བའི་ཞེས་པ་དབྱིངས་རྣམ་པར་དག་པའི་སྒྲོན་མ། ཐོག་མ་དཀར་པོ་ལང་ལོང་ལས་འོད་ལྔའི་སྣང་བ་དུམ་བུ་དུམ་བུར་སྣང་བ་ཡིན་ནོ། །སྐྱེས་བུ་ཞེས་པ་ཉམས་སུ་ལེན་པའི། སྐལ་(༦༢)བཟང་ལ་ཞེས་པ་ཚོགས་གཉིས་མཐར་ཕྱིན་པའོ། །འཁོར་བར་འཇུག་པ་ག་ལ་སྲིད། །ཅེས་པའི་དོན་ནི། འཁོར་བར་ཞེས་པ་དེ་ལྟ་བུའི་ཉམས་དང་ལྡན་ནས་ཤི་ཡང་། འཇུག་པ་ཞེས་པ་འགྲོ་བ་དྲུག་གི་མངལ་དུ། ག་ལ་སྲིད་ཅེས་པ་འདི་ནི་ཕྱིའི་རྟགས་སྟོན་ཏེ། རང་བཞིན་སྤྲུལ་སྐུའི་ཞིང་ཁམས་སུ་པད་མ་ལས་བརྫུས་ཏེ་སྐྱེས་ཏེ། ལོ་ལྔ་བརྒྱ་ན་སངས་རྒྱ་བ་ལ་ཐེ་ཚོམ་མེད་དོ། །གྲུ་ཆད་རྣམས་ལ་གང་སྣང་བ། །ཞེས་པའི་དོན་ནི། གྲུ་ཆད་ཅེས་པ་ཡུལ་གྲུ་ཙམ། རྣམས་ལ་ཞེས་པ་རྒྱ། གང་སྣང་བ་ཞེས་པ་འོད་ལྔའི་སྣང་བ་གྱེན་འགྲེང་དང་། རྩིབས་ལ་ཤར་བ་ཉིན་མོ་དང་མཚན་མོ་མེད་པར་སྣང་བ་ཡིན་ནོ། །སྤྲུལ་པའི་ཡོན་ཏན་འདི་ཡིས་འགྲུབ། །ཅེས་པའི་དོན་ནི། སྤྲུལ་པའི་ཞེས་པ་སངས་རྒྱས་ཀྱི། ཡོན་ཏན་ཞེས་པ་འཛམ་བུ་གླིང་བྱེ་བ་ཕྲག་བརྒྱར་སངས་རྒྱས་ཀྱི་མཛད་པ་བྱེ་བ་བྲག་བརྒྱ་འགྱེད་པ། འདི་ཡིས་འགྲུབ་ཅེས་པ་གོང་མའི་ཉམས་དེ་ལྟ་བུ་དང་ལྡན་ནས་ཤི་ཡང་། མཐོང་བ་ཡུལ་ཙམ་གང་སྣང་བ། །ཞེས་པའི་དོན་ནི། མཐོང་བའི་ཞེས་པ་རང་གནས་ནས། ཡུལ་ཙམ་ཞེས་པ་ནམ་མཁའ་དང་ཡུལ་ཁམས། གང་སྣང་བ་ཞེས་པ་ཐིག་ལེ་འཁར་ཕོར་རམ་འཁར་གཞོང་ངམ། བསེ་ཕུབ་ཙམ། མུ་ཁྱུད་འཁོར་ཞིང་འོད་དུ་འཁྲུགས་པས། ཚོམ་བུ་ལ་ནི་དེ་བཞིན་ནོ། །ཞེས་པའི་དོན་ནི། ཚོམ་བུ་ཞེས་པ་རིགས་ལྔ་ཡབ་ཡུམ་གྱི། ལ་ནི་ཞེས་པ་དེ་ལྟ་བུའི་ཉམས་དང་ལྡན་ན། དེ་བཞིན་ནོ་ཞེས་པ་རིག་པ་ཚད་ལ་ཕེབས་ནས་འགྲོའོ། །ཕྱིར་སྣང་འགགས་པ་གང་ཡིན་པ། །ཞེས་པའི་དོན་ནི། ཕྱིར་སྣང་ཞེས་ས་རྡོ་རི་བྲག་དང་། རྩི་ཤིང་ནགས་ཚལ་ས་ཆུ་མེ་རླུང་ཉི་ཟླ་སྐར་མའོ། །འགགས་པ་ཞེས་པ་འོད་དང་ཐིག་ལེ། ཐིག་ལེའི་ནང་དུ་རྡོ་རྗེ་སེམས་དཔའ་སྐུ་རྐྱང་གིས། གང་ཡིན་པ་ཞེས་པ་སྐལ་བ་ཅན། ལུས་སེམས་ཕྱེད་པའི་རྣལ་འབྱོར་རོ། །སྐད་ཅིག་མ་ནི་བཅུ་དྲུག་ལ། །ཞེས་པའི་དོན་ནི། སྐད་ཅིག་མ་ནི་ཞེས་པ་ཀུན། བཅུ་དྲུག་ལ་ཞེས་པ་ཟླ་བ་གསུམ་ན། འདི་ཡང་དེ་ལྟར་འགྱུར་བའོ། །ཞེས་པའི་དོན་ནི། འདི་ཡང་ཞེས་པ་ལུས་སེམས་ཕྱེད་པའི་རྣལ་འབྱོར། །དེ་(༦༣)ལྟར་ཞེས་པ་རིགས་ལྔ་ཚོམ་བུའི་དཀྱིལ་འཁོར་དུ། འགྱུར་བའོ་ཞེས་པ་སྣང་བ་ཐམས་ཅད། མ་སྨིན་ལ་སོགས་ཐིག་ལེ་དང་། །ཞེས་པའི་དོན་ནི། མ་སྨིན་ཞེས་པ་ཐིག་ལེ་སྟོང་པའི་སྒྲོན་མ་མཐོང་ནས། ལ་སོགས་ཞེས་པ་དབྱིངས་རྣམ་པར་དག་པའི་སྒྲོན་མ་རྩིབས་ཤར་དང་། གྱེན་འགྲེང་དང་། མདུང་རྩེ་ལྟ་བུའམ། རེ་ལྡེའི་རྣམ་པ་ཙམ་དང་། རིན་པོ་ཆེའི་དྲ་བ་དང་། དྲ་བ་ཕྱེད་པ་དང་། མིག་མངས་རིས་དང་། མིག་ཚགས་ལྟ་བུའམ། མཆོད་རྟེན་དང་ལྕགས་ཀྱུ་དང་མདའ་དང་ཉ་མིག་དང་། ཟ་འོག་གི་གུར་ཁྱིམ་ལྟ་བུ་དང་། དེ་ནས་དབྱིངས་ཐོག་མ་དཀར་པོ་ལང་ལོང་ལས། དེ་བརྟགས་པས་ཁ་དོག་གསལ་བའི་འོད་ལྔས། རང་གནས་པའི་ལུང་པ་ཙམ་མི་སྣང་བ་དང་། དབྱིངས་དང་རིག་པ་ལ་ཉིན་མཚན་མེད་པར་སྣང་བའོ། །ཐིག་ལེ་དང་ཞེས་པ་ཉུང་འབྲུའམ་སྲན་མའི་རྡོག་པོའམ། འཁར་ཕོར་རམ། འཁར་གཞོང་ངམ། བསེ་ཕུབ་ཙམ་དུ་སྣང་བའོ། །དེ་བཞིན་སྐུ་ལ་ཐུག་གི་བར། །ཞེས་པའི་དོན་ནི། དེ་བཞིན་ཞེས་པ་གོང་མའི་ཐིག་ལེ་དེ་རྣམས་ཡུལ་ཁམས་ཙམ་དུ་གང་སྟེ་འོད་ལྔའི་མུ་ཁྱུད་ཀྱིས་རབ་ཏུ་བསྐོར་བའོ། །སྐུ་ལ་ཞེས་པ་ཐིག་ལེ་རེ་རེའི་ནང་དུ་རྡོ་རྗེ་སེམས་དཔའི་སྐུ་རྐྱང་རེ་རེ་སྣང་ངོ་། །ཐུག་གི་བར་ཞེས་པ་སྐུ་རྐྱང་གི་སྣང་བ་མན་ཆོད་ལ། དྲུག་དང་བཅུ་དང་ལྔ་གསུམ་ལ། །ཞེས་པའི་དོན་ནི། དྲུག་དང་ཞེས་པ་དབང་པོ་འབྲིང་གིས་སོ། །བཅུ་དང་ཞེས་པ་དབང་པོ་ཐ་མས་སོ། །ལྔ་གསུམ་ལ་ཞེས་པ་དབང་པོ་རབ་ཀྱིས་སོ། །གདོན་མི་ཟ་སྟེ་ལོངས་སྐུའོ། །ཞེས་པའི་དོན་ནི། གདོན་མི་ཞེས་པ་བློ། ཟ་སྟེ་ཞེས་པ་ཐེ་ཚོམ། ལོངས་སྐུའོ་ཞེས་པ་རིག་པ་ཚད་ལ་ཕེབས་ཏེ་སྣང་བ་ཐམས་ཅད་ཞིང་ཁམས་སུ་གྲོལ་ལོ། །ནང་ལུས་ཟད་པའི་སར་ཕྱིན་ཚེ། །ཞེས་པའི་དོན་ནི། ནང་ལུས་ཞེས་པ་རང་གི། ཟད་པའི་ཞེས་པ་ཟག་པ་རྣམས། སར་ཕྱིན་ཚེ་ཞེས་པ་ཕྱི་ཟད་དེ་ཞིང་ཁམས་རང་སྣང་ངོ་། །ནང་ཟད་དེ་ཆོས་མེད་ཀ་དག་གོ། །བར་ཟད་དེ་འོད་ལུས་ཟང་ཐལ་ལོ། །སོར་མོ་ལ་སོགས་དེ་བཞིན་སྣང་། །ཞེས་པའི་དོན་ནི། སོར་མོ་ཞེས་པ་རང་གི། ལ་སོགས་(༦༤)ཞེས་པ་ལུས་ཀྱི་རྐང་ལག་ཐམས་ཅད། དེ་བཞིན་སྣང་ཞེས་པ་རིགས་ལྔ་ཚོམ་བུའི་ཞིང་ཁམས་སུ། འདི་གཏད་འབྱུང་བ་རང་དེངས་སོ། །ཞེས་པའི་དོན་ནི། འདི་གཏད་ཅེས་པ་རིག་པ་རང་གི་ལུས་ཀྱི་ཞིང་ཁམས་ལ། འབྱུང་བ་ཞེས་པ་ས་ཆུ་མེ་རླུང་གིས་བསྡུས་པའི་ས་རྡོ་རི་བྲག་དང་རང་ལུས་འདི། རང་དེངས་སོ་ཞེས་པ་ནམ་མཁའ་འོད་ཕུང་གིས་བཀང་སྟེ་ཟག་བཅས་མི་སྣང་བར་ཐོག་མ་ཀ་དག་ལ་ཐིམ་མོ། །སྐྱེ་དང་འཇུག་པའི་ཁྱད་པར་གྱིས། །ཞེས་པའི་དོན་ནི། སྐྱེ་དང་ཞེས་པ་རང་དབང་ཐོབ་པ། འཇུག་པའི་ཞེས་པ་རང་དབང་ཐོབ་པའི། ཁྱད་པར་གྱིས་ཞེས་པ་གཞི་གཅིག་པའི། ཆོས་ཀུན་ཟད་པའི་རང་ས་ལ། །ཞེས་པའི་དོན་ནི། ཆོས་ཀུན་ཞེས་པ་ཉམས་སུ་བླང་རྒྱུའི། ཟད་པའི་ཞེས་པ་གོང་དུ་འཕེལ་རྒྱུ། རང་ས་ལ་ཞེས་པ་ངོ་བོ་རང་བཞིན་ཐུགས་རྗེ་གསུམ་གྱི། ཅི་ཡང་འཛིན་པ་མེད་པར་ནི། །ཞེས་པའི་དོན་ནི། ཅི་ཡང་ཞེས་པ་དྲན་བློ། འཛིན་པ་ཞེས་པ་སྐུ་གསུམ་གྱི། མེད་པར་ནི་ཞེས་པ་གང་དུ་ཡང་མ་གྲུབ་པ། གནས་པ་ཡིན་ནོ་སྤྲུལ་པའི་སྐུ། །ཞེས་པའི་དོན་ནི། གནས་པ་ཞེས་པ་ཀ་དག་ལ། ཡིན་ནོ་ཞེས་པ་དེའི་དུས་སུ། སྤྲུལ་པའི་སྐུ་ཞེས་པ་རྡོ་རྗེ་འཆང་ནས་བརྒྱུད་པ་ཟམ་མ་ཆད་པར་ལུང་བསྟན་པའི་རང་སྒྲའོ། །འདི་ནི་འཇུག་པའི་ཤུགས་ཀྱིས་དབང་། །
ཞེས་པའི་དོན་ནི། འདི་ནི་ཞེས་པ་གདམས་ངག་གི་གནད། འཇུག་པའི་ཞེས་པ་མ་དག་པའི་འཁྲུལ་པའི་སེམས་དག་པ་ཡེ་ཤེས་ལ། ཤུགས་ཀྱིས་དབང་ཞེས་པ་ཡང་དག་པའི་གྲོང་འཇུག་གཅིག་ཡིན་ཏེ། སེམས་ཅན་སུམ་སྟོང་ལ་རིག་པ་བཅུག་པས་གྲོལ་ལོ། །སྐྱེ་བའི་རང་དབང་སུས་ཐོབ་པ། །ཞེས་པའི་དོན་ནི། སྐྱེ་བའི་ཞེས་པ་མཚམས་མེད་པའི་ལས་བྱས་ཏེ། མནར་མེད་པའི་དམྱལ་བར། རང་དབང་ཞེས་པ་དེ་ཉིད་ཀྱིས་སངས་རྒྱ་བར་བྱེད་པའི། སུས་ཐོབ་པ་ཞེས་ཆོས་ཉིད་ཟད་པའི་སྣང་བ། དེ་ཡང་དེ་ལ་གཏད་ནས་ནི། །ཞེས་པའི་དོན་ནི། དེ་ཡང་ཞེས་པ་ཐབས། དེ་ལ་ཞེས་པ་རིག་པ། གཏད་(༦༥)ནས་ནི་ཞེས་པ་རང་གི་སོར་མོ་ལ། ཡང་དུས་འདི་ལྟར་བྱས་པ་ན། །ཞེས་པའི་དོན་ནི། ཡང་དུས་ཞེས་པ་ཡང་ཡང་། འདི་ལྟར་ཞེས་པ་ཐབས། བྱས་པ་ན་ཞེས་པ་སེམས་ཅན་གྱི་དོན་བྱ་བར་དགོངས་པ་ཡོད་པ་དེས། སྣང་བའི་རང་སྒྲ་སིལ་སྐད་དེ། །ཞེས་པའི་དོན་ནི། སྣང་བའི་ཞེས་པ་འབྱུང་བ་བཞིའི། རང་སྒྲ་ཞེས་པ་འབྱུང་བ་སོ་སོའོ། །སིལ་སྐད་དེ་ཞེས་པ་འུར་ཤྭོལ། སྔོན་དུ་ལོག་སྟེ་འཁྲུལ་པར་སྣང་། །ཞེས་པའི་དོན་ནི། སྔོན་དུ་ཞེས་པ་རང་གི། ལོག་སྟེ་ཞེས་པ་ས་རྡོ་རི་བྲག་ཏུ། འཁྲུལ་པར་སྣང་ཞེས་པ་དང་པོའི། ཨ་འཐས་ཙམ་ཡང་མེད་དེ། མེ་ལོང་ནང་གི་གཟུགས་བརྙན་ཙམ་དུ། འདི་ནི་སེམས་ཅན་དོན་ཀུན་བྱེད། །ཅེས་པའི་དོན་ནི། འདི་ནི་ཞེས་པ་རྩལ་ཆེན་རྫོགས་པའི་རྣལ་འབྱོར། སེམས་ཅན་ཞེས་པ་འཁྲུལ་པའི། དོན་ཀུན་བྱེད་ཅེས་པ་ངོ་བོའི་འགྲོ་དོན་འཁོར་བ་མ་སྟོངས་པར། རིག་པ་མཉམ་པར་གཅིག་པའི་ཕྱིར། །ཞེས་པའི་དོན་ནི། རིག་པ་ཞེས་པ་གཞི་འཛིན་པའི་རིག་པ་རྡོ་རྗེ་ལུ་གུ་རྒྱུད། མཉམ་པར་ཞེས་པ་ཀུན་ཏུ་བཟང་པོ་ནས་འཇག་མིག་སྲིན་བུ་ཡན་ཆོད། གཅིག་པའི་ཕྱིར་ཞེས་པ་ཡེ་གདོད་མ་ནས། སྟོང་ཕྲག་གསུམ་རྣམས་སེམས་ཅན་གྱི། །ཞེས་པའི་དོན་ནི། སྟོང་ཕྲག་གསུམ་རྣམས་ཞེས་པ་གྲངས་སོ། །སེམས་ཅན་གྱི་ཞེས་པ་འགྲོ་བ་ཆེ་ཆུང་མེད་པའི། འཕོ་བ་ཆེན་པོ་འདིས་འགྲུབ་བོ། །ཞེས་པའི་དོན་ནི། འཕོ་བ་ཞེས་པ་སེམས་ཅན་རྣམས་དག་པ་ཡེ་ཤེས་ཀྱི་སྐུ་རུ། ཆེན་པོ་ཞེས་པ་མ་རྫོགས་དགུ་རྫོགས། གོང་ན་མེད་པ། འདིས་འགྲུབ་བོ་ཞེས་པ་རྩལ་ཆེན་རྫོགས་པའི་རྣལ་འབྱོར་རོ། །དེ་བཞིན་རིམ་དང་ཅིག་ཅར་གྱིས། །ཞེས་པའི་དོན་ནི། དེ་བཞིན་ཞེས་པ་སེམས་ཅན་སུམ་སྟོང་གྲོལ། རིམ་དང་ཞེས་པ་འདས་གྲོངས་མེད་པར་བཞུགས་ནས། ཅིག་ཅར་གྱིས་ཞེས་པ་རང་ཟག་བཅས་མི་སྣང་བར་ལྷག་མེད་ལ་གྲོལ་བའི་དུས་སུ། ལུས་ནི་འདི་ཡིས་གྲུབ་པ་ཡིན། །ཞེས་པའི་དོན་ནི། ལུས་ནི་ཞེས་པ་ཟག་བཅས་ཀྱི། འདི་ཡིས་ཞེས་པ་ཟག་མེད་དུ། གྲུབ་པ་ཡིན་ཞེས་པ་སེམས་ཅན་སུམ་སྟོང་ལ། རང་(༦༦)གི་རིག་པ་བཅུག་པས་དེ་དག་ཐམས་ཅད་ཕུང་པོ་ལྷག་མེད་དུ། དེ་ཀུན་ལུས་ཟད་མཚན་མས་གྲོལ། །ཞེས་པའི་དོན་ནི། དེ་ཀུན་ཞེས་པ་རིག་པ་བཅུག་པའི་སེམས་ཅན། ལུས་ཟད་ཅེས་པ་ཟག་བཅས་མི་སྣང་བར། མཚན་ལས་གྲོལ་ཞེས་པ་དངོས་པོ་དང་། འདི་ཀུན་འབྲས་བུ་ངེས་པའོ། །ཞེས་པའི་དོན་ནི། འདི་ཀུན་ཞེས་པ་ཆོས། འབྲས་བུ་ཞེས་པ་ཡང་དག་པའི། ངེས་པའོ་ཞེས་པ་མཐར་ཐུག་གི་དོན། ས་མཆོག་དཀྱིལ་འཁོར་ཆེན་པོ་འགྲུབ། །ཅེས་པའི་དོན་ནི། ས་མཆོག་ཅེས་པ་བཅུ་དྲུག་རྡོ་རྗེས་ཀ་དག་གི། དཀྱིལ་འཁོར་ཞེས་པ་རང་བཞིན་ལྷུན་གྲུབ་རིགས་ལྔའི། ཆེན་པོ་འགྲུབ་ཅེས་པ་མཐའ་བྲལ་གོང་ན་མེད་པ། འདི་ལྟར་ཐབས་ལས་ཡང་དག་བྱུང་། །ཞེས་པའི་དོན་ནི། འདི་ལྟར་ཞེས་པ་ཉམས་སུ་ལེན་པའི། ཐབས་ལས་ཞེས་པ་ཆོས་ཉིད་རང་སྒྲའི་གདམས་ངག་གི། ཡང་དག་བྱུང་ཞེས་པ་ཕུང་པོ་ལྷག་མེད་དུ་སངས་རྒྱ་བ། སངས་རྒྱས་བསྒྲུབ་པར་འདོད་པའི་མིས། །ཞེས་པའི་དོན་ནི། སངས་རྒྱས་ཞེས་པ་ངོ་བོ་ལ་གཟུང་ཡུལ་སངས་ཏེ་ཐིག་ལེར་རྒྱས། རང་བཞིན་ལ་སྒྲིབ་གཡོགས་སངས་ཏེ་སྐུ་རུ་རྒྱས། ཐུགས་རྗེ་ལ་ཕྱོགས་རིས་སངས་ཏེ་མཁྱེན་པར་རྒྱས། བསྒྲུབ་པར་ཞེས་པ་ཚེ་འདིར། འདོད་པའི་མིས་ཞེས་པ་བཀའ་སྡོད་ལས་ཀྱི་རྣལ་འབྱོར། འདི་ཐབས་ལྡན་ན་དེ་བཞིན་ནོ། །ཞེས་པའི་དོན་ནི། འདི་ཐབས་ཞེས་པ་ཆོས་ཉིད་རང་སྒྲ་བསྟན་པའི་བུ་གཅིག་གི། ལྡན་ན་ཞེས་པ་སྐལ་བ་ཅན་ལ། དེ་བཞིན་ནོ་ཞེས་པ་གོང་མ་སངས། ཇི་ལྟར་རྒྱས་པ་བཞིན་ཉམས་སུ་བླངས་ན། གཞན་སྤྱོད་སྙེམས་བྱེད་ཉིད་ཡིན་པས། །ཞེས་པའི་དོན་ནི། གཞན་སྤྱོད་ཅེས་པ་ཐེག་པ་ཐུན་མོང་བའི། སྙེམས་བྱེད་ཅེས་པ་ཡ་བྲལ་ཡིད་དཔྱོད་ཀྱི་ལྟ་སྒོམ། ཉིད་ཡིན་པས་ཞེས་པ་སྐུ་གསུམ་དབྱེར་མེད་དུ་མ་རྟོགས་པས། དངོས་པོ་མཐོང་བ་མ་ཡིན་ནོ། །ཞེས་པའི་དོན་ནི། དངོས་པོ་ཞེས་པ་རིག་པའོ། །མཐོང་བ་ཞེས་པ་མངོན་སུམ་མོ། །མ་ཡིན་ནོ་ཞེས་པ་ཡ་མ་བྲལ་བས་སོ། །དེ་ཕྱིར་འདི་ཀུན་དཀོན་པའི་ཚིག །ཅེས་པའི་དོན་ནི། དེ་ཕྱིར་ཞེས་པ་(༦༧)ཡིད་དཔྱོད་ཀྱི་ལྟ་སྒོམ་གྱིས་སངས་མི་རྒྱ་བས། འདི་ཀུན་ཞེས་པ་ཡང་དག་པའི་དོན། སྐུ་གསུམ་ཡ་མ་བྲལ་བའི་གནད། རིག་པ་རྡོ་རྗེ་ལུ་གུ་རྒྱུད་མངོན་སུམ་དུ་སྟོན་པའི་རང་སྒྲ། དཀོན་པའི་ཚིག་ཅེས་པ་གང་ནའང་། རྟག་ཏུ་རིན་ཆེན་གཏེར་འདི་ལྟོས། །ཞེས་པའི་དོན་ནི། རྟག་ཏུ་ཞེས་པ་དུས། རིན་ཆེན་ཞེས་པ་དཀོན་པའི་ནོར་བུ། གཏེར་འདི་ལྟོས་ཞེས་པ་སངས་རྒྱས་འབྱུང་བའི། འདི་ལྟར་ཟད་པ་ལ་སྤྱོད་ན། །ཞེས་པའི་དོན་ནི། འདི་ལྟར་ཞེས་པ་སྔར་སངས་རྒྱས་པ། ཟད་པ་ཞེས་པ་འོད་ཕུང་དུ། ལ་སྤྱོད་ན་ཞེས་པ་རྩལ་ཆེན་རྫོགས་པའི་རྣལ་འབྱོར། འདི་ནི་སངས་རྒྱས་སྟོང་ཕྲག་གསུམ། །ཞེས་པའི་དོན་ནི། འདི་ནི་ཞེས་པ་རྩལ་ཆེན་རྫོགས་པའི་རྣལ་འབྱོར་རོ། །སངས་རྒྱས་ཞེས་པ་གོང་དུ་བཤད་པ་དང་མཐུན་ནོ། །སྟོང་ཕྲག་གསུམ་ཞེས་པ་གྲངས། འདི་ཡིས་ལེགས་པར་ཞལ་མཐོང་ཡིན། །ཞེས་པའི་དོན་ནི། འདི་ཡི་ཞེས་པ་རྒྱུད་བསྟན་པའི་བུ་གཅིག་གི་གནད། ལེགས་པར་ཞེས་པ་ཉམས་སུ་བླངས་ན། ཞལ་མཐོང་ཡིན་ཞེས་པ་ཐེ་ཚོམ་མེད་པར་མངོན་སུམ་དུ། དེ་ལྟར་དུ་སངས་རྒྱས་སུམ་སྟོང་ཞལ་མཐོང་བའི་ནུས་པས། སེམས་ཅན་སུམ་སྟོང་གྲོལ་བར་ནུས་པའོ། །འདི་ཚིག་གསང་བ་ཉིད་ལས་བྱུང་། །ཞེས་པའི་དོན་ནི། འདི་ཚིག་ཅེས་པ་ཡང་དག་པའི་དོན། གསང་བའི་ཞེས་པ་མ་ཚོར་བར་ཉམས་སུ་བླངས་པ། ཉིད་ལས་བྱུང་ཞེས་པ་ཕུང་པོ་ལྷག་མེད་དུ་སངས་རྒྱ་བ། སྐྱེས་བུ་རྣམས་ཀྱིས་འདི་ལྟར་བྱ། །ཞེས་པའི་དོན་ནི། སྐྱེས་བུ་ཞེས་པ་སྐལ་བ་ཅན། རྣམས་ཀྱིས་ཞེས་པ་རྗེས་སུ་ཞུགས་པ། འདི་ལྟར་བྱ་ཞེས་པ་ཆོས་ཉིད་ཀྱི་རང་སྒྲ། བསྟན་པའི་བུ་གཅིག་ནས་གསུངས་པ་བཞིན། གསང་ཆེན་ཡང་གསང་དམ་པའོ། །ཞེས་པའི་དོན་ནི། གསང་ཆེན་ཞེས་པ་ཟབ་ལ་རྒྱ་ཆེ་བ། དེ་ཡང་དེ་བཞིན་གཤེགས་པ་རིག་པ་མཆོག་གི་གདུང་སྒྲུབ། རིགས་དྲུག་འཁོར་བ་རྒྱུན་གཅོད་ལ་འདོད་པས། རང་སྐད་ཅིག་གིས་རྡོ་རྗེ་སེམས་དཔའ་རུ་བསྒོམས་ལ། ཐུགས་དཀྱིལ་རྩ་ལྔའི་ངོ་བོ་པདྨ་འདབ་བཞི་(༦༨)དབུས་དང་ལྔ། དཀར་མཐིང་སེར་དམར་ལྗང་པ་རུ། རིགས་ལྔ་ཡབ་ཡུམ་ལྔ་སྐད་ཅིག་དྲན་རྫོགས་སུ་བསྐྱེད་ལ། རང་གི་སྤྱི་བོ། མགྲིན་པ། སྙིང་ག །ལྟེ་བ། གསང་གནས། རྐང་མཐིལ་རྣམས་སུ། ཨ་སུ་ནྲ྇་དུ་པྲེ་ཏྲི། རིགས་དྲུག་ས་བོན་སྦྱང་ཞིང་རྒྱལ་བའི་སྙིང་པོ་འདི་ལ་ཞག་བདུན་བསྒྲུབ་བོ། །ༀ་ཨཱཿཧཱུྃ༔ ཨཱ་ཧཱུྃ་ཏྲཱྃ་ཧྲཱིཿཨཱཿ ཨ་ཧ་རི་ནི་ས། ཨཱ་བཛྲ་གར་བཱཻ་སྭཱ་ཧཱ། ཨཱ་ཥ་མ་དར་ཏེ་སྭཱ་ཧཱ། ཨཱ་དྷརྨ་དྷ་ཏུ་གརྦྷེ་སྭཱ་ཧཱ། སྐྱེས་བུ་དེ་ཉིད་འདས་པའི་ཚེ་ན། ཆོས་སྐུ་ནམ་མཁའ་ལྟ་བུ་དང་། ལོངས་སྐུ་ཉི་ཟླ་ལྟ་བུ་དང་། སྤྲུལ་སྐུ་ས་གཞི་ལྟ་བུས་སེམས་ཅན་གྱི་དོན་འབྱུང་ངོ་། །འཇའ་དང་འོད་དུ་འཁྲུག་ཅིང་རུས་པ་ལ་རིང་བསྲེལ་དཀར་པོ། ཤ་ལ་དམར་པོ། ཆུ་སེར་ལ་སྔོན་པོ། པགས་པ་ལ་སེར་པོ། ཤ་རཱི་རམ་སྲན་མ་ཙམ། སྙིང་ལ་སྣ་ལྔ་འབྱུང་བར་འགྱུར་རོ། །འདི་ནི་བསྒྲུབ་པས་སངས་རྒྱ་བའོ། །ཡང་གསང་ཞེས་པ་སྙིང་ཐིག་གི། དམ་པའོ་ཞེས་པ་ཆོས་ཉིད་ཀྱི་རང་སྒྲ་ཐོས་པས་གྲོལ་བ། མཐོང་བས་གྲོལ་བ། བལྟས་པས་གྲོལ་བ། བཏགས་པས་གྲོལ་བའོ། །ཚེ་འདིར་བསྒོམ་ཞིང་ཉམས་སུ་བླངས་པས་རྟགས་མཐར་ཕྱིན་ཏེ། ཟག་པ་མེད་པར་བསྟན་པའི་ལེའུ་སྟེ་བཞི་པ་རྫོགས་སོ།། །།ས་མ་ཡ། རྒྱ་རྒྱ་རྒྱ།། །།