འཁྲུལ་པ་གཅོད་པའི་གལ་མདོ།
རྒྱ་གར་སྐད་དུ༔ པྲ་བ་བྷེ་ལ༔ བོད་སྐད་དུ༔ འཁྲུལ་པ་གཅོད་པའི་གལ་མདོ༔ བདེ་ཆེན་ཉིད་ནི་རྒྱ་ཆེ་རབ་༼ཆོད་ན་ཟེར་བ་བརྟག་༽ཟབ་ལ༔ སྐུ་གསུམ་ཕྱག་རྒྱ་དྲན་པས་ཕྱག་འཚལ་ལོ༔ གཞི་དང་ལམ་ནི་མ་རིག་འཁྲུལ་སོགས་སུ༔ སྒྲ་དང་དྲི་རོ་རྣལ་འབྱོར་ཀུན་གྱི་རྒྱན༔ མ་སྐྱེས་མི་སྐྱེ་གདོད་ནས་སྐྱེ་དང་བྲལ༔ མི་སྐྱེ་མི་འགག་སྐྱེ་བའི་ཆོ་འཕྲུལ་ཅན༔ མ་སྐྱེས་གདོད་ནས་སྐྱེ་བའི་དོན་རྣམས་ཤེས༔ གང་གི་སྐྱེ་བ་ཤེས་ན་སྐྱེ་མེད་ཐུར་དུ་འཇུག༔ གང་གིས་འགག་པ་ཤེས་ན་འགག་མེད་ཐུར་དུ་འཇུག༔ གང་གིས་འཁྲུལ་པ་ཤེས་ན་འཁྲུལ་མེད་ཟང་ཀ་མའོ༔ འཁྲུལ་པའི་ས་བོན་བསྲེགས་ན་མྱུ་གུ་ལོ་འདབ་རྒྱས༔ དྲན་པའི་འཕྲེང་ཐག་བཅད་ན་དྲན་མེད་ཆེན་པོ་འགྲུབ༔ མཐོ་དམན་དལ་ཁོད་སྙོམས་ན་དམའ་བའི་ལུང་མི་སྣང༔ རང་ཤར་རང་རྐྱེན་ཕྲད་ན་བླ་མའི་ལུང་ཡང་ཡིན༔ གོམས་ཤུགས་སྔོན་དུ་བྱས་ན་འཆི་བའི་འཇིགས་པ་བྲལ༔ བླ་མའི་ལུང་བཞིན་སྤྱད་ན་རྟགས་རྣམས་མྱུར་དུ་འབྱུང༔ གནས་སུ་དུར་ཁྲོད་བརྟེན་ན་མཁའ་འགྲོའི་བྱིན་རླབས་འཇུག༔ སྨྲ་བརྗོད་འཁྲུལ་གཏམ་བཀག་ན་ཞེ་སྡང་སྐྱེ་མི་སྲིད༔ གཅིག་པུར་དལ་བར་འདུག་ན་ཡི་དམ་མངོན་དུ་སྣང༔ རི་དྭགས་བཞིན་དུ་བྱས་ན་ཟས་དང་གོས་མི་དགོས༔ འཁོར་འདས་རུ་ཤན་ཕྱེད་ན་ཕྱིས་ཀྱི་བག་ཆགས་བྲལ༔ རྟག་ཏུ་རླུང་སེམས་གཅུན་ན་ནམ་མཁའི་བྱ་བཞིན་འགྱུར༔ རྟེན་འབྲེལ་ཉིད་ལ་གོམས་ན་དངོས་གྲུབ་སྣ་ཚོགས་འབྱུང༔ ཞེས་བཀོད་(༣༨)པ་ཆེན་པོ་ལས་འཁྲུལ་པའི་དོན་ཉམས་སུ་བླང་བ་དང་སྦྱར་བ་སྟེ་བདུན་པ་རྫོགས་སོ༔
རྒྱ་གར་སྐད་དུ༔ བྷ་ལ་ཀ་ཀ་པ༔ བོད་སྐད་དུ༔ རྟོག་ཚོགས་ཉོན་མོངས་གཞོམ་པ༔ རྡོ་རྗེ་ལུས་ཀུན་རྫོགས་ལ་ཕྱག་འཚལ་ལོ༔ དྲང་སྲོང་ལྟ་བུའི་འདུག་སྟངས་ཀྱིས༔ འབྱུང་བ་ཚ་གྲངས་འདུས་པ་མནན༔ སེང་གེ་ལྟ་བུའི་འདུག་སྟངས་ཀྱིས༔ དྲན་པ་རྣམས་ཀྱི་ཐག་པ་བཅད༔ གླང་པོ་ལྟ་བུའི་འདུག་སྟངས་ཀྱིས༔ འཁྲུལ་པ་དེ་ཉིད་དབང་དུ་བསྡུ༔ སྐྱེས་བུ་ལྟ་བུའི་འདུག་སྟངས་ཀྱིས༔ འབྱུང་བའི་དྲི་མ་ཆམ་ལ་དབབ༔ ཝ་མོ་ལྟ་བུའི་འདུག་སྟངས་ཀྱིས༔ ཕྱི་ཡི་ཡུལ་རྣམས་རྒྱ་ཡིས་གདབ༔ ལྕགས་སྡོང་ལྟ་བུའི་འདུག་སྟངས་ཀྱིས༔ སྒོ་ལྔའི་ཤེས་པ་གཅིག་ཏུ་དྲིལ༔ དེ་ལྟར་འདུག་སྟངས་རྣམ་པ་དྲུག༔ སྐྱེས་ཆེན་སྐལ་བ་རབ་ལྡན་པས༔ གོམས་ནས་གཞན་རྩོལ་བྱ་མི་དགོས༔ ཀྱེ་མ་ཉོན་ཅིག་རྡོ་རྗེ་འཛིན༔ སེང་གེ་ལྟ་བུའི་ལྟ་སྟངས་ཀྱིས༔ འཁྲུལ་པའི་ཡུལ་རྣམས་དུས་གཅིག་བལྟ༔ གླང་པོ་ལྟ་བུའི་ལྟ་སྟངས་ཀྱིས༔ རང་གི་དེ་ཉིད་རྒྱུན་དུ་ལྟ༔ རི་བོ་ལྟ་བུའི་ལྟ་སྟངས་ཀྱིས༔ རིག་པའི་སྣང་བ་མཆེད་པ་བལྟ༔ མདའ་སྲོང་ལྟ་བུའི་ལྟ་སྟངས་ཀྱིས༔ རིག་པ་མི་འགྱུར་སྲངས་སུ་གཞུག༔ ཐི་བྱ་ལྟ་བུའི་ལྟ་སྟངས་ཀྱིས༔ ཕྱི་ཡི་ཆོས་ཅན་དུམ་བུར་བལྟ༔ ལྕེ་སྤྱང་ལྟ་བུའི་ལྟ་སྟངས་ཀྱིས༔ ཉིན་དང་མཚན་མོ་མེད་པར་བལྟའོ༔ ཀྱེ་རྡོ་རྗེ་འཛིན་པ་ཡང་ཉོན་ཅིག༔ མདུད་པ་ལྟ་བུའི་ཤེས་པ་ཡིས༔ ལུས་དང་དབང་པོ་གཅིག་ཏུ་གསལ༔ མདའ་སྲོང་ལྟ་བུའི་ཤེས་པ་ཡིས༔ རླུང་དང་ཤེས་པ་ནང་དུ་དྲང༔ མདུང་ཁྱིམ་ལྟ་བུའི་ཤེས་པ་ཡིས༔ དབང་པོའི་མདོ་ནི་གཅིག་ཏུ་གསལ༔
གཅུད་ཕུར་ལྟ་བུའི་ཤེས་པ་ཡིས༔ ལུས་དང་དབང་པོའི་གནད་རྣམས་གཅུན༔ རྒྱལ་མཚན་ལྟ་བུའི་ཤེས་པ་ཡིས༔ ལུ་གུ་རྒྱུད་ནི་ཡུལ་ལ་གཏད༔ མེ་ལོང་ལྟ་བུའི་ཤེས་པ་ཡིས༔ དེ་ཉིད་གོང་ནས་གོང་དུ་བལྟའོ༔ ཀྱེ་མ་རྡོ་རྗེ་འཛིན་པ་ཁྱོད་ཉོན་ཅིག༔ དེ་དག་རྣམས་ལ་སུ་གོམས་པ༔ ཉོན་མོངས་རྣམས་ནི་རང་དག་གོ༔ རྟོག་པ་ཉིད་ཀྱང་རྟོག་མེད་དུ༔ རྣམ་པར་དག་(༣༩)པ་ལམ་ཡིན་ནོ༔ མ་རིག་ལ་སོགས་ཉོན་མོངས་དྲུག༔ འདུག་སྟང་དྲུག་གིས་གཅུན་ནས་ནི༔ ལྟ་སྟངས་དྲུག་གིས་རྩད་བཅད་ནས༔ ཤེས་པ་དྲུག་གིས་གཏན་མེད་དག༔ དེ་ཕྱིར་ཉོན་མོངས་རང་དག་པའོ༔ ཆུ་ཡིས་ཆུ་རྣམས་ཁྱེར་བ་དང༔ མེ་ཡིས་མེ་རྣམས་བསྲེགས་པ་དང༔ རླུང་གིས་རླུང་རྣམས་དེད་པ་དང༔ ས་ཡིས་ས་རྣམས་མནན་པ་བཞིན༔ རང་གི་གཉེན་པོ་རང་གིས་སོ༔ ཞེས་བཀོད་པ་ཆེན་པོ་ལས་ཉོན་མོངས་རང་དག་གི་གནད་གཏན་ལ་ཕབ་པ་སྟེ་བརྒྱད་པ་རྫོགས་སོ༔