ལྔ་པ། ཁ་སྒྱུར་གྱི་ལེའུ།

དེ་ལྟར་སྒོམ་ཞིང་སྒྲུབ་པའི་དུས་སུ་རང་ཇི་ལྟར་འདོད་པའི་དངོས་གྲུབ་འགྲུབ་པའི་ཁ་བསྒྱུར་ནི། བསྐྱེད་རྫོགས་རྣམས་སྒོམ་ཚུལ་སྔ་མ་བཞིན་བྱས་ཏེ། སྔགས་དང་འོད་ཟེར་གྱི་ཕྲེང་བའི་འོད་ཀྱིས་འཆད་པ་དང་། རྩོད་པ་དང་། རྩོམ་པ་ལ་སོགས་པའི་ཤེས་རབ་གང་འདོད་ཀྱང་དེའི་དངོས་གྲུབ་སངས་རྒྱས་དང་བྱང་ཆུབ་སེམས་དཔའ་ཉན་རང་ལ་སོགས་པའི་ཤེས་རབ་དེ་ཉིད་བསྡུས་ནས་རང་གི་ལུས་ཁེངས་ཏེ་གང་འདོད་པའི་ཤེས་རབ་དང་ལྡན་པར་བསམ། དེ་བཞིན་དུ་དབང་དུ་བྱ་བ་ཕ་རོལ་གྱི་སེམས་དང་། ངག་བརྐུ་བ་དང་འཕྲོག་པ་ལ་སོགས་པ་འཆད་པར་འགྱུར་བ་དེ་དག་དེ་བཞིན་དུ་ཐོབ་པར་བསམས་ལ་བྱས་པས་དེ་ཁོ་ན་བཞིན་དུ་འགྲུབ་པའོ། །ཁ་སྒྱུར་གྱི་ལེའུ་སྟེ་ལྔ་པའོ།། །།