སྐུ་བཞིའི་བདག་ཉིད་གདོད་མའི་མགོན་པོ་དང་སོགས་མགུར།
༈ སྐུ་བཞིའི་བདག་ཉིད་གདོད་མའི་མགོན་པོ་དང་། །དབྱེར་མེད་ཆོས་ཀྱི་རྒྱལ་པོ་སྐུ་གསུམ་གླིང་། །དྲིན་ཆེན་བླ་མ་རྡོ་རྗེ་འཛིན་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐར་དཀའ་འཇིགས་རུང་སྲིད་པའི་རྒྱ་མཚོ་ཆེའི། །བཟོད་མེད་སྡུག་བསྔལ་དྲག་པོར་ཡིད་འབྱུང་ནས། །སྐྱབས་གཞན་འཚོལ་བའི་བསམ་པ་ཀུན་བཏང་སྟེ། །མགོན་ཁྱེད་སྐྱབས་ཀྱི་དམ་པར་མཐོང་བར་ཤོག །དགོས་མེད་ཚེ་འདིའི་བྱ་བའི་བསླུ་ཁྲིད་ཀྱི། །སྒྱུ་མའི་ལྟད་མོ་ཆེད་དུ་མི་གཉེར་བར། །དོན་ཆེན་ཐབས་མཁས་རྒྱལ་བའི་རྣམ་ཐར་བཞིན། །བྱང་ཆུབ་སེམས་ཀྱིས་རང་རྒྱུད་འདུལ་བར་ཤོག །རིན་ཆེན་ནོར་གྱིས་མི་རྙེད་གདམས་པའི་བཅུད། །ཟོལ་མེད་དད་པའི་ཞིང་སར་དྲངས་པ་ལས། །རང་བཞིན་ཁམས་ཀྱི་ནུས་པ་རབ་སད་དེ། །རྫོགས་སྨིན་སྦྱོང་བའི་ལམ་བཟང་མཐར་ཕྱིན་ཤོག །མཉེས་གསུམ་བྱ་བ་སྒྲུབ་ལ་མི་ངལ་ཞིང་། །གང་འདུལ་མཛད་པ་རིས་སུ་མི་འབྱེད་པར། །དད་གུས་དག་པས་ཁྱོད་ཞབས་བསྟེེན་པ་ལ། །རྒྱལ་སྲས་རྟག་ངུའི་སྤྱོད་དང་མཚུངས་པར་ཤོག །དཔུང་བཞི་བསགས་
ཤིང་སྟོབས་གཉིས་བསྐྱེད་པ་ཡིས། །སྦྱིན་སོགས་ཕ་རོལ་ཕྱིན་པའི་འཇུག་ངོགས་ལ། །ཆོས་བརྒྱད་རྟོག་པའི་དྲི་མ་ཀུན་བསལ་ཏེ། །གཏད་ས་བཞི་ཡིས་རང་རྒྱུད་འདུལ་བར་ཤོག །སེམས་ཀྱི་རང་བཞིན་འོད་གསལ་རྫོགས་པ་ཆེ། །བགྲང་ཡས་དུས་གསུམ་རྒྱལ་བའི་དགོངས་པ་སྟེ། །དེ་ཡང་ཡིད་དཔྱོད་བློ་ཡིས་མ་བསྐྱོད་བར། །མ་བཅོས་མཉམ་པར་བཞག་པས་མཐོང་གྱུར་ཅིག །མདོར་ན་བདག་སོགས་ནོངས་པའི་ལས་དབང་དང་། །སྲིད་འདིར་སྐྱེ་བའི་གནས་སྐབས་ཀུན་ཏུ་ཡང་། །མགོན་པོ་ཁྱེད་དང་ནམ་ཡང་མི་འབྲལ་ཞིང་། །ཚད་མེད་ཐུགས་རྗེའི་སྣང་བས་བསྲུང་གྱུར་ཅིག །ཅེས་པའི་གསོལ་འདེབས་སྨོན་ཚིག་དང་འབྲེལ་བ་འདིའང་རྗེ་གང་ལ་མི་ཕྱེད་པའི་དད་པ་ཅན་སྡོམ་བརྩོན་ཚུལ་ཁྲིམས་ཞེས་པས་བསྐུལ་ངོར་སྤྲང་བཙུན་མཁྱེན་བརྩེ་ནོར་བུས་བྲིས་པའོ། །