གསུམ་པ་དགོས་འབྲེལ་གྱི་རབ་ཏུ་དབྱེ་བ།
གསུམ་པ་དགོས་འབྲེལ་གྱི་རབ་ཏུ་དབྱེ་བ་ནི།
དགོས་འབྲེལ་བཞི་གསུམ་བཅུ་གཉིས་ཡོད་པ་ལས། ངག་ཙམ་ལ་ཡོད་པའི་དགོས་འབྲེལ་ཡན་ལག་བཞི་ནི། ངག་དེས་བསྟན་པར་བྱ་བའི་དོན་དེ་ནི་བརྗོད་བྱ་ཡིན་ལ། ངག་ལ་བརྟེན་ནས་ངག་གི་བརྗོད་བྱའི་དོན་རྟོགས་པ་ནི་དགོས་པ་ཡིན་ཞིང༌། ངག་གི་དོན་རྟོགས་པ་ལ་བརྟེན་ནས་སྐྱེས་བུའི་དགོས་དོན་གྲུབ་པ་ནི་ཉིང་དགོས་ཡིན་ནོ། །ཉིང་དགོས་དེ་ནི་དགོས་པ་ལས་བྱུང་ཞིང༌། དགོས་པ་དེ་ངག་ལ་བརྟེན་ནས་བྱུང་བ་ནི་འབྲེལ་པ་ཡིན་ཏེ། དེ་བྱུང་གི་འབྲེལ་པ་ཡིན་ནོ་ཞེས་སྔ་མ་རྣམས་གསུངས་སོ། །གཞན་དེ་ལྟར་ཡིན་ཡང༌། དགོས་པ་དེ་ནི་དཔྱད་དགོས་ཏེ། ངག་གི་བརྗོད་བྱའི་དོན་རྟོགས་པ་དགོས་པ་ཡིན་ན། བྱ་རོག་སོ་རྟོག་གི་བསྟན་བཅོས་ཆོས་ཅན། དགོས་པ་ཡོད་པར་ཐལ། ངག་གི་བརྗོད་བྱ་རྟོགས་པ་ཡོད་པའི་ཕྱིར་རོ། །འདོད་ན། ཊཱི་ཀ་འཐད་ལྡན་ལས། བྱ་རོག་གི་སོ་རྟོག་པ་བཞིན་དུ་འབྲས་བུ་མེད། ཅེས་བཤད་དོ། །དེས་ན་ངག་གི་བརྗོད་བྱའི་དོན་རྟོགས་པ་ཙམ་ནི་དགོས་པ་ཡིན་པར་མ་ངེས་ཀྱི། སྐྱེས་བུའི་དགོས་དོན་འགྲུབ་རུང་གི་དབང་དུ་བྱས་ཏེ་ངག་གི་བརྗོད་བྱའི་དོན་རྟོགས་པ་ནི་དགོས་པ་ཡིན་ནོ་ཞེས་རིགས་སོ། ། དགོས་འབྲེལ་ངག་ལ་ཡོད་པའི་དགོས་འབྲེལ་ཡན་ལག་བཞི་ནི། བསྟན་བཅོས་ལུས་ཀྱི་དགོས་སོགས་ཆོས་བཞི་ཡོད་པ་དེ་བརྗོད་བྱ་ཡིན་ལ། དགོས་སོགས་ཆོས་བཞི་ཡོད་སྟོན་གྱི་ངག་ལ་བརྟེན་ནས་བསྟན་བཅོས་ལུས་ཀྱི་དགོས་སོགས་ཆོས་བཞི་ཡོད་པར་གོ་བ་དེ་དགོས་པ་ཡིན་ཞིང་དེ་ལྟར་གོ་བ་ལ་བརྟེན་ནས་རྟོག་ལྡན་བསྟན་བཅོས་ལ་འཇུག་པ་ནི་ཉིང་དགོས་ཡིན་ནོ། །ཉིང་དགོས་དེ་ནི་དགོས་པ་ལ་བརྟེན་ནས་བྱུང་ཞིང༌། དགོས་པ་དེ་དགོས་འབྲེལ་གྱི་ངག་ལ་བརྟེན་ནས་བྱུང་བ་ནི་འབྲེལ་པ་ཡིན་ནོ། །བསྟན་བཅོས་ལུས་ལ་ཡོད་པའི་དགོས་འབྲེལ་ཡན་ལག་བཞི་ནི། བསྟན་བཅོས་འདིའི་བརྗོད་བྱ་ནི་ངེས་པར་འབྱུང་བའི་ཚུལ་ཁྲིམས་ཡིན་ལ། ཚུལ་ཁྲིམས་དེ་བདེ་བླག་ཏུ་རྟོགས་པ་ནི་དགོས་པ་ཡིན་ཞིང༌། མྱ་ངན་ལས་འདས་པ་ནི་ཉིང་དགོས་དང༌། མྱ་ངན་ལས་འདས་པ་ཐོབ་པ་ནི་ཚུལ་ཁྲིམས་རྟོགས་པ་ལས་བྱུང་ཞིང༌། ཚུལ་ཁྲིམས་རྟོགས་པ་དེ་བསྟན་བཅོས་འདི་ལ་བརྟེན་ནས་བྱུང་བ་ནི་འབྲེལ་པ་ཡིན་ཏེ། ཊཱི་ཀ་ལས། འདིར་བརྗོད་པར་བྱ་བ་ནི་ཆོས་འདི་པ་དག་གི་ཚུལ་ཁྲིམས་ཏེ། ཞེས་དང༌། འདིར་དགོས་པ་ནི་བཅོམ་ལྡན་འདས་ཀྱིས་གསུངས་པའི་ཚུལ་ཁྲིམས་བསྟན་པ་སྟེ། ཞེས་དང༌། དེའི་ཕྱིར་དགོས་པའི་ཡང་དགོས་པ་བརྗོད་པར་བྱ་སྟེ། དེ་ཡང་ངེས་པར་འབྱུང་བ་ཞེས་སྨོས་པས་བསྟན་ཏོ། །ངེས་པར་འབྱུང་བ་ནི་མྱ་ངན་ལས་འདས་པ་སྟེ། ཞེས་པ་དང༌། མདོ་འདི་ནི་ཐབས་ཡིན་ལ་ཚུལ་ཁྲིམས་བསྟན་པ་ནི་ཐབས་ལས་བྱུང་བ་ཡིན་ཏེ། ཐབས་དང་ཐབས་ལས་བྱུང་བའི་མཚན་ཉིད་ནི་འབྲེལ་པ་ཡིན་ནོ། །རྒྱུ་དང་འབྲས་བུའི་མཚན་ཉིད་ཅེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར་རོ། །