རིགས་གསུམ་འཕགས་པའི་གནས་རི་སྦས་ཡོལ་དགའ་བ་ལྗོངས་ཀྱི་དཀར་ཆགས་ཐོས་པ་དོན་ལྡན། སྒོ་འཛི་བླ་མ་དོན་རྟོགས།
ཧྲཱི༔ རིགས་གསུམ་འཕགས་པའི་གནས་རི་སྦས་ཡོལ་དགའ་བ་ལྗོངས་ཀྱི་དཀར་ཆགས་ཐོས་པ་དོན་ལྡན་ཞེས་བྱ་བ་བཞུགས༔
༼ཡོལ་མགོ༽
ཨེ་མ་ཧོ།
སྤྲོས་བྲལ་ཀ་དག་ཆོས་སྐུ་སྣང་མཐའ་ཡས། །
མ་འགག་ལྷུན་གྲུབ་ལོངས་སྐུ་མིག་མི་འཛུམ། །
དབྱེར་མེད་ཟུང་འཇུག་སྤྲུལ་སྐུ་མཚོ་སྐྱེས་རྗེ། །
སྐུ་གསུམ་ཀུན་འདུས་བླ་མར་ཕྱག་བགྱིའོ། །
སྤྱིར་ན་དམ་པའི་བཞུགས་གནས་ས་ཕྱོགས་གང་། །
རང་སྣང་རྣམ་དག་སྐུ་གསུམ་ཞིང་དུ་གྲོལ། །
དེ་ལ་དུས་བབ་པདྨའི་ཕོ་ཉ་བ། །
སྤྲུལ་བའི་གཏེར་སྟོན་གྲུབ་པའི་རིག་འཛིན་རྣམས། །
མཁའ་འགྲོའི་བརྡ་དང་དངོས་ཉམས་རྨི་ལམ་དུ། །
རྟེན་འབྲེལ་འཆར་སྒོ་མ་འགག་སྣང་ཚུལ་འགོད། །
འཛམ་གླིང་ཆ་ལས་གཡུ་ཡུལ་གསང་སྔགས་ཀྱི། །
སྣོད་བཅུད་རྟེན་འབྲེལ་ལེགས་པའི་སའི་ཆ་ཤས། །
སྦས་ཡོལ་དགའ་བ་ལྗོངས་ཞེས་དཔལ་གྱི་རི། །
སྔོན་བྱོན་གྲུབ་ཆེན་ས་ར་ཧ་པ་དང་། །
བཱི་མ་པད་འབྱུང་བཻ་རོ་གཡུ་སྒྲ་དང་། །
ཤྲཱི་བཛྲ་ཀུན་མཁྱེན་ཀརྨ་པ། །
དབུ་ནག་དོན་གྲུབ་རྒྱ་ཚ་ཞལ་དཀར་སོགས། །
རྒྱ་བོད་མཁས་གྲུབ་སྙིགས་མའི་རྒྱལ་བ་འགས། །
གནས་ཆེན་ནོར་བུ་ཕུག་གི་གནས་མགོ་བཀོད། །
ཕྱི་ལྟར་རིགས་གསུམ་མགོན་པོའི་གནས་སུ་བརླབས། །
ནང་ལྟར་སྒྲུབ་པ་བཀའ་བརྒྱད་གཞལ་ཡས་ཁང་། །
གསང་བ་དཔལ་རི་པདྨ་འོད་ཀྱི་ཞིང་། །
མ་ལུས་རབ་འབྱམས་རྒྱལ་བའི་ཞིང་བྱིན་བརླབས། །
ཕྱི་ནང་བར་གསུམ་གསང་བའི་སྐོར་ལམ་རྣམས། །
ནང་སྐོར་སྦས་ཡོལ་སྟེང་འོག་བར་གསུམ་ཡོད། །
ཡོལ་ཆེན་སྤྱན་གཟིགས་ཡོལ་ཆུང་ཕྱག་ན་རྡོར། །
ཆུ་ཆེན་ཕར་བརྒལ་འཇམ་དཔལ་དབྱངས་ཀྱི་རི། །
དེ་ན་བཞུགས་པའི་གྲུབ་རྟགས་མང་པོ་ཡོད། །
གནས་གསུམ་དཔལ་རི་ལྷ་ཆེན་གསང་རྡོར་དང་། །
ཨུ་མའི་མཚལ་ཆེན་མ་ཧཱ་མཛོ་རྗེས་ཡོད། །
ཆུ་བོ་ཆེན་པོར་ཞབས་རྗེས་ཡ་མཚན་ཅན། །
པདྨ་རྒྱལ་མཚན་ཕྱག་རྗེས་ཆོས་གོས་གཏེར། །
ཉི་གྲགས་གསུང་པོད་པདྨ་དྲྭ་བའི་སྐོར། །
གཏེར་སྒོ་མང་བཞུགས་དེ་ཡི་ཡར་སྟེང་ན། །
ལྷ་ལུང་དཔལ་རྡོར་སྐུ་རྗེས་གྲུབ་རྟགས་མང་། །
ཞི་ཁྲོའི་དཀྱིལ་འཁོར་རྣམ་སྲས་བླ་མཚོ་ན། །
དུང་དཀར་གཡས་སུ་འཁྱིལ་བའི་གཏེར་མ་བཞུགས། །
དེ་ནས་ཡར་སོང་བཞུགས་རབ་ཆུ་རྒྱུད་ན། །
དང་པོ་ཨ་ར་པ་ཙ་རང་བྱོན་བཞུགས། །
བཛྲ་གུ་རུ་རང་བྱོན་ཁྱད་འཕགས་ཅན། །
དེ་ནས་ཡར་སོང་སྲིན་མོའི་སྙིང་ཁྲག་མཚོ། །
མཚོ་དེའི་གོང་ན་གླང་ཆེན་རང་བྱུང་ཡོད། །
གླང་ཆེན་ལུས་ལ་རྟགས་བརྒྱད་སྣ་བདུན་འཛོམས། །
དེ་མིན་ཕག་མོའི་ངར་སྐད་སྐོར་གསུམ་གྱི། །
གཏེར་སྒོ་དང་ནི་གླིང་བའི་གྲུབ་རྟགས་མང་། །
དེ་ནས་ཡར་སོང་སྟག་རོང་གསང་རྡོར་རྗེས། །
རྟ་སྔོན་རྗེས་དང་གཙང་ཞུང་ཡོད་པའི་སར། །
གཡང་ཐང་བཀྲ་ཤིས་ར་བར་གནས་གཏེར་ནི། །
ཐང་མགོར་ཁ་བྱང་བརྡ་ཡིག་དག་ཏུ་ཡོད། །
དེ་ནས་ཡར་སོང་ཡར་འཁོར་རྣ་ལུང་མདར། །
སྟག་མོ་རང་བྱུང་འཇམ་དཔལ་རྩ་རྒྱུད་ཀྱི། །
གཏེར་བྱང་བརྡ་ཡིག་རང་བྱོན་མང་དུ་བཞུགས། །
དེ་ནས་ཡར་སོང་ལམ་གྱི་འདབ་ཟུར་ན། །
ཐང་རྒྱལ་ཕྱག་འཁར་སྨྲ་སེང་ཕྲེང་བའི་གཏེར། །
གཏེར་སྒོ་ནོར་བུའི་བརྒྱན་པ འི་གཏེར་སྒོ་གསུམ། །
ཇོ་བོ་ཐང་པའི་ཞབས་རྗེས་སྐྱེས་མཆོག་གི། །
ཕྱག་དཔེའི་གཏེར་སྒོ་ཙན་ཏན་སྡོང་པོ་བརྒྱད། །
དེ་གོང་མཁའ་འགྲོའི་བྲོ་ར་གཏེར་སྒོ་མང་། །
བདེ་བ་ཐང་དང་པདྨའི་ཚལ་ཞེས་ན། །
གཡུ་འབྲུག་རང་བྱོན་ཙན་ཏན་སྦྲུལ་སྙིང་ཡོད། །
དེ་ནས་ཕར་བབ་ཆུ་བོའི་ཤར་ཐང་ན། །
ཀརྨ་པ་དང་ཁྲོ་ཐུང་རྟ་རྗེས་ཡོད། །
མ་ཧཱ་མཛོ་ཁུར་མཛོ་རྗེས་བྱ་བྲལ་ནི། །
པདྨ་རྒྱལ་མཚན་མི་ཉག་འཇམ་དབྱངས་གྲགས། །
ཨ་ར་ཆོས་རྗེ་སོགས་ཀྱི་གྲུབ་རྟགས་མང་། །
དེ་ན་བདུད་སྲིན་འདུལ་ཆས་གླིང་བ་ཡི། །
བྲོ་ར་ལྷ་མོའི་བླ་མཚོ་གེ་སར་ཕུག །
ཚེ་ཆུ་བདུད་རྩི་འཆི་གསོའི་ཆུ་མིག་ཡོད། །
དེ་སོགས་རང་བྱུང་བཀོད་པ་དུ་མ་ཡོད། །
ཡོལ་ཆེན་གསང་སྔགས་གླིང་གི་ཤར་ངོས་ན། །
བྲག་དཀར་སེང་གེ་འདྲ་བའི་ལྟོ་བ་ན། །
འཕགས་པ་མ་རིག་མུན་སེལ་གཏེར་སྒོ་ཡོད། །
སྡུག་བསྔལ་རང་གྲོལ་སྐུ་ནི་རང་བྱོན་ཡོད། །
དེ་ཡི་སྟེང་དུ་རྟ་མགྲིན་སྒྲུབ་གནས་ཡོད། །
དེ་ནས་ཡོལ་ཆུང་མདུན་གཡས་ཆུ་རྒྱུད་ན། །
རྣམ་སྲས་སྐུ་མཁར་ཛམ་ནག་བླ་རྡོ་ཡོད། །
ཞིག་པོའི་གདན་ཁྲི་དཔའ་ཐུལ་འགའ་ཡི་ཆས། །
དམ་ཅན་ཐོ་རྗེས་སྐུ་མཁར་བླ་རྡོ་ཡོད། །
གནས་ཀྱི་སྒོ་སྲུང་ཚེ་རིང་མཆེད་ལྔའོ། །
ཡོས་ཀྱི་ལོ་འདིར་དུས་ཆེན་དང་བསྟུན་ནས་། །
ཡི་དམ་གང་བསྙེན་བགྲང་ནས་གཅིག་བསྐོར་ན། །
དུང་ཕྱུར་ཉེར་ལྔ་ནམ་དུ་དུང་བཅུ་གསུམ། །
ཐེ་ཚོམ་མི་དགོས་དཔའ་བོ་མཁའ་འགྲོའི་བརྡ་། །
སྐྱབས་མགོན་ཛམ་ལྷའི་སྒྲུབ་གནས་གསེར་ཉ་ཕུག། །
དེ་སྟེང་ཐང་རྒྱལ་བྱང་ཆུབ་མཆོད་པའི་རྟེན།
ཤུག་ཀློང་གྲི་བཙན་བྲག་རི་རྡོ་རྗེ་འབར། །
མཚོ་སྨན་ཆུ་མིག་གཉིས་ནི་ཁ་འཐབ་ཡོད། །
ཆུ་བོའི་རྒྱུད་ན་ནོར་བུ་རང་བྱུང་ཡོད། །
དཔའ་ཐུལ་འགའ་ཡི་གྲུབ་རྟགས་མང་པོ་བཞུགས། །
ཧྲཱི༔ བར་སྐོར་རྣ་ལུང་ནས་བརྒྱུད་གཡུ་སྙིང་ཡན། །
ཆུ་མིག་བཀྲ་ཤིས་དཔལ་ན་ཚེ་རིལ་བུ། །
ལྷ་ལུང་དཔལ་གྱི་རྡོ་རྗེའི་རྩིས་རི་མོ། །
ཛམ་ནག་སྒྲུབ་ཆོག་བཀྲ་ཤིས་གཡང་ཕུག་ཡོད། །
ཞིག་པོས་བཏུལ་བའི་དུག་སྦྲུལ་དུམ་བུ་དང་། །
བཀྲ་ཤིས་རྣམ་རྒྱལ་མ་ཎི་ཆོས་འཁོར་གནས། །
སྨོན་ལམ་ཐང་ལ་མ་ཎི་ཀ་ཆེན་ཡོད། །
ཡེ་ཤེས་རྡོ་རྗེའི་གཏེར་སྒོ་རྣམ་གསུམ་ཡོད། །
འཕགས་པ་མ་རིག་མུན་སེལ་སྒྲུབ་ཐབས་ཡོད། །
ཁྱུང་ནག་སྒྲུབ་ཐབས་གཏེར་སྒོ་གྲུ་གསུམ་ཡོད། །
ཞིག་པོའི་རྡོ་དྲིལ་སྐུ་རྗེས་དྲག་བསྙེན་མང། །
དམ་ཚིག་རྡོ་རྗེའི་སྐུ་རྗེས་ཞབས་རྗེས་དང་། །
བཻ་རོའི་རྒྱ་དཔེ་གཤིན་རྗེའི་སྒྲུབ་ཐབས་དང་། །
སྒྲོལ་མ་ཉེར་གཅིག་ཏཱ་རེ་རང་བྱུང་ཡོད། །
ལོ་གྱོན་བསྙེན་པ་སྨན་རི་ཕུན་ཚོགས་གླིང་། །
ལྗོན་ཤིང་བྱིན་ཆགས་བྱ་རིགས་སྐད་སྙན་ཅིང་། །
སྨན་གྱི་གཏེར་སྒོ་བཀྲ་ཤིས་རྟགས་བརྒྱད་ཚང ། །
ཆུ་དང་ལོ་མ་མྱོང་ཀུན་ནད་རྣམས་སེལ། །
ཐར་པ་རྒྱལ་མཚན་ཨ་ར་ཆོས་རྗེ་དང་། །
སྐྱེས་མཆོག་འཇམ་དབྱངས་གྲགས་པ་དེ་གསུམ་གྱིས། །
གྲུབ་རྟགས་མཛད་ནས་གནས་འདི་བྱིན་གྱིས་བརླབས། །
ཆོས་འཁོར་པདྨའི་ཚལ་ཐང་ཞེས་བྱ་ན། །
དྭགས་པོ་བཀྲ་ཤིས་རྣམ་རྒྱལ་ཆོས་འཁོར་བསྐོར། །
བདེ་བ་ཐང་ཞེས་དགེ་མ་བརྩོན་བཟང་མོས། །
མ་ཎིའི་ཆོས་གསུངས་ཞི་དྲག་ཟུང་འཇུག་ཅན། །
རྟེན་བཟང་ཞིག་ཡོད་སྟག་རོང་གཟིག་འཕེན་གྱི། །
སྦྲ་མལ་གཡང་རྟེན་བཀྲ་ཤིས་རྟགས་བརྒྱད་དང་། །
གཡུ་འབུམ་ནོར་བུ་བསམ་འཕེལ་གཏེར་སྦས་ཡོད། །
མི་ཟད་སྲིད་པའི་ནས་རྫོང་ཕྱུག་མོ་དང། །
དམ་ཅན་སྐུ་མཁར་ར་རྗེས་དཔའ་ཐུལ་འགའི། །
གྲུབ་རྟགས་མང་པོ་རྟ་སྔོན་ཁྲི་འབྱམས་རྗེས། །
སྤྱན་གཟིགས་ཞལ་མཇལ་རྡོ་རྐོ་ཀརྨའི་མིང་། །
ཕུན་ཚོགས་དང་ནི་རབ་རྒྱས་རྣམ་གཉིས་ཀྱིས། །
བརྐོས་པའི་མ་ཎི་བྱིན་ལྡན་མང་པོ་ཡོད།
ཨ་མྱེ་ཁྲ་རྒན་གདན་ས་གཡུ་སྙིང་ཞེས། །
ཟངས་མདོག་དཔལ་རི་དང་མཚུངས་ཁྱད་འཕགས་གནས། །
ཞི་དྲག་སྐུ་བརྙན་རང་བྱོན་རྩ་རྒྱུད་ཀྱི། །
སྒྲུབ་ཐབས་གྲུབ་ཆུ་བཀྲ་ཤིས་ཆུ་རྒྱུན་ནི། །
མྱོང་བཀྲུས་འགྲོ་རྣམས་སྒྲིབ་འདག་ཛམ་ནག་གི། །
སྒྲུབ་ཐབས་གཏེར་དང་རྣམ་སྲས་གཏེར་བུམ་ཡོད། །
ཡར་བསྐོར་ས་རའི་ཞབས་རྗེས་བྱ་ཁྱུང་དང་། །
ཨ་ར་པ་ཙ་རང་བྱོན་གཙང་བ་ནི། །
མི་ཕམ་མགོན་པོའི་ཕྱག་ནི་གཉིས་པོའི་རྗེས། །
དེ་སོགས་རང་བྱུང་བཀོད་པ་དུ་མ་ཡོད། །
གནས་ཀྱི་སྒོ་སྲུང་དམ་ཅན་སྡེ་བདུན་ཡིན། །
ལོ་འདིར་དུས་ཆེན་དང་བསྟུན་བསྐོར་བ་གཅིག།
ཡི་དམ་གང་བསྙེན་དུང་ཕྱུར་ལྔ་བཅུའོ། །
ནམ་དུ་ཉེར་ལྔ་གནས་འདུས་མེད་སྐབས་ལ། །
དུས་ཆེན་དང་བསྟུན་ཞི་དྲག་གང་བསྙེན་གྲངས། །
དུང་ཕྱུར་བདུན་ནམ་གསུམ་ནི་ཐེ་ཚོམ་མེད། །
དམ་པས་བསམ་མི་ཁྱབ་ལ་ཚད་མར་ངེས། །
ཧྲཱི༔ མཐའ་སྐོར་རྡོ་རྗེ་གཡུ་ཁྲོམ་མཐིལ་དུ་བཞག །
ཕྱོགས་དང་མཚམས་སུ་མ་ཎི་རང་བྱུང་བརྒྱད། །
ཤར་གྲོང་ཇུ་མདའ་རྨི་མདའ་བོལ་གོང་མདའ། །
རྫུ་འོར་སྦྲུལ་མདའ་ཚ་ཁང་ལ་འུ་བརྒྱད། །
ཕྱི་སྐོར་གནས་དེ་ཐུགས་རྗེ་ཆེན་པོ་དང་། །
གྲུབ་ཆེན་བརྒྱད་ཅུ་རྗེ་འབངས་གྲོགས་གསུམ་སོགས། །
སྔ་ཕྱིའི་གྲུབ་ཆེན་མང་པོས་བརླབས་པའི་གནས། །
འབྲུ་ནོར་ཆོས་གཏེར་གཏེར་ཁུང་ཁ་བྱང་དང་། །
གསེར་གཡུ་དུང་མཚོར་འབྲུ་ནོར་རིན་ཆེན་གཏེར། །
གཏེར་ཆེན་བཅུ་གཉིས་གཏེར་ཕྲན་བརྒྱ་རྩ་དང་། །
སྒོ་སྲུང་དྲེགས་པ་སྡེ་བརྒྱད་མཆེ་ཅན་ཚོགས། །
འཇིགས་གཟུགས་རྫུ་འཕྲུལ་སྣ་ཚོགས་སྟོན་པ་ཡོད། །
ཡོས་ལོ་ནམ་ཤར་དང་བསྟུན་གང་བསྙེན་གྲངས། །
ལན་གཅིག་བསྐོར་བས་དུང་ཕྱུར་བརྒྱ་འགྱུར་རོ། །
ནམ་དུ་ལྔ་བཅུ་པདྨའི་ཐ་ཚིག་བརྡ། །
འདི་ལྟར་ལེགས་བྱས་དགེ་ཚོགས་གངྒའི་རྒྱུན། །
མི་ནུབ་བསྟན་པའི་རྒྱལ་མཚན་སྲིད་རྩེར་བསྔགས། །
བསྟན་འཛིན་དཔོན་སློབ་ཡུན་དུ་འཚོ་གཞེས་ཤིང་། །
བོད་ཆེན་སྤྱི་དང་ཕྱོགས་འདིར་བཀྲ་ཤིས་འཕེལ། །
མ་གྱུར་འགྲོ་བའི་རྒྱས་འགྱུར་རིགས་སད་ནས། །
ཡེ་སངས་རྒྱས་ལ་ཡང་སངས་རྒྱ་བར་ཤོག །
གནས་བསྟོད་འདི་ནི་ཨ་ཚབ་བླ་མ་ཀུན་མཁྱེན་སྐྱབས་ཀྱི་བཀའ་གསུང་ལྟར་སྒོ་འཛི་བླ་མ་དོན་རྟོགས་ཀྱིས་ཕབས་པར་གྲགས། །