འཇམ་དཔལ་ཁྲོ་ཆུ་དུག་གདོང་གི་གཏོར་དབང་བསྐུར་བའི་ལག་ལེན།
འཇམ་དཔལ་ཁྲོ་ཆུ་དུག་གདོང་གི་གཏོར་དབང་བསྐུར་བའི་ལག་ལེན་བཞུགས་སོ།།
ན་མོ་ཡ་མཱནྟ་ཀ་ཡེ། འཇམ་དཔལ་ཁྲོ་ཆུ་དུག་གདོང་གི་གཏོར་དབང་བསྐུར་བའི་ལག་ལེན་ནི་གཏོར་མ་ཟུར་གསུམ་ཁྲམ་རིས་ཅན་རྩང་བདུན་གྱིས་བརྒྱན། མར་གྱི་མེ་རི་དང་ཤས་རྒྱན། འཛོམ་ན་ཆོས་འབྱུང་བསྣོལ་མའམ། འབྲུའི་ཚོམ་བུ་བདུན་བཀོད་པའི་སྟེང་དུ་བཤམས། སྨན་རཀ་མཆོད་པ་རྣམ་ལྔས་བསྐོར། ཁྲོ་ཆུའི་ལས་བྱང་གི་བསྟོད་པ་ཡན་བདག་མདུན་དུས་གཅིག་བསྒོམ་ལ་བསྙེན་པ་སྐབས་དང་བསྟུན། སློབ་མ་ལ་ཁྲུས་བྱས་མཎྜལ་ཕུལ། དབང་བཤད་བྱས་ལ་གསོལ་བ་གདབ་པ་ནི། སློབ་དཔོན་ཆེན་པོ་བདག་ལ་དགོངས། །བདག་ནི་བླ་མ་ལྷ་ལ་རབ་ཏུ་དད། །ལས་ཀྱི་གཤིན་རྗེ་ནག་པོ་ཡི། །བྱིན་རླབས་དབང་རྣམས་སྩལ་དུ་གསོལ། །གསུམ་མམ་གཅིག
བླ་མས། ཁྱོད་ནི་སྣོད་དང་མི་ལྡན་པའི། །མུ་སྟེགས་ཅན་དང་རིགས་ངན་ཅན། །ལོག་ལྟ་ཅན་དང་དམ་མེད་ཅན། །ཉམ་པ་ཅན་དང་ལོག་སེམས་ཅན། །གཡོ་སྒྱུ་ཅན་སོགས་མ་ཡིན་ནམ། །སློབ་མས། ཨེ་མ་སངས་རྒྱས་བསྟན་པ་བསྲུང་བ་དང་། །སློབ་དཔོན་སྐུ་དགྲ་བསྒྲལ་བ་དང་། །དཀོན་མཆོག་དབུ་འཕང་བསྟོད་བྱའི་ཕྱིར། །བདག་ལ་གནང་བོར་མཛད་དུ་གསོལ། །གསུམ་མམ་གཅིག ད་ཁྱེད་རང་སྣོད་དང་ལྡན་པའི་ཕྱིར་སྐྱབས་འགྲོ་འདིའི་ལན་མོ་མཛོད། དུས་འདི་ནས་བཟུང་བྱང་ཆུབ་སྙིང་པོའི་བར། །སོགས་ནས། ལུས་ངག་ཡིད་གསུམ་གུས་པས་
སྐྱབས་སུ་མཆི། ཞེས་པ་སྐྱབས་འགྲོ་ལས་བྱང་ལྟར་དང་། ད་ནས་སེམས་བསྐྱེད་འདིའི་རྗེས་ཟློས་མཛོད། སྣང་གྲག་ཆོས་རྣམས་རང་བཞིན་མེད་པ་ལ། །ཞེས་སོགས་ལས་བྱང་སེམས་བསྐྱེད་བྱའོ། །དེ་ནས་སློབ་མ་ལས་བུམ་ཆུས་བྲན་ལ། ཨོཾ་སྭ་བྷ་ཝ་སོགས། སྟོང་པའི་ངང་ལས་ཆོས་འབྱུང་གྲུ་གསུམ་དམར་ནག་བསྣོལ་མ། ཞེས་སོགས་ནས་གཙོ་བོའི་མངོན་རྟོགས་ལས་བྱང་ལྟར་བྱའོ། །དེའི་དཔྲལ་བར་ཨོཾ་མགྲིན་པར་ཨཱཿཐུགས་ཀར་ཧཱུྃ་དང་ཡས་མཚན་པ། ཐུགས་ཀའི་ཧཱུཾ་དང་ཡ་ལས་འོད་ཟེར་འཕྲོས་པས་ལྷོ་ཕྱོགས་རིམ་པ་བདུན་གྱི་ས་འོག་ལས་ཀྱི་གཤིན་རྗེའི་གྲོང་ཁྱེར་ནས། །ལས་ཀྱི་གཤིན་རྗེ་ཁྲོ་ཆུ་དུག་གདོང་གི་སྐུ་ཆེ་ཕྲ་སྣ་ཚོགས། གསུང་སྔགས་ཀྱི་ཕྲེང་བ། ཐུགས་གནམ་ལྕགས་རྡོ་རྗེ་དང་ཧཱུྃ་དང་ཡ་མཐིང་ནག་ཁ་བ་བུ་ཡུག་ལྟར་སྤྱན་དྲངས་ནས་སློབ་མ་ལ་སིབ་སིབ་ཐིམ་པར་གྱུར། ཧཱུྃ། ཕྱོགས་ཕྱོགས་དག་ཀྱང་ཕ་ཀི་ན།། །ཞེས་སོགས་ལས་བྱང་གི་སྤྱན་འདྲེན་བྱས་པའི་མཇུག་ནས་རྩ་སྔགས་ལ། ཨཱ་ཝེ་ཤ་ཡ་ཨ་ཨཱཿ ཞེས་སྔགས་གསུམ་བདུན་སྤོས་དང་རོལ་མོ་བྱའོ། །ཡེ་ཤེས་པ་དེ་བརྟེན་པར་གྱུར། ཏིཥྛ་བཛྲ༔ རྡོ་རྗེ་མགོར་བཞག་སླར་ཡང་མཎྜལ་ཕུལ། ཨེ་མ། སངས་རྒྱས་བསྟན་པ་བསྲུང་བ་དང་། །རྡོ་རྗེ་སློབ་དཔོན་སྐུ་དགྲ་
འདུལ་བ་དང་། །རུ་ཏྲ་ཆམ་ལ་ཕབ་པ་དང་། །དཀོན་མཆོག་དབུ་འཕང་བསྟོད་བྱའི་ཕྱིར། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་དབང་རྣམས་བདག་ལ་སྩོལ། །གསུམ་མམ་གཅིག སྤྲོན། གཏོར་མ་འདི་ཉིད། ཅེས་གཙོ་བོའི་མངོན་རྟོགས་རྒྱས་པར་འདོན། བསྡུ་ན་རང་གིས་བསྒོམས་པས་འཐུས། ད་གཏོར་མ་འདི་དང་ཁྲོ་ཆུ་དུག་གདོང་གཉིས་སུ་མེད་པའི་སྤྱི་བོར་ཨོཾ་ལས་འོད་ཟེར་དཀར་པོ་འཕྲོས་པས་སངས་རྒྱས་བྱང་སེམས་རྣམས་དང་། ཁྱད་པར་སྐུའི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། དེ་རྣམས་ཀྱི་འགྱུར་མེད་སྐུ་ཡི་དངོས་གྲུབ་ཐམས་ཅད་འོད་ཟེར་དཀར་པོའི་རྣམ་པ་དང་བདུད་རྩིའི་དཀར་པོའི་རྒྱུན་བབ། ཁྱེད་རང་གི་སྤྱི་བོ་ཚངས་པའི་བུ་ག་ནས་མར་ཞུགས་པས་ལུས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་དག །སྐུ་ཡི་དངོས་གྲུབ་མ་ལུས་པ་ཐོབ་པའི་མོས་པ་མཛོད་ཅིག །གཏོར་མ་ལག་ཏུ་ཐོགས་ལ་དབྱངས་དང་བཅས་པས། ཧཱུྃ། གཏོར་སྣོད་བྷནྡྲ་ཡངས་པའི་དཀྱིལ་འཁོར་དུ། །གཏོར་མ་ཤ་ལྔ་བདུད་རྩི་ཡེ་ཤེས་ལྔ། །ཟག་མེད་བདུད་རྩི་དཔལ་གྱི་གཏོར་མ་འདི། །ལས་ཀྱི་གཤིན་རྗེའི་སྐུ་དང་གཉིས་སུ་མེད། །སྐལ་ལྡན་རིགས་ཀྱི་བུ་
ལ་དབང་བསྐུར་བས། །སྐུ་མཆོག་གཡོ་མེད་སྐུ་ཡི་དབང་ཐོབ་ཤོག །ཅེས་རྩ་སྔགས་དང་། ཀཱ་ཡ་བཛྲ་ཨོ། ཞེས་སྤྱི་བོར་བཞག སྤྲོ་ན། དབང་དོན་བཤད་པ་དང་། བསྟོད་པ་ཤོ་ལོ་ཀ སྐུ་ཡི་བཀྲ་ཤིས་ཤོག སྦྱར་བ་འགྲེས་སོ། །མེད་ཀྱང་ཆོག་གོ། །དེ་བཞིན་དུ། མགྲིན་པའི་ཨཱཿལས་འོད་ཟེར་དམར་པོ་སོགས་འདྲེས། ཧཱུྃ། གཏོར་སྣོད་སོགས་ནས། གསུང་མཆོག་འགག་མེད་གསུང་གི་དབང་ཐོབ་ཤོག རྩ་སྔགས་དང་། ཝཱཀ་བཛྲ་ཨཱཿ མགྲིན་པར། ཐུགས་ཀའི་ཧཱུཾ་ལས་འོད་ཟེར་སྔོན་པོ་སོགས། ཧཱུྃ། གཏོར་སྣོད་སོགས། ཐུགས་མཆོག་གཡོ་མེད་ཐུགས་ཀྱི་དབང་ཐོབ་ཤོག །རྩ་སྔགས་དང་། ཙིཏྟ་བཛྲ་ཧཱུྃ། སྙིང་ཁར། ལྟེ་བའི་འོད་ཟེར་སེར་པོ་འཕྲོས་པས་སངས་རྒྱས་བྱང་སེམས་རྣམས་དང་། ཁྱད་པར་ཡོན་ཏན་གྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ་ཡོན་ཏན་གྱི་དངོས་གྲུབ་མ་ལུས་པ་ཐམས་ཅད་འོད་ཟེར་སེར་པོ་དང་བདུད་རྩི་སེར་པོའི་རྒྱུན་བབ་ལྟར་ཞུགས་པས་ཁྱེད་རང་རྣམས་ཀྱི་ལུས་ཀྱིས་སྒོ་ནས་བསགས་པའི་སྡིག་པ་དང་སྒྲིབ་པ་དག །ཡོན་ཏན་རེ་བཀང་གི་དངོས་གྲུབ་མ་ལུས་པ་ཐོབ་པའི་མོས་པ་མཛོད་ཅིག །ཧཱུྃ། གཏོར་སྣོད་སོགས། ཡོན་ཏན་རེ་བཀང་དབང་མཆོག་ཐོབ་པར་ཤོག །རྩ་
སྔགས་དང་། གུ་ཎ་ཨ་བྷི་ཥིཉྩ་སྭཱ། ལྟེ་བར། གསང་གནས་ནས་འོད་ཟེར་ལྗང་གུ་འཕྲོས་པས་སངས་རྒྱས་བྱང་སེམས་རྣམས་དང་། ཕྲིན་ལས་ཀྱི་དངོས་གྲུབ་མ་ལུས་པ་ཐམས་ཅད་འོད་ཟེར་ལྗང་གུ་སོགས། ཁྱེད་རང་རྣམས་ཀྱི་ལུས་ལ་ཞུགས་པས་སྡིག་པ་དང་སྒྲིབ་པ་ཐམས་ཅད་དག །ཕྲིན་ལས་ཀྱི་དངོས་གྲུབ་མ་ལུས་པ་ཐོབ་པའི་མོས་པ་མཛོད་ཅིག ཧཱུྃ། གཏོར་སྣོད་སོགས། དགྲ་བགེགས་ཚར་གཅོད་དབང་ཐོབ་ཤོག །རྩ་སྔགས་མཇུག་ཏུ། ཀརྨ་ཨ་བྷི་ཥིཉྩ་ཧཱ། ཞེས་ལྔ་པོ་ལ་འོད་ཟེར་སྤྲོ་བསྡུ་སོགས་གོང་གི་འགྲེས་ཤེས་པར་བྱའོ། །དེ་ནས་གཏོར་མ་ལ་བརྟེན་ནས་བཀའ་བསྒོ་བ་ནི། གཏོར་མ་འདི་ཉིད་འཇམ་དཔལ་ཁྲོ་ཆུ་དུག་གདོང་ལས་གཤིན་དྲུག་དང་བཅས་པའི། སྟེང་གི་ཆ་ལ་རྩ་བརྒྱུད་བླ་མ། བར་གྱི་ཆ་ལ་ཡི་དམ་ལྷ་ཚོགས། འོག་གི་ཆ་ལ་ཆོས་སྐྱོང་དམ་ཅན་ལས་ཀྱི་གཤིན་རྗེའི་ཚོགས་དང་བཅས་པ་སྤྲིན་འཁྲིགས་པ་ལྟར་ཁྱེད་རང་གི་སྤྱི་བོར་བྱོན་ནས་དབང་བསྐུར་བྱིན་གྱིས་བརླབས་པས་ཡེ་ཤེས་པ་ཐམས་ཅད་འོད་དུ་ཞུ་སྟེ་ཁྱེད་རང་ལ་ཐིམ་པས་འཇམ་དཔལ་ཁྲོ་ཆུ་དངོས་དང་དབྱེར་མེད་པར་གྱུར་སྙམ་པའི་ངང་ལ་མི་དམིགས་པའི་ངང་ལ་ཞོག་མཛོད། སྤྲོ་ན་གཏོར་མ་
ལག་ཏུ་ཐོགས་ལ་བསྟོད་པ་གང་རུང་ཞིག་གྱེར། མེད་ཀྱང་ཆོག །བླ་མ་བརྒྱུད་པ་ཧ་ལམ་པ་དང་། གཙོ་འཁོར་བདུན་གྱི་མཚན་ལས་བྱང་ལྟར་བསྒྲུང་ལ་བཀའ་བསྒོ་སྨོན་ལམ་དབང་སྤྱི་ལྟར་གང་འོས་བྱའོ། །དེ་ནས་སྔགས་པ་ཉམས་སུ་ལེན་མཁན་ཡིན་ན་གཏོར་མ་ལག་ཏུ་གཏད་ལ་འཁོར་ལས་གཤིན་རྣམས་ཀྱི་མིང་བརྗོད་ལ་བཀའ་བསྒོ་གང་འོས་སྤྱི་ལྟར་བྱ། ད་མེ་ཏོག་སྔོན་པོའི་ཕྲེང་བ་རེ་ཕུལ་བའི་མོས་པ་མཛོད་ལ། བཅོམ་ལྡན་བདག་གིས་བཟུང་ལགས་ཀྱི། །སོགས། སློབ་དཔོན་གྱི་ཐུགས་ཀ་ནས་སྔགས་ཕྲེང་བྱུང་སློབ་མའི་ཞལ་དུ་ཞུགས་ཐུགས་ཀར་འཁོད་པར་མོས་ལ། བསྙེན་སྔགས་དང་བཟློག་སྔགས་དང་། གལ་ཆེ་ན་བསད་སྔགས་དང་གསུམ། རྡོ་རྗེའི་ཕྲེང་བ་ནས་བཟུང་ལ་བྱ། སྔགས་ཕྲེང་མེ་ཏོག་གི་ཕྲེང་བ་བྱས་ནས་སྤྱི་བོར་བཅིངས་བའི་མོས་པ་མཛོད། རྡོ་རྗེ་མེ་ཏོག་མགོར་བཞག་ལ། བཅོམ་ལྡན་འདི་ལ་བསྩལ་ལགས་ཀྱིས། །སོགས་བྱས། དེས་ཁྲོ་ཆུའི་གཏོར་དབང་ཐོབ་ནས་སྒྲུབ་པ་སྲུང་ཟློག་སོགས་རུང་བ་ཡིན་པས། འདི་ལ་ཡི་དམ་ཆོས་སྐྱོང་དབྱེར་མེད་དུ་བཟུང་བའི་མོས་པས་འདི་ཡི་རྗེས་ཟློས་མཛོད། གཙོ་བོས་ཇི་ལྟར་སོགས་བྱས། གཏང་རག་གི་མཎྜལ་ཕུལ་མཛོད། ས་གཞི་སྤོས་ཆུས་བྱུག །སོགས་བྱ། སྤྱིར་ཁྲོ་ཆུའི་དབང་འདི་བསྐུར་བ་ལ། རང་བསྙེན་པ་ཐེམས་པ་སློབ་མ་
དམ་ཚིག་ཅན་གལ་ཆེ་སྟེ། ས་ཡ་གཉིས་ཀྱིས་དངོས་གྲུབ་དབང་། །གྲངས་ལ་ངེས་མེད་རྟགས་ལ་གཅེས། །དྲོད་རྟགས་མ་ཐོན་རང་འདོད་ཀྱི། །སློབ་དཔོན་སློབ་མ་གཉིས་ཀ་ཕུང་། །ཤི་ན་རྡོ་རྗེ་དམྱལ་བར་འགྲོ། །སྲོག་དང་འདྲ་བས་སྙིང་ལ་འཆང་། །གསེར་དང་འདྲ་བས་ཕུགས་སུ་སྦོས། །ས་སྟེང་ནོར་གང་སྙིང་ལ་འཆང་། །སྙིང་དང་འདྲ་བའི་བུ་གཅིག་གིས། །གསེར་རམ་སྙིང་གི་ནོར་ཕུལ་ནས། །རྟག་ཏུ་བླ་མར་ཞུས་ལ་བསྟེན། །དེ་འདྲ་མིན་པའི་ཁ་འཛམ་གཡོ་སྒྱུ་ཅན། །བླ་མ་གསང་ཞིང་མན་ངག་རྐུ། །མཁས་པ་གཡོ་སྒྱུ་ཅན་གྱི་མིང་། །དེ་འདྲ་དག་ལ་བྱིན་པ་ན། །ཚེ་འདིར་ལས་ཀྱི་གཤིན་རྗེས་སྙིང་བཀའ་འོ། །ཕྱི་མ་རྡོ་རྗེའི་དམྱལ་བར་འགྲོ། །དེ་བས་དམ་ལ་མ་འདའ་ཞིག །ཞེས་སོ། །ས་ཡ་གཉིས་ནི་འབུམ་ཕྲག་ཉི་ཤུའོ། །རྟགས་ནི་གཞུང་དུ་གསལ་ཞིང་། རྟགས་ཡིག་སྤྱི་དང་མཚུངས། འདི་ནི་ལས་ཀྱི་གཤིན་རྗེའི་ངན་སྔགས་ཡིན་པས། གསུམ་ལས་སྤེལ་ན་སྡིག་ཆེའོ། གནང་བས་དགོངས་མཛོད་ཁྲོ་ཆུའི་གཏོར་དབང་ལག་ལེན་དུག་དབང་གཞུང་ནས་ཁོལ་དུ་ཕྱུང་བ་༧ རཱ་ག་ཨ་སྱས་བཀོད་པ་སངས་རྒྱས་བསྟན་པ་སྲུང་བའི་རྒྱུར་གྱུར་ཅིག །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།