རྒྱུད་བཤད་ཐབས་ཀྱི་མན་ངག་བཤད་པ།

ད་ནི་སྤྱི་དོན་གསུམ་པ་རྒྱུད་བཤད་ཐབས་ཀྱི་མན་ངག་བཤད་པར་བྱའོ། །དེ་ལ་བཤད་ཐབས་ཀྱི་མན་ངག་དཔག་ཏུ་མེད་ཀྱང་། བླ་མ་གོང་མ་རྣམས་ཀྱི་གསུང་ནི་དྲུག་སྟེ། ཉན་པ་པོས་རྟོགས་སླ་ཞིང་གཟུང་བདེ་བར་བྱ་བའི་ཕྱིར། གདམས་ངག་དྲུག་གིས་བཤད་པ་དང་། སེམས་ཀྱི་རྒྱུད་རྒྱུན་ཆགས་གཅིག་གཏན་ལ་དབབ་པ་ལ་དགོངས་ནས་རྒྱུད་གསུམ་གྱིས་བཤད་པ་དང་། དབང་ལམ་དུ་བྱ་བའི་ཕྱིར་བདག་ཉིད་ཅན་གསུམ་གྱིས་བཤད་པ་དང་། འབྲས་བུ་སྐུ་བཞི་ལམ་དུ་བྱ་བའི་ཕྱིར་གནས་པ་བཞིས་བཤད་པ་དང་། སྤང་བྱ་མི་མཐུན་པའི་ཕྱོགས་སྤོང་བ་ལ་དགོངས་ནས་དག་པ་གསུམ་གྱིས་བཤད་པ་དང་། སྣོད་མ་ཡིན་པ་ལ་གབ་ཅིང་གསང་བའི་དོན་དུ་གསང་བ་རྣམ་པ་བདུན་གྱིས་བཤད་པ་སྟེ་དྲུག་ཏུ་གསུངས་སོ། །དེ་ལ་དང་པོ་གདམས་ངག་དྲུག་ནི། དཔལ་ནམ་མཁའ་དང་མཉམ་པའི་རྒྱུད་ལས་གསུངས་པ། ཡི་གེ་དང་ནི་ཡན་ལག་དང་། །བསྡུས་པའི་དོན་དང་སྤྱི་ཡི་དོན། །སྦས་དང་དེ་བཞིན་མཐར་ཐུག་པར། རྒྱུད་རྣམས་ངེས་པ་ཁོ་ན་ཡིན། །ཞེས་གསུངས་ཏེ། བརྗོད་པར་བྱ་བའི་དོན་བཤད་པར་བྱ་བའི་མན་ངག་གསུམ་དང་། དེ་རྗོད་པར་བྱེད་པའི་སྒྲ་འཆད་ལུགས་ཀྱི་མན་ངག་གསུམ་མོ། །དང་པོ་ནི་སྤྱིའི་དོན་དུ་བཤད་པ་དང་། སྦས་པའི་དོན་དུ་བཤད་པ་དང་། མཐར་ཐུག་པའི་དོན་དུ་བཤད་པའོ། །སྒྲ་གསུམ་ནི་ཡན་ལག་གི་དོན་གྱིས་བཤད་པ་དང་། ཡི་གེའི་དོན་གྱིས་བཤད་པ་དང་། མན་ངག་གི་དོན་གྱིས་བཤད་པའོ། །དེ་ལ་སྤྱིའི་དོན་ཞེས་བྱ་བ་ནི་གཉིས་ཀྱི་ཐུན་མོང་དུ་གྱུར་པ་ལ་བྱའོ། །དེ་ལའང་གཉིས། ཕ་རོལ་ཏུ་ཕྱིན་པའི་ཐེག་པ་སྤྱི་དང་། བསྐྱེད་པའི་རིམ་པ་སྤྱིའོ། །དང་པོ་ནི་ཕ་རོལ་ཏུ་ཕྱིན་པའི་ཐེག་པ་ནས་བཤད་པའི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་ལམ་ལྔ་དང་། ས་བཅུ་ལ་སོགས་པ་ཉིད་གསང་སྔགས་ཀྱིའང་བརྗོད་བྱར་བསྟན་པས་ཐུན་མོང་བ་ཡིན་པས་སྤྱིའོ། །བསྐྱེད་རིམ་སྤྱི་ནི་ལམ་བསྐྱེད་པའི་རིམ་པ་ནི་ཕྱག་རྒྱ་ཆེན་པོ་མཆོག་སྒྲུབ་པས་ཀྱང་བསྒོམ་ལ། ཐུན་མོང་གི་དངོས་གྲུབ་སྒྲུབ་པས་ཀྱང་བསྒོམ་པར་བྱ་བས་ཐུན་མོང་ཡིན་པས་སྤྱིའོ། །དེ་ལྟར་སློབ་དཔོན་ཟླ་གྲགས་ཀྱིས་ཀྱང་བཤད་པ། མདོ་དང་སོགས་པ་མངོན་འདུལ་ལ་ནི་རབ་ཞུགས་པའི། །འགྱོད་པ་སྟེ་སྔགས་ལ་ཡིད་མི་ཆེས་པ་ཟློག་པར་བྱེད་པའི་སྐབས་སུ་བྱང་ཕྱོགས་སོགས་བསྟན་པ་དང་། །བསྐྱེད་པའི་རིམ་དང་ལྡན་པ་དག །སྤྱི་ཡི་དོན་ནི་ཡིན་པར་བཤད། །ཅེས་བཤད་པ་ལྟ་བུའོ། །སྦས་པའི་དོན་ཞེས་བྱ་བ་ནི་གོང་མའི་ཡུལ་དུ་གྱུར་ལ་འོག་མའི་ཡུལ་དུ་མ་གྱུར་པས་སྦས་པའོ། །དེ་ལ་གོང་མ་ནི་མཆོག་དབང་གསུམ་ཐོབ་པའི་ཡུལ་ཡིན་ལ། འོག་མ་བུམ་དབང་ཐོབ་པའི་ཡུལ་མ་ཡིན་པས་སོ། །དེ་ནི་ཐབས་ལས་མིང་བཏགས་ན་རང་བྱིན་བརླབས་ཀྱི་ཐབས་དང་། དཀྱིལ་འཁོར་འཁོར་ལོའི་ཐབས་ཞེས་བྱ་ལ། བྱང་ཆུབ་ཀྱི་སེམས་ལས་མིང་བཏགས་ན་ཀུན་རྫོབ་བྱང་ཆུབ་སེམས་དང་། དོན་དམ་བྱང་ཆུབ་སེམས་ཞེས་བྱ་སྟེ། ཧེ་བཛྲ་ལས། གཞན་ལུས་ལ་བརྟེན་པ་དཀྱིལ་འཁོར་འཁོར་ལོའི་ཐབས་དང་ནི། །མ་བརྟེན་པ་རང་བྱིན་བརླབ་པའི་རིམ་པས་ཀྱང་། །རགས་ཤིང་རྟོགས་བསླ་བ་རྟེན་ཀུན་རྫོབ་བྱང་ཆུབ་ཀྱི་སེམས་དང་ཕྲ་ཞིང་རྟོགས་པ་དཀའ་བ་བརྟེན་པ་དོན་དམ་ཚུལ་ཅན་གྱི། །བྱང་ཆུབ་སེམས་ནི་རབ་ཏུ་བསྐྱེད། །ཅེས་སོ། །ཡེ་ཤེས་ལས་མིང་བཏགས་ན་རང་བྱུང་དང་ལྷན་ཅིག་སྐྱེས་པའི་ཡེ་ཤེས་ཞེས་བྱའོ། །མདོར་ན་གསང་བ་ཆོས་ཀྱི་དཀྱིལ་འཁོར་གསུམ་ལ་བློ་གཏད་དེ་བཤད་པ་མཐའ་དག་སྦས་དོན་ནོ། །དེ་ལ་དཀྱིལ་འཁོར་གསུམ་ནི། དཀྱིལ་འཁོར་ལུས་སུ་གསུངས་པ་སྟེ། །དཀྱིལ་འཁོར་བྷ་གར་བརྗོད་པ་ཉིད། །དཀྱིལ་འཁོར་བྱང་ཆུབ་སེམས་ཉིད་དེ། །དཀྱིལ་འཁོར་གསུམ་ནི་བརྟག་པར་བྱ། །ཞེས་གསང་བ་འདུས་པ་དང་སཾ་པུ་ཊའི་རྒྱུད་ཕྱི་མ་གཉིས་ཀ་ལས་བཤད་དོ། །དེ་ལ་ལུས་རགས་པ་དང་ཕྲ་བ་རྩའི་གནས་ལུགས་ཀྱི་བར་སྟོན་པ་ནི་ལུས་ཀྱི་དཀྱིལ་འཁོར་རོ། །ཐབས་ཤེས་རབ་ཀྱི་རྡོ་རྗེ་པདྨ་དང་རྩ་ཡི་གེའི་གནས་ལུགས་སྟོན་པ་ནི་བྷ་གའི་དཀྱིལ་འཁོར་རོ། །ཀུན་རྫོབ་ཐིག་ལེའི་གནས་ལུགས་དང་དོན་དམ་དེ་ལས་སྐྱེས་པའི་བདེ་སྟོང་གི་ཏིང་ངེ་འཛིན་གྱི་ཚུལ་སྟོན་པ་ནི་བྱང་ཆུབ་སེམས་ཀྱི་དཀྱིལ་འཁོར་རོ། །དེ་དག་གི་ཞར་ལ་དེ་རྣམས་ལ་མངོན་དུ་བྱེད་པ་སྙིང་པོ་ཡེ་ཤེས་རླུང་སྟོན་པ་རྣམས་ཀྱང་སྦས་པར་བསྡུའོ། །མཐར་ཐུག་པ་དེ་ནི་དེ་ལས་གོང་དུ་བོགས་དབྱུང་དུ་མེད་པས་མཐར་ཐུག་པ་སྟེ་སངས་རྒྱས་ཀྱི་ཡེ་ཤེས་སོ། །དེའང་རྣམ་པ་གཉིས་ཏེ་སྤྱིའི་དོན་གྱི་མཐར་ཐུག་སྟེ་ཐེག་པ་ཐུན་མོང་བ་ལས་གྲགས་པ་ས་བཅུ་གཅིག་པ་དང་། སྦས་དོན་གྱི་མཐར་ཐུག་སྟེ་གསང་སྔགས་ལས་གྲགས་པའི་ས་བཅུ་གཉིས་པ་དང་ས་བཅུ་གསུམ་པའོ། །གལ་ཏེ་མཐར་ཐུག་གཉིས་མི་རིགས་ཏེ་སྤྱི་དོན་མཐར་ཐུག་ཡིན་ན་དེའི་སྟེང་དུ་ཡོན་ཏན་བསྐྱེད་དུ་མེད་པས་སྦས་དོན་གྱི་མཐར་ཐུག་མི་རིགས་ལ། ཡོན་ཏན་བསྐྱེད་དུ་ཡོད་ན་སྤྱི་དོན་ལ་མཐར་ཐུག་མི་རིགས་སོ་ཞེ་ན། ཡོན་ཏན་བསྐྱེད་དུ་ཡོད་དེ་ཕ་རོལ་ཏུ་ཕྱིན་པ་ལས་ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བའང་མ་བཤད་ལ། གསང་སྔགས་ལས་བཤད་པ་དང་། ཕ་རོལ་ཏུ་ཕྱིན་པ་ལས་སྐུ་གསུམ་ལས་མ་བཤད་ལ། གསང་སྔགས་ལས་སྐུ་བཞི་དང་ལྔ་བཤད་པ་དང་། དེ་བཞིན་དུ་དཔལ་སཾ་པུ་ཊ་ལས། གང་དག་བསམ་གྱིས་མི་ཁྱབ་པའི་གནས་མངོན་དུ་མ་བྱས་པ་དེ་དག་ནི་བདེ་བར་གཤེགས་པ་སྟེ་སངས་རྒྱས་ཡིན་ལ། མཚན་གཞི་མཚོན་པར་བྱེད་པ་ནི་རྡོ་རྗེ་སེམས་དཔའ་ཡང་དག་པར་གསུངས་སོ། །ཞེས་བྱ་བ་འདིས་ཕར་ཕྱིན་པས་ཤེས་བྱ་གཞན་སྣང་ལས་མི་མཁྱེན་ཏེ། ཕར་ཕྱིན་པས་གཟུགས་ཀྱང་གཞན་ལ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱང་གཞན་ཞེས་གསུངས་ལ། གསང་སྔགས་ཀྱིས་ཐམས་ཅད་རང་སྣང་དུ་མཁྱེན་ཞེས་པ་འདིས་ཁྱད་པར་ཡོད་དོ། །འོ་ན་སྤྱི་དོན་ལ་མཐར་ཐུག་ཏུ་གཞག་པ་མི་འཐད་སྙམ་ན་འཐད་དེ་ཉེ་བའི་བྱ་བ་བྱས་པའི་ཕྱིར་རོ། །དཔེར་ན་མངོན་རྟོགས་རྒྱན་ལས། ས་དགུ་འདས་ནས་ཡེ་ཤེས་ནི། །གང་གིས་སངས་རྒྱས་སར་གནས་པ། །དེ་ནི་བྱང་ཆུབ་སེམས་དཔའི་ས། །བཅུ་པ་ཡིན་པར་ཤེས་པར་བྱ། །ཞེས་ས་བཅུ་པ་ལ་སངས་རྒྱས་ཀྱི་སར་བཤད་པ་དང་འདྲའོ། །གལ་ཏེ་སློབ་དཔོན་ཟླ་གྲགས་ཀྱིས། འོད་གསལ་བ་ནི་དངོས་པོའི་གནས་ལུགས་མཐར་ཐུག་ནི་རབ་སྟོན་དང་། །ཟུང་དུ་འཇུག་པ་ལམ་གྱི་མཐར་ཐུག་རྟོགས་པ་སྟེ། །སྟོང་པ་འོད་གསལ་ལ་མཐར་བྱས་པ་དང་། འོད་གསལ་དོན་དམ་ཟུང་འཇུག་མཐར་ལ་མཐར་བྱས་པ། རྣམ་པ་གཉིས་སུ་མཐའ་བཤད་དེ། །མཐའ་ནི་མུར་ཐུག་པ་ཡི་ཚིག །ཅེས་སྟོང་པ་ཉིད་ལ་སོགས་པ་སྟོན་པ་ལ་མཐར་ཐུག་ཏུ་བཤད་པས་དེ་དང་འགལ་ལོ་སྙམ་ན་མི་འགལ་ཏེ་སྟོང་ཉིད་དང་ཟུང་འཇུག་ལ་ལུགས་གཉིས་ཡོད་དེ། དེའི་མཐར་ཐུག་པ་ཐོབ་པ་དང་། སྤྱི་བློའི་ཡུལ་དུ་བསྟན་པའོ། །སྤྱི་བློའི་ཡུལ་མིང་གི་རྗེས་སུ་འབྲངས་བ་ཙམ་དེ་ནི་ཕར་ཕྱིན་པ་དང་སྤྱིའི་དོན་དུ་བཤད་ལ། མཐར་ཐུག་ཐོབ་ པ་ནི་སངས་རྒྱས་ཉིད་དེ། འོད་གསལ་བ་ནི་ཆོས་ཀྱི་སྐུ་ལ། ཟུང་འཇུག་ནི་ལོངས་སྤྱོད་རྫོགས ་པའི་སྐུའོ། །དེ་ལྟར་བརྗོད་པར་བྱ་བའི་དོན་གསུམ་ལ་ཕྱེ་ན་དྲུག་ཏུ་བསྟན་ཏོ། །དེ་རྗོད་པར་བྱེད་པའི་སྒྲ་གསུམ་ནི་ཡན་ལག་གི་དོན་གྱིས་བཤད་པ་དང་། ཡི་གེའི་དོན་གྱིས་བཤད་པ་དང་། མན་ངག་གི་དོན་གྱིས་བཤད་པའོ། །དང་པོ་ཡན་ལག་གི་དོན་ནི། འཇིག་རྟེན་ལས་གྲགས་པའི་སྒྲ་དང་བཅས། བསྟན་བཅོས་ལས་གྲགས་པའི་སྒྲ་དང་བཅས། སྒྲ་འཇུག་པའི་རྒྱུ་མཚན་ངེས་པའི་ཚིག་དང་བཅས་པས་གཞུང་དངོས་ཀྱི་དོན་ལ་འཇུག་པའོ། །དེའང་འཇིག་རྟེན་ལས་གྲགས་པ་ནི་དཔེར་ན་རྒྱུ་མེ་ཤེལ་ལས་གྲུབ་པ་ནམ་མཁའ་ལ་གནས་པ་ཚ་བའི་འོད་ཅན་དེ་ལ་ཉི་མ་ཞེས་གྲགས་སོ། །དེ་ཉིད་ལ་བསྟན་བཅོས་ལས་བཅུ་གཉིས་པ་དང་། འོད་ཟེར་བརྒྱ་པ་དང་། པདྨོའི་གཉེན་དང་། སྣང་བྱེད་དང་། ཉིན་མོར་བྱེད་པ་ལ་སོགས་པ་གྲགས་པ་བཞིན་ནོ། །སྒྲ་འཇུག་པའི་རྒྱུ་མཚན་ཡང་ཉི་མ་ལ་ཁྱིམ་བཅུ་གཉིས་ཡོད་པས་དང་། པདྨོ་ཁ་འབྱེད་པས་དང་། མུན་པ་སེལ་བ་མཚན་མོ་འཇོམས་པ་ལ་སོགས་པ་ཡོན་ཏན་དུ་མ་ཡོད་པས་དེ་དང་དེ་དག་ཏུ་གདགས་སུ་རུང་བས་ཚུལ་འདི་ལྟ་བུ་རྣམས་ལ་ཡན་ལག་གི་དོན་གྱིས་བཤད་དོ། །ཡི་གེའི་དོན་གྱིས་བཤད་པ་ནི་གཞུང་དངོས་ལ་རྒྱུ་མཚན་མི་རྙེད་ཀྱང་ཡི་གེ་སོ་སོར་བྱས་ནས་རྒྱུ་མཚན་རྙེད་པ་སྟེ་དེའང་སྒྲས་དྲངས་ཏེ་བཤད་པ་དང་། ཡི་གེ་ཁ་ཕྲལ་ཏེ་སྒྲས་དྲངས་པས་བཤད་པ་དང་། ཡི་གེའི་དབྱིབས་མཐུན་པས་བཤད་པའོ། །དང་པོ་ནི་དཔེར་ན། ན་ག་ཧ་ཨ་ཤྭ་ཞེས་བྱ་བ་ལྟ་བུ་དངོས་སུ་བཤད་དུ་མི་བཏུབ་པ་ལ་སྒྲས་དྲངས་ན། ན་ནི་ན་ར་སྟེ་མི། ག་ནི་ག་བི་སྟེ་བ་ལང་ཞེས་བྱ་བ་ལྟ་བུའོ། །གཉིས་པ་ནི་དཔེར་ན། ཧཱུྃ་ཞེས་བྱ་བ་ནི་གཟུང་བ་དང་འཛིན་པ་དང་བྲལ་བའོ། །ཞེས་གསུངས་པ་ལ་དངོས་སུ་གཟུང་འཛིན་དང་བྲལ་བའི་དོན་བཤད་དུ་མི་བཏུབ་པས་ཡི་གེ་ཕྲལ་ཏེ་སྒྲར་དྲངས་ནས་བཤད་ན། ཧ། གྲ་ཧ་ཀ་ནི་གཟུང་བའི་ཡུལ་དུ་འགྲོ་ལ། ཧ། གྲ་ཧ་ཙ་ནི་འཛིན་པའི་སེམས་སུ་འགྲོ་ལ། ཞབས་སྐྱེད་ཨཱུ་ལ་རྐྱེན་ཤ་བྱིན་པས་ཤཱུ་སྟེ་ཤཱུ་ཱུནྱ་ཏཱ་སྟོང་པར་འགྲོ། ཀླད་ཀོར་མ་ཡིན་པས་མ་ནོ་ཏ་སྟེ་ཡིད་ཡིན་པས་གཟུང་འཛིན་གཉིས་ཀྱིས་སྟོང་པའི་ཡིད་ཙམ་ཞེས་བྱ་བ་ལྟ་བུར་འགྲོ་བ་ལ་བྱའོ། །དབྱིབས་མཐུན་པས་བཤད་པ་ནི་དཔེར་ན་ཨེ་བྃ་མ་ཡ་ནི་ལྟེ་བ་དང་སྙིང་ག་དང་མགྲིན་པ་དང་སྤྱི་བོའོ་ཞེས་གསུངས་པ་ལྟ་བུ་དངོས་སུ་བཤད་དུ་མི་བཏུབ་པ་ལ་དབྱིབས་ཀྱིས་མཚོན་ནས་ཨེ་གྲུ་གསུམ་དང་དབྱིབས་མཐུན་པས་ལྟེ་བ་སྤྲུལ་པའི་འཁོར་ལོར་བརྗོད་པ་ལྟ་བུའོ། །བསྡུས་པའི་དོན་གྱི་མན་ངག་གིས་བཤད་པ་ནི། འཇིག་རྟེན་ལས་གྲགས་པའི་སྒྲ་ཡང་མ་ཡིན་བསྟན་བཅོས་ལས་གྲགས་པའང་མ་ཡིན་ཡི་གེས་བཤད་དུའང་མི་བཏུབ་སྟེ། སངས་རྒྱས་རྣམས་ཀྱིས་བརྡ་མཛད་པ་སྟེ་དཔེར་ན་ཆང་ལྟ་བུ་ལ་འཇིག་རྟེན་ན་ཆང་ཞེས་གྲགས། བསྟན་བཅོས་ལས་མྱོས་བྱེད་ཅེས་གྲགས་ཏེ་འདིར་མ་ད་ན་ཞེས་པ་ལྟ་བུ་དེ་བཞིན་གཤེགས་པའི་བརྡར་གྱུར་པ་ལས་སོ་སོ་སྐྱེ་བོ་རྣམས་ཀྱི་སྤྱོད་ཡུལ་མ་ཡིན་པ་སྟེ། དེ་བཞིན་དུ་ཚོད་མ་ལ་ཨིན་དྷ་ནཾ་དང་། བཟའ་བ་ལ་ཏྲི་པི་ཏ་ཞེས་བརྗོད་པ་ལྟ་བུ་སྟེ། ཟླ་བ་གྲགས་པས། ཀོ་ཊ་ཀྵ་ལ་སོགས་པ་སྟེ་ཀོ་ཏ་པ། ཀོ་ཏ། ཀོ་ཏ་པཉྩ། ཀུ་ཏཱི་ར་ཀཀོ་ལ་ཀྵ། ཀོ་ལ་བ། ཀོ་ལ། ཀོ་ལ་པཉྩ། ཀེ་ལ་ཏ་ཐཱ་ཞེས་བྱའི་སྒྲ། །སྲོག་འཛིན། ཐུར་སེལ། མཉམ་གནས། གྱེན་རྒྱུ། ཁྱབ་བྱེད། རྒྱུ་བ། རྣམ་པར་རྒྱུ་བ། ཡང་དག་རྒྱུ་བ། ངེས་པར་དུ་རྒྱུ་བ་སྟེ་རླུང་བཅུའི་མིང་ཡིན་ནོ། །འཇིག་རྟེན་བསྟན་བཅོས་ལ་མེད་ཅིང་། །དེ་བཞིན་གཤེགས་པའི་བརྡར་གྱུར་པ། །འདི་ནི་ཇི་བཞིན་མིན་པར་བརྗོད། །ཅེས་གསུངས་པ་ལྟ་བུའོ། །དེ་ལྟར་ན་བརྗོད་བྱའི་དོན་གསུམ་མམ་ཕྱེ་ན་དྲུག་པོ་དེ་རེ་རེ་ལའང་རྗོད་བྱེད་ཀྱི་སྒྲ་འཆད་ལུགས་གསུམ་༼གསུ༷མ༽་གྱིས་འཆད་པ་ཡིན་ནོ། །དེ་དག་ཀྱང་དཔེར་བརྗོད་སྤྱིར་བསྟན་པ་དང་། རྒྱུད་ཇི་ལྟར་འཆད་པའི་ཚུལ་བསྟན་པའོ། །དང་པོ་ནི་ཕར་ཕྱིན་པ་སྤྱི་ལྟ་བུ་ལ། ཡན་ལག་གི་དོན་གྱིས་བཤད་པ་ནི། དང་པོར་བྱམས་པ་བསྒོམ་པར་བྱ་ཞེས་བྱ་བ་ལྟ་བུ། དང་པོ་ནི་གོ་རིམ། བྱམས་པ་ནི་བདེ་བ་དང་བདེ་བའི་རྒྱུ་དང་ཕྲད་པར་འདོད་པ། བསྒོམ་པར་བྱ་བ་ནི་རྣལ་འབྱོར་པས་དེ་ལྟ་བུ་ལ་བསམ་པར་བྱ་ཞེས། འཇིག་རྟེན་དང་བསྟན་བཅོས་ལས་གྲགས་པའི་སྒྲ་ཇི་བཞིན་པའོ། །ཡི་གེའི་དོན་ནི། ཡི་དྭགས་བསྟན་ལ་རབ་ཏུ་གནས། །ཞེས་བྱས་པ་ན། ཕ་རོལ་ཏུ་ཕྱིན་པ་དག་ཀྱེ་མ་ཡི་དྭགས་ལ་ཇི་ལྟར་སྡོད་སྙམ་པ་ལ། ཡི་དྭགས་ནི་པྲེ་ཏ་ལ་པྲ་ཏེ་རབ་ཏུའོ། །ཨེ་ཏ་ནི་སོང་བ་སྟེ་རྣམ་པར་རྟོག་པ་རབ་ཏུ་སོང་བ་ལ་སྡོད་པའོ། །དེ་བཞིན་དུ་ཕ་རོལ་ཏུ་ཕྱིན་པ་ཉིད་གང་ཡིན་སྙམ་ན། པཱ་ར་ནི་མཆོག་སྟེ་སངས་རྒྱས་སོ། །མི་ཏཱ་ནི་འགྲོ་བ་སྟེ་སངས་རྒྱས་ཀྱི་སར་འགྲོ་བ་ཞེས་བྱ་བ་ལྟ་བུའོ། །མན་ངག་གི་དོན་གྱིས་བཤད་པ་ནི། སྙིང་སྟོབས་སྐུ་དང་རྡུལ་ངག་བཅས། །མུན་པ་སེམས་ཀྱི་རང་བཞིན་ལས། །ཞེས་བརྗོད་པ་ན། ཀྱེ་མ་སྔགས་པ་ནི་མུ་སྟེགས་གྲངས་ཅན་འཛིན་པའོ་སྙམ་པ་ལ། རྡུལ་མུན་པ་སྙིང་སྟོབས་ཀྱི་བརྡས་ནི་ཀུན་བརྟགས་པ་དང་གཞན་དབང་དང་ཡོངས་གྲུབ་ཡིན་ནོ་ཞེས་བཤད་པ་དང་། དེ་བཞིན་དུ་ཕྱག་བཅུ་གཉིས་བསྒོམ་ཞེས་བྱས་པ་ན་ཕྱག་བཅུ་གཉིས་ཀྱིས་ཅི་བྱ་སྙམ་པ་ལ་དེ་ནི་རྟེན་ཅིང་འབྲེལ་བར་འབྱུང་བ་བཅུ་གཉིས་ཤེས་པར་བྱ་བའི་དོན་ཡིན་ནོ་ཞེས་བྱ་བ་ལྟ་བུ་སྟེ། མདོར་ན་ཕ་རོལ་ཏུ་ཕྱིན་པ་བ་དག་གསང་སྔགས་ལ་ཞུགས་པ་ན་རིམ་པ་གཉིས་ཀྱི་དོན་མ་གོ་བས་འདི་ལྟ་བུ་ལམ་མ་ཡིན་ནམ་སྙམ་པའི་འགྱོད་པ་བསལ་བའི་ཕྱིར། ཁ་ཅིག་ནི་སྒྲ་ཇི་བཞིན། ཁ་ཅིག་ནི་ཡི་གེའི་སྒོ་ནས། ཁ་ཅིག་ནི་བརྡ་ཡིན་ནོ་ཞེས་བསྟན་པའི་སྒོ་ནས་དེ་དག་གཞུག་པའི་ཕྱིར་བསྟན་པ་ནི་ཕ་རོལ་ཏུ་ཕྱིན་པའི་སྤྱི་དོན་ཏེ། ཡེ་ཤེས་རྡོ་རྗེ་ཀུན་ལས་བཏུས་པ་ལས། ངོ་མཚར་གྱི་རྡོ་རྗེའི་ཚིག་ཐོས་ནས་སྨོད་པར་བྱེད་པ་དེ་རྣམས་ལ་མི་འགལ་བའི་སྒོ་ནས་བཤད་པ་འདི་ནི་སྤྱིའི་དོན་ཏོ། །ཞེས་གསུངས་པ་ལྟ་བུའོ། །བསྐྱེད་པའི་རིམ་པ་སྤྱི་དོན་དུ་ཡན་ལག་གི་དོན་གྱིས་བཤད་པ་ནི། ཧཱུྃ་ལས་བྱུང་བའི་རྡོ་རྗེ་ནི། །ཁ་དོག་ནག་པོ་འཇིགས་ཆེན་པོ། །རྡོ་རྗེ་ལྟེ་བའི་དབུས་གནས་པར། །ཡང་ནི་ཧཱུྃ་གི་དེ་ཉིད་བསྒོམ། །ཞེས་བྱ་བ་ལ་སོགས་པ་གཞུང་བཞིན་བཤད་པས་གོ་བ་རྣམས་སོ། །ཡི་གེའི་དོན་གྱིས་བཤད་པ་ནི། །ན་དང་ག་ཧ་དང་པོ་དང་། །མཐའ་ཡི་ཤྭ་དང་དང་པོའི་ཤྭ། །ཞེས་བྱ་བ་ལ་སོགས་པ་ལ། ན་ར་ནི་མི་ཤ། ག་བི་ནི་བ་ལང་། ཞེས་བྱ་བ་ལ་སོགས་པ་ལྟ་བུ་སྒྲས་དྲངས་ཏེ་བཤད་པས་བཟའ་བའི་དམ་ཚིག་ཏུ་སྟོན་པ་རྣམས་ལྟ་བུའོ། །མན་ངག་གི་དོན་གྱིས་བཤད་པ་ནི། གཽ་རཱི་རི་དྭགས་མཚན་མ་འཛིན་ཞེས་བྱ་བ་ལ། གཽ་རཱི་ནི་དབང་ཕྱུག་ཆེན་པོའི་ཆུང་མ་སྟེ་དེའི་བརྡས་རྣམ་པར་སྣང་མཛད་མཁའ་འགྲོ་མའི་སྐུའོ། །རི་དྭགས་མཚན་མ་ནི་ཟླ་བ་སྟེ། དེའི་བརྡས་བྱང་ཆུབ་སེམས་ཀྱི་ཐིག་ལེའོ། །ཞེས་བྱ་བ་ལྟ་བུའོ། །རང་བྱིན་གྱིས་བརླབ་པ་སྦས་པ་ཡན་ལག་གི་དོན་གྱིས་བཤད་པ་ནི། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་ཞེས་བྱ་བ་ལ་སོགས་པ་ལྟ་བུའོ། །ཡི་གེའི་དོན་གྱིས་བཤད་པ་ནི། ཨེ་བྃ་མ་ཡ་བཞིས་འཁོར་ལོ་བཞི་བསྟན་ཏེ་དབྱིབས་མཐུན་པའི་སྒོ་ནས་སོ། །མན་ངག་གི་དོན་གྱིས་བཤད་པ་ནི། དབུ་མར་རླུང་སེམས་ཚུད་ན་རྣམ་རྟོག་ནུབ་པས་ཆོས་ཀྱི་སྐུ་དང་རྐྱང་མ་ནས་ཐིག་ལེ་འབབས་པས་བདེ་བ་ལ་ལོངས་སྤྱོད་པས་ ལོངས་སྤྱོད་རྫོགས་པ ་འི་སྐུ་དང་རོ་མ་ནས་མེ་འབར་ཞིང་སྤྲུལ་པས་སྤྲུལ་པའི་སྐུ་སྟེ་གསུམ་ཚན་དེས་ནི་ལྟེ་བ་སྐུ་དང་མགྲིན་པ་གསུང་དང་སྙིང་ག་ཐུགས་སོ་ཞེས་བྱ་བའི་བརྡས་འཁོར་ལོ་བཞི་དང་རྩ་གསུམ་བསྒོམ་ཞེས་བྱ་བར་བསྟན་པ་ལྟ་བུའོ། །དཀྱིལ་འཁོར་འཁོར་ལོའི་ཐབས་ཡན་ལག་གི་བཤད་པ་ནི། འཁྱུད་དང་འོ་བྱེད་ལ་སོགས་པ། །སྣ་ཚོགས་རྣམ་པ་སྣ་ཚོགས་བཤད། །ཅེས་བྱ་བ་ལ་སོགས་པ་གཞུང་དངོས་དོན་གྱིས་སྒྲས་གོ་བ་རྣམས་སོ། །ཡི་གེའི་དོན་གྱིས་བཤད་པ་ནི། ཨེ་ཝཾ་གཉིས་ཀྱི་བརྡས་མཁའ་གསང་གཉིས་དབྱིབས་མཐུན་པའི་སྒོ་ནས་བསྟན་པ་ལྟ་བུའོ། །མན་ངག་དོན་གྱིས་བཤད་པ་ནི། །རྡོ་རྗེ་ྈབློ་ལྈ༼བོ༷ལླ༽༷་ཞེས་བཤད་དེ། །པདྨ་ཀཀློ་ལ་ཞེས་ཟེར། །ཞེས་བཤད་པ་ལྟ་བུའོ། །མཐར་ཐུག་པའི་དོན་དུ་ཡན་ལག་གི་དོན་གྱིས་བཤད་པ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྗེ་བཙུན་གསང་བ་ལས་ཆེས་གསང་ྈབའིྈ༼བའང་༽ཞེས་བྱ་བ་ལ་སོགས་པ་ལྟ་བུའོ། །ཡི་གེའི་དོན་གྱིས་བཤད་པ་ནི། བཞུགས་སོ་ཞེས་བྱ་བ་ལ་བི་ཛ་ཧ་ར་སྟེ། བི་ཙི་ཏྲ་ནི་སྣ་ཚོགས་ཡིན་ལ། ཛནྨ་ནི་སྐྱེ་བོའོ། །ཧ་ར་ནི་འཕྲོག་པ་སྟེ། གདུལ་བྱའི་སྐྱེ་བོ་སྣ་ཚོགས་ཀྱི་ཡིད་འཕྲོག་པ་སྟེ། སྤྲུལ་པའི་སྐུ་སྟོན་པ་ལྟ་བུའོ། །མན་ངག་གི་དོན་གྱིས་མཐར་ཐུག་ཏུ་བཤད་པ་ནི། མེ་ལོང་ཡེ་ཤེས་ཚངས་པ་ཆོས་དབྱིངས་ཡེ་ཤེས་ཁྱབ་འཇུག་བྱ་གྲུབ་ཡེ་ཤེས་ཞི་བ་སྟེ་དབང་ཕྱུག་དང་། །མཉམ་ཉིད་ཡེ་ཤེས་ཐམས་ཅད་དེ་གཙོ་བོ་སངས་རྒྱས་སོར་རྟོག་ཡེ་ཤེས་དེ་ཉིད་དེ་ལྷ་རྒྱལ་བ་དམར་པར་དེ་ཉིད་བརྗོད། །ཅེས་བྱ་བས་ཡེ་ཤེས་ལྔ་བཤད་པ་ལྟ་བུའོ། །དེ་ལྟར་ན་མཐར་ཐུག་གཅིག་ཏུ་བསྡུས་པས་ལྔ་ལ་གསུམ་གསུམ་སྟེ་བཅོ་ལྔར་སྦྱར་བར་བྱའོ། །མཐར་ཐུག་གཉིས་སོ་སོར་བྱས་ན་འཆད་ལུགས་ཀྱི་མན་ངག་བཅོ་བརྒྱད་དུ་འགྱུར་རོ། །ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བའི་རྒྱུད་ལས་མཐའ་དྲུག་གི་བཤད་པ་ཞེས་བྱ་བ་གསུངས་པ་ནི་འཆད་ལུགས་ཀྱི་མན་ངག་འདི་ཉིད་ཡིན་ནོ། །ཇི་ལྟར་ཡིན་ན། བརྗོད་བྱ་སྤྱིའིདོན་གཉིས་སུ་ཡན་ལག་གི་དོན་གྱིས་བཤད་པ་ནི་སྒྲ་ཇི་བཞིན་པ་ཞེས་བྱའོ། །བརྗོད་བྱ་སྤྱི་དོན་གཉིས་སུ་ཡི་གེ་དང་མན་ངག་གི་དོན་གྱིས་བཤད་པ་ནི་སྒྲ་ཇི་བཞིན་མ་ཡིན་པ་ཞེས་བྱའོ། །བརྗོད་བྱ་སྦས་པའི་དོན་དུ་ཡན་ལག་གི་དོན་གྱིས་བཤད་པ་ནི་ངེས་པའི་དོན་དུ་བཤད་པ་ཞེས་བྱ་ལ། བརྗོད་བྱ་སྦས་དོན་དུ་ཡི་གེ་དང་མན་ངག་གིས་བཤད་པ་ནི་དྲང་བའི་དོན་གྱི་བཤད་པ་ཞེས་བྱའོ། །བརྗོད་བྱ་མཐར་ཐུག་ཏུ་ཡན་ལག་གི་དོན་གྱིས་བཤད་པ་ནི། དགོངས་པ་མ་ཡིན་པས་བཤད་པ་ཡིན་ལ། ཡི་གེ་དང་མན་ངག་གིས་བཤད་པས་མཐར་ཐུག་པའི་དོན་དུ་འགྱུར་བ་ནི་དགོངས་པས་བཤད་པ་ཞེས་བྱ་བ་ཡིན་ནོ། །བཤད་ཐབས་ཀྱི་མན་ངག་དེས་རྒྱུད་ཇི་ལྟར་འཆད་པའི་ཚུལ་ལ་གཉིས་ཏེ། གཞུང་གི་ཚིག་དོན་ལ་བརྗོད་བྱ་གསུམ་སོ་སོར་སྦྱར་བ་དང་། ཚིག་རེ་རེ་ལ་བརྗོད་བྱའི་དོན་གསུམ་ཀ་སྦྱར་བའི་བཤད་པའོ། །དང་པོ་ནི་རྗོད་བྱེད་ཀྱི་སྒྲ་ཡན་ལག་གི་དོན་གཙོ་ཆེ་བར་བྱས་ཏེ་ཡི་གེ་དང་མན་ངག་ཀྱང་སྐབས་ཀྱི་ཅུང་ཟད་ཙམ་བྱས་ནས་འཆད་པ་སྟེ། དེ་ནི་གཞུང་གི་སྐབས་ཁ་ཅིག་ཏུ་ནི་སྤྱི་དོན། ཁ་ཅིག་ནི་སྦས་པ། ཁ་ཅིག་ནི་མཐར་ཐུག་པའི་དོན་དུ་འཆད་པ་སྟེ། འདི་ནི་གཞུང་གི་ཡི་གེ་དང་མིང་དང་ཚིག་ལ་འཇུག་པ་ཡིན་པས་ཡི་གེའི་དོན་གྱི་བཤད་པ་ཞེས་བྱ། གཞུང་ཐད་སོའི་བཤད་པ་ཞེས་བྱ། བཀའ་བསྟན་བཅོས་སྤྱི་ལ་གྲགས་པ་དང་མཐུན་པས་ཡོངས་གྲགས་ཀྱི་བཤད་པ་ཞེས་བྱ། ཡན་ལག་གི་དོན་གཙོ་ཆེ་བས་ཡན་ལག་གི་དོན་གྱི་བཤད་པ་ཞེས་བྱའོ། །གཉིས་པ་ནི་དེའི་དོན་དུ་ཚིག་རེ་རེའང་བློ་དམན་པ་རྣམས་ལ་ཕ་རོལ་ཏུ་ཕྱིན་པ་དང་མི་མཐུན་པའི་འགྱོད་པ་བཟློག་པའི་ཕྱིར་ཕ་རོལ་ཏུ་ཕྱིན་པ་སྤྱིར་ཡང་འཆད། བསྐྱེད་པའི་རིམ་པ་སྤྱིར་ཡང་ཆོ་ག་ལ་དགའ་བ་རྣམས་ལ་འཆད། ཟབ་མོ་ལ་མོས་པ་རང་གི་ལུས་ལ་དགའ་བ་དང་། ཆགས་ཅན་ཕྱག་རྒྱ་བསྟེན་པ་ལ་དགའ་བ་གཉིས་ལ་ཙཎྜཱ་ལཱི་ལྟར་ཡང་འཆད་ལ། དཀྱིལ་འཁོར་འཁོར་ལོའི་ཐབས་ལྟར་ཡང་འཆད། རྟོགས་པ་དང་མི་ལྡན་པ་རྣམས་ལ་སྤྱི་བློས་མོས་པ་ཡུལ་དུ་བྱ་བའི་ཕྱིར་དང་། རྟོགས་ལྡན་རྣམས་ལ་ཏིང་ངེ་འཛིན་གྱིས་དཔེའི་ཚུལ་དུ་རྟོགས་པར་བྱ་བའི་ཕྱིར་མཐར་ཐུག་པའི་དོན་དུའང་འཆད་དོ། །དེ་ལྟར་བཤད་ཡམས་མང་དུ་ཡོད་ཀྱང་། ཡི་གེའི་དོན་དང་། སྤྱིའི་དོན་དང་། སྦས་པའི་དོན་དང་། མཐར་ཐུག་པའི་དོན་དུ་བཤད་པ་ཞེས་ཡེ་ཤེས་རྡོ་རྗེ་ཀུན་ལས་བཏུས་པ་ལས་དེ་ལྟར་ཚུལ་བཞིའི་བཤད་པ་ཞེས་མིང་བཏགས་ལ། བརྒྱུད་པ་འདིའི་ལུགས་ཀྱི་ཡི་གེའི་དོན་གྱིས་བཤད་པ་ནི། སྔ་མ་ཁྲ་བོར་བཤད་པ་དེ་ཡིན་ལ། སྤྱི་དང་། རང་བྱིན་བརླབ་དང་དཀྱིལ་འཁོར་འཁོར་ལོའི་སྦས་པ་གཉིས་དང་། མཐར་ཐུག་པ་སྟེ་བཞི་པོ་ལ་བཞི་བཤད་ཅེས་མིང་འདོགས་སོ། །གང་ལྟར་ཡང་དོན་ལ་འགལ་བ་མེད་དོ། །ཚུལ་འདིར་བཤད་པ་འདི་ནི་རྣལ་འབྱོར་ཆེན་པོའི་རྒྱུད་མཐའ་དག་དེ་ལྟ་བུ་ཡིན་པར་ཁོང་དུ་ཆུད་པར་བྱའོ། །སློབ་དཔོན་ཁ་ཅིག་གིས། ཕྱི་དང་གསང་བ་དེ་བཞིན་ནང་། །དེ་བཞིན་ཉིད་དོན་རྣམ་པ་བཞི། །དཀྱིལ་འཁོར་ལས་ཀྱི་ཕྱག་རྒྱ་དང་། །ལུས་དང་རང་བཞིན་གྱིས་གནས་པའོ། །ཞེས་གསུངས་པ་དེའང་བཤད་ཚུལ་འདི་དང་མཐུན་པར་ཤེས་པར་བྱའོ། །བཤད་ཐབས་ཀྱི་མན་ངག་གཉིས་པ། སེམས་ཀྱི་རྒྱུད་རྒྱུན་ཆགས་ལ་དགོངས་ནས་རྒྱུད་གསུམ་དུ་བཤད་པ་ནི། གསང་བ་འདུས་པའི་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །རྒྱུན་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང་། །མི་འཕྲོགས་པ་ཡིས་རབ་ཕྱེ་བའོ། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བ་ཡིན། །དེ་བཞིན་མི་འཕྲོགས་འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་གསུངས་པའི་དོན་ཏེ། འདི་ལའང་བཤད་ཐབས་ཀྱི་མན་ངག་གི་ཚུལ་བསྟན་པ་དང་། དེས་རྒྱུད་ཇི་ལྟར་འཆད་པའི་ཚུལ་བསྟན་པའོ། །དང་པོ་ནི་རྒྱུའི་རྒྱུད་དང་། ཐབས་ཀྱི་རྒྱུད་དང་། འབྲས་བུའི་རྒྱུད་དོ། །དེ་ལ་རྒྱུ་རྒྱུད་ནི་སེམས་ཅན་ཐམས་ཅད་ལ་ཆོས་ཉིད་རང་བཞིན་གྱིས་དག་པ་མྱ་ངན་ལས་འདས་པ་ཇི་ལྟར་ཡིན་པའི་ཚུལ་དང་། དེ་ཆོས་ཅན་རྒྱས་པར་ཕྱེ་ན་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་ཆོས་སུམ་ཅུ་རྩ་ལྔའམ་མདོར་ན་ལུས་ངག་ཡིད་གསུམ་ཇི་ལྟར་གནས་པའི་ཚུལ་བསྟན་པ་རྣམས་སོ། །ཐབས་ཀྱི་རྒྱུད་ནི་སྨིན་པར་བྱེད་པའི་ལམ་དབང་བསྐུར་བ་དང་། གྲོལ་བྱེད་ཀྱི་ལམ་བསྐྱེད་པའི་རིམ་པ་དང་། རྫོགས་པའི་རིམ་པ་སྟེ་གཉིས་པོ་འཁོར་དང་བཅས་པ་ཇི་ལྟར་ཉམས་སུ་ལེན་པའི་ཚུལ་དང་། འབྲས་བུའི་རྒྱུད་ནི་རྒྱུ་ལ་ཇི་ལྟར་གནས་པ་དབང་གིས་སྨིན་པར་བྱས་ནས་དབང་ཐོབ་པ་བཞིན་དུ་བསྐྱེད་རིམ་བསྒོམ་པ་དང་། རྫོགས་རིམ་བསྒོམས་པས། རྟོགས་པའི་ཏིང་ངེ་འཛིན་རྒྱུད་ལ་སྐྱེས་ནས་གྲུབ་པའི་ས་ཐོབ་སྟེ། དེ་ཁོ་ན་བཞིན་དུ་སངས་རྒྱས་ཀྱི་སྐུ་དང་ཡེ་ཤེས་མངོན་དུ་གྱུར་པ་གང་ཡིན་པའོ། །འདི་དག་རྒྱས་པར་ནི་རྒྱུད་ཀྱི་མངོན་པར་རྟོགས་པ་ལས་ཤེས་པར་བྱ་བས་འདིར་རྒྱས་པར་མ་སྨྲས་སོ། །གཉིས་པ་དེས་རྒྱུད་ཇི་ལྟར་འཆད་ན། འདིའང་སྔ་མ་ལྟར་གཉིས་ཏེ་ཁ་ཅིག་ཏུ་རྒྱུ་རྒྱུད་ཁ་ཅིག་ཏུ་ཐབས་རྒྱུད་ཁ་ཅིག་ཏུ་སྨིན་ལམ་ཁ་ཅིག་ཏུ་གྲོལ་ལམ། ཁ་ཅིག་ཏུ་འབྲས་བུའི་རྒྱུད་འཆད་པ་སྟེ། ཁྲ་བོར་བཤད་པ་དང་ཚིག་རེ་རེའང་རྒྱུད་གསུམ་དང་ལྡན་པར་བཤད་པའོ། །དེ་ལྟར་གདམས་ངག་དྲུག་གིས་གཞུང་ཚིག་དང་ཡི་གེའི་དོན་བཤད། རྒྱུད་གསུམ་གྱིས་དོན་ཉམས་བླང་གི་མངོན་རྟོགས་སུ་སྦྱར་ཏེ་བྱེད་པས་འདི་གཉིས་བཤད་ཐབས་ཀྱི་གཙོ་བོ་ཡིན་ནོ། །བཤད་ཐབས་གསུམ་པ་དབང་ལམ་དུ་བྱ་བའི་ཕྱིར་བདག་ཉིད་ཅན་གསུམ་གྱིས་བཤད་པ་ནི། ནམ་མཁའ་དང་མཉམ་པའི་རྒྱུད་ལས། སྔགས་དང་དབྱིབས་དང་ཆོས་བདག་ཉིད། །སྦྱོར་བ་རྣམ་པ་གསུམ་གྱིས་ནི། །སྲིད་པའི་ཉེས་པས་མི་གོས་ཤིང་། །རྒྱུད་ཀྱི་དོན་ལ་འཇུག་པར་བྱ། །ཞེས་གསུངས་སོ། །འདི་ལའང་གཉིས་ཏེ། བདག་ཉིད་ཅན་གསུམ་གང་ཡིན་བཤད་པ་དང་། དེས་རྒྱུད་ཇི་ལྟར་འཆད་པའི་ཚུལ་བསྟན་པའོ། །དང་པོའང་ལུས་ལ་བུམ་པའི་དབང་བསྐུར་ནས་ལུས་ཉིད་སྤྲུལ་པའི་སྐུ་སྟོན་པར་བྱེད་པའི་བསྐྱེད་པའི་རིམ་པ་དབྱིབས་ཀྱི་བདག་ཉིད། ངག་ལ་གསང་བའི་དབང་བསྐུར་ནས་ངག་ཉིད་ ལོངས་སྤྱོད་རྫོགས་པའི་སྐུར་སྟོན་པ ་ཙཎྜཱ་ལཱི་སྔགས་ཀྱི་བདག་ཉིད། སེམས་ལ་ཤེས་རབ་ཡེ་ཤེས་ཀྱི་དབང་བསྐུར་ནས་སེམས་ཉིད་ཆོས་ཀྱི་སྐུར་སྟོན་པར་བྱེད་པ་དབང་ཆོས་ཀྱི་བདག་ཉིད། ལུས་ངག་ཡིད་མཐའ་དག་རླུང་དང་བཅས་པ་ལ་དབང་བཞི་པ་བསྐུར་ནས་རླུང་ངོ་བོ་ཉིད་ཀྱི་སྐུར་སྟོན་པ་མཐར་ཐུག་ཆོས་ཀྱི་བདག་ཉིད་དོ། །དེ་ལྟར་ན་དབང་ཆོས་དང་མཐར་ཐུག་ཆོས་གཉིས་ཀ་ཆོས་སུ་སྡུད་པ་ན་བདག་ཉིད་ཅན་གསུམ་མོ། །དེ་དག་སོ་སོར་བྱས་ན། ལུས་ལ་ཞེས་བྱ་བ་ནི་སྦྱང་གཞིའམ་རྒྱུའི་རྒྱུད་དོ། །བུམ་པའི་དབང་ཞེས་བྱ་བ་ནི། སྨིན་ལམ་མོ། །བསྐྱེད་པའི་རིམ་པ་ཞེས་བྱ་བ་ནི་གྲོལ་ལམ་མོ། །སྤྲུལ་པའི་སྐུ་ཞེས་བྱ་བ་ནི་འབྲས་བུའོ། །དེ་ལྟར་བཞི་ཀ་ཕྱིའི་ཆོས་ཡིན་པས་ནི་དབྱིབས་ཀྱི་བདག་ཉིད་ཅེས་མིང་དུ་བཏགས་སོ། །འོག་མ་གསུམ་ཡང་དེས་བསྒྲེས་ཏེ་ཤེས་པར་བྱའོ། །གཉིས་པ་དེས་རྒྱུད་ཇི་ལྟར་འཆད་པའང་། ལུགས་གཉིས་ཏེ་རྒྱུད་ཁྲ་བོར་བཤད་པ་ནི་སྐབས་ཁ་ཅིག་ཏུ་དབྱིབས་ཀྱི་ལུས། ཁ་ཅིག་ཏུ་དབྱིབས་ཀྱི་སྨིན་ལམ། ཁ་ཅིག་ཏུ་དབྱིབས་ཀྱི་གྲོལ་ལམ། ཁ་ཅིག་ཏུ་དབྱིབས་ཀྱི་འབྲས་བུ། ཁ་ཅིག་ཏུ་སྔགས་ཀྱི་སྦྱང་གཞི་ངག །ཁ་ཅིག་ཏུ་འབྲས་བུ་ལོངས་སྐུ་ལ་སོགས་པ་འཆད་པའོ། །བཤད་ལུགས་གཉིས་པ་ནི་ཚིག་རེ་རེ་ལའང་སྔགས་དང་དབྱིབས་དང་ཆོས་སུ་འཆད་ལ་དེ་རེ་རེ་ལའང་རྒྱུ་དང་དབང་དང་ལམ་དང་འབྲས་བུར་འཆད་པས་བཅུ་གཉིས་སུ་བཤད་པའམ་ཆོས་ལ་གཉིས་སུ་བྱས་ཏེ་བཅུ་དྲུག་གིས་འཆད་པར་འགྱུར་རོ། །བཤད་ཚུལ་འདི་ནི་རབ་ཏུ་རྒྱ་ཆེ་སྟེ། སྔར་གྱི་གདམས་ངག་དྲུག་དང་རྒྱུད་གསུམ་གྱི་བཤད་པ་ཕྱོགས་གཅིག་ཏུ་བྱས་པ་དང་འདྲའོ། །བཤད་ཐབས་བཞི་པ་འབྲས་བུ་སྐུ་བཞི་ལམ་དུ་བྱ་བའི་ཕྱིར་གནས་པ་བཞིར་བཤད་པ་ནི། དཔལ་ནམ་མཁའ་དང་མཉམ་པ་ལས། གོང་བུ་ཆུ་དང་གཟུགས་སུ་བཅས། །དེ་བཞིན་གཟུགས་ལས་འདས་པ་དང་། །གནས་པ་རྣམ་པ་བཞི་རུ་ནི། །རྒྱུད་རྣམས་ངེས་པ་ཁོ་ན་ཡིན། །ཞེས་གསུངས་སོ། །འདིའང་བཤད་ཐབས་གང་ཡིན་པ་བཤད་པ་དང་། དེས་རྒྱུད་འཆད་པའི་ཚུལ་བསྟན་པའོ། །དང་པོ་ནི་ ལོངས་སྤྱོད་རྫོགས་པའི་སྐུ་ནི་གོང་བུར་གནས་པ ་དེ་བདེ་བ་ལ་ལོངས་སྤྱོད་པས་སོ། །ཆོས་ཀྱི་སྐུ་ནི་ཆུ་རུ་གནས་པ་སྟེ། ཆུ་ུལ་ཆུ་བཞག་པ་ལྟར་རོ་གཅིག་པའམ། ཆུའི་ཐིག་ལེ་ལྟར་རྣམ་རྟོག་གི་ཟུར་མེད་པའོ། །སྤྲུལ་པའི་སྐུ་ནི་གཟུགས་སུ་གནས་པ་སྟེ་ཞལ་ཕྱག་གི་རྣམ་པ་ཅན་ཡིན་པས་སོ། །ངོ་བོ་ཉིད་ཀྱི་སྐུ་ནི་གཟུགས་ལས་འདས་པར་གནས་པ་སྟེ་ཐམས་ཅད་དེར་ཐིམ་པའི་ཕྱིར་རོ། །འབྲས་བུ་སྐུ་བཞི་གནས་པ་བཞི་ཡིན་པ་ལྟར་རྒྱུ་རྒྱུད་སྦྱང་གཞི་གནས་པ་བཞིར་གནས་ཏེ་མངལ་སྐྱེས་ཀྱི་སེམས་ཅན་གྱི་དབང་དུ་བྱས་ནས། དང་པོ་ཕ་མ་གཉིས་འཁྲིག་པའི་བདེ་བ་ལ་ལོངས་སྤྱོད་པའི་ཚེ་བར་དོའི་སེམས་ཅན་ཡང་བདེ་བ་དེ་ལ་ཆགས་པས་མངལ་དུ་འཇུག་པའི་ཕྱིར་བདེ་བ་ལ་ལོངས་སྤྱོད་པས་ལོངས་སྐུ་སྟེ་གོང་བུར་གནས་ལ། ཁུ་ཁྲག་གི་ནང་དུ་བར་དོའི་རྣམ་ཤེས་བརྒྱལ་ཏེ་མེར་མེར་པོ་ལ་སོགས་པ་ཆུ་རུ་གནས་པའོ། །དབང་པོ་རྫོགས་ཏེ་ལུས་གནས་པའི་གནས་སྐབས་ནི་གཟུགས་སུ་གནས་པའོ། །ཤི་བའི་གནས་སྐབས་ནི་གཟུགས་ལས་འདས་པར་གནས་པའོ། །དེ་ལྟར་རྒྱུ་དང་འབྲས་བུ་གཉིས་གནས་པ་བཞི་ཡིན་པའི་ཕྱིར་ཤུགས་ལ་དབང་བཞི་དང་ལམ་བཞི་དེ་བཞིན་དུ་སྦྱར་ལ། ལམ་རེ་རེ་ལའང་གནས་པ་བཞི་བཞི་དང་ལྡན་ཏེ། དཔེར་ན་རྒྱུ་རྡོ་རྗེ་འཆང་ལྷ་མོ་དབྱུང་བ་དང་བཅས་པ་ནི་གོང་བུར་གནས་པ། རྒྱུ་རྡོ་རྗེ་འཆང་འོད་དུ་ཞུ་བ་ནི་ཆུ་རུ་གནས་པ། འབྲས་བུར་བཞེངས་པ་ནས་དབང་བསྐུར་གྱི་བར་ནི་གཟུགས་སུ་གནས་པ། ལྷ་བསྡུ་བ་ནི་གཟུགས་ལས་འདས་པར་གནས་པ་ཞེས་བྱ་བ་ལྟ་བུའམ། དེ་བཞིན་དུ་སཾ་པུ་ཊའི་བརྟག་པ་ལྔ་པའི་གཉིས་པ་ལས་དཔག་ཏུ་མེད་པ་སྦྱར་བ་ལྟ་བུའོ། །གཉིས་པ་དེས་རྒྱུད་འཆད་པའི་ཚུལ་ནི་སྔ་མ་ལྟར་ཁྲ་བོར་སྦྱར་བ་ནི་སྐབས་ཁ་ཅིག་ཏུ་རྒྱུའི་གནས་པ། ཁ་ཅིག་ཏུ་འབྲས་བུའི། ཁ་ཅིག་ཏུ་ལམ་གྱི་སྦྱར་བ་དང་། ཚིག་རེ་རེ་ལ་གནས་པ་བཞི་བཞི་སྦྱར་བ་ནི་མེད་ཀྱང་ཚིག་རེ་རེ་ལ་རྒྱུ་དང་ལམ་དང་འབྲས་བུར་སྦྱར་བ་རྒྱུད་གསུམ་ཆར་དུ་སྦྱར་ཏེ་འདི་ནི་རྒྱུད་གསུམ་གྱི་བཤད་པ་དང་ཆ་འདྲའོ། །བཤད་ཐབས་ལྔ་པ་སྤང་བྱ་མི་མཐུན་པའི་ཕྱོགས་སྤོང་བའི་དབང་དུ་བྱས་ནས་དག་པ་གསུམ་གྱི་བཤད་པ་ནི། ཧེ་བཛྲ་ལེའུ་དགུ་པ་ལས། ངེས་པར་དངོས་པོ་ཐམས་ཅད་ཀྱི། །རང་གཞིན་གདོད་ནས་དག་པ་དེ་བཞིན་ཉིད་དུ་བརྗོད། །རང་བཞིན་གདོད་ནས་དག་ཀྱང་ཕྱི་ནས་ཏེ་དེའི་ངང་ནས་རྒྱུ་ཅན་གྱི་ཆོས་ཅན་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་དག་པར་བརྗོད་པར་བྱ། །སོ་སོར་རང་རིག་པའི་ཡེ་ཤེས་ཀྱི་བདག་ཉིད་དག་པ་ཉིད་རྟོགས་ན་གྲོལ་བར་འགྱུར་གྱི་མ་རྟོགས་ན། །དག་པ་གཞན་ྈགྱིྈ༼གྱི༷ས་༽རྣམ་གྲོལ་མིན། །ཞེས་སོ། །འདི་ལའང་བཤད་ཐབས་གང་ཡིན་པ་དང་། དེས་རྒྱུད་འཆད་པའི་ཚུལ་བསྟན་པའོ། །དང་པོའང་དེ་བཞིན་ཉིད་ཀྱི་དག་པ་དང་། ལྷ་སོ་སོའི་དག་པ་དང་། རང་རིག་པའི་དག་པའོ། །འདི་གསུམ་ཡང་རྒྱུའི་རྒྱུད་ཀྱིས་བསྡུས་པའི་དག་པ་གསུམ་དང་། ཐབས་རྒྱུད་ཀྱིས་བསྡུས་པའི་དག་པ་གསུམ་དང་། འབྲས་བུའི་རྒྱུད་ཀྱིས་བསྡུས་པའི་དག་པ་གསུམ་མོ། །དེ་ལ་རྒྱུ་རྒྱུད་ཀྱི་གསུམ་ནི་ཆོས་ཐམས་ཅད་ཀྱི་དེ་བཞིན་ཉིད་གདོད་མ་ནས་མ་སྐྱེས་པ་ནི་དེ་བཞིན་ཉིད་ཀྱི་དག་པ། ལུས་ཞལ་ཕྱག་གི་རྣམ་པར་སྣང་བ་ལྷ་སོ་སོའི་དག་པ། སྣང་བ་ཐམས་ཅད་རང་གི་སེམས་ཉིད་དུ་གྲུབ་པ་རང་རིག་པའི་དག་པའོ། །ཐབས་རྒྱུད་ཀྱི་དག་པ་གསུམ་ནི་དང་པོར་ཐོས་བསམ་གྱིས་སྒྲོ་འདོགས་བཅད་པའི་ལྟ་བ་ནི་དེ་བཞིན་ཉིད་ཀྱི་དག་པ། ལམ་བསྐྱེད་པའི་རིམ་པ་ནི་ལྷ་སོ་སོའི་དག་པ། རྫོགས་པའི་རིམ་པ་རང་རིག་པའི་དག་པའོ། །འདིས་དབང་བསྐུར་ཡན་ཆད་ཀྱང་དག་པ་གསུམ་དུ་སྦྱར་བར་ཤེས་པར་བྱའོ། །འབྲས་བུའི་རྒྱུད་ཀྱི་དག་པ་གསུམ་ནི། ངོ་བོ་ཉིད་ཀྱི་སྐུ་དེ་བཞིན་ཉིད་ཀྱི་དག་པ། གཟུགས་སྐུ་གཉིས་ལྷ་སོ་སོའི་དག་པ། ཆོས་ཀྱི་སྐུ་རང་རིག་པའི་དག་པའོ། །གཉིས་པ་དེས་རྒྱུད་འཆད་པའི་ཚུལ་ཡང་རྒྱུད་གསུམ་སོ་སོར་སྦྱར་ཏེ་འཆད་པ་ནི་བཤད་པ་ཁྲ་བོའོ། །ཚིག་རེ་རེ་ལ་དག་པ་གསུམ་གསུམ་སྦྱར་དུ་མི་བཏུབ་ཀྱང་། ཚིག་རེ་རེ་ལ་རྒྱུའི་དང་། ཐབས་ཀྱི་དང་། འབྲས་བུ་སྦྱར་ཏེ་བཤད་པ་བྱེད་པ་ནི་བཤད་ཚུལ་ཡོངས་སུ་རྫོགས་པ་སྟེ་འདིའང་རྒྱུད་གསུམ་གྱི་བཤད་པ་དང་མཚུངས་པར་ཤེས་པར་བྱའོ། །བཤད་ཐབས་ཀྱི་མན་ངག་དྲུག་པ་གསང་བ་བདུན་དུ་བཤད་པ་ནི། དཔལ་སཾ་པུ་ཊའི་རྒྱུད་ཕྱི་མ་ལས། གསང་བ་ནི་མི་གསལ་བའོ། །གསང་བ་ནི་དེ་ཁོ་ན་ཉིད་མདོར་བསྟན་པའོ། །གསང་བ་ནི་ས་བོན་ལྔའོ། །གསང་བ་ནི་དམ་པའི་དངོས་པོ་སྦས་པའོ། །གསང་བ་ནི་གསང་བའི་པདྨའོ། །གསང་བ་ནི་ལྟེ་བའི་དགའ་བའོ། །གསང་བ་ནི་ཐམས་ཅད་དུ་འགྲོ་བ་བསྡུས་པའོ། །གསང་བ་ནི་བདེ་བ་མཐའ་ཡས་པ་སྟེ་རྒྱུད་ཀྱི་གཞུང་གི་བཤད་པའོ། །ཞེས་བརྒྱད་གསུངས་སོ། །འདི་ལའང་གཉིས་ཏེ། བཤད་ཐབས་གང་ཡིན་པ་དང་། དེས་རྒྱུད་འཆད་པའི་ཚུལ་བསྟན་པའོ། །དང་པོ་ནི་རྒྱུད་ལས་བརྒྱད་གསུངས་ན་གསང་བ་བདུན་ཇི་ལྟར་ཡིན་ཞེ་ན། དེ་ཉིད་ལས་གསང་བའི་སྒྲ་ནི་བདུན་པ་སྟེ། བརྒྱད་པ་ནི་བརྗོད་དུ་མེད་པའི་མཚན་ཉིད་དོ་ཞེས་གསུངས་པས། བདེ་བ་མཐའ་ཡས་པ་ཞེས་བྱ་བ་དང་། གསང་བ་མི་གསལ་བ་ཞེས་བྱ་བ་དེ་གཉིས་ནི། རྟོགས་བྱའི་དོན་རྒྱུའི་རྒྱུད་ནི་མི་གསལ་བ་ཞེས་བྱ་བས་བསྟན་ལ། བདེ་བ་མཐའ་ཡས་པས་དེ་རྟོགས་པ་བསྟན་པས་དེ་གཉིས་ཀ་གནས་ལུགས་སུ་གཅིག་པའི་ཕྱིར་བདུན་པ་ཡིན་པ་དང་། གནས་ལུགས་རྟོགས་པ་ཉིད་བསྟན་རྒྱུ་མེད་པས་བརྒྱད་པ་བརྗོད་དུ་མེད་པ་ཞེས་བྱ་བ་ཡིན་པས་དེ་མ་གཏོགས་སོ། །དེ་ཁོ་ན་མདོར་བསྟན་པ་ནི་སྨིན་པར་བྱེད་པའི་ལམ་དབང་ངོ་། །ས་བོན་ལྔ་ནི་བསྐྱེད་པའི་རིམ་པའོ། །དམ་པའི་དངོས་པོ་སྦས་པ་ནི་རྟོགས་པའི་ལྟ་བའོ། །གསང་བའི་པདྨ་ནི་དཀྱིལ་འཁོར་འཁོར་ལོའི་ཐབས་སོ། །ལྟེ་བའི་དགའ་བ་ནི་རང་བྱིན་གྱིས་བརླབ་པའོ། །ཐམས་ཅད་དུ་འགྲོ་བ་བསྡུས་པ་ནི་ལམ་གྱི་ཡན་ལག་རྣམས་བསྟན་ཏོ། །གཉིས་པ་འདིས་རྒྱུད་བཤད་པའི་ཚུལ་ནི་བཤད་ཐབས་སྔ་མ་རྣམས་ལྟར་ཚིག་རེ་རེ་ལ་བཤད་ཐབས་མང་པོ་སྦྱར་བ་ནི་མི་གསུང་སྟེ། གཞུང་ཡི་གེའི་དོན་ཉིད་ཀྱིས་གནས་སྐབས་གང་དང་གང་དུ་འབྲེལ་བ་ཁྲ་བོར་བཤད་པ་སྦྱར་ཏེ་འདི་ནི་མངོན་པར་རྟོགས་པ་དང་འདྲའོ། །དེ་ལྟ་བུའི་བཤད་ཐབས་འདི་དང་སློབ་དཔོན་ཁ་ཅིག་གིས་རྒྱུད་དོན་ཡན་ལག་ལྔའི་བཤད་པ་ཞེས་བྱ་བ་དང་ཡང་འདྲ་སྟེ། དེ་ལ་ཡན་ལག་ལྔ་ནི་སྔོན་དུ་འགྲོ་བ་དབང་གི་ཡན་ལག །ལམ་མངོན་པར་རྟོགས་པའི་ཡན་ལག་སྟེ་རིམ་པ་གཉིས་དང་། གྲོགས་དམ་ཚིག་དང་སྡོམ་པའི་ཡན་ལག་སྟེ་ལམ་གྱི་གྲོགས་དང་། བརྟན་པར་བྱེད་པ་སྤྱོད་པའི་ཡན་ལག་དང་། འབྲས་བུ་ལས་ྈཀྱིྈཚོགས་༼ཀྱི༽༷་ཡན་ལག་སྟེ། དམན་པ་ཞི་སོགས་འབྲིང་གྲུབ་ཆེན་ཏེ་གཉིས་པོ་ཐུན་མོང་གི་འབྲས་བུ། སངས་རྒྱས་ཏེ་མཆོག་གི་འབྲས་བུ་ཞེས་བྱ་བར་བསྡུས་ཏེ་འཆད་དོ། །ཡང་གསང་བ་འདུས་པའི་རྒྱུད་ཕྱི་མ་ལས། བསྙེན་པ་དང་། སྒྲུབ་པ་དང་། ཉེ་བར་སྒྲུབ་པ་དང་། སྒྲུབ་པ་ཆེན་པོ་དང་དེ་ཐམས་ཅད་ཀྱི་ཐུན་མོང་གི་ཡན་ལག་ཅེས་བྱ་བ་བཞིའམ་ལྔར་བསྡུས་ཏེ་བཤད་པའང་། འདི་དང་ཚུལ་མཚུངས་སོ། །ཡང་བདེ་མཆོག་ཉུང་ངུར་ལམ་གྱི་གསང་བ་དང་། འབྲས་བུའི་གསང་བ་དང་། དེ་རྫོགས་པར་བྱེད་པའི་ཡན་ལག་ཅེས་བྱ་བར་བསྡུས་ཏེ་འཆད་པ་དང་ཡང་ཚུལ་མཚུངས་སོ། །མདོར་ན་རྒྱུད་བཤད་ཐབས་ཀྱི་མན་ངག་གི་ཚུལ་གཉིས་ཏེ། ཚིག་རེ་རེ་ལ་ཚིག་དོན་དུ་མ་སྦྱར་བ་དང་། ཚིག་རེ་རེ་ལ་བཤད་པ་རེ་རེ་སྦྱར་བའོ། །མང་པོར་སྦྱོར་བ་ནི་གང་ལྟར་སྦྱོར་ཡང་རུང་སྟེ་སྔ་མ་རྣམས་དང་མཚུངས་སོ། །དེ་རེ་རེར་སྦྱོར་བ་ནི་གང་ལྟར་སྦྱོར་ཡང་རུང་སྟེ་ཕྱི་མ་གསང་བ་བདུན་དང་མཚུངས་སོ། །དེའང་མངོན་རྟོགས་ནི་རྒྱུད་གསུམ་དུ་དོན་གྱིས་འགྱུར་ལ། ཚིག་དོན་ནི་ཡན་ལག་གི་དོན་གྱིས་བཤད་པ་གཙོ་ཆེ་བར་འགྱུར་རོ། །ད་ནི་དེ་ལྟ་བུའི་བཤད་ཐབས་ལ་རྩོད་པ་སྤང་བ་བཤད་པར་བྱའོ། །དེ་ལ་གསུམ་སྟེ། བཤད་ཐབས་མང་པོ་དོན་མེད་པ་སྤང་བ་དང་། བཤད་ཡམས་གཅིག་ཏུ་བཤད་པ་ཚོགས་པ་ལ་བཤད་པར་ཐལ་བ་སྤང་བ་་དང་། བཤད་ཐབས་མང་པོ་གཞན་གྱི་བཤད་ཚུལ་དུ་ཐལ་བ་སྤང་བའོ། །དང་པོ་ནི་གལ་ཏེ་བཤད་ཚིག་རེ་རེ་ལ་མང་པོ་སྦྱོར་རོ་ཞེས་བྱ་བ་དེ་དོན་མེད་དེ་ད་ལྟར་མང་པོ་འཆད་པ་དེ་མི་སྣང་བའི་ཕྱིར་རོ་ཞེ་ན། བདེན་ཏེ་ཚིག་མཐའ་དག་ལ་མང་པོ་སྦྱོར་བ་ད་ལྟ་མི་སྣང་སྟེ་ད་ལྟ་སྙིགས་མའི་དུས་སུ་གྱུར་པས་བློ་གྲོས་དང་བརྩོན་འགྲུས་ཞན་པས་མི་ནུས་པར་གྱུར་ཏོ། །འོན་ཀྱང་བཤད་ཚུལ་འདི་དག་ཁོང་དུ་ཆུད་པ་དང་། གླེང་གཞི་ལ་སོགས་པ་མདོར་བསྟན་པའི་ཚིག་དང་དཀའ་བའི་གནས་འགའ་ཞིག་ལ་བཤད་པ་ཡོད་པས་ཐམས་ཅད་ལ་སྣང་བ་སྐྱེ་བར་བྱེད་དེ། ཕྱོགས་གཅིག་གིས་ཀུན་མཚོན་པར་བྱེད་དོ། ༼། གཉི༷ས་པ༷། ༽གལ་ཏེ་ཡང་བཤད་ཚུལ་རེ་རེ་ྈབརྗོད་པ་ྈ༼སྦྱོར༷་བ༷་༽འདི་ཡི་གེའི་དོན་ལ་ཞུགས་པ་ཙམ་ཡིན་པས་འདིའང་ཚོགས་པ་ལ་བཤད་པར་འགྱུར་ཏེ། སློབ་དཔོན་ཟླ་གྲགས་ཀྱིས། ཇི་བཞིན་སྒྲ་དང་དགོངས་མིན་དང་། །དྲང་བའི་དོན་དུ་གང་གྱུར་དང་། །ཡི་གེའི་དོན་དང་སྤྱི་ཡི་དོན། །ཚོགས་པ་ལ་ནི་བཤད་པར་འདོད། །ཇི་བཞིན་སྒྲ་མིན་ངེས་དོན་དང་། །དེ་བཞིན་དགོངས་ཏེ་བཤད་པ་ཉིད། །སྦས་དང་མཐར་ཐུག་པ་རྣམས་ནི། །སློབ་མ་ལ་ནི་བཤད་པར་འདོད། །ཅེས་པས་སོ་ཞེ་ན། ཡིག་དོན་གྱི་བཤད་པ་ཡིན་ན་ཚོགས་པ་ལ་ཡིན་ཟེར་བ་དེ་ཡང་དག་པ་མ་ཡིན་ཏེ། གཉིས་ཀ་ལ་རྒྱུད་ཚང་བར་བཤད་པར་ཡང་མི་འགྱུར་ལ། སློབ་མ་ལ་གཉིས་ཀ་འཆད་དུ་བཅུག་ཀྱང་། ཚོགས་པ་ལ་རྒྱུད་ཚང་བར་བཤད་དུ་མི་བཏུབ་སྟེ། སློབ་དཔོན་ཟླ་གྲགས་༼ཉི༷ད་༽ཀྱི་འགྲེལ་པ་ལས། ཁ་ཅིག་ན་དགོངས་ཏེ་བཤད་པ་ལ་སོགས་པ་རེ་རེ་ལས་མ་བཤད་པ་མཐོང་བས་དེ་འཇོག་པར་འགྱུར་རོ། །དེས་ན་མ་ཡིན་ནོ། །འོ་ན་བཤད་པ་གཉིས་གང་ཡིན་ན། སྤྱི་དོན་གཉིས་སུ་འཆད་ལུགས་ཀྱི་མན་ངག་གསུམ་གྱིས་རྒྱུད་མཐའ་དག་འཆད་པ་ནི་ཚོགས་པ་ལ་བཤད་པ་ཡིན་ལ། སློབ་མ་སློབ་དཔོན་དུ་གྱུར་པ་ཟབ་པ་རྒྱ་ཆེ་བའི་བློ་དང་ལྡན་པ་ལ་བཤད་པ་མཐའ་དག་བྱེད་དོ། །ཡི་གེའི་དོན་དུ་བཤད་པ་འདིའང་སྦས་པ་དང་མཐར་ཐུག་འཆད་པས་སློབ་མ་ལ་བཤད་པ་ཡིན་པ་དང་སྤྱི་དོན་ཡང་སྟོན་པས་བཤད་པ་ཚང་བ་བསྡུས་པ་ཡིན་པས་སློབ་མ་བློ་ཞན་པ་བསྒྲུབ་པ་དོན་དུ་གཉེར་བ་ལ་བཤད་པ་ཡིན་ནོ། །གོང་གི་ལུང་དོན་འདིར་བཀྲལ་བ་ལྟར་ཤེས་དགོས་ཀྱི། གཞན་གྱིས་བཤད་པ་བཞིན་བྱས་ན་ཟླ་བའི་དགོངས་པ་དང་མི་འགྲིབས་གསུངས་པ་ཡིན་ནོ། །རྩོད་པ་སྤང་བ་གསུམ་པ་ནི་འདི་ན་ཁ་ཅིག་ན་རེ་དེ་ལྟར་བཤད་ཐབས་ཀྱི་མན་ངག་མང་དུ་སྦྱར་ཡང་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་རྒྱན་བདུན་ཞེས་བྱ་བ་གླེང་བསླང་བ་ལྔ་དང་། རིགས་པ་བཞི་དང་། མཐའ་དྲུག་དང་། ཚུལ་བཞི་དང་། བཤད་པ་གཉིས་དང་། སློབ་མ་བརྟག་པ་དང་། བདེན་པ་གཉིས་ཞེས་བྱ་བ་གསུངས་པ་དེ་འདིར་མ་ཚང་བ་དང་། ཡང་སྤྱི་དང་སྦས་པ་ལ་སོགས་པར་བཤད་པ་འདི་ཀུན་ལས་བཏུས་པའི་རྒྱུད་ཀྱི་རྗེས་སུ་འབྲངས་ནས། སློབ་དཔོན་འཕགས་པ་ཡབ་སྲས་ཀྱི་ལུགས་ཡིན་གྱིས་དགྱེས་པའི་རྡོ་རྗེ་ན་མེད་པས་དེ་འདིར་བཀབ་པ་ཡིན་ནོ་ཞེས་བླུན་པོ་ཕལ་ཆེར་བླུན་པར་གྱུར་པ་རང་གི་ལུགས་ཙམ་ལ་མགུ་བས་གཞན་སྨོད་པར་བྱེད་པ་འདུ་ཤེས་མེད་པའི་ལྷ་ཚེ་རིང་པོ་ལྟ་བུར་གྱུར་པ་ཁ་ཅིག་ཟེར་རོ། །དེ་ལ་རྒྱན་བདུན་ཞེས་བྱ་བ་བདག་ཅག་གི་བླ་མ་མི་གསུང་བས་མ་སྨྲས་ཀྱིས་དེ་དག་ཚང་བར་ཡོད་དོ། །ཇི་ལྟར་ཡོད་ན་རྒྱན་བདུན་ནི། རྒྱུད་ཀྱི་མཚན་དོན་མིང་དང་ཆགས་ཅན་གྱི་དོན་དུ་གསུངས་པ་རྒྱུ་དང་རྒྱུད་མཛད་པ་པོ་རྡོ་རྗེ་འཆང་དང་ཆོ་ག་ལེའུ་རིམ་པར་ཕྱེ་བ་དུམ་བུའི་བཞིའི་ཚད་དང་དམན་འབྲིང་མཆོག་གི་དངོས་གྲུབ་དགོས་པ་སྟེ་ལྔ་ནི་གླེང་བསླང་བ་དང་། འཛམ་གླིང་གི་མིར་འཁྲུངས་པ་རིགས་རྒྱུད་དང་ཁྱིམ་ནས་འབྱུང་བ་གླེང་གཞི་དང་འདུལ་བའི་སྡོམ་པའི་སྡོམ་པ་སྲུང་བ་ངེས་པར་བསྟེན་བྱའི་གནས་ཀྱི་ཚིག་དང་དཀའ་སྤྱད་འབྲས་བུའི་རྒྱུ་སྟེ་ཆགས་བྲལ་སྤྲུལ་སྐུའི་དབང་དུ་བྱས་པའི་རིགས་པ་བཞི་དཀྱིལ་འཁྱོར་པ་ཐམས་ཅད་རིགས་ལྔའི་གཙོ་བོ་གང་བྱས་ཀྱི་རིགས་སུ་སྐྱེས་པ་རྒྱུད། སླར་ཡང་གསང་ཆེན་རིགས་གཅིག་ཏུ་ངེས་པ་གླིང་གཞི། རིགས་ལྔའི་སྡོམ་པ་གཟུང་བ་ཉིད་ངེས་པར་བསྟེན་བྱའི་གནས་ཀྱི་ཚིགསྒེག་སོགས་འདོད་ཡོན་ལ་སྤྱོད་པ་འབྲས་བུ་མངོན་དུ་བྱེད་པའི་རྒྱུ་སྟེ། ཆགས་ཅན་གྱི་རྒྱུའི་དབང་དུ་བྱས་པ་བཞི་སྟེ། དེ་ལྟར་གཉིས་ནི་རྒྱུད་སྡེའི་དབྱེ་བ་དང་བྱུང་ཚུལ་དང་མཚན་དོན་གྱི་སྐབས་ཀྱིས་ཤེས་པར་ནུས་སོ། །གོང་ཏུ་བཤད་ཟིན་པའི་མཐའ་དྲུག་དང་ཚུལ་བཞི་དང་བཤད་ཚུལ་ཚོགས་སློབ་གཉིས་ནི་རྒྱུད་བཤད་ཐབས་ཀྱི་མན་ངག་གིས་བསྟན་ལ། ཐོས་ཚེ་འཛིན་ནུས་ཀྱང་མྱུར་དུ་བརྗེད་པ་ཨུཏྤལ་ལྟ་བུ། ཐོས་དོན་མི་བརྗེད་ཀྱང་གཞན་ལ་སྟོན་མི་ནུས་པ་པད་དཀར་ལྟ་བུ། དད་བརྩེ་ཤེས་རབ་ལྡན་ཡང་ཐོས་དོན་བརྗོད་སླ་བ་པདྨ་ལྟ་བུ། ཐོས་ཉུང་ང་རྒྱལ་ཆེ་ཁ་མང་བ་གཞན་རྗེས་འཛིན་མི་ནུས་པ་ཙནྡ་ལྟ་བུ། ཚུལ་ཁྲིམས་དག་ཅིང་མཁའ་ལ་སྒྲིན་པ་ཤེས་རབ་དང་ལྡན་ཞིང་རྒྱུད་གཅིག་ཐོས་ནས་ལེགས་པར་སྟོན་པ་སྐལ་བཟང་སྤྱོད་པས་བརྒྱན་པ་རིན་ཆེན་ལྟ་བུ་སྟེ། སློབ་མ་བརྟག་པ་དང་ཀུན་རྫོབ་དོན་དམ་གྱི་བདེན་པ་གཉིས་ནི་རྒྱུད་ཀྱི་མངོན་པར་རྟོགས་པས་ཤེས་པར་ནུས་ཏེ་དེ་དག་ཀྱང་བཤད་ཚུལ་འདིའི་ཁོངས་སུ་འདུས་པར་རིག་པར་བྱའོ། །ཡང་གཞན་གྱི་བཤད་པ་འདི་ལ་བཀབ་བོ་ཞེས་བྱ་བ་དེ་ལ་འདི་འདྲི་བར་བྱ་སྟེ། བཀབ་པ་ཞེས་བྱ་བ་དེ་རང་གི་བཤད་སྲོལ་ལ་མེད་པ་ལ་གཞན་གྱི་བཤད་སྲོལ་ལ་མཐོང་ནས་དེ་ལེགས་སུ་རེ་ནས་བཀབ་པ་ལ་ཟེར་རམ། རྒྱུད་ཀྱི་ནང་ན་མིང་མི་སྣང་བ་རྒྱུད་གཞན་གྱིས་གསལ་བར་བྱས་པ་ལ་བཀབ་ཅེས་ཟེར། དེ་ལ་དང་པོ་ལེགས་སུ་རེ་ནས་མེད་པ་བཀབ་བོ་ཞེས་སྨྲ་ན། འཕགས་སྐོར་གྱི་ནི་ཚུལ་བཞི་དང་མཐའ་དྲུག་ཅེས་བྱ་བ་ཡིན་ལ། བདག་ཅག་གི་ནི་གདམས་ངག་དྲུག་ཅེས་བྱ་བ་ནམ་མཁའ་དང་མཉམ་པའི་རྒྱུད་ཀྱི་ཡིན་པ་ག་ལ་མཚུངས། གལ་ཏེ་དོན་མཐུན་ནོ་ཞེ་ན། དེ་ནི་ཤིན་ཏུ་ལེགས་ཏེ་སངས་རྒྱས་ཀྱི་དགོངས་པ་མ་ནོར་བར་འཆད་པ་དེ་ཚུལ་འདི་ཡིན་པར་རིག་པར་བྱའོ། །གཞན་ཡང་མཐའ་དྲུག་ཚུལ་བཞི་དང་གདམས་ངག་དྲུག་མཐུན་དུ་བཅུག་ཀྱང་། བདག་ཅག་ལ་བཤད་ཐབས་ཀྱི་མན་ངག་གཞན་བདག་ཉིད་ཅན་གསུམ་དང་གནས་པ་བཞི་ལ་སོགས་པ་དུ་མ་ཡོད་ན་འདི་རྣམས་གང་གི་ལུགས་འདིར་བཀབ་པ་ཡིན། དེས་ན་བདག་ཅག་གི་ལུགས་བཤད་ཚུལ་མཐའ་ཡས་པ་འདི་ནི་གྲུབ་པའི་བླ་མ་བརྒྱུད་པ་མ་ཉམས་པ་ལས་ཤེས་ཀྱི་གཞན་གྱིས་འདི་ལྟ་བུ་རྟོགས་པར་ག་ལ་འགྱུར། འདི་ལྟ་བུའི་ཚུལ་རྟོགས་པ་ནི་གནས་བརྟན་དཔལ་ལྡན་ཆོས་སྐྱོང་རྣལ་འབྱོར་གྱི་དབང་ཕྱུག་བིཪྺ་པ་ཞེས་བྱ་བ་ཡོངས་སུ་རྫོགས་པའི་པཎྜི་ཏར་གྱུར་ནས། སྒྲུབ་པ་སྙིང་པོར་མཛད་ནས་སྤྲུལ་པའི་སྐུ་ཡེ་ཤེས་ཀྱི་མཁའ་འགྲོ་མ་ལས་དངོས་སུ་དབང་བླངས་ཏེ་གྲུབ་པ་ཆེན་པོའི་ས་བརྙེས་ནས་ལུས་དེ་ཉིད་ཀྱིས་ཕྱག་རྒྱ་ཆེན་པོ་མངོན་དུ་མཛད་དེ། ཕྱི་རོལ་པ་དང་ནང་པ་མཐའ་དག་གིས་ཀྱང་ཅུང་ཟད་ཀྱང་བསྙད་པ་མེད་པར་གྲུབ་སྟེ། དེང་སང་ཡང་སྟོབས་ཀྱི་མགོན་པོ་ཞེས་ཀུན་གྱིས་བསྔགས་པ་དང་། ཡང་རྣལ་འབྱོར་གྱི་དབང་ཕྱུག་ཌོམྦི་ཤྲཱི་ཧེ་རུ་ཀ་ཞེས་བྱ་བ་བིར་པའི་སློབ་མར་ཡང་གྲགས་ཤིང་། ཡེ་ཤེས་ཀྱི་མཁའ་འགྲོ་མ་ལས་ཀྱང་དབང་བླངས་ཏེ། ར་ཌ་ཞེས་བྱ་བའི་ཡུལ་དུ་ཀུན་ཏུ་བཟང་པོའི་སྤྱོད་པ་མཛད་ནས། ལུས་དེ་ཉིད་ཀྱིས་གནས་གྱུར་པའི་སྐུ་དབང་ཕྱུག་བརྒྱད་དང་ལྡན་པའི་བཅོམ་ལྡན་འདས་དཔལ་ཧེ་རུ་ཀའི་སྐུར་གྱུར་ཏེ་འཇིག་རྟེན་པ་ཐམས་ཅད་མཐུན་པར་གཤེགས་པའི་སློབ་དཔོན་དེ་ལྟ་བུས་རྒྱུད་ཀྱི་དོན་ཇི་ལྟ་བ་བཞིན་དུ་ཐུགས་སུ་ཆུད་ནས། དེ་ཉིད་ཀྱི་ཞལ་སྔ་ནས་བྱུང་བའི་བརྒྱུད་པ་བར་མ་ཆད་པས་ཤེས་པར་ནུས་སོ། །དེ་ལྟར་དེ་དག་གི་བརྒྱུད་པ་ནི་བིཪྺ་པའི་སློབ་མ་ནག་པོ་པ་དང་། དེའི་སློབ་མ་ཌ་མ་པ་དང་། དེའི་སློབ་མ་ཨ་བ་དྷཱུ་ཏི་པ་དང་། དེའི་སློབ་མ་ག་ཡ་དྷ་ར་དང་། ཡང་ཌོམྦི་པའི་སློབ་མ་ཨ་ལ་ལ་བཛྲ་དང་། དེའི་སློབ་མ་ནགས་ཁྲོད་པ་དང་། དེའི་སློབ་མ་གརྦྷ་རི་བ་དང་། དེའི་སློབ་མ་ཛ་ཡ་ཤྲཱི་ཤཱནྟི་པ་དང་། དེའི་སློབ་མ་མི་ཐུབ་ཟླ་བ་དང་། དེའི་སློབ་མ་དཔའ་བོ་རྡོ་རྗེ་སྟེ། ག་ཡ་དྷ་ར་དང་དཔའ་བོ་རྡོ་རྗེ་གཉིས་ཀའི་སློབ་མ་འབྲོག་མི་ལོ་ཙཱ་བ་ཆེན་པོ་ཤཱཀྱ་ཡེ་ཤེས་ཏེ། དེས་གངས་ཅན་གྱི་ཁྲོད་ཐམས་ཅད་སྣང་བར་མཛད་དེ། དེང་སང་ཡང་ཧེ་བཛྲའི་རྒྱུད་མཐའ་དག་ལོ་ཙཱ་བ་ཆེན་པོ་དེས་བསྒྱུར་བ་ལ་བཤད་པ་བྱེད་པས་རྒྱུད་ཀྱི་སྡུད་པ་པོ་དང་འདྲའོ། །ལོ་ཙཱ་བ་ཆེན་པོ་དེའི་སློབ་མ་ནི། སྙིང་པོའི་མཐའ་དང་དེ་བཞིན་རྒྱལ་པོའི་མཐའ། །རིག་པའི་མཐའ་དང་སྣང་བའི་མཐའ་ཅན་ཏེ། །སྙིང་པོའི་མཐའ་དང་རིག་མཐའི་བླ་མ་ལས། །འབར་བའི་མཐའ་ཅན་བླ་མ་གཉིས་སུ་བརྒྱུད། །དཔེར་ན་མཚོ་མ་དྲོས་པ་ལས་ཆུ་བོའི་རྒྱུན་བཞི་འབབ་ཅིང་། རྒྱུན་དེ་དག་ཀྱང་ཡང་བྱེ་ཞིང་ཡང་འདུས་ཏེ་རྒྱ་མཚོ་ཆེན་པོར་བབས་པ་དང་མཚུངས་པར། བདག་ཅག་གི་བླ་མ་ཆོས་ཀྱི་རྒྱ་མཚོ་ཆེན་པོར་འདུ་བར་གྱུར་པ་ཡིན་ནོ། །གལ་ཏེ་ཡང་རྒྱུད་རང་གི་ནང་ན་གནས་པས་འདིར་གསལ་བར་བྱ་བར་མི་རིགས་སོ་ཞེས་སྨྲ་ནའང་། དེ་ལྟར་ན་རྒྱུད་བཀླགས་པ་ཙམ་ཉིད་ཀྱིས་ཆོག་གིས་བཤད་པ་འགའ་ཡང་མི་དགོས་པར་འགྱུར་རོ། །ཡང་བླ་མའི་མན་ངག་གིས་འཆད་དོ་ཞེ་ན། གསང་སྔགས་ཐམས་ཅད་མན་ངག་མེད་པར་སུས་འཆད། མན་ངག་དེ་དག་ལུང་གིས་གསལ་བར་བྱས་ན་ལེགས་པར་འགྱུར་གྱིས། ལུང་མེད་པར་མན་ངག་འབའ་ཞིག་བྱས་ན་རང་བཟོ་མཁན་རྣམས་ཀྱིས་རང་བཟོའི་ཚིག་དུ་མ་འཇུག་པར་འགྱུར་རོ། །དེ་བས་ན། རྒྱུད་ནི་རྒྱུད་ལས་ཤེས་པར་བྱ། །ཞེས་འབྱུང་བ་དང་། ཧེ་བཛྲ་རྡོ་རྗེ་སྙིང་པོའི་འགྲེལ་པ་ལས་ཀྱང་། དགྱེས་པའི་རྡོ་རྗེ་བདེ་མཆོག་འཁོར་ལོ་དང་ནི་རྡོ་རྗེ་གདན་བཞིའི་ཚིག་ཤེས་འགྱུར། །དེ་བཞིན་བདེ་མཆོག་ཉུང་ངུའི་ཚིག་གིས་རྡོ་རྗེ་གདན་བཞི་དང་ནི་དགྱེས་པའི་རྡོ་རྗེའོ། །ཞེས་བྱ་བ་ལ་སོགས་པ་གསུངས་པས་སོ། །དེའང་རྒྱུད་མ་ལུས་པ་ཕན་ཚུན་སྦྱར་བ་ནི་མ་ཡིན་ཏེ། བླ་མའི་མན་ངག་གིས་རྩ་ྈབའི་རྒྱུད་ཀྱིྈ་༼བ་བྱ༷ས་ན༷ས་དེ༷་ལ༷༽་ངེས་ཤེས་སྐྱེད་པ་རྒྱུད་ལས་ཤེས་པར་བྱའོ་ཞེས་བྱ་བའི་དོན་ཏོ། །དེ་བས་ན་རྒྱུད་ཀྱི་བཤད་པ་གཞན་ཕལ་ཆེར་ནི་པཎྜི་ཏ་རྣམས་ཀྱི་སྒྲའི་དཔྱད་པ་དང་། སྒྲུབ་པའི་ཐབས་ཀྱི་མན་ངག་ཙམ་ཤེས་པས་རྒྱུད་སྒྲུབ་པའི་ཐབས་ལྟར་བཤད་པ་ཞེས་བྱ་བ་བཤད་པ་ཕྱོགས་གཅིག་པ་ཙམ་ཡིན་ནོ། །རྒྱུད་ཀྱི་བཤད་པ་འདི་ནི་རྒྱུད་ཡིད་བཞིན་གྱི་ནོར་བུ་ལྟ་བུར་བཤད་པ་ཞེས་བྱ་བ་གསང་སྔགས་ཐམས་ཅད་ཀྱི་ཚུལ་སྟོན་པ་ཡིན་ནོ། །རྒྱུད་སྡེ་སྤྱིའི་རྣམ་པར་གཞག་པ་ལས་རྒྱུད་བཤད་ཐབས་ཀྱི་མན་ངག་བསྟན་པའི་ལེའུ་སྟེ་གསུམ་པའོ།། །།རྒྱུད་སྡེ་སྤྱི་ཡི་རྣམ་པར་གཞག་པ་རྣལ་འབྱོར་མིག །བློ་གྲོས་རྒྱ་ཆེར་སྐྱེད་བྱེད་རིན་ཆེན་ལུང་གི་མཛོད། །ཟབ་མོའི་མདོ་རྒྱུད་གསལ་བར་བྱེད་པའི་སྒྲོན་མ་སྟེ། །རྒྱལ་བའི་དགོངས་པ་མཐའ་ཡས་ལྟ་བའི་མེ་ལོང་ཡིན། །དེ་ལྟར་བྲིས་པ་འདི་ནི་བླ་མའི་གསུང་། །དེ་ཡི་གསལ་བྱེད་མདོ་རྒྱུད་བསྟན་བཅོས་ལས། །མཐོང་བ་བྲིས་ཀྱིས་རྟོག་གེས་བརྟགས་པ་ཡི། །རང་དགར་བྲིས་པ་འདི་ན་ཡོང་མ་མཆིས། །དེ་བས་དཔལ་ལྡན་བླ་མ་མཁའ་འགྲོའི་ཚོགས། །བདག་གིས་ལེགས་སྨྲས་འདི་ལ་མཉེས་མཛོད་ལ། །བདག་ལ་བརྩེ་དགོངས་སྐུ་གསུམ་མ་ཐོབ་བར། །ལམ་གྱི་བར་དུ་གཅོད་རྣམས་ཞི་བར་མཛོད། །འདི་བྲིས་དགེ་བས་སེམས་ཅན་ཀུན། །བསོད་ནམས་ཡེ་ཤེས་ཚོགས་རྫོགས་ཏེ། །དཔལ་ལྡན་ས་བཅུའི་རྩེ་མོ་ནི། །རྡོ་རྗེ་འཆང་དབང་གྲུབ་པར་ཤོག །རྒྱུད་སྡེ་སྤྱིའི་རྣམ་པར་གཞག་པ་རྒྱུད་མ་ལུས་པ་ལ་འཇུག་པ་ཞེས་བྱ་བ་འདི་རེ་ཞིག་རྫོགས་ཏེ། སེམས་ཅན་དཔག་ཏུ་མེད་པས་འདི་རྟོགས་ཏེ་བློ་གྲོས་ཡངས་པ་མཆོག་ཏུ་གྱུར་པ་ཐོབ་པར་གྱུར་ཅིག །རྣལ་འབྱོར་པ་བསོད་ནམས་རྩེ་མོས་སྦྱར་བའོ། །དོན་འདི་ནི་ཐོས་པ་འཛིན་པའི་དངོས་གྲུབ་བརྙེས་པའི་བདག་ཉིད་ཆེན་པོ་ཐུགས་ལེགས་པར་སྦྱངས་པའི་གསེར་གཙོ་མ་ལྟར་དྭངས་ཤིང་རྣམ་པ་ཐམས་ཅད་ཀྱི་མཆོག་དང་ལྡན་པའི་གངས་རིའི་ངོགས་སུ་ཡོངས་སུ་རྫོགས་པའི་སྒྲོན་མེའི་བསིལ་ཟེར་བབས་པ་ལྟར་ཀུན་ནས་གསལ་ཞིང་མ་རྙོག་པས་ཤེས་བྱ་ལ་བསྙེངས་པ་མི་མངའ་བའི་ས་མངོན་དུ་མཛད་ཅིང་མི་འཕྲོགས་པའི་མཁྱེན་རབ་སྐྱ་རེངས་ལྟར་གསལ་བའི་གཟི་བརྗིད་ཀྱིས་མི་ཤེས་པའི་མུན་པའི་དགྲ་སྡེ་བཅོམ་པས་འཁོན་དུ་གྱུར་པའི་ཆོ་འབྲང་དང་ལྡན་པའི་སྐྱེས་བུ་ཆེན་པོ་བསོད་ནམས་དང་ཡེ་ཤེས་ཀྱི་ཚོགས་མ་ལུས་པ་ཡོངས་སུ་རྫོགས་པར་མཛད་པས་ལྷ་དང་བཅས་པའི་འཇིག་རྟེན་གྱི་གཙུག་གི་ནོར་བུའི་རྩེ་མོས་བཀུར་བའི་གནས་སུ་གྱུར་པ་མཁས་པ་ཆེན་པོ་འཇིག་རྟེན་གྱི་རྒྱན་རིག་པ་འཛིན་པའི་དངོས་གྲུབ་བརྙེས་ནས་བདེ་བ་ཅན་དུ་མངོན་སུམ་དུ་གཤེགས་པར་གྱུར་པ་དེས་མཛད་པ་ལས་ཚིག་གི་སྡེབ་སྦྱོར་གྱི་ཕྲེང་བ་དཔག་དཀའ་བའི་སྟོབས་ཀྱིས་ལས་དང་པོ་ྈལྈ༼པ༽་རྣམས་ཀྱི་ཡིད་ལ་འཛིན་དཀའ་བར་གྱུར་པའི་སྐབས་ཁ་ཅིག་རྗེ་བཙུན་ཆེན་པོ་བདེ་བར་གཤེགས་པ་དང་མི་གཉིས་པའི་ཐུགས་མངའ་བའི་བཀས་གནང་བ་དང་དམ་པའི་གྲོགས་འགའ་ཞིག་གིས་བསྐུལ་བས་དུས་ཕྱིས་ས་སྐྱའི་དབེན་གནས་དམ་པ་དེ་ཉིད་དུ་འཁྲུངས་པའི་གནོད་བྱེད་དང་འཁོན་པའི་གཞོན་ནུ་ཐ་སྙད་ལ་ཞུགས་པའི་ཤེས་རབ་དང་ལྡན་པ་ཀུན་དགའ་རྒྱལ་མཚན་གྱིས་གཡར་ཁྲལ་བླངས་ནས་གཟུང་བདེ་བར་བགྱིས་པ་ལགས་སོ། །མཁའ་འགྲོའི་དབང་པོ་དཔག་ཡས་ནམ་མཁའ་ལ། །ལྡིང་བའི་མཚན་མ་རྗེས་སུ་མཐོང་གྱུར་ནས། །སྦྲང་རྩི་འཛིན་པ་པདྨོའི་རྩ་ལག་དང་། །ལྡན་པ་དེ་ཡང་རྗེས་སུ་བརྩོན་པ་ལགས། །ཞེས་བྱ་བར་རྟོགས་པར་བྱའོ།། །།