སྤྱི་དོན་བཞི་པ་གདམས་པ་ཉམས་ལེན་གྱིས་མཚོན་ཚུལ་བསྟན་པ།

གདམས་བཞི་རྒྱུད་ལུང་བབ་ཚུལ་གྱིས་ཁོག་བཅིངས།

༈ སྤྱི་དོན་བཞི་པ་གདམས་པ་ཉམས་ལེན་གྱིས་མཚོན་ཚུལ་བསྟན་པ་ལ་གསུམ་སྟེ། 1 གདམས་བཞི་རྒྱུད་ལུང་བབ་ཚུལ་གྱིས་ཁོག་བཅིངས།2 གདམས་ཚུལ་དབང་གི་ཆུ་བོས་རྒྱུད་སྦྱོང་། 3 གདམས་ཁྲིད་ཉམས་ལེན་གྱི་རིམ་པས་གྲོལ་བར་བྱ་བའོ། །[1] དང་པོ་ནི། གཞི་ལྷུན་གྲུབ་ཆེན་པོའི་ངང་ལས། ཐུགས་རྗེས་རང་སྣང་དུ་རིག་པས་དབང་བཞི་ཡེ་ཤེས་ཀྱི་ཆུ་བོ་ཡེ་རྫོགས་རང་བྱུང་ཆེན་པོར་ཐོབ་སྟེ། དགོངས་པ་རང་བྱུང་གི་མན་ངག་རང་ཤར་བས། ལུང་སྟོན་པའི་བླ་མ་མེད་པར་སངས་རྒྱས་པ་ནི། ཀུན་ཏུ་བཟང་པོ་གཞི་ཐོག་ཏུ་བྱང་ཆུབ་པའོ། །དེ་ནས་ཆོས་ཀྱི་སྐུ་ལས་ལོངས་སྐུར་བཞེངས་ཏེ་རྣམ་དག་སྟུག་པོ་བཀོད་པའི་ཞིང་དུ་རིགས་ལྔའི་དཀྱིལ་འཁོར་མངོན་པར་སྣང་བ་དང་། སྟོན་པ་རྣམ་པར་སྣང་མཛད་ཀྱིས་འཁོར་རིགས་བཞིའི་ཚོམ་བུ་རང་སྣང་དུ་གསལ་བ་ལ། དགོངས་པ་བཞི་འདུས་ཀྱི་དབང་རང་རྫོགས་ལྷུན་གྲུབ་ཏུ་རྫོགས་ཏེ། རང་གི་ངོ་བོས་བརྡའི་ཆོས་བསམ་གྱིས་མི་ཁྱབ་པའི་དུས་སུ་གསུངས། དེ་ནས་ལོངས་སྐུ་ཡབ་ཡུམ་གྱི་བྱིན་རླབས་ཐུགས་རྗེའི་རང་ཤར་གྱི་རྩལ་ལས་སྤྲུལ་སྐུ་རྡོ་རྗེ་སེམས་དཔའ་རང་བྱོན་ཏེ། དགེ་བ་ཡེ་རྫོགས་ཀྱི་དབང་དང་ཆོས་ཉིད་རང་བྱུང་གི་གདམས་པ་ཡེ་བབས་ལྷུན་

གྲུབ་ཆེན་པོར་ཐོབ་ནས་གནས་རིགས་གསུམ་དུ་གདུལ་བྱའི་དོན་མཛད་དེ། ཀུན་གསལ་ལས། ངས་ལེན་མ་མྱོང་བའི་ལུས་གཉིས་བླངས་པས། མཐོང་མ་མྱོང་བའི་ཡུལ་གཉིས་མཐོང་། གྲག་མ་མྱོང་བའི་སྒྲ་གཅིག་བྱུང་། བརྗོད་མ་མྱོང་བའི་ཚིག་གཅིག་བྱུང་། དེའི་ཚེ་རྟོགས་པའི་ཤེས་རབ་སྐྱེས་སོ། །ཞེས་གསུངས། ལེན་མ་མྱོང་བའི་ལུས་ནི་ཆོས་སྐུ་ནང་གསལ་ཏེ། ལོངས་སྤྲུལ་གཉིས་དེ་ལས་བྱུང་བའོ། །ཡུལ་གཉིས་ལོངས་སྐུ་རང་སྣང་གི་ཞིང་དང་། སྤྲུལ་སྐུའི་གདུལ་ཞིང་ངོ་། །སྒྲ་ནི་ལོངས་སྐུ་རང་གདངས་ཡི་གེ་དྲུག་གི་འཁོར་ལོ། ཚིག་ནི་འདུས་བྱས་རང་སྣང་ཚངས་པའི་དབྱངས་སུ་ཐོས་པའོ། །ཡང་ལུས་ནི་སྐུ་གསུམ། ཡུལ་ནི་ནང་ལྷུན་གྲུབ་དང་ཕྱི་ཞིང་ཁམས། སྒྲ་ནི་རང་བྱུང་གི་ཡི་གེ། ཚིག་ནི་རང་ཤར་རང་གྲོལ་དུའང་སྦྱོར། དེ་ཐམས་ཅད་སྐུ་གསུམ་གྱི་མཛད་པ་སྟེ། དེ་ཉིད་ལས། རིགས་ཀྱི་བུ། ངོ་བོ་ཆོས་སྐུ། རང་བཞིན་ལོངས་སྐུ། ཐུགས་རྗེ་སྤྲུལ་སྐུ་སྟེ། ཐམས་ཅད་འབྱུང་བའི་གཞི་མ་འགགས་པར་གནས་པས། གཞི་ལ་གནས་པའི་སྐུ་གསུམ་མོ། །རྒྱུ་དག་པ་ཆོས་ཀྱི་སྐུ་ལས། འབྲས་བུ་དག་པ་གཟུགས་ཀྱི་སྐུ་གཉིས་ནང་གསལ་དུ་གནས་པ་ནི་ཡོན་ཏན་དུ་གྲུབ་པ་སྟེ། གཞི་ལ་གྲུབ་པའི་སྐུ་གསུམ་ཞེས་བྱའོ། །ཞེས་དང་། ཀྱེ་གསང་བའི་བདག་པོ་རྣམ་སྣང་ལ་ལོང༷ས་སྐུར༷་{ལོང༵ས་སྐུའི༵་ཆོས༵་སྐུར༵་}བཞག་པ་ནི། རྣམ་སྣང་ལས་རིགས་བཞི་འབྱུང་ཞིང་། རྣམ་སྣང་གི་ཡོན་ཏན་གྱིས་ཁྱབ་པ་སྟེ། རིགས་བཞིའི་གཞི་མའམ་ཤེས་བྱར་གྱུར་པའོ། །རིགས་བཞི་ཡང་ཡར་རྣམ་སྣང་གི་ཐུགས་རྣམ་པར་དག་པ་ལ་ལོངས་སྤྱོད། མར་འཁོར་དུ་སྨིན་པ་སེམས་

དཔའ་དང་སེམས་མ་ལ་ཐུགས་རྗེས་ལོངས་སྤྱོད་པའོ། །དེས་ན་རིགས་བཞིའི་ལོངས་སྐུའོ། །དེ་ལས་ཐུགས་རྗེའི་བྱེ་བྲག་མི་འདྲ་བར་མཁྱེན་པས། སེམས་དཔའ་དང་སེམས་མར་སྤྲུལ་སྐུའོ། །དེ་བཞིན་ཆོས་སྐུའི་སྐུ་གསུམ་གྱི་བཞག་ལུགས་དང་། སྤྲུལ་སྐུའི་སྐུ་གསུམ་གྱི་བཞག་ལུགས་ཀྱང་ཤེས་པར་བྱའོ། །སྐུའི་ཆེ་བ་ཡོངས་སུ་རྫོགས་པ་སྟེ། གདུལ་བྱ་འཁོར་སྨིན་པ་རྣམས་ལ་ཡང་མངོན་པར་སྣང་བས། འབྲས་བུ་མངོན་པར་རྫོགས་པའི་དུས་ཤེས་པར་བྱའོ། །ཐུགས་ཀྱི་མཁྱེན་པས་ཡར་ཆོས་སྐུར་གསལ་ཞིང་སྤྱན་གྱི་མཁྱེན་པས་མར་སྤྲུལ་པའི་སྐུར་གསལ་ཏེ། བར་ན་སྐུ་མཆོག་འོད་གསལ་རྩལ་སྣང་བས་ན་ལོངས་སྐུར་རྣམ་པར་བཞག་པའོ། །ཆོས་ཀྱི་སྤྱན་གྱིས་རྣམ་རྟོག་མི་མངའ་བར་གཟིགས་ལ། ཞལ་གྱི་བར་ནས་ཡི་གེ་དྲུག་འོད་ཟེར་དུ་འཕྲོས་པས། འཛམ་བུ་གླིང་བྱེ་བ་ཕྲག་བརྒྱ་ན་རྡོ་རྗེ་སེམས་དཔའ་རེ་རེ་གསལ་ཞིང་། འགྲོ་དྲུག་སྤྱིའི་གནས་ན་ཐུབ་པ་དྲུག་གནས་པས་ཐུགས་རྗེ་འབྱུང་བའི་སྐུ་གསུམ་མོ། །ཐུགས་རྗེ་མ་ལུས་པ་གཅིག་ལས་འབྱུང་བའི་ཕྱིར་རོ། །དེས་སེམས་ཅན་གྱི་དོན་དངོས་སུ་མཛད་པས་ན་སྤྲུལ་པའི་སྐུ་སྟེ། འགྲོ་བ་འདུལ་བའི་སྐུ་གསུམ་མོ། །མ་འགགས་པས་སྤྲུལ་པའི་སྐུ་སྟེ། རྩལ་ལམ་ཐུགས་རྗེ་ལྟར་སྣང་བའོ། །ཞེས་སོ། །སྐུ་དེ་དག་དབྱེ་བ་དངོས་ནི། དེ་ཉིད་ལས། དབྱེ་ན་ཆོས་སྐུ་ལ་གསུམ་སྟེ། རིག་པ་ངོས་བཟུང་དང་བྲལ་ཞིང་མི་འགྱུར་བས་ཆོས་སྐུའི་ཆོས་སྐུའོ། །རིག་པ་ཤེས་རབ་ཀྱི་སྐུ་ལྔ་མཁྱེན་པ་མ་འགགས་པ་ཡེ་ཤེས་ཀྱི་སྤྱན་རྣམ་པར་དག་པ་ལྔ་ནི་ཆོས་སྐུའི་ལོངས་སྐུའོ། །གདུལ་བྱ་ལ་སྣང་བའི་སྐུ་ལྔ་ནི་ཆོས་

སྐུའི་སྤྲུལ་སྐུའོ། །རིགས་ཀྱི་བུ་དེ་ལ་ནི་ངོ་བོ་རང་བཞིན་ཐུགས་རྗེ་གསུམ་ཞེས་ཀྱང་བྱའོ། །གཞི་ལ་གནས་པའི་སྐུ་གསུམ་ཞེས་ཀྱང་བྱའོ། །འབྲས་བུ་གཞི་ལ་གྲུབ་པ་ཞེས་ཀྱང་བྱའོ། །སྐུ་གསུམ་རྣམ་དག་ཇ་ལོག་ཆེན་པོ་ཞེས་ཀྱང་བྱའོ། །འབྲས་བུའི་ངང་ལ་གནས་པ་ཞེས་ཀྱང་བྱའོ། །ལོངས་སྐུའི་ཆོས་སྐུ་ནི་རྣམ་སྣང་ཆེན་པོའོ། །ལོངས་སྐུའི་ལོངས་སྐུ་ནི་རིགས་བཞིའོ། །ལོངས་སྐུའི་སྤྲུལ་སྐུ་ནི་སེམས་དཔའ་དང་སེམས་མ་རྣམས་སོ། །རིགས་ཀྱི་བུ་དེ་རྣམས་ལ་མཚན་གྱི་བྱེ་བྲག་འབྲས་བུ་མངོན་པར་གསལ་བ་ཞེས་ཀྱང་བྱའོ། །སྐུ་གསུམ་རྣམ་པར་བཞག་པ་ཞེས་ཀྱང་བྱའོ། །ལོངས་སྐུའི་སྐུ་གསུམ་མོ། །སྤྲུལ་སྐུའི་སྐུ་གསུམ་ནི། རིགས་བཞི་སངས་རྒྱས་ཆོས་སྐུ། སེམས་དཔའ་སེམས་མ་ལོངས་སྐུ། ཐུགས་རྗེའི་འོད་ཟེར་སྤྲུལ་སྐུའོ། །ཀྱེ་སེམས་དཔའ་ཆེན་པོ་དེ་ལ་ནི། ཐུགས་རྗེ་འབྱུང་བའི་སྐུ་གསུམ་ཞེས་ཀྱང་བྱའོ། །སྐུ་གསུམ་མཐའ་ལ་བསྐྱལ་བ་ཞེས་ཀྱང་བྱའོ། །དེ་རྣམས་རྡོ་རྗེ་སེམས་དཔའི་ཐུགས་ལ་གནས་ཤིང་སྟོན་པས་དོན་མཛད་པས་འགྲོ་བ་འདུལ་བའི་སྐུ་གསུམ་ཞེས་ཀྱང་བྱའོ། །ཀྱེ་གསང་བདག་ངེས་པར་ཟུང་ཞིག་རྡོ་རྗེ་སེམས་དཔའ་ནི་སྤྲུལ་པའི་སྐུའི་ཆོས་སྐུའོ། །ངའི་དབུའི་ཐོར་ཚུགས་དང་མཛོད་སྤུའི་བུ་ག་དང་། ཤངས་ཀྱི་རླུང་སྒྲོམ་ལ་སོགས་པ་ནས་བྱུང་བའི་སྐུ་འཇམ་དཔལ་དྲི་མེད་སྙིང་པོ་ལ་སོགས་པ་རྣམས་ནི་སྤྲུལ་པའི་སྐུའི་ལོངས་སྐུའོ། །ཐུབ་པ་དྲུག་དགའ་རབ་རྡོ་རྗེ་ལ་སོགས་པ་རྣམ་ནི་སྤྲུལ་པའི་སྐུའི་སྤྲུལ་སྐུའོ། །ཞེས་དང་། སྐུ་གསུམ་ཇ་ལོག་ཅེས་པ་ནི། མཚན་ཉིད་སྡེ་གསུམ་ལས་ཇ་ལོག་སྟེ། འདུས་བྱས་ཀྱི་ཆོས་

ཀ་ནས་དག་པས་རང་བྱུང་གི་ཡེ་ཤེས་ལྷུན་གྱིས་གྲུབ་པའོ། །སྔགས་ཕྱི་ནང་ལས་ཇ་ལོག་སྟེ། རིགས་ལྔ་གདུལ་བྱ་ལ་སྣང་བའི་སྤྲུལ་སྐུ་སྟེ། ལོངས་སྐུ་ལ་སྤྲུལ་སྐུ་ཇ་ལོག་གོ །རྫོགས་པ་ཆེན་པོ་ལ་སོགས་པ་སྤྱི་ཐུན་མོང་ལས་ཇ་ལོག་སྟེ། བདག་གིས་མ་བསྒོམས་མི་བསྒོམ་པར་བདག་ཉིད་ཆེན་པོའི་དགོངས་པ་དང་མི་འབྲལ་བར་གནས་པའོ། །འདུག་ཚུལ་ཇ་ལོག་སྟེ། ཆོས་སྐུ་ཡིས་གཟུགས་སྐུ་གཉིས་ཀྱི་ལུས་བྱས་ཏེ། བདག་མེད་བསམ་འདས་ཀྱི་སྐུ་ཡིན་པས་ཆོས་སྐུ་ཇ་ལོག་གོ ། ལོངས་སྐུ་སྤྲུལ་སྐུར་ཇ་ལོག་ཅིང་། སྤྲུལ་སྐུ་ལོངས་སྐུར་ཇ་ལོག་པས་ན་ཇ་ལོག་གོ ། རིགས་ཀྱི་བུ་དེ་ནི་ལོངས་སྐུ་མན་ཆད་ནས་ལྟོས་པའི་བརྗོད་ཚིག་གི །དེ་ལ་བྱེད་པ་མེད་པར་རང་བཞིན་གྱིས་གནས་པས་ཆེན་པོའོ། །སྐུ་གཉིས་རང་གི་གཞིའི་ངང་ལ་གནས་པས་ན། འབྲས་བུའི་ངང་ལ་གནས་པས། དོན་འགྱུར་བ་མེད་པར་གནས་པར་བྱའོ། །ཞེས་སོ། །དེ་ལྟར་སྟོན་པ་སྐུ་གསུམ་དགོངས་པར་བརྒྱུད་ནས་རྡོར་སེམས་དགའ་རབ་རྡོ་རྗེ་ལ་སོགས་པའི་འཁོར་ལ་ཞི་བ་རྫོགས་དབང་གི་ཆུ་བོ་ཕབ། རྒྱུད་ལུང་མན་ངག་གསང་སྒོ་ཕྱེ། ཚིག་སྦྱོར་ལེགས་པའི་སྒོ་ནས་དཔེ་དོན་རྟགས་གསུམ་གྱིས་སྨིན་ཅིང་གྲོལ་བར་མཛད་དོ། །དེ་ནས་རིམ་པར་བརྒྱུད་དེ་དབང་དང་གདམས་པའི་བཀའ་བབས་ཟམ་མ་ཆད་པར་བརྒྱུད་པ་ནི། གདམས་ཁྲིད་ཆེན་མོ་ལ་རྟོགས་པ་ཡེ་བབས་མན་ངག་གིས་ཁོག་བཅིངས་པས་ཟབ་དོན་སྙིང་པོའི་གཞི་ལ་བསྐྱལ་བ་ཞེས་བྱའོ། །