གཏེར་གསར་མི་གཡོ་བའི་བསྐྱེད་རྫོགས་ཀྱི་ཁྲིད་རིམ་ཟབ་མོའི་ས་བཅད།
༈ གཏེར་གསར་མི་གཡོ་བའི་བསྐྱེད་རྫོགས་ཀྱི་ཁྲིད་རིམ་ཟབ་མོའི་ས་བཅད་བཞུགས་སོ། །ན་མོ་གུ་རུ་ཙཎྜ་མ་ཧཱ་རོ་ཥ་ཎཱ་ཡ། གཏེར་གསར་ཐུགས་སྒྲུབ་བར་ཆད་ཀུན་སེལ་གྱི་ཆ་ལག །མི་གཡོ་བ་བདུད་བཞི་ཟིལ་གནོན་གྱི་བསྐྱེད་རྫོགས་ཟབ་མོའི་ཁྲིད་རིམ་ལ་གསུམ། སྔོན་འགྲོས་
རྒྱུད་སྦྱོང་བ། དངོས་གཞི་ཉམས་སུ་བླང་བ། རྗེས་ཀྱིས་མཐར་དབྱུང་བའོ། །དང་པོ་ལ་གཉིས། ཐུན་གྱི་སྔོན་འགྲོ་དང་། ཁྲིད་ཀྱི་སྔོན་འགྲོའོ། །དང་པོ་ནི། ལུས་ངག་ཡིད་གསུམ་རྣལ་དུ་དབབ་པ་སྟེ་སྤྱི་དང་འདྲ། གཉིས་པ་ལ་གཉིས་ཐུན་མོང་གི་སྔོན་འགྲོ་དང་། ཐུན་མོང་མ་ཡིན་པའི་སྔོན་འགྲོའོ། །དང་པོ་ནི། ཞལ་གདམས་སྙིང་བྱང་གི་རྩ་ཁྲིད་ལས། དལ་འབྱོར་མཆོག་ཐོབ་མི་རྟག་སྐྱོ་ཤས་ཅན༔ ངེས་འབྱུང་དྲག་པོའི་རྒྱུ་འབྲས་བླང་དོར་བརྩོནཞེས་གསུངས་པ་ལྟར་བཞི། ཆོས་ལ་འཇུག་པའི་རྒྱུ་དལ་འབྱོར་རྙེད་དཀའ་བསམ་པ། རྐྱེན་འཆི་བ་མི་རྟག་པས་བསྐུལ་མ་གདབ་པ། ངོ་བོ་ངེས་འབྱུང་གིས་རྒྱུད་སྦྱང་བ། འབྲས་བུ་ལས་འབྲས་ལ་བླང་དོར་བྱ་བའོ། །གཉིས་པ་ལ་བཞི། ཐར་པའི་ལམ་གྱི་རྩ་བ་སྐྱབས་སུ་འགྲོ་བ། ཐམས་ཅད་མཁྱེན་པའི་ལམ་གྱི་སྙིང་པོ་བྱང་ཆུབ་མཆོག་ཏུ་སེམས་བསྐྱེད་པ། འགལ་རྐྱེན་སྡིག་སྒྲིབ་སྦྱོང་བར་བྱེད་པ། དམ་ཚིག་རྡོ་རྗེའི་སྒོམ་བཟླས། མཐུན་རྐྱེན་ཚོགས་རྫོགས་ཤིང་བྱིན་རླབས་མྱུར་དུ་འཇུག་པར་བྱེད་པ་བླ་མའི་རྣལ་འབྱོར་རོ། །དང་པོ་ནི། སྒྲོལ་མ་འཇིགས་པ་ཀུན་སེལ་གྱི་གསང་སྔགས་ལས། བར་ཆད་སྐྱོབ་པའི་ཐབས་ཀྱི་མཆོག༔ སོགས་དང་། གཉིས་པ་ནི། བྱང་ཆུབ་སེམས་གཉིས་སོགས༔ གསུམ་པ་ནི། སྡིག་ལྟུང་ལ་བརྟེན་
སོགས༴ བཞི་པ་ནི། བླ་མའི་བྱིན་བརླབས་སོགས ཏེ་སྐྱབས་ཡུལ་གྱིགཙོ་བོ་མི་གཡོ་བར་བསྒོམ་པས་མཚོན་ཅུང་ཟད་ཁ་བསྒྱུར་བ་ཙམ་མ་གཏོགས་འདྲ་ལ། དམ་ཚིག་རྡོ་རྗེའི་བསྒོམ་བཟླས་ཀྱི་མལ་དུ་རྡོར་སེམས་བསྒོམ་བཟླས་ཐུགས་སྒྲུབ་རྩ་ཁྲིད་ལྟར་ཉམས་སུ་བླངས་ནའང་ལེགས་སོ། །གཉིས་པ་དངོས་གཞི་ལ་གཉིས། ལམ་གྱི་གཞུང་ཤིང་དང་། ལམ་གྱི་ཆ་རྐྱེན་ནོ། །དང་པོ་ལ་གཉིས། རྣལ་འབྱོར་བསྐྱེད་པའི་རིམ་པ་དང་། མན་ངག་རྫོགས་པའི་རིམ་པའོ། །དང་པོ་ནི། བདུད་བཞིའི་གཉེན་པོར་མི་གཡོ་བ་རིགས་བཞི་ཕྱི་ནང་གསང་བ་ཡང་གསང་གི་ཚུལ་དུ་བསྒྲུབ་པ་སྟེ། །དེ་རེ་རེ་ལའང་། དམ་ཡེ་དབྱེར་མེད་ཀྱི་ལྷ་བསྒོམ་པ། དམིགས་པའི་གཙོ་བོ་ལྷའི་སྣང་ཞེན་ལ་བསླབ་པ། ཞར་བྱུང་བཟླས་པ་བྱ་བ། ཐུན་མཐར་ཉེར་བསྡུའི་རྣལ་འབྱོར་གྱིས་མཚམས་སྦྱར་ནས་སྤྱོད་ལམ་ལ་འཇུག་པ་སྟེ་བཞི་རེས་བསྟན་པའི་ཚུལ་བཞིན་ཏུ་གཞུང་སོ་སོ་དང་སྦྱར་ནས་ཤེས་པར་བྱའོ། །གཉིས་པ་ལ་གཉིས། མཚན་བཅས་ཀྱི་རྫོགས་རིམ་དང་། མཚན་མེད་ཀྱི་རྫོགས་རིམ་མོ། །དང་པོ་ལ་གཉིས། སྟེང་སྒོ་རྣམ་པར་གྲོལ་བ་ཆོས་དྲུག་གི་ལམ་དང་། འོག་སྒོ་ཟབ་གསང་ཕོ་ཉའི་མྱུར་ལམ་མོ། །དང་པོ་ལ་དྲུག །རྩ་བ་གཏུམ་མོ། །གཞི་མ་སྒྱུ་ལུས། སྙིང་པོ་འོད་གསལ། ཚོད་འཛིན་
རྨི་ལམ། བློ་ཆོད་འཕོ་བ། སུན་མ་བར་དོའོ། །དང་པོ་ལ་གཉིས། སྦྱོར་བས་གཞི་བཅའ་བ། དངོས་གཞི་ཉམས་སུ་བླང་བའོ། །དང་པོ་ནི། གཏུམ་མོ་མཐིང་གའི་མན་ངག་ལས། ཁྱད་པར་གོས་ལྷགྱི་ཞེན་གཅོད་ཕྱིར༔ སོགས་ཚིག་རྐང་གསུམ་གྱིས་མདོར་བསྡུས་ཏེ་བསྟན་ཏོ། །གཉིས་པ་ལ་གཉིས། ཁྱབ་བྱེད་རླུང་གི་རྣལ་འབྱོར་དང་། ཁྱབ་བྱ་གཏུམ་མོའི་མན་ངག་གོ །དང་པོ་ནི། སྦྱོར་བ་བཞི་ལྡན་གྱི་བུམ་ཅན་བསྒོམ་པ་སྟེ་གཞུང་འདིའི་དངོས་ཤུགས་ལས་འབྱུང་བ་སྤྱི་ལྟར་ཉམས་སུ་བླང་ངོ་། །གཉིས་པ་ལ་གསུམ། མེ་སྦར་བ་དྲོད་ཀྱི་གཏུམ་མོ་ཐིག་ལེ་དབབ་པ་བདེ་བའི་གཏུམ་མོ། རྒྱས་འདེབས་པ་མི་རྟོག་པའི་གཏུམ་མོའོ། །དང་པོ་ལ་གཉིས། དངོས་དང་ཞར་བྱུང་ངོ་། །དང་པོ་ལ་གསུམ། གཞིར་གནས་ཀྱི་མེ་གསོ་བ། འཁོར་ལོ་བཞིའི་གནས་སུ་སྦར་བ། ཕྱི་ནང་ཀུན་ཏུ་ཁྱབ་པར་སྤེལ་བའོ། །དང་པོ་ནི། གཏུམ་པོ་མཐིང་གའི་མན་ངག་ལས། །རྩ་གསུམ་འདུས་མདོར་ཨ་ཤད་ནི༔ ཞེས་སོགས་སོ། །གཉིས་པ་ནི། དེ་ཡིས༴ སོགས་སོ། །གསུམ་པ་ནི། ལུས་ཀྱི༔ སོགས་སོ། །ཞར་བྱུང་རྫས་ཀྱི་གཏུམ་མོ་ནི། །ཐུན་མོང་སོགས་སོ། །གཉིས་པ་བདེ་བའི་གཏུམ་མོ་ནི། གཏུམ་པོ་དམར་པོའི་མན་ངག་ལས། ལུས་གནད་དང་བཅས་ལུས་ཀྱི་དབུས༔ ཞེས་སོགས་སོ། །
གསུམ་པ་མི་རྟོག་པའི་གཏུམ་མོ་ནི། བདེ་བ་ལྷང་གིས་སོགས་ཏེ། རྒྱས་པར་མཚན་མེད་ཀྱི་རྫོགས་རིམ་དང་ཟུང་འབྲེལ་དུ་ཉམས་སུ་བླང་ངོ་། །གཉིས་པ་སྒྱུ་ལུས་ལ་གསུམ་དངོས་དང་། །ཞར་བྱུང་དང་། འབྲས་བུ་འགྲུབ་ཚུལ་ལོ། །དང་པོ་ལ་གཉིས། ཐུན་མོང་ཚིག་དོན་དང་སྤྱི་དོན་གྱི་སྒྱུ་ལུས་ལ་བསླབ་པ་དང་། ཁྱད་པར་སྦས་དོན་གྱི་སྒྱུ་ལུས་ལ་བརྟེན་ནས་རགས་ལུས་དྭང་མར་བསྒྱུར་བའོ། །དང་པོ་ནི། གཏུམ་པོ་སེར་པོའི་མན་ངག་ལས། རང་དང་སྣང་བ་ཐམས་ཅད་ཀུན༔ ཞེས་སོགས་སོ། །གཉིས་པ་ནི། ཁྱད་པར་ཡང་ཟབ་སོགས་སོ། །གཉིས་པ་ཞར་བྱུང་ནི། གེགས་སེལ་སོགས་ཚིག་རྐང་གཉིས་དང་། ཉམས་ལེན་ཀུན་གྱི་སོགས་སོ། །གསུམ་པ་ནི། འདི་ལྟ་བུ་སོགས་ཚིག་རྐང་གསུམ་མོ། །གསུམ་པ་འོད་གསལ་དང་། བཞི་པ་རྨི་ལམ་ནི། གཏུམ་པོ་སེར་པོའི་མན་ངག་ལས། ཡན་ལག་མཚན་མོའི་སོགས་ཀྱིས་ཐུན་མོང་དུ་བསྟན་ཏེ། ལྔ་པ་འཕོ་བ་ནི། སྒྱུ་མའི་སོགས་སོ༔ དྲུག་པ་བར་དོ་ནི། སྣང་གྲགས་སོགས་སོ། །གཉིས་སོ། །འོག་སྒོ་ཟབ་གསང་ཕོ་ཉའི་མྱུར་ལམ་ལ་གསུམ། སྦྱོར་བ་རྒྱུད་སྦྱང་བ། དངོས་གཞི་དཔེའི་ཡེ་ཤེས་བསྐྱེད་པ། རྗེས་ཉམས་མྱོང་འཆར་ཚུལ་ངོ་སྤྲོད་དང་བཅས་པའོ། །དང་པོ་ལ་གཉིས། བདག་བྱིན་གྱིས་བརླབས་པ་
དང་། རང་ལུས་ཐབས་ལྡན་ལ་བསླབ་པའོ། །དང་པོ་ནི། གཏུམ་པོ་དམར་པོའི་མན་ངག་ལས། ལུས་གནད་དང་བཅས་སོགས་ཏེ། གོང་གི་བདེ་བའི་གཏུམ་མོ་ཉིད་དོ། །གཉིས་པ་ནི། དེ་ལ་ཅི་རིགས་སོགས་སོ། །གཉིས་པ་དངོས་གཞི་ནི། ཐིག་ལེ་འཛིན་འདྲེན་སོགས་ཏེ། རིག་མ་བརྟག་པ། དགུག་པ། རྒྱུད་སྦྱང་བ། འདུ་ཤེས་གསུམ་གསལ་གདབ་པ། ཐིག་ལེ་དབབ་པ། བཟུང་བ། ལྡོག་པ། སྒྱུ་མར་བསླབ་པ། གེགས་སེལ། བོགས་འདོན་རྣམས་ཏེ་གཞུང་དང་ཞིབ་པར་སྦྱོར། །གསུམ་པ་ནི། དེ་ལྟ་བུ་ཡི་སོགས་སོ། །གཉིས་པ་མཚན་མེད་ཀྱི་རྫོགས་རིམ་ལ་གཉིས། ཐུན་མོང་དང་ཁྱད་པར་རོ། །དང་པོ་ནི། གོང་དུ་བསྟན་པའི་མི་རྟོག་པའི་གཏུམ་མོ་དང་། ཕོ་ཉའི་ལམ་ལས། རང་ལུས་ལྷ་སྐུ་སྒྱུ་མ་དང་། སོགས་ཀྱིས་བསྟན། གཉིས་པ་ནི། །མན་ངག་འདིའི་མཇུག་སྡུད་གསང་བདག་རྡོ་རྗེ་བེ་ཅོན་གྱི་རྫོགས་རིམ་ལྟར་སྟོང་པའི་འོད་གསལ། སྣང་བའི་འོད་གསལ། སྣང་སྟོང་ཟུང་འཇུག་གི་འོད་གསལ་ལ་བསླབ་པའི་ཚུལ་རྣམས་རིམ་པར་སྟོང་པ་ཤིན་ཏུ་མཐར་ཐུག་དོན༔ ཕྱི་དབྱིངས་སྤྲིན་བྲལ་ནམ་མཁའ་སྟེ༔ ནང་དབྱིངས་ཀ་ཏི་ཤེལ་སྦུག་རྩ༔ གསང་དབྱིངས་འོད་གསལ་གདོད་མའི་བབསཿ དབྱིངས་གསུམ་གཅིག་ཏུ་གཅུན་པ་ཡིས༔ ཡེ་ཤེས་བསམ་མི་ཁྱབ་པར་སྐྱེ༔
རྟག་པར་འཛིན་པའི་གེགས་ཀུན་སེལ༔ ཞེས་དང་། གསལ་བ་ཤིན་ཏུ་མཐར་ཐུག་དོན༔ ནང་གསལ་རིག་པ་ཟང་ཐལ་རྩལ༔ ཕྱིར་གསལ་རྡོ་རྗེ་ལུ་གུ་རྒྱུད༔ བར་དུ་གསལ་བ་དབང་པོ་ཡི༔ མངོན་སུམ་གྱུར་ཏེ་གནད་གཅུན་པས༔ སྣང་བའི་ཡེ་ཤེས་མཁའ་ཁྱབ་འཕེལ༔ ཁྱད་པར་ལྟ་བའི་འཕྲང་ལས་གྲོལ༔ ཞེས་དང་། དེ་ལྟར་དབྱིངས་དང་རིག་པ་གཉིས༔ ཟུང་འཇུག་བསྒོམས་ཏེ་། རྩལ་སྦྱངས་པས༔ རྟག་ཆད་སྤྲོས་པའི་གེགས་ལས་འདས༔ སྤྲོས་མེད་དོན་གྱི་གསང་བའི་བདག རྡོ་རྗེའི་ཡེ་ཤེས་ཚེ་འདིར་འགྲུབ༔ ཅེས་པ་སྟེ་བླ་མའི་མན་ངག་དང་སྦྱར་ཏེ་རྫོགས་པ་ཆེན་པོ་ཡང་གསང་བླ་ན་མེད་པའི་དགོངས་པ་ལྟར་ཉམས་སུ་བླང་ངོ་། །གཉིས་པ་ལམ་གྱི་ཆ་རྐྱེན་ལ་གསུམ། ཟས་ཀྱི་ཞེན་པ་གཅོད་པ་བཅུད་ལེན། གཏམ་གྱི་ཞེན་པ་གཅོད་པ་རོ་སྙོམས། གནས་གྲོགས་ཀྱི་སྤྱོད་ཡུལ་གྱི་མན་ངག་གོ། །དང་པོ་ལ་གཉིས། ཐུན་མོང་མ་ཡིན་པ་ནམ་མཁའ་ཟས་སུ་ཟ་བ་དང་། ཐུན་མོང་པ་རྫས་ཀྱི་བཅུད་ལེན་ཏེ། གཏུམ་པོ་མཐིང་གའི་མན་ངག་ལས། ཟས་ཀྱི་ཞེན་པ་གཅོད་པའི་ཕྱིར༔ སོགས་དང་། ཐུན་མོང་རྫས་ཀྱི་སོགས་སོ། །གཉིས་པ་རོ་སྙོམས་ནི། གཏམ་གྱི་སོགས་དང་། གསུམ་པ་སྤྱོད་ཡུལ་ནི། གནས་གྲོགས་སོགས་ཀྱིས་བསྟན་ཏོ། །གསུམ་པ་རྗེས་ཀྱི་ཁྲིད་ལ་
གཉིས། ཐུན་གྱི་རྗེས་སྤྱོད་དང་། ཁྲིད་ཀྱི་རྗེས་རིམ་མོ། །དང་པོ་ནི། ཐུན་ལས་ལྡང་བའི་ཚུལ་དང་། ཐུན་མཚམས་རྣལ་འབྱོར་སོགས་སྤྱི་ལྟར་སྦྱར། གཉིས་པ་ནི། གེགས་སེལ་དང་། བོགས་འདོན་གྱི་ཐབས་ལ་བརྟེན་ནས་མཐར་ཐུག་གི་འབྲས་བུ་འགྲུབ་པའི་ཚུལ་དང་བཅས་པ་སྟེ་གཞུང་སྤྱི་དང་སྦྱར་ཏེ་བླ་མའི་མན་ངག་ལྟར་ཤེས་པར་བྱའོ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པའི་སྡེས་བྲིས་པ་དགེ །