ལེའུ་བཅུ་པ།
༈ ཚོགས་ལམ་ཆུང་ངུ་དྲན་པ་ཉེ་བར་བཞག་པ་བཞིི། ཚོགས་ལམ་འབྲིང་པོ་ཡང་དག་པར་སྤོང་བ་བཞི། ཚོགས་ལམ་ཆེན་པོ་རྫུ་འཕྲུལ་གྱི་རྐང་པ་བཞིའོ། །རྫུ་འཕྲུལ་རྐང་པ་བཞི་ནི། འདུན་པའི་ཏིང་ངེ་འཛིན་དང་། བརྩོན་འགྲུས་ཀྱི་ཏིང་ངེ་འཛིན་དང་། སེམས་ཀྱི་ཏིང་ངེ་འཛིན༴ དཔྱོད་པའི་ཏིང་ངེ་འཛིན་དང་བཞིའོ། །སྦྱོར་ལམ་གྱི་དྲོད་རྩེ་མོ་ཆུང་ངུ། བཟོད་པ་འབྲིངཔོ་དང་། ཆོས་མཆོག་ཆེན་པོའོ། །དྲོད་རྩེ་གཉིས་སུ་དབང་པོ་ལྔ་བསྒོམ་པ་ནི། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོའོ། །བཟོད་ཆོས་གཉིས་སུ་སྟོབས་ལྔ་བསྒོམ་སྟེ། དད་པའི་སྟོབས་སོགས་གོང་ལྟར་བསྒྱུར་རོ། །འཕགས་ཆོས་ལྔ་ནི། སུན་འབྱིན་གཉེན་པོ་དང་། སྤོང་བའི༴ རྟེན་གྱི༴ ཐག་བསྲིང་གི་སོགས་ལྔའོ། །མཐོང་ལམ་གྱི་རྟེན་བྱང་ཆུབ་ཀྱི་ཡན་ལག་བདུན་ཡིན་ཏེ། དྲན་དང་ཆོས་རབ་རྣམ་འབྱེད་བརྩོན་འགྲུས་དང་། དགའ་དང་ཤིན་ཏུ་སྦྱངས་དང་ཏིང་འཛིན་དང་། བཏང་སྙོམས་འདི་བདུན་བྱང་ཆུབ་ཡན་ལག་སྟེེ། ཞེས་བཤེས་སྤྲིངས་ལས་སོ། །འཕགས་པའི་ལམ་ཡན་ལག་བརྒྱད་སྔ་མ་དེ་རུ། ཡང་དག་ལྟ་དང་འཚོ་དང་རྩོལ་བ་དང་། དྲན་དང་ཏིང་འཛིན་ངག་དང་ལས་མཐའ་དང་། ཡང་དག་རྟོགས་ཉིད་ལམ་གྱི་ཡན་ལག་བརྒྱད། ཅེས་བཤེས་སྤྲིངས་ལས་སོ། །དེ་ཡང་ཐེག་ཆེན་རྣམ་པ་གཉིས་སུ་གསུངས་པའི། བྱང་ཆུབ་སེམས་དཔའི་གཞི་ལ་སྔགས་ཀྱི་ཐེག་པ་ཁྱད་པར་དོན་གྱི་ཚོམ་བུ་བཀོད་པ་ལ། འབྲས་བུ་ནི་གཞོམ་གཞིག་དང་འགྱུར་བ་མེད་པའི་ཆ་ནས་རྡོ་རྗེའི་ཐེག་པ་དང་། ཐབས་མང་ཞིང་དཀའ་བ་མེད་པའི་དབང་རྣོན་གྱི་ཐེག་པ་ལ་རིག་པ་འཛིན་པའི་སྡེ་སྣོད་ཅེས་ཡོངས་སུ་གྲགས་ཤིང་། རྒྱུའི་ཐེག་པ་ལས་ཁྱད་པར་དུ་འཕགས་པ་ཡིན་ལ། རྒྱུན་ཆགས་སམ་རྒྱུན་ཆད་མེད་པའི་ངོས་ནས། གཞི་རྒྱུད་བདེ་གཤེགས་སྙིང་པོ་དང་། ལམ་རྒྱུད་བསྐྱེད་རྫོགས་བསྒོམ་བཟླས། འབྲས་བུའི་རྒྱུད་སྐུ་དང་ཡེ་ཤེས་རྣམས་ལས། བསྐྱེད་རིམ་དང་རྫོགས་རིམ་གཉིས་ལ་བརྟེན་ནས་ཐབས་དང་ཤེས་རབ་ཟུང་དུ་འབྲེལ་བའི་ལམ་ལ་ཞུགས་པའི་གསང་སྔགས་ཕྱི་རྒྱུད་གསུམ་ལྟར། དཀའ་ཐུབ་མཐུ་ཡིས་མི་གདུང་ཞིང་འཇུག་སྒོ་ཡངས་པ་དང་། དབང་པོ་རྣམ་པ་གསུམ་ལས་རྣོན་པོའི་དབང་དུ་བྱས་ཏེ་སྔགས་ཀྱི་ལམ་ལ་བསླབ་པའི་བརྟུལ་ཞུགས་མྱུར་བ་དང་། དུས་ལ་དགོངས་པ་སྟེ་རྫོགས་ལྡན་གྱི་དུས་བྱ་རྒྱུད་དང་། གསུམ་ལྡན་ལ་སྤྱོད་རྒྱུད་དང་། གཉིས་ལྡན་ལ་རྣལ་འབྱོར་དང་ནི་རྩོད་པར་ལྡན་པ་ལ་བླ་མེད་དང་བཞིའོ། །རིགས་ལ་དགོངས་པ་ནི། བྲམ་ཟེ་དང་རྗེ་འུ་རིགས་དང་། རྒྱལ་པོ་དང་ནི། དམངས་སམ། གདོལ་བའོ། །དབང་པོར་དགོངས་པ་ནི། རྟུལ་པོ་དང་། འབྲིང་དང་། རྣོན་པོ་དང་། མཆོག་གོ་ཆོས་ནི་དེ་དག་སོ་སོའི་རིམ་པར་བྱ་བ་དང་། སྤྱོད་པ། རྣམ་འབྱོར། བླ་ན་མེད་པའོ། །དང་པོ་གསུམ་ནི་གསང་སྔགས་ཕྱི་པ་སྟེ། ཐུབ་པས་དངོས་སུ་གསུངས་པའི་མཚན་ཉིད་ཀྱི་ཐེག་པ་དང་། གཙང་སྦྲ་དང་སྡོམ་པའི་ཀུན་སྤྱོད་ཕལ་ཆེར་མཚུངས་ཤིང་རྩོད་པའི་དུས་འགལ་བའི་ཞེས་མི་མཚུངས་པའི་འདོད་ཆགས་ཀྱི་ཀུན་སྤྱོད་ལམ་དུ་བྱེད་ཅིང་། ལྷ་ཡང་གཅིག་ལ་གཅིག་བལྟས་པའི་དགའ་བས་ཚིམ་པ་ཙམ་ལས་ཟུང་འབྲེལ་དུ་རོལ་པ་མིན་ལ། ཤ་ལྔ་དང་བདུན་རྩི་ལྔ་ལ་ལོངས་མི་སྤྱོད་ཅིང་སྤང་བྱའི་རྫས་སུ་འཇོག་པའོ། །དེ་དག་གི་རིམ་པ་དབྱེ་ན། བྱ་བ་དང་ནི་སྤྱོད་པའི་རྒྱུད་ལའང་སེམས་དཔའ་སེམས་མ་དང་། རིགས་སྔགས་དང་། གཟུངས་སྔགས་ཀྱི་ལྷ་རྣམས་ཇི་ལྟར་བསྒྲུབ་ཚུལ་ནི། བྱ་བས་ཡེ་ཤེས་པ་རྗེ་བོ་དང་། བདག་ཉིད་བྲན་ནམ་ཁོལ་པོའི་ཚུལ་དང་། སྤྱོད་པས་སྤུན་ནམ་གྲོགས་པོའི་ཚུལ་དུ་བསྒྲུབ་དགོས་རྒྱུ་སྟེ། བྱ་བས་རྗེ་བོདང་ཁོལ་པོའི་རྣམ་པར་བསྒྲུབ་པ་ལའང་བདག་བསྐྱེད་མེད་པས་རང་ཉིད་དམན་སར་བཞག་པ་དང་། ལ་ལར་བདག་བསྐྱེད་ཡོད་དེ་གཙོ་བོར་མདུན་བསྐྱེད་སྟོན་པ་ཡིན་ལ། ཕྱིའི་བྱ་བ་ཡན་ལག་ལྔ་ཁྲུས་སོགས་གཙང་སྦྲ་གཙོ་བོར་སྟོན་ཅིང་མཆོག་དམན་གྱི་ཚུལ་དུ་བསྒྲུབ་ནས་དངོས་གྲུབ་ཐོབ་པར་འདོད་པའོ། །བྱ་བའི་རྒྱུད་ལས་བཤད་པའི་ལུས་ཀྱི་སྤྱོད་པ་གཙོ་བོར་བྱེད་པ་ཐབས་དང་། ནང་གི་རྣལ་འབྱོར་ལ་ཆ་མཉམ་པར་སྤྱོད་པས་རྒྱུད་དུ་གྲགས་ལ། རང་ཉིད་དམ་ཚིག་སེམས་དཔའ་མདུན་དུ་བཞུགས་པའི་མོས་པ་དང་། དེའི་མདུན་དུ་ཡེ་ཤེས་པ་བཞུགས་པར་མོས་པའི་ལྷ་དེ་དག་སྤུན་ཟླ་འམ་གྲོགས་པོའི་ཚུལ་གྱིས་དངོས་གྲུབ་ལེན་པའོ། །རྣལ་འབྱོར་རྒྱུད་གྱི་གྲུ་ཆད་ཅེས་པ་ནི། གཞལ་ཡས་ཁང་གི་གྲུ་ཟུར་བཅད་པ་མན་ཆད་ལ་བཀོད་པ་ཆེན་པོ་ལོངས་སྤྱོད་རྫོགས་པ་ནི། འོག་མིན་ལོངས་སྐུའི་ཞིང་ཁམས་ཡིན་ལ། དེ་ཉིད་བཞུགས་ཚུལ་ལྟར་བསྟན་ཡང་སྟངས་དཔྱལ་ཟུང་འབྲེལ་མ་ཡིན་ཞིང་། བསྐྱེད་པ་དང་རྫོགས་པ་དང་། ཐབས་དང་ཤེས་རབ་རིམ་པ་ཅན་ཐ་དད་དམ་སོ་སོ་བ་ནང་གི་རྣམ་འབྱོར་གཙོ་བོར་སྤྱོད་ཅིང་ལུས་ངག་གི་སྤྱོད་པ་གྲོགས་སུ་སྟོན་པ། ཡེ་ཤེས་པ་འགུག་ཅིང་བསྟིམ་པ་ལ་ཕྱག་རྒྱ་བཞི་བཅིངས་ཏེ་དམ་ཚིག་པ་དང་ཡེ་ཤེས་པ་གཅིག་པའི་ངང་ནས་དངོས་གྲུབ་བླངས་ནས་བཟླས་པའི་མཐའ་ལ་གཤེགས་གསོལ་བྱའོ། །བླ་ན་མེད་པ་གསང་སྔགས་ནང་པ་གསུམ་ལས། དང་པོ་ནི། བསྐྱེད་པ་མ་ཧཱ་ཡོ་ག་དང་། རྫོགས་པ་ཆེན་པོ་ཨ་ནུ་ཡོ་ག་དང་། ཟུང་དུ་འཇུག་པ་ལས། ཕ་རྒྱུད་དང་། མ་རྒྱུད་དང་གཉིས་མེད་རྒྱུད་གསུམ་དུ་བཞག་པ་ཡིན་ལ། ལྷ་ནི་འཁྲིལ་སྦྱོར་དང་དམ་རྫས་ཁྱད་པར་ཅན་ཞེས་བྱ། ཤ་ལྔ་བདུད་རྩི་ལྔར་ལོངས་སྤྱོད་ཅིང་གཙང་བཙོག་ལ་སྤོང་བ་དང་ལེན་པ་མེད་པའི་རང་བཞིན་ཅན་ཡིན་ཏེ། དེ་ཡང་རྣལ་འབྱོར་ཆེན་པོ་ནི་ཕ་རྒྱུད་ཐབས་ཀྱི་ལམ་ཡིན་པསབསྐྱེད་རིམ་གཙོ་བོར་བྱས་ནས་གྱེན་རྒྱུ་དང་། ཐུར་སེལ་དང་། མེ་མཉམ་དང་། སྲོག་འཛིན་དང་། ཁྱབ་བྱེད་དེ། རླུང་ལྔ་པོ་དག་པར་བྱེད་ཅིང་། རྗེས་སུ་རྣལ་འབྱོར་ནི། མ་རྒྱུད་ནི་རྣམ་ཀུན་མཆོག་ལྡན་ཤེས་རབ་ཀྱི་ལམ་སྟེ། རྫོགས་རིམ་གཙོ་བོར་བྱེད་པས་ཁམས་བྱང་ཆུབ་སེམས་ལས་ཞུ་བདེ་བསྐྱེད་ཅིང་། འབྲས་བུ་འབྱིན་པ་ཡིན་ལ། ཤིན་ཏུ་རྣལ་འབྱོར་ནི་གཉིས་མེད་ཡེ་ཤེས་ཀྱི་ལམ་ཡིན་ཏེ། གཅིག་དང་དུ་མ་བྲལ་བའི་འོད་གསལ་ཆེན་པོ་ནི། བདེ་གཤེགས་སྙིང་པོ་ཡིན་ཏེ། དེ་དང་གཉིས་སུ་མེད་པར་སྦྱོར་བ་སྟེ། དེ་དག་ཀུན་གྱི་གནད་དུ་ཁམས་དྲུག་ལྡན་པའི་ལུས་ཏེ། འབྱུང་བ་ལྔའི་ཁམས་དང་། དེའི་སྟེང་དུ་ཡེ་ཤེས་ཀྱི་ཁམས་བསྣན་པའི་དྲུག་ཡིན་ལ། དེ་ལྟར་ཕུང་པོ་ཁམས་དང་། སྐྱེ་མཆེད་རྣམས་དང་། རྩ་གསུམ་འཁོར་ལོ་ལྔའི་རྩ་རྣམས་གཙོ་བོར་གྱུར་བའི་སྤྱིར་རྡོ་རྗེའི་ལུས་ལ་རྩ་སྟོང་ཕྲག་བདུན་ཅུ་དོན་གཉིས་ཡོད་པར་གསུང་བཞིན། དེ་ལ་རྟེན་དང་བརྟེན་པའི་ཚུལ་གྱི་ཐིག་ལེ་དཀར་དམར་གྱི་རྣམ་པར་གནས་པ་རླུང་གི་འགྲོ་འོང་ལས་སྤྲོ་བསྡུ་བྱེད་པ་མིན་ཀྱང་རླུང་སེམས་ལས་སུ་རུང་བ་ལས་བསྐྱེད་པ་དང་། རྫོགས་པ་དང་། ཟུང་འཇུག་གསུམ་ཀའི་དཔལ་དང་ཡོན་ཏན་ཀུན་བསྐྱེད་པ་རྡོ་རྗེ་ཐེག་པའི་ལམ་སྒྲ་ཇི་བཞིན་པ་ཡིན་ཏེ། དེ་ཉིད་རང་བཞིན་ལྷུན་གྲུབ་ཀྱི་དཀྱིལ་འཁོར་ཆེན་པོ་ཡིན་ལ། ཡིན་བཞིན་རྟོགས་པ་རྒྱུ་ལྟ་བས་ཐེག་བཅད་ཅིང་། བསྒོམ་པས་ཉམས་སུ་བླངས་ནས། སྤྱོད་པས་ལ་དོར་ནས་འབྲས་བུ་རང་གཞན་དོན་གཉིས་བསྒྲུབ་པ་ནི། གཞི་དང་། ལམ་དང་། འབྲས་བུའི་རྒྱུད་ལ་ཡང་དག་པར་བརྟེན་པའོ། །འཇུག་པའི་སྒོ་ནི་སྨིན་པར་བྱེད་པ་དབང་གི་རིམ་པ་དང་། གྲོལ་བར་བྱེད་པ་ལའང་བསྐྱེད་པའི་རིམ་པ་དང་། རྫོགས་པའི་རིམ་པ་སྟེ་རྣམ་པ་གཉིས་དང་། དེའི་སྟེང་དུ་མཐུན་པའི་གྲོགས་སུ་དམ་ཚིག་སྤྱོད་པ་གསུམ་དུ་ཡོད་པ་ལ་སྔགས་ཀྱི་ལམ་མཆོག་རྣལ་མར་ངེས་པ་ལ། གསང་སྔགས་ཉམས་སུ་ལེན་པའི། དང་པོ་དབང་བསྐུར་མ་ཐོབ་ན་དངོས་གྲུབ་མེད་ཅིང་། བྱེ་མ་ཅི་ཙམ་བཙིར་བ་ལ་ཞུན་མར་འདོད་པ་བཞིན་དུ་འཆད་པ་དང་ཉན་པ་དང་བསྒོམ་པ་ལ་བརྩོན་པར་གྱུར་ཀྱང་དམྱལ་བར་འགྲོ་བ་ལས་འོས་མེད་ཅིང་། དབང་ཇི་བཞིན་ཐོབ་པའི་སྐྱེས་བུ་དེ་ཉིད་རྒྱལ་བའི་སྲས་སུ་འགྱུར་བར་གདོན་མི་ཟ་ལ། དེར་མ་ཟད་དཀྱིལ་འཁོར་གྱི་ཚོན་རྩི་མཐོང་བའི་མོད་ལ་སྡིག་པ་ཀུན་ལས་རྣམ་པར་གྲོལ་བར་འགྱུར་ཞིང་གཙང་མའི་རིས་ཀྱི་ལྷ་ལྔའི་ནང་དུ་སྐྱེ་ཞིང་། དེ་ནས་སྐྱེ་བ་བདུན་དག་ན་སངས་རྒྱས་ངེས་པར་འགྲུབ་ཅིང་ས་བཅུ་འཐོབ་པར་བཤད་པ་ནི་སྒྲ་ཇི་བཞིན་པའོ། །དེ་ཡང་དབང་སྐུར་བྱེད་ཀྱི་སློབ་དཔོན་ནི་བསྐྱེད་རིམ་དང་རྫོགས་རིམ་གཉིས་ཀའི་གདེང་དང་བྲལ་ཞིང་། བསྟི་གནས་དཀོར་སྤྱོད་ཅེས་རང་གི་སྡོད་གནས་ཁྱིམ་ཆེན་ཁྱིམ་ཆུང་གང་ཡང་འདྲ་སྟེ། དེ་ཉིད་བསྲུང་བས་ཆེད་དུ་ལོག་འཚོ་ལྔ་སོགས་དཀོར་ཟས་ལ་བག་མེད་དུ་སྤྱོད་པ་དང་། མ་བསྡམ་པ་ཞེས་སྡོམ་པ་གསུམ་དང་འགལ་བའི་ལས་ལ་ཅང་མི་སེམས་ཤིང་ཁྱིམ་ལ་ཆགས་པ་དང་། ཆོས་ཀྱི་རྩ་བ་སྙིང་རྗེ་ཆུང་བ་དང་། རྟོག་གེས་ཟིལ་གྱི་གནོན་པ་དེས་རང་གི་ཡོ་བྱད་ཕན་སུམ་ཚོགས་པ་བསྒྲུབས་ཤིང་། གར་ཐིག་དབྱངས་རོལ་འཛོམ་པར་དབང་བསྐུར་བྱས་ཀྱང་། བེའུ་སྦྲེལ་གཡང་སར་ལྷུང་བ་དང་མཚུངས་ཏེ། ངན་སོང་དུ་འགྲོ་བའི་རྒྱུ་བྱེད་པ་ལས་གཞན་མེད་དོ། ཕྱི་ནང་གསང་བའི་དེ་ཉིད་རྣམ་པ་བཅུ་ནི། དཀྱིལ་འཁོར་ཏིང་འཛིན་ཕྱག་རྒྱ་དང་། སྟངས་སྟབས་འདུག་སྟངས་བཟླས་བརྗོད་དང་། སྦྱིན་བསྲེག་མཆོད་པ་ལས་སྦྱོར་དང་། སླར་སྡུད་པ་ཡི་རྣམ་པ་ནི། ཕྱིའི་དེ་ཉིད་བཅུ་ཡིན་ནོ། །ཕྱིར་བཟློག་གཉིས་ཀྱི་ཆོ་ག་དང་། གསང་དང་ཤེས་རབ་ཡེ་ཤེས་དང་། ཁ་སྦྱོར་དབྱེ་བའི་ཆོ་ག་དང་། གཏོར་མ་རྡོ་རྗེའི་བཟླས་པ་དང་། དྲག་ཤུལ་བསྒྲུབ་པའི་ཆོ་ག་དང་། རབ་ཏུ་གནས་དང་དཀྱིལ་འཁོར་བསྒྲུབ། གསང་བའི་དེ་ཉིད་བཅུ་ཡིན་ནོ། །དེ་ལྟར་ཕྱི་ནང་གསང་བའི་དེ་ཉིད་བཅུའི་དོན་རྟོགས་པ་ལ་རིག་ཅིང་ཞེས་རང་ཉིད་གྲོལ་བའི་བླ་མས། བཅོས་མིན་གྱི་དད་པ་དང་ངོ་ཚ་དང་ཁྲེལ་ཡོད་ཤེས་པའི་སློབ་མའི་གཞི་རྒྱུད་ཞིབ་ཏུ་བརྟགས་ལ་སྐྱོན་བྲལ་ཡོན་ཏན་ལྡན་པ་དག་ལ་དབང་བསྐུར་རིམ་པས་སྦྱིན་པར་བྱ་དགོས་པ་ལ་ཡང་། བདག་བྱིན་གྱིས་བརླབས་པ་བསྙེན་པ་དང་། ཉེ་བསྙེན་དང་། བསྒྲུབ་པ་ བསྒྲུབ་པ་ཆེན་པོ་དང་ནི་བཞིའོ། །སའི་ཆོ་ག་ལ་ཡང་ས་སྤྱིར་བརྟགས་པ་དང་། སའི་བདག་པོ་རྒྱལ་པོ་ལ་སོགས་དང་སའི་ལྷ་མོ་རྣམས་ལ་བསླང་བ་དང་། སྦྱང་བ་དང་། བཟུང་བ་དང་། བསྲུང་བ་དང་ལྔ་པོ་དཀྱུས་ལྟར་དུ་བྱའོ། །སྟ་གོན་དང་ནི་ཞེས་དང་པོ་བུམ་པ་ནི། རྟེན་བུམ་པ་གཞལ་ཡས་ཁང་དུ་གསལ་བ་དང་། བརྟེན་པ་ཞི་ཁྲོ་གང་ཡིན་གྱི་ལྷ་ཡོངས་རྫོགས་སུ་གསལ་བ་དང་། དེ་ཉིད་བསྒྲུབ་ཚུལ་གྱིས་རིམ་པ་ཡང་ཆོ་ག་རང་གཞུང་གི་དཀྱུས་ལྟར་བྱ་བ་དང་། མཐར་མཆོད་ཅིང་བསྟོད་ནས་ལྷ་འོད་དུ་ཞུ་བ་ལས་བདུད་རྩིའི་རྒྱ་མཚོ་ཆེན་པོར་གྱུར། བར་བདག་དབང་ལེན་པ་དང་བཅས་པའོ། །སློབ་མ་འཇུག་ཅིང་སྨིན་ནས། དོན་གཉིས་ཀྱི་དང་པོ་ནི། སློབ་མ་གྲངས་ཉི་ཤུ་རྩ་ལྔ་མན་ཆད་ཁ་ཡར་བ་ཞིག་ངེས་པར་དགོས་གསུངས་ན་ཡང་། རྒྱུད་གཞན་དུ་མང་ཉུང་མི་དཔྱད་པའི་མཐའ་བསྡུས་ཏེ། མདོར་ན་སློབ་མ་པན་ཚུན་དུ་མི་གཤིན་པ་བཟུང་བར་མི་བྱ། གཅིག་ལ་གཅིག་ནི་སེམས་བཟུང་ཞིང་། ཞི་དུལ་བླ་མ་ལ་ཕན་པ་ཞེས་གསུངས་པས་དཀྱིལ་འཁོར་དུ་གཞུག་པ་ཙམ་ལ་ནི་གྲངས་མ་ངེས་ཏེ། སེམས་ཅན་གྱི་ཁམས་མཐའ་ཡས་པ་བསྒྲལ་བར་ཡི་དམ་བཅའ་བ་ཐེག་པ་ཆེན་པོའི་ཁྱད་ཆོས་ཡིན་པས་དེ་དག་གིས་ཚོན་རྩི་མཐོང་བའི་ཕན་ཡོན་ཀྱང་བསམ་གྱིས་མི་ཁྱབ་པའོ། །འཇུག་པའི་སྔོན་དུ་སློབ་མ་སྟ་གོན་ལ། སྭོ་ཤིང་བྱིན་ནས་དངོས་གྲུབ་ཐོབ་མིན་རྟེན་འབྲེལ་བརྟགས་པ་དང་། ཁྱོར་ཆུས་སྡིག་པ་སྦྱངས་པ་དང་། དེ་བཞིན་དུ་ཀུ་ཤས་རྨི་ལམ་བརྟགས་པ་དང་། སྲུང་སྐུད་ཀྱིས་རྨི་ལམ་བརྟགས་པ་དང་། ཅི་བཞིན་མཐོང་བ་ལ་བར་ཆད་མི་འབྱུང་བ་དང་བཞིའོ། །གཉིས་པ་རྒྱུད་སྨིན་བྱེད་དབང་ལའང་། སོ་སོར་དཀྱུས་ལྟར་རོ། །མངོན་རྟོགས་བཞི་པོ་ནི་བཤད་ཟིན་པ་ལྟར་ལས། རེ་རེ་ཉིད་ལའང་། བཞི་བཞིར་རྫོགས་པའི་ཡན་ལག་མ་ཚང་བར་གྱུར་ན། ཆོ་ག་ཉམས་པའི་སྐྱོན་གྱིས་སློབ་མ་དག་སྨིན་པར་ནུས་པ་མ་ཡིན་ནོ། །དེ་ཡང་རྒྱུད་སྡེ་སོ་སོར་དབང་གི་རིགས་དབྱེ་ལ། བྱ་བའི་རྒྱུད་ལ་ཆུའི་དབང་དང་ཅོད་པན་གྱི་དབང་གཉིས་སོ། །དེ་ལ་བྱ་རྒྱུད་ནི། སྨྱུང་གནས་དང་། སྨན་བླ་དང་དོན་ཞགས་སོགས་སོ། །སྤྱོད་པའི་རྒྱུད་ལ་དེའི་སྟེང་དུ་རྡོ་རྗེ་མིང་གི་དབང་བསྐུར་བའོ། །རྣལ་འབྱོར་གྱི་རྒྱུད་ཀུན་རིགས་ལ་སོགས་པ་ལ་ཆུ་དང་དབུ་རྒྱན་རྡོ་རྗེ་དྲིལ་བུ། མིང་སྟེ་རིག་པའི་དབང་ལྔ་དང་། གསང་བའི་བཀའ་དབང་ནི་ཕན་ཡོན་བཤད་པ་དང་། མཐའ་རྟེན་སྦྱིན་པའི་རྫོགས་པའོ། །བླ་མེད་རྒྱུད་ལ་ཕ་རྒྱུད་མ་རྒྱུད་གསང་འདུས་དང་། མ་རྒྱུད་མ་ཧཱ་མ་ཡ། སྤྱི་རྒྱུད་དུས་ཀྱི་འཁོར་ལོ། སྙིང་པོ་ཀྱཻ་རྡོ་རྗེ། ཡང་སྙིང་འཁོར་ལོ་བདེ་མཆོག་ལ་སོགས་གསར་མའི་ཡི་དམ་རྣམས་དང་། ནང་རྒྱུད་སྡེ་གསུམ་བསྐྱེད་པ་མ་ཧཱ་ཡོ་ག །ལུང་ཨ་ནུ་ཡོ་ག། རྫོགས་པ་ཆེན་པོ་ཨ་ཏི་ཡོ་ག་གསུམ་ཀྱང་སྤྱིར་བཏང་ཙམ་དུ། བུམ་དབང་དང་། གསང་དབང་དང་། ཤེས་རབ་ཡེ་ཤེས་ཀྱི་དབང་། ཚིག་དབང་དང་བཞིའོ། །ཐེག་པའི་རྩེ་མོ་ཨ་ཏི་ཡོ་ག་རུ། དབང་གི་རིམ་པ་བྱེ་བྲག་པ་ལའང་སྤྲོས་བཅས་བུམ་པའི་དབང་དང་། སྤྲོས་མེད་གསང་བའི་དབང་དང་། ཤིན་ཏུ་སྤྲོས་མེད་ཤེར་དབང་དང་། རབ་ཏུ་སྤྲོས་མེད་ཚིག་དབང་ངོ་། སྤྱིར་ན་གསང་སྔགས་རྡོ་རྗེ་ཐེག་པའི་དབང་གི་དབྱེ་བ་ལ་རྒྱས་བསྡུས་མཐའ་ཡས་པ་ཞིག་ཡོད་ཀྱང་ས་བཅད་ཀྱིས་ཟིན་པ་དང་། འཇོག་མཚམས་རྣམ་པ་བཞི་པོ་ཡིན། གཞི་བུམ་དབང་དང་། ལམ་གསང་དབང་དང་ཤེར་དབང་། འབྲས་བུ་དབང་བཞི་པ་སྟེ་རིག་པ་རྩལ་གྱིས་དབང་བཞི་རུ་གདོད་ནས་གྲུབ་པ་སྟེ། རྩ་དང་ལུས་གཙོ་བོར་གྱུར་པ་བུམ་དབང་བསྐུར་ཡུལ། རླུང་བཅུ་གསང་དབང་བསྐུར་ཡུལ། ཁམས་དཀར་དམར་གྱི་ཐིག་ལེ་ཤེར་དབང་བསྐུར་ཡུལ་གྱི་རྟེན། དབང་བཞི་པ་བསྐུར་ཡུལ་ནི། ཀུན་གཞིའི་སེམས་ཡིན་པ་སྤྱི་དང་མཚུངས་ཤིང་། དེ་དག་རྣམས་རྩོལ་སྒྲུབ་ལས་བྱུང་བ་མ་ཡིན་ཏེ། རང་ཆས་ཉིད་དེ་བཞི་པོ་མཚུངས་པར་ལྡན་དང་དེ་དག་ལྷན་ཅིག་བྱེད་པའི་རྒྱུ་ནི་རྣམ་པ་གཉིས་ལ། སྣོད་དུ་རུང་བའི་སློབ་བུ་ནི་རྒྱུའི་རྐྱེན་དང་། ལྟ་བ་ཡངས་ཤིང་དགོངས་པ་ལྡན་པའི་སློབ་དཔོན་བདག་པོའི་རྐྱེན་དང་ལྟ་སྔགས་ཏིང་འཛིན་ནུས་པའི་ཆོ་ག་མཁྱེན་པ་དམིགས་པའི་རྐྱེན། དབང་བཞིའི་རིམ་པ་གཅིག་ལ་གཅིག་བརྟེན་གྱི་རྟེན་ཅིང་འབྲེལ་འབྱུང་གི་ཚུལ་དུ་བྱུང་བ་དེ་མ་ཐག་པའི་རྐྱེན་དང་། རྒྱུ་གཉིས་རྐྱེན་བཞི་ཚོགས་པ་ལས་དབང་བསྐུར་འགྲུབ་པའོ། །དེ་ལ་ཡང་གཉེན་པོ་དྲང་དོན་ངེས་དོན་གྱིས་སྒོ་ནས་རྣམ་པར་བཞག་པ་ནི། ལུས་ཀྱི་གཙོ་བོར་རྩ་དབུ་རྐྱང་རོ་གསུམ་ཆོས་ལོངས་སྤྲུལ་གསུམ་གྱི་མཚོན་བྱེད་དང་། གནས་ལྔའི་འཁོར་ལོ་ལྔ་པོ་རིགས་ལྔའི་མཚོན་པ་ཡིན་ཏེ། རྩའི་རྣམ་པ་ཡི་གེའི་གཟུགས་སུ་གནས་པ་ནི་ལུས་གནས་རྣམས་པ་དྲུག་ན་མ་དག་པ་འགྲོ་བ་རིགས་དྲུག་ས་བོན་དང་། དག་པར་སངས་རྒྱས་སྐུ་གསུམ་གྱི་ངོ་བོ་ཡི་གེ་འབྲུ་གསུམ་དུ་གནས་ཤིང་། དེ་ལས་ཀྱང་རོ་མ་ཐབས་ཀྱི་རྩ་གནས་ན་དབྱངས་ཡིག་དང་། རྐྱང་མ་ཤེས་རབ་ཀྱི་རྩ་གནས་ན་གསལ་བྱེད་ཀྱི་ཡི་གེ་སོགས་མང་དུ་ཡོད་པར་གསུངས་པ་བཞིན་ནོ། །དེ་ལྟར་རྩལ་རླུང་བརྟེན་པ་ནི། གྱེན་རྒྱུ་སྟེ་ཁ་དབུགས་ཀྱི་རླུང་གིས་བཟའ་བཏུང་ལེན་པར་བྱེད་པ་དང་། ཕོ་བ་ལ་མེ་མཉམ་གྱི་རླུང་གནས་ཏེ། དེས་བཟའ་བཏུང་འཇུ་བར་བྱེད་པ་དང་། བཤིང་གཅིའི་ལམ་ལ་ཐུར་སེལ་གྱི་རླུང་གནས་ཏེ་དེས་མི་གཙང་བ་འདོར་བའི་ལས་བྱེད་པ་དང་། སྲོག་རྩའི་སྙིང་ལ་སྲོག་རླུང་ངམ། སྙིང་རྗེ་མེད་པ་བསྐལ་པ་ལས་ཀྱི་རླུང་ཞེས་བྱ་བ་གནས་ཏེ། དེས་གནས་མ་འཕྱུག་བར་དུ་སྲོག་འཛིན་པ་དང་། འཕྱུག་ཚེ་ལུས་སྲོག་འབྱེད་པའི་ལས་བྱེད་པ་དང་། ཁྱབ་བྱེད་དམ་གཡོ་བྱེད་ཀྱི་རླུང་ནི། ལུས་སྤྱི་དང་ཁྱད་པར་ཡན་ལག་ཉིང་ལག་རྣམས་ལ་གནས་ཏེ་དེས་འགྲོ་སྡོད་དང་བྱ་བ་སྣ་ཚོགས་ཀྱི་ལས་བྱེད་དོ། དེ་ལས་གཞན་དུ་འབྱུང་བ་ལྔའི་རླུང་གི་སོ་སོའི་ལས་བྱེད་པ་སྟེ། དེ་ལྟར་རླུང་བཅུ་པོ་ལ་ཁམས་ཀྱི་རྣམ་པ་ཁམས་དཀར་དམར་བརྟེན་ཞིང་། ཁམས་ལ་དོན་དམ་བྱང་ཆུབ་ཀྱི་སེམས་ཏེ། དོན་དམ་བདེ་གཤེགས་སྙིང་པོ། བརྟེན་པ་བཞི་ལ། དེ་ལས་ཀྱང་འདོད་པའི་ཁམས་ཀྱི་གང་ཟག་རང་རྒྱུད་པ་ཀུན་ལ། འདོད་ཆགས་རྣམ་པ་བཞིར་གནས་པ་སོགས་ནི། དག་བྱ་འདོད་ཆགས་བཞི་དང་། དག་བྱེད་དབང་བཞིའི་རིམ་པ་ལ་བརྟེན་ནས་འབྱུང་བར་ངེས་པ་ཡང་། དང་པོ་དག་བྱ་བལྟས་པའི་ཚིམ་པའི་འདོད་ཆགས་ནི། གཞན་འཕྲུལ་དབང་བྱེད་པ་ལ་གནས་པ་ཡིན་ཏེ། དག་བྱེད་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བུམ་པའི་དབང་ཡིན་ཞིང་། དབང་བསྐུར་བས་སྒྲིབ་པ་བཞི་ལས་གཙོ་བོར་ལུས་ཀྱི་སྒྲིབ་པ་འདག་ཅིང་། ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་བརྟན་གཡོ་དང་ཕུང་པོ་ཁམས་དང་སྐྱེ་མཆེད་ཀུན་ཀྱང་གདན་གསུམ་ཚང་བ་སྟེ། ཕུང་ཁམས་གཤེགས་པ་གཤེགས་མ་དང་། དབང་ཡུལ་སེམས་དཔའ་སེམས་མ་དང་། ལུས་ཀྱི་རྣམ་ཤེས་དང་། དབང་པོ་དང་། རེག་བྱ་རེག་ཤེས་བཞི་པོ་གནས་སུ་དག་པ་སྒོ་བ་བཞི་དང་། རྟག་པར་ལྟ་བ་དང་། ཆད་པར་ལྟ་བ་བདག་ཏུ་ལྟ་བ། མཚན་མར་ལྟ་བ། བཞི་པོ་གནས་སུ་དག་པ་སྒོ་མ་བཞི་སྟེ་སྒོ་བ་ཡབ་ཡུམ་བརྒྱད་སོགས་དཀྱིལ་འཁོར་གཅིག་གི་རྣམ་རོལ་ཏུ་ཤར་བ་ཡིན་ལ། སྣང་བ་དང་། སྟོང་པ་དང་། དེ་གཉིས་ཟུང་འཇུག་སྟེ་ཀུན་བརྟགས་དང་། གཞན་དབང་། ཡོངས་གྲུབ་སྟེ། ངོ་བོ་ཉིད་གསུམ་གྱི་རང་བཞིན་ལ། དེའི་གྲུབ་པའི་མཐའ་ནི་འཁོར་བ་ཞེས་མར་མ་ཆད་མྱང་འདས་ཞེས་ཡར་མ་ཆད་པར་གཉིས་སུ་མེད་པའི་ནང་དབྱིངས་ཆེན་པོ་ལ་མཚན་མའི་རྣམ་རྟོག་གིས་གོས་པར་མི་འགྱུར་ཞིང་འདའ་ཀ་ཞེས་ནམ་ཞིག་འཆི་བའི་སྐབས་ལ་བབས་པའི་ཚེ་མ་བསྒོམ་པར་སངས་རྒྱས་པའི་གདམ་པ་རང་གི་རྣམ་ཤེས་ཀྱི་རྟེན་འོད་ཀྱི་གོང་བུར་གསལ་བ་ཧིག་གི་སྒྲས་བདེ་བ་ཅན་སོགས་དག་པའི་ཞིང་ཁམས་སུ་འཕོ་བ་ཡིན་ལ། དེའི་ཚེ་རྩའི་འགྲོས་ཐིམ་བསྐྱེད་རིམ་སྤྲུལ་པའི་སྐུ་ཞེས་པ་ནི་བུམ་དབང་གི་བྱེད་པས་ལུས་དག་པས་བསྐྱེད་ཀྱིས་རྩའི་མ་དག་པའི་འགྲོས་ཐ་མལ་དུ་འཛིན་པའི་སྒྲིབ་བྱེད་རྣམ་པར་དག་པའི་ལུས་ཤིན་ཏུ་སྦྱངས་པའི་ཡོན་ཏན་འཐོབ་ནས་རྡོས་བཅས་ལ་ཐོགས་པ་མེད་ཅིང་། ཁམས་རྣམ་པར་དག་པ་ལྡོག་པའི་ཆུ་བོ་གྱེན་དུ་ལྡོག་པ་དང་། དམར་ཆ་དབུ་མར་ཆིངས་པའི་ཉི་མ་རྟོད་ལ་གནོད་ཅིང་གཅིག་ལས་དུ་མ་དང་། དུ་མ་ནི་གཅིག་ཏུ་བྱེད་པར་ནུས་ཤིང་། སྟོང་གསུམ་ཡུངས་འབྲུར་ཚུད་པ་སྟེ། ས་དྲུག་པ་དང་གྲུབ་མཐའ་འཁོར་འདས་གཉིས་མེད་ལ་དབང་བསྒྱུར་བ་ཡིན་ཞིང་། མཐར་ཐུག་གི་འབྲས་བུ་ནི་སངས་རྒྱས་ཐམས་ཅད་ཀྱི་རྡོ་རྗེ་སྤྲུལ་པའི་སྐུ་ལ་སྦྱོར་བ་ཡང་མཁའ་ཁྱབ་རྡོ་རྗེ་འདུས་མ་བྱས་ཞེས་པ་ལྟར་རོ། །བྷ་གའི་དཀྱིལ་འཁོར་གསང་དབང་བསྐུར་ཞེས་པ་ནི་རང་ལུས་ཐབས་ལྡན་གཏུམ་མོའི་གདམ་པ་ལ་གོམས་པར་བྱས་ནས་གཞན་ལུས་ཕྱག་རྒྱས་མན་ངག་རྣམས་ལག་ལེན་ལ་ཐེབས་དགོས་པ་སྟེ། དགོད་པས་ཚིམ་པ་ནི། འཕྲུལ་དགའི་ལྷ་ལ་ཡོད་པས། དག་བྱ་འདོད་ཆགས་དང་ངག་གི་སྒྲིབ་པ་གཉིས་ཀྱི་གཉེན་པོར། དག་བྱེད་གསང་དབང་བསྐུར་བས་ངག་གི་སྒྲིབ་པ་སྦྱངས་ཞིང་། བདག་བྱིན་གྱིས་བརློབས་པའི་ལམ་གཏུམ་མོས། གཟུང་འཛིན་རོ་རྐྱང་གི་རླུང་དབུ་མར་འཛུད་ཅིང་། རང་བྱུང་ཡེ་ཤེས་ནི་རྣམ་པར་མི་རྟོག་པ་སྟེ། གྲུབ་མཐའ་མ་རྟོག་ལོག་རྟོག་ཕྱོགས་རྟོག་གི་གྲུབ་མཐའ་མ་འདྲེས་པར་རྫོགས་པའོ། །འདའ་ཀ་མའི་དུས་དཔེའི་འོད་གསལ་ཞེས་དབང་ལས་བྱུང་བའི་ཡེ་ཤེས་ཆེན་པོའི་ངང་ལས་འཇོག་པ་ཡིན་ལ། ཡི་གེའི་འགྲོས་ཐིམ་ནི། འཇིག་རྟེན་དང་འཇིག་རྟེན་ལས་འདས་པའི་ཚིག་རྣམས་རླུང་གི་བྱེད་ལས་ཀྱི་བྱུང་བ་ཡིན་པས་དེ་དག་གི་གཟུང་འཛིན་དབྱིངས་སུ་ཐིམ་པ་ལས་ལོངས་སྤྱོད་རྫོགས་པའི་སྐུ། འབྲས་བུའི་དུས་ན་ཡན་ལག་དྲུག་ཅུར་རྫོགས་པའི་གསུང་རྡོ་རྗེའི་གོ་འཕང་ཐོབ་པ་ཡིན་ནོ། །ཕུང་ཁམས་གཤེགས་པ་གཤེགས་མའི་གདན། དབང་ཡུལ་སེམས་དཔའ་སེམས་མའི་གདན། ལུས་ཀྱི་སྒོ་བ་བཞི་དང་། རྟག་ཆད་མུ་བཞི་ཁྲོ་བོ་ཁྲོ་མོའི་གདན་དང་གསུམ་མངོན་རྟོགས་ངོམ་པའི་མཛེས་མ་ཞེས་དབང་གསུམ་པའི་རྟེན་གྱི་ཕྱག་རྒྱ་མའི་གསང་བའི་དཀྱིལ་འཁོར་ལ་བརྟེན་ནས་ཤེས་རབ་ཡེ་ཤེས་ཀྱི་གསང་དབང་བསྐུར་བ་ཡང་གཞུང་བཞིན་འཁྲིལ་སྦྱོར་དང་། ལག་བཅངས་ཀྱིས་ཚིམས་པ་ལྷ་དགའ་ལྡན་པའི་འདོད་ཆགས་དག་པ་དང་། ཡིད་ཀྱི་སྒྲིབ་པ་སྦྱངས་ཞིང་སྣང་མཆེད་ཐོབ་པ་གསུམ་དང་། དགའ་བ་དང་། མཆོག་དགའ་དང་། ཁྱད་པར་གྱི་དགའ་བ་དང་། ལྷན་སྐྱེས་དགའ་བ་བཞིའི་ཡེ་ཤེས་ཀྱི་ཞུ་བདེས་འགྲུབ་ཅིང་། གྲུབ་མཐའ་བདེ་སྟོང་དབྱེར་མེད་པའི་དོན་ཉམས་སུ་མྱོང་ཞིང་། འདའ་ཀ་མའི་ཚེ་དེར་སྣང་ཞེས་དམིགས་པའི་བཞག་པ་ཙམ་ཡང་མ་གྲུབ་པར་རྡོ་རྗེ་སེམས་ཞེས་འགྱུར་བ་མེད་པའི་ངོ་བོ་ཡིན་ཏེ། སྙིང་གའི་རྩ་མདུན་གྲོལ་བ་དཔེའི་ཡེ་ཤེས་ཏེ། མཁའ་ཁྱབ་རྒྱལ་བ་ཀུན་གྱི་ཐུགས་ཀྱི་རྡོ་རྗེ་མི་ཤིགས་དངས་མའི་སྐུ་ཐོབ་པ་ཡིན་ནོ། །ཁམས་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ནས་གསུམ་པ་ཤེས་རབ་ཡེ་ཤེས་ཤེར་དབང་གི་དེ་དག་ཉམས་སུ་མྱོང་བ་ཚིག་གི་མཚོན་པའི་དབང་ནི། ལྷ་མཐའ་བྲལ་མན་ཆད་འཁྱུད་སྦྱོར་གྱི་འདོད་ཆགས་དང་། སྒོ་གསུམ་གྱི་སྒྲིབ་པ་དེ་དག་ཐ་དད་འཛིན་པ་སྦྱོང་ནས། སྟོང་པའི་ཐིག་ལེ་སྟེ་རྣམ་པར་མི་རྟོག་པའི་དབྱིངས་རིག་པའི་སྙིང་པོ་ཅན་ཡིན་ལ། གྲུབ་མཐའ་ནི་བསམ་གྱིས་མི་ཁྱབ་པའི་ཡེ་ཤེས་དེ། འདའ་ཀ་མའི་ཚེ་གསང་ཆེན་ཕྱག་རྒྱ་ཆེན་པོ་ལ་ཞེས་པ་ནི། སངས་རྒྱས་ཐམས་ཅད་ཀྱི་གསང་བའི་མཐར་ཐུག་པ་འབྲས་བུ་མཁའ་ཁྱབ་ངོ་བོ་ཉིད་ཀྱི་སྐུ་སྒྲ་ཇི་བཞིན་པར་ཐོབ་པའོ། །སྒྲ་དང་དོན་གཉིས་ཤན་སྦྱར་ན་ཨབྷི་ཥིཉྩ་ཞེས་པའི་སྒྲ་ལས། གློ་བུར་དྲི་མ་གཏོར་བ་དང་། ཥི་ཀ་ཏས་རང་གི་སྐལ་བ་དང་མཚམས་པ་བཅུད་བླུགས་པ་རྣམ་པ་གཉིས་སུ་གྲུབ་པ་ཡིན་པ་ལ། དབང་མཆོག་རང་ལ་གནས་པ་སྟེ། མི་ལུས་རིན་པོ་ཆེ་འབྱུང་ལྔའི་ཁམས་དང་ཡིད་ཤེས་ཀྱི་ཁམས་ཏེ། དྲུག་གི་རྟེན་དང་། རྩ་ཐིག་རླུང་གསུམ་གྱི་འབྱོར་བ་ཚང་བ་ནི་ས་བོན་ནམ་རྒྱུའི་དབང་ཡིན་ཏེ། སློབ་དཔོན་ཉིད་ཀྱིས་དཀྱིལ་འཁོར་དང་ཆོ་ག་བསྐུར་བ་གཞིའི་དབང་དང་། རང་གི་བླ་མའི་རྣལ་འབྱོར་སོགས་ལ་བརྟེན་ནས་དམིགས་པ་འདྲེས་པ་ལམ་གྱི་དབང་དང་། མཚན་ཉིད་རྒྱུའི་ཐེག་པར། ས་དང་པོ་ནས་བཅུ་པའི་བར་བསྒྲོད་པས་དུས་དེར་སངས་རྒྱས་རྣམས་ཀྱིས་འོད་ཟེར་ཆེན་པོའི་དབང་བསྐུར་བཞིན་དུ། རང་སེམས་སྤྲུལ་སྐུ་དང་ལོངས་སྐུ་དང་ཆོས་སྐུ་ངོ་བོ་ཉིད་སྐུ་སྟེ། སྐུ་བཞིར་སྨིན་པ་འབྲས་བུའི་དབང་རྫོགས་པ་ཡིན་ཕྱིར་དབང་བཞི་རྫོགས་པའི་ཚེ་རིག་འཛིན་སྔགས་ཀྱི་སྡོམ་པ་ཐོབ་པ་ཡིན་ལ། དེ་ལྟར་དབང་བཞི་རྣལ་མ་ཐོབ་པའི་སྐྱེས་བུ་དེ་ནི་ཞིང་ས་ཐ་རེངས་སུ་གྱུར་པའི་སྐྱོན་ཐབས་ལ་མཁས་པའི་རླན་གྱིས་སྦྱངས་པའི། ཞིང་སར་ས་བོན་བཟང་པོ་བཞག་པ་ཇི་བཞིནདུ་གྱུར་ནས་ལུས་ངག་ཡིད་གསུམ་གྱི་སྒྲིབ་པ་དང་སྒོ་གསུམ་ཆ་མཉམ་གྱི་སྒྲིབ་པ་སྟེ། བཞི་པོ་དག་ཅིང་། སྐུ་བཞི་མངོན་དུ་བྱེད་པ་ཡིན་ནོ། ༈ གཉིས་པ་གསང་སྔགས་རྡོ་རྗེ་ཐེག་པའི་ལམ་ལ་བསྐྱེད་པའི་རིམ་པ་དང་། རྫོགས་པའི་རིམ་པ་གཉིས་སུ་གསུངས་པ་ལས། དང་པོ་བསྐྱེད་རིམ་ལ། སྐྱེ་གནས་བཞིའི་བག་ཆགས་སྦྱོང་ཕྱིར་དེ་དང་མཐུན་པར་བསྐྱེད་རིམ་ཡང་སྟོན་པ་སྟེ། བསྐྱེད་པའི་ཚུལ་ནི། འཁོར་བའི་རྣམ་པ་དང་མཐུན་པའི་བསྐྱེད་རིམ་ལ་བསླབས་ཤིང་གོམས་པས་སྲིད་པ་གསུམ་པོ་མ་ལུས་པའི་བག་ཆགས་སྦྱོང་ཞིང་དག་ནས། མྱ་ངན་ལས་འདས་པའི་རྣམ་པ་དང་བཞུགས་ཚུལ་མཐུན་པའི་ལྷའི་རྣམ་པ་འབྲས་བུ་གཞི་ལ་རྫོགས་ཤིང་། གཉིས་ཀའང་རྫོགས་པའི་རིམ་པའི་སྨིན་བྱེད་དུ་འགྲོ་བའི་དག་རྫོགས་སྨིན་གསུམ་སྤྱི་ལ་གཅེས་པ་ཡིན་ལ། དེ་ལ་ཡང་ཇི་ལྟར་ན་སྒོང་སྐྱེས་ཀྱི་རིགས་རྣམས་ལན་གཉིས་སྐྱེ་བ་ལྟར། བདག་སྲས་དང་གཞན་སྲས་རྣམ་པ་གཉིས་སུ་བསྐྱེད་པར་བྱ་བ་སྟེ། བདག་གི་སྲས་སུ་གཞན་བྱ་བ་ལ་ལྔ་སྟེ། ས་བོན་ལས་ནི་གཙོ་བོར་གང་ཡིན་པ་བསྐྱེད་པ་དང་། ཕྱོགས་བཅུའི་སངས་རྒྱས་རྣམས་བཀུག་ནས་ཡུམ་གྱི་མཁར་བ་སྟིམ་པ་དང་། དེ་བཞིན་སེམས་ཅན་རྣམས་ཀྱང་སྔར་བཞིན་བཀུགས་ནས་ཡུམ་མཁར་བསྟིམ་སྒྲིབ་པ་སྦྱང་བ་དང་བཅས་རྫོགས་པས་སྲིད་ཞི་གཉིས་སུ་མེད་པའི་བདག་ཉིད་ངའོ་སྙམ་པས་ཆེ་བ་བསྐྱེད་པ་དང་མཐར་ཡུམ་མཁའ་ནས་བཏོན་ནས་སོ་སོའི་གདན་ལ་འགོད་པའོ། །གཞན་གྱི་སྲས་སུ་བདག་བྱ་བ་ལ་ཡང་བརྒྱད་དེ། བྱ་རྣམས་དང་པོ་སྒོ་ང་སྨིན་པ་དང་། གདོད་བྱ་གཟུགས་སུ་སྨིན་པ་ལ་དེར་གྱུར་པ་བཞིན་དུ། གཙོ་བོ་འོད་དུ་ཞུ་ནས་ལྷ་གང་ཡིན་པ་དེའི་ཐུགས་སྲོག་ས་བོན་དུ་གྱུར་པ་དང་། དེ་ལས་ཡབ་ཡུམ་གཉིས་ཀའི་སྐྱེ་མཆེད་རྣམས་ཚང་བར་རྫོགས་པ་དང་། དེ་ཡང་ཡབ་ཀྱི་ཀུན་ཏུ་རྟོག་པ་རྣམ་པར་དག་པའི་ངོ་བོ་རིགས་ལྔ་ཡབ་ཡུམ་གྱིི་ས་བོན་དང་། སེམས་དཔའ་ལྕམ་དྲལ་ཐུབ་དྲུག་ཡབ་ཡུམ་བརྒྱད་ལ་སོགས་ཞི་བ་བཞི་བཅུ་དང་། འབར་བ་ཁྲག་འཐུང་ལྔ་བཅུ་སོགས་རིམ་གྱི་སྤྲོས་དགོས་པའི་རྟོགས་ཚོགས་ཡི་གེར་གྱུར་པ་སླར་ལྷར་བསྒྱུར་བར་བྱེད་པ་དང་། ཡུམ་ལས་འོད་འཕྲོས་སྲས་བསྐྱེད་པའི་ཕྱིར་ལྷ་ལ་གསོལ་བ་གདབ་པ་དང་། དབྱིངས་ཀྱི་ལྷ་རྣམས་ཀུན་ཀྱང་རང་ལ་བསྟིམ་ཞིང་། ལྷ་ཐམས་ཅད་ཀྱི་བདག་ཉིད་ངའོ་སྙམ་པས་ང་རྒྱལ་བཟུང་བ་དང་། བདག་ཉིད་ཡབ་ཡུམ་སྙོམས་པར་ཞུགས་ནས་ཡུམ་གྱི་མཁའ་རུ་དཀྱིལ་འཁོར་བསྐྱེད་པ་དང་། རྟོག་པ་ཞེ་གཉིས་ནི་སེམས་བྱུང་ལྔ་བཅུའི་རྟོགས་ཚོགས་རགས་རིམ་ཙམ་བཞིན། དེ་དག་ལྷར་གསལ་བ་མངལ་འབྱིན་ཚུལ་གྱི་ཕྱིར་འདོན་པ་དང་། དེ་རྣམས་ལྕགས་ཀྱུའི་ཕྱག་རྒྱས་སྤྱན་དྲངས་ཤིང་། ཞགས་པའི་གདན་ལ་བཞུགས་པ་དང་། ལྕགས་སྒྲོགས་ཀྱིི་དམ་ཡེ་དབྱེར་མེད་དུ་བརྟན་པར་གནས་པ་དང་། དྲིལ་བུས་ཐམས་ཅད་དགྱེས་པ་ཆེན་པོའི་ངང་ནས་བཞུགས་པར་བསམ་པ་སོགས་ཕྱག་རྒྱ་བཞིས་བཅིངས་དང་རྒྱས་གདབ་པའོ། །ཆོ་ག་བསྡུས་པའི་ལུགས་ལྟར་ན། ཐོག་མར་རང་ཉིད་བསྒྲུབ་བྱའི་ལྷ་གང་ཡིན་པ་དེའི་སྐུར་གསལ་བའི་མདུན་གྱི་ནམ་མཁར་དཀྱིལ་འཁོར་གྱི་ལྷ་གསལ་གདབ་པ་དང་། རང་གི་ཐུགས་ཀ་ནས་དཀྱིལ་འཁོར་སྤྲོས་པ་དང་དབྱིངས་ནས་སྤྱན་དྲངས་ཤིང་། མདུན་མཁར་བཞུགས་པར་དམིགས་པ་དང་། གསུམ་དུ་ཡོད་པ་དཀྱུས་ལྟར། གསལ་བཏབ་ནས་རྒྱུན་བཤགས་ཡན་ལག་བདུན་པ་དང་། བརྒྱད་པ་སོགས་བྱ་ཞིང་། བདག་དང་ཚོགས་ཞིང་གཉིས་ཀ་མི་དམིགས་པའི་ངང་ལས། ལྷ་སོ་སོའི་དཀྱིལ་འཁོར་དང་མངོན་རྟོགས་ཇི་བཞིན་པར་བསྒོམ་པའོ། །འཁོར་བའི་མངལ་སྐྱེས་ཀྱི་བག་ཆགས་སྦྱང་ཕྱིར་མངོན་པར་བྱང་ཆུབ་པ་བཞིའམ་ལྔ་ར་དབྱེ་བ་ཡང་། དང་པོ་ཁྲག་འཐུང་ཧེ་རུ་ཀ་གལ་པོའི་དགོངས་པ་སྟེ། འཆི་སྲིད་དང་བར་དོར་རྣམ་ཤེས་བཅས་པ་ནི་སྟོང་ཉིད་སེམས་ཀྱི་རང་བཞིན་ཡིན་ལ། དྲི་ཟ་ཉེ་བར་ལེན་པ་ནི། སྲིད་པ་བར་དོའི་སྐབས་ཡིན་པས་དེ་རྣམས་ནི་ལྷའི་ས་བོན་ཧཱུཾ་ལ་སོགས་པ་བསྒོམ་པའི་ནུས་སྟོབས་ཀྱིས་སྦྱོང་ཞིང་། དེ་ཉིད་ཀྱང་ཁུ་རྡུལ་རླུང་དང་འདྲེས་པའི་མེར་མེར་པོ་དང་། ནུར་ནུར་པོ་རྣམས་ས་བོན་ཉིད་ལས་ཐུགས་ཕྱག་མཚན་དུ་གྱུར་པས་སྦྱོང་ཞིང་། ལྟར་ལྟར་པོ་དང་མཁྲང་གྱུར་པོ་གཉིས་ཕྱག་མཚན་འོད་གོང་དུ་གྱུར་པས་སྦྱོང་ཞིང་། ཁྱབ་མཇུག་ཉ་དང་རུས་སྦལ་དབང་པོ་རྫོགས་པ་སོགས་ལྷའི་རྣམ་པར་གྱུར་ནས་སྦྱོང་བའོ། །ལྷ་གང་ཡིན་པ་དེའི་ ཕྱག་རྒྱ་སྐུའི་རང་བཞིན་ལ། ས་བོན་ཡིག་འབྲུ་ནི་གསུང་རྡོ་རྗེ། ཐུགས་ནི་ཡེ་ཤེས་ཀྱི་ཕྱག་མཚན་གྱི་རྣམ་པ་ཉིད་དུ་སྦྱོར་བ་ལ་རྡོ་རྗེའི་ཆོ་ག་གསུམ་ཞེས་ཕ་རྒྱུད་བླ་ན་མེད་པའི་ལུགས་ཡིན་ལ། སྲིད་པ་བར་མ་དོ་ནས་ལུས་འཚོལ་བ་ལ་ཞུགས་པས་ཚོགས་ཀྱི་ལམ་དང་། མངལ་དུ་རྣམ་ཤེས་འཇུག་པ་སྦྱོར་ལམ་སྟེ། ལྷུམས་ཞུགས་བྱང་ཆུབ་སེམས་ལྔ་པོ་མཐོང་སྒོམ་དང་། ཞེས་མངོན་བྱང་དང་པོ་གཉིས་ཀྱིས་ཕ་མའི་ཁུ་ཁྲག་འཚོགས་པ། གསུམ་པའི་དྲི་ཟའི་རྣམ་ཤེས་ཞུགས་པ། བཞི་པས་ཁུ་རྡུལ་རྣམ་ཤེས་གསུམ་འདྲེས་ནས་འགྱུར་བའི་གནས་ཉམས་སུ་མྱོང་བ། ལྔ་པས་མངལ་གྱི་གནས་སྐབས་རྫོགས་པ་སྟེ། ཟླ་བ་བཅུ་ནི་ས་དང་རབ་ཏུ་སྦྱར་ནས་བཙའ་བས་གནས་སྐབས་ནི། མི་སློབ་པའི་ལམ་དུ་གྱུར་ནས་སྤྲུལ་སྐུའོ། །དེ་ལ་ཡང་མངོན་བྱང་དང་པོ་ཟླ་བའི་དཀྱིལ་འཁོར་ནི། མངལ་སྐྱེས་ཀྱི་ཁུ་བ་དང་། དྲོད་གཤེར་སྐྱེས་ཀྱི་གཤེར་བའི་ཆ། སྒོང་སྐྱེས་ཀྱི་ཕ་དང་། རྫུས་སྐྱེས་ཀྱི་སྟོང་པའི་ཆ་རྣམས་ཡིན་ལ། དེ་བཞིན་མངོན་བྱང་གཉིས་པ་ཉི་མའི་དཀྱིལ་འཁོར་ཡང་། མངལ་སྐྱེས་ཀྱི་རྡུལ་དང་། དྲོད་གཤེར་སྐྱེས་ཀྱི་དྲོད། སྒོང་སྐྱེས་མ་དང་། རྫུས་སྐྱེས་ཀྱི་གསལ་བའི་ཆ་རྣམས་སོ། །མངོན་བྱང་གསུམ་པ་ས་བོན་ཕྱག་མཚན་དང་བཅས་པས་ཁུ་རྡུལ་གཉིས་ཀྱི་བར་དུ་རྣམ་ཤེས་ཞུགས་པ་དང་། སྐྱེ་གནས་བཞི་པོའི་བར་དོའི་རྣམ་ཤེས་སྦྱོང་བ་ཡིན་ལ། མངོན་བྱང་བཞི་པ་རྣམ་གསུམ་གཅིག་ཏུ་འདྲེས་པ་ནི། ཁུ་རྡུལ་གཉིས་དང་སེམས་གསུམ་རོ་གཅིག་ཏུ་འདྲེས་པ་དང་། དྲེད་གཤེར་སྐྱེས་ཀྱི་དྲོད་དང་རྣམ་པར་ཤེས་པ་དང་། རྫུས་སྐྱེས་ཀྱི་གསལ་ལ་སྟོང་པའི་ཆ་ཙམ་དང་། བར་དོའི་སྲིད་པ་འདྲེས་པའི་ཆ་རྣམས་སྦྱོང་བ་ཡིན་ལ། མངོན་བྱང་ལྔ་པ་སྐུ་རུ་གྲུབ་པ་ནི་ཞེས་སྐུ་ཡོངས་རྫོགས་སུ་གྱུར་པས། སྐྱེ་གནས་བཞི་པོའི་སྐྱེ་མཆེད་རྣམས་ཡོངས་སུ་རྫོགས་ནས། བཙའ་བའི་དུས་རིག་པའི་ཡུལ་ལ་ཞེས་དབང་པོའི་སྒོ་ལྔར་རྣམ་ཤེས་སད་པའམ། ཤར་བའི་འཁོར་བའི་རྣམ་པ་ཆ་དང་བཅས་པ་སྦྱོང་ཞིང་། ཁམས་ལྔ་དང་ཕུང་པོ་ལྔ་དང་རྣམ་པར་ཤེས་པའི་ཆོགས་རྣམས་གནས་སུ་དག་པ་ནི་གདན་གསུམ་ཚང་བའི་ལྷ་སྟེ། མྱ་ངན་ལས་འདས་པ་སངས་རྒྱས་དང་བཞུགས་ཚུལ་མཐུན་པ་ནི་རྒྱུའི་ཧེ་རུ་ཀ་ལས་འབྲས་བུའི་ཧེ་རུ་ཀར་གནས་གྱུར་བའོ། །ཁུ་རྡུལ་རླུང་གསུམ་སེམས་དང་བཅས་པའི་ཆ་མ་ལུས་པ་རྣམ་པར་དག་པའི་རྫོགས་རིམ་གྱི་སྨིན་བྱེད་དུ་འགྱུར་བ་ཡིན་ནོ། །དྲོད་གཤེར་སྐྱེས་ནི་གཉིས་པོ་འདུས་པ་ལ་བར་དོའི་རྣམ་ཤེས་ཞུགས་པས་མོད་ལ་གཟུགས་གྲུབ་པ་བཞིན་དུ་ལྷ་སྔགས་མཚན་བརྗོད་པ་དང་། མངོན་རྟོགས་ཡིད་ལ་དྲན་པ་ཙམ་ལ་ཕྱག་རྒྱ་སྟེ། ལྷའི་སྐུ་ཡོངས་སུ་རྫོགས་པའི་བསྐྱེད་རིམ་ཚང་བར་བསྒོམ་པའོ། །རྫུས་ཏེ་སྐྱེ་བ་ནི་རྒྱུ་རྐྱེན་ལ་མ་ལྟོས་པར་སྐད་གཅིག་དྲན་རྫོགས་སུ་བསྒོམ་པ་སྟེ། མིང་དང་གཟུགས་ལ་མ་བརྟེན་པར་སྐད་ཅིག་ལ་ཝལ་གྱིས་གསལ་བའོ། །བསྒོམ་ཚུལ་བཞི་པོ་དེ་ཡང་དང་པོའི་ལས་ཅན་ལ་ཞེས་པ་ནི། བསྐྱེད་རྫོགས་ལ་བློ་མ་སྦྱང་པ་རྣམས་ཀྱིས་སྒོང་སྐྱེས་སྦྱོང་བའི་བསྐྱེད་རིམ་གཙོ་བོར་བསྒོམ་ཞིང་རིམ་པ་བཞིན་དུ་གོམས་པ་བརྟན་པ་ཆེ་ཞིང་། ཤིན་ཏུ་བརྟན་པའི་རིགས་ཅན་དག་ལ་དེ་དང་དེའི་མཐུ་དང་མཐུན་པར་སློབ་དགོས་པ་ཡིན་ལ། དེ་དག་ཀུན་ཀྱང་དེ་བཞིན་ཉིད་ཀྱི་ཏིང་ངེ་འཛིན་ཞེས་པ་སྤྲོས་པ་ཀུན་དང་བྲལ་བའི་ཤེས་རབ་བརྗོད་པ་དང་བྲལ་བ་ཡིན་ལ། ཀུན་སྣང་གི་ཏིང་ངེ་འཛིན་ནི་གོང་གི་ཏིང་ངེ་འཛིན་གྱི་རྩལ་ལས་སྙིང་རྗེས་འཕེན་པ་བསྐྱེད་རིམ་དུ་ཤར་བ་ཐབས་ཀྱི་ལམ་མཆོག་མ་ནོར་བ་ཡིན་ཞིང་། སྣང་བའི་དུས་ཉིད་ནས་ངོ་བོས་སྟོང་ཞིང་རང་བཞིན་མ་གྲུབ་པ། ཟབ་མོ་སྣང་སྟོང་ཐབས་དང་ཤེས་རབ་ཟུང་དུ་འབྲེལ་བའི་ལམ་མཆོག་ཏུ་གྱུར་པ་ཡིན་ལ། དེ་ལས་འགལ་བའི་དམིགས་པ་དང་བཅས་པའི་བསྐྱེད་རིམ་ནི། མུ་སྟེགས་དང་། གདོན་གྱི་རིགས་ཕལ་མོ་ཆེ་ལའང་ཡོད་པ་མཐོང་ཐོས་སུ་གྱུར་པ་བཞིན་ནོ། །སྔགས་སུ་བྱང་ཆུབ་སེམས་དཔའི་མཐོང་ལམ་སྟེ། ས་དང་པོ་རབ་ཏུ་དགའ་བ་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས། སྤྲོས་བྲལ་དེ་བཞིན་ཉིད་ཀྱི་བདེན་པ་མངོན་སུམ་མཐོང་བ་སྟེ། ཤིན་ཏུ་གྲགས་པ་མངོན་དུ་བྱེད་པའི་ཐབས་ཀྱི་མཆོག་ཏུ་གྱུར་པ་སྣང་ཆ་ལྷ་སྐུར་གསལ་བ་རྒྱུ་བསོད་ནམས་ཀྱི་ཚོགས་དང་། དེ་ལ་རང་བཞིན་མ་གྲུབ་པ་འབྲས་བུ་ཡེ་ཤེས་ཀྱི་ཚོགས་ཏེ། ཚོགས་གཉིས་ཉེ་རྒྱུར་བསྟེན་པའི་དབང་རྣོན་དག་དང་། བྱང་ཆུབ་སེམས་དཔའ་ལམ་ལྔར་འབྲེལ་པ་རྡོ་རྗེ་ཐེག་པའི་ལུགས་ཀྱི་རིག་འཛིན་རྣམ་པ་བཞིའི་ཐེམ་སྐས་ཉིད་ལ་འཛེགས་ནས་ངེས་པ་ལྔ་ལྡན་སོགས་སྐུ་ལྔའི་ཞིང་དུ་མིག་འཕྲུལ་ལྟ་བུར་འགྲོ་བའོ། །གཉིས་པ་རྫོགས་པའི་རིམ་པ་ཉིད་ལའང་གཉིས་ཏེ། ཕ་རྒྱུད་རྣམས་ལས་འབྱུང་བ་ལྔའི་རླུང་། རྣམ་པར་དག་པའི་གསལ་སྟོང་ཡེ་ཤེས་བསྐྱེད་ཅེས། དཔལ་གསང་བ་འདུས་པ་དང་། གཤིན་རྗེ་གཤེད་ལ་སོགས་རྣལ་འབྱོར་ཆེན་པོའི་རྒྱུད་རྣམས་ལ་འབྱུང་བ་ལྔས་རླུང་ལ་གནད་དུ་བསྣུན་པའི་ཟབ་གསལ་ལམ། གསལ་སྟོང་རྣམ་པར་མི་རྟོག་པའི་ཡེ་ཤེས་ལ་གཙོ་བོར་དམིགས་ནས་དངོས་གྲུབ་རྣམ་པ་གཉིས་བསྒྲུབ་པ་ཡིན་ལ། མ་རྒྱུད་ཡང་ཕུར་དང་། ཀུན་འདུས་རིག་པ་དང་། འཁོར་ལོ་སྡོམ་པ་དང་། དགྱེས་རྡོར་ལ་སོགས་རྗེས་སུ་རྣལ་འབྱོར་རྣམས་ལས་ནི་ཁམས་ལ་ཞུ་བདེའི་ཡེ་ཤེས་བསྐྱེད་ཕྱིར། རང་ལུས་ཐབས་ལྡན་དང་ཞེས་པས། རྩ་རླུང་ལ་གནད་དུ་བསྣུན་པ་དང་། གཞན་ལས་ལ་བརྟེན་ནས་དགའ་བ་བཞིའི་ཡེ་ཤེས་བསྐྱེད་ཅེས་པ་ནི། གཞན་ལུས་ལ་བརྟེན་ནས་དགའ་བ་བཞིའི་ཡེ་ཤེས་ཀྱི་ཞུ་བདེ་འདྲེས་པས་བདེ་སྟོང་རྣམ་པར་མི་རྟོག་པའི་རྫོགས་རིམ་གཙོ་ཆེ་ཡིན་ནོ། །གཉིས་སུ་མེད་པའི་རྒྱུད་ལས་རྡོ་རྗེ་སེམས་དཔའ་སྒྱུ་འཕྲུལ་དྲ་བ་དང་། དུས་ཀྱི་འཁོར་ལོ་དང་། སངས་རྒྱས་མཉམ་སྦྱོར་ལ་སོགས་པ་ལས་ནི། རྩ་ཐིག་རླུང་གསུམ་གྱི་ཞུ་བདེས་དྲངས་པས་གསལ་བ་དང་། མི་རྟོག་པ་དང་། བསམ་གྱིས་མི་ཁྱབ་པའི་གཅིག་དང་དུ་བྲལ་གྱི་ཡེ་ཤེས་ཐིག་ལེ་ཆེན་པོའི་འོད་གསལ་གཙོ་བོར་བྱེད་པ་ལས། སྔ་མ་གཉིས་ནི་བསྐྱེད་རིམ་དང་སྣང་བཅས་དམིགས་པའི་ལམ་དང་། ཕྱི་མ་གཅིག་ནི་སྣང་མེད་འོད་གསལ་གྱི་ལམ་ཡིན་ཏེ། དང་པོའི་ཕྱོགས་ལ་གནས་པ་རྩ་དང་རླུང་ནི་ཞེས་པས་སྤྱིར་རྡོ་རྗེའི་ལུས་ལ་རྩ་སྟོང་ཕྲག་བདུན་ཅུ་རྩ་གཉིས་ཡོད་པར་བཤད་ཅིང་། གཡོ་བ་རླུང་ལ་གྱེན་རྒྱུ་དང། ཐུར་སེལ་དང་། མེ་མཉམ། སྲོག་འཛིན། ཁྱབ་བྱེད་དང་འབྱུང་བ་ལྔའི་རླུང་ཡང་ཡོད་པའོ། །བཀོད་པ་བྱང་ཆུབ་སེམས་ཀྱི་ཐིག་ལེ་ཐབས་ཕ་ལས་བྱུང་བའི་དཀར་ཆ་དང་། ཤེས་རབ་མ་ལ་ས་བྱུང་བའི་དམར་ཆ་གཉིས། རྩ་གནས་ཀུན་ཏུ་རྒྱུ་ཞིང་སྤྲོ་བསྡུ་བྱེད་པའོ། །དེ་ལྟར་གསུམ་དུ་གནས་པ་ནི་རྡོ་རྗེ་ཕུང་པོའི་གྲོང་ཁྱེར་ཡིན་ལ། དེ་ཡང་དང་པོ་མའི་མངལ་གནས་འཛིན་པའི་ཐོག་མ་རུ། དབང་པོ་དངས་མ་མིག་གཉིས་དང་ནི་ལྟེ་བའི་རྩ་མདུད་ཆགས་པ་ཡིན་ལ། དེ་ལས་ལུས་བསྐྱེད་བྱེད་དངས་མར་གྱུར་བའི་རྩ་གསུམ་ཀ་བ་ལྟ་བུར་གནས་པའི་ནང་ན། ཕྱི་རུ་ལུས་ངག་ཡིད་གསུམ། ནང་དུ་ཉོན་མོངས་དུག་གསུམ། གསང་བ་སྐུ་གསུང་ཐུགས་གསུམ་ཀྱི་རྟེན་བྱེད་པའི་ཡི་གེ་གསུམ་དུ་གནས་པ་དང་། དབུ་མའི་ཡས་མར་གྱིས་སྣ་གཉིས་ཀྱི་གོང་མ་ཚངས་པའི་སྒོ་སྤྱི་བོ་དང་གསང་གནས་གཉིས་སུ་ཟུག་པ་དང་གཡས་གཡོན་ན་རོ་མ་རྐྱང་མ་གཉིས་དཀར་བ་དང་དམར་བ་ཉིད་དེ། བུད་མེད་ཉིད་ལ་རྩ་གཉིས་གོ་ལྡོག་པས་རྐྱང་མ་གཡས་དང་རོ་མ་གཡོན་ན་ཡོད་ཅིང་། དབུ་མ་སྔོ་སྐྱར་རོ་རྐྱང་གཉིས་པོས་ལུ་གུ་རྒྱུད་དུ་མདུད་པ་ཉི་ཤུ་རྩ་གཅིག་བྱས་ཡོད་པ་ལ། རིམ་པ་བཞིན་དུ་སྐུ་གསུང་ཐུགས་གསུམ། སྐུ་བཞི་འམ། སྐུ་ལྔ་ཕ་རོལ་ཏུ་ཕྱིན་པ་དྲུག་གི་གྲངས་ཀྱི་འཁོར་ལོའི་རྩ་འདབ་རྣམས། ཕྲི་ཞེས་འཁོར་ལོ་ཉུང་སྐབས་དང་། བསྣན་པ་མང་སྐབས་ལྟར་གྱུར་པ་སྦྱང་གཞི་བདེ་གཤེགས་སྙིང་པོའི་རང་བཞིན་ལ། སྦྱོང་བྱེད་བསྐྱེད་རྫོགས་རྣམ་གཉིས་ཀྱི་ཚུལ་དུ་ཡོད་པས། ལྟེ་བར་དྲུག་ཅུ་རྩ་བཞི་དང་། མགྲིན་པ་ལ་བརྒྱད་ཚན་གཉིས། སྙིང་ཁར་རྩ་འདབ་བརྒྱད་དང་། སྤྱི་བོར་སུམ་ཅུ་རྩ་གཉིས། བདེ་སྐྱོང་འཁོར་ལོ་ན་བདུན་ཅུ་རྩ་གཉིས་དང་། དེ་བཞིན་དུ་གཙུག་ཏོར་ལ་ནམ་མཁའི་ཁམས་ཀྱི་འཁོར་ལོ་ཞེས་སུ་གྲགས་པའོ། །འཁོར་ལོ་རེ་དང་དེ་དག་སོ་སོའི་བར་མཚམས་རྣམས་སུ་འཕོ་བ་བཅུ་གཉིས་ཀྱི་རླུང་གི་དུས་སྦྱོར་གྱི་ཚུལ་དང་། དེ་བཞིན་དུ་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་ཚུལ་དུ་གནས་ཤིང་། ཁམས་ལ་ཕྱིར་འཕོ་བ་སྤངས་བའི་ཐིག་ལེ་ལུགས་ལྡོག་གི་འགྲོས་ཀྱིས་གསང་གནས་ཡེ་ཤེས་ཀྱི་འཁོར་ལོར་ཕྱིན་པ་དང་། རླུང་གི་འཕོ་བ་གཅིག་དང་། རྟེན་འབྲེལ་བཅུ་གཉིས་ལས་གཅིག་འགགས་ནས། དང་པོའི་ས་ཞེས་རབ་ཏུ་དགའ་བའི་རྟོགས་པ་འཆར་ལ། རིམ་པ་བཞིན་དུ་གཙུག་ཏོར་ནམ་མཁའི་ཁམས་ཀྱིས་འཁོར་ལོའི་བར་གྱི་རླུང་དང་། རྟེན་འབྲེལ་རེ་རེའི་ཆ་ལྡོག་པས་ས་བཅུ་གཉིས་པོ་རབ་ཏུ་རྫོགས་པའི་མཐར། ཐིག་ལེ་གཙུག་ཏོར་ནམ་མཁའི་འཁོར་ལོ་ལ་སླེབས་ཤིང་དེའི་ཁམས་དང་འདྲེས་པའི་ཚེ། མངོན་པར་འཚང་རྒྱ་བའི་དང་པོ་རབ་ཏུ་སངས་རྒྱས་དུས་ཀྱི་འཁོར་ལོའི་ལུགས་ཡིན་ལ། དེ་དང་རྣམ་གྲངས་མཐུན་པའི་རྩ་འདབ་རྣམས་ལ་སྦྱང་གཞིར་གནས་པའི་རིགས་དྲུག་གི་ས་བོན་རྣམས་ནི། སྦྱོང་བྱེད་རིག་པའི་སྐྱེས་བུ་ཐུབ་པ་དྲུག་རྣམས་དང་། ཕ་རོལ་དུ་ཕྱིན་པ་དྲུག་གི་སྦྱང་བ་ལས། ཐ་དད་པའི་ཡེ་ཤེས་རྣམ་པ་ལྔ་ནི། ཆོས་དབྱིངས། མེ་ལོང་། མཉམ་ཉིད། སོར་རྟོགས། བྱ་གྲུབ་དང་བསམ་གྱིས་མི་ཁྱབ་པའི་ཡེ་ཤེས་གཅིག་དང་དྲུག་འཐོབ་པའོ། །དེ་བཞིན་དུ་སྙིང་ཁ་ཞི་བའི་འཁོར་ལོ་དང་། སྤྱི་གཙུག་ན་ཁྲོ་བོའི་འཁོར་ལོ་རྣམ་པ་གཉིས་སུ་ཡོད་པ་ལ་ལྷ་ཞི་ཁྲོ་གཉིས་དང་རྣམ་གྲངས་མཉམ་པའི་རྩ་འདབ་དང། ཐབས་བདེ་བ་ཆེན་པོ་དང་། གྲོལ་ལམ་སྟོང་པ་ཉིད་དེ། སྟེང་འོག་ལམ་གྱི་སྒོ་གཉིས་སུ་འདོད་པ་ནི། རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བའི་ལུགས་སོ། །གཡོ་བ་རླུང་ལའང་འབྱུང་བ་ཆེ་ཆུང་གཉིས་ཏེ། ཆེ་བ་ཉིན་ཞག་ཕྲག་གཅིག་དག་ལ་ནི་ཉི་ཁྲི་དང་། ཆིག་སྟོང་དྲུག་བརྒྱའི་གྲངས་སུ་འགྱུར་ཞིང་ཆུང་བ་ཡང་ཀུན་རྟོག་བརྒྱད་ཁྲི་དང་བཞི་སྟོང་གི་གྲངས་དང་མཉམ་པའི་བཞོན་པ་ལྟ་བུར་གནས་ཤིང་། རྩ་བའི་རླུང་ནི་སྲོག་འཛིན་དང་། མེ་མཉམ་དང་ཁྱབ་བྱེད། གྱེན་རྒྱུ་ཐུར་སེལ་དང་ལྔར་གནས་པའི། བྱེད་ལས་ནི་རིམ་བཞིན། སྲོག་བརྟེན་པ་དང་། མེ་དྲོད་བསྐྱེད་པ་དང་། ལུས་ཉམས་བརྟས་པ་དང་། དབུགས་ཀྱི་འགྲོ་འོང་དང་། འགྲོ་འདུག་དང་། བཤང་གཅི་འཕེན་པའི་བྱ་བ་བྱེད་ཅིང་། དེའང་ཕོ་རླུང་གྱེན་རྒྱུ་སྟོད་ན་གནས་ཤིང་། མོ་རླུང་ཐུར་སེལ་སྨད་དང་། མ་ནིང་གི་རླུང་མཉམ་པར་གནས་པ་དང་། ནང་གི་རླུང་ནི་འབྱུང་ལྔའི་ཁ་དོག་ཅན་ཕུང་པོ་ཁམས་དང་སྐྱེ་མཆེད་གནས་པའི་རྟེན་ཡིན་ལ། མ་དག་པ་དུག་ལྔ་དང་། དག་པ་ཡེ་ཤེས་རྣམ་པ་ལྔ་བཅས། རྒྱུ་དང་འབྲས་བུ་ལྟ་བུར་མཆེད་པའི་རྟེན་བྱེད་དོ། །ཁྱད་པར་ས་ཆུ་མེ་རླུང་ནམ་མཁའི་ཁམས་ཀྱི་དངས་མའི་རླུང་ལྔ་པོ་དྷུ་ཏིར་ཏེ། དབུ་མར་ཆུད་པར་གྱུར་ན། ཟད་པར་ས་དང་། ཆུ་དང་། མེ་དང་། རླུང་དང་། ནམ་མཁའི་ཏིང་ངེ་འཛིན་དང་ཡོན་ཏན་དང་རྫུ་འཕྲུལ་རྣམས་འགྲུབ་པའོ། །གསང་བའི་རླུང་ནི་ཡེ་ཤེས་རྣམ་པ་ལྔ་ཡིན་ཏེ། རགས་པས་ཆོས་ཀུན་རྫོབ་དང་རྣམ་པར་འགལ་བ་ཡིན་ནོ། །གསུམ་པ་རྩ་ལ་རླུང་། རླུང་ལ་བཀོད་པ་བྱང་ཆུབ་སེམས་ཀྱི་ཁམས་བརྟེན་པ་ཡིན་ཏེ། གཡས་པ་རོ་མ་ལས་ནི་ཟླ་བའི་བདུད་རྩི་དང་། གཡོན་པ་རྐྱང་མ་ལས་ནི་ཉི་མའི་རྡུལ་འབབ་ཅིང་། ཕོའི་རྐྱང་མ་དང་མོའི་རོ་མའི་སྣ་གཉིས་མདུད་པར་གྱུར་པའི་ཁམས་དཀར་དམར་གཉིས་འཛག་པ་བསྲུང་ཞིང་། དེ་བས་གཞན་དུ་རོ་རྐྱང་གཉིས་པོ་ལས་མཆེད་པའི་རྩ་མདུད་ཀུན་ན་དངས་མ་དཀར་དམར་གཉིས། དཔའ་བོ་དང་ནི་རྣམ་འབྱོར་མའི་ཚུལ་དུ་འཁྲིལ་ཞིང་སྦྱོར་བས་བདེ་སྟོང་མཆོད་པ་ལེན་ཞིང་། མདོར་ན་གནས་པ་རྩ་ནི་ཆུ་འདྲེན་པའི་ཡུར་བ་འདྲ་ཞིང་། གཡོ་བ་རླུང་ནི་ཡུར་བར་ཆུ་འཁྲིད་པའི་འགྲོ་འོང་བྱེད་པའི་ཁ་ལོ་བ་ལྟ་བུ་ལ་ཁམས་ཆུ་བྱང་ཆུབ་སེམས་ནི་ཆུ་དང་འདྲ་ཞིང་གང་དུ་ཁྲིད་སར་འདུ་བ་ཡིན་ལ། འཁོར་ལོ་དྲུག་ཏུ་བརྩེགས་པའི་སྒྲ་གཅན་གྱི་དབྱིངས་སུ། སྲོག་སྟེ་རོ་མ་དང་རྩོལ་བ་ནི་རྐྱང་མ་ཡིན་ལ། དེ་གཉིས་ཀྱི་ཤིང་རྟས་དྲངས་པ་ལས། དབུ་མ་ལ་རོ་རྐྱང་གཉིས་ཀའི་མདུད་པ་གཉིས་གཉིས་གྲོལ་བ་དང་། རླུང་དང་ཁམས་ཀྱི་དངས་མ་རྣམ་པ་གཉིས་རེ་སྒྲ་གཅན་སྟེ་དབུ་མའི་ལྟོ་བར་ཞུགས་པས་དང་པོས་ས་ནས་བཟུང་ཞེས་རབ་ཏུ་དགའ་བའི་ས་ནས་ས་རྣམ་རིམ་གྱིས་བགྲོད་བཞིན། ས་བཅུ་པར་སླེབས་ཚེ་དེའི་ཡོན་ཏན་གོང་དུ་འཕེལ་ནས་གཙུག་ཏོར་གྱི་བར་དུ་འགྲོ་བའོ། ཁྱད་པར་དུ་ཞི་ཁྲོ་སྒྱུ་འཕྲུལ་དྲ་བ་གསང་ཐིག་གི་ལུགས་ལྟར་ན། ཕྱི་སྣོད་འཇིག་རྟེན་དང་། ནང་བཅུད་སེམས་ཅན་གྱི་དཔལ་དང་ཡོན་ཏན་རང་ལ་རྫོགས་པ་ཕུང་པོའི་གྲོང་ཁྱེར་ན། འདས་པ་དང་། མ་འོངས་པ་དང་། ད་ལྟ་བ་སྟེ་དུས་གསུམ་གང་དུའང་ལུང་དུ་མ་བསྟན་པ་བདེ་གཤེགས་སྙིང་པོ་སྟེ། སྔགས་ཀྱི་ལྟ་བསྒོམ་སྤྱོད་གསུམ་ཚུལ་བཞིན་ཉམས་སུ་བླང་བ་མཐའ་དག་མངོན་འཚང་རྒྱ་བ་རྡོ་རྗེའི་གདན་ཞེས། སྙིང་ཁ་དཔལ་གྱི་བེའུའི་ཁོང་སེང་ན་རྩའི་དངས་མ་བརྒྱད་དུ་གནས་པ་ལས། འདི་ལྟར་དབུས་མ་གསུམ་ནི་ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་གྱི་ཆོས་ཉིད་ཅེས་ངོ་བོ་འགྱུར་བ་མེད་པའི་རྟེན་ཡིན་ལ། དེ་དག་གི་མདུན་མ་གཅིག་ནི་ཡེ་ཤེས་འཆར་བའི་རྩ་དང། རྒྱབ་ན་ཡོན་ཏན་གྱི་རྩ་ལས་ཞིང་ཁམས་ཀྱི་བཀོད་པ་འཆར་ཞིང་། གཡོན་ན་ཐ་མལ་རང་རྒྱུད་ཀྱི་རྩ་གསུམ་ནི་འཁྲུལ་སྣང་གི་རྟེན་བྱེད་ཅིང་། དེ་དག་སོ་སོའི་དབུས་ན་འཁོར་འདས་ཡིག་འབྲུ་ནི་ཞེས་པ་སྙིང་ཐིག་ཡ་བཞི་སོགས་ན་རྩ་ཡིག་རྒྱས་པར་གསལ་བ་ལྟར་ཡིན། དེ་དག་སྦྱང་གཞི་སྦྱོང་བྱེད་ཀྱི་ཚུལ་དུ་གནས་པ་རྣམས་སྐུ་གསུང་ཐུགས་ཀྱི་ཡི་གེ་ཨོཾོ་ཨཱཿཧཱུཾ་གི་ནུས་པས་དག་པར་བྱེད་པའོ། །རྩ་དེ་དག་ཀུན་གྱི་དབུས་ན་ཁྲག་དང་ཆུ་སེར་གྱིས་མ་གོས་པའི་དངས་མའི་རྩ་དཀར་པོ་རྟ་རྔའི་བཅུ་ཆ་ཙམ་དུ་ཕྲ་བའི་ནང་ན་རྡུལ་ཞེས་ཁམས་དམར་ཆ་དང་དབུགས་ཀྱི་དངས་མ་འདྲེས་པའི་འོད་ཁ་དོག་ལྔ་པ་ཤིན་ཏུ་ཕྲ་བ་ཉིད་དེ། རང་བཞིན་འོད་གསལ་བྱང་ཆུབ་སེམས་ཀྱི་རྟེན་ཡིན་ལ། ཀུན་ཏུ་བཟང་པོ་རིགས་ལྔ་བཞུགས་པའི་གཞལ་མེད་ཁང་ཡིན་ཏེ། གང་དུ་རླུང་དང་བྱང་ཆུབ་སེམས་ཀྱི་དངས་མ་འདུས་པའི་ཚེ་མྱ་ངན་ལས་འདས་པའི་ཞིང་གི་སྣང་བ་མཐའ་དག་འཆར་ཞིང་། དེ་ཡང་སྣང་ཆའི་འོད་ཁ་དོག་ལྔ་དང་། སྟོང་ཆའི་ཆོས་སྐུ་གཉིས་པོ་རོ་གཅིག་ཏུ་འདྲེས་པའི་ལམ་གྱི་ཚོགས་ཆེན་རྣམ་པ་གཉིས་རྫོགས་ནས། འོག་མིན་རྣམ་པར་དག་པ་སྡུག་པོ་བཀོད་པ་ཞེས་བྱ་བ་དེ་གཞན་གང་དུའང་མི་གནས་ཤིང་། སྒྲིབ་པ་མཐའ་དག་ནམ་ཞིག་སྤངས་པར་གྱུར་པའི་དུས་དེར་ལྷུན་གྱིས་གྲུབ་པའོ། །དེའི་ཕྱིར་ན་ལུས་ནི་ཡེ་ཤེས་ཆེན་པོའི་རྟེན་ཡིན་ཏེ། འཁོར་བ་ཉིད་ནའང་བདེ་གཤེགས་སྙིང་པོ་ངོ་བོའི་བཞུགས་ཚུལ་མ་ཉམས་པ་དང་། དམན་པར་གྱུར་པ་གཉིས་ཀ་མེད་ཅིང་འགྱུར་བ་མེད་པའི་དོན་དམ་བྱང་ཆུབ་སེམས་ཉིད་དེ་ནི། ཏིལ་འབྲུ་ལ་མར་གྱི་ཁྱབ་པ་ཇི་བཞིན་དུ་གནས་པ་ཡིན་ནོ། །འདི་ལྟར་རྡོ་རྗེའི་ལུས་ཀྱི་གནས་ལུགས་ཇི་ལྟ་བ་བཞིན་དང་། གདོད་མ་གཞིའི་བཞུགས་ཚུལ་ཤེས་པར་བྱས་ནས། ལམ་གྱི་རྩ་བ་གཏུམ་མོའི་གདམ་པ་དང་། གཞི་མ་ནི་སྒྱུ་ལུས་ཀྱི་གདམ་པ། རྟག་ཚད་ཉིད་འཁྲུལ་ལམ་གྱི་རྨི་ལམ་གྱི་གདམ་པ། སྙིང་པོ་འོད་གསལ་གདམ་པ། བསུན་མ་བར་དོའི་གདམ་པ། བློ་ཆོད་འཕོ་བའི་གདམ་པ་དང་རྣམས་པ་དྲུག་པོ་དེ་ནི། སྐྱེས་བའི་རྩོལ་བ་དང་བརྩོན་འགྲུས་ཀྱིས་འགྲུབ་པ་ཡིན་གྱི་གཞན་གྱི་རྐྱེན་ལ་རག་མ་ལུས་ཕྱིར་རང་ལུས་ཐབས་ཀྱི་ལམ་ཞེས་བྱའོ། །དེ་ལྟར་རྩ་ཐིག་རླུང་གི་སློབ་སྦྱོང་གོམས་པ་གནད་དུ་སོང་ན། སླར་ཡང་བདེ་སྟོང་ལམ་དུ་བྱེད་པ་གཞན་ལུས་ཕྱག་རྒྱ་བསྟེན་པ་སྟེ། ཀུན་ཀྱང་ལམ་དུ་འགྲོ་བས་ན་ཐབས་ཀྱི་ལམ་མོ། གཉིས་པ་སྣང་བ་མེད་པའི་རྫོགས་རིམ་ནི། རྣམ་པར་གྱུར་པའི་གོང་གསལ་གྱི་ཆོས་དྲུག་གི་བསླབ་སྦྱངས་ལྟ་བུ་དེ་དག་ནི། རྣམ་པ་ལས་རྣམ་པར་གྱུར་པའི་བསྐྱེད་རྫོགས་གང་ཡིན་ཡང་འདྲ་སྟེ། མཐར་དག་པའི་སྣོད་གཞལ་ཡས་ཁང་དང་། བཅུད་ལྷའི་རྣམ་པར་གསལ་བ་ལ་བརྟན་གཡོའི་སྣང་བ་འདི་ཀུན་ཀྱང་། འོད་ཀྱི་རང་བཞིན་དུ་ཞུ་ནས་གཙོ་འཁོར་རྣམས་ཀྱི་སྙིང་གའི་ས་བོན་རྣམས་ཐིག་ལེར་ཐིམ་པ་དེ་ཡང་མས་རིམ་ནས་ཐིམ་བཞིན་སྟོང་པར་གྱུར་པ་ནམ་མཁའི་ངོ་བོ་ཉིད་ཀྱི་ངང་དུ། ཡེ་ཤེས་ཆེན་པོའི་སྤྱོད་ཡུལ་ཉིད་ལ་བཞག་གོ །དེ་ལྟར་བསྐྱེད་རིམ་གྱིས་ནི་སྣང་བའི་བདེན་ཞེན་འགོག་ཅིང་། རྫོགས་རིམ་གྱིས་ནི་སྒྱུ་མར་འཛིན་པའི་ཞེན་རྟོག་སྤོང་ཞིང་། བདེ་གསལ་མི་རྟོག་གི་ཉམས་དང་། ལྷན་སྐྱེས་ཡེ་ཤེས་བློས་བཅོས་པ་མེད་པ་དེ་འཆར་རོ། ཤིན་ཏུ་ཟབ་པའི་རྫོགས་རིམ་བླ་ན་མེད་པ་རྣམས་ནི་བླ་མེད་རྒྱུད་ལས་གསུངས་པ་མ་གཏོགས་འོག་མར་གང་དུ་ཡང་གསུང་པ་མེད་དོ། །དབང་པོ་རྣོན་པོ་ཚེ་གཅིག་གི་རྡོ་རྗེ་འཆང་གི་སར་འགྲོ་བའི་ཉེ་ལམ་སྦས་པ་ཤིན་ཏུ་ཟབ་མོ་ཞེས་བྱ་བའོ། །གསུམ་པ་གསང་སྔགས་རྡོ་རྗེ་ཐེག་པ་དང་མཐུན་པའི་གྲོགས་སུ་གྱུར་པ་དམ་ཚིག་གི་རིམ་པ་ནི། སྔགས་ཀྱི་ལམ་ལ་ཞུགས་པའི་བརྟུལ་ཞུགས་ཏེ་སྤྱོད་པ་མི་ཉམས་པར་བསྲུང་དགོས་པ་གལ་ཆེ་ཞིང་། ཐབས་ནི་དུག་ལ་སྔགས་ཀྱིས་ཐེབས་པ་ལྟ་བུས་གདམ་པ་དང་། གཉེན་པོ་ནི་ཉོན་མོངས་པ་གང་ཡིན་གྱི་དབང་དུ་མི་གཏོང་བའི་དབང་གིས་རྟེན་འབྲེལ་བཟང་ངན་མི་འཆོལ་བ་སྟེ། བྱ་གཞན་གྱིས་དུག་ཟོས་ན་འཆི་བ་ཡིན་ཀྱང་། རྨ་བྱའི་མགྲིན་པར་བཙན་དུག་ཞུགས་ན་རོ་ནུས་རྒྱན་དུ་སྨིན་པ་ལྟར་སྤྱོད་དགོས་པའོ། །དེ་ལ་ཡང་དམ་ཚིག་དང་ནི་སྡོམ་པའི་ཁྱད་པར་ནི། དམ་ཚིག་ནི་འདའ་བར་བྱེད་བ་མ་ཡིན་ཞིང་། འདས་ན་འདི་ཕྱི་གཉིས་ཕུང་གི་རྒྱུར་འགྱུར་ཞིང་། སྡོམ་པ་ནི་ལུས་ངག་གི་མི་དགེ་བ་བདུན་པོ་ཉན་རང་གི་སྙིང་ནས་སྤང་དགོས་ཀྱང་། ཐེག་པ་ཆེན་པོའི་བྱ་དང་མི་བྱའི་ངེས་པ་སྟེ། འོན་ཀྱང་མི་དགེ་བ་བཅུ་པོ་སྤང་བ་གཙོ་བོར་བྱེད་པ་ཡིན་ཞིང་། སྡོམ་པ་ངོ་བོ་གཅིག་ཡིན་ལ་ལྡོག་ཆའི་དབྱེ་བའོ། །དེའང་སྔགས་སྡོམ་ཡིན་ན་དམ་ཚིག་འདྲེས་ཏེ། སྔགས་ཀྱི་དབང་བཞིའི་སྡོམ་བཟུང་གི་སྐབས་སུ་སྡོམ་པ་གསུམ་ག་བླངས་ནས་གདོད་དབང་ལ་འཇུག་དགོས་པའི་ཕྱིར་དང་དེར་མ་ཟད་དམ་ཚིག་ཁོ་ན་ལས་སྡོམ་པ་འདྲེས་པར་མི་འགྱུར་བ་རྒྱ་གར་གྲུབ་པའི་དབང་ཕྱུག་ཕལ་མོ་ཆེའི་ལུགས་དང་མཚུངས་སོ། །ཀུན་གྱི་སྤྱི་དོན་ཞེས་དབང་བཞི་སྤྱི་ལ་དགོས་པའི་སྔགས་སྡོམ་མ་ཐོབ་པ་དང་། ཐོབ་ཀྱང་སྨྱོ་བ་ལ་སོགས་པའི་སྐྱོན་གྱིས་འདུ་ཤེས་རངབཞིན་དུ་མི་གནས་པ་ལ་ལྟུང་བའི་ཉེས་པ་དང་། བསྲུང་བའི་དངོས་གྲུབ་གཉིས་མེད་དོ། སྔགས་སྡོམ་བླངས་ནས། དེའི་རྒྱུད་ལ་ལྡན་ཞིང་མ་ཉམས་པ་དང་། མ་བཏང་ལ་ཤེས་པ་རང་བཞིན་གྱི་རྣལ་དུ་གནས་པ་དེ་ཉིད། ལྟུང་བ་དང་ནི་དངོས་གྲུབ་གཉིས་ཀའི་སྣོད་ཡིན་ལ། བྱང་ཆུབ་ཀྱི་སེམས་ལས་གཞན་པའི་རྩ་ལྟུང་ལ་ཀུན་དཀྲིས་ཞེས་བྱ་བ། ལྟུང་བའི་བྱ་བ་དེ་ཉེས་པ་ཡིན་པར་ཤེས་བཞིན་དུ་ད་དུང་བྱ་བ་དེ་བྱེད་འདོད་མ་ལོག་པ་དང་། དེ་ལ་འགྱོད་པ་མེད་པ་དང་། རང་ངོར་ལྟོས་པའི་ངོ་ཚ་ཤེས་པ་དང་། གཞན་ངོར་ལྟོས་པའི་ཁྲེལ་ཡོད་མེད་པ་སྟེ། ཆོས་གསུམ་པོ་དེ་ཚང་བའི་ཀུན་སློང་བྱ་བའི་མཐའ་རུ་གཏུག་པ་དེ་སྲིད་རྒྱུན་ཆགས་སུ་ཡོད་པར་གྱུར་ན་ཀུན་དཀྲིས་ཚང་བའི་ཕམ་པ་ཞེས་ལྟུང་བ་ཆེན་པོར་འགྱུར་བ་ཡིན་ལ། དུས་ཀྱི་བར་ཆད་ནས་ཉེས་ལྟུང་གི་མཇུག་སྐྱོང་རྒྱུ་མ་བྱུང་བའི་རྒྱུན་ཆགས་སུ་མེད་པའམ། ཆོས་གསུམ་པོ་དེ་དག་གང་ལས་གཅིག་ཤོས་མ་ཚང་ན་བྱ་བའི་ཡན་ལག་མ་ཚོགས་པ་ཡིན་པས་ལྟུང་བ་སྦོམ་པོར་འགྱུར་བའོ། །དེས་ཤེས་པར་བྱ་བའི་ལྟུང་བའི་རྩ་བ་དང་ཡན་ལག་ཀུན་ཀྱང་ཡིད་ཀྱིས་མི་སྤོང་ཞིང་། ལུས་ཀྱི་དོར་བར་མི་བྱའོ། །ཉིན་ཐུན་གསུམ་དང་། མཚན་ཐུན་གསུམ་སྟེ། ཆ་དྲུག་ཏུ་བགོས་པ་ལ། ཆ་རེ་རེའི་ནང་དུ་རྩ་ལྟུང་བཅུ་བཞི་པོའི་ཉེས་བ་བྱུང་ངམ། མ་བྱུང་ཞིབ་ཏུ་བརྟགས་ཏེ་བསྔོ་བགྲང་བྱ་དགོས་པ་ལ། ལྟུང་བའམ་ཉེས་པས་གོས་ན་འགྱོད་པ་དྲག་པོ་བསྐྱེད་ཅིང་། ཕྱིར་འཆོས་ལ་སེམས་བཞིན་ཉེས་བཅོས་ལ་འབུངས་བ་གལ་ཆེ་ལ། གོས་པ་མིན་ན་དགའ་བ་བསྒོམ་ཞིང་བསྔོ་ལ། སྔོན་ཆད་ཉེས་ལྟུང་གི་གོས་སམ་མ་གོས་པ་གང་ཡིན་ཀྱང་རུང་སྟེ། ད་ཕྱིན་ཆད་སྲོག་ལ་བབ་ཀྱང་ཉེས་བྱས་ཀྱིས་གོས་པར་མི་བྱ་བའི། སྡོམ་སེམས་ཤིན་ཏུ་བརྟན་པར་བྱ་དགོས་ཤིང་། གང་ཚེ་ཉིད་མཚན་ཆ་དྲུག་ཏུ་བགོས་པ་གང་ཡང་རུང་བའི་ནང་དུ་ལྟུང་བ་ཡིན་མིན་བསྔོ་བགྲང་བྱེད་པའི་འདུ་ཤེས་རྨོངས་བར་གྱུར་ན། ཁ་ན་མ་ཐོ་བའི་སྦོམ་པོ་ཞེས་བྱ་བ་འབྱུང་བར་འགྱུར་ལ། ཉིན་མཚན་ཆ་དྲུག་ཀ་འདས་ནས་སྦོམ་པོ་དྲུག་ཏུ་འགྱུར་པ་ཤེས་དགོས་ཤིང་། ཉམས་ཉེས་བྱུང་བའི་ཞག་དེའི་ཁོངས་སུ་ཕྱིར་བཅོས་མ་གྲུབ་ན་ཞག་ཕྱི་མའི་སྐྱ་རིངས་དང་པོ་འཆར་བ་དང་། སྦོམ་པོ་བཅུ་གཉིས་དག་ཏུ་འགྱུར་བར་བཤད་པས་ཞིབ་ཏུ་བརྟག་གོ། ཡན་ལག་གི་དམ་ཚིག་ལ་ཡང་དེས་འགྲེས་ཀྱིས་ཤེས་པར་བྱའོ། །ཐོག་མར་བླ་མེད་ཀྱི་རྒྱུད་སྡེ་སྤྱི་ལ་བཅེས་པའི་དམ་ཚིག་གི་ཆིངས་ནི། རྩ་ལྟུང་བཅུ་བཞི་ཡོད་པའི་རབ་ཏུ་དབྱེ་བ་འདི་ལྟར་བརྟགས་ཕར་བྱ་སྟེ། དང་པོ་དབང་ཐོབ་བླ་མ་རྡོ་རྗེ་སློབ་དཔོན་སྨོས་ཅི་དགོས། ཞེས་ཤིན་ཏུ་གཉན་པའི་དབང་དུ་བཞག་ནས། དེ་ལས་གཞན་པའི་སྔགས་རྒྱུད་ཚིག་བཅད་གཅིག་པ་ཡན་ཆད་ཀྱི་དོན་བཀྲལ་ནས་བསླབ་པ་དང་། ལམ་གྱི་མན་ངག་ཟབ་མོ་ནི་བསྐྱེད་རྫོགས་བཟླས་ཀྱི་གནད་མཚངས་ཐེ་ཚོམ་དུ་གྱུར་པ་བསལ་ཞིང་སྟོན་པ་དང་གསུམ་ལ། ཆོས་ཀྱི་འབྲེལ་བའི་བཀའ་དྲིན་མ་བསམ་པ་བསྙེན་ཞིང་བསྟོད་བཀུར་གྱི་ཁུར་བོར་ནས་བརྙས་ཤིང་གཤུང་པར་བྱེད་པ་དེ་ལ་སྔགས་ཀྱི་དངོས་གྲུབ་ཡོད་པ་མ་ཡིན་ཞིང་། གཉིས་པ་ནི། ཕྱི་སོ་སོར་ཐར་པ་དང་། བར་བྱང་ཆུབ་སེམས་དཔའ་ནང་རིག་འཛིན་སྔགས་ཀྱི་དམ་ཚིག་སྟེ་སྡོམ་པ་གསུམ་དང་། བསླབ་པའི་གནས་སྤྱི་དང་བྱེ་བྲག་རྣམས་དང་། བདེ་བར་གཤེགས་པའི་གནང་བཀག་གི་མཚམས་ལས་འདས་པ་དང་། དེ་བཞིན་ཏུ་མཚན་ཉིད་དང་ལྡན་པའི་བླ་མས་ཡུལ་དང་། དུས་ལ་དགོངས་ཏེ་བླང་དོར་འདི་ལྟར་དགོས་ཞེས་པར་འཛོལ་ཞིང་བཀའ་ལ་ཁྱད་བསད་བྱས་པ་ཡིན་ཞིང་། གསུམ་པ་ནི་བླ་མ་དང་དཀྱིལ་འཁོར་གཅིག་ལ་བརྟེན་ནས་དབང་གི་གྲལ་གཅིག་ཏུ་ཞུགས་ཤིང་འདྲེས་པའི་མཆེད་ལྕམ་གྱི་རིགས་ལ་བསྐུར་བ་འདེབས་ཤིང་བརྙས་པར་བྱས་པ་ཁོ་ན་དམིགས་ཀྱིས་བསལ་ནའང་། དེར་མ་ཟད་མཐའ་ཡས་པའི་སེམས་ཅན་བདེ་གཤེགས་སྙིང་པོ་གཅིག་གིས་བསྡུས་པའི་སྤུན་ཡིན་པའི་ཕྱིར་ན། རིང་བའི་མཆེད་སེམས་ཅན་སྤྱི་དང་། ཉེ་བའི་མཆེད་ནང་པ་སངས་རྒྱས་ཀྱི་རྗེས་འཇུག་ཡོངས་ཏེ་མཆེད་ལའང་མཚུངས་སོ། །བཞི་པ་ནི་གཞན་ལ་གསོད་གཅོད་དང། རྐུ་འཕྲོག་སོགས་སྦྱོར་བ་རྩུབ་པའི་སེམས་ཅན་ཞིག་མཐོང་བའི་ཆོས་ལ་རྒྱལ་པོའི་ཆད་པ་འབེབས་པ་གསོད་གཅོད་བཀྱིག་བརྡུངས་སོགས་ལས་ཀྱིས་མནར་བར་གྱུར་པ་དེ་དག་ལ་དགའ་བ་བསྒོམ་ནས་བྱམས་པའི་སེམས་གཏོང་བ་ནི་བྱང་ཆུབ་སེམས་དཔར་རབ་ཏུ་ལྕི་ན་གཞན་བདེ་བ་དང་བྲལ་འདོད་སྨོས་ཅི་དགོས་ལ། ལྔ་པ་ནི་གཞན་དོན་གཉེར་བར་དམ་བཅས་པའི་བྱང་ཆུབ་ཀྱི་སེམས་སྤང་པའི་མོད་ལ། སྨོན་སེམས་གཏོང་བའི་ཕྱིར་ཀུན་དཀྲིས་ཚང་བའི་ཕམ་པར་འགྱུར་བ་ཡིན་ལ། གནང་བའི་སྐབས་བདུན་མིན་པར་ཁུ་བ་ཕྱུངས་ཞེས་པ་ནི། ཇི་སྐད་དུ། གསང་བའི་དབང་དང་གསུམ་པ་དང། རོ་མཉམ་དང་ལྷ་མཆོད་དང་། རིགས་རྒྱུད་སྤེལ་དང་རིལ་བུ་དང་། འཆི་ལྟས་བརྟགས་པའི་དུས་ཡིན་ཏེ། ཞེས་སོ། དྲུག་པ་ནི་ཉན་རང་གི་ཐེག་པ་དང་། བྱང་ཆུབ་སེམས་དཔའི་ཐེག་པ། རིག་འཛིན་སྔགས་ཀྱི་ཐེག་པ་སྟེ། གསུམ་ལ་ལྟོས་པའི་རྒྱལ་བའི་བཀའ་གཞུང་རྣམས་ལ་དཔྱས་ཤིང་སྟོན་པས་མ་གསུངས་ཞེས་རྫུན་ཚིག་སྨས་པ་དང་། ལས་བཞི་དང་། རབ་འབྱམས་ཀྱི་ལས་དང་། མཆོག་ཐུན་གྱི་དངོས་གྲུབ་ཀྱི་རྒྱུར་རུང་བའི་བསྟན་བཅོས་དག་ཀྱང་རྗེས་སུ་གནང་བ་དང་། བྱིན་གྱིས་བརླབས་པའི་བཀའ་རུ་མ་བལྟས་ཤིང་བརྙས་པའོ། །བདུན་པ་ནི་དབང་གི་ཆོ་ག་མ་བྱས་པ་དང་། དཀྱིལ་འཁོར་གྱི་སྒོར་མ་ཞུགས་པ་དང་། ཞུགས་ཀྱང་དབང་བཞི་མ་རྫོགས་པ་དང་། རྫོགས་ཀྱང་ཉམས་པ་དང་། འགལ་བ་དང་། རལ་བའི་ཉེས་པ་བྱུང་བ་སོར་མ་ཚུད་པ་དང་། ཉན་རང་ལ་སོགས་སྣོད་ངན་སྨིན་གྲོལ་གྱིས་ཆོས་ཟབ་མོས་སྐྲག་བ་དང་། གསང་སྔགས་ཀྱིས་འདུལ་བའི་དུས་སྐབས་གནས་ཀྱིས་བསྐལ་བ་སྟེ། དུས་ལམ་བབ་པའི་རིགས་ལ་གསང་སྔགས་ཟབ་མོའི་དོན་དང་ལྟ་དགོངས་དང་སྤྱོད་པའི་ཚུལ་བསྒྲགས་པ་སོགས། དམིགས་གསལ་ཡིན་མོད་ཀྱི་དབང་བཞི་མ་རྫོགས་བར་རྗེས་གནང་ཙམ་གྱིས་ཆོག་པར་རློམ་པ་དང་། དེ་ལས་བཟླས་ལུང་ཡང་། གསང་བ་སྒྲོགས་པ་ལ་རིངས་ནས་ལྷ་གང་ཡིན་པ་ངོས་འཛིན་སོགས་བཀག་པ་ཡིན་ཀྱང་། འདིར་ནི་སྣོད་དུ་རུང་མིན་ལ་བརྟག་དགོས་པ་ཡིན་ནོ། །བརྒྱད་པ་ནི་གཟུགས་ཕུང་རྣམ་པར་སྣང་མཛད་དང་། རྣམ་ཤེས་མི་བསྐྱོད་པ། ཚོར་བ་རིན་འབྱུང་། འདུ་ཤེས་སྣང་མཐའ། འདུ་བྱེད་དོན་གྲུབ་ལ་སོགས་ལྔ་དང་། དེ་བཞིན་དུ་སྐྱེ་མཆེད་རྣམས་ལྷ་དང་ལྷ་མོའི་སྐུར་མི་ཤེས་པར་སྡུག་བསྔལ་གྱིས་བདེན་པའི་རང་བཞིན་དུ་བསྒྲུབ་པའི་རྟོག་གེའི་བློས་བརྙས་པ་དང་། བསྙུང་གནས་ལ་སོགས་དཀའ་ཐུབ་མཐུས་ལྷག་པར་གདུང་དུ་བཅུག་པའོ། །དགུ་པ་ནི་ཆོས་ཐམས་ཅད་ཀྱི་དབྱིངས་རང་བཞིན་གྱི་དག་པའི་སྟོང་པ་ཉིད་དོན། སངས་རྒྱས་ཁོ་ནའི་སྤྱོད་ཡུལ་ཉིད་ལས་གཞན་སེམས་ཅན་རྣམས་ཀྱི་ཁམས་དང་འབྲེལ་བ་ལྡེམ་དགོངས་སུ་ཐེ་ཚོམ་ཟོས་ནས་དེ་ལ་དཀྲི་བར་སྤངས་པའོ། །བཅུ་པ་ནི་ཕྱི་ནང་གསང་བའི་དཀོན་མཆོག་གསུམ་དང་རྩ་བ་དང་བརྒྱུད་པའི་བླ་མ་རྣམས་སྨོད་པ་དང་། མདོ་སྔགས་ཀྱི་བསྟན་པ་འཇིག་པའི་ལས་ལ་སྦྱོར་བ་སོགས་ཡིན་ཡང་རུང་སྟེ། དྲག་ཤུལ་ཆོ་གའི་མངོན་དུ་སྤྱོད་པའི་མཐུ་རྩལ་དང་ལྡན་བཞིན། གནོད་ཅིང་འཚེ་བ་སྦྱོར་བའི་ཡུལ་ལ་བསྲན་ཅིང་བཟོད་པར་བྱས་ཏེ། འདྲིས་ཤིང་མཛའ་བཤེས་བྱས་ནས་བྱམས་ཤིང་བརྩེ་བར་བྱས་པའོ། །བཅུ་གཅིག་པ་ནི། མིང་བྲལ་ཆོས་ལ་ཞེས་པ་ནི། ཀུན་རྫོབ་རྟེན་འབྲེལ་གྱིས་སྒོ་ནས་ཐ་སྙད་ཙམ་གྱིས་མིང་བཏགས་པ། ཀུན་བརྟགས་ལས་མ་འདས་ཀྱང་ཚད་མས་གཞལ་ཏེ། ཡོད་མེད་དང་རྟག་ཆད་ལ་སོགས་སུ་བསྒྲུབ་ཅིང་། ཆོས་ཀྱི་བདག་མེད་ནི། བློས་བཏགས་པ་ཙམ་དང་གཞན་བཟུང་རྒྱུའི་རྫས་འགལ་བ་བཞིན་དུ། ཕུང་པོ་ལྔ་སོགས་སྟོང་པར་བལྟ་བ་མཆོག་ཏུ་འཛིན་པའི་བློས་སྐྱེ་མེད་གྲུབ་མཐའ་རྟོག་པས་མཇལ་བའོ། །བཅུ་གཉིས་པ་ནི་སྔགས་ཀྱིས་སྣོད་དུ་རུང་བའི་གདུལ་བྱ་གང་ཡང་རུང་བའམ། དང་བའི་དད་པ། འདོད་པའི་དད་པ། ཡིད་ཆེས་ཀྱི་དད་པ་སྟེ། གསུམ་དུ་ལྡན་པ་ལ་དོན་གཉེར་བའི་ཆོས་མི་སྟོན་ཞིང་། ཆོས་ཡོན་སོགས་ལ་མ་མགུ་བའི་ཀུན་སློང་ངན་པས་གཞན་སེམས་སུན་ཕྱུང་ནས། དད་པ་དང་འདུན་པ་ལོག་ལྟར་བསྒྱུར་བ་ལ་ཕྱིན་ཅི་ལོག་ཏུ་སྐྱོགས་པའོ། །བཅུ་གསུམ་པ་ནི་སྤྱད་བྱའི་དམ་རྫས་རྣམས་རང་རྒྱུད་ཐ་མལ་དུ་བལྟས་ནས། ལ་ལ་མི་གཙང་བའི་འདུ་ཤེས་ཀྱིས་སྤོངས་ཤིང་། ལ་ལར་གཙང་ཞིང་ཞིམ་པའི་འདུ་ཤེས་ཀྱིས་སྲེད་པ་ལ། སྔགས་ཀྱི་བརྟུལ་ཞུགས་ནི། གཙང་བཙོག་དང་། བཟང་ངན་དང་བླང་དོར་སོགས་ཀྱི་དབྱེ་བ་མེད་ཅིང་མཉམ་པ་ཉིད་དུ་ལམ་དུ་ཁྱེར་དགོས་ལ། དེ་ཇི་ལྟ་བ་བཞིན་དུ་དགོངས་དོན་ཉམས་འོག་ཏུ་མ་ཆུད་ནས། གཟུང་འཛིན་དབང་གིས་མཐའ་གཉིས་ཀྱི་མལ་དུ་འཁྱམས་པའོ། །བཅུ་བཞི་པ་ནི་རྡོ་རྗེ་རྣལ་འབྱོར་མ་སོགས་འཇིག་རྟེན་ལས་འདས་པའི་མ་མོ་མཁའ་འགྲོ་ལ་སོགས་འཁོར་འདས་ཀྱི་སོ་མཚམས་འཛིན་པའི་འཇིག་རྟེན་པའི་ཚུལ་བཟུང་བ་རྣམས་དང་། འབྱུང་བ་ལྔའི་ཁམས་ནི་ཡུམ་ལྔའི་རང་བཞིན་ཡིན་པར་མ་ཤེས་པར་དེ་རང་རྒྱུད་ཐ་མལ་གྱི་ས་ཆུ་མེ་རླུང་ནམ་མཁའ་སོགས་སུ་བལྟས་ནས་འཁྲུལ་པའི་སྣང་བར་ཞེན་པ་དང་། དབང་གི་རྟེན་དུ་གྱུར་པའི་བུད་མེད་ལ་སྨོད་པའོ། །རྩ་ལྟུང་བཅུ་བཞི་སྤྱིའི་ཡན་ལག་སྡོམ་པ་གཏོང་བྱེད་ཀྱི་རྐྱེན། ཕ་མ་དངོས་མིན་ཡང་དངོས་གྲུབ་རྣམ་གཉིས་ཐོབ་པ་ལ་གེགས་སུ་ཆེ་བའི་སྦོམ་པོ་བརྒྱད་ཡོད་དེ། སྨིན་བྱེད་ཀྱི་དབང་དང་། དམ་ཚིག་དང་སྡོམ་པས་རྒྱུད་མ་སྦྱངས་པའི་ཐ་མལ་གྱི་བུད་མེད་རིག་མར་བསྟེན་པ་དང་། དེའི་བདུད་རྩི་སྟེ་རྡུལ་རང་སྟོབས་ཀྱིས་ལེན་པ་དང་། དབང་མ་ཐོབ་པའི་རིགས་དང་ལྷག་པར་མ་རྟོག་ལོག་རྟོག་ཕྱོགས་རྟོགས་རིགས་ཅན་དང་། མདོར་ན་དད་མེད་རྣམས་ལ། རང་གི་ཡི་དམ་གྱི་སྐུ་གཟུགས་དང་། གླེགས་བམ། ཕྱག་མཚན་ཕྱག་རྒྱ་སྟོན་པ་ལ་ཅང་མི་སེམས་པ་དང་། ཚོགས་ཀྱི་འཁོར་ལོའི་དུས་ན་འཐབ་རྩོད་དང་། གཞན་ཡང་ཚོགས་འཁོར་གྱི་སྐབས་སུ་ལུགས་ཟུང་ཐད་ནས། རྩོད་གླེང་དང་། བབ་ཅོལ་ད། ཀྱལ་ཀས་སྔགས་ཀྱི་བརྟུལ་ཞུགས་ཐ་མལ་ལ་སྦྱར་བ་དང་། སྣོད་ལྡན་དག་ཆོས་འདྲི་བ་ལ་ཤེས་བཞིན་དུ། ཡུལ་གྱིས་དྲིས་པའི་ལན་མི་ལྡོན་པར་དེ་ལས་འགལ་བའི་མ་ཡིན་པ་བསྙོན་དོར་པ་ལན་དུ་ལྡོན་པ་དང་། སྔགས་ཀྱི་གཞུང་དང་ལྟ་སྒོམ་སྤྱོད་པའི་གནས་ལ་བསྐུར་བ་འདེབས་ཤིང་ཉམས་སད་པའི་ཉན་ཐོས་ཀྱི་རིགས་ཅན་རྣམས་དང་། གྲུབ་མཐའ་མི་གཅིག་པའི་སེར་གཟུགས་འགོང་པོའི་ཚོགས་ཀྱི་ནང་དུ་ཞག་བདུན་ལོངས་པར་བསྡད་ཅིང་། སྔགས་རྒྱུད་ཀྱི་དེ་ཉིད་དང་ཆོ་ག་མི་ཤེས་བཞིན་དུ་རྡོ་རྗེ་འཛིན་པ་ཆེན་པོར་སྙེམས་ནས་ང་རྒྱལ་དང་། བརྫུན་རིབ་དང་འགྲོགས་ཤིང་། དབང་བསྐུར་ཇི་བཞིན་ཐོབ་ཀྱང་སྔགས་ལ་མི་དད་པའི་ཐེ་ཚོམ་ཅན་དག་ལ་སླར་ཡང་སྔགས་ཀྱི་གསང་བ་རྣམས་ཀྱང་འཆད་པའོ། །དེ་ལྟར་སྦོོམ་པོ་བརྒྱད་ཀྱི་རྣམ་གྲངས་འདི་དག་ནི་འཕགས་པ་ཀླུ་གྲུབ་ཀྱིས་བསྡུས་ཤིང་། དེ་བཞིན་སློབ་དཔོན་དཔའ་བོ་དང་། ལཀྵིཾ་ཀ་རཱས་དེ་ལ་དོན་གཞན་པ་བསྙེན་པ་དག་པར་མ་བྱས་པར་དབང་བསྐུར་གྱི་ཆོ་ག་ལ་འཇུག་པ་དང་། རབ་གནས་དང་། སྦྱིན་བསྲེག་དང་། སློབ་མ་མང་པོའི་འཁོར་ཚོགས་བསྡུ་བ་རིངས་ནས་མྱུར་དུ་བསྡུ་བའི་ཐབས་དང་གཡོ་ཟོལ་བྱེད་པ་དང་། །ཚོགས་འཁོར་ལས་གཞན་བཟའ་བཏུང་། སྤྱོད་པ་དུས་ཀྱི་ངེས་པ་མེད་ཀྱང་། ཕྱི་དྲོའི་ཁ་ཟས་ཟ་བ་སོགས། སོ་ཐར་དང་། བྱང་སེམས་ཀྱི་བཅས་པ་དགོས་པ་མེད་བཞིན་འདའ་བའི་ཉེས་པས། བདག་ཉིད་སུན་འབྱིན་ཞིང་། དངོས་གྲུབ་འཕྲོག་བའི་རྒྱུར་འགྱུར་བར་གསུངས་པའི་དོན་སྦོམ་པོ་རྣམས་ལའང་བརྟག་པར་བྱ་དགོས་སོ། །འདི་ལྟར་རྣལ་འབྱོར་རྒྱུད་དང་བླ་མེད་རྒྱུད་ཐུན་མོང་གི་ལུགས་ཀྱི་རྩ་ལྟུང་བཅུ་བཞིར་བྷ་ཝི་ལྷས་བསྡུས་བ་ཉིད་ཀུན་ལ་ཁྱབ་ཆེ་ཞིང་ཡོངས་སུ་གྲགས་པ་སྟེ། གཞན་དུ་རྒྱུད་སྡེ་བཞི་པོའི་རང་རང་གི་ལུགས་གི་དམ་ཚིག་བཅུ་བཞིའི་གྲངས་ངེས་དཔལ་དུས་ཀྱི་འཁོར་ལོ་དང་སྤྱི་རྒྱུད་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་སྡེ་ལ་སོགས་ལས་གསལ་པོར་གསུངས་པ་བཞིན་ནོ། །སྔགས་ཀྱི་རྣལ་འབྱོར་དང་ལྡན་པ་འཆིའམ་སྲོག་གཏོང་བར་ཡང་སླ་ན། རྟག་ཏུ་དབང་བཞིའི་དམ་ཚིག་བསྲུང་བར་མ་བྱས་ན། སྔགས་ལ་སྤྱོད་པའི་སྐྱེས་བུ་དེ་ཉིད་དམ་ཚིག་ཉམས་ཆགས་ཆེན་པོས་གོས་པར་གྱུར་ན་ངན་སོང་གསུམ་དང་། དེ་ལྟར་མ་ཡིན་ན་སངས་རྒྱས་ཀྱི་གོ་འཕང་གཉིས་ལས་འགྲོ་ས་གསུམ་པ་མེད་ལ། དེ་ཕྱིར་ལྟུང་བ་བྱུང་ན། བདག་ཉིད་སུན་ཕྱུང་ནས་ཕྱིར་བཅོས་པའི་ཐབས་ལ་དེ་མ་ཐག་ཏུ་འབད་དགོས་ལ། ཁྱད་པར་རྩ་ལྟུང་དང་པོ་ཤིན་ཏུ་ལྕི་བ་ཤེས་པ་ནི་གལ་ཤིན་ཏུ་ཆེ་བས་བླ་མ་བསྙེན་བཀུར་འཁོར་གསུམ་ཡོངས་སུ་དག་པ་འབུལ་ལ་དབང་བསྐུར་བསྐྱར་ནས། སྡོམ་པ་གསོར་གཞུག། བླ་མ་དང་ས་ཐག་གིས་བསྐལ་ཏེ། ཉེ་བར་མི་གནས་ན་བདག་འཇུག་ལན་མང་བླང་བ་གལ་ཆེ་ཞིང་དེ་བཞིན་དུ་གཞན་ངོ་ལ་ལྟོས་ནས་ཁྲེལ་ཡོད་དང་། རང་ངོར་ལྟོས་པའི་ངོ་ཚའི་རྟེན་ལ་བླ་མ་མེད་ན་ཡང་སྔགས་ཀྱི་སྡོམ་ལྡན་ཟུང་གང་རུང་གི་མདུན་དུ་ཕྱག་དང་སྤྱོད་ལམ་དེས་ཤིང་དུལ་བས་རང་གི་མིང་སྨོས་ནས། རྡོ་རྗེ་ཐེག་པའི་འདུལ་བ་དང་འགལ་བའི་ནོངས་པ་སློབ་དཔོན་སྨོད་པ་ལ་སོགས་འདི་དང་འདི་བྱུང་བས། ནོངས་པ་འཆབ་ན་བདག་ཉིད་བདེ་བར་གནས་པར་མི་འགྱུར་ཞིང་། འཆབ་པ་མེད་ཅེས་ལེགས་པར་གསོལ་ནས། བཤགས་ཡུལ་བླ་མའམ་སྡོམ་ལྡན་རྣམས་ཀྱིས་ཁྱོད་ཀྱིས་ནོངས་པ་ཉེས་པར་མཐོང་ངམ་དྲིས་པར། རང་གིས་མཐོང་ལགས་ཞེས་བརྗོད་ཅིང་། ཡང་ཡུལ་གྱིས་ཕྱིན་ཆད་སྡོམ་པར་བྱེད་དམ་དྲི། ཆོས་བཞིན་འདུལ་བ་བཞིན་དུ་སྤྱི་བོས་ནོད་པར་བགྱིའོ། །ཅེས་ལན་གསུམ་བརྗོད་ལ་ཐབས་ལགས་བྱའོ། །གལ་ཏེ་ཉམས་པ་བྱུང་ནས་ཕྱིར་བཅོས་འགྱངས་ན་ཞག་རེ་སོང་བཞིན། གོང་འཕེལ་དུ་འགྲོ་བར་འགྱུར་བ་དེའི་གཉེན་པོ་རུ་སྟོབས་བཞི་ཚང་བའི་ཡིག་བརྒྱས་རྟག་ཏུ་བཤགས་པ་བྱ་ཞིང་། གོང་ལྟར་རྩ་ལྟུང་བཅུ་བཞི་པོའི་བསྔོ་བགྲང་བརྗོད་པའི་བཤགས་ཚིག་འདོན་པར་བྱའོ། །ཁྱད་པར་དུ་མདོ་སྒྱུ་སེམས་གསུམ་གྱི་རིང་ལུགས་ནི། སྤྱི་མདོར་སྐུ་དང་གསུང་དང་ཐུགས་རྡོ་རྗེའི་ལུགས་ཀྱི་བསྲུང་བྱ་དང་། སྤྱད་པར་བྱ་བ་དང་། ཡིད་འོང་མི་འདོར་བ་དང་། ཤེས་པར་བྱ་བ་དང་། བསྒྲུབ་པར་བྱ་བའི་དམ་ཚིག་གི་དབྱེ་བས་ཉི་ཤུ་རྩ་བརྒྱད་དང་། སྒྱུ་འཕྲུལ་རྩ་བ་གཞུང་གི་དམ་ཚིག་རྣམ་པ་ལྔ་དང་། ཡན་ལག་རྣམ་པ་བཅུར་བཤད་པའི་རྩ་བའི་ཕྱོགས་ལ་ནི་འདི་བཞིན་ཏེ། རྡོ་རྗེ་སློབ་དཔོན་མི་སྤོང་ཞིང་བཀུར་སྟིས་བསྙེན་པ་དང་། ལྷའི་སྔགས་དང་ཕྱག་རྒྱ་སོགས་རྒྱུན་མི་གཅོད་པ་དང་། མདོ་དང་སྔགས་ཀྱི་གཞུང་ཡང་དག་པའི་ལམ་དུ་ཞུགས་པ་ལ་བརྩེ་ཞིང་བྱམས་པར་བྱེད་པ་དང་། གསང་བའི་དོན་རྣམས་མ་ལུས་པ་གཞན་སུ་ལ་ཡང་མི་བསྒྲགས་པའོ། །ཡན་ལག་གི་དམ་ཚིག་རྣམས་སྡེ་ཚན་གཉིས་སུ་བསྡུ་བ་འདི་ལྟ་སྟེ། དང་པོའི་ཕྱོགས་ནི་ཉོན་མོངས་པ་ལྔ་མི་སྤང་སྟེ། རང་བཞིན་ཤེས་པའི་ཉོན་མོངས་པ་དེ་བཞིན་ཉིད་དང་རོ་གཅིག་སྟེ། ཉོན་མོངས་པ་ཐབས་ཀྱིས་ཟིན་པས་རྨ་བྱའི་དུག་ཟོས་པ་འཚོ་བའི་མཆོག་ཏུ་འགྲོ་བ་དང་འདྲ་ཞིང་། ཡེ་ནས་རིགས་ལྔར་ཤེས་པའི་ཡེ་ཤེས་སུ་འགྱུར་ལ། གཉིས་པའི་ཕྱོགས་ནི་བདུད་རྩི་ཆེན་པོ་ལྔ་ནི་སྔགས་ཀྱིས་དམ་ཚིག་ཏུ་བླང་བྱར་ངེས་པ་ཡིན་པས་ཆོས་ཉིད་རོལ་པ་གཅིག་ཏུ་ཤེས་པས་བླང་བ་དང་། རིགས་ལྔའི་རང་བཞིན་ཉིད་དུ་ཤེས་པས་བླང་བ་དང་། དངོས་གྲུབ་བསྒྲུབ་པའི་དམ་རྫས་ཡིན་པར་ཤེས་པས་བླང་བ་དང་། མཁའ་འགྲོ་རྣམས་འདུ་ཤིང་དངོས་གྲུབ་ཉེ་བས་བླང་བ་དང་། སངས་རྒྱས་ཀུན་གྱི་བརྟུལ་ཞུགས་ཡིན་པས་བླང་བ་ཡིན་པ། དེ་སོགས་ཆ་ཤས་དབྱེ་བ་ཉིས་བརྒྱའི་གྲངས་སུ་ངེས་པ་ནི། ཉི་ཤུར་བསྡུ་བ་འདི་ནི་ཤེས་བྱ་ཀུན་གཟིགས་རོང་པ་ཆོས་ཀྱི་བཟང་པོའི་ལུགས་ཡིན་ལ། རྫོགས་ཆེན་སེམས་ཀྱི་ཕྱོགས་ཀྱི་དམ་ཚིག་ལ། མེད་པ་དང་། གཅིག་པུ་དང་། ཕྱལ་བ་དང་ནི་ལྷུན་གྲུབ་ཞེས་སུ་གྲགས་པའི་དམ་ཚིག་ལ་བསྲུང་བྱ་དང་སྲུང་བྱེད་ཀྱི་མཚམས་བྲལ་བ་ལ་འདའ་བྱ་མི་དམིགས་པས་ན། གནས་ལུགས་ཀྱིས་ངོ་བོའི་བཞུགས་ཚུལ་ལ་དམ་ཚིག་ཆིངས་ཀྱིས་བཅིངས་པ་ཡིན་ལ། ཚུལ་དེ་ལ་ཡེ་ནས་ཉམས་བྱ་དང་ཉམས་པ་མེད་པས་རྡོ་རྗེ་རྒྱལ་པོའི་ལུགས་ཞེས་པའོ། །ལམ་དུ་ཞུགས་པ་རྣམས་ཀྱིས་རང་གི་རྒྱུད་དག་པར་བྱ་བའི་ཕྱིར་དུ་དམ་ཚིག་ཉམས་ཆགས་བྱུང་ན་ཕྱིར་བཅོས་ཤིང་། རིན་ཆེན་བུམ་པ་བཟང་པོ་ལྟ་བུའི་དམ་ཚིག་རྣམ་པར་བཀོད་པ་ཞེས་བྱ་བའི་གྲུབ་མཐའ་ནི། རྩ་བའི་བླ་མའི་སྐུ་གསུང་ཐུགས་གསུམ་ལ། ཕྱི་ནང་གསང་བའི་དམ་ཚིག་གསུམ་ཚན་དུ་ཡོད་པ་ལ། སྐུའི་ཕྱིའི་དམ་ཚིག་གསུམ་ནི། སྲོག་གཅོད་པ་མི་ཚངས་སྤྱོད་པ་དང་། བརྐུ་བ་དང་གསུམ་སྤང་ཞིང་། སྐུའི་ནང་གི་གསུམ་ནི། ཕ་མ་དང་། སྤུན་སྲིང་དང་། རང་ལུས་ཀྱི་ཆོས་གང་ཡང་སྨོད་པ་དང་གསུམ། གསང་བ་གསུམ་ནི། གྲིབ་མ་འགོམ་པ། ཡུམ་གཙེས་པ། སྤུན་སྲིང་ལ་བརྡེག་པའོ། །གསུང་གི་ཕྱིའི་གསུམ་ལ་ནི། རྫུན་དང་། ཕྲ་མ། ཚིག་རྩུབ་སྤང་ཞིང་། གསུང་གི་ནང་གི་གསུམ་ནི། ཆོས་སྨྲ་དང་། དོན་སེམས་པ་དང། གནས་ལུགས་བསྒོམ་པ་མི་བཀུར་བ་དང་། གསུང་གི་གསང་བ་གསུམ་ནི། བླ་མའི་ཡུམ་དང་། སྤུན་སྲིང་གི་ཚིག་ལ་མི་བརྙས་པའོ། །ཐུགས་ཀྱི་ཕྱིའི་གསུམ་ལ། ཡིད་ཀྱི་བརྣབ་སེམས་དང་། གནོད་སེམས་དང་། ལོག་ལྟ་སྟེ། རྣམ་པ་གསུམ་དང་། ཐུགས་ཀྱི་ནང་གི་གསུམ་ནི། སྤྱོད་པ་དང་། བ་སྒོམ་པ་དང་། ལྟ་བ་ལོག་པ་སྤང་བ་དང་། ཐུགས་ཀྱི་གསང་བ་གསུམ་ནི། བླ་མ་དང་། ཡི་དམ་གྱི་ལྷ་དང་མཆེད་དང་ལྕམ་དྲལ་ཐམས་ཅད་ལྟ་སྒོམ་སོ་སོ་མ་ཡིན་གཅིག་ཏུ་ཐུན་ཀུན་སེམས་པའོ། །ཐབས་ཀྱི་དབང་དུ་གྱུར་པ་ཡན་ལག་གི་དམ་ཚིག་ཉི་ཤུ་རྩ་ལྔ་ནི། ཏ་ན་ཞེས་སྒྲོལ་བ་དང་། ག་ན་སྦྱོར་བ་དང་། གཟུངས་མ་དང་། ཐོད་པ་མཚན་ལྡན་སོགས་མ་བྱིན་པར་ལེན་པ་དང་། གཞན་ལ་ཕན་པའི་ཕྱིར་རྫུན་སྨྲ་བ་དང་། གཞན་གྱི་ངན་སེམས་རྒྱུན་གཅོད་པའི་ཕྱིར་ཀྱལ་བའི་ཚིག་སྨྲ་བ་སོགས། སྤྱད་པར་བྱ་བའི་དམ་ཚིག་ལྔ་ནི་གནང་བཀག་གི་མཚམས་ཤེས་པས་སྤྱོད་པ་དང་། འདོད་ཆགས་ཞེ་སྡང་ལ་སོགས་ཉོན་མོངས་ལྔ་ནི། མི་སྤང་བ་ལྔ་ཡིན་པས་ཐ་མལ་པ་རང་རྒྱུད་པ་བྲལ་ནས་བརྟེན་པར་བྱའོ། །དྲི་ཆེན་དང་། དྲི་ཆུ་དང་། མཾ་ས་དང་། རཀྟ་དང་། རྡོ་རྗེའི་ཟིལ་བ་སྟེ། དང་དུ་ལེན་པའི་དམ་ཚིག་ལྔ་ལ་གཙང་སྨེ་དང་གཉིས་འཛིན་གྱི་རྟོག་པ་འདྲལ་དགོས་པའོ། །ཕུང་པོ་ལྔ་དང་། འབྱུང་བ་ལྔ་དང་། ཡུལ་ལྔ་དང་། དབང་པོ་ལྔ་དང་། ཁ་དོག་ལྔ། རྣམས་ལྷར་ཤེས་པར་བྱ་དགོས་པ་ལྔ་ནི། ཤེས་རབ་ཀྱི་སྟོབས་ཀྱིས་སྤྱོད་དགོས་པའོ། །རྡོ་རྗེ་དང་། རིན་ཆེན་དང་། པདྨ་དང་། ལས་དང་། དེ་བཞིན་ཉིད་དེ་བསྒྲུབ་བྱ་ལྔ་ནི། རང་རང་གི་དོན་རྟོགས་ཤིང་གོམས་པའི་མཐུས་བསྒྲུབ་དགོས་པ་སྟེ། འདི་དག་ནི་དམ་ཚིག་གསལ་བཀྲའི་དགོངས་པ་ཇི་བཞིན་པ་སྟེ། དེ་བཞིན་དུ་དཔལ་དུས་ཀྱི་འཁོར་ལོའི་བརྟུལ་ཞུགས་ཉི་ཤུ་རྩ་ལྔ་ནི། དཔལ་གསང་བ་འདུས་པ་དང་། སངས་རྒྱས་མཉམ་སྦྱོར། ཟླ་གསང་ཐིག་ལེ་ལ་སོགས་པ་སྔོན་ཆད་དང་། ཕྱིན་ཆད་འགྱུར་བའི་རྒྱུད་སྡེའི་སྤྱི་དོན་དུ་གྱུར་པ། རིགས་ལྔའི་སྡོམ་པ་ལ། སངས་རྒྱས་རྣལ་འབྱོར་དུ་བྱ་བ་དང་། སྨོན་པ་དང་། འཇུག་པ་སྟེ། ཚུལ་ཁྲིམས་རྣམ་པ་གསུམ། མི་བསྐྱོད་པའི་དམ་ཚིག་ཏུ། རྡོ་རྗེ་དང་། དྲིལ་བུ་དང་། ཕྱག་རྒྱ་དང་། བླ་མ་རྣམས་བཟུང་བ་དང་། རིན་འབྱུང་གི་དམ་ཚིག་ཏུ། ཆོས་དང་། ནོར་དང་། མི་འཇིགས་པ་དང་། བྱམས་པ་སྟེ། སྦྱིན་པ་རྣམ་བཞི་སྦྱིན་དང་སྣང་མཐའི་དམ་ཚིག་ཏུ། ཕྱི་སོ་སོར་ཐར་པ་དང་། ནང་བྱང་ཆུབ་སེམས་དཔའ་དང་། གསང་བ་སྔགས་ཀྱི་ཐེག་པ་གསུམ་གྱི་དམ་ཚིག་རིམ་པ་འཛིན་ཞིང་དེ་དག་གི་ཆོས་རྣམས་བཤད་པ་དང་། དོན་འགྲུབ་ཀྱི་དམ་ཚིག་ཏུ། རྒྱལ་བ་སྲས་བཅས་ལ་མཆོད་ཅིང་། བསྟོད་བསྔགས་བརྗོད་པ་དང་། ཕྲིན་ལས་ཀུན་ལ་གུས་པའོ། །ཁྱད་པར་གསང་སྔགས་བླ་ན་མེད་པ་རིགས་ལྔའི་སྡོམ་པ་ནི། རྡོ་རྗེའི་རིགས་གྱུར་སྲོག་ལ་འཚེ་བ་ལ་སོགས་པ་ལའང་། བསྒྲལ་བའི་ཞིང་བཅུ་དང་། ཉམས་པ་བདུན་སོགས་བསྒྲལ་བྱ་ཡིན་ལ། དེ་ལས་གཞན་དབུ་མར་ལས་རླུང་དང་། དེས་བསྐྱེད་པའི་ཉོན་མོངས་པ་བརྒྱད་ཁྲི་བཞི་སྟོང་གི་ཀུན་ཏུ་རྟོག་པ་གསོད་པའོ། །རིན་ཆེན་རིགས་ལ་མ་བྱིན་པ་བླང་བྱ་ནི། མཚན་ལྡན་གཟུངས་མ་དང་སྐལ་མེད་སྐྱེ་བོའི་ལག་ན་ཡོད་པའི་ཐོད་པ་མཚན་ལྡན་སོགས་སྔགས་ལ་མཁོ་བའི་ནོར་དང་ཡོ་བྱད་བཅས་ཁྱད་པར་དུ་རྫོགས་པའི་བྱང་ཆུབ་རང་སྟོབས་མཐུ་ཡིས་བླང་བ་དང་། པདྨའི་རིགས་ལ་གཟུངས་མ་རི་དྭགས་མིག་ཅན་མཆོད་པ་དང་། སྟོད་པ་ཉིད་ཀྱི་བུད་མེད་ཞེས་རང་གི་སེམསཀྱི་གནས་ལུགས་མི་བསྒོམ་བར་ངང་ལ་འཇོག་པ་ལ་ཀུན་ཏུ་སྤྱོད་ཅེས་ཐ་སྙད་བཏགས་པ་ཡིན་ལ། ཆོས་ཀྱི་ཕྱག་རྒྱ་ནི། རིག་ལྔ་གང་རུང་གི་སྔགས་འཁོར་དང་འོད་ཟེར་སྤྲོ་བསྡུ་དང་། སྔགས་ལ་བརྩོན་པ་དང་། དམ་ཚིག་གི་ཕྱག་རྒྱ་ནི། རིགས་ལྔ་གང་ཡིན་གྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་ཀྱི་མཛད་པ་དང་བསྲུང་སྡོམ་སོགས་གཞུང་བཞིན་བྱེད་པ་དང་། ཕྱག་རྒྱ་ཆེན་པོ་ནི། རིགས་ལྔ་གང་རུང་གི་སྐུ་མདོག་ཕྱག་མཚན་ཆ་ལུགས་བཅས་མ་འདྲེས་ཡོངས་རྫོགས་སུ་གསལ་བ་མེ་ལོང་དུ་གཟུགས་བརྙན་ཤར་བ་ལྟར་བསྒོམ་ཞིང་བརྟེན་པའོ། །དེ་ཡང་འཁོར་ལོའི་རིགས་ལ་སྟེ། དེ་བཞིན་གཤེགས་བའི་རིགས་རྫས་དང་། ཚོགས་དྲུག་གི་ཡུལ་རྣམས་ཀྱི་འདོད་པའི་ཡོན་ཏན་ལྔ་པོ་སྒྱུ་མ་དང་རྨི་ལམ་ལྟ་བུར་སྤྱོད་པ་དང་། ལས་ཀྱི་རིགས་ལ་རྫུན་ཚིག་སྒྱུ་མ་ལྟ་བུར་སྒྲོགས་པ་ཞེས་པའོ། །དེའི་ཡན་ལག་མངོན་གྱུར་དུ་མ་བསྒྲགས་ཤིང་ཚིག་གི་གབ་པ་ནི། མ་བསྒྲལ་བསྒྲལ་དང་མ་གྲོོལ་གྲོལ། དབུགས་དབྱུང་མྱ་ངན་འདས་ལ་འགོད་ཅེས་སོགས་བྱང་ཆུབ་སེམས་དཔའི་ས་དང་ཐུན་མོང་ལ། ལྷ་དང་ལྷ་མིན་ཞེས་པ་ཡེ་ཤེས་པ་དང་འཇིག་རྟེན་པའི་ཚོགས་ཕལ་མོ་ཆེ་ཡིན་ཞིང་གསང་བ་པ་གནོན་སྦྱིན་དང་ནོར་ལྷའི་རིགས་དང་། གཞན་ཡང་ཕན་འདོགས་ནུས་པའི་རིགས་གང་ལ་ཡང་མི་བརྙས་ཤིང་། ཕྱག་རྒྱ་ཞེས་ལག་པས་བཅས་པའི་ཕྱག་རྒྱའི་གཟུགས་བརྙན་དང་། བཞོན་པ་ནི་བླ་མའི་ཆིབས་པ་དང་། ལྷའི་ཕྱག་མཚན་གྱི་རིགས་གྱུར་མཚོན་ཆ་དང་། མཚན་མ་བཀོད་པ་ལ་སོགས་ལ་འགོམ་ཡུག་དང་སྨད་པར་མི་བྱ་བ་གཉིས་ནི་དངོས་སུ་བསྟན་པ་སྟེ། གསང་བ་གནོད་སྦྱིན་དང་ཕྱག་རྒྱའི་སྐུའི་གཟུགས་བརྙན་རྫོགས་པ་དང་དེའི་ཕྱག་རྒྱ་བཅའ་བའོ། །བཞོན་པ་བླ་མའི་སྟན་དང་ཆིབས་པ་ལ་སོགས་དང་མཚོན་ཆ་ལྷའི་ཕྱག་མཚན་ཆེད་དུ་བྱས་པའི་རིགས་དང་། མཚན་མ་དང་ཕྱག་མཚན་དང་། ལྷ་དང་། བླ་མ་དང་། མཆོད་རྟེན་གྲིབ་མ་སོགས་འགོམ་པ་ལ་སྨད་པའི་སྒྲ་ཞུགས་པའོ། །དེ་བཞིན་མཆོད་རྫས་རྙིང་པའི་རིགས་ལ་དམན་པར་གྲགས་ཤིང་ཕྱག་མཚན་གྱི་རྣམ་བར་བཅོས་པ་གང་ཡང་བཟའ་བར་མི་རུང་ཞིང་བཀག་པ་ཡིན་ནོ། །ཁྱད་པར་དུ་གསོད་པ་དང་མ་བྱིན་ལེན་པ་སོགས་དངོས་བསྟན་ཉིད་དང་། དགོངས་པ་ལུང་སྟོན་གྱི་ཚུལ་དུ་གསུང་པའི་རྣམ་པ་དབྱེ་བ་མ་ཕྱེད་པའི་སྔགས་པ་ངན་སོང་གསུམ་དུ་ཐུར་ལ་ལྟུང་བར་འགྱུར་ཞིང་། མདོར་ན་གབ་པའི་གསང་བ་རྣམས་མ་རྟོགས་པར་སྦས་པའི་གསང་བར་མངོན་དུ་འཆེལ་ཞིང་ཀུན་ལ་གཟུར་ཞེས་མངོན་དུ་བསྒྲགས་པའོ། །དེ་ཡངཉིན་བཞིན་བྲམ་ཟེ་གསོད་པ་ནི་སྡིག་པའི་ཆེ་ཤོས་ཏེ། དེ་དང་མཚམས་མེད་ལྔ་ལ་སྤྱོད་པ་རྣམས་ཀྱང་། སྔགས་ཀྱི་སྡོམ་པ་སྐྱེ་བའི་རྟེན་དུ་རུང་བས་ན་གསང་སྔགས་ཐབས་མང་བ་དང་ཐབས་ཀྱི་ཆེ་བ་ནི་སྨོས་ཅི་དགོས་ཏེ་མ་སྨོས་ཀྱང་ལོས་ཤེས། སྔོན་གྱི་དམ་ཚིག་རྣམས་ངོ་མི་ཤེས་པ་དང་། དེ་བཞིན་དུ་བསྲུང་མཚམས་མི་ཤེས་ཤིང་བླ་མར་མི་གུས་པ་དང་། རྩིང་སྤྱོད་བག་མེད་ལ་གོམས་པ་ཞེས་མ་དུལ་བས་ཉོན་མོངས་པ་མཐུ་ཆེ་བ་དང་བཞི་སྟེ། ལྟུང་བ་འབྱུང་བའི་སྒོ་བཞི་ཡིན་ལ། དེའི་སྟེང་དུ་བརྗེད་ངེས་ཆེ་བ་དང་། དྲན་པ་མི་གསལ་བ། བསྣན་པ་དམ་ཚིག་ཉམས་པའི་རྒྱུ་དྲུག་ཡིན་ཞིང་། དེ་བས་དྲན་པ་དང་། ཤེས་བཞིན་དང་གཉེན་པོས་ཟིན་པས་ལོང་བ་དབྱེ་བའི་གནས་སྐབས་ཐོབ་པའི་ཚེ། བག་ཡོད་ཀྱིས་འགུལ་སྐྱོད་སོགས་བསྲུང་བ་ཇི་བཞིན་ཉིད་མཚན་ཐུན་དྲུག་ཏུ་སྤང་བླང་གི་གནས་ལ་བསྒྲིམ་ཤིང་བརྩོན་པས་དཔྱད་པ་གལ་ཆེ་ཞིང་། ཉམས་ན་གསོ་བའང་ཐེག་པ་འོག་མ་ལས་འཕགས་སྟེ། ཉན་ཐོས་པའི་སྡོམ་ཁྲིམས་ནི་འཆབ་སེམས་མ་སྐྱེས་ན། ལན་བདུན་དུ་གསོལ་ཡོད་པར་གསུངས་ཤིང་སྤེད་པར་བྱེད་ཅིང་འཆབ་པ་བཅས་ན་ལན་གཅིག་ཀྱང་གསོ་བའི་ཡུལ་མེད་དེ་རྫ་བེའུ་ཆག་པ་བཞིན་ཡིན་ལ། བྱང་ཆུབ་སེམས་དཔའི་སྡོམ་པ་ཉམས་པར་གྱུར་ཡང་། རིན་ཆེན་ལས་བྱས་ཉེར་སྤྱད་ཆག་པ་དང་འདྲ་སྟེ། གཞན་གྱི་རྐྱེན་དགེ་བའི་བཤེས་གཉེན་ལ་བརྟེན་ནས་གསོ་རུང་བའི་འཕགས་པ་ཡིན་ལ། གསང་སྔགས་ཀྱི་སྡོམ་པ་ནི་རིན་ཆེན་གྱི་སྣོད་ཞོམ་པ་ལྟར་རང་གི་སྟོབས་མཐུས་གསོ་རུ་བྱར་ཡོད་པ་ཡང་། བླ་མ་དང་རྡོ་རྗེ་སྤུན་གྲོགས་ལ་བརྙེས་པ་ཤོར་ན་འཕྲལ་དུ་ཚོགས་ཀྱི་འཁོར་ལོ་ལ་སོགས་པས་མཉེས་པར་བྱས་ན་ཉམས་ཆགས་བསྐོང་བར་འགྱུར་རོ། །གསུང་གི་ཐ་ཚིག་ཉམས་ན་རྡོ་རྗེ་ཆོས་སམ་རྡོ་རྗེ་སེམས་དཔའ་བསྒོམ་ལ་སྙིང་པོའམ་ཡིག་བརྒྱ་འབུམ་ཐེར་གདོན་པར་བྱའོ། །ཐུགས་ཀྱི་དམ་ཚིག་ལས་ཉམས་པར་གྱུར་ན་རྡོ་རྗེའི་བཟླས་པ་སོགས་ལ་བརྩོན་བཞིན་ལོ་གསུམ་སྨྲ་བ་བཅད་ལ། རྩེ་གཅིག་ཏུ་མཉམ་པར་བཞག་པ་གསོ་བའི་ཐབས་མཆོག་ཡིན་ལ། ཉིན་མཚན་ཐུན་དྲུག་ཆ་ལས་ཐལ་ན་ཐུན་ཚོད་འདས་བའི་མཚམས་སོགས་ལ། འགལ་དང་། ཉམས་དང་། འདས་དང་། རལ་པ་ཞེས་པ་རྣམས་རིམ་བཞིན་དུ། ཞག་དང་། ཟླ་བ་དང་། ལོ་གཅིག་དང་ལོ་གཉིས་ལས་འདས་པ་གསོ་བར་རུང་སྟེ། དེ་ཡང་ཕྱི་མ་ལྕི་ཞིང་། ལོ་གསུམ་འདས་པར་གྱུར་ན་གསོ་བར་རུང་བ་མ་ཡིན་ལ། རིམ་པ་བཞིན་དུ། འགལ་ན་ཚོགས་ཀྱི་འཁོར་ལོ་དང་། ཉམས་པར་གྱུར་ན་བདོག་དགུ་སྤོང་དག་བྱས་ནས་ཕུལ་བས་བསྐོང་ཞིང་། འདས་ན་བུ་ཆུང་དང་མ་ནོར་གྱི་དབྱིག་ལ་སོགས་པ་ཕུལ་ནས་བཤགས་ཤིང་སྐོང་ན་ཉམས་ཆགས་དག་པ་དང་། རལ་ན་བླ་མའི་སྐུ་གླུད་དུ་རང་གི་ལུས་སྲོག་གི་བྱས་ཏེ་བཤགས་ན་གསོ་ཐུབ་པའི་རྣམ་བཞག་འདི་རྣམས་རྡོ་རྗེ་ཉི་མ་རྣམ་པར་བཀོད་པའི་རྒྱུད་ལས་གསུངས་པའོ། །གཞན་ཡང་དབང་བཞི་བསྐྱར་ནས་ཞུས་པ་དང་། བདག་འཇུག་མང་དུ་བླང་བ་གལ་ཆེ་ཞིང་། བསྐྱེད་རིམ་དང་རྫོགས་རིམ་དང་། བསྙེན་བསྒྲུབ་དང་བཟླས་བརྗོད་དང་། འཕོ་མད་ཀྱི་ཚུལ་ཁྲིམས་ཞེས་ཐིག་ལེ་འཛག་མེད་དུ་བསྲུང་བ་ལ་ཐིག་ལེའི་རྣལ་འབྱོར་དང་། གཞན་ཡང་སྦྱིན་སྲེག་དང་། གཏོར་མ་གཏོང་བ་དང་། ངན་སོང་གསུམ་གྱི་སྡིག་སྒྲིབ་དྲལ་བའི་སྔགས་དང་ཕྱག་རྒྱ་སོགས་ཀྱིས་བཀྲུ་བ་དང་གཏུམ་མོས་བསྲེག་ཅིང་། དགེ་འདུན་འདུས་པའི་ཚོགས་སམ་རྟེན་གསུམ་གྱི་དྲུངདུ་རང་གིས་ཉེས་པ་བསྒྲག་ཅིང་འཆི་ངེས་པའི་སེམས་ཅན་གྱི་སྲོག་བསླུ་བ་དང་། གསུང་རབ་བཀླག་པ་དང་། ཡིག་བརྒྱ་བཟླ་བ། མཎྜལ་གང་ནུས་འབུལ་བ། ཡན་ལག་བདུན་པ་དང་། མཆོད་རྟེན་བཞེངས་པ་ལ་སོགས་བཤགས་པའི་རིགས་པ་ཐབས་ཀྱིས་ཤེས་པར་བྱ་བའོ། །དེ་ཡང་དམིགས་བཅས་ཀྱི་ཉེས་ལྟུང་ཀུན་ལ་འགྱོད་སེམས་སྐྱེས་པ་ལྷག་པར་གཅེས་ཏེ། ཉེས་ལྟུང་ཅི་བྱས་མ་བཤགས་ན་ཅི་མི་སྙམ་དུ་བསྐྱུར་ན། ཚེ་འདིར་བདེ་ལེགས་དང་ཡོན་ཏན་གྱི་ཚོགས་རྣམས་འགྲིབ་པར་འགྱུར་ཞིང་སྡུག་བསྔལ་དོ་ཟླ་མེད་པའི་རྡོ་རྗེ་དམྱལ་བའི་གནས་སུ་ལྟུང་བ་ཡིན། དམ་ཚིག་དང་ལྡན་པ་དག་སྐྱེ་བ་བཅུ་དྲུག་གམ། མྱུར་ན་ཚེ་འདིའམ། འཆི་ཁ་བར་དོར། ཐུན་མོང་གི་དངོས་གྲུབ། གྲུབ་པ་བརྒྱད་ཐོབ་པ་ཡང་མཁའ་སྤྱོད་ནི་མཁའ་ལ་གནས་ནུས་ཤིང་འཆི་བ་མེད་དོ། །རལ་གྲི་ནི་ཕ་རོལ་ནས་རྒྱལ་བར་བྱེད་པའོ། །རིལ་བུ་གང་དག་བསྒྲུབ་པ་ལག་ཏུ་ཐོགས་པས་ལུས་མི་སྣང་བའོ། །རྐང་མགྱོགས་ནི་མཆིལ་ལྷམ་གྲུབ་སྟེ་གྱོན་པས་ཡུད་ཙམ་ལ་རྒྱ་མཚོའི་མཐའ་ཡང་འཁོར་བའོ། །བུམ་པ་ནི་དེའི་ནང་དུ་ཟད་མེ་ཤེས་པའི་འདོད་དགུའི་གཏེར་འབྱུང་བའོ། །གནོད་སྦྱིན་གྱི་ཁོལ་པོ་ནི་དེ་བྲན་དུ་བྱས་ནས་ཅི་དགོས་པ་གྲུབ་ཅིང་མི་འབུམ་ཕྲག་གིས་བསྒྲུབ་དགོས་པའི་ལས། ཉིན་གཅིག་ལ་ཟིན་པ་རྒྱལ་པོ་མྱ་ངན་མེད་ཀྱི་ཙཻ་ཏྱཾ་སྟེ། མཆོད་རྟེན་བྱེ་བ་ནུབ་གཅིག་ལ་བཞེངས་པ་ལྟ་བུའོ། །བཅུད་ལེན་ནི་ཉི་ཟླའི་ཚེ་གླང་པོ་ཆེའི་སྟོབས་པདྨའི་མདངས་ལྡན་ཞིང་། ལྡང་བ་ན་ཤིང་བལ་ལས་ཡང་བ་སློབ་དཔོན་པདྨ་ལྟ་བུ་སྐྱེ་འཆི་མེད་པའི་སྐུ་བརྙེས་ཤིང་དབང་ཕྱུག་བརྒྱད་དང་ལྡན་པའི་མཁའ་ལ་སྤྱོད་སྟོབས་མང་ཡུལ་གྱི་རི་བོ་དཔལ་འབར་ཕན་ཚུན་བརྗེ་ལྟ་བུའོ། །མིག་སྨན་ནི་མིག་ལ་སྨན་བྱུགས་ནས་ས་འོག་གཏེར་མཐོང་བ་ཁྱིམ་བདག་མགོན་མེད་ཟས་སྦྱིན་དང་། ཁྱད་པར་དུ་ཡང་ས་དང་པོ་ནས་བདུན་པའི་བར་ལ་དབང་བཅུ་ཕྱི་ལྟར་ཡོད་དེ། ཚེ་ལ་དབང་བས་བསྐལ་པ་ཅི་ཙམ་འདོད་པར་གནས་པ་དང་། སེམས་ལ་དབང་བས་ཏིང་ངེ་འཛིན་དཔག་ཏུ་མེད་པ་ལ་སྐད་གཅིག་རེ་རེར་མཉམ་པར་འཇོག་པ་དང་། ཡོ་བྱད་ལ་དབང་བས་བསམ་པ་ཙམ་གྱིས་འཇིག་རྟེན་དུ་ཟས་ནོར་སྣ་ཚོགས་པས་གང་བར་ནུས་པ་དང་། ལས་ལ་དབང་བས་བཟོ་དང་ལས་ཀྱི་གནས་སྐབས་ཐམས་ཅད་ལ་ཇི་ལྟར་འདོད་པ་བཞིན་སྤྱོད་པ་དང་། སྐྱེ་བ་ལ་དབང་བས་ལྷ་དང་མིའི་གནས་གང་འདོད་དུ་སྐྱེ་བ་དང་། མོས་པ་ལ་དབང་བས་ས་གཞི་ཐམས་ཅད་རིན་པོ་ཆེ་སྣ་ཚོགས་སུ་བསྒྱུར་བ་ལ་སོགས་མདོར་ན་དངོས་པོ་ཐམས་ཅད་ཇི་ལྟར་འདོད་པ་སེམས་ཅན་སྤྱིའི་སྣང་དོར་མཐུན་སྣང་གྲུབ་པར་བསྒྱུར་བ་དཔེར་ན་སློབ་དཔོན་སངས་རྒྱས་གཉིས་པས་བསམ་ཡས་ཀྱི་གསག་མ་ནིའུ་སེང་དུ་བསྒྱུར་ནས་ཀུན་གྱི་ལོངས་སྤྱོད་དུ་རུང་བ་ལྟར་དང་། སྨོན་ལམ་ལ་དབང་བས་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་གང་བ་ལ་སོགས་ཇི་ལྟར་སྨོན་པ་བཞིན་འགྲུབ་པ་དང་། རྫུ་འཕྲུལ་ལ་དབང་བའི་ཞིང་ཁམས་དཔག་ཏུ་མེད་པ་སྐྲ་རྩེ་གཅིག་གིས་ནམ་མཁར་འཛིན་པ་ལ་སོགས་གང་འདོད་དུ་སྤྲུལ་ནུས་པ་དང་། ཡེ་ཤེས་ལ་དབང་བས་ཤེས་བྱ་གང་ཤེས་པར་འདོད་པ་དེ་ཤེས་པ་དང་། ཆོས་ལ་དབང་བ་ནི་ཆོས་ཐམས་ཅད་ཀྱི་མིང་དང་དོན་རྣམ་པར་བཞག་པ་ལ་མཁས་པའོ། །དེ་ཡང་དབང་བཅུ་ཕུལ་བྱུང་ནི་དག་པ་ས་གསུམ་ནས་ཡོད་པས་ནང་དུ་བཞག་ལ། དེ་ཉིད་ཀྱི་རྒྱུན་མཐར་འོད་ཟེར་ཆེན་པོའི་དབང་བསྐུར་བ་ཡོད་པའི་ཚུལ་མདོ་སྡེ་དཀོན་མཆོག་སྤྲིན་ལས། བྱང་ཆུབ་སེམས་དཔའ་ས་ཆེན་པོར་ཐོབ་པ་འོད་ཟེར་གྱི་སྤྲིན་ཆེན་པོའི་དབང་བསྐུར་བས་དབང་བཅུ་ཐོབ་པ་ཤ་སྟག་ཏུ་གྱུར་ཏེ། དེའི་དོན་ནི་མ་དག་ས་བདུན་མན་ཆད་བགྲོད་པ་མན་ཆད་ནང་དབང་དུ་མ་བཞག་ཅིང་ས་གསུམ་ནས་བརྩིས་པའི་ས་བཅུ་ཆོས་ཀྱི་སྤྲིན་རྫོགས་ཚེ། ནང་གི་དབང་བཅུ་ཐོབ་པ་དང་། དབང་བཅུ་ཤིན་ཏུ་རྣམ་དག་ནི་སངས་རྒྱས་ཀྱི་ས་ན་ཡོད་པའོ། །དེ་ལྟར་གཉིས་པོ་དང་དབང་ཕྱུག་བརྒྱད་ཀྱི། དང་པོ་ཕྲ་བ་ནི་འཁོར་འདས་ཀྱི་ཆོས་ཐམས་ཅད་དབུ་མའི་རང་བཞིན་དུ་མཐོང་བའོ། །ཡང་བ་ནི་ཡེ་ཤེས་ཀྱི་རླུང་སྟེ། དེའི་སྟོབས་ཀྱི་མཁའ་ཁྱབ་ཀྱི་འཇིག་རྟེན་གྱི་ཁམས་སུ་རྫུ་འཕྲུལ་གྱིས་སྐད་ཅིག་ཙམ་ལ་འགྲོ་བ་དང་། བལྟ་བར་ནུས་པའོ། །ཕྲ་བར་ནུས་པ་ནི། དབུ་མར་རླུང་སེམས་ཞུགས་པའི་བདག་གཞན་མཐའ་དག་སྟོང་པ་ཉིད་དུ་ཐིམ་པར་རྟོགས་པས་གཉིས་སྣང་ནུབ་པའོ། །སྤྱོད་པར་ནུས་པ་ནི། ནང་གི་བཙུན་མོ་ནི་དབུ་མ་ཡིན་པས་རླུང་སེམས་ཞུགས་པའི་རྟེན་འབྲེལ་གྱིས་ཕྱི་རོལ་དུ་གཟུགས་རྡོ་རྗེའི་བདག་ཉིད་ཅན་ལ་སོགས་པ་ཟག་མེད་ཀྱི་འདོད་ཡོན་ལྔ་ལ་སྤྱོད་པའོ། །བདག་ཉིད་ཆེན་པོ་ནི་མཚན་དཔེ་འབར་བ་ལ་སོགས་པ་དང་། བདུད་བཞི་ལས་རྣམ་པར་རྒྱལ་བ་དང་། མཐུ་སྟོབས་ཀྱི་བདག་པོར་གྱུར་བའོ། །དགའ་མགུར་བྱེད་པ་ནི། འགྲོ་བ་རྣམས་ལ་ཇི་ལྟར་འདོད་པའི་སྐུ་དང་གསུང་ལ་སོགས་པའི་རྣམ་པར་འཕྲུལ་བ་སྣ་ཚོགས་བསྟན་ནས་བསམ་པ་ཚིམ་པར་བྱེད་ནུས་པའོ། །ཐམས་ཅད་དབང་དུ་གྱུར་པ་ནི། སེམས་ཅན་རྣམས་ཚོགས་གཉིས་རྫོགས་པའི་གོ་འཕང་ལ་འགོད་ནུས་པས་གཞན་དོན་དུ་མི་འགྱུར་བ་སྐད་ཅིག་ཀྱང་མེད་པའོ། །ཅི་འདོད་བྱེད་པ་ནི། རང་གཞན་གཉིས་ཀའི་དོན་དུ་གནམ་རྡོ་ལྷུང་བ་དང་། རྒྱ་མཚོ་འཁྲུགས་པའི་སྒྲ་དང། གཅིག་ལས་དུ་མ་དང་། དུ་མ་ལས་གཅིག་ཏུ་བྱེད་པ་ལ་སོགས་པའི་རྫུ་འཕྲུལ་ལ་དབང་ཐོབ་པའོ། །དེ་ཀུན་ཀྱང་རང་རང་གི་བཞེད་པ་ཙམ་ལ་རག་ལས་པ་ཡིན་པས་ཟག་མེད་ཀྱི་ཡོན་ཏན་མ་ལུས་པ་ལ་དབང་འབྱོར་བའི་ཕྱིར་དབང་ཕྱུག་དང་ལྡན་པ་ཞེས་བྱའོ། །དེ་ལྟར་བརྒྱད་པོ་དང་རྣམ་པར་སྨིན་པའི་རིག་འཛིན་དང་། ཚེ་ལ་དབང་བའི་རིག་འཛིན་དང་། ཕྱག་རྒྱ་ཆེན་པོའི་དང་། ལྷུན་གྱིས་གྲུབ་པའི་རིག་འཛིན་དང་། རིག་འཛིན་རྣམ་པ་བཞི་ཐོབ་པར་འགྱུར་ཞིང་མཆོག་གི་དངོས་གྲུབ་ཁ་སྦྱོར་ཡན་ལག་བདུན་ནི། སྐུ་རྣམ་པ་ཐམས་ཅད་པ་ཤེས་བྱའི་སྣང་བརྙན་ཡོད་དགུ་འཆར་བ་ནི་ཁ་སྦྱོར་དང། གསུང་རྣམ་པར་དག་པ་སྒྲིབ་པ་དང་བྲལ་བ་ནི་ལོངས་སྤྱོད་རྫོགས་པ་དང་། ཐུགས་རྣམ་པར་དག་པ་ཐམས་ཅད་པ་གཟུང་འཛིན་གྱི་རྟོག་པ་ལས་གྲོལ་ཞིང་འགྱུར་བ་མེད་པའི་བདེ་ཆེན་ལ་རོལ་པ་དང་། དེ་ཡང་རང་བཞིན་མེད་པ་སྟེ་མེད་དགག་གི་མཐའ་ལས་གྲོལ་བའི་སོ་སོར་རང་རིག་པ་མཚན་ཉིད་ཅན་བཞིས་རང་དོན་ཕུན་སུམ་ཚོགས་པ་དང་སྙིང་རྗེས་ཡོངས་སུ་གང་བ་ལས་ཡིད་བཞིན་གྱི་ནོར་བུའམ། དཔག་བསམ་གྱི་ཤིང་ལྟར་གཞན་དོན་འབད་མེད་དུ་འབྱུང་བ་དམིགས་པ་མེད་པའི་ཐུགས་རྗེ་དང་། ཐུགས་རྗེ་ཆེན་པོ་དེ་ཉིད་ནམ་ཡང་རྒྱུན་ཆད་མེད་པས་རྟག་པ་དང་། གདུལ་བྱའི་མོས་པ་དང་། དབང་པོ་ལ་འཚམས་པའི་གཟུགས་སྐུའི་སྣང་བརྙན་དང་། ཆོས་ཀྱི་སྒོ་མཐའ་ཡས་ལ་ནམ་ཡང་འགོག་པ་མེད་པར་འཆར་བ་དང་གསུམ་གྱིས་གཞན་དོན་ཕུན་སུམ་ཚོགས་པ་ཤུགས་ལ་གྲུབ་པའི་དོན་གཉིས་ལྷུན་གྱིས་གྲུབ་པའི་སངས་རྒྱས་ཞེས་བྱའོ། །དེ་ལྟར་ས་བཅུ་ལམ་ལྔའི་སྤངས་རྟོགས་མཐར་ཕྱིན་ནས་སངས་རྒྱས་སྤྲུལ་སྐུ་དང་། ལོངས་སྐུ་དང་། ཆོས་སྐུ་དང་། ངོ་བོ་ཉིད་སྐུ་དང་། མངོན་པར་བྱང་ཆུབ་པའི་སྐུ་དང་ལྔའི་རྣམ་དབྱེ་ཡོད་པས། དེའི་སྟེང་དུ་མི་འགྱུར་རྡོ་རྗེའི་སྐུ་བསྣན་པའི་དྲུག་ནི། རྫོགས་པ་ཆེན་པོའི་ཁྱད་ཆོས་ཡིན་པས་དེ་རྣམས་ཀྱི་ཞིང་དུ་དོན་གཉིས་ཞེས་རང་དོན་དང་གཞན་དོན་ལྷུན་གྱིས་གྲུབ་པའོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་པའི་བསྡུས་འགྲེལ་ལོ།