ཞི་ཁྲོ་ལས་ཀྱི་གལ་ཕྲེང། སློབ་དཔོན་ནམ་མཁའི་སྙིང་པོ།

༄༅ ། །མཱ ལྱཱ རྠཾ ཤཱ ནྟ ཀྲོ དྷ ཀ རྨཱ ཎཱཾ ནཱ མ བི ཧ ར །
ཞི་ཁྲོ་ལས་ཀྱི་གལ་ཕྲེང་ཞེས་བྱ་བ་བཞུགས་སོ། །
བཅོམ་ལྡན་འདས་དཔལ་རྡོ་རྗེ་སེམས་དཔའ་ཁྲག་འཐུང་རྒྱལ་པོ་ལ་ཕྱག་འཚལ་ལོ། །ངེས་པར་འབྱུང་དང་གདུལ་དཀའ་བའི། །ལས་ངན་བྱང་ཐག་ཆད་པ་ལ། །མཛད་སྤྱོད་ཞི་ཁྲོ་རྣམ་གཉིས་ཀྱི། །རྗེས་སུ་འཇུག་པའི་ཏིང་འཛིན་གྱིས། ། གདུལ་བྱའི་ཐབས་སུ་ཇི་སྙེད་ལས། །ལས་ཀྱི་གལ་ཕྲེང་མན་ངག་འདི། །གང་དགོས་ཏིང་འཛིན་སྔགས་ཕྱག་རྒྱ། །བསྡུས་ནས་དྲིས་ལན་ཚུལ་དག་ཏུ། །མ་འོངས་དོན་དུ་བདག་གིས་བརྩམ། ༈ །ཕྱི་ནང་གི་ཆོས་ཐམས་ཅད་ཆོས་ཀྱི་དབྱིངས་ཀྱི་གནས་ཡེ་ནས་དབེན་པའི་ངོ་བོ་ལ་འཕྲལ་དུ་གནས་དབེན་པ་བཙལ་བའི་དགོས་པ་ཇི་ལྟ་བུ་ལགས། སྣོད་བཅུད་ཆོས་དབྱིངས་ཆེན་པོ་ལ། །མཐའ་རྣམས་ཀུན་ཀྱང་དབེན་གྱུར་ཀྱང་། །དེ་ལྟར་མ་རྟོགས་རྣལ་འབྱོར་པས། །འདུ་འཛི་གཡེང་བ་ཐག་བཅད་ལ། །ཏིང་འཛིན་མངོན་དུ་འགྱུར་བྱའི་ཕྱིར། །རྒྱང་གྲགས་དཔག་ཚད་དབེན་པར་ནི། །སེང་གེའི་དཔེ་བཞིན་གཅིག་པུར་གནས། ༈ །སྔགས་ཀྱི་སྐབས་ན་ཅིར་སྣང་རྣལ་འབྱོར་གྱི་མཆོད་རྫས་དང་ཡོ་བྱད་ཡིན་པ་ལ། ལྷག་པར་ཡོ་བྱད་བཙལ་ཞིང་བཤམ་ཅི་འཚལ། །ཅིར་སྣང་མཆོད་རྫས་ལོངས་སྤྱོད་ལ། །དེ་བཞིན་མ་ཤེས་ཀུན་གྱིས་ཀྱང་། །བར་ཆད་རྣམ་གསུམ་བཟློག་པ་དང་། །ལས་དང་དངོས་གྲུབ་སྟོབས་འགྱུར་ཕྱིར། །ཡོ་བྱད་རྣམ་གསུམ་ཚང་བར་བཙལ། ༈ །ཐམས་ཅད་བདག་ཉིད་ཆེན་པོ་ལ། བདག་གཞན་མིང་ཡང་མེད་པར་མཚམས་བཅད་ཅིང་བགེགས་བསྐྲད་ཅི་འཚལ། ངོ་བོས་བདག་གཞན་གཉིས་མེད་པར། །དང་པོའི་ལས་ཅན་རྣལ་འབྱོར་པའི། །ཏིང་འཛིན་ཉམས་ལེན་བར་གཅོད་དག །ངེས་པར་བསལ་ཕྱིར་མཚམས་གཅད་བྱ། ༈ །སེམས་ཉིད་ཡེ་ནས་དག་པ་ལ་དཔང་པོའི་ལྷ་རྣམས་ལ་ཉམས་ཆགས་བཞི་བཤགས་པ་འགལ་ལམ་མི་འགལ། བྱང་ཆུབ་སེམས་ནི་རྣམ་དག་པས། །ཕྱི་ནང་བཤགས་པར་བྱར་མེད་ཀྱང་། །ལམ་ལ་གནས་པའི་སྒྲུབ་པའོ། །ཉམས་པ་རྣམ་བཞི་བཤགས་པ་དང་། །རྒྱུད་པ་ཁྲུས་ཆེན་གཏོགས་བྱའི་ཕྱིར། །དབང་པོ་གསུམ་ལ་དྭངས་བས་བཤགས། ༈ །བདག་ཉིད་འབྲས་བུ་ལྷུན་གྱིས་གྲུབ་པ་ལ་བྱིན་དབབ་ཅི་འཚལ། སེམས་ཉིད་འབྲས་བུ་ལྷུན་རྫོགས་ལ། །སྐུ་གསུམ་བྱིན་རླབས་བསྡུར་མེད་ན། །མངོན་དུ་མ་གྱུར་འགྲོ་བ་ཡིས། །སྐུ་གསུང་ཚོགས་གཉིས་ཐོབ་བྱའི་ཕྱིར། །སྔགས་བརྗོད་འོད་བསྡུའི་བསམ་པ་ཡིས། །འབྲས་བུ་རྣམ་ལྔའི་བྱིན་རླབས་དབབ། ༈ །ཡེ་ཤེས་དང་ལྡན་པའི་ལྷ་རྣམས་ལ་བརྡ་སྒོ་དབྱེ་ཞིང་ཕྱག་བཙལ་ཅི་འཚལ། །མངོན་ཤེས་དྲུག་ལྡན་དབང་པོ་ལ། །བརྡ་ཡིས་མཚོན་པ་མི་དགོས་ན། །རྣལ་འབྱོར་ཆེན་པོ་ངེས་པའི་སྒོར། །བདག་ལ་དགོས་པ་བཞི་ལྡན་ཕྱིར། །ཏྲི་རྒྱུས་བསྐྱེད་པའི་གཞལ་ཡས་ཁང་། །བདའ་ཚུལ་སྒོ་དབྱེ་ཕྱག་འཚལ་བྱ། ༈ །ཆོས་ཐམས་ཅད་བདུད་རྩིའི་བདེ་བ་ཆེན་པོར་སངས་རྒྱས་པ་ལ། མཆོད་རྫས་བྱིན་གྱིས་བརླབས་པ་ཅིའི་ཕྱིར། །བདུད་རྩི་བདེ་བ་ཆེན་པོ་ལ། །ཏིང་འཛིན་སྔགས་དང་ཕྱག་རྒྱ་ཡིས། །འཕྲལ་དུ་སྦྱངས་སྤེལ་མི་དགོས་ན། །སྒྲུབ་ལ་བརྩོན་པའི་རྣལ་འབྱོར་གྱིས། །མཆོད་པ་ལས་འབྲས་སྒྲུབ་བྱེད་ཕྱིར། །གསང་སྔགས་ཕྱག་རྒྱ་ལྡན་པ་ཡིས། །བདུད་རྩི་རྒྱ་མཚོ་ལྷ་མོར་བརླབ། ༈ །ཐིག་ལེ་ཆེན་པོ་བསྐྱེད་རྫོགས་དང་བྲལ་བ་ལ་ཏིང་ངེ་འཛིན་རྣམ་གསུམ་རིམ་པར་བསྒོམ་པ་མི་འགལ་ལམ། ཅིག་ཆར་འཇུག་པའི་སྐལ་མེད་རྣམས། །རིམ་པར་འཇུག་པའི་བསྐྱེད་ཚུལ་གྱིས། །ཚེ་འཕོས་བར་དོར་ལུས་ལེན་ཞིང་། །སྐུ་དང་ཡེ་ཤེས་ཐོབ་བྱའི་ཕྱིར། །ཏིང་འཛིན་རྣམ་གསུམ་རིམ་པར་བསྒོམ། ༈ །ཐམས་ཅད་དེ་བཞིན་ཉིད་ཀྱི་གཞལ་ཡས་ཁང་ལ་དབང་ཆེན་དང་གཞལ་ཡས་ཁང་བསྐྱེད་ཅི་དགོས། གཟུང་འཛིན་བྲལ་བའི་ཡེ་ཤེས་ཉིད། །སངས་རྒྱས་ཀུན་གྱི་གནས་ཡིན་པས། །མི་ཤེས་པ་ཡི་སྐྱེ་བོ་ཡིས། །མཚན་མ་བསྒོམ་པས་བརྒྱུད་པའི་ཕྱིར། །སྣོད་ཀྱི་སྲིད་པ་བྱུང་ཚུལ་གྱིས། །རིམ་བརྩེགས་གཞལ་ཡས་གཞུང་བཞིན་བསྐྱེད། ༈ །རྟོག་ཚོགས་ཡེ་ནས་ལྷའི་དཀྱིལ་འཁོར་བསྐྱེད་ཅི་འཚལ། རྡོ་རྗེ་ཕུང་པོའི་ཡན་ལག་རྣམས། །ཡེ་ནས་ལྷ་ཡི་དཀྱིལ་འཁོར་ལ། །ཏིང་འཛིན་སྔགས་རྐྱེན་བསྒོམས་པ་ཡིས། །རང་བཞིན་མངོན་དུ་གྱུར་བྱའི་ཕྱིར། །ཕྱག་རྒྱ་ཆེན་པོ་ཚང་བར་བསྐྱེད། ༈ །དལ་གྱི་ལྷ་རྣམས་བྱིན་རླབས་ཀུན་དང་ལྡན་པ་ལ་ཆོ་འཕྲུལ་བཞིས་ནུས་པ་དང་ལྡན་པར་བྱ་ཅི་དགོས། འབྲས་བུ་ལྷུན་གྲུབ་དཀྱིལ་འཁོར་ལ། །ངོ་བོ་བྱིན་རླབས་དབང་ལྡན་ཡང་། །དམ་ཚིག་སེམས་དཔའི་དཀྱིལ་འཁོར་ལ། །ནུས་པ་ཀུན་དང་ལྡན་བྱའི་ཕྱིར། །དབང་དང་བྱིན་རླབས་ཆོ་འཕྲུལ་བསམ། ༈ །ཡེ་ཤེས་ཀྱི་ལྷ་དང་བདག་ངོ་བོ་གཅིག་པ་ལ་སྙན་གསན་དབབ་ཅིང་སྤྱན་དྲངས་ཅི་དགོས། བདག་ཉིད་ཆེན་པོའི་དཀྱིལ་འཁོར་ལ། །སྤྱན་དྲངས་གཤེགས་སུ་གསོལ་མེད་ཀྱང་། །རང་བཞིན་གྲུབ་པའི་དཀྱིལ་འཁོར་ལྷའི་སྐུ་དང་ཡེ་ཤེས་ཐོབ་བྱའི་ཕྱིར། ས་མ་ཛཿདང་ཨེ་ཧ་ཧིས་དགུག ༈ །སྔགས་ནང་པའི་གཞུང་ལུགས་ཀྱི་ལྷ་དང་བདག་གཅིག་པ་ལ་ལྷ་གུད་ནས་བསྟིམ་པ་མི་འགལ་ལམ། དོན་ཉིད་བདག་དང་དབྱེར་མེད་ཀྱང་། །ཏིང་འཛིན་ཡེ་ཤེས་དབྱེར་མེད་དོན། །དེ་ཉིད་སྒོ་ནས་མཐོང་བྱ་དང་། །ལས་དང་དངོས་གྲུབ་ཐོབ་བྱའི་ཕྱིར། །ཇི་སྲིད་ཐོབ་པར་བཞུགས་སུ་གསོལ། ༈ །བདག་ལ་ལྷ་བསྟིམ་བསྟན་པར་བྱས་པ་ལ་ཕྱག་བཙལ་བའི་གནས་མེད་པར་ཕྱག་བཙལ་བ་ཇི་ལྟ་བུ་ལགས། ལྷ་དང་བདག་ཏུ་དབྱེར་མེད་པའི། །དོན་ཉིད་ཕྱག་གིས་རྟོགས་བྱའི་ཕྱིར། །ཇི་ལྟར་མར་ལ་མར་བཞིན་དུ། །གཉིས་མེད་རིག་པས་ཕྱག་འཚལ་ལོ། །བདག་ཉིད་ལྷའི་དལ་དུ་གསལ་བཞིན་དུ་དམ་བཅའ་བ་མི་འགལ་ལམ། དམ་བཅའ་དབང་པོ་གཉིས་མེད་ཀྱང་། །མངོན་དུ་མ་གྱུར་ཚུལ་སྒོ་ནས། །དམ་ཚིག་ཕྱག་རྒྱ་རྩེ་གཅིག་བཅའ། །ཁས་བླངས་དོན་གཉིས་བསྒྲུབས་པ་ཡིས། །བདག་གཞན་དོན་གཉིས་རྫོགས་བྱའི་ཕྱིར། །དངོས་སུ་སྒྲུབ་དང་སྨོན་པར་བྱ། ༈ །བསྒུལ་བསྐྱོད་ཐམས་ཅད་ཕྱག་རྒྱའི་ངོ་བོ་ལ། །དམ་ཚིག་གི་ཕྱག་རྒྱ་དང་ལས་ཀྱི་ཕྱག་རྒྱ་རྩེ་གཅིག་པ་བཞི་དང་ལྡན་ནས་མཆོད་པ་ཅིའི་ཕྱིར། མི་བསྐྱོད་ཕྱག་རྒྱའི་ངོ་བོ་ཡང་། །ལམ་བཞིན་བསྒྲུབ་པའི་གང་ཟག་གིས། །དམ་ཚིག་ཕྱག་རྒྱ་བསྐུལ་བ་དང་། །རྣམ་གྲོལ་སྒོ་མཚོན་གསལ་བའི་ཕྱིར། །ཕྱག་རྒྱ་བཞི་གསལ་གཉིས་མེད་མཆོད། ༈ །ཆོས་ཉིད་ཀྱིས་གར་ཁྱབ་པ་མཆོད་པའི་ངོ་བོ་ལ། ནམ་མཁའ་མཛོད་ཀྱི་སྔགས་དང་ཕྱག་རྒྱས་ལྷག་པ་ཀུན་ཏུ་བཟང་པོའི་མཆོད་པ་དབུལ་ཅི་དགོས། ཐམས་ཅད་མཆོད་པའི་ངོ་བོ་ཉིད། །རིག་པས་དབང་ཐོབ་བྱ་ཕྱིར་ན། །ཕྱི་ནང་གསང་བའི་མཆོད་པ་རྣམས། །ནམ་མཁའི་ཁམས་ཀུན་གང་བར་མཆོད། །ཐམས་ཅད་མཆོད་ཕྱིར་ཀུན་ཏུ་བཟང། ༈ །ཐུན་མོང་མ་ཡིན་པའི་ཐེག་པའི་སྐབས་འདིར། ཕྱིའི་མཆོད་པ་ལྔ་འབུལ་ཅི་དགོས། །ཐེག་པ་ཆེན་པོའི་དོན་ཉིད་ཀྱིས། །གང་དག་ཀུན་དང་མཐུན་སྤྱོད་པས། །ཕྱི་རོལ་ཆོས་དང་མཐུན་བྱའི་ཕྱིར། །ལྷ་མོར་གསལ་བས་བསྣོལ་མར་མཆོད། ༈ །ཐམས་ཅད་སྤང་བླང་མེད་པ་ལ་དམ་རྫས་ལྷག་པར་བསྟེན་ཞིང་མཆོད་པ་སྤང་ལེན་དུ་མི་འགྱུར་རམ། མ་རྟོགས་རྣམས་དང་ཐེག་ཆུང་གིས། །ལྷག་མ་དོར་བའི་རྫས་རྣམས་ཀུན། །སྤང་དུ་མེད་པར་སྤྱད་མཆོད་པས། །ཉོན་མོངས་གྲོལ་བར་བྱ་བ་དང་། །བརྟུལ་ཞུགས་དམ་ཚིག་བསྲུང་བ་དང་། །ཁྱི་ཡི་དཔེ་བཞིན་ཞེན་བཟློག་ཕྱིར། །རྣམ་གསུམ་ཚུལ་གྱིས་མཆོད་ཅིང་བཟའ། ༈ །ལུས་ངག་ཡིད་གསུམ་ཉིད་སྐུ་གསུང་ཐུགས་ཀྱི་ངོ་བོ་ཉིད་ལ་རྫས་ལ་བརྟེན་ནས་དངོས་གྲུབ་བླང་ཅི་དགོས། སྒོ་གསུམ་སྐུ་གསུང་ཐུགས་ཡིན་པའི། །དོན་ཉིད་འཚམས་པའི་ཏིང་འཛིན་གྱིས། །བསྐུལ་ནས་བསྒྲུབ་པར་བྱ་ཕྱིར་དང་། །ལས་ཀྱི་མདོ་དོན་བསྒྲུབ་བྱའི་ཕྱིར། །རྫས་ལ་ཡིག་འབྲུ་བཀོད་ནས་ནི། །བསམ་དང་ལྡན་པས་དངོས་གྲུབ་བླང་། ༈ །དེ་བཞིན་གཤེགས་པ་ནི་སྒྲིབ་སྐྱེམས་དང་བྲལ་བ་ལ་འདོད་ཡོན་ལྔས་བསང་ནན་དབུལ་བ་དང་། གཏོར་མས་མཆོད་ཅི་དགོས། །གཤེགས་སྐུ་སྒྲིབ་སྐྱེམས་ཀུན་བྲལ་ཡང་། །རྣལ་འབྱོར་ཚོགས་གཉིས་རྫོགས་བྱ་དང་། །ཉོན་མོངས་ལམ་དུ་བྱས་པ་ཡིས། །འཆིང་བདུད་གཉིས་ལས་གྲོལ་བྱའི་ཕྱིར། །འདོད་ལྔས་ནམ་མཁའ་གང་བར་མཆོད། །གསང་བའི་ལོངས་སྤྱོད་རྫོགས་བྱའི་ཕྱིར། །བདུད་རྩི་ལྷ་མོར་བྱིན་བརླབས་པས། །ཞལ་ཟས་དབང་པོ་གཉིས་མེད་མཆོད། ༈ །སྣང་སྲིད་རྡོ་རྗེ་དབྱིངས་ཀྱི་དཀྱིལ་འཁོར་ལ། །མཆོད་པའི་རྒྱུ་མེད་པར་སྟོང་གསུམ་མཆོད་པར་དབུལ་ཅི་འཚལ། ཐམས་ཅད་སེམས་ཀྱི་ངོ་བོར་བས། །ཅིར་སྣང་མཆོད་པའི་རྗེས་ཡིན་པས། །དེ་ལྟར་མཆོད་པའི་ཚུལ་སྒོ་ནས། །སེམས་ལ་དབང་ཐོབ་བྱ་བའི་ཕྱིར། །ཕྱི་ནང་སྣོད་བཅུད་མཆོད་པར་དབུལ། །བསྐྱེད་པའི་རིམ་པ་ལ་གནས་པས་སྦྱོར་སྒྲོལ་གྱི་མཆོད་པ་འབུལ་བ་ཉོན་མོངས་པར་མི་འགྱུར་རམ། བསྐྱེད་པའི་ཏིང་འཛིན་ལེགས་གསལ་བས། །བདག་གཞན་དོན་གཉིས་རྫོགས་བྱ་དང་། །འཆིང་བས་འཆིང་བ་གྲོལ་ཕྱིར་དང་། །ཐབས་དང་ཤེས་རབ་ལྡན་པ་དང་། །གཉིས་མེད་མཆོད་ཕྱིར་ཏིང་འཛིན་བྱ། ༈ །རྡོ་རྗེ་དབྱིངས་ཀྱི་ལྷ་རྣམས་ཡོན་ཏན་གྱི་ངོ་བོ་ལ་བསྟོད་པ་བྱ་ཅི་དགོས། གཤེགས་སྐུ་བསྟོད་དགྱེས་མི་མངའ་ཡང་། །བསམ་ཚིག་ལྡན་པས་བསྟོད་བྱས་ན། །ཚོགས་རྫོགས་དེ་ཉིད་གསལ་འགྱུར་ཕྱིར། །སྐུ་གསུང་ལས་ལྔའི་སྒོ་ནས་བསྟོད། ༈ །ལྷ་རྣམས་འདོད་པ་དང་བྲལ་བ་ལ་རོལ་མོ་དབུལ་ཅི་དགོས། །དེ་བཞིན་གཤེགས་ཉིད་འདོད་བྲལ་བས། །རོལ་མོས་དགྱེས་པ་མི་མངའ་ན། །རྣལ་འབྱོར་བདག་གཞན་དོན་འདོད་པས། །རོལ་མོས་སེམས་ཉིད་གསལ་བ་ཡིས། །སེམས་རྒྱུད་དགྲོལ་དང་བསྟོད་པ་དང་། །མཐུན་པས་འགྲོ་བ་སྒྲོལ་བའི་ཕྱིར། །རོལ་མོའི་མཆོད་པ་ཚུལ་བཞིན་བྱ། ༈ །སྔགས་ཀྱི་སྐབས་ནས་འབྲས་བུ་གཞན་ནས་མི་འཚོལ་བ་ལ་སྨོན་ལམ་གདབ་པ་ཇི་ལྟ་བུ་ལགས། མ་གྲུབ་གྲུབ་པར་བྱ་མེད་ཀྱང་། །དེ་ཉིད་རྟོགས་པར་བྱ་བ་དང་། །དགོངས་གསོལ་མཆོད་དང་བཤགས་པ་དང་། །དངོས་གྲུབ་གསོལ་དང་ལས་བཅོལ་བས། །བསམ་པ་འགྲུབ་པའི་སྟོངས་འགྱུར་ཕྱིར། །བསམ་དང་བཅས་པས་སྨོན་ལམ་གདབ། ༈ །ཏིང་ངེ་འཛིན་གྱི་དལ་དང་རང་བཞིན་གྱི་དལ་དབྱེར་མེད་དུ་འདོད་པའི་དོན་གསོལ་བ་འདེབས་པ་ཀྲི་ཡ་བ་དང་འདྲ་བར་མི་འགྱུར་རམ། དཀྱིལ་འཁོར་རྣམ་གཉིས་དབྱེར་མེད་པས། །གསོལ་བ་གདབ་པའི་གཞི་མེད་ནའང་། །ལྷུན་གྱིས་མ་གྲུབ་དབང་གིས་ན། །བསམ་པས་གསོལ་འདེབས་རེ་རྩོལ་བས། །ལུས་ངག་རྡོ་རྗེ་གྲུབ་ཐོབ་ནས། །མཐའ་ཡས་སེམས་ཅན་དོན་བྱའི་ཕྱིར། །གཉིས་མེད་གསལ་བས་གསོལ་འདེབས་པ། །རྗེ་སྤུན་གྲོགས་ལྟ་མཚུངས་པ་མིན། ༈ །ཅི་བརྗོད་སྔགས་ཀྱི་ངོ་བོ་ཉིད་ལ། །བསྙེན་པའི་གྲངས་ཀྱིས་བྱ་ཅི་དགོས། །ཅི་བརྗོད་སྔགས་ཀྱི་ངོ་བོ་ཉིད། །མངོན་དུ་འགྱུར་བར་བྱ་བ་དང་། །དངོས་གྲུབ་རྣམ་གཉིས་ཐོབ་བྱའི་ཕྱིར། །རྣམ་གསུམ་ཚུལ་གྱིས་བཟླས་པ་བྱ། ༈ །བསྙེན་པ་ཟིན་ནས་བཤགས་པ་བྱ་ཅི་དགོས། །བསྙེན་པས་རྟགས་མཚན་ལྡན་བྱས་ནས། །དངོས་གྲུབ་བླང་བའི་གེགས་གྱུར་པ། །སྦྱངས་ནས་སྣོད་དུ་བྱ་བའི་ཕྱིར། །ཡེ་ཤེས་མཉམ་ཉིད་ཚིག་གིས་བཤགས། ༈ །དཀྱིལ་འཁོར་རྣམ་གཉིས་གཅིག་པ་ལ། །རིག་པའི་མེ་ཏོག་དོར་ཅི་དགོས། །ད་ལ་རྣམ་གཉིས་དབྱེར་མེད་པའི། །དོན་གཉིས་མ་བུ་གསལ་གདབ་ཕྱིར། །ལྷ་དང་དབྱེར་མེད་རིག་པ་ཡིས། །གསལ་བའི་མེ་ཏོག་དོར་བར་བྱ། ༈ །རིག་པའི་མེ་ཏོག་དོར་ནས་དངོས་གྲུབ་གསོལ་ཅི་དགོས། རིག་པ་གསལ་བའི་སྐད་ཅིག་མ། །མངོན་དུ་གྲུབ་པའི་མཐུ་མེད་པས། །སྐུ་གསུམ་དངོས་གྲུབ་བྱ་བའི་ཕྱིར། །སྔགས་ཚིག་ལྡན་པས་དངོས་གྲུབ་གསོལ། །གནས་གསུམ་ཡིག་འབྲུ་སྤྲོས་པ་ཡིས། །སྒོ་གསུམ་སྐུ་གསུང་ཐུགས་འགྱུར་བསམ། ༈ །མཁའ་འགྲོ་སུམ་ཅུ་རྩ་གཉིས་ཞི་བའི་སྐབས་སུ་ལྷག་མ་མཆོད་པ་ཇི་ལྟ་བུ་ལགས། སྔོན་ཚེ་བཅོམ་ལྡན་རིགས་ལྔ་ཡིས། །མཁའ་འགྲོ་སུམ་ཅུ་རྩ་གཉིས་པོ། །བཏུལ་ནས་སླས་དང་གདན་དུ་བྱས། །ད་ལྟ་རྣལ་འབྱོར་ལས་སྟོངས་ཕྱིར། །རིགས་ལྔའི་ཕ་འབགས་གཞུང་བཞིན་མཆོད། ༈ །ཐམས་ཅད་ཆོས་སྐུའི་ངོ་བོ་ལ། །དཀྱིལ་འཁོར་བསྡུ་བ་མི་འགལ་ལམ། །ཆོས་སྐུ་དོན་དུ་དབྱེར་མེད་པའི། །དོན་ལས་མི་འདའ་བྱ་ཕྱིར་དང་། །མཚན་མའི་སྐྱོན་དུ་མི་འགྱུར་ཕྱིར། །དཀྱིལ་འཁོར་ལུགས་བཞིན་བསྡུ་བར་བྱ། ༈ །དཀྱིལ་འཁོར་བསྡུས་ནས་མི་དམིགས་པ་ལ་ལས་ལྷར་བསྐྱེད་ཅི་དགོས། ཆད་པའི་མཐའ་རྣམས་བསལ་བ་དང་། །སྤྱོད་ལམ་རྣམ་བཞི་བསྒོམས་པ་ཡིས། །འགྲོ་བའི་དོན་རྣམས་རྫོགས་བྱའི་ཕྱིར། །གཙོ་བོའི་སྐུ་ཉིད་གསལ་བར་བསྐྱེད། ༈ །བདག་ཉིད་ལྷར་གསལ་བ་ལ་གོ་བགོ་ལུས་བསྲུང་ཅི་དགོས། ལྷ་ཡི་སྐུ་ཉིད་གསལ་གྱུར་ཀྱང་། །རྣམ་སྨིན་ལུས་དང་མ་བྲལ་བས། །དགེ་བའི་བར་ཆད་འབྱུང་བའི་ཕྱིར། །རྒྱ་གྲམ་གོ་བགོད་ཁྲོ་བོས་བསྲུང་། ༈ །བདག་ཉིད་ལྷར་གསལ་བཞིན་ཡི་གེ་བརྒྱ་པས་བཤགས་པ་མི་འགལ་ལམ། སྒྲ་གསུང་སྔགས་ཚིག་བརྗོད་མེད་ཀྱང་། །དེ་བཞིན་མ་རྟོགས་རྣལ་འབྱོར་བས། །ལས་ཀྱི་ལྷག་ཆད་དག་བྱའི་ཕྱིར། །ཡི་གེ་བརྒྱ་པས་གཞུང་བཞིན་བཤགས། ༈ །སྤྱོད་ཡུལ་ཐམས་ཅད་གསལ་བ་ལ། །སེམས་ཅན་མིང་ཡང་མེད་པར་དགེ་བའི་རྩ་བ་སུ་ལ་བསྔོ། །ཁམས་གསུམ་སེམས་ཅན་མ་ལུས་ཀུན། །རང་བཞིན་ལྷུན་རྫོགས་སངས་རྒྱས་ཀྱང་། །མ་རིག་ལིང་རྟོག་བསྒྲིབས་པ་རྣམས། །བདག་གིས་གཞན་དོན་རྫོགས་བྱའི་ཕྱིར། །སེམས་ཅན་དོན་མཆོད་དགེ་རྩར་བསྔོ། ༈ །དེ་བཞིན་གཤེགས་པ་ནི་བྱིན་རླབས་ཀུན་དང་ལྡན་པས། གདུལ་བྱ་ལ་ཇི་ལྟར་འདུལ་བ་བཞིན་དུ་དུས་གཅིག་ཏུ་འདུལ་པ་ཡིན་ན། རྣལ་འབྱོར་པ་རྣམས་ཞི་བ་ལས་ཁྲོ་བོར་བསྒྱུར་ནས་བསྒོམ་པས་མི་འགལ་ལམ། ལྷུན་གྲུབ་རྒྱལ་བ་ཉག་གཅིག་གི། །མཛད་སྤྱོད་ཐམས་ཅད་ལྷུན་གྲུབ་པས། །ཇི་ལྟར་འདུལ་སྣང་དཔག་བསམ་ལྟར། །རྗེས་སུ་འཇུག་པའི་རྣལ་འབྱོར་པས། །ལྷུན་གྱིས་གྲུབ་པ་མ་ཐོབ་པས། །ངེས་འབྱུང་དཔྱང་ཐག་ཆད་དོན་ཕྱིར། །བསམ་པས་ཞི་ཁྲོ་རེས་མོས་བསྒོམ། ༈ །ཁོག་གཞུང་ཞི་ཁྲོ་གཉིས་མཐུན་པ་ལ། །ཁྲོ་བོའི་གནས་སྐབས་བཏུས་པ་རྣམས། །གསལ་བར་བྱ་ཕྱིར་སྒོ་དབྱེ་སྟེ། །ཁྲོ་བོའི་དོན་རྣམས་ཤེས་པར་གྱིས། ༈ །ཁྲོ་བོའི་གནས་སྐབས་ན་དབྱེར་མེད་པར་བསྟིམས་ནས་གཟི་བྱིན་བསྐྱེད་ཅི་དགོས། ཡེ་ཤེས་ལྷ་རྣམས་བྱིན་ལྡན་ཡང་། །དམ་ཚིག་སེམས་དཔའི་དཀྱིལ་འཁོར་དང་། །བྱིན་དང་ལྡན་ན་དོན་སྒྲུབ་ཕྱིར། །སྐུ་དང་གསུང་ཐུགས་གཟི་བྱིན་བསྐྱེད། ༈ །མཆེ་བའི་ཕྱག་རྒྱ་དང་སྔགས་ཀྱིས་གདུག་པ་ཅན་བཟའ་བརྩེའི་ཕྱིར། ཡེ་ཤེས་སྤྱན་དྲངས་གཤེགས་པའི་ཚེ། །ཞོར་ལ་འབྱུང་བའི་ཡི་དྭགས་རྣམས། །རྣལ་འབྱོར་ཏིང་ངེ་འཛིན་བར་གཅོད་ཕྱིར། དཔལ་གྱི་ཞལ་དུ་གདུག་ཅན་གསོལ། ༈ །ཐོད་པ་ཚར་གསུམ་གྱི་དམ་ཚིག་གི་རྒྱ་བསྟན་པ་ལ་དགོས་པ་ཅི་ཡོད། ཁྲག་འཐུང་དཀྱིལ་འཁོར་མ་ལུས་རྣམས། །སྐུ་གསུང་སྒོ་ནས་འབྲས་ཐོབ་ཕྱིར། །དངོས་གྲུབ་རྩོལ་བར་དམ་བཅས་པས། །སྔོན་གྱི་ཐུགས་དམ་གནས་དབབ་པས། །སྐུ་གསུམ་དངོས་གྲུབ་གསལ་མཛད་ཕྱིར། །དམ་ཚིག་ཕྱག་རྒྱ་བསྟན་པར་བྱ། ༈ །བདག་དཔལ་ཁྲག་འཐུང་གི་དཀྱིལ་འཁོར་དུ་གསལ་བས་མཁའ་འགྲོ་མ་ཟིལ་གྱིས་མནན་ཅིང་དབང་དུ་བསྡུ་བ་མི་འགལ་ལམ། དཔལ་ཆེན་ཚོགས་ཀུན་བདག་པོ་ཡི། །རྗེས་སུ་འཇུག་པའི་རྣལ་འབྱོར་པས། །ཟིལ་མནན་དབང་བསྡུས་འཁོར་བྱས་ནས། །རང་དབང་མེད་པར་ལས་བྱེད་ཅིང་། །ཁྱུང་གཤོག་ཕྱག་རྒྱས་བརླབ་པར་བྱ། ༈ །དཔལ་ཆེན་པོའི་སྐུ་ལ་གསང་བའི་ལྷ་མོ་བཞི་དང་ལྡན་པའི་ཚུལ་དུ་མཆོད་པ་ཇི་ལྟ་བུ་ལགས། སྔོན་ཚེ་དཔལ་ཆེན་ཧེ་རུ་ཀ །ཡུམ་བཞི་ལྡན་པའི་དངོས་གྲུབ་བརྙེས། །དེ་རྗེས་འཇུག་པའི་རྣལ་འབྱོར་པས། །བཞི་ལྡན་ཚུལ་དུ་གསལ་ཕྱག་འཚལ། ༈ །དེ་ལྟར་མཆོད་པ་རྣམས་ཚུལ་བཞིན་རིམ་པར་ཕུལ་ནས། ཨེ་ས་ཧཱུྃ་གི་སྔགས་ཀྱིས་བཤགས་པ་བྱ་ཅི་དགོས། །མཆོད་པ་ཚུལ་བཞིན་བྱས་གྱུར་ཀྱང་། །དང་པོ་ལས་ཀྱི་རྣལ་འབྱོར་པས། །ཚེ་རབས་སྡིག་དང་ཆོ་ག་ཡི། །ལྷག་ཆད་དམ་ཚིག་ཉམས་པ་རྣམས། །སྐྱོན་དུ་མི་འགྱུར་བྱ་བའི་ཕྱིར། །ཨེ་ས་པ་ས་ཧཱུྃ་ས་མ་བཤགས། ༈ །རྣལ་འབྱོར་པས་བསྐྱེད་ཟིན་ནས་ཚོགས་ཀྱི་མཆོད་པ་བྱ་བའི་དོན་ཆེད་ཇི་ལྟ་བུ་ལགས། བཟའ་དང་བཏུང་བའི་ཡོ་བྱད་རྣམས། །མ་སྤངས་རོལ་པའི་ཚུལ་ཉིད་ཀྱིས། །ཚོགས་གཉིས་རྫོགས་པར་བྱའི་ཕྱིར། །བདག་ཉིད་སྤྱན་ཅིང་ལྷ་ལ་མཆོག ༈ །དབང་ཕྱུག་ཉེར་བརྒྱད་ལ་ལྷག་མ་དང་ཁ་ཆུས་མཆོད་པའི་དོན་ཇི་ལྟ་བུ་ལགས། དབང་ཕྱུག་མིང་སྲིང་འཁོར་བཅས་རྣམས། །སྔོན་ཚེ་དཔལ་ཆེན་ཧེ་རུ་ཀས། །དུར་ཁྲོད་བདག་པོ་བརྟུལ་བའི་ཚེ། །ཁྱོ་རྣམས་བཏུལ་ནས་གདན་དུ་མཛད། །ཆུང་མ་སྦྱོར་ནས་བྱི་མོར་མཛད། །ལྷག་མ་བྱིན་ནས་ལས་དབང་བསྐུར། །མོ་རྣམས་ཀུན་གྱིས་ཁས་བླང་པ། །དབུས་སུ་མཆི་སྐལ་མི་ལྡན་གྱིས། །འབར་བའི་དཀྱིལ་འཁོར་མཐའ་ལ་ཞོག །ཕུད་ལ་འཚལ་སྐལ་མི་ལྡན་གྱིས། །ལྷག་མ་ཞལ་ཆབ་མགྲོན་ལ་གསོལ། །དེ་སྐད་ཁས་བླངས་དམ་བཅས་པས། །གཞུང་བཞིན་མཁྱེན་པའི་རྣལ་འབྱོར་པས། །དཔལ་ཆེན་ཁྲག་འཐུང་དཀྱིལ་འཁོར་དུ། །ཏིང་ངེ་འཛིན་གྱི་གསལ་བྱས་ཏེ། །ལས་ཀྱི་དབང་ཕྱུག་གནས་ནས་དགུག །གདན་དབུལ་ཟིལ་མནན་དབང་བསྡུས་ལ། །དཔལ་གྱི་ཕ་འབབ་གཞུང་བཞིན་གསོལ། །ཁ་ཆུས་དཔལ་ཆེན་ཞལ་ཆབ་ཀྱིས། །ཚིམ་བྱས་ལས་ཀྱི་བསྒོ་བ་བྱ། །རང་གི་གནས་སུ་ལས་ལ་དགྱེ། །རྩ་བའི་དཀྱིལ་འཁོར་ཚུལ་ལ་བསྡུ། ༈ །དེ་ལྟ་བུའི་ཕྲིན་ལས་དང་ཏིང་ངེ་འཛིན་བྱས་པའི་འབྲས་བུ་ཇི་ལྟ་བུ་ལགས། ལྷ་མི་སྐུ་ཉིད་གསལ་བསྒོམས་པས། །བསོད་ནམས་ཚོགས་ཆེན་ཐོབ་པར་འགྱུར། །དེ་ཉིད་ཆུ་ཟླ་ལྟར་ཤེས་པས། །ཡེ་ཤེས་ཚོགས་ཆེན་ཐོབ་པར་འགྱུར། །ཚོགས་གཉིས་རྫོགས་པས་སྐུ་གསུམ་འགྲུབ། ༈ །དེ་ལྟར་བསྐྱེད་པའི་ཏིང་འཛིན་སྤྱིར་བསྒོམས་པའི་དགོས་པ་ཇི་ལྟར་ལགས། བསྐྱེད་པའི་ཏིང་འཛིན་གསལ་བ་ཡིས། །ཐུན་མོང་ཞེན་པ་གྲོལ་འགྱུར་སྤང་། །ལས་དང་དངོས་གྲུབ་མཐར་ཕྱིན་འགྱུར། །བསྙེན་པའི་མཚན་མ་རྒྱུན་དུ་བསྒོམ། ༈ །དེ་ལྟ་བུའི་མན་ངག་འདིའི་སྣོད་ཀྱི་མཚན་ཉིད་ཇི་ལྟ་བུ་ལགས། བཀའ་ལས་སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་སྦྱིན། །གཞན་ལ་ནམ་ཡང་སྦྱིན་མི་བྱ། །རྨོངས་ལ་འཚར་བས་གལ་ཏེ་བྱིན། །དུས་མིན་པར་ནི་སྲོག་ཟད་ནས། །བསྲེགས་དང་སྦྲེགས་ལ་ཡུད་རིང་གནས། །དེ་བས་སྣོད་ཀྱི་མཚན་ཉིད་གཅེས། ༈ །མན་ངག་ཞི་ཁྲོ་ལས་ཕྲེང་དོན། །མ་འོངས་དོན་དུ་བགྱིས་པ་ཡིས། །ཕྱི་རབས་རྣལ་འབྱོར་ཇི་སྙེད་པ། །ཞི་ཁྲོ་དོན་བཞིན་སྤྱད་པ་ཡིས། །གདུག་ཅན་ཞི་ཞིང་ཐུལ་གྱུར་ཏེ། །བསམ་པ་ཡིད་བཞིན་འགྲུབ་པར་ཤོག །བདག་ལས་ནམ་ཞིག་ཤི་འཕོས་ཚེ། །ལྷ་ཡི་སྐུ་རྣམས་གསལ་འགྱུར་བས། །ལས་ངན་བར་ཆད་མི་འབྱུང་ཞིང་། །བར་དོར་སྒྱུ་མའི་སྐུ་ཐོབ་པ། །ཁྱུང་དང་སེང་གེའི་དཔེ་བཞིན་དུ། །རྣམ་སྨིན་ལུས་ཀྱི་མདུད་གྲོལ་ནས། །ཕྱག་རྒྱ་ཆེན་པོ་ཐོབ་གྱུར་ཏེ། །མཐར་ཡང་འགྲོ་བའི་དོན་བྱེད་ཤོག །དེ་ལྟར་འགྲོ་དོན་རྫོགས་བྱས་ནས། །ཁམས་གསུམ་གནས་པའི་སེམས་ཅན་ལ། །བྱིན་རླབས་བློ་ལ་མུན་སྒྲོན་བཞིན། །སྣང་ནས་ཀུན་ཀྱང་འབྲས་ལྡན་ཤོག །གསང་སྔགས་ཀྱི་གྲུབ་ཐོབ་ཆེན་པོར་གྲགས་པ་སློབ་དཔོན་ནམ་མཁའི་སྙིང་པོས་མཛད་པ། ཞི་ཁྲོ་ལས་ཀྱི་ཕྲེང་བ་ཞེས་བྱ་བ་རྫོགས་སོ།། །།ཞི་ཁྲོ་མཁན་ལ་འདི་མེད་ན། །ལོང་བས་ལམ་སྣ་ཁྲིད་པ་ཡིན། །ཞི་ཁྲོ་དོན་གཉེར་མཛད་རྣམས་ཀྱིས། །འདི་ལ་བལྟ་རྟོག་ལེགས་པར་མཛོད། །དགེའོ།། །།