ལྔ་པ། འགྲོ་བའི་དོན་དུ་ཐུན་མོང་གི་ལས་བསྟན་པའི་ལེའུ།
༈ ད་ནི་ལེའུ་ལྔ་པ་འགྲོལ་ཏེ། ཨེ་མ་ཞེས་པའི་དོན་ནི། ཨེ་ནི་དབྱིངས་སོ། །མ་ནི་མི་འགྱུར་བའོ། །དབྱིངས་མི་འགྱུར་བ་ངོ་མཚར་ཆེ་བའི་རང་སྒྲའོ། །འདི་ལྟར་འབྱུང་འདོད་སྐྱེས་བུ་གང་། །ཞེས་པའི་དོན་ནི། འདི་ལྟར་ཞེས་པ་ཐུན་མོང་གི་རྟགས། འབྱུང་འདོད་ཅེས་པ་འགྲོ་བ་འདྲེན་པའི་དོན་དུ། སྐྱེས་བུ་གང་ཞེས་པ་སྐལ་བ་ཅན། ཐབས་ཀྱི་ཡན་ལག་འདི་ལྟ་བུ། །ཞེས་པའི་དོན་ནི། ཐབས་ཀྱི་ཞེས་པ་འགྲོ་བ་འདྲེན་པའི། ཡན་ལག་ཅེས་པའི་དོན་མ་ནོར་བ་ལ་འཇུག་པའི། འདི་ལྟ་བུ་ཞེས་པ་བྱ་ཐབས། རྣམ་པ་སྣ་ཚོགས་ཉིད་ལ་ནི། །ཞེས་པའི་དོན་ནི། རྣམ་པ་ཞེས་པ་སངས་རྒྱས་ཀྱི་རྟགས་ཀྱི། སྣ་ཚོགས་ཞེས་པ་འགྲོ་བའི་དོན་དུ་ཐུན་མོང་གི་ལས། (༦༩)ཉིད་ལ་ནི་ཞེས་པ་འདི་དག །འདི་ལྟར་དེ་ཡི་སྔོན་དུ་སྦྱོང་། །ཞེས་པའི་དོན་ནི། འདི་ལྟར་ཞེས་པ་རང་གིས། དེ་ཡི་ཞེས་པ་ཐུན་མོང་གི་ལས་ཀྱི། སྔོན་དུ་སྦྱོང་ཞེས་པ་རང་ཞེན་པ་ལོག་པར་བྱ་བའི་ཕྱིར་དུ། འདི་ལྟར་རང་གིས་སྔོན་མ་སྦྱངས་ན། རང་ཉིད་འདོད་པའི་དབང་དུ་ཤོར་ཉེན་ཡོད་པའོ། །སེམས་ཀྱིས་རིམ་པ་ཅི་སྦྱངས་པ། །ཞེས་པའི་དོན་ནི། སེམས་ཀྱིས་ཞེས་པ་རང་གི། རིམ་པ་ཞེས་པ་བདུན་ཏེ། དང་པོ་འདུས་བྱས་ཐམས་ཅད་མི་རྟག་པ་ལ་བསམས་ཏེ་བྱང་ཆུབ་ཀྱི་སེམས་སྦྱང་། གཉིས་པ་འཕྲལ་གྱི་བདེ་སྡུག་དང་ཡུན་གྱི་བདེ་བ་ལ་བསམས་ཏེ་བྱང་ཆུབ་ཀྱི་སེམས་སྦྱང་། གསུམ་པ་འཆི་བའི་རྐྱེན་དུ་མ་ལ་བསམས་ཏེ་བྱང་ཆུབ་ཀྱི་སེམས་སྦྱང་། བཞི་པ་ཚེ་འདིའི་བྱ་བ་ཐམས་ཅད་བྱས་པ་དོན་མེད་དུ་འདུག་པ་ལ་བསམས་ཏེ་བྱང་ཆུབ་ཀྱི་སེམས་སྦྱང་། ལྔ་པ་སངས་རྒྱས་ཀྱི་ཡོན་ཏན་ལ་བསམས་ཏེ་བྱང་ཆུབ་ཀྱི་སེམས་སྦྱང་། དྲུག་པ་བླ་མའི་མན་ངག་ལ་བསམས་ཏེ་བྱང་ཆུབ་ཀྱི་སེམས་སྦྱང་། བདུན་པ་མི་རྟོག་པ་ལ་བསམས་ཏེ་བྱང་ཆུབ་ཀྱི་སེམས་སྦྱང་། ཅི་སྦྱངས་པ་ཞེས་པ་ཉི་མ་གསུམ་གསུམ་ཉི་ཤུ་རྩ་གཅིག་ཏུ་ཉམས་སུ་བླངས་པས། འདིས་ནི་མི་རྟག་སེམས་ལ་འབྱོར། །ཞེས་པའི་དོན་ནི། འདིས་ནི་ཞེས་པ་སེམས་སྦྱོང་བདུན་པོས། མི་རྟག་ཅེས་པ་རྒྱུད་ལ་ཁེལ་ཏེ། སེམས་ལ་འབྱོར་ཞེས་པ། བྱང་ཆུབ་ཀྱི་སེམས་སྦྱངས་པ་དང་པོས་འཁོར་བ་ལས་བློ་ལྡོག །གཉིས་པས་སྡུག་བསྔལ་ལ་ཡིད་འབྱུང། གསུམ་པས་དད་པ་སྔོན་དུ་འགྲོ། བཞི་པས་བླ་མའི་གདམས་ངག་ལ་འཇུག །ལྔ་པས་སྒོམ་པ་ལ་བསྲན་ཚུགས། དྲུག་པས་བྱ་བ་ངན་པ་ལ་མི་འཇུག །བདུན་པས་ཏིང་ངེ་འཛིན་གོང་ནས་གོང་དུ་འཕེལ་བ་རྣམས་སོ། །ཇི་ལྟར་སྒྲ་ཡི་རྣལ་འབྱོར་པས། །ཞེས་པའི་དོན་ནི། ཇི་ལྟར་ཞེས་པ་མཁྱེན་པ། སྒྲའི་ཞེས་པ་འབྱུང་བ་བཞི། རྣལ་འབྱོར་པས་ཞེས་པ་སྒྲ་འབྱུང་བ་ལ་ཆུའི་རྣལ་འབྱོར་བྱ། སྒྲ་གནས་པ་ལ་སའི་རྣལ་འབྱོར་བྱ། སྒྲ་འཇུག་པ་ལ་རླུང་གི་རྣལ་འབྱོར་བྱ། སྒྲ་ལྡོག་པ་ལ་མེའི་རྣལ་འབྱོར་བྱ། ས་ཆུ་མེ་རླུང་འབྱུང་བ་(༧༠)བཞི། །ཞེས་པའི་དོན་ནི། ས་ཆུ་ཞེས་པ་ལྃ་ཁྃ། མེ་རླུང་ཞེས་པ་རྃ་ཡྃ། འབྱུང་བ་བཞི་ཞེས་པ་སོ་སོའི་ཡིག་འབྲུ་དང་ལྷའོ། །སྒྲ་དོན་རྣམས་ལ་གོམས་པ་ཡིས། །ཞེས་པའི་དོན་ནི། ཆུ་སྒྲ་བཤུད་པ། ས་སྒྲ་ལྡེག་པ། མེ་སྒྲ་འཚིག་པ། རླུང་སྒྲ་སྦིར་བ། ནམ་མཁའི་སྒྲ་སེང་པའོ། །རྣམས་ལ་ཞེས་པ་ལྔ་པོ་ལ། གོམས་པ་ཡིས་ཞེས་པ་འབྱུང་འཇུག་གནས་ལྡོག་ལ། རིགས་དྲུག་རྣམས་ཀྱི་རང་སྐད་ཀྱིས། །ཞེས་པའི་དོན་ནི། རིགས་དྲུག་ཅེས་པ་འགྲོ་བ། རྣམས་ཀྱི་ཞེས་པ་ལྷ་ཚངས་པ་མན་ཆོད། རང་སྐད་ཀྱིས་ཞེས་པ་སོ་སོ་རང་རང་གི། མངོན་ཤེས་འཆར་བ་འདིས་འགྲུབ་བོ། །ཞེས་པའི་དོན་ནི། མངོན་ཤེས་ཞེས་པ་འདས་མ་འོངས་ད་ལྟར་གྱི། འཆར་བ་ཞེས་པ་རང་ལ། འདིས་འགྲུབ་བོ་ཞེས་པ་འབྱུང་བ་བཞིའི་སྒྲ་ལ་བརྟག་ཅིང་ཧ་རི་ནི་ས་བཟླས་ན། ཞག་རིམ་དུས་ནི་རྣམ་དྲུག་གིས། །ཞེས་པའི་དོན་ནི། ཞག་རིམ་ཞེས་པ་ཚེས་གཅིག་ནས་བཅུ་དྲུག་ཚུན་ཆོད་ལྷའི་སྐད། ཚེས་བདུན་ནས་བཅུ་གཉིས་ཚུན་ཆོད་ལྷ་མིན་སྐད། བཅུ་གསུམ་ནས་བཅོ་བརྒྱད་ཚུན་ཆོད་མིའི་སྐད། བཅུ་དགུ་ནས་ཉི་ཤུ་བཞི་ཚུན་ཆོད་བྱོལ་སོང་གི་སྐད། དེ་ནས་ཞག་གསུམ་ཡི་དྭགས་སྐད། དེ་ནས་ཞག་གསུམ་དམྱལ་བའི་སྐད་དོ། །དུས་ནི་ཞེས་པ་ལྷའི་འཇུག་པ་དཔྱིད་ཟླ་ར་བ། འབྱུང་བ་དབྱར་ཟླ་ར་བ། གནས་པ་སྟོན་ཟླ་ར་བ། ལྡོག་པ་དགུན་ཟླ་ར་བ། ལྷ་མིན་འབྲིང་པོ་བཞི། མི་ཐ་ཆུང་བཞི། རྣམ་དྲུག་ཅེས་པ་ཞག་རེ་ལ་དུས་ཆུང་དྲུག་སྟེ། སྐྱ་རེངས་ཤར་ནས་ཉི་མ་རྩེ་ཤར་ལྷའི་སྐད། རྩེ་ཤར་ནས་དྲོས་པོ་ཆེ་ཚུན་ཆོད་ལྷ་མིན་སྐད། དྲོས་པོ་ཆེ་ནས་གྲིབ་ཆེན་ལྷགས་ཚུན་ཆོད་མིའི་སྐད། གྲིབ་ཆེན་ལྷགས་ནས་ཉི་མ་དམར་ཐག་ཆོད་པ་ཚུན་ཆོད་བྱོལ་སོང་གི་སྐད། ཉི་མ་དམར་ཐག་ཆོད་ནས་ནམ་མ་ཕྱེད་ཚུན་ཆོད་ཡི་དྭགས་སྐད། ནམ་མ་ཕྱེད་ནས་སྐྱ་རེངས་ཤར་བ་ཚུན་ཆོད་དམྱལ་བའི་སྐད། མཁའ་འགྲོ་ལྔ་དང་ཡང་སྦྱར་རོ། །དེ་ལ་སོགས་པ་དང་གང་རུང་བ་ཞིག་གི་སྐད་ལྷང་ལ་བྱུང་བ་དང་། རླུང་འབྱུང་འཇུག་གནས་ལྡོག་ལ་བརྟགས་པས། འདི་ཡི་སྐད་ཀུན་རང་དུས་ཤེས། །ཞེས་(༧༡)པའི་དོན་ནི། འདི་ཡི་ཞེས་པ་དུས་རྩིས། སྐད་ཀུན་ཞེས་ཤེས་པ་རིགས་དྲུག་དང་མཁའ་འགྲོའི། རང་དུས་ཤེས་ཞེས་པ་སོ་སོ་རང་རང་གི་སྐད་དང་སྐལ་བ་ཅན་གྱིས། འགྲུས་པ་མེད་པར་སུས་ཤེས་པ། །ཞེས་པའི་དོན་ནི། འགྲུས་པ་ཞེས་པ་དུས་གནད་ལ། མེད་པར་ཞེས་པ་མ་ནོར་བར། སུས་ཤེས་པ་འབྱུང་བཞིའི་རྣལ་འབྱོར། མ་འོངས་ད་ལྟར་འདས་པ་ཡི། །ཞེས་པའི་དོན་ནི། མ་འོངས་ཞེས་པ་ཕྱིས། ད་ལྟར་ཞེས་པ་སྐྱེ་བ་འདི། འདས་པ་ཞེས་པ་སྔར། སེམས་རྒྱུད་ཇི་ལྟར་ཤེས་པར་འགྱུར། །ཞེས་པའི་དོན་ནི། སེམས་རྒྱུད་ཅེས་པ་དགའ་མི་དགའ་དང་། ཡོད་མེད་དང་ནམ་འཆི་གར་སྐྱེ་མ་ལུས་པ། ཇི་ལྟར་ཞེས་པ་དེ་ཉིད་མཁྱེན་ཏེ། ཤེས་པར་འགྱུར་ཞེས་པ་མཁའ་འགྲོ་དང་རིགས་དྲུག་གི་དུས་མ་ནོར་བར་ཞར་ལ་འབྱུང་ངོ་། །གཞན་གྱི་དོན་བྱེད་སྤྲུལ་པ་པོས། །ཞེས་པའི་དོན་ནི། གཞན་གྱི་ཞེས་པ་འགྲོ་བ། དོན་བྱེད་ཅེས་པ་སྡུག་བསྔལ་ལས་གྲོལ་བའི། སྤྲུལ་པ་པོས་ཞེས་པ་སངས་རྒྱས་ཀྱི་ཞིང་སྤྲུལ་གྱིས། འདི་ལ་སྔོན་དུ་མ་སྦྱངས་ན། །ཞེས་པའི་དོན་ནི། འདི་ལ་ཞེས་པ་སྒྲ་དང་བཞི་ལ་དུས་བཞི། སྔོན་དུ་ཞེས་པ་ཉམས་སུ་ལེན་པའི། མ་སྦྱངས་ན་ཞེས་པ་ཡོ་གེས། སྤྲུལ་པའི་ས་བོན་འཇོག་པར་ནི། །ཞེས་པའི་དོན་ནི། སྤྲུལ་པའི་ཞེས་པ་རྟགས། ས་བོན་ཞེས་པ་ཕན་གནོད་ཀྱི། འཇོག་པར་ནི་ཞེས་པ་ཁྱད་པར། ནུས་པ་ཉིད་ནི་མི་ཐོབ་བོ། །ཞེས་པའི་དོན་ནི། ནུས་པ་ཞེས་པ་མངོན་ཤེས་ཀྱི། ཉིད་ནི་ཞེས་པ་ཅིག་ཆར། མི་ཐོབ་བོ་ཞེས་པ་བསྒོམ་ལོངས་མེད་པར་ཐུན་མོང་གི་མངོན་ཤེས། ཡང་དག་པའི་མངོན་ཤེས་ལུ་གུ་རྒྱུད་ཉམས་སུ་བླངས་པ་ལས་འབྱུང་ངོ་། །དེས་ན་འབྱུང་བའི་སྒྲ་ལ་བསླབ། །ཅེས་པའི་དོན་ནི། དེས་ན་ཞེས་པ་ཐུན་མོང་གི་མངོན་ཤེས་འདོད་ན། འབྱུང་བའི་ཞེས་པ་ས་ཆུ་མེ་རླུང་གི། སྒྲ་ལ་བསླབ་ཅེས་པ་འབྱུང་འཇུག་གནས་ལྡོག་གི་དུས་ལ། བྱ་བྱེད་ཞེན་པ་བཟློག་པའི་ཕྱིར། །ཞེས་པའི་དོན་ནི། བྱ་བྱེད་ཅེས་པ་བཟོ་དང་སྒྱུ་རྩལ་རྩིས་ལ་སོགས་པའོ། །ཞེན་པ་ཞེས་པ་དེ་དག་ལ། བཟློག་པའི་ཕྱིར་ཞེས་པ་ཐབས། ལག་ནི་བྱ་བྱེད་སྣ་ཚོགས་(༧༢)བྱ། །ཞེས་པའི་དོན་ནི། ལག་ནི་ཞེས་པ་རང་གི། བྱ་བྱེད་ཅེས་པ་གང་གི། སྣ་ཚོགས་བྱ་ཞེས་པ་ལག་ལེན་ལ་བལྡབས་ཏེ། མཁར་ཁང་བརྩིགས་ཤིང་འཇོག་པ་དང་། ས་ཆུ་མེ་རླུང་དང་ཤིང་ལྕགས་ལ་སོགས་པའི་ཕན་པ་རྣམས་དང་། གནོད་བྱ་ཐམས་ཅད་དགྲ་གྲོགས་མ་བུ་རྩི་བ་ལ་སོགས་པ། དེ་བཞིན་འདུས་བྱས་རྣམ་པ་ཡིས། །ཞེས་པའི་དོན་ནི། དེ་བཞིན་ཞེས་པ་དེའི་ཞར་ལ། འདུས་བྱས་ཞེས་པ་འཇིག་པའི་ཆོས་ཅན། རྣམ་པ་ཡིས་ཞེས་པ་ཐམས་ཅད་བྱས་པས། དབང་པོའི་མངོན་ཞེན་བཟློག་པ་སྟེ། །ཞེས་པའི་དོན་ནི། དབང་པོའི་ཞེས་པ་ལྔའི། མངོན་ཞེན་ཞེས་པ་ཐོག་མ་མེད་པ་ནས། ཟློག་པ་སྟེ་ཞེས་པ་སུན་ཐོན་པར། ཡུལ་རྣམས་གོམས་པའི་གནད་ཀྱིས་སྦྱངས། །ཞེས་པའི་དོན་ནི། ཡུལ་རྣམས་ཞེས་པ་དབང་པོའི། གོམས་པའི་ཞེས་པ་དེ་རྣམས་ལ། གནད་ཀྱིས་སྦྱངས་ཞེས་པ་ཞེན་པ། ཇི་ལྟར་གཉིད་དང་རྨི་ལམ་དུ། །ཞེས་པའི་དོན་ནི། ཇི་ལྟར་ཞེས་པ་དོན། གཉིད་དང་ཞེས་པ་མཚན་མོའི། རྨི་ལམ་དུ་ཞེས་པ་འོད་གསལ་དུ་བསྲེ་བ། དུས་བཞི་འབྱུང་བའི་གནད་ཀྱིས་དབྱེ། །ཞེས་པའི་དོན་ནི། དུས་བཞི་ཞེས་པ་སྟོན་དཔྱིད་དབྱར་དགུན་ནོ། །འབྱུང་བའི་ཞེས་པ་སྟོན་ས། དགུན་ཆུ། དཔྱིད་རླུང་། དབྱར་མེ། གནད་ཀྱིས་དབྱེ་ཞེས་པ་སའི་དུས་ལ་རིག་པ་ལུ་གུ་རྒྱུད་སྤྱི་བོར་བཟུང་ལ་ཉལ། ཆུའི་དུས་ལ་རིག་པ་ལུ་གུ་རྒྱུད་མགྲིན་པར་བཟུང་ལ་ཉལ། མེའི་དུས་ལ་རིག་པ་ལུ་གུ་རྒྱུད་སྙིང་ཁར་བཟུང་ལ་ཉལ། རླུང་གི་དུས་ལ་རིག་པ་ལུ་གུ་རྒྱུད་ལྟེ་བར་བཟུང་ལ་ཉལ། ཚད་ནི་གནད་ལ་ཕེབས་པས་བཟུང་། །ཞེས་པའི་དོན་ནི། ཚད་ནི་ཞེས་པ་སེམས་བསྐྱེད་པ་དང་ཚོགས་གསོག་པ་དང་གསོལ་བ་འདེབས་པ་སྔོན་དུ་བཏང་སྟེ། ཅི་དང་ཅི་ལ་ཡང་རྨི་ལམ་ཡིན་སྙམ་པ་ཐིས་ཕུར་དུ་བྱས་པས་རྨི་ལམ་དུ་ཤེས་པའོ། །གནད་ལ་ཞེས་པ་དེ་ནས་དཔེ་རྟགས་དོན་གསུམ་གྱི་ངོ་སྤྲོད་ཆོས་ཐིས་ཕུར་དུ་སྦྱངས་པས། ཕེབས་པས་བཟུང་ཞེས་པ་ཉིན་ནུབ་མེད་ཙ་ན། འཁོར་འདས་ཀྱིས་བསྡུས་པ་ཐམས་ཅད་ཞི་ཁྲོའི་དཀྱིལ་(༧༣)འཁོར་ཡིན་ཞེས་ངག་ཏུ་ཡང་བརྗོད། ཡིད་ཀྱིས་ཀྱང་ཐིས་ཕུར་དུ་བྱས་པས་རྨི་ལམ་དུ་ལུ་གུ་རྒྱུད་དང་ཞིང་ཁམས་ཟིན་ཏེ། སྙམ་བྱེད་ཀྱིས་ལྟ་བས་མྱོང་བྱེད་ཀྱིས་མཐོང་སྟེ། ཡེ་ཡིན་ལ་སླེབས་པ་ཞེས་བྱའོ། །ཐེག་པ་ཐུན་མོང་པ་དང་སྙམ་བྱེད་གཅིག་ཀྱང་། མྱོང་བྱེད་དང་ཡེ་ཡིན་པ་གཅིག་པས་སྤྲུལ་པ་ལ་སོགས་པ་མ་དགོས་སོ། །ཐིག་ལེ་ཕྱི་ནང་བསླབ་བྱའི་ཕྱིར། །ཞེས་པའི་དོན་ནི། ཐིག་ལེ་ཞེས་པ་ཐབས་ཤེས་རབ་གཉིས་ཀྱི་ས་བོན། ཕྱི་ནང་ཞེས་པ་བློ་ཆེ་ཆུང་གིས། བསླབ་བྱའི་ཕྱིར་ཞེས་པ་རླུང་ལ། དེ་ཡང་ཕོ་རླུང་སྣ་བུག་གཡས་ནས་རྒྱུ། མོ་རླུང་སྣ་བུག་གཡོན་ལ་རྒྱུ། ཡབ་ཡུམ་གཉིས་མེད་ཀྱི་རླུང་མཉམ་པོར་རྒྱུ། ཕོ་རླུང་གི་དུས་སུ་མི་རྟོག་བསྒོམ། མོ་རླུང་གི་དུས་སུ་གྲོལ་ལམ་བསྒོམ། གཉིས་མེད་ཀྱི་དུས་སུ་ཆགས་ལམ་སྦྱང་། གང་ཟག་རྣམ་པ་གཉིས་དོན་བྱ། །ཞེས་པའི་དོན་ནི། གང་ཟག་ཅེས་པ་ཉམས་སུ་ལེན་པའི། རྣམ་པ་ཞེས་པ་བློ་ཆེ་ཆུང་། གཉིས་དོན་བྱ་ཞེས་པ་གྲོལ་ལམ་དང་ཆགས་ལམ་གཉིས་ལས་གྲོལ་ལམ་པས་རང་གི་བདེ་བ་ལ་ཉམས་སུ་བླངས་ཏེ། འོད་རིག་ལ་བརྟེན་ནས་དབབ་བཟུང་ལྡོག་དགྲམ་བདེ་སྟོང་དབྱེར་མེད་སངས་རྒྱས་ཀྱི་དགོངས་པ་དང་བསྲེའོ། །ཆགས་ལམ་པས་ཡབ་ཡུམ་གཉིས་མེད་ཀྱི་བདེ་བ་ཉམས་སུ་བླངས་ཏེ། དེ་ཡང་རིག་མ་མཚན་ལྡན་ལ་བརྟེན་ཏེ་ཐིག་ལེ་དབབ། མཚན་ལྡན་ནི་དཀར་སངས་འཕྲ་ལྡེམ་ཆུང་བར་མངོན་པ་ནི་བདེ་གཤེགས་རིགས་སོ། །སྔོ་སངས་བཤན་པ་རྡོ་རྗེ་རིགས། སེར་སངས་གྲུ་བཞི་རིན་ཆེན་རིགས། དམར་སྨུག་སོ་ལེགས་སྐད་སྙན་མིག་ཟླ་གམ་པདྨའི་རིགས། ལུས་ཆེ་འགྲོས་བུལ་གོམ་རླབས་ཆེ་ཆ་ཆ་ནས་ཆེ་བ་ནི་ལས་ཀྱི་རིགས། དེ་རྣམས་གང་ཡིན་ཀྱང་དད་པ་དང་བརྩེ་སེམས་སྙིང་རྗེ་ཆེ་བ། བློ་ཁོག་ཆེ་ཞིང་ལྟ་དགོངས་མཐོ་བ་ནི་མཆོག་གོ། །དེ་ལྟ་བུ་ལ་ལྟ་རྒོད་འཛིན་འཇིབ་མཉེ་སྣོམ་པས་ཕེབས་སོ། །བསྒོམ་པ་ལྷ་སྟེ་ཞི་ཁྲོ་གང་མོས་སུ་ཡབ་ཡུམ་བསྐྱེད་དོ། །ཐིག་ལེ་འཛིན་པ་དེ་ངོ་བོ་སྟེ་བྱུང་ས་གནས་ས་འགྲོ་ས་ལྟ་བའོ། །འདྲེན་པ་ཧཱུྃ་སྟེ་(༧༤)གསུས་པ་སྒལ་པ་ལ་སྦྱར། སྒྲོན་མ་གྱེན་ལ་ཟློག །མགྲིན་པ་གཞུ་ལྟར་བདུངས། དམིགས་པ་རྩ་གསུམ་ན་ཡར་ཞོ་ལུད་པ་ལྟར་སྤྱི་བོར་ལན་བདུན་བསྐྱལ། འགྲེམས་པ་སྤྲུག་སྟེ་རླུང་བཟུང་ཉྭ་བཞི་སྒྲིམ་མགོ་ལུས་སྤྲུག་གོ། །སྐྱེལ་སོ་ངོ་བོ་རང་བཞིན་ཐུགས་རྗེ་གསུམ་སྟེ། རིགས་ལྔ་ཚོམ་བུའི་དཀྱིལ་འཁོར་རོ། །བཅོས་མ་འདུས་བྱས་བསྒོམས་པ་ཡིས། །ཞེས་པའི་དོན་ནི། བཅོས་མ་ཞེས་པ་ལུས་ངག་ཡིད་གསུམ། འདུས་བྱས་ཞེས་པ་ལུས་འདུས་བྱས་ལྷ་ཡི་བསྒོམ། ངག་འདུས་བྱས་ཧཱུྃ་རིང་ཧཱུྃ་ཐུང་། སེམས་འདུས་བྱས་དམིགས་པ། བསྒོམ་པ་ཡིས་ཞེས་པ་ཡིད་དཔྱོད། དང་པོ་སེམས་གཡེང་ཞེན་པ་དགག །ཅེས་པའི་དོན་ནི། དང་པོ་ཞེས་པ་ལས། སེམས་གཡེང་ཞེས་པ་མ་ཆུན་པས། ཞེན་པ་དགག་ཅེས་པ་རིགས་ཆད་པ་ཐུགས་རྗེས་བཟུང་བས་གདོད་རིག་པ་མངོན་སུམ་ལ་ངེས་ཤེས་སྐྱེའོ། །འབྲས་བུ་ཅིག་ཆར་མ་ཡིན་པས། །ཞེས་པའི་དོན་ནི། འབྲས་བུ་ཞེས་པ་སངས་རྒྱས་ཀྱི། ཅིག་ཆར་ཞེས་པ་མངོན་སུམ་དུ། མ་ཡིན་པས་ཞེས་པ་སྐྱེ་བ་བརྒྱུད་པར་བྱེད་དོ། །སྣང་བ་རིམ་གྱིས་གོམས་པར་བྱ། །ཞེས་པའི་དོན་ནི། སྣང་བ་ཞེས་པ་གང་ཟག་གི། རིམ་གྱིས་ཞེས་པ་དང་པོ་བྱང་ཆུབ་ཀྱི་སེམས་སྦྱངས་ཏེ། སྣང་བ་བདེན་མེད་དུ་རྟོགས་པར་བྱ། དེ་ནས་བསྐྱེད་རིམ་བསྒོམས་ཏེ་སྒྲ་གྲག་སྟོང་དུ་རྟོགས་པར་བྱ། དེ་ནས་རྩ་དང་རླུང་བསྒོམས་ཏེ། ལམ་གྲོལ་ལམ་ཆགས་ལམ་གྱིས་སྣང་བ་བདེ་སྟོང་དུ་རྟོགས་པར་བྱ། དེ་ནས་མཚན་ཉིད་འཛིན་པའི་རིག་པ་མི་དྲན་དགུ་དྲན་འདི། ཕཊ་བྱས་ཏེ་ཉོན་མོངས་ཁྱེར་ཆོད། ངོ་རང་ཐོག །ཐག་ཆིག་ཆོད། གདིང་གྲོལ་ཐོག་སྟེ་ནམ་མཁའ་ལྟ་བུར་རྟོགས་པར་བྱ། གོམས་པར་བྱ་ཞེས་པ་ལོ་གཉིས་གསུམ་དུ་གོང་མ་རྣམས་ལ། མིག་སྨན་ལ་སོགས་སྒོ་ལྔ་ཡི། །ཞེས་པའི་དོན་ནི། མིག་སྨན་ཞེས་པ་དབང་པོ་དྭངས་བྱེད་ཀྱི། ལ་སོགས་ཞེས་པ་བྱ་ཐབས་ལྔ། སྒོ་ལྔ་ཞེས་པ་གཟུགས་སྒྲ་དྲི་རོ་རེག་བྱའོ། །སྨན་གྱི་རིམ་པ་སྦྱར་བར་བྱ། །ཞེས་པའི་དོན་ནི། སྨན་གྱི་ཞེས་(༧༥)པ་སྒོ་ལྔའི། རིམ་པ་ཞེས་པ་སོ་སོ་གང་འདོད། སྦྱར་བར་བྱ་ཞེས་པ་དང་པོ་མིག་གི་གཟུགས་ནི་ཁ་དོག་དང་དབྱིབས་སོ། །ཁ་དོག་ནི་ལྔའོ། །བཙོད་གདུས་པའི་ཁན་དྷ་དང་ཨ་རུ་རའི་ཁན་དྷ་ཙན་དན་དཀར་དམར་གྱི་ཐང་ཆུ། བྱ་ནག་མོའི་སྒོ་ངའི་མར། གཙོད་ཀྱི་མིག་དང་ར་དཀར་མོའི་འོ་མ་དང་། དེ་རྣམས་རིམ་པར་སྦྱར་ལ། ལྕགས་ཀྱི་སྣོད་དུ་ཞག་ཉི་ཤུ་རྩ་གཅིག་བྱིབས། དེ་ནས་ཞག་བདུན་པ་དང་། གསེར་ནས་ཙམ་དང་གཡུ་ནས་ཙམ་གཉིས་ཕྱེ་མར་བཏགས་ཏེ་གོང་གི་རྫས་ལ་བཏབ་ཏེ་དཀྲུགས། དེ་ནས་གོས་ཀྱིས་བྱིབས་ཏེ་ཞག་བཅུ་བཞི་ནས་བལྟའོ། །དེ་ལ་བལ་སྔོ་སོབ་ཀྱིས་ཡོང་སྟེ། མ་བྱུང་ན་ཕབ་ཞོ་ཕྱེད་བཏབ་ནས་ཞག་དགུ་བཞག་པས་གོང་ལྟར་འོང་ངོ་། །དེ་ལྟར་བྱུང་བ་དང་། རིལ་བུ་མཐེབ་རྡོག་ཙམ་བྱས་ཏེ་བསྐམ། དེ་ནས་ཁ་དོག་ཏུ་བསྒྱུར་བ་ནི་རི་ལུ་གཅིག་དང་། སྐྱེར་པའི་བར་ཤུན་གྱི་ཁན་དྷ་རུ་ལྡོང་རོས་ཕུལ་གང་ཡུང་བ་དེ་དང་མཉམ་པ་གཅིག་གདུ། དེ་བཙགས་པའི་ཁུ་བ་བྱ་ནག་མོའི་སྒོ་ངའི་སེར་པོ་དང་། བུད་མེད་ནུ་ཞོ་དང་སྦྱར་ནས་མིག་ལ་ཉི་མ་རེ་ལ་ལན་ཉི་ཤུ་རྩ་གཅིག་བྱུགས་ན། ཉི་མ་བདུན་གྱི་བར་ལ་མཉམ་པ་ཉིད་ཀྱི་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་སྤྱང་ཚེར་མའི་མེ་ཏོག་ལུག་མིག་པ་དང་། སྤང་རྒྱན་གྱི་མེ་ཏོག་དང་། མན་དྷ་ར་བའི་མེ་ཏོག་རྣམས་གདུས་པའི་ཁན་དྷ་དང་། སྤང་མ་བྱ་རྒོད་ཀྱི་སོར་མོ་མིའི་འོ་མར་སྦྱར་ནས་གོང་ལྟར་བྱུགས་ན། ཆོས་ཀྱི་དབྱིངས་ཀྱི་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་སིན་དྷུ་ར་འབྲི་མོག་ཕྱི་རྩི་སྨུག་པོ་སྦལ་རྒྱབ་ཀྱི་ཁུ་བ་དང་རྒྱ་ཤུག་འབྲས་བུ་གདུས་པའི་ཁན་དྷ་བྱ་སྒོང་མིའི་འོ་མར་སྦྱར་ནས་གོང་ལྟར་མིག་ལ་བྱུགས་ན། སོ་སོར་རྟོག་པའི་ཡེ་ཤེས་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་གོང་གི་རིལ་བུ་གཅིག་དང་བྱ་རྒོད་ཀྱི་བྲུན་དཀར་པོ་དང། སོ་བྱའི་སྒོ་ངའི་ནང་གི་ཆུ། ཨུཏྤལ་དཀར་པོའི་མེ་ཏོག་སྤང་རྒྱན་དཀར་པོ་ཤང་ཤང་དཀར་པོ་སེ་བའི་མེ་ཏོག་དཀར་པོ་རྣམས་ཕྱེ་མར་བྱས་ཏེ། བྱ་སྒོང་མིའི་འོ་མར་སྦྱར་ལ་གོང་ལྟར་མིག་ལ་བྱུགས་ན། མེ་ལོང་ལྟ་བུའི་(༧༦)ཡེ་ཤེས་སྣང་བར་འགྱུར་བ་ལ་ཐེ་ཚོམ་མེད་དོ། །ཡང་གོང་གི་རི་ལུ་དང་མེ་ཏོག་ལུག་རུ་དམར་སེར་གཉིས་ཀ་དང་། ཐང་ཤིང་ཙན་དན་གྱི་ལོ་མ་རམ་རྒྱ་སྐྱེགས་ཀྱི་ཁུ་བ་དང་སྦྱར་ལ། བྱ་སྒོང་མིའི་འོ་མ་དང་སྦྱར་ལ་གོང་ལྟར་མིག་ལ་བྱུགས་ན། བྱ་བ་གྲུབ་པའི་ཡེ་ཤེས་སྣང་བར་འགྱུར་བ་ལ་ཐེ་ཚོམ་མེད་དོ། །དབྱིབས་ནི་དྷ་དུ་རའི་འབྲས་བུ་བདུན་དང་འོལ་མ་པི་པི་གཅིག་ཙན་དན་དམར་པོའི་ཐང་ཆུ་ཁྱོར་བ་གང་། ཁྱི་དཀར་པོའི་ཀླད་པ་ཞོ་གཅིག་འདམ་གྱི་པད་མ་དཀར་པོ་དྲུག་དང་། བྱའི་སྒོ་ངའི་མར་སྲང་ཕྱེད། ཆང་བཟང་པོ་བྲེ་དོ་བྲེ་ཕྱེད་དུ་གདུས་པའི་ཁན་དྷ་རྣམས་སྦྱར་ལ། མཁར་བའི་སྣོད་དུ་བླུགས་པ་ལ། སའི་དོང་ཁྲུ་དོའི་འོག་ཏུ་ཟླ་གཅིག་ལ་བཞག་ནས། དེ་ཨེ་ལངས་ཁ་ཕྱེ་ནས་བལྟས་པས་སྦུ་ཆུང་ཉུང་འབྲུ་ཙམ་ཏལ་ཏལ་ཡར་ནས་འོང་ངོ་། །དེ་མ་བྱུང་ན་སྦྲང་རྒོད་ཕུལ་ཕྱེད་དང་དོ་བླུགས་ནས་ཞག་གསུམ་མནན་ནོ། །དེ་ནས་རི་ལུ་སྲན་མ་ཙམ་བྱས་ཏེ། རིལ་བུ་གཅིག་དང་མཚོན་ཆའི་ཕྱེ་མ་སྦྱར་ནས་ཟོས་ན་ཐམས་ཅད་མཚོན་ཆར་འགྱུར། སྟག་གི་འགྲམ་པ་གཡས་པའི་རུས་པ་སྦྱར་ནས་ཟོས་ན་སྣང་བ་ཐམས་ཅད་སྟག་ཏུ་འགྱུར་བར་ཐེ་ཚོམ་མེད་དོ། །དུད་འགྲོ་གང་གིས་སྣང་བ་བྱེད་ཀྱང་དེའི་འགྲམ་རུས་དང་སྦྱར་གྱིན་ཟོས་པས་དེར་འགྱུར་བར་ཐེ་ཚོམ་མེད་དོ། །སའི་ཞག་དང་སྦྱར་ན་སའི་སྣང་བ། ཙན་དན་གྱི་མེ་སྟག་དང་སྦྱར་ན་མེའི་སྣང་བ། ཆབ་རོམ་དང་སྦྱར་ན་རླུང་གི་སྣང་བ། ཆུ་སྣ་བཅུ་གཅིག་དང་སྦྱར་ན་ཆུའི་སྣང་བ། ལྷང་མ་ལྷང་ཚེར་མ་དང་། ཐོད་ལེ་སྐོར་དང་སྦྱར་ནས་ཟོས་ན། ནམ་མཁའི་སྣང་བ་འཆར་རོ། །རང་གི་ཡི་དམ་གྱི་ལྷ་གང་ཡིན་པའི་སྐུ་ཤེལ་ལས་ཚོན་གང་པ་བྱས་ཏེ། དེའི་སྐུ་དང་སྦྱར་ནས་ཟོས་ན། སྣང་བ་ཐམས་ཅད་ལྷའི་སྐུར་འཆར་རོ། །ཡང་ལྷ་བཟོ་མཁས་པས་ལྷང་མ་ལྷང་ཚེར་མ་ལ་རྨ་བྱའི་ཁྲག་གིས་ཡི་དམ་གྱི་ལྷ་བྲིས་ནས་བཙན་དུག་གི་དུད་པས་བདུག་པས། འཇའ་ཚོན་སྣ་ལྔའི་ཡི་དམ་གྱི་ལྷ་རུ་འོང་སྟེ་དེ་དང་རི་ལུ་སྦྱར་ནས་ཟོས་ན་འཇའ་ཚོན་དང་ལྷའི་སྐུ་རུ་སྣང་བ་ཐམས་ཅད་དུ་འཆར་རོ། །རི་མོ་(༧༧)གང་འདོད་བྲིས་ཏེ་བལྟས་ནས་ཟོས་ན་གང་འདོད་དུ་སྣང་བ་ཡིན་ནོ། །སྒྲ་ནི་བུམ་ལྡིར་གྱི་རྔ་ལ་བརྟེན་པས་ནང་གི་ཉམས་སྐྱེ། རྫ་རྔ་ཁ་མང་ལ་བརྟེན་ན་ཕྱིའི་ཉམས་སྐྱེ། རྔ་དྲ་བ་རྒྱུད་མང་ལ་བརྟེན་པས་སྣང་བ་སྣ་ཚོགས་པའི་ཉམས་སྐྱེ། གླིང་བུའི་སྒྲ་ལ་བརྟེན་ན་ཤེས་པ་གཞན་ལ་མི་འཇུག་པའི་ཉམས་སྐྱེ། པི་ཝང་གི་སྒྲ་རྡོ་ཕག་དང་ཆ་ལང་དང་དུང་ཏིང་གི་སྒྲས་རང་བཞིན་དུ་མི་གནས་དང་། སྒྲའི་དབྱིངས་ཀྱི་དོན་རྟོགས་ཏེ་དཔེའོ། །དོན་རྣ་བའི་སྒྲ་ནི་སྒྲ་མངོན་སུམ་མོ། །རྟགས་ཐོས་པ་རྣམས་སོ། །ཤིང་ཀ་ར་བཱི་རའི་འབྲས་བུ་བདུན་ཟོས་ནས་ཉལ་ན། ལྷ་དང་ལྷ་མིན་གྱི་སྒྲ་ཐོས་སོ། །སྲི་ཤིང་གི་འབྲས་བུའི་ནང་ཕྱེ་དང་ཞིམ་རྩེ་ཏིལ་དང་། ཤིང་ཀ་ར་བཱི་རའི་འབྲས་བུ་བདུན་གྱི་ཕྱེ་འབྲུ་མར་དང་སྦྱར་ནས་རྣ་བའི་བུག་པ་གཡས་སུ་བླུགས་ན་དམྱལ་བའི་སྒྲ་ཐོས་སོ། །ཡང་ཤིང་ཀ་ར་བཱི་རའི་འབྲས་བུ་བདུན་དང་ཤིང་ལྡེམ་པ་དང་མ་ཧ་ལྡེ་བ་དང་། འབྲུག་རུས་ཀྱི་ཕྱེ་མ་དང་འབྲུ་མར་སྦྱར་ནས་རྣ་བུག་གཡོན་དུ་བླུགས་ན་ཡི་དྭགས་ཀྱི་སྒྲ་ཐོས་སོ། །ཡང་ཤིང་ཀ་ར་བཱི་རའི་འབྲས་བུ་བདུན་དང་རྡོ་རྗེ་ཅན་གྱི་ཤིང་ཆུ་ཤིང་གི་སྙིང་པོ་དང་། ཁ་བྲལ་བྲེ་བོ་སེང་ལྡེང་གི་དབུས་སྙིང་གི་རྩེ་རྣམས་འབྲུ་མར་དང་སྦྱར་ནས་རྣ་བ་གཉིས་ཀར་བླུགས་ན་བྱོལ་སོང་གི་སྒྲ་ཐོས་སོ། །གོང་གི་སྒྲ་བཞི་ལ་སློབ་པའི་དུས་སུ་རྫས་དེ་ལྟ་བུ་དང་སྒྲ་འཇུག་ལྡོག་གནས་པའི་དུས་དང་བསྟུན་ནས་བརྟགས་ན། དོན་ཅིག་ཆར་འགྲུབ་པ་ལ་ཐེ་ཚོམ་མེད་དོ། །དྲི་ནི་གུ་གུལ་དཀར་པོ་རྒྱ་ཤུག་གི་འབྲས་བུ་ཨ་ཀ་རུའི་ཕྱེ་མ་དང་ག་པུར་གྱི་སྙིང་པོ་དང་། མུ་ཟི་བྱ་སྒོང་གིས་བརྟུལ་བ་དང་། ཤིང་བྱིལ་པའི་རྩ་བ་ཉའི་ཀླད་པ་འུག་པའི་མིག །རི་སྐེགས་ཀྱི་མཇུག་རྩེ་རྨ་བྱའི་མགྲིན་པ་སྲིན་པོའི་སྣའི་རྩེ་མོར་སྦྱར་ནས། བ་གླང་པོས་ཟོས་ཏེ་ཤི་བའི་ཕོ་བའི་ནང་དུ་བླུགས་སྦྲང་རྒོད་ཁྱོར་གང་ཡང་བླུགས་སྤོས་སྣ་ཚོགས་ཀྱི་ལོ་མ་དང་ཙན་དན་གྱི་ལོ་མས་བྱིབས་ལ་ཞག་བཅུ་དགུར་མནན་ནས་ཁ་ཕྱེ་བ་དང་། སྣའི་རྩེ་མོར་ཐིག་ལེ་གཅིག་བྱས་ན་བདེ་བ་དང་མི་རྟོག་པའི་ཉམས་སྐྱེ་བ་ལ་ཐེ་ཚོམ་(༧༨)མེད་དོ། །རོ་ནི་བུ་རམ་གྱི་ཤིང་སྨིན་པ་སོར་བཞི་བཞིར་གཏུབས་ཏེ། སྦྲང་རྩིའི་སྙིང་པོ་བྲེ་གང་དུ་བཙོས་ཏེ་ཐེམ་པ་དང་། ཏིལ་མར་ཕུལ་དོ་བཙོས་ཏེ་ཐོན་པ་དང་། རྡོ་གཏུན་ནང་དུ་ཁ་ཚིར་བྱས་ཏེ། མར་བཟང་པོ་དང་ག་པུར་སྲན་མ་བདུན་དང་མཉམ་པ་གཅིག་དང་། མི་རྐང་གདུས་པའི་སྙིང་པོ་ཞོ་གཉིས་དང་སྦྲང་རྒོད་ཕུལ་གང་ཏིལ་ཆང་ཕུལ་གང་། དེ་རྣམས་དང་ཆང་སྦྱོར་བ་ཡིན་ཏེ། རྫ་གསར་པ་ཕུལ་དགུ་དགུ་ཤོངས་པ་དགུ་བྱས་ཏེ། དེ་ནས་འབྲས་བཙོས་པའི་ཆང་ལ་ཕབས་དང་སྦྲང་རྒོད་ཞོ་གཅིག་བཏབ་ལ་དེ་ལངས་པ་དང་། རྫའི་སྣོད་ཁ་ཆུང་བར་བྱས་ཏེ། དེའི་ནང་དུ་བླུགས་ལ། ཁེངས་པར་བྱས་ལ་ཤིང་ལོས་ཁ་བཅད། དེ་ནས་ཁ་སས་བཅད། དེ་ནས་ཞག་ཉི་ཤུ་རྩ་གཅིག་ན་གཅིག་གི་ནང་དུ་ནས་ཀྱི་ཆང་བཟང་པོ་དང་། མི་ཞུན་རྙིང་པ་དང་སྦྱར་ལ་བླུག །དེ་ནས་དེ་བཙགས་ལ་གཅིག་ཏུ་བསྲེ། དེ་ནས་དགུའི་མཇུག་མ་ལ་དེ་བཙགས་པ་ཕུལ་གང་འོང་བ་བྱས་ཏེ། དེ་ཕུལ་ཕྱེད་དུ་གདུ་བ་དང་། གོང་མ་རྣམས་དང་སྦྱར་ལ། ལྕེའི་སྟེང་དུ་ཐུར་མས་ལན་ཉི་ཤུ་རྩ་གཅིག་ཏུ་བཞག་ན། ཉི་མ་བདུན་གྱི་བར་ལ་ཅི་ཡང་ཡིད་ལ་མི་འགྱུ་སྟེ། རང་བཞིན་གྱི་བསམ་གཏན་ལ་གནས་པ་ཐེ་ཚོམ་མེད་དོ། །རེག་ནི་ཨུ་རྒྱན་གྱི་ཡུལ་བྷེ་བ་རེས་བྱ་བ་ན། ཤིང་མ་ལེ་ཀིས་བྱ་བ་ལོ་མ་གཡས་སུ་འཁྱིལ་པ་ཞིག་ཡོད་དེ། ལོ་མ་མཐུར་དུ་ཟུག་པ་རྩེ་མོ་གསུམ་དུ་གྱེས་པ་ཞིག་ཡོད། དེ་བླངས་ན་དེའི་འདབ་མ་དང་དོམ་གྱི་སྙིང་ཁྲག་བྱུགས་ཏེ་དེ་རང་གི་སྙིང་ཁར་སྦྱར་ན། དེ་དང་མ་བྲལ་གྱི་བར་དུ་མི་རྟོག་པ་རྒྱུད་ལ་སྐྱེ་བ་ཡིན་ནོ། །དེ་ལྟར་དྷཱ་ཀི་མཚན་ལྡན་དང་རང་ཉིད་ཡོ་གིས་གཅིག་ལ་གཅིག་ལྟ་བ་ནི་གཟུགས་ཀྱི་བདེ་བའོ། །རྒོད་ཅིང་གླུ་ལེན་པ་ནི་སྒྲའི་བདེ་བའོ། །ཙན་དན་དང་དུ་རུ་ཀ་བྱུགས་ནས་སྣོམ་རེས་ནི་དྲིའི་བདེ་བའོ། །བུ་རམ་དང་ཀ་ར་མུར་རེས་དང་སྟེར་རེས་དང་ལྕེ་འཇིབ་རེས་ནི་རོའི་བདེ་བའོ། །ཁྲུས་ལེགས་པར་བྱས་ཏེ་ནུ་མ་ཉེད་རེས་དང་གཡའ་དགག་རེས་དང་པད་མའི་ཟེའུ་འབྲུ་ལ་མཛུབ་གུས་རེག་རེག་དང་། ནོར་བུ་དྷཱ་ཀིས་ཁས་འཇིབ་པ་དང་། གཡེར་མ་དང་སྦྲང་རྒོད་ཟེར་རྒོད་གསུམ་ནོར་བུའི་མགོ་ལ་བསྐྱོན་(༧༩)ནས་པད་མར་བརྫངས་ན། མ་འགུལ་ཀྱང་རང་བཞིན་གྱིས་རེག་པས་བདེ་བ་འོང་ངོ་། །དེའི་ཕྱིར་ན་གསང་སྔགས་པས་འདོད་པའི་ཡོན་ཏན་ལྔ་ལ་ལོངས་སྤྱོད་ནས། སྒོ་ལྔའི་ཞེན་པ་ལོག་སྟེ་འབྲས་བུ་སངས་རྒྱས་པ་ཡིན་པས། ཡབ་ཡུམ་གཉིས་མེད་ཀྱི་དོན་ལ་མཁས་པར་བྱའོ། །ཐིག་ལེ་མ་ཤོར་བར་བཟུང་བས་ཡུམ་གྱིས་ཐོབ་འགྲོའོ། །འདི་ཀུན་གསང་བའི་ཐབས་ཡིན་ནོ། །ཞེས་པའི་དོན་ནི། འདི་ཀུན་ཞེས་པ་འདོད་ཡོན་ལམ་དུ་འཁྱེར་བའི་ཆོས། གསང་བའི་ཞེས་པ་བློ་དམན་པའི་རིགས་ལ། ཐབས་ཡིན་ནོ་ཞེས་པ་སྒོ་ལྔའི་ཞེན་པ་དང་བྲལ་ཏེ་སངས་རྒྱས་པའི་ཚེ། ལམ་གྱི་རྟགས་ནི་ལུས་ལས་ནི། །ཞེས་པའི་དོན་ནི། ལམ་གྱི་ཞེས་པ་སངས་རྒྱ་བའི། རྟགས་ནི་ཞེས་པ་ཐུན་མོང་གི། ལུས་ལས་ནི་ཞེས་པ་རང་གི། མངོན་པར་ཕྱི་རོལ་སྣང་འགྱུར་བའི། །ཞེས་པའི་དོན་ནི། མངོན་པར་ཞེས་པ་མིའི། ཕྱི་རོལ་ཞེས་པ་ལུས་ཀྱི། སྣང་འགྱུར་བའི་ཞེས་པ་རྟགས། སྨན་ཉིད་དང་ནི་དེ་བཞིན་ནོ། །ཞེས་པའི་དོན་ནི། སྨན་ཉིད་ཅེས་པ་རྫས། དང་ནི་ཞེས་པ་སྔགས། དེ་བཞིན་ནོ་ཞེས་པ་ལས་འགྲུབ་པ། དེ་ལྟར་འདོད་པ་བརྟེན་པའི་ཡོ་གིས་ལམ་གྱི་གནས་འཁོར་བའི་རྩ་བ་བཅད་པའི་ཐབས་ནི། ལན་ཅིག་ལ་སྲིན་ལག་གཡོན་པའི་རྩ་བ་སྲེ་མོའི་རྒྱུས་པས་བཅིངས་ཏེ། སྦྱོར་བ་བྱས་ན་འཁོར་བ་འཕེལ་མི་སྲིད་དོ། །གཏན་དུ་བཅད་ན་ཙན་དན་དཀར་པོ་དང་ཏི་ཚ་དང་གསེར་ནས་ཙམ་སྦྱངས་པའི་གཡའ་དང་བསྲེས་ལ། སྐྱེས་པ་ལྟོ་བཀུག་ནས་ཐོ་རངས་བཏུང་ན། ཐིག་ལེ་ཉམས་ཀྱང་འཁོར་བ་འཕེལ་མི་སྲིད་དོ། །ཀ་ར་ཞོ་གཅིག་སྟག་ཤ་དེ་དང་མཉམ་པ་དང་། བྱང་པ་དུག་ཕྱུངས་པ་གསུམ་རྩི་བཞིན་དུ་བཏགས་ཏེ། ཞུ་མཁན་ཆུ་ཕུལ་གང་ལ་བཏབ་སྟེ། བུད་མེད་ལ་ལྟོ་སྟོང་ལ་བཏང་ན། འཁོར་བ་གཏན་ནས་ཆོད་དོ། །ཡང་ན་ག་པུར་གུར་གུམ་རྒྱ་ཚིལ་རྨ་བྱའི་སྙིང་རྣམས་ཕྱེ་མ་བྱས་ཏེ། ནོར་བུའི་རྩེར་བྱུགས་ན་ཐིག་ལེ་རྡོ་རྗེའི་བུམ་པར་ཕྱག་རྒྱ་མ་དང་མ་བྲལ་བར་གནས་པ་ཡིན་ནོ། །འོ་མ་ལ་ལྕགས་ཕྱེ་བཏབ་སྟེ། ནོར་བུའི་བུག་པར་རྡོ་ཁབ་ལེན་གྱི་རི་ལུ་བཅུག་(༨༠)ནས་འོ་མ་ལ་ཁ་གཏུགས་ན་འོ་མ་འཐུང་བར་བྱེད་དོ། །གཉེར་མ་མེད་པར་འདོད་ན་མུ་ཙི་རྟའི་འོ་མར་བཙོས་ལ་དེ་ཁམས་བུའི་ཙི་གུའི་མར་དང་རྩི་མར་དང་བ་དམར་མོའི་འོ་མ་དང་བསྲེས་ནས། ལུས་དག་པར་བཀྲུས་ཏེ་རྫས་ཁྱབ་པར་བྱུགས་ཤིང་བཏུང་ན་གཞོན་ཅིང་གཉེར་མ་འོང་མི་སྲིད་དོ། །སྐྲ་དཀར་མེད་པར་འདོད་ན། སྐྲ་བཞར་ལ་དག་པར་བཀྲུས་ཏེ་ཨ་རུ་རའི་ཆུ་བླུག །དེ་སྐམ་པ་དང་ནགས་མཚུར་ཆུ་བྱུགས་པས་སྐྲ་དཀར་ནག་པོར་འགྱུར་བ་ལ་ཐེ་ཚོམ་མེད་དོ། །སོའུ་སྐྱེ་བར་འདོད་ན། མ་ཧེའི་དཔྲལ་བའི་རུས་པ་བྱ་རྒོད་ཀྱི་བྲུན་གྱི་དཀར་པོ་ཅོང་ཟི་འབྲུག་རུས་རྣམས་མཉམ་སྟེ། རྩི་བཞིན་བཏགས་ལ་སྦྲང་རྩི་དང་ཞོ་དང་སྦྱར་ལ་རུ་སྦལ་གྱི་ཁོག་པར་བླུགས་ལ། གོས་ཀྱིས་བྱིབས་ཏེ་ཞག་བཅུ་དགུར་མནན། དེ་ནས་ཁ་ཕྱེ་ནས་བལྟས་པས་དཀར་ལ་གནག་པའི་རི་མོའམ། དམར་པོའི་རི་མོ་འོང་ངོ་། །ཡོ་གིས་ཞག་གསུམ་དུ་ཟས་གཞན་མི་ཟ་བར་འོ་མ་བསྐོལ་ལ་བཏུང་ངོ་། །དེ་ནས་སོའི་ཤུལ་དུ་གོང་མའི་རྫས་བྱུག་ཅིང་སྦྲང་རྩིས་སྟེང་མནན། དེ་ལྟར་ཡང་ཡང་བྱས་ན་ཟླ་བ་གཅིག་ན་སོའུ་སྐྱེའོ། །ལོ་དུས་སོང་ཙ་ན་རྫས་བྱུག་ཅིང་། དེའི་སྟེང་སྦྲང་རྩི་བྱུག།དེའི་སྟེང་དུ་ཟར་མའི་མར་བྱུགས་པས་སོ་དང་སོ་སྙིང་མཁྲེགས་ཤིང་མདོག་དང་ལྡན་པར་འགྱུར་རོ། །མཚན་མོ་འོད་འཕྲོ་ཞིང་གོས་མི་དགོས་པར་བྱེད་ན། སྤྱང་ཚེར་གྱི་རྩེ་ཁྲོག་ཆེན་གྱི་ཚི་བ་དང་། ཤུག་ཚི་ཐང་ཚི་རྒྱ་ཚ་ར་ཚ་ཤིང་ཚ་དང་། ཁ་རུ་ཚ་ལྕེ་མྱང་ཚ་མུ་ཚི། དེ་ཆ་མཉམ་པ་རྣམས་ཕྱེ་མར་བཏགས་ཏེ། སྐྱུང་ཀའམ་བྱ་མོ་ནག་མོའི་སྒོ་ངའི་སེར་པོ་དང་ཚི་བ་ལ་བཏབ་སྟེ། བག་ཟན་གྱིས་དྲིལ་ལ་སླང་ངར་མར་ནག་ཕུལ་གང་དེ་ལ་ཐིམ་པར་བཙོ། དེ་དང་རྡོ་སོལ་ངར་ལྡན་གྱི་ལྕགས་ཕྱེ་དང་། སྦྱར་ནས་རས་སམ་གོས་ཀྱི་ཐོང་ཀ་ལ་བྱུགས་ན། རླུང་ཕྱོགས་སམ་ཕུས་གདབ་ཅིང་མཆིལ་མ་བཏབ་ན། འོད་མེ་བདུན་གྱི་ཚད་དུ་གསལ་ཞིང་གོས་མི་དགོས་ཏེ་དྲོད་འབར་བར་འགྱུར་རོ། །འཚིགས་པ་ཙམ་བྱུང་ནས་ནུའི་ཆུ་བླུག་གོ། །མ་ཤི་བ་དང་ཤི་བའི་དུས་སུ། གདུང་འབྲུལ་བར་འདོད་ན། མུ་ཏིག་དང་མུ་(༨༡)མེན་ཤེལ་དངུལ་ཆུ་ཟེ་ཚ་ཞོ་རེ་སྦྱར་ཏེ། རྫ་གསར་པའི་ནང་དུ་ར་དཀར་མོའི་འོ་མ་ཕུལ་གང་དང་བཅས་ཏེ་བླུགས་ལ། ཁ་ལེགས་པར་བཅད་ལ་འབའ་ཆས་གྲིལ་ཏེ་ཁམ་སས་གྲིལ། ཡང་ན་བའི་ལྕི་བས་གྲིལ། དེ་ཐབ་ཁུང་དུ་བཅུག་ལ་སོལ་བ་སྤུངས་ཏེ། སྦུད་པ་གཉིས་ཀྱིས་རེ་མོས་བུས། ལན་གསུམ་དུ་བསྲེག་ཅིང་བལྟས་པས། རྟགས་ནི་ལྟེང་ལྟེང་མིག་གིས་མི་བཟོད་ན་ཕེབས་པ་ཡིན་ནོ། །གལ་ཏེ་དེ་ལྟར་མ་བྱུང་ན། སྟར་བུ་སྲན་མ་བདུན་དང་མཉམ་པ་བླུག །གོང་ལྟར་བསྲེགས་པས་གཏན་ལ་ཕེབས་སོ། །དེ་ནས་གོང་མའི་རྫས་དང་རིང་བསྲེལ་ཁྱི་ལུད་མེས་བསྲེགས་པ་གཉིས་སྦྱར་ནས་རང་གར་འདོད་པར་བྱུགས་པ་དང་མཉམ་པར། དེ་ནས་གདུང་ཡང་དེ་དང་མཉམ་པར་འཁྲུལ་ལོ། །གླང་པོ་ཆེའི་རུས་པའམ་ཐོད་པའམ་རུས་པ་ལ་གོང་མའི་སྐུ་བྲིས་ཏེ། མེས་བསྲེགས་ན་སྐུ་འོང་ངོ་། །ཡང་ན་བསེ་རུའི་ནང་དང་སྦྱར་ཏེ། སྟག་གི་རྐན་ཕུགས་ཤ་ཆེན་དང་སྦྱར་ནས་བྱུགས་ན་མཆོད་རྟེན་འོང་ངོ་། །ཡང་ན་ཡོ་གར་འདུག་པའི་ཆུར་ཚ་བ་དྷ་ཀ་ཏ་ཤིའི་རྩ་བ་དང་། ཧ་ཤད་ཕྱེ་མ་རྣམས་དང་སྤོས་དཀར་སྦྱར་ཏེ། ཆོས་འཆད་དུས་ན་དུད་པ་བཏང་བས་འཇའ་ཚོན་འཁྲུག་ཅིང་འཇུག་པར་འགྱུར་རོ། །ཡང་ན་ཡོ་གི་ཡིས་སྤྲུ་མ་འོམ་བུ་སེང་ལྡེང་དང་། རྒྱ་ཤུག་ཙན་དན་ལོ་མ་དང་ལན་ཚྭ་བྱ་རྒོད་རྐང་མར་རྣམས་ལེགས་པར་སྦྱར་ནས་རང་གི་ལུས་ལ་བྱུགས་ན། དུད་འགྲོའི་ཚོགས་རྣམས་འདུས་ཤིང་ཕྱག་དང་བསྐོར་བ་བྱེད་པར་འགྱུར་རོ། །ཡོ་གིས་སྤྱོད་པ་རྩོམ་པའི་དུས་སུ། ཀུ་ཀུ་ར་ཙ་མི་ཡོང་བར་བྱེད་ན། སྦྲང་རྒོད་བུ་རམ་འབྲིའི་ཀླད་པ། ཁྱི་སྦྱོར་བ་བྱེད་པའི་དུས་སུ་ཁྱི་མོའི་སྟུ་བཀབ་ལ་ཕྱིང་པ་སླན་ཏེ། དེ་ལ་ཁྱིའི་ས་བོན་འཛགས་པ་རྣམས་འབྱར་བ་འོང་སྟེ། དེ་བཀོག་ལ་གོང་གི་རྫས་དང་བསྲེས་ནས་སྔགས་འདི་སྟོང་ཚོ་བཞི་བཟླས་པ་ལུས་ལ་ཅོ་ཅོར་དུ་བསྲེལ་ལོ། །ཨཱ་ཙ་ཙ་ཙེ་ཙོ། ཁུང་ཁང་། ཐུས་ཤི་ཐུས་ཤི། ཧ་སེ་ཧ་སེ། ཤ་ད་མ་མ་རིལ་རིལ། ཞེས་བཟླས་ཏེ་ཁྱི་བྱུང་བ་དང་། རང་གི་རྐང་པའི་འོག་ནས་ས་སྤར་གང་བླངས་ཏེ་ཁྱིའི་ཕྱོགས་སུ་གཏོར་(༨༢)རོ། །དེས་ནི་ཁྱི་ཐམས་ཅད་མཇུག་མ་བསྒྲིལ་ཞིང་འདུག་པར་འགྱུར་རོ། །རི་ལ་བསྒོམ་ཞིང་ལམ་འགྲུལ་སྐྱེལ་མ་བྱ་བའི་ཕྱིར། ཆོམ་རྐུན་ཇག་པ་འཆིང་བ་ནི། བ་སྤྲུ་བ་རང་འཐག་ལྟེ་ཕྱེ་ཉུང་དཀར་གསུམ་བསྲེས་ལ། སྔགས་འདི་འབུམ་དུ་བཟླས་སོ། །ཨཱ་ཨོ་ཏི། ཨི་ཏན་སོད་ཡ། དེ་ནས་དགྲ་བྱུང་བ་དང་རྫས་གཏོར་ཅིང་སྔགས་འདི་བཟླས་སོ། །ཨཱ་ཨོ་ཏི། ཨི་ཏན་སོད་ཡ། བྱས་པས་འགྲོ་མི་ཤེས་སོ། །ལྕེ་ཡ་ཀི་ནན། ཨིས་ཀྲོ་ཏ་ཡཱ་དན་སོད་བྱས་པས་སྨྲ་མི་ཤེས་སོ། །ཧ་ཏཱ་ཧ་ཏཱ། མུ་ཡུ་མུ་ཡུ། ངག་ངག་དུ་དུ། ཨིས་ན་སོད། བྱས་པས་སྙིང་གིས་མི་དྲན་ནོ། །སླར་གསོ་ན། ནི་ཤ་ཀུ་རུ། ཁ་སོ་ཏྲི་ཡ་པ། སེན་མེན་ཡཾ། སུ་ཏྲི་ཡཾ་ཞེས་ཆུ་གཙང་མ་ལ་བཏབ་ཏེ་ཇག་པ་ལ་གཏོར་ན་གྲོལ་ལོ། །ཡོ་གི་ལ་མཚོན་གྱིས་མི་ཆོད་པར་བྱེད་ན། ཞག་བདུན་སྔགས་འདི་ལ་རང་ལུས་མེར་བསྒོམས་ལ་བཟླས་སོ། །ཨཱ་རྣོར་སོད། ཆུམ་བཟློག །དྲིལ་ནན་མི་སྭཱ་ཧཱ། དགོས་དུས་སུ་ས་གཙང་མ་ལ་བརྒྱ་རྩ་བརྒྱད་བཟླས་ཏེ། རང་གི་ལུས་ལ་བྱུགས། དགྲའི་མཚོན་གྱི་ཕྱོགས་སུ་གཏོར་ན་མཚོན་ཁ་འཆིང་ཞིང་ཕིག་པར་མི་འགྱུར་རོ། །ཡང་ཡོ་གི་དུ་རུ་ཀའི་དམག་དང་མིས་མི་མཐོང་བར་བྱེད་ན། མུན་པ་ནག་པོར་བསྒྲུབས་ཏེ། སྐྱེས་པ་གྲིར་ཤི་བའི་པགས་པ་ཤ་དང་རོ་བསྲེགས་པའི་དབུར་ནག་གཉིས་རྩི་བཞིན་དུ་བཏགས་ཏེ། རྭ་ནང་དུ་སྔགས་འདིས་ཞག་ཉི་ཤུ་རྩ་གཅིག་ཏུ་བསྒྲུབ་བོ། །ཨཱ་ན་མོ་རུ་ཏྲི་ཡ་ན་མོ། ཧི་རི་མི་རི་སྭཱ་ཧཱ། ནམ་དགོས་པའི་དུས་སུ་སྨིན་ཕྲག་ལ་བྱུགས་ན་སུས་ཀྱང་མི་མཐོང་སྟེ། སླར་ཕར་འཇོམས་ནུས་པར་ཐེ་ཚོམ་མེད་དོ། །འདི་ཀུན་འཇིག་རྟེན་དྲང་དོན་དུ། །ཞེས་པའི་དོན་ནི། འདི་ཀུན་ཞེས་པ་ཐབས། འཇིག་རྟེན་ཞེས་པ་སོར་བཞག་དང་ཕྱིན་ཅི་ལོག་གཉིས། དྲང་དོན་དུ་ཞེས་པ་ཡང་དག་པའི་དོན་ལ། སྐལ་བ་ཅན་གྱི་སྤྱོད་ཡུལ་ལོ། །ཞེས་པའི་དོན་ནི། སྐལ་བ་ཞེས་པ་ཚོགས་བསགས་པའི། ཅན་གྱི་ཞེས་པ་ཚེ་འདི་ལ། སྤྱོད་ཡུལ་ལོ་ཞེས་པ་མཆོག་རང་འདོད་དང་བྲལ་བའི་ཡོ་གིའི། འདི་ཡི་ཐབས་ནི་སྣ་ཚོགས་(༨༣)པས། །ཞེས་པའི་དོན་ནི། འདི་ཡི་ཞེས་པ་བསྟན་པའི་བུ་གཅིག །ཐབས་ནི་ཞེས་པ་མཆོག་དང་ཐུན་མོང་གཉིས་ཀའི། དེའི་རྫས་ནི་བདུན་ཏེ། བླ་མ་མཚན་ལྡན་དང་ཨེ་ཀ །རིག་མ་མཚན་ལྡན་དང་དྷུ་ཡི། དེ་བཞིན་གཤེགས་པའི་རིང་བསྲེལ་དང་ཏྲཱི༔ སྐྱེ་བ་བདུན་པའི་ཤ་དང་རྟག་ཏུ་ངུ་དང་ཙི་རི། དུམ་ཅིག་བནྦྷ་བཟང་པོ་དང་པན་ཙ། དྲི་མེད་ཤེལ་སྒོང་དྭངས་པོ་དང་ཚ་ཊུ། བསྟན་པའི་རང་བཙས་སངས་རྒྱས་སྲས་གཅིག་པོ་དང་ཙེ་ན། དེ་རྣམས་འཛོམས་ན་ནོར་བུ་དབང་གི་རྒྱལ་པོ་ཡིན་པ་དང་ཚ་དྷུ། དམིགས་པ་གང་འདོད་ལ་གཏད་ཅིང་། གསོལ་བ་བཏབ་པ་དང་གྷ་ད། བསམས་པ་ཡིད་བཞིན་དུ་འགྲུབ་པའི་ཚེ་ཧཱ། ནོར་འདོད་ན་རིང་བསྲེལ་ཤེལ། སྐྱེ་བདུན་ཤ །བསྟན་པའི་བུ་གཅིག་ཐོད་པར་བཞུགས་སུ་གསོལ། དར་སྣ་ལྔས་གྲིལ་ལ་གང་འདོད་པའི་མཆོད་པ་འབུལ་ཞིང་གསོལ་བ་བཏབ་སྟེ་ཚར་གསུམ་གསུམ་བསྒྲགས་ན་མི་འགྲུབ་རེ་ནི་ན་ར་ཀན། སྣ་ཚོགས་པས་ཞེས་པ་འདི་ལ་བརྟེན་པའི་ལས་ཚོགས་ཐུག་པ་མེད་དོ། །ཁྱད་པར་སེམས་ཅན་གྱི་དོན་དུ་ཆར་འབེབས་ན་འབྲུག་ཤིང་ནམ་མཁའ་མ་མཐོང་བ་དང་ཆུ་ཤིང་གཉིས་ལས་ཕུར་པ་སོར་བཞི་ལས་མི་ཐུང་བ་རེ་བྱས་ཏེ། དེ་གཉིས་རས་གཙང་མའི་ཁུག་མར་བཅུག་སྟེ། ཆར་འབེབས་པའི་དུས་སུ་དཀོན་མཆོག་དང་མཁའ་འགྲོ་དང་ཆོས་སྐྱོང་དང་ཀླུ་གཏོར་རྒྱས་པར་བཏང་སྟེ། ཕུར་པ་གཉིས་ལ་ཐག་པ་བཏགས་ལ་ནམ་མཁའ་མ་མཐོང་བར་འབྱུང་བ་ཆུ་དང་ཉི་མ་དྭངས་དུས་སུ། ཆུ་མིག་ཏུ་བཅུག་ནས་གཅིག་གིས་བསྟན་པའི་བུ་གཅིག་རལ་གྲིའི་ལྕེ་ཡིས་བཀླག་ཅིང། གཅིག་གིས་སྦྲུལ་ཤ་བསྲེག་ཅིང་སྔགས་འདི་བཟླས་སོ། །
ཧ་རི་ནི་ས་དྷཱ་ཀི་ཙ་རི་ཆར་ཕོབ་ཕོབ། ཁཾ་ཁཾ་ནཱ་ག་ར་ཙ་པན་ཙ་བྷ་རི་ཤ་ཡ་ཕོབ་ཕོབ། ཁཾ་ཁཾ་ཞེས་བཟླས་སོ། །ཆེས་ན་ཕུར་པ་བཏོན་ཏེ་གོང་གི་རང་ཁུག་ཏུ་སྦས་པས་ཆད་དོ། །གཞན་གྱི་འདོད་ཞེན་མཐའ་དགག་ཕྱིར། །ཞེས་པའི་དོན་ནི། གཞན་གྱི་ཞེས་པ་ཐེག་པ་ཐུན་མོང་བ། འདོད་ཞེན་ཞེས་པ་ཐུན་མོང་གི་སྒྲུབ་རྟགས་ཀྱི། མཐའ་(༨༤)དགག་ཕྱིར་ཞེས་པ་སངས་རྒྱས་པའི་སྔོན་དུ། རབ་ཏུ་གསང་བར་བྱུང་བའོ། །ཞེས་པའི་དོན་ནི། རབ་ཏུ་ཞེས་པ་ཐུན་མོང་གི་ཚིག་ཙམ་རླུང་ཕྱོགས་ཙམ་དུ་ཡང་། གསང་བར་ཞེས་པ་ལོག་ལྟ་ཅན་ཐེག་པ་ཐུན་མོང་གི་ཆོས་བདག་ཅན་དུ་མ་གཏོགས་པ་རྣམས་ལ། བྱུང་བའོ་ཞེས་པ་ཡེ་གདོད་མ་ནས་རང་བབས་སུ་ཆོས་ཉིད་ཀྱི་རང་སྒྲར་རོ། །འགྲོ་བའི་དོན་དུ་ཐུན་མོང་གི་ལས་བསྟན་པའི་ལེའུ་སྟེ་ལྔ་པ་རྫོགས་སོ།། །།ས་མ་ཡ། རྒྱ་རྒྱ་རྒྱ།། །།