ལྷག་པའི་བསམ་གཏན།

རྒྱ་གར་སྐད་དུ༔ ས་མ་ཏི་བ་ཏཾ་ཀི༔ བོད་སྐད་དུ༔ ལྷག་པའི་བསམ་གཏན༔ དགོངས་པ་རང་སར་གནས་ལ་ཕྱག་འཚལ་ལོ༔ གཤིས་གནས་པ་ལ་དྲན་པ་མེད༔ མངོན་སྣང་རྟོགས་ལ་སྤང་བླང་མེད༔ སེམས་རྒྱུད་ཟད་ལ་འདུ་ཤེས་མེད༔ ཅིག་ཅར་བ་ལ་བློ་དངོས་མེད༔ ཨེ་མ་ཧོ༔ དྲན་པ་རྒྱུན་ཟད་ཀྱི་མན་ངག་གིས་ཡིད་བསམ་གཏན་ལ་གནས་པར་བྱ་བ་དང༔ བསམ་པ་རྒྱུན་ཟད་ཀྱི་མན་ངག་གིས་དག་བསམ་གཏན་ལ་གནས་པར་བྱ་བ་དང༔ དངོས་པོ་རྒྱུན་ཟད་ཀྱི་མན་ངག་གིས་ལུས་བསམ་གཏན་ལ་གནས་པར་བྱ་བ་དང༔ འབྱུང་བ་རྒྱུན་ཟད་ཀྱི་མན་ངག་གིས་ཉོན་མོངས་པར་རང་ཟད་དེ་དེ་དག་གི་རྟགས་མངོན་དུ་འབྱིན་པར་བསྟན་པའོ༔ ཕྱི་ཡུལ་ལ་བརྟེན་པའི་བསམ་གཏན་གྱིས་ཕྱིའི་ཞེན་པ་གཅད༔ ནང་སེམས་ལ་བརྟེན་པའི་བསམ་གཏན་གྱིས་ནང་གི་ཞེན་པ་གཅད༔ བར་ལུས་ལ་བརྟེན་པའི་བསམ་གཏན་གྱིས་ཕྱི་ནང་གཉིས་ཀའི་ཞེན་པ་གཅད་པའོ༔ རྡོ་རྗེ་བཀོད་པ་ཆེན་པོ་ལས་ལྷག་པའི་བསམ་གཏན་གཏན་ལ་ཕབ་པ་སྟེ་དགུ་པ་རྫོགས་སོ༔ རྒྱ་རྒྱ་རྒྱ༔