སྙིང་གི་བུ་སློབ་ལ་འགྲོ་ཁར་གདམས་པ་བླང་དོར་མིག་གི་ཐུར་མ། འགྱུར་མེད་འཇམ་དཔལ་ཆོས་གྲགས།
སྙིང་གི་བུ་སློབ་ལ་འགྲོ་ཁར་གདམས་པ་བླང་དོར་མིག་གི་ཐུར་མ་ཞེས་བྱ་བ་བཞུགས་སོ། །འགྱུར་མེད་འཇམ་དཔལ་ཆོས་གྲགས།
སྙིང་གི་བུ་སློབ་ལ་འགྲོ་ཁར་གདམས་པ་བླང་དོར་མིག་གི་ཐུར་མ་ཞེས་བྱ་བ་བཞུགས་སོ། །འགྱུར་མེད་འཇམ་དཔལ་ཆོས་གྲགས། གང་ཐུགས་མཁྱེན༵་བརྩེའི༵་ཉི་འོད་འབུམ་བརྡལ་བས། གང་གི་བློ་ཡི་མུན་སྟུག་རབ་བསལ་ནས། འདོད་འབྱུང་ནོར༵་བུའི༵་དཔལ་ལ་སྦྱོར་མཛད་པ། བླ་མ་མཆོག་གིས་བྱང་ཆུབ་བར་དུ་སྐྱོངས། ༡། གང་ལ་ཁྱེད་ཀྱིས་བདག་ལ་ཕན་པའི་ངག །བཤད་པར་གྱིས་ཞེས་ཡང་དང་ཡང་བསྐུལ་ཡང་། །རང་ལ་ལུགས་གཉིས་ཡོན་ཏན་ཡོད་དམ་མེད། །བརྟགས་པས་སྨྲ་བའི་སྤོབས་པ་དལ་གཅིག་ཞུམ། ༢། འོན་ཀྱང་རྣམ་འདྲེན་མི་ཡི་སེང་གེ་ཡིས། །གང་ཟག་མི་རྟོན་ཆོས་ལ་རྟོན་གསུངས་དང་། །བྱམས་པས་རྒྱུད་བླར་ཐར་ལམ་སྟོན་པའི་ངག །དྲང་སྲོང་ངག་བཞིན་སྤྱི་བོར་བླང་གསུངས་པས། ༣། དེ་ཡི་དོན་དེ་དེ་བཞིན་གང་ལ་ཡང་། །ལེགས་པར་བརྟགས་ནས་བླང་དོར་སྟོན་པའི་ཚིག །བདེན་སྨྲའི་གསེར་གྱི་ཐུར་མ་དེང་བསྒྲེང་བས། །མཁྱེན་སྤྱན་བག་ཡོད་མཛད་ཅིང་གསན་པར་འཚལ། ༤། དལ་རྟེན་འཛིན་མའི་ཁྱོན་གྱི་གཞི་ཡངས་པོར། །ལུགས་གཉིས་ས་བརྟོལ་ལྗོན་པའི་རྒྱན་སྤྲས་ཏེ། །ཆོས་སྲིད་གཉིས་ཀྱི་དཔལ་ལ་མངོན་མཐོ་བ། །ཚངས་དབང་ལྷ་ཡི་གཙུག་ཏུ་བཀུར་མིན་ནམ། ༥། དགེ་བཅུའི་ཁྲིམས་ཀྱི་སྟོབས་རྒྱས་གཉིས་འཐུང་གིས། །ངག་བཙུན་ཉེས་བྲལ་པདྨའི་སྐྱེད་ཚལ་ལ། །བརྟེན་ཅིང་དྲང་པོའི་སེམས་ཀྱི་སྤྱོད་པ་ཡིས། །རྐང་གཉིས་ལུས་ཅན་ཀུན་གྱི་སེམས་ལ་མཛེས། ༦། དུས་གསུམ་རྒྱལ་བའི་གཤེགས་ཤུལ་ཡངས་པའི་མཁར། །ཚུལ་གནས་ཐོས་བསམ་སྒོམ་པའི་ཚ་ཟེར་ཅན། །བཤད་སྒྲུབ་བསྟན་པའི་རྒྱལ་མཚན་སྣང་བའི་རྒྱུར། །ལེགས་པར་བརྩོན་
པས་རྟག་ཏུ་སྣང་བར་འཚལ། ༧། ཡོན་ཏན་ཀུན་གྱི་གཞི་མ་ཚུལ་ཁྲིམས་ཏེ། །དེ་ཡང་སོ་སོར་ཐར་དང་བྱང་ཆུབ་སེམས། །གསང་སྔགས་ཕྱི་ནང་ཐུན་དང་ཐུན་མིན་གྱི། །སྲུང་མཚམས་དམ་ཚིག་མིག་གི་འབྲས་ལྟར་སྲུངས། ༨། དེ་ཡང་ཤིན་ཏུ་ཕྲ་བའི་གནས་རྣམས་ནས། །ལེགས་པར་མ་སྲུང་རགས་པར་གཅེས་སྤྲས་ཀྱང་། ངན་འགྲོའི་རྒྱུར་འཚལ་ཨེ་ལའི་འདབ་ཀླུང་བཞིན། དེ་བས་ཕྲ་རགས་ཀུན་ལ་གཅེས་པར་མཛོད། ༡༠། སྔོན་ཆད་ཆོས་མིན་སྤྱོད་པས་སེམས་ཞུམ་སྟེ། །སྒྱིད་ལུགས་རློམ་པས་མི་དགེར་མི་སྤྱད་པར། །དེ་རིང་ཉིད་ནས་རྩེ་གཅིག་ཆོས་བརྩོན་ན། །དགོས་པ་འགྲུབ་པོ་དགའ་བོ་བདེ་བྱེད་བཞིན། ༡༡། ཕུང་ཁམས་སྐྱེ་མཆེད་རྟེན་འབྲེལ་དབང་པོ་དང་། །གནས་དང་གནས་མ་ཡིན་དང་ཐེག་པ་དང་། །འདུས་བྱས་འདུས་མ་བྱས་དང་དུས་ཀྱི་ཚུལ། །༼མཁས་འཇུག་བཞིན་མཆན། ༽བདེན་གཉིས་བདེན་བཞིའི་གནས་ལ་ཐོས་པར་བརྩོན། ༡༢། དེ་ལ་མཁས་གྲུབ་དགོངས་པའི་ཆུ་བོའི་རྒྱུན། །སྣ་ཚོགས་རིགས་པའི་སྣང་ཚུལ་བགྲངས་ཡས་ཀྱང་། །ཟབ་རྒྱས་སྔ་འགྱུར་ཆོས་ཀྱི་རྒྱ་མཚོ་ཆེར། །མ་གཞོལ་གཞན་དུ་བསྟན་པ་འདི་ཡི་དགྲ། ༡༢། དེ་ཕྱིར་ཕྱོགས་རིས་རླབས་ཀྱིས་སྐྱོན་བྲལ་བའི། བཀའ་གདམས་མཛད་སྲོལ་དྭངས་མའི་རྫིང་བུ་རུ། ཤིན་ཏུ་བརྩོན་པའི་སྤྲོ་རྒྱས་ལུས་དཀར་ཅན། ངོམས་མེད་ཀློག་པའི་དགའ་བདེར་རྟག་རོལ་མཛོད། ༡༣། དྲི་མེད་མཁྱེན་གཉིས་ཡེ་ཤེས་ཆེན་པོ་ཡང་། །ལམ་མཆོག་འདི་ལ་བརྟེན་ནས་བྱུང་བ་དང་། །ཕུང་ཁྲོལ་ཀུན་གྱི་གཞི་མ་གཏི་མུག་ལ། །ཐུག་པར་བསམ་ནས་བརྩོན་པར་ཆེར་སྐྱེད་ཅིག༡༤། ཐོས་དོན་ཚིག་གིས་སྤྲོས་པའི་འོ་མཚོ་ལ། །བསམ་པའི་ངང་མོའི་རོ་དཀར་བཅུད་འཛིན་ན། །ངེས་ཤེས་སྟོབས་བཅུའི་ལུས་ཀྱི་རྩལ་རྫོགས་ཏེ། །ཤེས་བྱའི་མཁའ་ཁྱོན་ངང་གིས་གཞལ་བར་འགྱུར། ༡༥། དེ་ཡང་༼དོན་རྣམ་ངེས་དགོངས་པ་བཞིན། ༽ཤིང་འོན་ཞེས་པའི་ཚིག་གཅིག་དེ། །སྤྲོས་པའི་སྤྲོས་པས་ཤིན་ཏུ་དཔྱད་བཏང་ན། །སྐབས་དོན་སྙིང་པོ་མི་འཛིན་ཕྱིར་ཤོར་ཏེ། །གང་ལ་བརྗོད་པའི་དོན་ནི་མ་ངེས་བཞིན། ༡༦། དེ་བས་དྲང་ངེས་༼སེམས་ཉིད་ངལ་གསོས་དགོངས་པ་བཞིན། ༽ལྡེའུ་མིག་ལ་བརྟེན་ནས། །མདོ་རྒྱུད་ཆོས་ཀྱི་བང་མཛོད་སྒོ་ཕྱེས་ལ། །དཔྱད་གསུམ་ལུང་རིགས་དྲང་
པོས་ལེགས་བརྟགས་ཏེ། །ངེས་དོན་རིན་ཆེན་སྙིང་པོ་བླང་བར་རིགས། ༡༧། སྐྱོན་ལ་སེམས་ན་རྒྱལ་བའི་གསུང་ལ་ཡང་། །སྐྱོན་རྟོགས་རྣམ་སྨིན་མཐོང་ཆོས་ལྷས་སྦྱིན་བཞིན། །ཡང་དག་ཚད་མས་བཀའ་དང་དགོངས་འགྲེལ་གཞལ། །ངེས་ཤེས་རབ་རྙེད་རོང་ཟོམ་ཆེན་པོར་གཟིགས། ༡༨། དེ་ལྟར་ཐོས་བསམ་ཟུང་གིས་གཏན་དབབ་པའི། །བླང་དོར་གནས་རྣམས་གཞན་དྲིང་མི་འཇོག་པར། །ཕྲ་ཞིང་ཕྲ་བར་ཉམས་སུ་ལེན་པ་ནི། །རྒྱལ་སྲས་དམ་པའི་སྤྱོད་ལ་ཞུགས་པའོ། ༡༩། དེ་ལ་ལས་འབྲས་དད་དང་སྐྱབས་སུ་འགྲོ། ངེས་འབྱུང་རྟེན་འབྲེལ་བདག་མེད་བྱང་སེམས་དང་། །སྟོང་ཉིད་བསྐྱེད་རྫོགས་རྫོགས་ཆེན་མན་ངག་རྣམས། །སྒོམ་པས་རྟོགས་པ་དངོས་སུ་མྱོང་བར་མཛོད། ༢༠། དེ་ཡང་ཉམས་རྟོགས་ཡོན་ཏན་དང་ལྡན་པའི། །བླ་མ་མཆོག་དང་གྲོགས་ལ་ལེགས་བརྟེན་ནས། །རྟོགས་པའི་མན་ངག་རང་བཟོས་མ་སླད་པར། །དབེན་པའི་གནས་སུ་ཚེ་འདིར་སྒྲུབ་པར་སྐྱོལ། ༢༡། རྩེ་གཅིག་སྒྲུབ་པར་སྐྱེལ་བའི་འབྲས་བུ་ནི། །བདེ་ཆེན་ལྔ་ལྡན་ལོངས་སྐུའི་རྒྱལ་ས་འཛིན། །ཐོས་ཀྱང་མ་གྲུབ་ཡན་དུ་ཤོར་བ་ལ། །སྐྱབས་མེད་ངན་འགྲོའི་འཕྲང་ལ་འཁྱམས་ལས་ཅི། ༢༢། ཁྱད་པར་ཐེག་པའི་ཡང་རྩེ་རྫོགས་པ་ཆེ། །སྐད་ཅིག་རྫོགས་སངས་རྒྱས་པའི་ཟབ་མྱུར་ལམ། །ཡང་གསང་བླ་ན་མེད་པའི་གནད་འདི་ནི། །ད་ལྟའི་དུས་འདིར་བརྩོན་དང་མྱུར་བར་མཐོང་། ༢༣། དེ་ཡང་བླ་མར་ཡིད་ཆེས་དད་པ་ནི། །སངས་རྒྱས་དངོས་སུ་མཐོང་བའི་མོས་གུས་ཀྱིས། །ཅི་གསུང་བཀའ་བཞིན་སྒྲུབ་པས་རབ་བརྟེན་ན། །སྐད་ཅིག་འབྲས་ཐོབ་པཎ་ཆེན་ན་རོར་ལྟོས། ༢༤། གཞི་དབྱིངས་མ་བཅོས་ཡེ་ནས་ཀུན་ཏུ་བཟང་། །གཞི་སྣང་མ་འགགས་འཁོར་དང་འདས་པ་གཉིས། །གཞི་ལས་མ་བྱུང་གཞི་རུ་མཉམ་རྟོགས་ན། །གཞི་ཀློང་མ་བཙལ་ཆོས་སྐུའི་རྒྱལ་ས་འཛིན། ༢༥། ཀྱེ་མ་དེང་དུས་སྒོམ་པར་ཁས་འཆེ་བ། །ཆོས་བརྒྱད་འདུ་འཛིར་གཡེངས་ལས་ཕལ་ཆེར་དཀོན། །འགའ་ཞིག་ཅི་ཡང་མི་དམིགས་གནས་སྐབས་ལ། །སྟོང་དང་ལྟ་བ་འཛིན་ནས་སྐད་ཆེན་འདོན། ༢༦། དེ་ཉིད་མ་རྟོགས་ཆད་ལྟར་རྒྱབ་བཅོལ་ནས། །ལས་འབྲས་ཁྱད་གསོད་ངེས་འབྱུང་བསམ་པས་དབེན། །
ད་དུང་བློ་འདས་རྫོགས་པ་ཆེན་པོར་རློམ། །དོན་ལ་མ་རེག་སྲིད་རྩེའི་མུན་ལས་ཅི། ༢༧། ལ་ལས་ཐེག་པ་གཞན་རྣམས་སྤོང་བར་བྱེད། །ཆོས་སྤོང་ལོག་ལྟ་གསང་སྒྲོགས་མི་དགེའི་འབྲས། །ཐར་པའི་རིགས་ཆད་རྡོ་རྗེའི་དམྱལ་བ་ལས། །བདག་གིས་ནམ་ཞིག་སྐྱབས་ཏེ་ཕན་གདགས་སྙམ། ༢༨། དེ་ལྟར་ལུགས་གཉིས་གཏམ་གྱི་ཐུར་མ་ཡིས། །ཁྱོད་ཐུགས་རྨོངས་པའི་སྤྲི་མ་རབ་བཅད་པས། །ཆོས་སྲིད་གྲོང་ཁྱེར་ཆེན་པོར་གཟིགས་པ་ལ། །ཆགས་ཐོགས་དྲི་མེད་དབང་པོ་དགྱེས་པར་མཛོད། ༢༩། འཕགས་པའི་ནོར་གྱིས་གཏམས་པའི་རིན་ཆེན་མཛོད། །ཟབ་རྒྱས་ཐུགས་ཀྱི་བ་གམ་ཆེན་པོ་རུ། །བསླབ་བྱ་བཱཻཌཱུའི་དོ་ཤལ་སླར་བཙུད་པས། །སྤྲོ་བའི་སྒོ་ཆེན་དེང་འདིར་དབྱེ་བར་རིགས། ༣༠། ཐོག་མར་དགེ་བའི་གཏམ་གྱིས་སྙིང་པོ་ཐོས། །བར་དུ་དགེ་བའི་ལས་ལམ་རྩེ་གཅིག་སེམས། །ཐ་མར་དགེ་བ་སྒོམ་པས་ཚེ་འདིར་སྐྱོལ། །བླ་སློབ་དགེ་བས་འདའ་བའི་ཤིས་པ་སྩོལ། ༣༡། ཁྱོད་ཀྱི་དད་པའི་ཡིད་ཀྱི་ཞིང་ས་རུ། །བདག་གིས་ཆོས་སྐྱེས་བདུད་རྩིའི་རྒྱུན་བབས་པས། །རྣམ་བྱང་ཞི་བའི་མྱུ་གུ་ལེགས་འཁྲུངས་ཏེ། །བདེ་བའི་འབྲས་བུར་སྤྱོད་པའི་བཀྲ་ཤིས་ཤོག༣༢། ཅེས་པ་འདིའང་གོ་དཔོན་བསླབ་གསུམ་འཕེལ་རྒྱས་དབུས་ཕེབས་ཁར་ལྷ་རྫས་ཀྱི་སྐྱེས་བཅས་གསུང་བསྐུལ་གནང་བ་ལྟར་མ་ལྡོག་པར། སྨྱོས་རིགས་རིག་འཛིན་བརྒྱུད་པའི་བཀའ་དྲིན་གྱིས་འཚོ་བ་སྨིན་གླིང་གྲྭ་ཤཱཀྱའི་དགེ་སློང་འགྱུར་མེད་འཇམ་དཔལ་ཆོས་གྲགས་པས། རྣམ་འཕྱང་བགྲང་བྱའི་ཟླ་༡བའི་ཚེས་ཀྱི་བསེ་རུར་ཉག་རོང་ཐུབ་བསྟན་བཤད་སྒྲུབ་གླིང་དུ་སྦྱར་བའོ། །